او مستحى اعيونج
فرح خدران بخيال الجفن يدبي
يشاورني
والبوسه التجي أويه الخوف
حسبالك شعر شعبي

- شاكر السماوي
..

بعز الخريف وكل بساتينك مزهره

- كاظم الرويعي
..

ليلة بردّ والنجمات نوّمهن حچي عيوني
وغفه حتى الضوه السهران

واحنا اسرارنه مفرعات
لاشيلة ولاچلّاب

فشلة من الجرح ياروح
مابينه بعد وگفة اعلى عتبة باب


- ميثاق الهلالي
..

وشماله القره چفوفي بچة وغنه ؟

- عزيز السماوي
..

طوّل مأتم البستان
والبلبل نسى التغريد


- عبدالكريم القصاب
..

گبل ما تنطفي النجمات
وتشب الشمس حمره
وگبل ما تعرگ الوجنات
وتصير الشمس جمره
گبل ما يحلم المسجون
بطيوف الصبح للصبح والگمره
لگيته يعامل الدفان
شايل بيده تابوته
ويدور عالينزل جثته من ظهره

ـ كاظم اسماعيل الگاطع | تعريف

هاي الناس كلها أوهام
من يفرش ظلامه الليل كلها تنام
كلها أمواعدتها أحلام
بس احنه الجزانه الطيف

- حسن الترابي
..

انت عمرك
نذر چلمه وشمعة مصلوبه اعله باچر

- غازي ثجيل
..

مكان الفرح
ظل فارغ
مكان الگلب ظل شاهد عله المامش

- طارق ياسين
..

تانيناك ما رافگ جدمنه ادروب المتيهين
فكينه العمر شباچ
بلكي الله وتمر نسمه

- حسن الترابي
..

أبچي گلبي الماعرف المن يحن والمن يريد ...

- غانم الفياض
..

شفناك فوگ الگمر تتمرجح بكل عين

- كامل العامري
..

وانت جروح
مهموم الشجر من ينطفي ويه الصيف
لن شح المطر بالروح
لو هذا العمر... فتشنا بيه مجروح

- علي الشباني
..

أهيس لمن أشوفك
گلبي..
وردة ماي تشهگ
بچفي تشهگ

- مظفر النواب
..

گبلك الگالولي احبك
ماشفت بعيونهم لمعة حزن

- ريسان الخزعلي
..

رافگني
مشي العميان مثل الماي
مايندل طريجه منين اذا مو ساجيه تگوده

- حسن الترابي
..

الليل طال وبخت عنده اليروي عينه بشمس باجر
وصوتينه الصوت مايجزي الشفايف !
يادفو البين البرد والحر نريدك
وين صاير

- كاظم الركابي
..

قصيدة (اصابع جام )

دگ ناقوس خوفي وجفلت طيوفي
نار بنار طگ وماعت سيوفي
عثر ممشه الحلم ماوجد بيا عين
ذب تابوت روحه وعافني بخوفي
شلت عيني ادور بالضلام اوجوه
گد نهر الحنين اليجري بجفوفي
مانه من اول الدنيه غصن ذبلان
زنجر ماي شطي وطگت جروفي
وكبر خوفي
وبتت ويه الصبر والناس راس براس
لاطخيت راس ولنكسر شوفي
وكبر خوفي
وعرفت اشبيه مابيه
وعرفتك من هذاك اليوم مرجوحت لعب وياي
مرجحني
انه بروحي لعب واطفال ترگص
لو رگص وجه الگمر بالماي وتغني
مرجحني
بعد روحي غشيمه وتنگل الخطوه اعله سجت خوف
گد وحشة رغبتي وگد حلم دنياي مرجحني وعلمني
علمني
اسوي من الفياي افياي
وارسم لليطوف السان
علمني اصلي بصوت روحي
بغير صوت اوذان
علمني اوادد كل گلب مغشوش
وارسم للطيور اعشوش
وانطي الغابه للأنسان
يل تارس عيوني طيوف جذابه وسهر واوهام
يل ماشي اعله خاصرة الضوه ابروحي اصابع جام .

- غانم الفياض
..

سكرانين
ماندري النويا بيا درب تمشي
ماندري الحنين بيا درب يمشي
سمران وخذانة الليل
مدري بيا كتر طاح الوطن منه
ضعنه بحزن الولايات
غربة ولا فرح لمنه
طحنة من السمة على الماي
هدوة وضيّ
ورهمنة لكل حزن مفتاح
لاكينة الهوة اشراعين
وكاسرنة الشمس بالفيّ
فز بينة الضمير وصاح
متعوب الوطن ياناس
ديرولة العنب والتين فوك الكاس
ديرولة الشعر بالكاس

- حسن الترابي
..

تذكر من جنت تركض وره اهلالك
ما واحد ركض وياك
اول ماركض گدامك خيالك
وتذكر من ڰمت غنيت
شفت بكل حرگته الماي غنالك
وتذكر من بنيت امن الثلج تمثال
طلعت چم شمس ما ماع تمثالك

- غانم الفياض
..