من كالت ابوي الليله اريده
رقيه ركضت وشبكت حميده
وتكلها البقيه في حياتج
كل احنه يبت مسلم خواتج
ــــــــــــــــــــــــــــــــــــــ
تدري البنيه تنكسر من تفتقد والدها
يخنكها كلشي بغيبته وغير الدمع ما عدها
ما ترجع ايام الابو وكعدت كبل شيردها
ويا ناس المضيعه تره تحتاج اليساندها

لو راح الابو ويتم بناته
تبقه بالكلب بس ذكرياته
انه ادري الليالي امشيباتج كل احنه يبت مسلم خواتج
**
اغلب الناس امن الزمن ومن الفراك اتعاني
وهوه التعود عالجرح غير الدمع شيتاني
يالحالج ايفطر الصخر وضعج صدك اذاني
احنه خواتج للابد وحسين ابوج الثاني

انته امدلله وماريد تبجين
هديتي بدمعتج حيل الحسين
بت الغالي يالماكو بغلاتج كل احنه يبت مسلم خواتج
**
صاحت يبويه اشعطلك يالخذت كل احلامي
كل طفله يم والدها اجت وشبكت علي كدامي
من كثر نوحي وحيرتي ما بيه اشيل اجدامي
ما حسبت يمشي الابو وظلمه تصير ايامي

كلهن ركضن التمن عليه
هاي تبوس راسي وذيج اديه
وصاحن بالصبر يقوه ثباتج كل احنه يبت مسلم خواتج
**
كلهن بنات حسين اجن بفكد الابو يصبرنها
بين الخيم يمشن سوه ولو طاحت ايلزمنها
صارت تره الجان الكلب يا ناس خايف منها
العباس اجاها بدمعته وبشوكه ضل يحضنها

لا تبجين كلها وانه يمج
فدوه يروحلج يبنيتي عمج
ورقيه اتنادي لتكرب وفاتج كل احنه يبت مسلم خواتج
***
ما ينحمل ثاري الهجر للماكو منهم رده
مو ماي هذا العل درب كل عمري هذا اتبده
صاحت يبو طول الحلو شيردها ذيج الكعده
تكدر تضمد اكبر جرح جرح الكلب شيضمده

للكوفه تحن وتريد ابوها
من مسلم حميده يتموها
ودعيله تكللها بصلاتج كل احنه يبت مسلم خواتج
**
حطت اديها اعله المتن وتكلها طيبه امتونج
باجر حميده بكربله يضربوني ويضربونج
مني التراجي تنوخذ وانتي بجمر يجوونج
انه بحبل وانتي بحبل وعيوني يم عيونج

رايح تحترك باجر خيمنه
وين نروح لو ذبحو زلمنه
باجر تلهب النار بعباتج كل احنه يبت مسلم خواتج
***
تمت
تحسين الخفاجي

قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

بلغت بالحق رساله يا سفير حسينها
بيها للدنيه السلامه وبيها رفع لدينها
***.
انت يا اول حسيني يعني مرسول الالــــــه
بلغت امر الالــــــــــــه الواحد الماكو سواه
عن طريق حسين بامره والوحي ربك وحاه
كال اكمل امر جدك واتّبع نهجه وهـــــــداه
اجه بقران الرسالـــه ونهجه صار ومحتواه
وبأمر رب الجلاله وبنهج ياسينها
****.
نهجه الــــواضح نعرفه اجه يخلينه كرام
كلت مــــــا تركع ي مسلم فقط لله السلام
عيشة الحريه عندك تسوه جنات اللئــــام
موت حر ولا مذلـــه تعيشها تحت الحسام
هيج كــال حسين وصه وانه مرسول الامام
يوم حر ويا جماله ولا ذليل سنينها
*.
جيت وبمعول يمينك هدمت كـــــــــــل تاج راس
كلت بس ال الرساله للعدل همــــــــــــه الاساس
حسين واليمشي بطريقه الباقي من حدر المداس
و لا خطوط الحمره تبقه ولا حزب يحكملـــه ناس
فقط دين الله مقدس خطه الاحمـــــــــــر لا مساس
يا خليل الله بفعاله وهدم البانينها
***.
انت بالمعروف تأمر ناهي عن منكــــر يزيد
عن ظلمهم جيت ناهي كل حكمــــهم ما تريد
الذلو الناس بفعلهم واصبحـــــو عدهم عبيد
تسلطو وانت تعرفهم واللـــــي حاكمهم عتيد
كلت بالمعروف آمـــــــــــر ثابت لحز الوريد
الموت للعاشك حلاله لو نصر مسكينها
*.
الما رفض للجور جلمه هـــــــذا مو من الحسين
الما رفع للدين رايه خـــــــــــــل يعيش بلايه دين
بصوتك وذيج الكرامـــــــــــه ولا ظلام الجائرين
عليّ صوتك يالموالـــــــي وانصر اصحاب اليقين
ولا تهاب اهــــــــــل المناصب ربع مروان اللعين
يا شعار بزود شاله وزلزل صواوينها
**.

جيت وبجفك رساله تكول حي اعله الجهــــــــاد
انصروا حسين وطريقه يا اهــــــــل هاي البلاد
ولو ادري انتم وادي وانــــــه امشي بغير واد
لجن جيت انشر رساله واسمعوا ي اهل السواد
هالامــــــــــــر واجب عليكم وبوجه اهل الفساد
صاح والسيف انتخاله وهمته بيمينها
*""""""*
اليوم اتممت الرسالــــــــــــه عليهم الحجه لقيت
الدين بأحكامه واصولــــــــه فوك منبرهم حجيت
كل تعاليم الرسالـــــــــــــه ولا حرف منها نسيت
مــــــا عفت للكوفــــــــــــه منبر الا بيه وبلغيت
بلغت بس يا ندامــــــه شلون مــن وحدك بقيت
وحده لاناصر بكاله وسدت دواوينها
****.
سيدي بقصر الاماره ولا تهاب مــــن الحتوف
بلغت بالحك رساله بكل شجاعه بلايه خـــــوف
حسين دين الله علنها وخل يشوف المـا يشوف
مـــــا اهاب الكون كلـــــه وما تخوفني السيوف
حسين ثوره بوجه ظلمك واقترب وكت الطفوف
ابتده الثوره بمقاله وهز اميه بعينها
****.
ونسألكم الدعاء والتوفيق
لخادم ال محمد((عليهم السلام))
الشاعر ........حيدر كاظم الساري
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

قصيدة
﴿مسلم إنه بالحرب.... محد يواجهني من اطب﴾

هذا اربات الهواشم بالسيوف
سيفه بالجيمات بيهم كل تشوف
تشوف الكوفة العجب مثل طفوف

مسلم العباس يوم الموزمة


****
ابن قتال العرب طب بالقتال
مسلم الضرغام بملاگة الرجال
نزل بطشه عالكفر سوا المحال

هذا مسلم البطل بالحومة

****
زلزل الكوفة تربات الحسين
هذا مسلم عالحرب حق ويقين
تشرد العدوان من يخزرها عين

نسل هاشم بالحرب ويومه

****
صال بالكوفة تربات الفحول
يضرب الكفار بيهم و يصول
هذا مسلم عالحرب جن العقول

عمه حيدر بشجاعة معلمه

****

اربات من حسين هذا بالفنون
يشد لثام الحرب يعبر جنون
الاشاوس تنمحي بخزرت عيون

مسلم العباس نفس علومه

****
كلمات
عضيد هادي الصالحي
﴿ﺎللھُمۘ ؏َـجۚل لِوليۧڪَ ﺎلفَرجۚ﴾
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

نزال شور
مسلم ابن عقيل عليه السلام


عمي قتال العرب


غيمة اجيت وجايب وياي السبيل
حسين وداني حرز للكوفة
اني وحدي وابد ماعندي بديل
اعله الرسايل كل ختم بجفوفه
جيتكم احني الضلم طافحله سيل
وهالقرار بدمي ابد ما اعوفه

سرفنتها ارداني         من طفح بركاني
حسين من وداني      السفير بديني

ضهضبت وبكيفي          منكم اخذ حيفي
هاذي شمرة سيفي        دمكم يكفيني

عمي قتال العرب

ــــــــــــــــــ

هالحرب مو بس حجي لازمها روس
أطيح والدم يترس بكيعانها

بسم رب حسين نبديها وندوس
على الخطر ونحارب بعدوانها

راح ارجع خيبر وحربٌ ضروس
وبيدي اشلع بالحصن بيبانها

سيفي ذو الفقاري      تلتهمهم ناري
مسدد من الباري        والمدد بجفوفي

وما تفض اطلابة    سيفي أذب أكرابه    
والرگب بحسابة     والنزال اطفوفي

عمي قتال العرب    

ــــــــــــــــــ

أني ابو طاهر عله الحگ من اميل
مربع اخذ ثاري من عدواني
معمعة بتاري ما ألها المثيل
جمري يلهب لو عدو لگاني
اني عمي حيدرة ذاك الأصيل
والله من شارب علي سواني

فنهم يلاگونـي           ذولة التحدوني
جدحة بين اعيوني     شردو الشافوها

تيهوها مشرادهم       وعثرو بأولادهم
كلشي لا ما فادهم    سيوفهم ذبوها

عمي قتال العرب       

ــــــــــــــــــ

صعدت الغيرة وكلت نصرٌ قريب
الفتح من الله وعليه مضمونها

دخنت والروس من عدها تشيب
الحرب تثخن من تصگ اسنونها

الينجرح بالمعركة لا ما يطيب
تغمج النبلة التسد أعيونها    


من تغبر اترابها        تمطر بنشابها
تنخبط بأنسابها        تثعول بنيرانها

ينحدر عاليها        من حطام البيها
تختنگ تاليها       تكثف بدخانها

عمي قتال العرب   

ــــــــــــــــــ

اني مسلم والحرب صدري وكفاي
لما يعرف الحرب لا يندالها
اني حايكها مثل خاجيتي هاي
وخايض اني الحرب هاي اعدالها
الما يعرف البير ما ينطيلة ماي
لو دلو اعيونك تذب اوشالها

هالمراجل بينه     من علي منطينه
علمتنه ايمينه      من بدت اعمرنا

الشجاعة احساسه      والعداله براسة
جنت وي عباسه         حيدرة مغورنا

عمي قتال العرب   

ــــــــــــــــــ

الشاعر زين العابدين الشمري
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

طاح منك ما طحت من القصر
عشت مرسال الحسين ابكل عصر
____

شمس تغرب لا تطيح ولا طحت
باجر الدزك يضل راسه بطشت
لو ملحك على الموقف لو شفت
كلبك اعلي من ونينك ينعصر
____

يا صراط الكوفه يا حمل الثكيل
ما ملت والحمل لزنودك يميل
يا سلام الله اعلى مسلم بن عقيل
لان بحسين ارتباطك تنتصر
__
لقنيت الكوفه بيمانك درس
يا شعور الما يعرفك ما يحس
يا رساله اتزود وتفوق اعلى امس
يا جرح بالروح ماظن تنجبر
_

الراد يضرب ترهم بحجيه مثال
يالثكيل بفعلك اثكل من جبال
يا شديد وكاسر اخشوم الرجال
يالحدر طولك شدايد تستتر
____

على الكوفه بموقفك حطيت حد
الكلب كبل السيف يالمغوار هد
درع للخير وصرت للدين سد
رحت كبل حسين خاطر تختصر
___
انته اول دم قبل طف كربله
خير ناصر للحسين ومثله
يا مداد المفخره والمرجله
يابصير وغير شخصك يبتصر
__
#لاتنسوا_صاحب_الزمان_من_دعائكم
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4