زلزلوها المعاره زلزلوها   2
مثل ريح وطك سعف
محد بطوله وكف
زلزلوها المعاره زلزلوها
.
.
نزل بيها الموت الاحمر حارت منين المفر
قائد العام انطه فتوه الشهم  كض بيده الامر
لمهم بجف الشجاعه و ذبهم بوادي سقر
اسروب مثل الكطته فرت لو طرك جنحه الصكر
اليوم يوم المرجله
قرو طف البسمله
حاوشوها العساكر حاوشوها
.
.
رسمو الخطه سويه تقسموها اعله الحرف
يبدي بيها ابو فاضل يبدي راح امن الالف
البا بوابت عضيده النصر وياهم حلف
الجيم معناه جماعه من يطبهم جن عصف
الحا لحسين النصر
الخا خالد كل دهر
قسموها سويه تقسموها
.
.
الله يستر عينه حمره من زعل هزاها هز
شاف اخيه حسين واكف شد عليها ورتجز
الما يمل منها الطلابه اخو زينب ما عجز
ضلت الروس اتطافر وهك بيها بسيفه حز
نار وكباله حطب
يوم ابو فاضل غضب
حاوطوها الوسيعه حاوطوها
.
.
كسرو اضهور الاصايل من بالملاعب هوسو
شمر الخاجي اعله متنه صاح الاكبر و عتنو
الصعيبه تريد الاهلها وكفو لا ما قصرو
اثنين بنص جاسموها حصه حصه امن اعتنو
ذبو الشرجي شمال
لحضة الصار القتال
سابكوها المنيه سابكوها
.
.
من نزل ليث الهواشم  خيل صعدت عالزلم
شبه وي الذهب صارو فرغ من دمه الجسم
عبست اوجوه الاعادي  اخو زينب مبتسم
شد عليها لزم سيفه و شال  بالطف العلم
حسين بس عاين اله
بجفه داخت كربله
فرحوها الحزينه فرحوها
.
.
حسن صالح العيساوي

محلاها المسيه 🌷 فرحانه البريه
بحيدر والخلافه 🌷 معروفه الوصيه

.🌷... 🌷...🌷

اتريد الخلافه بالصعبه وكلافه
تقريب المسافه يم حيدر عليه

🌷... 🌷... 🌷

اثلاثه يجذنون مومثلك يصدكون
راعيها يعرفون جذابه البقيه

🌷... 🌷... 🌷

مبروك ابغديرك يحيدر اسيرك
بس حيدر اميرك ممزور هويه

🌷... 🌷...🌷

يا اول خليفه بعناد السقيفه
يوم الصعبه كيفه راعي الاوليه

🌷... 🌷... 🌷

اولها الولايه معروفه النهايه
عن علم ودرايه تستاهل تحيه

🌷... 🌷... 🌷

بالشوك ومسرات    ابعثلك سلامات
املاك السماوات   بالفرحه سويه

🌷... 🌷... 🌷

كالهاي امنياتي    يافرحت حياتي
ياصومي وصلاتي فرحانه الزجيه

🌷... 🌷... 🌷

من فوك المنابر   صرخت كل حناجر
اتنام الضماير     مرتاحه و هنيه

🌷... 🌷... 🌷

بأشواك المحبين  وي بيت الميامين
واكلوب الموالين    مسروره وهنيه

🌷... 🌷... 🌷

حسن صالح العيساوي
.
.
.
https://www.tg-me.com/hsan12

شور
.
زينب حاجت اناكه    يعباس
نار  اجفاك  حراكه     يعباس
العزيز يموت افراكه   يعباس
♕♕♕♕♕♕♕
تحشم زينب الحره اعله اخوها
سمعو صوتها اعداك اضربوها
وعلى الناكه الهزيله  ركبوها
اضربو راس الحسين وشتموها
مشت بين الشماته مهبطه الراس
زينب حاجت اناكه     يعباس
♕♕♕♕♕♕♕
تكليله يناكه شنهي  الاخبار
شنهي الصار وي حسين ماصار
اضنه اخلاف اخو عباس محتار
يسمونه الغرايب احنه احرار
تعال وشوف حالي بين الارجاس
زينب حاجت اناكه   يعباس
♕♕♕♕♕♕♕
يناكه حسين والكافل ردتهم
عمت عيني يناكه من شفتم
ما فزعو علي  من حشمتهم
مايدرون شنهي حال اختهم
يفراك الغوالي ابدا مينقاس
زينب حاجت اناكه يعباس
♕♕♕♕♕♕♕
ويا ناكه الهزيله وين منواج
وي حسين من تمشين ردناج
ما نمشي الوحدنه كلنا وياج
على شنهي تهل دموع عيناج
ادريبج حنينه وعندج احساس
زينب حاجت اناكه   يعباس
♕♕♕♕♕♕♕
على هونج اريدج لا تسرعين
ريضيلي اعله كيفج يم الحسين
شماتي جثيره و انتي تدرين
تتفرج علينه الناس صوبين
السلبو عمته والدرع والطاس
زينب حاجت اناكه   يعباس
♕♕♕♕♕♕♕
حسن صالح العيساوي

امر خدام المجالس الحسينيه
.
.
محسوم الامر باجر يشيعه
تاخذ بيدك الزهره الوديعه
بس جم يوم ونسافر
انهض لا تضل حاير
:::::-----:::::
تحضر فاطمه الزهراء بضلها
اعله مصاب الفجعها
وتهل بدمعها
تشاهد كلمن ينوح اعله ابنها
الما يغمض جفنها
مصايب مرمرنها
الخادم لو حضر مجلس عزيه
ينعه اعله السبيه
والدمعه جريه
تسجلكم بدفتر الخدمه يخدام
مـن وكت الضلع ما تكدر تنام
الاول فاجعه مـرت بالاسلام
عزيز الله نذبح بيده رضيعه
حسين نداس بالحافر
انهض لا تضل حاير
:::::-----:::::
ابوي اعله المجالس علماني
ويه مـن خذاني
بيده درساني
كلي حسين يبني لا تعوفه
يلطم وانه اشوفه
ماملن جفوفه
وكلي يبني اوصيك بوصيه
بس عاين عليه
حد يوم المنيه
خادم كون اريدك بس للحسين
بويه ولا تبطل دمعت العين
انـه مخيرك مــا بين امرين
العمر لحسين لو لحسين بيعه
كوم بمجلسك باسر
انهض لا تضل حاير
:::::-----:::::
اسمع شنهي وصتني الحنونة
متعلمه امن ابونه
من نظرت عيونه
امي البيت كله كلبته اسود
من الحد الا الحد
دمعتها عله الخد
الما فكت ولا ساعه حزنها
المصايب علمنها
ما مره اتركنها
جان الزاد مـــــن تاكل توديه
بثواب حسين حتى الماي تهديه
الفرض امي الحنونة من تصليه
تدعي الكل بشر بيها طبيعه
حسين بلا مناصر
انهض لا تضل حاير
:::::-----:::::
احنه اهواي من عدهم خذينه
ازغار مـن وعينه
عالخدمه ربينه
مجرد من قره القاري المصيبه
بس نسمع نحيبه
دمعتنه سجيبه
ربي ارزقنه هل فطره السليمه
كون الدمعه غيمه
العندك عضيمه
يلاهي دوم هـل نعمه علينه
يدعي الخادم يخلصن سنينه
حاضر بالمجلس تجري عينه
ام حسين بس هيه الشفيه
رايح تجبر الخاطر
انهض لا تضل حاير
:::::-----:::::
حسن صالح العيساوي

فدوه لحسين بنيني فدوه لحسين
صح قليلين ييمه صح قليلين
كون وياهم اهد
خاف ماتكفي الولد
:::::-----::::::
كون عدي امن الولد يحسين ميه
حتى يوفون الوعد بالغاضريه
حتى بيهم افتخر يم الزجيه
حتى ترضه ام الحسن باجر عليه
كمر واخوانه اربعه
طاحو اعله المشرعه
:::::-----:::::
الك ربيت اربعه يا يمه يحسين
ياريت مو بس اربعه ياريت الفين
مشكوره يا ام الوفه يا ام البنين
ماقصريتي لاابد عن نصرت الدين
انتي فعلاً طاهره
قدوه انتي الكل مره
:::::-----:::::
ليش اربيهم وعوفك يبني محتار
يمه جاشنهي العذر من علي الكرار
الك ربيت اربعه بالعزم وصرار
هاك احسبهم خدم لعيونك ازغار
خدم لعيونك خدم
انته بس ترضه المهم
:::::-----:::::
انه امهم افتخر بيهم يالحسين
لون ضحو للاخوه ونصرته الدين
هيج وفولي رباي وسهر الاسنين
خل تشهد عليه الناس صوبين
انه كل همي الوفه
عله حكمه ومعرفه
:::::-----:::::
شرف هذا من اضحيلك يغالي
حتى راسي بالمكارم يبقه عالي
اخذ كل تعب العمر يمه ودلالي
تالي منهم بس حزن والهم صفالي
عفيه ولدي المفخره
طاحو اعله الكنطره
::::::------:::::
حسن صالح العيساوي
:::::-----:::::
2024/5/29

يا قصيدة اقراها تشفيلي الكلب
هيه حيره و حيرت حتى الكتب
منين ابدي مادريت
مقصر وماضن وفيت .
.
وياك مايكفي الكلام وشنهي اضحيلك قليل
مال تطلع من حياتي حسين هذا المستحيل
انته ضحيت الغوالي ابلا مقابل و الدليل
من خذت عبدالله بيدك ردت مرضات الجليل
نحر طفلك قدميت
مقصر وماضن وفيت
.
ما اجازي قطره من ذاك النحر والتضحيات
حسين انته الهوه بريتي وانته سر هاي الحياة
انته باب الله الوسيعه الجنه بيدك و النجاة
يا اصول الدين انته و قبله انته و الصلاة
امري بيدك سلميت
مقصر وماضن وفيت
.
حسين حيلي انته البديه انته كلشي امتلك
اني صح ما شفت طولك لكن اني كلي الك
انته سر و صعب حلك و العرف يا مسهلك
حسين مو كلمه بسيطه بالوجوب نرتلك
بحلمي لطميه قريت
مقصر وماضن وفيت
.
يا حبيبي و نظر عيني وياك اريدنه المسير
عايش انته وسط روحي انته عايش بالضمير
حسين وياك بعلاقه و ادري باجر ما احير
شلون احيرن وانه احبك انه مو مثل الاجير
انه بس بيك اكتفيت
مقصر وماضن وفيت
.
لو تعبت اعليك ادري هذا قطره من وفاك
من ادور الكون كله حسين مامش مستواك
انته سيد الرسل كلها بيوم عاشر من نعاك
حسين جابيش انه اوفي قطره من هذا دماك
عمري اكتبلك بقيت
مقصر وماضن وفيت
.
.
حسن صالح العيساوي

حال لسان كل خادم
.
.

من اموت اشلون كلي بحالي
انـه متروسه معاصي اسلالي
.
.
محمله ذنوب الحمل كلش ثجيل
تـغرك بساع السفينه بـس تميل
اهناك مـا ينفع المال ولا خليل
راح يبره الغالي من كل الغالي
.
.
هيه حيره وما الي غير الحسين
ما تطفي النار بس دمعة العين
خن تحاسب بيش خلصنا السنين
اسنين مـــا بيهن نفع لتالي
.
.
دنيا ما تسوه وعلي صم التراب
هنه جم يوم ويجي وكت الحساب
بكيفك انته اختار جنه لو عذاب
اطلب الرحمه ورضات العالي
.
.
اليوم بيه الحيل هم عندي ولد
راح كلشي يروح مني ومـا يرد
باجر اشلون بغربتي و اللحد
يروح كل تعبي التعبته ومالي
.
.
عندي بس حل الوحيد بدنيتي
غاد ينفعني امن اموت بغربتي
مــــن ارخص بالعزيه دمعتي
حيل خايف كلشي يتراوالي
.
.
حسن صالح العيساوي

حسين خليني اكلك رايحه
لا تضل عينك عليه شابحه
خلي اخبرك مايلي
راسي عالي بت علي . خويه يحسين
:::::-----:::::
بعد روحي حسين خويه خلي اكلك سالفه
انــه اختك لا تصدك يــوم اذل لـو خايفه
عله نهجك راح امشي حسين ماني زالفه
راح اخزيهم و حكك و انه بسمك حالفه
وحك شارب كافلي
راسي عالي بت علي . خويه يحسين
:::::-----:::::
حسين خويه خلي اكلك يبو الاكبر لورحت
لا تصدك طـاح ستري بالغرب مــا دنكت
راح اذل اجيوش اميه كلمه وحده صرحت
مـن كمر هاشم كفيلي انه هيج تعلمت
الشام رايح تبتلي
راسي عالي بت علي . خويه يحسين
:::::-----:::::
انه زينب ما ادنك لا وحك راس الكفيل
خلي اكلك راح اشلع شارب البيه يعيل
و لا يهمك يبو الاكبر غير ويانه العليل
لا يكلك اطخ راسي لا تصدك مستحيل
اعمي عينه الصد الي
راسي عالي بت علي . خويه يحسين
:::::-----:::::
موش اني اطخ راسي راسي من علو النجم
افكس عيونه وغلاتك كلمن يغث الحرم
ستري ما طاح و عباتي لكن بكلبي سهم
دير بالك عله روحك سهله يحسين الخيم
مـا يهمني عاذلي
راسي عالي بت علي . خويه يحسين
:::::----::::::
بس غيابك حيل يصعب خويه يحنيلي ضهر
احنه مـن بيت الرساله احنه نؤمن بالقدر
مـــا تهمنه الدنيه كلها ولا مشينه بمنحدر
حسين خويه راح امشي دير بالك عل گمر
راح امشي بلا هلي
راسي عالي بت علي . خويه يحسين
.
.
حسن صالح العيساوي

‏مقطع صوتي من حسن صالح العيساوي

يبو فاضل يبو فاضل
.
.
ما ادري شوصفنك
انته حيدره جنك
الشارد ماسلم منك
لمن سولفو عنك
يدرونك ابو فاضل انته الغيره راعيها
هجت شردت الفرسان كافي تطرد اعليها
كلف يمعدل الميلات ومعدل سوانيها
عباس الطف نشف مايه
عباس الطف نشف مايه
.
.
طالع من بطن لبوه
تسري بدمك الخوه
تنزل عل خصم بلوه
جنه مرورت الكهوه
سيفك مايرد ضميان لمن يورد بقاده
سويها الحرب نصين ونعمين ابن ساده
تفرح بالعدد عباس تطرب لو اكو ازياده
من راد يطب ما وكفوله
من راد يطب ما وكفوله
.
.
صول وجول بالميدان
لبسهم شيل نسوان
خلي الكابلك حيران
صول ودوخ العدوان
بيس بالزلم صوبين انته الكل يهابونك
يعرفونك ابو الكلفات ما كدرو يكحمونك
موبس سيفك الصكار تكتل نظرت عيونك
لو راد الشط بيده يجيبه
لو راد الشط بيده يجيبه
.
.
شطهم ماكفه الجودك
تحود و محد يحودك
يل تشبه علي عودك
سهله طيحت زنودك
كفيت وبعد وفيت والشاهد نظر عينك
ما قصرت يالعباس من ضحيت بسنينك
انته طبعك الوكفات اهلك ما موصينك
من طبعه معلم عل نيبه
من طبعه معلم عل نيبه
.
.
صكر متوسط البيده
يفتر فره عل صيده
جفه يلوح البعيده
محد يخلص امن ايده
الشارد خبر الشارد هاي الشغله محسومه
من الرعب من الخوف ضل يشمر هدومه
كلي بيا طريقه اخلص والكافل كلف يومه
مانخلص لا هاي ابعيده
مانخلص لا هاي ابعيده
.
.

حسن صالح العيساوي

حضرنه كلشي يحسين وهلالك متانينه
.
.
المواكب و الخدم و الراية
ابيوتنه ما تخله بيها اقرايه
الشاعر و رادود اجو عنايه
الله يعلم خدمه موعن غايه
انصارك احنه و خدام بالدفتر تخلينه
.
.
حسين غيرك ماتشوف عيونه
عليك وادم كامو  يحسدونه
بغير نظره  ضلوا يشوفونه
حسين من دربك نمل  يردونه
بس احنه كدها يحسين العاذل مبجينه
.
.
سفرتك يحسين هايه وحاضره
الطير لو جه ما نحط بخاطره
ابوتنه يحسين بسمك عامره
اول هلال الشهر و اباخره
ابيوتنه بسم  الله تستقبل العانينه
.
.
سنه صار اعله الوعد يل غالي
حسين افديك العمر و اعيالي
ماكو  غيرك  انته  تارس  بالي
حته  لو  نايم   تصير  اكبالي
ماعدنه غيرك محبوب يحسين تعرف بينه
.
.
الشاعر و رادود كلمن دوره
كتب واحد يدي واحد طوره
العلك البيرغ وشال الصوره
لحسين كل اعمارنه منذوره
فدوه الك يامولاي بس كون ترضه اعلينه
.
.
حسن صالح العيساوي

ها انا العباس ادعو بالسقا
لا اهاب الموت يوم الملتقا
انه عباس . انه عباس
.
.
هذا انه العباس سبع الكنطره
اليوم اراويكم شجاعة حيدره
الدنيه تتحول عليكم اخره
كربله بيكم اخلي حايره
انه عباس . انه عباس
.
.
انه ابن حيدر علي عند المهام
النهار اليوم احولنه ضلام
انه اخو زينب درع دون الخيام
راح اعلن كربله اليوم انتقام
انه عباس . انه عباس
.
.
انـه فنان الصعايب و الثكال
انه عيدي بالعرك عيدي القتال
مال اعوف حسين لاوالله محال
انه ابن فارس مظر عندي يقال
انه عباس . انه عباس
.
.
اليوم منكم مااضن راح اكتفي
راح الفهم مثل لفت معطفي
زينب بداعت عضيدج سولفي
انتي كليله الابو كلب الوفي
انه عباس . انه عباس
.
.
خاف اقصر بالمهمه ما وفيت
انـه اشكن وي اخيي قصريت
حسين لجلك اكلب الدنيه دريت
عني بس كونك يبو الاكبر رضيت
انه عباس . انه عباس
.
.
حسن صالح العيساوي