كوم شيل الرايه
صاحت الوفايه
++++++++++
اليوم اريدك يبني تكلب كربله
تحمي الحره ييمه من البله
سيفك اعله اعداك لمن تحمله
كوم كلها تصيح يا ميت هله
يمه فدوه الاربعه . طبو اعله المشرعه
حسين هوه الغايه
صاحت الوفايه
++++++++++
هاك يمه استمع مني مطلبي
انته وخوانك فده البيت النبي
طيحت جفوفك ولا طيحت عبي
لا تخليني اذبن معصبي
الخوه ذمه برايتك . مـا تثني احجايتك
كون ولدي هوايه
صاحت الوفايه
++++++++++
انه امك يا ابو فاضل يا كمر
لا تقصر فدوه لحسين العمر
خلي بالك يم عضيدك كن حذر
ضجه سوي بكربله وما تستقر
اليمين اعله الشمال . ذبها يوليدي تعال
كض المسنايه
صاحت الوفايه
++++++++++
يبني ربيتك بديه امـن الزغر
انه اريدن بيك يوليدي افتخر
يمه باجر مـا اريدن اي عذر
فدوه يمه الاربعه الام الخدر
ما اريدن تنسبي . حره من بيت النبي
اطني يمه احجايه
صاحت الوفايه
++++++++++
من تشد العركه يبني انته هد
انـه اعرفك يبو فاضل ما ترد
جـرد الفقار و طردها طـر
عن اخييك يبني لا لا تبتعد
اخذر اوليدي الغدر . تشر جيوش الكفر
انتم الحمايه
صاحت الوفايه
++++++++++
حسن صالح العيساوي

تم ليلة الوداع
.
حيرت اوداع الهواشم حيره
شحال زينب ويه راعي الغيره
اليله ماعدها كلب
والمدامع دم تصب
:::::-----:::::
اليله كل محبوب وي محبوبه
بيها بس الحزن فـاتـح بوبه
الحره وين الشام وين ادروبه
هيه ليش بيا ذنب مطلوبه
حيل يصعب حالها
والحزن يبرالها
:::::-----:::::
اليله كل غالي يودع الغالي
اليله مـا بيها نجوم اتلالي
ليش غايب يا كمرنه العالي
العين مـا نامت ابـد لتالي
وشثكل هل ساعه
الغالي ياذي اداعه
:::::-----:::::
اليله دمعات الحزن سجابه
اليله كل غالي يودع احبابه
اليله بيها الحزن فـك ابوابه
الغالي بالدلال صار صوابه
كلف يا ناس الجرح
افراكهم ذره ملح
:::::-----:::::
مره ساعات الوداع اثكيله
خلي ابو الاكبر يودع العيله
كون مـا ينطر فجرها اليله
والمفاركه كـل هله يا ويله
ما يشوف الراحه
ما تطيب اجراحه
:::::-----:::::
اليل لو مرها يمرمر حالها
للغرب باجر تشد ارحالها
صفت مهضومه عكب كفالها
ما يعوفوها الاهل حسبالها
الكبل جان مدلله
مشت وي القافله
:::::-----:::::
حسن صالح العيساوي

محرم العشره الثانيه
.
زينب الديره الغريبه يخو زينب رايحه
تعاتب الكفال اخوها والمدامع جارحه
:::::-----:::::
سار حاديكم يزينب والحزن هل يوم حان
ردنه بس اليله راحه و نسري باجر بالاذان
حتى لو سرنه ومشينه لاكو خيمه ولا مكان
عكب كفال الهواشم مــن نسير بلا امان
مادرت مطفيه عينه ثنين ادينه طايحه
:::::-----:::::
راح طول اليوم تمشي راحه ماكو بالمسير
كوم ماعدهم شهامه وتدري ماعدهم ضمير
هيه مـو هايه المصيبه مايرحمونه الزغير
حرم واطفال ويساره الشاف قصتكم يحير
الشام بحجار اعله زينب ترمي كلها وصايحه
:::::-----:::::
حيره حيرتكم يزينب صار حاديكم حقود
ياهو حداي الضعينه من عكب ذيج الاسود
وسفه راح وياج يمشي ابن اكالت جبود
وين جفك يبو فاضل كون بس ساعه يعود
راح تكلبها عليهم هاي كلش واضحه
:::::-----:::::
دار وياج الزمان همومج ابثكل الجبال
راحت شيوخ العشيره زينب اطكها الرجال
ميسره لشام راحت حره مجتوفه بحبال
وين سيفك يخو اخيتك لحك الزينب تعال
فرق بان اعله الهواشم هسه بين البارحه
:::::-----:::::
كام حاديهن يسبهن و المدامع دم تصب
الرجال الحرب الهم نسوه مابيهن ذنب
هاي تعثر ذيج كامت داخن بكثر التعب
غيره مابيهم عليهن ناس ماجنهم عرب
مرها ياحادي اعله اخوها خلي اخته تسامحه
:::::-----:::::
حسن صالح العيساوي

الدنيا من عندج يزينب مدري شنهي رايده
وين مـا رحتي مصيبه وياج جـن متواعده
.
:::::-----:::::
.
عمت عيني اعليج زينب ماهدالج ساعه بال
مـا كدر شاعر يوصف حالج ايفوق الخيال
من عكب ذيج العشيره من عكب ذاك الدلال
كون ابو فاضل يشوفج و انتي مجتوفه بحبال
جان رديتي الاميره و فوك عرشج كاعده
.
:::::-----:::::
.
لـو صبر ايوب عندج جان لحضه مـا كفاج
انـتي دستـور المصايب حيريتي الـي قراج
ضيعيتي بيوم واحد اهل بيتج كل حماج
عكب ذلك العز وخوتج شامت اليمشي وراج
خلصيتي العمر بالهم مـا لكيتي الفايده
.
:::::-----:::::
.
الله عونج كون زينب كلبج اشلون احتمل
زينب انتي شكد عضيمه همج ابكبر الجبل
مـا شكيتي الحال مـره مؤمنه بهذا الاجل
اقل تقدير اعله زينب مضرب انتي الكل مثل
صابره انتي اعله همج و المصايب زايده
.
:::::-----:::::
.
صاح حاديكم يزينب و المحامل و المسير
جاهزات وكومي اركبي هايه لتهز الضمير
ناس مـا بيهم محنه المـا يرحمون الزغير
راح اخت الكمر باجر بالغرب رايح تحير
بالغرب لمن مسيتي كلبج الله يساعده
.
:::::-----:::::
.
بين دمعات الهضيمه بين لوعات السنين
عكب اخوتج والعشيره اليوم ماعندج معين
وين جان الحال زينب انتي هسه اصبحتي وين
جان ابو فاضل يحرسج والهواشم حاظرين
من ثكل ضيم المصايب هسه زينب راكده
.
:::::-----:::::
.
حسن صالح العيساوي

نعي للسيده رقيه عزيزة الحسين ع
.
.
دفـعـو رقيه و طيحوها
تدري شوكت من طاح ابوها
فوك الصار بيها شتموها
الما عدهم حميه مارعوها
.
.
طكها النذل والعين تدمع
كون الكفل هل يوم يسمع
جاخله الشوارب كلها تركع
ما يقبل عليها بليل تطلع
.
.
جرو تراجيها امـن اذنها
ياريت ابوها يعاين الها
تموت الغريبه بدون اهلها
حرمه وغريبه وطش شملها
.
.
ازغيره بدار و حشه ماتبوها
شجاكم يال هاشم ماتبوها
الامل يهل المحنه مات يها
مشة للشام ميسوره رقيه
.
.
حسن صالح العيساوي

بيمني السيف وابيسراي علماي
اشد احزام  وهجم راح علماي
يختي شعندج اشتردين علمي
الج وفاي لاخر نفس بيه
:::::----:::::
علم النبي وداحي الباب علماي
انه المن كبل معروف  علماي
على شاطي النهر من يرف علماي
لخلي الروس كاع تصير اليه
::::::----::::::
حسن صالح العيساوي

لسان حال السيدة زينب عليها السلام

.
.
جذب من كال شافولي خيالاي
اشلون اطلع وابو فاضل خيالاي
بضلام اهدعش من اكبل خيالاي
تلكيته وطلع حامي الحميه
.
.
حسن صالح العيساوي

زينب يا اخو زينب شافت ضيم شبعت نوح
من كد مابجت بجفاك بمصابك يهل مذبوح
.
.
كوم اختك مشت للشام ميسوره يخو زينب
الباب اخيالها ماشاف شلون اعله الهزل تركب
اعليها امصايب التمن مثل المطر صبن صب
ماترهم اسيره تروح حيل اعله الحرم تصعب
زينب بت علي الكرار راحت و الكلب مجروح
.
.
مره اطيح مره تكوم زينب من مشت للشام
و رجليها لـحد الــيـوم محترك بجمر لخيام
مـن كثر الضرب زينب مــا تكدر يخوها اتنام
و مـره تفكد النسوان مـره تـجـمـع الايتام
محتاره ابمصيبتكم مـا تدري لا وين اتروح
.
.
الخيمه التستر الحوراء شبت وين ابو فاضل
وين الجان وجعت موت وين اليسطر العايل
مـــــن ام عون يا عباس دم ويه الدمع سايل
كوم الحك عليها شوف وجها امن هضم ذابل
حل وكت العتب عباس غير العتب مامسموح
.
.
زينبكم يـهـل زينب راحــت لاكن بـيـا حــال
راحت والكلب مكسور مــا عدها فكر لا بال
من عدها الفكر مشدوه محتاره بحرم واعيال
مـحـد يفزع الزينب ويـن حسين و الكفال
زينب ويه راس حسين درب الشام راح تروح
.
.
عله الناكه مشت لشام ميسوره بكلب حزنان
ما شايف شكلها الباب اشلون بطبت الديوان
بسوك الشام من طبت بس شمات والعدوان
زينب كامت اعله الراس تلطم والكلب حيران
ام عون العقيله يبات دمعها اعله الوجن مسفوح
.
.
حسن صالح العيساوي

هاي زينب يل تكول اشلونها
ردت امن الشام زركه امتونها
.
.
صبت اعليه المصايب جن مطر
كامت امن الضيم تمشي وتعثر
من مثل كلبج  تعذب يا بشر
جنها مــو زينب تغير لونها
.
.
ردت بيا حال زينب  حايره
صارت البيها كبل ماصايره
بعينها شافت خيول الغايره
ريت فرسان الوغا يشوفونها
.
.
هاي زينب من زغرها مرمره
هم مثلها اتعذبت بس يا مره
راحت بدار الاعادي  ميسره
عميه من كد البواجي اعيونها
.
.
جايه تزور الكفلها و الحسين
تلطم اعله الراس يوم الاربعين
هاي زينب بت امير المؤمنين
اشلون  حيدر  بتك  ايبجونها
.
.
زينب الحره الاميره اتعذبت
نضربت اعله امتونها وتشتمت
زينب بصوت الهضيمه حشمت
وين هاشم خلهم ايخلصونها
.
.
حسن صالح العيساوي

يم عون شعلامج ما تردين
زلمكم وين راحت والصواوين
.
.
حكج لو بجيتي وكلبج احتار
بس انتي بقيتي بهاي الاديار
ام عون شعلامج شنهي الصار
مصايب مو بسيطه كلهن اكبار
عكب عباس اخيج عكب الحسين
.
.
عمت عيني يزينب راح عباس
راح الهيبه الج والجان نوماس
اخيج راح زينب رفعت الراس
الج ماكو محامي بين هل ناس
بس اطفال يمج و النساوين
.
.
الله يعين كلبج يــل غريبه
لان شاف مصايب مو مصيبه
كلبج شاب من ونه ونحيبه
الما يبرد ولا ساعه لهيبه
بدار العز تعوفيهم مطاعين
.
.
جنتي مدلله هسه شعلامج
لا اهلج يحره ولا عمامج
ولا بيت اليلمج لا خيامج
انتي الجان فوك النجم هامج
رايـح بيش يــا زينب تباتين
.
.
جنتي مدلله و هسه سبيه
محد ضل الج زينب تجيه
عفتيهم يزينب عـل وطيه
ضلو بس جثث بالغاضريه
بس الله يزينب هوه لمعين
.
.
حسن صالح العيساوي

نعي عن لسان السيدة زينب عليها السلام
.
.
ثلث تيام ضل جسمه رميه
هذا حسين بارص الغاصريه
تدوس اعليه خيل الاعوجيه
عرب لا غيره عدها ولا حميه
.
.
وين اهل الشيم خلها تشيله
ابـو السجاد مــا عنده قبيله
لو عنده عرب هسه تجيله
ما يكدر عله حمله عليله
.
.
وين الزلم صارت و العشيره
جا وين الشيم والعدها غيره
جيبو خنصر حسين وزغيره
هاشم وين عمتكم اسيره
.
.
حار الرمل يا بعد حيلي
يحسين يا روحي و دليلي
اخلاف الولي ياهو اليجيلي
جـا ليش عافاني كفيلي
.
.
جسم وياي وكتي شلون جسماه
بخوي الضل ثلث تيام جسماه
اما تدرون من العرش جسماه
اسمه ومصحف الله امسن سويه
.
.
حسن صالح العيساوي

عالناكه خويه اخذوني
بسوك الغرب مشوني
خويه عباس خويه عباس
فوك الرمح سمعيتك
اعليه لمن ناديتك
بعيني تصد الكيتك
خويه عباس خويه عباس
#
بس راسك الفوك الرمح يبرالي
راس الحسين يصد اليه اكبالي
لمن رحت ويه الغرب يا حالي
عميانه عيني ولا اشوف الوالي
وين الوكت وداني
بغربه ويسر خلاني
اخوي الكمر ماجاني
خويه عباس خويه عباس
#
عكب الكمر وحدي اروح بحيره
وين الوعد عباسي يابو الغيره
فوك الهزل ياخويه امشي ايسره
زينب مشت من ديره خويه الديره
بدار الغرب ميسوره
عباس شوف الصوره
راسك عليه ادوره
خويه عباس خويه عباس
#
مـا حسبت يابن علي اتخلوني
فوك الجمر عكب الولي مشوني
وانه سلالت فاطمه يدروني
بسمك يخويه ضلو ايصيحوني
رديت اسمع ردي
محد كرب يم حدي
بيمن يكافل ابدي
خويه عباس خويه عباس
#
للشام تاليها الوكت وداني
لاخيمه اليه ولا اهل يخواني
افزعلي خويه يا كمر شمتاني
بدار الغرب وسفه الزمن خلاني
بدار الغرب خلوني
من صحت ماسمعوني
فوك الجمر مشوني
خويه عباس خويه عباس
#
مسبيه سموني الخلك عباسي
وانه العقيله الما يندك راسي
يل ماتغيب وما يخيب احساسي
تدري شكلت خويه لونك ناسي
كتلي يخويه عونج
شحدهم اليسبونج
والله وحك عيونج
خويه عباس خويه عباس
#
حسن صالح العيساوي

وين راعي الغيره
والفركته اجبيره  ، الغالي عباس
.
.
اهلي شنهي اخباركم
صفت وحشه دياركم
الجانت  بخطاركم   .  ياحلات الديره
اليوم وحشه وخاليه
الكبل  بيهم  عاليه
تمشي وسفه الغاليه . مجتفه واسيره
راح اعيش بحيره
والفركته اجبيره  .  الغالي عباس
.
.
ودعت  كل  غالي
حزني ضل  يبرالي
اشلون خويه بحالي   .  ما تنام عيوني
اطفالكم ميسوره
اعيالكم مذعوره
خويه شوف الصوره  .  بالحبل اذوني
من نعوف الديره
والفركته اجبيره   .  الغالي عباس
.
.
حسين راح امن ايدي
و راح مني اعضيدي
ابقى ليش اوحيدي  .  بالغرب مجبوره
بيش المك مكدر
الخيل فوكك تفتر
خيل اميه وعسكر  .  فرن المعمروه
الما يصح تفسيره
والفركته اجبيره    .  الغالي عباس
.
.
عمت عيني القاسم
عل ترب ضل  نايم
عبدالله يا هل العالم   .  مادريت شحاله
لا معين  و ناصر
مـن اروحن باجر
حسين حدر الحافر  . سلبوها عياله.
وهم خذوها ايسيره
والفركته اجبيره    .  الغالي عباس
.
.
الحيره حيرت زينب
عـل هزل من تركب
بس تنوح و تنحب  .  هيه زينب هايه
و العقيله  شحالها
تمشي  وي  كتالها
مـن عكب  كافلها  .  ماتطيح الرايه
وما تموت الغيره
والفركته اجبيره   .  الغالي عباس
.
.
الله كـون بعونها
الغرب مي عرفونها
جـانـو  اليحمونها  .  زلم كدها وزايد
الحط ستر عل خيمه
هسه ضل  بالهيمه
هوه راعي الشيمه   .  ابو فاضل قائد
هوه مامن غيره
والفركته اجبيره  .  الغالي عباس
.
.
حسن صالح العيساوي