الخدمة وطَن تَجلي المِحن
عَالمها چن جنَّة عدَن
عالم تفاني و أيثار و عالمبدأ اتَرَبينه
—————————
نعمة الخَدمة نَحمد الله اعليها
عالم مَثالي و الفَخر ماضيها
سيد شباب الجَنّة مَتبنيها
راَعي المَجد لو يَنشّد
كل خَادم يگلهم عَبد
هذا المقام المحمود بالمحشَر إينجينه
—————————-1
حسين الوسيلة الما يخيّب عبده
حاشه ابو السجاّد يخلف عهده
يحضر الخادم من يطيح بشدّه
بهَالمُعتقد هذا وعد
بإذن الله و يحل الشَدد
و بيمنته كاف و نون أهل العلم يدرونه
——————————-2
الخادم على نهج المضوا كون يسير
عالفَطره و اليخلص تره دربه اينير
لا شَهره لا عينه تريد التَصوير
و الكامَره مَتطوره
بچف الوديعه الطاهره
تكشف نوايا الخدام و اليخلَص تگر عينه
——————————3
اليخَدم ابو السجاد ما يتغيّر
يتمسّك بنهجه و يضّد المُنكر
مثل الذي منه يفوح العنبر
بجون إمتثل لأجل العدل
ميّت لچن ذچره عدل
فوگ النجم إسمه يصير والوادم أيوقرونه
—————————-4
صمصام ذو حدين هاي الخدمة
تگدر تخليها بحياتك نعمه
و لمّن تزل بالعكس تصبح نقمه
دربين الك و بلا محك
يا وادي دلالك سَلِك
شتقرّر بهالمضمون لو شخصك يسألونه
—————————-5
شمحلاها بالمحشر يناديك حسين
يا خادم العترة چنت بالدارين
مخلص و عالمعروف ما ترمش عين
حان الأجر بعد الصبر
بأخلاصك لگلبي تَسر
باچر تطب الفردوس يالچنت حگي تصونه
———————————6
مرتجى الأزيرجاوي/ بغداد
١٣ شوّال المُعظم ١٤٤٤ هــ

لا تكتب شعر ودگول لحسين
لتخلينه نحچي وتسمع الناس
المو يم القضيه وأصل عاشور
لا عقله يتعبه اويوجع الراس
الما فاهم حسين منين لاوين
ماعنده ضمير بفهم الأحساس
الكل قصده يأذي ويجرح الغير
أشجابه اعله الحسين المعنى حساس
سهمك لا تصوبه بگلب اليصيح
حُسيناً وآحُسينه الگطع النفاس
ما محتاج منك تكتب أشعار
ولا محتاج منك تجرع الكاس ؟
حسين أكبر قضيته من قلم بيد
شاعر مايفهمه الغايه دساس؟
اتعلمنه وفهمنه وصرنه نحتاط
مـا نهتم بعد للماله أي ساس
بذره أحنه أندفنه بتربته الروح
اوغذتنا الشريفه أچفوف عباس
مـن أول نشأنـه اليومـنـا هـذا
ما جـربنـه ناذي غير الأرجاس
طينتنه سليمه اواضحه اهواي
ما عـدنا حـقـد لا عـدنا وسواس
ما نكتب شعر ونصيره للقوس
أفعالك ماهي عدنه عدنه قسطاس
منبعنه طُهر من طين أبو تراب
ما تنقاس ؟ بالك بينـه تنقاس


#ام_علي_الشمري

أول مرة صحره
ذرّه تحاچي ذرّه
سـرّ وما نفسَره
بوادي الغاضريه
——————
روايـه و هذا مو إلهام شاعر
ولا عاطفه و تحريـك المشاعر
وهَب ربنه لتُراب الطفْ عناصر
على كل الأرض حگـها تفاخر
دونـك هالروايه
عن زَين البرايه
خصها بهالمزايه
گال أطهر وطيه
——————١
روابـيها گبل خَلق الوسَيعـه
انحنت و تواضعت للرب تَطيعه
جعَلها الباري للبائـس شفيعه
هدية انطاها جسم أبن الوديـعه
أطهر بُقعة صارت
بيها الدنيا حارت
بحسين أستنارت
چان أثمن هديه
———————٢
مرابعـها حچت و بلا تباهـي
آنه الوادي المقدس هذا جاهي
كليـم الله هُنا من عُمق فاهـي
سمع مني صدى الصوت الإلهي
بگاعي هذا طلسَمْ
ربـي وحده يعلمْ
ولدَت عيسى مريمْ
هاي أشرف عَطيه
——————-٣
بگيت اتلّهف و أحسب ليالـي
مضت بالحسره أيامي الخـوالي
حنين الأم على حسين و مقـالي
شوكت دمك يطهّرني يـغالي
كل عام اليُمرني
حسراته تجرني
يا يوم و تسَرني
يا روح الزچـيه
———————٤
صبَرِت أعوام مهجوره و حزينه
كل ذره تصيـح حسين وينه
لحظه و لن ابو اليمه و بنينه
اجاني و نوّخ احمول الظعينه
رحبَت بقدومه
شاركته بهمومه
يدري بگاعي يومه
مكتوبة المنيه
———————٥
من شهر المُحرَّم ثاني ليـله
گصدني أبن الذي يحمي دخيله
فخـر هذا الفخـر ما صح مثيله
شرف لو داست ترابـي العقيله
زينب شرفتني
بيا حاله اجتني
لمّن شاهدتني
حسّت بالرزيه
————————٦
گرب عاشور و العـالم تغير
شَعرت برهبة من شدّة المنظر
بدت نار الحرب تشتـد و تسعر
هناك ولن بگه وحده ابو الأكبر
أمر الله ترتّــب
جسمه بدمْ تخضّب
مطروح و تسلّب
من گوم آل آميه
————————-٧


مرتجى الأزيرجاوي / بغـــداد
٢٣ ذو القعــدة ١٤٤٤ هــ

الإمام علي ع

أبوذيات جديدة لمولاتي فاطمة العليلة


طگ گلبي على اغيابك علي مر
يبويه الـزمـن ما يرحم علي مر
گلتلي لـو ابـو فـاضل علـي أمر
أشــو لا عــم رجــع لا خي إليه


گلـتله الظـعن لا تحــركه دمـهله
صـبغ جفني وجره عليكم دمهله
أحسـاس الما يـرد منكـم دمـهله
يگلي اهناك تجـري اعله الوطيه


اعله باب الدار أتنـطّر أمــل لـي
أبوي حسـين ما ميــت أمل لـي
أريــد ابــآخــر ايــامــي أمــلـي
أشبــع ناظــري وتـلفــي المنـيه


الگلب يا حـيل يـبـقاله ويـتــني
يبويه حسـيـن نيرانـك ويـتــني
وحگ البس حـرم ردت ويتــني
إلك حـنيـت والريــحـة رقــــيه


#ام_علي_الشمري

الى سيدتي فاطمة بنت
الإمام الحسين عليه السلام
………………………………..



رحتـوا بظَعينه
من المــدينة
مثل السفينــة
حيــن تسير
يَوليانـي و يَـخَواني
ولا منكم خُبر جاني
——————————
مشَيـتوا بالرواحـل و آنه أصّد الكم
أحس بروحي طلعت وَي قوافـلكم
مثل طيـف اختفيتوا عن منازلـكم
و بگيت اتلّهف لوارد رسايـلكم
گلبي بوصـاله
راسم خيالـه
ما من رساله
شلون ايصير
ولا قاصـي و لا دانـي
و لا منكم خُبر جاني
——————————١
رجعت لدار صبري و الحزن خيَّم
اطش حزني بزواياه و يرَد يلَتم
ابـوي الچان وجهه للجرح بلسـم
رحل عـني و تركنـي لنايبات الهمَّ
تارك علامه
حلو الجهامه
بدار الإمامه
بدره اينير
غريبه و آنه بَوطانـي
ولا منـكم خُبر جاني
________________٢
يجن ليلي و مرار الوحشه يعصَرني
و نجوم اللامعه بأهلي تذَكرنـي
صـوركم ساكنه ابالي و تمَرمرني
(ألم نشرح) أرتّلها و تـصَبّرني
مصحف نياحي
رتّل جَراحـي
و آية صباحي
بهالتفسيـر
تفَسّر مُجمل أحزاني
ولا منـكم خُبر جاني
——————————-٣
نشاشيب القهر كل ساعة ترميـني
و اشاگفها بشمالي و مـره بَيميني
ردت (آصف)زمانـي هسّه يلفيني
لأبو السّجاد و عيالـه يوديــني
محد حضرني
بچلمه يسرني
همَّي كسرني
يَهـل الخيـر
عليله و منهو يرعاني
ولا منـكم خُبر جاني
———————————٤
علامات الفجيعة گبالي تتكـرر
شفت أم البنين بهمها تتحسّـر
تگـلي اليوم أحس هالعالم أتغير
عسه بعيد البله عنك يبو الأكبر
أم الشـبيبه
تخفي المصيبه
بحاله عجيبـه
و هالتفكير
نذير الغربـة نادانـي
ولا منـكم خُبر جاني
———————————٥
مرتجى الأزيرجاوي
٢ المحرّم الحـرام ١٤٤٥ هــ

قصيدة ( أولادك تاهو يا مسلم )


أولادك تـاهـوا يا مسلم
وامهم تجري ادموع العين
مـذعورة  و  تصرخ يا الوادم
 محد شاف أطفال اثنين

*             *             *            *            

يامـسـلـم عن حال اولادك
 أرويلك أفجع أخبار
چـانـوا بأرض الطف 
وشافوا مصرع فتيان المختار
شـافـوا غـارات الخياله
 كلما حل بالطف و صار
شـافـوا  فزع العسكر لمن 
عالخدر هجموا صوبين

*             *             *            *            

دوية  خيل و من كل جانب
 تهذي بصولات الفرسان
مـا ظـل صـيوان او لا مضرب
 إلا و شبت بي نيران
و  هـنـاك  أطفالك يا مسلم 
فرت بفجوج الوديان
تـتـعـثّـر بـطعوس الغبره
 ما تعرف تتوجه وين

*             *             *            *            
لـيـل  انهار ادف بالممشى
 و تصحبها اهموم و الآم
مـا تـدري اليا صوب اطوح
 بيهم ركبان الأجذام
لـن  دخلوا حارات الكوفه
 و صاروا بين ايد الظلام
و  بـسـجن ابن زياد الظالم 
سجنوا بالكوفه الطفلين

*             *             *            *            
بـالـسجن المظلم و اتجهوا
 للرب و اخذوا يتعبدون
أشـبـاح الموت اتراودهم
 شنهو اليحصل ما يدرون
بـهـالـموت و لن دارت الهم
 من ذاك السجان اعيون
لـن  الـسـجـان يشاهدهم 
ويه الخالق مشغولين

*             *             *            *            
مـا بـيـن الساجد و الراكع
 مسجونين بلا أسباب
حـن  قلب السجان اعليهم
 ناشدهم و يريد اجواب
انـتـو  مـن انين و من يا ديره 
تنسبون اليا أنساب
قـالـوا  احـنا انعود المسلم
 لو رايد تعرفنا من انين

*             *             *            *            
عـاصـف لـوعه بقلبه اتهيج 
و اتغير حال السجان
صـاح آنا اتعذر عن كلما
 صادر من عندي و ندمان
بـيـش  اتـعذّر يوم المحشر
 باجر من سيد الأكوان
لـو عـاتبني و گال أطفالي
 بسجنك كانوا مسجونين

*             *             *            *            

أخـرجـهـم بالخفيّة و لكن
 طلعوا مدهوشين البال
يـتـخـطـون ابلفح البيده
 شايلهم موج الأهوال
لـمـن  أتـعـبـهم ممشاهم 
ناموا مهضومين الحال
نـومـة  مـن  يترجى المامش 
مهمومين او مكسورين

*             *             *            *            
شـافـتـهم حرمه و أخذتهم
 للمنزل وياها اضيوف
لـن  صـاحب هالدار الظالم
 ساورهم بغيوم الخوف
و زوجـة هذا الغادر تصرخ
 اترك هالطفلين اضعوف
لـيـش اتـلـطخ ايدك من دم 
هالأطفال المحرومين

*             *             *            *            
بـاتـوا لـيـلـتـهم بالمحنة
 من بيّن وجه المصباح
يـم  شـاطـي الجدول وداهم
 هذا الشرير السفاح
سَـل  الـسيف و آمر عبده
 هالطفلين اذبحهم صاح
هاك السيف و روح اذبحهم
 يا عبدي و جيب الراسين

*             *             *            *            
هـم عـبده اتهّيب هم ابنه
 رفضوا أمره و ما طاعوه
و الـنـوب بـنـفـسه اتعناهم
 هذا الغَدّار المعتوه
سـل  سـيـفه  و رايد يذبحهم
 لن هالطفلين ينادوه
ارخـصنه انصلي الوجه الله
 و ندعوا المعبود بها الحين

*             *             *            *            
صـلـوا لـلمعبود بمدمع
 يقطر عل الوجنات ادموم
دعـواهـم  يسمعها الباري
 يسمع دعوة كل مظلوم
صـاحـوا بـين الظالم احنه
 احكم يا رب يا قيوم
سـيـف الـظالم يتنطرنه
 و إحنه أطفال و مظلومين

*             *             *            *            
اتوجه  صوب الطفل الأكبر
 حز راسه بسيف الأحقاد
مـن حـز راس الطفل الثاني
 بالجدول ذب الأجساد
شـال  الـروس وياه و مسرع
 راح المجلس ابن زياد
كـل ظـنه اعلى المال ايحصّل
 لنه ايضيع دنيه و دين

*             *             *            *    

التـراث الأصـيل ( جابــر الكاظمـي )
      

(الى سيدتي أم البنين عليها السلام)
…………………….


بوابةُ العطاءْ
فريدةُ الوفاءْ
كهفُ السَخاءْ
غيثُ السَماءْ
أميرةُ النساءْ
——————-
هاي الوفيه الما نَعد فضلها
أم البنين الما شفت مثلها
باب العطايا لو فرد سألها
لا ما ترده و الكرم أصلها
سخيةُ اليَدين
عَاشقةُ الحُسين
قُطب الندىٰ
أم الهُدىٰ
قرينةُ السخاء
——————-1
مو عجبه صارت عالنسه أميره
و حيدر بعلها الما يصح نظيره
تقوى و علم منه خذت بصيره
تشبه علي بوكت الشدد مُجيره
حَليلةُ الأمير
عطاؤها غَفير
ذا بَدرها
لـقَدرهَـا
ينذهلُ البهاء
———————2
بحر الكرم لا ما يجف نبعها
من أم ابيها أستلهمت طَبعها
لــذكر الزچيه ينحدر دمعها
أقسم عليها بفاطمه و ضلعها
إن أذرفَ الدمُوع
لحَادث الضَلوع
لِدَمعِها
و ضِلعِها
قَد جادت السماء
———————3
چفها سحابه و تَمطر بغزاره
توَزع موائدها على الحَياره
موضع گبرها لو رحت مزاره
أقسم عليها بالفَده يساره
ذا قسمٌ عظيم
بإبنها الكرَيم
بكفهِ
بِعَطفهِ
بذلك اللواء
———————4
للنخوة صارت جامعه عظيمة
كل قسم منها جوهرة كريمة
لو حاجة عندك اگصد الحليمة
اقسم عليها بشهگه اليتيمه
بطَفلةِ الشهيد
شهيدةِ الوريد
أعَني هنا
أمَ الدُنا
رُقيةَ الأباء
———————5
يا سامعي لو ضاگت الوسيعه
أقسم عليها بمحسن الوديعه
ام البنين لدعـوتك سـميعه
لو تدعي بحسين ونحر رضيعه
بمَنحر الرضيعْ
يا كوكب البقيعْ
سيدتي
أمُنيَتي
أن تسمعيَ النداء
———————6
مرتجى الأزيرجاوي / بغداد
١٤ جماى الآخرة ١٤٤٤ هـــ
٦ كانون الثاني ٢٠٢٣ مــ

ليلة الخامس من المُحرّم الحرام
ليلة سفير الإمام الحسين عليه السلام مسلم بن عقيل عليه السلام
…………………………..



مسلم ينادي حَسين نسمع ونينه
خانت عهدها الگـوم رد للمديـنه
—————————————-
لمّن اجيت أحشود كلـها تَودني
للبيعـة مَتلهفيـن تالـي تضَدني
موقف يهّد الحيل بس الضَهدني
ما أدري هالأوباش تخفي الضغينه
————————————١
فجـر الأجل من لاح مَطلع صَباحه
جـيش استعد جراّر لوّح رِماحـه
صدري لضراب السيف حس بأنشراحه
فرصة الطـراد و هاي فرصة ثميـنه
———————————-٢
نقضَت ذِمـام أعهود هالكوفه بيه
وينك يبو السـجّاد دارو عليـه
وحـدي اصّد غارات گوم آل آميه
و لا من كمي و فزّاع ينغَر علينه
————————————٣
طوعه تگـلي حسين وينه يَمسلم
وين النفل عباس هالساعه يهَجم
حشّم يبعد چلاي حيدر دَحشّم
و الينخه حامي الجار لا شك يعينه
————————————-٤
أهلي يطوعه ابعاد و الدنيا جارت
دور الرمش عالعين عالعتره دارت
يا حره شتنشدين هالنكبة صارت
عمّي بأرضكـم هاي طبروا جبينه
————————————-٥
لن كثرت الجيمان خيل و كتايب
مسلم وحيد هناك وحده يحارب
نصبوله حفره و طاح ابن النجايب
شبه الأسد مغدور و مگيدينـه
—————————————٦
طب للقصر مأسور ضامي الحشاشه
رغم الأسر و الزود لا ما تلاشـه
يحضر اله تمنيت ساگي العطاشه
يسگي دليله الذاب و يفك يَمينه
—————————————-٧
لن الدعي أبن زياد أمَـر عبيده
من القصـر دفعوه و أنحز و ريده
بين السكك جروه ضنوه حميده
هذا جَـزه الأحسان گطعوا وتينه
—————————————٨
مرتجى الأزيرجاوي
٨ ذو الحجّة الحرام ١٤٤٤ هــ

قصيدة الأولاد مسلم إبن عقيل ع


مسلم بــأولادك مــا تــدري

****
منين أبـديلك مسلم وأشرح
مــن يا قـصة وكـلهن تجرح
موت اونــار او ظالم يــمرح
جمه مصايب كسرت ظهري
****

يـوم العاشـر يـوم امصيـبه
شيب راسي الما بـي شيبه
من ذبحوا بالطف الهــيبــه
ونهـران الـدم منهـم تجـري
****
بعد الـمذبـح صــال اعلينـه
جيش الكُـفـر او روع بينـه
او مـاعدنا الوالي اليحمينه
ريـت اوياهــم حزوا نحـري
****
أطفالك ضـاعوا مـن عنـدي
فوگ مصابي ولوعة چبدي
ماظلوا من خــوف ابسـدي
من نهـبونه وسلبـوا خـدري
****
محمد وبـراهيــم أنـفقــدو
فزعـوا من الصار او شردو
ما أدري اليا ديــره أبتـعدو
بخيـر اوشر صارو ما أدري

****
دورت اعليــهـم والــزهــره
بيــن النـار او بيــن الغـبره
مـاحـصلت الـولـدك گـمـره
طفلينـك زادولـي ابجمـري
****

✍️ #ام_علي_الشمري

على لحن قصيدة الحاج باسم الكربلائي
(يحسين أگعد شاهد حالي)

كتبت اليوم 5 محرم الحرام 1445 هـ
24/7/2023 مـ

قصيدة المسلم إبن عقيل ع

للكوفة دزه احسين ياخذ البيعه
غــدر وكـُفـر لذمـام مسلم تبيعه

****
للكوفـه دز حسين مسلم سفيره
ايشوف الوجوه أهناك منهو نصيره
لمن دخل كوفون حاطته حيره
شاف الوجوه اشكال جدًا مُريعه
****

ظـل السفير ابحـال المـن يناشـد
شاف الوجـوه أتميل عنه وتباعد
وين الوجه ينطيه ما جاره واحد
حاير يصب العيـن مسلم يشيعه
****

صبت اعيونه اوصاح أرجع يمولاي
محد يريدك عـود من جيتك هاي
باعت ذممها الناس ويـزيـد شراي
لتكمل ابمسراك يبـن الوديعه
****

من مسلم المغدور ثقته وسفيره
مرسالي يوصل ليك رد بالمسيره
لا تدخل الكوفـان كلـش خطيره
أبعثلك او أرجوك رد بالوسيعة

****
دمك تريده الناس مو أنتَ يحسين
رد بالظـعن مــولاي لجـل النساوين
ماهن حمل لوعـات ومهامل العـين
خوفي تجي وتشوف نار الفجيعه


✍️ #ام_علي_الشمري

كتبت اليوم 5 محرم الحرام 1445 هـ
24/7/2023/مـ
على طور ثلاث دگات

ملا علاء الكاظمي

قصيدة مذخور الهاليوم يبني

لشهادة مولانا شِبّلُ الحسن المجتبى "ع"


مـذخــور الهالـيوم ** يبني
وصــاني المسموم ** يبني

يا جاسم لحسين ** يا جاسم لحسين

****
ياجاسم يوليدي أسمعني
شراح أحچي وشنهو المضمون
وصاني الوالد يا يمه
ومني أسمع ياضي العيون
بعمك وصاني يوليدي
او صراها گليبي المحزون
گلي الهذا اليوم أذخرته
يوم الطف وحچيله شلون
لحسين أفديهم كل ولدي
والغالي اعليه لا تغلون

لو حاير والگـوم ** يبني
نيَّتـها المــظـلـوم ** يبني

تفديه نور العين ** يا جاسم لحسين

****
گلبي البعدك ما يتحمل
يا ثمرة رملة البعدين
بس اوصيّة عودك أوجب
نرخص يمه ويغلى الدين
لابد لجل الدين انضحي
ونتبع أسلافك بالزين
لا تهتم الدمعة أُمك
خل كل همك يم حسين
وأمشي بمنهج من وصانه
منهج عودك والطيبين

أنــصـر هــالـمحــروم ** يبني
اوضحي الدمه أدموم ** يبني

تفوز ويه الماضين ** يا جاسم لحسين

**
روح العمك وأفديه دمك
وحچيله الگتلك والصار
لــو مـا يقبل منّك تطلع
للحرب وبيدك بتار
تنطيه هذي وصيّة عودك
لا ترجع والموت أختار
بيض وجهي أگبال الزهره
وأگبال الـعتره الأطهار
لتخيب ظن أمك جاسم
ورفع راسي ويه الأنصار

ماريــدك مــهــزوم ** يبني
ترجعلي او مهموم ** يبني

ياسورة ياسين ** يا جاسم لحسين

****
روح وفرح گلبه العمّك
خل ايشوفه بوجهك نوره
ايشوف المسموم الما حاضر
من تفزعله اتبيّن الصوره
لو حاضر ميعوف إبن أُمه
ميعوفه الناس المأجوره
ينطي الروح او ما يتردد
لا تتردد وأخذ ابشوره
رباك الهالساعة او رايد
يوم العاشر تاخذ دوره

طب وبسيفك حوم ** يبني
چن ابحــر اتـعــوم ** يبني

لتخـاف ولتليــن ** يا جاسم لحسين

****
من تدخل علمهم بأسمك
ياهو إنّــتَ وشنهو اعلومك
خل الما يعرف منهو إنّـــتَ
بالطف يحفظ كل أرسومك
گلهم جـدي الأكبـر طــه
وحيدر جدي تغيض أخصومك
گلهم إبن السبط الأول
راويهم بالظهر أنجومك
خليهم يومك ما ينسوه
يوليد وختفيض أدمومك

باچر هذا ايدوم ** يبني
تثّبت بيها الزوم ** يبني

فدوه التعب أسنين ** يا جاسم لحسين

****

✍️ #أم_علي_الشمري

كتبت 7 محرم الحرام 1445 هـ
24/7/2023/مـ
لأحياء ذكرى مولانا الحسن بشهادة ولده القاسم ع اللهم تقبلها ببركة مولانا الحسن وولدهِ عليهم السلام

يَبن الأطهار لأجل الثآر
صوت الحكَـ ينادينه
دِمْه الكرار و المَسمار
و جروح الحسن بينه
نسحگ جيش أبن زياد
غايتنه الإستشهاد
دِمْه الكرار و المَسمار
و جروح الحسن بينه
—————————-
صفوة و فرسان المعمورة
و صرح الدين إيريد إبطال
تكتب بالدمْ هالمنوال

ترسم للحق أوضح صورة
و تثبّت معنى الأستبسال
بيوم الشده تهز أجبال

شح الناصر و احنه أنصارك
هالميثاق المتواصل
عفنه اديار و عفت اديارك
حتى نقاوم كل باطل

عهَد مرسوم يا مظلـوم
ما نترك صواوينك
قسم هاليوم يا جيدوم
بالحومه نگر عينك
من ساعة الميلاد
غايتنه الإستشهاد
دِمْه الكرار و المَسمار
و جروح الحسن بينه
—————————١
دم الطَبره و ضلع الزهره
عاشن ويانه بكل حين
يابو الأكبر هالثآرين

و دمْ الچبده بسَمّ متوجره
ثآر اعضيدك ها يحسين
منتظرينه صار اسنين

اثلث ثآرات انطالب بيهن
مَتهمنه اعداد العسكر
ثار اسلافك ما ناسيهن
يبن المُرتضه حيدر

قَسم يا حيد جيش إيزيد
لو خيط الفجر أسفر
بدرها انعيد إيد بإيد
نخسف موكب العسكر

وقعة بدرْ تنعاد
غايتنه الأستشهاد
دِمْه الكرار و المَسمار
و جروح الحسن بينه
——————————٢
(إبن القين) و ضنوة ظاهر
(و الطرماح )ايصيح بصوت
ويهَ حسين شمحله الموت

(و قاسط) هذا الحُر الثائر
صاح اليوم إعله الطاغوت
ننزل غضبة امن اللاهوت

(رافع) للمصرع يَتأهب
يصرخ وينك يا أسلم
سِل بتارك انته و شوذب
باجر كون نضحّي الدم

سَعيد يصيح مثل الريح
صَرْصَر لو نشن غاره
دمانه تسيح حين نطيح
نكتب هاي الِبشاره

ومن توگع الأجساد
غايتنه الأستشهاد
دِمْه الكرار و المَسمار
و جروح الحسن بينه
—————————-٣
بليل العاشر يأبو اليمه
تطلب من عدنه نخليك
وحدك و العسكر يوليك

بينه اشتعلت نار الهمّه
باچر بالحومه نراويك
نبذل دمنه ومَا نوفيك

واحد واحد نفدي المنحر
ضنك لا ما يتخيّب
كل أنصارك يابو الأكبر
تطلب منك هالمَطلب

گبل لَتثور عالديجور
گبلك نرخص دمانه
نضحي انحور وبعاشور
كلمن يلبس اچفانه


باچر عند الميعاد
غايتنه الأستشهاد
دِمْه الكرار و المَسمار
و جروح الحسن بينه
—————————٤
بهاي الدنيا احنه اصحابك
بيوم الرجعة وَياك انعود
هم تقبلنه انصير اجنود

نسجد يحسين اعله اعتابك
بهالسجدة نطيع المعبود
و نحارب جيش النمرود


أول معصوم انت الترجع
من بعد المهدي القائم
دولة عدلك عنها اليسمع
يتمنى بحكمك خادم

تَرد للناس يا نبراس
بدولة عدل للملّه
تَسن ناموس و العباس
هو قائد الدولة


و هذا العهد ينعاد
غايتنه الأستشهاد
دِمْه الكرار و المَسمار
و جروح الحسن بينه
—————————-٥

مرتجى الأزيرجاوي
٦ المحرّم الحرام ١٤٤٥ هــ

كفايه نظلم العباس
بس عَالمشرعه انذكرَه
وندري بأسمه مايخفه
فقيه و عالِم العتره
—————————
ناموس الشَريعه ايگول
أنواع العلِم عَلِمين
علِم من الله تكتسبه
و علِم مأخوذ بالتدوين
لچَن جدام ابو فاضل
حيارى و نبگه محتارين
سرَّ وما شخص بالكون
فسّر جزء من سرَّه
———————-١
لو نفرض گمر عدنان
عَلِم رباني يمتلكه
مو عَجبه لأن ذاته
طهوره بَعوده مشتركه
واذا رايد بعد حُجّة
و حگ بيت العلي بمكه
نسخة حيدر و شفناه
من حامي الحمه گدره
————————٢
مقامه بالوصي مقرون
اذا يالسامع اِتجهله
ابوه باب العلم ونگول
أخذ من علِم ابو الحمله
بحر تتلاطم اعلومه
لُغز ما واحد اِيحلّه
بچفوفه منبع الحكمه
و كنوز المعرفه بصدره
————————٣
خصاله لو نعددهـن
فضايل حيّرن هالناس
مثال الخوّه و الايثار
للغـيره صبح مقياس
الف من حاتم الطائي
اذا يتقارن بعبــاس
شلون الذره يا وادم
نقارنها بألـف صحره
————————-٤
عطوف اتشوفه عالمؤمن
لچَن عاليعتدي بركان
هَلـوع بخطة المحراب
جَسور بساحة بالميدان
تشهدله الحرب بالطفْ
من كر مُهره عالجيمان
لسبـاع الفله بسيفــه
مدّ إعله الثره سُفره
—————————-٥
رسم عالمشرعه لوحة
بجروحه خط أجل منهاج
بدر و انخسف بس نوره
نشوفه بالسمه وهّاج
ما شفنه گمر گــبله
صريع مگطّع الأوداج
لو ما القدر چا بالسيف
يمحي العسكر بأسره
—————————٦
الك انقل بعد موقف
عگب ما دفنوا الاجساد
وصل يم الگمر حاسر
سمعنه بـزينة العُباد
على الدنيا العفه بعدك
يصيح بدفنته السجّاد
قبّل يمنته المعصوم
و قبّل يَسرته و نحره
—————————٧


مُرتجى الإزيرجاوي / بغــداد
١٤ ذو القعدة ١٤٤٤ هــ

قصيدة لا تشتكيله الظمة ليلة علي الأكبر ع


يا علي أخفّـي العطش
يبني لتعذب احسينك
لا تشتكيله الظمه
وگليبه بالهم دمه
يبني لتعذب احسينك

****
يوليد لو رحت ودخلـت الحرُب
هاي المصيبه اتحمل او هالدرُب
ثقـل الحـديد أتحمل اوهالكُرب
ماي بخيمـنـه ماكو شح الشرُب

بس الصبر نمتلك يبني من فدوتي العينك
جفت خيمنه العذب
موقفنه يمه صعب .. يبني لتعذب احسينك

****
يـالظنــك اتـــرد للأبـــو تــرتــوي
اوهـــو بدليله النــار تچـوي چوي
مثلك ييـمه أحــشاه تــدوي دوي
أشــبيده يالأكبر هاذ حـكم القوي

لتبين الهم ظمي أجبيدك من تضرب إيمينك
بالك يحس العدو
خلّي ضربتك كفو يبني لتعذب أحسينك

****
يا سلوت أمــك يا ضمــاد الجرح
يالما لي بعدك دوه يصح اويصح
هاك أرتوي من أمك دمع يـاصبح
لا يجـف دمع أُمك اوعنك يشح

أشرب عذب عيني يبني وخل بيني وبينك
يا لبيب الگلب
اروه من اليصب يبني لتعذب احسينك

****
هاي الاخـيره او لو رحت ما ترد
يالويه جيتك شفت معنى السعد
تجرحني كلمة ماكــو الأكـبر بعد
تالي شيطيبه الجرح ياهو الضُمد

منهو اليضمد الجرح گلي ويداوي الوينك
مِنهو بـعدك دوه
البيتي ياهو ضوه يبني لتعذب أحسينك

****
يا عمد بيتي ويــا نجمـتي بســماي
خوفي تغيب النجمة وأفگد ضواي
والـعــلة تكــبر لا ضــوه ولا دواي
ولا آني ميـته شلـون وتــروه مـاي

بعدك يظل العمر حاشه وأتذكر أسنينك
ما أظل فتره أبد
وأتبعك يالولد يبني لتعذب احسينك

****

#ام_علي_الشمري

على لحن (جسام ياضنوتي )

كتبت 8 محرم الحرام 1445 هـ
27/7/2023/مـ

قصيدة نسائية

الزينـب بت علي الكـرار عيـنـن
يحبـيّــباتـها وللحـزن جـيـمــن

عيننـها العـقـيـلة وســاعـدنـهــا
اوآسـنها عالأبـن أُمهـا اومحنـها
هاي أخت الحسين الـراح منـها
تبخلـن لا ويـاها الدمــع صُــبن

المـثل أمصـابها ماشافت العـين
الشافت كربله اوذبـح الميامين
عمد ديرانها اعله التربه مرمين
دونــن والهـضيمــتـها دصيحن

ونن عالبقى مرضوض الأضلاع
إبن أمها العزيز الظل عله الگاع
الماتدري بعدها تحرسه الأسباع
لمصـابــه ومصيبـتـها دنــوحـن

صيحن وآ مصابـه وعلن الصوت
على الما چـفنوا لا شـاله تـابوت
لبو اليمه ابعزاچن گطعن ابـتوت
خــل الزهره تســمع مــن تـونـن

هاي اللي جـزع لمصابها الكــون
كلشي ابهالوجود اعليها محزون
البيه ارواح والـمابــيه يبـــچون
حـتى الحـجر ناحـلهـا او تحـنن

ما ننسه ســماها ابـيوم عاشـور
يا لون أمـطـرته الذبـح النحور
ساعة ذبحت أخــوتها و البدور
كل وجــه الســمه بالــدم تـلون


✍️ #ام_علي_الشمري


اللهم عجّل لوليكَ الفرجَ والنصر

ام علي للشمري