علامات الحزن بانت
ودموع الخلك سالت
كالو هل الهلال
الكل توشحت بأسود
وبدلو راية المرقد
كالو هل الهلال
======================
من هل والنظر صد ليه يهل ناس
سالت دمعتي ودكيت عل راس
شهر حسين هذا وشهر عباس
بيه دين الله ضل بخيل ينداس
ماضل للفرح منظر
وكلمن حَبه يتكدر
كالو هل الهلال
حب حسين يتمدد
وبدلو راية المرقد
كالو هل الهلال
======================
بهذا الشهر خلي نصفي الكلوب
ونلطم على حسين الطاح مسلوب
حسين شكد رسايل بيها مكتوب
ثورة اعله الظلم والثار محبوب
والماثار يتندم
واليسكت ولا يسلم
كالو هل الهلال
يثور وخله يتعبد
وبدلو راية المرقد
كالو هل الهلال
======================
خل نحزن يعالم والحزن زين
وخل نتعلم من ادروس الحسين
من قدم عياله لنصرة الدين
واخيه الطاح بس ماعده جفين
وكل الصار وياهم
هين وصعب اسراهم
كالو هل الهلال
واخته وابنه يتكيد
بدلو راية المرقد
كالو هل الهلال
======================
عيني الماتسيل عليك مو عين
يريت بمجلسك ويسير البين
احنه بلا عزائك جنه ميتين
ولو متنه بعزائك نبقه عدلين
هاي امنيتي والغاية
امن اموت اتجفن براية
كالو هل الهلال
حزني علبك مايبرد
بدلو راية المرقد
كالو هل الهلال
======================
امنية الخام بكل عام تزداد
وانه امنيتي وحده يبو السجاد
تحضرني المنيه بكبتك غاد
وانه بثوبي الاسود عالن احداد
هاي امنيتي مولاي
وماضن تبخل بهاي
كالو هل الهلال
ودمعي سايل اعله الخد
بدلوا راية المرقد
كالو هل الهلال
=======================


خادمكم باقر رشيد

شسم هاي المدينه كربله هايه
هنا ننصب خيم ونعلك الرايه
هنانه يسيل دمنه وحيل يزيد همنه
هنا ننصب خيم ونعلك الرايه
======================
مهري من وكف وعلمني كلبي
بهاي الارض راح يصير حربي
راح اطيح كلها وكلها كربي
وزينب تنسبي بس ليه تربي
وهنانه العدو يهجم عله خيامي
وبخيول اعوجيه تُكسر اعضامي
وتتذبح زلمنه وحيل يزيد همنه
هنا ننصب خيم ونعلك الرايه
====================
نصبوها الخيم وعليها حراس
وبخيمة الحره وكف عباس
زينب خويه ابشري وانه نوماس
اموتن لجل خدرج عادي انداس
كلشي ولا خدرجن يانضر عيني
ليجن فدوه اموت وفدوه لحسيني
ولا اسمعله ونه وحيل يزيد همنه
هنا ننصب خيم ونعلك الرايه
======================
شفت انصاري داروه دوره هلال
وكلهم حاوطولي خيام العيال
هنياله الي عنده مثلي ارجال
جاين النصرتي وتركو المال
اكلهم باجر نصبح تره موته
كلها تطيع ما واحد طلع صوته
كل انصاري منه وحيل يزيد همنه
هنا ننصب خيم ونعلك الرايه
=====================
من جلجل اليل الكمر مانام
اثاري مستعد ويصد للخيام
لو طحنه وبقت زينب والايتام
يرافكها منو من تمشي للشام
ياهضمتنه تمشي مو عله الناكه
وشمس الله الضهر بالوجه حراكه
مو يمها كمرنه وحيل يزيد همنه
هنا ننصب خيم ونعلك الرايه
=====================
ماصاير كبل نسكن تره بصحرة
ولا صاير امام وينكطع نحره
وماصارت خيول وتسحك بصدره
الله يعينه ويساعد الزهره
هذا الي يصير بهذي الاوطان
ضعن حسين كله يبقه عطشان
كل هذا حزنه وحيل يزيد همنه
هنا ننصب خيم ونعلك الرايه
=====================

خادمكم باقر رشيد

اشرحولي سبب ضلتي وحيده
وماريدٍ تكولولي بعيده
مو عبد الله ازغر مني ويروح
ضلتي هنانه وحدي تزيد النوح
اشرحولي سبب ضلتي وحيده
======================
يهلي وياعمامي ووالدي حسين
ياعمتي الحنينه سالت العين
كلها تروح وياكم غريبين
بس انه وحيده ومالي معين
لو ابقه وحيده تغرب الروح
ضلتي هنانه وحدي تزيد النوح
اشرحولي سبب ضلتي وحيده
======================
خافن نوك ماكو اكو رجلين
امشي عليهن واخدم الماشين
بس لو ابقه انعد من الميتين
وماعرف خبركم وين ماوين
سر عدكم يااهلي ومحد يبوح
ضلتي هنانه وحدي تزيد النوح
اشرحولي سبب ضلتي وحيده
=====================
عيوني انعمت يهلي وزاد مبجاي
ومن اعطش عليكم مو عله الماي
امنيتي اسمع حجايه تروح وياي
حته ارتاح ويعاودلي الراي
لو ابقه اصيرن طير مذبوح
ضلتي هنانه وحدي تزيد النوح
اشرحولي سبب ضلتي وحيده
======================
الوحده تعذب وشيخلصه اليل
دم مو دمع عيني كامت تسيل
خلوني اروحن اسرج الخيل
من ابقه تره يكتلني العويل
مايبقه فرح والحزن مسموح
ضلتي هنانه وحدي تزيد النوح
اشرحولي سبب ضلتي وحيده
======================
هواي توسلت واختم كلامي
اودعكم يااهلي وكل عمامي
وعلى العمه وخواتي اخر سلامي
وابوي الفدوه الك نحري وعضامي
الله وياكم ووياي الجروح
ضلتي هنانه وحدي تزيد النوح
اشرحولي سبب ضلتي وحيده
======================

خادمكم باقر رشيد

قصيده اليله الثالثه ليله مولاتي فاطمه العليله عليها السلام

ياولدي اخيكم من تنصرونه
يم فاطمه راسي ترفعونه
هذي وصيتي يابعد بيتي
يم فاطمه راسي ترفعونه
======================
ولدي اوصيكم وصيه وادري مايحتاج اكول
حسين لو باجر يولدي هجمت عليه الخيول
صولو كلكم عنه يمه ولا تخلونه يصول
رايده اتفاخر بولدي من اشوفنها البتول
نفذو الوصيه يابعد عيني
ترخص الروح لخاطر حسيني
لا هوه بريتي يابد بيتي
يم فاطمه راسي ترفعونه
=====================
ياابني ياعباس فدوه خلي عينك عل خيام
واسهر اليل عله زينب لا تخل عينك تنام
مااريد العين تغمض لون صابوها بسهام
يبني نفذ كل وصيتي وحفظ وياي الكلام
يولدي اريدن تحرس الحره
هاي العزيزه عندي والزهره
عزتي وحميتي يابعد بيتي
يم فاطمه راسي ترفعونه
=======================
زامطت بيكم يولدي وادري متفشلوني اكيد
هجمو هجمة رجل واحد وارعبو جيوشه يزيد
ولو وكع واحد يولدي هذا عد الله شهيد
كلكم ويه حسين كونو ولا تخلونه وحيد
لو يبقه وحده ينكسر ضهره
ويطيح يمه من ضهر مهره
تحضر منيتي يابعد بيتي
يم فاطمه راسي ترفعونه
======================
انه امكم وانتو ولدي حسين افضله عله الجميع
انه وانتم يمه فدوه نروح لكماط الرضيع
يمه اموتن من الحركه من اشوفنه صريع
راح اصلي وبصلاتي ادعي من الله السميع
كون انه اموتن كبله ياربي
لومات اموتن مايضل كلبي
هذي امنيتي يابعد بيتي
يم فاطمه راسي ترفعونه
======================
افتخر بسمي يولدي وانه اسمي ام البنين
بيكم اتسمه افتخاري وافتخر بأام الحسين
يمه لتجرحوني بيكم والله ماتبقالي عين
وابقه انحب عمري كله وشبقت من السنين
ياولدي ياروحي وبعد كلبي
يل بيكم انه انضر الدربي
صرتولي صيتي يابعد بيتي
يم فاطمه راسي ترفعونه
========================

خادمكم باقر رشيد

قصيده اليله الرابعه ليله مولاتي ام البينين

اسف تأخرت بسبب الضروف

كتلي نتلاكه يبويه من رحت وانه فرحت
انطرك وايدي اعله خدي بويه كلش طولت
منك ولا اي خبر
خاف لاحاك الخطر
انطرك وايدي اعله خدي بويه كلش طولت
========================
بويه يامسلم تراني راح اروح ويه الضعن
وي الحسين وبناته مدري وين ويا وطن
من اجت نوك الرحيل وكل نساوين صعدن
ردتك تصعدني بيدك بويه وعيوني بجن
بيده صعدني الكمر
خاف لاحاك الخطر
انطرك وايدي عله خدي بويه كلش طولت
=======================
نكعد بدرب الرحيل بكل مكان وتنذكر
وانه من اسمع بأسمك بويه اتمنى الكبر
لو تجي الكلبي تنضره بويه صاير كل جمر
من رحت لليوم ابجي بويه احس صاير امر
حشمت كلبي وصبر
خاف لاحاك الخطر
انطرك وايدي عله خدي بويه كلش طولت
========================
سار بينه الدرب بويه وانه اتنطر تجي
لو سمعت اسمك وحكك بويه اموت امن البجي
ملت يابويه بغيابك وانه اريدن انتجي
ماكلت يابويه ابطي وجيتك ليها ارتجي
امن البجي راح النضر
خاف لاحاك الخطر
انطرك وايدي عله خدي بويه كلش طولت
========================
بويه حط الضعن وينك حط يبويه بكربله
خيمه نصبولك عظيمه وانه حضرت الهله
كلبي لاجمني شجاله شو احس بيه يامله
كلها تنضري يبويه وانه دمعي هامله
ليه رد امن السفر
خاف لاحاك الخطر
انطرك وايدي عله خدي بويه كلش طولت
========================
واكعدت بالخيمه لحضه جاني الحسين العظيم
باسني براسي ومسحلي جنه جايسله يتيم
حرت اصرخ لو اسئله لو ابوس ايده الكريم
وهوه كالالي يبنتي والدج يم رب رحيم
كلبي حسيته انفطر
خاف لاحاك الخطر
انطرك وايدي عله خدي بويه كلش طولت
======================


خادمكم باقر رشيد

قصيده اليله الخامسه ليله سيدي ومولاي سفير الحسين مسلم بن عقيل (عليه السلام)

اتمنى من خدمة الحسين ان يشرفوني بخدمتهم والاشتراك بالقناه

عباس ماردت الماي ردتك تردلي سالم
ماحسبت يابو الجود ع النهر تبقه نايم
ليمت ترد وتلكاك ___ واتفيه بفياي لواك
@@@@@@@@@@@@@@@@@
خلافك علي دار الوكت والشيب غيم ب الراس
وعلية دارت دنيتي وبخيولهم كمت انداس
جا مو كلت ما نفترك وين الوعد ياعباس
وانه ادري بيك توذرت مابيك موضع ينباس
خلافك وحيد الصيوان
وبالخيم كلهن نسوان
ليمت ترد واتلكاك ........ واتفيه بفياي لواك
@@@@@@@@@@@@@@@@@@
عباس محتاجك سند وتسد يخوية بمكفاي
يهواي اريدنك نفس خلافك علي شح هواي
حيلي نهدم يابو الفضل وعلية ضاكت دنياي
ردت اروي روحي بشوفتك ماردت ارويها بماي
بجفاك ماضلت عين
يابعد شيبات حسين
ليمت ترد واتلكاك ........ واتفيه بفياي لواك
@@@@@@@@@@@@@@
عباس ابشرك من طحت وي طيحت راح الشوف
ملت ولفيتك منحني اركض يخويه وملهوف
حيلي نهدم من عاينت لاعين بيك ولا جفوف
ورماح وسيوف الزلم عله ضلوعك تلف وتطوف
ملهوف اجيت بلا راي
ع نهر مذبوح عضاي
ليمت ترد واتلكاك ........ وتفيه بفياي لواك
@@@@@@@@@@@@@@@
مابية واوصل للخيم لاحيل ضل ولا عين
متعيني ياتعب العمر غفله وخذك مني البين
يلكتلي ما اعوفك ابد شو هسه ضل وحده حسين
والمثلك بهذه الوكت عباس اجيبنه منين
ياحيف اطك راح براح
لابجي يردك لصياح
ليمت ترد واتلكاك ....... واتفيه بفياي لواك
@@@@@@@@@@@@@@@
عايفني ومخاوي النهر يابعد حيلي ومتني
نايم بحر ذيج الشمس خوية ومتية حضني
ضهري نكسر من غيبتك ضليت بعدك محني
والسمة نطبكت ع الارض من كد حنيني اوني
يل رحت عني بلا حساب
كل عشك بعدك جذاب
ليمت ترد واتلكاك ...... واتفية بفياي لواك
@@@@@@@@@@@@@@@@@

الخادم .... علي الموسوي

رفرف بيرغه العباس وهتزت عواليها
شد ونجفت حدره الكاع ونخسفت بهاليها
@@@@@@@@@@@@@@@
فرع واليجهبة يموت والكاع نجفت حدرة
شد والخيل طكها بخيل وتراب عتله الغبرة
صال وهوس عله الكوم والزركه كلبت حمرة
جرد صارمه وشجعان ضاعت عن تواليها
@@@@@@@@@@@@@@@
زمجر وارتعد والجيش شافه وتاهت صفوفة
ضكت فرد ضكه وكام يصفر كلمن يشوفة
ركضو مادرو لاوين حد ما وصلو الكوفة
شايل قارعه بجفه كتايبهم وهك بيها
@@@@@@@@@@@@@@
دارت والجهبهم حيد شد وحمرت عيونة
دخن ورتعد وختاض وضاك الدرع بمتونة
طبها وزوم طك بزوم والعسكر شبح لونة
فرت ما توجد وين ركضت عكس رجليها
@@@@@@@@@@@@@@@
صال وخيل داست خيل عثرها بجماجمها
سبعين الف راس براس طكها وطفحت بسمها
ركضت ماتوجد وين ركضت سابحه بدمها
وخيره كومهم من صال ذبت هدم العليها
@@@@@@@@@@@@@@@
ضاكت والصفوف الغوث صاحت من وصل حدها
كامت ناس تردم ناس تاه الدرب من عدها
غيم واغضب وصوبين بضهور الشكر شدها
سجرها ورعد والكاع زلزلها برواسيها
@@@@@@@@@@@@@@@@@
الخادم ...... علي الموسوي

منهاج محرم الحرام ١٤٤٤ هجرية
الليلة الاولى
مقدمة عزاء

اه واويلاه يهلال الدمع
اه واويلاه يهلال الدمع
############################
اه يهلال المصايب والحزن
جايب الحسرات ودموع الجفن
هلبت بهل ليل وإعليه تحن
وماتهل يهلال بمصاب الإهل
@@@@@@@@@@@@@@@@@@@
اه يهلال الحزن عندي عتب
انباكت احلامي مثل بوك الذهب
ماخذ اعزاز الكلب وبلا سبب
مصيبة ماصارت مثله بكل ازل
@@@@@@@@@@@@@@@@@@@
لا تهل يهلال لتعيده الجره
أدموعي لسه اعل الزجية موجرة
شلون اشوف اخوان منظر ياترى
بس جثث متكطعه عقلي انذهل
############################
اه يهلال إكسرت مني الظهر
شيبت كلبي وخذت من النظر
وخذت من إيديه يهلال الكمر
وفتت روحي ودمع عيني نزل
@@@@@@@@@@@@@@@@@@@
شحجي احجي ياجرح بيه الاشد
عن ابو السجاد بالخيل انمرد
لو مصيبة ليله من راح الولد
عن نحر مكطوع ياوسفه بنبل
@@@@@@@@@@@@@@@@@@@
اه يهلال الحزن كلبي إنثلم
الدهر دولاب صوبنه بسهم
ومارحم نسوان ماعنده شيم
ولا رحم اطفال لا يرحم كهل
############################
اه يهلال الجره كلش صعب
خِدَرْ الكرار يمشن بالغرب
والزنيم الناصبي بسوطه يظرب
ريت ساعته كرب مني الإجل

حسين العميدي الحلي

منهاج محرم ١٤٤٤هجرية
الليلة الاولى
رئيسية


اه يهلال الحزن جايب مصايب
شيبت راسي وخذت مني الحبايب
امجانهم أظلم صعب
راحو اعزاز الكلب
يروحي يروحي
###########################
ياشهر عاشور جم غالي خذت
تأخذ اعزاز العمر نظره ردت
اه ياكلبي المصاب شكد جبير
جثث منثوره الفله بعيني شفت
جدي مطروح الأرض جثه دميه
وعمتي مكيوده غصب تمشي سبيه
وتمشي مابين الغرب
راحو اعزاز الكلب
يروحي يروحي
###########################
اه يهلال الحزن صعبه تره
اتحشم العباس سبع الكنطره
يحدي بيه الحادي وبكيفه مشت
يْمَشْيِ زينب بالغرب وميسره
صعب مابين الزلم تمشي نساوين
فوك كل هذا الحزن طرن دواوين
امجتفه ايديهن غصب
راحو اعزاز الكلب
يروحي يروحي
&&&&&&&&&&&&&&&&&&&&&&&&&&&
اه يهلال الدمع كلبي إنفطر
انكسر ظهر حسين من راح الكمر
راح ابو الغيره بعد منهو الكفيل
مكطع الجفين وجفوفه نهر
راح ابو الكلب السمح ساقي العطاشَ
فاضن ادموعي بألم صبري تلاشَ
صعب يادنيا صعب
راحو اعزاز الكلب
يروحي يروحي
###########################
رمله تتباجه صفت صبح ومساء
راح وبعمر الورد حلمي بهباء
قاسم العريس بحلامَ اندفن
وغدت حزنانَ الأرض ويه السماء
ارد اسولف عن شباب وكلبي محزون
الراحو بغمضة جفن لا مايريدون
عشت يادهري حرب
راحو اعزاز الكلب
يروحي يروحي
&&&&&&&&&&&&&&&&&&&&&&&&&&&
اه يهلال النوايب والمصاب
دافن ابوسط الجفن شيب وشباب
اليدفن بكلبه محب ينسى الحياة
وأنه الأكبر بالدمه منزلَه التراب
بصوت عالي من صحت دفنوه كلبي
بلايه تشيع وجفن يدموعي صُبْي
راحت أحلامي سُرْب
راح اعزاز الكلب
يروحي يروحي
$$$$$$$$$$$$$$$$$$$$$$$$$$$$$$
آخر أحلامي مشن مثل الشراع
راحو اهلي ياكلب وبلا وداع
عسه يهلال المصايب لاتهل
اه يهلال الحلم بعدك ضياع
امشي محني الظهر راحو أهلنه
بلا وداع وسافر كلهم محنه
ابجي كل ما طر درب
راحو اعزاز الكلب
يروحي يروحي

حسين العميدي الحلي

منهاج محرم ١٤٤٤هجرية
للخدام
شور


مجنونك... يضنوة فاطم
ممنونك..... لفظ كل خادم
يا أبا عبدالله ياابا عبدلله
🌼🌼🌼🌼🌼🌼🌼🌼🌼🌼🌼🌼🌼
شكرا ياحسين...... عالي كلش صيتي
شكرا ياحسين...... خادمك تسميتي
شكرا ياحسين...... بعد اهلي وبيتي
شكرا ياحسين..... بس رضاك امنيتي
حلم كل خادم تحضره بكبره
يضنوة فاطم عظيم بقدره
فدواتك .... يكلبك مالم
ممنونك.... يضنوة فاطم
ياابا عبدلله يا أبا عبدالله
🌹🌹🌹🌹🌹🌹🌹🌹🌹🌹🌹🌹
خادمك ممنون..... بكل عزه واقرايه
خادمك ممنون..... بخدمة المشايه
خادمك ممنون ..... يلرضاكم غايه
خادمك ممنون ...... خدمتك منوايه
يقدرك عالي عشكت ارسومك
رضاك لغايه فديتك ادمومك
مرسومك ....كلب كل هاشم
ممنونك...... يضنوة فاطم
يا أبا عبدالله يا أبا عبدالله
🌺🌺🌺🌺🌺🌺🌺🌺🌺🌺🌺🌺🌺
فخرا ياحسين.......... بدرس حبك دارس
فخراً ياحسين...... ارتبط اسمي بعابس
فخرا ياحسين...... بخدمتك منسايس
فخرا ياحسين......... من حزنكم قابس
ترست اعيوني بكثر حنيتك
صحت محبوبي يابشر حبيتك
الخدمونك..........بكلبهم هايم
مجنونك........ يضنوة فاطم
يا أبا عبدالله ياابا عبدالله
💐💐💐💐💐💐💐💐💐💐💐💐💐
اهواي اتشكرك ......... شكر موش احجايه
اهواي اتشكرك ........ متفضل انته هوايه
اهواي اتشكرك ........ إعله العهد الوفايه
اهواي اتشكرك ....... ماتطيح الرايه
سندنه الكافل رفع طارينه
وحك احروفك فلا ذلينه
مكنونك........ يسر العاصم
ممنونك...... يضنوة فاطم
يا أبا عبدالله ياابا عبدلله
🌸🌸🌸🌸🌸🌸🌸🌸🌸🌸🌸🌸🌸
عذرا قصرت ......... بذنبي انته التدري
عذرا قصرت ......... دمعي إلك بس يجري
عذرا قصرت ......... يمحبوبي وشكري
عذرا قصرت ......... فدوه إلك كل عمري
حلم كل شيعي يواسي العتره
تظل بدمانه يحزن الزهره
ديوانك.......... بكلمته حاسم
ممنونك........ يضنوة فاطم
ياابا عبدلله ياابا عبدلله
🌷🌷🌷🌷🌷🌷🌷🌷🌷🌷🌷🌷🌷
بلا حنانك وين ......... يل ذكركم عافيه
بلا حنانك وين .......... يبو سوالف دافيه
بلا حنانك وين ............ ما تلمك قافيه
بلا حنانك وين .......... بس خدمتك شافيه
ييوسف فاطم يشمت ورده
كلبنه الحافر يريت يمرده
منذورك......... عزائك قائم
ممنونك......... يضنوة فاطم
ياابا عبدلله ياابا عبدلله

حسين العميدي الحلي

منهاج محرم ١٤٤٤هجرية
للخدام
مقدمة عزاء أو رئيسية


احسبني خادم للأبد ورضه عليه
مولاي احلفك بالحسن وأمه الزجيه
كل ليله مولاي احترك
لولاك بالدنيا اختنك
يحسين احبك من صدك
ياحبيبي ياحبيبي
###########################
نجمه تطلع كل صبح..........هيبة الله إعله الرمح
شفتك بكلبي جرح....... واتحركه الاخيام
سيدي طال الصبر............ تسحك اجدامي الجمر
خليني اشماً بالكبر......... وامسح اجدام
ليلة الجمعه اطب وذنوبي وياي
وأنه انظف بالصحن موتني مولاي
خليني اموت بخدمتك
عطشان أريد بحضرتك
يارحمة الله رحمتك
ياحبيبي ياحبيبي
&&&&&&&&&&&&&&&&&&&&&&&&&&&
خدمتك تشفع إلي............. حلفتك بحيدر علي
خله صدري ينملي....... من المجالس
سيدي كليبك حنون......... نزل ادموعي بشجون
خادمك عقله بجنون......علمني عابس
خلني عابس بالعشك واقبل خدمتي
كثراً اهواي النعم وانته نعمتي
كلولي ليش تقدسه
غير الهوه إلي اتنفسه
يحسين إشكرك كل مسه
ياحبيبي ياحبيبي
###########################
سألوني مولاي بحقد.......... لاتشرك بحبك أبد
مولاي اقبلني عبد.......... وادوسه اعوجيه
من المهد حتى اللحد........ حبيتك وربي شهد
الموت البدربك سعد.......يامحله المنيه
كلبي ذايب بالعشك بيك انه مجنون
وارث إِقْرَيتَ إلك يا ضي العيون
بحبك انه شكد همت
بلا نِعِمْتَك ما عشت
مولاي توفيقك ردت
ياحبيبي ياحبيبي
$$$$$$$$$$$$$$$$$$$$$$$$$$$$$$
السلك دربك ثق سلم......... انه من دونك عدم
احركني ويه حرك الخيم......يلحبك هويه
حمزه بالخدمه كُبَر.......... وكاظم بشعره انتصر
حلفتك بجاه الكمر........ بس ارضَ عليه
انه غيرك سيدي شعندي وسيله
اقبلني خادم سيدي بجاه العقيله
إحساسك يعطش نهر
مقدملي مولاي نحر
مقدملك ذنوب شكثر
ياحبيبي ياحبيبي
$$$$$$$$$$$$$$$$$$$$$$$$$$$$$$
عذبتني مولاي السنين...... يزيد كل لحظه الحنين
كلبي يهتف ياحسين....... نظره إليه
ويه النده عطرك يمر......... يحل كل شده وعسر
ويطفيّ نيران الجمر......... بالغاضريه
نار شوكي من الخيم تحركني هيده
خادم أحسبني ردت يبن الصميده
شفتك وطن من ذنبت
اي عايش بخيرك صحت
اي غير دربك ماردت
ياحبيبي ياحبيبي
$$$$$$$$$$$$$$$$$$$$$$$$$$$$$
بدمي اجددلك ولاء....... حي حي آعله العزاء
ماأنسه اقسم كربلاء....... ليوم القيامه
بدمعي فتت الجبل......... كلبي صبخه من العمل
تحضرني لو يدنه الأجل....... بذيج الظلامه
يرتفع صوت الخِدم من الظماير
بلكبر نقسم قسم نحي الشعاير
الميمون تصدح بالكبر
وعلطمه وسمنه الصدر
وصدري ياريت انسكر
ياحبيبي ياحبيبي

حسين العميدي الحلي