تعبت إعليك حد ما ظهر حنيت
و حنية الحمام إعليك حنيت
ييمه چفوفك بيمناي حنيت
حنة عرس مو حنة منيه

الدهر بالحزن بس وياي قاسم
يبچيني ييمه إعليك قاسم
ينشدوني و أصيح بصوت قاسم
عريس و رحل من بين إديه

ليش الفرح يبني وياك ماتم
موت الولد بعده يحين ماتم
العرس يا ييمه صار اليوم ماتم
عليك و ضلت عيوني جريه

خذه دهري و فعل ما چان رمله
على وليدي سهام الموت رمله
عليه شموس و الجواه رمله
و عليه إندار دمعي و جيش أميه

سعيت بنايباتي شبعد شسعه
أدور و الطفوف هواي شسعه
أنه أم البالمعارك أهم شسعه
من الجيش كله و من أميه

يا خيمات حسين وجي و لا تطفين
راح الكافل و الأكبر و حسين إوجهه الأزهر
وجي و لا تطفين

يخيام صيوان النبي إستعري يالله بنارج
من عندچ إنفگدوا أهل ليهم جرت أعبارچ
إشتعلي و أدري يا خيم يمن تدور أفكارچ
ما ريدن چفوف العده تلمس خيوط أنوارچ

ما ريد أي چفوف بطن الخيمه تشوف
ستر الله و طه و حيدر و حسين إوجهه الأزهر
وجي و لا تطفين

يخيام شبي بحسرتچ خل تعله نار الحمره
تدرين بخيوطچ ضوه منسوجه بيد الزهره
لو ما توجين بعجل تتعله يمچ نبره
تگلچ إسمعي يا خيم محبوبچ إنحز نحره

كل غربان الشوم يم خيامي تحوم
من كافل زينب تثأر و حسين إوجهه الأزهر
وجي و لا تطفين

وجي و احاچيچ بهضم بين الدمع و اللهفه
لا يوصلچ چف العده يلمس خيوط العفه
يالعشتي فوگ آل النبي بين الإيدين الترفه
إتوجري و خلي الجمر حد الحشر ما يطفه

وجي بهاي النار يا ستر الأحرار
نارچ يطفيها المحشر و حسين إوجهه الأزهر
وجي و لا تطفين

يا نار گومي إعله الخيم بس خيمه لا تنديها
خيمة رقيه ام الحزن لعبتها ضلت بيها
خافن تعاين عاللهب دمعة هضم تجريها
و تنادي يحسين بألم يا بويه گوم إطفيها

خاف تنادي بنوح يا بويه المذبوح
و تريد الكافل يحظر و حسين إوجهه الأزهر
وجي و لا تطفين

يخيام من بعد االظهر إستعرن بهالبيده
خلن طرفچن يا خيم عالي اللهيب يزيده
بس خيمة إبن المصطفى خلها توج بهيده
خافن عليل آل النبي نارچ تصل يم إيده

لو وصلتله اليوم عنها شلون يگوم
دمعه بوجناته تفجر و حسين إوجهه الأزهر
وجي و لا تطفين


ما ريد أگلچ يا خيم نارچ تشب إعلينه
رمادچ ننثره إعله الوجه لمن تچوي عبينه
لو يبقى من عندچ أثر خيطچ يگيد إيدينه
يبقى لظهور المنتظر بيرغ نصر مهدينه

من تعله الرايات و تحين الثارات
ثار القائم من يظهر و حسين إوجهه الأزهر
وجي و لا تطفين

الدهر بجفاك نار الهم يشبها
يمن طه النبي وجهك يشبها
هجرك يا علي لحيتي يشبها
و يفت گلبي و يوج نيران بيه

گلبي شگد يود گلبك و إلأكبر
زغار جروحي يهونك و إلأكبر
جاسم راح من إيدي و إلأكبر
وگع و إتداور العسكر عليه

يمن مثله شبه للنبي ماصاح
الوكت كدر و ابد وياه ماصاح
تصوب علي وبين الناس ماصاح
من كسر الگلب خايف عليه

يدنيا الحزن يم حسين دربيه
و جفن عيني على الدمعات دربيه
شفت الخيل بالميدان دربيه
بين الخيل و جنود آل أميه

مصاب الأكبر لدلالي ما راد
غير الماي بالطف غاد ما راد
خذاه الخيل بس للخيم ما راد
تاهت بيه بين جنود أميه

بضربة القامه نداوي جروحنه
يا حسين إنت السكنت بروحنه
حيدر حيدر

من أشيل القامه و أجريلك دماء
ما يضل بفكري خوف من البلاء
لكربلاء إگصد يالتريد الشفاء
ذكر أبو السجاد للعالم دواء
حيدر حيدر

خلي يسمع كلمن يعادي و يشوف
شگد معاجز صارت بأرض الطفوف
من ننادي بإسم مگطوع الچفوف
ما تضل كل عله لا ما يبقه خوف
حيدر حيدر

من أشيل القامه و أصرخ يا حسين
يوگف إبالي حجر ذاك الجبين
و لمن أطبر راسي يزداد اليقين
إسمي ألگاه بسجل أم البنين
حيدر حيدر

يا حسين إسمك دوه و سد المنيع
يا سلام الله على الجسم الصريع
بالطفوف شأروي چم منظر فجيع
عمت عيني إعليك عبد الله الرضيع
حيدر حيدر

وين اليضدني أرد أنشده بفد سؤال
إنته هم دايس على حر الرمال
سامع بطفله يگودوها بحبال
تنادي بنت حسين للكافل تعال
حيدر حيدر

آه من أذكر عقيلة حيدره
وي أسم زينب دمع عيني جره
بيا شرع مكتوب يسبون المره
إخت أبو فاضل خذوها ميسره
حيدر حيدر

كل شخص ينحب على مصاب البدور
خلص عمره و بالمجالس ضل يدور
بدفتر أم حسين متسجل حضور
بالحشر باچر تشع وجناته نور
حيدر حيدر

أرد أسألك هالسؤال و گلبي إعذره
جدك من إنذبح غاد شسوه مهره
سيدي شأحواله من وگع خياله
من وگع خياله
******

سيدي ادري بسؤالي يهيج جمرك
و انته گاعد و الحزن يطحن بصدرك
بين شام و كربله خلصته عمرك
إنته ما ناسي طفوفك حته أذكرك

يبدي توقيت الدمع من هالمسيه
تطرق إبابك جراح الغاضريه
دمعتك هماله من وگع خياله
من وگع خياله
******

مو شرط يا سيدي تجاوب سؤالي
آنه مهر حسين شاغل كل خيالي
انته غالي و تنسأل عن الغوالي
عندي صورة خيل مرسومه إعله بالي

صوره بيها الخيل متعني لخيامه
تلگته عماتك وياها اليتامه
گلبك إتعناله من وگع خياله
من وگع خياله
******

إباب خيمة عمتك يجري دمعته
چن يگلها حسين فوگ الغبره عفته
يا هضيمه يصيح بگليبه حسرته
ليا سبب خياله عافه إتعنه لإخته

ليش عاف حسين و لزينب تعنه
حسين گلاله إعله زينب سلمنه
دز خبر لعياله من وگع خياله
من وگع خياله
******

سيدي بيا عين تنظر من يصلها
من يدنگ يمها بالمقتل يگلها
من نظر بنت الولي خلصوا أهلها
أعتقد لحسين چان يفزع إلها

صعدي عالتله و إنظري بعينچ
سحگت الناس إعله صدر حسينچ
ضلعه حافر شاله من وگع خياله
من وگع خياله
******

سيدي تنظر عليه و تجري عينك
ويلي من هذا المصاب الله يعينك
من ينادي بهضمه يتعله حنينك
توگف گباله و يون هو لونينك

لو نظرت لدم حسين يغطي ظهره
يا قصيده بهالمصيبه الليله تقره
يا شعر تقراله من وگع خياله
من وگع خياله
******

هالفرس يا سيدي أعلن وفاءه
و لأهل بيت النبي قدم ولائه
من وگع خياله ضل عالي بكائه
لطخ ناصيته و تخضب من دمائه

خضب لجمسه من حسين و جروحه
زلمه لو چان الفرس چا إنطه روحه
وفي و هاي أفعاله من وگع خياله
من وگع خياله
******

يمضيع چفوف زغار يمضيع ضوه بنيه
ما تنشف عليك العين تبقه الدمعه مجريه
حسين حسين
________________________________

يالطاح يضي الليل يالما ينوصف بدرك
طحت إنته و عليك الخيل صعدت تسحگ بصدرك
يمحبوبي شجاها الناس ما عرفت كبر قدرك
تشمر رحمتك عالناس بحجار العده تشمرك

ما رادت خلاص بيوم تهوه أهل الظلم هيه
حسين حسين
________________________________

يالمالي التراب عطور يالمالي السمه دمايه
يالمات بچبد عطشان حته نرتوي بمايه
يالمخلي بگلوب الناس للحب و الحزن ثايه
لأجلك يا أجل معشوگ نهدي أجمل قرايه

محلاه مجلس العشاگ من بيه تعله حنيه
حسين حسين
________________________________

شما دارت علينه سنين نبقه إحنه خدامك
ننوح و نحب بكل حين مو بس من تجي أيامك
إرزقنه عليك دموع بلكي تبرد خيامك
و إرزق گلبي شوغه إعليك تشبه شوغة أيتامك

أرد أركض و أهم إعليك خل تتچوه رجليه
حسين حسين
________________________________

يحسين العمر خلصان بس حبك يضل دايم
بحبك يبن أبو الحملات تتفاخر تره الوادم
الما عنده حسين هناك يحظر بالحشر نادم
على حب الحسين العاش دنيه و آخره سالم

محلاته العمر يحسين من تختمه لطميه
حسين حسين
________________________________

يسألوني إعله دمعي الناس تهمل دايمه عيونك
و أگلهم هالعمر ما بيه لذه و رحمه من دونك
حگه يسال الما ضاگ خبزة هذا ماعونك
يمن غيرت رسومك خيل و الحر غير إلونك

يمن جثتك ثلثة أيام فوگ الغبره مرميه
حسين حسين
________________________________

يحسين الدموع ألوان كلمن لون يجريها
دمعاتي أبد متلوگ و الله لغيرك أجريها
و حگ اللي صرخت بالطف و السلبوا تراچيها
دمعاتي أمانه إعليك ذخر لحشري خليها

و بگبري يبو السجاد بلكن تعطف إعليه
حسين حسين

خيل يگل لخيل لمن صار الليل
جثت من هاي الدسناها بيها أتنشغ ريحة طه
لمن صار الليل

من خلص عاشر محرم دار بالطف هالحوار
عشرة خيول أعوجيه ناشدن عن اللي صار
واحد يگول بحوافر دست بضلوع النهار
منهوا هذا اللي سحگته بعد ميفيد إعتذار

انطحنن منه ضلوع بس ما شفنه دموع
و أنظر بسمات البشفاهه بيها أتنشغ ريحة طه
لمن صار الليل


واحد يگول إعتنيته و سحگت صدره بعد
أصعد إعليه و يردد قل هو الله أحد
واحد يصيح آنه شفته يحسب إچم مره رد
هالفرس جم مره داسه نزل عنه و رد صعد

و إچم حافر داس بضلوعه و عالراس
صرخات الآه العلاها بيها أتنشغ ريحة طه
لمن صار الليل


واحد من الأعوجيه يروي چلمات الألم
آنه فوگاه و أنظره دار وجهه إعله الخيم
واقعة طفه قراها و ردد آيات القلم
رد نظر صوب الشريعه ناده يا راعي العلم

ناده إبحة صوت ميت قبل الموت
و رسومه الضاعت بدماهه بيها أتنشغ ريحة طه
لمن صار الليل


فرس گال آنه نظرته دمعته بعينه تسيل
من سمع صوت إخته نادت حرگوا خيام الكفيل
شگد سحگنه إحنه إعله صدره لجن گام و كله حيل
نور شمس الله بجراحه و إحنه ظلمه و كلنه ليل

صوب العسكر راح بين الوادم طاح
و إخته بنبرة هم ناداها بيها أتنشغ ريحة طه
لمن صار الليل


منهوا دسناه و سحگنه و سلم أمره و ما رمش
منهوا خبرونه بكيانه الباقي جثه بلا نعش
ياهو النطحت ضلوعه و گلبه ضامي من العطش
ناحت السبعه لمصابه من الرمل جواه فرش

گاللهم خيلين يمكن إسمه حسين
من حيدر أنواره و جاهه بيها أتنشغ ريحة طه
لمن صار الليل


يالله يخيول آل أميه ما بقه عندچ عذر
شلون طاوعتي الضلاله دستي من عنده الصدر
إخذي ثاره بهالمسيه و دوسي بضلوع الشمر
باچر بناره يوجچ من يجي راعي الأمر

عجزت أن تكون تشبه للميمون
و سياط الباچر تتناها بيها أتنشغ ريحة طه
لمن صار الليل

إحچي يا زين العباد عمه شو كلك رماد
گلي يا أم الحزن توني خلصت الدفن
عمه عمه
```````````````````````````````````````````

عمه بالي إنشغل آنه و جيت أشوفك
من الصبح ليهسه ما أعرف ضروفك
صعب حالك و أبد ما أگدر أعوفك
ليش أشتم ريحة رماد بچفوفك

لا تخليني بعذاب عالشعر ناثر تراب
أسمع بكلبك يون توني خلصت الدفن
عمه عمه
```````````````````````````````````````````

گلي يا عمه يبت حامي الحميه
شرد أسولفلچ چنت بالغاضريه
رحت ادفن جثة حسين و أخيه
و علي الأكبر و الليوث أهل الحميه

أدفن حسين الغريب و عابس و جون و حبيب
و كل جسد ضل منسحن توني خلصت الدفن
عمه عمه
```````````````````````````````````````````

عمه شحچيلچ تره الحسره چبيره
والدي المظلوم لميته بحصيره
عمه ما عنده جسد ليث العشيره
ماكو راس و حته عاليمنه أديره

گبره رشيته بدموع صدره ما بيه أي ضلوع
بالحوافر منطحن توني خلصت الدفن
عمه عمه
```````````````````````````````````````````

عمه هاي آثار لطمات إعله خدك
إحچي عمه أرجوك بهموم اللي عندك
ياهو أكثر جسد بالدفنه يضهدك
بيه أحس حيل إنمرد يا عمه چبدك

صاح من شلت الرضيع منظره ذاك الفجيع
شلت بيدي و كمت أحن توني خلصت الدفن
عمه عمه
```````````````````````````````````````````
قاسم العريس لسه بچفه حنته
وسفه شاب و للتراب تصير زفته
عمه أذاني أخيي من دفنته
من العطش و جروحه لسه يون سمعته

عمه طلعت مني روح من شفت ذيچ الجروح
أنظر آثار الطعن توني خلصت الدفن
عمه عمه
```````````````````````````````````````````
عمي ابو فاضل تره دلالي سله
من وصلته إعله الشريعه بعينه نبله
عمه بركان المراجل صعب حمله
مگطع و آنه لحفرته شلون أنزله

من شلت بيدي الچفوف قبلتها و گمت أطوف
نبله بمجان الجفن توني خلصت الدفن
عمه عمه
```````````````````````````````````````````

آنه رايح هالمسيه أدفن الجثه الرميه
و أدفن الضل عالنهر بلا چفوف و لا نظر

آنه رايح هالمسيه أدفن أوصال الضوه
و أدفن الگمره بحياتي و أدفن أنفاس الهوه
بسملة روحي و حياتي و الحمد و القل هوه
شلون أدفنها بإديه الچانت لجرحي دوه

أمشي و آلام بحياتي ردت وياهم مماتي
عشت أيامي بقهر بلا چفوف و لا نظر


رايح لأرض المصيبه راح أفتش بالرمل
و أغسل أوصاله لحبيبي من دمع عيني اليهل
حاير شلون أرد أشيله يا كتر بيه ينحمل
و إعله صدر ابن الزچيه ادفن وليده الطفل

عمه وصاني بدموعه أدفن وليده بضلوعه
دفنه بدموم النحر بلا چفوف و لا نظر



أحفر الحفره بإديه و أگعد و أسچب دمع
و أجمع أوصاله بحصيره و عالگبر أعلگ شمع
عمه و اليمرد دليلي خنصر إيده المنگطع
من نظرت آنه إعله حاله وياه تمنيت أنصرع

عايش إلمن يا حبيبه گلبي ينظر يا مصيبه
جرح البگلبي كبر بلا چفوف و لا نظر


كل بسمتي أدفنها رايح من الأكبر يندفن
هو رايح يم حبيبه و آنه يمليني الحزن
مضرج موذر يويلي يرسم جروحه الجفن
و الله يا عمه من ادفنه ينهدم حيل المتن

عمه ذاك الترفه روحه ما گدرت أحسب جروحه
جسمه الموذر وذر بلا چفوف و لا نظر



عمه الأنصار بدفنهم إله أقبلهم و أشم
ذوله أحباب الزچيه و النعم من هالزلم
شيخهم من آنه أنظره و الله گلبي يلچم
للسبط قدم حياته ينزف الدم مبتسم

و النعم من الأطايب من هوو فوگ الترايب
عاهدوا فارس مظر بلا چفوف و لا نظر


أدفن الدنيا و ضواها عمه يم المشرعه
ونتي يم نهر المصيبه تهز سماوات أربعه
من أصد لزنده دامي و الچفوف مگطعه
يمه أصرخ يا بو فاضل جفني سايل مدمعه

الكافل بيا عين أشوفه مالي حيل أحمل چفوفه
و أدفن لعمي الگمر بلا چفوف و لا نظر

ابوذيات للعلويه ع


دهري بنار أحقاده وجاني
و تسجل ظالمي و قاتل وجاني
أعرفه اللي حظر يمي وجاني
و نصب مجلس عزه بگبري عليه

و حگ زنود طاحن غاد يماي
أبد ما نشف من الجود يماي
أسجله اللي حظر هاليوم يماي
و أرفع إسمه يم أمي الزچيه

يحره بنار هالدنيا وجينا
و سمعنه بفيض حاجاتچ وجينا
مسحنه بطرف شباچچ وجينا
نريد مرادنه بهاي المسيه

نار گلوب هالليله وجت ليچ
شمعة إعله الگبر لأجلچ وجت ليچ
خدامچ تعنتلچ وجت ليچ
نظره تريد منچ هالمسيه

شريفه أبد لا تگطع وصلها
لأن مترد ابد واحد وصلها
الحسن والدها ابن حيدر وصلها
تشافي وتگضي حاجات البريه

روحي بمرقدچ هاليوم حالات
وزوارچ بعلتي إعليچ حالات
مو حاله إتشافه اليوم حالات
بمستشفى الطبيبه الهاشميه

صعب سر الطبيبه كشفه كشفه
الگصد متريد منه كشفه كشفه
المرض يمها يزاير كشفه كشفه
عدها دواك بت خير البريه

المرض حدد مكاني بسمچاني
وأشوف آنه اعله گبتچ بسمچاني
إذا اتنخيت والله بسمچاني
أطيب وأشفه من كل اللي بيه

وحگ دمع الگصدني من شفيته
اوحگ كل گلب لاهب من شفيته
الشمر والسوط بيده من شفيته
لذت بذيال عمتي الهاشميه

منو يحصي فضلها اليوم من عاد
كرمها من الحسن عالناس من عاد
يسولف عالحوائج يضل من عاد
قبرها ويشم ريح أمها الزچيه

يمن طحت بحياتك وسط شده
عزمك يم شريفه بساع شده
إخذ بيرغ وبالشباچ شده
وتأكد تنتهي هنانه القضيه

لون دهرك عليك چفوف شباك
ولون جمر الألم بحشاك شباك
اوصيك لخلاصك زور شباك
راعيته كريمه و طيبه هيه

وحگ عين التي بس نوح شافت
إوحگ من بعداها الروح شافت
شريفه شكثر من الناس شافت
أمراض وگضت حاله عصيه

نفوس الناس يم الگبر حاجات
لگبرچ هالمسيه الروح حاجات
اليمد إيده لضريحچ نال حاجات
شفاعه و مغفره وعزه وحميه

يحير العقل يمچ منتطينه
الترب در يصبحنه منتطينه
العلاج بلايه كشفه منتطينه
يشافي البي مرض والبيه أذيه

الدخل حضرتها بالهم سمه بيها
لأن جـود وكـرامـه سمه بيها
الذكر يا شيعه يمها سمه بيها
التريده تصيح بس إحچيه إليه

وحگ الچان همه هناك بسماي
الكرم والجود صار اليوم بسماي
اليجيني وينتخي يا ناس بسماي
أطيبه وأگظي حاجاته العصيه

يتيمه و عين ابو فاضل ترابيچ
طبيبه و يشفي كل عله ترابيچ
اليگصدچ يصرخ بگبرچ ترابيچ
ريح الحسن و الزهره الزچيه

سلام الله على چفوف الـ ترابيچ
يتيمه و چم جرح ويلي ترابيچ
مصيبة والد سكينه تُرابيچ
طفوف بعمرچ و نار و أذيه

خدم و الما يخدمچ منتمنه
و غير الخدمه و الله منتمنه
املنه إحنه بضريحچ منتمنه
تسجلينه خدم يم الزچيه

دوائچ يصعب بهالشعر وصفه
ترد صحته اليجيچ يزور وصفه
ترابچ صار للمعلول وصفه
الگبر مستشفى بابچ صيدليه

دموعي وي شريفه منشفتهن
و جروحي راح ألمهن منشفتهن
التراچي بإذن غيري منشفتهن
متت و تذكرت ذيچ الرزيه

الكرم للگاصد بحاجه عباتچ
و متاعه بطول أيامه عباتچ
صارت وصفه للعالم عباتچ
يگصدها الخلگ من كل نويه

حسن هالدنيا ذره من حسنها
لأن أخذت كرامه من حسنها
إجتها افواج تلهف من حسنها
فتحت بالكرم ( للخلگ) باب العطيه

و حگ الما نست سطرة خدمها
شريفه تعين كل واحد خدمها
شكر للباري سوانه خدمها
و تسمينه بإسمها الهاشميه

و حگ الچان والـدها عزلها ( عز إلها)
شريفه و أمها هالليله عزلها ( عازه إلها)
أظن نصبت بهالساعه عزلها ( عزه إلها)
تندب بيه بتها الهاشميه

أبد مـا بينـه و الله من مشينه ( منمى شينه )
علينه أكوان ناحت من مشينه ( من سرن )
ملامــحنـه تغيـرت من مشينه ( المشي)
الوجه برماد هاي آنه و رقيه

دمـع عـمـي جـرالـي من مشيته ( من مسحته)
إنكسر ظهره عرفتـه من مشيته ( من المشي )
بيسر و الشمر ويلي من مشيته ( من ماشيته)
يطگني و أشگف سياط بإديه

الدهر تمثال بس هم ناحت إلنه ( نحت)
و إحنـه اللي سمـانه ناحت إلنه ( تنحت او تزحزحت)
تـره النـوگ الهـزيـلـه ناحت إلنه ( بچت)
من نظرت علينه آنه و رقيه

زغيره و حـبـل يسـري كف إديه ( كف او قصّر)
الحبل ماهو إعله إيدي كف إديه ( كفه)
يعمـه أرجــوچ مسحي كف إديه ( چفوف)
بلچن ينشفن من الأذيه

چم زاير طبيبه عافه عافه
و گصد للي خدرها عافه عافه
چفها شگم مصيبه عافه عافه
و گضه هموم و فرج كربه و بليه

يبو محمد عن مضيفك رحى تون
تون دلتك على مصابك رحى تون
مشيت و بنتك خلافك رحى تون
و تجرح خدودها و تشبع أذيه

بچيت و أحسن بعيوني طفلي
و ردت منچ يبت حيدر طفلي
سمعت بصوت بس إگصد طفلي
إلك طفلين بإذن الله هديه

ما همني اليضد شخصچ ورايه
أزور و تضل چلماته ورايه
رفعت عالقبه چم رايه ورايه
صارت للكرم أقدس هويه

يمن أمرك عسير و صعب حله
و عليك الدهر بس الجور حله
توجه باليقين إعتني الــ حله
بگبر بنت الحسن تلگه الهديه

شگد أرواح گبرچ ما خذلهن
كراماتچ چثيره ما خذلهن
منو الحاجات منچ ما خذلهن
منو المد يمنته و ردت خليه

دنيا بغير شباكچ منارات
الخير البيها من عدچ منارات
علت فوگ القبر يمچ

منارات
مناير للشفه صارت هويه

شهر عاشور لأحبابك بدلها / بين
لأن رايه على قبتك بدلها / تبديل
لسبي عيالك تره بانت بدلها / بيده
و درب شام و زچر لوع رقيه


الحزن يحسين ضل ساكن بدلنه / بدن
لأن عاشور بجراحه بدلنه / بين
صعدنه لراية القبه بدلنه / بدلنه
براية ثار إبن خير البريه

رايه و صوت للهم يعله منها / يعتلي
على القبه ترفرف يعله منها / الأمان
المهدي إبن الزجيه يعله منها / يعلم إنها
تتنه چفوفه كل صبح و مسيه

آيه و الخدمها رايت إلها
طبيبة و بس معاجز رايت إلها
لأن عباس منطي رايت إلها
و منطيها كرم بيده السخيه

على گبتچ تصد گلوب و أنظار
الهجر بالروح ما غيبچ و أنظار
إجيتچ يبت داحي الباب و أنظار
تمدين إيدچ برحمه عليه

وحگ من بجدامه سحگ عاللات
شريفه شكثر من الناس عاللات
گضت حاجات و شگد شفت عاللات
الصعب كلش سهل عالهاشميه

و حگ الطاح بالطف غاد و إلهام
شريفة شگد تخلص كروب و إلهام
إجوا زوار يم القبر و إلهام
فتحت باب الحسن و إنطت هديه

نامت بس مآسيها صحنها
نوايب عاشر محرم صحنها
لذلك صار مستشفى صحنها
بلا كشفيه تشفي الهاشميه

الحزن من صغر سني فاتحه آني
و على الأطياب أنصب فاتحه آني
شكم باب بضريحي فاتحه آني
الوصلها يطيب من كل الأذيه


و حگ ذاك الضعن و الذي سر بيه
دليلي بخدمتچ للموت سر بيه
تره الباري ضريحچ وضع سر بيه
و جعل بيه الشفه لأهل البريه


خادم العلويه شريفه
الحاج محمد عبد الرضا العيساوي

يم باب الطبيبه تخلص كل مصيبه
من تنادي بإحساس زينب يا غريبه

إجينالچ يباب الله نتوچه بمآسينه
كل خادم وصل يمچ ينوح و دمعته بعينه
بلائات الدهر كثره و بس إنتي التخلصينه
برحمتچ يا بنت فاطم عليچ الزهره غطينه

ذات الزهره ذاتچ يالطيبه صفاتچ
بجاه الإسمه عباس غطينه بعباتچ
***************************

يحره محملين هموم و اتعنينه يم دارچ
كريمه و بت كريم إنتي ما رديتي خطارچ
يبت خير النسه گصدناچ يالفرحتي زوارچ
أيات الشفه بكل بيت خليتها آثارچ

آثار الكرامه للمحشر علامه
خليتها مقياس حد يوم القيامه
***************************

بضريحچ لذنه هذا اليوم تشكي الحاله دمعتنه
يدكتوره بهضمنه نصيح كل الدنيا سمعتنه
نشكيلچ هضم و جروح و اللآلآم تبعتنه
خدام و على الشباك يا محلاها لمتته

نلتم و نزوره يالما يطفه نوره
هاي الخدمه يا ناس صارت أحله سورة
********************************

يدكتوره الزمن ظالم و العالم قسه بأمره
و إحنه أولاد داحي الباب ذاك اليشبع الفقره
إجيناچ و قسمنه إعليچ بأمچ فاطمه الزهره
تنظرين بعطف لينه تكفينه فقط نظره

نظره تطيب الآلآم و تحقق للأحلام
چلمه و ترفع الراس يمچ إحنه خدام
********************************

يبت حيدر علي العالم شوكه و إحنه بيه ورگه
و بينه للجره إعله حسين مو شهگه ألف شهگه
السمع بمصاب ابو الأحرار يعثر بالهوى حگه
إجينه لبابچ و صحنه مثلچ و الله ما نلگه

يا تربات الأطهار ويانه الدهر جار
عندچ للشفه كاس يخمد جمرة النار

يلي كاصد خلي نيتك صافيه
زور كبري وبيدك اخذ العافيه
تنجلي كل المحن من تصل يم الصحن
يم شريفه يم شريفه


انضر الكاصد واعرف اشرايد يشكي من جور الزمن
امسح ابنحره برايتي الخضره بأسم الإمام الحسن

تنجلي اهمومه من ايشوف المناره
يطمئن كلبه لمن يقره الزياره
قبل لايدخلي ياخذهه البشاره
تنجلي اهمومه ويرد هوه اعله داره

ياخذه ابأيده الحسن ويطب مظيفه
يحصل امراده وينادي ياشريفه
شكرا البنت الحسن من تصل يم الصحن
يم شريفه يم شريفه


يالتجي زاير لاتضل حاير اقره بدروبك قطع
صور وكلهم للبشر كلهم منهه ماواحد رجع

كل مريض اليكصد البنت الزجيه
ينفض آلامه الضريح الهاشميه
رحمة الله الواسعه لاهل البريه
جود طه والشمايل حيدريه

من تصد عينك على آيات الكرامه
كلبك بشباچي يتزايد هيامه
كلبك لبشباچي حن من تصل يم الصحن
يم شريفه يم شريفه



يمي خدامي انسه آلامي وانسه آلام السبي
هذا اليفتش وهذا الينضف وهذا اليوزع عبي

خادم اليكنس يذكرني ابمصيبه
من عجاج ايصير كلبي يوج لهيبه
اذكر الخيل وسبي عمتي الغريبه
وأذكر العباس والشيبه الخضيبه

من اشوف الازدحام اتمرني عصره
اذكر الخيل الاجت لحسين عشره
دموع البعيني انشفن من تصل يم الصحن
يم شريفه يم شريفه



عندي اوصيه لليجي ليه من تجي وياه طفلته
لايأذيهه ولايعت بيهه حتى لو هي اذته

الطفله ماتحمل تره جر واذيه
بالاخص لو إسمها هالطفله رقيه
من الشمس آني اضللهه بديه
مثل اخيتي اللي انسبت بالغاظريه

هالاطفال اللي تجي ارعاهه
وكعد آنه بالضريح وياهه
نكعد نسولف مزن من تصل يم الصحن
يم شريفه يم شريفه



لومحرم هل اعلك المقتل بموكبي الكل المله
وآنه كل قوتي اصرخ بصوتي هله بالزاير هله

افرش الزوار عمي اعيوني الثنين
مودع الله بالسلامه توصل احسين
كله نحملك سلام ابدمعة العين
من شريفه اللي مشت ذيج الميادين

يالنخيتك عني اكصد بالنيابه
يم الحسين اسجد وقبلهه بابه
وسولف اهموم الزمن من تصل يم الصحن
يم شريفه يم شريفه

تسألچ هالليله كل خدامچ
جمر الخيام شعمل بجدامچ
يالهاشميه إنتي و رقيه
جمر الخيام شعمل بجدامچ

خدامچ الليله إعتنت يمچ يبنت الزهره
عدها سؤال بحضرتچ بنت الحسن يالحره
يا بت علي الرد الشمس يا بت كريم العتره
تسأل على ذاك الألم من دستي فوگ الجمره

من ركضتي و دمعتچ بعيونچ
حرمله و شمر إعتنوا ياذونچ
بذيچ المسيه إنتي و رقيه
جمر الخيام شعمل بجدامچ
،،،،،،،،،،،،،،،،،،،،،،،،،،،،،

نسأل يبت طه النبي و ندري الدمع بعيونچ
لا لا تحسبين الخدم بهالمسأله ياذونچ
بجدامچ سحگتي الجمر و سوط إلتوه بمتونچ
من كثر ما شفتي هضم بچيتي اليحبونچ

ينحب إعليچ السمع بجروحچ
يا عليله إچم مصيبه بروحچ
و إچم أذيه إنتي و رقيه
جمر الخيام شعمل بجدامچ
،،،،،،،،،،،،،،،،،،،،،،،،،،،،،،،،،،،،،،،،،،،،

من طاح عمچ عالثره وخيل العده بصدره ترض
و طف المآسي لكل ألم فوگ المخيم ينفض
نبچي إعله حالچ بالخيم لهذا الجرح لا منغض
شحال العليله من إهجموا فوگ الجمر من تركض

ثگلت جدامچ رمال الهيمه
فوگج و تحتچ لهيب الخيمه
شفتي المنيه إنتي و رقيه
جمر الخيام شعمل بجدامچ
،،،،،،،،،،،،،،،،،،،،،،،،،،،،،

لمن علت نار الخيم ركضتي بعيونچ دمعه
و لمن سحگتي إعله الجمر شلتي بجدامچ طبعه
ما صحتي آه من الألم صحتي ييمه البضعه
لحگي يزهره لكربله محبوبچ إنطگ ضلعه

همچ إعله حسين مو آلآمچ
من تنظريه ينسحگ گدامچ
بالغاضريه إنتي و رقيه
جمر الخيام شعمل بجدامچ
،،،،،،،،،،،،،،،،،،،،،،،،،،،،،،،،،،،،

معلوله چنتي بكربله بس عشتي بأجمل سوره
مثل العليل الممتحن هوايه إنتي عشتي بدوره
نتخيلچ ويه الگمر نورچ جزء من نوره
و چي گادچ بچف يمنته صار إسمچ الدكتوره

مثل أبو فاضل كريمه چفوفچ
بحزن أبداً ما ترد ضيوفچ
چفچ سخيه إنتي و رقيه
جمر الخيام شعمل بجدامچ
،،،،،،،،،،،،،،،،،،،،،،،،،،،،،،،،،

مو كل سنه لا كل مسه نتذكر إحنه مصابچ
و نطب ضريحچ ننتحب و نصب دمع يم بابچ
بگد ما بچيتي بدنيتچ صار الشفه بعتابچ
و اليگصدچ بيه أي مرض يلگه دواه بترابچ

يلگه وصفه محظره و مكتوبه
مشفي و إنمسحن جميع ذنوبه
عبره جريه إنتي و رقيه
جمر الخيام شعمل بجدامچ

بالوداع من إلتقن فاطمه و بنت الحسن
بالدموع تشابگن هاي المسيه


هذي بنـت حسين فاطمــة العفيفــه
ويه بت عمها التقت شبگت شريفه
خيه أرد أوصيچ بالما ينسه ضيــفه
للحــسن بالحلــه فتحيلــه مظـيـفــه

إنتي گضاية شدد زايرچ بالفرحه رد
صيتچ بــذاك البلد يصبح هويه


جاوبتها الحره والمـدمــع تسيلـه
آنه يا بــت عمي هم مثلچ عليلـه
من بعد عيناچ يا هـم راح أشيلـه
بعــد گــدامي مصايب  مـو قليله

راح أعاني من اليسر وألتقي بشمر و زجر
و أنچوي بنار وجمر بالغاضريه


لو وگعتي بضيج وصبحتي غريبه
ديري وجهچ للنجف يمــچ قريــبه
صيحي يا حيدر علي آنــه الحبيبه
بنت الإيمـام الحسن آنـــه بمصيبه

يسرع و يحظر إلچ ما تضل مصيبتچ
يگلچ آنه بخدمتچ يالهاشميـه

 
شلون أعوفچ صعبه يا بت عمي صعبه
والله دمـــع عيــونــي بـس لأجلچ أصبه
راح أوديــلـــچ انــه مــن گبــري تربـه
وإنـتــي بـيـدچ شيـديـلـي لگـبـري قـبـه

لو إجيتي لكربله زرتي لحسين وهله
راح أگلچ يا هله بالفاطميـه

لمن أوصل كربله وأنظـر ضـيـائـچ
إله أحظر يـمـــچ و أنصب عــزائچ
لــو دعيتي البـاري ذكريني بدعائـچ
إنــتـي التـشـافـيـنـي يا خيـه بشفائـچ

جدامي وحدهن سرن توجهن صوب الصحن
خيه يا بنت الحسن عينچ عليه


والله مــا أنســاچ يا خيتي العليلــه
ياهو يگصد حضرتي عنـچ أسيله
أدعي ربي تنتهي السفره الطويله
ونــلتقــي بجنة عــدن يــم العقيله

نگعد نسجل الإجوا للمجالس ولطموا
و النعم ما قصروا ويه إبن الزچيه


محمد عبد الرضا العيساوي

يالدنيتك صعبه وياك إگصد شريفه أنخاها

يالدربك بهالدنيا مليان بشوك
و أحبابك إبحر المواجع خلوك
آنه أرد أدليك إعله ناس ينجوك
بيهم صفة نشر الجود رب العرش خلاها

بيهم صفة جود و كرم ما موصوف
لفيض الكرامات الگصد عينه تشوف
يمهم ملائكة العرش دوم إتطوف
لو مدمعك سال بيوم إتعنه يم بت طه

لو جفنك لدمع الهضايم ساله
لگبر الطبيبه بدمعك إتعناله
چم زاير إتعنه و تغير حاله
چم عايله الگصدت ليه بسرعه إنگضت بلواها

چم عايله الردت عليها الفرحه
و چم عليل الخلصت من جرحه
هذي الطبيبه أم الكرامه السمحه
اليگصدها أبد لا ميخيب ميخيب التعناها

إليگصد شريفه و يدخل لمرقدها
بفيض المدامع يذكر لوالدها
دار الشفه ودار الشفاعه العدها
ورثتها من الزهراء و من حيدره رجواها

من فاطمه ورثت معاني العفه
لهذا السبب من جاها و يمد چفه
من كل بلايا الدنيا حتماً يشفه
ترد روحه ما بين الناس عطر القبر غطاها

إگصد شريفه بدمعة العين
بحضرتها مد إيديك الإثنين
ناديها يا بنت الحسن لمن تطب وسط الصحن
يا باب المراد يا باب المراد
*******************************

ياللي تدور عالفرج بدموعك المجريه
من ونتك مل الصبر تبچي و تون عصريه
إتوجه لباب السمه يمها الشدد مگظيه
أوگف على باب الكرم ناديها يا علويه

ناديها و أوگف و اطرق الباب
دنگ عليها و شم الأعتاب
حضرتها صارتلك وطن لمن تطب وسط الصحن
يا باب المراد يا باب المراد
*******************************

إگصد لعد بنت الحسن و إعرض عليها همومك
يمها إتبدل حالتك بسرعه يتبدل يومك
شگد ما شلت هم و قهر محروم لذة نومك
تلبسك ملابس عافيه هدم الشفاء هدومك

دكتوره هاي و تشفي الأمراض
يم القبر ما تبقه أعراض
تشفي العلل سر و علن لمن تطب وسط الصحن
يا باب المراد يا باب المراد
*******************************

لمن تصل باب الصحن للحره مد چفوفك
بنت الكريم أم الكرم حتماً جفنها يشوفك
تفرح لون زاير گصد تكتب بديها حروفك
تنادي يبويه يالحسن گوم و تلگه ضيوفك

يالگبرك ويه الگبه مهدوم
زواري يمي تذكرك اليوم
يا زايري علي الشجن لمن تطب وسط الصحن
يا باب المراد يا باب المراد
*******************************

لتعلي صوتك من تطب حاچيها بأحله حچايه
گلها عليچ أم الخدر و جود الكفيل و مايه
آنه الإجيتچ مختنگ و بصدري حيل هوايه
گالولي يمچ تنگضي حنيت إلچ چم رايه

جيت و شفت هاي الكرامات
مشكوره مشكوره العبارات
حسباتي گالولي صفن لمن تطب وسط الصحن
يا باب المراد يا باب المراد
*******************************

أوصيك من تطلب طلب من تدگ باب الرحمه
إقرالها أبيات و نعي و رددلك شكم چلمه
نوح لرقيه و فاطمه و لزينب أم الحشمه
تاخذ مرادك لو صحت يحسين يا ابو اليمه

نوح بگبرها و دنگ الراس
لو يمها تذكر عمها عباس
نوح إعله حماي الضعن لمن تطب وسط الصحن
يا باب المراد يا باب المراد
*******************************
يامن تزور أم الكرم تگلك أنه الناديتك
ياللي إعتنيت بأي مرض من عندي إخذ عافيتك
من عندي تاخذ حاجتك تعنيت إلي و عنيتك
لو تگصد بأصعب طلب تفرح ترد لبيتك

شما زادت أعداد اليگصدون
تنشر كرمها إعله اليزورون
حاجاتك الصعبه إنگضن لمن تطب وسط الصحن
يا باب المراد يا باب المراد
*******************************
خادم العلويه شريفه
الحاج محمد عبد الرضا العيساوي

نصبت الليله مجلس نوح فگدت الليله علويه
ماتت من سياط الجور من أخذوها مسبيه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

آنه المجتبى و حنيت للتبچي دمه من العين
للزورگ متنها بسوط لمن طاح عمها حسين
للصاحت يبويه بصوت لمن چتفو الإيدين
التتمنى يمرها بساع بدروب الطفوف البين

الشگفت عنها عمتها سوط بدمعه مجريه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

إجيت بلهفه هذا اليوم تجري الدمعه بعيوني
إجيت لمرقد بنيتي أتلگه اليواسوني
مواكب كثره يمها اليوم بالدكتوره عزوني
شچم موكب عزاء زنجيل لطمت وياهم متوني

و على قراياتهم ونيت ألطم خدي بإديه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

دخلت الحضره و الخدام نصبوا هالمسه قرايه
و شفت بالمجلس الزهراء حضرت تنعه ويايه
نضرتلي و تگلي بصوت هالخدام وفايه
إنظر يمه هاي الناس دگت بالعرش ثايه

إلهم مني يوم الدين قصور الجنه مبنيه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

مجالس كثره منصوبه على الموتها درب البين
على اللي ماتت بعاشور مو مره تره مرتين
أول موته بالطف غادة يوم الطاح عمها حسين
و ثاني موته هذا اليوم بأسرها مگيده الچفين

ماتت من سياط الجور تنزف دمعه مدميه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

عفت گبري و إجيت بآه هليت الدمع أحمر
و صرخات الهضيمه اليوم بقت بأسماعي تتكرر
بحضرتها شفت عباس و تعناها أبو الأكبر
صاحوا يالحسن مأجور ردنه بمجلسك نحظر

إجينه بهالمسه نواسيك نقره الليله تعزيه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

وگفت آنه إعله باب النوح أستقبل أنه لهالناس
من أنظر لطمهم حيل أبچي و أشهگ الأنفاس
دين التعزيه بهاليوم فضلهم احمله إعله الراس
وقسم يوم القيامه هناك تسگيه جربة العباس

دين و لازم نوفيه حگهم واجب إعليه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

نتمايل بألمنه لمن شمر ضربنه
آنه و رقيه و عمتي نذرف سوه دمعنه

آنه شريفه أم الحزن آنه الطبيبه
جتفوا إديه بالحبل ويه الحبيبه
كل واحد و مكتوب إله كلمن نصيبه
ضليت أتاني و أنتظر موتي شيجيبه

من راحوا الغوالي ضليت أرد سؤالي
يا موتي تلفيني شوكت بين المآسي ضعنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

لمن وگع حامي الخدر بالغاضريه
مستعجل إتعنه الشمر چتف إديه
من الرعب تبچي و تون ضلت رقيه
صحتلها و بلايه نظر ركضت إليه

نادتني يا شريفه عيون الشمر مخيفه
و تشابگينه بكربله صوب النهر ركضنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

نتلوع و نحمل ألم مدمعنه سايل
و إنادي وين أهل الشيم وين الكوافل
وين اللي جابونه بترف فوگ المحامل
بس روس ضلوا يا وسف فوگ العواسل

ما شاهدو سبينه و حبل اليسر بدينه
و لا سمعو لصوت أجنبي بدرب اليسر شتمنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

كلها جراحات و ألم رحلة سبينه
نتگاود و نهمل دمع لمن مشينه
حبل اليسر كلش خشن يذبح بدينه
صحنه و لا واحد سمع ينغر علينه

محد فزع و إجانه يمسح دمع بچانه
بس الأعادي بهالدرب نتماوج بهضمنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

كلما مشينه بهالدرب دمعتنه تنصب
تنظر علينه و تنتحب عمتنه زينب
بيا حاله يمشي المنفجع و جدامه تتعب
و الرمش من گد البچي ننظرله شيب

و الشيبت جفونه تلهب جمر عيونه
صاحي بقه طول الدرب لا ما غمض جفنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

ما ردت يخلص هالشهر ما يبره همي
ردت آنه أفارگ دنيتي و أمشي ويه عمي
لا ما تهمني رويحتي لو يجري دمي
ردت آنه أموت بهالدرب يتعله إسمي

و تصير إلي مناره من تمشي للزياره
يوم اربعينه شيعته للمرقد إتعنه

انه بنت الحسن و أم الحزن آنه
إلي مرقد شفه بالحله عنوانه

أنه بنت الحسن و أنفاسه و جروحه
من بيت الكرامه أحمل ملوحه
بكراماتي رسمت لأهل الأرض لوحه
و بيباني تضل لناسي مفتوحه
تفرح من يجيها و تكشف أحزانه


أنه حيدر أبوي و فاطمه أمي
حرسو خدري وين النشمي و النشمي
بكثر ما بالحياة تحملت همي
صبحت عندي كرامه لليجي يمي
الگصدلي بهمه يخلص يرتفع شانه


عندي جروح لا تخلص و لا تنعد
حزن عيوني فاض و عالوجن ورد
ردت موتي و يه عمي و خالقي يشهد
المصايب بخلافه إعله الگلب تشتد
تمنيت أنذبح بالحومه بمچانه


أسيرة نوحي صرت بعالمي وحدي
جراحاتي الچبيره بدنيتي تحدي
سرت درب السبي وي عمتي إولدي
سرت و الدنيا سارت بالدرب ضدي
صرت يا ناسي للحسرات سلطانه


صرخت بآهتي بالعاشر و يومه
من شفت الحسين مسلبه هدومه
سگت ارض الطفوف بكربله دمومه
نظرته آنه و بگيت لحاله مهضومه
مو للماي روحي لوجهه عطشانه


بدرب سبي الاطايب ينتظر موتي
صحت يا ويلي بس محد سمع صوتي
وسف بس النسه يشيعن بتابوتي
بامان الله شريفه إعله القبر فوتي
على درب المشي لحسين نيشانه