#عبدالله_الرضيع_ع ٢
___

هوه مو هوه كل خطوه انظر للرمح
منخطف لونه وعيونه مو مالت ذبح
___

كلما التفت صوب الرمح يلچمني جرح
نبلة منحره
عبدلله تره نحره ترف مو مالت نزف
ست اشهر تره

شكد حاولت اصد عنه
بس مشتاكه اشبكنه
هلبت لو نزل مره ردت من ابني شبكه
من رمحه نزف دمه
و المتبدي شيلمه
بوجهي يبتسم و انه انهظم بكليبي حركه

يافرح روحي وجروحي ياوجه الصبح
يا تعب حظني كل ظني مو مالت ذبح
__

برمحه ما ثبت نحره يكع ومن دمعي نكع
كل الدرب اليسر
من كثر الجرح وجهه دمه وشفته من الضمه
صارت تنفطر

راسه ما ثبت خطوه
كلسا عالارض يهوه
راسه ازغير وخشن الرمح كدما يلجمه
شدوا بالحبل راسه
و بنحره الرمح جاسه
واصل حد لهاته و النزف ما خله دمه

اسمع اهاته شهكاته ما يكفي الشرح
ميت وشفته يا ونته مو مالت ذبح
_

حظني يالولد فارغ صفه وجفنك من غفه
عيشني السهر
انظر وجنتك كلها دمه وعالخد لاطمه
يولدي بقهر

ما تنزل يبعد أمك
خلي لهفتي اتضمك
ما فاركته حظني من اديه الايد الحسين
هسه برمحك انظرلك
ماكو چف اليحملك
نايم عالرمح يلي جنت مهدك رمش عين

ما برد صدري يا عمري بعدك يتضح
يخلص ابنوحي يا روحي مو مالت ذبح
____

امشي والدمع مني رسم لوعات السهم
ذابح ركبتك
من خالي رجع چف والدك عني بعّدك
انطاك العمتك

ساكت رجعك يبني
اميه شربك ظني
ماكو امناشغك ثاري السهم كاطع لهاتك
عالهزل وانه اتصور
تلجم كطعة المنحر
كون انه المتت يبني كبل ساعة مماتك

وانه عالهزل اتخيل نحرك ينجرح
ريته ذابحني موش ابني مو مالت ذبح
___

بعدك ماكو ظل عن الشمس ولا تهوه النفس
وانته منجتل
ست أشهر كضه منك عمر وانه بهالگدر
عندك ارتحل

يا عيشه بعد تحله
و رايح مني عبدالله
ماتت كل دللول المهد بعدك يغالي
ادعي كون اجي يمك
يلي ما سلم جسمك
رضّوا بالرمح وانه الذبح بعدك هنالي

انهظم بيها امن احجيها مي عنك يشح
هظمة الهظمه يايمه مو مالت ذبح





حسين الأمين

#ليلة_الوادع ١
لسان حال الإمام علي السجاد عليه السلام
____

الخيمه رسمتلي صور منيه
اشد من گطع النحر عليه

والدي ايودع عياله
كلشي بالدنيا بچاله
____

التمن و صار الدمع كل الحچي
وحده ماتت وحده بيده ترتجي
عمتي زينب سمعته و شبعت بچي
يا عيالي رايح انه و ما اجي

الخيمه صارتله جرح هذا أشد من الذبح
الفرگه صارت تتضح قتيل
شفت دمعات اليتم شبت بروحه الم
بحيله گوه ظل يلم ثچيل

شبگته عمتي و تون سمعها
نشّف ابچفه الجفن دمعها

بخطوه كل دمعي جراله كلشي بالدنيا بچاله
____

ما بقت كل دمعه بينه بخطوته
من ظهر مهره اشاهد طيحته
عمتي من الخيمه تسمع رضته
الله لا ينطي الخيول السحگته

نشّف عيون الدمع استمع كسر الضلع
شفنه راسه منگطع سليب
الخيل تسحگ عالصدر طحنت بعظم الطهر
امن الگفه حزه الشمر تريب

عمتي تركض بالحرب يحيره
من يصدوها الغرب چبيره

منفرش عالغبره حاله كلشي بالدنيا بچاله
__

من وگع شفنه العساكر و الخيول
فوگ صدره تسحگ و ظلت تجول
جتني زينب ناشدت عمه شتكول
فرن اعله الحومه هالموقف يطول

أنظر الحال الحرم اتشگاف و ماكو رحم
السوط و النار ابخيم تطوف
طفل بالحافر عثر طفل متگطع وذر
و ابن مگطوع النحر نشوف

اقسى كل منظر جره عليه
طفله تمشي اميسره وسبيه

جسم أبويه الخيل جاله كلشي بالدنيا بچاله
___

طفله طاحت عالجمر مچويه ادين
ارقيه سلوبها التراچي الظالمين
وحده تصرخ عمّتي وحده حسين
بالترب ركضتهن الما أدري وين

راس مرفوع برمح و راس بالعين الجرح
وانه كل لحظه انذبح عذاب
طفله تركض للنهر طفل بالحومه عثر
وحده تنده يالكمر مصاب

حشمت عمي الكفل يجيها
الثوب بالنار اشتعل عليها

عالنهر موته حلاله كلشي بالدنيا بچاله
__

بهيمه تالي گعدوهن عالتراب
لا خيام و لا حراسه بس حجاب
الزينب السوط اعتنى بكل العذاب
من بعد ما شاهدت اعظم مصاب

نامن بوسط الرماد غربه حراس و بلاد
الهوه صاير بس سواد دخان
وحده تنشد يا حسين عمتي يا عباس وين
تريد اخيتك يالحنين مكان

والله حيره حيرتي بعذابي
ألم زيدت عمتي مصابي

والشمر جهز حباله كلشي بالدنيا بچاله





حسين الأمين

(بسمه تعالى ) رئيسيه تجليبه
لسان حال رقيه بنت الحسين( ع)

ها يموتي --- بجيتك ترحمني
من ونيني --- من تجي تخلصني
هوايه متأخر عليه---وأني ميته من الأذيه
ها يموتي -------- هايموتي

ألك يا موت أريدن أحجي مأساتي
وريدك تحكم أنته التحجي دمعاتي
من اول عمري وكظي عمري باهاتي
زغيره ودهري سلب مني ضحكاتي

جنت أني ---- مدلله ومهيوبه
وعد أبويه--- شكد جنت محبوبه
مخدره وأسمي رقيه--واني ميته من لأذيه
ها يموتي-------- هايموتي

عكب حسين أبويه عمري ما ردته
صحتلك موتي ردته وماسمعت أنته
مدري انته سمعتني ويومي أجلته
تحسرت وبجيت وحسرتي بسكته

شكد تمنيت--- أني بالطف موتي
وانه ظنيت---- ما وصلك صوتي
من تسميت السبيه--- واني ميته من لأذيه
هايموتي--------- هايموتي


جروح الطف بعدهي ابالي تترتل
ولحد هالساعه أني اكبالي اتخيل
لشمر جدامي جاي بسوطه يتمرجل
وينادي بصوته وينه البيجن أتكفل

خل يجيجن---- لو عدل يحميجن
ذبحته بيدي--- وبيدي راح اسبيجن
ومن سمعته صار بيه--وأني ميته من لأذيه
هايموتي------- ها يموتي


كل ظيم السبي جرعته وتحملته
وأنه شجم ليل مر عليه ما نمته
لجن بس ساعه وحده جفني غمضته
وبهالساعه أبويه أكبالي أجه وشفته

من منامي----- كعدت أصيحن بابه
بحلمي أجاني---- وكمت أشم بثيابه
وين أبو النفس الأبيه--- وأني ميته من الأذيه
هايموتي------ هايموتي

صحت ها وين ابويه والدمع يجري
وعلي شتاكيت أله اليتمني من زغري
جاي اشتمله ريحه وريحة بصدري
قريبه عليه لاجن وين ما أدري

بروحي أشتم --- ريحته وأنفاسه
ثاري أليه ---- بطشت عافو راسه
شفته وصفكت بأديه--وأني ميته من الأذيه
هايموتي ------- هايموتي


الزمن بحزانه شيب كل شعر راسي
زغيره ولاجن بكد دنيتي حساسي
عله راس حسين أبويه خمدة أنفاسي
وصحت شلي بحياتي بغير أعز ناسي

صار موتي--- فوك راس الغالي
أحمد الله ----وشكرك مرسالي
من أجيت أنته أليه---وأني ميته من الأذيه
هايموتي--------- هايموتي


(تمت بعون الله تعالى) حسين السيلاوي الحلي

بسمه تعالى
نزله

معاهدينك لا أبد هذه العهد
معاهدينك وحنه مانخلف وعد



بكل زمن يحسين نبقه عاللعهد وفايه
ومن تجي أيام أربعينك نكصدك مشايه
ولعلى حبك يضدنه انكله بس أحجايه
ما نهاب الموت أحنه الموت أله شرايه

وبالمنايه نصيح ياحيدر مدد
معاهدينك وحنه مانخلف وعد


شيعه وعنوديه حيل ويالتضدنه أطباعنه
ولتحاربنه عله حبك ما تظل ابكاعنه
خاسر العاداك هاذه وربح كلمن طاعنه
شيعه بس الموت كادر يلوي هوه أذراعنه

يابو الاكبر كلشي بعضانه شهد
معاهدينك وحنه ما نخلف وعد

هايه ثورتنه بمحرم وبصفر ملكانه
لو مشينه أجم نبي أحنه يفخر بممشانه
وصوت نسمع لو كعدنه من التعب نادانه
كوه حيلك ها يزاير كوم ومشي ويانه
علينه كبرك نعتنيها شما بعد
معاهدينك وحنه مانخلف وعد

ما نمل لو كل عمرنه بي نجي نمشيلك
وما نوافيك أحنه ندري لو دمه نبجيلك
سيدي شمنطينك احنه وبالله شمقدميلك
كلها اقل من تضحياتك تره شما نفديلك

ومن عشكنه ما نمل أحنه أبد
معاهدينك وحنه مانخلف وعد


خدمتك يحسين نعمه واشكره الله عليها
الكل موالي أبينه أدينه رحمته منطيها
ها يخادم بس تميل النعمتك تجفيها
ربك انطاك انته نعمه ولازم اتداريها

لتزم بيها خدمته حسينك سند
معاهدينك وحنه ما نخلف وعد

(تمت بعون الله تعالى)
حسين السيلاوي الحلي

بسمه تعالى
تراث ميمر

عكبك يطه المختار بيه لدهر ما يرحم

يلي جبت كل عمرك اتداريني
ينطيك كللبك وحدي تخليني
فراكك يبويه وداعتك ياذيني
ولعجب بعدك دنيتي تراويني

ياوالدي ومن اتروح عكبك تراني أتيتم


يالرايح وتاركني للهم ولنوح
لا ما تشوف بغيبتك راحه الروح
يابويه أنته راحتي ومن تروح
بالكللب تترك للحزن بيت جروح

بيه جرح هجرك صار للموت ابد ما يلتم


رئفت حنانك بويه وين الكاها
راحت وظلت روحي تتمناها
كل عمري اظل أنعاها ما أنساها
وروحي ردت يوم الاجل وفاها

ولاأظل كل يوم انعاك وبشوفتك اتحلم


أني الزجيه ابنيتك المنفجعه
ما مل عله مصابك مسيل الدمعه
ولحد مماتي عليك أظل بس أنعه
وثوب السواد عليك ابد ما نزعه
ومن الهظم دمع العين بغيابك يهل من دم


يابويه بس تغمض أنته عيونك
كل صحبتك متأكده يغدرونك
لعاشو بخيرك باجر يشتمونك
ولمن اكلهم والدي ينكرونك
لجانو بوكتك اصحاب من عدهم أنه اتشتم


عكبك تره ليجرالي بي أنته ادره
من صحبتك ينهشم ظلع الزهره
وبداري نار اهل الحقد مستعره
ولعجب حيدر عالجره شيصبره
شيصبره لو باجر شاف جدامه ظلعي مهشم


(تمت بعون الله تعالى)
حسين السيلاوي الحلي

(بسمه تعالى ) نزله

هايمهدي ها يمهدي

أعله ثارك يمته تظهر هايمهدي
بضلوعي النار تسعر هايمهدي
جروحي الثاري تكبر هايمهدي
بظهورك جرحي يجبر هايمهدي

يوم تظهر يوم تظهر

برجوعك احله بشره يوم تظهر
الظلع يتشافه كسره يوم تظهر
وحك دمعة الفقره يوم تظهر
الكلب من تجي تسره يوم تظهر

ها ييمه ها ييمه

الشغل فكري وضهدني هاييمه
مصاب حسين أبني هاييمه
الجراله أكثر فجعني هاييمه
لحجر ذاب عله وني ها ييمه

ثار جدك ثار جدك

الترك بجروحي عله ثار جدك
عليه دم دمعي أهله ثار جدك
ييمه الثاري خله ثار جدك
الأهم من هذه كله ثار جدك

أبو فاضل أبو فاضل

ألك خله أنته رايه أبو فاضل
تركها أوبيها غايه أبو فاضل
وكتب بيها حكايه أبو فاضل
طللب ثار السبايه أبو فاضل

يابو صالح يابو صالح

عليك الحاله تصعب يابوصالح
من جيبن طاري زينب يابوصالح
تظل متإكده تنحب يابوصالح
ودليلك جمره يهلب يابوصالح

من أخبرك من اخبرك

ييمه أدري أألمك من اخبرك
بخبر طك ظلع أمك من اخبرك
أزيدن جرح همك من اخبرك
غيور ونار دمك من اخبرك

عله ثارك عله ثارك

الحزن حابسه بصدرك عله ثارك
واجرحك من اخبرك عله ثارك
أمر من الله أمرك عله ثارك
ويزيد بعمر صبرك عله ثارك


(تمت بعون الله تعالى)
حسين السيلاوي الحلي

(بسمه تعالى )

بدمعة عزانه بهاي المسيه
لصاحب زمانه ندعي سويه
يالذي قمتو العزاء اهنانه مقبول الدعاء
بدمعة عزانه

يا لتقيمون العزاء بكل عزيه
ليوم خل نرفع أدينه بصافي نيه
وطللب نطلب من شفيعتنه الزجيه
هيه باب الله الوسيعه لكل قضيه
موجوده ندري بهذا عزانه
لزهره الزجيه وتسمع دعانه
سيدة كل هل نساء اهنانه مقبول الدعاء

اليوم يزهره احنه يمج مشتكانه
رفعنه ادينه وكل محب يلهج لسانه
بحسره ناده تقبلي يزهره دعانه
ودعي للغايب يجي لهذا زمانه

تاذي فركته شيحمله الفراك
ولشوفته العين كل لحظه تشتاك
بحزن واهات وبكاء اهنانه مقبول الدعاء

طول اعلينه ابغيابه وذايبه الروح
يمته اشوفن رايته بجفه يمنته تلوح
من تجي الجمعه وتروح تزيد الجروح
عشت كل عمري انتظر ورويحتي أتنوح

أحسب باليام وبجفوفي أعدن
يظهر أمامي بهالجمعه بلكن
يرفع ابجفه الواء اهنانه مقبول الدعاء
بدمعة عزانه

عليه محبوبي أني غايب صارله سنين
بذنبي خاف أخرته اني يم الحسين
منج ارجو المعذره يا جوهر الدين
ورايد توفقيني أكحل ابشوفته العين

يالزهره يمته بشوفة ولينه
نستبشر احنه ونكطع بجينه
وتنتهي أيام العناء هنانه مقبول الدعاء

أشتري بروحي الخبر لو عنه أجاني
وشرط من أجله افتدي كل غالي أني
هوه امامي أل بسمه يتطهر لساني
مثله ما حبيت أبد أي شخص ثاني

لحظرة جنابه فدوه اروحن
وبين أدينه هنيالي أموتن
ترخص الجيته الدماء اهنانه مقبول الدعاء
بدمعة عزانه

(تمت بعون الله تعالى
حسين السيلاوي الحلي )

لسان حال السيده زينب (ع)

بحزني ومكابري روحي متألمه
وشهد أبلا ذنب أستشهدة فاطمه

فاطمه العنده الله ياناس شعظمهه
من أجلهه الشيعه من ناره فطمهه
أمي حته الوحي يتمنه يخدمهه
شكد فقيره وتارسه الدنيه ابكرمهه

من طبعهه الوفه اوبالكرم غانمه
وشهد ابلا ذنب استشهدة فاطمه

كل كرم طه لكوه موجود عدهه
والفقير اتعزه اكثر من ولدهه
أني زينب أدري وشهد من بعدهه
أبلا ذنب ماتت ودمعتهه اعالخدهه

ما مأذيه شخص تشهد اهل لسمه
وشهد أبلا ذنب استسهدة فاطمه

الزهره من ماتت مشت أزرك جفنها
وبيده ابويه اباليل شيعهه ودفنها
ألله لاينطي الحرم أمي من أبنها
واني وحسين وحسن يحرمنه منها

فكدنه من الزغر جوهر المرحمه
وشهد أبلا ذنب أستشهدة فاطمه

ياألهي أنتقم من راس الجريمه
الخطط ألهل فاجعه بمحنه أليمه
بزغري ومن أمي حرمني يا هظيمه
وصارت ابالسن الخلك زينب يتيمه

امي ظمهه الكبر وروحي متيتمه
وشهد ابلا ذنب أستشهدة فاطمه

يختلف عن كل البشر موت الزجيه
امن القهر ماتت وجت ألهه ألمنيه
توصي كامت بيه حماي الحميه
وعالخدر وعاللحجاب اتوصي بيه

بهالوصيه اعرفت عالحزن قادمه
وشهد أبلا ذنب أستشهدة فاطمه

من بعدهه الحزن ما فاركني لحظه
عاش حزني وياي جن كلبي وينبظه
شكد جنت ارتاح من اسم أمي الفظه
راحت وراح البجي اعليه افرظه

مو كفايه امن اهل ويه دمعي دمه
وشهد أبلا ذنب استشهدة فاطمه

(تمت بعون الله تعالى)
حسين السيلاوي الحلي

شلون امن لحزن ارتاح ومسح دمعتي
وثار أثلطعش معصوم لسه أبركبتي
أنفاسي صبر لظهوري أنتظر
ومسح دمعتي

بغيابي ابغربتي عايش وعيش بحزني عاشورين
الأول أسمه يا زهراء ولثاني أسمه أه يحسين
مصيبه من مصيبه أعظم ياهي لبيهه أغمض لعين
وأول يوم من عمري لاكاني ابدمع وونين

رافكني الحزن والنوح قبل لا أنولد
وحمد ربي وعاللثار بأيامي أعد
شيحمله الهجر لظهوري أنتظر
ومسح دمعتي

بداية حزني وألأمي أبتدت من عصرة لزهره
ويجبر خاطري الرادود عليهه ابلوعه من يقره
ظلعهه المنكسر بالباب غيري محد يجبره
يوم الأبتدي ابثاري يتشافه الظلع كسره

الظلمو أمي منهم راح باجر أنتقم
بجفي يصير سيفي نار أليصله ينلهم
مرفوض العذر لظهوري انتظر
ومسح دمعتي

بعد الزهره حامي الجار يطبره ابراسه أبن ملجم
ابيت الله ابشهر رمضان وشهر اصيامه ما تمم
قبل لا هل الجرح يلتم من بعده الحسن ينسم
وبعده أتلكه شهر احزان تهل ادموعي بي من دم

شهر أشتم هواه اجروح عليه من يهل
شهر بيهه لطفل عطشان ظامي وينجتل
مصايب تنذكر لظهوري أنتظر
ومسح دمعتي

شهر حزني وألم روحي أعيشه ابحسره وبعبره
بغدر بي عالنهر عباس يكع لا يمنه لا يسره
أنذبح بي جدي وعياله مشت ويه الغرب أسره
وجسمه الظل بلا نحره جم حافر سحك صدره

رضت صدره خيل اعداه ماظله صدر
وصدر الي تدوسه الخيل منه اشينجبر
شجبر ياكسر لظهوري انتظر
ومسح دمعتي

اليطللب ثار ما يرتاح وتظل بي تاكل الحيره
مساهره يبقه ليل انهار يعيش ابطيف تفكيره
مثل حيدر صرت لمن عله الزهره سكن بيره
سكنته ألبير وحجيله بسبي الفكدة ابو الغيره

زينب قبل ما مولود صاحتني بألم
أدركني يراعي الثار حركرهه الخيم
والثار الخدر لظهوري انتظر
ومسح دمعتي

مكابلل صارمي اوياه أحجي ابدمعي وأهاتي
وثار أثمن أئمه أطلب بعد تسليب عماتي
كظو أهلي بغدر وبسم وعله لخد تجري دمعاتي
شما طال الفرج عمره أبد ما أنسه ثاراتي

تخلص غيبتي يا يوم ونهض ونتفض
لاجن بمر رب الكون لا ما أعترض
من عنده الأمر لظهوري أنتظر
ومسح دمعتي



حسين السيلاوي الحلي

اورثت وبزغري من والدي علماي
وقسم لو ما أكع ما يكع علماي
أخو زينب أنه اوخلدت عالماي
عبر ودروس وحقوق الخويه

حسين السيلاوي الحلي

شهر عاشور بجروحه بدنه
يمن لأطهر بدن فدوه بدنه
صعدنه اليوم للقبه بدنه
راية قبتك يبن الزچيه

هجركم بويه للدلال مارد
لغير الروحه بويه وياك مارد
يگلولي الضعن لو راح مارد
تموتين و تضل عينچ جريه

عليچ الحزن بنت حسين يندار
و إلچ دهر الهضم يا وسف يندار
المثل حسين وسط الگلب يندار
وحيد بدنيته و بالغاضريه

أضل أصرخ وره الأكبر عليلاه
تعوف إختك و تدريها عليلاه
شفته ينوح بس صوته عليلاه
نجيچ و ناخذچ للغاضريه

و حگ من الخلگ چفه شفت بيه
أشوف الناس دلالي شفت بيه
نظرت وجهك يبو اليمه شفت بيه
ملامح تختلف بالغاضريه

إجه شهرك و إجيت ألطم على الراس
و دليلي من الهضم يحسين مخنوگ
شفت راية ضريحك رفت بنوح
و أنه المذبوحه خويه حسين بالشوگ
قميصك نشرته الليله السماوات
بده شهر الحزن يالغالي من فوگ
شفتها ترفرف و حنيتلك حيل
يا أجمل حسين ترتله الحلوگ
ذكرت أيامك و ذيچ المعاناة
ذكرت ذبحك يخويه و صعدة النوگ
و ذكرت حبال إيدي و نوح العيال
و ذكرت أيام سبيي و طبة السوگ
الدموع لغير شخص ما تهل كون
لغيرك يا حسين الدمع ميلوگ
لنوح إعليك نوح لگطع الأنفاس
نوح الفاگد أهله و گلبه محروگ

دمع عيني إعله غير حسين ما لاگ
و مثل شخصك أبد بالكون ما لاگ
مشيت و خصمي لاگ الوجه ما لاگ
بچفه و بالسياط يدگ عليه

شهر عاشور بمصابك بدنه
يمن لأطهر بدن فدوه بدنه
صعدنه اليوم للقبه بدنه
راية قبتك يبن الزچيه

يم كلك كرم متروس ملگه
بعد مثلك يبو السجاد ملگه
أدور أوصالك إعله الرمل ملگه
خذتهن بالحوافر خيل أميه

يشيعي الحزن عالكونين نشره
و گوم لمجلس المذبوح نشره
قميص حسين جبرائيل نشره
على ابواب السمه بهاي المسيه

لعظم مصيبتك خويه وجلها
طحت و الخيمه إجه خصمك وجلها
لون موت يحظر لإختك وجلها
و لا تمشي عكب عينك سبيه

محبوبي سار لكربله لا ما يرد محبوبي
ضلت عيوني هامله دمعي حبر مكتوبي
وياه رحل ضي البدر ما يسوه بخلافه العمر
روحي بجراحچ ذوبي
**********************************

هالليله سافر والدي وياه أخذ كل روحي
بعده بقيت بلا أهل اسمع صدى بس نوحي
راح و أخذ وياه گلب تاركني ويه جروحي
لوح المصايب عاينت بس الهضايم لوحي

لوحة جراحات رسمت و تطشرت ألوانه
باللوحه ينبض هالگلب و محاوط بأحزانه
چم فاجعه إبالي تمر ما يسوه بخلافه العمر
روحي بجراحچ ذوبي
**********************************

سافر و أخذ كل الأهل و بغربتي تركوني
و شلون أصبر ناظري لوما تشوفه عيوني
من بيتي راحت سلوتي نار البعد بضنوني
منهو اليصبر مهجتي و بالراحوا يواسوني

يواسني بالسار بضعن و تلاشى عن أنضاري
و شگد وراهم صيحت روحوا بأمان الباري
آه شعظم هذا الأمر ما يسوه بخلافه العمر
روحي بجراحچ ذوبي
**********************************

سار و خذه حته العطر ذاك الأشمه و أشفه
سار و ترك نار الگلب مستعره أبد ما تطفه
ضفتين عندي من الدمع ضفه تموج بضفه
أتمنى لو مره بعد اشتمه و ألثم چفه

أتمنه أغفه براحته و بحضنه يخلص ليلي
و لا أبقه من بعده أون وحدي يتهدم حيلي
من الفجر حد الفجر ما يسوه بخلافه العمر
روحي بجراحچ ذوبي
**********************************

ما شوفه من سافر بعد لا شم چفوفه السمره
لا أگعد بسد والدي لا شم أبوي بنحره
هو المضيعله شمس شله بعد بالگمره
و الفارگت أعظم أبو ميهمها كون بأسره

محد يسد خلة الابو محد يعوض الوالي
چم غالي من عندي رحل عني مشه إچم غالي
لمن بده وكت الهجر ما يسوه بخلافه العمر
روحي بجراحچ ذوبي
**********************************


سافر حبيبي لكربله بگلبي علت آلآمه
يخنگني ضل ليل الهجر ليل الهجر ما نامه
كل طفل عنده فد حلم و يسولف بأحلامه
كل حلمي أمشي لكربله و يضمني فيّ خيامه

عني رحل و آنه أيست و تطشرت أحلامي
من سمعت بيه ينذبح حزوا وريده الضامي
إلمن أتاني و أنتظر ما يسوه بخلافه العمر
روحي بجراحچ ذوبي
**********************************

سافر حبيبي و ما يرد معلوله ضلت بنته
تبچي و تحن وكت العصر دمعتها تنزل سكته
يمته تناشد نلتقي خلصت دموع اليمته
كون أگعد وياك أنتحب بس آنه أگعد و إنته

يا بويه بلكت نلتقي يا أحله من كل ناسي
و اشرحلك شسوه البعد دهري بغيابك قاسي
كسري بكلامك ينجبر ما يسوه بخلافه العمر
روحي بجراحچ ذوبي
**********************************

إنصار الحسين وگفوا يم خيمة المهيوبه
صاحوا سواتر من زلم باچر إلچ منصوبه
يالحره هاي حچايه فدوه إلچ هاي و هايه
باجر إلچ منصوبه
"""""""""""""""""""""""""""""“"""""""""""""""""""""""""

أذن حبيب من الخيم ناده ليوث الغبره
يالله يفرسان الوغى خالنگصد إعله الحره
إمشوا إعله زينب بت علي هالليله تحمل حسره
من عدنه كلش خايفه خافت نعوف النصره

تخاف نعوف أخوها حسين وحده يقاتل خصومه
سمعتها تسولف بهاليوم زينب حيل مهضومه

خل نمشي يمها و ننجمع هالليله هاي نسرها
گراب السيوف التنشهر يم بت علي نكسرها
يمها ندگ الثايه فدوه إلچ هاي و هايه
باجر إلچ منصوبه
"""""""""""""""""""""""""""""“"""""""""""""""""""""""""

گربوا على خيام الطهر و بدمعته المجريه
ناده حبيب الطاهره يابت علي المرضيه
سلم عليها و جابته گللها يا علويه
لا ما نعوف إحنه الخيم لو ننذبح يوميه

شما يبقه نفس بينه بكتر خيمتكم نرابط
خدامچ يبت حيدر بإسمكم نحچي و نزامط

شما نبقه نشتم الهوه شما عشنه فوگ الغبره
نبقه على طول العمر خدام بنت الزهره
و تنادي هالوفايه فدوه إلچ هاي و هايه
باجر إلچ منصوبه
"""""""""""""""""""""""""""""“"""""""""""""""""""""""""

مو إحنه كل أهل الأرض مولاتي لأجلچ فدوه
هو العمر ساعه و يمر كلشي بعد ما يسوه
أمني و أمان الله إلچ طمني قلوب النسوه
خبريهن أنصار السبط موت لأجلكم تهوه

خبريهن تره الأنصار يحسبون الحرب نزهه
دم رگابهم لو سال فدوه لطارف خيمهه

نطيح إحنه كلنه و لا يگع بالطف ستر من خيمه
لا ينكشف ستر النبي و تركض مره بنص هيمه
لمن ترف الرايه فدوه إلچ هاي و هايه
باجر إلچ منصوبه
"""""""""""""""""""""""""""""“"""""""""""""""""""""""""

إنسرت بنت فارس مظر حاچت حبيب بهيده
صاحت يعمي و النعم منكم ليوث البيده
تزلزل حبيب من الخجل و السيف هلهل بيده
منهو آنه و تحاچين إلي منهو آنه يا صنديده

أنه اللي مستحي منكم تهل من عندي هالعبره
و أنه المفروض أفديكم مو مره ألف مره

أفديكم و أنطي النفس لا ما تهمني أيامي
من صغري آنه رددت فدوه العمر للضامي
من صغري هاي الغايه فدوه إلچ هاي و هايه
باجر إلچ منصوبه
"""""""""""""""""""""""""""""“"""""""""""""""""""""""""

فدوه نذرنه هالعمر ننطي السبط كل دمنه
عدنه إبن طه النبي گرب الأجل ما يهمنه
شما ننطي لإبن المرتضى لا ما نحس قدمنه
يكافئنه طه المصطفى لمن نناصر إبنه

لون كل هالرؤوس تطيح مهم كون السبط سالم
و لا نسمع ونينه هناك من تحاوطه الوادم

شفنه الحسين أعظم شمس و تعلقينه بنوره
صارت كواكب عيلته يم الخيام تدوره
دورة نهر وي مايه فدوه إلچ هاي و هايه
باجر إلچ منصوبه
"""""""""""""""""""""""""""""“"""""""""""""""""""""""""


صاح الحسين بدمعته و النعم من هالشيبه
دنگ حبيب لهامته كل العزم بگليبه
گلهم يفرسان الحرب يالله يزلم النيبه
حشمهم و زادوا عزم ماكو بگلبهم ريبه

حسين يعاين الأنصار يهمل مدمع عيونه
يگلهم يا بعد بيتي أجركم غاد تلگونه

هناك الجزاء السرمدي هناك الأجر يتضاعف
ابيض وجهكم بالحشر و لون البشر يتخاطف
بالروس المحنايه فدوه إلچ هاي و هايه
باجر إلچ منصوبه
"""""""""""""""""""""""""""""“"""""""""""""""""""""""""

نادوا الفرسان وسط الحومه
هذا عباس الإجتنه علومه
يا عباس يا عباس

صوت فرسان إعتله بأرض الطفوف
هذا مو بالسيف يضرب بالجفوف
لو وصل يمنه فلا تبقه الصفوف
يخلي روس العسكر بدمها تطوف
خلو عدكم بالخطر معلومه
يا عباس يا عباس


طب عليكم هذا چن برق و رعد
يذبح و سيفه يريد أكبر عدد
ما يضل الجيش ما يبقه أحد
لو هتف عباس يا حيدر مدد
توگع الفرسان من رسومه
يا عباس يا عباس


طب علينه و تيهينه احنه الدرب
زلم خشنه و گامت المدمع تصب
زلم توگع من قبل لا تنضرب
نزهه طالع ابد ما چنه بحرب
فارس و يهوه الحرب من يومه
يا عباس يا عباس


سيفه حدره و بعده نايم ما گعد
صاح صوت الهيبه و العسكر جمد
بلا درع عباس وسط الحومه هد
الگدر يختل و الوگع و اللي شرد
عالنهر صولات إله محسومه
يا عباس يا عباس


فوگ راس الگمر ريشاته ترف
صال بالحومه و قره آيات الخسف
صاحه اخوه و گله موقف مو كلف
كلش گليلين همه إچم ألف
ساعه تلگاها الزلم معدومه
يا عباس يا عباس


هجم عباس و دخل وسط النهر
أربعة آلاف وذرهم وذر
شال منهم چم ألف بيده و شمر
و البقه هناك بسحگ جدمه إنعصر
كومه خلاها الزلم يم كومه
يا عباس يا عباس

ما نعوفك للأبد يبن حلال الشدد
يا ابا عبد الله يا ابا عبد الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

صوت يم خيمة بنت حامي الحميه
يا سلام الله على أولاد الزچيه
إحنه أنصارك يبن خير البريه
ما نعوفك لا وحگ ضلع الزچيه

ما نعوف إحنه الخيم إحنه گدامك خدم
يا ابا عبد الله يا ابا عبد الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

طلعت إلهم زينب و أبدت شكرها
حيل هالموقف بنت حيدر يسرها
خففوا آلامها و ثلجوا صدرها
علم عدها بالذي باچر يمرها

باچر المدمع نهر لا حسين و لا گمر
يا ابا عبد الله يا ابا عبد الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

شيخ الأنصار إستحه لمن سمعها
گبال أصحابه فتح عينه و رفعها
يا ليوث الهيجه لا ينزل دمعها
و إحنه نعرف بت علي و نعرف وضعها

فشله من طه النبي و من ابوها الطالبي
يا ابا عبد الله يا ابا عبد الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ركبوا هذا الليل جلماتك چونه
يا حسين و حيل هالموقف هضمنه
مستحين هواي لأجلك ننطي دمنه
و إنته سيدنه و أبونه و إنته أهلنه

لو ردت ننطي الأهل يا شبل خير العمل
يا ابا عبد الله يا ابا عبد الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

منهو غيرك للگلب عشگه و خليله
يا حسين البالأرض ما صح مثيله
يالملكت الگلب يالمالك دليله
لو ألف مره أنذبح لأجلك قليله

هالعشگ فطره و رتب عابس و جون إوهب
يا ابا عبد الله يا ابا عبد الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ما نعوفك سيدي لختمة عمرنه
يا أمير رواحنه و سيد أمرنه
بين إديك نقدم إباچر نحرنه
ويه ذكرك سيدي دايم ذكرنه

شما تزورك شيعتك تنظر إلنه بصحبتك
يا ابا عبد الله يا ابا عبد الله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ويلي ويلي بمسلم يمر الأجل
ويلي ويلي لا عشيره و لا أهل
بدمعة العين ناده يحسين
بلا عشيره و لا أهل
-------------------------------------

آنه بت مسلم بقيت بهالحياة
عيني تجري الليله من دون البنات
راح أبوي اليحمل لأجمل صفاة
خله بنته وحيده تتمنه الممات

آنه آنه وحدي ضليت بهضم
آنه آنه دنيتي ليه شتضم
والدي وين ناده يحسين
لا عشيره و لا أهل
-------------------------------------

ويلي مسلم يگضي بالكوفه غريب
وحده باقي و موقفه كلش عصيب
صاح يا بن عمي يحسين الحبيب
ما أظن لشوفتك باقي نصيب

هذي هذي آخر أنفاس العمر
هذي هذي حاوطتني أهل الغدر
گرب البين ناده يحسين
لا عشيره و لا أهل
-------------------------------------

دمعته بعينه و رفع چف الدعاء
ربي إجعل دمي قربه لكربلاء
انطي دمي لشبل خير الأنبياء
كون يسلم ما يمر بيه البلاء

ريته ريته لا يجي بناسه و هله
ريته ريته لا يگرب كربله
شمعة الدين ناده يحسين
لا عشيره و لا أهل
-------------------------------------

حاوطه و جرد بچفه الحسام
يقاتل و يهتف على حسين السلام
خاف قصرت أعتذر يبن الكرام
جنها هاي النار تعله إعله الخيام

چنها چنها تعتلي فوگ الخيم
چنها چنها من يگع راعي العلم
ون نساوين ناده يحسين
لا عشيره و لا أهل
-------------------------------------

يقاتل و يشمر زلم فوگ السطوح
خله هالفرسان بالكوفه تنوح
غدر غدروه و سقط من الجروح
شيمة أهل الكوفه هذي بكل وضوح

كوفه كوفه غدرت بحيدر علي
كوفه كوفه بيها مسلم مبتلي
صوت الإثنين ناده يحسين
لا عشيره و لا أهل
-------------------------------------

لون ناده شلون نفزع للبعيد
ينذبح فوگ القصر مسلم وحيد
الطف بده من يم رگبته و هذا أكيد
يا سلام الله على اول شهيد

طايح طايح تسحل بجثته العده
طايح طايح جرحي من يمه إبتده
دمه كل حين ناده يحسين
لا عشيره و لا أهل
-------------------------------------

هيه بداية موتي ليلة وداع اخوتي
من أصعب الليالي ليلة وداع اخوتي
_______________________________

هالليله يندار العمر من الفرح للحسره
هالليله أودع للضوه تطفي بعيوني الگمره
الحره ينادوني اخوتي باچر فلا أضل حره
إلمن أودع هالمسه و إخواني يمنه و يسره

و تحيرت جفوني إلمن تصد عيوني
يأخواني هذا حالي من يستمع شكوتي
_______________________________

شمس الله باچر تنطفي يضيع النجم بالهيمه
و خيمه التلم هذا الفلك باچر تطيح الخيمه
يخواني و الله إتحيرت ما بين گلبي و ضيمه
حاچوني يا ريحة علي حاچوني يأهل الشيمه

ردوا فقط عليه گلبي إنترس أذيه
يا ريحة الغوالي يا عزتي و نخوتي
_______________________________

هالليله آخر ليله إلي باچر أضل بوحدي
و بلا حسين و لا گمر لا إبن يبقه عندي
أنظر بالوجوه الفلح دمعاتي عالخد تدي
وين الله ما يطلع صبح ما ريده باچر يبدي

لو يطلع بصباحه بي تعتلي المناحه
حزن الأرض دنالي هو اليسبب موتي
_______________________________


ياللي تودعوني بهضم يمته بعد نتلاگه
يمي إخوتي و ما مشوا و إلهم أنه مشتاگه
ياهو الأودعه و أحتمل ياهو أگدر إعله فراگه
يخواني باچر ونتي تكسر گليب الناگه

و اليهجر لحبيبه بس الهضم نصيبه
بأحزاني ما أبالي لو ضيعت تچوتي
_______________________________

لو طل فجر باچر يطل يوم الحزن مصباحه
هم مثلي و سمعتوا إبشر ينتظر يوم جراحه
جبت العمر حسره و قهر عمري فلا بيه راحه
انظر على حسين و أون يعاين على ذباحه

تضل حسرته بكلامه ينظر على خيامه
چن حزني ماله تالي دمعي وي سكوتي
_______________________________


إلمن أودع حايره ياهو أستمع چلماته
صديت لحسين و بچه و عاين على بنياته
يحسين يا سورة فجر تذبح ذبح آهاته
باچر تضل وكت الظهر فوگ الرمل آياته

منهو الذي يلمها و يسكن لألمها
يجاوب على سؤالي من يستمع دعوتي
_______________________________

يا گلب عندي و يحتمل طاري الذبح و الفرگه
ياهو الأقبله و أحضنه و أشهگ عليه چم شهگه
الما أگدر أحمل فرگته فوگ الرمل أشبگه
و يجرني من فوگه الشمر و العاديات تسحگه

و بجثته المرميه يفزع ركض إليه
ما دارت بخيالي يتعله بعده صوتي
_______________________________

وكت الظهر رد المهر خالي و دمه إعله متونه
ليه نشدت من عاينت گتله الحسين شلونه
ناداني ضل طريح فوگ الرمل ذبيح
بالغاضريه
"""""""""""""""""""""""""""""""""""'

آنه العقيله و ناطرت روحي إعله باب الخيمه
أتنطر و دمعي يهل و گليبي عايش ضيمه
حولي النساء تجمعت و نتاني راعي الشيمه
شفت العجاج گدامي هاج
يكتل عجاج الهيمه

عجه و خطر و شگد صور دارت يخويه إبالي
أصعب أمر مر بالفكر بس لا يطيح الغالي
خف الأمل يطيح فوگ الرمل ذبيح
بالغاضريه
"""""""""""""""""""""""""""""""""""'

أتأمله و بلكت يرد أنظر إجاني مهره
وينه صرخت بس لا وگع بالدمه تارس ظهره
دنگ أمامي و هل دمع من عينه تجري العبره
مملي بجراح خيالي طاح
هذا الدمه من صدره

مني دنه گلي أنه جيتچ و أريد أخبرچ
لمن وگع صوته إنسمع حفظي يزينب خدرچ
صوت بحزن يصيح فوگ الرمل ذبيح
بالغاضريه
"""""""""""""""""""""""""""""""""""'

أنظر عليه و أنتحب شفته تغير حاله
هذا الفرس حيله إنهدم ويلي الحسين شحاله
يصهل هضيمه ينذبح ينحب على خياله
خير الشباب فوگ التراب
ضلت وحيده عياله

دمعه يهل مثل الطفل يبچي إعله راعي بيته
دم النحر حنه الظهر بالدم صبغ ناصيته
دمع النظر يسيح فوگ الرمل ذبيح
بالغاضريه
"""""""""""""""""""""""""""""""""""'

ضاع الحچي و بس البچي من عيني و من عيونه
گتله يميمون السبط ليش رجعت من دونه
گلي أفزعچ جيت أنه خاف العده يسحگونه
جابو خيول فوگه تجول
صدره تره يطحنونه

عشره إجن و تحضرن يردن يسحگن صدره
خيل أعوجي لمن يجي بأرض الطفوف يوذره
عالغبره ضل جريح فوگ الرمل ذبيح
بالغاضريه
"""""""""""""""""""""""""""""""""""''

غيرة زلم شال الفرس چنه و يحشم بيه
يصهل يهل دمعة حزن و يگلي يا علويه
ذبحوا إمامي و سيدي جثته بقت مرميه
فوگ الرمال خيالي ضال
ينحب على رقيه

هذا الفرس بذني همس خافن تسمعه سكينه
صابوه حجر گطعوا نحر خنصر نقص بيمينه
بهالموقف الصريح فوگ الرمل ذبيح
بالغاضريه
"""""""""""""""""""""""""""""""""""''
يا فرس محبوبي الرحل محد مچانه يعوضه
ما صارله هواي إبتعد مشتاگه أسمع نبضه
خاف أطلع و أمشي إله بهذا الأمر ما يرضه
خافن يصيح يمشي و يطيح
يجويه تراب الرمضه

لو صد إلي و ناده علي للخيمه زينب رجعي
شلون أتركه بالمعركه من عيني يهمل دمعي
دمع النظر شحيح فوگ الرمل ذبيح
بالغاضريه
"""""""""""""""""""""""""""""""""""''

حنه و شمع هالليله حضرتهن العقيله
للقاسم بخور و دمع فرحانه بيه العيله
_______________________________

هالليله للقاسم إجت عمته الأبيه
جابت صواني للفرح بالغاضريه
گالتله يا شبل الحسن يبن الزجيه
أرد أفرح بزفتك أنه هاي المسيه

من عدها سالت دمعه علگتله بالطف شمعه
فزعت عمامه و إخوته خل تگصد تهنيله
_______________________________

حضرنه عمه لزفتك هاي الصواني
كلنه إجينه لخيمتك نحمل تهاني
الله يتمم هالفرح هاي الأماني
كلما اريد افرح حزن يصرخ بذاني

لو مرت بشفافي بسمه ينادي كافي
دهري و يحضرلي الحزن شوفي الدمع يسيله
_______________________________

من عطر هيبتنه الحسن بس إنته عدنه
بزفتك يشبل المجتبى نتباهه ردنه
حضرنه حنة زفتك بيها إتحنه
يكمل زفافك و الفرح كلنه نتمنه

سالم ترد للديره ماكو بعيونك حيره
لآرض المدينه الطاهره ترجع معاك العيله
_______________________________

ما أحسك تهم بالعرس إحچيلي همك
ياللي شلت عطر الحسن يالدمه دمك
شما سولف بطاري الفرح تنظر لعمك
حطيتك بعيني و خفت چا وين أضمك

خافن تضمك روحي بس تلچمك جروحي
و العنده مثلك إبن أخو بين الضلوع يشيله
_______________________________

يالگتلي ما ريد العرس ها يالحنونه
أفرح أنه و عمي السبط حسره بعيونه
مصباح باچر لو إجه أعداءه يجونه
أهونلي گدامه انسحگ لا يسحگونه

ما ريد أمر بالفرحه و حسيني ينزف جرحه
باقي وحيد بكربله بغربه و تهدم حيله
_______________________________

يا عمه هالليل إلإجه حظر سهامه
باچر أظن بكربله ماكو سلامه
شنهو العرس و إبن النبي ودع خيامه
باچر يطيح و بالخيم تبقه اليتامه

ما همني كلش حالي بالهيمه يبقه الغالي
عالغبره يبقه بلا چفن حته السمه تبچيله