نعي للسيده رقيه ع

إجيت الليله أودعك و أحچي وياك
و أريدن أحظنك بثنين إديه
أريد اليوم أقبلك وين الخدود
أبوسك وين يا شبل الزچيه
أشو بس نحر دامي وين العيون
يبويه أرجوك بس عاين عليه
بحوافر خيلهم منك عطر ليش
وذر منك ملاها الغاضريه
خنصر يمنتك يا بويه مگطوع
منك شنهو باقي بهالمسيه
إجيتك و التراچي إنسلبن هناك
جرهن حيل هالما بيه حميه
مد إيدك عليه و حس بالسياط
إنولت بعدك تره بنتك رقيه


بنتك عالجرح بويه تراچي
سلبوا هالليله من عندي تراچي
إجيتك أشتكي الليله ترا چي
حرگوا خيمتي و چتفو إديه


الگلب يمك يرد ردود ونتاه
أصيحن آه يخويه اليوم ونتاه
بنتك ونت إعله الراس ونتاه
لحد ما ماتت من الون رقيه

نعي للسيدة رقيه عليها السلام


مــنهــــو الشاف طفلــه بعـــمــر الورود
تمشي اتطيــح تصرخ بالهضيـمــه
وتــشـــــــب نيــــران بيها بعلو الخيــــام
تفــر لاوين والصحراء هــيــــمـــه
إعله جسم الوالي راحــت تزحف زحوف
تسولــفــله إعله صيوانه وحريمـه
يـــبــويه ويـــاي گــــوم نـطـفـي الخيــام
بعــــد يا بــويــه ما ضلتلي خيـمـه
علامـــه البيــهـــا مو مثــــل العــلامــات
عــــــلامتــهــــا جرح گلب بيتيمــه
يجـــرحهــا الضـــوه لو يـمـهــا يــنـــدار
ويكتــلها الهــوه لـو هــب نسيـمـه
اليجـــر منها التراچــي تگلــه لا حــيـــل
إلـــــك أنــطيهــن وآنــه الكـريـمـه
الفگـــد غاليــه شلــه بـذنـــي الأقـــــراط
شيســون بذنـــه لــو ذبحـوا نديمه
بــس آنــه أعـزهـن چــي مــن حسـيـــن
ولأن بـيهـن عـطـر چـفـه العظيمـه


لـــون تـعــرف الأمـــه من بيها
فــلا بعــدت رقـيــــــــه من بيها
التراچي تصيــح إتـرك من بيها
عطر وأنفاس من إبن الزچيه

بناتـــــك عالمصايـب حـيـــل يرهن
ودليلي إعلــه الجروح بهضم يرهن
خصمــك للتــــراچــي اليــوم يرهن
وگطع إذني وشتم حامي الحميه

الگلب يمـــك يرد ردود ونتاه
أصيحــن آه يخويه اليوم ونتاه
بنتك ونــت إعله الراس ونتاه
لحد ما ماتت من الون رقيه

صدى صوتي لرضيعك لذنه والله
بغيابـك مُــــر يصبـــــح لذنه والله
يبــويـــه آنـــــه وشريفه لذنه والله
بحمه الحره العقيله الهاشميه

إجيــت الليله أسمعـــــك والله أذاني
و أشوفــك يبو الغيــــره والله أذاني
أخـبــرك عــن عـــدوك والله أذاني
يطگني بسوط ويچتف بإديه

تدري الـعــــفـه بنـــتـك ما عفتها
و أبـــد طـــف النـوايب ما عفتها
رقــيـه بـنـيــــتـك أبـــداً ما عفتها
لحد ما گيدوا چفها إبإديه

عـفـة الـكـون تـخــجــل من عفتها
و سنـى النيران بالطف من عفتها
رقـيـــه الـيــوم خـويــه من عفتها
إجتني مسلبه وتركض عليه


محمد عبد الرضا العيساوي

بيش اخبر والدي حاير منين ابتدي
والله يا عمه حرت هاي المسيه شرد أگله لو سألني عن رقيه
حاير منين أبتدي

*****************************

آنـــه يا عمه العليل بگلبي حيــــره
عن أبوي حسين وجهي وين أديـره
لـو نشد عن طفله مسبـيــه وأسيــره
والله متحــيـــر شگــلــه يا أمــيـــره
والله عمـــه تحيــرت وبمسيري تمرمرت
من نصل گبر الولي بالغاضريه شرد أگله لو سألني عن رقيه
حاير منين أبتدي


************************************

من أصل يمه شجاوب لو سألني
إختـــك رقيــه العزيزه وين يبني
إحچي يا بــويه المصايـب ألمني
وطــرق رحلتــكم يبويـه عذبـني
شرد أسولف يا خبر ينهمل دمع النظر
سالت من العيـــن دمعاتي الجريــه شرد أگله لو سألني عن رقيه
حاير منين أبتدي
***********************************

عمه عينيني بجوابچ رحمـي حالي
وإنتي تدريني عليـل وحزني عالي
هـــم أسولــف للسبـط ذيــچ الليالي
بالخرابـــه والدمـع من عيني هالي
من گعدنه اعله الترب بســــوط ظالم ننظرب
كل خواتي تراكضن بويــه عليــه شرد أگله لو سألني عن رقيه
حاير منين ابتدي

********************************

عمه ما ريـــدن ابد زيدت عذابـــه
ولا أجيبن طاري من ذيج الخرابـه
عمه يدري بينه نمنه اعله الترابــه
وتلهب شموس الحقد ماكوا سحابه
بيه يتعله الألم من أسولف عالخيم
طاري ما جيبن أنه لأذن الدميه شرد أگله لو سألني عن رقيه
حاير منين أبتدي
**********************************

عمه راح احچي لأبوي بهالظلامـه
وراح أگله اعله المتن ظلت علامه
ليــــل سفرتـهــــا رقيــــه ما تنامـه
ملوعــــه بنتــــك تـره دون اليتامه
ملوعه وضلت تـون تشكي من جرح الإذن
من أعاينها تشب نيراني بيه شرد أگلــــه لو سألني عن رقيه
حاير منين ابتدي
***********************************

بويــــه بالديـوان نـادت وين أبونـه
بالله جاوبـني يبـــن حيــدر يخونــه
جابوا الراس بطشت شافت عيونـه
واعله راسك ماتت بحسره الحنونه
شمت الراس وبچــت من بچيها ما صحت
زادت إعلينه المآسي بهالرزيه شــرد أگله لو سألني رقيه
حاير منين ابتدي

************************************

عمه يا زينـب لقانـه بروضة الباري وجنانــه
عمه بالرؤيــه شفت راح أموت إعله الطشت
هاي المسيه

عمه زينب راح أسولفلـچ خبــر
والله بيه دلالي هـــــالليله إبتشر
هذا أبويه حسين إجاني ويالگمر
گلــــي يا طفله بعد ماكــو قهــر

بالفرج من بشروني فاضـت بدمعي عيـــوني
وشكثر آنــه فرحـت راح أموت إعله الطشت
هاي المسيه


گلي باچــــر بالقصر أنــده إلچ
وإنتي ودعي الليله يا بويه هلچ
شعندچ بدنياچ بويه أرد أسألـچ
مـن بعـــد عيناي مــن يتكفلـچ

گلي إنسي الون وأفرحي لا تنوحين إعلـه جرحي
آنـــه بالحســـــره صحت راح أموت إعله الطشت
هاي المسيه


عمه أبويــه بدمعته سولـف إلـي
آنه إجـيـتـچ بويــه وإنـتـي ادللي
وصي للسجاد گولي يــــا علـــي
إذكرني خويه لو وصلت لمنزلي

خويه طب إنته لحجرتي گلهـــا ما ترجعلچ إختي
و للمكـــان البــي نـمـت راح أموت إعله الطشت
هاي المسيه


عمه ما تحمل بعد جدمي سبـي
ليـــش بس سياط صايـر ملعبي
طفله آنه و أنچوي بنــار العبـي
راح أروح وأشكي يم طه النبي

راح أروح وأشكي همي راح أسولفله إعله دمــي
الليلــه لــو بالهم نـحــت راح أموت إعله الطشت
هاي المسيه


عـمه چـم ذكره على عيوني تمـر
عالسبي و السوط لـو وجـه الشمر
باچر شيحچي شيقـدم مـــن عــذر
لو وگفت آنه شيسولـــف بـالحـشر

بالحشر أرفع إديه وأدعــي يم رب البريــه
والله منه تـلـوعـت راح أموت إعله الطشت
هاي المسيه


عالارض باچــر مصيبـاتي تجل
وللحشر جرحي فلا ضن ينـدمـل
عمه دفني وياي چم شعرة هــزل
وعالگبر خلليلي قطعه من الحبل

بگبري خليهن علامه شاهـــد ليـــوم القيامـــه
وياهـــن آنـه اتيسرت راح أموت إعله الطشت
هاي المسيه

عل الراس على الراس طفلــه ونخيـت المهدي
على الراس على الراس ضل دمعي من دم يدي
عجـلّـي ثـــــارك طال إنتظارك
يمهدي يمهـــدي


آنه طفله وباليسـر إسمــي السبيـه
بالحبل جابـــوني مــن الغاضريـه
تدري بالديوان خصمي شسوه بيه
گال جيبوا الراس لوعوها لرقـيـه

والأغراب والأغراب كتــلتـنــه بالشماتـه
والأغراب والأغراب شتـموا علي وبناته
يا حـــــــامي جـارك طــال إنتظـارك
يمهدي يــــمهدي


من نظرت لراس ابوي ودمعي يهمي
حرت انخـــامن ســرت نار ويه دمي
جنت انخـــه الكافـل و هاجرني عمي
قــررت انخاك وأحـچـي الليلـه همي

بالدموع بالدموع كتلك يبو الحميه
بالدموع بالدموع إتلگـــه هالرزيه
بيـــهـــــــا انتـشـــارك طـــال إنتــظارك
يمهدي يمهدي


هذا يا مهدي الدمـع إنظــر سيولـه
شنهوا ذنبي وأنحرم من الطفــولـه
الطفل من يبجي بعجل أهله يجوله
وآنه كل أهلي گظوا نبـع الرجوله

بالطفوف بالطفـوف وسفــه گظـوا خواني
بالطفوف بالطفـوف حته احترگ صيواني
ناري ويه نـــــــارك طــــــال إنتظارك
يمهــــدي يمهدي


من سمعني حسين أوجهلك كــلامي
گلي لإبن الحسن وصليلــه ســلامي
بويه گليله أبـد لا يــــنسه ضــامـــي
عالترب مطروح ضل وجسمه دامي

عالتراب عالتراب ينــزف دمــه وريده
عالتراب عالتراب گطعوله خنصر إيده
يـنحـــب فقــــارك طـــال إنتظارك
يمهـــدي يمهدي


عالطشت ما أگــدر لراسي أشيلـه
خاف أشيله وينذبح صبــر العقيـله
بروحي سالوفة ألف ليله ويته ليله
عن أبوي الغالي عن گلبي وخليله

والأيام والأيام تحچي بهضم نياحي
والأيام والأيام تسولف عن جراحي
تنطر قــــــرارك طــال إنتظــارك
يـمهـــــدي يــمهـــدي


راح أروح ويـــــــاه آنه بهالمسيه
إلك من عندي تضل هاي الوصيه
من تجي ياريت ترجعلي الهديـــه
تجيب ترچيتي بحـــزن تقبل عليه

بالچفوف بالچفوف تمسحلي هالبواچي
بالچفوف بالچفوف تلبسني هــالتراچي
بـــيـــك نتبــــــارك طــال إنتظارك
يــمــــــهـــدي يــمهـدي

وين أبوسك و إنته ما عندك خدود
بويه إگعد و إنظـر ألون الزنود
من نظرت لخنصرك گلت أقبل منحرك
ها يبويه


بويه يا شبل الزچيه إگعد و حاچيني
إنته عندك چم رقيه يا بعد ضي عيني
آنه جيتك هالمسيه دمعتي تچويني
دنيتي اندارت عليه و ضيعتها سنيني

ضاعت سنيني و فگدت آنه الحياة
ما بقه عندي أمل بس بالممات
عمري بالطف انترك گلت أقبل منحرك
ها يبويه


احتركت الخيمه و اجيتك بويه شوف دموعي
بويه لضلوعك يروحن فدوه كل ضلوعي
چنه بالخيمه نسولف إنته كل موضوعي
إنته شجرة كل حياتي و إنته كل فروعي

إنته بعيوني چنت چلمة دلال
عني وين إنته رحت بويه تعال
طفله مشتاگه إلك گلت أقبل منحرك
ها يبويه

بويه إحضني إعله كيفك لا تهيج جروحك
أدري مشتاگ لطفلتك فدوه روحي لروحك
خاف أسولفلك جروحي خاف أزيّد نوحك
يا جبل عمري و حياتي ضمني بين سفوحك

ضمني و أدري يمنتك قلعة أمان
يا حنين الليله محتاجه الحنان
بيه چم جرح إشترك گلت أقبل منحرك
ها يبويه


خيمتي زغيره حرگوها بويه حيل أذوني
شنهوا معناة السبيه بهالأمر نادوني
واگفه و أنظر عليها تجري دم عيوني
بويه ذاك اللي سطرني و هذا طگ متوني

طفله شحمل شأعرف بأرض الطفوف
ريتك إعليه تصد بويه و تشوف
لحرمتي خولي إنتهك گلت أقبل منحرك
ها يبويه


بويه أخذوها الهديه البيها أذكرك آني
چم جرح مرني بغيابك چم جرح أذاني
بويه مد إيدك عليه بويه شوف ألواني
بويه سلبوها التراچي و جروحها آذاني

گتله ترچياتي ما تگربها إدين
ذني ذكرة والدي ذاك الحسين
جرهن من إذني و ضحك گلت أقبل منحرك
ها يبويه


بويه جمعونه ضربونه و جيتك إتعنيتك
بويه لو وياك إخذني لو تردني لبيتك
فارس الحب و المدامع كل وكت ناديتك
هذي قبلات المناحه عالنحر حبيتك

بستك و أدري الجفن لمن ينام
ننجمع إحنه سوه و يلمنه شام
كلشي هان لخاطرك گلت أقبل منحرك
ها يبويه

لمولاتي رقية (ع)

—-{ المستهل}——

من طاحت رقيه واحنه ماشين
غرس بالرمل چن راس الحسين

طفله يضربوه
لو رادت ابوه

رقيه...رقيه

———-

دلوني اعله ابويه ارد احجي وياه
وسولفله شجرالي

ولو غايب عليه حسين ساعات
ما نام الليالي

يبو طول الحلو وعيون حلوات
فاكدتك يغالي

نايم عل ترب وحسين عريان
ورايح كل دلالي


من صار العصر حركوه الخيام
بدت رحله السبي يابويه للشام

بنيتك شتموه
لمن مات ابوه

رقيه... رقيه

————

اذا رايد تسافر خذني وياك
ما ضلن وحيده

اضن هذه الغياب يطول هواي
والسفره بعيده

منو غيرك الي يواسيني يحسين
وينيمني اعله ايده

ادييه بنيتك الترفات يحسين
مو مالت حديده


مشونه بدرب بي فحطت النوك
يبويـه صعبه تدري طبت السوك

اربع اسنين عشت
وفوك راسك متت

رقيه ... رقيه

————

اذا راد الحبيب يطيب الجروح
خل يحضن حبيبه

يضل كل اليالي بعمره مخنوك
وشي يسكت نحيبه

وذا يمه اخوته واهله وناس
يحس روحه غريبه

يرفع جف اديه ويرجع يريد
ويضل يدعي لمجيبه

يرد سالم يجيني بلايه مذبوح
ويرد طوله الابو خالي من الجروح


مشتاكه لحنانك
وضل خالي مكانك

رقيه ... رقيه

————

اذا جان القدر ما قاسم تعود
على الدنيا السلامه

اضل مشتاكه اله يا بلسم الروح
وشتاك الكلامه

حلو من يبتسم ويدير العيون
يا عشكه وغرامه

احلى من البشر الحسين بهواي
وذو حسن وسامه


من طول الدرب وطول الايام
عله الناكه يبويه نكعد انام

ردينه بضعنه
خالي من اهلنه

رقيه ... رقيه

————

مشه وما ودعاني شلون يا روح
مشه وراح من ادينه

التقينه بناس ما يرحم حجي الناس
وتباوع لو بچينه

تمنيه المنيه وياك يحسين
ومتنه ولا اجينه

اجه الليل واجن كلهن على البال
جا يمته تجينه

وذا صار الفجر انطر على الباب
هلبت جايني وجايبلي الاحباب

انه انه مدلله
يتمتني كربله

رقيه ... رقيه

————

حسين شبّر

لمولاتي فاطمة العليله (ع)

عليمن عايشه والمن اتاني
الموت الماخذك جا ما خذاني

مشتاكه لحنانك
سلف ماسد مكانك

تفاركنه بوكت مو مالت فراك
________

ادور بالمحامل محملي وين
ردت وياك اروحن بويه يحسين
بعد ماشوف بيهن ذني الثنين
برمشت عين خلصت عشرت سنين

حمل ضعن اهلنه وچنهم نجوم
مشو والذكره ضلت بس الهدوم

ما كلي اصعدي
مشه وخلاني وحدي

تفاركنه بوكت مو مالت فراك
____

اخذني وعادي خله اچوه بالنار
اركض بالفله انه وي الصغار
لتخليني وحدي بهاي الديار
اضل سهرانه ترجع لليل ونهار

اشوفك وين وانه عيوني مشتاكه
صار هواي كلي يمته نتلاكه

مشتاكتلك هواي
اريدك تكعد حداي

تفاركنه بوكت مو مالت فراك
_

ثكل كلشي بغيابك حته ممشاي
انه عطشانه الك مو بويه للماي
بهيده ياوجع من تمشي بهداي
يون كلبي عليكم ونت الناي

اذكرك من تمر بيه اليالي
ابجي اعليك مدري ابجي اعله حالي

تبقى واعدتني
شمالك فاركتني

تفاركنه بوكت مو مالت فراك
_

على عيونك نصبح عودتنه
عمت عين اليالي الفركتنه
بصبح عاشر يبويه ويتمتنه
چنه جبال لكن طيحتنه

دلوني الشريعه صايره منين
بيه اعزاز و ولهم حسين

فاطم التركته
ماتت من عفته

تفاركنه بوكت مو مالت فراك
__

جان الشوفتك كلبي انه هايم
رجع خالي ضعنه من الهواشم
ومثل لون السمه چتف الفواطم
اضن حسين ما ردالي سالم

مشه بجسمي المرض يابويه جناز
من شفت الضعن خالي من العزاز

خبر موتك كسرني
وعبدالله هضمني

وتفاركنه بوكت مو مالت فراك
_

حسين شبّر

شور
لمولاي علي الأكبر (ع)


كوم يبني انطيني جفك خل ارجعك للخيام
بويه خليني بمكاني ولمي وصل هل كلام
كله الاكبر ما يردلج بويه خصه بالسلام
شدي حيلج على فراكه نام ماي عيوني نام

كوم مو كلبي كسرته لايحس ولايه صوت
علي رد وياي لمك يبني لو وياك اموت

كال ماريده انه حلمي انه حلمي
بويه دربالك عله امي عله امي

راح الاكبر ليلى مني راح الاكبر
________

راح حيلي وكوه جيته راح بس كاسرلي ظهري
طحت يمه وبيدي شلته وبني نايم فوك صدري
كتله بويه لا تسافر هزلي راسه ومات دغري
رد عليه علي يبني بعد ساعه يسبه خدري

شلون ترهم هاي كلي ونته الميتمني چنك
رحت ادور عله وليدي يبني والدلاني ونك

مددت يمه وشبكته شبكته
من كثر خوفي لچمته لچمته

راح الاكبر ليلى مني راح الاكبر
_

شلته للخيمه واجينه وغالي شايل بيده غالي
مدري اشيله مدري المه حالي يكسر يختي حالي
راح المسمي ضحكتي وهيبتي وعزت دلالي
شلون بيه وكله ماتو وانه منكم ما صفالي

زينب تلكيني خويه علي شيبني بشبابي
وانتي ضليتي يزينب عاد واسيني بمصابي

مشه وذاني برحيله رحيله
خله خطواتي ثكيله ثكيله

راح الاكبر ليلى مني راح الاكبر
__

چنه من نطلع سويه عيوني بس عليك اصدهن
منين اجيبن انه ثوبك خاطر عيوني يردهن
يا حنين بكد خواتك ويا سوالفنه وعشكهن
مشيك وطولك يبويه ذني كلهن بيك احبهن

كله يمي ونته ماكو چني واحد فكد عينه
لو فكدتك انه لحضه علي رايح علي وينه

علي سالم ما اجاني اجاني
تالي مات وعذباني عذباني

راح الاكبر ليلى مني راح الاكبر
__

حسين شبّر

حسين من انه اذكره ... كلبي يسكت مايدك
حسين علمني المحبه ... وهوه قبله الكُل عشك
قبل لا يكرب محرم ... ابدي اشتم الحرك
وطبر اعله الهامه انه ... بيوم صاحوله الطبك


حسين يا ابا عبدالله
حسين يا ابا عبدالله

*


انه لو كلبي لجمني ... راسن اكصد حضرتك
حسين يا محلاتة عمري ... ويكضي كله بخدمتك
تحترك روحي ويه كلبي ... ولون ذكرو خيمتك
كلشي علمتني بحياتي ... حسين هاي ثورتك


حسين يا ابا عبدالله
حسين يا ابا عبدالله

*


حسين يم بابك وكفتي... ارد اسولف قصتي
حسين مهموم وأعاني ... وفقط يمك راحتي
اني بس يمك اسولف ... لان تفهم غايتي
ويمك اتناسة همومي... ولون تنزل دمعتي


حسين يا ابا عبدالله
حسين يا ابا عبدالله


*


حسين لو ما اعتنيلك ... كون تنشل الجدم
حسين دليني اعله مجلس ... تنجمع بيه الخدم
ارد ادك حيل اعله صدري ... ارد احس جمر الخيم
عيني لو ما تبجي لجلك ... كون يعميهة السهم


حسين يا ابا عبدالله
حسين يا ابا عبدالله


*


حسين نور الدنيا كلهة...و هوة نور الكل ضوه
حسين كلما اذكر اسمة ... ويه اسمه يهب هوى
يحسين بس انتة طبيبي ... وللمرض انت الدوى
عاشكه من گلبي گلة ... وعاشك ويا نينوى


حسين يا ابا عبدالله
حسين يا ابا عبدالله

____

حسين شبّر

لمولاتي سُكينه (ع)


——{ المستهل }——-


عمي جاني الليل شو ما جيتني
عمي ليش الوحدي خليتني

__

عمي ذبلانه شفافي من العطش
كلبي من الخوف گلش ارتعش
عمري صاير مثل ليل هدعش
للمنيه وياك ما وديتني
عمي ليش الوحدي خليتني
__

ما انامن انه اريدن شوفتك
ليش حرموني يعم من ضحكتك
عمي وينك سكنه بتك فكدتك
كون كبلك مييته يا ريتني
عمي ليش الوحدي خليتني
__

رايح الوين يشمعت هلي
ضحكتك الكرار وعيون الولي
انته اعز من النفس بالنسبه الي
بالمهد ونت يعم ناغيتني
عمي ليش الوحدي خليتني
__

انته يالضيفت عينك للسهم
ونته راعي المرجله و راعي العلم
من طحت من المهر طاحت خيم
عمي تدري بطيحتك بجيتني
عمي ليش الوحدي خليتني
___

ما وكف بغيابهم دمع العيون
عالدرب اكعد وكولن هم يجون
وين ابويه حسين وعمي الحنون
ونته تدري بروحتك اذيتني
عمي ليش الوحدي خليتني
___

حسين شبّر

لـمولاتي السيدة رقيه (ع)


------- {المستهل} --------


بل خرابه انتظرتك تجي
يا ابو الاكبر الك عندي حجي

ليش فاركتني ..... ليش فاركتني

---[١]----

بويه من حركو خيمنه الشمر حيل اذاني
ردت اجيك وتدري بويه الشمر ما خلاني
انه لا بيه اجيلك ولا ارد لمچاني
اركض ومسبيه انه والجمر چواني

بويه .. طكني النذل بعيوني
بويه .. عنك ايمنعوني
بويه .. من رحت ماودعتني

ليش فاركتني ..... ليش فاركتني

---[٢]----

طبو اعلينه الخيمنه كامو يضربونه
كلنه كيدونه بحبلهم صارو يجرونه
عل ارض ذبو رمحهم خاطر يعثرونه
والتصيح بأسم ابوهه راسن يشتمونه

بويه .. انته عاري بنينوى
بويه .. زحمه انه اشتم هوى
بويه .. من رحت ما ودعتني

ليش فاركتني ..... ليش فاركتني

---[٣]----

عل رمح راسك حبيبي بكل حقد رفعونه
هدوا اعلينه بسيفهم صارو يخوفونه
استولوا اعلينة بعددهم رادو ان يولونه
جرو امن اذني التراجي وكامو يسلبونه

بويه .. وسفه نايم عل ترب
بويه .. منين اجيك بيا درب
بويه .. من رحت ما ودعتني

ليش فاركتني ..... ليش فاركتني

---[٤]----

انه اذكر من كلتلي أمس وبوسط الخيام
بنتي باجر راح اسافر بس امرلج بل منام
تدري من جابولي راسك مو حقيقة چن وهام
ماترد بويه عليه فدوه رد بس السلام

بويه .. انه وحدي ولوني
بويه .. وبچلاي اضربوني
بويه .. من رحت ما ودعتني

ليش فاركتني ..... ليش فاركتني
____

حسين شبّر

شور
لمولاي سيد الشهداء (ع)


عيـونك ديـره للعشـاك مو مالـت ذبـح انتـه
ما سالم عظم بحسين روحه ورده ساحكته
لا چـادر ولا صحبـان مـامـش منـه فـاتحتـه
وما شايف كبل ميت ضل ينازع بسكته

منو بيكم يوخر الخيل عن جسمه
شمسوي اخويه وينسلب هدمه
بشر مابيهم مروه ولاحته ابد رحمه

كله مذبحه الخوان
ونامت كله بتربان
رفعت چفه وتخاطب
ربي تقبل القربان
_____

رحله من التعب صارت وحسين البطـل غايـب
يم صوب النهر من راح شـاب ومن رجع شايب
زيـنـب راح ارد عـبـاس رد وكـلشـي مـا جـايـب
وظهره المنكسـر ويـلاه يشبـه كسـرت الحاجـب

هد حيله ابو فاضل حارس خيمت الحره
نايم ياحلال اخته وتراب الفله حدره
سهم بعينه مستوطن وسهم غافي بوسط صدره

بحبال مچتفه ايديه
دنيا ودارت اعليه
خضر حته ظهر النوك
من كثرت بواجيه

_

زينب حشمت اخوته وعليهم كثر صاحت
ناكـه عرجـه جابولـي لا وكفـت ولا ناخـت
بلا ثنيـة رجـل عبـاس رادت تركب وطاحت
بلا شيخ العشيره حسين زينب عل هزل راحت

جا وين الكمر عباس ما سير عله العيله
اذا مابي يرد ليه انه تعنه ومشيله
بكثر مابيه شايفته عطره تارس الشيله

غريبه بعدك يصيحون
ليش بوالدي يشتمون
حجيهم ياكل بكلبي
ومايرحم نضر العيون

_

نايم بالشمس يحسين وانت فيايك شكبره
مغطي كربله والكون والتاريخ ويعبره
مصبرنه بمصايبنه وابنك محد يصبره
تكتل يا عزيز الروح مو بس تخنك العبره

هونت كل مصيبه مصيبتك يحسين
حزنك ورث أهالينه وهاي بركبتي دين
موش ادموع اصب اعليك فص العين

ماتكفي الدموع اعليك
ميسد دينك شننطيك
يالمنطينه ابو فاضل
شننطي ارواح مانوفيك

_

نحرك رايه حمره وثار ضل مضموم للقائم
يالطحت وعليك الخيل جالت لمت الوادم
صوت اضلوعك بموضوع مايستحمله الخادم
كلي اتحملتها اشلون زينب منظرك صادم

تعاين والعده فوكك ترك ضلعك
تعاين والولاد مجتله وربعك
نايم عالرمل يحسين مو طبعك

كون اعله الحرير تنام
صدرك هذا لو احلام
عبد الله مكانه هنا
واخذت شو مكانه سهام

____


حسين شبّر
احمد ابو الشون

نزله لـمولاي مسلم بن عقيل



ضحه بروحه لجل الدين
مسلم سفيرك يحسين

_____

طب الحومه بسيفه الباشط
بأسم الدين مسلم ناشط
رگاب جنود العده كاشط

كل القاده تعرفه زين
مسلم سفيرك يحسين

_


رج الكوفه بدكت جدمه
شايل غيرت حيدر عمه
زلمه ومنو يواجه زلمه

يخزرهم بطارف عين
مسلم سفيرك يحسين

_

بالكوفه سئلو چم شاهد
همه ألالاف مسلم واحد
جمع روسهم مثل الوارد

والي شافه يشرد وين
مسلم سفيرك يحسين

__

مسلم ابن بيت العزه
ابو سكينه هواي يعزه
طب وقصر الكوفه هزه

جاب العده من الصوبين
مسلم سفيرك يحسين

__

بسطح القصر موته صبح
بحب حسين الجنه ربح
وبدمه مسلم هم سبح

ضحه بروحه لجل الدين
مسلم سفيرك يحسين

__

حسين شبّر

لمولاتي السيده حميده


——{ المستهل }——


انه بيه شلون باجر
حسينك اتسحكه الحوافر
صبر مابيه وناطر
بابه بابه

———-

بابه فدوا لا تسافر … انه اخاف ابقه وحيده
كلي هم ينطيك كلبك … تمشي وتفارك حميده
بعد ما اسمعه چلمت … بنيتي ايامج سعيده
طفله مو مالت حوافر … وصعبه انكاد بحديده

انه جنت مدلله
اصبح يتيمه بكربله
هاي اصعب مرحله
بابه بابه

———-

عود ليش الدنيا تقوه … لو تشوفله يتيم
سلبو الترجيه بابه … وسلبو هدوم الكريم
حركو الخيمه علينه … وذبحو حسين العظيم
نركض ورمل الصحاري … يچوي بجدام الحريم

هيمه وعيونك بعيده
ضربو بنيتك حميده
وين ابويه اريده
بابه بابه

————

شلون اقنع كلبي كلي … بويه من ينشد عليك
ياهو ليدليني بابه … انه لو ردت من اجيك
جنت لو فزن خايفه … بسرعه تحضني بديك
انه مشتاكه الك … وتدري مشتاكه الحجيك

وحشه صارت كل سنيني
بابه فدوه ما تجيني
وتمسح دموع عيني
بابه بابه

————

من طلعنه من خيمنه … بعد ما صار المصاب
حسينك الضامي الحنين … تدري عاري عل تراب
ليلى طاحت يم الاكبر … وشيبت عمتي رباب
وزينب العمه الجبيره … تبچي وتون عل شباب

انته وحسينك عطاشه
ورده فوكاه الفراشه
انتو يالب الحشاشه
بابه بابه

————

على الناكه من صعدنه … كلمن الوحده ركبت
ومن وصلنه لكربله … كلمن الغاليه ركضت
تدري ببنيتك وحيده … ومن عله الناكه وكعت
ركضت وماكو اهلهه … وتالي يم عمته رجعت

وحده بيديهه حظنتهم
سكينه طاحت عل تحبهم
وانه اهله ما لكتهم
بابه بابه

————-

حسين شبّر

نزله للانصار


احنه انصارك يبو سكينه
_____

هاي انصارك يبن حيدر
عشكك كل يوم بينه يكبر
والما حبك كلبه تفطر

المن عايش هاي سنينه
احنه انصارك يبو سكينه
__

احنه بدم نبصم عهد
زلم ونطو كلمه وعد
الك كلنه صحبه وسند

فضلك جازي هم اعلينه
احنه انصارك يبو سكينه
__

كل الاديان بچيشه جامع
حب حسين بدمهم نابع
اسمه بلكلب هم طابع

غيرك ماكو ويرأف بينه
احنه انصارك يبو سكينه
__

دارو عل الجيش دواره
صارو لحسين اسواره
ماكو منهم انصاره

وانت ماخذنه من ادينه
احنه انصارك يبو سكينه
___

همه سبعين بس هوايه
صارو لحسين درع ورايه
واحنـه الـك وفـايـه

هاي رواحنه حنينه
احنه انصارك يبو سكينه

___

حسين شبّر

زنجيل للانصار


هاي الارواح فدوا لجالك خل كلشي يروح اله عيالك

شيخ الانصار حبيب وذب العمامه
وي ال النبي العشك مابي كرامه

هاي الارواح … هاي الارواح

_____

ربنه لجلك خالقنه … وانت حبل الله الوحيد
حبك هذا يابو سكينه … كله يجري بالوريد
جون من انصارك حسبته … هوه ينعد عل عبيد
وهب بعيونك چذبته … رغم ماعنك بعيد

لبو الاكبر تعله الصرخات احنه وياك حد الممات

هاي الارواح … هاي الارواح

___

اعلينه نكتب هذا الاجل … ولازم نئدي المهام
والي ينصره بدينه … هذا يشفعله الامام
شرايد بعد من الدنيا … خل يختمه بسلام
واليقترب يم ضعونه … عالي الشرف والمقام

لو ذبحونه الف مره نرجعك وياك يبن الزهره

هاي الارواح … هاي الارواح

____

الغلام التركي شكتله … وحته يلحك بضعونك
وعابس كله سيدي … انـه هـذا مجنونـك
خيرك تارس الدنيا … وتزهب الفقره بماعونك
شمسوي بهاي انصارك … خاطر هيج يحبونك

يبن الزهراء يبن الاطهار عفنه الدنيا ولكم انصار

هاي الارواح … هاي الارواح
____

حبيب يكلله زينب … والخلق هذا الهوه
شوفت عيونه عوافي … يعني اخيج هم دوه
ومنطي كلمه عهد انه … نرد لو نذبح سوه
والغيره الماخذه انه … شويه من راعي الوه

يحلف ويكول ويكض شيبات يبين الرجال بنص الشدات

هاي الارواح … هاي الارواح
___

هنيالك بهل الاصحاب … ومايجي منهم سبعين
جامعهم من غير اديان … وعله حبك ملتمين
طول الدرب يحمونك … مثل الرمش يحمي العين
كلهم لبو هل الفتوه … وماتو من اجلك يحسين

مولاي الموت بي لذه وياك تجمع الانصار بالبرزخ ذاك

هاي الارواح … هاي الارواح
_

حسين شبّر

لمولاي ابا الفضل العباس (ع)



جودك وتحضنه شلون يا عباس..بجفوفك
شفت العده يشمرون ياعباس..بجفوفك
صرنه غرايب…حزن ومصايب
ياعباس
___

انه متعنيه وجيتك وارد اشوفك
انه باجر عل هزل امشي وعوفك
خويه لا تكطع ابد مرني بطيوفك
نصبغن بدمك هذن شيبت زلوفك

عباس وضحكت عون جيت انه…تيهتك
انه الحافظتك عود يا عباس…تيهتك
بعد الحبايب…حزن ومصايب
ياعباس
____

خويه رد الخميتي ومسامحينك
مو مهم الجود بس سالم چبينك
وغفه انه من التعب خويه بيمينك
تعدل الشيله وتضمني بهاي ادينك

ريت المصرع احلام يا وفاي…تمنيته
وحسينك مو عطشان شابع ماي…تمنيته
بذيج الخرايب…حزن ومصايب
ياعباس
_____

وين نشرد والعدو تركض ورانه
وهذا دخان الخيم كلش عمانه
انت جنت وبلخيم نسمت هوانه
وضلمت الدنيا علينه يا ضوانه

وضلع الزهراء اليوم يا عباس…مت انه
من شفت بحافر خيل حسين نداس…مت انه
عباسي غايب…حزن ومصايب
ياعباس
_

ابو فاضل خويه ضل فارغ مچانك
والسهم مو عينك مصوب حنانك
ما شفت بدنيا تدري من امانك
كلبي طير وباني بيته بغصانك

ما سولف عل ايام يا عباس…من بعدك
تمنيت شكد الموت يا عباس…من بعدك
بخده ترايب…حزن ومصايب
ياعباس
__

مشتاكه يبو فاضل وسنه دارت
على الناكه زينب صعدت وسارت
من شافت قبر كافله هم طاحت
وبشام القهر زينبكم وماتت

بدروب الشام جروح يا كفال…كل هاجن
ومن ذكرت الاطفال يا كفال…كل هاجن
شفت العجايب … حزن ومصايب
ياعباس

____

حسين شبّر

نزله للامام العباس (ع)


حي الله عباس … حي الله عباس

____

ذبت درعه القاده من شافو العباس
گف الردان وبارز ماخله درع وطاس
بظهره الحسن من كاعد ما يلفت لمكفا
راعي العلم والغيره هيبه يبو النوماس

تهابه الكتائب كله من ينضرله بعين
عباس يبو الغيره يربات الحسين

حي الله عباس … حي الله عباس

___

ذل النهر بجفوفه من وصله الوفاي
سالم يرجع لگربه متغره كطرة ماي
نهرك تحفره يوصل يم الخيام هناك
جر النهر من متنه ويكله كوم وياي

دوخن الهوا الهاب ريشاته الثنين
عباس يبو الغيره يربات الحسين

حي الله عباس … حي الله عباس

____

خله الزلم تّشرد من طب ابن عدنان
والي يصير كباله يمتنه لو حلمان
زلمه ودخل للحومه ومعصب الرجال
خلفت علي الكرار كله زلم شجعان

ذكرهم هواي رجعهم الصفين
عباس يبو الغيره يربات الحسين

حي الله عباس … حي الله عباس

____

مبدع جمال الباري سبحان من سوا
بالحومه من يصول يميل المهر ويا
بيده الشمال وشايل راية لواء حسين
وبعينه زينب اخته ذيج الكثر تهوا

وبسيفه شطرهم فراهم ميادين
عباس يبو الغيره يربات الحسين

حي الله عباس … حي الله عباس

_____

حسين شبّر

زنجيل
لمولاي القاسم ع

انكروني انه القاسم
احمي عيال آله هاشم
وصيت والدي بعمي
اضحيله كون بدمي
للمعركه كلبي هايم

انه القاسم … انه القاسم

__

ميهزني كل هذا العدد
انه منطي كلمه وعهد
اذبحهم بنظرة عيني
اني احامي عن ديني
للمعركه كلبي هايم

انه القاسم … انه القاسم

___

طلع من الخيم شاب
يشبه مشيت ابو تراب
وكف بين العده يخاطب
هذا الموت عندي واجب
للمعركه كلبي هايم

انه القاسم … انه القاسم

____

هذا حسين وانه وليده
اليشهر سيفه ابتر ايده
من القاده جاسم سالب
ما خله بيهم اي شارب
للمعركه كلبي هايم

انه القاسم … انه القاسم
____

يازلمه بيكم خل يدناله
يبقى يم اصحابه اشواله
منو بيكم يوصل يمه
املي هذا الفله بدمه
للمعركه كلبي هايم

انه القاسم … انه القاسم

_____

حسين شبّر