للـعليلة
~.~.~.~.~.
ويهلي
حزينه ودمعي يتجاره ويهلي ( يجري )
بكَيت وما رِحِت وسفه ويهلي ( مع اهلي )
يريت اترابي يلمني ويهلي ( يهيل عليه
لأن صارت كَبر دنياي إليّـه
* * ***
راحمـنّـي
عليله ودهري ماظن راحمنّي ( راحمني )
ولا مرّة الكَلب حس راحمنّي ( راحة مني )
أبوي حسين هاجر راحمنّي ( راح مني )
وخذه الروح التحبّه ويا سبيّـه
* * ***
ونسألكم الدعاء
حسام الناصري

إلهي .. بجاهي
* * ***
لخادم اهل البيت(ع)
حسام الناصري
إلهي ... بجاهي ... تشافي كل عليله
* * ***
أنا الظلّت عليله معاشرة الدمعه ذِبِـت من نار فركَاهم مثل شمعه
رفعت ايدي إلك يارافع السبعه اريد انخاك وانته لصوتي تسمعه
رجائي ... ندائي ... مجيري واشـتـكـيـله
* * ***
أنا بروحي المصايب كلها ملـتَـمّه وكلشي بعيني دون حسين احس ظلمه
الهي كَلبي هاي الليله اترحمه وتـشـــافي كل كَلب متــلوّع بـهـظمه
مجيبي ... وطبيبي ... وأدِكَـ بابك وأجـيـلـه
* * ***
يَـرَبْ هذا محرّم والحرمني اهلي وتركني بعلّـتي ياربي من مثلي
الهي كل عليله تدعي و إتْـكَـلّـي بجاهج يالعليله ربّي يفْـرجلي
ويشافي ... ويعافي ... كَلب ماعنده حـيـلـه
* * ***
اريد العدها عـلّة وشاركت همّي تكَـوّمهعا بسلامه لو نخت بـسمي
انا الروحي عليله مو فقط جسمي انا الـ لا ظل ابو لا ظل اخو يمّي
وأنادي ... يحادي ... لجن مامن وسـيـلـه
* * ***
التفاركَـ كل اهلها اتعيش مـتْـحيْرَه وشفت حال التخاوي الونّة والحسره
الهي بخاطري المحّـد وصل كسره الكَـلـبها منكسر ياربي اتـجـبـره
مصايب ... نوايب ... تره احسبها قـلـيـله
* * ***
تشافي كل ادين التلطم لحالي وتعافي كل كَلب ماعنده كل والي
يربّي لا تخـيّـب ظنّي البالي الرحيم انته ورحمتـك أوّل وتالي
يعالِـم ... يراحِـم ... ودمع ضعفي أسـيـلـه
* * ***
ونسألكم الدعاء

أحزان العليلة
~.~.~.~.~.~.~.
الـلـيـلـة بـالأحـزان آنـه وعـلّــتي
* * ***
الليلة راحو عني كل أهلي سوه
وموحشة الليلة عليّه بلا ضوه
عـلّـتي فركَاهم وجانو دوه
جن غريبة اليوم وحدي بغربتي
* * ***
الليلة ماعندي أبو بكتري ينام
ولابكَت خوّان عندي ولاعمام
راح أودّي بحسرتي ليهم سلام
ومن كثر الآلام توصل حسرتي
* * ***
بالسلامة ودّعت هاي الشباب
وودّعت سكنه ورقيّة والرباب
حتّه زينب عمّتي ويّه الغياب
ومابكَـت ويّاي زينب عمّتي
* * ***
بكَلبي نار فراكَهم ما تنحمل
وفاركَاني حته عبدالله الطفل
ظل يسلّيني الدمع عالخد يهل
جن دم من العين تنزل دمعتي
* * ***
الليلة وي احبابي فاركَت الصبر
بعيني ظل حزني وبكَه بكَلبي الجمر
ما أشوف أحّد ولا أحّد يمر
واليمر ايكَول شنهي ظلّـتي
* * ***
ريت لاطال العمر ويظل سنين
وآنه أظل امفاركَه وكَلبي حزين
أكَضي يومي بالمناحة والونين
ومن يجيني الليل تعله ونّتي
* * ***
ونسألكم الدعاء
للشاعرحسام الناصري

تنادي بالدمع
~.~.~.~.~.~.
لخادم اهل البيت(ع)
حسـام الناصري
تنادي بالدمع ... و كَلبها منفجع
مِـشَـوْ عني الاهل مِـشَـوْ عني الاهل
* * ***
الـلـيـلة وحـشـة بـدارها تــبـات العـلـيـله
بالـمـدامع والـمـآسي شــلون لـيـــــــــله
لا إبــــوها الــيـــلة يـمـها وتـشـتـكـيـله
ولا إخــو لا عَـم ولا حته الـعـقـيـــــله
مِـشَـتْ هالعايله ... كَـصدها لكربله
ولا واحد يظل مِـشَـوْ عني الاهل
* * ***
خـيّـم اعليها الهظم والدار ظلمه
ساعة يا بويه تنادي وساعة يُـمّـه
اشلون حاله الما يـظـلون اهله يَـمّـه
ولا يظل واحد يـسـولـفــله ويكـلـمه
وحيده بوحشتي ... و أصارع عِـلّـتي
اشـكـثُـر صارن عِـلَـل مِـشَـوْ عني الاهل
* * ***
بويه اشوف رسومكم صوره بخيالي
و وين ماصِـدْ النظر هالبيت خالي
بويه حال الظيم والاحزان حالي
وهذا ليل الفركَـه مو مثل الليالي
تِـكَـلّـه من رِحِت ... يبويه شكَد نِـحِـت
الدمع من دم هِـمَـل مِـشَـوْ عني الاهل
* * ***
ودّعتني ودّعاني وياك صبري
ومن عفتني الهَـمّ اجاني وجاب قهري
أسهر وبس النجوم تواسي سهري
كَاعده والنار وسط حشاي تسري
ولايطفي الحَـشَـه ... لضعنكم من مـشَـه
جزه عني ورحل مِـشَـوْ عني الاهل
* * ***
شلون انام وما تمر ايدك جـبـيـني
وبسمة من شـفـافـك إتـسـجّن ونـيـني
مو جنت كل ساعة يا بويه تجيني
فاركَتني وشوكَي يلجمني وحنيني
أحِـن لـشـوفـتـك ... و أوِن لـغـيـبـتـك
ولا ظلّي أمل مِـشَـوْ عني الاهل
* * ***
رحتو يابويه وبكَيت بنار وجدي
بين حسرات الملامه وصدع جبدي
لا كَلب ظل لا فكر لاروح عندي
جنّي ميته واندفنت وداري لحدي
أحس روحي بكَبر ... وخلص مني العمر
وأخذ روحي الاجل مِـشَـوْ عني الاهل
* * ***
ونسألكم الدعاء

رايـح الغــالي
~.~.~.~.~.~.~.
لخادم أهل البيت (ع)
حسام الناصري

رايــح الغــالي ... ومـاخـذ الــروح
مــا رحـم حــالي ... وخـلّـه الـجـــروح
يــا مــراري ... خـالي داري ... ومـاخــذ الــروح
* * ***
آنه فاطمة العليله بروحي مصيوبه
كَلبي مفاركَـ دليله ونبضه محبوبه
غيبته عنّي طويله بعمري محسوبه
جسمي ناحل بادِ حيله ناره منشوبه
بالحزن روحي ... وكَلبي بونين
وتنزف جروحي ... تشتكي البين
وتسري ناري ... خالي داري ... ومـاخــذ الــروح
* * ***
فاركَت عيني نظرهه وإنعمه إصْـبَيْـهه
عايشه بظلمة دهرهه فاجده ضيْـهه
وروحي محتاره بأمرهه مثل المْـتيْـهه
ظلّـت برمضة صبرهه وفاركَت فَـيْـهه
انهدمت أركاني ... وعزمي انهار
دمعي واساني ... يجري أنهار
كل نهاري ... خالي داري ... ومـاخــذ الــروح
* * ***
يا حزن ينفع وأحزنه ويا صبر يجدي
حسره حسره وونّـه ونّـه ودمعتي بخدّي
منهو يرحم كَلبي وهنه ويالأمل وحدي
حسبه مني وحسبه منه انجيب وإنودّي
أبدي آهاتي ... وأحسب حساب
وأحجي جلماتي ... وأنطر الباب
وكل قراري .. خالي داري .. ومـاخــذ الــروح
* * ***
والله حيّرني زماني والزمن قاسي
بسهم المصايب رماني وصوّب إحساسي
من زغر سنّي دهاني من أعز ناسي
ويلهج بحبهم لساني وتشهكَـ أنفاسي
ينتهي يومي .. ابويلي يــا ويــل
وتشهد نجومي ... مساهره اللـيل
ودمعي جاري ... خالي داري .. ومـاخــذ الــروح
* * ***
راح أشيل اثجيل حملي وأهدم متوني
وخل يصير النوح خِـلّـي خل يلوموني
ماخذوني وياهم أهلي وحدي خلّوني
شتـتّـوْ بالفركَه شملي ما يلـمّـوني
شملي ويّـاهم ... وهُـمّه ويّـــاي
غربه فركَاهم ... وتشمت اعداي
بأنتظاري .. خالي داري ... ومـاخــذ الــروح
* * ***
ونسألكم الدعاء
%%%%%%%%%%%%%%%%

يـا مـوت إخـذنـي
~.~.~.~.~.~.~.
لخادم أهل البيت (ع)
حســام الناصري
يا مـوت إخِـذني وإرحـمْـلي حـالـي
كـاتِـلـني حـزني فـراكَـ الـغــــوالي
أتمنّـه ملكَـه ... والعلّة فَـركَـه ... يا موت اخذني
* * ***
أمـنــيــاتي .. كَــالـت يـعــــــودون والـنـيـران بـيّـه
ومن عـبـاتي .. كَمت أحس روحي غريبة لو سبيّه
ذكــريــاتي .. تـلـتـم ويـاهه الـدمــوع الـمُــغْـربـيّه
ويْ خـواتي .. كَـاعـدة و ذيـج الـســوالف زيـنـبـيّه
وبالحسرة صوتي من كل جروحي
وينك يموتي تاخذلي روحي
تـكـتـلـني حـركَـه ... والعـلّـة فركَــه ... يا موت اخذني
* * ***
يـجـري دمعي .. والـتـفـــاركَـ كل أهـلها يـصب دمـعـها
وحدي وأنعي .. و بس صَـدَه الآهـات يرجع وأسـتـمـعـها
الـنـوح طـبـعي .. والإسِـمْـها فـاطـمـة تـنـــوح بـطـبـعـها
بـحـسرة وأدعي .. ربّي عـجّـل مـوتِـتي بـكـسـرت ضـلـعها
مـا تـطـفَــه نــاري وهــاجـرني صبـري
بالـوحـشة داري صــــــــارالي كَـبـري
بـأنـفــاسي خَـنـكَه ... والعـلّـة فركَــه ... يا موت اخذني
* * ***
كَـلبي حـاير .. و لـمِـثِـل كَـلـبي تَـرَه الحيرة قـلـيله
جـفـني ساهر .. وماشِـفِـتـهم حتّه لو بأحـلامي لـيله
ساعة اكابر .. عالمرض ساعة أعترف آنه العـلـيله
بصوت أجاهر .. يـا اسْـكـيـنه يا رُقـيّـة يالـعـقـيله
مَـحّـد تِـجـاوِب وأصرخ بِـسِـمـهِـن
صـارن غـرايـب ولا جَــنّي مِـنْـهِن
بالوحـدة أبـكَـه ... والعـلّـة فركَــه ... يا موت اخذني
* * ***
حَـنْ جـبـيـني .. اتـمُـرّه إيـد الوالِـد ويرجع زمـاني
كـل سـنـيـني .. جـان يـمّي وهـسّـه شو وحدي بـمكاني
ما يـجـيـني .. عِـلّــتي فـراكَـه وأمَـل مَـلـكَـا جـفــــاني
ظـل ونـيـني .. يـحـركَـ بـكَـلـبي ويِـكَـلّه لا تِـتــاني
وأبقه بحنيني للموت أريده
وتتمنّه عيني تغفه اعله إيده
احسيني وتِـعِـشـكَـه ... والعـلّـة فركَــه ... يا موت اخذني
* * ***

هذا حالي .. صافْـنَة وحـسبـاتي اتـجـيـب وتِـوَدّي
مالي والي .. وإيـدي والدمـعـات ما فـارِكَـن خـدّي
وبخيالي .. يـبـجي عبدالله ويِـكَـلّي هـزّي مـهـدي
وأدري خالي .. لا طِـفِـل بالـبـيـت لا ظل مَهَد عندي
ايـناغـيـلي حِـسّـه يـهْـظـمني ظـنّي
وبْـحِـضني أحـسّـه ايـلـولـيـله وَنّـي
وبروحي أشبكَـه ... والعـلّـة فركَــه ... يا موت اخذني
* * ***

مو يتيمه .. وآنه حسّيت اليِـتِـم ساعة سفرهم
يا هظيمه .. والسِـمَـه بعيوني ظلمة بلا كَمرهم
اشكَد أليمه .. بكل زوايه البيت تلجمني صورهم
النوح أجيمه .. بكَلبي كل ساعة ولا أنسه ذكرهم
بشوكَي وهيامي أبقه حسافه
وأبعث سلامي بطول المسافه
وكل خطوة شهكَـه ... والعـلّـة فركَــه ... يا موت اخذني
* * ***
ونسألكم الدعاء

لأم البنين
~.~.~.~.~.~.
ظلام الدنيه ما تسوه بلا حسين ( بلا حسين )
بدمع وبحسرة أكَضيهه بلا حسين ( بالاحسن )
قليله الأربعة وأقسم بالحسين ( قسم بالحسين )
ولو عشرة فِدَه أنطيهم سويّه
* * ***
أريد التجري عينه دمعه لبني ( دمع لأبني )
وأنا من اسنين أبجي دمعله إبني ( دم على ابني )
الحزن ما فاركَيته دامعله إبني ( دام على ابني
وأنا بكَبري وأحس جمراته بيّه
* * ***
إجيت وخِطْوِتي تعثر وجدماي ( اقدامي )
وأحس بشوكَي يتلاهب وجْدماي ( حركَـ دمي )
أريد أنشد على وليدي وجدماي ( لكَه ماي )
وإذا ظامي بكَه أرويه بديّـه
* * ***
ونسألكم الدعاء
حسام الناصري

حال ام البنين (ع)
يِـحِـب حسين غِيره ماله كَـلـبي ( ما عنده )
بـحِزِن وفراكَـ تالي ماله كَـلـبي ( تارسه )
عجيبه وظال عايش ماله كَـلـبي ( شبي ؟!)
اريده يموت إله موتت رقـــــيّه
~.~~.~.~.~.~.~.~.~.~.
راح وكَـلـبـي لـحـســـيـــــــــنه حِـنَـه اعليه ( حَـنْ )
ومثل ظهره اعله اخوه ظهري حِـنَـه اعليه ( انحنه )
إبّـابه لـــــــــــــــــــورجع يلكَـه حِـنَـه اعليه ( حِـنّـة )
ومـــو حِـنّـه أثَــــردكَـــــــــات إدَيّــــــــــــه
~.~.~.~.~.~.~.~.~.
لخادم ام البنين (ع)
حسام الناصري

حال ام البنين (ع)

الكَـلب محّـد يجـيـبه اعليك مَـنْـحَـر ( احتار)
مثل خيمه إشـتَـعَـل ويصيح مَـنْـحَـر ( حرارة )
صدكَـ ذبـحـو الك يـحـسـين مَـنْـحَـر ( نحر )
وأنا ام الاربعه والــــــــــروح بيّـه
* * * **

الكَـلـب بحسين يلهج كـلّـمادكَـ ( ينبض )
وأحس بفراكَه مـيّـت كـلّـمـادكَـ ( كلاّ )
ركض للباب اروحن كـلّـمـادكَـ ( ينطرق)
وأكَــول حـسـيـن هـذا رَدْ إليّــه
** * ** **

انا ام الاربــعه الـتـعـبَـت ورابيت ( تربية )
شكثر ظـليّـت انـاطـــرهم ورابيت ( عيني تربي )
شِـعِـر عالفركَه بيت انظم ورابيت ( بعد بيت )
أحِـن وما إجه الحـسـيــــــــن لـيّـه
** * * ****
عله فـراش المـنـيّــه واربَـعَـالي ( اباوع )
وأكَـولن حـاشه يكَطع واربَـعَـالي ( ربّي )
غـريبه بـمـوتي جَـنّـي واربَـعَالي ( اربعه )ِِْ
ولا الحسين اكولن بيه جـيّـه
** * **
لخادم البنين (ع)
الشاعر حسام الناصري

أبو ذيات لأم البنين ع
* * ***
نياط حشاي متكطعه وصلها (مقطعه وصل )
أحس سهم المثلث جن وصلها ( واصل الها)
حرت أكصد لرض غاضر وصلها ( اوصلها )
لَوَن اكصد لعد كَبر الزجيه
* * ***
جمر كَلبي يبو الاكبر وجرلك ( توجر )
أون وأتنهّد بحسرة وجرلك ( اتحسر )
لَوَن للمصرع أكصدلك وجرلك ( اطلع )
سهم جبدك يبن سيد البريه
* * ***
المثلث من ارمالك ورّمالي ( انرمه الي )
صوّب كَلبي مثلك ورّمالي (تورم )
وبكَه بين الظمه وحَرْ ورّمالي (الرمال )
وخيول البين أحس سحكت عليه
* * ***
ونســـــــالكم الدعــــــــــــاء
خادم ام البنين ع
حسام الناصري

بعازة ماي
~.~.~.~.~.~.
لخادم اهل البيت(ع)
حســام الناصري
ما تعطش يا كَلبي هواي ... إلا حسين بعازة ماي
ما تلزمني ,,, وما تلجمني إلا حسين بعازة ماي
* * ***
يكَلبي شبيك من تعطش تِـوِن ويكثر ونينك
أدري ما تِـحِـن عالماي تِـحِـن لشوفة احسينك
كَلب أمّ البنين انته وكَضيت بخدمته اسنينك
وأدري وياه تـتـألـم نبض ما بينه وبينك
لاجن عطشان من الروح ... وتحس بنبضك مذبوح
بس ارحمني ,,, وما تلجمني إلا حسين بعازة ماي
* * ***
ذبل حته الورد ويّاه ظامي ومنخطف لونه
وبِـجَـه حته الفَرَاش اعليه حزين وتجري عيونه
كلشي بي عطش مثله ومثلي يناشد شلونه
الروح اشتاكَت لروحه بحنين ولهفه مدفونه
مثلك كلشي ايْـحِـن وإشتاكَـ ... وما يتحمّل طول فراكَـ
فراكَه سَـمْـني ,,, وما تلجمني إلا حسين بعازة ماي
* * ***
انا الودّيت إخو ويّاه راضع مرجله ونخوه
وأنا موصّيته ما يشرب وكَبل حسين يتروّه
أبد يا كَلبي ما تعطش ولا بالنار تـتـجوّه
إلا الكَـمـر غاب هناك وإلا انذبحت الخوّه
معقوله يعطش الاحساس ... وآنه مودْيَه ويــا عباس
وما يهظمني ,,, وما تلجمني إلا حسين بعازة ماي
* * ***
اليعيش بـلـبّـة الوجدان صعبة فركَته صعبه
أحسّ انفاسه من تـثـكَـل وأحسّن لو عطش كَلبه
شَـكَـلّ لأم الحسن شـحجي وعزيز الروح بالغربه
شيله وجف دعاء يظل وهديه الفاتحة وقربه
صرت بحيره و هم وأحزان ... وهوّه المـبـعِـد عن الاوطان
جن يـتّـمني ,,, وما تلجمني إلا حسين بعازة ماي
* * ***
عجيبه الماي يعطش ماي الفرات وجان مهر أمّه
عجيبه اللّي يروّي كَلوب يعطش والنهر يمّه
النَـقَـش بلساني حروفه اموت وألهج بإسمه
بعدها لجمة اغيابه وجايـبـلي بعد لجمه
لا تقنعني ظامي حسين وما تعمه من الشوف العين
بعينه يلمني ... وما تلجمني إلا حسين بعازة ماي
* * ***
شما يـبـعِـد طبع بالماي يِـحِـن ويعود لجروفه
إخذ كل كَـطرة من عندي وروح لكربله وشوفه
كَـلّه ام البنين اعليك بكَت والروح ملهوفه
عليها إلـتـمّـت الاحزان مثل ظماك وسيوفه
إطلع مني و فـكّ اضلوع ... وإخذ شماكو بعيني دموع
وكَـلّـه ضمني ,,, وما تلجمني إلا حسين بعازة ماي
* * ***

مقدمة الانصار
~.~.~.~.~.~.~.
لخادم الحسين(ع)
حسام الناصري
سادس ليله بالغربه ... ودمعها زينب تصبّه
* * ***
وطبّت خيمه المولى ودمعها بحيره و تهلّـه
خفت انصارك اتـكَـلّه جمل هالـيـل وتركبه
* * ***
يكَـلها انصاري مـوقـفـهم فلايـعـوفـوني وأعـرفـهـم
الموت وما يـخـوّفـهـم الشهادة رادَوْ و قربه
* * ***
وحبيب المارجف يرجف وكَف وسط الجمع يهتف
زينب رايده موقف تخاف نعوفهم غربه
* * ***
كل واحد رفع صوته بعزمه و زوده و قوته
مو موته لو ألف موته لجل حسين موصعبه
* * ***
كَالو كلنه نتوذّر وِذَر وبنار نِـتْـنَـثّـر
و لا هم يوصل الخِـدّر ولا علويّه متصوبه
* * ***
و هـلّـت زيـنب العـيـنـين و توصي حسين اخوي حسين
لا يـبـكَـه بلايه معـين وسـيـوف الغادره اتخضبه
&&&&&&&

فرسان الشهادة
~.~.~.~.~.~.
لخادم أهل البيت(ع)
حســام الناصري
هـلـه بــأنـصار ديــن الله وهلا بـيـــهه
الـسـمه وأهـل الـسـمـه كَــامـت تـحـيّـيهه
* * ***
بِـدَه وكت الـنـزال وصالـت الـغـيـرة
وبِـدَه الحـسـيـن نـظـرة وياهه تـكبـيره
يشوف أصحابه خـلّـوْ خصمه بالحيرة
زلم وتريد أهل الكفر تـفـنـيـهه
* * ***
فرسان وأبد ما تقبل الذلّة يحسين إحنه إحنه الأوّل اتكَـلّـه
ولا تبدي الهواشم عنهم النزلة ننزل والقيامة اليوم نبديهه
* * ***
زلم وكت الشِـدَد للموت متحسبه
تدوس الخوف ما تعرف أبد صعبه
وكل واحد لبس فوكَـ الدرع كَلبه
وطلع والروح بيده يريد ينطيهه
* * ***
فزعوْ عالمنايه بزود وبهمّة
غِطَوْ عين الشمس والدنيه جن ظلمه
اسباع بكربله هاليوم ملتمّه
وسافلهه يكَلبونه اعله عاليهه
* * ***
طلع شيخ الصحابه والنعم منّه حبيب وكل حبيب يسولف بفنّه
يشوف الموت كلمن يمّه يدّنّه وقتال أبطال لخصومه يراويهه
* * ***
وبرز عابس يهدّ ملهوف للملكَه حُبْ حسين جنّه وذايب بعشكَه
يدافع عن حبيبه اليوم من حكَـّه حلف من عالوطيّه الكَوم يمحيهه
* * ***
برير ومسلم وجون وبعد نافع وسعد ويّه وهب للقافلة يتابع
وشبيب ويه زهير وكالنجم لامع وفرسان الشهادة الكَل تسمّيهه
* * ***
أبد ما قصّروْ لحسين بالنصره وخذو منّه دروس التضحية وصبره
ويظل هذا الخلود إلهم مع الذكره وهناكه الزجيّة الكل تجازيهه
* * ***
ونسألكم الدعاء

انصروا يمامكم
~.~.~.~.~.~.~.
يالله شـدّو احزامكم .. كَـومو انصروا يمامكم
وا حسينا ... وا حسينا
* * ***
اتوسّـط بنص المعارة صاح بأصحابه حبيب
الكَـوم هالـودّت رسلها اسهام وتريد المجيب
احنه من كَـبل الهواشم ننـصر احسين الغريب
يا من تريدون أجلكم الموت هالاصبح قريب
اوياه اختمو أيّـامكم ... كَـومو انصروا يمامكم
وا حسينا ... وا حسينا
* * ***
للحرب كَـومو اسـتـعـدّو وجرّدو بيض السيوف
إلـبـسو الغيرة درعكم سِـوَه هـدّو للحتوف
خـلّـو الحسين بنظركم لا تهمكم هالالـوف
زلـزِلو الكَـاع بـعزمكم خسف سـوّو بالطـفـوف
والرعـب كَـدّامكم ... كَـومو انصروا يمامكم
وا حسينا ... وا حسينا
* * ***
باجـر الجـنّة سكنكم ياللي خـلّـيتو البيوت
المات ويا حسين يِـحيا العاش وي غيره يموت
اليوم للسيف السوالف كل حجي يعني سكوت
الترس حب احسين كَـلبه عالمنايه خل يفوت
والشهادة احلامكم ... كَـومو انصروا يمامكم
وا حسينا ... وا حسينا
* * ***
إبـرز بهمّة يـنافع بِـدَو ويّانه القتال
يا برير انته تِـقَـدّم يا زهير اهنا تعال
واليـكَول العشكَـ شنهي عابس يـرّد السؤال
يالله هِـبّـو للشهادة وآنه أوّلكم أنـــال
هذا دين اسلامكم ... كَـومو انصروا يمامكم
وا حسينا ... وا حسينا
* * ***
حاربوهم قاتلوهم خل يشوفون العذاب
لا تخلّون المناحر شيلو من عدهم ركَاب
الكَـال بس سبعين انتم يوكَف ايعيد الحساب
الواحد انتم بألف فارس ينعد بـفَـن الضراب
الخصن تحت اقدامكم ... كَـومو انصروا يمامكم
وا حسينا ... وا حسينا
* * ***
قـدّمو الارواح فـدوة ارخصو لحسين الدماء
انطو درس التضحيات وعلمو الاجيال الفداء
خلّو التاريخ يكتب ذوله صفوة كربلاء
نِـصرو احسين بـغربته وتشهد بهاي السماء
والمَـلَـك خدّامكم ... كَـومو انصروا يمامكم
وا حسينا ... وا حسينا
* * ***
ونسألكم الدعاء

منهاج محرم الحرام ١٤٤٦ هجري
ليلة علي الأكبر عليه السلام
( مو للحافر )


مو للحافر إلي
صدرك يا كل هلي
يوليدي ياعلي............. يوليدي ياعلي
$$$$$$$$$$$$$$$$$$$$$$$$$$
يبو الكلب لماكو مثلة يا بعد عزي ودلالي
موش حصة للحوافر صدرك الطاهر حلالي
ليش هيجي تهون يبني امشي مكسوره بخيالي
ردت طولك ذخر ليه يا عطر اغله الغوالي

يبن الغالي شبعد
يا عون وياسند
ما قد حان الوعد ...... يوليدي ياعلي
##########################
يا عزيز امك يالاكبر ياثمر روحي وحنيني
تدري حالي من عفتني بين دمعاتي و انيني
ما تمرني ولو لحظة يمه مشتاكه يعيني
غير العاشر جمالك وادري تخجل ما تجيني

بيا حالة بيا وضع
لا صدر ولا ظلع
بس راس ومنكطع ........ يوليدي ياعلي
###########################
بلهفة الفاكدله غالي كلبي يلهف كل مسية
عازتك يوليدي عازة تلفي ليه بالمنية
بيدك توسدني لحدي ودمعتك من دم عليه
بس عكس وياي دهري ذهب باكك من أديه

يا درة فاطمة
يانجمات السمة
حالي الله يعلمه ....... يوليدي ياعلي
###############################
مثل جدك في صفاتك هيبة ومروة وشجاعة
ياكمرنه بليل هندس ياحزن كلبي وضياعه
تره المضيعله غالي يشوغ كل لحظة بوداعة
خبر موتك حيل يكلف أذني ما تحمل سماعه

اوداع الغالي جمر
كسرة وما تنجبر
روحين إبفد كبر ...... يوليدي ياعلي
##############################
شمعة اسنيني طفوها وشاب راسي بزغر سني
اتغيرت من طاح ذخري ياعلي الاكبر يحزني
شكثر سهارت إعله طولك واعلمودك ذبل جفني
ليش هيجي مجازة تعبي يا وجع عمري ويوني

بين الدمعة وعسى
يجوز وليدي نسه
اتنطر كل مسة ......... يوليدي ياعلي

حسين مجيد العميدي

منهاج محرم الحرام ١٤٤٦ هجري
ليلة علي الأكبر عليه السلام
(نظره من اعيونك )

يمه الاكبر .......مرني بنظره من اعيونك
ريتك تحضر ......تباوع حالي يمه بدونك
يمه الغالي........ارحم حالي
بنظره من عيونك
###############################
انه امك يالولد وبعيني جم حسرة
ولهساع الصور عيشتني بالمرة 

ما تجيني.......تكلي يمه .........حتى يرتاح الكلب
عكبك انه.............بالمكابر ........ ابقه اشمشم بالترب 
ياحنانك ........ يا جمالك ........ عمري من دونك غرب

كل حسراتي .........صرت اتنطر يمه طيوفك
ويا دمعاتي..........بالخد تجري تريد تشوفك
امجانك خالي ..........ارحم حالي
بنظره من اعيونك
###############################
متى يرد الشمل والدمعة حراكه
وهيجي الله بحلم يايمه نتلاكه

يافرحتي ....... عشت عمري.......بعدك انه اعله الدمع
يا حبيبي ........ويا عيوني ........ هاشمي ونورك يشع  
شو دكلي ........ماعرفتك...........الخيل غيرتلك وضع

يامذبوحي........... طولك ذاك ذابل لونك ؟
لجمة روحي...........هسه بكبرك كلي شلونك!
ياأمالي ...........ارحم حالي
بنظرة من اعيونك
#################$#$$$$$$$$$$$$#
ظكت مر الهجر جا مرني لو نسمه
وحكك ياعلي اتمنيت انه اعمه

كلبي يلهج.............كل مسية.......... كحل عيني شوفتك
يبني ليه ............ارجع ارجع......... مو وكته موتتك
لسه تسعر.............جنه جمره..........من تمرني صورتك

جَنهَ الحافر.........داس بصدري نار افراكك
جفني يساهر ......كل لحظه انه يمه اشتاكك
ويتروالي ........ارحم حالي
بنظرة من اعيونك
###############################
اليفاركله ولد الله اعرف ابوضعه
وانه بعمر الورد مني طفت شمعه

ذخر ردتك .........تالي عمري............موش ادفننك انه
هيه هايه...........مجازه تعبي ........ماشفت بعدك هنه
كبرتني .........هالمصايب ..........جن تسعمية سنة

لموتي أتْحَضر...........يمه وداعك ماخذ روحي 
شلون تصبر .......... لا ما ظنه تبره جروحي
دمعي يلالي ..........ارحم حالي
بنظره من اعيونك
###############################
انه شحمل قهر  يا يمه يمعدل
اموتن كل مسه من اذكر المقتل

وانه اشوفك...........بالحوافر.........وشبعد ظلي صبر
إعوجية ............بلاية رحمه........تدبج بذاك الصدر
ورده ترفه ..........ارد اشمك ........موش انزلك بالكبر

غربة الديرة...........بذيج الصحره ونار العاشر
منظر حيرة...........عيني تشوفك عين تكابر
يا منوالي ..........ارحم حالي
بنظره من اعيونك
###############################
انه امك والجرح بكليبي ما خله
وبروحي المصايب لا تظن سهله

ياشمعتي...........مو وكته..........بروحتك جدمي ثكل ياغلاتك..........اشتكيلك........بالسبي بيه شحصل
من شفتكم ........عل وطية..........ريت لو موتي وصل

يبني يبني .......ايا مصيبة هدت حيلي
هايج حزني ..... ولا ماترحم شوغة ليلي
ضايع بالي ...........ارحم حالي
بنظره من اعيونك




حسين مجيد العميدي

هدهد ال محمد ( مسلم ابن عقيل )

اليوم مسلم زمجر وكص نابها
وشرد كدامه كهلها وشابها
#######################
هلهلت طوعه ودوه وصار النزال
وكامت من خيولها تطيح الرجال
تكول مو مسلم علي البلكوفه صال
تراكضت ونزعت حته اثيابها
######################
طبها فراس الوغئ وحامي الدخيل
وكام يستنكي الزلم وين الثكيل
مالت أ وياها مال شما تميل
وسلمت للعمه قالع بابها
#######################
وجر بيها ومالت كباله الصفوف
ضهضب ودك بجماجمها السيوف
وحده يحوم وعلي دارت الوف
بنارها وتطلب بثار اصلابها
#####################
عت زلمها وغيم وطبها الجبير
وشال سيفه وكامت ركبهم تطير
دمدمت وعله الجحافل ضل يدير
وفرت من ايده ولحكها وجابها
######################
ضاعت وتاه الدرب والشرده وين
ركضت وبيها عتله صياح اونين
هذه عمه اليدعئ حبل الله المتين
وشيخه عراف العرب وانسابها
#######################

#الخادم

#علي_جاسب_الموسوي

جديد لسيدي ومولاي ( مسلم ابن عقيل )

مسلم شيخها وخيالها وصلها
شما مالت الكوفه يرد يعدلها
@@@@@@@@@@@@@@@@
شما مالت ودارت حول عليها
ذلها وفرت وعتها اوجر بيها
غار وكلب سافلها عله عاليها
ونكس روسها وشجعانهم شلها
@@@@@@@@@@@@@@@
جن حيدر النازل والزلم طرها
ضهضب والتوه وتاهت معابرها
عاد الخندق وصولات خيبرها
وذكرهم بقتال العرب كلها
@@@@@@@@@@@@@@@@
فراس وثكيل وياهو اليكدره
من اسياد العرب والموزمه بصدره
يافارس يلاكي ينكسر ضهره
وحالف عله الكوفه بصارمه يذلها
@@@@@@@@@@@@@@@
حدره تبريدت وختاض خالسها
وضاك الهوه وضكت ونخمد حسها
وكام يكطف الخيل وفوارسها
منه تراجفت وارخت فطاحلها
@@@@@@@@@@@@@@@
زمجر ورتعد وعليها ذب حيله
حيهم ولتوت من عزمه الكحيله
خيرهم نزع هدمه ولبس شيله
وداس حيودها وكص راس عايلها
@@@@@@@@@@@@@@@

#الخادم

#علي_جاسب_الموسوي

سيدي ومولاي قمر بني هاشم ( ابا الفضل العباس )

شد بحيودها ونكس عساكرها
زمجر والزلم تاهت معابرها
@@@@@@@@@@@@@@@@
كردسها ولواها وحول عليها
رعد والخيل رجبها عله راعيها
ضهضب ب الزلم وختنك واديها
وطبها الحيد المخوف جبابرها
---------------------------------------------------
زمجر والكتايب مالت وردها
وبضهور الشكر شد الزلم شدها
تاهت والمنايا اليوم موعدها
غار وبيت السيف بمناحرها
---------------------------------------------------
كباله حيود فرت ونجفت حدره
زلزل كاعها ويمنه ردمت يسره
جن صفين عادت والوصي بكبره
يعت بصفوفها وفر الرحئ يفرها
---------------------------------------------------
عت بصفوفها وغاص بكتايبها
ختنكت من رعد وختاض راهبها
سباع اللاكته زين شواربها
وتريس عليها وغار صاكرها
--------------------------------------------------
شتتها ودوت وزلام طكها بخيل
بريد حيلها وطب جنه عزرائيل
تاهت والفوارس كام بيها يشيل
والوادي ختنك والحومه سجرها
---------------------------------------------------

#الخادم

#علي_جاسب_الموسوي

سيدي ابا الفضل العباس ( سلام الله عليه )

طبها ضيغمها ورعد ب اكتارها
وضاكت وحول عليها ودارها
@@@@@@@@@@@@@@@@
نزل ميمرها وغضب واعلنها ثار
جدحت عيونه ودوت نار وشرار
دمدمت وتصاعد بطفها الغبار
ونكس الروس وسحك كفارها
@@@@@@@@@@@@@@@@
زوم طك زوم وجهبها وعتها حيل
زلمه طك زلمه وكطف خيل عله خيل
مالت وشدها الثكيل ابن الثكيل
وضهضب وشب ب العساكر نارها
@@@@@@@@@@@@@@@@
ضاكت وبيها التوه وصار التحام
شنف ردانه ودوه وصارت ظلام
وجر بيها وصار ع الموت زدحام
وضكت وبيها رتعد فقارها
@@@@@@@@@@@@@@@@
طبها وانشبجت يسار عله اليمين
وعله صوت صياحها وصار الونين
هذه صلها وحيدها ودرع المتين
وشيخه قتال العرب واكبارها
@@@@@@@@@@@@@@@@
خيل لاكت خيل واعلن بيها موت
شح هواها وخورست ماضلها صوت
زلزلها وجن علي يصيحله فوت
وطبك اليمنه بعزم ب ايسارها
@@@@@@@@@@@@@@@@

#الخادم

#علي_جاسب_الموسوي