#ليلة_الوادع ١
________

يا ليل العاشر
يجرح يذبح فجرك من يطر
و بصبحك باچر
رمله وليله و زينب تنكسر

بمدمع ناظرهن حزن
بنار اموادعهن حزن
_______

ليل اشعلامك انشر ظلامك
و خلي الخيم تتوادع الليله بحزنها
ملتهبه نارك يفجمع نهارك
و البيت الرساله چم شمس تگطع وتنها
عاين دمعهم بوداع اهلهم
اهنانه ابنيه وي والدها بالحسره حظنها
بسهم المصيبه كلمن نصيبه
و شاهد چم گلب أم مستعر لوداع ابنها

طول ساعاتك
رجوه امروه من عندك ردت
و اسبل دمعاتك
باچر حاير ياريتك متت

عاين لخيمهن حزن
بنار اموادعهن حزن
_______

رمله ابدمعها تعلگ شمعها
عرس القاسم الليله تريد اتحني ايده
امبارك يجاسم يبن الهواشم
ايلاگي الهلاهل هالدمع عالخد تريده
و ليلى بصبرها اتودع ذخرها
تشبگ علي شبگت ابن ينحز وريده
بخرت نظرها شينفع عمرها
و اليشبه محمد شوفته صارت بعيده

ليلى امن ادموعه
ماتت رادت تفديه بالاجل
و رمله اعله اشموعه
مالت ناحت ضاع الها امل

آخر ساعتهن حزن
بنار اموادعهن حزن
________

يبرد حظنها الغافي ابنها
و بعمر الورد نار السهم تاخذ املها
يم مهده گعدت اتلوليله بلگت
حسرات الگلب تغفه ويظل سالم طفلها
ماي اليطلبه ابنبله يصوبه
من دم منحره متروي باچر يرجعلها
اتناغيله مده اتهزه اعله مهده
مفطوم بسهم بعد الضنه و شيبقى الها

يمه اتلوليله
ابمهده بعده ما شاف الجرح
ضامي اتناغيله
و تنعه ابدمعه عن لا ينذبح

الحومه اتناطرهن حزن
بنار اموادعهن حزن
________

ليل و عذابك يكتب مصابك
و گلب الطفله لو حن الابوها يا رزيه
گعدن سويه سكنه و رقيه
يم احسين اجني الخيمته ابدمعه جريه
وحده تكلمه وحده تشمه
بنحره اسكينه وبصدره اجت تشبگ رقيه
لو روعوهن باچر ابوهن
اينظرنه على الغبره تسحگه اخيول اميه

سكنه وي خوله
يمه ابجسمه ايحضنن بالدمع
و اندارن حوله
ايندبن يبچن يصعب هالوضع

اتيتمن والدهن حزن
بنار اموادعهن حزن
_______

شمصعبها ليله ابعين العقيله
اتوادع ياهو من اخوتها باچر كلها ترحل
حسين و عضيده مگطوعه ايده
ياهو التصدله تقره فوگ اعيونه مقتل
وحشة خيمها لا والي يمها
باچر تركض ابحيرتها تصرخ من على التل
وينك يخويه ها يبن يبويه
يبن امي عدل لو ميت وما النه كل حل

تركض بالحومه
اتشوفه اطوفه خيل اعله الصدر
و تندب مهظومه
بحسره و عبره و يضربها الزجر

سوط ايرافگهن حزن
بنار اموادعهن حزن




حسين الأمين

#ليلة_الوادع ٢
لسان حال الإمام زين العابدين
علي السجاد عليه السلام
_______

الخيمه رسمتلي صور منيه
اشد من گطع النحر عليه

والدي ايودع عياله
كلشي بالدنيا بچاله
___

التمن و صار الدمع كل الحچي
وحده ماتت وحده بيده ترتجي
عمتي زينب سمعته و شبعت بچي
يا عيالي رايح انه و ما اجي

الخيمه صارتله جرح
هذا أشد من الذبح
الفرگه صارت تتضح قتيل

شفت دمعات اليتم
شبت بروحه الم
بحيله گوه ظل يلم ثچيل

شبگته عمتي و تون سمعها
نشّف ابچفه الجفن دمعها

بخطوه كل دمعي جراله
كلشي بالدنيا بچاله
_______

ما بقت كل دمعه بينه بخطوته
من ظهر مهره اشاهد طيحته
عمتي من الخيمه تسمع رضته
الله لا ينطي الخيول السحگته

نشّف اعيوني الدمع
استمع كسر الضلع
شفنه راسه منگطع سليب

الخيل تسحگ عالصدر
طحنت بعظم الطهر
امن الگفه حزه الشمر تريب

عمتي تركض بالحرب يحيره
من يصدوها الغرب چبيره

منفرش عالغبره حاله
كلشي بالدنيا بچاله
_____

من وگع شفنه العساكر و الخيول
فوگ صدره تسحگ و ظلت تجول
جتني زينب ناشدت عمه شتكول
فرن اعله الحومه هالموقف يطول

أنظر الحال الحرم
اتشگاف و ماكو رحم
السوط و النار ابخيم تطوف

طفل بالحافر عثر
طفل متگطع وذر
و ابن مگطوع النحر نشوف

اقسى كل منظر جره عليه
طفله تمشي اميسره وسبيه

جسم أبويه الخيل جاله
كلشي بالدنيا بچاله
______

طفله طاحت عالجمر مچويه ادين
ارقيه سلوبها التراچي الظالمين
وحده تصرخ عمّتي وحده الحسين
بالترب ركضتهن الما أدري وين

راس مرفوع برمح
و راس بالعين الجرح
وانه كل لحظه انذبح عذاب

طفله تركض للنهر
طفل بالحومه عثر
وحده تنده يالكمر مصاب

حشمت عمي الكفل يجيها
الثوب بالنار اشتعل عليها

عالنهر موته حلاله
كلشي بالدنيا بچاله
____

بهيمه تالي گعدوهن عالتراب
لا خيام و لا حراسه بس حجاب
الزينب السوط اعتنى بكل العذاب
من بعد ما شاهدت اعظم مصاب

نامن بوسط الرماد
غربه حراس و بلاد
الهوه صاير بس سواد دخان

وحده تنشد بالونين
عنه چا عباس وين
يجي و اتوزع الادين حنان

والله حيره حيرتي بعذابي
ألم زيدت عمتي مصابي

والشمر جهز حباله
كلشي بالدنيا بچاله





حسين الأمين

#ليلة_الوحشه

السيده زينب تخاطب اخيها الحسين عليهما السلام
بعد إنتهاء معركة الطف
_ - _ - _ - _ - ___

ليل وحشه وماكو وجهك
لا عطر منك اجاني لا خيال
ياهو اليه بغربه وحدي
اخلاف عينك چتفوني بالحبال

ضيعت كلشي من گلت أمشي
_____

شحلاة ارسوم وجهك چانت اطوف
بدليلي و الحزن عن گلبي مكشوف
هسه اعله الشفايف طبرة اسيوف
اشوفنها و عساها عيوني متشوف

شلون ظلت روح عندي
من شفت دم بوجنتك و التراب
طايحه منك عمامه
خويه اول مره اشوفك لسه شاب

ضيعت كلشي من گلت أمشي
_____

چنت وياك چن شجره و غصنها
تفي اعليه و انه بسد حضنها
رحت و بروحتك روحي حزنها
ميته وياك يا خويه لونها

عفيه ظلت مهجه عندي
من گلت راح امشي خويه والوداع
عگب ما ضيعت صوتك
انشده يا خويه حالي وگلبي ضاع

ضيعت كلشي من گلت أمشي
____

اسهرت ليل الهظم بالدمعه اناطر
يتامه خايفه و ابلايه ناصر
لحظه و لن تمر شفت الحوافر
وذر جسمك يخويه اعليها صاير

هنا ردت خويه المنيه
و لا اشوفن خيل تسحك بالعظام
ما دريت اشلون حالي
نباوع و يجري دمعنه ابلا كلام

ضيعت كلشي من گلت أمشي
_____

صدك ليل و بعد ما تگصدلنه
وحيده أبقيت و ابلايه زلمنه
اناطر بلكي اشوفن رف علمنه
اشوفه و لكن الشاله شتمنه

شايل بچفه علمنه
و بالسهام امزگينه و النساء
فرحت العباس اجاها
تالي حارس عالظعينه و الخباء

ضيعت كلشي من گلت أمشي
_____

شفت حارس يمرنه بعتمة الليل
يگول انه الحرس من عگب الكفيل
يخويه اهنا طحت و اتهدم الحيل
شبچت ايدي اعله راسي ودمعتي اتسيل

درت وجهي عالشريعه
ها يخو زينب أناشد يالكفيل
وسفه شامت يحرسلنه
و باچر بأمره سبايه عالهزيل

ضيعت كلشي من گلت أمشي
___

درت هالعين و الهزل ورايه
ظعنه امسافر ابلايه نهايه
ركبت اعله الهزيله ابلا حمايه
ينشدوني يزينب ماكو رايه

مودع الله بدربي انه
اي يبو اليمه حبيبي والسلام
مروا اعله القتله بينه
الأكبر و جاسم ملوهم بالسهام

ضيعت كلشي من گلت أمشي
____

مشينه و من وصلنه الديرة الشام
نظرات الغرب ترمينه بسهام
أهلها احجار يرمونه عالايتام
بخرايبهم يخويه اطفالك اتنام

صعبه بت ذاك الغضنفر
تدخل بمجلس دعيه ترد جواب
تالي گعدونه بخرابه
لا ستر بيها الحرمنه ابلايه باب

ضيعت كلشي من گلت أمشي





حسين الأمين

#فاجعة_السبي
صباح ليلة الحادي عشر عندما مرت النياق على الأجساد المرملة بالدماء
قالت العقيلة عليها السلام
_______

عالتربان شاهدناكم
بدمع العين رويناكم
من عالنوگ ودعناكم
________

من جابوا النوك الهزل
ركبونه و الدمعه تهل
وحده تلوذ بوحده
يخواني عانيت شكثر
منكم الواحد انتظر
و ركبت الهودج شده

زينب انه يخواني تره الوحدي
و من التل مهجه ما بقت عندي
الشمر يخواني صار بناگتي يحدي

سوط و نار حرگت خيمه
نوم اطفال وسط الهيمه
شوفوا الحال ناشدناكم
______

ركبونه و المشيه رمح
و الكلمه اشد من الذبح
منها انمرد دلالي
مرونه بالحومه غصب
شفنه دماكم من تصب
و متوذر شچم غالي

من عالناگه ادور وين ابو اليمه
لن شفته صريع امخضب ابدمه
و من سحگ الحوافر منطحن جسمه

صحت حسين بس ابگلبي
بختك شوف منهو اليسبي
افراگ البين فارگناكم
_________

بمصرعكم انشوف الهظم
ورمله تره شبعت لطم
من شاهدت جاسمها
مذبوح نايم عالترب
مو حنه بالدم منخضب
وي دمه يگطر دمها

و ليله شافت الاكبر على الغبره
و كل جسمه انملى لو طعنه لو طبره
راحت صوب ابنها و تجذب الحسره

ليله اتصيح الشيبي ردتك
رمله اتگول يبست حنتك
يالشبان دم حناكم
________

لهناك لن شفنه الطفل
رگبته گاطعها النبل
و امه علت ونتها
رادت تلولي للولد
و الرمل صايرله مهد
الصوبه مشت ناگتها

وگعت من عالناگه تشمن بيه
و اتلوليله بالدمعات و اتناغيه
الرباب و من حزنها گعدت اتحاچيه

يبني ليش مو بحظاتي
ميته كون ابدالك اني
هذا الصار من شفناكم
_________

من ردنه نگطع هالسفر
والحادي مر اعله النهر
شاهدنه چف مگطوعه
عاينت لن ذاگ الگمر
طايح و مگطوع النحر
و زادت بگلبي اللوعه

نايم و السهم بالعين و اموذر
صحت ها خويه وينك يا شبل حيدر
بعدك سلبوني و هسه اتيسر

يا عباس يا كفالي
نايم ليش شاهد حالي
متيسرين ويه اعداكم




حسين الأمين

#فاجعة_السبي ( شور )
_______

راح راح الحسين
راح واغمض العين
راح و المفر وين يا ويلي
_____

شفته وگع من المهر
و نام اعله وجهه يحتضر
و بالحجر صوبوا هامته
و سهم المثلث بالصدر

الخيمه ارفعتها و يا خويه صحته
ارجع لخيتك گلبي فجعته
لني انظر حسين گطعوا رگبته

راح مني مذبوح
راح شاغت الروح
راح و دمه مسفوح يا ويلي
_________

بشوغه اطلعت من خيمتي
اركض لخويه بدمعتي
و هجمت علي خيل العده
و شافت الوادم ركضتي

لحدود الخيام من گربت الخيل
و مچويه اديه من جمرة الويل
بخواني احشم لچن مچاتيل

راح اتشاهده العين
راح اطشر حسين
راح انسحك مرتين يا ويلي
_____

عالتل وگفت و ناشدت
يحسين لتگلي متت
انچانك يبن أمي عدل
الحگ تراني اتسلبت

ناديته بس ما اسمع كلامه
ثاري الحوافر طحنت عظامه
و راسه تصده اعيون اليتامه

راح جسمه مسحوگ
راح صدره مطبوگ
راح و گلبي محروگ يا ويلي
_______

احتاريت و الموقف صعب
وين انطي وجهي ابنص غرب
و ابن امي نايم عالثره
ويلي اعله وجهه منگلب

حاولت اجيله و اعداه منعني
و سوط ايتلوه گام اعله متني
صحته يخويه ترضه يطگني

راح و المتن طاح
راح و الخدر راح
راح و راسه برماح يا ويلي




حسين الأمين

#ليلة_دفن_الاجساد
_______

من اعتنى السجاد
يدفنها للاجساد

صاح بگلب مجروح
وآويلي عالمذبوح
________

اعتنى من الخرابه للطفوف و گلبه ذايب
من وصل طاح اعله وجهه و الدمع من عنده ساچب
ايعاين اصحابه و اخوته اموذره فوگ الترايب
و صد للحسين ابدمعته و ثگلت ابروحه النوايب

امطبره يشوف السيف
ابوجه حجر يا حيف

فوگ الثره مطروح
وآويلي عالمذبوح
_________

الوالده حاول يشيله و الدمع عالخد يديره
ايوسده اشلون التوذر بالصوارم والله حيره
ما گدر بيده يحمله و محنته بهاذي چبيره
تالي جمع جسم ابيه و لمهن اوصاله ابحصيره

من نزله ابيا حيل
الرضت ابيه الخيل

دمعه بحزن مسفوح
وآويلي عالمذبوح
_______

وسده ابگبره و دمعته امن الهظم تتجاره حمره
و حاول اترابه يهيله لنه ابيه يحچي نحره
يا علي وسده اعله صدري ابني عبدالله يخبره
و اعله صدر حسين اخيه وسده و ابعينه عبره

صاح ابگلب محزون
بصدره الولد مدفون

و صاح القلم و اللوح
وآويلي عالمذبوح
________

و رد على الاكبر يدفنه و وسده يم رجل ابيه
أنكسر ظهره ابحملته صعبه يدفن بيده اخيه
و رد على جاسم يويلي امحنه بدموم المنيه
وسده ويه الصحابه و دمعة اعيونه جريه

من دفنة الاطياب
رد ابدمع سچاب

صوت الألم و النوح
وآويلي عالمذبوح
_________

للنهر صارت عيونه و رسمت آلام الفجيعه
يركض و يلطم جبينه و يصرخ الصوب الشريعه
دنگ و بيده يقبله لنه شايل چف گطيعه
و ناده يا عمي و كمرنه الجثته عالشط صريعه

شاهد عمد بالراس
وآويلي عالعباس

و ابعينه سهمه ايلوح
وآويلي عالمذبوح




حسين الأمين

#فاجعة_السبي ١
________

عن يا سوگ احچيلك انه
بختك هالوادم شمتانه

تدري لو ما تدري شصار
دم وسوط وضرب احجار
عن يا سوگ احچيلك انه
_______

انه زينب يابو فاضل اشتگيلك حالتي
بطيحتك من ظهر مهرك اعليه وگعت خيمتي
سهم عينك من تصوب راوه دمعي الشامتي
گطع چفك جرح راسك ريته جارح هامتي

راسك من رمحه ايناظرنه
كلفه من توگع دمعتنه

بين الهزل بين النار
دم وسوط وضرب احجار
عن يا سوگ احچيلك انه
________

من مشينه شفت جسمك اموذر بصف النهر
انه وحدي و يحدي بيه الگطعك خويه وذر
شوفني و شصار حالي اتغيرت كثر القهر
انه من اصواب عينك عمت عيني امن النظر

يا منظر منهن احچيلك
ويا لوعات اتريد اشكيلك

حالي من عگبك مندار
دم وسوط وضرب احجار
عن يا سوگ احچيلك انه
_______

درب وحشه وانته ماكو فقط راسك منجرح
ابدمعة ايتامي يخويه انه كل لحظه انذبح
شوف هاي الحاله يمك أتخيل شينفع شرح
ارقيه من يضرب متنها تروح تركض للرمح

شوف الهظمات الما تنعد
بذن ارقيه الدم اتجمد

رايد تسمع مني اخبار
دم وسوط وضرب احجار
عن يا سوگ احچيلك انه
______

هذا حالي يابو فاضل من بعد ذاگ الدلال
بغربه أمشي دون حامي التفت يمنه وشمال
بعد ظلك هسه خويه واكفه ابين الرجال
تالي محروسة ابوها تنچتف وسفه بحبال

الماسمعوا من عدها الصوت
اگبال الوادم تالي اتفوت

يتفرج بحوالي المار
دم وسوط وضرب احجار
عن يا سوگ احچيلك انه
______

آخر احچايه اگلك واستمع هذا الهظم
نمشي بالصحره وعدوك ابد ما خله عظم
هاي مو كل المأآسي زينبك شبعت لطم
وگفت بديون اميه بت علي اتحاچي الزلم

آخر چلمة يالضرغام
كبرت زينب مية عام

حيل اختك عباس انهار
دم وسوط وضرب احجار
عن يا سوگ احچيلك انه





حسين الأمين

#فاجعة_السبي ٢
______

چنها علي من دخلت ابوسط القصُر
رجفت زلم كلمتها لن تمحو الذكُر
______

دخلت المجلس اميره مو سبيه
شايله مصحف نحور الغاضريه
چن حرب عدها ولا چنها ابرزيه
تخطب ابرهبة علي حامي الحميه

هزت عروش أهل الظلم و اهل الكفُر
رجفت زلم كلمتها لن تمحو الذكُر
_________

من رعبهم من بلاغتها ابحچيها
بيرغ الطف ظل يرفرف بين اديها
لجمت احلوگ التسولف عن سبيها
و راس الحسين ابتسم من صد عليها

فوگ الرمح بعيونه صد لم الخدُر
رجفت زلم كلمتها لن تمحو الذكُر
_________

وكفت ابعين الي رايد ذلها سله
و هوه المربي علي ياهو يذله
ذو الفقار ابكل حچيها من تسله
كلمن ايصدلها راسه ما يردله

بثت رعب لبوة علي ما تنكسُر
رجفت زلم كلمتها لن تمحو الذكُر
_______

بكل دربها بكل هظمها و الرزايه
توصل القصر آل اميه عدها غايه
منحر حسين التحمله اوياها رايه
عدها جيش امن اليتامه و السبايه

وسط القصر بين العده سجلت نصُر
رجفت زلم كلمتها لن تمحو الذكُر
________

من بعد حرب السبي كتبتها كلمه
هذا الحسين انتصر بالتالي دمه
خالد ابكل بقعه يضوي لسه نجمه
و كل شبر رايه اله مخطوطه بسمه

دم الطهر ما ينشف اليوم الحشُر
رجفت زلم كلمتها لن تمحو الذكُر




حسين الأمين

#فاجعة_السبي ٣
____

موقف سبي هاظمنه يا عباس
من العشاير جتنه يا عباس

ردوا النسوه امن السبي
و ظلن ربيبات النبي
_____

الكوفه من فتنه هاجت الفتنه
كل عشيره شبحت اعلينه النظر
للقصر راحوا للحرب فاتوا
صوب ابن ازياد علنوا هالامر

عشايرهم اجت سيوف امشاهره
عار اعله العرب من تسبي مره

خاف الحرب و الفتنه ابن ازياد
طلعوا النسه من عدنه ابن ازياد

نفذوه حالاً مطلبي
و ظلن ربيبات النبي
________

بالخبر دخلوا و النسه طلعوا
امن الخرابه بسرعه طلعن للاهل
خويه يا هظمه دورت زلمه
من بني هاشم اجه لينه عدل

نظرت اعله الحرم يدورن بالزلم
يشوفن يندعن يرفلهن علم

يا خويه ميّت مره تذبحني
من سكنه اسمع حسره تذبحني

ما فزع لينه طالبي
و ظلن ربيبات النبي
________

كل عشايرهن صوت حارسهن
يا فلانيه أخرجي سبيج گضه
التفت حيره نشفت الغيره
صاح يبقن بس بنات المرتضى

بقينه باليسر فقط نسوة علي
باسياط و حجر يخويه ننولي

بيت الشرف چنه احنه بالكوفه
تالي الخوارج صرنه بالكوفه

ومن الدمه حمره العبي
و ظلن ربيبات النبي
_____

للاهل طلعن واخواتك الظلن
بين خولي و حرمله و سوط الشمر
وينه حامينه صاحت اسكينه
وكفت اباب الخرابه تنتظر

كلما التفت رقيه اتنادي إلي
عمي ما يجي و اگلها اتحملي

شوف الهظم و اللوعه بين الناس
چم طفل تجري ادموعه بين الناس

انغر علينه يا أبي
و ظلن ربيبات النبي
_______

تالي طلعونه لشام يسرونه
بس حرمكم بالسبي خويه سرن
خوله من طاحت من الظعن ماتت
الشام آه الشام من فات الظعن

تتشفه النسه اجني بالدرب
واحنه ابلا أهل و بديرة غرب

بحجارهم لاگونه أهل الشام
و ذاك الحچي سمعونه أهل الشام

سب الصميده الناصبي
و ظلن ربيبات النبي





حسين الأمين

#فاجعة_السبي ٤
______

بعد عز ماضيها حرمله يسبيها

الچانت اميره امدلله
مگيوده تالي بسلسله
_______

ستر الله وخدر حيدر تنسبي وابلا ولي
والسبي للعرب فشله وعار ابد ما ينجلي
يطلبون ابثار بتهم و الصوارم تعتلي
وسفه ماواحد فزعها بسوگ طبت بت علي

ابلا كفيل و رايه تفوت نص اولايه

دم المدامع سايله
مگيوده تالي بسلسله
________

ادموعها بكل خطوه كوثر والدمع احمر يصب
الچان ابو فاضل حرسها يشتموها و تنضرب
السوط ما توجع ضربته مثل چلمات الغرب
هاي اخوها ابرمح راسه و جسمه باقي اعله الترب

السبي جارحها و الحچي ذابحها

من بيت أشرف عايله
مگيوده تالي بسلسله
_____

كربله اخذت گلبها و السبي ماخذ عمر
طاح يم الشاطي ظلها وصار يحديها الشمر
التحلف الكوفه ابخدرها وبالعفاف و بالستر
طلعت بثوب الاميره ودخلت بگيد اليسر

الدنيه دارت بيها من بعد واليها

المهيوبه اجتي الكربله
مگيوده تالي بسلسله
________

درب وحشه تمشي زينب والجرح يتبع جرح
ابدمعة ايتام وثكاله حايره ابليل وصبح
اتشوف منظر للسبايه هوايه أشد من الذبح
ارقيه لو ضربوا متنها تركض الصوب الرمح

هظمه كل ايامها احتارت ابأيتامها

نسوان هاشم بالفله
مگيوده تالي بسلسله
_______

تالي ما تالي بخرابه بنت باء البسمله
بعد عين الگمر حارس صار ليها حرمله
لا سگف لا باب بيها فرجه أشرف عايله
أحجار واسياط اضربوها بعد محنة كربله

حيره والله حيره دخلت اشچم ديره

اميسرها گدام المله
مگيوده تالي بسلسله





حسين الأمين

#فاجعة_السبي ٥
_____

اصعب ايامي راسك گدامي
أنظرله و بعيوني اتصور
يمشن ويايه جودك و الرايه
و نحرك كافل ضعن الخدّر
______

على اعيونك شفت مرسومه اثر كلمه
اعذريني يخويه انكتبت بهظمه
اجيتچ عالرمح منحر يهل دمه
و گلتلك منحرك يسوه الف زلمه

نحر تگصدلي كامل
تظل انته ابو فاضل
درع فوگ المحامل يا عباس

جيش ايهابونك خزرات اعيونك
سور و ما الهن كل معبر
ايحرسن فوگاي جودك و الرايه
و نحرك كافل ضعن الخدّر
_______

اريد احچيلك و خوفي اجرحنك
و مطر دمعك يسولف بالعذر عنك
عليمن تعتذر هوه شبدر منك
يخويه أنلچم من استمع ونك

على رمحك دمعتي
تره دمعك كسرتي
وفيت بحگ عشرتي يا عباس

انساهن كلهن لا تسأل عنهن
خدري و متني و خيمه التسعر
هسه بممشايه جودك و الرايه
و نحرك كافل ضعن الخدّر
________

على زينب يبو فاضل و لا تهتم
تره بس المتن من عندي ما يسلم
و على العين التصدلي اسهام تتقسم
و لا تزعل لون دمعي جره من دم

لون يجرحني متني
و حبالي آلمتني
و حقك ما تهمني يا عباس

دربي و خطواته يكتب آهاته
من الطف اليوم المحشر
عالشاطي و مايه جودك و الرايه
و نحرك كافل ضعن الخدّر
_______

سبيه و عالرمح راسك جرح گلبي
و لكن رايتك بيدي رغم تعبي
يبو فاضل و حقك مو ضعن مسبي
مشاعل ثورتي خطت نصر دربي

اخط بيدي انتصاري
و لا بان انكساري
يشد گلبي اسطباري يا عباس

ياما ناشدتك اعذر گلب اختك
تدري الزينب انته الابهر
محتاجه ابهايه جودك و الرايه
و نحرك كافل ضعن الخدّر
_______

الف شكراً قليله يابو المروه
يمن خوتك و لا تشبها كل خوه
سبيه صح شفتني و امشي بالگوه
لچن درب انتصاري بالصبر يطوه

اطب باچر قصرهم
ابددهم و اذرهم
و يهد صبري نصرهم يا عباس

من حيدر علمي زينب آنه اسمي
تربايت ضرغام و كوثر
اذبح بحچايه جودك و الرايه
و نحرك كافل ضعن الخدّر




حسين الأمين

#فاجعة_السبي ٦
_____

نايم يخويه اعله الرمح
وانه كبر بيه الجرح

كل هاي الايام مرت بالف عام
مشتاگه ياوجه الصبح
______

مشتاگه لعيونك يخويه
بعدك عيوني عموها
ابلا گلب أنته و اعرفك
تنلچم سكنه اضربوها

شفت العيون من يشمتون
تقبل شلون يوالي
مشاگف الايد راسك ابعيد
جرحك ايهيد يوالي

بچفي حرگات الخيم
ومناطره بلكت علم

يرد عني الخيول يلفيني و يگول
زينب خلص كل الألم
______

الدرب عدنه طويل لكن
دمع عينك واسه بينه
سوطهم ما خله متني
و بالهظم تشگف ادينه

بين الاجناب صار الحجاب
اعظم امصاب يوالي
رايده الموت بمجلس انفوت
ينده الصوت يوالي

أمشي و اصدلك بالدمع
ادري يلچمك هالوضع

ما ظلت عيون ما ظلت امتون
منكسر مني شچم ضلع
_____

نايمه بهيمه رقيه
تدري يحسين شهظمها
من اذنها ادماها تجري
و المتن سوطه لچمها

شحچي يا حال كل هاي الاطفال
جروها بحبال يوالي
ما عندي امعين مسبيه يحسين
مچتوفه الايدين يوالي

يالغالي شاهدت القهر
زينب تفوت ابلا گمر

تحچي بمجالس ما عدها حارس
والموت من عندي اعتذر
_______

مشتاگه اسولفلك مواقف
و ذكريات النه قديمه
من چنت يا خويه يمنه
و فيك امغطينه خيمه

چنت النه قران و چفوفك احنان
هسه بالاحزان يوالي
تاركنه لآلام دخلونه للشام
ويايه الأيتام يوالي

كل نظره بعيون اليصد
منها دليلي ينمرد

كل هالمعانات والفاطميات
ذبلن مثل غصن الورد
_____

هسه يحسين بخرابه
بعد طولك گعدونه
مو عرب اشراف صرنه
بالخوارج لقبونه

مو مره يحسين متنه الفين
شما شافت العين يوالي
تتشمت الناس انته بس راس
ما جانه عباس يوالي

أمنتك براس الرمح
وانته اعله طولك منذبح

كفالة اعيال مچتوفه بحبال
ارتاح و اتركلي الجرح




حسين الأمين

#فاجعة_السبي ٧
_____

امودعتك الله و الحبل بديه
ابلا رايتك فوگ الهزل سبيه

ها يالجبتني وحدي عفتني
______

فوگ الناگه شفتك عالنهر مطروح
و ردت فوگاك اطيح امن الهظم والنوح
انعمت عيني عساها و مني طلعت روح
و لا عالنوگ أودع نحرك المذبوح

لا تنهض اختك هالجرح تحمله
اليصعب وداعك و الرزيه سهله

فگدك هظمني وحدي عفتني
________

راح امشي وحيده ابغربه مسبيه
و لو ضربوني لا تفزع يخي ليه
ابلا محمل صفيت و ايدي مچويه
و اعيون الشماته تنظر اعليه

يالعايف اختك باليسر ضعنها
و سوط اليذبحك ما رحم متنها

سبني و شتمني وحدي عفتني
______

ياهو الي ينشف دمعة اعيوني
بعدك يالعفتها امسلبه اضعوني
يخويه ما الچمك و انظر شلوني
شمر و حرمله ورموها لمتوني

و الينسبي بين الغرب خدرها
اتظل تعتب اعله اخوتها من قهرها

ليش اتركتني وحدي عفتني
________

هاك اعيون زينب يا بعد زينب
و گوم الحگلي ظهري امن الضرب حدب
بكل هظمه اصيحك و الگلب يلهب
ترضاها الخدر من عندي يتسلب

اليا ديره اطب سهم الحچي رماني
و اسمي السبيه من هظم زماني

شگد مرمرتني وحدي عفتني
______

احشمك بيش يالنايم على التربان
تقبل اختك اطب ابوسط ديوان
و عله صوت الشماته و ناحت النسوان
و صاحوا هاي اخت المنذبح عطشان

و من بعد خدري و عزي المهابه
تالي يخويه اغفه بالخرابه

و سوط اعله متني وحدي عفتني




حسين الأمين

#فاجعة_السبي ٨
________

بالدرب
راسك نظرته و المدامع جرت
بالدرب
واتذكرت ايام عزي المضت
بالدرب
انته ذبيح و زينب اتيسرت
______

امشي بضعون المواجع
و الجرح فوگ الجرح
هاي اول مره اشوفك
بالدمه فوگ الرمح
اتذكرت من باوعتلك
كل دلالي المنذبح
من چنت ما ترضه خدري
يابو فاضل ينلمح

منذبح
فوگ الرمح بس انته ما منكسر
منذبح
و عيونك اتراقب و تحمي الخدر
منذبح
طول الدرب ما لحظه عينك غفت
_______

آنه ربيتك اليه
وانته لعيوني ضوه
آنه روحك و انته روحي
چنه نتنفس سوه
هسه يا عباس حالي
الحبل بچفوفي التوه
و من اطيح ايگوموني
و سوط بمتوني هوه

كربله
وياك اجيتلها و يرفلي علم
كربله
و منها طلعت اويايه بس الالم
كربله
رايتك و چفوفك و گلبي خذت
______

گبل ما احچي تگلي
ادللي ابأمرج انه
و لمن بعينك تصدلي
احس روحي امأمنه
الچنت اوياك العزيزه
هسه صرت امدوهنه
چم نذل بعدك يسبني
و الضرب ظهري حنه

لا أهل
گلولي زينب ياهو يفزع الچ
لا أهل
فوگ النهر طايح صفه كافلچ
لا أهل
يا حرمه مثلي كل اهلها گضت
________

چنت من امشي اشوفك
الجدمي تمسح كل أثر
و هسه شماتي تصدلي
بعين صلفه يا قهر
اسمي المحد يعرفه
و حرف منه ما صدر
تالي يا عباس اسمي
صار بحلوگ البشر

زينبك
دولبها طف النايبه بالدرب
زينبك
حتى اسمها انعرف بين الغرب
زينبك
مهظومه بعدك يالوفي و انتخت
_______

اصعدت عالناگه الهزيله
ميته بس حي الدمع
ضعن مسبي ابلايه وگفه
يگطع ادروب الفزع
خويه و الشامت ذبحني
من كلامه استمع
هاي اخت الدسنه صدره
الما سلم منه ضلع

و الزمن
خلاني متغربه بسهامه انلچم
و الزمن
ويه اليذبحك امشي ما انحشم
و الزمن
ما يرحم و ناره ابدليلي بقت
________

ابالي مرن ذكرياتي
و ماضي ما ارجع اله
بس هظم درب السباني
خويه ابد ما احمله
الشام ذبحتني ابحچيها
و صوت ضحكتها عله
كلفه اوگف بالمجالس
بين شمر و حرمله

تنتهي
كل المصايب بس يظل القهر
تنتهي
و الصعبه يتجسر عليه بشر
تنتهي
بدرب السبي كل ذكرياتي انتهت




حسين الأمين

#زين_العابدين_ع
_ - _ - _ - _ - _

يا سيد الساجدين
تشبه ولي المؤمنين
بالحبل مچتوف ادين

يا علي تشبه علي
______

امگيديها ايدك بالحبل
و الجامعه اتحز نحرك
متوارد اويه المرتضى
هم الوصيه اتأسرك

شعنده وياكم يمولاي الحبل
انته مچتوف و علي گيدوا قبل
والله صعبه يا علي و ما تنحمل
اگبال عينك يضرب الحره النذل

هد اليسر كل حيلك
و الحرمه من تشكيلك
و راس برمح يوميلك

يا علي تشبه علي
______

جدك قبل هم منچتف
و الزهره چانت تُعصر
حالك مشابه للوصي
اميسريها زينب بالبر

على الناگه و المتن منها جريح
طفل ضايع طفل يا عمه يصيح
و انته تنظر راس الحسين الذبيح
و الحرم گدامك اتگوم و تطيح

طفله تناشد بالناس
ماشفتوا عمنه العباس
و گدامك ايلوح الراس

يا علي تشبه علي
_________

الباب حرگوها گبل
و يمك خيم مشتعله
ابيت الوصي اتنزل وحي
و الخيمه چانت قبله

الباب و الخيمه صفن نفس الأمر
الباب عالزهره احترگ و ام الخدر
الخيمه شبّت و الاطفال بكل كتر
ظلوا ابين الحوافر و الجمر

باب فاطم وجت
و الخيمه هم احترگت
نارين عمتك شهدت

يا علي تشبه علي
_______&

الله يعينك بالسبي
ويه الفواطم وحدك
بالكوفه و الشام شكثر
بيهن تفطر چبدك

شگد محن شفت و هظم لآل النبي
حجة الله اعله الأرض يمشي سبي
بحرم هاشم يا وسف يحدي اجنبي
ما فزع واحد عليهن طالبي

يا عروة المتقين
تسمع انين الحسين
يا سيد الساجدين

يا علي تشبه علي
________

من اوصلت يم القصر
بالخارجي ينادونك
و راس الحسين بنص طشت
و تنظر عليه بعيونك

اگبال عينك ينضرب راس الحسين
شفته زرگه من كثر ضرب اللعين
الله اليعينك يزين العابدين
بالطشت راس الابو اتشاهده العين

ثگل الجرح ما يهيد
بالشفّه يضرب يزيد
حال الوصي هم تعيد

يا علي تشبه علي





حسين الأمين