#السيدة_رقية_عليها_السلام ١
_____

انتظرتك عالدرب مفروشه روح
دمعي عالوجنه ينوح
اطيب بالملگه الجروح

انتظرتك بويه ذابحني الهجر
و الگلب صاير جمر
يمته لبنيتك تمر انتظرتك
____

ساهرت اوي الجروح
امصلايه افرشت روح
الجيتك بالخرابه
شلون اغفه بلياك
وانه امچاني يمناك
و بصدرك يبابه

من رحت حسيت بعدك كلشي رايح
بويه چفك چان بين اچفوفي لايح
هسه لبنيتك حبلهم چفها جارح
و المتن من السياط اتحسه طايح

بعد چفك ليش يضربني النذل
و اركب النوگ الهزل
چفي صاير للحبل

بعد چفك ضعت ما بين المحن
غربه تحدي بالظعن
غيّر الحال الزمن انتظرتك
____

نمت و نومتي هاي
بلكت بالحلم جاي
و اتصبر ونيني
نمت بهاي الظنون
من سديت الچفون
شفتك معتنيني

حلمي چانت شوفتك ما رايده النوم
بويه وجهك لن اشوفه اگبالي مرسوم
سالم امن الذبح ما مسلوبه الهدوم
الحظنك اركاض اركضت طيحت الهموم

من فرحتي بعد ماحس بالجدم
طحت چن طيحة نجم
على حظنك بي اشم

من فرحتي انموت گتلك بس سوه
شفتك و ردلي الهوه
كلشي احس بيه روه انتظرتك
_

يبنيتي امشي وياي
بحظنك و استمع هاي
انتظرچ رقيه
ضاع احسابي يا حيف
انسيتك معتني بطيف
و حزني رد عليه

ضيّعت وجهك تراني بفتحت العين
دورت كل الخرابه والدي وين
عمتي گالت ما اجه و كل النساوين
و آنه أگلها چان يمي والدي حسين

دوريتك ودمعت عيوني تصب
فرفح اعليك الگلب
بالخرايب عالترب

دوريتك و اسمع اصوات النسه
يا رقيه اليائسه
ما اجه هذا المسه انتظرتك
_

ما صدگت الانگال
و ضليت اعله هالحال
والجيتك اتاني
المبچاي اعتله صوت
لن الحارس ايفوت
شايل طشت اجاني

اگبالي حطه و شفت عمتي تبچي وياي
ناشدت ماريد اكل يا عمه لا ماي
اتحيرت و اكشفت عن الغطه بيمناي
لن اشوفن بويه راسك معتني جاي

من نظرتك انعمه مني النظر
ليش صاير بس نحر
بوجهك آثار الحجر

من نظرتك شيبك امخضب دمه
اشفافك المتخذمه
و مهجتي متألمه انتظرتك
___

ها يا راس الحسين
چا جسمك بقه وين
احچيلي اشجرالك
سكتت شفّتك ليش
و گلبي اتصبّره بيش
مذبوح اعله حالك

السوط ويه السبي وي دخان الانفاس
كلهن يهونن لون ما جاي بس راس
اطيب چوياتي و تظل چويات الاحساس
وين اغفه و صدرك اعله الترب ينداس

شلون اشبگك
بيك شمسويه السيوف
ريت مو واقع طيوف
و انته جاي ابلا چفوف

شلون اشبگك
حايره و حيرتني هاي
وين اشمّك يا هواي
گلي يبنيتي تعاي انتظرتك




حسين الأمين

#السيدة_رقية_عليها_السلام (گعده)٢
______

من كربله للشام بويه
انتظر جيتك
بين المحن بين المصايب
عايفها بنتك

و بغربة احزاني محتاجتك اني
________

يوم ما فارگت وجهك
ظلمه كل دنياي صارت
وسط نيران المخيم
حيرتي و عمّتي احتارت
و بين سوط المتن بويه
من عفتني اعداك جارت

چفي احترگ من الخيم
و السوط بضلوعي هشم
و انه انتظرتك بالالم
وچم مصاب اعيوني شافت

يا دمع يكفي الغربه هايه
ها يالعفتني
نار المخيم و الهزيله
شگد لوعتني

وبس دمعي وآسني محتاجتك اني
______

بالسبي ما ناسيه اسمك
كل درب اسمك اجيبه
يا اولايه ادخللها
عنك اسأل كل غريبه
بلكي واحدهم يعرفك
و الگلب يسچن نحيبه

ثاري انته چنت اعله الرمح
وياي تمشي منجرح
ما چنت اعرفك منذبح
و جثتك ظلت سليبه

ياما نشدت الناس عنك
و بكل مدينه
ثاري انته راسك يمشي مسبي
ويه الضعينه

بآلامك اتعاني محتاجتك اني
______

من بعد طول انتظاري
و اغيابك الطول عليه
ليش بس راسك اجاني
ما جبت صدرك اليه
هواي مشتاگه اشبگك
و تغفه بحضانك رقيه

ظليت بعدك حايره
طفله عفتني اميسره
ما ادري بحوالك تره
من نهار الغاضريه

وسط الطشت يالمعتنيني
بآلام حزنك
بس نحر بين اچفوفي شلتك
چا وينه حظنك

و شو انته بحظاني محتاجتك اني
______

فدوه اخذني اوياك بويه
الدنيه ماتسوه ابغيابك
طفله عمري أربع اسنين
و شيبت من طف عذابك
بركضة العاشر الخيل
الخيمتي جابت اثيابك

و ركضت على التل عمتي
و شفت العذاب بصرختي
يمك ردتها موتتي
و لا يلوعني مصابك

هاي الخرابه بيها شفتك
بعد الرزايه
وياك اخذني و خل احضنك
مثل البدايه

مفتوحه ذرعاني محتاجتك اني
_______

( المصيبه )

وغربة احزاني بعدها
عايشه اوياي ابمماتي
حايره و بس عمتي يمي
و بيه زادت نايباتي
هوايه مشتاگه اگصدك
باربعينك وي خواتي

اوصل و انوح اعله الگبر
و ادموعي من عيني حمر
ياريت يمك استقر

وينحفر لحدي اويه لحدك
و اترك الشام وغربته




حسين الأمين

#السيدة_رقية_عليها_السلام ٣
__________

نامت بعد ذاك السهر بحزن يتم
و شافت ابوها مبتسم اجه بحلم

دمعة العين شبگت حسين
بساعة البين شبگت حسين
__________

بعد المدامع و السهر
و ليل الخرابه المظلم
نامت رقيه امن الحزن
و احساسها متيتم
اشتاگت للحسين شكثر
و الطفل شوگه ايهدم
ما تدري ابوها منچتل
و منه الصدر متهشم

ما تدري راسه اعله النحر دمه يهل
و الجسد باقي ابكربله بلا غسل

انسحگ مرتين شبگت حسين
بساعة البين شبگت حسين
_______

غمض جفنها وما بچت
خلص صبر رجواها
لنها تشوفه بالحلم
والدها و اتعناها
طاحت عليه مثل النجم
طفله البُعد اذاها
و شبگت ابوها و حضنته
و دمعة فرح مبچاها

گالتله راواني الهجر
أشد ألم
ايهون السبي ايهون الضرب
و بعد خيم

طولت وين شبگت حسين
بساعة البين شبگت حسين
________

بحضنه و تسولفله الهظم
طفله صرت مسبيه
طول الدرب سوط المتن
ما فارگاني شويه
و لمّن رحت حرگوا خيم
و بيها انچوت ايديه
و هاي اليتيمه ابكل بلد
ايأشرون بويه اعليه

كل ديره ادخلها الحچي مثل رمح
تهظمني كلمات اليتم اشد جرح

بصوت الونين شبگت حسين
بساعة البين شبگت حسين
________

ما طوّل اعليها الحلم
خلصت ابسرعه اطيوفه
لن فزت و كلشي انتهى
و رد الدمع لجروفه
نادت اريدن والدي
هستوها عيني اتشوفه
يا عمه وبحضنه اگعدت
و ضليت احب بچفوفه

يا عمتي وينه والدي بدمع حچت
ما لحگت منه ارتوي ونهر بچت

عيوني الاثنين شبگت حسين
بساعة البين شبگت حسين
_______

صوت النحيب امن اعتلى
جاها الطشت يا هظمه
ما عرفته و استغربت
محتاره گعدت يمه
رفعت غطاا لنه نحر
والدها و ابلا جسمه
شبگت منيه شبگته
بدمعتها مسحت دمه

راسه بحضنها خلته وتصد نحر
و بچفها دمه مسحته وبچه الدهر

باسته امنين شبگت حسين
بساعة البين شبگت حسين
________

ماتت على راسه و مشت
يمه و گضت سفرتها
و صوت العليل المنكسر
رفعيها يا عمتها
ماتت رقيه اعله النحر
يا لچمة امصيبتها
وسط الخرابه بالغرب
بذاك الهظم دفنتها

طفله اربع اسنين العمر
تطب گبر
فسرت مواجعها الصخر
وگضه الصبر

بغربه للحين شبگت حسين
بساعة البين شبگت حسين




حسين الأمين

#الحسن_المجتبى_ع
_____

آنه الحسين
يبو محمد و الجرح ضاهدني
آنه الحسين
ابدال روحك اخذ روحي مني
آنه الحسين
ليش وحدي نيتك تتركني
_______

يا چبير البيت يالاخو اتمنيت
عمري كله استظل بظلك
احچيلك ابحرگه مو وكت فرگه
ابدال روحك اخذ روحي لجلك


چنت والد اليه من بعد حيدر
ابوجودك هيبتي ما تنلوي و تزغر
چبدك بالطشت بچاني دم احمر

چبدك اشوف
و انمرد لجلك يخويه چبدي
چبدك اشوف
و چنك اتگول استعد من بعدي
چبدك اشوف
و بالطفوف و لوعته ايذكرني
________

ابحالتك هايه افهم احچايه
امودع الله اتگول يابو اليمه
يالمعودني ما تفارگني
شلون خويه اتعوفني بالهظمه


يا أول ظهر مكسور من عندي
مو طبعك يخويه اتعوفني ابوحدي
يريت السم ترك چبدك و اخذ چبدي

كلمة وداع
تنرسم عالوجنه من دمعاتك
كلمة وداع
يبو القاسم واضحه ابدمعاتك
كلمة وداع
گطعت گلبي تره و ذبحتني
______

فرگتك حانت وكسرتي بانت
و بعد وياك العمر شيرجعه
امضيفك الخالي شده كل بالي
من اصدله تنزل امن عيوني دمعه


انهدل متني يخوي بعازت امتونك
يالمشبع الخلگ و الطير ماعونك
چنت انظر ابويه و امي بعيونك

الزهره و علي
من اصد لعيونك آنه انظرهم
الزهره و علي
و بلامح وجهك اتذكرهم
الزهره و علي
اوياك خويه الليله راحوا عني
_______

زادت اجروحي وما گضه نوحي
اطيح دمعاتي امن اصد ابنيتك
كل ملامحهم من يصد عمهم
چني يا خويه اباوع عينك


مو بتراب لا وسدتك بگلبي
يحيرة عيني من أدورك گربي
و اشاهد ولدك و ينزاح كل تعب

لمن مشيت
طاح حيلي و انكسر كل ظهري
لمن مشيت
اوياك طلعت روحي عافت صدري
لمن مشيت
رافگت دمعي و مواجع حزني
_______

ظلت الذكره حسره وي حسره
و صورتك ما لحظه عافت بالي
نام و اتهنه و آنه بالونه
اظل عگبك و الحزن يحلالي

ارتاح و عوف لبن امك جروح و هم
ابفگدك هايه ثالث مره اتيتم
امودعك و اللقا يم صدري المهشم

برض الطفوف
انتظر باچر يخي تلفيني
برض الطفوف
من يخلص الشمر گطع اوتيني
برض الطفوف
بعد ما خيل العده تسحگني




حسين الأمين

#الحسن_المجتبى_ع ٢
__________

يا بحر الكرم و الجود
و ديوانك صبح قبله
الضيف اليوصلك معتاز
بكل خيرك يرد لهله
_______

يا ثاني ضوه للكون
يا منهج علي الكرار
أول نور للزهره
و يا سبط النبي المختار
ديوانك منارة خير
و قبله للگصد خطار
و على چفوفك ينام الطير
و ما لحظه فرغلك دار

و انته للكرم دستور لازم يندرس كله
_______

حاتم لو يصد جودك
يسجدله على اركبه
تحط اللير فوگ الزاد
للگاصدلك ابطلبه
روج الدله من اتفور
تشبه روجة الكعبه
و انته ابن الصفه و زمزم
و الحج بيكم ايوجبه

الباري اموجبه بيكم
الميحبك يحج شله
________

سم چبدك يبو محمد
رسم للنايبه احزان
من غدرك بدت للطف
ملامح ذبحة العطشان
الگوم الخانت اعهودك
عليها لعنة الرحمان
نار الهظمه و اللوعه
خلت بالگلب نيشان

الگوم الي سعت ضدك
عليها انطبعت الذله
_______

منعوك الدفن مولاي
يم جدك نبي الرحمه
ما راعت نبي الإسلام
وادم هتكت الحرمه
باعت دينها ابدينار
و ميثاق الشرف ذمه
الخانت كل عهود الله
بوسام العار متوسمه

و انته اعله العرش اسمك
و املاك السمه اترتله




حسين الأمين

#الحسن_المجتبى_ع ٣
__________

من مصاب السم بدت ذبح المناحر
الحسن بالسم و الحسين ابحوافر
يا مصيبه يا مصيبه
________

خل افصل بالرزايا وحده وحده
چبد الحسين انرمه من قوس جعده
آية القربى جفوها و الموده
و من حقدهم سمموا للحسن چبده

شگد توارد بين اصحاب اللئامه
بسم غدر ينهي الحسن آخر ايامه
يا مصيبه يا مصيبه
________

الحسن چبده توذر بألم سمه
و الحسين ابچبده نابت باقي سهمه
اطشرت امعاء الحسن وياها دمه
و الحوافر طشرت لحسين جسمه

امه ما راعت رسول الله بعترته
سم ابو محمد صبح ياذي مهجته
يا مصيبه يا مصيبه
______

امه تعتاش الغدر و اعله الخيانه
و ما رعوا ريحانة الهادي و مكانه
الچان حتى الطير يشبع من حنانه
الناس ما رحمت و لا يرحم زمانه

ما كفتهم هالجنايه و هالرزيه
ردوا اعله احسين بارض الغاضريه
يا مصيبه يا مصيبه
_______

يا فجيعتهم و لا تشبه فجيعه
اشحال امهم فاطمه الزهره الوديعه
واحد امن السم گضه اتناثر نجيعه
و واحد ابلا راس بس رگبه گطيعه

مو دموع اتهل دمه اعيون الزجيه
و الحسن بعيونها اتشوفه رميه
يا مصيبه يا مصيبه
_________

يا مصيبه گبره ما تشبه ولا امصاب
مرقده وسفه تساوه ويه الاتراب
هذا ابن خير الورى و من نسل الاطياب
ماكو گبه و لا مناره الحضرته و باب

حلم عد انصاره تشتم ترب گبره
و المواكب بالصحن تلطم و تقره
يا مصيبه يا مصيبه
______

باچر المهدي لون بيّن ظهوره
نبني گبته و مشي نتعنى نزوره
تظلم الدنيه و يشع اعلينه نوره
و الاذان الشيعي يتسجل حضوره

و نحب شباچه و حوائجنه بدينه
و من كرم جوده الحسن يرأف علينه
يا مصيبه يا مصيبه





حسين الأمين

#زيارة_الاربعين
___

الرايد يزور الجنه
الكربلا يتعنى

حياكم يزوار حياكم
__

الخطوه ابدربه ابحجه و عمره
اليخدم و يحشم يكبر قدره

اليبحث عالثقافه بالمشي ايواكب
يتعلم شنو الاخلاص و الواجب
ابو الموكب على اجبينه صبح كاتب
يالمشاي انته العين و الحاجب

(( و اتراب اجدامك يتقدس ))

جدم اليزوره انبوسه
و من البغض محروسه

حياكم يزوار حياكم
____

العالم حاير ومحتاره المعموره
منظر للمحشر صاير صوره

كل خطوه تهز الكره الارضيه
و يتحول إسمها الكربلائيه
شعارات الهلا اتحير الاعزوبيه
و كل چادر تشوفه چنه ملويه

(( كل موكب ينعد ابدوله ))

العالم اشما يتجدد
لحسين يلبس اسود

حياكم يزوار حياكم
___

ايعزب موكب و موكب يطبخ
زاير يمشي و زاير أرخ

بدربك يل التزوره املاك متنزله
عدها كربله تصبح تره القبله
و شوف شچم خدم لجلك ترك اهله
و من تعطش الماي ابعينه ما يغله

(( و چاي حسين اشگد بي نعمه ))

هايه المسيره هايه
ما تنوصف بحچايه

حياكم يزوار حياكم
___

اتشاهد واحد ما يخدم يوحيلك
يگصد من تگعد عن الحر ايفيلك

عن حر الشمس يصبح درع جسمه
خاطر ينكتب من الخدم اسمه
ميهمه التعب لا والله ميهمه
المهم ام الحسين اتحسبه بالخدمه

(( و مبخوت الدار البي زاير ))

الرايد يعمر داره
بحسين و بزواره

حياكم يزوار حياكم
___

بالطف اوكف من توصل سالم
اتلفت بلكت تلگه القائم

اكيد المهدي چان اوياك هم حاضر
من البصره هم متعني اله زاير
أحمل بالمشاعر لوعة العاشر
حتى ابجيشه جندي ايحسبك و ناصر

(( انصار المهدي المشايه ))

بكل خطوه الف هنيالكم
و المهدي يمشي اوياكم

حياكم يزوار حياكم




حسين الأمين

#زيارة_الاربعين ٢
________

هله بالزاير هله
من البصره الكربله

يا هله و ميت هله ابزوار الحسين
________

رافعه ابكل موكب الزهره عباره
هله بشيعة حيدره الناس الغياره
العاف بيته يدري يم احسين داره
ينسى روحه لون ينظر للمناره

انه اجازي بالحشر
الخطوه احسبها ابعشر

يا هله و ميت هله ابزوار الحسين
_________

الذكر زينب بالمشي باچر جزاته
يشوف وجه احسين و يقبل عباته
ما تلوحه النار اليتابع صلاته
و انه باچر احضره ابساعة مماته

الما يعاين بالدرب
الجنته بيدي يطب

يا هله و ميت هله ابزوار الحسين
_______

الشال رايه بالدرب أجره عليه
انه وي حيدر نحضره بالمنيه
و بعد من الگمر هم ياخذ هديه
رايته يتباها بيها اعله البريه

الرايه عنوان النصر
بالحشر تصبح ذخر

يا هله و ميت هله ابزوار الحسين
_______

و الذي مشتاگ للزاير يخدمه
و مستعد عمره لبو اليمه يقدمه
بالقيامه بيدي هالخادم الزمه
و الطهارة مولده اتشكر امه

عنده حجه امسجله
ايرفعه الله منزله

يا هله و ميت هله ابزوار الحسين
________

يالتواسيني اعله ولدي الف شكراً
ادموعكم ويه دموعي لسه يجرن
اجدامكم لرض الطفوف اهواي يمشن
الجنه تحت اقدامكم باچر تُـثمن

و المواقف ساعيه
عالوعد و التضحيه

يا هله و ميت هله ابزوار الحسين




حسين الأمين

#زيارة_الاربعين ٣
______

گبرك
نحتمي بسوره ياهو اليزوره
ينوح المصابك

نعتنيلك عالجمر
نكتب آيات النصر
_______

يا حسين انته الطبيب الكثرن اجروحه
زايرك من يعتنيلك تطمئن روحه
اربعينك على العالم خيّم ابنوحه
و گبرك الكل البشر بيبانه مفتوحه

سرك
معجزت الهام شما گضت اعوام
تزيد الشعاير

يا عظيم و مقتدر
نكتب آيات النصر
_________

نعتنيلك كل سنه نمشي اعله لهفتنه
خاطر انفرح دليلك لو تشاهدنه
ندري بيك انته العبادة الواجبه النه
و لهذا انگول لجلك الله خالقنه

نمشي
لشوفت عيونك انخلي مضمونك
عقيدة گلبنه

صعبه نوفيلك عشر
نكتب آيات النصر
________

يالمشت اختك اسيره بثورتك هايه
لون طول العمر نمشي دون الكفايه
لكن انواسي العقيله بهاي الحچايه
واجباً مو مستحباً نرفع الرايه

نگصد
انواسي العتره زينب و اسره
علي و الزچيه

جايه ليك من اليسر
نكتب آيات النصر
________

كل مشينه ما يوافي لوعه من گلبك
اچبير جرحك و الطريق ازغيّر ابدربك
انته صح ضامي و لكن نرتوي بعذبك
احنه ما عدنه وسيلة فقط بس حبك

الزاير
بالعمر مره تعتني الگبره
بيوم القيامة

انته راعي هالامر
نكتب آيات النصر
_________

بدربك انشاهد معاجز و العقل مبهم
طه يمشي الحد ضريحك قبّله و سلم
واگف و ناصبله موكب حيدر امحزم
فاطمه اتوزع بديها و الحسن يخدم

بيهم
من يمر زاير الحسن حاضر
يرحب مضيفه

شيعه و اليوم الحشر
نكتب آيات النصر




حسين الأمين

حبك يحسين ديني (يا ملاذي) | علي حمزه العزاوي
https://youtube.com/watch?v=vMFdYGvRPUc&si=rIDSwp-TDkUsX4o1

#الحسن_الزكي_العسكري_ع ١
_______

صوت الحسره من سامره
تبچي الزهره تنعى ابويلاه

ميت مظلوم بسمه
ثامن ولد ابو اليمه
تنعى ابويلاه
________

لرض سامره اجتي ابيا وضع
تبچي و امخليه اديها اعله الضلع
اهتزت الجدران من كثر الدمع
اتصيح يبني گلبي لجلك منفجع

يبن الهادي هاج افادي
صوتي اينادي لمصابك آه

ابدلالي زادت لچمه
ثامن ولد ابو اليمه
تنعى ابويلاه
______

ويه چبده الچبد من عدها انثلم
و فوگ گبره كل حزن بيها انرسم
چم ابن ليها انسكى سم الألم
من الحسن للحسن ما واحد سلم

شافت سمهم كل محنتهم
يا غربتهم ياهو التنعاه

كلهم حالتهم هظمه
ثامن ولد ابو اليمه
تنعى ابويلاه
______

شمت اترابه و مدامعها نهر
و من بني العباس چم ضلع انكسر
ليها من كثر المواجع و القهر
و المصاب العسكري محني الظهر

حزن اصوابه جرح امصابه
دمع اترابه يشرح مأساه

تصرخ يم گبره ابيمه
ثامن ولد ابو اليمه
تنعى ابويلاه
_________

حاچت اترابه و تگله يالحسن
يبني من سموك حبل الله انطعن
أمه ما راعت وصايه المؤتمن
و على العتره بالغدر صبت محن

بغدر الأول لمن أول
إرث المرسل و آيات الله

و تبعت اهوائه الامه
ثامن ولد ابو اليمه
تنعى ابويلاه
_________

ويه ونها انسمع للمهدي ونين
ثاري حاضر چان ويه ام الحسين
گعدت و تحچيله آلام السنين
يمتى يبني وعد ثاراتك يحين

موعد ثارك يا بتارك
كل انصارك وعدك تتناه

سيفك يكشفها الغمه
ثامن ولد ابو اليمه
تنعى ابويلاه
_______

عظمت أجره بأبوه العسكري
و بالألم باتت حزنها سرمدي
هالظلامه الاسساها السامري
الجحد من بعد النبي بيعة علي

هاذي الزمره أصل الغدره
بدم العتره اشتركت وياه

ما راعوا لله حرمه
ثامن ولد ابو اليمه
تنعى ابويلاه




حسين الأمين

#الحسن_الزكي_العسكري_ع
( عگيلي ) ٢
_______

اللهم عجل ثاره
_______

من سامره ندعوا الليله
و للحسن مدمعنه انسيله
و لبنه المهدي هم ندعيله

يظهر و يهل اببتاره
_______

بسرداب الغيبه للباري
نتوجه و المدمع جاري
ايعود و يطلب ثار العاري

البطف متوذره اكثاره
_________

اللهم بطه المرسل
و اكتاب القرآن المنزل
تعجيل الثاره نتامل

ايرد احگوگه و يشعل ناره
_________

اللهم بطبرة حيدر
و فقاره اليشطر بالعسكر
عجل للغايب خل يظهر

و يا رب اجعلنه أنصاره
______

اللهم بضلع الزهره
و محسنها الما نندل گبره
عجل للمحجوب ابنصره

و ايرد الحگ هم لدياره
________

اللهم بوالي الامه
الحسن المظلوم و سمه
عجل ثاره و أشدد عزمه

و حفظه يا رب من اشراره
_________

اللهم بگطعة نحره
و ابحق اضلوعه المتكسره
عجل للطالب في امره

يطلب ثاره و ثار انصاره




حسين الأمين

#الليالي_الفاطميه

كما وردَ عنكمْ سادتي آلَ محمد ( عليكم الصلاة و أتم التسليم ) ، أنَّ الهجومَ على دارِ الوحيِ أَمَرُّ وأدْهى مِنْ كلِّ مصاب ، وهو أصلُ يومِ العذاب ، فإنَّني أستأذِنُكم وأطلبُ النظرةَ منْ صاحبِ العزاءِ (عجل الله تعالى فرجه) طارقاً بابَ العزاءِ الحسينيِّ بآبياتٍ وآهاتٍ فاطميَّة ابتغاءً لمرضاة الله تعالى

خدمة الحسين ( عليه السلام ) الكرام لا ألتمس غير دعائكم لي و لوالديّ بالأجر و الثواب

#١٤٤٧هـ
#محرم_الزهراء
#حسين_الأمين

#الليالي_الفاطميه ١
_______

ياهو اندفن بالمگبره سولفلي بجروحك
وسدت بيدك فاطمه لو وسدت روحك

بعيونك امصاب فاطم بالتراب
لو وسدت روحك
________

مو خطوات إلي تمشيها
اتنازع ملك الموت اعليها
بچتافك ياهي امخليها مقهور

مو من بيتك حيدر طالع
من جسمك روحك دتنازع
شايل تابوتك بس واگع مكسور

هذا آخر نفس بدموعك التنزل
چنك يا علي بالدنيا مطول
يا نعش التشيله و متنك ايهدل
و انته الكون بيدك يا علي تحمل

يحزام صبرك ما رخه بس الجرح يكتل
يعقوب بعيونك كعد بالمدمع اليهمل

اتنطر اجواب فاطم بالتراب
لو وسدت روحك
_________

تحفر بالكاع بدلالك
ياهو المات وبدل حالك
جن هاذه نعش ام عيالك ويلاه

حگك لو هليت ادموعك
حگك لو تحنيها اضلوعك
راحت من الدار اشموعك ويلاه

عثره الخطوه تكضيها باثر خطوه
بيرغ للحزن رفيت مو غزوه
بنياب الدهر ظليت تتلوه
اويه الزهره مشت ايامك الحلوه

دافن عزيزك بالكبر حكك ترد تعثر
والموت لو يتعنى الك ما منه تتعذر

وللموت طلاب فاطم بالاتراب
__

اسگي الزهره بماي اعيونك
اتخضرلك كلمات شلونك
حط طير الشوك اعله امتونك
ميروح

ابالك تسرح كل ذكرتها
رايد گطره من عشرتها
ابيتك تربتها وسبحتها
والروح


ما ظلت ملامح و الدمع ياذيك
و الشوگ ازدحامه ياعلي ايوديك
يم رحتّها تگعد و المواجع بيك
تشتمه عطرها من جفوف ايديك

ابراهيم گلبك يا علي و النار نص كلبك
تطفه لون شفت التحب بس بالترب حبك

من الكسر غاب فاطم بالاتراب
لو وسدت روحك
_________

اكصد بير احزانك وانعه
متردلك يالحيد البضعه
رتل قرآنك بالدمعه ترتيل

لو هاجت آلامك ليله
اكصد ليها ودمعك سيله
ولتراب الزهراء اشكيله بالليل

بسمار الضلع ماخذ گلب منك
الشايلها برموشك هدلت جفنك
كل ليله اكصدلها بدمعك و حزنك
اذا ظنك ترد اكطع علي ظنك

اويه ام الحسن ضاع الحلم و افراحك و عمرك
ارجع الدارك جم طفل مكسور ينتظرك

و لتعاين الباب فاطم بالتراب
لو وسدت روحك
________

اطفالك ضاعو بعد امهم
روح الدارك بآهك لمهم
شوف الحسره من اتكلمهم بالعين

تلكه بزينب ونه ولجمه
واتفسر كلبك بالهضمه
والحسن ايسالك عن امه وحسين

دمع اطفالك اشكد يا علي ايفجعك
عليهم عالضلع المن تهل دمعك
الله يساعدك ياحيدر بوضعك
وعله ونت اليتامه منكسر ضلعك

جم ضلع ويه فاطمه منكسر من عندك
ضلع الهجر ضلع الثأر ويه ضلع ولدك

جم ضلع منصاب فاطم بالاتراب
لو وسدت روحك




حسين الأمين

#الليالي_الفاطمية ٢
--------------

للمسجد رحت وسطه صحت
بعد الكسر
لا ولي إلا علي
طول العمر
_______

من گصدت المسجد و جان الضلع
ينزف أمن اصوابه واهمل بالدمع
بالرمح قنفذ ضربني واندفع
صحت وسط المسجد بون منفجع

عباد الصنم ضلعي انهشم
من الغدر
لا ولي إلا علي
طول العمر
_______

التفت خلوني وبلايه معين
واحد بجفه سطرني اعله الجبين
صحت خلو عن أمير المؤمنين
الثاني اجاني وزيد اعليه الونين

بچفه انضرب وسط الغرب
و انعصر
لا ولي ألا علي
طول العمر
________

من صحت خلو علي يرجع الي
لو أگشّف راسي وانده للعلي
اوصيتك خانوها ومجتف علي
او حرگوا اعليه يلاهي منزلي

مكسورة ضلع فوك الدمع
انسطر
لا ولي ألا علي
طول العمر
____

أرجعت للدار محنيه بقهر
حيدر ايتچيلي والضلع انكسر
شفت أولادي دمعهم چن نهر
وزينب من اصوابي عذبها السهر

ونتهم ألم بيه انرسم
اصعب امر
لا ولي الا علي
طول العمر
_______

من گرب ليه الأجل والموت حان
حيدر ايگلي بقيت ابلا أمان
كون مو عمرچ خلص عمر الزمان
ريت يم گبرچ احلصي مكان

يازهرتي يادنيتي
موتي انتضر
لا ولي ألا علي
طول العمر





حسين الأمين

#الليالي_الفاطمية ٣
__

الضلع بنتظارك تشهره فقارك
المصاب الزجيه شوكت يبدي ثارك

يمهدي يلچمك انسطر خدها لامك
شوكت يبدي ثارك
___

يمتى سيفك اتشهره المصاب الباب
تره اصواب الضلع يالمنتظر ما طاب
لليوم الزجيه اتهل دمع سچاب
يلچمها الكسر من دفعة الاجناب

يغايب دفعها وكسر هم ضلعها
على العتبه طاحت تون من وجعها

غيور و نحشمك انسطر خدها لامك
شوكت يبدي ثارك
__

نابت بالصدر بسمار بالعصره
و طاحت و الونين ايفسر الصخره
وصل يم حيدره صوت الضلع كسره
بقت محتاره امك تجذب الحسره

علي ما اجاها وحيده ابأذاها
الوصيه بچفوفه أمر بيها طه

صبر ما يهظمك انسطر خدها لامك
شوكت يبدي ثارك
_

يمهدي جيش حاوط امك الترفه
كلفه ينضرب خد فاطمه كلفه
گوم و نحره اگطعه مو فقط چفه
تعرفه لا شريف و لا ابن عفه

بهذاك التعدي تمادى يمهدي
سطر بيده امك الصبر لا ميجدي

بلا غيره خصمك انسطر خدها لامك
شوكت يبدي ثارك
__

ما رجعوا يمهدي بكسرت الضلعين
لحد ما من دفعهم طاح منها اجنين
وگع محسن غصب من رضت الجبتين
و تالي محسن و امك صفوا ميتين

ميكفي قتلها ميسلم طفلها
عليها دموعك من الدم تهلها

مصايب تألمك انسطر خدها لامك
شوكت يبدي ثارك
___

انهض يالغيور و لا تعوف احگوك
تره الباب اعله صدر الزهره ظل مطبوك
و بيت الله صفه بنار الحقد محروك
من دخانهم محسن وگع مخنوك

ميتوصه مثلك غدر ماتوا اهلك
مته اتسل حسامك جنود احنه لجلك

الحقيقة نِعلمك انسطر خدها لامك
شوكت يبدي ثارك




حسين الأمين

#الليالي_الفاطميه ٤
____

يا زهراء شلون ارجع وحدي البيتي
يا زهراء و بيدي اموسد عافيتي

دافن وياچ ايامي
ويا حيل ايحرك اجدامي
_

يا زهرة حياتي اوياچ
وسدت الگلب بتراب
انه يمچ تركت الروح
وراجع والدمع سچاب
اليدفن حب حياته ايعود
صاير للحزن محراب
يظل بالغربه يتلفت
لا خل يمه لا احباب

وحشه هواي بغيابچ كل الدنيه
وحشه هواي اتموتني الضلعچ و احيه

الفگدچ لابس احرامي
ويا حيل ايحرك اجدامي
_

يا حسره التمر بالليل
من أتذكر العشره
وياخذني الگلب بالشوگ
يم گبرچ اشم عطره
تره اليفگد عزيزه ايموت
ويتمنى لحد كتره
وانه بعدچ بقيت انفاس
عايش بس عله الذكره

جيت الليل اتمرمر روحي يا روحي
جيت الليل و اتعلعل من اجروحي

كل طولي بعدچ دامي
ويا حيل ايحرك اجدامي
__

انهدم حيلي على فرگاچ
وبقيت ابغربه واتحسر
انه الما يوم رگ جدمي
يفاطم عگبچ اتعثر
درت وجهي اعله ذاك الباب
ليليه ابعتابه اسهر
تمنيت الكسر بگفاي
ولا منچ ضلع كسّر

بيه اضلوع متكسره الكسرة ضلعچ
بيه اضلوع اتگطر حنيه الدمعچ

و حنتلچ كل احلامي
ويا حيل ايحرك اجدامي
__

عجب عايش اظل اشلون
وانتي فاطمه الانفاس
يامن وحده بس تسوين
بهاي الدنيه كل الناس
عشت هاي السنين اوياچ
طيب وعاطفة وإحساس
لوما هالوصيه اتكون
چا ما توصل الارجاس

چم يعقوب يالزهره شايل صبري
چم يعقوب ما يحمل شدة أمري

انحيل ومهشومه اعظامي
ويا حيل ايحرك اجدامي
__

قسم بالمصطفى وأمره
چا دمهم مله هالدار
حيدر بالوغه اتعرفيه
من ايشهره ذو الفقّار
چان الروس يم جدمچ
و ارميهم حطب للنار
بس چلمة عهد منطي
أصبر گتله للمختار

ذو الفقار چا خليته ايصب الدم
ذو الفقار من سيفي فنه اليسلم

بس وعدي بي الزامي
ويا حيل ايحرك اجدامي
_

وحكچ يم حسن تدرين
من رحتي گبرت اسنين
اظلمت عگبچ الأكوان
يالچنتي ضوه الهل العين
صفه فارغ هذاك البيت
ما بي بس بچي و ونين
ينشدوني عليچ اهواي
زينب والحسن وحسين

هظمه الحال شوفي من بعدچ حالي
هظمه الحال يذبحني دمع أطفالي

هجرچ روع ايتامي
ويا حيل ايحرك اجدامي



حسين الأمين

#الليالي_الفاطمية ٥
_

وقت الظهور انتظاري
بس الفرج يطفي ناري

بسيفي اعلن المجزره
و ابديها من حبتره
__

انه خلافة رساله
اطهر و أشرف سلاله
اصل _ فصل _ عدل
احگوگي باچر اردهن
ما أعفو عن الغصبهن
وعد _ أشد _ عهد

بدليلي جمره بعدها حمره
على اعظم مصاب
الكسر ضلوعي و طفه شموعي
و دفع لينه باب


كلمن تماده اجيله
سطرت اچفوفي ثجيله

الحمزه عمي تره
و ابديها من حبتره
_

برض المدينه وعيدي
من أوصل و سيفي بيدي
هجم _ ندم _ نقم
أخرجها ذيچ الحثاله
الصارت رموز الظلاله
جرن _ فتن _ وثن

ابد متخمد بعدها تشتد
وسط روحي نار
الدفعها بابي و بده مصابي
اطلبه انه ثار


الثاني و إللي يتبعه
انبشله گبره و اطلعه

بس الفرج ناطره
و ابديها من حبتره
_

القتلوا الزهره الزچيه
باچر اصلبهم بديه
أمر _ ثأر _ نصر
احرگهم و بالسقيفه
كلمن تسمه خليفه
كفر _ غدر _ سطر

الهجم عل امي وجفنها مدمي
بضربته الحقير
اطلعه باچر ضلوعه كاسر
حسابه عسير


يا ويلهم من عذابي
كلمن حرگ بيده بابي

و عذبوها للطاهره
و ابديها من حبتره
____

البالحرب شيلت امه
يلبسها لو صاحوا اسمه
سمع _ هلع _ فزع
لو شاف حيدر ميسلم
ايظل ابمنامه ايتحلم
رعب _ يطب _ حرب

يا وسفه هظمه علينه زلمه
يصير الجبان
الهتك امانه و فعل خيانه
النبي اموصي چان


وكت الحرب و الكلايف
ايشردون بس جدي واكف

يرجفون من حيدره
و ابديها من حبتره
___

الكاسر ضلوع أم أبيها
أسس ظلامت بنيها
سحگ _ رشگ _ حرگ
ألگتل محسن ويه امه
عبدالله نفسه يفطمه
سهم _ ألم _ هجم

الأخذ سبيه ضعن نبيه
نتيجة فعال
من الأوائل بشر رذائل
غصب و احتيال


صارت أساس الزچيه
و حسين بالغاضريه

نفس النهج سائره
و ابديها من حبتره
____

كلمن تطاول اجره
و السانه منه ابتره
شهد _ نكد _ بعد
حتى الي يرضه عليهم
و بالوسط باقي حچيهم
عمل _ جهل _ حصل

الرضه الفعلهم تره مثلهم
احسبه شريك
الرفض لعنهم أعده منهم
بعذابي اجيك


حسامُ جدي حسامي
اوياهم مينفع كلامي

نار الغضب مسعره
و ابديها من حبتره





حسين الأمين

#الليالي_الفاطمية ٦
___

باب الله دفعوها والصحبه خانوها
عالزهره لمّن هاجمت والصحبه خانوها
________

اباب فاطم چم روايه
بحقه نزلت بالكتاب
حتى من قبل المنيه
النبي ايدگ اعليها باب
ما يفوت إلا ابأذنها
الفاطمه يسمع جواب
ليش اتباع السقيفه
هجموا بحقد و عذاب

بالزهره وصاهم هالكلمه حاچاهم
يرضه الله لو فاطم رضت
و الصحبه خانوها
___

بيّنت كل الحقائق
من على الباب اهجموا
ما رعوا حرمة نبيهم
و الوصيته ما رعوا
الجاهليه رد زمنها
من عالزهره اعتنوا
ضلع كسروه بغدرهم
و القتلها اتلهفوا

ونتها سمعوها ظلوا يأذوها
عرفوا وره الباب احتمت
والصحبه خانوها
________

نابت البسمار بيها
و أثر چفهم منطبع
يجري فوگ العتبه دمها
ظل يسيل اويه الدمع
واحد يصيح اضربوها
فوگ خدها المنصفع
ويلي كل قوته دفعها
وكسر منها اشچم ضلع

كلمن أخذ دوره واعليها صب جوره
و احقادهم بيها شفت
والصحبه خانوها
________

ما شفاهم سطر خدها
او ورموا من عدها عين
رجعوا و رضّوا ضلعها
و سگّطوا منها الجنين
محسن البشهوره سته
طاح من عدها بونين
وطاحت بلوعة طفلها
ومن يغيث ام الحسين

لا ما كفه ونها زادوها محسنها
ويه الطفل هيه ارتمت
والصحبه خانوها
______

ما كفتهم هالجنايه
ذوله أصحاب الغدر
الباب حرگوها عليها
و انچوت من الجمر
صاحت ابلوعة هظمها
يا عرب شنهو الأمر
بيا ذنب ضلعي تصوب
ليش مني منكسر

بكعب الرمح جاها قنفذ و أذاها
اذيابه و على الحره اهجمت
و الصحبه خانوها




حسين الأمين

#الليالي_الفاطميه ٧
____________

ضلع واحد شفت و انهدل متنك
لأن بالباب مطبوگ
شحالك لو تجي لطفوف ابنك
و تصد حسين مسحوگ

اضلوع الزهره خلف الباب عصروها
و اضلوع الحسين ابخيل طشروها
_________

الجرحه يصبح الحادي
يرافگ دمعة اعيونه
و الي ينذبح بفراگ
تصبح حسرته لونه
علي بيا چف تدير الماي
على درتك المكنونه
ضلع واحد جزعت اعليه
شلون ابجثه مطحونه

بحبر دمعك علي أرخ عذابك
جرحك باچر ايهون
تعال الكربله و شاهد احبابك
دم تبچيها العيون

بنحور الأهل هالگاع ترسوها
و اضلوع الحسين ابخيل طشروها
_______

انچانك يا علي مكسور
لان شاهدت أثر بسمار
نابت و الضلع مهشوم
و تون من عنده يالكرار
شحالك لو تشوف حسين
و بگلبه المثلث صار
و امهشم جبين ابنك
كثر ما شامروه احجار

اذا بسمارها هدم دليلك
تعال و شوف الحسين
سهم الحرمله ايهدمه الحيلك
يجسم گلبه نصيين

طاح امن المهر و اهدومه سلبوها
و اضلوع الحسين ابخيل طشروها
__________

طحت اعله الوجه مفجوع
و ايمش دمعتك يا ثوب
ماتت فاطمه و الصوت
من ولدك وصل متعوب
ركضت الدارك ابحرگه
وميته اتشاهد المحبوب
شحالك يا علي وابنك
ذبيح اعله الوجه مگلوب

وگعتك حيل تفرق عن وگعته
بين الفرگه و اصواب
وگع والنار حرگت خيمة اخته
مثل ما حرگت الباب

زينب بالطفوف الزهره شافوها
و اضلوع الحسين ابخيل طشروها
__________

غسلت الزجيه ابليل
و وجهك ترسته الهظمه
غُسل الزهره چان الماي
بس حسين من دمه
الچفن لفيته و ادموعك
فوگ الوجنه ملتمه
و لحسينك تره التربان
فصلتله چفن جسمه

و كافور الحسين اتراب خده
و ثلث تيام مهجور
محسن مات بس مدفون وحده
و رضيعه بصدره منحور

و مهجته امن السهم بدمومه فطموها
و اضلوع الحسين ابخيل طشروها
__________

تشيعها علي وحدك
وما ظلت على الغبره
متروك بلهيب الحر
ويطوف اعله الرمح نحره
و على رض الصدر مكسور
شحال المنطحن صدره
روحه و رده فوگه الخيل
خله اوصاله مطشره

ارجعت من الدفن يا علي البيتك
صح مقهور محتار
بس بنتك تشاهدها يريتك
سبيه ادور الاقطار

عالهزل بلا كفال صعدوها
و اضلوع الحسين ابخيل طشروها




حسين الأمين