عندك زلم كلهم عزم
ناده حبيب شدو الحزم
ركضوله من گلهم حيهم
**
طلعو الانصار كلهم والگمر حياهم
ذوله انصار العقيده والله يامحلاهم
برايته البيضه ابن ظاهر يركض اتلگاهم
لجل ابو اليمه الغياره تبرعو بدماهم

بعده وعدد صاحو مدد
نضحي النفس للمعتقد
طبوها والحومه انگلبت
****
انتكلوا عله الله وگصصهم عرگت من الغيره
زلم كلفه ويا كبرهم والطفوف ازغيره
صاحو الجيش ونظامه من نصول انديره
الموت لتباع آل اميه ما رضينه بغيره

بالطف بده موت العده
وهاي الجثث هالشاهده
خياله والطف مو گدهم
**
زلم ظهر الطف تكسره لو أمر قائدهم
هو بس حسين واحد غيره گلي شعدهم
تنحني الدنيه بكبرها لو زعل واحدهم
الانصار بزود صاحو يوصلون شحدهم

انطوا وعد وعله العهد
جيش العده منهم شرد
يگضونه كلمن لاگاهم
****
ركضو الحر وابن ظاهر زلزلوها الحومه
ومن برير وجون بالطف هالزلم مهزومه
من زهير وعزم نافع كل سبح بدمومه
من جنونه اليوم عابس شگگاها اهدومه

الطف انخسف وحيدر هتف
الكل ركض صوب النجف
مهيوبه فرسان الحومه
***
الصحبه موقف موش كثره انتبهلي وحاسب
من تطيح بشده تدري اهنا يبين الصاحب
ولو ردت تختار صاحب كون مثل الشايب
بكربله اصحاب ابو اليمه سحگو اكبر شارب

طبوا سوه وضاع الهوه
غص بالزلم طف نينوى
طبوها والموت بجفهم
***
جسدوا اروع ملاحم زلم گد افعالها
ذوله فرسان الطليعه الكلفه همه ارجالها
بموقفه كل حر تعرفه المهره من خيالها
بصولت أليوث المنايه انحنت ابطالها

البذل النفس صاروا درس
طول الزمن مثل الشمس
ردوها خيل وخياله
****
تمت
ميثم العمري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

هاي الصحبان صارو عنوان وي صاحبهم
كلهم ايثار ازغار اكبار الحد شايبهم
ضحت كلها للصاحب من ازغرها للشايب
****
شوف بعينك وراقب ياهو الضحه للصاحب وماهمه العمر
انطو معنى للصحبه وبيهم مطمئن گلبه فرسان العصر
ما تلگاها صحبتهم ذوله حره طينتهم وفايه شكثر
زلم وحطها عد عينه موش اشويه سبعينه ماعدهم عذر

تدري ايضحون ماكو بهل كون مثل اصحابه
انطو ارواح وكل واحد طاح باس اترابه
عدها تضحي اله واجب من ازغرها للشايب
****
تدري الصحبه مو كثره انريد اليوفي للعشره مو حچي وعتب
اخصم هالحچي بچلمه شوف اصحاب ابو اليمه معدنهم ذهب
تعلم من ابن ظاهر من گله الوعد باجر وبجبينه انكتب
ومن لزمو شواربهم ويله اليدنه صاحبهم راووها العجب

اصحاب حسين وفوه الدين الكل تعرفهم
خطهم مرسوم وخالد للدوم ظل موقفهم
عالجبهه الوعد كاتب من ازغرها للشايب
****
اسباع وياهو البگدهم وياويله الوصل حدهم واحدهم كلف
ايعدلون وعلي الميله ومن عدهم تجي العيله وبيهم تنكشف
زامط بيهم القائد لو طب معركه الواحد ينعد بألف
لو نزلو سوه انصاره توگف كلها محتاره والطف ينخسف

همه واصرار گدها واحرار وكلهم غيره
فرسان الليل شدوه الحيل وجنهم ديره
كلها طلعت تحارب من ازغرها للشايب
****
فرسان وصدر حومه منهم كلها مهزومه من طبو حرب
الدنيه لو تحاربهم ميعوفونه صاحبهم ساكن بالگلب
ذوله فتية الساده كلهم بالحرب قاده وماعدهم صعب
جون ونافع اغتاضو واكبر ملحمه خاضو ونسد الدرب

والحر من صال ماظل خيال الموت الاحمر
تتطاير روس وبمهره ايدوس فوگ العسكر
كلها بالعده تحاسب من ازغرها للشايب
****
زهير ومسلم وعابس عدهم للحرب واهس وماهمهم عدد
برير ايخاطبه شوذب جمعهم ما اله مهرب ياويله الشرد
موقف بالذهب يكتب راحو طمنو زينب ونطوها العهد
گدها وللحرب راحو بنص المعركه صاحو ياحيدر مدد

شيخ الانصار عالعسكر غار ماجن شايب
فحطها الخيل وراواهم ويل لجل الصاحب
جنه من ال ابو طالب من ازغرها للشايب
****
زلم ما تعرف تساوم گضت اعمارها تقاوم وترفض كل ظلم
والجيش اليلاگيهم يطوون الارض بيهم هذا اخر حكم
صاحو اله نگضيهم وبعد مانسكت عليهم وصلت للعظم
احنه النرد كل عايل وابد مانعرف انجامل ومانعرف نضم

نخضع هيهات وكل الصعبات حلّيناها
ماعفنه حسين ونصرنه الدين من گلناها
طحنه وزينب اتراقب من ازغرها للشايب
****
تمت
ميثم العمري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

يالمتعبين الگلب
يالمتعبين الكلب
،،،،،،،،،،،،،،،،،،،،،،،،،،،،،،،،،،،،،،،،
شلونــــك اعله فراگكـم نشـدوني
وانــه حمره مــن البواچي عيوني
حرت بيـن الزيـن والموزين اگـول
ماعرف شحچـي الغرب خلونـــي
،،
من الحچي الموزين رايح
گلبي وكلساع طايــــــــح
شكثــــر غثوني بحچيهم
وانه كــل هــــذا واسامح

،،،،،،،،،،،،،،،،،،،،،،،،،،،،،،،،،،،،،،،،،
الحچي موش بضهري صار گبالي
أويـــن الحچايــــه التضـــل ابالي
اشوه اذا عـن ربعي بس نشدوني
گامو ينشدوني عـــــــــــن عيالي
،،
هيــــــه هاي المنها خايف
وعلئ اعصابي گوه واگف
اكــــو اليذبحـــــك بسيفه
وكــــو يذبحـك بالسوالف
،،،،،،،،،،،،،،،،،،،،،،،،،،،،،،،،،،،،،،،،،
شرده عــن الناس اخوكــم شارد
متت والموتنــــي حچـي الزايـــد
كلها تنشـــد ويــــــن ربعك صارو
عني اوخر واحــــــــد يرد واحــد
،،
شفت كــــل الضيم منهم
اوين اروحن حرت عنهم
وادم تحـــب الشماتــــــه
تحيــرك ومدري شتگلهم
،،،،،،،،،،،،،،،،،،،،،،،،،،،،،،،،،،،،،،،

اليله ياصحبانــــــي اكثــــــر ليله
متعبه اخوكم والعطش هـد حيله
بيـــــه لو تدرون شنهو الصايـــــر
حسين يتنخه الغريـــــــب يشيله
،،
كلفه ياصحبانــــي كلفه
للأعرفــــه وما اعرفــــه
گمت امـد ايـدي يخوتي
وماكو واحد مدلي چفه
،،
،،،،،،،،،،،،،،،،،،،،،،،،،،،،،،،،،،،،،،،،،،
مصطفئ الصالحي
شور گعده،،

اجانه الليل اجانه
يشمعتنه وضوانه
بظلام الليل اريدك
يشمعتنه وضوانه
،،،،،،،،،،،،،،،،،،،،
اجانه الليل واحنه بلايه والي
حرم وايتام ومضيعه الغوالي
محيت البال بس انت عله بالي
بظلام الليل وحدي وهذا حالي
اَلِمَنْ باليتامه
قسه عليهه بظلامه
بظلام الليل اريدك
يشمعتنه وضوانه
،،،،،،،،،،،،،،،،،،،
بظلام الليل والوحشه وسكونه
احس الخوف يرعبنه بعيونه
الفكر يرتاب بفكاره وظنونه
تمنيناك ياعزنه وابونه
تمنيتك تجينه
يبو الروح الحنينه
بظلام الليل اريدك
يشمعتنه وضوانه
،،،،،،،،،،،،،،،،،،،،،،
ام جسام مذهوله عله ابنهه
وظلام الليل مايرحم جفنهه
وليلى هناك گطع گلبي ونهه
ورباب عله الطفل زايد حزنهه
عبدالله تريده
وتحاچي وريده
بظلام الليل اريدك
يشمعتنه وضوانه
،،،،،،،،،،،،،،،،،،،،
اجانه الليل بآهاته وحنينه
الگلب يشتاگ ويفطره ونينه
ردت عباس بالرايه يجينه
تصير عله الحرم خيمه يمينه
يعباس من اشوفك
تغطيني بچفوفك
بظلام الليل اريدك
يشمعتنه وضوانه
،،،،،،،،،،،،،،،،،،،،
غربه وليل ودموع ويتامه
وليل الفرگه ياذينه بظلامه
يدري الكافل النار بخيامه
وشمر يحسين يشتمني بكلامه
واسمعه ومن اسمعه
تصير بعيني دمعه
بظلام الليل اريدك
يشمعتنه وضوانه
،،،،،،،،،،،،،،،،،،،،،
اجاني الليل وانت عني رايح
وظلام الليل ذكرني بملامح
چنت بيهه امسي وبيهه اصابح
الهجر يحسين حيل لگلبي جارح
چنت كل يوم اشوفك
صعب يالوالي اعوفك
بظلام الليل اريدك
يشمعتنه وضوانه
،،،،،،،،،،،،،،،،،،،،،،،
خادم الحسين ابو اسحاق الفحام
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

هاي اول مره تفارگني محتاج اجفوفك تشبگني
آخر مره اريدك حيل اتضم عضيدك
*
شفت الرايه من طاحت وجيتك اعثر وانهض
من اخيامي للشاطي انحنيت وراسي صار ابيض
بطيحتك ما خليت كل حيل
معناها احضر صدري للخيل
راح الشمر يذبحني عباس
شلون بخواتك من يجي الليل

الوادم بفراگك توليني وبالغربه شلون تخليني
وكتك ما يعيدك حيل تضم عضيدك
**
كل عمرك جنت وياي ولحظه ما تفارگني
أول مره عني اتروح وفرگتك حيل تخنگني
عالمشرعه طولت الفراگ
وصدري يخويه بغيبتك ضاگ
غير انت اخوي وحامل الواي
الشوفتك تدري اهواي مشتاگ

مليت وبفراگك غربه وبجفاك الدنيه اشگد صعبه
خوفي اجروح ازيدك حيل تضم عضيدك
**
مطشرينك وصل عالگاع وبيك الخيل شمسويه
بحوافرها خذت صدرك ومنك خلت اشويه
جسمك يخويه تارس الگاع
ومن عندك اشگد بالترب ضاع
جا وين طولك والجتف ذاك
أتغيرت عباس شبساع

صدرك راح وبيك شصاير والحافر انظر عالحافر
ودموعي شتفيدك حيل تضم عضيدك
**
السهام مكسره بصدرك ومن عدهن تون اسمع
وسهم العين اطلعه اشلون عينك بالسهم تطلع
السهم مارد عينك اهواي
طشرها خويه وعالثره هاي
عباس جا من عندك شظال
شو حتى جودك ظل بلا ماي

عله اجروحك صحت الله يعينك ما يطلع سهمك من عينك
والگطعت وريدك حيل تضم عضيدك
**
بحجري من احط راسك ليش تنزله من حجري
تگلي خلني عالتربان ويعباس انكسر ظهري
شلتك وصدرك عالترب طاح
واصل الگلبك طعن الارماح
بالعمد راسك شفته مهشوم
اهنا صحت راعي العلم راح

صديت الراسك متهشم وعذرني اتگلي ومتألم
وفيت بوعيدك حيل تضم عضيدك
*
شلت اجفوفك من الگاع وجبتهن ارد اودعنك
هاك اشبگني بيهن حيل آخر مره اريدنك
اشلون ارد دونك للخيام
وتسألني راح عليك الايتام
وزينب شگلها خويه عباس
وما تدري الها العاشر شضام

من دوني ودونك يسبوها والخيمه عليها ايحرگوها
تحتاج اشگد أيدك حيل تضم عضيدك
**
تمت
ميثم العمري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

انصار الحسين عليه السلام
....................................

يرجف الكون ...من يصولون

زلــم كلـفه ورفت الهـم رايــه.
بين ادين حسين سبعين آيــه

من يصولون.... من يصولون
.......................................

صدح صوت الاوفياء...وارتفع جف الولاء... وكف عابس والعزم بعيونه .

وكف وكفت شرفاء...بعزمة تشهد كربلاء
خله وي سيفه الرگب مرهونه

برض القتال المرجله تشرح مواقف
يتوكه سيفه ومايذل لو جرحه نازف

زود المراجل .. يفني الجحافل
كل واحد بصولت عزم عالموت زاحف

مايهابون.... من يصولون
..............................

طلگ الدنيه حبيب... راد مرضات المجيب
بطل والغيرة تفور براسه .

صال والموقف رهيب... اسد لو كر مو عجيب
عنده الحسين اغلــه من انفاسه .

من طبع الابطال الهمم تنضح عزيمه
لــو للنتصر.. لــو للـذبح. لا للهزيمه.

فزعوا فوارس... مثل النوارس

حولوا برض المعركه.جن مطر غيمه.

مايرجعون ....من يصولون .
.................................

برز مسلم للقتال.. وارتجز يوم النزال.
هذا سيفي اليوم يشرح زودي .

كشف صدرة بلا جدال ...ياسهم وينك تعال.
والله لحسين انطي كل مجهودي .

كلمن يضحي وينتفض لجل العقيدة .
ياخذ وسام المرجله وكل اليريدة .

بسوح المعارك ...كلمن يشارك .

يوكفله باجر بالحشر سبط الصميده

هذا مضمون ...من يصولون.
.................................

آه ياموقف برير..نافع وجون وزهير.
صولت الفارس تضل مشهودة.

ذوله انصار الامير . اسيوف لو قل النصير.
والزلم يوم الشدد مريودة .

يوم الحرب وكت الشدد مريودة الابطال .
انصار ابو الاكبر وفوا ماهابو اجال

ماردهم الموت... صاحو فرد صوت .

للغـالي منذور النحر في كل الاحوال .

مايخافون ....من يصولون
..................................

ذوله آيات الخشوع... گلوب لبسوا عالدروع.
لجل ابو السجاد هيبه انصاره.

انحنت مكسورة الجموع... شعلوا العشرة شموع.
غضب واحدهم يصب بتارة .

لاذت من الخوف العدة بالذله والعار .
واعتلت رايات النصر بجفوف الانصار .

زود الغياره.... ردد شعارة.

احرار عشنه ومانذل ونموت احرار.

مايذلون ....من يصولون.
................................

✍️ ابو منتظر الحجامي 2025

#قصائد_الانصار_عليهم_السلام


حي الله زلم حسين بيهم تگــــر العيــن
يتنومـــس المهيوب بأزلامـه السـبعــين
ـــــــــــــ

حي الله زلم البالحرب مـا تخضع
عرگت گصصهم غيره غيره المنبع
بس صاحت ام عون وگبل لتفـزع
فزعو لبو اليمه وحبــيب المـــرجع
گلهم حــــبيب اليــوم لازم نضحـي ادموم
حيهم يخوتي ايصيح هذا الأمـــر محتوم
ــــــــــــــــــــ

حي الله زلـــم الما تـــخيب ضنــك
يا كاتــــب التــاريخ توصــــف فنك
خل تطمــــئن زينــــــب ندافع عنك
صوت الضماير كـــــبر بطـف حزنك
يحسين صاحو صوت نفدي الرگب ونموت
هد بينه أحنــــه اوياك لجــل المنيه انفوت
ـــــــــــــــــــــــ

هاي الـــــمراجل والزلـــــم ما تنـهز
موقف بطولي بالحرب هـــل منجز
عن وصـــف الأنصار ودماهم نعجز
كل قطره مـــــن دمنه الك لا متعز
هجــي الـــزلم تنقاس بيـــهم وفه العباس
شدو حزم لحــسين هد بــينه وارفع راس
ـــــــــــــــــــــــــ

صدگيه ربعك مـــن صدگ صدگيه
تحــــتار ليش وزلمــــــك الحربيه
گاع الطـــــف برجلينهم مــــطويه
صوت العقـــــــيده صــاح للعلويه
خل تطمئن ام عون لخيمــــــها ميوصلون
حشـــد إلزلم هيهات لا ما يــخيب اضنون
ـــــــــــــــــــ

حشد العـقيده يموت بس مايهُزم
هاي المراجل ربــــــي انعم واكرم
خطو مســـيره واضحه ابذل الدم
يحسين بالسبـــــعين حگ تتشيم
رباهـــــــم الكـــرار مــــــا بيــــــــهم الفرار
بالطف مراجل شوف حــــــــي الله الانصار
ــــــــــــــــــ

الخادم المقصر ناجي ابو كيان الصالحي
ونسألكم الدعاء لي ولوالدي 2025

#قصائد_الانصار_نزال_ثگيل



حي الله ازلام الكلفات گالـــو عالذل لا منبات
___*
صاحــت زينـــب حيهـم ها وكـّلهــم لبو صيـحتهه
عدهم غيره من العباس هــاي الـــحومه وقــادتهه
ازلام حسين وخوش ازلام وياهو اليوصل لحدهه
غيره ومرجــله وبركـــان وياهــو اليگدر يصــدهه
حي الله البيهم فزعات گالـــو عالذل لا منبــــات
___*
رفــت راية الانـــصار وطلـــعو كلــــــهم فـــــزاعه
اهــــل النايــبه ايهدون وكلمــن غيــــرته امــتاعه
حـي الله الماهزهم ريح وبالـــطف ثبـــت اشراعه
من هدو خسفوها الگاع مال الــــطف هوه وگاعه
هد بيهم وكت الصعبات گالـــــو عالذل لا منبات
___*
خله يســـولف الــتاريـــخ ولازم ما ينقـــص منهم
لازم الهم وقفــه اجلال الــموقف نفسه ايسولفهم
بالـدم وقـــــعو لـحسين وصـاحو حـيدر مرجـعهم
اهل الغيـــره والـنوماس وعايش عــباس ابدمـهم
ما نخضع صاحو هيهات گـالو عـــالذل لا مـنبات
___*
حشد حسين وكلهم زود وصاحــــو احـنه العوانه
واحدهم يــــنعد بالاف وگــــام يســـــرفن بردانه
يامـــرنه وما نخلــف راي وبـــــس يأشــر مولانه
نگلب گاع الطف لو راد ونرخـص لـحسين ادمانه
ما مات الخلف مامات گالو عـالـــذل لا منبـات
__*
مالت كربــله مـّــن الغيــــض وحـي البيهم الهمه
لو هــدو چنهـــــــم زلال وصــارو بالـــحرب قمه
حي الله بأنصار حسين الواحــدهم غــيره ابدمه
واحدهم يمشي اعله النار زلـمــه ومـن ظهر زلمه
الهم بالحــرب وگفــــات گالــــو عالذل لا منبات
__*
تمت بحمدالله وتوفيقه: الخادم المقصر ناجي ابو كيان الصالحي ونسألكم الدعاء لي ولوالدي

#قصائد_الانصار_عليهم_السلام



ياهلا   ياهلا  حيو الانصار           ياهلا   ياهلا حيو الانصار


__***
يا هلا بأهل الشـــــهامه يا هــــلا بأهل العزم
للحسين اصحـــــــاب فزعــه ونعم والله زلم
سجلو اروع بـطوله يا هلا بأهـــــل الـــّـشيم
ليث واحدهم نشـــوفـه ياهو من سيفه سلم
ذوله الانـــصار النـشامه
دمهم اتحــــــول علامه
يا هلا بأهــــــل الكرامه
ياهلا   ياهلا  حيو الانصار      ياهلا   ياهلا    حيو الانصار

_____***
زلم لو دگت رجلهـا تگـــلب الحـــــــومه گلب
نار واليگـــــــرب سناهـا ينــچوي بذاك اللهب
ياهلا ابزلم النـوايب غيضـــــــهم والله عجب
واحد يســولف للأخر قبـلـــك الحــومه اطب
منافس وصعدت هممهم
من ابوفاضـــــل عزمهـم
بالحـــــرب شدو حزمهم
ياهلا  ياهلا   حيو الانصار         ياهلا  ياهلا  حيو الانصار

_____***
عالمراجل يالــتســولف اقـره عنـهم واتعــض
ركضو اعله الموت ركضه وبدو بطـي الارض
حسين گلوله اعله امرك سيدي وصـلو فرض
عرگت اگصصهم شهامه وعـرج للغيَـره نبض
الواحد وسبعـين غيـــره
ذولـه همـــكــتهم چبيره
شيخهـــــم بدر العشيره
ياهلا  ياهلا  حيو الانصار             ياهلا  ياهلا  حيو الانصار

___***
واحد وســــبعين گالو تامـر الـــحـره امـــــر
للخيم حــــراس نبقه وياهو بخـــــيمها يـمر
انصار الحسين الغيارى انطـــو لزينب العـمر
فزعو اعله الموت فزعه وشدو الـظهر بظـهر
للخـــيم حــــراس گالو
يا لثار حســــين صاحو
بالطفـــوف الشرف نالو
ياهلا  ياهلا  حيو الانصار              ياهلا  ياهلا   حيو الانصار

__***
غيره تدفع غيره طلعو واختنگ حتى الهوى
اشوارب الانصار رفت وانگلــب طف نينوى
حشد صــارو للشــفيه وگالو المـــوته سـوى
نورهم ميحجبـه سيف ويا هلا بهذا الضوى
نورهم ما بــين اديهم
شكــــــــر الله سعيهم
قسمو لنــصرت وليهم
ياهلا  ياهلا    حيو الانصار            ياهلا  ياهلا   حيو الانصار

__***

تمت بحمد الله وتوفيقه:الخادم المقصر ناجي ابو كيان الصالحي ونسألكم الدعاء لي ولوالدي

يوم الانصار رضوان الله عليهم
نزله

نار وتوج بينه *** خنطب يبو سكينه
صوت الوفه ناده *** وعرگت جفافينه

___
سهمك الراحه.. وسلاحك.. احنه بالحرب
لو تخلينه ... وعيونك ......نگلبها گلب
هاي كدامك.. نفنيها ... من تسمح نطب

انطينه بس حجايه... خن نشيل الرايه
تكضي عدنه بساعه...ساعه خاف هوايه

تباوعلك انطيها... شاره التهد بيها
فرحنه يلقاضي *** عرگت جفافينه
___
ضحكت عيونك... شفناها.. معناها نعم
كلمن ابيده ... بتاره ... وعنانه لزم
ما يرد سالم ..كل فارس..نذبحهم غنم

فتوه بيها نحارب.....نسحك اكبر شارب
احنه زلم النيبه.... صاحبين الصاحب

نخليها تتمنه ... موت التكابنه
ما نرحم العايل ... عرگت جفافينه
___
هيبت الهيبه... انصارك .. طبت للوغه
صالت وجالت.. بالحومه .. كلمن بيرغه
والعرف موته.. ذب سيفه... محد فرغه

البلسمه يحط روحه...موت جفنه يلوحه
وللبد بخيامه.. تفضحه راح جروحه

صارت جرف يابس... طب للزلم عابس
غار بكلب غيضه..... عرگت جفافينه
___
القاده بلقاده ... تترادم ... ردت ليوره
شافت عيونه... ابن ظاهر.. يزئر قسوره
كال اسويها ... بجفوفي ... يوم الاخره

شاب ارد بلعازه ... حسين ما يتجازه
اله ما اخليها ... جنازه فوك جنازه

شيخ الحرب اسمي .. ومات الوصل يمي
بجفك حبيب ائمر ... عرگت جفافينه
___
عهد مطينج ... يازينب .. ميمرج خطر
اركبنه مرهونه... لخيامج .. نتكطع وذر
حبكم بدمنه ... شارينه .. من عالم الذر

وهب شن الغاره... وعينه جن بتاره
سوو بالطف جوله ... صار ليله انهاره

للحر بقت بصمه .... داس الزلم جدمه
والطف شهد لينه..... عرگت جفافينه
___
الخادم
انور خلف البيضاني

قصيده للانصار .تراثيه.
على لحن .عهد الله عاهدناك.
........................................

يهتف صوت الانصار.
ما...نرجع مهما صار

ميعوف الساعد جفه
للكلفــه ارجال الكلفه

لجـلك يابو الاحرار.
ما. نرجع مهما صار.
.........................................

مانرجع.. وهيهات يمنعنه الخوف.
واحنه الكلايف حزمت بينه اسيوف
يحسين الك منوافي ذرت معروف.
يارحمت الله البيك وجه الله نشوف.

مثلك نقره الايات.
نهتف للذل هيهات.

نتلاوه بجف الشده.
والثائر منهـو ايـرده.

لا للذل . لا للعار.
مانرجع . مهما صار.
.........................................

احنه انخلقنه صفوه للغالي حسين.
مثل الشجر والماي .ما مفترگين.
واليوم يـوم النصر يبن الطيبين.
طبينه وحـزامين الك متحزمين.

انصار وصحنه بصوت.
لا ما يرهبنه الموت.

احزام الموت تحزمنه.
بعيونك رســـــم الجنه.

نسحگ جتف الاخطار.
ما ...نرجع مهما صار.
.........................................

طبع المراجل بالشدد من تنقاس.
تمطر شجاعه وغيره حتى الانفاس.
واليوم اجينه مثل جيت عباس.
بـالرايه وكت الحرب عصبنه الراس.

طبع انصارك معروف.
يتلاوذ منها الخوف.

والحومه تظل حومتنه.
زود اترفرف رايتنه.

ابشر يبن الكرار .
مانرجع مهما صار.
........................................

غايتنه معروفه .ونترجمهه افعال.
بالحومه لـو طبينه .ينزل زلزال.
انت الأمير واحنه درعــك ابطال.
والله الجثث لجلك نخليها اتلال.

يــا ..بسملت القران.
متظل وحدك حيران

يـا من اسمك حررنه
مابين اجفوفك صرنه

نقسم لك بالجبار .
ما نرجع مهما صار.
.........................................

يبن الوصي والقل هو والغايه
يا.. آيه التطهير واعظم آيــــه.
رايتنه رفت نصر وانت الرايه.
يالغالي والگطع النحر وفايه.

رفت زود الاعلام .
تشهد لينه الايام.

غالي وضلك يجمعنه.
ياجيش الي يرجعنه.

واحنه بجفنه البتار.
ما نرجع مهما صار.
.....................................

✍ أبو منتظر الحجامي 2025

عكَيلي .للانصار
.......................

لا منعوفك . لا منعوفك . وحدك بالطف لا منعوفك.
..............................................

نعمه انت ولازم نشكرها.
والثوره انصارك تنصرها.
باجر يوم الطف يذكرها.

عن مبدء نحرم وانطوفك
.................................

تعرفنه انصارك يوم الدم.
يحسين انخانه ولا تهتم.
باجر جدامك نتحزم.

غالي ونركع بين اجفوفك.
..........................................

ما نتخاذل يابو الاكبر .
وفايه أنسر الخاطر سّر .
واحدنه الكافل لو زمجر..

بين احبابك حلوه انشوفك
.........................................

نقسملك بضلوع الزهره.
غالي وعنك ما نتبره.
وفايه ونبصم بالعشره..

خسران الينكر معروفك .
........................................

يبن اليحضر وكت الشده .
جدامك ماي ونتبده.
الماكو بكَلبه حسين شعنده..

يصبح محروم من اطيوفك
....................................

ياوجه الباري وميزانه.
ليش اخت زينب حزنانه.
باجر عد عينك تلكَانه.

بالحومه ونهتف بحروفك.
.......................................

باجر. ياعنوان الكوثر.
منذور النحرك جم منحر.
نرضيك الحد مانتوذر.

نتعفر من ذاري اطفوفك.
..........................................

✍ ابو منتظر الحجامي......2025

#قصائد_الانصار_عليهم_السلام





انصــار الحســـــــيـن بالـــطــف سلاطـــين
گـــــول وفعل شـوف وســــــــط المـيـادين

__***
حي الله ابو الاكبر يحي ارجاله
سبعين اله خــــــياله من خياله
ما عافو حســـين الشفيه بحاله
زلــــم الوغـــــه ما تنهزم عياله
ازلام اله خوش ازلام
ماخلو حـسين انظام
صاحوله تامــر خدام
تامـرنــــه مــــــــــولاي ما نخــــــــــلف الـراي
گول وفــــــــعل شوف وســـــــــط الميـادين

__***

انصاره والغيـره جرت بدماهم
حــــي الله زلمه النايبه حياهم
گالوله عد عينك علي بيمناهم
شدو حزمــهم والفـخر ناداهم
واحدهم ايطيح اجبال
زلال لــــــو هـــد زلال
انصار الحسـين ابطال
ميــهمهم المـــــــــــوت لــبــــــوله هل صــوت
گول وفعــــــــل شوف وســـــــــــط الميـادين

__***
حشمهم حسين وگبـل ليحـشم
يعرفهم اهـــل النايـبه يعـرفهم
گلوله زينـــب ســـيدي لا تهتم
بدمانه وقعــنه وفداكم هل دم
تامرنه بنـــــت الكرار
خدامـك ازغــار اكبار
بالك ابد لا يـــــحتار
ما تغلــــــــــــه الارواح صــــوت الوفـــه صاح
گول وفــــــــعل شوف وســــط المــــــيـادين

_***
كلهم مراجـــل والوفــــه منبعهم
عباس ابوالشيمه الگمر مرجعـهم
ازلامه وحــسين السبط قائدهـم
عباس چـــــان البالوفـه معلمهم
بيهم وفه مــن عــباس
كلهم لزينب حـــــراس
خدر الله لا ما ينـجاس
لا تهتــــم ام عــــــــون والباقــــي مضــــــــمون
گول وفعـــــــــل شوف وسـّـــــــط المــــــيـادين

____***
رايــة محــمد بالحـرب عـلــوهه
انصاره والغيـره حــــرز شالوهه
ما تنظمي بنـــــت الولي گالوهه
بنت الصمـيده بهل امـر سروهه
من گالو انـمـوت ابزود
يا زيـنب اوياج اعـهود
للخيمه احنـه العامــود
لا زيـــــنب اتـــــــــحير يمــــــنه التـــــــــــدابير
گول وفــــــــعل شــوف وســــــــط المـــــيـادين

__****

تمت بحمدالله وتوفيقه: الخادم المقصر ناجي ابو كيان الصالحي ونسألكم الدعاء لي ولوالدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

عمّي عمّي يا حبيب ... هالله هالله بالغريب
ما أوصّيك بعزيز الزهره ... اريد نحرك كون يسبك نحره
...........................
ياهله بيكم يعمي عفتو هالدنيه وأهلكم
الليله اتبان الرجوله وغيره تزايد هممكم
يانعم بانصار اخوتي الكون ظل يحلف باسمكم
هاشمي باجر يشور ويانه من يسيل دمكم

شعظم هل منزله البيهه تشهد كربله
التاريخ باجر يبقى الكم فخره
ما أوصّيك بعزيز الزهره
..................
باجر موادع يصير وتحجي الدموع عله خدكم
باجر بيا لوعه اوكف باب الخيم وانتظركم
باجر بهاي الصحاري يفوح يتطشر عطركم
كون باجر ماهو باجر حتى ما ياخذ عمركم

طول يا ليل بظلام هالفجر مابيه سلام
عبدالله باجر سهم ياخذ عمره
ما أوصّيك بعزيز الزهره
٠٠٠٠ ٠٠ ٠٠٠٠
هذا اخوي حسين روحي غالي يل ماكو بغلاته
نور شايل من محمد وحارت الدنيه بصفاته
من تعوفونه يعمّي اوحيد وعيونه البناته
يعني بهاي الصحاري باجر يركضن خواته

حافيات مسلبات من المصيبه ملوعات
وكًلوبهن ماتطفى منهه الجمره
ما أوصّيك بعزيز الزهره
........................
هاي ليله بعمري اخيره وتختلف عن الليالي
يموت كلشي وي صبحنه خدري والناكه ودلالي
أحترك وي حرك الخيم ودهري مايتركلي غالي
عمي باجر من اخوتي محد يكلي تعالي

منهم يشح النصيب اصيح ماحصل مجيب
باجر تشح من اخوتي النظره
ما أوصّيك بعزيز الزهره
..........................
يا حبيب ابين غربه يموت خدري وذكرياتي
باجر من سياط اميه احمي روحي لو خواتي
سكينه ورقيه ودمعتي وجمر الخيم لو عباتي
من اعد هاي المصايب يوكف الموت بلهاتي

والاشد سبط الرسول عليه تسابك خيول
باجر احير ابين نحره وصدره
ماواصيك بعزيز الزهره
..........................
خادم اهل البيت ع
فلاح طالب الماجدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

امك الدنيه تنوح من كد حزنهه
مو للعرس للموت زفت ابنهه
صارت حنتك دمك يمشيم ولد عمك
\\\\\\\\\\\\\\\
احسب وعد ايام وبعيني تكبر
وبشوفتك جسام دلالي ينسر
وكل ام تربي تريد بضناهه تفخر
وبكربله ياحيف حلمي تطشر

تعب السنين انباك وبلحظه مني
للموت ظل بالنوح مايكضي حزني

رحت مني وبقالي اسمك
يمشيم ولد عمك
\\\\\\\\\\
حلمي انجفه عله الكاع ماي وتبده
بالطف الله وياك مامنهه رده
كًلبي ييمه عليك بيا صبر اشده
عنك يغالي الموت وشلون ابعده

ريت انعمت هالعين وروحي راحت
ولا اسمع الشمات يوليدي صاحت

ميت شيعو بسمك
يمشيم ولد عمك
\\\\\\\\\
وتطشرت عالكاع كل ذيج الاحلام
من اسمع يصيحون ذبحينه جسام
كًلبي تركني وراح يم جثتك هام
الكيتك يماي العين متغطي بسهام

مدلل عله التربان مو هذا نومك
ياريحت النعناع فاحت علومك

بنص الخيمه و اشتمك
يمشيم ولد عمك
\\\\\\\\\
يوليدي اطلبك دين تعب الليالي
وبلحظه مني تروح موش عله بالي
يمخلي وجه الكون وبيتي خالي
دللتك انه هواي رجع دلالي

كل ظني ياجسام تدفني بيدك
وكًبالي موش بعيد كطعو وريدك

يلمدلل يروح امك
يمشيم ولد عمك
\\\\\\\
نتعاون عله الاه انه ويزينب
موراسي يمه عليك دلالي شيب
نار الخيم والنار البيه تلهب
عمك وحيد حسين طاح وتسلب

بعد السلب ويلاه داسوله صدره
وداسن عليه خيول يايمه عشره

وراسه عله الرمح يمك
يمشيم ولد عمك

خادم اهل البيت ع
فلاح طالب الماجدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

نزال بحق الانصار

أصحاب حسين
صارو للوفه اسطوره
٠٠٠٠ ٠٠ ٠٠٠٠
نزلو عالمنايه الموت ماهمهم
غيره ومرجله رفت شواربهم
برگاب العده حنو صوارمهم



جيلا جيل نقلو إلنه هالصوره
أصحاب حسين صارو للوفه اسطوره
٠٠٠٠ ٠٠ ٠٠٠٠
صيد بكربله وتزاودو عالصيد
ماجنها حرب وتگول عدهم عيد
مذره اسيوفهم وتكيف عله الويد



جيوش يزيد من سبعين مذعوره
أصحاب حسين صارو للوفه اسطوره
٠٠٠٠ ٠٠ ٠٠٠٠
رجال حسين ذوله البالحرب كلفين
صاحو بت علي يازينب تبشرين
گبل حسين كلنه انطيح گبل حسين



هاي أرواح فدوه لروحه منذوره
أصحاب حسين صارو للوفه اسطوره
٠٠٠٠ ٠٠ ٠٠٠٠
ذوله الهوسو مادنگو هامه
حسين الحير التاريخ بأزلامه
فرع شيخهم وذب العمامه



صحنه بصوت هل فرسان مشكوره
أصحاب حسين صارو للوفه اسطوره
٠٠٠٠ ٠٠ ٠٠٠٠
عجزان الشعر ولي مدح بيهم
شماننصب مئاتم مانوفيهم
الله اختارهم واختار اساميهم



وأعله الموت كلمن منتظر دوره
أصحاب حسين صارو للوفه اسطوره
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

هي احچايه مـــــــــا تتكرر اثنين
لجل حسين صرنه نموت بحسين 
صحبتنه صحبة موقف
::::
اجينه نموت لجلك ابد منعيش
وتضربنه السهام نصيح بريش
غير انت الابو الاكبر
شما يجرحنه سيف نباوع اعليك
مو ارواح كلشي حسين نطيك
يا شريان أبهر
نموت وياك كلش عدنه واهس
حبيب وجون يمك هذا عابس
نكشخ بالشهادة  نعيش تاريخ
تره بالشذره كشختها المحابس
مــــــو عنوان صـــــرنالك عناوين
لجل حسين صرنه نموت بحسين 
صحبتنه صحبة موقف
::::

احنه انصار مــــــا ننغر بالفلوس
هذا الكون فارغ وانت متروس
شيخ انت وفراضه
مخلوقين لجلك هــــــــذا معلوم
انت الگمر واحنه انصارك انجوم
عرضنالك عراضه
اليوم تبيـــــن أصحاب الحقيقه
ياهو يظل لــــــــو يترك طريقه
احنه انصارك أصحاب المهمات
ابد مـــــــا بينه اليترك صديقه
انصارك نعـــــــــم تهوه الميادين
لجل حسين صرنه نموت بحسين 
صحبتنه صحبة موقف
::::
الموقف ينذكـر ويعيش عنوان
عطشانين چا غير انت عطشان
ابد ما نشرب الماي
جبل شامخ وعـــــدوانك التله
الشمس اتريدها تنجاب سهله
حسين انت اسمك هواي
مو صحبة عطش لو صحبة اموال
اليوم يبين الــــــــي گــــال رجال 
لو تملك ذهب وما عندك حسين
فقير تظل فقير شما مشه الحال
سبعين الف خلهم واحنه سبعين
لجل حسين صرنه نموت بحسين 
صحبتنه صحبة موقف
::::
جون اسمر وگلبه ابيض اللون
عابس كله صاير بيك مجنون
كلشي يهون لجلك
ابن القين تاجــــــر عافها وجاك
حبيب يگلك احنه نموت وياك
يحسين انه احبك

مــــو شغلة دراهـــم احنه تجار
هذا اليوم اصبح يـــــوم الانصار
وحدت الطــــوائف انت يحسين
لهذا اليـــــوم سويت النه تذكار
دمـــــــك يا حسين الثبت الدين
لجل حسين صرنه نموت بحسين 
صحبتنه صحبة موقف
::::
منعوفك ابد حـــــد گطع انفاس
اخذنه حروره من الگمر عباس
درسنه ابو فاضل
ازمط يا حسين انصارك اسباع
تره بالجيش نگلب حتی الگاع
مـــــا يبلع الريج الجيش مهموم
واحدنه صگر عالصیده  ایحوم
نعم حلوه الشهاده وياك يحسين
جواز انصار من حسين مختوم
بسمك يا حسين انصــــــار باقين
لجل حسين صرنه نموت بحسين 
صحبتنه صحبة موقف
::::
علي جبار الكعبي
الفاتحه لوالدي

هيه المواقف تنعرف    لمن تطيح انت بظرف
وتميز الصحبان الك    ياهو العرف والمو عرف
&&&&
شلك بكثرتهم بعد       ما تنفع الكميه
حسين ميدور عدد    عنده المهم نوعيه
انصارك نعادل الف    كل واحد احنه بميه
وياك احلى من الگطن   صفينه احنه النيه
بفعالها تبين الزلم      ياهو اليظل والينهزم
مثل الحديد اقوه وبعد   ما بينه اي واحد ترف
&&&&
الصحبه مو كثرة عدد   ودگول عندي انه اكثر
حيدر قبل ما يعترف    چا غير عنده الاشتر
واليوم يوم الملحمه         نگلبها يا ابو الاكبر
شنهي النفس يا ابو علي    وينعز عليك المنحر
ياهو الي منكم مستعد    واحد قبل واحد يهد
نموت كلنه بخدمتك     ما عدنه واحد ينصرف
&&&&
تعرف صديقك بالشدد    لمن تطيح بشده
لو شافك تحس بالعطش   ماي وگبل يتبده
انصارك وگول وفعل      جربنه وكت الهده
جا غير يتگطع وذر    اليوصل الخيمه شحده
بس خطط وشوف الفعل    نطبگ الميت والعدل
مثل الرسايل تنكتب     هيج الجثث كلها بظرف
&&&&
خلهم وذا سبعين الف    صح كثرة لكن قله
لجل الدراهم قاتلو      هاي المواقف فشله
يحسين نمحيهم الك    بس انته گول وسهله
ما طحنه ابدن عالارض    بس طحنه فوگ العله
برمشت عيونك تنسحگ    نشلعها والله من العرگ
واليوم كل بيرغ يظل   گدام ابو الاكبر يرف
&&&&
سهله احنه عدنه المعركه   يحسين چن شربة ماي
صح همه بس سبعين الف  بس احنه اكثر بهواي
لعيونك نسدها الشمس       ونصيرلك احنه فياي
يا رحمة الله الواسعه         ننتظر منك بس راي
واحد سأل ويگله اجب   بس گلي تيهت الدرب
تلعثم السانك بالحچي   ما ظل بعد ينطق حرف
&&&&
علي جبار الكعبي
الفاتحه لوالدي

نزال...



بركان الغضب بالكوفة نزل
سواهم حطب مسلم من زعل
___

مطرمن السمه جاي.
يروي الناس والماي
سحاب ولو مشه افياي عله البيهم ضمه
اجاهم شمس بالليل
واجته اهل المراسيل
حجيهم چنه ابابيل يسر گلبه السمه
تره التاريخ مرواح
من ايده الموخشن طاح
چم جحجيح لفاح يخاف من الدمه

مبعوث الصبح بچفوفه الامل
سواهم حطب مسلم من زعل
_
نزل بالكوفه سلطان
اسد وبهيئة انسان
گعد بس صدر ديوان. يفر بسبحته
حچه ومدنگه الروس
كلامه صار ناقوس
جبل ما هزته الفوس شجاع بكلمته
زعل والزعل محلاه
زعل بس جان لله
غريب ومحد اوياه ولاهم وحدته

عالسيف انكتب قد حان الاجل
سواهم حطب مسلم من زعل
_

عليه الجيش من دار
عرج من حمزه بيه ثار
غضب والعسكر احتار الى اين المفر

تمايل والحرب كيف.
ثگل من دمهم السيف
اخذ من عدهم الحيف يذكرونه دهر

تحزم والرگب باث
حصدهم سيفه نفاث
رشگ طبراته موداث مثل رشگ المطر

يانار بگصب بيهم من حمل
سواهم حطب مسلم من زعل
__
مثل عمه علي طاب
وشاف ارگابهم باب
هلا بقلاع الرگاب يمسلم ياشهم

هلا يربات ابو احسين
هلا يا فتشت العين
اليوم اگلبها صوبين منك والنعم

مره بس صارت احزام
شدت ظهر الاسلام
العفيه مثل السهام تشد حيل الزلم

والصارم طرب بالعفيه اكتحل
سواهم حطب. مسلم من زعل
___

سبع والغيرة تنور
حمم من گصته اتفور
ملامح يوم عاشور عله الكوفه رسم

رساله صار للناس
تموت ولا تطخ راس
گبر مهيوب تنباس ولاذله بنعم


علي والتبعته اسباع
خطاهم تفطر الكاع
اسمهم بالسمه شاع اهل زود وقيم

بالعزه الرگب تنذب كالسمل
بركان الغضب بالكوفه نزل

فيصل المياحي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي