قصيدة بحق فاطمة العليلة عليها السلام


*
روحي لاحباب الجفوني يا مراسيل الهـــــــــجر
مــــن بعــــــدهم ظيعــــوني واندفنت امن الزغر
وجــــــوهم مالت منية من مشوا للغاظرية
--------------------------------------------------
شكتب وانه اعله كلي بس جرح ينزف احاسيس ومشاعر
انتظر وايدي اعله خدي هم يجي يوم ويرد طير اليهاجر
وردة ذبلانة اتركوني وانكسر عودي وبعد مكسورة خاطر
بالمراسيل ابعث لكم كَلب متروس بحزن يعمي النواظر
كَلبي اشـــــــــدنه بكتابي وآنه محـــــــزونة نفس
ابقه مزروعة اعله بابي واكَعد ابحــر الشمس
ما كسر عالروح فيية من مشوا للغاظرية
-------------------------------------------------------
ياهلي بساعة سفركم روحي خذتوها ودفنتوا امنياتي
بوية احس الموت اجاني من جفيتوا ومن مشن عني خواتي
احــــلى ايام العـــــــــشتها راحت ولهنا احس وكَفت حياتي
منهد الله وياك بــــــوية مرورة الموت اشعر لهسه بلهاتي
روحي تبعتكم عليلة واغركَ بــجاري الدمع
انحب ابونة ثجــــــيلة وني بالطف ينــــــسمع
خلفوا نــــيران بية من مشوا للغاظرية
----------------------------------------------------
حتى ليلي انباكَ مني كَامت عيوني تحب سهر الليالي
ملت الحيطان وني من بعدكم حالي ظل يبچي اعله حالي
ذكرياتي وياك حلوة وياها اعيشن وابقه مسجونة خيالي
مات كل احساس بيه وعاشت احزاني بعد فكَدك يغالي
اعله الحياطين ارسملكم صور وانسولف سوة
انتــــبه واحلامي عـــــــنكم طارت ابعالي الهـــوة
فاركَوني وهاي هية من مشوا للغاظرية
------------------------------------------------------
ابعث عتاب واعاتب للجفوا عني ومشوا اهل المحنة
ماي وتبدة اعله رمضه هيچ طشرنه الدهر ياهو اليلمنة
ما ترد ذيچ الليالي چنة وين اوين هسة اليوم صرنة
نار مستعرة بدليلي ماتردلي ارجوك يالملكَاك جنة
لو نظر يعكَوب حزني ما يعد حزنه حزن
انه راحت كلها مــــــني هوة فاكَد بس ابن
لاخبر لا من وصية من مشوا للغاظرية
----------------------------------------------------
خِلّ اليـــــــفاركَ خلـــــــــيلة تيبس شفافة وفلا ترويها بسمة
هذا حالي اكتب الكم جرحي كل نسمه هوة منكم تلچمة
ماتطيب جروحي بوية كل اثر باقي الك اكَعد واشمة
يا عذاب الشافه كَلـــــبي شفت نجمات الظهر نجمة اعله نجمة
دهري ماهمه مصابي مدري يطلبـــــــني بـطلب
يســـــــــتلذ كَام بعذابي فوكَ ناري ايذب حطب
طالت الغـــــيبة علية من مـــــــــشوا للغاضرية
-----------------------------------------------------
صوتي من انشد يردلي والصدى يجرحني من ايردلي صوتي
اغفه ويفززني جرحي ويه كل شهكَة حزن اتمنه موتي
اذكر بمرسالي واكتب بوية من كتلي يجونچ يلّة فوتي
ابحرت عني السفينة لا رجع عمي ولا رجعولي خوتي
بعد ما يحـــمل دليلي كافي يا مرسالي روح
ابهالكلام ايبيد حيلي وانه اتنفــــــــــس جروح
كَلبي دوم ايحن لبية من مشــــــوا للغاضرية
*
أسالكم الدعاء رائد الاسدي

قصيدة بحق العليلة عليها السلام


چان اعله بابي الطير بصوتة تفاؤل خير
يا بوية من سافرتوا عني
طير السما ون اعله وني
==========================
ايغرد الطير امن الصبح وي صوتة ابدي بيومي
نگعد ســـوة انة و هلي مرتاحة حلوة علومي
بمصباح يوم اضلم صدح للحزن فاطم گومي
بس انة وانتي والدمع صارت چبيرة همومي
رايح عزيز الروح خلة الگلب مجروح
صار البچي والنوح فني طير السما ون اعله وني
==========================
هُدهُد سُليمان النبي محتاجة الك تدريني
تطوي الارض وعلية رد كون بخبر تلفيني
مملكت بيت ال النبي وين اصبحوا دليني
ويا آصف بشوكَ لهلي بلمحت بصر وديني
أتمنى بس ما صار ضليت اون بالدار
لا خبر لا مرسال اجني طير السما ون اعله وني
==========================
تعبانة من كثر المرض والونة تجرح گلبي
اكتب رسايل للمشوا وعيوني الهم تربي
ياطير مد جنحك الي حمل اشواگي وكتبي
وصلهن لنبض الگلب ويشوف شوگي وعتبي
ارحل ياطير الشوكَ واحمل گلب محروكَ
شيبت وانة بزغر سني طير السما ون اعله وني
==========================
عني المحامل من مشت منكم ما واحد ردلي
منتظرة من عدكم خبر گلبي نسوچ ايگلي
شو طوليتوا وما رجع لا اخو ولا عم يهلي
ابعث مكاتيب اشكثر وجواب ما يوصلي
عني الخبر مگطوع ضليت اصب ادموع
من شمهن اهدومك عمني طير السما ون اعله وني
===========================
وي كلشي ابعثلك گمت عن كلشي بعدك جاري
مستغربة شلون وعجب رد ما يجي من اخباري
تاهت مراسيلي ابهوى لــــو ما يعــــرفن داري
بالدار انوحن وانتظر ليلي اتـــصل بنــــهاري
ينساني ابوي شلون لا اهلي ما ينسون
ابقى ابأمل ما خاب ضني طير السما ون اعله وني
===========================
أسألكم الدعاء رائد الاسدي

ليلة مسلم ابن عقيل
اول شهيد من القصر يرمونه
ضل بمكانه وماكو الي يشيعونه
كل اضلوعه متهشمه
مثل حسين ابن عمه
/////////////////////
منا بدايات الحزن من مسلم لحد النحر
ومنا بدايات العطش من الخيم حد الگمر
ومنا بدايات الكسر والگسره جانت بلضهر
التمو عليه من كل كتر وحجارهم مثل المطر
  بحر الضهر ويدكدكون البيبان
  ‏بلكوفه خلوله اذن بالحيطان
  مسلم عاشها الجمه
مثل حسين ابن عمه
/////////////////////////
بالكوفه كلها تحزمت صلو وراه يمكن الف
صله وكضه من التفت ماضل ولاوحد عرف
خانوه وضل بوحده والغيره كامت تختلف
بس طوعه هيه اتلگته وكام بختها ينحلف
البيت الك والنه الخله وتفضل
انت كنز  بس انت ماتتحص
الرايد دين شيفهمه
مثل حسين ابن عمه
////////////////////////
حزنت ملاكة السمه لمن طلع خيط الصبح
سلم عله حسين وبچه وبدمعه يحجيله الشرح
الكوفه خانت كل وعد وماغزر وياها الملح
سود الوجوهه اتلثمت  وعيونهم شمرت رمح
اشباه الرجال وبيهم ولارجال
وجروح مسلم جانن هواي اثگال
منگع ثوبه  من دمه
مثل حسين ابن عمه
////////////////////
‏مرسالك الاعظم وصل لمن قروه محد فهم
  يحسين اتحضر بعد جايلك و مثل السهم
  النار شافاهه شكثر يمكن يحركون الخيم
‏شاهك دمع لاموهوه من العطش هم ماسلم
  دم عله راسه وراسك مخضب راح
‏ جم سهم يحمل گلبك وياه ارماح
‏طاح وكتلته الصدمه
‏مثل حسين ابن عمه
////////////////
وكفو سره جن مسطره والناس يمه اسطرت
‏متانين طيحت مسلمك التمو عليه وتشمتت
‏شمروه من فوك القصر وضلوعه كلها اتهشمت
‏ لاغيره عدهم لارحم من طاح  كلها  اتكترت
‏اتصور بمسلم هيجي حاله صاير
‏يحسين بس انت اليسحكك حافر
  ضامي وماشرب همه
  مثل حسين ابن عمه
  ‏/////////////////////
سيد محمد الهاشمي

#ام_البنين_ع_

.
.

قصيدة لــ أم_البنين ع



.            عـاشـت الـطـف بـروحـهـه .. ام البنين
             اجروح الزچـيـه اجروحهه .. ام البنين

                        *---------------*---------------*

             ابيت الـفـحـول مـن العرب مـولـوده
             وامعلمه ابو فاضل يـضـحـي ازنوده
             التـلـچـمـهـه ساعات الهجوم السوده
             وي زينب ابـخـيـمـتـهـه ما مـوجوده

             مستحيه مـن مـذبـوحـهـه .. أُم البنين
             اجروح الزچـيـه اجروحهه .. أُم البنين

                        *---------------*---------------*

             عـاشـت احـداث الواقعه بأحساسهه
             ذبـلانـه چـن الـرمـح شـايـل راسـهـه
             كلما تـضـيـگ وتـخـتـنـگ انـفـاسـهـه
             يـعـنـي وگع چف مـن زند عـبـاسـهـه

             سـوط الـعـقـيـلـه ايلوحهه .. أُم البنين
             اجروح الزچـيـه اجروحهه .. أُم البنين

                        *---------------*---------------*

             مـسـدود بابـه وچـان امـان بـدارهـه
             بس الـخـيـم تـچـويـهـه لهبة نـارهـه
             تنشـد گـلـبـهـه زيـنـبـك شـخـبـارهـه
             واتحس حـبـل چتّف اديهه وجـارهه

             اتـخـاف المصيبه اتبوحهه .. أُم البنين
             اجروح الزچـيـه اجروحهه .. أُم البنين

                        *---------------*---------------*

             شما يجي اغروب وتفرش امصلايه
             تــشــعــر مـن الـقــرآن تــذبــل آيــه
             واتگول احس بالعطش ليش هوايه
             ما تدري عبد الله انـحـرم من مـايـه

             نوحت الثچله اتـنـوحـهه .. أُم البنين
             اجروح الزچيه اجروحهه .. أُم البنين

                        *---------------*---------------*

             ايمر اعله صـفـنـتـهـه السـبـط ليليه
             وتــذكـر بـنـاتـه ابـنـيـه بـعـد ابـنـيـه
             شلون ابحضنهه اتحط طفلته ارقيه
             ابـهـيـده بـأذنهه اتـلـبّـس الـتـرچـيـه

              للمحن صــارت سـوحـهـه .. أُم البنين
             اجروح الزچـيـه اجروحهه .. أُم البنين

                        *---------------*---------------*

             مـا هجعت الـدمـعـه بطوارف عينهه
             البسمتهه چانوا هـالـمـسـه امبچينهه
             ام الـبــنــيــن الاربـعـه امـسـمـيـنـهـه
             وعنهم فـلا نشدت تريد احـسـيـنـهـه

             الـفـرگـه صـــارت لـوحـهـه .. أُم البنين
             اجروح الزچـيـه اجروحهه .. أُم البنين

                        *---------------*---------------*


✍️خادم الحسين ع
الشاعر سعد هادي الشمري

#جديد_محرم_الحرام_
@HxzEU1
#قناه_نشر_القصائد_المنبريه 
#الناشر_مصطفى_المياحي

قصيدة لسان حال السيدة زينب سلام الله عليها في ليلة الحادي عشر من شهر محرم الحرام بعنوان (( سَفرُ الحسين ))

راح الحسين ... بغربه والبالطف جـرح ينـدب جـرح
راح الحسين ... وعسعس الكون ومشه راسه برمح
سافر العـــــام ... وأحسب أيتام
راح الحسين ... راح الحسين
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

غَرَّب حسين أو أشرگت نـار الحقــد بظعونه
واحترگت گلوب الورد شــافت تغيّــر لونــه
مرعوبه ظلّت ترتجــف چانت گبــل مكنونه
عليها العيون اتفتّحت لمّــن غُمَضْهــا عيونه

عاشت بخوف .. وبين نـــار وصحره واشواك ونبل
عاشت بخوف .. وعسكر وسوط التوى وطوية حبل
وجرّ الأسهام ... وأحسب أيتام
راح الحسين ... راح الحسين

ــــــــــــــــــــــــــــــــــــــــــــــــــــــــــــــــــــــــــــــــــــــــــــ



كلشي انتهى وطاح العصر وطاحت عيون بداره
وانتشرت بطف كربلــه مـــن الخيــــــام أَسرَاره
بين اليتامــــى وجثّتـــه اسعـــــى وأدوّر چــــاره
أطفـي الخيم چـــا والگلب ياهــــو اليخمّـــد ناره

فرگه الاحباب .. اتوجّـر الحسره بدليلي مــن الهجر
فرگه الاحباب .. تنگضي ونلتم عسى بوجــه الفجر
وسط الاخيام ... وأحسب أيتام
راح الحسين ... راح الحسين
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
راح الغروب وليل أجه وأحسب سنــه على اغيابـه
وما بينهن عشتــه الظمـا وبشوغــه أجـي المحرابه
خالــي وأصدّ على النبـــع سال على عتبـــة بابـــه
دمعه احترگ بيهــــا الجفن وابن أمّي چفنـه اترابه

صدره مكسور .. اضلوعه داستــه الخيول على الصخر
صدره مكسور .. ومحّــد النگّطله مـــــاي مــــن احتضر
صرعى الارحام ... وأحسب أيتام
راح الحسين ... راح الحسين
ــــــــــــــــــــــــــــــــــــــــــــــــــــــــــــــــــــــــــــــــــــــــــــ

دارت سنه ومــن ما رجــع دارت عليّه ايتامه
وأحتار أضمّد يا وجــه مچـوي بلهيب إخيامه
وچفوفـــي تمسح يا دمع لو تمسح اليـــا هامه
لـــو أدوّر آنـــه الياطفل بين الرمـــاد أحلامه

راحت وياه .. البيها روحي تعلّگت نجمه بسمه
راحت وياه .. الچنت أشوفـن بيه محنّــة فاطمه
ذيـــچ الأيـــام ... وأحسب أيتام
راح الحسين ... راح الحسين
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
كلشي اختلف بالطف شفت صـار الرمح مرجوحه
لولح شمسنــه على السمه ويضحك ابلچم جروحـه
اوجوه الزغار إتشابهت صفره على روحت روحه
حتّى الاصــوات اتماثلت ليــل اهدعـــش مبحوحه

اشلون الاحساب .. ينسمع صـــوت الأسامي الدينا ليل
اشلون الاحساب .. وحده وحده افتر عليهن ماكو حيل
أبّيــــن الالام ... وأحسب أيتام
راح الحسين ... راح الحسين
ــــــــــــــــــــــــــــــــــــــــــــــــــــــــــــــــــــــــــــــــــــــــــــ

الراحتله عين اهون اله ولا يفگـد مــن اعزازه
الفاجـــد المـاي اويه الهوى حتماً يصير اجنازه
بالطـف بقيت الخاطــــرك للمنكســـر عكّـــازه
عازه آنه مــا بين الحرم بس آنـــــه ليك بعازه
ترجع اوياي .. ولليتامي چفوفك اتمدهن غصن
ترجع اوياي .. وعلـى اديك تهوّد وتغمض جفن
ابسدّك تنام ... وأحسب أيتام
راح الحسين ... راح الحسين
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
بالطف بعدني وچن سنه روحـي بحزن مبهوته
ما زالت خيامــــــي تشب والعده يجهجه صوته
ولا زالت چفـوف اشكثر عالخـــد بقت منحـوته
وحسيني بعــده عله الرمل محّـــد نگـــل تابوته
فوگ الاتراب .. الجثـــه مطروحه ورمــل شابــع نزف
فوگ الاتراب .. وموش عين جروحه اشوفنها التِرِف
الروحت الشام ... وأحسب أيتام
راح الحسين ... راح الحسين
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
كلمــــــات (( حسن موسى النافع ))

قصيدة لــ ليلة الحادي عشر من شهر محرم الحرام بعنوان (( موتُ الأمل))

نزف دمّــه الأمل مــات ... اجت تبچي الفراشات
لگن ما يشبه ارسومه ... تغيّر كلشــي بالحومه
نزف دمّه الأمل مات
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

وسط صحره الأمل ما غمّض عيونه
رغم ظامي ... وسط صحره
رغم لون العطش أصفر بقى بلونه
ترف طبعه ... نشر عطره
تطوفــــه وتبتسم كلهـا الفراشات ... فــرح تتنشّگه لـــو هــب عبيره
على اذراعه بأمان الخايفه تبات ... ولا حسبت خطر ساعه الاخيره
إذا فوگ الرمل طاح ... او گصد له بهِمّه ذبّاح
يروّي السيف بدمومه ... تغيّر كلشــي بالحومه
نزف دمّه الأمل مات

ــــــــــــــــــــــــــــــــــــــــــــــــــــــــــــــــــــــــــــــــــــــــ

يبس غصنه وبدت تتناثر وروده
على الغبره ... يبس غصنه
ونسيمه البالطف يهب فرگة وجوده
بوكت عازه ... الوکت محنه
وصل باب الخيم عطره الأمل فاح ... وركضن بإنكسار بگلب حيره
عليـــه إتهافتن عالغبره مـن طــاح ... ينشدنّــه الظعن شنهو مصيره
منو ايلمّه إذا ضاع ... بجيش انترست الگاع
وتطش بلا حما علومه ... تغيّر كلشــي بالحومه
نزف دمّه الأمل مات
ــــــــــــــــــــــــــــــــــــــــــــــــــــــــــــــــــــــــــــــ
شرب دمّه الرمل والسيف البنحره
وسهم چبده ... شرب دمّه
ونبت حافر فرس غاير على صدره
وكسر ضلعه ... وملخ جسمه
لگن بيـــــه شكثر نيشان طعنات ... وعليـه ثيابـــه مسلوبات منّه
وحتى چفوفه ما سلمن گطيعات ... ومنهن چف بلا خنصر لگنّه
عليه ايذرّي التراب ... صاحن يَمَّه يا ياب
الدم والثرى هدومه ... تغيّر كلشــي بالحومه
نزف دمّه الأمل مات
ــــــــــــــــــــــــــــــــــــــــــــــــــــــــــــــــــــــــــــــ
إجن يمّه الگبل ساعه يشع نوره
ودفو احساسه ... إجن يمّه
ولگن طوله أبد ما يشبه الصوره
انگطع راسه ... أختلف رسمه
عليـــه طافـــن حزن يقرنّه آيات ... عِدل قرآن مطروح علـى هيمه
وحده تحنّي چفها من الجراحات ... والاخرى تگلّه بعدك ماكو خيمه
تقبّل وحده الضلوع ... عليه الثانيه اتلوع
الك مو حلوه هالنومه ... تغيّر كلشــي بالحومه
نزف دمّه الأمل مات
يوالينــــه بچـــن وتناثر المدمـع
بچي برهبه ... يوالينــــــه
رحت منّه يبونه وما بعد ترجع
الوطن غربه ... شيدلّينــه
بعـد منهـو اليباريها الغريبات ... ويمسح هامها الصارت يتيمه
اذا بالخيمه نار وجيشهم فـات ... يسلّبهــن يشتّمهــن هظيمــــه
ويجتّفهن الى الشام ... أبوهن عالرمل نام
راح وما يرد يومه ... تغيّر كلشــي بالحومه
نزف دمّه الأمل مات
كلمـــــــــات (( حسن موسى النافع ))

قصيدة لصاحب العصر والزمان بعنوان (( ساعي الأجل ))

غيبتك فصل الخريف وعمري شجــره
ورگه ورگه سنيني طاحت منّي صفره
قاب قوسين الرحيل ... الشوفتك شنهي السبيل
يا أبو صالــــح ... يا أبو صالــــح

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

گصـــد ساعي الأجل يمّي اجـــه الما أهوى سالفته
گبل لا اشوفك اگبالــــي يغايب مـــــا يجـــي ردته
قلق عشت الرسايل هاي على وجهي انعكس شفته
أوّل چلمـــــــه تقــرأ العين چفنـــك ينّســـج سكتـه

واشتعل راسي بغيابك من مشيبه
مثله لو لفني الچفن باچر مصيبه
ما تجي والگبري اشيل ... الشوفتك شنهي السبيل
يا أبو صالــــح ... يا أبو صالــــح
ـــــــــــــــــــــــــــــــــــــــــــــــــــــــــــــــــــــــــــــــــــــــــــ

كبرت وشابت سنيني ونهايـــة عمـــري اعيشنها
بظهر محنــي وجســم ناحــل وأديّه امچّتفه چنها
أتاهــل والصدر ضايگ النسمـــه بحسره اشمّنها
رچيچه عيوني مــــا أوچّد الملامح گوّه افرزنها
كلشي بأغصان السنين اتشوفه ذابل
بيّنت هـــاذي الشــــواهـــد بالرسايل
بالعمر ما باقي حيل ... الشوفتك شنهي السبيل
يا أبو صالــــح ... يا أبو صالــــح
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
ضحك شيب الوجـــه غفله بوجــه ما مرّته البسمه
وتجاعيــد الحزن تحچي عمر بالهـــم كشخ رسمه
الگلب ماخذنــــي الك شوگــه ونبض يندبلك بهَمَّه
بيا ساعـــه اللقاء يفـــوح عطــــره ويمّـــك اشتمّه
يبتسم كلشــــي بحضورك هـــذا رايه
ويجري من بين الخيام الشاطي مايه
موجه بارد سلسبيل ... الشوفتك شنهي السبيل
يا أبو صالــــح ... يا أبو صالــــح
ـــــــــــــــــــــــــــــــــــــــــــــــــــــــــــــــــــــــــــــــــــــــــــ


بلا نـــار الشمــوع تمـــوت النار اتعيّش الشمعـه
وعشت ليل انتظارك نار بقنوت ودمعــه للرجعه
مـــا تطفي الجمر لچن عمت لي عيوني هالدمعه
تجي وأهلاً أصيـــح بصوت يبن الهشّموا ضلعه
سحگت الخيل بحوافرها على صدره
عالرمح عينـــه البناتـــه اللي تنطره
يرجع الها الغربه ليل ... الشوفتك شنهي السبيل
يا أبو صالــــح ... يا أبو صالــــح
ـــــــــــــــــــــــــــــــــــــــــــــــــــــــــــــــــــــــــــــــــــــــــــ
إذا تجبل واجي الملگاك سلامي اليبدي يا چلمه
بـــ يبن المن گفــاه نحروه لـــو يبن النشف دمّه
بـــ يبن المنذبــح ظــامـي اگلّك والنهـــر يمّــــه
بـــ يبن السلّبوا ثوبـــه وصبح دم او رمل هدمه
مــــــن اگلّك بيهــــن ألچـــم لك دليلك
انته عايش عمرك بطف تگضي ليلك
يشفى جرحك مستحيل ... الشوفتك شنهي السبيل
يا أبو صالــــح ... يا أبو صالــــح

ـــــــــــــــــــــــــــــــــــــــــــــــــــــــــــــــــــــــــــــــــــــــــــ


اشوكت ترجع يل مهاجر عشت كل عمرك بغربه
أمـــا آن الآوان تعـــود وتملـي مــــن النهر جربه
وتمــــر بيهــــا بگمر هاشــــم تبرّد شوفتك گلبــه
وتاخذها الضريح حسين المــــــاي اتنثره عالگبه

وتطفــي نار الوجّرت خيمــة خواته
وتگطع احبال السبي من چف بناته
تگلهن بخير الكفيل ... الشوفتك شنهي السبيل
يا أبو صالــــح ... يا أبو صالــــح

ـــــــــــــــــــــــــــــــــــــــــــــــــــــــــــــــــــــــــــــــــــــــــــ



كلمات (( حسن موسى النافع ))

قصيدة لصاحب العصر والزمان بعنوان (( نور الورى ))

يا نورَ ابصارِ الورى ... في أيِّ أرضٍ يا تُرى
تقضي سنيناً غائبــاً ... يا نازحــــاً أيــنَ تُرى
أبرضوى .. أم ذي طوى .. أو نينوى ..
تبكي لمِا فيها جَرى

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ليتَ شعري يابنَ طــه .. أينَ قـدْ طالَ المُقـــامْ ؟
أيُّ أرضٍ تقضي فيها .. ضوءَ فجـرٍ أو ظلامْ ؟
أيُّ روضٍ فيهِ تمضي .. ماكثـــاً يابنَ الكـرامْ ؟
عِندَ بيتِ القُدسِ طَوراً ؟.. قاصدَ البيتِ الحرامْ ؟

(أينَ استقرَّتْ بكَ النَّوى) ... في روضةٍ أم في قَوَى
هل باسمٌ فــــــي لحظةٍ ... أم وجهُكَ حُزنـــاً ذوى
وقتَ البلا .. أو للجَلا .. أم كربلا ..
أشلاؤكُم فوقَ الثَّرى
ــــــــــــــــــــــــــــــــــــــــــــــــــــــــــــــــــــــــــــــــــــــــــ

يا تُرى فـــي أيِّ أرضٍ .. ساكنـاً بيتَ الرَّسـولْ ؟
أو نزلتَ عِنـــــدَ قبـــرٍ .. يُخفي نـــوراً للبتــولْ ؟
باكيــــاً ضِلعـــاً كسيراً .. اشعثاً تمضي النّزولْ ؟
ليت شعري يابنَ طـــه .. عِنْدَهـــا مـــاذا تقـولْ ؟
يا أُمّي قدْ أفجعتِني ؟ ... مــنْ جُرحِكِ آذيتِني ؟
أو تَسمعُ صوتاً لهــا ... يا ضِلعي آهٍ مُحسني
في أنِّهـــا .. لابنِهـــا .. أم أَنَّهــــا ..
تبكي حُسَيناً في العرا
ـــــــــــــــــــــــــــــــــــــــــــــــــــــــــــــــــــــــــــــــــــــــــ
هلْ تُراكَ فـــي البقيــعِ .. عِنْدَها قُربَ القبـورْ ؟
أو حَلَلتَ فـــي العـراقِ .. عِنْدَ سامرا حضورْ ؟
فـــــي الجواديـنِ تُراكَ .. أو بُراثــا فيهِ نــورْ ؟
يا تُرى هلْ عِنْدَ طوسٍ ؟.. حولَ كوفانَ تدورْ ؟
ذا مسلمٌ في مَصرِهم ... فاستأنسوا بنَصرِهـم
واستوحــــدوهُ بينَهم ... ألقَوا بِهِ من قَصرِهم
نالَ الشَّقا .. صُلباً بقى .. حتّى رقى ..
للمجدِ وجهاً مُسفِرا
ــــــــــــــــــــــــــــــــــــــــــــــــــــــــــــــــــــــــــــــــــــــــــ
ليتَ شعـــري أينَ أنتَ .. تَشحــذُ ذاكَ الحُســامْ ؟
جالساً فــي أيِّ روضٍ .. يا تُرى وادي السَّلامْ ؟
أو أَنَختَ الرَّحلَ حَولَ .. قَبـــرَ مسلوبِ الخِيامْ ؟
تبكي دمعـــاً أو دمـاءً ؟.. مِنهُ قدْ رضُّوا العِظامْ
تبكي لِمنْ في الواقعهْ ... لزينبٍ أو مصرعهْ
أم نــائـــــحٌ أيتـامَـــهُ ... فَـرّوا بعيــنٍ دامعهْ
بينَ العِدى .. طالَ الصَّدى .. سيفُ الرّدى ..
بالحقدِ حزَّ المَنحرا
ـــــــــــــــــــــــــــــــــــــــــــــــــــــــــــــــــــــــــــــــــــــ
هلْ سَكنتَ التَّـلَ حزنـاً .. ناظــراً للعاديــاتْ ؟
عندمـــا كـانتْ تجـولُ .. فوقَ جُثمانِ الحُماةْ ؟
أو تُطيلَ فـي الجلوسِ .. باحثاً فــي الفلـواتْ ؟
خُنصراً كفّـــاً قطيعــاً .. أو مَرَرتَ بالفراتْ ؟
ما بينَهُ والخِدرِ هَمْ ... عبّاسُهمْ قدْ فاضَ دمْ
ممّـــا تـــراهُ حائراً ... للمــاءِ أو تلكَ الخِيمْ
لمّا وَقفْ .. مِنْ غيرِ كفْ .. والجودُ جَفْ ..
والماءُ في الرَّملِ جَرى
ـــــــــــــــــــــــــــــــــــــــــــــــــــــــــــــــــــــــــــــ


يا إمامَ العصرِ نحنُ .. قـــدْ طرقنْــا كلَّ بابْ
فيـــهِ نَلقاكَ ولكـــنْ .. ذَنْبُنـــا كــانَ الحِجابْ
نازحاً لمْ تَخفَ عنّا .. حاضِراً عِنْدَ المُصابْ
إنِّنـــا نشكـــو إليكَ .. شاقَنْـــا طــولُ الغِيابْ

هلّا نــراكَ حاضِــرا ... ذاكَ اللــواءُ ناشِـرا
نمضي جنوداً خلفَهُ ... بالنَّصرِ دوماً ظافِرا
تحُيي السُّنَنْ .. يابنَ الحسنْ .. تجلي الفتَنْ ..
لمْ يأتِ ليلي مُقمِرا
ــــــــــــــــــــــــــــــــــــــــــــــــــــــــــــــــــــــــــــــــ





كلمـــــات ((حسن موسى النافع))

نزّال للعباس عليه السلام ، بلسان حال أم البنين سلام الله عليها ، الليلة الرابعة بعنوان (( سيف المرتضى ))
هلا بك يالگمر ... يبن فارس مضر
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
گبل شفتك حلم .. گمر وسط الحضن .. الوليلك وأحـــــن ..
إلك يا ابو الفضل
يعالي على النجم .. تنور على الفضا .. يسيف المرتضى ..
وچلمته بكل فصل
هلا بك يا شهم .. أنه اشتمّك هوى .. ضوه بطول الضوه ..
على عيوني تهل
عشت مشتاگـه لك ... واعايـــن بالفلك
واشوفك كل سحر ... يبن فارس مضر
ــــــــــــــــــــــــــــــــــــــــــــــــــــــــــــــــــــــــــــــــــــ
لون ردّتك تفز .. اناغيــلك ظعـــن .. رحل عـــن الوطن ..
هـــوادج والحرم
اسمعك ترتجز .. تفــك عينك الــــي .. وتگلّي اتدلّلـــــي ..
وتشيل ايدك علم
على زنودك حرز .. جربتك طلّسم .. وعلى چفوفك رسم ..
نهر يــــمّ الخيم
واذا گلبــــي نعــــه ... دللّــــوه مشرعه
تغمّض على النهر ... يبن فارس مضر
ـــــــــــــــــــــــــــــــــــــ((1))ـــــــــــــــــــــــــــــــــــــ

يبو الجود وكـــرم .. ينبضــي البالگلب .. يـآية كــــل محب ..
قراك انته الوفه
تسابگ للسهـــم .. تطر سوح الوغى .. وتنــــــــال المبتغى ..
تهب كالعاصفه
عليت على الهرم .. صعب يومك صعب .. يهزبر بالحرب ..
تزف بالازفه
وسط يـوم العسر ... يحارس للخــــدر
يبيـــــرغ بالخطر ... يبن فارس مضر
ــــــــــــــــــــــــــــــــــــــــــــــــــــــــــــــــــــــــــــــــــ
دعتكـــم كربله .. يبـو الغيره استعد .. تماشيه المجد ..
لحـــد آخـــر نَفَس
على ذيج القافله .. اريدنّـــك ظلل .. لونّ الحـر نزل ..
على ظعونك قَبَس
بوسط ذاك الفله .. ستر عن الخيم .. وترفرف بالعلم ..
وتظل عمرك حَرَس
ولون مرّ الظمـه ... على طفله الفاطمه
تصب يمها مطر ... يبن فــــارس مضر
ـــــــــــــــــــــــــــــــــــ((2))ـــــــــــــــــــــــــــــــــــــــــ




لأخوك أهدي العمر .. بعشگ وكت الفرض .. تِوَذّر على الارض ..
اطلبنّـــك عهــــد
فــدائك مــــو قصر .. تمـــــام بطاعتــــــه .. وقيـــــــام الحضرته ..
تظل طول الامد
وضـــــوئك للنصر .. الك چـــف ينگطـــع .. وسهــــم عينك نبع ..
مسح هامك عمد
صلاتك عالرمــــح ... بعــد وكت الذبح
الخيم مرهن خطر ... يبن فارس مضر
ــــــــــــــــــــــــــــــــــــــ((3))ــــــــــــــــــــــــــــــــــــــــــــ



كلمــــات (( حسن موسى النافع ))

اوداعك بعدين     زحمه من حسين
ظل واگف وين     يتأمل
&&&&
امك هسه انه وياك   بس شوف حسين هناك  لايسمع
صافن بس حجيه هواي  راد امه تذب الماي من يطلع
زحمه من حسين توادعنه
خاف نجرحنه احنه بوگفتنه
كلشي ولا ينظر دمعتنه
ظل متانيك          بس عينه اعليك
راد يحاچيك      بس يخجل
&&&&
جاي يشوفك عباس    تدري حسينك حساس يتألم
مفضوحه عيونك ليش   يا قائد كبش الجيش اتبسم
وام واعرف گلبي حروره
راد امه بهالساعه تزوره
وانه اعله وداعك مجبوره
صافن مولاك      امشيله هناك
گله انه وياك     ادلل
&&&&
متخوصر شوفه بساع  راح يطيح اعله الگاع  ما يگدر
هسه وياك انه هنا   راد امه تكون وياه   يتذكر
انه امك يحسين احسبني
الله يحبني من تحبني
اكثر من اولادي تهمني
گله امي دگول      انته المحصول
حارت شدگول      تتوسل  
&&&&
روح امشي بلا تأخير   خدامك گله نصير   منعوفك
گله بدونك مولاي    ما نشرب حتى الماي  بطفوفك
عطر الخيمه حسين نشمه
خادمتك هاي شگد نعمه
تخبل منك كلمة يمه
ما طب البيت   لو انته امشيت
بس انه ادعيت    اتحمل
&&&&
هسه اوداعك خلي   خاف حسين انأذي  هالمره
اترك هذا الموضوع   ونسولف بس ادموع  لزهره
اعگد بيدك يبني الشيله
عوف امك وحسين امشيله
يا عباس انته وكل حيله
اعرف ترحون     لا تتأخرون
ما تبقة عيون     بس تذبل
&&&&
علي جبار الكعبي
الفاتحه لوالدي

قصيدة ( سحك قصر الاماره ) الى سفير الامام الحسين مسلم بن عقيل عليهما السلام




سحگ قصـر الامــاره بگلــب مستـعــره نـاره
اعتـلا يقــره الزيــاره السلام عليك يا حسين

*

طعم الزيــاره يختلــف
لو طبگ وي طعم النزف
وكت الشدد مــا تنسي محـــــــال

أول زياره من الگلـب
تعجز توصفها الكتــــب
يا كاتب أيوصفها الي بمقــــــال

من نوى فرض الزياره مسلم شچان الشعور
سيـدي يحسـين ازورك لكـن أبــدم النحـور
وانته تستاهل يغالي اسحگ القصــر وازور

يبو اليمــه إمــامـي ازور وگلبي ضامي
الك ابدي بسلامي السلام عليك يا حسين

*


لزيارتك صعب الشرح
يا سيدي أبطعــم الذبـــح
أول زيــــاره أمطــرزه أبـــدمــــاء

نكتبت أبصفحات الدهر
وانرسمت أبأغرب صــور
أول زيـــاره تـعتــلـي السمـــــــاء

بالزياره حسين يسمع صوتك الكلش عـذب
مر ببواليمه سلامك كـال هــذا من المحـب
تقبل ادخل يا أمامي لجنتك وســط الگـلب

قبل فـرض المناحر أنــادي وگلبي حاير
أمـامي اقبلني زاير السلام عليك يا حسين

*

متيمم أتراب الحــــرب
وثوبك جديد من الضرب
ومتعطـر بــذاك الدمــه اليســيل

لجـــل الحبيب اتخذمت
مسلم شبيهك ما شفت
هاي آخر ازيــاره وبعد رحيــــــل

ابد ما هماك جرحــك همــك أتزور الإمــام
انه ما شايف شبيهك تنزف اجروحه غرام
يبتدي بحاضر أمامي وينتهي بأجمل سلام

أمامي وانته غايه الك دمـــي البدايه
و أزورك بالنهايه السلام عليك يا حسين

*

يا سيدي كاتب درس
عن الابه وعزت النفس
حد الممات ومــا تذل عجيـــب

ظنـوا تمدهــا يمنتـك
والهم تنزل هــامتــك
گلت انه ربـاني علي الحبيــب

ما اعوف حسين أمامي اكتب أبدم الـوريد
والله اگص اچفوف أديه وابد ما أصافح يزيد
الفوز ابواليمه قبلني دونه من اوگــع شهيد

أموت انه أعلى حبه أمامي ومايه اشربه
أزوره وأهوى دربه السلام عليك يا حسين

*

بيــن الزيــــاره والحـــرب
يا سيدي حسرة محب
فـوگ القصـر منــك بـدت دمــــوع

من تهوى انته أعلى الارض
حسيت بالخيل شترض
يا سيدي ابطــــف كـــربله ضلـــوع

بين فرض الموت حاير بين فرض ازيارتك
چنت تتمنى يا مسلم خيــل بالطف رضتـك
دون ابو اليمـــه حبيبـك بالحوافــر جثتــك

اظل بيك انه حاير قلم ومتاني شاعر
زرت بس بمشاعر السلام عليك يا حسين

**
الشاعر
موسى البديري

قصيدة  (   حبر الثوره )  الى سفير الحسين مسلم ابن عقيل عليهما السلام



مسلم  يــا حِبــر الثـــوره
بعــزه أبتـاريخــك نقـــره
دمــك ظـل يسطـــع بدره
يا مبعوث حسين      يا مبعوث حسين
*
تــاريخـــك لــــوّن نقــــراه نتشيــم
فصولك معجـزه سجلها قانــي الدم
حسين أول ضحيه شخصك القـــدم
يعرف غيرك لهل النهض ما يرهـم
بأسراره اختصاك    
حسين من اختاراك      عن حكمه
بعــزه تمثل الدين    
يدري بهـاي حسين      وبعلمــــه

قائـــد.. وحسيــن يعــرفــــك     
والله ... ما يخضع چفك
نحتار.. بيش احنه انوصفك      
يــا  مبــعــــوث حســين
*
تاريــخ الكرامــه أبشخصك أتجسد
وصفحــة كبريائك مـا وصلها احد
المــواقف بالدمــه وبالعّــزه تتخلد
والك بالكوفه موقف صعبه يتجدد
مـــــا صافحة أيــزيد        
ومـــا مديت الأيــد         للجائر
دمــك غيـــره يــفــور       
ظل بـــركان يثــور         يا ثائر

دمـــــك ... عالظالم نهضـه     
عـزه ... وإخلاص أبنبضه
سيفــك ... نـــار وتتلضّــه       
يــا  مبــعــــوث حســين
*


درس وضحّته بالكـوفـه يحّير أجيـال
الغـدر هيهات مو من شيمت الإبطال
فــرق ال النبي عـن  زمــرة الأنـذال
لذلك انتــه باقــي وغيرك الي إنزال
صحنـك شــع أنـوار   
وبيك تحـج زوار          للحضـره
وين أصحاب الجور   
زلـزلهم عاشــور          من نحره

نصرك ... مسلم يتجدد         
كل يوم ... ذكراه يتخلد
بركان ... دمك مايبرد          
يــا  مبــعــــوث حســين

*
مسلــم للمجد خطيــت مــوســوعـه
مو شرط النصر بچفوف مجموعـه
خانــو بيك بــس النصرتــك طوعه
ظلت للدهــر ذكــراهــا مـــرفــوعه
نادت يـــا مغــوار     
حمـــلات الكـــرار         جــددهـــا
مجتمعه الأحزاب     
انهض شيل الباب         واحصدها

حـيـــدر ... مــا ثنّه أبضــربه      
بـزوده ... الميدان يگلبه
خصمك ... ادري انته ترعبه      
يــا  مبــعــــوث حســين


*

عكس كل الحروب اهناك يومك صار
واحــد انتــه ثابـــت  والــزلم طشـار
ناس اتگول مسلم لــو علــي الكـرار
لان ضربت حسامــك چنها ذو الفقار
ماخذ منّــه الـــزود     
چــن حيدر مــوجود      بالكوفـــه
ناس أتفــزع نـاس     
چـن هــــذا العبــاس     وتشوفــه

چفك ... نكس چم رايه       
بالكون ... ما صارت هاي
ظلت ...  يــا مسلم ايـه       
يــا  مبــعــــوث حســين
*
مسلم من هويـّت ويضحك أبقصـره
ربــك زلـــزلاه وعــلا الك حضـــره
ربــك هيـــچ رادك للخلــگ ثـــوره
الينصـر ربــه لابـد ربــه الينصـره
دمــك بعــده  يفــور      
ينزف في عاشـور           حــريــه
دم الحگ لــو سـال      
كون يربـي أجيال          ثــوريـه

دمك ... يا مسلم مو دم       
ثـوره ... للعـــالم قــدّم
منك ... لازم   نـتعلــــم     
يــا  مبــعــــوث حســين

*
الشاعر 
موسى البديري

ما مــد أيـده ودنگ راسه
مــا ســاوم بالدين
مسلم حيدر أصله وساسه
منْ اختـاره حسين

أبو اليـمــه يـريــده
گلب ينبض عقيـده

****

مسلــم والكـــلام يحـيّــر
من نحجي اعلى شخصيته
الــربــاه حيــدر الكــرار
نعـــرف شنهـي تـربـيــته
مــن بيت النبي الاطهار
شَــرّف ربنـــا اهــل بيتـه
ثوري وما يطخ الراس
مــنْ حســين ثــوريــتــه

يـدري بمسلم ثابـت عـزمـه
مــا يخض للجـور
ضـده الكـوفه لـو متحزمـه
وحـده اهنـاك يثور
آبــه يجري بوريـــده
گلب ينبض عقيـده

****

قـرَاك الراوي مــن فكـره
حسـبْ ما يفتهم يقراك
عكس حسين أبو السجاد
لاعظم مرحلـه اختــارك
مــرحلــة الــدمـاء تفــوز
لكــن وبشــرط ينـعــاك
لــذلك ما رفضــت الـدور
للعــالـم شمــس خــلّاك

أعظم مبعـوث لهل الثــوره
هيج حسين يـريد
يدري بشخصك ثابت فكره
يعَارضْ فكر أيزيد
عــزم تتفايض أيــده
گلب ينبض عقيـده

****

الكوفه شاهـده لليـوم
مسلم ظل شمس نحره
لمّــن تنظــر بتجــريد
وبــأنصاف للحضــره
وين الظالــم وجيشـه
منْ أتصد على قصره
تعرف بالدماء تعيش
مــن تضحـي للـزهره

مسلم عايـش ينبض گلبه
مــن ساعة عاشور
مــو مرقــد وايوان وگبّه
شَمس وشعّت نور
الدهــر ردد نشــيده
گلــب ينبض عقيـده

****

مسلم سوره للاخلاص
أيــه انرتل أحـروفـه
اول ثائــر ويـه حسيـن
مسلم قــائــد الكـوفـه
رفع رايـة علـي بيمناه
بعقيده ثابته اﭼفـوفـه
رايـه المهـدي يرفعـها
وكــل العــالم يشوفــه

رايـة ديــن الله المهيوبـه
خطها بدمّه حسين
من دم المنحـر مخضوبه
حتى يعيش الدين
الدمّه سجل قصيده
گلب ينبض عقيـده


****

مسلم مـو جــرح ننعــاه
وبس نستعرض اجروحه
انكطع منه النحر معلوم
لكــن عــايش ابــروحــه
مسلم مـنْ نهـض للدين
قـــدّم دمّــه أطـــروحــه
لا شــك دمّـــه يتخـلــد
الرَخـصْ للهـدف روحــه

مسلم ظل رايه ومرفــوعـه
مــا نــزلت لليوم
واضح من حيدر مشروعه
يظل قـائم للــدوم
لظهور ابن الصميده
گلب ينبض عقيـده

****
الشاعر
موسى البديري

قصيدة ميمر الى سفير الحسين عليهم السلام


رغـــم الألم دمـــك رسم
طـــول الدهــر لوحة قيَّم
بالكـــوفه ظلت لليــوم
تحيّــر عقــــول اللوحه
****

دمــك رسم لوحـــة عشگ بالكــوفـــه
لـوَّنهــا مـــرسم مصـــرعك بچـفوفــه
مــاكـــو شبيه ألهــا ولا مـــوصوفــــه
دم النحــر راسم صَّــور
مـــا شافتـــه أعيــون البشــر
بيها النحــر لمــن غـــاب
شـع الضوه مـــن صبحـه

*

شمس الكرامــه أشـــرقــت مـن دمــك
شمــا حاول يغطيها يفشــل خصــمــك
رغــم الحقــد بإخـــلاص لــون رسمــك

من الدمه بلون الضمه
لــروح الزچيــه فاطمـــه
رخصــت دمــك لحسيـــن
مــوقف صعب لو اشرحه

*

قصــة جهـــادك ملحمـــه تظل كبــــرى
بدمـــك لبــو الأحـــرار وافيــت أمـــره
تــاريخـــك أتخطـــه دمـــاك الحمــــره

دمـك كتــب مـو بالــذهب
بعزه نضحيها الـــرگب
والدمّـــه خـط التـاريخ
محــد يحـــاول مسحه

*

جيــوش ال أميـــه تحــاربك مجموعـه
وحـــدك يـــا مسلم والمنــاصر طوعــه
الثائـــر يضحـــي مــن اجل مشروعــه

أعظم درس يفدي النفس
وما يخضع لچف الرجس
دمــك رســـم لـلأجيـــال
منهــج تعـــاله أبصرحه

*

كــون السفيــر يصيــر يفهــم درسـك
وحــدك سفيـــر ولا حمايـــه تحرسك
لجـل الهــدف ضحيت مسلم نفســك

حتى بشرف تحمي الهدف
لو عالترب دمـــك نزف
بالـــدم وفيـــت وي حســين
گبل الطفــوف وجــرحه


*
كــون السفيــر لقصتـــك يفــهمهــا
ولوحـــة وفائك كل وكـت يرسمها
ودمـــك كرامه هــل الخلگ علّمهـا

لكل المــلا اسمــك علا
آية مجـــد وتــرتلــه
اليروي العقيده من أدماه
ربـــه كـــرامـه يمنــحه

*
الشاعر
موسى البديري

قصر الاماره أتحول التراب
وقصرك يمسلم ناطح السحاب
وبابك صبح مجيب
الزارك فلا يخيب
<<<<<<<<<<<<<<<<<<<<<<<<<<<<
١=

يلي اخدمت .. حيدر علي …وحسين ابو اليمه
يل هدمت .. عرش الكفر .وحدك بكل همه
يل الآمنت ..بيك السمه.. اعظم واهم زلمه
اده الامانه ..ابكل بفخر ..ناصر لبن عمه

نلت الصداره ابمهنة السفير
ما خنت أميرك لا خنت ضمير
يا مسلم الحبيب
الزارك فلا يخيب

<<<<<<<<<<<<<<<<<<<<<<<
٢==

يل حيّرت ..أهل الأرض.. وأهل السمه بعزمك
وحدك خضت … ثورة نصر … عل حللو دمك
كلشي ركع … يم صولتك .. يا مسلم واسمك
صيته وصل .. جوه العرش .. وبيك افتخر عمك

يا مسلم أنت خيرت الرجال
هيجي عليك بكربله يُقال
مسلم رجل رهيب
الزارك فلا يخيب

<<<<<<<<<<<<<<<<<<<<<<
٣===

يالمبتسم ..وقت الحرب… وإسهام يرمونك
ماهمتك …كثرت عدد .. ناس اليعادونك
صنت العهد …وأنت اتعرف .. باجر يذبحونك
عشت بشرف ..مت ابشرف … لجل اليحبونك

ما همتك روحك إلى الحُسين
أنت انذرتهه امن اول السنين
للينذبح غريب
الزارك فلا يخيب

<<<<<<<<<<<<<<<<<<
٤====

يل قدمت … اعظم درس ..بالتضحية الناسك
منك أخذ … عِلمه الوفه  … وبجبهتك باسك
ما خالفت .. درب الصدك ..أي وحق عباسك
لآخر نفس .. ما طاوعت .. سيف الكطع راسك

عشت بشموخك لآخر الحياة
مثل الوكع يم شاطيَّ الفرات
ومن العطش شحيب
الزارك فلا يخيب

<<<<<<<<<<<<<<<<<<<<<<<<<
٥=====

إكراما إلك .. ما ظل قصر .. ربك هدم صرحه
وأنته أصبحت … قُبه إلك … توصل شمس صبحه
واليعتني .. بحاجه إلك …يرجع بديه فرحه
وبابك دوه  ..الكل مبتلي … ويعاني من جرحه

جم واحد بواحد مريض اجاك
رديته متشافي بفضل دعاك

يا سيدي الطبيب
الزارك فلا يخيب
<<<<<<<<<<<<<<=====>>>>>>>>>>>
✍️🏻 كلمات موسى الخادم ٢٠٢٥

ما لاووهن اجفوفه
بيهم زرع جم خوفه
ولآخر شبر بالكوفه
ركضهم السفير
><><><><><><><><><><><><><>
١=
ابد ما جنه وحده من لفاهم
زلم تردم زلم خله امن اجاهم
السبع بيهم وكَـف خاتل وراهم
وعلى ابواب المدينه علكاهم

مثل عمه …الفحل حيدر …تولاهم سطر
شمر عشره .. على عشره .. رفع راية نصر

مثل الأسد من يزأر
وحده ودوخ العسكر
حيّر كل فكر حيّر
حسبوو علي الامير . ركضهم السفير

><><><><><><>
٢==
ابدخوله الكوفه أرعب كل خصومه
علن ساعت صفر ساعة قدومه
ملك موت ونزل وصلت علومه
يويله اليدنه مسلم هذا يومه

ابو محمد .. نعم منه .. كلف حيد وشهم
على احدوده …الوصل ويله ..يرد لهله اسم

كل واحد وصل صوبه
رد ايصيَّح التوبه
اعليه الدنيا مكلوبه
وفقاره يستشير = ركضهم السفير

><><><><><><><
٣===
اله شهدت أساطير وفحوله
شجاعه ومرجله وغيره ورجوله
أخذ من عدهم ادوار البطوله
ابوكفته الشامخه الما بيهه لوله


وكف وكفت … جبل شامخ .. يريح اتحركه
ورسم لوحت..نصر سيفه ..اعله كد المعركه

رسام ورسم سيفه
من خصمه أخذ حيفه
مطرت غيمته ابصيفه
على ازغير وجبير = ركضهم السفير

><><><><><><><
٤====
تسولف طوعه عن صولاته مسلم
تكول ابكيفه صار ايطشهم ايلم
وعلى إركاب الزلم فقاره يرسم
صور للقاده ساعة بيهه يعدم

فلا واحد …كدر بيهم … يردهه صولته
مثل كافل ..خدر زينب .. يرف ابرايته

بالقاده لعب جوله
خذاهم مسلم بطوله
يصيح الجيش افرجوله
أويصير الي يصير = ركضهم السفير

><><><><><><><><><><<><>
٥=====
كثر ما كطع الروس الجبيره
الجثث صارت يغطوهه بحصيره
وعشيره صارت اتعزي ابعشيره
سلام الله على حسين وسفيره

زلم كلفه …ترك خلفه ..جثثهه امطشرَّه.
سلام الله .. على مسلم  ..عظيم المفخره

بيهم سَوّه الايريده
فارس والحرب عيده
لم الجيش ترس ايده
مثل لم الشعير = ركضهم السفير
><><><><============><><><><
✍️🏻 كلمات موسى الخادم ٢٠٢٥