گلبي احتار بلزمه _ كلشي اجيسه يلجمه
جسم الغالي احسين
من گد مالميته _ الطف كله افتريته
وادموعي اعله العين
بدموعي ادعي لرَبي _  الله يساعد گلبي
/////////////////////////////////////
رحت بالگوه اجر جدمي اعيوني من الدمع ذبلن
اعتنيت الزاكيات ابجي عله الي بالشمس ضلن
من گد ما طحنها الخيل مدري اشلون يلمن
امشي واحجي وي گلبي يگلبي حيره اروح المن

بگدما بالحر ضلن  _ وخيل عليهن سحگن
بدمهن حمره الگاع
خايف من اوصلهن _ مدري اشلون ادفنهن
ينهد حيلي بساع
بوجهي امبين تعبي _ الله يساعد گلبي
/////////////////////////////////////
اول نظره الي من حسين خنصر جان ماعنده
عليه لا مو دمع والله عليه عيوني تتبده
اليشاهد حالتي البيها عليّه ينمرد جبده
بهذيج الساعه  اتمنه منجن يمي لو وحده

وحده تعاين حالي _ محدب حتى خيالي
من شفته من ابعيد
محنيات اضلوعي _ بيد امسحها ادموعي
ولازم ظهري بأيد
مضيع اهلي ودربي _ الله يساعد گلبي
/////////////////////////////////////
  وصلته الغالي بس شفته وذر  مطشره بالغبره
علي مزدحمه عمه اسهام فراغ مبين بصدره
الشمس لا والله  ماتوكف گبل تتعده من ضهره
الله يعين ابوي حسين عليّ خيل اسحكت عشره

راحت عمه وردت _ فوكه الخيل السحكت
مشدودات عيون
معبر الهن صاير _ الحافر فوگ الحافر
ينلم حيره اشلون ؟
ياعيني بدم صبي _  الله يساعد گلبي
////////////////////////////////////
من گد السحگ بالخيل  الهوه لوجاسه يتطشر
جبير احسين حيل اجبير قياسن شفته وي البر
بحصير وگوه لميناه قليله بحقه الموذر
اكثر من رگضجن ذاك والله بلمه گمت افتر

بگد ركضتجن بالبر _ اركض وافتر واعثر
ومدنگ كلساع
اجمع وذره بوذره _  خيل الداست صدره
ترست بيه الكاع
حيره وردتج گربي.... الله يساعد گلبي
////////////////////////////////////
ترابات الگبر نگعن بكثر ماسايل المدمع
حفرته وروحي جم مره تريد من الجسد تطلع
بس الله اليصبرني واكولن ياعلي وترجع
وسدته على التربان وصوت من النحر اسمع

من نزلته بكبره _  صوت اسمع من نحره
ادفن عبدالله وياي
موذر من ادفنته _ عاري وماغسلته
خاف يلچمه الماي
الطف باب لحربي _ الله يساعد گلبي
///////////////////////////////
تمت _ عباس فرحان الزيدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

(حال الامام السجاد اثناء الدفن)

بسبعين واحد رحت جناز
محد فگد مثلي من العزاز

المرض هدني.. وَشكبر حزني
 
___

ع العله امصاب زاد العله...فاگد ناس التسوه دموع
ذبحوهم بس ما كفاهم... ودو خيل اتكسر ضلوع

ياكلبي شتتحمل تتعب
بچي اطفال وخدر امسلب
واجساد اهلي الصارت ملعب
بين الخيل

والنار الما خلت خيمه
وركضت عماتي البهيمه
ومغرب ليل الوحشه وضيمه
يهد الحيل

بين الزلم شَوفني عاشور
ركض امهات العز والخدور

الشفته عذبني .... وشكبر حزني

___

جيت ادفنهم ماجبت الروس..ضلت متعلگه اعله رماح
بدمع عيوني ووشالت حيل..طاحت وي الدمع الطاح


وشالت حيلي الضلت عدي
طاحت وي دمعي المتبدي
ادفن بجساد اهلي الوحدي
ضال اوحيد

الله يساعدني اعله احزاني
مذبوحين كبالي اخواني
واحد ميت يم الثاني
وعمي ابعيد

والتنطگ امه گباله ويشوف
شيسوي كون امگيد اچفوف

فَزِعَت يبني... وشكبر حزني

__

ياهو اليكدر يدفن موتاه... ابلا تغسيل ولا تچفين
انه الدافن اهلي بدمهم... وهمه حسين وربع حسين

ياهو الضل مَيته اعله الغبره
خيول اتسحگه سيوف توذره
امكطع محد حافر گبره
بس موتاي

ياهو الدافن ميته بدمه
وبي محتار شلون يلمه
لين اوصال مكطع جسمه
شلون بهاي

جثه تضل بالكاع نيشان
بس للسحك من غير دفان

بدفنه تعبني _ وشكبر حزني
___

اه ياكلبي شيجبر كسره... شايل بي سبعين صواب
الله يعظم بيهم اجري .... غابو كلهم فرد اغياب

اه ياحزني وكبر جروحي
وضيمي وعلتي وهمي ونوحي
موزين وماطلعت روحي
ويه حسين


الشايف كلشي بيوم العاشر
والشاف بعماته اشصاير
زين وعايش ضال وصابر
كلش زين

سلب ونهب واطفال وصياح
وروس الهواشم فوك الرماح

والشتم بذني....وشكبر حزني

  ___

عادة الموت النه اواحدنا.... الله امكرمه بأستشهاده
بس نسوان ابداً ماعدنه ... مسبيات اخلاف العاده


ياهو يكابل حزني وحزنه
ويسمع مني واسمع منه
ماتكفيني اعليهم ونه
حزني اچبير

المعتل والفاگد طايفته
وادم يمه تداري ابعلته
مو مچتوف وناس اتعته
شلون يصير

غير المريض اهله تداريه
مو بالحديد امچتفه أيديه

مايكف وني.... وشكبر حزني


محمد صادق الخفاجي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

اعله باب الشام چم ساعات ضلينه
سبايه والغرب تتفرج اعلينه
سمعنه من الحچي اشكال
هضيمه علينه ينگال

ضعن متعوب من يومه من ازغر طفل ليه
الشمس والصوط تعبنه وماكو النگعد بفيه
تعبنه من المشي والضيم رفضو نگعد اشويه
كلما اريد احاچيهم صاحو انتي مسبيه

اذا تنشدني عن الشام مايرحم
اثارالدموع اهنانه ماتنضم
وتگص ابچفي الحبال
هضيمه علينه ينگال

شتمه ابكل متر نمشي وگلبي عله القهر صابر
بدمعي ومشي محنيه وضعنه اليا كتر حاير
وبنات احسين من الضيم الوحده تكسر الخاطر
صرنه اشلون صدر احسين من يسحگ عليه حافر

غربه اوجوهم كل عرف مابيهه
زينب وي غرب والغرب تسبيهه
اجدامي ابحسره تنشال
هضيمه اعلينه تنگال

المالاحهه صوط الشام من الحجر ماتمشي
الحجرمايندل امن ايطيح الچفهه ازغير مايحمي
ولايه ابطولهه فزعت علينه وبل حجر ترمي
عمه اهواي گمت اسمع الح گينه انتخن بسمي

حرت ياهي الاضمهه وياهي اعوفنهه
وكل وحده تموت ابعيني اشوفنهه
دم من الجفن سال
هضيمه اعلينه تنگال

اول تالي بت حيدر مچتوفه ويمشوهه
بقصر گتال اخوهه اشلون ذيچ الوگفه وگفوهه
قسو بيه بحچيهم حيل وعليه اصوات علوهه
القصر والبي فرد چلمه زينب وسفه سبوهه

تمنيتك تشوف اشصاير اعلينه
من بعدك نموت احنه تمنينه
بچو حته الاطفال
هضيمه علينه تنگال

من عزي ودلاي الچان ابخرابه گعدتي صارت
ماغمض جفن بيه اختكم خويه مانامت
الضاعلهه مثل عباس بين الغربه ماعاشت
بچت مومن بچي زينب خويه من القهر ماتت

يخو زينب تعال الزينب ادفنهه
تواسيهه وتطيب چم جرح منهه
مخليتك للثگال
هضيمه علينه تنگال

سلام البهادلي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

ارسم عله الگاع    اخيال الرمح وتشابگ ويا
        يادنيه شبساع  اتريدين ليش الغالي انسا
كلما ارسمه يرسم وياي
عطشان رايد يشرب الماي
____

مذبوح حلمي/ بلطف حلم ماشفت/ گلت اشعجب مامتت
مختنگه النفاس/
بس غرب يمي/ غيرالاخو ماردت/ والشوفته اتحسرت /   وياغربة الناس

شيبت كل خطوه مرتين //  اشلون افارگ وجه الحسين
ردته لوثواني///   ينزلي المكاني///  من رمحه اعاني 
لحضانك اتاني   تضمني

بدروب الجروح    مشاني وكتي ليل ونهار
موطلعت الروح   لشوكت ابقه گلبي محتار
بگلبي المصايب صارن اهواي
كل ماارسمه يرسم وياي
_
ذبلان جفني/ بدرب السبي والتعب/  من أنضرب موعجب
وبعيوني التراب
ياكبر حزني  /   هذا العليه انكتب /  من عيني نومي انسلب
ومضيعه الاحباب

والغرب بعزازنه اطوف //  بلرماح وعينه اتشوف
چم مره نشتمنه//  والشامت هضمنه//   وي رمحك عتبنه
مثل خيمه انهدمنه
بثواني

بعبينه العيون   من كل جهه وكل صوب بل شام
ضلو يشمرون   حچايات بس اقوه من السهام
يشتمنه ضل الرايح وجاي
كلماارسمه يرسم وياي
_
ضميت دمعي/ تمنيت عيني انعمت/ حچايه الثگيله انحچت
ياهيه هايه
ياروحي اسمعي/ انه المره الي انسبت / وگالوا عليهه بچت
مايمهه رايه

ياهلي وغيابگم موت  . من الهظم ماظل بعد صوت
من الغربه تعبنه .. تألمنه وسهرنه .. تقاسمنه قهرنه
عل دنيه عتبنه
نعاتب

متعوبهة الگلوب   مابينه وحده اتجر الانفاس
وبصوت مرعوب  يصيحون ذني ابلايه حراس
شفت الحجر يبچي عله مبچاي
كلما ارسمه يرسم وياي
_
يفرون بينه/ و شمات بس تبتسم/ بجرحه الضعن ينرسم
تتعاله الاصوات
كلماحچينه/ چم صوط الي ينقسم/  واللچمه ماتنحسم
بينه النفس مات
يازمن ماخذنه ليوين  //  من الصياط امحومره العين
ابنص گلبي حراره/  ب اگلوب الحياره / اليمته تطفه ناره
ضعنه ياخساره
  بعدكم

ياراحت البال    مدفونه ضلي ابصف الحسين
موقصت احبال    الضلت ابهيمه اتروح چاوين
بلشمس گمنه اندور افياي
كلماارسمه يرسم وياي
____

مووحده وثنين/فوگي المصايب مطر/ مسبيه فوگ القهر
خلصت حياتي
ماادري لاوين/ يمشيني گام القدر / والدرب وحشه وحجر
ضلمه امنياتي

حدبت منكثر الجراح // منندفن بلكي الله ارتاح
چم مره انسبينه/  بهيمه اتسلبينه /عذاب اتعذبينه
مچويات ادينه
تعبنه

الماعدهه خوان    تخنگهه عبره اگبال شمات
والفگدت حنان    تدفن حلمهه والفرح مات
علگاع ضل مطشر ارباي
كلما ارسمه يرسم وياي
عطشان رايديشرب الماي

سلام البهادلي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

كلما باوع لچفوفي اذكر     خيمه اطيح وركض ازغار
  من الطف ضلت بس ذكره  دخان بريتي امن النار
ليش اتسلب    ليش اتعذب  خيمه اطيح وركض ازغار
_
جمعّت كل ذكرياتي     ادري خلصانه حياتي
ارسم اعله اجفوني ذكره بلكي ترجعلي امنياتي
امفارگ اعزازي الاحبهم  اشتاگ الهم من صفاتي


الماشايفه احبال السبي تاكل گلبهه الحسره
و اعله المدللهه تضل كل الملامح تقره

فارگته الماضن يتفارگ   واحد بس حنيته اهواي
كلما اعثر الزم گلبي  اشعر طول انفاسه وياي
مااتعجب   ليش اتعذب   خيمه اطيح وركض ازغار
____

الرمح ماخذ كلشي مني      مايهم الصغر سني
الشايله مابي محنه       امد چفي يبعده عني
صوطه ينزل عله متوني   الدرب كله مارحمني


الفرحه بعيوني انتهت وبزغري عشت الچمه
لون الطفوله بلا ابو   ليل ويفارگ نجمه

اليمشي ويه الغربه اشمايمشي  اول خطوه يحس تعبان
يخلص دربه بهضمه ودمعه  وبعيونه اتعيش الاحزان
ابچي وانحب   ليش اتعذب  خيمه اطيح وركض ازغار
_
الحبل مايعرف ابجرحي  ينشد اشمانزل دمعي
والجوارح تبچي حسره  الشتم مافارگلي سمعي
صارت امنيتي الوحيده  الملگه ابويه ابموتي ادعي

الدنيه والبيهه تره امعلگه ابرمش اعيونه
من يفتح اعيونه الصبح يخليني فوگ امتونه

متعلقه ابروحه وحنيته   شتسوه الدنيه ابدون احسين
ضيعته وضاعت امالي   المثلك يحصل بويه منين
گلبي اتشيب   ليش اتعذب  خيمه اطيح وركض ازغار
_
النوم مامر اعله عيني  الحادي بصياطه يجيني
بل  الرمح متعلقه روحي والشمر ماييخليني
تيقنت راس الاحبه عله الرمح من يحاچيني


ما حاسبه  بيوم الرمح ياخذك مني ويمشي

مقهوره اباوع والتعب ماخله حيل ابرمشي


حيل اعله اشفافك مقهوره   مامرتهن گطرت ماي
وجسمك ضل عل گاع مطشر  بالهيمه ومافوگه افياي
امن اعثر انسب  ليش اتعذب خيمه اطيح وركض ازغار

سلام البهادلي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

گد ما عنـك .. ضليت انشد
كلها الوادم  عرفت بِـسْمي
وحتى الموتى..  البطف ملت
بكد ما عاثر بيهم جدمي

يمـذبــوح ..يمـذبــوح
➖➖➖

اوّل حلال انت انوخذ..من عدّه حتى اثيابه
واول بشر ميت سحك ..وتفزعله بس سـلابه
وتدَّافع الوادم شفت ..فوگك والاخره بصوبك
الهاضمني محّد گوّمك ..كلها تـِجــر ابــثـوبك

ضلّت كلها..  تجر بثوبك
ما بيهم حايوز الطبلَك
فوگك كلها .. تدوس وتعبر
محّد گال اسم الله وشالك
يمـذبــوح ..يمـذبــوح
➖➖➖

ولو أدري ثوبك ينسلب .. وينشگ واحير  ابأمرك
چا ضامه اهدوم الحسن .. ومغطيه بيهن صدرك
ولا وصلة اخيام البقت  .. وافرشها جوّه امتونك
ولا بيه اوكف فَي الك .. وشويّـه ابرد اعيونك

حاولت اوكف..  فَي يم جسمك
لاجن طولي محدّب خويه
انا ام عون و .. ما عاونتك
اعذر زينب يابـو رقيه

يمـذبــوح ..يمـذبــوح

➖➖➖
وماضلي حيل من الركض ..جسمك لَمَن دورته
يأشرون ذاك انت واجي .. وتطلع جذب موش انته
يضحكون وانا مدوهنه .. فحطو رجلي وگلبي
ومنين ما ادير الوجـــه ..  الكاهم بنص دربي

تدري بموتك .. يشلع كلبي
لخاطر زينب موتك اجله
وتدري بروحي .. وروحك وحده
شلون تموت وزينب عدله

يمـذبــوح ..يمـذبــوح
➖➖➖
وبسهامك انا اتحيرت .. اكثر من اللي امسلبك
خفت امن اجر منّك سهم .. اولنّـه طالع  گلبك
وجرت الرمح تملَخ ضلع .. وبجرته أدري يألمَك
وخوفي عليك من الهوا ..  يهزله سهم ويلجمَك

عطشان انت ..وريجك يابس
ويشربون الماي بگربك
وحتى الما عطـشان اتعمد
يشرب حتى يگطّع گلبك

يمـذبــوح ..يمـذبــوح

➖➖➖
الهاضمني مو حرك الخيم .ولا ركْضِتي البل حومه
ولا هطرتي ابين الزلم .. ولا من عطش مهضومه
الهاضمني  ذبّاح النحر  .. من شفته فوكك جالس
من شفته گوه الا اكطعه  .. جيفنه ضامي ويابس

باشط سيفه ..ونحرك ضامي
وذبحك حار وجمره انفاسك
برجلك ترفس .. وتصم ايدك
شفتك من يحز براسك

يمـذبــوح ..يمـذبــوح
➖➖➖
تمت والحمدلله
✍️حيدر عبدالله السعيدي

(لحن هذا الغريب منين):

زينب وحيده  اليوم
ولْيه ولتها الكوم .. وليه ولتها الكوم
وين الهواشم وين
وين الكمر وحسين .. وين الكمر وحسين

------
ضاكت الليله الوسعيه
بعين الحتركت خيمها
احتارت بوليان هاشم
ياهو ويّـاها اليلمها
لا ولي اليفرع يجيها
ولا كفيل الضال يمها
بس حرايم عدها ضلت
والحرم رادت زلمها

ضاكت عليها الكاع .. مامش ولي وفزاع
زينب فجعها البين.. وين الكمر وحسين

--------
تنادي يا عباس مرّه
ومره تندب  يابو الأكبر
ومابقى صوت الها كدما
يابو فاضل صاحت احضر
من كثر ضيم العليها
كامت من الريح تعثر
العاشر وضيمه وضلامه
تكوم ما خلاها تكدر

ضيم العليها ازداد  .. من طاح ابو السجاد
والرايه والجفين .. وين الكمر وحسين

-------
من الخيم لحسين وصلت
بيا علي كوه بدمعها
تشكي ضيم البيها رادت
لاجن المنظر منعها
شافته بلا راس جسمه
وهالوضع  زيّد وجعها
حالته البيها رميّـه
من الجمر اكثر لسعها

تشكيله اجت بجروح   ..  بس شافته مذبوح
ولطمت على الخدين.. وين الكمر وحسين

-------
وكامت من حسين كوه
وراحت لصوب الشريعه
وعثرت بجود الكفلها
وكامت بحسره فظيعه
شافت الماي وزراگه
وذْكرت حسين ورضيعه
وتعتب اعله الماي ضلت
ونشِدَه حال الوديعه

وبالهم كلبها احتار .. وحركت جدمها النار
ونار بدموع العين  .. وين الكمر وحسين

-----
جلجل الليل بضلامه
والكمر عالرمضه نايم
وزينب بوحدها ضلّت
ياهو يحرسها الحرايِم
ليله وحشه اعليها مرّت
من عگب عين الهواشِم
وين الاكبر وين جعفر
وين عون  اوين جاسِم

بنت اشرف الانساب   .. تحرس حرمها اجناب
ياوسفه عالطيبين .. وين الكمر وحسين
-------
✍️حيدر عبدالله السعيدي

ريحة خيمة محروكه
وصوت ابنيه مخنوكه
سمعته ابليل .. جان اعله من ونتي
صحت ياهي انتي يبنيه
ولهنه تكول أنَه رقيه
صحت شبيج .. عمه اوين جنتي !

كالتلي جنت يم بابا يا عمتي
كتلها من ابوج بهالمسه  شردتي
كالت رحت انام بحظنه واشتمه
بس ما ينحظن  شفته انا يا عمه

الخيل الدايسه اعليه
ما خلت صدر بيه
وردت امن ايده ابوسه
ولكيت اثار دوسه
وما حضنته ..وما حضنته
------

لو مو عطره البجفه
جان لهسه ما عرفه
الدم البيه .. غيّر كل معانيه
وكتلها شبعد شفتي
وصاحت آخ يا عمتي
صحت احجي .. كالت عمه مابيه

كتلها رقيه بروح ابوج احجي
كالت عمه مخنوكه اريد ابجي
بجت كالت ببوي الرمش ما سالم
وكاطع حتى اصبعه البايك الخاتم

كالت عمه والثوب
جر من عده مسلوب
التراب الحدره صاير
من الدم والحرافر
طيبنة حمره ..طينه حمره
------
طاحت يمي تعبانه
وكالت عمه عطشانه
وشلتها انا .. كدتها وطاحت من ايدي
وعثَرت اوياها من طاحت
وردتها تكوم ما كامت
شيل تريد .. وانا الحيل فض عندي


لا ضل حيل بيه ارجع واشيلنها
ولا مجعة اميّـه العندي اشربنها
ولا هيه التكوم وكلـشي خلصان
ولا ضل صوت احشم بيه عالسنوان

واخذنا الليل والخوف
ورجعنه اثنينه ازحوف
وكوه بيا ابو حسين
وصلناها الصواووين
بس تعبنه ..بس تعبنه
➖➖➖➖
ولمن  احنه ردينه
اجتنه طافحه اسكينه
صاحت وين .. جنتن عمه يا زينب
وصحت اعله رقيه بصوت
لا تحجين خاف تموت
لا تحجين .. وارحمي كلبي المعذّب

وكعدت اشويه كلت من الطف ارتاحن
ولن صوت الحرم ميت طفل صاحن
وتعالن ليّـه صحت بهيده كومني
ما ضل حيل بيّه وكلشي يوجعني

من ضيم السده اعليه
ماتن رجلي وايديه
فكد حسين ابو الاكبر
خلاني امشي واتهطر
من فكدته ..من فكدته
➖➖➖➖➖
حيدر عبدالله السعيدي

قارِب ذنوبي .. عنّك محبوبي ..  ياخذني بَعيد
وأندم بدايـه .. بس بالنّـهايه .. أذنب من جديد
عُذراً مولاي .. عُذراً مولاي
➖➖➖

شما نويت اعله گربك تعت بيدي الذنوب
وقارب ذنوبي ياخذني عن بابك بَعـيد
هيه غلطه وهجرتك لجَن هسه صَحيت
ورايد امراضة گلبك واجي تسامحني اريد

هيّه غلطة عمري هاي
من مشيت ابمشتهاي
وما شرِت گلبك وشوري الضّيعاني
چنت يمك عندي شان
وجاه عندي وكلشي چان
ورخّصت روحي بعشگ دنيا امداني


بذنوبي ذنّـي .. خايف اتْهدني .. من ايدك واضيع
مولاي اريدك ..   ربيني بيدك .. واحسبني رضيع

➖➖➖
يمته آخر عَفو احجيها من گلب ولسان
ويمته يا دمعة منها و اتوبن يا حُسين
بكلبك اتلمني مولاي واطشر روحي دوم
مو حنين انا  وانت عَلي دومك حِنين

هواي گتلك راح اتوب
وما نشَفت  من الذنوب
شما ردت تبنيني اهدّم بيدي روحي
عمر خلّـصته اعتذار
يمته احس بالأنكسار
شما الك انوي اعتدل يعْـوَج طموحي

مو حلوه مني .. لو گلبي خَذني .. وما ردني ليك
كافيني اهجرك .. خايف اخسرك.. واتحسر عليك

➖➖➖
بلغة ندمان اجي احچيلك بواهس رضاك
هذا ذنبي وعلى الله بقت روحي وعليك
منين ما باوع لروحي غلطان  انا اشوف
وهل اجيت ارد اعمّر حياتي آنا اعله اديك


من مَقالب روحي راح
بفَي حنانك  أستـراح
حالي من حال الحمَام اليَم ضريحك
وثوب هجراني الطويل
راح  انزعــه وما أعيـل
وگلبي اگرصه و راح اعلمه ما يجرحك

سامحني مَرّه .. وما راح اكسره .. گلبك يا حُسين
عينك عليه .. يابو رقيه .. وادريبك حِنين

➖➖➖
ولْدي واموالي مولاي سند بس ما يدوم
وانا أحوج إلك منهم بهذا الوجــود
بعالم الدّنيا والموت بدونك انا اضيع
كلشي فاني ورحمتك فلا إلها حِـدود

مالي واهلي والبيوت
مالهم دور من اموت
انت بس انت الـذِي ما تنطي ظهرك
ومن يدفنوني ابْـتراب
وعني تتخلّه الاحباب
هنا اخاف ومالي يابو سكينه غيرك

ماعندي ناصر ..يوگفلي باچر.. بلگبر من افوت
رايد وكفتك .. انا ورحمتك..  يحسين من اموت

➖➖➖

حيدر عبدالله السعيدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

عندما وقع الحسين عليه السلام واهل بيته واصحابه اخُذت العائلة الى الاسر وقُيدت بالحبال واركبوهم على النوق الهزيلة ومروا بهم على مصارع الشهداء ولم يسمحوا لهم بتوديع امواتهم وكأني بالنساء تقول


هزلة النوك جابوها لسبينا
وبحبال اليسر شدوها ادينا
بچينا ولا سمع واحد بچينا
ها يهل المروة اتلوعينا
================

السيدة زينب عليها السلام
=================
ما ترهم نروح وما نمركم
نتوادع اخير وداع منكم
على التربان خلينا جثثكم
لبعيد الدرب ماشين عنكم
==================
تسلم من على الناگة العقيلة
ومن دم الدمع عالخد تسيلة
شلون وداعكم فوكَ الهزيلة
نريد انروح والرحلة طويلة
=================
يالحادي اريد اشتم الاخوان
مشتاگة ودليلي اليوم لهفان
عليهم بالگلب ملتهبة نيران
امن ابعيد السلام اشلون يحنان
====================
نريد انروح ها يهل المحنة
شلون وداعنة وياكم يهلنة
الرايحلة عزيز ايزود ونة
فوكَ الگاع ناموا كل اهلنة
===================

ام علي الاكبر
=============
اعله هونك يالحديت النوكَ بية
عزيز الروح ضل فوكَ الوطية
ريضلي ارد اودعنة الشفية
يريت وياه تاخذني المنية
==================
اريد اشتم اهدومة شوية مالك
واگلة ها ييمة اشلون حالك
نوم الگاع يا يمة حلالك
چتالك يطگني وما مشالك
==================
هذاك ابني يضالم خل اودعة
عنكم يشتمر گلبي يشلعة
وينك يا علينا انريد فزعة
شملنا وي اهالينة تجمعة
==================

ام القاسم
==============
يا بعد الگلب يا شوف العيون
اودعنك اريد ومدري اشلون
تكتل فرگتة اوليد الزغيرون
يجاسم حاچي اخوتك ماتگعدون
====================
على النوكَ واسلم والله حيرة
اروح بعيد وابني بغير ديرة
محنية الضهر امك چبيرة
مچتوفة بحبل وامشي يسيرة
====================
على وجهي يبس دمك يغالي
وحال الضيم من فرگاك حالي
يطول وداعنا ظنيت تالي
على الناگة اودعك مو ابالي
===================

ام عبدالله الرضيع
================
زغير ابني وفلا يعرف اذية
شني ذنبة انذبح بالغاضرية
اتمنى احطة ابين ادية
واشمنة واشربنة امية
=================
احطنة اعله صدري مرة وحدة
واشمن بيه چن شمت الوردة
مثل ماي ابرمل ابني وتبدة
ييمة وداعك ابهاليوم شدة
=================
اخاف اعليك يبني من الهوة الهاب
ترف بعدك زغير وحار التراب
يعبدالله دليلي من الحزن ذاب
صوبني الغياب ابگلبي صواب
====================

أسالكم الدعاء رائد الاسدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

عنوان القصيده
شتياق مولاتي رقيه ع

جيت يا بويه اخبرك جفّي بالنار انجوه
ومن كثر حسرات كلبي كمت اغصّن بالهوه
...................................................................
جيت ادورنّك يبويـــه والدهــــر مــا خلّه حيل
امشي ويعثرني خوفي ظلمــــه يا دنيانـــه ليل
اخيام يتلاهب جمرهــه وصوره مـا الهه مثيل
شلون اصبر وانه طفله وبعده ما راوي الدليل
بعده كلبي زغير بعده وعالمصايب ماروه
................................................................
كمت اركض ليك احشمك والمنادي نـاده وين
انتي بت من ها يطفله عالرمـح راس الحسين
كلبي سبكاني بخطوتي وشال من عيوني عين
ما اصدّك من حجولي وشفت مصيوب الجبين
والحجر من صاب راسك ريت صوبنه سوه
...............................................................
كمت اشهك من اجيتك كـــوّه اجرن بالنفس
دايره عليّـه الشماته وحزني بالروح انحبس
كلبي أنه بسن الطفوله وثوب اســود هالبس
صرت استاذة مصايب والدهر عندي درس
درسيته عله المصايب شبع مني ورتوه
......................................................................

جيت حسبالــــي احشمك تفزع تطفــــي الخيام
الكيت جسمك قطعه صاير من كثر شج السهام
من الزغر واصبح يتيمه لا اهل عنـدي وعمام
بويه بويه كمت اخاف شبح صــــارالي الظلام
يلي نورك من محمد عالبشر دومك ضوه
........................................................
الكيت جسمك مــــا عرفتك لأن نحرك منذبـــــح
كلت اغفه انه عله صدرك عسه وما يطلع صبح
ولني اسمع صوت ناده وزاد لجروحـــي جرح
اجــــه وكبالك ضربنــــي ونبّت بجسمك رمــح
جان ظنّي من اشوفك الكه الجروحك دوه
.............................................................
عفت عمتي آنه العقيله حايره بلـــمّ العيـال
كلهه فرّت من خيمها وانسلب منهـا الدلال
اتصيح كامت للكفلهـــــه هنـا يكافلنه تعال
شلون تقبلهه حميتك عالحرم تنظر رجال
خدري يمّك امّنيته وراح من طاح اللّوه
.............................................................
خادم الحسين ع
فلاح طالب الماجدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

شوصف الشام من طبينه لشام
ضحك عدهم واحنه ندگ عله الهام
وين نبات واحنه بدون الخيام الخيام
:::::
ندري اليسافر نعرفه امتاعه وياه يحمله
راح من يوصل تشوفه هواي تفرح بي هله
واضحه معروفه كلش هاي حال المسأله
شگد بله ذبت علينه من دخلنه لكربله

ستر الله وطلع ظل يمشي بالسوگ
حلوگ الشام ما تنسد الحلوگ
لاگتنه بهلاهل تدگ دمام
:::::
الضيف من يوصل معزب تخدمه ندري اهل الكرم
الشام چان الكرم ماله بالسياط اعله الحرم
واحنه من عمتي لطفلنه كلها تبچي وتجري دم
وشيخنه اعله الرمح راسه وعينه مطفيه بسهم

هاي اوضاعنا واحنه اعله همنه
ترسنه الگاع گد ما يجري دمنه
جدنه الثبتاها اركان الاسلام
:::::
جربو كلشي بجسمنه سياط وارماح ونبل
اخ من تعذيب اديهم مات النه اچم طفل
ما تميز من تباوع ياهو ميت لو عدل
الشام طول وعرض كله ابد ما بي شي سهل

ارماح اسهام كلها التمت سيوف
لما طگانه ظل يباوع يشوف
طبينه وشفتها نرفعت اعلام
:::::
تعبت امتون العلينه بعد ما تحمل ضرب
وهاي بس اطفال رضع وينها وين الحرب
حيل ما بينه ومشينه واحنه ما نندل درب
الستر مچتوف يمشي دخل للسوگ بغصب

تلم بينه العقيله وتهمل العين
صح تعبانه بس اطفال الحسين
تاليها الشمر ظل يمشي گدام
:::::
وگفو عمتي العقيله بمجلس ايزيد اللعين
ولهضم عمتي بدمعها يضرب براس الحسين
همه مبتسمين كلهم واحنه بصياح اونين
ليش هيچ يصير بينه واحنه حبل الله المتين

بيده الخيزرانه ويضرب الرأس
عمتي تصيح تقبل هيچ عباس
اليوم الستر واگف نص الازلام
:::::
علي جبار الكعبي
الفاتحه لوالدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

يا مَن تحَبُ التائبينا يديكا

عبداً كما سمتني امّي إليكا


حسيناً .. وا حُسيناه

————-

بساحة حرب ذنبي ورعدن اعضاي

و اسود وجه گلبي وماله كل راي

يگلبي الحب الاعمه يقوي الاگلوب

الحر اعيون امامة النسته الماي


ياگلبي توب .. حدد مكانك بين الاثنين

ياگلبي توب .. بين الضياع وبين الاحسين


طاحَ اختياري يا حسينٌ عليكا

لو مزقّو القلبَ محالٌ يفيكا

عبداً كما سمتني امي اليكا

——————

اجيتك راجل ووجهي على الگاع

سفينة وريح ذنبي اتشگ الاشراع

يراعي الروح وانت اعليها مسؤول

وقَدْ قالَ محمّد ( كُلكُمْ راع )


انته الحنين .. شلذاته واحد يمك ايذِل

انته الحنين .. بمدرسة حُبك جيت اسجل


خادِمكُم لو ذلَّ يَعْلُو مَليكا

وصلاً فزدني هاكَ حبلاً سميكا

عبداً كَما سمّتني امّي إليكا

————————-

سجين امكَبَّل وتقصيري الاسياج

اجيت برجلي يمك حُكُم محتاج

يقاضي اعيوني احكم ذنبي باعدام

وطلّع دمعتي اعله مصابك افراج


قصرك امان .. وبقصرك ارضه اشتغل عامل

قصرك امان … لو بس دمع يوميتي قابل


ألدمعُ اموالي وحُزني شَريكا

أرضيني عبداً وموالي أبيكا

عبداً كَما سمّتني امّي إليكا

—————-

اليحبك موت تلگه عيونه حمرة

وتلگه براس گلبه اثنعش طبرة

يصياد التريده اتجيبه يحسين

من حلگ الذنب بيدك تجرة


تايب اجيت .. انه التعاند ويه روحة

تايب اجيت .. شمحلاچ يالتوبة النصوحة


لا يُظْلَمُ عبدٌ مُطارد لديكا

دمعي على خدّيَّ يمشي وشيكا

عبداً كَما سمّتني امّي إليكا

————————-

اجيت اشرب امان و اعطش الناس

اروح اعليك وارجع مثل الانفاس

اذنوبي اتشبگ الرجلين يحسين

بس اتجيبني راية العباس


لو ما ازور … مثل الصخر هذا الهوه يصير

لو ما ازور .. اختنگ مثل الطايح ببير


دَع روحي بعضَ الاشتياقِ تُريكا

يا قوةَ اللهِ فقلبي ركيكا

عبداً كما سَمّتني امي إليكا

———————-

علي هادي الخزعلي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

(لحن خليجي ) بعد العاشر من محرم


     
      شكراً خلصت العشره
        گالت فاطمه الزهره
      كـلمـن شـارك اولادي
      باچر حيدر ايحـضره
              :::::::::::::::::::::::    
ماجور اليشاركني ويشيل الهم
جـزاه الله خير اليوگف ابماتم
اليطبخ واليصب الماي ومحزم
واليلطم علينه وصدره ينزف دم       
     كل واحد بچه اعله ابني
             يوم الشده يطلبني
                   باچر أمه يحسبني
         كل واحد نذر عمره
          :::::::::::::::::::::::::
كل خادم يهل ادموعه وي زينب
حيله امن الحسن وحسين مايتعب
خدمتكم عليهه الناس تتعجب
يطلع من وسطها النار لو تلهب
اجيه ابليلت الجمعه
    من خده امسح الدمعه
             وصيرن بالقبر شمـعه
    اشيل الضلمه من قبره
           ::::::::::::::::::::::::::::
الينصب چادر اعله حسين مايخسر
يزود الخير عنده وموكبه يكبر
ندعيله الجليل ايحرسه من كل شر
هـذا الـمـايهـم بـيه البرد والحر
كل خادم نسجل أسمه
     تجيه من العرش نعمه
          حبيب الحيدر يقدمه
     وياه كل وقت يبره
             ::::::::::::::::::::::::::::::
شكراً شيعتي يامن جزيتو الحد
خدمتكم أبكـل عاشور تجـدد
علئ زينب وخوها لابسين اسود
جمرتهم تضل للموت ماتبرد

جمرتهم تضل تسعر
   شيعتنه اعله ابوالاكبر
           الصادق گالهه وكرر
    لفضها امرار مو مره
         :::::::::::::::::::::::::::::
ياخـدام مـا ينساكـم المـرسل
نشفعلك يمن تبچي علئ المقتل
خدمتكم ابيوم الحشر تتسجل
الخـادم بالقيامه يصبح امـدلل
نساء ورجال نكتبهم
      ننفذ كل مطالبهم
           الله لا يعـذبـهـم
حبيبه المصطفئ يقدره
               :::::::::::::::::::::::::::
فاخر علي الشبيبي

(( صباح العافية يا والدي المذبوح ))
عليك الليل كظيته بواجي ونوح
لا تسالني اشلوني
عليك ابيضت اعيوني
ياوالدي المذبوح
**************
من اعتنيت… المصرعك ... ذيج المسية وشفتك امدمة
مابطلت … عيني البجي … اعليك ابسوادة ليلة الظلمة
بعيوني الك… ظلت صور … تكسر الخاطر بيها جم لجمة
نزف النحر… كسر الظهر… وجروحك الفوكاك ملتمة…

غير الف وتسعميت اجروج البيك
شافت عيني واحجار الذي مغطيك
الصاير بيك شوفوني
عليك ابضيت اعيوني
…… .

ليلة امس… ماتنوصف… امن اصعب الليالي المرت اعلية
ما غمضت ... عيني الجفن ... من البجي ما ظل نفس بية
اتخيلك… كل ساعة انه… من جنت تاخذ بيدك أيدية
واعله الصدر… لمن جنت… اتنومني يابويهه ابحنية

عليك اهواي حسدوني ابزمان الفات
هسة ادموعي تجري وتضحك الشمات
شكلك حيل هضموني
عليك ابيضت اعيوني

…… .
طر الفجر… وانا انتظر… جيتك يروحي واغلة من روحي
كل ساعه اكول…انه بحلم…ما مات ابوي الماتت اجروحي
ما حسبّت… تبعد علي… وتتركني وي احزاني اونوحي
اه اشعمل… بية الزمن… مني خذاك وهدم اصروحي

ريت اوياك اخذني والدي ياريت
شلّي ابعمري بعدك يا ملاك البيت
ريت اوياك ذبحوني
عليك ابيضت اعيوني

……
يا والدي … فوك الترب … وسفة تنام وتنسبي اعيالك
انت اصفة من…ماي العذب… ياترف حيل اشكطع اوصالك
ما رحمو… ابحالك عجب … لا واحد المنهم بجة الحالك
يا اشبه… ابطاها النبي ... ليش الملك جبريل ماشالك

المثلك عل الارض ما يبقى ساعة ويوم
تشيلة املاك ربنه للسماء معلوم
هيجي احبابي فهموني
عليك ابيضت اعيوني
…… .
متغيرة… ارسومك علي… ماجنك انت والدي الغالي
جم حافر… الخيل العدة… فوك سحك يا صاحب امالي
ثغرك يصب… ليش الدمة… جاوبني بوية وارحم بحالي
بية بعد… ماظل صبر ... متوجر ابنيران دلالي

ليش الخيل هيجي امغيّرة ارسومك
ومن كثر الرفس متشككة اهدومك
عليك اهواي بجوني
… ..
من الخيم… جيتك ركض… مشتاكة حيل الشوفت اعيونك
متعودة شوفك ...كل وكت... اشلونج تكلي واسأل اشلونك
عطشان اعرفك… من امس … مالاح ثغرك ماي واسنونك
جيت وجبت … ماي العذب… اكعد اتّروه يالذبل لونك

اجيت وجبته الك ماي العذب يحسين
اكعد روي جبدك وافتح العينين
اكعد خابت اضنوني
عليك ابيضت اعيوني
……
الحمدالله رب العالمين
اللهم صل على محمد وال محمد
موسى الخادم…

يحسين اودعك من على الناكه ... غصبأ عـــلية بدمعة حراكه
ريتك انه كبلك خوية ذبحوني
ودعتك الله يا ضوة عيوني
… ..
جرحك… جرحي… نفس الوجع واللوعة والحركة
دمك… دمي… هذا اليسيل امتنالي للملكة
روحك… روحـي… متشباكات ايرفضن الفركة
جسمك .. جسمي… الصعدت عليه الخيل وتسحكة

سهم الي صابك خوية صاباني ... يابس اللسانك يابس اللساني
مثلك يخوية الماي حرموني
ودعتك الله ياضوه اعيوني
… ..
خوية ..اوداعك… يكسرلي مو بس خاطري وظهري
كلشي… البية… ينكسر لجلك يغلى من عمري
دونك… انه… اكظي العمر وي دمعتي التجري
شذكر .. شنسة… منك يزارع طيبك بصدري

عايش يخي ما صدك بموتك ... اشلون انت ميت واستمع صوتك
عنك غصب يحسين بعدوني
ودعتك الله ياضوه اعيوني
……
ميته… كبلك… خوية عساني وخلصت ايامي
غالي ..اعلية… اشلون اصبر انظر منحرك دامي
شوفي… الحالك .. نسّاني حالي وجرحي والامي
بعدك… شلي ... بيهة انه روحي يالمتت ظامي

شلي بحياتي وعمري وسني ... حزني الغيابك دم يبجيني
يالجنت اشوفك سلوتي وعوني
ودعتك الله ياضوه اعيوني
… .
ليلي… انهاري … بعدك يخوية ما اميزنّه
ظلمة…وحشة… كلشي ابوداعك صرت اشوفنه
يقهر ..حالي… اخلافك غريبة يا هـوه الجنه
دمعة…عيني…ما نشفت وما بطلّت حنه

جم صورة الك ما فاركت بالي ... يالمنذبح من الكفة اكبالي
ياخوية بيك اعداي فجعوني
ودعتك الله ياضوه اعيوني
……

سامع…صوتي… يالبية عايف كل جرح يدي
عاين .. خوية.. كثرة دموعي الجرحت خدي
حاشا… امروتك… تقبل اروح اوية العدة الوحدي
نوحي… الفكدك…ما ينتهي حد نزلتي اللحدي

مجلس عزائك دايم ابروحي ... ما ينتهي وما ينكطع نوحي
حد ما وسط لحدي ينزلوني
ودعتك الله ياضوه اعيوني
……
ابكسرت…خاطر…راح امشي عنك خوية مسبية
ظهري…محني…العظم المصيبة الطاحت اعلية
امودع … بالـله … لبيك الف طعنة وتسعمية
مبري..الذمة... يل وي الاهك صادق النية

ما قصرت ويانه بالمرة ... يالطيبتك من فاطمة الزهرة
الوادم عليك اهواي حسدوني
ودعتك الله ياضوه اعيوني
… ..

انه .. وانت … بينة الزمان اشخلة ما سوه
شوفت… عينك… جمّع علينه اليسوه ما يسوه
بعدك … دهري … شداني بحبال اليسر كوه
شحجي… ويلي … ماتت اوياك الغيرة والنخوة

بعدك يخوية ماتت الغيرة ... ياهو الاحشمة طايحة ابحيرة
ابكثر الشماته الحاطت اضعوني
ودعتك الله ياضوه اعيوني

……



الحمد الله رب العالمين
اللهم صل على محمد وال محمد
موسى الخادم

يعباس .. زينب لليسر طلعت .. يعباس
محنية ظهـــر ومشيبة الراس
ما ظل عدهة كافل ها ينوماس
************
زينب على النوك الهزل .. ركبت يبو المراجل
مجتوفة بحبال اليســر .. دمــع الهضم تسايــل
كل ساعة يهضمهة الشمر .. ميت يكلهه الكافل
لوعة بالسوط أشكثر .. ترضاهة يا بو فاضل

ألمتون .. زركة امن الضرب صارت .. ألمتون
ريتك حاضر اتشاهد بالعيون
بحبال اليسر زينب يجـــرون
*********
متحيرة ظـــلت بت علي… بل العايلة وسبيهة
جم طفلة ظلت جم طفل… تسحك الخيول اعليهة
بنار الخيام اتحرّكت … ام الخـدر رجليهة
لا بيهة تركض تلجم … لا كافل اليجيهة

بالخيام .. زينب كعدت أطفي .. بالخيام
ومن تحت الحوافر تسحب أيتام
كوه اجّر نفسهه مـن اللالام
…… ..
الحرة ما بين الجثث… مشوهة جيش امية
واتخيل انت الي حصل…لختك يبو الحمية
جم غالي ابغالي انظرت .. متوسد الوطية
جم منحر ابجف منكطع.. جم راية هاشمية

بلا روح… زينب وكفت أكبالك .. بلا روح
محنية ظهر لمصابك أتنوح
شافت سهم عينك نازف أجروح
******
زينب يحماي الخدر .. ليك النظر تديرة
مكسور خاطرهة اطلعت … بت فاطمة الاميرة
عكب الدلال البي زهت… بين الغرب أسيرة
ما الهة مهرب يا كمر… والغاضرية أجبيرة

تفر وين .. جيش امحزم اعليهة.. تفر وين
وبركبتهه خله ايتامة الحســـين
ما ظل عدهة شوف ابيضت العين

… ..

حرمة وغريبة ابلا اهل .. ظلت يمـن كفلهه
جارت عليه كربلة…اوسوط الشمر وصلهه
لا انت لا سبط النبي .. يحضرها يفزعـلهه
ما عدهة ظل غير الصبر…هو البقة امن اهلهه

بلا أخوان ..زينب كظت العاشر…بلا أخوان
تمشي واياهة تمشي غيمة أحزان
كل هذا وتصيح الربي قربان
……
اختك يعباس الفحل … مشوهة بالشــتايم
بكثر الشماته امحوطة… والناصبي واللايم
سمعوهة ياكافل حجي… ما ينحجي اعلى فاطم
بمحنتهة هاذي رادت .. يل عل الشريعة نايم

مسبّات .. زينب سمعوهة أشكد… مسبّات
من غير السبي وحرك العبايات
عليهة ناحت املاك السماوات
… ..
الحمد الله رب العالمين
اللهم صل على محمد وال محمد
موسى الخادم

ثار حسين ابـو الــيمة
عايش بينة مثل أسمة
مــا ننساه وحــك دمة
.. وحك الطاهرة امه
*********
يعيش اويانه ثار حسين .... لحد ما نكـــطع الانفـاس
عليه ما تنشف الدمعات ... مصابة شيبـــنة الـراس
ما ننساه وحـــك اجفوف ... امير المرجـــــلة العباس

يظل طول العمر بينة
ثار الغــالي والــــينة
قسم بالصوبو عــينة
عباس الرخص دمة
**********************
كل عـام اليـمر بينة ... نحي امصيبة المظلوم
وحك الطاهر الزهرة ... ما ننسه مصابه ابيوم
عهــد خطينة بدمانة ... مجالسنة تظل للــدوم
نحييهة بمـــدامــعنة
ويحسين بضاميرنة
ما نتــــرك شعايرنة
وحك حسين ابو اليمة
**********************
فرض مثل الصلاه واجب ... عدنة حب أبو الاكبر
على نهجة نظل انسير ... يشهد خـــالق الكوثر
دنية واخرة اويحسين ... ما يمنعنة كــوم الشر

لجل عينة نضحي انحور
عمرنة الحضرته منذور
نعديد ابكل زمن عاشور
رددناهــــة هالجـــــلمة
************************

نظـل خــدام ابـــو اليمة ... لحــد شيلتنة بالتابوت
ما نترك خدمتة ابيوم ... وحك السكن بطن الحوت
بضمايرنة يعيش حسين ... منعوفــــة لحـد الموت

هذي صيحت الخدام
لجلة انضحي بالايام
وللخدمة نشد احزام
يا محلاهة هالخدمة
**************************
…… .
نتعنة الضريح حسين ... ما يمنعنة كــل ظالم
لجلة نرخص الارواح ... يستاهل شبل فاطم
يظل دايم عزانة اعليه ... لحد ما يظهر القائم

وقعنة بدمـــة المـــنحر
عـــزانة يــبقى للمحشر
على حسين البقى بالحر
نجري المدمع بهمة



الحمد الله رب العالمين
اللهم صل على محمد وال محمد
موسى الخادم

عشگ الولاء........يافاطمه
 نحيي العزاء........يافاطمه
*******************************
 للرسول   واله
صوته ظل يتعاله
...........خادمج يتفاخر
والله الف هنياله
............
والدموع ابعينه
بالعزه.......تلگينه
 .......... هذا بشر الناعي
لو نعه عله حسينه
.......
سجلت وياكم
سادتي بحماكم
..........چنهه فاطم گالت
والله ما انساكم

هذا البكاء.........يافاطمه
نحيي العزاء.........يافاطمه
*******************************
گلبي  يمكم  ناده
 يعتني عله مراده
...........صدري بيكم يشفه
حرزي من الساده
............
هايم   امخليته 
بالعشگ تربيته
..........كل حرف تسبيحه
فاطمه لطميته
...............
والطم  يحلالي
ظل يعيش بالي
.......بالمجالس  ذخري
والدمع للغالي
......
يعلى النداء..........يافاطمه
نحيي العزاء.........يافاطمه
*******************************
يا حلات الخدمه
شفنه اكبر نعمه
.............بيها سر العاشگ
رحمة الله بأسمه
..........
صدري لو دگيته
ما احس وفيته
.........وآنه صرت الخادم
عالخلگ حبيته
...............
خدمتي ونوماسي
بيها عشگ انفاسي
..........بالمجالس تدري
الله  رافع   راسي
..........
عمري فداء............يافاطمه
 نحيي العزاء...........يافاطمه
*******************************
فاز  من   والاها
يخسر   العاداها
.......... فاطمه تسبيحي
كل فرض اقراها
...........
والله يابت طه
خدمتج محلاها
.........والسفينه ننشاهد
فاطمه مرساها
........
تنجه بس الشيعه
بصمت اعله البيعه
............نهتف انواليها
حيدري توقيعه

عشك السماء ........يافاطمه
نحيي العزاء............يافاطمه
*******************************
اي  وحگ العاشر
ما نسيت الحافر
.......يمشي فوك اظلوعي
يا ملاذ الحاير
...........
هيه رفعت راسي
 اشعر ابحساسي
............والجنون ابديهه
بالعشگ عباسي
............
عدنه جون وعابس
 بالمجالس   فارس
...........بالخدامه انشاهد
كلها گام اتنافس

من كربلاء...........يافاطمه
نحيي العزاء..........يافاطمه
*******************************
تمت بعون الله تعالى
الشاعر..... يوسف الفتلاوي