زوار الحسين
من المحافضات الذين ينطلقون
من منطقة الفاو
البصره تتشرف بتراب اقدامكم بل بتراب مداساتكم
وخدمتكم ملاذنا وحصنا وسورنا
انا اقل خادم من البصره
سأكون طيلة ايام المسير
واقف ع رحمة طريقكم
وسابل كفيني لذرات شجونكم
مستجدي عطفكم
ف اسئلكم
بحبكم وعشقكم
اجعلو لي نصيب بتقبيل غباركم
مودتي لكم
#عبدها

(( #تباً #تباً ))
……………………………………………………………

تباً تباً  .  للقائلِ زينبَ قد ضعُفت
تباً تباً  . من يروي بالطفِ ارتعبت
بنتُ الكرار .. سيفُ الفقار
بالكوفةِ والشامِ أنتصَرت

……………………………………………………………


يا كاتب لا تظلم بختك . اكتبت بنصاف او وجدان
هي احجاب امفصله الباري . منها انسترت هالنسوان

بس الشكل هيئة مره . هي ابأصل حوريه
گَل للخدر كن فيكن . و انخلقت العلويه
جبريل من نور العرش . الزينب صنع بوشيه

قالَت هاجر . فأنا ومعي ساره و مريم
قالَت هاجر . من زينبَ سترٌ نتعلم
اختُ الاطهار .. سيفُ الفقار
بالكوفةِ والشامِ أنتصرت

……………………………………………………………


الدين استهظم و اصبح شارد . لمن رفعوا راس حسين
وركضت زينب حتى تحلگه . او رد شامخ وياها الدين

لو رايده اتعوف الركض . اتأشر فقط بصبعها
اسليمان لبساطه إيأمر . لم عون روح ارفعها
عصّاة موسى ويمها اجت . بس رفضت اطلعها

جيشٌ يغرق . لو ترفعُ سبابةَ كفِ
جيشٌ يغرق . في بحرِ رمالٍ في الطفِ
شمرٌ يحتار .. سيفُ الفقار
بالكوفةِ و الشامِ أنتصرت

……………………………………………………………


شنو السوط ايخوف زينب . شنهو النار وشنهو الخيل
قوه ومو چفين العدها . جنحين المن جبرائيل

نار المخيم تعتبر  . لاشيء هيه الزينب
ابطارف عبايتها سقر . تُخمد بعد ما تلهب
لبوه وبكت خيل الشمر . يمها وابد ما تگرب

عينُ السوطِ . تنظرُ رعُباً للحوارءِ
عينُ السوطِ . فترى جبلاً علوَ سماءِ
يسطعُ انوار .. سيفٌ فقار
بالكوفةِ والشامِ أنتصرت

……………………………………………………………


قبلت بالحبل ايچتفّها . تعرف بالرب هيجي يريد
عدها املاك ولو تأمرهم . امشبگ ويجيبونه ايزيد

حمره عبايتها اصبحت . موش ابشمس من گلبت
بيها انرسم روح النبي . وبالسبي اعليهم غضبت
مو عالهزل صعدت تره . عالغيمه زينب ركبت

كلُّ الحورِ . تمشي مع زينب تحرسُها
كلُّ الحورِ . في الليلِ بهمسِ تؤنسُها
تفرشُ ازهار .. سيفُ الفقار
بالكوفةِ والشامِ أنتصرت

……………………………………………………………


خطبت بالكوفه ابكل هيبه . وسكتت اجراس وانفاس
احچايات ام عون ايخوفنهم . چنهن ريشات العباس

نهج البلاغه اتكلّمت . وشيّاب گامت تسأل
هالصوت كلش نعرفه . حيدر رجع من اول ؟
اومت وكل شي انخرس . بعيونهم رمش انشل

حتى الطيرِ . لم تقدِر خفقَ الجنحينِ
حتى الطيرِ . تهتفُ تحيا أختُ حسينِ
صوتُ الجبار ..  سيفُ الفقار
في الكوفةِ و الشامِ أنتصرت

……………………………………………………………


اتراب الشام ايزيد امنجسه . واتطهر بجدام ام عون
وظل يدعي الله ايگله اريدن  . گبر الزينب عندي ايكون

يرمون زينب بالحجر . بس ماكو عدهم فكره
كل حجر رأساً ينكسر . من ينرمي اعل الصخره
بالسوگ مو بعبايه بس . ابثوب العرش منستره

قصرُ الطاغي . قد دخلَت ترفعُ بالانفِ
قصرُ الطاغي . في عينيها مثلُ الكهفَ
ويزيدُ إنهار .. سيفُ الفقار
في الكوفةِ و الشامِ انتصرت

……………………………………………………………
✍️ ( سيد خضر الزاملي )
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

(قصيدة المشايه)

يابوعلي ،،،، يابوعلي
       انته الولي

حتئ المـعـوُق مشاي
عطشان ويثوب ماي
ويگول فدوه المولاي
               """"""""""''""""'"'"1'"''''''"''""''''''''''''''
شافت اعيوني ابهلدرب شياب مابيهم حيل
گالو طريقك موصعب مشيتهم احله امن الخيل
زوارك ابكـثر النجـم مـن يضهـر ابتالي الليل
بيهم عطر مـاينوصف لـوشمه يرتـاح الهيل
من عدهم يفوح الياس
ريحت ضريح العباس
لوشمـه يرتاح الـراس

يابوعلي ،،،، يابوعلي
                  """'""''"''''''"'''''''"''"2''''''''''''""''"'""""
راياتهم تطلع ترف كلهه الزلم والنسوان
من السعوديه اومصر والهند وفغانستان
بحرين وكويت وقطر والطالعين أمن ايران
  زاد أومنام ابكل وقت مايضل واحد جوعان
شفت الدول كلهه أوياك
رغم البُعد تتعناك
تلزم ضريحك تنخاك
يابوعلي ،،،،يابوعلي
             """""""""""""""""""3"'''''''"''""'"""""""
شفت الضرير ابرايته متعني ويريد ايزور
رغم الشمس رغم التعب من وجهه يتناثر نور
كل العشاير غربت والسلف مابيه ناطور
خير المواكب من يصب يشبه الماي الناعور
يحسين كل هذا الخير
عييش ابنادم والطير
منـك ولا مـن الـغيـر

يابوعلي ،،،، يابوعلي
                   """"'"""""""""""4"""""""""""'"""""
من يطلب الزاير ذهب يلگاه ابدربك موجود
تتوشح الگاع ابحزن من كثر رايات السود
نصبو مواكب بالدرب حتئ الرزقهم محدود
شفت ألّي  ماعدهم بزر ندبوه اوجاهم مولود
غير انت ابن داحي الباب
تحسب الزوار احساب
كلـمـن يندبك ماخـاب

يابوعلي ،،، يابوعلي """"""""""""""""""""""5"""""""""""""'''''""""
وكت الضهر جوه الشمس شفت الطفال أيعزبون
وسمع كلام امن الاهل فدوه الرقيه يگولون
مجنونه كل هاي الخلگ مو فرد عابس مجنون
لوطلعو ابهذا الدرب برواحهم مايدرون
لـو صبو ابـدربك نار
كل سنه اتزود الزوار
كلهم يصيحون الثار

يابوعلي ،،، يابوعلي
                    """"""""""""""""''6'''''''''''''''''""""""""''''
✍️فاخر علي الشبيبي
#جديد_محرم_الحرام_
@HxzEU1
#قناه_نشر_القصائد_المنبريه 
#الناشر_مصطفى_المياحي

واه حسيناه واه حسيناه واه حسيناه
ــــــــــــــــــ
طاح العشگ من الفرس طيحة مطر
من انگلب سرجة انگلب كل الدهر
والراية والجف طاحن بسد النهر
من طاح ابو الفضل لزم بيده الظهر

واه حسيناه واه حسيناه واه حسيناه
ــــــــــــــــــ
كل الأرض من النزف فاضت دمه
ومطرت دماء اعله الأرض كل السمة
نزلت تدور جسم ابنها فاطمة
ما ينعرف من السهام المؤلمة

واه حسيناه واه حسيناه واه حسيناه
ــــــــــــــــــ
مامر على سنين الدهر كل معظلة
تشبه مصيبة عاشر بطف كربله
هاي الظليمة الما مثلها بكل مله
وجه النبي فوگ الرمل جرحة امتله

واه حسيناه واه حسيناه واه حسيناه
ــــــــــــــــــ
بيبن النواويس وصحاري نينوى
أوصال ابو الأكبر رمل بيها وهوه
وشمس الظهر تشرب ملامح كل ضوه
وتكطع أصحابه على الغبرة سوة

واه حسيناه واه حسيناه واه حسيناه
ــــــــــــــــــ
مثل الخريف الي يمر ورگة بغصن
مر المحرم وگع ادموع الجفن
قرح جفون ال النبي بهذا الحزن
من ضلع ابو اليمة بحوافر ينطحن

واه حسيناه واه حسيناه واه حسيناه
ــــــــــــــــــ
لا زلتي كرباً وابتلاءاً على القلب
وشخلت بزينب ألم هاي الحرب
والله الحصل ياكربلة اصعب من صعب
صعدتي زينب على الهـزل طول الدرب

واه حسيناه واه حسيناه واه حسينا
ــــــــــــــــــ
ما ظلت اخيام وتفيي اعله الظعن
لا ظلت ازلام وتردهم للوطن
بس العليل القلب مفجوع بمحن
ضاع الدوه وضاع الحجي وشاخ الزمن

واه حسيناه واه حسيناه واه حسيناه
ــــــــــــــــــ
بعد المصايب والحزن مات الصبر
باجر ولا ينفع اعله الصاير عذر
من يظهر المهدي ويجي بجفة الامر
مثل انتصار الدم يعيد الطف نصر

واه حسيناه واه حسيناه واه حسيناه
ــــــــــــــــــ
الشاعر زين العابدين الشمري

بويه الغالي.. مذبوحه وتشكي المذبوح
رمحك عالي..واجفوفي اكصار ومالوح
يابوشفاف الذبلانات..ورم ضهري أمن الطكات
بويه الغالي
ــــــــــــــــــــــــــــــــــــــ
يبواليمه رقيه اني
زغيره وذبلت اغصاني
حر الهيمه سواني
زرع وامفارك الماي

تعبانه من طول الدرب.. والحادي ماعنده كلب
ابجي ولاهمه البجي..شلع امتوني أمن الضرب

يبن الزهره.. انزل مشتاقتلك حيل
آخر مره..شفتك بيهه ابنص الخيل

وآنه بعمر الفراشات ..ورم ضهري أمن الطكات
ــــــــــــــــــــــــــــــــــــــ
اباوع ماتباوعلي
اريدك بويه تنزلي
تطلع الشوك الابرجلي
وتمسح دمع الاعيون

محتاجه بويه الشبگتك.. وياك أخذني ابسفرتك
بعيونك آنه جاي احس.. عطشانه تطلع نظرتك

أمن اهد العاشر.. گالولي وماشارب ماي
ليش الحافر.. بايگ كل فرحه بدنياي
ياهنياله اوياك المات..ورم ضهري أمن الطكات
ــــــــــــــــــــــــــــــــــــــ
اخاف أمن الهوه ايجرحك
لو شيالك ايطيحك
للهامه وصل رمحك
جا شمسوي يحسين

مو گتلي راح انضل سوه..موچنه فراشه وضوه
صعدني يمك عالرمح.. يالشوفة اعيونك دوه

گلبي الهايم.. منك بس حنيه ايريد
مثل الصايم.. من ايتاني اهلال العيد
للجيه احسبلك لحظات..ورم ضهري أمن الطكات
ــــــــــــــــــــــــــــــــــــــ
اعله حظنك راسي عودته
حظنك هسه فارگته
ليل اليمر مانمته
بدونك كارهه النوم

يم الرمح مرات اجي.. بيديه اشبگه وانتجي
اغفه واشوفك بالحلم..بويه ويفززني البجي


يمك ابچي.. وماكتلي اشمالچ تبجين
شو ماتحچي.. شو ساكت صوتك يحسين
ساكت چاوين الچلمات..ورم ضهري أمن الطكات
ــــــــــــــــــــــــــــــــــــــ
اخيرا شفتك بنومي
تشم بريحة اهدومي
گلتلي للقصر  كومي
وهزي ابصوتج الشام

سمعوني بويه اهل القصر.. ابچي واريدك بس تمر
جابولي راسك منگطع..وأمن الطشت هب العطر

الله يساعد..عيسى اشلون إبلا اب جان
اگبالي الحاقد..يضرب ثغرك يالعطشان
وآنه اشكيلك بالدمعات..ورم ضهري أمن الطكات
ــــــــــــــــــــــــــــــــــــــ
يميت والطشت نعشك
اشحلاة الشيب الابرمشك
ملك وابداخلي عرشك
ملك وامسلب التاج

ايغارون منك يالابو..ايغارون منك جي حلو
عصفور ماجارح كبل.. بويه الجرح خدك منو

خل نتشابك.. وانحط انفاس اعله انفاس
مانتفارك.. مثل الرايه وجف عباس
خلص حيلي أمن العثرات..ورم ضهري أمن الطكات
بويه الغالي

محمد الجماسي

#اللهم_عجل_لوليك_الفرج
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

(ًعمه وينه)


عمه وينه      الحظنه دافي كلميني
عمه وينه     ليش ابويه  مايجيني

گلبي مشتاگ الحنانه  .. وانه ما اندل مكانه
       
          كلميني     ***       كلميني

*-------------------------*----------------------*

سولفيلي عمه وينه بيا  مكان
علماني بحظنه أغفه بكل أمان
چنت اشمه وگلبه ينبظ بالحنان
خيمه أليه وبوجوده جنه چان

راح أموتن        بالأماني يمته أشوفه
راح أموتن         بس حناني ما أعوفه
*-----------------------*----------------------*

تغفه عيني وصوره تحضر للحبيب
يمته أشوفه الفارگاني وكله طيب
بكل صباح اتنطريته  بكل  مغيب
عايش بروحي واحسه اشگد قريب

چن اشوفه         الغالي لحظه مانسيته
چن أشوفه         أگبالي هسه اتخيليته
*-----------------------*--------------------*

گلتي  سافر  واليسافر هم  يعود
وين أبويه ادموعي حفرن بالخدود
الفرگه مره ومضلم بعيني الوجود
صارت ايامي العشتهه بلحظه سود

صبري خلّص         عني غايب ما أجاني
صبري خلّص         يمته اشوفه الفارگاني
*----------------------*---------------------*

عمه زينب صبري خلّص انتضار
الدمعه تنزل بالنواضر چنهه نار
كمت أحس الليل  يشبه للنهار
مادريته ودهري بيه بسرعه دار

عمري شمعه            ونار  بُعده  ذبّلتهه
عمري شمعه          وهل مصايب عاشرتهه
*-------------------------*---------------------*

چني ريشه وجني فجئه العاتيات
أطشرن بيهه أمنياتي وحلمي مات
ذكره  ذكره  كمت  أعدن  ذكريات
وي أبويه أسنيني غابت والحياة

هذا حالي          وعمري دمعه ما أريده
هذا حالي          وصبره گلبي مايفيده
*----------------------*----------------------*

عمه كافي أتعذبيني بهل سكوت
كلشي سكته والدموع بلايه صوت
كلميني  من  سكوتچ  راح  اموت
يجرح  الريه  الهوه  لمن  يفوت

صعبه احسهه         التفارگ تبقه عدله
صعبه أحسهه       العنده غايب مايردله
*------------------------*--------------------*

✍ خادم الحسين// ع  //
الشاعر رعد الجريخي

((سورة اصحاب الكهف))


سُورَة أصـحـاب الـكـهـف راسـك تــلاهــه
ياحبيبي        
يــا حــســيــن

عـجّـبـيـت الــكــون والـعَـلـيـه وسـمـاهـه         
يــا حــبــيــبــي يــا حــســيــن

*          *          *

لـراسـك الـدامـي اخـتـلـف حـكـم الـسـمـه       
يــنــزف آيــات وســور مــو بــس دمـــه
عــجّــبـيــت أهــل الـكـهـف بـالـمـلـحـمـه        الــمــايــشــوفــك نـور بـعـيـونـه الـعـمــه

صـرخـتـك لـلـمـوت مـا يـخـمـد صـداهـه         
يــا حــبــيــبــي يــا حــســيــن

*          *          *

انــتــه بـــاء الـتـبـتـدي ابــكــل بـسـمـلـــه       
حــتــى عـالـراس الــرمـح راســك عـلــه
وانــذهــل يــحــســيـن عــقــل الـحـامـلــه       
مــن ســمــع يــقــره الــذِكــر ويــرتــلــه

يـا حـسـيـن الـســنــه دم نـحـرك حـيـاهــه         
يــا حــبــيــبــي يــا حــســيــن

*          *          *

داســـوا الــقـــرآن وي جــســمــك تــــره       
مــا دروا صــدرك صــدر ســيــد الــوره
اصــطــفــاه ربــنــه ابــقــدرتــه وطـهـره       
يــاهــو مــثــلــك آيـــه رَتـــل مــنــحــره

شــمــعــة الــثــوار انــتــه ومــقــتــداهــه         
يــا حــبــيــبــي يــا حــســيــن

*          *          *

جــســمــك شـلـون الاعــادي اتــســلــبـــه       
وانــتــه خـامـس نـور لاصـحـاب الـعـبـه
الـدنــيــا كــلـهــه ابـمـنـحـرك مـتـعـجّـبـه       
الـبـاري خـصه  وفـضّـلـه ابـهـالـمـنـقـبـه

مــن وريــدك كــربــلـه اتــروت ثــراهــه         
يــا حــبــيــبــي يــا حــســيــن

*          *          *

مــعــجـزة يــاســيــن انــتــه الـخـــالــــده       
هــامــت ابــحــبــك حــبــيــبــي الأفــئـده
عـمـري واعـمــار الـخــلـق لأسـمـك فـده       
حــزنــي مــن يـوم اعـرفـت يـومـك بــده

مـن يـهـل عـاشـور عـيـنـي يـهـل غـذاهـه         
يــا حــبــيــبــي يــا حــســيــن

*          *          *

كــالــوا إيــغــالــي عـلـي مـن حُـبـي إلـك       
مــــا دروا لـــولاك مــــا دار الــفـــلــــك
يــا أمــيــر ويــا مَــلــك مــثــلــك مـِـلـــك       
ربــنــه كـلـشـي انـطـاك والـعـافـك هـلـك

خـــدمـتـك جــن وإنــس بـيـهـه ايـتـبـاهــه         
يــا حــبــيــبــي يــا حــســيــن

*          *          ***

خـــادم الـحـسـيـن
✍الشاعر رعد الجريخي✍

محرررم 1447هـ ( وكأني بالزهراء لم تترك بنات الرسالة في تلك الخرابة )

ياخرابة اضيوفچ الليلة
سكنة زينب رمله وي ليلى
فاگدات املوعات . ضاميات امتربات . گالن اهنانه انبات
الليلة الليلة

ياخرابة تدرين . الجاياتچ امنين . من جرح إسمه حسين . من اهل عطشانين . من مخيم محروگ
من وطن كله اجروح . من اخو ضل مذبوح . من جسد مابي روح . بس دمه منه ايفوح . بالحوافر مسحوگ

منهو يتلگى بناتي ابيا هلا ابيا مرحبا
منهو يتلگى العليل وماي بلكي ايشربه
هذي زينب ياخرابة عاينيها امتربه
حتى شيلتها ابدماء حسين اخوها امخضبه

ياخرابة هَوني اعليهن
بردي گاعچ لاتچويهن
بالحبل مچتوفات . امن الجمر مختنگات . گالن اهنانه انبات
الليلة . الليلة
_____
وحدة فگدت خوان . وحدة فگدت رضعان . هذي فگدت عرسان . أحلى من الشبان . هايه فگدت أطفال
طفلة عافت مچتول . والد وشنهو اتگول . طفلة شافت لخيول . تسحگ وحيل اتجول . وتنظر اعله الچتال

عذبوهن عطشوهن نوموهن بالفله
وجيت وياهن سبية عالهزل من كربله
ياخرابة الزهرة آنه وجيت اشوف العايله
والكسرني بنتي زينب ياخرابة امدللـه

امدللاتي هذي حالتهن
عالهزيلة وتجري دمعتهن
امن المشي متعوبات . ابلا حمه وعطشانات . گالن اهنانه انبات
الليلة الليلة
_____
الگاعدة يم الباب . وثوبها كله اتراب . هذي فگدت أحباب . والكفلها ماجاب . ابجودة لطفاله الماي
لطمت اشگد عالراس . صاحت اشگد عباس . ركضت ابين الناس . عالذي ابخيل انداس . وصاحت حسين اهواي

هذي زينب ياخرابة بالچ اعليها ترى
عَطري اترابچ عليها حرمة هذي امخدره
واشكبرها بالخرابة اتنام من عدنه مره
هذي زينب بنت ابوها بت علي لمعتبره

هذا حال التفگد اخوتها
بالخرايب تالي نومتها
كل بناتي احنينات . امن الفگد مهضومات . گالن اهنانه انبات
الليلة . الليلة
_____
الشاعلة بس شمعات . وتبچي واتذب حسرات . اوحيدها القاسم مات . زفته بالدمعات . وصوتها اعليه مبحوح
الواگفة وتبچي ابعيد . فاگدة اهناك اوليد . لاكبر وچنه العيد . إلها مد بس الإيد . يم ابوه ظل مطروح

هذي رمله وهذي ليلى ياخرابة اتعذبن
اثنينهن فگدن ولدهن بالطفوف وشيبن
سوى ينزفون باچر زفة وحدة حسبن
گعدن اهنا بالخرابة والولدهن عاتبن

هذا حال الوالدة الفگدت
كسرت حسين الأخو انكسرت
عالولد ملچومات . فارگنه ابلحظات . گالن اهنانه انبات
الليلة الليلة
____
الطفلة هذي امن ايام . اعليها حرگوا لخيام . اتريد ابوها امن اتنام . اتشوفه بس بالأحلام . وتگعد اتصيح حسين
وهذي منتظرة اوعود . عمها يحظر بالجود . ودها للطف اتعود . اتگول بلكت موجود . وانظره طايح وين

هذي سكنة وي رقية اتلوعن من الزغر
طلعن امن الخيمة دورن عن الحسين الظهر
وحدة متعودة اعله ابوها تگعد ابحضنه او تسر
وحدة ليهسه ابأملها ماي عمها تنتظر

يتموهن منهو ظل عدهن
ابلايه عم ابلايه والدهن
ضلن ابلا خيمات . تعبن امن الطيحات . گالن اهنانه انبات
الليلة الليلة
____
الترسم ابمهد ازغير . وصاحت اصباح الخير . أمه عبدالله اتصير . كل صبح هي اتدير . الكربله اتسلم اعليه
فگدت اجمل ريحان . عمره ست اشهر چان . شالته بالأحظان . إبني صاحت عطشان . حسين منهو اليرويه

امن الرضيع اگماط باقي ذكرى ضل عند الرباب
اتحضنه ليليه وتقبله ماتعودت عالغياب
الچان بحضاني تنادي صار بحضان التراب
آه ياعبدالله تصرخ يمى ماتسمع جواب

ماتبطل الونه عالناگه
للدللول امه مشتاگه
هي والعلويات . للطفل مشتاگات . گالن اهنانه انبات
الليلة الليلة

حيدر الحلفي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

من ظلن وحيدات اخذوهن اسيرات
دارت بيهن دنيتهن وعالهزل تاليتهن
**
ذبحو حسين وسحگت بصدره الخيل
وبعده خواته من الشمر شافن ويل
ينطن وجهن وين لو صار الليل
ولا خيمه عدهن لا اخو لا ظل حيل

بالطف ركضن اهواي وما صح الهن الماي
ما تتوصف حالتهن وعالهزل تاليتهن
**
والله وكت هالدنيه دارت بيهن
عگب الخدر ذاك الشمر يسبيهن
عذبهن ويفتر بسوطه عليهن
ومحد خوات حسين اجه يحميهن

صارت زرگه المتون وبيهن باجر شلون
محتارات بغربتهن وعالهزل تاليتهن
**
للكوفه عالهزل سبايه اخذوهن
أمخدرات وبالحبل جتفوهن
بذيج الظهاري وبالشمس مشوهن
وشكثر بالسوط العده ضربوهن

بيهن شمتت الناس وصاحو وين عباس
وظلت تكبر حيرتهن وعالهزل تاليتهن
**
محتاره بيهن زينب وتاه الراي
ذيج التگلها عمه تعبانه اهواي
وعطشانه هاي اتگلها ما عندج ماي
شتصير زينب بت علي الذيج الهاي

زينب صاحت حسين اجتني كربله منين
طالت بعدك محنتهن وعالهزل تاليتهن
*
للشام اخذوهن غصب مسبيات
ومن السبي ودربه شكثر تعبانات
ساعات وگفوهن اباب الساعات
وتتفرج عليهن عيون الشمات

كلها ازغار وكبار ظلت ترمي بحجار
وعالخد تهمل دمعتهن وعالهزل تاليتهن
**
والله وكت زينب تطب ابديوان
ما تنسبي لو عدها زينب خوان
طبت خرابه ونامت عله التربان
مصيبة رقيه اجروح الهم واحزان

تجرح ذيج الايام دموع وموت وآلام
طالت بالهم رحلتهن وعالهزل تاليتهن
***
تمت
ميثم العمري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

تعنينه بالرايه للغالي مشايه
كل اربعينيه يدرينه وفايه
***
وكت المشي حان الأقدس انسان
وتعنت حسين من كل الاوطان
طول المسافات بيديها رايات
وبحضرته انشوف كل الديانات
بصحنه اليحب طاف واتعنته آلآف
يجمعها الحسين كل هاي الاطياف

من كل العالم زواره وحسين ايرحب بخطاره
قبله صبح گبره للعالم بأسره
وتنسى التعب كلها من توصل الحضره
*****
عايش بالگلوب نگطعلك ادروب
صوت العشگ صاح انت اغله محبوب
عفناها البيوت ورددنه هالصوت
ما نترك حسين زواره للموت
ثوره المشي صار وهبينه زوار
اتظل كربله دوم قبله للاحرار

قدسها حسين وشع نوره ومن كل دوله الناس اتزوره
گبره صبح جنه ونزوره نتمنه
كل العشگ هوه ما نبتعد عنه
**
بينه اشتد الحيل وصبح المشي وليل
ويازينب انصيح والمدمع ايسيل
كل زاير تشوف عالممشه ملهوف

كل همنه الحسين نوصله ونطوف
شنهي الحر انصيح ولا تصدگ انطيح
بس زاير حسين انفاسه تسبيح

كل خطوه الزاير يخطيها راح المهدي ايبارك بيها
اجره على الزهره وياخذ ضعف اجره
كل خطوه الف حجه تدري والف عمره
****
متعني مشاي والرايه بيمناي
ياناس الحسين مشتاگ اله اهواي
ما احمل الفراگ والگبره مشتاگ
والله على حسين گلبي شكثر طاگ
متحزم احزام وامشيله كل عام
لزيارته احساب احسبها الأيام

حلوه ايامه اشگد تدريهن وآنه من العام امتانيهن
اهوايه احن ليهن وبكل سنه امشيهن
ما تنمل ايامه وماكو تعب بيهن
*
الموكب نصبناه الزاير نطرناه
عهد وي الحسين بالدم كتبناه
حضرنه الاعلام وشدينه الاحزام
الزوار الحسين كل احنه خدام
نفرح تره اهواي لو مرنه مشاي
اتذكر حسين من تشرب الماي

ماكو احله من ايام الخدمه ازغار اكبار الكل متحزمه
يالزاير ادعيلي وجم خطوه امشيلي
ومن توصل الغالي جم دمعه اهديلي
***
تمت
ميثم العمري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

مسبيات واهواي الشمات يم باب الساعات الوگفه اتطول
فوك النوگ شلون انطب السوگ يالصدرك مسحوگ وكلها تگول مسبيه
****
بده كل عذابي من اجاني على ابابي الشمر بيده راسك دمه ايسيل
اخيج ذبحته ويزينب طبرته عله نحره ورفسته وشاف الويل
عله صدره صعدت وحيل لزمته وگمت احز نحره
وتدرين شكثر عطشان مات وما شرب گطره
وبيدي من شلت راسه رفسته زينب بصدره

الاصعب هاي حسين ايريد الماي وعذبته آنه اهواي الحد ما مات
دار العين وآنه اذبح بحسين زينب وجهج وين والخيمات مگظيه
****
الشمر روعانه بعساكر اجانه احرگو خيمهم ظل ايصيح
حرگها علينه بجمرها انجوينه ركضنه وعثرنه وگمنه انطيح
حيل اتعذبت يحسين من العاشر وضيمه
الشده من اجانه الليل وماعدنه بعد خيمه
وما بين الزلم والخيل شلون انام بالهيمه

كلها تنوح الفاگد والمجروح بعدك وين انروح صار الليل
تجري العين وكلها تصيح حسين زينب شتصيرين شفت الويل صد ليه
*****
بحبل جتفونه سبايه خذونه عله هزل صعدنه بالدمعات
ضحايه اهلنه وبعد محد النه الشمر يحدي بينه والشمات
روس اثمنطعش برماح مشت ويانه مسبيه
يعثرن بالرمح يحسين من تتعثر ابنيه
وصلت الكوفه والوادم غدت تتفرج عليه

ماكو احساس تتفرج هالناس هاي اخت العباس زينب هاي
جرح ايتام هاي الدنيه ايام ودهري مدري شضام يگصي وياي وعليه
*****
حنتني المصايب ونمت بالخرايب وگظتني اليالي والاحزان
سبيه امشي صعبه وصد كلها غربه وكت خله زينب بلايه اخوان
حداي الضعن يحسين ذباحك مشه ويانه
شصير وعندي ماظل حيل وكلها تصيح تعبانه
هاي اتگلي اريد ارتاح وذيج اتصيح عطشانه

حرت بهاي عطشانين اهواي وكلها تريد الماي وما ينطون
عله هالحال من الهم بينه شضال وبينه اجروح اثگال مو تدرون شمسويه
***
مشينه بصحاري بهذيج الظهاري الشمس عذبتنه وشفنه آلام
عطشنه وتعبنه وبجينه وضربنه شكثر عذبونه اهل الشام
سمعنه الحجي الما ينگال الكل اتجاسر علينه
ناس تصيح مسبيات وناس اتشمتت بينه
وناس اتسب شفت يحسين وناس بحجر ترمينه

مدري شصار تصيح ازغار اكبار ارموهم بحجار واحنه انسير
جرت احزان والماعدها اخوان راح اتطب ديوان راح اتحير يوميه
***
بمجالس وگفنه سبي وغربه شفنه وسمعنه اليسبنه بهاي الناس
السبي مر عذابه وخذونه بخرابه بتعب نمنه گوه وما ينقاس
رقيه فزت من النوم تريدك واشد محنتها
جابو بالطشت راسك وعليه شبگت بدمعتها
عله راسك بالغرب يحسين رقيه اتصير موتتها

برض الشام ماتت والآلام بجروح الايام تظل كل يوم
عله كل ليل بزينب ماظل حيل شافت اختك ويل ومن الضيم محنيه
****
تمت
ميثم العمري
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

#قصائد_محرم


يالمطيب الجروح... بدونك وين اروح.
                 اليه انته روح
حبيبي يا حُسين........ حبيبي يا حُسين
____1️⃣
شرد اسولف عالعشگ... يالبدونك اختنگ.. انته اليه أمنياتي.. وكلشي يحسين ابحياتي.
والله ماغيرك ألي... ياأبن حيدر علي..
أياواهس ذكرياتي.. وكلشي يحسين ابحياتي.
كون يمك. واطوفك. واموت ابحضرتك.
عميه العيون . يمولاي. فقط بس نضرتك.
عطوف انته وسموح.. بدونك وين اروح.
               اليه انته روح
حبيبي يا حُسين..   حبيبي يا حُسين
_2️⃣
ما افكر بالطُمع... كلشي من عيني.. طلع... كل حياتي انتهيهه... انته لو ما انته بيهه.
الدنيا ما امنهه ابد.. شماتقدملي السعد.. أبد ما اسأل عليهه... انته لو ما انته بيهه.
من الطبيعه. لگيته . الجمال ابمرقدك.
انه ارتاح .  والهموم .تزول من اگصدك.
عطر جنه تفوح... بدونك وين اروح.
                  اليه انته روح
حبيبي يا حُسين.       حبيبي يا حُسين
____3️⃣
ضلمه وكتي اوما احس... انته بعيوني شمس... جازي ابفضلك عليه.. انته اليه اوكلشي اليه.
لوغبت عنك صعب... يبقه مشلوع الگلب.. حسين شمسوي انته بيه.. انته اليه اوكلشي اليه.
بيك مجنون.  والجنون.  احسه هيبتي.
الخدمه ذِله. اوكرامه.ألك بس خدمتي.
لخدمتك هالطموح.   بدونك وين اروح.
                 اليه انته روح
حبيبي يا حُسين.       حبيبي يا حُسين
____4️⃣
من اطيح ابّعِلتي... وأمي تنضر حالتي... اتنادي ابگد  ماتحبني... داخل اعله حسين يبني.
من امي هاي الندبتك... راضع انه امحبتك... اعليك كل امال تبني... داخل اعله حسين يبني.
أبچي وّياها. لجلك . يمحبوب العباد
من يهل شهرك. انته . تلبسني السواد.
عله امصابك ننوح.. بدونك وين اروح.
               اليه انته روح
حبيبي يا حُسين.     حبيبي يا حُسين
_5️⃣
ياغريب ابكربله. والشفاه الذابله.. يلي ماتنعد جّروحك... ياسلام الله اعله روحك.
يالمبرج بالدمه.. ايضنوة فاطمة.. سهم المثلث يلوحك.. ياسلام الله اعله روحك.
غبظ شيبه. الكريمه. الشمر دَنه اوجِسر.
اواعله صدرك. يثني. اويحز بيده النحر.
نصر دمك يلوح... بدونك وين اروح
                  اليه انته روح
حبيبي يا حُسين.      حبيبي يا حُسين
____6️⃣
لو حِتم ذاك الامر... سيدي ويوم الحشر.
سجل اسمي اويهل وادم... لأن مولاي الك خادم.
ادري تعبي مايضيع.... انته الگاك الشفيع..مااگولن يوم نادم.. لأن مولاي الك خادم.
بدنيه انته.. اليه.. امامي واخره.
مانسيتك.. وله انساك.. عهد للطاهره..
واگولنهه بوضوح     بدونك وين اروح
                     اليه انته روح
حبيبي يا حُسين.       حبيبي يا حُسين

#الشــــاعر ✍️
#ابو #عــبدالله #الشمري

كلشي بالدنيا خسارة سيدي وحبك ربح
بالنحور الدم يغالي بفضل راسك عل الرمح
١ـــــــــــــــــ
بفضلك تحررنا من سوق العبيد
وبفضل دمك بقى الدم البوريد
والله لولاك الظلم بينه يزيد
ولسة يحكم بينة بالدنيا يزيد

ماكو رحمة ولاكو رأفة من بعد عينك جرح
بالنحور الدم يغالي بفضل راسك عل الرمح
٢ـــــــــــــــــ
انت خيمتنة التلمنة من الضياع
بعد عينك كلشي بالدنيا وداع
سيدي انته الذي توجه الشراع
ودونك نظل بالبحر ما نلگه كاع


بالبحر نبقى بعمرنا والوضع ما ينشرح
بالنحور الدم يغالي بفضل راسك عل الرمح
٣ـــــــــــــــــ
سيدي ودربك ضوانة من الضلام
لجلك ومانمشي بدورب الحرام
دربك يودينة للحب والسلام
وغيرة اليودينة نحركلك خيام

درب غيرك ظلمة هندس سيدي ودربك صبح
بالنحور الدم يغالي بفضل راسك عل الرمح

٤ــــــــــــــــــ
دونك أسنين الخدم تصبح عجاف
الماترويه دمعته يعيش بجفاف
خدمتك أكبر نهر ما بي ضفاف
حبك الجنة أمر دون اختلاف

الما يعرفك هذا جاهل حبك شكد متضح
بالنحور الدم يغالي بفضل راسك عل الرمح

٥ــــــــــــــــــ
يبقى حبك يا ابو الاكبر بالفؤاد
لاخر الانفاس ويظل الحداد
يالحزن لجك يبو اليمة الجماد
القلبة مابي جمرة ما بي بس رماد


اسمك بقلب اليحبك للأبد ما ينمسح
بالنحور الدم يغالي بفضل راسك عل الرمح
٦ــــــــــــــــــ
اختصارا للسوالف يا عظيم
فاز كلمن حبك وقلبه يهيم
ما تعوف الخادم انت شگد كريم
يا امان انته غدا من الجحيم

بفضلك احنه نعيش هسه يا ابو القلب السمح
بالنحور الدم يغالي بفضل راسك عل الرمح
ــــــــــــــــــ
الشاعر زين العابدين الشمري

محرم 34
لشهادة السيدة شريفة بنت الحسن عليهما السلام ..

اوصَل وانخَه بدمِع
الطم واكسِر ضِلِع
وصيح عالي الصوت جيتج .. ياشريفه
................
اليحجي عنج مايهمني .. يكول وهمي لو صِدِك
ليش يم شباجج آني .. كلبي نار ويحترك
نبض كلبي يم ضريحج .. جَنَّه بضلوعي يِدِك
اكعد اكبالج وصدري .. جنه بالهَّم ينسِحِك

صرتي لليِكبُل دِوَه
يا أَعَز من الهوى
وصيح عالي الصوت جيتج .. ياشريفه
................
انتي من ابواب ربنه .. رحمه بيتج للبشر
تجبري دمع اليزورج .. العِلَّه ما إلهه أَثَر
من اذكرج ليش كلبي .. مني احِس بيه انكِسَر
عِطِر جفين بضريحج .. ودمع بي عِطر النَحَر

انتي للزاير سِمَه
والله يابت فاطمه
وصيح عالي الصوت جيتج .. ياشريفه
................
جيتي وي ضَعن الاحِبهُم .. بي وصلتي كربله
وانتي فوك العِلَّه كلبج .. شكد حزن بيه انمله
رِسَم صوره وي رقيه .. اثنينجن جَن بالفَلَه
سوط شمر الي لِحكجن .. لو سِهامه حرمله

شلون بيجن والكُمَر
باجر ابلايه أثَر
وصيح عالي الصوت جيتج .. ياشريفه
................
اجه باجر ماكو خيمه .. كلهه محتركه الخِيَم
لو صِعدتي التَلَّه شِفتي .. مابُكَه إلكُم عَلَم
جم طفل مات بحوافر .. جم طفل مات بسهم
زغير وجبير اعله هَيمَه .. تِلحَك اعبات الحَرَم

والاشد سوط الشِمِر
يضرب العَظمَه يِجِر
وصيح عالي الصوت جيتج .. ياشريفه
................
من كثر ضيم الي شفتي.. ومن كثر فكد الاهل
لا عمام اوياج ظلت .. لا اخو الكل انجتل
وانتي بيج العِلَّه تذبح .. مابكه العُمرِج إٔمَل
لله سَلًَمتِي الامانه .. الحِلَّه ضعنج من وِصَل

اتشرفت بيج الارُض
حبج امن الله فَرُض
وصيح عالي الصوت جيتج .. ياشريفه
................
ابو مريم الاسدي..
11/تموز/2025 ..

قصيدة للمشاية طور اهوازي


اجتك سيدي الخدام    واترفرف رواياها
تگطعلك طويلة دروب   ليك الشوكَ جاباها
آيحسين ومصابة    آيحسين ومصابة
(==================)
مشاية ولحد الموت  مانترك مصاب حسين
مصباح الهُدى وللناس  سفينة واحنا غرگانين
ذنوب محملين هواي   يغفرهن مشي الرجلين
بخدمتك مانرد ونخاف  وشرف هالخدمة نلگاها
آيحسين ومصابة       آيحسين ومصابة
============================
كون انعرف ابو السجاد   من تمشيلة رجيلنة
نترك كل حقد عالناس   ننضف گلوبنة وجينة
ما نمشي بعكس ما راد  ونسير بدربة خلينة
هاي الغاية والمطلوب   الحسين المنة راداها
آيحسين ومصابة       آيحسين ومصابة
======================
تواسي زينب الحوراء   مشي بالاربعينينة
بدربك للنساء انشوف   بعضهن عدها سلبية
شقة وتمضحك ومكياج   چن تمشي لعرس هية
مو چن رايحة لحسين   الروحة لخدرچ اطاها
آيحسين ومصابة       آيحسين ومصابة
=========================
خدم عدنا بذهب تنقاس   تخلص وي ابو اليمة
بنفسة يخدم المضلوم   ويزود بخدمتة الهمة
يجازيه الحسين اضعاف   مكانة ايرفعة للقمة
التخلص وي ابو السجاد   جاه ورفعة جازاها
آيحسين ومصابة         آيحسين ومصابة
=========================
الف هنيالة كلمن زار   الحُسين وعارف بحقة
يرد چنة انولد بالحال   ذنوب اعليه ما تبقة
حبك من نزل للناس   اهو كل واحد ورزقة
عالفطرة الگلب لحسين   گام الخدمة يهواها
آيحسين ومصابة      آيحسين ومصابة
=========================
اسالكم الدعاء رائد الاسدي

قصيدة ما بعد انتهاء الخدمة من المواكب (طور اهوازي)


يا وسفة اعله احلى ايام   بالخدمة گظيناها
انتانيها اعله طول العام   هالخدمة عشگناها
حد الموت خدامة    حد الموت خدامة
=======================
نعمتنة الچبيرة حسين   يربي ادوم هالنعمة
عشنا بخدمتك ايام   مثل الشهد هالخدمة
خلصت وانگظت ياحيف  مرت مرت النسمة
المحبة الضاعت من سنين  بالخدمة لگيناها
حد الموت خدامة    حد الموت خدامة
=====================
الچبير وگوة يلله يگوم    وروحة هواي خلصانة
وي الشاب ابو العشرين    گام و يركض ويانة
من خلصت بقى مهموم   عينة دموع غرگانة
يرد محني الظهر للبيت   حالة هواي شفناها
حد الموت خدامة    حد الموت خدامة
==========================
مو من العمر هيهات   ايام الگضت منة
عشناهن سوة ويحسين  وچن عشناهن بجنة
كل واحد تشب بي نار   زوارك مشوا عنة
للعام اليجينة انوب   ايامك نطرناها
حد الموت خدامة    حد الموت خدامة
=======================
عزلنة المواكب حيف   دمعة تسابكَ بدمعة
وحشة الدنيا عالزوار   وضاگت سيدي الوسعة
لجلك رخصينا ارواح   والشيعي اتعرف طبعة
يرخض روحة لجل حسين   عالفطرة عرفناها
حد الموت خدامة    حد الموت خدامة
=========================
خلصت خدمت الزوار   وضلت بالگلب حسرة
كل خادم صبح مكسور   گلبة ويستعر جمرة
ما يبرد لهيب النار   لمن نوصل  الحضرة
گطرة دم لبو السجاد  ما نوفي احنا گلناها
حد الموت خدامة    حد الموت خدامة
======================
اسالكم الدعاء رائد الاسدي

مضلوم زين العباد
٠٠٠٠ ٠٠ ٠٠٠٠
شايف ضيم مامشيوف
والطف گصر اسنينه
يمه نذبحو الوليان
وتجري بالدمع عينه
واصعب موقف الشافاه
خيل اتدوس ابو سكينه

مضلوم زين العباد
٠٠٠٠ ٠٠ ٠٠٠٠
يشوف الخيل فوك حسين
تدبج كسرت صدره
مايگدر يشيل السيف
وگاضي أيامه بالحسره
وين ايروح والنسوان
صفت بالهيمه متطشره

مضلوم زين العباد
٠٠٠٠ ٠٠ ٠٠٠٠
اخيامه تفرهدت والنار
تلهب وانته اتصور
خيل وبس حرم واطفال
والله يشيب المنضر
وين بهل يتامه يروح
وترعب شوفت العسكر

مضلوم زين العباد
٠٠٠٠ ٠٠ ٠٠٠٠
من چلچل عليه الليل
واه ياضيم هذا الليل
صارت عالرماح الروس
ودموع العقيله تسيل
أيتام مروعه من النار
ويرعبهم صهيل الخيل

مضلوم زين العباد
٠٠٠٠ ٠٠ ٠٠٠٠
ياطرت الفجر والناس
كلها مجمعه صوبين
صاحو وين اخت عباس
المالمحتها يوم العين
عل هزله وطريج بعيد
وي ذباحج تروحين

مظلوم زين العباد
٠٠٠٠ ٠٠ ٠٠٠٠
حده الحادي ومشه بالنوك
وعلي السجاد بهمومه
ثكل الجامعه والگيد
بالدم صبغن هدومه
ماكو ولا بشر بالكون
مر بمحنته ويومه

مظلوم زين العباد
٠٠٠٠ ٠٠ ٠٠٠٠.

خادم اهل البيت ع
فلاح طالب الماجدي

كلشي اتغير بعد العاشر
مسبيات او نگسر خاطر


*

بعد العاشر إِدمـوع الـحـرم تكتب
كلشي اتغير وصـار الوضـع مُرعب
بلايه أحباب تخنگ جيت المغرب
سبايـه إِبـيـن وادم بالهوى إِتسلب 

نمشي اونتلفت ونحـاذر
مسبيات او نگسر خاطر


*

بـقـيـنـه إبـلا خيم لا اخـوه محتارات
وجهنه إِنديره وين الوين بس شمات 
متنه امن الـقـهـر سـمـونـه مسبيات
وبـعـد ذاك الـدلال إِنـطـب للولايات

مـره إِنوح او مـره إِنكابر
مسبيات او نگسر خاطر


*

بأرض الكوفه من طبينه شفنه الويل
ومن ثكل المصيبه بينه مـات الحيل
علينه الـنـاس تـتـفـرج نــهـار او ليل
مـارحمونـه غـايتهم دمـعـنـه إِيسيل

بالأسـواق إِيفرنـه الكافر
مسبيات او نگسر خاطر


*

بـعـد مـاچـانـت إِترف بـيـهـا رايتنه
علينه إِتـغـيـرت يـاوســفـه كـوفتنه
إبـدال الـفـزعـه بـالطعنات جـازتنه
بـيـهـم مـاتـغــزر لـيـش خـبـزتـنـه

موقفهم مـو ثابت حاير
مسبيات او نگسر خاطر


*

زينب والوكت بـس بـالـحـزن يوحـي
عليه او كون أظـل إِبدمعتي او نوحـي
درب الـشـام خنجر نـابــت إِبـروحـي
 وملح الدنيه كِلّه إِنرش على اجروحي

من الـشـام أتشتم باجر
مسبيات او نگسر خاطر

*

كـل الـشـام مـسـرور إِبسبي العفه
فرصتها الـنـواصـب بـيـنـه تتشفه
بناتـك يـا علي بـالـغـربـه يـا وسفه
جـرحـهـن للمنيه يـبـقـى مـايشفه

وجه الشام بلون الحافر
مسبيات او نگسر خاطر

*

بالشام الحجر و الناس نفس الشيّ
گلبهم مـيّـت و مـا بـيّ ملامح ضيّ
حقودين ويموتون اعلى ملك الريّ
خـلـونـه بخرايـب مـاكـو بيهن فيّ

گلب الخِدر مجمر صاير 
مسبيات او نگسر خـاطر

*

سليم الغزالي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

قصيده وداع الامام الحسن معه اخيه
الحسين عليهم السلام


نتوادع يحسين بغربه
عيني وعينك شنهي تشوف
انه بسم ياخويه أتكطع
ونته بحافر لو بسيوف
جرحي فدوه يروح الجرحك
بالطف زينب  تنضر ذبحك
٠٠٠٠ ٠٠ ٠٠٠٠
يبن امي انه وياك نتوادع اشلون
عطشانه دوم عليك يحسين العيون
بصورة جمالك ليش باجر يخربون
بالطف غريب تموت ماتحصل امتون

اتظل ياخويه بذيج الهيمه
لاتشيع ولاتغسيل
كلشي مسلب حته الخنصر
وياقسوتها وياك الخيل

بايع كلشي مضاعف ربحك
بالطف زينب تنظر ذبحك
٠٠٠٠ ٠٠ ٠٠٠٠
تختلف عني هواي يالبت حشاي
وحدك غريب اتموت وبعازت المايالصغيره
خويه اليصير وياك ماصاير وياي
يبقه الخدر يحسين تايه بلا راي

لاتبجي ياروح الزهره
مجروح يصبر مجروح
ضم دموعك يوم العاشر
بيه كل لحضه تطلع الروح

شيضم ليلك شيضم صبحك
باجر زينب تنضر ذبحك
٠٠٠٠ ٠٠ ٠٠٠٠
يحسين اخذ جسام يعّوض غيابي
وشماتصد عليه تذّكر شبابي
يمك يخويه ايهون جرحي ومصابي
شما أشوفك بهل حال يكثر عذابي

جم مره تحنيها ضلوعك
من خوانك كله تطيح
تبقه لوحدك مامن ناصر
بذيج الساعه خويه تصيح

شما تصبر الدمعه تفضحك
باجر زينب تنضر ذبحك
٠٠٠٠ ٠٠ ٠٠٠٠

لو جبدي اكول الاف بالسم تگطع
تضل عيني خويه عليك بالحسره تدمع
روحك ابين عداك يبن امي ٠٠تطلع
وزينب حجي الشمات نسبيها تسمع

الله يعينك ويعين اختك
شافت منضر مامشيوف
جنك تربه وبنص هيمه
ولتسجد مو ناس سيوف

وشايل راسك بالطف رمحك
باجـر زينب تنضر ذبحك
٠٠٠٠ ٠٠ ٠٠٠٠
أكبر جرح بالكون جرح العقيله
ماعده اخو من ضيم حي تشتكيله
بعد الخدر ياحيف تركب هزيله
وراسك يخويه ارماح باجر تشيله

زينب لو ماتت بالحسره
حگها انگول وماتنلام
شمات وحرمه بلاوالي
وكلها اتصيح الشام الشام

تعثر سكته وادم تضحك
باجر بالطف تنضر ذبحك
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي