مابي رحم كلب السباني
ماظل نحر ماشوفاني
يدريني ملهوفه اعله الاخوان
متعمد بنصهم خذاني

تسمع يكفال الضعن راح امشي بدروب السبي
عيون متروس الدرب مامش ستر غير العبي
مو جفك يجر ناكتي هزله ويجر بيهه اجنبي
راح امشي وي وادم غرب ياهو اليعدل معصبي 

وأنه اعله الهزل
مجتوفه بحبل.. صحت نزلوني

أودع اخوتي
بعيده سفرتي.. ولا خلوني

الموادع بجي
وسولفت الحجي .. بدموع بعيوني

واويلاه يازينب.  واويلاه يا زينب
...................

حادي الضعن مو خوش حداي
طول الدرب متواتب وياي
يضحك جذب جدامي ويصيح
احنه الكطعنه اعليكم الماي

انه الجنت عند اخوتي مو اخت جنت ام وأبو
هسه امشي بالسوك العصر واسمع حجي يزعل الاخو
ماظل ولا واحد عبر ماصاح هل حرمه منو
المايدري بيه مخدره عرفاني من حجي العدو

زينب صيحو
خوانج كضو .. ولا واحد فزع

الماشافت شمس
الصوت الماله حس..  بالشام انسمع

خدر بيت الوحي
ويه الما يستحي ... ياوسفه طلع

واويلاه يازينب.  واويلاه يا زينب
...................

درب السبي يرادله اخوان
جدامنه مو بيت ديوان
بس العليل يموت ويعيش
نسوان ظلت تحمي نسوان

الليل مايرحم مره ونسوان عدهه وعايله
من حگهه كل خطوه اتعثر الماراكضه ومدلله
ماظل شبر ما منسحگ من شردتي بطف كربله
ليهسه ما ميته اشعجب واسمي انحجه بكل المله

انه العالمه
واملاك السمه ..  جانولي خدم

ع الهزله اصعدت
عود انه الجنت  ..  بت شيخ الامم

اسمي ام الخدر
طبيت العصر  ..  سوك بلا شيم

وا ويلاه يا زينب. وا ويلاه يا زينب
.....................

غم الوكت من غمهه الايام
الخلتني اطب مجتوفه للشام
انه الجنت عند اهلي محراب
يباوع عليه الخاص والعام

كواجن الله اعله التعب محد علي حن كالهه
التفكد مثل زينب زلم لحد يكول اشحالهه
مكتوبه أظل الوحدي روحي الحزن يحلالهه
خيعون زينب ع الخدر من عندي الطف شالهه

محسوده جنت
مامش مثلي اخت .. تعزهه اخوانهه

وسفه وصبحت
ع الهزله مشت ... تغير شانهه

من بيت الخدر
تمشي وي الشمر .. القصر عدوانهه

واويلاه يا زينب.   وا ويلاه يا زينب
.................
الخادم موسى البطلي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

قصيدة لخدمة الحسين عليه السلام

خدام الحسين حسين يرعاهم
بالمحشر يگوم ويگعد وياهم
===================
خدامة وفخر لو گلنة خدامة
چلمت خادم اتضل تاج عالهامة
ويتمنون كون اتراب لجدامة
مجنونين حب حسين خلاهم
===================
يالحاقد عليهم شنهي عدك ثار
ابشر مقعدك باچر يصير النار
ما تنفع صلاتك لا صيام انهار
وانظر للخدم الباري شنطاهم
==================
مذلولة الخدم والحالة مسموعة
عد كل البشر والذلة مطبوعة
وبخدمت حسين الروس مرفوعة
دنيا واخرة لاتضنة ينساهم
=====================
اسمع يالتضدنة وافهم المغزة
احنا انزود جاه ومنزلة وعزة
باچر كل شخص شنهي عمل يُجزة
ويخسر كلمن الخدام عاداهم
=====================
شما تحچي وتگول وتكتب اقلامك
وتجيش جيوش وترمي بسهامك
ما يگدر يغير خادم اعلامك
ال البيت وسط الروح تلگاهم
======================
ابغير حسين هاي الدنيا ما تسوة
ومن نخدم نعيش ايامنة الحلوة
جيل لجيل حبك للگلب سلوة
وخيرك عالخدم يحسين غطاهم
====================
أسالكم الدعاء رائد الاسدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

قصيدة للمشاية جديد


يا مولاي اجاك الكون كلة
وبگلب اليبغضك هاي علة
من كل صوب لجلك تعني الناس
وساعات الملاگة وياك تحلة

لجل حسين تتعنة الملايين
تسوة هواي عدنا زيارة حسين
من گد ما تحب حسين الگلوب
حب حسين خلاها مجانين

ما ننساك رب الكون يشهد
وبكل عام هالموعد تجدد
يحسين  يحسين  يحسين  يحسين
====================
حبك عن عقيدة وعدنا واجب
وكل گلب بغرام حسين ذايب
الحبك من صدكَ والمخلص وياك
بسمك يرتفع باعلى المراتب

خدام شكثر بالخدمة ذابت
طول اعمارها وما يوم غابت
ما تركوا عزة المظلوم هيهات
لحد ما روسهم مولاي شابت

طول اعمارهم خدام يبقون
گطعولك عهد وياك يوفون
يحسين  يحسين  يحسين  يحسين
====================
نطي ارواحنا لجلة قليلة
ولو اخر الدنيا هم نجيلة
مشاية وخدم نفديلة الارواح
غير حسين ما عدنا وسيلة

مشاية اعتنتلك شايلة اعلام
ومنصوبة المواكب كلها خدام
صاحوا ياهلا بزوار الحسين
كل زاير يجيك انحطة عالهام

وي الدم جرة يحسين حبك
نطي ارواحنا ونريد قربك
يحسين  يحسين  يحسين  يحسين
====================
اسالكم الدعاء رائد الاسدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

قصيدة للمشاية طور اهوازي


اجتك سيدي الخدام    واترفرف رواياها
تگطعلك طويلة دروب   ليك الشوكَ جاباها
آيحسين ومصابة    آيحسين ومصابة
(==================)
مشاية ولحد الموت  مانترك مصاب حسين
مصباح الهُدى وللناس  سفينة واحنا غرگانين
ذنوب محملين هواي   يغفرهن مشي الرجلين
بخدمتك مانرد ونخاف  وشرف هالخدمة نلگاها
آيحسين ومصابة       آيحسين ومصابة
============================
كون انعرف ابو السجاد   من تمشيلة رجيلنة
نترك كل حقد عالناس   ننضف گلوبنة وجينة
ما نمشي بعكس ما راد  ونسير بدربة خلينة
هاي الغاية والمطلوب   الحسين المنة راداها
آيحسين ومصابة       آيحسين ومصابة
======================
تواسي زينب الحوراء   مشي بالاربعينينة
بدربك للنساء انشوف   بعضهن عدها سلبية
شقة وتمضحك ومكياج   چن تمشي لعرس هية
مو چن رايحة لحسين   الروحة لخدرچ اطاها
آيحسين ومصابة       آيحسين ومصابة
=========================
خدم عدنا بذهب تنقاس   تخلص وي ابو اليمة
بنفسة يخدم المضلوم   ويزود بخدمتة الهمة
يجازيه الحسين اضعاف   مكانة ايرفعة للقمة
التخلص وي ابو السجاد   جاه ورفعة جازاها
آيحسين ومصابة         آيحسين ومصابة
=========================
الف هنيالة كلمن زار   الحُسين وعارف بحقة
يرد چنة انولد بالحال   ذنوب اعليه ما تبقة
حبك من نزل للناس   اهو كل واحد ورزقة
عالفطرة الگلب لحسين   گام الخدمة يهواها
آيحسين ومصابة      آيحسين ومصابة
=========================
اسالكم الدعاء رائد الاسدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

قصيدة للمشاية

لبيك لبيك ابا عبدالله
------------------------------------
ثابت عهدنا وللحشر كَلناها
لجلك رخيصة ارواحنا بعناها
فوكَ الثُريا الراية عليــــــــــــــناها
مثل الجسد والروح حبك شلناه
---------------------------------------
ياخذ كَلبنا الشوكَ ياوليــــــــــــــنة
نطوف ونلبي وانحج اتعنينة
نعزيك ونعزي بحزن مهديــنة
مصابك يعيش وللحشر ماننساه
--------------------------------------------
هاي الملاين اعتنت وتنــــــــــــادي
شوكة بعيون البغضتك وتعادي
اتباها خادم وافتخر باســــــيادي
احنا عبيدة ونفتخر بايعــــــــــــناه
-------------------------------------------
مثلك نصيح بصوت لا مانخظع
نوصل نزورك لو جسمنة اتكطع
حبك يغالي بالكَلوب اتربــــــــــــــــع
نفديلك انحور ودمة لوجه الله
-----------------------------------------
حبك جمعنة وجينة الك مشاية
مرفوعة بالعالي ترف الرايــــــــــة
والحشد واكَف عالحدود حماية
لجلك يبو اليمة العمر ما هماه
-------------------------------------+--
بسمك حـــــــــشدنا صول وطباها
روس النواصب بالجدم داساها
ظلمة اعلى كل العادتك سواها
راية نصر بالحومة رفت يمناه
-----------------------------------------
بحزامة شدالة علكَ واتعــــــنة
فرحان مو رايح حرب للجنة
ابيا حسين ايصول ما يتونة
عالساتر ايرفرف نصر عالي لواه

أسالكم الدعاء رائد الاسدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

قصيدة للمشاية

نتعنة زوار .. لعزنا اولينة ... مشاية جينة.. هزنة الحنين
مشتاگة الگلوب.. للغاضرية .. لبن الزچية . هزنة الحنين

جيناك ... للحضرة خطار
جيناك ... يالوالي زوار
هزنة الحنين .. هزنة الحنين
====================
مشاية اجيناك يالعدنا غالي
شما تبعد ادروب لا ما نبالي
نمشيلك ايام نسهر ليالي
نتباها خدام واعلينا والي
بحبك مجانين.. نتفاخر بهاي.. تلگانة مولاي.. هزنة الحنين
لا ما نسيناه ..لترابة خدام.. نمشيلة كل عام.. هزنة الحنين
جيناك ... متهنة الاخطار
جيناك ... يالوالي زوار
هزنة الحنين ... هزنة الحنين
===================
عاهدنا كل عام نحييها ذكراك
عايش بالگلوب لا لا مننساك
يا سيدي بشوكَ زوار اجيناك
يگضي العمر دوم نتمنى وياك
يالساكن الروح ..تمشي بدمانة ..نشمك هوانة .. هزنة الحنين
الدنيا بلاياك... ما تسوة كلشي .. نتعنة نمشي .. هزنة الحنين
جيناك ... يا سر الاسرار
جيناك ... يالوالي زوار
هزنة الحنين ... هزنة الحنين
==================
انواسيكم اليوم يا اشرف الناس
وياكم انصيح حد گطع الانفاس
ويانة تمشون صرتوا النة حراس
كلشي النة تنطون وابلاية مقياس
أهلاً يزوار ..چنكم تصيحون.. يالجيتوا تمشَون .. هزنة الحنين
ها يالموالين.. تدرونة نشتاك.. الكم يعشاكَ.. هزنة الحنين
جيناك ... وابكل الاعمار
جيناك ... يالوالي زوار
هزنة الحنين .. هزنة الحنين
=================َ
تسعر بالگلوب الكم حرارة
والشيعي للموت ما تطفى نارة
بنيران الاشواكَ الكم اُسارة
ولذلك اتشوف زحف الزيارة
نگصد ملايين .. يالوالي الكم.. نفخر خدمكم.. هزنة الحنين
تلگونة يكرام.. يهل المحنة.. ليكم وصلنة.. هزنة الحنين
جيناك .. ما تنطفي النار
جيناك .. يالوالي زوار
هزنة الحنين ... هزنة الحنين
====================
أسألكم الدعاء رائد الاسدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

قصيدة للمشاية زيارة الأربعين


يحسين يا اغلى الناس نتعنة الك مشاية
حبك ســــكن بالدلال شيعة ونضل وفاية
لبيك لبيك ابا عبدالله لبيك لبيك ابا عبدالله
==========================
حبك سكن دلالي يا اغلى من كل غالي حبيتك
اغفى وافز جدامي وبيقضتي واحلامي لاگيتك

مشاية اجينا والاهل عفناها الدنيا ابوجودك سيدي محلاها
انة بمحبتك عالخلكَ اتباها الباري روحك للعشكَ سواها
يالتارس الدنيا احساس مجنونة بيك هواية
حبك سكن بالدلال شيعة ونضل وفاية
لبيك لبيك ابا عبدالله لبيك لبيك ابا عبدالله
=============================
كل خطوة الك محسوبة بسجل الخدم مكتوبة هنيالك
الحُـــجة لازم بيــــدك توصل تواسي ايريدك يبرالك

اليلزم بآل النبي ايلزمونة لليخلص الهم حاشة ميعوفنة
وغاد ايعرفهم همة ويعرفونة والجنة عدهم للخدم مضمونة
امن الكوثر انحصل كاس والعذب نشرب ماية
حبك سكن بالدلال شيعة ونضل وفاية
لبيك لبيك ابا عبدالله لبيك لبيك ابا عبدالله
===========================
انباهي البراية ابحبك نحيى ونموت ابدربك والينة
ولهســــبب تلگانة نسير ونجد ممشانة اشتاگينة

يامن على اسرار الخلايق عالم حكَ اليعرفك بالعشكَ ظل هايم
افتخر لجل حسين اصبح خادم مسرور گلبي بخدمتة ومو نادم
الخدمة تاج اعله الراس ترضون عدنا الغاية
حبك سكن بالدلال شيعة ونضل وفاية
لبيك لبيك ابا عبدالله لبيك لبيك ابا عبدالله
=========================
قطب الارض يالضامي يمك خذتني اجدامي ملهوفة
من كل بلد تــــتعنة لگبرك تــــــطب للجنة وتطوفة

كل الارض يم گبتك جاذبها والمهدي واكف شيعتة ايراقبها
النية السليمة ينعرف صاحبها بسجل الخدم بيدة غدة يكتبها
محسوبة حتى الانفاس للگصدتك عناية
حبك سكن بالدلال شيعة ونضل وفاية
لبيك لبيك ابا عبدالله لبيك لبيك ابا عبدالله
==============================
من البحر نگصدلك حد النحر نوصلك والينة
من الــــمهد نهواكم حد اللحد وياكم ضلينة

خدام الكم نفتخر بالخدمة نحمد الباري ونشكرة ابهالنعمة
ياربي كل خادم نريد اتسلمة كل عام يرجع عدة نفس الهمة
من الزغر دكَ الساس للموت منطي حچاية
حبك سكن بالدلال شيعة ونضل وفاية
لبيك لبيك ابا عبدالله لبيك لبيك ابا عبدالله
===========================

أسالكم الدعاء رائد الاسدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

قصيدة للمشاية جديد

من البحر ...... حد النحر
يحسين الك مشاية
يحسين الك مشاية
==================
بلهفة گلب.. يمشي المحب.. يالغالي الك عاهدنا
نصون العهد... أباً وجــــد... يفدي العمر واحدنا
حبكم عقيدة ومعتقد والشيعي يوفي بحبة
انــــتم املنة ونعـــقتد للهادي انـــتم قربة
الخالف نهجكم سيدي خاسر وتيه دربة
بس اليحبكم ما خسر حبكم يوصلة لربة
فاز وربح .... كلمن صبح
يحسين الك مشاية يحسين الك مشاية
=================
تعادل حجج .... بيها الفرج.... زيارة حسين الضامي
ابحر وبرد .... دوم استعد ... تندل دروبة اجدامي
ما بيني وبينك عشكَ ابلهفة وشغف اتعنة
مشاي اجيلك واعتني حبك فلا امل منة
امشي بطريقك وأعتقد اوصل لحد الجنة
لو تعبت اجدامي زحف اوصل الك واتهنة
ازحف زحف .... راية ترف
يحسين الك مشاية يحسين الك مشاية
=====================
راحة نفس..... بيها يحس.... كلمن مشه لمحبوبة
واليمشي الك.... ايحفة الملك... مغفورة كل ذنوبة
ياربي عجل بالفرج نمشي ونناجي الباري
يرعانة ابو صالح هتف احفظ يربي انصاري
وحسين ابو أليمة استعد ياهله ابكل زواري
وبالحظرة ابو فاضل وگف اهلا اجيتوا لداري
الطب كربلة ..... مية هلة
يحسين الك مشاية .... يحسين الك مشاية
=================≠=========
من أقصى الجنوب.. لسيد القلوب. خدمة وخدم متروسة
صبح ومسه.... الكل جالسة.... بالله وعلي محروسة
كل خادم تشوفة ملك بحسين من يتسمة
خدام الحسين ونعم طول الدرب ملتمة
تاج وفخر بيها افتخر كلها تصيح الخدمة
لو تعب واحد بالدرب فزعولة شدوا عزمة
عز وشرف.... غاية وهدف
يحسين الك مشاية.... يحسين الك مشاية
=======================

أسالكم الدعاء رائد الاسدي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

يلمسافر على الدنيا العفاء بعدك
يلمسافر دمع لمــني علــى خدك

محتار وتدري اشلون
بينك ما بين أم عون
وگبالك طاح حسين يلأكبر
…………………….

تمدتت وي طولك
وتسمع يگلولك
طاح ابوك ومالت الدنيا اعله حيلة
لا تروح دخيلك
واسمع منحجيلك
وگلبي عد جرحــك يبــوية ادخيلة

وضليت محني بمشيتي ومابية شيلن إيدي
ولا گتني زينب ها شكو گلتلها مات وليدي
وحاجيت روحي بفرگتك بعد الرحل لتهيدي
ويهلال لمن سافرت ماريد بعدك عيدي

وضليت بيد امسح دمع وبأيد لازم ظهري
ورجليه ماتن من طحت والحرگة خنگت صدري

وانه منبجي يضحكون
بينك ما بين أم عون
وگبالك طاح حسين يلأكبر
…………………….

مات شوف عيوني
وگاموا يسمعوني
حسين يبجي وما گدر ابنه يعينه
توسلتلك روحي
گوم شد اجروحي
ما أريـد انه أگللها انتهينه

وي طولك من تمددت گلت انه راحوا اهلي
وحسبالي من اكبر گبل بيدك توخر حملي
ومن ووگع بإيد العدو محسب جنت تفزعلي
وهسه الهظم والهم صفن بعدك علي يتجلي

بدموعي بويه تمددت هيج وصرت يم طولك
وما تسمع انته ياعلي حسين انتهى يگلولك

گوم رجع يشمتون
بينك ما بين أم عون
وگبالك طاح حسين يلأكبر
…………………….

من بجتلك عيني
ضلمه كلها سنيني
وعمري يمك هسه راح ايصير دمعه
بدمعة احبن بيدك
روحي يبني تريدك
واليموت ابنه يشيب بويه ضلعه

خليني أكلك ياعلي وگلبي انته اسمع ؤنه
شگد صعبة تدري اعله الأبو من بيده يدفن ابنه
يمك متت لمن شفت بيدك الدم مو حنه
هسه انه حيل تهدمت والگلب شيب ضنه

ويچونً النار بفرگتك يا بويه هسه جروحي
ولو ما خدر زينب طلع وياك طلعت روحي

ورجـــع بيه أيعيلون
بينك ما بين أم عون
وگبالك طاح حسين يلأكبر
…………………….

گلبي زايد ضيمة
اشلون ارد للخيمة
وگوه أجرن بالنفس يل حاني ضهري
من شفتها جروحك
بحضني طلعت روحك
نار خليت بدليلي وانه صدري

أنفاسي كلهن ياعلي بعدك صفت مختنگة
شريان الأبهر من رحت شيب ترى من الحرگة
ومابيه أتحمل بعد وتريد حيل الفرگة
يمك وعطشان شكثر هيج صبحت عل ملگة

وب لوعة يمك سولفت والدمع تارس إيدي
وسمعوني من يمك گلت ياروحي راح اوليدي

وبنك مات أيصيحون
بينك ما بين أم عون
وگبالك طاح حسين يلأكبر
…………………….

هسه يبني الحيرة
الدنيا حيل ازغيرة
وغارت عيوني وتهدم حيلي
يلغبت عن عيني
والمن مخليني
هسه بس جرحك بقى ويشكيلي

وتهدمت لمن رحت من راسي حد اجدامي
وما بيه بويه وداعتك أوصل وطب لخيامي
مو سهله اشوفنك علي متمدد وگدامي
بعدك على حسين الهظم يل يتميت أحلامي

يابوية حيل توجعت لمن علي ودعتك
وعذرني خاف أمضى تحس من الجرح عذبتك

بعيوني ضاگ الكون
بينك ما بين أم عون
وگبالك طاح حسين يلأكبر
…………………….

الشاعر محمد البنداوي

للهجرة 1447
ميلادي 2025
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

((كل المشاهد مرعبه))
غيرن شكلي ولوني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°°°°
گالو التعبان يتوچه اعله إخوته
اعليمن اتوچه واخوتي كلها موته
التنذبح يمه هله ينذبح صوته

"صعدت الناگه لاچن چفي محروك"
"بس چف اعله چف بحبال مشبوك"
" ادهورنه يخوتي بطبت السوگ"

((لهاي المصايب ياهلي))
شيكفي دمع اعيوني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°
الهوه يضيگ ابصدر اليسلبونها
موذهبها الماخذينه اعيونها
إذن مشلوعه وتغير لونها

"شلعو من إذن بنتك رقيه"
"ترچيه ونزل دمها اعله اديه"
"بهذا الحال گلي شضال بيه "

((سيف الهجر بعد اخوتي))
بالطف ذبح ذبحوني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°°°
اشلون اگعدكم تشوفون المصيبه
أنه ام الخدر زينب موغريبه
منين أنه هسه ابوفاضل اجيبه

"خذيتو الحيل مني  من مشيتو"
"واحد گابل الثاني صفيتو"
"الكلام الي حچيته هم سمعتو"

((مخنوگه من جرة النفس))
من اسمع يشتموني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°
والجسد ضلن حوافر دايساته
لوا وخر احجاره لواحير بناته
هوه الي يشوف الرمح شله بحياته

يچوينه الضهر  وبحرةالشموس"
" أنه أول مرة إخوتها  بلاروس"
" الماطلعت بيوم بشوچهه ادوس"

((المثلي چبيره مدلله ))
ليش بحبل چتفوني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°°°°
منين حيله التنذبح كل العشيره
الچنتو الي اسموني زينب يااميره
عمري خلص ذني ساعاتي الاخيره

"ليش الطف خذه من عندي الإخوان"
"چنت اخت الگمر هسه ام الحزان"
"وكت خلاني اطبن هيج ديوان"

(( الماشافو خيالي بحلم ))
كلهم تره شافوني
(( شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°
سيد محمد الهاشمي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

لسان حال السيدة رقية تخاطب السيد زينب عليهم السلام

ما مغمضه من نَهَد حرگ الخيام
عمة تعبانة و اريــــــد شوية انام
هيمة و الحر قاسي
و لا كو فيي عباسي
وين انـــــــام
ـــــــــــــــــــــــــــــــــــــــــ ـــــــ
عمه زينب/ هذا مــن يا دين حادينه الحدانه
ما أضِّنه/ مُسـلم او لا عنـده ذرة امن الديانة
گلبه قاسي /و الكلام العيـــب ما فارگ لسانه
ما رحمنه /و ماي مــن أول امـس مـا شَرِّبانه

فاطمة و حيدر شِتَم وگت الاذان
و من نصـلي يوگعلنه ابخيـــزران
يعز عليَّ ســـب ناسي
و لا كو فيي عبـاسـي
وين انـــــــام
ـــــــــــــــــــــــــــــــــــــــــ
موت اشوفه/ يحدي بينه و يحدي ويانه عذابه
گبل ساعة /طگني چفه و طيحـاني اعله الترابة
صلفة عينه /ذاگه شـــوفي الله لا يحفـظ شبابه
چفه يوجع /من ضربني خدي من الضربة عآبه

يباوع إلنه عمه لا عيــــــنچ تدير
لا يجينه و هم يطگ خدي الزغير
خايفة ياحســـاسي
و لا كو فيي عباسي
انام
ـــــــــــــــــــــــــــــــــــــــــ
مـــا درينه /ويـن ماشي و لا عـرفنه شضام لينه
مـو دربنه./ هــــذا ما يشبه درب ارض المدينة
رت اسأله /و عاينت سوط و بعد فد شي بادينه
خفت ازعجه /عمه و يگّطِع شكو بيـده علينه

عمه زينب انتي اسألي من بعيد
و شوفي بله اشّــايلنه ابثاني ايد
شبعد راح انقـاسي
و لا كو فيي عباسي
وين انام
ـــــــــــــــــــــــــــــــــــــــ
بهالظهاري/ نِزِّلانة ابگـــاع خَــــضَّر شــوك بيها
و انه رجلي /حافيــة و اتـون عليَّه أمجــــرحيها
فكرة جتني /گلـت امدها اعبايتي و اغفه عليها
بس شفتها /رايحة و امن السيــــاط امشگگيها

انه لــو مــــا چفي لاويته الحبال
جان سويت الوسادة امن الرمال
زغيرة و بگد راسي
و لا كـو فيي عباسي
وين انـــــــام
ـــــــــــــــــــــــــــــــــــــــــ
بلگت الله/ و انه مشدودة ابحبل فــوگ الهزيلة
بهــذا حالي/ ألتقي ابراس الكفــــلنه و اشتكيله
راح اطلبه/ يمدلي رمحه و اصعد لنحره دِخِيلة
و عمة اگله /يابو فاضل إلحـگ امتـون العقــيلة

عمتي خيمة و السبي يمطر شرار
يابو جــربة الذبحت احلام الزغار
ضعنه يـــا نوماسي
و لا كو فيي عباسي
وين انـــــــام
ـــــــــــــــــــــــــــــــــــــــ
الليل اجانه /و روحي تشبه ليلهم يا عمة ظلمة
و هسه گلبي/ حـن عليَّه و رايـــــد الوالد يشمه
فرصه جتني/ أعتنيله و للصُبــــح راح ابقه يَمَّه
أروي شوگي /و ما انام النـوم يـم الغالي زحمة

نحره دافي و انـه بس يَمَّه استراح
و ارد اگله بويـــــة خنگتني الرماح
بايگــــــات أنفاسي
و لا كو فيي عباسي
وين انــــــام
ـــــــــــــــــــــــــــــــــــــــ
الحمدلله
#علي_حسين_الكناني
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

أتمنه اشيل الرايه
          من تطلع المشايه
       كل عام ازورك يحسين
         أنته الأمل والغايه
             ==============
     يـوم أربعينك مـا أنـامن ليلي
   اسمع حزن عن اليسر يحچيلي
    قصت رقيه اتگوم تهدم حيلي
        أختك اجت يامظلوم
          صـوب الـگبر عنـايه
       كل عام ازورك يحسين
           أنته الامـل والـغايه
              =============
     أتمنه تـطبع رايتك بمـتوني
ودموعي ترسم صورتك بعيوني
حتئ امن اموتن خادم يسموني
        ماعندي مثلك مولاي
        صاحب اوبيه اكفايه
      كل عام ازورك يحسين
          انته الامل والغايه
            ================
هذا انته غالي اوماكو مثلك غالي
كلمن يخدمك راسه يصبح عالي
يحسين الك موكب وسط دلالي
      تبقئ انته عايش وياي
       وبروحي عندك ثايه
    كل عام ازورك يحسين
       انته الامل والغايه
                ==============
من تطلع المشايه تاخذ روحي
يحسين تستاهل نحيبي اونوحي
رايتك بلسم بيهه تشفه اجروحي
     اسمك يداوي المجروح
       عالجت ناس اهوايه
    كل عام ازورك يحسين
       انته الأمل والغايه
                 ===============
يانظر عيني وبيك اشوف ادروبي
اشتاق الك كـل يوم يامحبوبي
ياسيدي اترجاك تمحي اذنوبي
      لجلك يبن حامي الجار
         أحضر أبكل قرايه
     كل عام ازورك يحسين
        انته الامل والغايه
                ==============
      الشاعر فاخر الشبيبي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي

وبذاك السوگ يحسين اشصار
وازغــار اكــبار ترمينــه احجار
شحچيلك يحسين
بس تهمل هالعين
يحسين اشصار
________
دخلنه السوگ والوادم تسب بينه
ماندري الذنب شنهو المسوينه
اسهام اعيونهم لمن تصد لينه
وماكو احد فزع يمنه ويحامينه

خويه اتمنيت كونك وياي
بنياتك هاي رادت حمـاي
خويه نروح لوين
بس تهمل هالعين
يحسين اشصار
______
اغمض اعيوني واتخيل تحوطوني
اتصور خيلكم تفتر على اضعوني
وافز من هالخيال وافتح اعيوني
والواقع يگول اخواني عافوني

مـن ارفع عين توگع عالراس
مره اعله حسين مره لعباس
شسوه وياي البين
بس تهمل هالعين
يحسين اشصار
______
تدگ اطبولهم والناس فرحانه
لهاي الناس فرجه ايزيد سوانه
الضعن يمشي وتروش الناس ويانه
اشما نندار بــحجــار اتلگانــه

مــره يضربون مــره يشتمون
لحگ يحسين شتصير ام عون
والــــناس امتانين
بس تهمل هالعين
يحسين اشصار
______
هم بهم علي السجاد خطواته
وي نگل الجدم تذبحني حسراته
مريض امگيد وعينه اعله عماته
تــــدگ بگلوبنه يحسين اهــاته

حـــــال السجاد اذانه هــواي
يحسين ايموت لوشاف الماي
يتذكـــركـــم زين
بس تهمل هالعين
يحسين اشصار
_______
مشينه اجساد والارواح عفناها
خويه ارواحنه يمكم نسيناها
العشره اوياكم ابصفكم دفناها
والراحت بعد چا وين نلگاها

خويه اتمنيت تطلع احلام
وانضل وياك لاكوفه وشام
يـــاروحي اتضلين
بس تهمل هالعين
يحسين اشصار
________
جديد
✍️احمد علي البغدادي
محرم 1447 هـ

((كل المشاهد مرعبه))
غيرن شكلي ولوني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°°°°
گالو التعبان يتوچه اعله إخوته
اعليمن اتوچه واخوتي كلها موته
التنذبح يمه هله ينذبح صوته

"صعدت الناگه لاچن چفي محروك"
"بس چف اعله چف بحبال مشبوك"
" ادهورنه يخوتي بطبت السوگ"

((لهاي المصايب ياهلي))
شيكفي دمع اعيوني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°
الهوه يضيگ ابصدر اليسلبونها
موذهبها الماخذينه اعيونها
إذن مشلوعه وتغير لونها

"شلعو من إذن بنتك رقيه"
"ترچيه ونزل دمها اعله اديه"
"بهذا الحال گلي شضال بيه "

((سيف الهجر بعد اخوتي))
بالطف ذبح ذبحوني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°°°
اشلون اگعدكم تشوفون المصيبه
أنه ام الخدر زينب موغريبه
منين أنه هسه ابوفاضل اجيبه

"خذيتو الحيل مني  من مشيتو"
"واحد گابل الثاني صفيتو"
"الكلام الي حچيته هم سمعتو"

((مخنوگه من جرة النفس))
من اسمع يشتموني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°
والجسد ضلن حوافر دايساته
لوا وخر احجاره لواحير بناته
هوه الي يشوف الرمح شله بحياته

يچوينه الضهر  وبحرةالشموس"
" أنه أول مرة إخوتها  بلاروس"
" الماطلعت بيوم بشوچهه ادوس"

((المثلي چبيره مدلله ))
ليش بحبل چتفوني
((شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°°°°
منين حيله التنذبح كل العشيره
الچنتو الي اسموني زينب يااميره
عمري خلص ذني ساعاتي الاخيره

"ليش الطف خذه من عندي الإخوان"
"چنت اخت الگمر هسه ام الحزان"
"وكت خلاني اطبن هيج ديوان"

(( الماشافو خيالي بحلم ))
كلهم تره شافوني
(( شماتي حرگو خيمتي))
وجهه بوجهه لاگوني
°°°°°°°°°°°°°°°°°°°°°°°°°°
سيد محمد الهاشمي
#جديد_محرم_الحرام_
@HxzEU1
#قناه_نشر_القصائد_المنبريه
#الناشر_مصطفى_المياحي