Республикӕйы сӕфт хӕзна: хуссарирыстойнаг нывгӕнӕг Гасситы Хсары фыртты фӕнды сӕ хистӕры кӕлӕддзаг хӕдзарӕй музей скӕнын

🔻13-ӕм майы Гасситы Хсарыл сӕххӕст уыдаид 95 азы. Кӕм цардис, уыцы хӕдзар ис Цхинвалы астӕу, Сталины уынджы. Нывгӕнӕджы фыртты рагӕй фӕнды сӕ фыды хӕдзарӕй музей скӕнын. Уыимӕ дзы канд сӕ фыды кустытӕ нӕ, фӕлӕ иннӕ нывгӕнджыты сфӕлдыстад ӕвдисын. Бинонты хъуыдымӕ гӕсгӕ дзы скӕнӕн ис нырыккон аивады фӕз.

Хсары фырттӕ «Сапӕ»-йӕн куыд радзырдтой, афтӕмӕй музеймӕ сӕ куыстытӕ бирӕтӕ радтиккой. Гасситӕм дӕр ис Кавказы зындгонд авторты нывтӕ.

💬 «Мӕ бон сӕ уырдӕм аласын нӕу, нӕ коллекци стыр у. Искуы Хуссар Ирыстоны кӕй бахъӕудзысты, ууыл нӕ зӕрдӕ дарӕм. Ис нӕм Хсары конд ӕртӕ стыр нывы. Тынг стыр нывтӕ сты ӕмӕ сӕм иумӕ кӕсын хъӕуы, трилогийы хуызӕн», — бамбарын кодта «Сапӕ»-йӕн фырттӕй иу, Цопан.

Йӕ ныхасмӕ ма бафтыдта, Хуссар Ирыстоны экспозици саразыныл зӕрдиагӕй кӕй бакуыстаид, фӕлӕ 2x3 метры нывтӕ кӕм равӕрой, ахӕм бынат не ссардта.

Хсары куыстыты фылдӕр хай сты Цхинвалы, сӕ иу хай — Мӕскуыйы. Республикӕйы национ музейы Гасситы Хсары куыстытӕй ис 15-20, Дзӕуджыхъӕуы дӕр 20 бӕрц сты, иу уый бӕрц та Тбилисы. Ӕдӕппӕтӕй алыхуызон музейты ис нывгӕнӕджы 100 куысты бӕрц.

Фӕлӕ музей саразын — нырма ӕнӕрцӕугӕ бӕллиц у. Хӕдзар кӕлӕддзаг у, йӕ цалцӕгӕн та ӕхца нӕй.

⚫️ Уæхи «СапÆ»-йыл бафыссут

Хуарзбӕл исӕмбӕлӕ: рухс федта фыццаг «Дыгурон ӕвзаджы хӕдахуыргӕнӕн»

🔻Чиныджы ис 2 мины бӕрц дзырды, арӕзт у дыууӕ хайӕ. Фыццаджы — 26 урочы, се 'ххуысӕй ӕвзаг сахуыр кӕндзӕн цыфӕнды адӕмыхатты минӕвар дӕр. Дыккаг хай ахъаз у бӕлвырд зонындзинӕдтӕ райсынӕн. Уыдон сфидар кӕнынӕн автор Тахъазты Федар бакуыста фӕлтӕрӕнтӕ ӕмӕ контролон куыстытыл дӕр.

💬 «2004 азы ныффыстон ирон ӕвзаджы хӕдахуыргӕнӕн. Куы йыл куыстон, уӕд раиртӕстон англисаг, немыцаг, испайнаг, сомихаг ӕвзӕгты хӕдахуыргӕнӕнтӕ. Сӕ иуӕй дӕр мӕ бон не сси дӕнцӕджы хуызы спайда кӕнын. Уӕд ӕрхъуыды кодтон мӕхи методикӕ. Ныр дӕр ууыл ӕнцой кодтон. Зӕгъӕн ис, ӕмӕ ирон дыгуронимӕ иу ӕвзаг сты сӕ структурӕмӕ гӕсгӕ», — радзырдта «Сапӕ»-йӕн Тахъазты Федар.

Автор байхъуыста дыгурон ӕвзаджы ахуыргӕнджыты хъуыдымӕ дӕр. Сӕ фиппаинӕгтӕм хъус ӕрдардта. Ныр уыдон дӕр чиныгӕй сӕ куысты пайда кӕндзысты. Фӕлӕ, хъыгыгӕн, дыгурон ӕвзаг амонӕг педагогты къухы ӕнгуылдзтыл дӕр ис банымайӕн.

💬 «Университет дыгурон ӕвзаджы ахуыргӕнджыты нӕ цӕттӕ кӕны. Уӕдӕ хъӕугӕ методикон ӕрмӕг дӕр нӕй. Дыгурон ӕвзаг ахуыр кӕнынц ӕрмӕст дыккаг къласы онг, уый дӕр Дыгуры ӕмӕ Ӕрӕфы районты цалдӕр скъолайы. Ныртӕккӕ ӕртыккаг ӕмӕ цыппӕрӕм кълӕстӕн дӕр аразынц чингуытӕ», — бафтыдта лингвист.

➡️ «Дыгурон ӕвзаджы хӕдахуыргӕнӕны» тираж у 500 экземпляры. Ныммыхуыр ӕй кодтой Уӕрӕсейы адӕмты хӕлардзинады университеты рауагъдады. Чингуытӕ Дзӕуджыхъӕумӕ сласдзысты майы кӕрон. Сӕ иу хай сын байуардзысты скъолатӕ ӕмӕ чиныгдӕттыл.

⚫️ Уæхи «СапÆ»-йыл бафыссут

«Уазӕгуарзон» индустри: Цӕгат Ирыстоны туристон афон бырондӕттӕ цухӕй ӕмӕ чъизи туалеттӕй кӕй райдыдта, уый гидты тыхсын кӕны

🔻Хъуыддаг афтӕ цӕмӕн у, уый экскурсоводты дисы ӕфтауы. Ау, бырондӕттӕ сӕвӕрын ӕмӕ сӕ сыгъдӕг кӕнын ахӕм зын куы нӕ у. Уӕдӕ туалетты фарста дӕр иуварсгонд нӕма ӕрцыд.

💬 «Туристон афон бӕргӕ райдыдта, фӕлӕ быронӕй нӕ зынӕм. Биотуалеттӕм та дӕс метрӕй хӕстӕгдӕр бацӕуӕнтӕ нӕй, нӕ сӕ ӕфснайынц. Уӕдта сӕ бынтондӕр куы нӕ сӕвӕрдтаиккой. Мыййаг сӕхигъӕдӕй куы нӕ сыгъдӕг кӕнынц. Мах ӕрмӕст Цӕгат Ирыстоны нӕ аразӕм экскурситӕ, фӕлӕ сыхаг регионты дӕр. Уавӕр ахӕм никуы у», — рахъаст кодтой «Сапӕ»-йӕн гидтӕ.

Диссаг, фӕлӕ туризмы комитеты минӕвӕрттимӕ сӕ ныхас кӕрӕдзийыл нӕ бады. Дзуапдӕттӕг бӕрнады куыд зӕгъынц, афтӕмӕй туалеттӕ ссыгъдӕг кӕнынц къуыри дыууӕ хатты. Дзывгъис ӕмӕ Дӕргъӕвсы цы модулон туалеттӕ ис, уыдон та уӕвгӕ дӕр айсынвӕнд кӕнынц, уымӕн ӕмӕ сӕм хӕстӕг ӕндӕртӕ фӕзынд.

💬 «Санитарон агъуыстытӕ ис Буроны, Балта ӕмӕ Фыййагдоны туристон информацион центрты, куыстытӕ кӕронмӕ фӕхӕццӕ кӕнынц Цъӕй ӕмӕ Зӕрӕмӕджы. Федералон ӕххуысы фӕрцы ма афӕдзы кӕронмӕ байгом уыдзӕн цалдӕр туристон информацион центры, туалет сӕ алкӕцыйы дӕр уыдзӕн», — зӕгъынц дзуапдӕттӕг бӕрнады.

⚫️ Уæхи «СапÆ»-йыл бафыссут