البارت 76

شافت له: في الالم بالصدر
يمين: ايوه
رؤى: بالعاده المرضى مايقدرو يتحملو الالم كيف انت ساكت كذا ؟
فاروق وقف: اذكري الله ي بومه الشؤم
يمين شاف له وضحك ورجع قال: دكتوره لو كان عندك وجع في ضرسك وكسرتي يدك ب اي الم بتحسي
رؤى: اكيد يدي يا زعيم
شاف امامه بالم: كذالك انا يا دكتوره، عندي وجع ثاني !
فاروق : اسمعي بدون كثره هدره صلحي المغذيه وتوكلتي
خرج وهي تشوف بعده عندما قال لها: دكتوره هل بقدر اعيش ذي الاسبوعين في شي ضروري اعمله
شافت له ورجعت تصلح المغذيه والدموع لمعت في عينها: عمر طووويل يا زعيم ربي يمدك به
شاف لها: ههه عمر طويل والدموع في عينك
بتحاول تتكلم : انا زعلانه على اخو صاحبتي مات اليوم
قالتها وانفجرت بالدموع وهو يشوف لها بصمت وقال: مات او عادوه بيموت ؟
كانت تتكلم وهي تمسح دمعاتها: سيدي بخصوص الدخان انسيه خالص ، اليوم لازم ترتاح وتنام هنا ماتطلعش الدرج ، وكما قلت لك استخدم الاكسوجين اكثر ، والدواء التزم به، ولا تجهد نفسك كثير، بكره ان شاء الله بتكون احسن
يمين: يعني بيكون معي هذي الاسبوعين
هزت راسها بنعم  والدموع تتساقط وهو يشوف لها وهي تمسحهم بسرعه: المعذره ، مدري مالي اليوم
خرجت وهو يشوف بعدها وهي تبكي:....
رد ظهره على السرير بتعب ومجرد ما كملت المغذيه قام بيروح المكتب وشاف فاروق جالس هناك: فاروق روح انا تمام
وقف: ماقدرش ي زعيم بنام هنا على الكنب
........
قام الصباح وهو يحس نفسه احسن ، عندما دخل فاروق : سيدي ابو الولد حاشد رجاله وهم الان امام الفله ومسلحين ويشتي يدخل
اقترب: اكلم القناصين حقنا يصفوهم
يمين: لا اكيد شرف الذي ارسلهم ، هم متظرين مني الزله
فاروق: بخلي واحد من القناصيين يضربه رصاصه في راسه واتحديهم يطلعو او يثبتو انه مننا
هز راسه كمان ب النفي: لا اطلب لهم الامن !
فاروق : حاضر
يمين : وخلينا نطلع نشوف من فوق ايش بيحصل
طلع معه
وعصام بيكلم شرف: طلبو امن المنطقه ذيك
شرف: مثل ماتوقعت مابيوقع بسهوله
كان الرجل بيصيح ويضرب رصاص بشكل عشوائي ويمين يشوف من الدور الثاني ومبتسم وفاروف جنبه
وصلو الامن وماقدرو يفرقوهم بسهوله
الضابط: لو سمحت الذي بتفعله فوضى خلينا نتكلم بالتفاهم
ابو الولد: فووووضى ؟ واللي عمله هو بوجهه ابني ؟ وين العدل لما ماقدرتو تسجنوه
فاروق: اوبا بيدور العدل
يمين ضحك: هههههه غريبه حق ابنه عدل وحق بنت الناس ماشي، هولاء الذي بيفعلو الفوضى وبعدين يطالبو بالهدوء
فاروق: الامن مش قادر لهم بينسحبو او ايش ؟
يمين: لا بيطلبو الدعم وياخذوه
فاروق: بيدفع لهم وطلعوه
يمين: اصبر بس انا بقول لك كيف بردها لهم كلهم
........
#روايه #رواية #روايات

البارت 77
رجع المغرب كان بيكلم زوجته: روزان تغدت ؟
زوجه عزام: ايوه خرجت الظهر ورجعت الغرفه
تنهد وهو يشوف امامه
زوجه عزام: اصبر عليها
عزام: صابر صابر بس اشتي ارتاح
........
له اربعه ايام هو في اداره الامن كان اتصل بالبيت عندما دخل شرف: شفت الانترنت
عصام: ايش في
شرف فتح بيوريه: المنشور هذا غزا الترند حرفيا
عصام بيشوف وهي لواحده من الناشطات " لما الامن يعجز عن شي يرجعو يرجمو التهمه فوق المحامي تيمور ، للمعلوميه قبل مده تشوهه وجهه بنت اسمها شذى والان في حد حرق وجهه الذي شوهه بعد ما حكمت له المحكمه بالبراءه وهم من اتهمو ؟تيمور ، لهذي الدرجه بتشوفوه بيفعل عملكم بياخذ حقك الناس مع العلم انه بريئ"
شرف: بدا الكل بينبش على موضوع البنت رغم انه محد كان يعرف شي وانه القضاء خرج المتهم ، والنيابه احاله القاضي المسؤول لتحقيق والموضوع كبير المنظمات تدخلت والناشطين في صف تيمور والشارع اصبح يغلي
عصام: يعني نفذ تهديده !
شرف: في كمان مقابله مع البنت بتدافع عنه وتقل انها ماسبق وقابلته اصلا وانه النيابه خذلتها والدوله ومحد اخذ حقها والامر اصبح اسوء الان
عصام ضرب بيده الجدار: النذل
شرف: اتصلو لي من الداخليه وقالو انه اسير انا وانت نقابله ونطلب منه يوقف الحمله !
عصام وقف بضبح: نطلب منه !
شرف وقف: ضروري نسير ! اذا ما وقف الموضوع الان وطلع يهداء الشارع الامر بيزداد سوء !
عصام: لهذي الدرجه صعب علينا
شرف: خلينا نروح وانا كلمتهم بكل شي والاسبوع الجاي فاعلين اجتماع لنا كلنا مع اكفاء الموضفين هنا ونشوف حل لموضوع يمين حل جذري حقيقي
عصام وقف: طيب
..........
بعد الاكسوجين ودخل غرفته يغير ملابسه فتح الدرج وشاف ملابس لونه خرجهم كلهم بضبح وفتح البلكونه وبيشوف ل اسماعيل: اسماعيل
التفتت له: نعم ي زعيم
رجم له الملابس: حرقهم !!!
شاف له بتردد ورجع اخذنه وحرقهن وهو يكلم نفسه" الزعيم مفكر لو حرق ملابس بنته بتحرق صورتها وذكرياتها من عينه "
وهو دخل وورجع ياخذ له شميز ولمح فنيله من حقها وقعت من يده واخذها وغلق الدولاب وضرب راسه عليه " يا الله ياروز والبلاء الذي بليتيني "
رجع على طرف السرير والفنيله في يده: اللي هزمني انه هي بنتي رضيت او مارضيت بنتي ! اعترفت او ما اعترفت بنتي غصب عني ! وضعتني امام الامر الواقع !
غير ملابسه وفاروق طلع: سييدي
خرج: ايش في يافاروق
فاروق: شرف وعصام تحت اخليهن يدخلو
يمين: دخلهم وخليك معهم لما انزل
فاروق: حاضر
دخل معهم عندما نزل وهو يحاول يخفي تعبه : حححم اهلا
قالها وجلس على مكتبه : السيد شرف كريم بالزيارات ذي الايام
شرف: يمين انت دخلت الراي العام

#رواية #روايه

البارت 78

شرف: يمين انت دخلت الراي العام
يمين بتعجب مصطنع: انا !! الله المستعان ي سيد شرف انا للان ماعلقت على الموضوع حتى
عصام: انت بتعلق الان وتهداء الامور
شاف له بنظرات اخافته ودخلت الريبه قلبه ثم قال: اوه. فندم عصام نسيت ما ارحب بك صار لي فتره ماعاد شفتك !
شرف: يمين رجاء امتص غضب الشارع وخلي الامور تهداء
رد ظهره على الكرسي وقال: سيد شرف انا مش قلت لك الراي العام بيتدخل اذا ما تدخلتو
شرف: احنا قبضنا على الرجل والدعوه مسحوبه
يمين: تمام بهداء الشارع بس ما اظمنش انه مايرجع يغضب
شرف وقف وعصام معه : طيب ، وشكرا على تعاونك
يمين وهو يشوف لعصام : العفو
شرف طلع وعصام يكلمه: مازال بيشوف لي بطريقه مخيفه
شرف: انا متاكد انه عرف انك كنت من ضمن الذي اقتحمو مقرهم زمان
عصام: معناتها بيثار ل اصحابه
شرف: بالضبط ، الان خلينا نرجع الامن ونشوف ايش بيقول للاعلام عشان يمتص غضب الشارع

.......

كان امام المكتب عندما دخل فاروق : سيدي في وكالات اخباريه يشتو يسمعو رايك بخصوص القضيه
شاف له: خلي الوكاله اللي بتشتغل بها ساره تجي وتعمل اللقاء ساره
فاروق : حاضر
دقائق ووصلت
كان فارق معه داخل عندما وصلت رؤى اسماعيل اشر براسه لها: شوف من جاء
حمزه التفتت لها : البومه
ووقف: خير ؟
رؤى: جيت اشوف الزعيم
حمزه : مشغول الان مع الصحافه روحي وبكره تعالي
شافت له بعناد: مابروحش وبعدين ايش خير ذي محسسني البيت بيتك
حمزه: قلت لش مشغول
رؤى: بدخل اجلس بالصاله لما يفضى
حمزه وقفها: ماينفعش تعالي هنا لوما يخرج فاروق وكلميه يدخلك
جلس جنب إسماعيل وهي اقتربت: يسعم بستاذن من فاروق عشان اشوف الزعيم ؟ انا مثلي مثلكم من حقي اشوفه او تعودتو كلكم رجال وخلاص مفكرينه ملككم بس
اسماعيل: شوفي نفسك مفكرته زوجك متى ماتشتي شفتيه
حمزه ضحك وهي جلست بقهر: اسماعيل انشغل بنفسك طيب ومادخلكم بي ورقمه معي لو ترجعوني بكلمه واشتكي له
حمزه : شوفي انتي حيا الله دكتوره تشوفيه وتعالجيه وخلاص ذا شغلك فهمتي
رؤى: انا معه دكتوره وانا معه رؤى ومثلي مثلكم وغصب عنكم
اسماعيل شاف امامه:مالك منها ذي مريضه

#روايه #رواية

البارت 79

كانو منتظرين يبث القاء على احر من الجمر عندما نزل على صفحه القناه فتحه عصام
ساره: استاذ تيمور بخصوص قضيه الاخت شذى اللي هزت الراي العام واتهمت انك الذي احرقت وجهه المعتدي عليها ايش ردك ورايك بالموضوع
يمين : ساره احنا تعودنا منهم يتهمونا وكإني شماعه يلقو علي اتهاماتهم
عصام: يابريئ
يمين يكمل : اولا موضوع شذى عار على القاضي الذي حكم للمتهم بالبراءه لكني واثق من القضاء انه بيحاسبه على هذا ، بعض القضاه مايفهم ان دوره مهم واساسي وانه في اهم مركز على الاطلاق الغلطه الواحده تكلف كثير،القضاء هو الركيزه والاساس ، لو القضاء ما اخذ حق الناس بالعدل بيلجئ الناس انهم ياخذو حقهن ب انفسهم وهنا المصيبه ي ساره لانه بتعم الفوضى بالبلاد ، انا من هنا اوصي القضاء انه يتخلص من هذول الناس الذي يشوهو سمعته وكمان انا اتبرئ من التهمه لانني محامي واعرف الضرر لما كل واحد ياخذ حقه بنفسه
شرف شاف لعصام: وكإن الذي بيتكلم واحد مانعرفه
ساره: بخصوص انه حاول قتلك وسط بيتك
يمين : انا بلغت الجهات الامنيه وانا اثق بنزاهتها لكن لو الشخص ذا طلع من السجن اعتقد الموضوع بيكون واضح وبنفهم لو في تلاعب بالقانون على حساب افراد

عصام: قضيه عليه !
شرف: قضي على الكل
عصام: الان ولا بيقدر يطلع حتى بكفاله ! اتخيل لو يطلع كيف بيكون رده فعل الشارع !!
شرف: قلب الطاوله علينا !

ساره: طيب الشارع غاضب بسبب الموضوع هذا ف ايش بتقول له
يمين: بما انه القضاء فتح تحقيق بالموضوع والانسان ذا الذي تهجم وفعل دوله داخل الدوله هو الان بالسجن اظن ان الشارع بيرجع يثق بالدوله، طالما الدوله مستمره في عملها بشكل نظيف، وانا بقول لهم انه انا مثل ما انا بظل اناضل من اجل العدل وحقوق الناس
........
روزان كانت بالغرفه مغلقه وهي تتذكر " لو طلع عقلي صح بتالم ياروز جداً"
فتحت الانترنت شافت الفديو وهو يتكلم كانت تشوف له والدموع مليان عيونها " الناس بتسمع كلامك ي يمين وانا الوحيده الذي اشوف وجههك ! وحشتني وغير كذا ملامحك متعبه متعبه جدا وانا السبب ! مابقدر اسامح نفسي انا عاهدتك ونقضت عهدي "
......
كانت منتظره هناك عندما خرج الصحافيين وفاروق وراهم اقتربت: ماباقي حد عند الزعيم ادخل
اسماعيل ب استهزاء: ادخل !؟ مافيش حتى استاذن
التفتت له: مابستاذن من حد عشان اشوفه
فاروق شاف لها شوي ورجع اشر براسه: ادخلي عتلقيه بمكتبه
مشت وهو جلس جنب اسماعيل وحمزه يتكلم: كيف سمحت لها كذا تدخل
فاروق: بعدين بتتصل لزعيم وتنزل دموع التماسيح ذيك وتقل ماخلوني ادخل ويرجع يصيح مثل المره الاوله خليها تدخل، وبعدين يمكن تقنع الزعيم يروح المشفى !
#روايه

نكمل الروايه او نسيتوها 😂

البارت 80

..وبعدين يمكن تقنع الزعيم يروح المشفى !
كان ماسك الشيشه عندما التفتت له:حصلنا لك عروسه ي فاروق
شاف له: اسماعيل !
إسماعيل: ليش مالها رؤى
حمزه انفجر ضحك: ههههه عتكون تمكنك انا احسن دكتوره صدر بالمنطقه
فاروق: اعوذ بالله لو يكملو البنات واصلا هي مناسبه لك ي حمزة
حمزه: الله لايقولها ، واحده مغروره ومستفززززه
اسماعيل : بس بتحب الزعيم قووي
فاروق: جدا ي اسماعيل
حمزه: خلاص نزوجهاا له
فاروق: هههههههه وبعدين ايش بتفعل السيده زوجته عادك ذاكر لما جاءت اخت سيف كيف عملت
حمزه كان بيده شاي اشترغ به وهو يضحك: هههههههههههههههههههههههههههه والله جلست اضحك يومين المشكله حتىالزعيم ماقدر يسيطر عليها رجع صرف البنت
فاروق:كذا حال الواحد لما يسيطر عليه قلبه
اسماعيل: بس انا احترم السيده روزان على الاقل في حالها ،اما لو يتزوج رؤى والله لتورينا الويل وتخلينا خدم لها
فاروق: ههههههههههه

وصلت هي دقت الباب ودخلت وهي مبتسم: كيفك
يمين شاف لها واشر لها بيده تجلس: اهلا يا دكتوره تفضلي
رؤى:كنت ماره من هنا قلت اطل عليك
يمين : الحمد لله احسن
رؤى: وعاد بتكون احسن اكثر لو تجي معي المشفى*
قاطعها:رؤى تكلمنا في هذا الموضوع
وقفت: سيدي وقتها مابتعيش اسبوعين او شهر بتعيش سنه سنتين ثلاثه
وقف هو واقترب امامها: دكتوره رؤى عمر الانسان غير محدود ايش عرفك اني بعيش سنه او ثلاثه ممكن اموت بحادث سياره او مقتول
شافت له بقلق: لا سيدي لا تقولها
شاف لها بهدوء وهو ملاحظ قلقها عليه ثم قال: رؤى الدكتور لازم يكون قوي وما يضعف امام مريضه
نزلت عيونها وهي عارفه انه يقصد القاء الاخير عندما بكت ورفعت له عيونها وهي ممتتلاءه بالدموع: بس انت مش مريضي ! انت سيدي! انت افضل حد قابلته بحياتي ، لولا الله ثم انت اني الان اشحت بالشارع ،لولاء الله ثم انت اني مت مع اهلي جوع ! انت دفعت ديوني ،دفعت التزامتي وكملت درساتي العلياء بفضل الله ثم بفضلك! دفعت ديه اخي ، دعمتنا ماديا ومعنويا ولا مره لجئت لك وتخليت كيف تحسب نفسك بس مريضي ؟؟؟ انا وكل موضفي المشفى ممنونيين لك
سكت وهي خرجت بقهر وهو يشوف بعدها
اول ماخرجت التفتو لها الثلاثه وهي تمسح دمعاتها وتمشي
وفاروق وقف بقلق: بروح اشوف الزعيم
بيوقفو جلسهم: لو في شي بقول لكم

كان هو واقف امام مكتبه ورجع شاف للكنب يحس انه محتاج يرتاح  وهو يحاول يتوهه نفسه عندما حصل سوار الخرز حقها جنب الكنب واخذه بيده " بنتي !" رجع على الكنب والدموع لمعت في عينه " مش قادر ! من من لما رحتي وانا احاول اتوهه نفسي بس مش قادر ! انا مشتاق لك جداً ، ماقدرش اتخيل رده فعلي لو اشوفك بهذه اللحظه ! "
#روايه #رواية

البارت 81

كان يمسح سوارها بيده "عمري ماتوقعت ان الانسان ممكن يحب حد بهذي الطريقه ! انا من شده ما احبها شكيت اني قد حبيت قبلها اصلاً ! ايش العمل معها ومع امها ، روز وضعتني بموضع صعب"
اقترب من مكتبه ويمسح سوارتها بيده عندما دخل فاروق : سيدي
التفتت له
فاروق: انت بخير
هز راسه: تمام يافاروق
رد ظهره له: فاروق لما تكون تجي رؤى كون خلها تدخل لا تكونو تزعجوها او تنرفزوها
فاروق: ليش اشتكت لك
يمين : لا
وشاف لسوار بنته بيده وقال: فاروق سير ادي بنتي !
فك عقده حواجبه بدهشه !
ثم ابتسم وقال: حاضر
طلع وهو مبتسم وشاف لحمزه خارج: بتجي معي ندي بنت الزعيم
حمزه وقف وهو طلع السياره وطلع جنبه: فاروق ايش بتقول
فاروق: اول مره الزعيم يتنازل بس حلو لانه غيابها متعبه نفسيا وجدا
حمزه شاف امامه ب ابتسامه ...

كانت هي مغلقه على نفسها وتشوف للونه امامها اللي بتحاول انها تحبي وهي تكلم نفسها : اشتقتي ل ابوك ي لونه ؟ تتوقعي كيف حاله الان
سمعت صوت الباب واقتربت من الشباك بغرابه عندما خرج عزام وفتح ودخل فاروق الحوش وهي تكلم نفسها بدهشة: ذا فاروق ؟ ليش جاء لايكون ارسله يمين ياخذ لونه مني ؟ او يشتي ينتقم مني او يقتلها ؟ بس يمين مش كذا !
كان هو بيكلم عزام: المحامي يشتي يشوف بنته !
عزام : طيب بدخل اكلم امها
دخل وهي متوتره ودق الباب عليها: روزان جهزي بنتك ابوها يشتي يشوفها
رده : طيب شوي اغير لها ملابسه
اخذتها وغيرت ملابسها وهي قلقه" بس مستحيل يمين يحبها جداً ، ايش ذي الوساويس اللي براسي"

#روايه #رواية #روايات

طبعا نحنا قربنا نكمل بس انا اريدها تكون مكتمله النهايه وما ابتر نهايتها مثل روايه رحيل عشان اني متعبه، لهذا انا اتوقف عن الكتابه افضل من انه اعمل نهايه مبتوره، لكني كلما شعرت بتحسن اكتبها ..❤️

البارت 82

فتحت لعزام وحاول ياخذ البنت وكانت خايفه منه وتبكي وروزان تشوف لها وهي خايفه عليها، اول ماخرج بيمكنها فاروق كانت مازلت تبكي بس لما اقترب حمزه عرفته ومدت ايدها واخذها وضمها بشوق: وووحششششتيني ، هذا انا عاد ابوك
كانت هي تحاول تشوف من خلف الباب وقد بتبكي بس لما شافت فرح حمزه بها اطمئنت روحها شوي
مكنهم عزام وحمزه اخذها وطلع السياره جنب فاروق: طلعتي مش سهله ! بنت الزعيم مره واحدة
فاروق يضحك: هههه خلاص ي حمزه ماذلحين قديه السيده حقنا

غلق الباب بيدخل ولمحها وهي بتدخل غرفتها وواضح مقهوره وقال بسرعه: لو في شي بينك وبينه كلميني باخذ لك حقك !
وقفت وهي راده له ظهرها وضحكت بمسخره وقالت: حقي ؟؟؟ تاخذ لي حقي ؟
التفتت له : من ياخذ لي حقي منك انت ي عزام !
اقترب: روزان اقسم بالله اني نادم ! الله اخذ لك حقك في انه معيشني بندم ذي الفتره كلها وما اسوء من شعور الندم ! شوفي شكلي وكيف اختلفت ملامحي ! روزان "قالها بالم مختلط بندم " انا اسسسف ابوس يدك وراسك اغفري لي !
كانت تشوف له بقهر : اسف ؟ هه ؟ اسف ي عزام ؟ على ايش والا على ايش ؟ انت طعنت شرفي ي عزام شرفي وانت اخي وابن امي وابي وشقيقي والمفروض اكثر حد تعرفني ! انا مازعلت من حد غريب اتهمني ي عزام اذا كنت انت ماصدقتني وانت تعرفني من بيصدقني ؟ عزام انت دخلت بشرفي وانا اختك ! وحاولت تقتلني ي عزام تقتلني وكاني دجاجه مش روح بني ادم ! وغير كذا قلت ب اداره الامن قتلتها عشان شرفي ! فعرف الجن والانس فعلتي الذي مافعلتها ! تخيل لو مت ياعزام كان بقي الناس ينهشو في لحمي بذنب مافعلته الناس ظالمه والسنتهم تملائها لحم بعضهم  ! تعرف ي عزام لو بينك وبين الجنه ذنبي هذا ماغفرت لك !
ماقدر يتحمل اقترب وضمها بقوه: لا ي روزان لا تقولي هكذا اسالش بالله سامحيني رجاء ي اختي رجاء
بعدته : عزام لولا الله ارسل لي الشخص هذا الذي اخذني بعد ما نبذتوني كلكم ! قبلني وتزوجني وعيشني بعزتي وكرامتي في بيته ، بعد ما كنتو تنظرو لي مثل حد به مرض معدي الكل تجنبني هو الذي قبلني ! هو الذي عزني لولا الله ثم هو ماكنتش اقدر اتخيل ايش كان حصل لي وغير كذا طلع برائتي ما خجلش مني ودس راسه بالتراب ي عزام !!!!! والله لو كنت فعلت مافعلت ما استحقيت ذاك العقاب ! الذي لا قال عليه الله ولا رسوله !
عزام: روزان مافات مات وانا الان امامك واحد جديد ي اختي
فكت يده بتدخل غرفتها وهو وقفها عندما قال: ماسالتي عن ابراهيم وين هو ؟
عزام يكمل : ابراهيم سافر مع زوجته مريض بيعمل زراعه كبد بعد يومين  ، كلمته انك جيتي وارسل لك تسجيل صوتي وماقدرت اسمعك ..

#روايه #رواية

البارت 83

كلمته انك جيتي وارسل لك تسجيل صوتي وماقدرت اسمعك لانك مش عاطيتني فرصه
التفتت له وهو شغل الصوت " ما اعرف كيف ابدا التسجيل ياروزان سجلت وحذفت وسجلت وحذفت ولا عرفت ايش اقول ، لكني بقول لك كيف احالك ي اختي ، اختي الوحيده وشقيقه دربي ورفيقه طفولتي ، جزئنا الطيف بالبيت انتي جانبنا الين، اطيب قلب قابلته على الاطلاق ، كنتي مثل السكر بالبيت ، وكما كان يقول لك ابي الله يرحمه روزتي ، انا عارف ان الاعتذار متاخر والندم فات اوانه وعارف انك تغفري لنا شي صعب، احنا تهورنا واخطائنا وجل من المخطئ ، لكني وعزم ندمنا على مافعلنا واكثر ندمنا انه ماسمعناك، كنتي مثاليه ياروزان، دئما ماكنتي تتجاوزي زلاتنا ، انا تاعب ي اختي وصوتي واضح وبالكاد اكلمك، ما اقول هكذا عشان ابتزك عاطفياً او اخليك تسامحيني شفقه بحالي ، لكني اقول لك هكذا عشان تعرفي ان العمر اكبر دافع للمسامحه لان الموت ماينتظر احد، واحنا انتظرنا نلتقيك وتسامحينا وهذي فرصتنا الاخيره ، ماتعرفي كم مرات جيت انا وعزام ل امام بيتك وماقدرنا ندخل ومازعلنا هذا خطائنا، لكن العمر بيروح من يدي طمني قلبي ياروزان "
اول ما كمل الصوت اقتربت واخذت التلفون من يد عزام وسجلت له: ابراهيم !! انا مش عارفه انك تعبان ! مهما كان ماتهون علي ، وانا يعلم الله اني سامحتك من كل قلبي ، روح ي اخي ربنا يشفيك
قفلت وهو مسك التلفون بتمشي مسك يدها: وانا
ماقدرت انفجرت بالبكاء واقترب هو وقبل راسها وضمها وغمرت عيونه الدموع:انا من كل قلبي نااااادم واسسسسف
بدلته هي ضمته وبصوت اختلط بالدموع: عزام
كان يتكلم ودمعاته تنزل امامها : انا تهورت لكني ندمت
عندما قالت:سامحك الله ياعزام !
.......
كان بمكتبه اول ما وصل فاروق مع حمزه فتح الباب ووقف هو : ي هلاااا
مجرد ماسمعت صوته بكت وكانها فقدته وميزته ولكن ماعرفت تعبر اقترب ومدت يدها لحظنه وضمها بقوه " وحشتيني ي بنتي اقتربي هكذا عبي الفرغات اللي تركها غيابك في قلب ابوك ، وكإنك قطعتي الناقصه والان انا اكتملت "
حمزه: ههههه واضح اشتقت لك ي زعيم
شاف له: وفي هذا كلام ي حمزه اكيد بتشتاقي لي مش ابوها
كان يمسح دموعها وهو تحاول تتمسك برقبته خايفه حد منهم ياخذها وفاروق يتكلم: سيدي واضح جيناتك فارضه نفسها
يمين: هههه من اي ناحيه الشبهه ؟
فاروق: احسها ذكيه وسريعه البديهه وكمان في شبهه واضح ، وكانه بتكون نسخه منك
شاف لهه شوي وقال: ان شاء الله افضل
كانت متمسكه به : واضح انها تشتي شوي من الوقت مع ابوها
ضحكو وخرجو وهو يكلمها : تعرفي ي لونه ، والله العظيم لو كان عندي علم انك بتجي لدنيا واحبك كل هذا الحب ماكنت دخلت هذا الطريق..
#روايه #رواية

البارت 84

كانت متمسكه به : واضح انها تشتي شوي من الوقت مع ابوها
ضحكو وخرجو وهو يكلمها : تعرفي ي لونه ، والله العظيم لو كان عندي علم انك بتجي لدنيا واحبك كل هذا الحب ماكنت دخلت هذا الطريق من اوله لكن الان ابوك غارق بالدماء وايديه ملطخه !
اقترب من المكتب واتكئ عليه وهو يقبلها ويحاول يشبع منها : مش عارف ايش العمل مع امك ، انا زاعل منها قوووي وقلبي متالم لكني محتار اسامحها او لا ، لانه ماعاد بالعمر متسع للبغضاء ي بنتي ، ماعاد بش معي وقت اغضب به من احد!
....
كانت هي مع عزام وزوجته بالصاله وهي متوتره: مارجعت للان خايفه ياخذها قلقه قوي
عزام : اهدائي اكيد بيرجعها
روزان: ولو مارجعهاش ي عزام
عزام: لكل حادث حديث،  بس ياختي  البنت ما لها الا ساعتين هناك اصبري
.......
كان يتكلم مع شرف : قال انه شافها تدخل الحي اكثر من مره ولانه الحي من الداخل خطير هو ماقدرش يتاكد الا اليوم مر وكانه عابر بعدها وتاكد انها بتدخل الفله
شرف: يعني الدكتوره بتعالج يمين ؟ وانا اقول اخر مره كان متعب
عصام: ذي ورقه ثمينه لايمكن نضيعها ، الدكتوره مش من رجال يمين يعني ممكن نضغط عليها ونخليها تموته
شرف: تتوقع بتقبل ؟
عصام: نجرب بنستخدم معها كل شي لانه هذي افضل فرصه حصلنا عليها مانقدرش نطيرها من ايدينا !!!

#روايه #رواية

البارت 85

خرج وفاروق بالصاله وكلمه : تعال رجع البنت ل امها عتفكر اني خطفتها الان
فاروق ضحك واقترب مد يده بس تمسكت ب ابوها قوي ماعاد سخي: اسمع كلم حمزه يمكن تروح عنده
ناديه ودخل حاول هو كمان بس كانت متمسكه به قوي تنهد وشاف لفاروق: هات الدراجة حقها وانا بتركها عليها وانت خذها ي حمزه يمكن لو اتركتها تقبل
اديها فاروق وهو تركها عليها بس ماجرد ما اقترب حمزه رجعت لعند ارجل ابوها وتشوف له وتبكي وتمد ايدها شاف لها واخذها
وفاروق يكلم نفسه" بياثر به بكائها قوي عاد المها "
سحب نفس عميق والتفتت لحمزه: اقول لك ! امري الى الله روح ادي امها !
فاروق رفع حواجبه ب استغراب ويكلم نفسه" بهذي السهوله بيسامح الزعيم السيده روزان على غلطتها ذيك !!"
شاف للونه وهي متمسكه برقبه ابوها ويكلم نفسه" البنت بتاثر به قووووي اكثر مما توقعت ".
حمزه ابتسم: حاضر
خرج بالسياره وروزان متوتره وتمشي بالصاله وعزام وزوجته مش قادرين يهدوئها عندما دق حمزه الباب والتفتت بسرعه: الحمد لله هذي اكيد لونه !
اقتربت وعزام خرج فتح وهو حمزه : الاستاذ تيمور امرني اجي اروح زوجته يعني كلم السيده روزان تتجهز
عزام استغرب ودخل وهي مستغربه: وين لونه
عزام: قال انه المحامي يشتيك ترجعي البيت
رفعت حواجبه بدهشه: ااايييش
عزام: كيف يخلي السواق حقه يرجعك المفروض يجي هو
بيكمل كلامه بس لفتت انتباهه ملامحها اللي تلالاءت وكانها يتطير من الفرح : قال ارجع البيت !!!
كان مستغرب ماعطته مجال دخلت لبست: يالله بروح
عزام وزوجته مستغربين
شاف لها: روزان متاكده !! اجي معك
شافت له: لا لا لاتقلق بكون تمام
طلعت وهو يشوف بعدها دخلت السياره وبدات تفكر " لحظه ؟ لو يمين يشتي ينتقم ! لو قتل لونه والان دوري ؟ لا ما اظنش ! ووالله لو يقتلني يزعلني يعاقبني يعمل الذي يشتيه مابقول شي ، انا اشعر بالذنب !
شافت لحمزه اللي شغل السياره وساكت وهي وراء: هل اشتاق زعيمكم ي حمزه لبنته !
شاف لها شوي وقال: سيدتي انتي قلتي بنته اكيد اشتاق لها
رجعت تكلم نفسها: ملامح حمزه مطمنه ، بس كيف بلتقيه بعد الذي فعلته ،انا متوتره متلبكه وخايفه قوي، مدري بيسامحني او لا ! وغير ذا كله وحده الله يعلم كم انا مشتاقه له !

#روايه #رواية

مرحبا ... اعرف اني طولت عليكم بس الدكتور كان مانعني منعاً باتاً من التلفون، الان بدات ارجع له بالتدريج وان شاء الله اكمل لكم الروايه .

مرحبا متابعيني الأوفياء، مع الاسف اني ماعدت اقدر استخدم التلفون او الكتابه به اطلاقاً، لهذا انا بعتزل الكتابه نهائياً، انا احبكم واحب تواجدكم في قناتي ورسائلكم اللطيفه لكن قدر الله وماشاء فعل ، هذي الروايه لو كان لي نصيب من العافيه وشفاني الله بكملها ولو بعد عشرين سنه ، المهم اعتذر منكم للمره الاخيره والسلام عليكم ...

طبعا فتح اليوم وشفت كميه الرسائل اللي تطيب الخاطر منكم ، بس ماقدرت ارد عليكم لانه تليجرامي محظور لاسبب لا افهمه فلا استطيع الرد على الرسائل القديمة ، شكرا كثيراً على لطفكم ، احبكم في الله .❤️