اهازيج لمولانا قمر العشيرة صلوات الله عليه

طب ورعد صهيل الخيل
وبرگت بالخزر لعيون
من صال ودخل عالگوم
تسمع بس صريج سنون
سدها الشمس بمتونه
من دخانها المتون

بيوم الطبهم مغضب
حنه اجروف الشاطي بدم
.............

دخيل الكافل الشردهم بخزه
السلم طلع بيهم من كسر ظهره
المات بسيفه كيف جي خلص عمره

والكيف شارد منهم
رد جاه بحلمه
.........

هلا بطول السمه للحرب ضل يصرخ
حتى وهوه ميت راس ابد ما طخ
اسرافيل الحرب وبصورها ينفخ

وعيونه بنار يخزرن
وياهو الگابل شمس الصيف
.........

صفر وجوهم من غاص بالعسكر
اسد بالحومه يستنگ الگطع جم بر
فارس حتى بعيونة بقى ينحر

واحد هوه الكافل
وما جابت مثله النسوان

.............

متربي بحرب والسيف جن ابنه
الگابل عينه ما لاحلك يفر متنه
ربان الحرب بس حيدره جنه

هوه ابن الشگ الگعبة
سهله الگاع برجله اطگ
............

ابن حيدر علي وما صار ابد بارد
الجه و گابله بلا راس رد شارد
هز الگاع هز وبدر جن عايد

امتونه تغطي الصفر
لو دخن بطف عباس


كرم زكي

برز للحومه خير الخلق لله
الشبيه الاشبه بجده رسول الله
ابن خير الخلق والشرف والجاه
برز وحسين صاح بصوت بسم الله

بسم الله والله واكبر
كر عليهم كر الاكبر
بالحومه علي الاكبر تبختر

نزل بيهة
وگلب أسفلها عاليهة
والحومه يلاويهة
علي الأكبر

على اجتافة
الرايه وترهب اوصافة
القيامه لو عدو شافة
علي الأكبر
ـــــــــــــــــــــ
راكب على المهر بس احله خيال
وبرز جنه محمد طبعه وارسومه
شجاع وما يرجع سيفه بتار
ويعيد امجاد حيدر شهدت الحومه

بسم الله للحومه نازل
حيدر لو علي الاكبر يقاتل
طبع جده ولا رداله سائل

علة صوته
من حيدر علي قوته
ترسها الحومه بس موته
علي الأكبر

ألملمع
نزل من مهرة واتربع
سيفه بالحرب يصدع
علي الأكبر
ـــــــــــــــــــ
غضب الله برز والحومه دخان
يرعد بالارض چا طاحت السبعه
كريم وما يرد السيف للراد
ماخذ شمره من عمه الحسن طبعه

بسم الله بالحومه قتال
شيوگفه علي بالحومه لو صال
راواهم غضب اشباه الرجال

على ايمينه
سيفه وكبر بدينه
ناده وعرگت جبينه
علي الاكبر

على ايساره
راية غيرة اصياره
تلهب بالصدر ناره
علي الأكبر
ـــــــــــــــ
شجاع وما يهاب العده ومهيوب
دخيل الأكبر ولو بالحرب نازل
گلبها ميمنة بميسره الجيوش
ضنو بالحرب نازل ابو فاضل

بسم الله بالحومه أذان
واحد بالحرب گدامه عدوان
ريشاته كفايه تجول ميدان

من عيونه
علي الأكبر يعرفونه
والفرو يلاگونه
علي الأكبر

غضب بيهة
الحومه وصار واليهة
سبع وتسيد عليهة
علي الأكبر


سيد سجاد الحيدري

جهبت دارها ام المصايب
الله يعينها لثكل النوايب
تومي بيدها لصوب الكرايب
جهزن للعزه والگلب ذايب
عفنه بيوتنه بيهن حبايب
انزلن بالبجي من المراجب
وليجن حار دمه عالترايب
لخيجن ياخواتي نجرح حاجب
حنينات البواجي ما نعاتب
ابونا حيدر مبجي الحرايب
وكافلنه شهم عالي المراتب
هاي بيوتنه يهل العجايب
طولن بالنعي ماهي خرايب
دارت على اخيجن الكتايب

راح حسين ماضل النه راحه
طولنها البواجي والمناحه
حكه ماخذه العاشر صباحه
ابجن واذكرن كلشي بجراحه
لاخيه منكسر والزم صفاحه
وعكب عباس راحه صفك راحه
رد مكسور يتجه بسلاحه
شفتن حاله جن الموت لاحه
وعدوجن شامت وكثرن افراحه
تمدد يم ألاكبر بويه صاحه
استنصر والعدو هد برماحه
عصفت غربته وهبت رياحه
بنص منيته والعدو صياحه
حركنه خيامك وكسروا جناحه


ثكلن بالنعاوي يا بناته
حار صوابجن يمدلالاته
العمر كله عزه واحنه خواته
حك اللطم حكجن يارباته
عزيز حسين واحنه مخدراته
عزاجن يختلف عالسامعته
شفتنه وعرفتن نايباته
بحوافر خيلهم راحت حلاته
تكومه غيرته يمجن غلاته
سلبوا محسبه وسلبوا عباته
ثنين وما بطت عنهن حياته
لا انتن تركجن لا صلاته
العزه لا يسكت احنه فاجدته
هذا البيت بيته وعزيزاته

انه الما عشت وياك
عشت وي جمره مصابك
منهد امي وهذاك الباب
وهسة انفتحت ابوابك
انحده بيه على ضهر النوك
لكن موش باركابك
ودخيلك صحت يحسين
گوم وردهم أحبابك

جزع مني المتانه والگلب ملهوف
وخلصت الدموع وعيني حد الشوف
قسه بيه الزمن حد ما عبرت الخوف

يا غربتك خويه بخواتك
راحن بهزله مدللاتك
ما ينسه اليفارگ حبيبه
طول الدرب ما ناسياتك
ـــــــــــ
دهري ودولباني بعيد
وخلاني اجهب الغربه
مو درب المشيته وياك
گلبي على الهجر دربه
عيوني معودات عليك
هسة على الغرب تربه
بعدك ما عشت يحسين
العيشه بموتتك صعبه

اعتب عالزمن خلاني بارده الحال
ما يبقه ضعن درب اليسر لو طال
مو چفك يخويه بچفي هسة حبال

طول الدرب نمشي سويه
بعدك مشيت انه سبيه
محد لزمها زمام النياگ
والناگه هزله تميل بيه
ــــــــــــــــــــ
يخنگنه هوة الغربه
نشتم من هوة انفاسك
نمشي احنه على ضهر النوگ
وانته على الرمك راسك
شيال الرمح فرحان
وميته من القهر ناسك
كل ساعه ويهوس بي
ويذبح گلبي واحساسك

يجرحني الرمح واتعنه يم الراس
يم راسك يخويه واشهگ الانفاس
الدمعته بنص فله ما تنخفي على الناس

والغربه خلت بيه عله
مايل ضعنه ارجع واعدله
خويه الضعن محتاج حماي
الزم طفل واتيه طفله
ـــــــــــــــــ
شما ردنه نصبر الحال
يبين نقص والينه
عطشان الضعن يحسين
وبين كل تعب بينه
يم راسك يجيب الماي
افا ويتصدق علينه
ياخويه صحت هيهات
العافك لا يرد لينه

صعبة على الضعن يا بو علي صعبه
ضعنك رافضه ولا رايد الشربه
يموت من العطش ولا منة الغربه

للغربه يا خويه انحدينه
ياهو اليجي يروي الضعينه
ارد اشكي يم جدي بمصابي
ليمت تجي نرد للمدينه


سيد سجاد الحيدري

متعوبه.... اريد ارتاح متعوبه
كرهت الشام ودروبه
وينه ....موتي تعطل هوايه


ما شفته ... النوم هناك ما شفته
منو نايم بفاتحته
طاحن..... الرايه وجف ابو الرايه

وينه عمنه .... اليتامه تصيح عمه وينه عمنه
تستغيث الهيمه ضلمه وينه عمنه

لا خيمنه ..... عمه شو ماكو أبونه لا خيمنه
لا أهلنه ولا زلمنه ولا خيمنه

الشفته بالشام
متشوفه العين
وضل كلبي هناك
يم صدر حسين


لا لا مو حال
المر بيه هواي
كدام أطفال
يجفون الماي

---------------------

مو ثوبه .... الشام الستر مو ثوبه
وثأر لعلي مطلوبه
جيته ..... ويريت الشام ما جيته

ثأري .... بيدك عمه منتظره
تجيبه ورأيتك خضره
بيته .... اليدخله ما يرد بيته

عمه مهدي ..... العجل للثأر أليه عمه مهدي
الشام اخذ مني رقيه عمه مهدي

عمه مهدي .... عجل ورد بينه أهلنه عمه مهدي
تبجي دم يا ابو المحنه عمه مهدي

وليومك هاذ
من ذاك اليوم
منتظره السيف
وللثأر تكوم

يا ثأر حسين
يا وعد اللله
جيبه أبجفك
دم عبد الله

-------------------

مشونه .... بهزل مو وضحه مشونه
ديره ديره جابونه
حالي ..... يتعب وانه مشتاكه

حادينه ..... نهار وليل حادينه
مشه وما هود أعلينه
عمه ..... عليه نهضمت الناكه

بيه شوكي .... والشام مجبوره لفيته بيه شوكي
والدرب كله بجيته بيه شوكي

فوك نوكي ..... أبجي عالصاير بخوتي فوك نوكي
والهضيمه شفت موتي فوك نوكي

يبعدني الموت
هضمتني العين
لا مر عباس
ولا جاني حسين

المثلي امن تموت
ما ضن ترتاح
بالريف الليل
يخنك ذباح

--------------------

براحه ..... لا موتي أجه براحه
ليالي الغربه ذباحه
أيامي ..... رجعت لأول أيامي

مو داري .... صار ودار مو داري
وعلي مكطوعه زواري
أيامي .... رجعت لأول أيامي

هذا الريف .... رجعت أيامي ألبدايه وهذا الريف
هيه هاي أعظم نهايه وهذا الريف

مامر طيف .... كل سنه موتي يجيني ومامر طيف
والدموع أباب عيني وما مر طيف

راح أغمض عين
وين أهلي وين
كل عام أحتار
وهل صار سنين

تانيت اخوان
وشكد تانيت
يحضرون ام عون
وين اهل البيت




اللهم عجل لوليك الفرج بما جرى على محمد وال محمد عليهم السلام

شايف كربلاء بعينه .. واه ويلي على السجاد
حاضر مذبح حسينه .. واه ويلي على السجاد
بدرب السبي مگيدينه .. واه ويلي على السجاد
ومگيدين چفينه .. واه ويلي على السجاد

حاضر كربلاء وما مات .. واه ويلي على السجاد
بگلبه الهضمه واللجمات .. واه ويلي على السجاد
وتعده ابوه وفات .. واه ويلي على السجاد
تذبح اخر النظرات .. واه ويلي على السجاد

اليعرف بالسمه وربه .. واه ويلي على السجاد
ما وچد ابد دربه .. واه ويلي على السجاد
ماشي بضعنه للغربه .. واه ويلي على السجاد
صعبه على الضعن صعبه .. واه ويلي على السجاد

ياهو الحاله يتصور .. واه ويلي على السجاد
گلبه من القهر جمر .. واه ويلي على السجاد
وبكل خطوه يتعثر .. واه ويلي على السجاد
اسير الغربه ما يگدر .. واه ويلي على السجاد

مشه ليله اقسه من ليله .. واه ويلي على السجاد
عليل وياهو يوميله .. واه ويلي على السجاد
والنسوان تشكيله .. واه ويلي على السجاد
اه الشام اخذ حيله.. واه ويلي على السجاد

حال الضيم يا حاله .. واه ويلي على السجاد
دخل ديوان بعياله.. واه ويلي على السجاد
وسامو يمه اطفاله .. واه ويلي على السجاد
وراس الوالد گباله .. واه ويلي على السجاد

خلص شام بطلاع الروح .. واه ويلي على السجاد
نوه يم گبر ابوه يروح .. واه ويلي على السجاد
فرع عل گبر وينوح .. واه ويلي على السجاد
وصوته من البچي مبحوح .. واه ويلي على السجاد

رد لدياره مهجوره .. واه ويلي على السجاد
والحيطان مفطوره .. واه ويلي على السجاد
بيت وطافي من نوره .. واه ويلي على السجاد
الهواشم جانت بدوره .. واه ويلي على السجاد

الدنيا بحزنه مفجوعه .. واه ويلي على السجاد
يخلط مايه بدموعه .. واه ويلي على السجاد
بس دمعاته مسموعه .. واه ويلي على السجاد
عاش الغربه واللوعه .. واه ويلي على السجاد

ما يوم وتهنه بيوم .. واه ويلي على السجاد
امام على الخلق مظلوم .. واه ويلي على السجاد
ومن فگد الحسين هموم .. واه ويلي على السجاد
گضه بيه العمر مسموم .. واه ويلي على السجاد


سيد سجاد الحيدري

انته عاجبهم غريب
ما يردونك حسين
ما يبجيني شعرهم والنواعي
انه اعرف ابجيك وين
خاف تفسد كل تجارتهم لذلك
ما رضوا وشلت العين
صوروا للناس مشهد
مو الك للملا مطلوبين دين
وصلوا للناس فكره
انته ما ترزق بواجي
اختصروا ارزاقك دراهم
الملا حصته تصير هالكد
شاعر النص ربحه عالي
وتعبت جفوف اليحاسب
وحيل مابيها لطم هاي ألادين
صوروا للناس صوره
انته راضيهم وراضي
وألادب والدين يمهم
وهمه اهل الرأي بعدك
ألامام يريد عاقل
ونصبوا عقل الفوائد
وصار هسه الشور كلش مو الزين

مصارحينك بالحقيقه
انته طفي اخيام زينب
واحنه نحركها شعائر
ما رضوا كل يوم اعيش وياك عاشر
ولا رضوا ترتاح انته
افعالهم كرات للطف
حته كل ليله تشوف الدنيا عاشر
بأسمك بدينك بربك
ما تئذيك القصايد ؟
كل قصايدهم تمر للطف حوافر
ليش عاجبهم عطشكم
وانته بفلوسك الماي

لهسه كم شاعر يسلبك
لهسه كم ملا ينهبك
لهسه كم قاري يتعبك
منو يدور راحتك باهل الحناجر
نقطه تفصلها الحقيقه
وخااف اذكرك لو كلتها
منو يدور راحتك باهل (الخناجر )

محد يريدك حسين

يا مجيب دعوة المضطرين

الليله بگلبي الك لوعه
شبه لوعة ضهر عاشر
هم يرجع ابوي حسين
علي نفس الحزن داير

عايفني امشي سبيه
شحال بگلبها رقيه هجرته
يابويه مو هاذ دربي
يا گلبي مو تدري گلبي كسرته
يا بويه ارحم حالي
تردلي ويردلي دلالي فگدته

برقيه
الليله البيك
جابوني بويه وخل احاجيك
برقيه
الليله ادعيك
اشكيلي بويه وخلي اشكيك

يا مجيب دعوة المضطرين
ــــــــــــــــــ
يالماخذ خضار الياس
ذبل عودي وصفر لوني
شيرجع دلالي المات
مبينه الغربه بعيوني

انه العشت في حنانك
وبگلبي تدري مكانك حبيبه
ترضه على بنتك سبيه
ترضه حبل بين اديه غريبه
مو بس ضعنه يعاني
يابويه حته اذاني سليبه

برقيه
يابو رقيه
الغربه خلت عله بيه
برقيه
بنتك خطيه
مو گدري يا بويه الرزيه

يا مجيب دعوة المضطرين
ــــــــــــــــــ
درب الغربه رايد حيل
مو طفله وبديها احبال
رحنه بلايه هودج خوف
على الهزله دربنه طال

ديره اقسه من ديره سرنه
بالسوگ يا بويه حرنه هضيمه
والضعن ما بي ملامح
صاحت علينه الصوايح جريمه
يابويه مو هاذ حقنه
والغربه ما لاگت النه أليمة

برقيه
ارحملي حالي
دونك تمر صعبه الليالي
برقيه
ردلي دلالي
من الخوف اخافً من خيالي

يا مجيب دعوة المضطرين
ـــــــــــــــــــ
بخربه شلون انام الليل
التصد لينه غريبه العين
عطش بيه ورفضت الماي
صحت جيبولي ابوي حسين

الليله حزني غيابك
موش على گدري عذابك ذبحني
فزعت الي بويه ناسك
بطشت الذهب جاني راسك هضمني
وبصفي عمتي واخويه
اخر نفس بيه بويه خنگني

برقيه
خلصني حزنك
الليله اموت وموتي منك

برقيه
الليله احضنك
وتمسح دموعي بطرف ردنك


سيد سجاد الحيدري

مو دربنه هاذ خويه مو دربنه
ضاع حبنه بالسبايه ضاع حبنه
كلشي شفنه من رحيلك كلشي شفنه
من دخلنه شكد صحتلك من دخلنه

درب السبي بينه خويه ما يگصر يطول
طبينه للشام خويه لاگونه بطبول

المحد قبل شافه ضلي ولا لامحه الجار
مو ضلي يا خويه بعدك گمت اشگف حجار

ها يخويه شلون بينه
بشامهم خويه انولينه
بعد متلحگ علينه
مرت العشرين يوم

كربلاء تختلف عنهم
ماكو موت يفكني منهم
شام والرذله طبعهم
والضعن ماضن يدوم
ــــــــــــ
شلون حيره طحنه بيه شلون حيره
ديره ديره تعيل بينة ديره ديره
ماكو غيره التفزعلنه ماكو غيره
بلا عشيره وانتو موته بلا عشيره

من فوگ هزلة تشاهدت بلا هودج النوگ
والصعبه گادو ضعنه ومرو على السوگ

من چان لو ضعني يمشي يطأطأ الراس
محد عرف خويه قدري وتباوع الناس

خويه فتنه وشاهدونه
اله اگلك شتمونه
يشتم بحيدر ابونه
يذبح الموقف صعب

ضعن محتاج الحمايه
حاجته بدرب السبايه
وكت نمشي وماكو رايه
ونچهب ديار الغرب
ـــــــــــــــــــ
اه يدهري دولباني اه يدهري
خلص عمري انه عدله وخلص عمري
نفذ صبري جزع مني ونفذ صبري
وينه ذخري شكد صحتلك وينه ذخري

انه العشت في حميتك بس هسة احتار
من دونك اجهب غريبة وماغضو ابصار

بديوان خويه دخلنه وبعلي السجاد
وضميت ايتامي بيدي وبحبل ننگاد

عاش بيه خويه خوفي
خلص دمعي وباقي شوفي
والحبل چتف چفوفي
وچان چفي بين اديك

مو اديك الي تلمنه
ياهو يمسح فوگ جفنه
طشرو لمة شملنة
وينك ما بيه اجيك
ــــــــــــــــ
يا زماني اه منك يا زماني
مو مكاني هالخرابه مو مكاني
كمت اعاني خويه وينك كمت اعاني
زينب اني مو غريبه زينب اني

هاذ السبي وحمل ضيمه والغربه والنوح
لمن يچل ليلي اوچد انعاك مذبوح

اخفي بدمعتي يخويه علا يشوفون
مو بس دمع خويه گدرك ابچيلك عيون

انعه روحك مدري روحي
والمن اكثر بيه نوحي
وزادت عليه جروحي
من يمر ليل الغياب

شتبچي الخلص دمعهة
وحادي من عندي سلبهة
روحي ملت من تعبهة
الخربه ما صح بيها باب


سجاد الحيدري

عليلُ آلِ البيتِ، والدمعُ انسكبْ
قلبٌ نحيلٌ في المصابِ قدِ اغتربْ

يا ساجدًا بالليلِ، يُبكي صمتَهُ
وترى الأسى في سجدةٍ، لمّا اقتربْ

جُرْحُ الحسينِ على الجبينِ علامةٌ
تبقى، كأنّ الدهرَ عنكَ ما احتجبْ

في كربلاءَ، وقد رأيتَ فواجعًا
يُذكى بها قلبُ النبيِّ، ويُنتَهَبْ

طفلٌ يذوبُ على الصدى من ظمئِهِ
والسهمُ في نحرِ الرضيعِ، وقد نَصَبْ

والخيلُ تطوي فوق صدرِ أبيكَ لا
حرمٌ يذودُ، ولا حِمىً، لا منقلبْ

فسُبيتَ والآهاتُ تُطفئُ نورَكم
والموتُ حولكَ نارُهُ لا تَحتَجِبْ


لكنَّ صبرَكَ في القيودِ منارةٌ
فيها يلوحُ النورُ، والعزمُ الغضبْ

يا وارثَ السجّادِ، سرُّك قائمٌ
والعلمُ بينَ يديك يمشي وينتسبْ

تبكيك أرواحُ الملائكِ خشعةً
والحبُّ في قلبِ الموالي قد وجبْ

نمْ في ثرى الطهرِ المضمَّخِ بالتُّقى
َهْوِي الْقُلُوبُ لِذِكْرِهِ وَتَلْتَهِبْ


الشاعر ابو الفضل عباس

نوحي على الأولاد يا زهرة الحزينه
حسين مات بكربلاء والضعن وينه

رايد اطرشلچ يزهرا بضعن الحسين
من الخيم طالع ومحتركه الصواوين
شرايچ علي السجاد توميله النسواين
وعينه على ضعنه ودموع بوسط عينه
ـــــــــــــــــــ
يا زهرة هم شفتي گبل بوجوهن خوف
مات الحسين وعالنسه مرفوعه السيوف
ياهو اليگود چفوفهن ما ضلت چفوف
چفوفه عگب عباس حبل مچتفينه
ـــــــــــــــــــــــ
سار الضعن بالغربه ودموعه جريه
عافو ابو الاكبر طريح الغاضريه
محد نشد عن حالها الراحت سبيه
ضعنج تدهور حالته ما تنضرينه
ــــــــــــــــ
ضعنج يزهرا بالسبي ريتج تزوري
حضنه خله من كربلا بيدچ احضني
يا زهره لميه الضعن والراس امسحي
حسين ماهو يالضعن ورايح حنينه
ـــــــــــــ
ريتچ تشوفين الضعن والراس جدام
كلما يصدون الرمح تتهايج الأم
ينادون الحگ يا ولي والولي ماگام
ضعنچ يزهرا من البواچي حارمينه
ـــــــــــــــــــــ
ضعنج يزهرا بالسبي مذعور تعبان
بالغربه ما صحت خيم والتمشي نسوان
الماي ما يعرف سبي والضعن عطشان
وساگي العطاشه على النهر فضخو جبينه
ــــــــــــــــ
يا زهره وبضعنچ بگت بي اخر انفاس
لا حسين يمه يطمنه ولا يمه عباس
السجاد گيده الجامعه من الجدم للراس
بس عينه تربي على الضعن مگيوده ادينه
ـــــــــــــــ
ضعنج يزهره ماله حس مبحوحه الاصوات
راچب الهزله والدرب متروس شمات
يا زهرا اسئلج هم يرد هم يرجع المات
ضعنج غريب بلا ابو ما تحضرينه


سيد سجاد الحيدري

ملتفته عيني على الضعن ووگلبي صوبه الكربله
احتار ضعني بنص غرب لو ضهري طايح بالفله

واليخطي خطوه بغربته هالروحه روحه وما يرد
والخطوه الاولى باخوتي وانه خطوتي على البعد

خطوه على الدرب الزيه
خلتني امشي سبيه
وامشي دربي عذاب

بعيوني ضلت صورهم
يطول سفرنه وسفرهم
وبيه حز الغياب

ماشين للسبي ماشين
نزل دمع العين ما اجوني

چا وين غربتي جا وين
واخوتي ميتين عذبوني
ــــــــــــــــ
دنكت راسي مستحه بس ما يغضون البصر
تبچيني هزله ناگتي ما تبچي من طول السفر

وانه ابچي من فگد اخوتي ما نزلت دمعي ألسبي
ما صارت ويايه قبل خلوني الوحدي هلي

لو امشي حاطوني اهلي
محد قبل شافه ضلي
وهسة صح لليشوف

تخنگني هسة عبرتي
والسمه تبچي الغربتي
وتبچي دم للطفوف

ياهلي وينكم يا هلي
ردلي بويه علي شوفه حالي

غربتي ياكبر غربتي
دمعتي وهضمتي من البقالي
ـــــــــــــــــــ
عباسي لو بعده عدل چا ما مشيت ويه الغرب
فراگه علي لا موسهل تمنيت اموتاً بالحرب

الماله على الوادم فرض برايه نمشي بيا زمن
احنه الفرض واهل الفرض من تالي تسبينه المحن

عطشانه شوف برحيله
ردته يرد واشتكيله
ارد اطرشه بخبر

بين الغرب تمشي شيله
اختك مشت عل الهزيله
هيج سوه الدهر

مگيود هالضعن مگيود
ها يخويه تعود رد ضعنه

آمال بالضعن أمال
بين ادينه حبال فك حبلنه
ــــــــــــــــــــــ
هضامني راسه المرتفع لچمة وهضم باگي الضعن
كلما يحسن بالرعب يم راس ابوهن يحتمن

ووصيت والينه بأمر ليشال راسه بسمهري
ياعمه كتله لو نوه يّبيعن انه اشتري

نمشي ويضوي علينه
ومتلوحه رفعت ادينه
وبينه هاج الجرح

وبميله تنزف جروحه
من روحي فدوه على ورحه
مو مكانه الرمح

ميتين عالرمح ميتين
بيه راس حسين مكلمينه

يحسين ننشدك يحسين
راح نمشي الوين يا ولينه

سيد سجاد الحيدري

ما ناسين
طول الدرب ما نسين
بدمع العين
سبحنه اله بدمع العين
ــــــــــــــــ
مشايه اسرنه ويالضعن والنية گصدت كربله
يم گبر ابو الاكبر تحل من السبايه القافله
مغير ارسوم السبي وشصار بيهة العايله
موعدنه نتلاكه سوه يم مصرعه بنص الفله
من الشام
راجع ضعن من الشام
كله ايتام
ورايد ابو كله ايتام
ـــــــــــ
ارض وسمه تبچي اله وينعه اله رب السمه
بعد اربعين من البچي لا مو دمع تبچي دمه
ومبچه الضعن اه يالضعن گلوب لهفانه وضمه
كضه الدرب يبچي ويون شو حته شمسه معتمه

كله جروح
رد الضعن كله جروح
بچي ونوح
محمل حمل بچي ونوح
ــــــــــــــ
مشايه نمشي الكربلاء موعدنه عشرين بصفر
بعد أربعين من السبي اخت الگمر جت للكمر
من العطش نروي حدث عطشان مات بصف نهر
وحر الشمس اه يالشمس تغير تفاصيل السفر

ما ماشين
بدرب السبي ما ماشين
اخت حسين
ويانه تمشي اخت حسين
ــــــــــــــ
نگصد درب طوله حزن ودرب السبي طوله جرح
نواسي الذي عافت ابن وعافت اخو بوجه الصبح
نواسي الذي عايف ابو فوگ الترابه ومنذبح
ومگيدينه بجامعه وهسة انجمع جرح وملح

صار شلون
الملتقى صار شلون
ما يدرون
ميت عدل ما يدرون
ــــــــــــــــــ



سيد سجاد الحيدري