ኢየሱስ ክርስቶስ ተወልዷል... እንኳን ደስ አላችሁ!

ሰፊ ሰሌዳ:: ብዙ ታሪክ:: አንድ ጠመኔ::

ቀን እንደ ናና ከረሜላ ሳይጠገብ ሚሟሟበት ከተማ ውስጥ እንኖራለን:: ሊስትሮው ዝናቡ የቀደሰለትን የእለት እንጀራ ያጭዳል:: ተላካፊ ረዳት የሰፈር ስም ይጠራል:: የመሸበት ሰራተኛ በዝለት ይራመዳል:: በወፍራም ሽቶ የታጠነ ነጠላ የጠመጠሙ አዛውንቶች ብርድን ያማሉ:: ያለፈው ጥር ያንቀላፉ ነፍሳት ጥር ሲደግም ይነቃሉ:: ሶስት ሰዎች ፣ የልብሳቸው ቀለም እንደ ባንዲራ ተዛንፎ የተሳከረ ፣ ቆመው ይሳሳቃሉ:: የህይወት ሀቅ መንገደኛ መሆኑን ይረሳሉ:: ዛሬ ቢያልፍ ነገ ይቀጥላል:: አስፋልቱ መሃል ከደመና የተፀነሰ ኩሬ ይተኛል:: የሹፌር እርግማን ይጠጣል:: ተሻጋሪ መልኩን ያይበታል:: አውቶብስ እንደ እባብ ይርመሰመሳል:: የመንገድ አምፖሎች ፈዛዛ ብርሃን ይለግሳሉ:: ፀሀይ በልዝብ ስንብት ይጠልቃል:: የጨለማ ወጋገን እንደወረርሽኝ ሰማይ ይሞላል:: ሽፍታ ዝንጉ ሰው በአይኑ ያስሳል:: ችኩል እርምጃዎች ይበረታሉ:: ተገናኝተው የቆዩ ሰዎች ባልጠበቁት ጎዳና ላይ ይገጣጠማሉ:: ታክሲ ሰው ይደርባል:: የታሪፍ ዋጋ ያሰዳድባል:: ሹፌር ትራፊክ ሲያይ ሃይማኖቱ ይታወሰዋል:: ቀኑ አራት ነጥቡ ላይ ይደርሳል:: ጭለማው ሁሉንም ያመሳስላል:: ወዳጆች በ'ቻው' 'ቻው' ይለያያሉ::

ዛሬም ትናንት ይሆናል::

ሃብሏ ደረቴ ላይ ተኝቷል:: ወርቃማ መስቀል::

'ሞተሽ አልነበር እንዴ?'

አይኗን አሸች::

'ከሞት በህዋላ ምን ያለ ይመስልሃል'

መሽቷል:: ደቃቃ ኮከቦች ፀይም ሰማይ ላይ እንደ ጨው ተበትነዋል::

'እምነት'

አይኗን አሸች::

'ለምን?'

'ምርጫ አለን?'

ጥርሷ የሐምሌ ጨረቃ:: ያፅናናል::

'አንቺስ'

'ትነት'

በአይኔ አይኗን ፈልጋለው:: ትኩስ እስትንፈሷ አንገቴን በስሱ ይገርፋል::

'እንደተረሳች ውሃ ጠብታ... ምተን ይመስለኛል'

ለደቂቃዎች የልቤ ምት ብቻ ይሰማል:: ትከሻዬ ላይ ሚፋጅ እንባ ከጉንጯ ያርፋል:: አንድ ጠብታ... የጉንጯን እጥፋት የሚከተል ዳና::

'አለአ... ስተን ግን የተለያየ ቦታ ምበተን ይመስለኛል:: የቡና ሃሜት ላይ- የስካር ታሪኮች ሲወዙ- ቡኒ ቀለም ሲነሳ- በደበዘዙ ጠባሳዎች ውስጥ... አላቅም... ምታወስ ይመስለኛል:: የትውስታው እድሜ ግን እንደ ትነት ነው:: ስሜ በተጠራ በዛው ቅፅበት ይረሳል::'

የተናገረችውን ሁለታችንም በፀጥታ ለመዋጥ እንታገላለን:: ጣራው ከወትሮው በላይ የቀረበ ይመስላል::

'መች ኖረህ ነው ግን ሞት ሚያስጨንቅህ?'

ምናልባት ልክ ነች:: ደክሞኛል:: አይኖቼን በስሱ ለመክደን እታገላለው:: የሰጠችኝን ሃብል በጣቶቼ ፈልጋለው::

...

በቆሎ ሻጯ ትዝ ትልሃለች? ያቺ ምስኪን ጠይም እናት የጨሰች ቢጫ ካኔቴራ ምታዘወትር ልጇ ከጡቷ ማይጠፋ? እንዴት ትረሳታላህ? ጭምት ፊት እና ችግሯን ሚክድ ፈገግታ ነበራት:: ልጇ አድጎ መንገድ ላይ አመድ ልሶ ሲሯሯጥ አገኘሁት:: እሷን አይመስልም:: ጠርቼው እናትህስ? ስለው ማናባህ ነህ ብሎኝ ሮጠ:: ጀርባ ጀርባውን እየሰጠኝ እየተከተልኩት እንዳልሆነ ለማየት አስሬ ወደ እኔ እያየ ሲሮጥ አድጦት ገኒ ሱቅ ፊት ያለው ቱቦ ውስጥ ፈረጠ:: ሮጬ ስደርስ ወጥቶ ለማምለጥ ይታገላል:: ግማሽ ሰውነቱ ተለውሷል:: ደህና ነህ? ስለው ግራ ትከሻውን ይዞ እያነከሰ ለመሮጥ ሞከረ:: እዛው ከገኒ ሱቅ አቦለድ ገዛሁለት:: ትንሽ ፍርሃቱ ለቀቀው:: እኔ ፊት መብላት አልፈለገም:: እናትህን ሰላም በላት ብዬው ወደ ቤቴ ገባሁ:: አንዳንዴ ሁሉም ታሪክ እንዳለው ይዘነጋኛል:: ማን የማን እንደሚበልጥ እድል ፈራጅ ነች:: በነጋታው በቆሎ በምትሸጥበት መንገድ ከስራ ተመለስኩ:: ልጇ ከጎኗ ተደግፏት ከሰል ያርገበግባል:: ቀና ብሎ አየት አድርጎኝ አንገቱን ደፋ:: በቆሎ ተወዷል:: ትኩስ ካለ ስጠይቃት እዛው እሳቱ ላይ ከነበረው ጠቅልላ ሰጠችኝ:: ጭምት መልኳ አልፈዘዘም:: ሁለት ጨምሪልኝ አልኳት:: እሳቱ ላይ የቀሩትን ሁለት ጠቅላላ ልትሰጠኝ ስትል አንዱን ለእሷ እና አንዱ ለእሱ እንድታደርግ ነገርኳት:: ፈገግታዋ ሲያምር:: አጠገባቸው ያለ ድንጋይ ላይ ተመቻቼ ተቀመጥኩ:: ብዙ አታወራም:: ከልጇ ጋር ስለኳስ አወራን:: በቆሎዬ ሲያልቅ ተነሳው:: በደንብ ሲጨልም ታወቀኝ:: ሰፈሩ አይታመንም:: ቤት ገብቼ ጥሩ እንቅልፍ ተኛው:: እድል ፈራጅ ብትሆንም ማቅለያ አንቀፅ ግን ለሰው- ሰው ነው::

We have no scar to show for happiness

በስሱ ክርኑን ተደግፋ ወደ ጆሮው ትጠጋለች::

'ይሄ ጫማ ሊገለኝ ነው- መኪና ውስጥ ሌላ ጫማ ይዣለው'

ተደጋግፈው ይሄዳሉ:: የአዳራሹ እንፋሎት ግንባራቸው ላይ ተቸፍችፏል::

'ምግቡ ተስማማሽ?'
'መች በላው በናትህ... አስሬ እዚህ እዚያ ሲያዋክቡኝ ታቲ ካጎረሰችኝ በቀር አልቀመስኩም'
'ታቲ አምሮባታል'
'ሁሉን ድራ ጨረሰች... ከእኔ ውጭ'

የመኪናውን በር ይከፍትላታል:: ለጥቂት ደቂቃዎች በዝምታ ይቀመጣሉ::

'ጫማሽን አቀይሪም እንዴ?'
'ከጀርባ ነው መሰለኝ'

ቢጫ ፌስታል ይዞ ይመለሳል::

'ወገቤ እየተንቀጠቀጠ ነው'

ጫማዋን ለመቀየር ታጎነብሳለች:: እህቷ ደወለች:: በዝምታ ከሰማቻት በህዋላ 'እሺ- በቃ ባይ' ብላ ትዘጋዋለች::

'ለእሷም ተቀያሪ ጫማ ትፈልጋለች... በዛውም ለዚህ እግሬ አልኮል ነገር ቤት ሄደን እናድርግበት'

እግሯ አግድሞሽ ላይ ቀይ የቁስል ሰንሰለት ተኝቷል:: ቤቷ ቅርብ ነው:: መኪናውን ያስነሳል:: የአምስት ደቂቃ መንገድ ብትሆንም ዝምታቸው ደቂቃውን ይለጥጠዋል:: በቅጡ ማይሰማ የሬዲዮ ድምፅ ይንሾካሾካል:: ቤቷ ሲደርሱ የጠዋቱ የሽቶ ጠአም አልፈዘዘም:: ለቤቷ ባዳ አይደለም::

'አልኮል የት ነው ምታረጊው?'

'ሳሎን ያለውን ባለአምስት መሳቢያ ቼክ አርግ'

'የለም?'

'እ?'

ከመኝታ ቤት ሚሰማው ድምፅዋ ይዋጣል::

'አምስቱም ውስጥ የለም?'

'አዎ... እኔ ቤት first aid አለኝ'

'እሺ በቃ'

በነጭ ፌስታል ጫማ ጠቅልላ ይወጣሉ:: ቤቱ ጥቂት ደቂቃዎች ቢርቅ ነው:: ማይተነትኑት ዝምታ እንደ መልህቅ ይዘፍቃቸዋል:: ያልፈቱት ቋት አለ:: ቃላት ማይበትኑት:: ቤቱ ሲደርሱ ወፍራም የቀለም ሽታ ይቀበላቸዋል:: ግራጫ ሶፋው ላይ በቀስታ ትቀመጣለች:: ከመታጠቢያ ቤት አልኮል እና ጥጥ ይዞ ይመጣል:: ሶፋው ላይ እንደተቀመጠች በስሱ ተንበርክኮ ጫማዋን ያወልቃል::

'መች ነው ይህን ስእል የሳልከው?'

ክፍሉ ጥግ ላይ በጀርባው የተደገፈውን ስእል በአገጯ እየጠቆመች:: ዞሮ ያየዋል::

'ትናንት ማታ'

'ያምራል'

በዝምታ የቁስሏን መስመር ቀስ ብሎ ያክማል::

'ምን ማለት ነው?'

ስእሉ ሁለት ጥንዶች አጠገብ ለአጠገብ ሆኖ ሲራመዱ የተቀዳ ነው:: ፊታቸው ላይ ሚነበብ የተራቆተ ስሜት አለ::

እግሯን ቀስ ብሎ ምንጣፉ ላይ ያሳርፋል::

'ሃሙስ የሆነ ፊልም እያየው የሳልኩት ነው... እስካሁን ስም ብቻ ነው የሰጠሁት'

'The illusion of parallel points’

ድምፅዋ ቀዝቅዟል::

'መች ነው ግን እንደዚህ ባዳ የሆንነው?'

ቀና ብሎ አይኗን ይፈልጋል:: መልስ ያጣል:: ቃላት የይሁዳ ለምዳቸውን ይለብሳሉ:: አይኗን ማየት ይቀጥላል:: መራራቅ ድንኳኑን በመሃላቸው ተክሏል:: ለእርስ በእርሳቸው ብቻ ሳይሆን ለስሜታቸው ባዳ ሆነዋል:: በዝምታ ዘላለምን የመሰሉ ደቂቃዎች እንደገና ይፈሳሉ::

'ለህክምናው አመሰግናለው'

ለመነሳት ስትጥር ያልደረቀው ቁስሏ ጠዝጥዟት ወደ ሶፋው ቀስ ብላ ተመለሰች:: አጠገቧ ከምንጣፉ ላይ ተነስቶ ተቀመጠ:: የላባቸው እና የሽቶ ድቃይ በመካከላቸው ይሰፋል:: ጭንቅላቷን ትከሻው ላይ ዘረረች:: ሁለቱም ጀርባውን ከክሬሙ ግድግዳ ላይ ከተደገፈው ስእል ጋር ይፋጠጣሉ:: የስሜት ትግሉ አዝሏቸዋል:: ቃል ቢሰጡት የተሳሳተ ትርጉም እንዳያለብሱት ይፈራሉ:: ጣቶቻቸው ይፈላለጋሉ::

'ፊልሙን ሳየው ይህ ቅፅበት ለምን እንደሆነ አላውቅም... ከበደኝ:: አንድ ላይ ሚሄዱ ሰዎች... ፊት ለፊት ስታያቸው እንድ ላይ እየተራመዱ ያለ ይመስላል:: ከጎን ሆነሽ ስታዪው ግን ወይ ሴቷ ወይ ወንዱ ቀደም ብለው እየተራመዱ ይሆናል:: ማን ያቃል? አብዛኛው ትዳር እንደዛ ይሆናል ሚያበቃው:: እስከሆነ ጊዜ ድረስ አንድ ላይ የሆኑ ይመስልና ግን በመካከላቸው የተሰወረ ክፍተት ይኖራል'

ለደቂቃዎች ሲያወራ በዝምታ አይኑን እና ከንፈሩን እየቀያየረች ትመለከታለች::

'እና...'
'ምን?'
'እኔ ነኝ ወይስ አንተ ... ቀደም ያልንው?'