سولفلي كلبك والماي ياهو اصفه من الثاني

_____________

ماي أنته واني الصيحت عطشانك
حته النحل ضل ياكل من لسانك
والفقرة عندك اعز من اخوانك

جنك وطن   كلبك احن      تساوي لفقير وي الحسن
تكعد بلا رسميات وتكله اخيك إني

  _______________

كد ماتحبني حسين هم حبيتك
وهج كلبي من أكبر قصر حب بيتك
مايعرف ابيات الشعر حب بيتك

رداهه الك    من توصلك     تمنيت اشوفك و اسالك
ليش من اذكرك مرات طيب يصير لساني

  _____________

سوالفي كلبك طايح بيا ورده
مانسوة والنه بهل سهوله تمرده
وجسمك حريمه كبال خيل تمده

مانسوة امس  ذاك لرفس     بحركه كلب زينب نحس
ما الكه مثلك بلناس هلكد صدك حباني

    _____________

كلبك جبير واي صدر لو شاله
مايبطي لو يشبع تعب لو شاله
 الضلن بصدر الخلك لوشاله

ماضل كلب     عد الغرب       من يلجم لو ينضرب
يستغفر من الرحمن شايل كلب رباني

_______________

لو باقي هم نحبك ونمشيلك
بس نكصد بجوريه مانبجيلك
 يا ماي موش بوصله غيمه نشيلك

وتمطر وفه      والكل دفه         والمثلك شلون اوصفه
شنهي الصبح وانته وياي احسله لو ماجاني

   _____________

تصبح على تراب اوكع من عينك
وتصبح على اصبع راجع لجفينك
وتصبح على اختك ماتصيح وينك

وماكو حزن     ولا شفت اذن     من بتك تكضهه وتون
تصبح على الجربه وماي لو وجهك لنوراني
            

حسن العبودي

ياخويه ون براحتك علدمعه لا تتوازة
ماعايش الحركه كلب بس اليعوف عزازة

وياخويه الله يخليك    عيف البجي وسولف بيك  
  والتنزل دموعه عليك      بس اليعوف عزازة
__________

صار الصبح كلنا سوة واحد يصد بواحد
وباب خيمة شجم طفل مكسور كلبة وكاعد
بلبال ملتم البجي بس العيون تعاند
والكلي احبج اختنك واشبع بواجي ومارد

 شايف اذا رايد تشم واحد تحبه هوايه
وتذكر الفركه اجت وتشم حرك جمرايه

صعبة العزيز تخسرة       يمشي وتباوع ضهرة
يتكبع ابيض شعرة     بس اليعوف عزازه            

__________

يا خيل يا حركة خيم غير انته تارس بالي
دورتك بوكت الجنت امتيهه حته خيالي
اسال على أحوالك وأنه بلضيم احس  احوالي
كدامك عيوني انجفن غير انته كلش  غالي

اني ويه عون وكل بشر يابو علي فدواتك
ولا تحرك بدمك بعد امن على بنياتك

عمتهن اهتم بيهن        ياخويه عيني عليهن
ودموعه ما يجفيهن  بس اليعوف عزازة
_________

آنه اختك واعرف شكو بكلبك واريدك تهدة
محروك كلبك عل مشو طيبك يخوي شحدة
بس كلي جرحك ما نشف مابيك حيل تشدة
المثلك يشيلونه بكلب مو هيج نايم وحدة

يحسين يا ريحه هلي يا تربه ومصلايه
شكد طيي ويه اختك جنت ماغاثني بحجايه

كلبك عل اختك ضل دوم      ومازاعل عليه بيوم
المابي خلك حته يكوم      بس اليعوف عزازة

____________

الفركة واهس للدمع وياهه كسرة خاطر
ماكدر اتصور بعد شرايد يسوي العاشر
من تباوع اعزازك مشو وتضل وحيد وحاير
يلشلتك بوسط الكلب ينشال راسك باجر

وتفز على حجار وضرب بعيونك المدميه
والوادم الشبعت ضحك من تعثر المسبيه

باجر سبي وطبة سوك       وجم خد يون ومكطوك
اليبجي من كثر لشوك       بس اليعوف عزازة

________

اني ادري بعيونك بجن بس انته ما تحجيلي
لمن اصدلك ونهضم تفر الرمح تبجيلي
يا حيلي اصيحلك جنت بس رأس ضل من حيلي
مثل الكلوب السحكتك ياخويه صاير ليلي

بعيونك تنكط حجي عتاب وحنين وحركه
هوه اليحب لابد يجي ليوم وتخنكه الفركه

الماعنده بلدنية احباب   ماكاعد بعتيت باب
البدة حيلة وما شاب    بس ليعوف عزازة
_________
لم روحك وكف الدمع خنسافر بلا جية
ونغير وجوه واسم ونبدي دمعه شويه
هسه اسمك احسين وانة تصيحولي يالعلويه
بس باجر انته المنذبح واني اسمي يالمسبيه

باجر شكو غيمة عبي تمطر شرف علوادم
ويفز شكو حشمة وستر من ثوب اخيتك قادم

باجر على عناد الناس          اشتم براية عباس
ماشايل بكلبة حساس       بس اليعوف عزازة


الخادم : حسن العبودي

كدامي واشتاك لعينك     بنص كلبي واندهلك وينك
يلعايش بيه وبحساسي    يحسين اشتمك بانفاسي
كدامي واشتاك لعينك

__________

جبت العمر كلة اهواك     وادريني قصرت وياك
يحسين الاهك سواك    حته تعيش بكلبي

ربك خلك ناس هواي       سواهه من طين وماي
بس انته من طيبة وماي    وكل للزهره شربي

لحسين ودرت ماي من اديه   للعالم هديه    مو بس للخلك سويته اليه

يا طعم الهيل بحب صافي    يالطايح ماي اعله شفافي
يالشابع وادم حنيه           الريجك ما ضاك اميه

__________

شايل كلب مابي عيب        هوه الله دارالك طيب
مابين عليك شيب       يشبة لون خدودك
جي انته عايش وياي         من عدهه ما ضكت الماي
فضلك علي صار هواي       لمن امشي بزودك

بيك احجي صرت صبح ومسية     من رتك إليه     كل الوادم التمت عليه

يحسين الناس يحبونك      ماعدهم بس يخدمونك
من سمعو خطار سهامك    بلمقتل صارو كدامك

_________

سولفلي جرحك ما طاب      من القهر شعرك شاب
بعينك لمن طاح تراب         وانته محد يمك
تتلمس وجوه الناس         جنك مضيع عباس 
لمن جست جربه وراس     ضل كلبك يلجمك

من شلته عله حضنك فز  ونينه   والكلوب الحنينه    
تندلة المحب ما يحجي وينه

خطار اتمنه بطف روحك      واتحسر واستر بجروحك
يا نسمة ومتروسه بروده     بتراب عيونك مسدوده
__________

امنيتي احسك مرتاح        والحزن من كلبك رااح
شيصير لو تنسه لراح         وتضمد جروحك
من جلجل عليك غروب      تمنيت اصيرلك ثوب
 يحسين احسك متعوب     الله يساعد روحك

شكد شايل صبر كلبك حبيبي     يا جرحي وطبيبي  
امن اول طيحتك بلش نحيبي

يا ماي الما عنده مروة         يمشي اعله الكاع وماروة
شفتك خلاهه بلا كطرة       يل ي تهز غيمك وتمطرة

________

يا أول حسين يروح          من الله متروس جروح
بس كل سنه تردلك رووح    ويردلك ونينك
مو انته ميت جا ليش       يوميه ويانه تعيش
ربك خلق كلبك بيش        ودارالك حنينك

يا أول بشر يتاذة سكته          وملجوم اعله بته    
لو عندي كلب طولك حضنته 

جم غيمه لملتمه بعيني     تمطر من يتاذة حسيني
وتروي شفافه لذبلانه     وتهيد ضلوعه التعبانه
_________

سولفلي جرحك يحسين       لمن طحت بالك وين
مشغول احسك بثنين           زينب وابو فاضل
محتار تمشي لعباس        لو تركض توخر الناس
بس تالي انته النتداس      جرحك مايجامل
زينب من تدورك خل تشوفك    من تلزم جفوفك
يل ضيعت اصبعك ما تروفك

يل عطرك حبوس بريتي       كون ارجع للطف منيتي
لاطشر ماي اعله عيونك       حته التيهوك يعرفونك


الخادم : حسن العبودي

عتاب     مخنوك بصف مجروح
عتاب     حسين وابنه المذبوح
________

حسين انتبه من الخيم حس مو غريبه لونه
ونينه على كلبه عرف لوالد يحس صوت ابنه
تعناله يصرخ يا علي يبجي وتمدد  يمه

شمه وطبك جفن بجفن       هذا انته البكلبي تون
كد ما عصرتك بلشبك         جفي انطبعلك بلمتن

تروح      احجي بصوتي المبحوح
تروح      حسين وابنه المذبوح
__________

يوليدي من طولك وكع من ضلت دموعي تسيل
حسيت نبضات الكلب تتراكض ركاض الخيل
من شفتك تبده الدمه ومن ضهري يتبده الحيل

ما لايك عليك الترب        يلاكبر وفكدك صعب
تستاهل ابجيلك نهر       غير انته وصله من الكلب

علي     حيلي بفركاك يروح
علي      حسين وابنه المذبوح
_________

شم عطره الحسين وبجه وساعه يصد لعيونه
يحجيله يوليدي الربه حق الاهل يردونه
البي شبه من النبي ليش العده يذبحونه

بحضاني نور يصد الي               مدري محمد لو علي
الله استجاب لدعوتي              ورجع محمد من هلي

يعين             تتحمل دم تنوح
يعين           حسين وابنه المذبوح
_________

كلش كثر شيب الشمس لمن اتبدت كمره
من راح الحسين لعلي رد للعقيله شكبره
ويكلهه يم عون الوكع كلش عزيز بزغره

يتركني الاكبر جنت احس      ضل كلبي يوجعني من امس
كلما اذكره اشبع بجي            لا شاف حنه ولا عرس

حرام      تعيش بفركاه الروح
حرام     حسين وابنه المذبوح
__________

تخيل حسين بلا علي غالي ويفارك غالي
من طيحت ابنه وللسبي تبقى الدموع تلالي
حسيته يحجيله بدمع يلاكبر ادنالي

يوليدي اريد اخر حضن      ون اعله جرحي واني اون
يل جنت امسح دمعتك     ليش الرمل غطه الجفن

عجيب           كبل الوالد مطروح
عجيب           حسين وابنه المذبوح
____________

من العطش ريجك علي يابس تغير صوتك
موتك ترس كلبي قهر الله واكبر موتك
حبيت ربك واعرفك لمن تحب كل قوتك

ربك يحبك ولسبب              تكثر حلاتك بل تعب
لو ما يريدك خالقك            جا شيبيت من العتب

لحبيب             كبالي يون ومجروح
لحبيب             حسين وابنه المذبوح


تمت ببركه الزهراء

الخادم : حسن العبودي

اني وياك شلون انساك وانت العايش بدمي
______________________
حسين لوحدك نايم اجيتك يبني اشوفنك
يوليدي السحك والخيل شكم وصله خذن منك
واذا جسمك بقه بلا راس بعدني هواي احبنك
سهامك فوكك التمن ماكو مجان احضننك

جسمك صار فوكه حجار من شفتك كبر همي
______________________
اذا تشبع قهر حقك عل صاير ولا لومك
بس لا تبلع بريجك رمحهم عبر زردومك
من دوس الخيول عليك يبني مشككه هدومك
معقولة السحك يحسين هلكد غير رسومك

بعينك طاب صم تراب بس من صوتي تعرفني
______________________
جسمك ما بقاله مجان الزمه وكبرت الحيرة
بعدني زغير اشوفنك بس جروحك جبيره
مثل زخت مطر يحسين السهام بجسمك اديرة
قانون السهام يكول جسمك ينحسب ديره

ماكو مجان يلعطشان السهام التمن بحضني
________________________
مطشر صاير من الدوس جسمك جنه حبة هيل
بعد لا تحرك بدمك اذا وحدك تكضي الليل
نكسر ضلع امك بعصرة و ضلعك من حوافر خيل
اريد عيونك يطيبن مو دم ورمال تسيل

يبني حسين اريدك زين وانيمك يل ترف يمي
_____________________
حنين وليدي مو بيدك عمرك ما شفت جرحك
من شفت السبايه تنوح راسك ياكل برمحك
جنت رايد يجيك انسان يشربك ماي ويفرحك
بس كل اليمر عليك يديره كبالك ويضحك

هاي الناس مو عباس يجيك وكلة ضل محني
______________________
حسين العايلة توكلت راحت عل هزل للشام
ضلو لا ابو فاضل رجع لا فرحو بجسام
لا انت الرجعتلهم بقو بس زينب وايتام
اذا حته بعبايتهه يطلع شيب ما تلام

اختك هاي وبلا راي ورثت هل قهر مني


حسن العبودي

الروح محتاجة الكمر لو بس يدزلي صم نضر
لو عطر ثوبة اشتمة
ماشاف دخان الخيم ها نابت بعينة السهم
حته التراب يلجمه
_________________________
عباس ما ترهم بعد ارجعلي خوية بسرعه
شو روحي ظلمة بغيبتك ارجع يواهس شمعه
حجي الشمر كلش يغث كونك تجي وتسمعه
يكلي الحسين اصبح وذر واني كسرتلة ضلعة
احسين مو مالت ذبح وجهة احلا من وجة الصبح
جا ليش حزو راسة
لا والتكتلك ما هدو وذرة من اذن بتة خذو
ويجرحوون احساسة
________________________

خوية اختفى ذاك الجسد كونك تجي وتحضرة
تنداس شفتة من شوكت ينطبع حافر مهرة
فكرت الم بجثتة وبلحومة رحت ادورة
كلما اضن جسمة اكتمل لهناك اشوفن وذرة
وذرة اختفت من الصدر شوصلهه ليدين الشمر
وشلون راح اردهه
وبكل صلافة يصد الي ويكلي ها يابت علي
بجفة النذل مردهه
________________________
عباس هلموقف صعب ماتحتمل يلعباس
لمن طلعت من الخيم جدمي عثر بشجم راس
تفكيري يم اصبع ترف فارك جفوف الحساس
شكد زحمة الاصبع ينكطم مفروض الاصبع ينباس
من يمهه عيني تكت دمع من شفت الاظفر منشلع
بلكاع وتسحكة الخيل
كلبي متلا من الالم ... من باوعت سنة انثلم
شلون يضحك بليل
___________________________

كونك تشوفة شكد صلف من يضرب برقية
بلروس تعثر والنذل مارجف كلبة شوية
وتكلي يا عمة الحبل خلة نقش بادية
يا عمة تعبني المشي مرغيلي بس رجلية
يا عمة مشتاكة شكثر . اكعد واشم ذاك العطر
من ثوب ابوي شوية
وابعثلة وي جرت النفس شوغة ودمع بية نحبس
من جرت الترجية
_________________________
عباس اذا عينك طفت يكفينه عطر حساسك
كد ما حنين اعله الخيم شمس الله تطفى براسك
تنور راسك يا كمر محد تعنه وجاسك
هنياله الحسين من اجه اخر دقايق باسك

ياعافيه وبيك الدفو عباسنه واعرف كفو
بس كلش حتاجيتك
لوما ركضتي وي الخيم ماخل بعيونك سهم
يابو الفضل جا جيتك


حسن العبودي

بلطيف اشوفك مو صدك
ويخضر بكلبي العشك
بس من افز امن الحلم
مثل التنانير احترك

__________
يالتارس عيوني هله جا ما خذتني لكربله
والليل نبله حرمله حسيته

بكلبي صحرة ومن ترد ايخضر عليهه الورد
كبرني كد سكنه البعد حسيته

يا ماي بستاني يجف من التجوة ماضلي جتف
وفراك ابو عشره كلف حسيته

وينك يبستان الحزن بلفركه ذابل جم حضن
الليل وصورك من يجن الخنكه توصل للعرك

_________

هوه اليضل بلا هوه وبلا جمر وحده انجوة
الما عنده بس وادم دوه امفارك

التارس الحايط صور والعايش بديرة سهر
والكاعد ينيم الكمر امفارك

سرداب البروحي من امس شكد تانه وجهك يا شمس
والينده بس ما يحس امفارك

من ينكسر كلبه اليحب كل وادمه يحسهم جذب
راح اترك طيوف الخلك وياك اعيشن يالصدك

____________

شلال عيني ما سكت تترس شليلي شما بجت
ولشوفتك رايد بخت يرويحتي

من كالو تبدة الكمر ضهرك ودلالي انكسر
جا وانته هم غادي وذر يرويحتي

يالكاسر عيون النهر لمن طحت مثل المطر
كلبك مثل هيله انعصر يرويحتي

كالولي جدمك منعثر شلته وطلع جف الكمر
ساعتهه شيب حاجبك وجفوفك بثوبك تشك

__________

الحاقد عليك وما هوه ما ينذر لعينك ضوة
الخيل والوادم سوة ياذونك

من شالو الراس برمح كالولي شمرو فص ملح
خاطر يصل حيل الجرح ياذونك

كالولي واحد من دفع بتك كبل راسك وكع
من الضرب راسك شبع يا ذونك

بحجار وتهف الغرب وشتايم تحز الكلب
يالتحرك بكلبك خلك مثل الخيم من تحترك

__________

انذر جنت لمن تجي امحضرة الك ديرة بجي
لسني اعله حايطنه انتجي بس وينكم

يالوجهك بلون النشه انغثيت من كالو مشه
من المغرب محضرة العشه بس وينكم

يالتحله كلما تنثلم الطف سمه وجسمك نجم
مليت من شمت الهدم بس وينكم

كد الهوه بكلبي الحجي والفركه رازونه بجي
يالتارس عيونك رمل واشتبجي لمن تفترك
__________

ابهيده يتبده العمر سم الهوه بريتي يمر
من صار فوكاك الشمر هد حيلي

اتربع وكض لحيتك وضل يشلع شيبتك
وبجفه يعصر وجنتك هد حيلي

شك ثوبك البي استعز كتله النحر ضل بي يحز
من هلحلم كلما افز هد حيلي

يوميه اعيش وي الحلم طابوك ومشاتم زلم
يالكايل لكلشي هلا بسهام حضنك ينشبك


حسن العبودي

يا جلمه الله بلخير كل الخلك يحجونه

#####
صح هيه بس تصح نخليهه ثنين
تنكال بلديوان من معزبين
بس بلمواكب تصبح الله بحسين

صبحكم  الله بحسين لكل خادم يشوفونه

______

حسين احس حبه واصل لشرياني
كلما يدك لخيمته وداني
واتخيله يمي ويكض رداني

هيج ويسجلني حسين وي ربعه اليخدمونه
_____

لو صير شايب بلخدم يلكاني
بس الاريده اتمنه ما ينساني
شكد اشرتله وصيحت هذا اني

وتذكرتهن بعدين لرمل ترس عيونه
_____

كلما يحب حسين خيضم ايده
زحمة وجفوف حسين عنه بعيدة
يتمنه الأصبع عل الاقل يريده

يتلمس وجوه الناس يعرف منو حبونه
___

حسين غيمه واحنه وادم صحره
نتمنه كل عاشر ينكط مرة
لو ما احبه ومستحي من الزهره

ماكول راسه المكطوع شمس الله اليعلكونه
_______
ماكول جي ماريد يذكر جرحه
اتمنه اكتبله قصيده تفرحه
مو كل سنه نذبحه ونعلكه برمحه

ونكول باسنه الخيل ما رادو يسحكونه

______
اتمنه اكول الخيل ابد ما داسه
بس التغث بجدمه داس حساسه
يا خيل هذا الما ادنه وجاسه

من كثر ما داسه لخيل الجلد اسود لونه

______
نفسه السواد الخضر اعله جفوني
من فدوة لمتونه تروح متوني
بلا نضر كون ولا تشوف عيوني

لو ينشمر حيلي عليه ومتوني فوك متونه 
_____



حسن العبودي

حسينا وا حسينا

اني انسان مذنب وانته طيب حيل
اذا ما ترضه عني ما انام الليل
ذنوبي بكد سهامك والسحك والخيل
اذا مو عفوك انته اني ما اسوة
____________

ذنوبي خيول احسن تسحك بكلبك
شكد واكفلي وكفه شيخ يم ربك
موش جبير لكن ذنبي المشيبك
عشرتي مرة وانت ل عشرتك حلوة
____________

رمح ذنبي وصل كلبك يبعد اهلي
محلفك بل متون الهادله اغفرلي
شلون ابجي عليك واني ماصلي
كلبي من الذنوب هواي يتلوة
___________

بهت كلشي بدونك حته طعم الماي
شوية الطف اشوفه وكلبك انت هواي
ترد روحي اذا كالو محرم جاي
بنار الخدمة اتمنة ايدي تتجوة
__________

يالمخلي الرمح من التعب يعرك
وحكك كلبي من الشوك ما يزهك
لكشلك راسي مثل الثوب من ينشك
دمي الما يسيل عليك ما يسوة
_________

يل كلبك جبير بكد سترة اختك
اول ما حجيت بزغري سولفتك
زغير وما اشوف نسان بس شفتك
غيرك من يجون بالي بل كوة


حسن العبودي

اني علوية       عندي امنية        قبل موتي
اكتب البيهه     صعبة احجيهه      تعب صوتي

امنيه والكاهه وين     موته وبحضن  الحسين
عمه عمه
___

بل خرابه فزت وصار الونين
جنهه شافت بلطشت راس الحسين
مدري رجفة راية لو رجفة ادين
نامي كتلهه ابوج الغالي زين

تكلي مو زين وشفت    حسين راسه بنص طشت  
شفته متعوب ومتت      علية
عمة بي ريحه حرك      ليش وجناته زرك
فدوة احجيلي الصدك    علية

سولفت كوة    عمة اي هوه   ابوج انتي
مددي شوية    جنتي مسبيه   تعذبتي

جنهه منتضره لسنين    موته وبحضن الحسين
عمه عمه
___________

تكلي اريدة وخضر بكلبي الجرح
احلم براس الترف كاشخ رمح 
ملتم اعله جفونه طابوك وملح
زحمة يتخلة بطشت وجه الصبح

توني اجيت احجي الصدك     دخلو براس العشك 
وكف كلبي وما يدك              سكوت

تكلي اريد الجان احن        زاد ماريد وصحن
سمعن وكلهن بجن         سكوت

تلمست راسة    كزبر حساسة    على بنيته
صيحت يابه    راسك شجابة    نذبح يمته

شصاير براس الحنين    موته وبحضن الحسين
عمه  عمه
___________

ملخت خدهه رقية من الالم
شافت بكصته اثر حفرة لسهم
حيرة ماتدري صدك لو بلوهم
اه يضحكة سنة بحجارة نثلم

تكلي يا عمة لعفو        فدوة كليلي شكو  
شصاير براس الابو       عجيب

لشفه ليش مورمه         مفطر شفافه الضمه
عمه شو كله دمه          عجيب

باسته كلة       وشيبت طفله       لزغيرونه
شبكتة بحركه   من بعد فركه   على عيونه

جنه يسالهه تجين         موته وبحضن الحسين
عمه عمه
_____________

من بعد ذاك البجي صارت سكوت
بت اخوي اعله النحر ماعدهه صوت
والهوه بريتهه مايقبل يفوت
جنهه تدري بحضنه من غالي وتموت

بنية من كد العشك        ماتت حركة شبك 
تدري الملاكه صدك         ممات
ماتت وضليت افل      من اديهه شكم حبل
ايد مو مالت طفل      ممات

جف زغيرونه    من يعصرونه   يصير ازرك
والمتن عمبر       ينكلب احمر    اذا ينطك

مبين عظام الادين        موته وبحضن الحسين
عمه عمه

_________

شكبره كلبي وبلسبي كلشي شفت
والله لوما عندي امانه جا متت
جني مو زينب انه بكلشي عثرت
طفلة ماتت فوك ابوهه وهل صحت

خوية بتك بل غرب      صافنه طول الدرب
تحط اديهه اعله الكلب   حنين
هسه ماتت بل حضن     وانت ابو حساس الكطن
ادري بي كلبك يون       حنين

عاشت شوية  وماتت رقيه    بحضن غالي
رادت دكلك   موته وبحضنك        يهنيالي

موتي سكته بلا ونين        موته وبحضن الحسين

عمه عمه


حسن العبودي

من الكبر اجيته      شابع سحك لكيته    متروسه دم لحيته

ووليدي ما ينحضن

@@@@@@
حضنته وكمت اشم ريحه حرك كلبه
ناسي جروحه كلهه وصافن لدربه
اكيد حسين فارك واحد يحبه
حنين وليدي اعرفه والبجي يتعبه

عايف الم سهامه        يبجي على اليتامه       شايل كلب حمامه
ووليدي ما ينحضن
@@@@@@
بجيت وجنت اخافن خنكته تزيده
منو اليكدر يشوف موذر وليده
لزمت جفوفه ابوسن كلش بهيده
لكيت جدام خيل مكسرات ايده

محتاره صرت اباوع    بجفوفه تسع اصايع      خنصر حبيبي ضايع

ووليدي ما ينحضن
@@@@@@@@
حضنته من المحنه والله مو بيدي
ابد ما جان نيتي الجم وليدي
ماكو مجان المسه لو احض ايدي
كله اسهام صاير فرحتي وعيدي

مختنكه واني اشاهد    اتعنه يمه واحد    ايكص اصبعه كاعد

ووليدي ما ينحضن

@@@@@@@
شتاكيت لعيونه هواي اباوعهن
لمن جان بعده زغير احن الهن
بجيت وشفت دم احمر نزل منهن
كثر ما رمل بيهن كوه افتحهن

كل هذا ناسي روحه    يم الخدر جروحه    جرو تراجي روحه

ووليدي ما ينحضن

@@@@@@
حسين الخيل ما خلت عظم سالم
كلي المهم ما داست على القاسم
كتلة رتاح صار هواي ما نايم
سهران اعله زينب من حجي لوادم 

ابراسي من اجوهه    يا يمه شتموهه     تتحسر اعله اخوهه

ووليدي ما ينحضن


حسن العبودي

وجودك راحه نفسيه تمر اعله البشر نسمه
تره هيه احبك كون الك بس نحجي هل كلمه

_____

عمه كلبي ولكيتك شوف درب مابي اثر عثرة
ابنص الليل اشوفك شيب تكسر واهس الكمره
عشرتك والله حلوة هواي وعشرت غيرك المرة

اريد اشتم هوه حساسك
وابوس الشيب الراسك
وامسح كل رمل جاسك

سمه واجهك واشوف يطيح بكل حجاره جم نجمه
____

مسافه جسمك الملموم وبين الراس الف آية
اجيت بديره العميان تكره طاري المرايه
ما عدهم حسين يصير وجهه بنور الولايه

سجاده واجه من الله
ما سجدو شكر لله
كل واحد اخذ وصلة

باكو حته اصبعك ليش بشر ماقدرت نعمه

__

مشيت بديرة عيونك لكيت شجم رمل غافي
ولكيت الكمر عل كاع يمشي بلا نضر حافي
شفت نسوان طبن سوك ولكيت مورمه جتافي

لكيت بنيتك محدبه
واخيتك كلش مشيبه
بمشيهه لوادم معيبه

لكيت من القهر يحسين ماتكدر ترد كلمه

____

كلت خل ادخل ابالك واعرف المخفي والغايب
دخلت بواهس الشبان طلعت ثمنطعش شايب
حته كلبك من على الصار لكيته من القهر شايب

جبيره جروح البكلبك
بكثر ما صافن بدربك
تره التفكير المشيبك

كثر ما صيحت عل راح كلبك محترك دمه

______

يبستان الله المخضر دمه ويحصدك الحافر
لكيتك وانت جوة الخيل كلبك للسمه مسافر
ولكيت اصبع خذو منك متحف للشذر صاير

لكيت ضلوع متكسره
وذر عل كاع متطشرة
وذرة ادفع بوذره

كل هذا واشوفك شيخ عراضه عليك ملتمه
_

يسجاده صلات الدين اجاك اشجم سهم صله
مكانك مو هنا يحسين مكانك انت يم الله
ما يتسمه هذا انسان اليبوك كماط عبد الله

تعال وكعد وليدك
لان رب الهوه يريدك
عوجه الناس مو بيدك

التعيش بديره الدخان ما تعرف شنو النسمه


حسن العبودي

باب كليبي عليك انطبك      شدني اباب عتابك علك

عيشني بديره من سهام 
حته اعرف يحسين شضام

 ونين بكلبك
___

يل حاصن بصدرك ديرة سهام
سولفلي عليك بكلبك شضام
مثل شكل المطر ويطيح عل جام
زخن فووكك و فاتن للعظام

يحسين صدرك صار ديره
والرمح جن شيخ العشيره
سير لجرحك حته الحجار
جا هلكد جروحك جبيره

اعذرني من الحسرة ارتعش       حته بجفنك ما ضل رمش

تمنيت الشاهدته احلام 
حته اعرف يحسين شضام

ونين بكلبك

_

سولفلي المواجع شيبة شيبه
شصاير ب الحسين بلا حبيبه
لا تتعب الرايح ما تجيبه
لا ترجف حسرتك مو غريبه

كلبك جبير تحمل شكد
يل لون جلدك صاير اسود
الرمل لمن فات بلعين
تتلمس وما تعرف احد

من صارو فوكاك الغرب       من يا صوب تحس الضرب
بطابوك يكسرون عضام
حته اعرف يحسين شضام

ونين بكلبك

_

راسك عل رمح متعوب يحسين
دامي ولل حجار اصبح نياشين
العين البيهه رملة تشوف مو زين
بس تسمع صياح وتكبر سنين

كلبك تطشر عل يتامه
والراس فوك بلا عمامه
كد ما شبعت حجار يحسين
ماباقي حته آثار شامه

ماتسمع زينب من تون           صارت كلهه تراب الاذن 

كون اسمع شتم الظلام
حته اعرف يحسين شضام 

ونين بكلبك

_

يل صاير جبير بكد حسرتك
صفنت هواي بيك وما عرفتك
اعذرني الخيول موذره جثتك
طحت عليك ارجف من شبكتك

محبس وصبعك سافرن وين
جمالهم بل بوك موزين
اعرف الهاك بحلكك هواي
بس هوه مامد ايده يحسين

مد الخنجر وضل يكص       حسين انت بشوغاتك تغص

شويه اطيني من الالام
حته اعرف يحسين شضام

ونين بكلبك

_

يل صلت وقوف عليك السهام
شكد صاير تون بليل متنام
راسك بل طريق يشوف الايتام
وبلطف جسمك ياذنه العضام

جسمك وذر والراس يفتر
الله يصبرك يبو الاكبر
كدما حنين لهاي الايتام
حته الرمح بلدرب خضر

من تحس واحد ينضرب       كوه عيونك يبجن ترب

لزركه عيونه شلون ينام
حته اعرف يحسين شضام

 ونين بكلبك

حسن العبودي

العباس ع رسول الطف

خرج البدر الينا          انه ابا الفضل
وجب الموت علينا      اننا لا  نحتمل

_______

بزغ سيفه من المخيم والركاب تحضرت
هواي وادم قبل جيته على القبلة توجهت
حان وقت الموت قومو كل نفس احتضرت
جائهم عزريل طف والحلوك تشاهدت

جئت حطمت الرؤس     والرجال اندثرت
كل من يحمل سيفا      كفة تبعثرت

________

هذا كله الخوف عدهم وابو فاضل ما وصل
الكمر مو بس سيفه يذبح خزرته تكطع وصل
جائهم بدر المخيم وعلى النهر اكتمل
قال ادخل جربتي والماي من خوفه متثل

دخل الماء اسيرا       نصفه صار بخار
انه كف اليم             يخرج منه شرار

___

زلم كد ما خوف عركت صارو عظام وهدم
يفزع وعلكاع دمهم خيط بلطف ينرسم
عندما يرفع كفا يلمس طرف النجم
قالو قف نحن نساء منو كال احنا زلم

انما نحن نساء    نرتدي ثوب الرجال
بينما انت عظيم     عابرا حد الكمال

_____

لفلف الخضرة ودخلهه منجل وطب للزرع
الكمر بس كدام اخيه صوته ابد ماينسمع
عجبا كيف وفائا مع رعب يجتمع
انة العباس فعلا بلعرك ما ينجرع

سيفه قد صار منجل      يحصد كل الرقاب
كل من يدعو النجاة       دعواه لا تستجاب
________

ابو فاضل كشخت الطف والدرع لايكله حيل
بل نهار يصير خيمة وكمر من يدنه ليل
 انه اخ خجول عند زينب والدليل
 عندما تاتي اليه مستحه الكصه تسيل

صاحب الطول الجميل     انت جملت النهر
ايها الوجه المضيئ        ما بة غاب القمر ؟

________

شايل الراية ويقاتل هيج شايل مقدره
الشافة كدامه يقاتل يفتر يشوفه وره
انه عصرة قبر وعذاب الاخره
كانت الارواح تاتي يمه بس تلزم سره

انه النوع الوحيد     يتجه عكس المدار
قمرا لكن فريدا           يخرج ليل نهار


حسن العبودي

العل درب تعبانه بتمن
تبجي ليش متانيتمن
تشتم باديهه         يا عطر عليهه
تبجي ليش متانيتمن

___

شكد عزيز عليهه وتشمة بقهر
ماكو ذكره لا قميص ولا صور
هوه بس عطره اليصبرهه السهر
مدري يشبهمن كلبهه من انكسر

جنه يشبه ضلع ابوهه    مدري كسره ضهر اخوهه
                           ونين
لان خطوتهه ثكيلة        صرت اشك هيه العليله
                          ونين

كثر ما نتطر حزنهه 
طابع الباب بمتنهه
تنتضر يجيهه     يا عطر عليهه

_____

تقربت يمهه وحجيتلهه بجرح
فاطمة انتي ؟ الحمد لله عل رمح
حسين ابوج اتذكرج من الصبح
دز الج بوسه قبل ما ينذبح

سمع بيج وكض وريده     وداست الخيل اعله ايده
                              حسين
ماكدر عمج يلحكه            هيه طيحه وهيه سحكه
                            حسين

يسلم عليج ويكلج
يل عزيزه هواي احبج
واستمر بجيهه     يا عطر عليهه

_____

حجيلي شنهي اليوجعج بس بوني
جاوبتني ستشهد ابالي الحسين
شيبت من كلي باجر ما تجين
خايف يتعبني ابو كلب الحنين

راح غالي بضهر غالي حسين ما كلي تعالي بجيت
حيلي يكدر عل عبايه هناك اذا ركضت سبايه بجيت

راحتي من يتعبوني
انذر دموع لعيوني
لعمتي وبجيهه يا عطر عليهه

_____

عدت ايام وعبر ذاك الزمان
وفاطمة اتانيهم بنفس المكان
بتسمت وكالتلي احس الملكه حان
حضري دمعج جاوبت فات الاوان 

ضمي شباكات الملاكه         مات كلبج على الناكه
                          سكوت
علكي للقاسم شموعه  وطشي مدمعج على ضلوعه
                         سكوت
 
لا ادورين بضعنهم
هناك مذبوحين كلهم
كربله وسبيهه يا عطر عليهه
____

راح كلة حسين لكن رد خبر
هيه هاي السالفه التكسر ضهر
ابجي واسمع سالفه رأس ونحر
نكسر واهس عيشتي وضلعه نكسر

جان الحسين شحلاته راح ابجي بكد غلاته
حنين
حجاية اكله وما اتعبه هوه يدري شكد احبه
حنين


للحياة ماناوي ضله
حسين رايح فدوة لله
ناوي يحضه بيهه يا عطر عليهه

حسن العبودي     

يوم من الأيام سيرت طفلة اعله بيت العافيه
يوم من الأيام لكت شيبة من القهر ما غافيه
تكلهه مساج الله بحسين الهوى
رايده اكعد يمج انتاني سوى
يوم من الأيام

__________

تكلهه هنيالج على هذا الابو
يتيمه اني واليسد جرحي منو
من صرت جيرانكم ضكت الدفو
والدج كلبة حنين اعله العدو


حقج عليله وحالج أصعب
هوه اليعوف حسين يتعب
عندج ابو من طيبة مخلوق
من الصبح لليل ينحب

كومي ستراحي التجوة رسمه لونهه اعله متونج
كومي ستراحي بلكت يسير حلم لعيونج

وانتي كليله ترة عيونك دوة
رايدة اكعد يمج انتاني سوى

يوم من الأيام


______

فاطمة تبجي وتكلهه تحضرت
لامه هديماتي منتضرة جنت
توسلت بيهم اروح وما رحت
همه عل نوك اصعدو واني طحت

عيوني تبجي واحجي كوة
فاركني وين الجان يسوة
حسين اليفارك وجهه مينام
جان اليرد الحيل هوه

كلش هضيمه حسين اليرد حيلي هدم حيلي
كلش هضيمه حسين راح وخنكه صاير ليلي

هسه كلبي بنار الأشواك انجوة
رايده اكعد يمج انتاني سوى

يوم من الأيام

__________

صارت تكوم وتطيح اعله الجرح
عافيتهه تخيلت صارت رمح
دك كلبهه ركاض خيل من الصبح
حلمت بزردوم يابس ينذبح

تدعي شكثر وتسولف العين
كون الحلم مو ريج الحسين
منحر حبيبي ينكط احلام
فززني سيف بحلم موزين

يوجعني الحسين من الحلم يا كلبي كلش خايفه
يوجعني الحسين مشة بطولة وراح يرجع سالفه

سالفه دخان يحملهه الهوى
رايده اكعد يمج انتاني سوى

يوم من الأيام

_____

الليل يخلص بانتضار ويبدي ليل
والعليله ابابهم تتبده حيل
الحيل جانت شبكه من حسين حيل
اجت يمهه تكلهه اجه اليوم الثكيل

بس حضري عينج للبواجي
شفت بحلم حمرة التراجي
شفت الكمر مستشهد بماي
شفت الجبير حسين باجي

محتركه الخيام هناك بلطف شكك اذني الصايح
محتركه الخيام والجبيره حسين كلبج طايح

تعودي عل ضلمة لان مات الضوة
رايده اكعد يمج انتاني سوى

يوم من الأيام

_____

فاطمة اسم الله تكلهه وتحترك
غير يوكف كلبي اذا صارت صدك
اني اغار هواي كلما ينشبك
شلون لو جوة الحوافر ينسحك

كون الله لا حقق حلمنه
وي الغروب ترد اهلنه
شكد حلوة من يشبكنه الحسين
وبحضنه كون يلم شملنه

عمري اعله عمرة والله شيب راسي طاري بعاده
عمري اعله عمره شوكت يرجع وافرش السجاده

للصلاة افرشلة عيني لو نوة
رايده اكعد يمج انتاني سوى

يوم من الأيام



نضرة يا صاحب الزمان

حسن العبودي

امنيتي اصيرلك دوه
وانذرلك بريتي هوه
انته السمه وغيمك رزق
وانت التوزعلنه الضوة
@@@@@@@@@
يا اول عطش يكسر كلب مايه
يا اول سكوت يذل الحجايه
يقران الله طايح خنصرك ايه
ربك خالقك تربه ومصلايه

يا اول واخر عشك
بس صيتك بكلبي صدك
ضي عينك اقوة من الشمس
ما تنطفي بديرة سحك
@@@@@@@@@
انت اول حزن مريود بلديرة
زغير الكون هذا وروحك جبيره
ياول فزعه اشوفك ساعه الحيره
بس منك وبيك انعرفت الغيره

شكد مستعز بيك الورد
كلبي الجمر رادك برد.
يا اترف انسان شعجب
جوة الحوافر تنمرد
@@@@@@@
يا اول بشر داسنه هلكد خيل
اذا لمك صدك يعبر عليه الليل
يعينه الله علي المتك رايد حيل
جف هاون الحافر وانته جسمك هيل

الحافر بجدمك نفش
يالدايس بكلب العطش
اذن اذان التضحيه
سجاده الحسين الفرش
@@@@@@@@
يبو الاكبر علي دور عليك هواي
كلي ليا كتر بلطف يروح الراي
اتصور اصبعك راح وي الماي
لو وي الحوافر للمخيم جاي

كون الله ما جاب الظهر
ولا اشوفك يسككك مهر
اكبر حسافه اتسولفت
لمن يحز راسك شمر
@@@@@@@@
يا اقرب مسافه توصل ل الله
الك شيبه بسهم طب ريج عبد الله
مثله شكم سهم طب جسمك وصله
بحيث من الثياب البقت بس وصله

شوه معانيك السحك
من عدهن متونك زرك
تحترك جي ما طلعت
بتك رقيه من الحرك


الشاعر : حسن العبودي

خلصت يا رقيه ومات الحسين
سحكو على ضلوعه وطفو العين
صاير وصل جسمه
لتصيحين بسمه
صوتج لو يسمعه يجاوب منين
____

حسين ختنك من دوس الحوافر
جسمه الوان ينطي هسه صاير
جوة الخيل ابوج وبينه حاير
خايف لا يدوس علينه حافر

تعنتنه الخيول وصاح ردن
عوفنهه الحرم وعليه اسحكن
ابوج يون يعمه
لتصيحين بسمه
صوتج لو يسمعه يجاوب منين
_____

ابوج متونه طلعت من الصفاح
حبيب كلوبنه طيحة مطر طاح
قبل لا ينسحك فوك المتن صاح
نص حيلي وكع من صوت الصياح

رايح للخيم شارد حساسه
فجئة وداست الخيل اعله راسه
كلش حار دمه
لتصيحين بسمه
صوتج لو يسمعه يجاوب منين
____

اول مرة هيج يصير بحسين
ما متعود يفاركنه يومين
واصل للمخيم صوت الونين
حسينج يا رقيه هواي موزين

حسين اعله الحصيرة تعود ينام
اول مرة اشوفه حاضن اسهام
وبخاصرته سهمه
لتصيحين بسمه
صوتج لو يسمعه يجاوب منين
_______

موتي بحركه انصحج يل زغيرة
عشكج راح ينلم بحصيرة
العليل يفوت اصابيعه ويديرة
تخيلي جروح ابوج شكد جبيرة

شلون يلمة كون الله اليعينه
من يشيل صدرة اطيح ادينه
خنصر طاح يمه
لتصيحين بسمه
صوتج لو يسمعه يجاوب منين
_______

يسحل بلحصيرة يريد دفنه
كل شوية توكع وذرة منه
لدفن حسين يرادلهه صفنه
موذر بيمن الغالي نجفنه

موقف صار عندة وسال دمعه
كلما لف ابوج يطيح اصبعه
حيرة شلون لمه
لتصيحين بسمه
صوتج لو يسمعه يجاوب منين
_______

ترجيتج يعمه نجيبهه منين
برمشه عين راحت مثل الحسين
عمة الشام دربه يريد رجلين
ولو هوه المشي اعله مجوي مو زين

متنج خل تطيبه جفوف اخيج
ازرك صار يشبه وجه ابيج
ينطي الوان جسمه
لتصيحين بسمه
صوتج لو يسمعه يجاوب منين


حسن العبودي

ورده وعصرهه الموش فلاح
سال النده من امتونهه وطاح
ما صاحت ادركني يبو حسين
كالتله يا راعي البساتين
جوريتك ابسمار تنلاح

_

سمع بيته حترك وحتركن عيونه
بستان الورد المن يحركونه
سمع جورية خلف الباب مسجونه

سمع بيهه وعلي تحسر      يفزع حيلة ما يكدر
صرخ يا فاطم ويعثر        هضيمه
ورده اميه تزكوهه           وعل قبلة تخلوهه
مو هلكد تعصروهه          هضيمه

لامو غرب عصروهه الاصحاب
من كد عصرهم غصت الباب
دم صارت بعصرتهم العين
كالتله يا راعي البساتين
جوريتك بسمار تنلاح

_____

متن مو ذكره ويعلكونه بلبسمار
نخلة وطلعو من حيلهه الجمار
والمحسن وكع فدوة علة امه يغار

زغيرون وفزع لامه      ولجده مشه بدمه 
يكلة الهاجمو همه           صحابه
بدفعهم عصرو الزهرة   وصل يمي صده الكسرة
ابطنهه واسمع السطره      صحابه

بعيونك الجانت زغيره
وحدهه والهجمو عشيره
للعرش واصل صوت الونين
كالتله يا راعي البساتين
جوريتك ابسمار تنلاح
___

اول مرة اشوفه مورمه عيونه
حيدر جان بل زهراء يحزدونه 
ابو الحسنين شايل روحه بمتونه

يكلهه السكته المتني     احجي يا بعد متني
بلسانج يخبل اسمي      ابو حسين
عيوني فدوة لعيونج      بعدهه يونن متونج
تره مو زين من دونج       ابو حسين

زينب بجت حد ما عمت عين
وذب روحه فوك هدومهه حسين
تحبهم كثر ما يمهه باجين
كالتله يا راعي البساتين
جوريتك ابسمار تنلاح

___

يكلهه الفاتحه من اقراهه مختنكه
ابو الحسنين عشكج كتلته الحركه
شفت زينب تشم بهدومج مدنكه

تصد لثوبج بحسرة       اثر شك ودمه بضهره
تكلي اليوجع الزهره     ضلعهه
يبويه اطرافه ممزوكه     ترة جدام امي محروكه
عليهه الباب مطبوكه        ضلعهه  

يبجي الحسن ويخضر دلال
وحسين صارت عينه شلال
يايمه صاحو ليش تمشين
كالتله يا راعي البساتين
جوريتك ابسمار تنلاح 

____

الم ويلادي كلهه ونمشي يم كبرج
مختنكين اجينه نشمشم بعطرج
الكبر باب الرمل هم كاعد يعصرج

افتحي احضانج وكلبج       اجينه نشاركج تعبج
زينب كلش تحبج            حنينه
الحسن مريت ديوانه         وجبت حسين ويانه
عليهم حيل ولهانه          حنينه

وحدج يزهرة اوحشه الغروب
جيناج خل نتشابك كلوب 
نبضة كلب حسبي وتلاكين
كالتله يا راعي البساتين
جوريتك ابسمار تنلاح

____

الجرح من ما يطيب يصير للذكره
علي البيبان جان تذكره بل العصره
جم بسمار شافة ومات عل زهره

حيدر كل مغربيه             يذكر عنده جوريه
حمرة وكلهه حنيه             يحبهه
جان شكد يشم بيهه          مثل المي يداريهه
مات من البجي عليهه         يحبهه

كل مغرب يشم بوردته
ويرجع علي ينوح بحجرته
كال الهه ارجع لا تخافين
كالتله يا راعي البساتين
جوريتك ابسمار تنلاح


الخادم : حسن العبودي

تدفن ومكسور كلبك    ياعلي
ما اريد وياي اتعبك   يا علي
اني والله هواي احبك  يا علي

@@@@@@@
عمت عيني شضال بيك وتعباك الشفته
يا علي شتكول واني هذا كله الضكته
فدوة اروح لدمع عينك لا يهل مو وكته
دير بالك علة المحسن من وكع ما شلته

انه بمكفه الباب  ادافع  يا علي
جيش واني بشعر اصابع يا علي
ما دريت الطفل واكع   يا علي
@@@@@@@@
علي والبسمار شايف من دخل بضلوعي
تيهيت ابيتي والدم ينزل وي ادموعي
بعد طولي الله يعينك يوجعك موضوعي
علي كلهم عرف صاحو يلا وني ولوعي

وانته اي همزين طالع  يا علي
ما شفت كالولي سامع يا علي
لا نكلب بلمواجع   يا علي
@@@@@@@@@
علي رد للبيت فدوة ولدك متانينك
بوسلي حسين اعله نحره يمكن متعبينه
والحسن ليهسه يجبي فدوة بوسه بعينه
وصي زينب ثوبي بي دم كلهه لتلبسينه

ثمنطعش عمري وعفتكم   يا علي
شكد تمنيت ابقى يمكم    يا علي
لو تعرف شكد احبكم   يا علي
@@@@@@@@
شكد جنت ارتاح من تكلي ها يعيوني
يلجنت خايف علية شكد تكلي شلوني
هوه يدفع بابي تزعل هسه اليدفعوني
وادم تكرهك يحيدر  كسرولي متوني

اعثر بثوبي واطيحن   يا علي
ردتك ومابيه اصيحن  يا علي
كلبي هسه لوجهك يحن  يا علي
@@@@@@@

آسفه اخذتني السوالف ما كلتلي شلونك
لزهره لو ديرة بكبرهه شايل اعله متونك
كالو بيوم العفتني شط جرة من عيونك
علة الكبر يوميه نايم ولدك يكعدونك

عل ام حسن دمعك تطشر   يا علي
بليله خمس سنين تكبر يا علي
التحبهه تحبك اكثر  يا علي

@@@@@@@
يا علي دموعك عزيزة مسحهن ورد بيتك
اعرف معزتي اعله كلبك و اااخ يا حنيتك
تدري من نمت اعله كبري خنكه وشتميتك
بكثر ما كتيت دمعك  هلكثر حبيتك

وانته هم تحبني بعدك    يا علي
دير بالك على ولدك  يا علي
لا تضل بلباب وحدك    يا علي


الخادم : حسن العبودي