#nimadir

Dunyo ikkiga bo’linadi: loser va loser ekanini tan olmaydigan o’ta ketgan loserlarga

@mahinsworld

#nimadir

Shoshmaslik

tabiatan juda qiziqqon, qoni qaynar odamman. Ya'ni adolatsizlik, nohaqlik, yolg'onlarga chidolmayman. Tez jaxlim chiqadi, haqiqatni yuzaga chiqargim, yoki adolatsizlik qilgan odamga qanchalar tuban harakat qilganini tushuntirgim keladi. Lekin

hozir shoshmaslikni tanladim. Shoshmayman, kuzataman yoki umuman unutaman. O'zimning dunyoyimga g'arq bo'laman. Avgust oxiriga yaqin o'zim uchun adolatsiz deb hisoblaydigan voqea bo'ldi. Qattiq ranjidim. Ko'nglim og'ridi. Avvaliga nega men bilan, degan savollar bo'ldi. Avvalgi Mahin bo'lganida yugurib kelib kanaliga yozar, hamma bilan bo'lishishga shoshgan bo'lardi. Ammo hozir. Bari o'zgargan. Shunchaki dunyoyimga sho'ng'idim, bu voqeani o'zimga bir dars, tajriba sifatida qabul qildim va qayta bu kabi takliflarga tezda rozi bo'lmaslik qarorini qabul qildim. Energiyamni dod-faryodu, adolatsizlikni isbotlashga, o'zimni haq ekanimni dunyoga ko'rsatib qo'yishga sarflamadim. Sababi deysizmi? Kimga qiziq?

Ishoning hech kimni siz-u men bilan ishi yo'q. Bir faktni sizga ham eslatay - dunyo bizni atrofimizda aylanmaydi. Biz dunyo markazida joylashmaganmiz. Sizning injiq ekaniz, ishlaringiz ko'p ekani, sizni mendan qaysidir ma'noda zo'rroq ekaningiz qanchalar og'ir bo'lsa ham aytay - hech kimni qiziqtirmaydi. Nari borsa 1-2 kun eslashar yoki sizning mavzuingiz ko'tarilsa g'isht qalashtirib, og'iz ko'pirtirib yomonlashar. Shunda ham siz dunyo markazi yo qiziqarli qahramon ekanizdan emas, shunchaki vaqt bo'lgani va gap kelgani uchun.

Shu sabab shoshmang, slow life yaxshi narsa. O'ylang, strategiyangiz bo'lsin. Strategiya kimdandir o'zish, kimgadir aslida qanchalar super odam-u, kuchli mutaxassis ekanizni ko'rsatish uchun emas, yo'q. Strategiya - sizni aynan o'zingizni rivojlantirish (birovga isbotlash maqsadida emas), ilm, kerak payt o'ziga g'amxo'rlik qilish, tin olish, dunyolardan uzilib oila bilan sifatli va ko'proq vaqt o'tkazish uchun. Hozir esa haftaning o'rtasi, oktabrning oxiri yaqin. Kuz tugamoqda, qish yaqin. GOTda aytilganidek "winter is coming". Yil tugashiga 2 oy qoldi. Shu yil o'zingiz uchun nimalar qildingiz? Kimsiz? Aynan hozir tin oling, ko'zlaringizni yuming va dunyo markazi sizdan iborat emasligini unutmang

@mahinsworld

​​​​#dialog_review

🌹"Kirka"🔞
👀Madlen Miller

- Mahin, men Madlen Millerni ilk bor siz sababli kashf etgandim. O‘shanda uning qalamiga mansub "The Song of Achilles" asarini tuhfa etgan edingiz. Yozuvchining soha mutaxassisi ekanligi, mifologiya va badiiyat o‘rtasida ko‘prik yaratganligi meni hayratga solgan edi. Kirka menga shu taassurotlarni qayta jonlantirdi. Lekin bu safar ona tilida o‘qiganim sababli yanada zavqli bo‘ldi deb o‘ylayman. Balki bu tarjimonning mahoratidir, nima deysiz?

- Balki, lekin yozuvchi uslubi boshida quruqdek tuyulgani uchun qiziqqanimdan boshqa tildagisiga (rus tili) murojaat qildim. O‘zbekchasi rus tilidagiga qaraganda jonli, jo‘shqin ekan. Yozuvchi uslubiyati esa ko‘nglimga o‘tirmadi. Xayolimda afsonalar, iloh va qahramonlar boshqa tomondan gavdalanaverdi. Sizda uslubi bo‘yicha qanday taassurot qoldi?

- Uslub ajib, ayniqsa yunon mifologiyasi asosiy unsur bo‘lganligi sababli juda ham fusunkor. Menimcha eng katta yutuq, asrlar davomida yovuz sanalgan qahramonning ichki olamidan dunyoga nazar tashlay olishimizga yozuvchi imkon yaratib berganidir. Kirkani bilgan, tanigan hech bir tirik zot uni e'zozlamaydi asli, lekin kitobxon asarni o‘qib bo‘lgach, eng ko‘p Kirkaga muhabbat qo‘yadi. Kirkaning muhabbat tarixi ham g‘aroyib, Freyd nazariyalari bilan tahlil qilgulik, shunday emasmi?

- Tahlil qilsak bo‘ladi. Ammo aynan Kirkaga muhabbat qo‘ya olmadim. Asar qahramoni ekani rost. Biroq bu darajada jabrdiyda, qurbon rolida bo‘lishi ba’zi joylarda odamni zeriktiradi.

- Sizga qaysi qahramon ko‘proq yoqdi. Shaxsan menga Hermes. Siz Atwood'ni Penelopa haqidagi asarini o‘qigan edingiz, Kirkadagi Penelopa bilan Atwood'dagi Penelopa bir-biriga o‘xshaydimi, yoki qaysidir biri boshqachami?

- Kirka va Penelopani qiyoslaydigan bo‘lsak hayotiy yo‘li, kuchi, o‘z ustida tinmay ishlagani, hamda unga berilgan jazoda yer tishlab o‘tirmay oldinga qadam tashlagani uchun Kirka ustunlik qiladi. Asar tomonlama esa - ko‘pchilikni xabari bor Atwood uslubi yoqadi, shu sabab asar borasida Penelopiadni ustunlayman. Qahramonlarga keladigan bo‘lsak Odisseyning o‘g‘illari ko‘proq e’tiborimni tortdi. Ikkisi ham nima istashini yaxshi bilishadi, istaklari yo‘lidan qaytmaydi.

- Men Kirkani o‘qib turib, uni Margaret Mitchellning "Shamollarda qolgan hislarim" romani bosh qahramoni Skarlet O'haraga o‘xshatdim, siz aytganingizdek bu qahramon, ayol qahramon, juda irodali va maqsadiga albatta yetishadi biloxir. Telegon esa ko‘proq Drayzerning "Sarmoyador" asaridagi Frenkka, Telemax esa Turgenevning Bazaroviga mengziydi. Sizda ham shunday qiyoslashlar bo‘ldimi, qaysidir sizga qadrli qahramoningizni boshqa olamdagi nusxasini uchratgandek his qildingizmi, masalan Alini?

- Ali jaydari, qiziqqon edi. Qaysidir ma’noda Telegon deyishim mumkindir, lekin Telegon aqlli. Doimiy beriladigan savollari, yangi narsani o‘rganishga chanqoqligi, mehnatsevarligi bilan ancha ustun. Kirka qaysidir ma’noda - orolda bir o‘zi yashashi, shunchaki osmonga termulib yotmasdan harakat qilgani, hayotini yaxshilaganini Robinsonga o‘xshatgan joyim ham bo‘ldi. Biroq Kirkaning doimiy ravishda xayoli-yu fikrlarida dunyo markazi bo‘lish, nishlar maydoni timsol gapirishi qurbon rolidamasmikan, degan fikr ham uyg‘otdi.

- Bir so‘z bilan aytganda, asar juda ham yengil, undan qandaydir betakror uslub, yoki purviqor syujetni kutmaslik kerak, kitobxon do‘stlarimizga esa, agar oralarida yunon mifologiyasi va feministik adabiyotga qiziquvchilar bo‘lsa, albatta o‘qishni tavsiya qilamiz.

- Ha, asarni o‘qish mobaynida zerikish va varaqlash holati bo‘ldi. Oddiy va yengil yozilgani sababdir. Sodda gap qurilmalari, uslubiyati jo‘n, agar boshqa yozuvchi ijodlari bilan aralashtirilsa bittada ajratib olish qiyin.

Hurmat va ehtirom ila Mahin& S.N.K

P.s.s: yangi usuldagi revyu shakli yoqdimi sizgan o‘z munosabatingiz bildirishni unutmang❤️

@mahinsworld

#nimadir

Ulg’ayish

Ulg’ayish - bu yoshga yosh qo’shilishi emas, balki psixik/aqliy jihatdan yetilish. Yetuklikka yetishishdir. Muloqot qilishni boshlash. Avvaliga o’zing bilan, ma’lum muddatdan keyin boshqalar bilan. Odatda ko’pchilik muloqot qila olmaydi, muloqotni esa - qarshi chiqish, terslik, bosim o’tkazish, jaxl qilish, yomonlash yoki shunga o’xshash narsalarga tensitishadi.

Aslidachi?

Aslida muloqot insoniyat uchun berilgan eng go’zal tuhfalardan biri. Biz odammiz, hayvonlardan farqimiz ham shundaki - tilimiz bilan gapira, miyamiz bilan fikrlay olamiz. Shunchaki gaplashib olish mukammal bir vazifa emas. Og’iz ochiladi va siz miyangizda tarakandek olib yurilgan aytiladi. Tamom. Masala hal.

O’zingizcha miyangizda 1001 ssenariy tuzib, narigi tomondan dushman yashash, yoki sizga adashib qayerdadir nimadir izoh yozganini million yil yelkangizda ko’tarish, u yelkadagi yukni esa erinmay hayotga tadbiq qilish - c’mon kulguliku. Narigi tomon sababini bilolmay miyasi achiydi. Shu bir sabab qidirib men bechora tuni bilan uxlamay telefoninimni titdim. Huh, topdim. Va rosa kulibman. Jiddiyroq sabab deb o’ylab yurgan ekanman, shunchaki 2 ta gapdan iborat dialog bilan ochiqlanadigan narsalar ekan.

Xullas, kimgadir gapingiz bormi barakalar topgur - AYTING! O’ziga ayting. Orqasidan tuxmat, bo’xton qilmang. O’sha odamni karyerasi, kelajagiga boltani urmang. Siz kimnidir shunchaki yoqtirmasligingiz bemalol o’sha odamni shaxsiy hayotiga burningizni tiqish, sirlarini olamga yoyish, yoki o’sha odam aytmagan gapni butun dunyoga dod-faryod solib dedilash huquqini bermaydi. Muammo sizning miyangizdami, boring o’sha odamga ayting, terapiya oling, yoki jimgina yashang. Bori shu. Tamam.

@mahinsworld

#nimadir

Shu yerda senga atalgan atalmam bo’lishi mumkin edi. Lekin sen arzimaysan.

@mahinsworld

#nimadir

Tun. Kitobim ochiq. O’qiyapman. Xayol qochdi. Rejalarim bo’lmasa. Maqsad ham. Borimni tiksam. Avtouy sotib olsam. Sayohat qilsam. Avtouyimda dunyo kezsam. Hech kimni tanimasam. Har kun notanishlarni ko’rsam. Jimjitliklar. Baland qad rostlagan tog’lar. Suvlar. Sharshara. Daryo. Dengiz. Hashorot-u tabiat bilan tanishsam.

Yo’qlik mazasin totsam. Shunchaki. Hayot kechirsam. Hech kim meni tanimasa. Mavjudligimdan ham xabardor bo’lmasa. Kitobimni kutubxonalarda almashtirsam. Biri olsam. Boshqasiga topshirsam. O’qisam. Sayohat qilsam. Yashasam. Nafas olsam. Tanam havodan to’ysa. Baridan uzoqlashsa. Hech kimni tanimasam. Meni-da hech kim tanimasa.

@mahinsworld

​​Assalomu alaykum barchaga. Hozir kitobxonlar uchun must have saytlar bilan tanishtirmoqchiman:

1. https://www.goodreads.com/ Bu sayt (platforma desa ham bo’ladi)da siz yangidan-yangi kitoblarni kashf etishingiz, turli reviewlar o’qishingiz mumkin. Bundan tashqari o’z profilingizni ochib kitobsevar do’stlar orttirib, o’zingizga turli shelf: Read, currently reading, want to read kabi yaratishingiz va jarayonni belgilab borishingiz mumkin. Bu platformada men (https://www.goodreads.com/user/show/90706649) profilidaman.

2. https://www.livelib.ru/ Bu sayt ruscha. Goodreadsga o’xshaydi, ammo ruscha analogi desa ham bo’ladi. Bu yerda ham siz turli “knijniy vizov” challengelar qilishingiz mumkin.

Ikkisidan yoqadigani menga: goodreads.


@mahinsworld

#reading

Yevropa davlat boshqaruv nazariya va amaliyoti ming yillardan beri tartibga tenglik, o'zlikni esa universal qoida hamda normalarga qarshiliklar orqali erishganlar.

@mahinsworld

#specialty

Hozir bir monografiya o’qiyapman, tahlil qilyapman. 40 yil avval yozilgan ekan. Tasavvur qiling shu monografiyani yozish uchun 12 ta davlat, provinsiya, davlatlarning shahar-u viloyatlari arxivlarida ishlagan ekan. Ulkan ish. Mehnat. Uzoq yillik harakat.

@mahinsworld

#specialty

POV emas real: miyangni qo’lingda tutib ishlayapsan.

@mahinsworld

#vaqtinchaxayr

Jigarlarim Mahin vaqtincha (noyabr oxiriga qadar) uzoqlashaman. Dissertatsiyam va sohamga doir muhim loyihalarni tugatishim zarur. Kimgadir vaqtida javob yoza olmasam yoki yetarli javob qaytara olmasam, oldindan uzr so’rayman. Dil so’zlaringizni @mahins_world ga yozib turishingiz mumkin. Qaytaman. Kuting

#staytuned
@mahinsworld

#specialty

Bir partizanni topgandik. Avlodlarini uzoq izladim, ma'lumotlarda Samarqand viloyati Kattaqo'rg'on tumani edi. Nuraliga iltimos qildim, Kattaqo'rg'onlik emasligini bilib berdi (rosa izladi). Va uning sharofati bilan avlodini telefon raqami topildi. Gaplashdim. Keling, deyishdi. Yugurdik...

Samarqand qaylardasan deya ketdik. Muzeylarga bordik, ma'lumot izladik, avlodlari bilan ko'rishdik. Uzoq suhbatlashdik. Juda kerakli va qimmatli ma'lumotlarni ololdim. Juda mehribon odamlar ekan. Eng ta'sir qilgani dadalari ruhi, xotirasini e'zozlashlari bo'ldi. Balki, aytarsiz hamma shunday, deb. Yo'q, afsus unday emas. Tashlab yuborganlarni ham guvohi bo'lganman. Aynan kuni kecha uchrashganimiz unday emas ekan. Ismlarini esa yaxshilab o'rganganimdan keyin aytaman). Lekin juda xursandman. Ish joyidan siljiganini his qilish odamga yoqimli his beradi. Ayniqsa uzoq yil izlagan ma'lumotlaringizdan ham ko'prog'ini topolsangiz - u hisni tasvirlab berolmayman. Ma'lumot uchun ilmiy ishim (PhD) mavzusini bilmaganlar uchun eslatib ketaman "Yevropadagi Qarshilik ko'rsatish harakatida O'zbekistonliklar (1941-1945)". Agar sizda shu mavzuga aloqador ma'lumot, kitob, partizan bobo yoki qo'shni bobongiz bo'lsa, menga xabar bering. Oilaviy rahmatimizni aytamiz).

@mahinsworld

#reading

Bosh qahramon Yusuf ismli bolakay. Yangi tarjima, Nobel mukofoti sovrindori qalamidan. Kitob sifati yaxshi ekan, tarjima ham. O’qiyapman.

P.S shu orada Nyu York trilogiyasi, Oyjamol, Moabit daftarini tugatdim. Review yozishim kerak. Uchchalasi ham o’qishli.

@mahinsworld

#new_books

“Izlam” chiqqanidan hammani xabari bor va allaqachon olgandirsizlar ham. Men mana imkon bo’lishi bilan bo’lib olishni boshladim (pulini olishmadi lekin, shuncha aytsam ham). Qolganlarini ham albatta olaman, imkon bo’lishi bilan.

@mahinsworld

​​#book_review

2-Jahon urushiga oid kitob-albomizning navbatdagi taqdimotida edim. Kitob-albom bo’limlari, ularga kiritilgan yangi arxiv ma’lumotlar va yangiliklar haqida gapirilayotgan bir paytda taqdimot prezentatsiyasi ichiga kiritilgan bir kitobga ko’zim tushdi. Kitob Bahodir Umurzoqovning “Oyjamol”i edi. Qidirdim, doimgidek topilmadi. Sotuvda qolmagan, 2016-yil nashr etilgan kitob ekan, 2000 adadda chiqqan. Rosti shu kitobga taqrizlar uchratmagan ekanman shu paytgacha, balki ayb o’zimda bo’lib, hech kimni kuzatmasligimda gapdir.

Turkiston legionini “izidan” tushganman. Ma’lumotlar – faktlarga tayangan albatta, kitoblar, ilmiy maqolalarni o’rganyapman. Shunda ustozimdan biri “Oyjamol”ni o’qib ko’ring, dedilar. Endiyam bu bir belgi, o’qish kerak dedim. O’qishni boshladi. Asarda biz bir oila – er-xotin va uch o’g’ilni uchratamiz. Asar sekinlik bilan 35-yildagi surgunlik, tuxmat bilan boshlanadi. Eri surgun qilingan Oyjamol uch o’g’li bilan qolganidan so’ng armiya degan narsaga duch keladi. Armiyadan esa urushning sovuq nafasi birdan uradi. Qaysi urush ekanin bildingiz – Ikkinchi Jahon urushi…

Asarning shiddati jaddalasha boshlaydi shu joyida. Uch o’g’ilning qismati qiziqtira boshlaydi. Urushga eng birinchi ketganlarning ko’p qismi yo halok bo’lgan yo asirga tushgan. O’zlarining tilinda “plen”ga tushgan. Plendan esa kimdir qochib partizanlarga qo’shilgan, kimdirni esa nemislarga tutqazib u yerdan legionga yoki konslagerdan legionga qo’shilishgan. Ana shunday qismat ularni kutgan.

Vatanda qolgan ayol/qizlar taqdiri yanayam achinarli holda. Turmush qurishgan-u 10 kun o’tmay eri urushga ketgan, bedarak yo’qolsa chaqirtirilgan, bekitik xat xabar yo’qmi deya so’roq qilingan. Eng achinarlisi esa qizlar. Urush yakunida vokzal chiqib uylanarmikan deya nogironlarni kutgan qizlar, edi. Shunday hodisalar ham uchragan.

Oyjamolga qaytsak, ikki kelin bilan uch o’g’ilning izlariga zor bo’lib kutish, oson emas. Mayli, ozgina spoyler qilay, qiziqtirishga: bir o’g’li legioner, biri partizan, yana biri esa qahramon. Uch o’g’ilda uch xil taqdir. Shaxsan o’zimga asarda eng qiziq bo’lgan joylari Turkiston legionlari joyi bo’ldi, arxiv ma’lumotlarga tayanilgan joylari juda qiziq chiqqan. Ularning urushdagi roli, nimalar qilishganini bilish muhim deb o’ylayman. Ayniqsa hozirda hamma turlicha talqin qilayotgan bir paytda: kimdir ularni qahramon darajasiga ko’tarsa, kimdir esa xoin deydi. Ilmiy va obyektiv nuqtai nazardan qaralishi o’ta muhim.

Asarni o’qing, sodda, beg’ubor kitob.
@mahinsworld

​​#book_review


Abdurazzoq Gurnaning “Jannat” asari 1994-yilda nashr etilgan. Qator o’qiladigan asarlari bo’lsa-da aksariyatimiz ushbu yozuvchini 2021-yilda Nobek mukofoti sovrindori bo’lganidan keyin tanidik.
“Jannat” olti qismga bo’lingan (qismlar aynan raqam 1-qism, 2-qism tariqasida boshkanmasa-da), shu qismlarda biz Yusuf ismli bolakayning ulg’ayishi va uning atrofida voqealarning rivojlanishini kuzatamiz.

Yusufning qulligi (ha, u qul) odatiy qullikka o’xshamaydi, uning qulligi otasining qarzdorligi va otasi qarzdan qutilgunga qadar Aziz amakining qo’lida yurishidir. Aynan shu almashinish/garov tizimi Sharqiy Afrikada o’z davrida juda mashhur bo’lgan. Aziz amaki Yusufni o’z makoniga – odam yashaydigan sharoit, o’zi yashagan sharoitdan ming barobar ustunroq joyga olib keladi. U yerda Yusuf o’zi kabi garovga kelgan Xalil bilan tanishadi.

Biz Yusuf timsolida, hikoyasining qayerlaridadir “Yusuf” qissasi retellini ko’rishimiz mumkin, balki menga shunday tuyilgandir. Uning chiroyi, beka voqeasi, go’zalligiga barchaning oshiq bo’laverishi shuni yodimga soldi. U beg’uborlik, bokirlik, go’zallik timsoli. Tashqi ko’rinishiga ko’p urg’u berilgan, ichki dunyosida esa uning sodda, oq ko’ngil ekani ta’kidlangan. Yana qanaqadir ichki kechinma tasvirlarida to’liqroq o’qishni, bilishni istardim.

Biz voqealarda yovvoyilar orasidan shaharga, shahardan esa yana yovoyyilar orasiga bir muddat tushgan Yusufni ko’ramiz. U ana shu sayohat, yashash mobaynida ulg’ayadi, atrofni aynan shular orqali tasvirlaydi. U erkinlikni istaydi, u o’zga bir hayotni, o’z dunyosida yashashni istaydi. Erkinlik aslida nima? Bizga kimningdir bergan in’omimi? Yoki biz shu erkinlik bilan dunyoga kelamizmi? Erkinlikning turlari bo’lishi mumkin ekan. Qalban erkin inson, uni ming chegaralamang, qul qilmang qalbidagi xurlikni egallay ololmaysiz. Boshqara olmaysiz. O’sha inson istasagina vaziyat o’zgarishi mumkin. Balki. Istasa. Albatta.

Asarda nemislarning temir yo’llar qurib boshlashi, sekinlik bilan egallay boshlashini ham ko’rishimiz mumkin. Yashirin molar sotuvi, din va dinsizlik, millatlar, qadriyatlar turfaligi, insonning shaxviy tabiatini ham uchratamiz.

Men uchun eng qiziq joylari qit’aga sayohat bo’ldi. Qabilalar, ularning sultonlari muomalasi, qiyinchiliklarni o’qish qiziq bo’ldi. Balki bu mavzuda juda kam kitob o’qiganim uchundir. Ayni shu kitob Afrikaga bo’lgan qiziqishimni uyg’otdi, desam ham bo’ladi.

O’qing, tarjima yaxshi.

@mahinsworld

#specialty

Men nechun sevaman Xalqaro olimlarni… Italiyadan qaynoq javob xati. Samarqandga borib, ko’rishgan partizanning qizlari aytgan ma’lumotlarni dissertatsiyaga kiritishdan avval Italiyadagi aynan shu mavzuda ilm qiladigan olimlar, dalillar va hujjatlarni izladim (doim shunday qilishga harakat qilaman). So’ragan savolimga faktlar bilan izlanib javob berdi. Juda xursand bo’ldim, kutib o’tirgandim javobni.

Ok. Bye
@mahinsworld

​​#book_review

Kuni kecha fransuz yozuvchisi Jorj Perekning “Uxlayotgan odam” kitobini o’qib tugatdim. Bilasizmi, doim qaytarganimdek kitoblar sizga kerak paytida oldingizga keladi.

Bundan 3 hafta oldin anxiety attack (bezovtalik huruji) chastotasi o’zimda tezlashganini sezdim. Xabarlarni ocholmay, telefonimni qo’lga ololmay qoldim. Bu shunday narsaki sizga bezovtalik beradigan narsalarga yaqinlashgan, o’ylagan saringiz miyangiz va tomog’ingiz, yuragingizga quyun bostirib keladi. Bo’g’ilasiz, havo yetmaydi, qimirololmay qolasiz. Shunda o’zimning ahvolimga yaqin kitobni qayta o’qishga kirishdim (avval tugatmay yarmida qoldirgandim).

Biz kitobda 25 yashar talabani uchratamiz. Apatiya holat, shunchaki hayot insondan nechadir santimetr uzoqda yoki yonidan o’tib ketishini mohirona yozgan. “Yotasan, shiftga termilasan, doimiy manzara, shiftingda nimalar borligi, uning ko’rinishini miyangda yod bo’lib ketgan. Shunday bo’lsada shiftda termulasa.

“Yoningda sochilib yotgan kitoblar, o’qimaysan. Devordan qo’shnilar ovozi eshitiladi, bir xillik. Eshiging taqillaydi, ochmaysan. Sening borishing kerak, belgilangan uchrashuvlaring bor - bormasligingni bilasan.” Bu manzaralar juda yaqin, juda tanish his. Belgilaysan, lekin bormasliginga aminsan. Oxirgi daqiqacha borishing kerak ekanini o’ylovi miyangni yeb bitiradi. Anxiety tinchlik bermaydi, to’xtovsiz huruj qiladi.

Hamma “muvaffaqiyatli, aktiv, o’zini ommaga ko’rsata oladigan, sergap”lar atrofiga yig’iladi. Lekin hech kimni apatiya holatidagi outsider bilan ishi yo’q. Ularning atrofidan hayot yoki hayot atrofidan ular o’tib ketaveradi. O’z o’ylari yoki umuman o’ylamasliklari bilan yashayverishadi. Bir xillik, bu holdan chiqolmaslik ma’lum vaqtdan keyin ularni qiziqtirmay qo’yadi. Bariga qo’l siltash deb ham atolmaymiz bu holatni.

Bu bora-bora klinik depressiyaga ham olib kelishi mumkin. Bir qultum suv ichish uchun o’rnidan qo’zg’ala olmaslik, tirik qolish uchungina yeyish, uxlash kerak bo’lgani uchun uxlash, yashash kerak bo’lgani uchun yashash - dahshatli holat.

Yuqorida aytganlarimni tushunmagan, bunday holga tushmagan odamga bari kulguli yoki bachkana tuyilishi mumkin. Agar shunday sezilayotgan bo’lsa ogohlantiray - kitob siz uchun emas.

Kitob apatiya nima ekanini, doimiy charchoq, qo’l siltash, anxiety attackni boshdan kechirganlar o’qisa o’zini ko’rgandek bo’lishi mumkin. O’qing, siz ham tanishing.

@mahinsworld