الما نزلت ادموعه امن انذكرنه يوم القيامة تايه اكيد
الما يدري لمن الدمعه استقرت معناها واصل حبل الوريد

فوض دموعك وانكسر هذا الامر واجب
بالجنة عايش انتبه بأعظم سُفنّ راكب
دور بـروحك تكتشف بالطف عشت تايب
اجلد النفس الاخرت الدمعه للغايب

الجزع مكروه فقط لحسين
واجب تلطم الخدين
الصافن كلي رايح وين

خلاصت دمعك الدمعه
اليعزها الكم شنو نفعه
بلا دمعه العمر فهمني شيرجعه


……….٢
بالفتنـه لطمك ودمعك يثبت لمن تردد هذا الدعاء
يلي تقلب قلب البريه وتسلب من عدهم صوت البكاء

بنهج القرايه ومعرفه تحافظ عله دموعك
كللها لا لو نفسك تحثك عله رجوعك
اخطي خطوتك للنحر هالخطوه مشروعك
للشع نوره ازحف زحف مختصر موضوعك

تره الصادق قصدنه احنه
تره الدمعه هيه الجنه
من ناتج رحى اتمنه

القناديل انطفت مره
بس ما عرفوا الزهره
لو يعمه الكلب ويموت شيكسره

….٣
مو اعتباطن هوه الي كلك اذكرني وانه اظمنلك بكاء
ولا عجبه لمن تسمع فلان من الخدمه صاير ظهر الوراء

الناس عبيدُ للهوى والدنيا تاخذهم
منهم اخذ بس الفعل هذوله قدسهم
ارخص بشر ويه الخلقّ بالسانه ميزهم
بني هاشم اهل الفعل هذوله اقصدهم

البلاء اشلون اتعيشه
مثل ايوب ضل ريشه
رغم هذا الصبر جيشه

بأبو فاضل اخذ الامثال
حاله ماكو منه احوال
من عيونه وده للخيم مرسال

_٤
مهد دمعك للي انتظرته الف والف وأعداد الخيام
ادري بدمعتك تتمنى يوكف صاحب زمانك بنص الخدام

يمته ترانا ونفتخر بالدمعه كدامك
والله استجاب لدعوتك وصرنه خدامك
بس الدمع عندي بقه قربان لخيامك
اجلدني بالحب والدمع خليني لطامك

فرصة كربله انته
نوصل عابسك يمته
بكيفك يمشي وترده

يمته نشوفلك رايه
نوصل يمك حجايه
ورصعت جدم من درب المشايه

منصور عباس الاسدي

انه العليلة .. فاطمة
انه العليلة .. فاطمة

1/
مستاحش البيت يبوية بغيابك
ماحاسبة حساب تروح بلا جوابك
انه اصد وين يالحسين بحسابك
..-
عفتوني وحدي عليلة ووحيدة
ومامش اخو وجار واگودنه بيدة
بس الحياطين وجروحي الجديدة
والديرة بعيدة ..
..-
صفنت اعلى حالي
بقيت بدون والي
وانادي ومايسمعون
صفة دار اهلي خالي
..-
ماحسبت هيج وداعك يالحسين
دمعة بغيابك تصب مانشفت العين
وحيدي بالدار واحاجي الحياطين
..-
2/
شيردهه كعدتنه من نكعد سوية
يم عمتي زينب وسكينه ورقية
بس الذكر ضل يبوية الية
..-
كل شبر بالدار يذكرني بيكم
مشتاكة اسمع يبوية الحجيكم
حسرة وبجي الليل يخلص عليكم
جا يمتى اجيكم ..
..-
ابد ما ضايكة النوم
علي بس الهموم
دمروني لو طيف
ابد ما منكم علوم
..-
لاحس ولا صوت وصلني بسفركم
مااعرف شكد اضل انتظركم
ومامش ترة علوم واشوفن خبركم
..-
3/
هام الكلب وبحزن متروسة روحي
ومخلصه الليل انه وي جروحي
من رحتو لليوم ابد ماوكف نوحي
..-
نوحي عليكم انه صبح ومسيه
طاحن عيوني وماشفت منكم جية
تكطعت روحي عليكم ياهو اليه
بس انه شبدية
..-
بقت روحي تلهف
الدمع لا مينشف
هلي وين اصيحن
الي محد يمد چف
..-
جا وين اهلنه اصيحن وانادي
ومن البجي حيل تكطع فؤادي
حزنانه ضليت موشحة بسوادي
4/

فوك المصيبة وعكب كل هضيمة
الوادم الشمات يصيحون يتيمة
عافوهه اهلة ومشو يا حريمة
..-
اسمع حجيهم يأشرون عليه
عافوهه اهلهه يكولون خطية
ويعصرني كلبي بهالحجاية القوية
عافوهه خطية ..
..-
حجي الشامت يعثر
بجروحي يبقى ينثر
انكطع كلبي بجروحة
ونار بصدري تسعر
..-
لمن يكولون عليه العليلة
يحركون كلبي ويزيدون غليلة
اشكيلك الحال ولا بيدي حيلة

5/
بقارورة تراب ردت اعرف خبركم
دم صبت وأيست ماانتظركم
وياهه انه بچيت وطفة البيت بهجركم
..-
ضني تردون وترد روحي الية
ماحسبت تنذبح بالغاضرية
وتحترك الخيام وعمامي اعلى الوطية
وتتسلب رقية ..
..-
ابد مايهدة نوحي
يربي اخذ روحي
اموتن كون وارتاح
واهجن من جروحي
..-
ياربي احلفك عليك العقيلة
روحي اخذهه بعد مابيدي حيلة
وماشوف عماتي اجن ع الهزيلة
..-
انه العليلة فاطمة

——————————————-
.. علي بلال الحسناوي ..
لطلب اللحن : @ooa_oo

ام البنين الخير والهمة
منهه ونشد حزام للخدمة
غيرة وعلينه تصبهه كل ليلة
اليبرد كلب ينخاهه وتحزمة
..-
حبهه شد حزامنه .. تثبتلنه جدامنه
فاطمة منهه ونعم لا ماترد الحاجة
مثل جمر دلالهه .. كلوب كل خدامهه
تحترك صبح ومسه ووكت العزة تتباجة
..-
منبع لدمعاتنه .. وخدماتنه .. ومنهه العون
اطلب بجلماتك .. دمعاتك .. تنطي عيون
كون من حب عابس .. وتنطينة .. من غيرة جون
..-
ام القمر .. مولاتي
2/
مديلي اديج وفدوة طلعيني
عن البشر مولاتي ابعديني
خليني عايش عمري بالخدمة
ماريد اعيش بحسرة سنيني
..-
من الهلاك اخذيني .. بخدمتج خليني
وحبج لصاحب زمانج قذفي منة لروحي
عبدج واتمنى .. ومو طمع بالجنه
بس كرامة عيشتي انه لكيتهه بجروحي
..-
وفة لصاحب امري .. ودمعي اجري .. انة اتمناه
عبرة من تضحيتج .. وتالتيج .. انه اخذ جاه
ارضي صاحب روحي .. وبجروحي ..امشي وياه
..-
ام القمر ..مولاتي

3/
باسم ام البِنين العزء نلمة
وترزقنه الدموع اعلى ابو اليمة
من عدهه اطلب وبكلب صافي
تترس شليلك حيل للخدمة
..-
حيل جر باهاتك .. واجزع بدمعاتك
من جروح ام الكمر اطلب دمع لحسينك
كبالهه انكر ذاتك .. وانطق بكلماتك
مدهه ايدك للمدد حتى تطول سنينك
..-
خل تطيح الدمعة .. جن شمعه .. اعلى جفون
خل نحسن النية .. والدنيا .. كلهه تهون
من اسمع انه بطفلة .. عالهزلة .. كون اعمي عيون
..-
ام القمر ..مولاتي
4/
كل الخلق من طين متصورة
بس انتي صاغج الله جن شذرة
كرمج رب السما بتكريمة
وخلاج يم اولادهه الزهرة
..-
شارة الله انطاهه .. وباب اله خلاهه
ماترد الكاصد الهه يصفك بذرعانه
اليقرة الهه الفاتحة .. وكلبة الهه فاتحةَ
تنكضي طلباته كلهه كبل نطق لسانه
..-
الكرم يمهه ويوكف .. و الموقف .. وي حسين
قدمت للحومة .. وبيومة .. اربع ابنين
حيل رفعت راسهه .. يم ناسهه .. مانزلت عين
..-
ام القمر ..مولاتي


علي بلال الحسناوي
لطلب اللحن : @ooa_oo

حميدة بنت مسلم .

ابي ... وامسلماه
ابي ... وامسلماه
ابــتاه ... ابــتاه
1..-
خبر موتك اجة لحسين
وانة امشي وي رقية
وناداهم حميدة وين
واجيتة وكض ادية
مسح راسي بادية الاثنين
وضم صدرة الية
..-
بجة ... وانة طحت
عرفت ... مني رحت
بكثر ... صوتي صحت
ابــــــــــي
..-

ابـي وامسلماه ... ابـي وامسلماه

ابــتاه .... ابــتاه
2..-
يبوية من مشيت بعيد
ردت بس حاجة يمك
قبل لاتطلع وتجبل
يبوية ردت اشمك
بعدني زغيرة بوية انة
وماشبعانة منك
..-
زغيرة ... بلا ابو
بعد ... وين دفو
الي...بعدك منو
ابــــــــــي
..-
ابـي وامسلماه ... ابـي وامسلماه

ابــتاه .... ابــتاه
3..-
شنهي العيشة من دونك
اموت ومااشوفك
من العالي يشمرونك
وتضل محد يطوفك
غريب بين هاي الناس
ومتوسد جفوفك
..-
تظل ... وحدك رمي
غريب ... الهاشمي
وانة ... وين انتمي
ابــــــــــي
..-
ابـي وامسلماه ... ابـي وامسلماه

ابــتاه .... ابــتاه
4..-
اول ما تحط رجليك
على الكوفة العجيبة
هلا بيكم يصيحولك
ويطبلون برحيبة
بس تعرف شنو الي يصير
من حالة غريبة
..-
بعد .. هذا الطبل
يقدموك .. ابحبل
الى .. الوالي النذل
ابــــــــــي
..-

ابـي وامسلماه ... ابـي وامسلماه

ابــتاه .... ابــتاه
5..-
يبوية ادري من مانام
ابد ماتغمض عيونك
اشو متوسد التربان
وبالحبال ويجرونك
افة وانته ابن هاشم
عجيبة شلون ينطونك
..-
تموت .. و بالـ غرب
وبعيد .. اعلى الدرب
الك .. من وين اطب
ابــــــــــي
..-
ابـي وامسلماه ... ابـي وامسلماه

ابــتاه .... ابــتاه


علي بلال الحسناوي
لطلب اللحن : @ooa_oo

ميمر

..-
انة المذنب...وجيتك اندب
گشرني وطلع مني اللب
خليني بحبك مجنون
وبيكم اشد احزامي
......................
طلع حب الدنيا من گلبي مولاي
خليني اعطش شوفتك مو للماي
موبس دمع عيني شرط للوفاي
..-
لعيني العمه تنزف دمه
بين الارض بين السمه
بحبك يبن داح الباب
خليني اعيش ايامي
٢/
..-
تايه ومااندل واجيت بدربك
وطحت بعشك كلة شغف من حبك
يلخدمتك نعمة اجت من ربك
...
كون استمر واكضي العمر
وما ابتعد عنك شبر
وبس خدمتك بوية حسين
ثبتلي بيها جدامي
٣/
..-
دليني حبك سيدي دليني
من عيني خذ كلشي حلو من عيني
عن خدمتك لتخلي شي يغريني
..-
بضلع الزهرة .... وخدر الحره
وجفوف الكافل والطبره
لو تقبلني خادم ليك
لو تصدر حكم اعدامي
٤/
..-

ياكون يحسبني شخص من ناسة
شنهي العمر لومااكض مكسانة
لو امشي شايل بيدي ضبة جياسة
..-
جياس الرزق بدرب العشق
ويه الجنه ابد ماكو فرق
الخدمة فد شي جبير
وبس بيهه شفت احلامي

٥/

حبيتهه انه من الزغر هالخدمة
ومافرطت فد يوم انه بهل نعمة
كون الحسين يديم هاي اللمه
..-
يابو احساس. وعطر الياس
نخدمك كون انته وعباس
رايد ابقه بهل الخدمة
وبالمجلس زيد الامي

٦/.
..-
مولاي شنقدم نضل مقصرين
شنطيتك وشنطيتني بوية حسين
يابن علي وابن النبي وابن الدين
..-
يكفي الاسم... ومية نِعم
والله وكفو شيخ الزلم
لازم باب الجنه تصيح
هاي الجنه لخدامي
......................................
مُشتركة
خدام الحسين (عليه السلام)
حيدر عمران الحجامي
علي بلال الحسناوي

صلى الله على الساقي .. صلى الله على الساقي

1
••
حاير بالشطر بيش ابدي محتار
بشر كلة شجاعه وعلم وافكار
بيمن رايد ابدي حرت ياناس
اذا هو طلع من ظهر كرار
••-
عن علمه راح ابدي الكلام
ياسامع اعرف هالمقام
افقه فقه ذاك الزمان
وزاهد يحب حيل السلام
..-
هو فارس معرفة قبل الحروب
هذا حقة والبعض مايعرفة
هذا ابن در الكلم وابن الرسول
هذا تفسيري صدگ مو عاطفة
..-
2
••
خلصنة العلم خل نبدي باطباعه
طيب والوفة ينكط من شراعة
اكصد باب صحنه وصيح ياعباس
كريم وطلبتك وماتعتدي الساعه
..-
العاجر تطب صحنه تون
تحلفة بضلع ام الحسن
وبس تصد عين اعلى الصحن
يترسة الها اطفال الحضن
..-
من الحسن ماخذ كراماته وصف
انعجن وي طين ابو فاضل كل شرف
هذا اخو زينب كفو من يمة حيد
يروحلة فدوة السلف واهل السلف
..-

3/

وقار و هيبه شايل الله من راده
جن حيدر علي وفارش السجادة
لو رتل دخل صوتة بنسيم الروح
وكرامة من الله ماينفذ ابد زادة
.-
عن هيبتة وعن الوقار
احجيلك واخذ القرار
جنة النبي بوكت الصلاة
وبلحرب حيدر والفقار
..-
من الزغر ماخذ شجاعة حيدرة
مو عبث من صار سبع الكنطرة
لو نزل للمعركة بأصبع ادية
ترجع الكدام كلهه اعلى الوره

4/
رمز للتضحية صاير كمر هاشم
فنه روحة وصبح لحسينه جن خادم
منبع للوفة والغيرة والخوة
ونعم التربية من ربتك فاطم
..-
عن تضحياته للحسين
شكد وصته ام البنين
يوليدي احلفك هذا دين
لخاطر اخوك انطي الادين
..
صار ظهر حسين ويشدلة الظهر
وفدة لزينب صاح كل هذا العمر
طب ع الجيش وسطر بيهم سطر
لاختة جابة وجرة من اذنه النهر

5/
برز من برز جن حيدر بزغرة
شرد كل جيوش الكافر بخزرة
مابقة بشر واكف ابو فاضل
مفرد ماكتل بخزراته طك عشرة
..-
حيد وتعرفة من زمان
ما انطة للكافر امان
سل سيفة حدة بالركب
لا زمن همة ولامكان
..-
تكاطفت روس الزلم من عن بعد
والله زلمة نصيحلة المنة شرد
مايلحك لو ركض من هَوة السيف
ينبتر راس الركد والما ركد

-علي بلال الحسناوي
لطلب اللحن : @ooa_oo

ليلة الانصار


1/ (حبيب ابن مظاهر الاسدي)
مرسال اجة من حبيبي
متروس شوك وغرام
استئنست روحي وجروحي
محبوبي دزلي سلام
اكصدلة انه ودموعي
جي شفته اجمل هيام
..-
اكصد بدمع .. والبس الدرع .. وامشي انه لنجاتي
سيفي الزمة .. وترضى فاطمة .. هاية امنياتي
..-
حبيب انه ياحبيبي
وصاحب جروحي وطبيبي
ويلهج لساني بذكرك

انت امامي بزماني
يمك شفت كل كياني
شلي بعمر ماانصرك
..-
مولاي .. مولاي .. مولاي

2/(وهب النصراني)
بحبك شفت كل حياتي
وديني عرفته واجيت
فزت بكلبي المشاعر
وبحركتك انجويت
حبك حية كل جروحي
لا ولله انة حييت
..-
هذا انه وَهب ..العمرة الك وِهب.. وفاني الك حياته
كلبي من عرف .. عطفك انصرف .. وصرت الة نجاته
..-
بحبك حييت انتَ ديني
ويمك عرفت بسنيني
لطف الله جاباني يمك

غيرت كلشي بحياتي
وبيك انه عارف صلاتي
منك كرم انه اكلمك

مولاي .. مولاي .. مولاي

3/(جون مولى ابي ذر)
عبدك وخليني عندك
مولاي وياك اروح
انه اسود وكلبي اسود
وبذكرك أبيَض وافوح
جون العبد انه اسمي
وانت للرحمة سفوح
..-
بجفك انه اكض .. واركض بركض .. بلكي الكة دربك
كلبي من هوى .. يمشي نينوى .. ويوكف اعلى حبك
..-
وجهي بياضة بنصرتك
والكة حياتي بخدمتك
شنهو الحياة بلا عيونك

من يتختلط دمي الاسود
وي دمكم ويصبح اوحد
هنانة افارك ضعونك

مولاي .. مولاي .. مولاي

..-
4/(عابس الشاكري)
مجنوك ومالي غيرك
يا خامس اهل الكساء
وياك اعيشن واموتن
والدنيا عندي هباء
من الكوفة اجيت وكصدتك
وارد اكصد لكربلاء
..-
من مسلمك .. جيت اسلمك .. هالرسالة بايدي
وياك انه ارد .. ياندى الورد .. يالتنبض بوريدي
..-
يابو علي ياسفوحي
عابس الك انه روحي
ورجلي اعلى دربك اخلهه

مجنون اصير بهيامك
والتهي بعالم غرامك
الدنيا اطلكهه وبيه شلهه

مولاي .. مولاي .. مولاي

5/(الحر الرياحي)
نادم اجيت اعلى بابك
من عكب كل الذنوب
وماترد تايب اعرفك
وانه اجيت ارد اتوب
اقبلني اقدم حياتي
واترك جميع الدروب
..-
انت اقبلت .. وخادمك صرت .. وحطيتني بخيامك
انه اشكرك .. وانطي كلشي الك .. شلون ارد غرامك
..-
حُــر ودينيتي خذتني
عن خدمتك بعدتني
وحريتي انه اعلى بابك

شلون احسب شلون اعدة
عمري الكضة شلون اردة
حتى اخدمك واشتم ترابك

مولاي .. مولاي .. مولاي


علي بلال الحسناوي
لطلب اللحن :@ooa_oo

#عزاء_الامام_الحسن_والسيده_رقيه_ع

📜 قــصــيـــدة {{ ابتاه }}

أدآء الـــرادود || علي سعد العتابي

كلمات الشاعر || منصور عباس الاسدي

الـــــذاكـــــــر || سجاد جمعه

🏴 هــيــئـة بــقــيـة الـــلــه ع 🏴

هلال من بعيد يمشي شفته
راجع محني خدري كسرته

زين وضل بعينك دمع وتبجي يخوي
كسرت ظهرك كسّرت خدري وينك ابوي

يكلي شوكي الج يكبر
وافهمه يعني ما يصبر
للموت رايح وانظر
جرحي بأذني كَبر

اوداع اوداع …. كلشي ضاع
الرب حاميكم يا خيتي ابري الماي
اريد اثياب …. ما تتعاب
لو رد ميموني ومغضب اتحملي الجاي

بكلبي جمره
سوالف عندي من أمي
بكلبي جمره
اخافن ينعرف إسمي
بكلبي جمره
بوريدي دمك اليجري

حسين حسين يا خيمة
حسين حسين يا خيمة

_2

لتودعني عندي اوصيه
طب للخيمه بكلبي جويه

افتح صدرك لازم أقبل نحرك دين
امي كالت سالم ميردلج الحسين

لنحرك لو يحزونه
بلا محمل يصعدونه
الشامت كلي اشلونه
ذابـل حتى لونــه

امشي بليـل …. ادور ادخيـل
صادفني عون وما شفته ادور عليك
وحدي أخاف …. كلفــه انشــاف
عطرك جرنـي وناقص خنصر من ايديك

فشله منك
اكلك عاين ضعونك
فشله منك
والعطش غوش عيونك
فشله منك
امشي وانه من دونك

حسين حسين يا خيمه
حسين حسين يا خيمه

_3

صرخه بكلبي بس ما اصرخ
عيون الشامت ضلت تجرح

صعبه اعله الفي لو يطلع بالشمس وحيد
وضعني ابلا كافل رايح يم قصر يزيـد

يدمعي صبرك لباجر
بلكي نموت ونسافر
خيول ومنظر الحافر
ادور ماكو ناصر

أحبال أحبال …. وطك خيـال
اجتي النوك وصعدني العليل وضل
حقد ركبوه …. ولا احترموه
شدوا رجله بطن النوك وصار هلال


على زينب
جابو نوك الي هزله
على زينب
يمته لوالدي اوصله
على زينب
ضيمي ولازم اتحمله
على زينب

حسين حسين يا خيمه
حسين حسين يا خيمه

_4

المجلس الأول الي ادخله
مجلس اخويه ما اوصله

مجبوره وطبيت المجلس ادور الرأس
محد يحس بشوكي الك فقط عباس

كفيلي ويعرف شبيه
اريد جواب لرقيه
تكلي ليش محنيـه
تسأل شنهو مسبيه

الدار الدار ….. يمها احتار
هلبت جاري ما يطلع لو اجت الطبول
انه ام عون ….. بلايه ضعون
ما يعرفني جاري غيرتني الخيــول

هذا عمري
عبيد الناس تنظرلي
هذا عمري
الي بس الصبر ضلي
هذا عمري
بصمتي اصرخ احسلي
هذا عمري

منصور عباس الأسدي

اللحن خاص

@manso8r

حال السيدة زينب صلوات الله عليها
عندما ارادو الخروج بضعن الحسين الى الكوفة ..

حسين حسين .. وين حسين
1/
على التربان شفت جفك .. يأشرلي
انه الروحي بقت يمك .. يبعد اهلي
عكب عينك انه بدنيا .. بعد شلي
..-
بعد شلي بحياتي ياحياتي
اموتن يمك انه امنياتي
..-
اعاين على جروحك واسجب الماي
يجسمك ع الترب وجروحك هواي
حسين حسين .. وين حسين
..-
2/
بجيت هواي بس ماكو .. خبر منك
يخوية شو تعطتلتوا .. عَلي جنك
تصد عيني على الهيمة … واصد عنك
..-
اباوع عالدرب بلكت خيالك
يمر بية وارد خوية لدلالك
..-
يخوية وشلت من عكبك العين
ورقية خاف تكعد تصرخ حسين
حسين حسين .. وين حسين
3/
مشينه وهالبدت روحي .. بجرح ميلم
الزلم تحجي واخاف ابجي .. كتلني الهم
واباوع وين اخوي حسين .. سبح بالدم
..-
مرة وبين الزلم نظرة أسيره
وانة بجالك جنت اسمي الاميرة
..-
تمنيته حلم واكضيه بعدين
خاطر ما اشوف اخواني ميتين
حسين حسين .. وين حسين
4/
راح امشي بدرب هيمة .. بمسير النوگ
على التربان اعوفنك .. واطب للسوگ
على الكوفة اطب انه .. بكلب محروگ
..-
اعلى درب الكوفة انه واطفالي نمشي
عكب ماجنتوا الية انتوا كلشي
..-
لو سألوا علينه وكالوا منين
الشماته تصيح طبو ضعن الحسين
حسين حسين وين حسين
..
5/
عكب هالنوك ومشيت السوك .. ليزيد احنة
نروح وماكو اي واحد .. نشد عنة
واعاتب راسك المرفوع .. وولا جنة
..-
ولا جن احجي وي راسك واسولف
احجي وعيني تبجي وكلبي يرجف
..-
جاوبني يخوية وين الجواب
ترضة عبايت اختك تنملي تراب
حسين حسين .. وين حسين

علي بلال الحسناوي
لطلب اللحن @ooa_oo

رقية عليها السلام

حسين بويه هذا واقع لو حلم
حسين بويه. راسك بلايه جسم

١.
جني ما شفت الجره ولا ادري بي
راح اسوي روحي فزيت برعب
وانته بحجاية دفو وجف الحنان
سمالله گلي وضمني حيل اعلى الگلب

مدلي جفك. وخنصرك ما منگطع
مدلي جفك. خل ابوسه واقتنع

٢.
بويه لا تگطع رجائي عليك اخوي
رد اليه وگلي كل هذا حلم
لا مشيت ولا عفتنه بهالظلام
بويه رد لا تلتم اعلينه الزلم

ردلي فدوه. بويه معقوله رحت
ردلي فدوه. لو اموت اعلى الطشت

٣.
يعني كل هذا البجي ما گعداك
بويه گلبك ليش ساكت ما يدگ
راح اصدگ صار كل هذا الخراب
يعني ما حلمانه والموقف صدگ

ها متگعد. انه بنتك يالحنين
ها متگعد. راح اموت من الونين

٤.
واقع الصاير وما متوهمين
من دمعتي تطيح وانته بلايه صوت
من يهجمون ابخيول اعلى الخيام
وانته لا حس لا نفس جا خل اموت

والهضيمه. نطلع بلايه كفيل
والهضيمه. يعيل بينه الي يعيل

٥.
بويه عفناك ومشينه اعلى الرمال
بلايه راس وترس جسمك كربله
طشروك بلايه ذمه ولا ضمير
وفرو بنسوانك اشكال الفلا

وعمتي زينب. شافت انواع الكفر
وعمتي زينب. جزع من عدها الصبر

حيدر عمران الحچـامـي

@zx_qwh : لطلب اللحن

غريبُ الدينُ إن أصبح حبيبُ الله قـد يُبلى
جفا بالعين أن بآن جنود النفسُ لـو تُـسـبى
بالمجان قد انصح كهف الدمع قد نادى

طلك الدنيا لأجل الحسين روض نفسك واصحه
ساعه تعيش الكبل كالت وبساعه العطش يضمه

ضل عاري لأجل سترك
بلا نحره وبقه نحرك
انوي تضمهن اسهامك
بلكي يشوفك ويروه

تايب اجيت يا حسين
_
المجيء لصحنُـك سهلٌ الصعبُ فيه أن تثبــتّ
منهم عالمٌ أعرض لمجيء الصحن قــد ادركــت
وبعد الضغط ان يذهب جاء لصحنك إستشهد

شجم جنه انحط بيها جواد وجده التزوره
سرُ من رأي جنه تدخل شابع حروره

لأمير النحل من تدخل
تحجز كبرك وترحل
ضلت كربله مأوى
وطعم الشامت مروره

تايب اجيت يا حسين
_
رهينٌ كَفُكَ أصبح لنهرٌ مات ضمئانًا
أخلع دمعك وابكي حُسينٌ باتَ حيرانًا
طاف الخدرُفي البلدان راها كُل شيطانًا

نجزع يمته ومحرم حج وعُمره للمذنب
اغسل ذنبك بدمعه من تسمع بمجلس طب
والزهره توزع ثواب والمهدي بقه يعزب

ودلال الحسن جمره
والقائم بجه بحسره
اخرني الدهر جدي
عمري كله الك اندب

-
غداً في القبر نورٌ شع آثر تسبيحة الزهراء
لا تُدفن وحيداً قـط معك يُدفنُ عاشوراء
كما زرت الحسين يأتيك فلا تقطع عليه الماء

مو ملكي هذني العيون مُلكك يا ابو الأكبر
أبعد عنك واصغـر وتندهـلي تعـال أكــبــر

متاني زيارة المشاي
واتعنه واكلك هاي
هذا انه اعله عهدي وياك
يمته بحُبك اتأســر

تايب اجيت يا حسين

منصور عباس الأسدي
١ محرم
١٤٤٥

طحت وبدمك محزم
مشينه وبيك نتحلم
مودعينك بامان الله

حسين حسين

١.
ابدي ابيش واحنه البادي بينه الموت
يصوت الله المتت واعليك مامش صوت
بقيت ابكربلا متاني يجي الزاتوت

يباقي اعلى الترب وحدك
لا في لا هدم عندك
اصبر روحي التريدك
ولا عاش الصبر بعدك

اصبر روحي بالگوه … وظهري كسرته الخوه
اختك يا بعد اختك … منكم رادت التجوه

٢.
اصبر روحي وادري الثكله معروفه
بس گدامي فنه اليرفع اجفوفه.
الناس تباوع وطبينه للكوفه

الخلگ تتباجة شفناها
عليمن ما عرفناها
گاللهم علي السجاد
رسايلكم قريناها

اذا تبجون عالصاير … جا ياهو الكتب حاظر
رسايلكم اجت لحسين … ومنكم ما شفت ناصر

٣.
مشينة دروب بيهه الحيد مايكعد
وحِدينة الحادي بينه حدة المبرد
واذا ينطق حجاية لسانه يتعكد

تبَشر وبنساوينك
نگر اعيونة وعينك
اخورسهه الزلم يمي
وامشي بنهجك ودينك

اضم جروحي واتكتم .. بس دموعي ماتنضم
كلما اغمض عيوني .. اشوفك سابح بنص دم

٤.
اطب للشام وانه الحرگة تجويني
اباب الساعة اوكف وانزف سنيني
واسولف وية راسك مايحاجيني

اسولف ضيمي وية الراس
وبية تشمتوا الارجاس
شجاوب كلي ياخوية
لو سألوني عن عباس

مايوصف بعد اللسان .. تهت ماضل الي عنوان
الماشافوا خيالي بيوم .. شلون يصير اطب ديوان

٥.
من اطب ديوانهم راسي بعلو راسك
وادنك روسهم جن حذوة بمداسك
انه ترباتك وناموس عباسك
..-
تفاخر بية واتبشر
انه بت فاطمة وحيدر
تطيح حجايتي جن سيف
ابونه وبحرب خيبر
..-
عِزة جدك ودينه .. جبناهه الكم وجينه
خطتهم خوطة الناعور .. وعلى كبرك تعنينه



علي بلال الحسناوي
حيدر عمران الحجامي

لطلب اللحن
@ooa_oo

يارحمة الله الواسعة الماتنكضي
يانعمة الرب الرضي المرتضي
ماتنعد نعماتك .. ماتنفذ خيراتك
حسين حسين
..-
1/

مگدر عَلي ثوب اللطم
وغيرة ميصلح هدمي
من جنت بكماطي طفل
ناغتلي باسمك امي
تحول مشاعر هـالنغم
وسار وي روحي ودمي
..-
تربيت بدمعي اعلى ضعونك
ولحم جتافي من ماعونك
محسود اعلى الخدمة هواية
وعمري اضلم من دون عيونك
..-
محروك لخيماتك .. ماتنعد نعماتك
حسين حسين
2/
جرحك ال وي عمري كبر
وعيني افتحتهه كبالك
امنيتي انه من الزغر
اكتب شعر واقرالك
شكري اليك يفتقر
ابجي الك وانعالك
..-
بسجنك يامحلى الحرية
يحسين وغيرك منو الية
مااستاهل كلمة خادم
بس حبك سوالي قضية
..-
خليني بنظراتك .. ماتنفذ خيراتك
حسين حسين
3/

يالتارس عيوني حزن
وبحبك انه مدلل
لو تمحي من عيني الدمع
بيك انه اضل اتوسل
عايش على جروحك انه
ولخدمتك ارد اوصل
..-
حبك دلاني بعافيتي
والموكب صاير جن بيتي
بالخدمة اتنفس احساسك
غيرك اي هوة ميطب ريتي
..-
عيشني بشوغاتك .. ماتنعد نعماتك
حسين حسين

4/

كبر سنيني بخدمتك
وخليني عايش مغرم
ما اعرف احجي وي الخلك
وانت اللكيتك معجم
سويتني زلمة صدك
وللخدمة كمت اتحزم
..-
بلخدمة خل ضهري يحدب
واقوة حدودي باب الموكب
بغربيلك طيحت هواية
بثيابك خليني مجلب
..-
ومااكسر جلماتك .. ماتنعد نعماتك

5/
كبران صيتي بمجلسك
واسمك صبح عنواني
وياي اريدك باللحد
واكف وتتلكاني
نارك ردت ياسيدي
وماريد جنة ثاني
..-
بگبري اريدك يامحبوبي
انه وزلاتي وعيوبي
تضويلي الحفرة بشيباتك
وتأنس وحشات ذنوبي
..-
تضويلي بشيباتك .. ماتنعد نعماتك


- علي بلال الحسناوي

لطلب اللحن @ooa_oo

نسألكم براءة الذمة

شهادة الإمام الحسن المجتبى (ع)

عمري ما يمتدد كلتني الحسره
شكبره بخته الي يعيشك جمره

عبره ودمع هنياله
اليترسه بس سلاله

يبو الخير يبو الخير
-1
من واقعه دار أمي و انظرلك
ربي جروحي خاطر اوصلك
ادري بجروحك وارثه حلمك
آه الوجع ما طلعت بجرحك

طلعت حسرتك خويه عل الراح
تارك خدمتك وانحسب طاح
الآفلين

العاشك طبيبه وحب الجروح
مو بس ضريح يشوفك الوح
يا حُسين

ولدي ناذرهم والأول قاسم
كونه تنظرله وتحسبه خادم

جلمة شهيد احلاله
اليترسها بس اسلاله

يبو الخير يبو الخير

_2
اوسع سفينه وكلبك شراعك
زاد اصبحت للرايد امتـاعك
بيه الكرم بس اللقب صاغك
للجنه تعزم هايه اطباعـك

امي تصير لزينب بليل
حنين بحيث يحسدك الهيل
جن جنون

اليعطش يجيك ترده سقاي
اليطلب دمع يتسمى بجاي
يبجي كون

ذوله ولدي وكربله تنتظرك
ياهو باجر بالكسر اليجبرك

عاشور اجه بهلاله
اليترسها بس سلاله

يبو الخير يبو الخير

_ 3
انعرضت قضية كربله ومنهم
ربك اختارك تصبح اولهم
كل المصائب الي شفناها
بس بالتصور المنظر افجعهم

ما حضروا الطف وحر الشموس
ولا شافوا الخيل بصدرك ادوس
يا غريـب

الناسُ عبيد الدنيا والزيــن
السملها بيضه ويه الحسين
يا طبيب

اخيك انه والجمني جروحك
شكثر وادم انهدت بحروفك

من الماكو اسمك شاله
اليترسها بس سلاله


_ 4
بالطف يطيح الكافل ينادي
ادركني خويه وحقق امرادي
من عل الخيل اطيح شتنادي
وحدك يخويه و يمك الهادي

تنده ملائكة السمه انثــور
ائذن يربي نعين النحـور
عنده طلاب

يطلع ولو بالدنيا ضل يوم
ياخذك بثاره الأمر محتـوم
اي وابو تراب

طايح انته وثورتك ضل بيها
زينب القائد الحمـل اعليـها

الشام طف الحاله
اليترسها بس سلاله

_5
انته الوطن والوادم الغربه
من كل طواف تميزك الكبه
صبي مسيحي سني مدور
ناعور طبعك بير والجربـه

اسمي الكريم واسمك حسين
اليذكرك بكلبه تغورك العين
يا حنين

انه الغريب ابين الأصنام
كون البقيع نترسه خدام
بالونين

عاقبة هالخدمه شافه بكبره
تجبره وبعطفك ويرد بكسره

طبعه طبع ادلاله
اليترسها بس سلاله

يبو الخير يبو الخير


منصور عباس الأسدي
لطلب اللحن ⬇️

@manso8r

قصيدة _ السيدة سّكينه (ع)

عندما وصل ضعن الحسين (ع)
يوم الأربعين وجلسوا على قبر سيد الشهداء

تحدثت مولاتي سكينة مع ابيها الحسين

قالت

بكلبي حجي من قدرك كلها تعرفه
بكلبي حجي من ضعنك سوط يوكفه
بكلبي حجي بالسوك اعيون الصلفه
بكلبي حجي

_ 1
جتك يبويه سّكينه …. هناك انست الحنينه
بكلبي حجي محمل دمـع
عيون الشماته هوايه …. الما شتم ذب حجايه
يم كبرك وراح الوجع
لمن طحت فرينه …. والخيل تلحك بينه
شجم طفل مسحوك اوكع
عاتكه داستها الخيل …. نتمى يوصلنه الليل
من الركض وني انسمـع

بكلبي حجي
وادري تلجمك حسراتي
بكلبي حجي
ما تعرفهن عماتي
بكلبي حجي
كثرت بالكوفه آهاتـي
بكلبي حجي

_ 2
لمن دخلنه الكوفه … بطبع الغدر معروفه
ما يعرف قدرك يحلف
هضمتني عمتي بهايه … من رفت يمها الرايه
نسوانــه ما تـنـجتـف
عمتي تعاين ليـه …. شمعنى جلمة مسبيه
شكد دورت وماكو وصف
ما سمعت مسامعنه بيوم …. بامرت الحادي نكوم
وبحبل واحد ننجــتف

بكلبي حجي
الدمعه ويانه عاشت
بكلبي حجي
بس بنتك ليك اشتاكت
بكلبي حجي
بالشام عبينه انشافـت
بكلبي حجي

_3
وكفونه يم باب الشام … فرحتهم جن حرك خيام
كطره شرف ما شفنه
كل عين بصدر حسين اتحولت سهم كل عين
حسرة كمر شكد عشنه
من النظــر خُـزينــه عمتي حجتها اعلينـه
حتى الشتـم سمعنه
ادخلنه القصر مكسورين استهزؤوا براس حسين
رأيه نصـر خلينـه

بكلبي حجي
الكافل جان النه خيمه
بكلبي حجي
بلا سكف انام هضيمه
بكلبي حجي
حارسنه الحادي حريمه
بكلبي حجي

_ 4
هذا الوداع الثاني …. لموتي اضل اتاني
بنيتك انه عندي صبر
ارجع يبوي بدونك … عيني متشوف عيونك
هاضمني متني بيه اثر
بلا كافل ادخل مدينة بعين الناس انحجينه
بالمشي داسوا جم جمر
ردينه بضعن مكسور …. نخفي كسر النحور
ابال الضعن ضل النحـر

بكلبي حجي
يفرحنه بثارك حجه
بكلبي حجي
اليكصدنه لا منرده
بكلبي حجي
بلياك الدنيا خنكه
بكلبي حجي

منصور عباس الأسـدي

بسم الله الرحمن الرحيم
بعون الله وحبيبة حبيبه رسول الله (ص)
فاطمة الزهراء (ع)

غداً ان شاء الله
سيتم نشر قصايد الليالي الفاطمية
مع اللحن

للشاعر _ حيدر عمران
الشاعر _ علي بلال الحسناوي
الشاعر _ منصور عباس الأسدي

نسألكم الدعاء