መልአከ አርያም ዓለማየሁ ዘውዴ የጀሞ ደብረ ሰላም መድኃኔዓለም ቤተ ክርስቲያን አስተዳዳሪ በበኩላቸው  እንደገለጹት ሠልጣኞች ሠልጥነው ወደ አካባቢያቸው ሲመለሱ ስብከተ ወንጌልን በቋንቋቸው ተደራሽ ለማድረግ እንዲያስችላቸው የበኩላቸውን ሚና እየተወጡ ያሉ አካላትን አመስግነው ይህንን ተግባር ለመደገፍ የገዳማትና የአድባራት አስተዳዳሪዎችም ኃላፊነታቸውን መወጣት እንዳለባቸው ገልጸዋል።

ለአሠልጣኞች ሥልጠና ከሚሰጡት መምህራን መካከል አንዱ የሆኑት መምህር ተመስገን ሥራህ ብዙ እንደተናገሩት “ወንጌልን ለዓለም ሁሉ ስበኩ” በማለት ክርስትናን ጀማሪው አምላካችን ኢየሱስ ክርስቶስ ባሳሰበው መሠረት የወንጌል አገልግሎት ባልተስፋፋባቸው   አካባቢዎች ለማድረስ ሐዋርያዊ አገልግሎት እየተሰጠ ይገኛል በማለት በዚህም እየሠለጠኑ ያሉ ሠልጣኞች የተለያየ ቋንቋ ተናጋሪዎች በመሆናቸው አካባቢያቸውን ለማገልገል ሥልጠናው እንደሚረዳቸው ተናግረዋል።

ሠልጣኞች እንደገለጹት በአካባቢያቸው ያለውን የስብከተ ወንጌል በቋንቋቸው ተደራሽ ለማድረግ የሚያስችላቸውን ሥልጠና እየወሰዱ መሆናቸውን ገልጸው ሥልጠናው የሄዱትን ለመመለስ፣ ያሉትን ለማጽናት፣ አዳዲስ አማንያንን ለማስጠመቅ እንደሚጠቅማቸው ጠቁመዋል።

በተጨማሪም ትውልድን የሚያንጽ፣ ክርስትናን የሚያጠነክር፣ ሰው ከእግዚአብሔር ጋር ተቆራኝቶ እንዲኖር የሚረዳውንና የሚያግዘውን  ማኅበረ ቅዱሳንን እናመሰግናለን ያሉት ደቀ መዛሙርቱ አክለውም በሥልጠናው የበኩላቸውን አስተዋጽኦ እያበረከቱ የሚገኙትን ሁሉ ምስጋናን ችረዋል።

በማኅበረ ቅዱሳን የስብከተ ወንጌልና ሐዋርያዊ አገልግሎት ዳሬክተር ዲያቆን ሙሉጌታ ነጋ እንደገለጹት ማኅበረ ቅዱሳን በገጠራማውና በጠረፋማው አካባቢ ከሚሠራቸው ሥራዎች መካከል ስብከተ ወንጌል ተደራሽ ባለሆነባቸው ስፍራዎች ለማደረስ ተተኪ መምህራንን እያመጣ ከባለድርሻ አካላት ጋር እያሠለጠነ ይገኛል  በማለት ተናግረዋል።

ዳሬክተሩ አክለውም ከማእከላትና ከወረዳ ማእከላት፣ ከወረዳ ቤተ ክህነት፣ ከሀገረ ስብከት ጋር በማስተሳሰር የሠለጠኑ ደቀ መዛሙርትን ወደ አካባቢያቸው በመላክ ከዚህ በፊት ከሠለጠኑ ሠልጣኞች ፣ ከካህናት፣ ከአጥቢ፣ ከሰንበት ትምህርት ቤቶች ጋር ሆነው በቅንጅት እንዲሠሩ በማድረግ የጠፉትን የመመለስና ቅዱስ ወንጌል ያልደረሰባቸው አካባቢዎች እንዲያደርሱ በማድረግ የማስተማርና የማስጠመቅ ሥራ እንደሚሠሩ ገልጸዋል።

በመጨረሻም ይህንን አገልግሎት በስፋት ተደራሽ ለማድረግ ማኅበራትና ሰንበት ትምህርት ቤቶች ለሠለጠኑ ሰባኪያን ደመወዝ የመክፈል፣ጉባኤያትን የማከናወን፣ሌሎች ሠልጣኞች ካልመጡባቸው ቦታዎች በማምጣት በጋራ መሥራት፣ ማስተማርና ለተልእኮ መላክ ቢቻል ነፍሳትን የማዳን ሥራ ማከናወን እንደሚቻል መልእክት አስተላልፈዋል።