ابدي بسم الله رب العالمين
وابدي بسم العشك مولاي الحسين

شما يجوني العشك ماصيح اه
بس اصيح بصوت عالي يا حسين

اني مو بيدي صرت كلشي بديك
سنيني كلها وعمري انتة يا حسين

روحي صحرة وانتة صرت الها متاع
اختنك لو ما اشمك يا حسين

دوريت الدنيا ما لاكي مثيل
انتة بس الروحي لايك ياحسين

هواي لاموني لان بس احجي بيك
مادرو مجنونك اني يا حسين

اي نعم مجنونك ورايد رضاك
كلشي مايرضة عليي لوما حسين

خلي بية احرورة ما تطفة بعزاك
وابقة هايم دوم واصرخ يا حسين

خلي بكليبي جمر يجويني حيل
واحترك لجروحك واندب حسين

خلي بعيوني دمع يجوي الجفون
كون كل دمعاتي لجلك يا حسين

شجاب دمعاتي على الدمعاتة دم
وكل صباح وليل يندب يا حسين

كون اواسي المنتظر لمن يصيح
اه يا ثارات جدي يا حسين

الرسول الكريم (ص) والامام علي (ع)




لتغمضها عينك ... يا خوية انة محتاجك
لتغمضها عينك ... بية يكسر فراكك
انت ابوية ... وانت اخوية
وانت المربيني

_(1)

حالي يا حال يهد الجبال
من بعد عينك عيوني هواي تبجي

نوحي عالي الراح غالي
اه من بعدك ويامن امشي وحجي

انت كل بسماتي والضحكة
والله حيل تموت الفركة
بنار هجرك روحي محتركة
اخو مثلك كلي وين الكة

يذبحني حنينك وتهز روحي اشواكك
لتغمضها عينك ... بية يكسر فراكك
انت ابوية ... وانت اخوية
وانت المربيني

_(2)

مو علي ذاك الجان وياك
بعدك اني منحني وضليت وحدي

هواي الجروح ذابلة الروح
وكلشي من عكبك تحول صار ضدي

واسمك الما فارك الشفة
وسفة بية الشامة اتشفة
بي كلش ضيعو العرفة
وعلى غدري اجمعو بلهفة

ماجن فاكدينك ولا هم بيهم امصابك
لتغمضها عينك ... بية يكسر فراكك
انت ابوية ... وانت اخوية
وانت المربيني

_(3)

انت وصيت لي حاجيت
اصبر شما صار ابد ما سوي كلشي

اني ضليت باقي بالبيت
من غدرهم وين اروحن وين امشي

وبحقدهم جمهرو عالدار
وباب بيتي وجروها بنار
واني كاعد وانظر اعلة الصار
وساكت شما شوفن شمادار

يدرون بوصيتك جوي وداسو اعتابك
لتغمضها عينك ... بية يكسر فراكك
انت ابوية ... وانت اخوية
وانت المربيني

_(4)

من ورى الباب تحجي بعتاب
فاطمة تكلهم اتركو ابن عمي

الباب دفعوه الضلع كسروه
نبت بسمار بصدرها وزاد همي

منالعصر محسن وكع منها
سال عالعتبة ونزل دمها
وانحنت مو فاطمة جنها
لعنة الله عالي اللمها

حيل اذوها بنتك اذو حتى احفاذك
لتغمضها عينك ... بية يكسر فراكك
انت ابوية ... وانت اخوية
وانت المربيني

_(5)

تعنو البيت كلش محجيت
بالحطب بابي احركوها واني ساكت

اني ضليت جي توصيت
جان ما بقيت هاي الروس طاحت

كلها تدري بسيفي وافعالة
ياهو بيهم يوكف اكبالة
لجن وسفة حالتي حالة
اوصيتك قيدتني جتالة

يدروني عضيدك منك حامل اسرارك
لتغمضها عينك ... بية يكسر فراكك
انت ابوية ... وانت اخوية
وانت المربيني

______

الخادم محمد ابو باقر الحجي

صل الله عليك يا زهراء

قصائد لمولاتي الزهراء (ع)

نعي مشطر كاني بالزهراء (ع)
تقول :


يفضة الباب من عندي ترچي
سطرني بسطرتة طاحت تراچي
ختلت وكامشة احجابي
بين الحايط وبابي
دفع بابي عليي كوة
عصرني المالة امروة
جمر بالباب ضل يلهب
چوة چفوفي وكمت انحب
ارد الباب وايردة
يدفعة بقوة ما هدة
طرف اثياب شبت نار
اندرت ليها اجة البسمار
زرف صدري وصحت ويلي
كمت كوة الم حيلي
استغل كل ضعفي او وضعي
عصر حيل وكسر ضلعي
بطرف الساني يا حيدر
ردت احجي ولا اكدر
هد الباب لم حيلة
رفسني بقوة ياويلة
من الرفسة اللمني
صحت اه وسكط ابني
طاح ابني وطحت يمة
خميد انفاس بعد امة
كمت منة وردت امشي
برمح طكني ورجف كلشي
ردت اوكف ولا اكدر
اجر النفس ما ينجر
شلت راسي وشفت زينب
تون الونتي وتنحب
ردت ما ابين وبين
هنة جروحي ينضمن
بهزت راسي صحتلها
الها احجاية كتلها
كل الي جرة اعلة امج ترة چي
بت طه وزوج حامي الحمية

_____


الخادم محمد ابو باقر الحجي

مقدمة عزاء


سلام الله سلام الله ... على كل فاطمة الزهرة
سلام الله سلام الله ... على الشوغة وعلى العصرة
سلام الله سلام الله ... على عيون الغدت حمرة
سلام الله سلام الله ... على الخد واثر سطرة
سلام الله سلام الله ... على اللوعة وعلى العبرة
سلام الله سلام الله ... على كل جوية بالجمرة
سلام الله سلام الله ... على الاه وعلى الحسرة
سلام الله سلام الله ... النفس ما تكدر اتجرة
سلام الله سلام الله ... على النور وعلى الدرة
سلام الله سلام الله ... على كل فاطمة الزهرة

_


الخادم محمد ابو باقر الحجي

زيارة ابا الفضل العباس (ع) لقبر الزهراء(ع)

ذهب الامام علي (ع) الى قبر الزهراء (ع) فوجد ابا الفضل العباس (ع) عند قبر مولاتنا باكيآ يلطم خده الشريف ويصرخ اماه كلميني انا ولدك العباس (ع)
كأني بالامام علي (ع) يقول :





عيونة حمرة منالبواجي
وبكبر فاطم يحاجي

ياهو مد ايدة عليج
ياهو جواهن اديج

وبكبر فاطم يحاجي

____(1)

شفتة واكف يم كبر
فاطمة وصاير جمر
يوكف ويرجع يطيح ابحيلة

ايشيل بجفوفة ترب
ايشمة ويصيح عذب
جني مو بتراب اشم الشيلة

من كبرها ايكوم يمشي وحسرة تخنك روحة
على الهامة ايدك بديه اوعالي كلش نوحة

يصيح تلجمني المصيبة
يمة يالزهرة الحبيبة

تنعصر روحي منجيج
ياهو جواهن اديج

وبكبر فاطم يحاجي

____(2)

كوة يتوجة ويكوم
حيل ماخذتة الهموم
ونتة تجرح روحة ومعذبتة

ايكلها يمة شنهو بيج
صدك مجويات اديج
صدك بابج محترك لازمتة

الباب صاير نارة جمرة وبيدج ادفعينة حيل
وجفج الينكط محنة محترك يايمة ويل

مو فقط جفج تجوة
كلبي بل لوعة تلوة

ملجم كلش عليج
ياهو جواهن اديج

وبكبر فاطم يحاجي

____(3)

شفتة يضرب عالضلع
يصيح ريتة ينشلع
شبيهة حاجيني ييمة اضلوعج

بيج يايمة شجرة
الضلع ياهو الكاسرة
ياهو هذا النزلاها ادموعج

صدك روحج من المها شاغت وضكتي العذاب
بين حايط انتي صرتي وانعصرتي بين باب

يمة ضلعج كاسرينة
مادرو انتي الحنينة

مادرو يايمة بيج
ياهو جواهن اديج

وبكبر فاطم يحاجي

____(4)

عالصدر ايدة ويكول
اه يا صدر البتول
صدك نابت بالصدر بسمارها

عالكبر يهوة ويصيح
يمة كليلي الصحيح
صدك شاغت روحج منالامها

يشيل بجفوفة تراب ويضرب اعلة الهامة
اه يا فاطم ينادي ومحترك بالامة

من كبرها يمشي حافي
يصيح هاي الزهرة كافي

يمة حاجيني ارتجيج
ياهو جواهن اديج

وبكبر فاطم يحاجي

____(5)

يرجع ومحني الظهر
يسال وكلة قهر
يكلها يمة احجيلي اخوية شصابة

محسن الثالث اخو
صدك ما شايف ابو
صدك بالعصرة وكع يم بابة

صدك فتح عينة اخوية عالمنية وموتة
لا غفة بحضنج ييمة ولا سمعتي صوتة

ماسمعتي صوت منة
وبحياتة ما تهنة

لا سمعتي ايناغي ليج
ياهو جواهن اديج

وبكبر فاطم يحاجي



_______


الخادم محمد ابو باقر الحجي

السيدة الزهراء (ع) الى خدام الحسين (ع) ....



يامن اعلة حسين جنتم لاطمين
ادخلوها بسلاما امنين
يلي رحتو الكربلة مشاية
هسة للجنة ادخلو وياي
فاطمة وياكم انتو مسيطرين
ادخلوها بسلاما امنين

____(1)

بالمجالس اني دوم وياكم
وبسجلي مسجلة اسمائكم
وجهوكم محفوضة كلها ابالي
يالذكرتو حسين ما انساكم

يلي دكيتو الصدر والهامة
حيل احبكم انتو ياللطامة
اصواتكم بالردة متروسة حنين
ادخلوها بسلاما امنين

____(2)

احضر الخادم بساعة موتة
ومن المغيسل لحد تابوتة
لمن اينزلونة ربعة بكبرة
اني ويا انزل وماعوفة

ما القنة هو يعرف يحجي
ايخلي منكر بالسوالف يبجي
ايكلة خلصت العمر ويا الحسين
ادخلوها بسلاما امنين

____(3)

مو الك هالوحشة اسمع النداء
للابد ماحاضر بمجلس عزاء
انت خلصت العمر نوح اونين
وتلجم اجروحك مصيبة كربلاء

عالحسين بحركة تلطم صدرك
وحشة ماكو حسين يحضر يمك
هناك ماتسمع صراخ ولا انين
ادخلوها بسلاما امنين

____(4)

الكبر ماخلي يحركك ذرة
يالي نزلتة الدمع عالحرة
يالصرخة اعليها اه يازينب
امن ومن كلشي باجر تبرة

ما يمسك سوء امن يمك
لا تحير وكلشي ابد ليهمك
باجر بيوم الحشر كر انت عين
ادخلوها بسلاما امنين

____(5)

راح اخلي البرزخ ابوابة يسد
لا يهمكم جوع لاحر لابرد
راح اخليكم تعبرونة ركض
ركضت اطويريج بالبرزخ ترد

بكل سهولة انتم تعبرونة
اني وياكم لمة تخلصونة
والاملاك تصيح خدام الحسين
ادخلوها بسلاما امنين

____(6)

هناك يم باب الجنان الكاكم
ما اطب الة سوية وياكم
الباري صك منالشفاعة انطاني
اشفعلكم انتو ويا احبابكم

هناك بالجنة نسوي قراية
ومن ابو فاضل نجيب الراية
وانتم اهل العزة والبي قائمين
ادخلوها بسلاما امنين



_______________


الخادم محمد ابو باقر الحجي

قصيدة شور...
السيدة الزهراء (ع) والحسين (ع)...
____________



نام ابني نام والحومة ظلام
وبكل الام نام ابني نام

_(1)_

اني ابني سليب
طايح عالغبرة ينادي
عطشان وجدي الهادي
وصرخاته تاذي فؤادي
اني ابني سليب

يكص بخنصرة الظالم يجرجر محبسة يريد
والاخر ضل يجر ثوبه ويصيح ملبسه اجديد

____(2)___

اني ابني جريح
ملتمه اعليه عدوانه
وحيدة بلا صحبانه
لا ولدة ولا خوانه
اني ابني جريح

يعت بلحيته واحد يظربه بقوة ياويل
واحد ضل على صدرة يرفسة بكل حقد حيل

_(3)_

اني ابني غريب
محروكة بنار اخيامه
وتركض بالحومة اعيالة
اعليهم هجمت خياله
اني ابني غريب

بعد بيه النفس عايش بسيف ابني يظربو
برمح صوبو وسط صدره وضلو بس يطعنو

_(4)_

اني ابني وحيد
يبجي والزيد الامه
من ينظر حركه اخيامه
ويسمع صيحات ايتامه
اني ابني وحيد

يون لمن يشوف اخته وعلى التل صعدت اتصيح
جريح امسلب ابن امي بجروحه تلجمه الريح

____(5)___

اني ابني صريع
متمدد فوك الغبره
ولا واحد يمه يحظره
يصعب ويحير امره
اني ابني صريع

يعاين جيش اعاديه عليه من هدت الخيل
تسحكة وتدبج بصدرة لحد ما خسفته حيل

_(6)___

اني ابني ذبيح
طايح متكسره اعظامه
مظروب بسيف وقامه
وبكثره اهواي اسهامه
اني ابني ذبيح

شمر ربع على صدره ويطبر راسه يا حيف
ويحز من القفه نحره وتلجمه احورة السيف

(7)_

اني ابني قتيل
يايوم اصعب من يومه
نايم ومسلبة اهدومه
والشمس مغيره ارسومه
اني ابني قتيل

الشمس غيرت معانيه مجويه اضلوعه الرمال
مو ابني ابد جنه صاير حاله يا حال

■■■■■■■■■■■■■■■■■

الخادم محمد ابو باقر الحجي
اسالكم الدعاء لي ولوالديه

عندما يتكلم امير المؤمنين (ع) عن عشق الزهراء (ع)





بالعشك احترك
وي حبيب افترك
زهرتي راحت اوحدي ضليت

_(1)

مني راحت سلوتي لا بل حياتي
هية كل الدنيا عندي وامنياتي

توأم الروح لا بل الروح
النفس اليصعد وينزل بريتي

دمعي مفضوح بكثرت النوح
تعلمن عالون سوة كل حياط بيتي

ياعذاب العشتة ما عاشة بشر ثاني
مني راحت زهرتي وذبلت اغصاني

شمعتي انطفت
لهفتي ماغفت
زهرتي راحت اوحدي ضليت

_(2)

منها اباوع بيتي اظلم صار خالي
راحت الجانت بسمتي وكلش غالي

حزني اجبير انحب ابير
وسفة من بعد الاحبهم هيج تاليتي

كلبي شيصير بلوعتة ايحير
ابد مو سهلة المشت من عندي ام بيتي

كلشي اخذت من مشت بقتني وحداني
اخذت الفرحة ومشت خلتلي احزاني

دمعتي بالجفن
للمشت بس احن
زهرتي راحت اوحدي ضليت

_(3)

افرك بجفيني وافتر روحي متهيد
منين اجيب ام المحنة لحيدر الحيد

نوحي مسموع انشافت ادموع
العلمتهم عالصبر كووة يصبروني

انظر الباب يزيد العتاب
وحيلي ينهد اوكع وصاير شلوني

كوة الم بحيلي واوكف صاير بكوة
بية من بعد الحبايب دهري اشسوة

مختنك عالمشو
عالسفر ما حجو
زهرتي راحت اوحدي ضليت

_(4)

يا عشك حيدر تعالي وطفي جمرة
عالوجه محفورة دمعة وعينة حمرة

راحت العيد صارت بعيد
من بعدها روحي ما تحمل الفركة

اصبر شلون هية العيون
ابد ما تبرد جروحي تبقى محتركة

بكل مكان الها اثر من انظر افتكرة
وين اديرن وجهي وين اتموت الذكرة

افتكر بالصور
والكلب انفطر
زهرتي راحت اوحدي ضليت

_(5)

عالكبر اوكف وسولف وي حبيبي
ما سكن لحظة ولا هود نحيبي

كومي وياي انتي الماي
اني عطشان اعلة شوفج اروي اعيوني

العمر ضاع مني ابساع
من بعد ما رحتي من خابت اضنوني

اشكد اسولف وي كبرها والحجي هواية
لاني رايح يمهة وانسر لاتجي وياية

وبكلب منعصر
وبحنين انتظر
زهرتي راحت اوحدي ضليت



___________


الخادم محمد ابو باقر الحجي

#نزلة_وهوسات

كاني بالزهراء (ع) عندما خرجة خلف امير المؤمنين (ع) مخاطبة العصابة الظالمة
قائلة :



شحدة ليمد ايدة هسه احشم اوليدة
وابد ما اكشف الراس
بس اصيحن يمة عباس
المدد يبني المدد

_(1)

عوفو حيدر خل يردلي وستور اعلة ارواحكم
لا اشيل ايدي لفوك بلحظة اغير احوالكم
ابو فاضل لو نخيتة لو كلتلة اسمائكم
لا سمة ولا كاع صدكو ما تظم اشكالكم

عوفو حيدر خل يرد الدارة
لا اشيل ايدي وتجيكم غارة
بس اكلة يابو فاضل وينك
الحالكم شوفولة صرفة وجارة

لو ارفع ايدي واصرخ يا حيدي ويسمعني اوليدي

ايهز الدنيا ابغيضة

(2)

ياهو هذا الاجة البيتي وبيدة شايل سيفة
ايصيح وينطي اوامر صار يحجي بكيفة
هذا انذاري الاخير الابن عمي ايعيفة
لا وحك ضلعي وابوي اوليدة ياخذ حيفة

والله خيعونة اليضل خيعونة
من يكابل خزرتة وعيونة
حيود ماكدرتلة لا مو انتو
ياهو اليشوفة ايتغير لونة

لو جدحت عينة تهتز ايمينة يحمر اجبينة

تفتر غيرة براسة

_(3)

كلو للاول يبطل لا اجيب اخبارة
يحكم الاسلام رايد هو حاكم دارة
هو لو بي خير زلمة خلة يغسل عارة
بيا حرب خاضها ابوية شو كضاها فرارة

خل يبطل لا اضيع اسنينة
وليدي متحضر فرك جفينة
خطفة من عباس ترعب روحة
يبقة يتلفت يصيح وينة

شما يعلة بسورة والناس ادورة بس يخطف نورة

يخطف روحة وعمرة

_(4)

الثاني شنهي يدوس بيتي بكل صلافة يفوتة
شنهي صاير زلمة هسة وهسة طلعة قوتة
خل ابن بيبيتة يسكت لا اسكتة بموتة
زلمة ابن صهاك صاير هسة طالع صوتة

خلة يسكت لا اسكت انفاسة
غيض حيدر كلة يم عباسة
لبو فاضل بس اهزن ايدي
عمر يم رجلية ينحط راسة

لو زلمة وفنة لايشرد منة من ايهد جنة

ريح وياخذ راسة

(5)

هاي اخر مرة اكلكم بعد مالي احجاية
عوفو ابو الحسنين كافي خل يرد وياية
لا وحك زينب واخوها لو بطيتو بهاية
ابو فاضل هسة ينزل بيدة تخفك راية

عيونة كلهن غيض صارن جمرة
خلي واحدكم يحير بامرة
مو فقط بس انتو يسحك روسكم
للخبيثة ايروح ذيج الحمرة

وليدي وناخيتة بزينب حاجيتة ينفض خاجيتة

وتهتز ريشة راسة


حرورة بدوية ابن العلوية تصبح ملوية

هواي اركاب بجفة




الخادم محمد ابو باقر الحجي

راحت ومات .. كلشي بية .. عمري هية .. مني راحت
كل حياتي .. وامنياتي
مني راحت

______________(1)

سلام الله على عيونج غفن ومساهر اعليهن
جنت من احزن ومهموم انسر بالنظر ليهن

تعالي ...
شوفي شصاير شبية
فكدج يصعب اعلية
تعالي يم حسن لية .. تعالي

مو ذاكة علي كونج تشوفينة
من بعدج وحيد ودمعتة بعينة
اه شكد يصيح وعالي اونينة

كلبي مهموم .. يشكي فكدة .. باقي وحدة .. مني راحت
باقي اعاني .. وبلساني
مني راحت

______________( 2)

الورد لوما يمر بي ماي يذبل هوة واغصانة
بعدج يا عذب يا ماي روحي هواية ذبلانة

الليالي ..
تخنك من تمر بية
مساهر بيها يومية
ابجي عالطفة ضية .. الليالي

ما يبرد دليلي ولا بطل نوحي
ما اكدر اكابر كثرن اجروحي
روحي فاطمة لكن مشت روحي

شخلة فركاج .. بس جروحي .. وانتي روحي .. مني راحت
كلشي غالي .. وياليالي
مني راحت

______________(3)

اشهك بالنفس حسرات تلجم صدري وتخنكة
ابد ما تبرد الجمرات وابد ما تبرد الحركة

اعاني ..
بية الجمرة ما تبرد
حيلي منالبواجي انهد
عالراح وابد ما رد .. اعاني

لو تدرين بية امصابج شسوة
كوة امشي والمن حيلي بالكوة
زهرة روحي انتي وللكلب سلوة

لمن اشتاك .. بسكتة ابجي .. المن احجي .. مني راحت
هية كلشي .. وسفة تمشي
مني راحت

______________(4)

ما خلة الحنين اعليج لوعة بروحي ماتهدة
اقنع روحي بحجايات هو الراح شيردة

شكابر
اشد اجروح واتصبر
تجي مرات ما اكدر
جرحج اكبر واكبر .. شكابر

شخلت روحي فاطم بعدج اشخلت
من بعدج غريبة ارويحتي وسلت
تخنكني عليج هواية اذا حنت

بيه لهفات .. ماتجينة .. يا حنينة .. مني راحت
شوفي حالي .. نوحي عالي
مني راحت

______________(5)

باقي بخاطري المكسور ياهو الخاطري ايجبرة
ابد ما حسبت وياج تخلص تنتهي العشرة

واتاني ..
رجعي فاطمة رجع
شوفي حالتي اوضعي
بجفج نشفي دمعي .. اتاني

لو انتي تجيني ويخمد ونيني
واذا ما جيتي يمج فاطم اخذيني
ما اكدر بدونج وانتي تدريني

حالي يا حال .. بس عبرتي .. يا زهرتي .. مني راحت
وبهيامي .. بس كلامي
مني راحت


_______________________

محمد ابو باقر الحجي

سلام .. من فاطمة العباس وصلولة
سلام .. لبني وحبيبي الكافل احجولة
سلام .. وصلو الخبر .. لبني الكمر
مشتاكة ابوس اجفوفة كلولة

_________(1)

يبو فاضل .. يالكافل
يا ابن الوفية
يعيوني الزجية
شوك بعيني يتنطر عيونك

يبو الغيرة .. الجبيرة
سلامي الكل حروفك
اجي المهدك وشوفك
وشد بيدي علك يمة بزنودك

وهز مهدك واسولفلك يوفاي
يخيمة زينب انت والها الفياي
يالحروفك ندة يالشوفتك ماي

حيدرة موصيتة بيك
للمهد لمن يجيك
ايقبلك كتلة منديك
انتة غالي

خيطت بيدي لواك
ما يرف الة بهواك
ماكو اي واحد سواك
ايرفعة عالي

ما يرهم فقط بيديك
منالزهرة ويلوك عليك
مفصل عالشهامة البيك
لحد ما تنكطع جفيك

هيام .. وي السلام ابعثلك احجاية
هيام .. عباس بيدك تحلة هالراية
هيام .. يم النهر .. لبني الكمر
مشتاكة ابوس اجفوفة كلولة

_________(2)

خدر بنتي .. وعايلتي
اوصيك بوصيتي
يا عامود بيتي
زينب روحها وروحك سوية

يخيمتها .. يرايتها
صاير كلشي الها
كافلها وخدرها
متفاركم الة الغاضرية

لون رايد تروح وصار الوداع
بهيدة بخطوتك لا تمشي بساع
تباوع زينب الاثار عالكاع

تنظر الخطوة بالم
تبتعد عن الخيم
الحيل رايح انهدم
صار طايح

صوفرت وجه الخيام
نظرن الظهر الامام
غصن بنص الكلام
وين رايح

تدري بروحت متعود
من مشيتك من الجود
الكسرة بالخايم شهود
يطيحن وانت ما موجود

تروح .. عنها تروح وهاي الجبيرة
تروح .. من ديرة زينب تمشي الديرة
تروح .. ويبدي القهر .. لبني الكمر
مشتاكة ابوس اجفوفة كلولة

__________(3)

لبو الاكبر اخو واكثر
روحة وعمرة انتة
بظهرة وكافل اختة
ترة حسين السفينة وانت الشراع

بطف احضر ما اكدر
اشوفن حمرة العيون
تشابكتو متحجون
كلش مؤلمة لحظات الوداع

من تمشي وتعوفة وعنة تبعد
يضل بين الخيام ايروح ويرد
تصيح ادركني خوية ويركض ايهد

يوصل الصوب النهر
ايرد يوكف ماكدر
الظهر منة انكسر
نوحة عالي

منحني يرجع كسير
بوجهة يتلفت يدير
الكسر كلش جبير
ظهرة خالي

ما يكدر ترة بدونك
ابد ما فارك عيونك
هو واختة يردونك
لكن غمضت اجفونك

ينوح .. راح لمكانك وكع الخيمة
ينوح .. صارت كعدتج زينب بهيمة
ينوح .. شخلة الدهر .. لبني الكمر
مشتاكة ابوس اجفوفة كلولة

_________(4)

يضربونك .. بعيونك
واركضلك وانادي
هذا ابني وفؤادي
واشوفن جسمك موذرينة كلة

وتعثر .. ما اكدر
لن اعثر واباوع
زنودك والاصابع
شلتهن بيدي والمدمع اهلة

وحك ضلعي وابوي وكل بنيني
اشيل اجفوفك بذني اديني
دين ام البنين اوفي ديني

باجر اكبال البشر
اني اطب وام الكمر
تمشي وياي بفخر
ام البنين

وارفع بايدي الجفوف
ترضة ياربي وتشوف
ايطيحن بارض الطفوف
ذني الثنين

من ارفع قميص حسين
ارفع بيدي هم جفين
يالوفيت دين بدين
اطلع بيدي سهم العين

وفاء .. منمك وفاء اواني اوفيلك
وفاء .. سهمك اوخرة وخل تكر عينك
وفاء .. وبكل فخر .. لبني الكمر
مشتاكة ابوس اجفوفة كلولة

__________(5)

والراية متجاية
يم صوب الشريعة
تضل يمك وديعة
يمك هل الامانة تبقة عباس

مو تدري المهدي
من يظهر يجيها
متعني عليها
وترف بيدة عالي تشوفها الناس

يرفعها بجفوفة صاحب الثار
وترف ابديه اكبال الانظار
حار وبيدة شايل راية الحار

مثل عمة كلة حار
سيف يلهب بيدة نار
عيونة تجدح بيها ثار
منبو فاضل

يظهر وكلها تشوف
يوصل لارض الطفوف
وياخذ بثار الجفوف
غيض حامل

ياخذ ثارك وثاري
تبرد بالكلب ناري
وينشف كل دمع جاري
ونرد نلتم سوة بداري

نعيش .. وبداري ولدي تلتم بشيمة
نعيش .. لا يحترك لاباب لا خيمة
نعيش .. ماكو خطر .. لبني الكمر
مشتاكة ابوس اجفوفة كلولة


___________

محمد ابو باقر الحجي

تشابه البكاء على الامام الحسين (ع)
بين ام البنين (ع) والامام المهدي (عج)
كأني بام البنين (ع) تقول:
_______________ا



نفس الالم والدموع ... يجمعنة نفس الموضوع
اني والمهدي سوى ... بينة تجرح نينوى
نفس المعانات

___(1)

اندبك صباح ومسة بأنكساري
للمهدي هذا شعارة وشعاري
عليك الدمع من دمة عدنة جاري
وابد ما طفت لحظة نارة ويناري

بجي ونوح .. والم روح

ابجي وانوح اعليك والمدمع ادموم
والمهدي نفس الحال يبجيلة كل يوم
نارك .. نارك .. ما تطفة بينة وتنخمد .. نارك


ماتطفة نارك بينة ... تجوينة وتبجينة
كلبة وكليبي انجوة... بينة تجرح نينوى
نفس المعانات

___(2)

المهدي بيتة صفة بالصحاري
واني بغيابك صفت صحرة داري
ينوح اوحيد اودمع عينة جاري
ونوح بحجرتي ليالي ونهاري

على الراح .. الدمع طاح

بالغربة وحدة اينوح المهدي مخنوك
وابجي بحجرتي عليك والكلب محروك
نبجي .. نبجي .. وحدنة بالغربة الك .. نبجي


هو اليحب وحدة ينوح ... محد يفهمة المجروح
والفكدناهم دوة ... بينة تجرح نينوى
نفس المعانات

___(3)

يصوتك نسمعة وحك جدي عطشان
نشوغ بالمنة على اجمل انسان
جبت ماي الغرفتك لجن خالي المچان
ويم كبرك ابنك بدية ماي يذبلان

بلا ماي .. يوفاي

للغرفة اجيب الماي واكعد واتانيك
ويم كبرك ابنك راح رايد يرويك
محروم .. محروم .. انت العذب من العذب .. محروم


اكعد واعاتب بالماي ... والمهدي يعتب وياي
جي دليلك ما روى ... بينة تجرح نينوى
نفس المعانات

___(4)

ادور على اليبجي لجلك يغالي
منو اليبجي لحسين اعيد بسؤالي
ينوح ابنك المهدي وبصوتة عالي
الا من جزوع اعلة جدي وعيالي

سوة انصيح .. لمة انطيح

اسأل وادور وين اليبجي على حسين
المهدي يدوور اوياي وين الجزع وين
وينة .. وينة .. اندور على اليبجي الك .. وينة


وين الي يبجي ومفجوع ... ماتنشف بعينة دموع
وين اليواسينة ترى ... بينة تجرح نينوى
نفس المعانات

___(5)

انه وابنك المهدي يجمعنة موضوع
التقينة بحجينة وبجينة والدموع
يندبك يجدي بحزن صوتة موجوع
وانه منالبواجي صفة كلبي مشلوع

اجتي .. منيتي

راح اغمض اني العين وتهود الروح
بس يبقة مهدي عليك بالغربة وينوح
وحدة .. وحدة .. بالغربة يبجي المنتظر .. وحدة


وبوحدة ضل الموعود ... ولا واحد ويا موجود
كوة يشتم الهوى ... بينة تجرح نينوى
نفس المعانات

______________

محمد ابو باقر الحجي

جذب تاريخهم بس انت اول
علي تنصيبك امن الباري انزل
ما ساجد للاصنام
بجفك صار الاسلام
جذب تاريخهم بس انت اول

_____(1)

منزل راسهم كل الي عادوك
لان انت الصدك همة يكرهوك
دورو بالاصل كل اليبغضوك
وعرفو ليش همة ما يحبوك

علي انت المحك سموك الرجال
الما حبك اذا في نطفتة اشكال
ثبتت لجلة الايام
بجفك صار الاسلام
جذب تاريخهم بس انت اول

_____(2)

الينصبولك حقد ياداحي الباب
جي قاتل زلمهم هاي الاسباب
يالمبجيهم انت يا ابو تراب
يقالع روسهم من فوك الركاب

ابطال العرب يم شخصك اطيح
من لمضت فقارك تشرد تصيح
وترفع بيض الاعلام
بجفك صار الاسلام
جذب تاريخهم بس انت اول

_____(3)

بكثر ما حاربوك اكلوبهم سود
حقد مالة نهاية وما الة احدود
على منزلتك انتة هواي محسود
يكرهونك لان بالكعبة مولود

يتربات النبي ونعم الي رباك
اخو ليه او وزيرة الله خلاك
ومنك نسل الاكرام
بجفك صار الاسلام
جذب تاريخهم بس انت اول

_____(4)

شكثر ضموك لكن مايكدرون
نورك كالشمس لا ما يحجبون
بيك شما حجو وشما يطعنون
بشخصك سيدي لا ما يغيرون

شكثر ما حاولو ما يحجبونك
ويأبى الله أن لا يطفة نورك
للحق يا علي اوسام
بجفك صار الاسلام
جذب تاريخهم بس انت اول

_____(5)

خل يسمعها مني الماسمع زين
عالحاجب ابد ماتعلة اي عين
اذا بس انت اول يا ابو حسين
موش الي اجو للدين بعدين

الخلافة تلوك الك مو ياهو الجان
مو للتالي اجو عباد الاوثان
رادت مثلك ازلام
بجفك صار الاسلام
جذب تاريخهم بس انت اول

_____(6)

شما نصبو عداء اهل السقيفة
غصب عنهم تضل انت الخليفة
يحبل الله المتين الما نعيفة
عشكك سيدي مالة وصيفة

الما حبك علي بالمحشر شلون
من ايشوف بس ربعك يعبرون
ربعك فقرة وايتام
بجفك صار الاسلام
جذب تاريخهم بس انت اول

_____________

الخادم محمد ابو باقر الحجي

امام المتقين
شفيع المذنبين
امير المؤمنين

___(1)

يا عشك عاش بدليلي بلون صافي
امي لولتلي اعلة اسمك صوت دافي
كافي كالولي العشك غاليت كافي
لا وحكة شما اعشكة ما اوافي

هو الحصن اليقين
هو النور المبين
امير المؤمنين

___(2)

منالطفولة وعايش بحبة وهيامة
كلشي يبرد بية بس يبقة غرامة
شوكي حافر عالكلب اسمة علامة
لا ابد ميزول الى يوم القيامة

هو الكهف الامين
هو الكف الحنين
امير المؤمنين

___(3)

بالدليل القاطع احجي وبالرواية
الما عرف يقرة علي ما قاري اية
اهدنة الصراط چا شنهي الهداية
الما عرف معناها طايح بالنهاية

السراط المستقيم
هو الحبل المتين
امير المؤمنين

___(4)

والدي وحرزي واميري وكلشي هوة
الدنيا لو ضاكت علية هوة سلوة
عمري اذا مابي علي عمري ميسوة
اني مخلوق العلي چا هية كوة

حبيب العاشقين
دليل التائهين
امير المؤمنين

___(5)

هو كعبت ديني لو انوي الصلاتي
لوما حيدر مني چا ضاعت حياتي
بغير حبة الربي اني شنهو اتي
الفضل لله بحيدرة صارت نجاتي

هوالحق اليقين
ملاذ الخائفين
امير المؤمنين

___(6)

هذا عشكي منالطفولة وهذا وضعة
امي غذتني بمحبتة رضعة رضعة
والدي بس بي يسولف جنت اسمعة
صار يضوي حيدر ابكل دربي شمعة

مجيب السائلين
شفيع العالمين
امير المؤمنين


______________

محمد ابو باقر الحجي