Тага весть ванца, петьса кой-коста и нолдаса

Мзярда нолдасак, ёрат азомс «пацаны, я такой прикол придумал…»😁

Сёрмадыне тундаста, юкстайне сонь))
Тя фэнтези..

Суват мельганза?

Сембось, мезть колга меколи луват,
Ашель эряфса, фантастикакс лувсак.
Но сембе потмоёжатне и оцю мяльсь
Ульсть тячиень шиса, повсть авторть кядьс.

И, кода эрь азксса, ушедови сетьмоста:
Эряй масторса од цёра, тячиень шись.
Прябаланза улихть, но эряй павазуста,
Лажнай, мес кельгомафтома моли киц.

Тевсь моли минцень модамасторсонк,
Тяса сембось содаф, эряй ётксонк.
Но нинге ашесть панжев ёткне,
А пялонк ашесть сува аф учсеф конакт.

Весть, кода фалу уленди, цёрась интернетса,
Ётафтсы ётпингонц, ваймай семботь эзда.
И сась аф содаф стирть эзда сёрма,
И тя пингть сельмонза куцсть коняс.

Корхнесть, ушедсь содавома мархтонза.
Стирь да стирь, но пяк сувай ваймозонза.
И цебярь ули эсонза, ули мезенкса шнамс,
И цёративок ульсь мезьса теенза сувамс.

А корхнема синь ашесть лотка,
Фкя-фкянди синь пяк тусть мяльс,
Но мяльсна моли, хуш пара корхтамс,
А васедемс синь пингса сась.

Пингть и вастть курокста кочказь,
Васедсть, ашкордасть, ламос ащесть.
И кядьта молезь сембе ошть шарозь,
А куду явомста синь ляпоняста паласть.

И ётась тяфта марнек тялонь ковсь.
Теест пара, но цёрать ваймоса аф пяшксе.
Кати-мезе стирть потмосонза кяшендсь,
И тоста мезе-мезе лия пряс повсь.

Пассиясь аф сембонь лаца вяти пря,
Максси эрь шиня серьгятьфти кизефкст.
И вов, пшкяди цёрати стирнясь,
Ёрай мезевок азомс сельмоста сельмос.

Апак арьсек од цёрась тусь инжикс,
Пачкодсь, сувась и ся пингть эводсь.
Оцтерец лия, марнек равжа сельмот,
Лофтана ронга, ащи ловажань шине.

Корхтай: «ётак ширезон, сувак порталу!
Тя масторть кельгомацень мархта катк.
Павазце ули тоса, тейть пара кармай фалу,
Ваймоцень сявса, аньцек ваксозон матт.»

И кой-мезе геройть пряса лятфтавсь,
Кле галактикаса лама модамасторхт,
И аф кунара, сембе кенкшне панжевсть,
И тостонь инжихне салатядязь мархтост.

А омба ширеса вргятихнень койсна лият,
Тяса кельгсазь Шкайть, тоса – шяйтанть.
Мезе теенк ули цебярь – теест сюдуши.
Тяса кулат, кда ётат тоза пефтома шис.

А эряфсна лия, тоса мялезт туй,
Но тястонь пара койхнень юкстасайть.
Но цёрать ашель мялец – лиякс касфтозь,
Идеалонзон аф мисы, козовок аф туй.

Терди эсонза шяйтанонь авась,
Аф ломанень вайгяльса эняльди ётамс.
А цёрась пани, ёрай мезьсовок сонь матрамс.
И ушедозе озксть, авась парай ёфси.

Геройсь азозе мекольце валонц,
И мялец сонь эсь вастсонза илядомс.
Лоткась од стирец, ушедсь шуваркс срадомс,
А пяльксонзон порталу вармась кандсы.

Илядсь сон ськамонза, ризназевсь.
Тага шава потмоц, но кой-мезе эсонза илядсь.
Мзярда паласть, оцтерец потмозонза нолдась яд.
Сяс и потмосонза сембось каладсь.

Тяни теенза аф эряви лия,
Шяйтан-авать кодяма веши стирня.
Эряви стамка, кона седисонза лядсь,
Но стама, кона модамасторсонза шачсь.

Ну, мезе азомс.. приватонь корхтамаса азондса, мезе тоса путф))

Эряфоньберьф од.

Тейне симоволь иневедсь, арандялярень эряфса лиякс,
Эряфоньберьф одкс,
Эряфоньберьф иредьфкс.

Арандялярень ляйкс, улелень шобда ведькс,
Эряфоньберьф одкс,
Эряфоньберьф иредьфкс.

Арандялярень кевбандокс, но тяни аф мон,
Кати-кие ирецта,
Кати-кие од.

Ёрай арамс ляйкс, улемс шобда ведекс,
Эряфоньберьф од,
Эряфоньберьф иредьф.

Ётафтонь фкя кой-кодама содаф мор
Рифмась лиссь колаф
Улема, тиемс мокшень кавер морть лангс?

Аф содаса, мезьса тяфта педсь ваймозон морсь.
Но морть мелодияц, лирикац вятихть эсон арьсемс.
Мон – уды гигантан. Эсон ули оцю потенциал. Но мезевок аф тиян, апатиясь и кальдяв мяльхне сяськондсамазь. Якан ошева, мезевок няян и арьсян «мон тиелень лиякс», «а тянь полафтолине», «кальдявста ащи, петелине лиякс»
И, сай пингсь, мзярда вастозон сай кивок лия(улема), мзярда тяфтак семботь кадса.

А мон аф кадса тяфтак. Карман тюрема.)
Но аф тячи. Тячи лия прябалане и тевне. Ваймамска эряви, кочкамс вийхть.
Нинге одан и карман ламос ванфтома эсь прязень. А алкогольда аф симан. Раман Red Bull, тиян тев да молян мадан.

Тячи казине эсь валморонень кельгома кураторозти университетста. Сон кунара учсь эздон, анась автографовок, ёрай лятфнемс, кодама ульсь студентоц.
И печатлань 7 валморотнень, тонатнень, конат мольсть фкя-фкянь мельгя. Казень аф аньцек валморот, а тага, эряфозень пяльксонц.
А фкя вастса кадонь «Кельгома мархта, Илья!»

Лия эряф

Тя кудса мзярда-бди учсесть конакт,
А тячи азорсь апак учсек али кулось коса.
Учсень лямбе киза, од панар кодань,
Аньцек ловнясь нинге ашезь сола.

Футболонь паксяса касы кумбарав,
А трибунаса водкада симихть.
Илада меле кунара сценать урядазь,
Вастозонза мезевок аф тиихть.

Куросон сембонь васьфнезь кшиса-салса,
Кулхцондонь кайги морот эзем лангса.
Лятфнесайне лямбе пинкнень прясон,
Мзярда ни ворьгодян тяста?

Кулень, кода кенярдсть, сотневсть кяльхть,
Тяни кулян, кода пяшкодыхть и сотнихть.
Вальмава няендень кувака кальхть,
Сембонь прафнезь, пенгакс молихть.

Васта ашень полафта, а сембось полафтсь.
Аф революция, аф кризис, аньцек пинге.
Козовок ашень яка, а сембось ётась,
Вдь тяфта улендсь тиньге?

Кати мзярда сельмоне палсть мезе-мезе сёрмадомс. А тячи сёрмадан аньцек тнярда, мзярда арьсян, сай мезе-мезе прязон. Тнярда пряботмоса сембе мяльнень тарксине, аньцек и вешень кодамовок валхт валморос.

Надиян, аф эльбятькшнян, кати-мзярда интервьюса али коса мярьгонь пеедезь: «мзярдовок аф кадса тя тевть». Тячи тяфта аф корхтан. Потмосон ули вий, кона аф максы тейне лоткамс. Содасасть, ломанць шавф, тапсеф, стакаста таргави ваймоц, но таргави!

Кие лувондсы валморонень, няйсы, кода монць полафтонь, колма кизот ни интернетса нолнян мезе-мезе. Ушедонь лиезь, сельмоне палсть, эсон содай сяда лама ломань эрь шиня. А тячи лия тематикась, мяльхне, ломаньда кржа варжаксты валморонень лангс.

Аф тянкса сёрмадан. Мезсь ашезь полафтов? Философиязе. Валмороне аф медиать колга. Тя мон корхтан сембонь мархта. А кие кульсы – ся кульсы

Пинкне полафтовихть? Мезевок аф азан, няйсасть тинць)

You really read this, are you serious??

А, улема, тя сембось он?
Мон сргозян щаскиге. Тейне 17, якан школав. Сембось сетьме…
А мон аньцек ушедонь няфтема пря интернетса, а инголе – зрнянь пантт, валда и сетьме эряф.

Сёрмадан и кулхцондан мор суоминь кяльса. Мяляфтса, кулхцондыне ся пингста, мзярда аноклань экзаметтненди. А тага, покоди ВПН-ць телефонцон, тнярда тянь колга ашень куле)

Мяльне шарсть тона пингти. А вдь, сембось молендяряль лия кигя. Мелавонь эффектть содасасть?

Косолень тячи? Месенделень тячи? Мезе улель мархтон? А шисолень?

Арьсян тянь колга, мезе учендонь. Кой-мезе ули, а кой-мезе аш, пяк аф сатни.

Сюкпря Шкайти сембонкса, кда моли тяфта, лисенди, тяфта и эряви.

Сетьме ве. Ашкордань. Илья.

А вдь тя кизефксть макссине эстейне 3 пингста
1) мзярда сатонь аф кржа сатфкста
2) мзярда ванан семботь лангс, мезе тиендеви масторлангса
3) мзярда кальдяв

Но меквалсь семботи ульсь фкя: тяфта эряви! Тяфтама кись!

Тячи вайбозе тяфтама

Сёксе вдь..

Тячи аф маятаманень колга. Тячи азондан кяльть да ломаттнень колга, конат эздонк ичкозет, аньцек эрямопингсна, эряфсна малат теенк, мокшетненди.

Бретононь кяль, васьфневи Бретань регионца, шивалгома ширень Кранцмасторса(France)🇫🇷
Кяльсна канневи Кельтонь тналти. Вага кода, лия кельттне, кода шотланттне, ирланттне, валлийхне, корнатне (ульсь тага мэнонь кяль, кулось ётай сядокизоста) эряйхть Бритонь цёнгатнень лангса, а бретононь ломаттне шаштовсть кунара Кранцонь мастору. Лятфтасть мокшетнень, минь вдь аф Мокша ляйть ширеса эвондаме, а кяленьке састь Кевть(Уралть) ширеста.

Мольхтяма сяда тов. Кранцмасторонь паспортсь мярьги сембонди: тон кранцонь ломанят, тон – Людовиконь, Наполеононь, Эйфелень, Шанелень, Гюгонь, Монень, Кюринь да лиятнень оцю юромснон эса поладыят. Аф ваномок, кият тон, афкуксонь кранцузат, Марокконь али Алжиронь эмигрантат, равжа ломанят али БРЕТОНАТ, тон – кранцузат. Лия ширеста, кранцонь ломаттне няйсазь бретоттнень, кода рдазу, шава, «вирень» ломанькс. Лятфатсть эсь прянтень, теентьке вдь мярьгихть рузонь ломанькс паспортонь коряс, а сяка рузонь ломаттне лангозонк лиякс ваныхть, кой-коста дискриминация мархта, тяда васькафне, васьфнеде. (Кодамовок кальдяв мяль да сепаратизма аш, аньцек фактат.)

Кати-мзярда Бретань ульсь кирдемасторкс, мзярс ашезь пачкотькшне кранцонь коронась. Миньге тяфта ульсь, Пурешень пингста, кепотьксонди.

Тага. Хуш бретононь ломаньда кржа, а диалекттнень колга аф мярьгат стане. Эрь Бретанень аймакса ули сонцень дилаект, пцтай кода минь, Мордовияса да Равань ширеса. Синьге ули тяфта, мзярда аф шарьхкодсак ялгацень шабрань аймакста. Монга тя пингс аф пяк лац шарьхкодса ару Зубунь корхтамать.))

Еуроняемань моронь пялькстомаса 2022 кизоня Кранцмасторть няфтезе группась, кона моразе марнек морть шачема кяльса. Лемоц – Fulenn. Ванан, кенярдян: катк юромсь емла, аньцек виец оцю.

Мокшетне тяфтапт: кда няйхтяма мезе, мольхтяма инксонза, тихтяма станя, кода эряви, да кода ёратама, кивок аф шоряй теенк. Бретоттненьге тяфтама ули, тянди лемге макссть – Doare. Кранцмасторса содасазь, ня ломаттненди мезевок аф шоряй, кда мезе-мезе срхкасть тиемс. Кода мала теенк, кодама содавикс факт.☺️

Валмороть атмосферац тя пара морть лаца