Прязон кой-мезе повсь. Ёран сёрмадомс валмора, конань лувсак, арьсят, бта кельгомать колга, смузьс коре ладяй, но тя аф кельгомать колга, тяфта и лемдьсаськ. А кельгомань темась тоса ащи аньцек маскакс. А мезень колга тоса, катк иляды секретокс, темась тага стака. Учеда🤌🏻

Тага гениень мяльхть сашендыхть ветеня.
~90% валморонень эзда шачсть, мзярда менельса валдоптсь ковсь.

Аф ламня тага.
А монь тага лайв-каналозе ули. Сонга вятеви мокшекс(ну аф рузонь мон ломанян, хуш шавомак)
Тоса аф оцю контент эряфстон. Курок ушедан сяда сидеста мезевок нолнема тоза

https://www.tg-me.com/+bcBo31aNmSUyMGE6

Аф кельгомать колга.

Тяни, кода фалу, аф ули.
Тага эсот вешендян.
Аварьдезь анан, кивок аф кули,
Сяда тов трнатозь вешендян.

Ётнян инксот ошт и вирьхть,
Шумбрашизе аф сатни.
Мзяра ласьконь стака кит,
Штоба цебярь кить сатомс.

Аньцек ватт, мезе мархтон тиеть,
Семботь максса, мезе ули.
Няйсак, кунара ёньцта лисень,
Тянь инкса, штоба пара улель.

Шавомак, саты фкя секунда,
Шавондат эсон ни мзяра кизот.
Аф максат аф стямс, аф удомс,
Аф лоткамс тюремс инксот.

Ёран лоткамс, но седизе анай.
Тоньфтемот тотнай, мархтот курок лоткай.
Потмозон кунара кивок аф ваны,
Ши эсот кельган, илядсь нинге кота.

Аф кельгомать колга, и аф колган.
Тяфтамть мархта лама кие васетькшнесь.

Надиямать сюролдац.

Вирьгучкава, ловга, келендян,
Вакскан ащихть кувака шуфтт.
Вирьста лисема кунара вешендян,
Эсон учи лямбе шачема куд.

Мзярда мекольцеда ярхцань?
Тя ульсь колмочес.
Но улихть вийне молемс, якамс,
Надиямась максы топодемс.

Перьфпяле шобда туста вирь,
Ловсь кунара валязе кить.
Пелемазевок юмась,
Мзярда вири пильгоне састь.

И вов лиссь учсеф шинясь,
Котькофтсы шалхкозень сюролдац.
Макссь тейне лама од вийхть,
Лямбоняста валдоптсы кить.

Ши валгома шири ласькозь лисян,
А туста вирьста педа-пес юман.
Стака ки ётань, а нинге шисан.
Эсон вяти надиямань сюролда.

Ляйхне солайхть.

Крвязень. Пяк палы конязе,
Тяк токсе – кядцень пидесак.
Кивок аф эряви, мзярс нинге шисан,
Кати-кие потмозень токазе.

Кати-коза кандсамань шада ведсь,
Тейне аф кельме, кодавок аф ваян.
Прясон аньцек ащи мяльсь:
Коза и мзярда тяфта уезь саян?

Пильгалон лов, а ушеса пяк пси.
Пелес штадан, но тейне кельме.
Менельса палы мани шись,
Частоне няфтихть ве, ащан кепе.

И сембось курокста юмась,
Ащан веляда эсь вастсон,
Прязе стака мяльхть кундась,
А катонязе уды вакссон.

Трване сенемгодыхть,
Сельмоне коневихть.
Ламбама онне пиндолдыхть,
А седизе аф колави.

Валмора, конань сёрмадыне оцю температураса.
Ванфтость эсь прянтень

Кельгома куломати.(18+)

Кудсонк тячи пешкодомат, жалнамат,
Кияксть лангса лазонтф кядьгонят.
Шабратне кунара ламбамняста удыхть,
А минь пеляскодоме, кафта сюдуфт.

Коса тага юмсеть ётай веня?
Мельгат пинекс ласькондень шиньберьф.
Кинь мархта улеть ётай веня?
Саты теенк полафнемс кизоньберьф.

Фкясь омбоцети сельмос пееди,
Омбоцесь – кяжиста сюци.
Тага пинге, и кенярди,
Мзярда каршек ащись кулы.

Стака валхт, кепотть кятть,
Пикссеф ронга, кальдяв мяльхть.
Тя кельгома? Фкя-фкянь кельгтама,
Кельгсаськ фкя-фкянь эса шавома.

Мезе ащат? Сотнить кяднень,
Синь ёрайхть эсот пондамс.
Ёран тумс, кальдяфт мяльне –
Синь сембот аньцек колгат.

Кизоньберьф симондить верозень,
Тячи сон шуди кядьган.
Мархтот эрямс – оцю пелемазе,
Аф содан, мезе тият мархтон.

Исяконь шицень колга тяни содан,
Аф эряволь тейть куду мрдамс.
Азк, мзярдовок арьсеть колган?
А тяни… Эздон ласьк.

Историясь и ломаттне арьсефт
Сёрмадонь кальдяв кельгомать колга. Кода тоса корхтайхть, абьюз, ред флаг да стак тов

Ялгат, эсон шави вдохновениясь, кармай анонс.
Курок нолдан валмора, конань лемоц «лажадома», илядсь шумордамс и нолдамс😋

Да, сон тага кармай депрессивнайкс💀

Лажадома

Кода фалу, ськамон илядонь.
Аш кинди тага азомс вал.
Тячи аф сатни, исяк кадонь.
Тейне эряви эздот хуш фкя вал.

Кодавок аф кеман, што эздон туть,
Тейне сяряди, мес кадыхтень.
Надиян, моньфтемонь паваз муть.
А кати-мзярда кядьта вятихте.

Ульсь пара, мзярда пеедеть,
Сельмоне солсесть инголет,
Моньцке пяк кенярдень,
Мзярда вакссолеть.

Няйхте аньцек фотографияса,
Тосовок пеедят, но аф тейне.
Мяляфтсак, улень депрессияса?
Тоста таргсемазь кяттне.

Тяни ськамон сргозкшнян.
Кода тяфта эрямс, юкстань.
Кудозе кунара вайгяльцень юкстазе,
Сон илядсь аньцек прясон.

Эрь шиня надиян, кле тя аньцек он,
Надиян сргоземс, вакссон няемс тонь,
Няемс кода лямбозень мархта удат,
А меколи паласамак, мзярда сргозят.

Кунара номерце тейне юкстаф,
Аш кинди ветеня азомс вал,
Мзярда паникась эсон кундай.
Аньцек ляпе вайгяльцень учса.

Тяни тон аф вакссон.
Да мзярдовок аф улят.
Лажадонь, аф юкстан.
Аньцек лятфнемане мархтон.

Лемтьф сембонди, кие лажаткшни. Лажадонь и монга, но эряви молемс инголи, кода афоль сатне кивок

Ламос ашень азонда эрзяфозень колга.
Моли сёксеть омбоце ковоц, а мон вельхкскять ала кяшень сембонь эзда шобда уженясон.

Тинь лувондость валморонень, няйхтяда негатив, няйсасть, кода од цёрась ётнесы од кризиснень. А аф кунара ульсь лия кризис, сяда стака. Киза ни ётась))
Тнярда явонь стирня мархта, эхи кальдяволь, а сон нинге ёрась тейне мрдамс, тиендсь сяда кальдяв, но ашезь кема, кле лямбе седи Илюшкась примасы меки. Сяда тов тундаста вешевсь од паваз, ноооо… сембе цебярсь фалу шумордави.

Тя пингста киньге эзда аф тушендан. А кие эряви? Мон кизонда ваймань ~1 тарга. Сессия, практика, покодема васта, ошень тефт.

Мзярда шумордайне сессиять да практикать(а шумордайне вай кода лац), арьсень, 3-це курсста кармай сяда пара.

Мезе тячи? Машнефти предметт, 5 экзаметт, курсонь покодема машнефти препод мархта, кальдяв расписания, конань мархта ковга аф кенерян. Покодемать сави ёрдамс сай кизоти(надиян)

Вакссон кивок аш. Кивок аф машнефти, но кивок аф корхтай, кодама питниян од цёракс. Ласькондян тоза-тяза, тиян тефт, ваймосян. Арьсян, эряви мезевок тянь мархта тиемс.

А мезе тага. Лиякс маряса прязень. Тяда инголе фалу улень меланхоликокс. Палсь сембе потмозе, аш мялезе мезевок тиемс. Содалесть, мзяроксть ёрань кадомс эсь тевозень. Ульсь валморонь сёрмады? Юкстасть.
Тячи лиякс. Кундань кати-кодама мания. Эвондасть вийхть, энергия. Но мезьса тя кальдяв: прясон фкя секундаса шачи 10-шка мяль, сембот ласькихть фкя-фкянь мельгя. Эвондай и агрессиясь, кати-мезе эсон машнефти. Аньцек паникась да аф тёждя мяльхне илядсть мархтон. А энергиязень аф содаса, ков тиемс.

Тячи ёрань кучемс тяза од валмора. Но идеясь кулось станявок курокста, кода и шачсь. Тячи мялезе корхтамс. Сюкпря сембонди, кие лувозе тя пакшти, кенярдян, кле улихть ломатть, кие мусь питне тевсон, эсон.
Илькась моли сяда инголи, вешема паваз да стак тов. Аньцек эстейне аф юмамс тозк.

Лама тяшкста лиссь, простямасть))

Ха-ха, тячи тага оцю текст. Пара илядьня.
Корхтатама тячи. Шобдава улень Светотехстройса. Ардан, валгонь аф эсь лоткама вастсон(эряволь ардомс тага фкя), илядыкс кить ётайне ялга. Молень, кулхцондонь музыка, козовок ашень эряскода. Ванондонь, кода моли эряфсь, ломаттне молихть тоза-тяза, синцень тевсна, прябаласна, эряфсна.
Молень, ульсь пара. Сёксе, сетьме ошень пялькс, тапсесайне сёксень праф лопанятнень, а вармась налхкси шяярьнень мархта. Ваймозе сетьме, ура. Ванондан ташта куттнень лангс, а ичкозде няевихть оттне, тюссоннетне.

И мезе арьсень. Эрятама Шистямаширень Европаса. Тя вастть токсезе кяжи коммунистонь идеологиясь. Но пинкне ётафт, шашттама сай пингти, Шивалгомширети, афкуксонь Европати. Сембось полафтови и моли инголи. Лятфтасаськ, кода полафтовсть Балтикань масторхне, конат арасть Европань пяльксокс. Польшась, кона советонь блокта меле ушедсь панжема, а пряошец – Варшавась, арась Европань Нью-Йоркокс. Румыниясь, кона панезе пине-диктаторть Чаушескуть, катк, аф козякодсь масторсь, но ушедсь панжема и эряй лац.

Ванан тянь лангс, ётафтонь параллельхть эсь мархтон. Катк тячи ламозе аш, ашень сата оцю сатфкст, эрян постсоветонь ширеса. Но сембось – кядьсон. Вийсон полафтомс семботь, молемс инголи. И тячиень эряфсь – мотивация. Лама ломаньда минь Европань пяльксстонк ёрасть кадомс ашу эряфть, полафтомс эсь эряфснон и шачема вастснон. Аньцек мяляфтода: сембе ломаттяма, сембе коса-бди шачеме. А молемс инголи эряви. Кда аф молят, менди тейть эрявихть пильгт?

Щаскиге тяфтама валмора нолдан…