Арьсян, пинге азондомс, мезе мархтон ульсь сёксенда и мес ламос юмсень..

Эряфонь контентта башка катк тяса улихть мяльне эряфозень колга да стак тов

Тячи кулхцондонь музыка, пяк сизефста ащень. Сань мяльти, бта од альбомсь - тя од эряфонь пялькс авторть тевса.

Ётафтонь параллельхть эсь валморонень мархта и тяфта явине эсь творчествазень:

№1 пялькссь - «Кить ушетксоц». Тяфтама лем мархта нолдань валмора.
Пингоц: 2021-ть пец — 2022-ть васенце пялец.
Няфтень пря, няфтине мяльнень эряфть колга, кись ушедсь.

Аф ламос юмань(пяле киза), ульсь стака пингозе: экзаметт, ётань эрямс од васту, университет да стак тов. Юмсень, аф сёрмадонь мезевок, ульсь вальме тевсон. Но сон ульсь эрявикс, штоба ушедоль …

… №2 пялькссь! Лемдьса - «Аськолкс инголи». Пингоц: 2022 кизоть пец – 2023 васенце пялец. Кодама ульсь пинге. Макссень интервьют радиоса, Теленяемаса(ТВ-са), «Мокша» журналса печатламазь. Тага няфтень пря, ушедонь содама од ломань мархта, мон панжень.

Сембе цебярсь, уленди, шумордави

№3 Пялькссь – «Меланхолия».
2023-ть омбоце пец – тячиень шись. Сёрмадан станявок, но…
Ушедсть прябалане, лама тефт, аф фалу кенярькшнян, сизьсан, оцтерезень мархта явонь. Сяс и мяльне аф кеняртьфтихть, бта ушедсь кати-кодама депрессия апатия мархта.

Но, сембось сяськови, инголе лама сави ётамс, и мон поладан молема эряфонь кигя.

Аф лама азондонь тянь колга лайв-каналсон
Тяни азондан сяда лама, курок нолдан тяса серия тона пингонь волморонень мархта, учеда)

Паваз

Кинди павазсь – тя кирдемс оцю ярмак,
А кинди – эрямс-ащемс, кельгомс.
Ломанть каршес уфай аера варма,
А сон павазу, тянди аньцек кенярдсь.

И катк срады лямбе оцю кудсь –
Вастозонза путтама кафта сяда одт.
Мезенди ризнамс, тулфталсь кодама ульсь?
Сёлгить сельмотнень – эсот учихть отт.

Ласькозь коволнятнень ланга, вярьгя лиян,
Сембе прябалатнень эзда курок туян.
Катк сатсамазь, но теест аф сяськован,
Няеви вдь – сембода павазуван.

Эрялянь тяфта, но аф вете кизоне,
Кати-мзярда дивандань лиемати,
А тячи лац тяфтамти тонадонь.
Тяни прамста тонафнян уемати.

Стака уленди эряфсь, но сон аньцек фкя,
Аф ламос тага эрян, кати-мзярда юман,
Косовок эздон аф кармай кодамовок куля,
Ульсь павазу цёра, а мес юмась?

[1/7]

И вов васенцесь тона периодста. Тяса нинге мяльхт-арьсемат, кальдявсь ашезь ушеда.
Тя валмороть лангса сембе оптимизмась серияса аделави…

Таколдома

Эрь шиня таколды седись,
Эрь шиня аньцек и анай лезкс.
Сон шава, эрь илядьня сярядсь,
Мзярда стакаста вайсень мяльс.

Озондан, сетьмоши учан.
Сярядян, пчкафтома вешан.
Ваймосян, мзярда нолдсамань,
Матодован, мзярда кадсамань.

Эсон тага пондай рефлексиясь.
Фалу арьсян: мезе тиень, мезе тиемс?
Тячи эрян, а ванды сргозян?
А ванды шиса мон улян?

Прань. И катк, мон курок стяян.
И синнеф пильгса поладан молемс.
Сокоргодонь, но лама мезе няян,
И мезть аф няйса – сяньге ёран няемс .

Лазф седись таколды кельгомс.
Ару ваймось ёрай эрямс.
Таколдан: катк перьфпяле кармай сетьме,
А потмосон катк арай лямбе.

[Мезе учан эряфть эзда? Катк сембось сетьми, катк юмай паникась эряфстон. Аф ськамон тяфтаман. Аф содасаськ мезе кармай ванды. Ломанць пели од телевизоровок рамамс, сяс мес аф содай мезевок. Кодама кармайхть питнетне? Эрявкстови сон? А вандысь хуш кармай? И тянь лангса лама мезе путови ломанень, организациянь, кирдемсторонь да модамасторонь эряфса. Пяк таколдан, штоба саль стама пинге, мзярда минь прястонк юмай тяфтама кизефкссь. (Илья, 2023 к.)]

[2/7]

Мельганза моли валморось серияста. Мяльхне колганза азфт песа. Тнярда арьсень тянь колга.

Меланхолия

Виить фтала ащи лафча ширец.
Азсы семботь, но тянди аф саты кялец.
Улема, виикс моньге ули кода лувомс,
Тейневок ули мезе эздот сёпомс.

Мезе ули потмосон - фалу ули тозк,
Но сяка ламоц лисенди ушешири.
Тя кода урма пингста лиси козсь.
А урмаськоды и лафчсь, и виись.

Тят гайфтя тейне, мон аф сявса.
Макст тейне эсь прязень мархта улемс.
Шава диалогть ёфси аф кельгса,
Мялязевок аш корхтамс да кулемс.

Мекольце мяльне толмаркс палыхть,
Мзярс ялгане апак шарьхкотть ваныхть.
Мезе дивандамс? Сембось ули лац.
Аньцек педа-пес паломс тейне макст.

Сидеста юкснян, кода пеедемс,
Лятфнян, кода мекольцеда рахсень.
Максан вал эсь прязти кярьмодемс,
Лятфак тянь, мзярда улят вакссон.

Циклась моли, ушеды – шумордай,
Мезсь аделавсь, ся курок мрдай.
Улема, тя сталмоть ичкози паньца,
Но оду сяда виикс васьфтса.

[3/7]

Мольхтяма сяда тов. Кода няеви, тонгонь сембе валморотненди эмоциянень, тянь мархта, кой-коста, кальдявста сувсесь строчкась. Меланхолиякс ули кода лемдемс сембе периодть, но лемдьса лиякс(курок азондса, кода)

Стасак седизень?

Кельмонь, аф эряви паламс монь,
Палсь седизе, тяни палонь монць.
Тяни кивок кядьта аф кирьдсамань.
И ушес эстейть аф лихтсамак.

Оржа салмокссь вятьсы мельганза сюреть.
Шарозь тоза-тяза семботь эса сотсь.
Тонга ёрат стамс, эсон аф ёрат кулемс,
Седизе аф стави, тя аф котф.

Мес тяни дивандат, кле аф станя?
Арьсят, стамс и кадомс ули тёждя?
И нинге эсот ёмла шабакс ваннят,
А монць содан эсот бта ниле тёжят.

Стамс – стасак, но смузь тяса аш.
Тя кода путомс куд, но кадомс потмонц.
Эрямс аш кода, и нинге няфтят кяжь,
Содак, ушеширесь аф няфтьсы потмоть.

Лоткак, семботь ётай пингса катк,
Кельгоманьке кунара ни юмась.
Тяк васькафне эсь пряцень, архт.
И монга эсь киган туян.

[4/7]

Вага и экваторсь ётаф, няйсаськ оцю туфталть.

Аутопсия.

Кядьсот скальпель, шразот велянь монць,
Панжемак. Ванк, мезе мархтон лиссь.
Прясон ни омбоце киза моли лов,
А верзанган шуди кельме ризф.

Пингсь ни ётась, илядсь аутопсиясь.
Няеви, мезе потмосон ульсь кяшф.
Эряви пчкамс, но мялезе аш.
Аф содань, кода азомс, бта дислексия.

Мес уленди мялезонк кяшемс
Тянь, мезсь фалу сяряди?
А мес сатама мяльти азомс,
Мзярда кулсетяма вачеда?

Таргак седизень – сон нинге тотнай.
Ванк, кодама сон арась колаф…
И путк вастозонза, коста сявить,
Шумордак тевть – семботь няить.

Диагнозсь путф, но кунара ётась пингсь.
Пчкафтсамак?
Топодсь мекольце стадиясь.

[5/7]

Аутопси́я(гр.) – кулоф ломанть ронгонц печкомац-панжемац, потмонь оргаттнень ваномасна, кона эряви куломань туфталть содаманцты тонафтомань(наукань) цельса

Валмороса тя процессь няфтьф кода ломанть менталонь прябаланзон азондомасна. Сон кунара повсь депрессияс (тяфта азомс, кулось). А мала ломанць, кона корхтай мархтонза, панчсесы, ёрай содамс, мезе мархтонза лиссь

А кунара ушедонь эсь колган корхтама, кода лия ломанть колга лия шамаса?

Идемэвосне

Сянгяря сельмоне арасть якстерькс.
Сюкпря, мес тя веня мархтон корхтать.
Панжине потмозень, сяс мес улят ялгакс,
Но аньцек няфтень, аф ёран нолдамс.

Тага якстерь китьксне архтозь ронгозень,
Тага прязон эцесть кяжи идемэвосне.
Кода стака афоль уле, аф максан пря,
Кода сяряди афоль уле, аф сязян пря.

Аф юкстаса, кода веньберьф ашень уда.
Сембот сргозихть – од ши ули тячи.
А сельминголен исяконнесь апак аделак.
Оду шарьхкотть, мес аф удысь най кяжи.

Ковгярьксса тага полафтовсь датась,
Тага фкя лувкссь эряфса полафтсь.
Онцта тунь – кяжи кельмоса ваянь,
Кальдявста маряса прязень, потмозе колавсь.

Кельгомась стакаль, тяни пост-кельгома,
Васенцесь лазомань, савсь тейне тумс,
Тяни омбоцеть эзда вешан ворьгодема.
Мзяра мон ётань, кода павазть мумс?

Идемэвосне пряса, вятихть кальдяв кигя,
Мархтост сяськан шобдаваста вес.
Кда молян мархтост – шиса аф улян,
Венептезь кядсьнон – сельган тя кядьс.


[Прязень тя пингс а аф пяк лац маряса. Бта кати-мезе мархтон аф станя. Мон вии, кеме ломанян, но уленди стака, пяк стака. Сизсян, сембозе потмосон колави, нинге прябалатне путневихть.
Да, содаса, сай прязт мяль, кле мон кати-мезе аноклань ламос, а лисенди, кле мянцеван, анан ужяльдема. Аф, ёфси аф. Да, тя валморонь кочкафкссь няфтьсы мезе мархтон улендсь сявф эряфонь периодсон.
Но, тянь мархта кеподян оцю прябала. Сембе минь сярятьф мархта. Мезе ёран азомс: тясть кадонда станяк тя семботь, и тяряфтеда няемс, кода марясы эсь прянц ялгаце, дуганняце, од стирьце, тядяце, семботне. Кда ломаттне кармайхть най тянь колга мяляфтома — аралави аф фкя эряф.(Илья, 2023 к.)]

[6/7]

Тянь колга, мзярда сембось кальдяв, а прязт эцихть стака мяльхть, тяни сашендови сяськомс и синь каршезост

Пинге нолдамс финалть
Удалась цёрати лисемс тоста али сёлговсь и мзярдовок аф панжеви?

Кулотама лия шиста.

Шобдава. Лямбе васта, 7 частт.
Стянь, штань, тевонь тиема тунь.
Катонязе илядсь, кадозь апак ватт –
Тяфта, ялгай, тага эсон учт.

И вов мрдан да срадан вастозон,
Прязень эса порихть стака мяльхть,
Кивок варжакстолендяряль лангозон,
Кода ломанць нинге ашезь прафта кятть.

Лоткафтыне телефонтть, прдайне,
Тят гайфте, эсон аф эряви машнемс.
Потмосон сембось палы, максода ваймамс,
Штоба кочкамс вийхть и сталмот ётнемс.

Ётаськ стака кельгомать, савсь явомс,
А меколи шавондоськ эсь пряньконь.
Ставсь седись, потмоть савсь панжемс,
Эряфсь моли, кеподеськ пряньконь.

Вайсень аф весть, но маштан уемс,
Ётань аф кржа, но ашень ана кядь.
Пилене пандовсть, но удалась кулемс,
Што эряфоньке минь аньцек фкя.

Сембе.
[7/7]

И цёрась лиссь адста! Да, ульсь стака пингсь, пцтай киза ётась..
Сюкпря сембонди, кие ульсь и ули мархтон.
Стака аржатне илядсть - тя эряфонь пяльксозе.
Но молян инголи и сяда тов карман корхтама кельгомать колга, хуш тячи кельгомась авати эсон эендай. (Но кеман, што кивок курок крвястьсы)