А кодама планонте тинь?

1. ✅
2. ⏳
3. 🙆‍♂️

Инегерой

Сембось палы, срады, перьфпяле паника.
Мазы ошеньконь мезевок изь иляда.
Стака стадонга…
Кинди, кда ай тейне, тянь сави урядамс?

Эздон шудесь сембе версь,
Штамс лезды салу сельмоведсь,
Видептине синнеф пакарьнень,
Конат илядсть, лиятнень кати-коса кадыне.

Срафтнень потмоста савор лисян,
Душматтнень кулдомада кемоста кундан.
Содасть, инегерой – лемозе монь,
Араласа масторлангозень монць.

Лезды Шкайсь тиемс аф ломанень тев,
Аф максы юкстамс илядомс ломанькс.
Путан оцю куд, кядьсон васенце кевсь,
Ваймозе валда, аф шоряй шобдась.

Эрьсь эздонк ули инегерой,
Ульхтяма ангелкс фкя паця мархта.
Кирдеда кядьта – эряфсонк кой,
Кирдеда кядьта, сяськтама марса

Мастор кандан лафтубряса,
Прябалатне молемс шоряйхть,
Инегероян – мзярдовок аф прафтса,
Тят нолне кядть, тонга мархтон молят

Мрдань валмора мархта
Мяльсон ульсь азомс, кле аф эряви нолнемс кядть, кивок инксонт тевонтень аф тисы.
Уледа ушманкс, геройкс. Эряфонте - масторлангонте. Аньцек теент сонь сави аралакшнемс.
Шумордайне 3-це курсть, кодама стакаль…
Ламось полафтовсь, лама травмада ётань, прань менельста модас. Тяни сави молемс инголи
Сембе тюрематне - инголен. Катк, стака. Катк, шобда. Аньцек шобда менельса няян сюролдат.

Фалу стака уленди эрямс. Эряфоньке фкя. Сембось кядьсонк. Да максы Шкайсь теенк вийхть
Уледа шумбрат, лацкас удода, ванды лама тевда, ётасть синь, сяськода, инегеройхть!🫶🏻

Трнатома

Мяльсонк ульсь марса путомс империя,
Кядьстонк тусь мазы кельгомась менели.
Потмосон толмарть тюсоц верыясь,
Куень сельмоса няеть, кода кенярдень.

Мезьса, азк, инь оцю пелемаце?
Иневедь, конань аш ведялксоц?
Тя ульсь инь вии кемамаце,
Кона макссь лисемс, ульсь кепотьксокс.

Сяпи валхне «сяшкава полафтоть»
Полафтозь эсон семботь.
Мезенди седизень солафнить,
Кда кадыть сонь тага кельмомс.

Тяк кадонда штада трнаты церанять.
Катт теенза хуш кодамовок котф.
Кадк мархтон оцю васькафнемать
Пандса семботь, туян монць

Тон - вакссон васьфнить шобдать-илядть.
Тон - ся, кие пяярди вастсон вина.
Кода пара синоним «пара шобдава» валти,
Кие космосса тяштть шачеманц няфтьсы.

Седизе потмосон панць якстерь вер,
Конань сяда тов куекс урафтыть.
Мяляфтса марнек апак удоф веть,
Мзярда ронгозень вастозон прафтыть.

Шорянь таблеткат да сельмоветть
«Кельгтя тонь» нюрьхкя валхненди.
Тяни вакссон аньцек стака мяльхть,
Кадыхтень, сельмотне мельган ванондыхть.

Штада трнаты цёракс илядондан,
Тяни фталу мзярдовок аф ванондан.
Пандса семботь, аньцек туян монць,
Удан, мзярс моли онць.

В А Л М О Р А

Анонсфтома, сяс мес темац пикссеф ни мзярксть
Аф лоткан колганза сермадома. Улема, курок муян эстейне ломань, кинь мархта аф васьфтеви мезевок стама. Илядсь учемс, учемс, учемс да кемамс, тявок колмоксть
Аньцек сёрмадома тянь колга аф лоткан, кадсь лама мезе эряфонь философияса. А лувинень ёткса, улема, васедеви тя прябалась

Референс валмороти сявонь тяста

Кулине кунара, а педсь потмозон аньцек ня шитнень

Кельгома пуромксозе нолдась од сингл 💔

Тяни учеда курок мезевок од кельгомать колга🤭

112 (фкя-фкя-кафта)

Уленди, мзярда аноклат лама планда,
Улема, лиси цебярь кинди-кинди кандомс.
Куцят пяк вяри, эсь пряцень аф ванфтсак,
А кати-мес сязевоть да лият алу пандста.

Монць срхкань ушес вайме таргамс,
Прясон вайгяльхне мярьгихть тейне «аф».
А кати-кинди пряса азсть эсон матрамс,
Сембе курось кульсь кальдяв гайф.

Вааай, тердеда 112,
Ушеса од цёрать прафтозь.
Скорайсь арды, лезттама марса,
Вишкста, маладода ласькозь.

Мезе лиссь? Мархтон сембось лац.
Аньцек кати-мезе цяткофтсь пряс.
Сембось лац, коварян шить ала,
Температуразевок валги алу.

Эряфть эзда мотоцикласа аф ворьгодят,
Мзярда ляцихть седизт - шлемсь аф лезды,
Катк валдопты шись, сяка сельмоса шоподи,
Катк ушеса пси, сяка кельме моли эздот

Мзярс ризнатада, менельга лиян,
Аш мезевок кальдяв лофтана кедьсон.
Аф шарьхкодян, мезьса муть зиян?
Тя прябалась тяни аш ни мяльсон.

Сембе эряфсь ётась сельминголен,
Теент 21 киза, тейне - фкя секунда.
Мзяра тевда ульсь, аньцек ашень кенере,
Мрдафтомасть хуш фкя минутас.

Мезсь няеви кувакакс, афкукс пяк нюрьхкя.
Лият, мзярс аф палави асфальтсь.
Аньцек исяк люкафнензе нюрямсь,
А тячи ваксозт панчфкат путсть.

Гайфти вакссон лазф телефонозе.
Ялгазе кати-коза терди тага.
Эхи конашкава стакаль онозе,
Асфальстсь пяк кельме алган.

Тячи аньцек мяльхть.
Кунара,валморода башка, ашень сёрмада тяза мяльнень колга, вага сась пингсь нолдамс сёрма. Мезевок петнема аф карман, кода сёрмадан - станя лиси. Потмостон – интернету.

Коварян эсь вастсон, кулхцондан музыка, арьсян, эхи конашкава стака ётни кизось. Аф аньцек климатонь коряс кизось, а тага кизось, кона ковгярьксонь.

Арьсетяда, ну мезе тага сон терди ширезонза ванф? Аф сатни теенза? Коса сембе позитивсь? (А весяла пяльксозень васьфтсасть «мокшень мемняса» да мархтон корхтамста. Пеетькшнема да рахама пяк кельгса. А сяда мялезон – рахафнемс, каземс пара эмоцият. Клоунан ахаха. Пара мялезон явомс валда момент ломанть мархта)

Поладтама. Арьсень, кода фалу, кельгомать колга. А кода соньфтемонза? Вешендян эстейне сай пингонь рьвяня, учса, мзярда кучсы тейне сонь Шкайсь. А сонць кельгомань темась фалу ули сёрмадомань тевсон. Ялгат, кельгомась - тя оцю вий. Сон максы теенк паваз, а тага, сярятьф. (Тейне максозе тянь да тонань). Ульсь тя кизоня кельгомазе. Ульсь. Тячи аш.
Аф содаса, мезе мархтон лиссь, аньцек кадыне сонь. Сембось мольсь аф тоза. Тунь. Кальдяв, мес тиень сяряди теенза. Тя пингс пяк визькс. А пингонь ётазь, сяряди арась тейне. Пара, мес ётайне.

Ётай кельгомать колга. Лама мемняда интернетса «кода пара ётай од стирть мархта». Корхтан видекс - лайкт путнян:)).
Вага мезьса тевсь – тя кальдяв ситуациясь. Кда книгась лувф, сериалсь шумордавсь – сембось аделаф. Аф эряви ваномс фталу.

Тя кизоня тейне ёрасть мрдамс 2 стирьхт ётай пингстон. (Фкять мархта ульсь кельгома, омбоцеть мархта улеме «ялгакс». Кафцьке лазозь седизень эсь пингстост). Азса лафчашизень - мархтост корхтамань контакт нолдань, аньцек ашине нолда седизон. Тейне саты. Аф эряви токамс ностальгиязень, сембось ётась.

Лафчашинень колга. Азса видекс, кода ломань аф ламос кальдявгодонь. Ульсь лама мезе: ванондонь паршихнень лангс апак ризназь, сёлгондовонь ломаттнень эзда, аф фалу кирдень вал, пяк лама сязендевонь, кяжиякшнень. А кой-коста вятине эсь прязень кода эмоциянь да инфантилизмань ломань. Эрь шиня эрянь мяльса «эхи аф кельгса эсь прязень»

Аньцек. Сембе ня кальдявшинень петине. Мрдань эсь ваймозти. Тяни арьсян аф кода од цёра, а кода аля. Налхксеме да саты. Тяни ванан надияма мархта вандыень шити, аньцек анокан эрь кодама кальдявти. Кадыне агрессиять, тяни аньцек кельгома перьфпяльти. (Васенце кяжти ахаха). Максы Шкайсь – сембось кармай

Тя потмонь атмосферазе, шарьхкодтяда, лиси сёрмадоматевозень лангс. Кунара сань мяльти, кле валморотне – тя аф кати-кодама пиар, няфтемс пря (арьсень тяфта 17-18 кизоса), а фкя оцю катарсис (курок лиси валмора тяфтама лемса, сембось шарьхкодеви). Сембе эмоциянень, ризнамазень – валморос.

Стака тянь семботь сёрмадомс. Кда лувить тя моментти – сюконян. Лисенди, ули интерес персонзти али лажнат инксон. Сяка, сюкпря❤️

А тяса колган корхтайхть)
https://vk.com/wall-224903745_3583

Арьсян, мон - васенце ломанць, кона сёрмадсь япунонь хокку мокшень кяльса:)

***
Лопанясь прай,
Вармась шамазон уфай.
Эрямс моли мяль


***
Пичедезь ащан.
Сюдерясамань шинясь.
Эльбядемс пелян.

***
Ситерди ушесь.
Лоткань, пара пиземть ала.
Молема пяк сизень.