صوتك زواكَة عرس

....... لانها تحبه بصدق
...... فكل شيء منه يزيدها جمالا

صوتكْ يرشني عطر ،

يغسل وجه حزني ،

وآتمايل آويا الهوه ،،

مدري شني يهزني ،

أطير من الفرح ...

وآركض للمرايه .

أشوف روحي آحلى .

صوتك زواكَة عرس .

صوتك مشط كَذله .

صوتك يزوّكَني .

سولف يريج العسل ،

يا آخر آحبابي .

خلّي التراجي تفز ...

وتورّد ثيابي .

لـبّسني مَشمَر عطر ...

وكَلادة آسوالف .

سولف يبعد المشوا ،

حجيك خرز كهرب .

خليني آتكهرب ...

وآطيح بميّتك ...

وآطفه وزلال آشرب .

بالك تفاركَني .

سولف لي صبح ومسا .

صوتك زواكَة عرس .

وكتين زوّكَني .

#عبدالكريم_القصاب

مامش جدحة

عطشة موت وغيم مصحّر ،

والسنبل شوغاته تهزّه

ميت والعاكَول يبزّه

ديرة عاكَول وبزّيز ، ....

وكلّش ظلمه ،

ولا خيط يفوت آمن الخرزه .

غيم مشظّى ...

ونجمتهم تلعب ختّيله ،

والفرحه بمظلم محبوسه ،

ومامش جدحه تفك الرزّه .

تفكَة غربه وعلّاس آسود ،

وتخاوه الذيب آويا الواوي ،

ومسابك ،...

والدم بيه مزّه .

مزّة ثار وخمرة ركَبه ،

والمخمور يهز ذويله ،

ولو مال غرابه يتجّيله .

ديره آعلى المهتوك تناشغ .

غراب آسود فوك الكَذله ...

ومروز بلا ديرم شتله ...

وتنور بلا ريحة خبزه ..

وبلبل ناسي شلون يطير ....

مفارك صبحه ،

ومغفّين آولاد الملحه .

موتى ومامش بيهم فزّه .

#عبدالكريم_القصاب

اِيْ يكَلبي

من بياضك كل عذابك

مرّه صير آسود يكَلبي

#عبدالكريم_القصاب

حزن شفّاف

يجويني الحزن وآخدر .

يعصرلي عنب وآسكر ...

وآذوب بكوثر اللذات .

حزن مدري شني ! يشهّي .

لذيذ يطيّب الخاطر .

حزن ما ينشبع منّه .

حزن شفّاف جنّه العيد .

يجويني وآكَول آفيش .

أنا مفطوم عالجويات .

روحي بلا حزن تطفه ...

ورماد بليله سوده تبات .

حزني آيلبّس الظلمه ...

كَلايد من شذر ونجوم ،

يشعل صفنتي مرايات .

أنام عيوني مفتوحه ...

وآشوف وجوه ناس عزاز ،

مشوا ، طشّوا بالولايات .

سلامي للعدل والمات .

وجه حزني شحلاته بماي المرايه !

يفرّحني وضميري يصفّك بروحي .

ملامح حزني شباج الزمان الفات .

أحزن ، يعني ما ناسي .

يعني ما عفت ناسي .

أحزن ، يعني آشوفنهم ،

يعني آوياي بالصفنات .

سلامي للعدل والمات .

#عبدالكريم_القصاب

..........كَمر شذري ............

بالظلمه المضويه آبطيفك الكَمري،

تجيني آمحاسنك ترفه ،

وآحبسك بين ذرعاني ودفو صدري .

اشبكَك ضي على طولي وكَمر شذري،

كَمر عن الحسد شذري.

اغمْض آعيوني،

آمصّن لونك الخمري ،.....

وتسيل آنفاسك بروحي خدر عذري ،

خدر مدري شني طعمه ،

وبعد ما آكَول،

بعد بيّه حجي ،وما آكَول،

بعد هلكَد حجي!! ،وما آكَول ،

لأنك بالحجي تدري .

#عبدالكريم_القصاب

...... نعــي آمفــــــارك .......

حبّك آبــدم كَلبــــي عجنتــه

عينـك عليْه يامـــن سكنتـــه

محّــد اِلــه بس اللـــه وآنتــه

/////////////////////////////////

يهـــواي كـــون الليله يمّـــي

وبشـوفتك ينـــــزاح همّـــــي

يابعْـــد آبــوي وبعــد عمّـــي

////////////////////////////////

لو بيــدي آضمّــك ياوليفــي

وكَابـلك وآبجـي آعلى كيفـي

وآطبك شتايـه فـوك صيفــي

////////////////////////////////

صرتم آكَبالي وكَاعــد آبجـي

لا أكَدر آومي ولكَـدر آحجـي

اخلافــكم ويــن آنــا آوجّــــي ؟

/////////////////////////////////

يا ريتنــي آطويــــره وجيــكم

وآكَعد آسويعه آســمع حجيـكم

واكل لي لكَمــــه مـــــن أديكم

//////////////////////////////////

يــاريــت آجـلّـب لي بســـحابه

وبســـطوحكم انــزل ربـــابــه

وغنّـي يـحـبـيّـب يـيـابــــــــــه

اشــكبر حظــه اللكَــه آحـبـابـه
//////////////////////////////////

#عبدالكريم_القصاب

لعبه ، وكَصّة الشيطان

تاكل وجه المصلّى

ونبي آخر زمن تمثال

#عبدالكريم_القصاب

وج الحنين وكلها غيّاب

منين آجيبنهم ، بعيدين ؟

#عبدالكريم_القصاب

ليش نخاف ؟ كلنا نموت

كل يوم اليمر بسمار للتابوت


#عبدالكريم_القصاب

أدري بيّه الشوك مطفي

وآدري مثل البيّه بيك .

أدري شموصّيني جرحي ،

أدري ، لكن ،

مدري يا شيطان بيّه اليشتهيك !

#عبدالكريم_القصاب

متونسين وجرحي يناشغ
وخنجرهم يضحك لذنوبه
جا يمتى العباس يشوّر ؟
كلّش طالت ، مامش حوبه

#عبدالكريم_القصاب

أشبكَك وآنت مو يمّي ...
وآكَول آفيش .
يمفاركَني وتحبني ،
كَلبك ما يكَلّك ليش ؟

#عبدالكريم_القصاب

* موال النسيان *

فاركَتني ومدري ليش !

ريح مدري منين هبّت ...

وآنجفه الكاس اللذيذ .

دثرت ضيّك بغيمه وآنطفيت ،

وآنت بس آنت جنت نجمه بسمايه .

جنت تجوه لطيحتي من أختنك .

فاركَتني ، ...

وهاي جم طيحه وعلى آخيال آنتجيت ...

وما اِجيت .

كون بس رايح تهون ،

المشكله كلّش نسيت .

يا وجعها من نهايه !

خايب شمالك نسيت ؟

ما شفت من عيني جم عصفور ...

بعده يزقزق بشباجك ، ...

مناطر خيالك ؟

ويتصنّط ،

بلجي من خلف الستاره البارده ...

يسمع حجايه .

ما شفتني بكَذلتك من مشّطت ؟ ...

ما فاح بيدك عطر روحي ؟

ما شفت كَلبي الصافي ...

من شفت وجه المرايه ؟

ما شفت بوسه آعلى خدك ،

على شفتك ،

على جيدك ،

وآنت تتنوّع لحسنك بالمرايه ؟

عجب ...

ما مر على بالك وجع راسي ...

وآنت بآصبعتينك تخوط استكان الجاي ...

تشرب بالشفا ويفوخ راسك ...

وانا كلّش دايخ ...

وجايك دوايه !؟

ما اِجا آببالك فضل بستان روحي ...

الفارش لطولك آفيايه ؟

والتلولي لّحّد ما تغمض عيونك ؟

جان كل شي بمشتهاك يصير ...

موش بمشتهايه .

ما تجي آببالك مواويل الهوى ...

وموعات كَلبي آكَبالك وجمرة غنايه ،

وحيرتي وحسبات ليلي ...

والبجي والما يغمضن ،

وغيرتي وخوفي ...

وآلآسم الله عليك ...

واَلك كل شي يروح فدوه ؟

وهنّ مو بس ذنّي ، ...

ما بيّاش آسولفهن ، هوايه .

يلّي كَلبك سوط وجروحي سبايه ،

أوجعتني هواي ، ...

من كل كَلبي آكَلّك ،

مسامحك لله ولجل عطر البدايه .

*****************

تتنوّع : تنظر

#عبدالكريم_القصاب

أشبكَك وآنت مو يمّي ...
وآكَول آفيش .
يمفاركَني وتحبني ،
كَلبك ما يكَلّك ليش ؟

#عبدالكريم_القصاب

اول منشور ب 2020❤️

يارب تكون 2020 سنة خير ومحبة ع كل العراقيين ويارب الامن والامان لهذا الشعب🇮🇶
ويارب تكون سنة 2020 سنة حصاد ثمار ثورة التغيير
ويتغير الوضع نحو الأحسن وتكون سنة العراق الحر الجديد 🖤💛

كل عام وانتم بالف خير احبكم ❤

********* احتفال *********

الليله دورة سنه ويا بخت مــــن ظل عدل

الفرحه كَد الســـــــــما والكَمر أجمل طفل

الناس رفّــــــــة جنح والكاس يركَص ثمل

وانا الحــــــــزن خمرتي ودنياي سجّة نمل

بســـــــــكوت أذبل ورد ، بيّه العطر يبتهل

مثل الورق بالشمس ، يحترك مـــــا يشتعل

أنزف آلوان وضوه وجروحي من كل شكل

الجـرح أرمـد جفن ورمـــــاد روحي الكحل

كل هذا وانا آبتسم . مـــــا أنكسر ، مو سهل

أشعل جروحـي ركَص وبثوب مـوتي آحتفل



#عبدالكريم_القصاب

شكَد لذيذ الزعل بيني وبينه !!

صح يسد الباب ، بس الباب جام ،

يبتسم لي وعيني قِبلة عينه .

#عبدالكريم_القصاب

ورسوم العله الحيطان

***** يا معزتك ****

ماع كَلبي بغيبتك موعة كَذلتك .

ذبلت البسمه على شفافي ...

وآعاين لك تجيني بعسل شفتك .

يا مكدّر خاطري وعني مشيت ...

ومدري طحت بيا دفو وكلّش نسيت ،

وانا ظال تنادم آويا آول ضحكتك ،

كون أرهم ويّ غيرك ،

جا آمن آول آه عفتك .

جا كَبلما تريد تهجرني هجرتك .

يا جرح ينكَط خمر بالروح ...

ما ينشبع منك .

يا معزتك .

يا عزيز المو على الخاطر ...

ومن كَلبي لَحَد الموت ما تطلع معزتك ،

بعدك آمن تنام تتكحل بطيفي ...

ومن تفز تبجي عليَّ ...

وتنزل دموعك آميّة روح ...

وتبلّل مخدتك ؟

هم يمر وجهي بصفنتك ؟

هم شفتني ...

بكثرما آشوفك آمن آصفن ؟

يا عزيز هواي شفتك .

يا جرح ينكَط خمر للروح ، ...

ما ينشبع منك ،

يا معزتك .

#عبدالكريم_القصاب