عدنان: ماااكو شي خلص هاي اني وهاي انتي موجودين وكلشي ما خلص .. احنه شنو اتفقنه .. بسمتي

ابتسمت بألم : اخذو بسمتك منك .. وسجلوها باسم غيرك .. باوعت بوجها وكلت.. عقدت وصرت زوجة وأحد ثاني ..

سكت ثواني يحاول يستوعب .. كأنما حيلة باد ورجلي ما تعينه يكعد عليهن .. كعد بالكاع صافن بيه .. ابتلع ريكه وحجة بصوت مبحوح .. مليان بالغصة ..

: عقدتي .. ش شوكت ؟ يعني من اجينه عمج ما جذب

:لا ...بعد ما طلعتو .. رحت واجهت عمي وكتله مستعدة اسويلك وكالة بالعمارة مقابل توافقون على عدنان ..وتتركوني بحالي.. بس الي صار صادق حبسني من العصر .. لحد.الليل فتح الباب وكال تعالي انطي موافقتج للشيخ ..

عدنان سكت لحظة، كأنه مو مستوعب، بعدين فجأة صرخ بصوت مبحوح:
: شلوووون يعني شلووووون .. عقدتي؟ وصرتي مرة واحد ثاني

: إي عدنان.. چنت مجبورة.. كلت الهم موافقة ما چان عندي حيل أقاوم أكثر..

وكف على حيلة خطا خطوتين لورا، حس نفسه جاي يختنك صار يفتر بالسطح يلوب ويسحب نفس هزز رأسه برفض
لاااا... لا ما أرضى مستحيل اتقبل هل نهاية .. مستحيل ترحين لغيري

رجع كعد كبالي وضرب بيده على صدره:

والله الا آخذج والله الا تصيرين إلي غصب عالكل واسحك خشومهم بقندرتي

:عدنان ! مايصير اي شي بعد .. خلص مانكدر.نسوي اي شي

رد بعصبية صاك.على اسنانة ..

ما أهدأ نروح لأي شيخ ثاني نروح ونستشرع وراح تشوفين هل عقد بااااطل .. انتي ما كلتي موافقتج من كل كلبج ورب العالمين يعرف انتي رافضة هل شي رفض قااطع .. وهل عقد باطل ولله باطل

قرب مني حيل لدرجه نفسه الحار صرت احس بي على وجهي
:تدرين شنو؟ اللي صار مو عقد.. هاي ورقة مزيفة هذا حكم اعدام .. هذا بس كسرة الج .. واني اخذج بايدي ونروح نستشرع.. وين ماتردين. نستشرع وراح تشوفين الكل شنو يكولج ..

حجيت بصوت مكسور
عدنان.. لازم تفهم.. أني عقدت شيخ.. صرت زوجة رجال ثاني.. هل كلام الي تكولة ما يصرف عند.احد ..






:لا... لا تكولينها مرّة لخ... لاتعيييدها ولج ... انتي ما تصيرين مرة واحد ثاااني
ما أتحمل فكرة تكونين لغيري أنتي مو إلهم.. أنتي إلي، وبس إلي.. وعدتچ وعد رجال، وما أخلف وعدي... اني وياج بسمة خلي ايدج بأيدي..

نزلت راسي وسمحت لدموعي تنزل بحضورة .. ساكتة ومحتارة شنو اكول

سكت لحظة، رجع باوع بعيني،
وجعج وجعي، وحق هذه دموعج ما أهدأ، إلا وأنتِ زوجتي.. وباسم عدنان تبقين..

بلعت ريكي ناااشف مثل الحجر ... شلووون واني صرت ل..
قبل ما اكمل كلامي .. سد.حلكي بأيدة.. كااافي.. غصصبن على اللكل انتي الي .. كوووومي

حجيت مستغربه : ووين اكوم ..

كووومي وياي تعااالي .. يله كومي جيبي اخوانج وحتى ملابس لاتجيبين

طلعت من القفص ارجع لسطحنه وحجيت : عدنان هذا هو .. كلشي انتهى .. انت سويت كل الي عليك ..وفيت بوعدك وبقيت وياي.. بس اني ماكدر بعد هذه نهاية الطريق.. وحتى لو كانت الكلمة توجع بس هذه الحقيقة .. اني صرت زوجة رجال ثااا....

حتى ما خلاني اكمل كلمتي ما حسيت غير نجريت من ايدي وبلمح البصر نجريت لداخل البيت ...
جرني عدنان ودخلني للبيوتنه .. وسركة بابها

: هاااي شبيك .. خل اطلع .. عدنان فدوة كافي خبال خلصص وخررر خل اطلع

وكف كدامي وكأنما أو مرة اشوف عدنان ... بعيونة نضرة ما فهمتها لأن اول مرة اشوفها وهو يكلي بهدوء وصدرة يصعد وينزل بقوة ... مراح اتركج ..

تقدمت بسرعة للباب افتحه واطلع .. بس عدنان فقد عقله وتفكيرة وصار يفكر بس بكلبة .. لف أيده على خصري وجرني من الباب .. وفتح باب الغرفة الي كانت سابقا غرفة اخو .. ودخلني بالغرفة وسد بابها
وكف ضهرة على الباب .. اول مره بعمري اخاف منه ويرجف كلبي .. اول مره بحياتي اشوف الدموع تارسه عيونة ويريد يبجي .. وهو ما بالسانه غير كلمة

:( انتي الي) اني ما حبيتج كل هل عمر .. حتى بالنهاية تصيرين لغيري .. انتي حقي اني .. اني الي حبيتج اني الي انام واكعد احلم بيج .. اني خفت عليج .. اني الوحيد.الي حق بيج .. وما راح اوكف اباوع بعيوني وانتي تضيعين مني






بلعت ريكي بخوووف ورجفة
: عدنان .. فدوة خل اطلع لتسوي هيج خل اطلع هسه اخواني يفكدوني

هز رأسه وكال : راح تطلعين .. بس مو قبل ما تكون الي

: انت انت شقصدك

بلا مقدمات ركض الي ولمني بين أدية وحضني قويي
كان يحتضني بطريقة .. شخص خايف من الضياع .. يريد يدخلني بداخل ضلوعة ..

اكذب اذا اكول ما ضعفت بلحظة واني بحضنه.. ضعت وبادلتة الحضن متناسية كلشي ..
وخرني من حضنة باوع بوجهي لثواني .. ورجع شدد حضنه عليه لدرجة عضامي وجعتني ... طول بهل حضن وكأنما يفكر بشي ..

وخر مني ولزم وجهي بثنين ادي خلة كصته على كصتي .. ونزلت دموعة .. وهو يباوع بعيوني
صارت اثنينه ادموعنه تجري سوة .. حجى بهدوء وقهررر

: اني اسف اسف ... لأن للحظة فكرت بنفسي
انتي اطهر من اني الوثج ... مجاااي اكدر اخذج ولا اكدر اتركج ... كوووولي الي شنووو اسوووي ...

بقيت ساكتة ودموعي هي الي تنزل .. دفعني بخفه وكالل : طلعييي منااا طلعي لاتبقين ..

فعلاً تركته وتقدمت لباب اطلع .. لزمت مقبض الباب ودرت وجهي عليه اشوفه لاخر مره .. لكيتة واكف وراي يباوع الي ... ماكدرت ... ماكدرت... ماكدرت ابتعد أكثر رجعتله وشمرت نفسي بحضنه وسمحت لروحي .. اتعلك بكربته .. مثل الي تتعلك بركبة ابوها .. وصوت البجي مالتي ملاء والمكان ... أكثر مرة بحياتي ابجي بيها بهذا القوة ..

حتى ما عرفت شكد مر من الوقت واحنا بهذا الحال .. يله تركته واجيت افتح الباب واطلع قبل ما اطلع كال

: اريدددج توعديني ؟

حجيت بلا أي تردد موافقة على اي وعد : اووووعدك

: غير تعرفين شنو الوعد اول مره

: مو مهم شنو المهم وعد يكون الك

: وعديني تبقين تحبيني .. وعديني ترجعيلي بيوم .. وعديني تكرهينه بعيشة .. بسمة ولو مو وكتها .. بس عليج الحسين لاتلبسين اله ملابس حلوة ولاتلبسين لماعي لأن يحبه






:وجهي مورم من البجي .. بس ضحكت من كال لاتلبسين لماعي ..

: اووعدك ..

فتحت الباب بسرعة وطلعت .. وفتحت باب البيتونة .. وبسرعة عبرت على سطحنة ..
وكفت يم باب سطحنه ... عيوني امسحها وترجع تنزل امسحها وترجع تنزل .. ردت انزل بسرعة لأن اذا بقيت اكثر من كل عقلي وكلبي اكله .. خل نروح اني وياك ..

فتحت باب سطحنة ودخلت تاركتة وراي ... و عدت نفسي ابتعد عنه بعد ومستحيل أشيل تليفون اخابرة لو اطلب منه مساعدة .. وعدت نفسي اخلي يعيش حياتة وينساني واني هم احاول اتناسى... هذا هو وصلنه للنهاية ..
ولازم اعتمد على نفسي بعد ..

نزلت على الدرج امشي بتعب وخذلان.. ورحت لغرفتنة .. لكيت سلوى كاعدة والقهر تارس وجها.. واخواني ضايجين .. القهر الي بيه كان كافيني لدرجة حتى ماحاولت اطمنهم لو اكلهم شي .. اكتفيت بالسكوت .. جريت مخدة وخليت راسي عليها وانطيتهم ضهري ..

سلوى ما حجت اي شي وعرفتني مالي طاقة احجي .. لكن الاطفال شنو يفهمهم .. اجة وعد مدد بصفي وحضني من ضهري .. ماكدرت ابقى دايرة عنه .. درت وجهي عليه ولميته لصدري..
باوع بعيوني بحزن وهو يكول

:بسمة راح تعوفينة صدك ..

بلعت غصتي وجبرت نفسي ابتسم بوجها ابتسامة اطمئنان.. مسحت بايدي على خدة

: تتوقع اني اكدر اعوفكم ؟

وعد:مو راح تتزوجين يعني تعوفينة

: لا حبيبي .. اني راح اكوم اجي يومية وابات يمكم .. وانتو تجون تباتون يمي .. وراح كل شوي اجي عليكم ..
مستحيل أتركم .. ابد .. واذا ردتو شي ومالكيتوني .. هذا سلوى موجودة..

:بس احنه نريدج تبقين عايشة ويانة

:شوف حبيبي وعد .. وانت رعد هم اسمعوني شنو راح اكول .. انتو زلم .. وسباع .. وكبار .. اني صح راح اتزوج بس ابد ما راح اتركم .. وبس شوي شوي .. واخذكم منا نروح نعيش بيت وحدنة.. تلعبون بي براحتكم ومحد يحاجيكم ابد .. بس اريد تصبرون شوية علي .. ماشي حبايب ..

اجة رعد شمر نفسه فوكاي .. وهو ووعد يبوسون بيه .. واني ابوس بيهم .. ولامتهم على كلبي ..






سلوى: الاحضان والبوس بفلس واني محد بحالي

ضحكت الها وكعدت يمها جريتها لحضني: ولج شعندي غيرج انتي بنيتي .. انتي الأصل ..

باوع بوجهي وحجت: بسمة اوعدج .. راح احاول اكون قوية وراح ادير بالي على خواني بمكانج ..

بسمة : سلوى اني كل الي اريدة منج تحاولين من اني ما موجودة بس اكلهم اهتمي بي .. أما ملابسهم دراستهم هل امور كلها تبقى عليه اني احاول اجي كل يوم .. مراح أتركم.. لحد ما نشوفها وين تصفى .. اعرف نفسي كلش زين اول وتالي راجعتلكم .. بس مستحيل ارجع لهذا البيت

سلوى: شلون يعني قصدج ما نبقى عايشين هنا

: ايي .. بعد كل الي صار بينه ما ابقى هنا.. باعي سلوى محمد .. وردة ويختلف عنهم تماما اذا اني ما موجودة هو بمكاني .. اي شي تحتاجي .. بس كولي اله وهو ابد ما راح يقصر

: اي ولله بسمة محمد كلش حباب ولا جنه ابن صادق وفاطمة.. حنون ويخاف الله مو مثلهم ضالم .. اني كلش احبه

: الله يحبج .. تحبينه مثل اخوج اكيد

بقت سلوى ساكتة وماردت وهل شي ماريح كلبي كررت كلامي عليها : تحبينه مثل اخوج ؟

حجت بتردد: احم اي

: شنو اي

: مثل مثل اخوي

: اي عفية .. حبي مثل اخوج وديربالج كلبج يغلبج ويخليج تحبي بغير طريقة

ردت بسرعة: بس محمد مختلف عنهم وكلش حباب ويخاف علينه ..

: وابن صادق وفاطمة ولاتنسين هل شي حبيبتي ..

سكتت بس حسيتها ضاجت .. واني هم غلست على السالفة .. اللوعات الي شفناها منهم تكفي وتوفي ...

ثاني يوم .. مثل العادة ..بين شغل البيت واخواني .. مر الصبح .. للضهر.. صاحني صالح .. وقررت ما اتجادل وياه باي شي يكولة .. لأن مايفيد بعد اي كلام ..
دخلت لكيته هو وجبرية كاعدين ..

: ها عمو

شمر علية مفاتيح : هذني مال بيت .. استاذ كمال .. عارضين بيتهم للايجار هو واثاثة بعد ما تهجرو اجرناه من أهله .. وراح تكعدين بي .. روحي نضفي ورتبي.. وحضري نفسج باجر ياخذج الحجي ...






استاذ كمال بيتهم بنفس شارعنه بس بنهاية الشارع صاير .. وحاله حال هواي ناس طفر هو وعائلتة لغير دولة بسبب الأوضاع وبقو أهله عرضو بيته للإيجار..

عصرت المفاتيح بأيدي مثل عصرة كلبي من كال باجر ياخذج .. شي واحد ريحني .. هو بيت قريب واكدر اجي كل يوم لاخواني .. طبعا جانو مقررين يأجرون بيت ابو خالد .. بس بعد ما تقدمو لخطبتي وعمامي رفضو ..لغو الفكرة .. بلا ما اجادل هزيت راسي موافقة ..

جبرية: روحي هسه بلشي رتبي .. البيت متروك صار فتره طويلة وهسه اكيد مترب وكله وسخ ..

درت وجهي وطلعت .. رحت لغرفتنة حاجيت اخواني ..

: تعالو وياي .. نروح ننضف البيت الي أجرو

سلوى:يابيت

: بيت استاذ كمال عمي أجرة حتى اكعد بي .. تعالو خل نروح ..

كامو وياي اخواني .. وطلعنه .. مريت على المحل اخذت زاهي وقاصر وأخذت بطريقي عصاير وكيك وجباسة لأخواني .. ورحنة للبيت ..

اول ما فتحت باب الشارع .. البيت موحش كلش ويقبط على الكلب لأن مهجور.. الطارمة والحوش تراب على حالهن .. بايسكل مترب ومتروك .. كبل رعد عاط واستعد حتى يركضلة

: الله بايسكل

:بسرعه لزمته من ايدة : رعددد هذا مو مالتنه عيب تلعب بشي مو الك

: بسمة بس شوي قابل راح أكلة

: مايصير حبيبي هذه الغراض أمانة وحرام نتملعب بيها

سكت مطنكر .. تقدمت فتحت باب الكليدور.. البيت كل اثاثه حلوة وراقية ومرتبة .. وكلش نضيف .. بس مترب
ومن كد التراب الي بي يخنك .. بس مبين يعني اكو احد بين فتره وفتره يدخلة .. لان ثيل الحديقة باقي اخضر ..
والصوندة مال ماي مشكلة على البوري ومشمورة بنص الطارمة ..

البيت كان .. طارمة عريضة وعليها شباكين شباك الهول وشباك الاستقبال .. وباب خشب.. من فتحته طلع كليدور بي مراية وبي سلة بداخل السلة تليفون ارضي.. شكلة كلش قديم.. مثل الديكور مخلي .. بداخل.الكليدور بابين باب يدخل للاستقبال وباب يدخل للهول .. الاستقبال بيها بابين واحد دخل الكليدور واحد داخل الهول .. وباب الهول الثاني يدخل للصالة .. الي بيها الدرج وغرفة ومطبخ وصحيات .. كان ينطي شبه لخرطية بيتنه بس اختلاف بسيط ..

سلوى: شوفي البيت شلون متروك بس تحسين بي ريحة امان ودفو عكس بيتنه حلو ومرتب بس كل روح حلوة مابي ..






: ومنين تجي الروح الحلوة من حقارة عمامج لو من سم خلفتهم ونسوانهم .. خل ابلش انضف ..

رحت دورت لكيت مكناسه .. وماسحة ..
فتحت الشبابيك وفتحت البيبان المراوح .. وبلشت كنس كنست البيت كله .. ورجعت نكتت الاثاث من التراب .. ومسحت الاخشاب .. جريت الصوندة لداخل البيت وغلسته من الدرج لحد باب الحوش ..
وسلوى تساعدني باشياء خفيف كلش .. مسحت المعرض مسحت كاونتر المطبخ و الثلاجة .. ما اخليها تسوي اشياء ثكيلة .. مر أكثر من ساعتين واحنه نمسح ونغسل لحد ما البيت ردت روحة وصار ينكعد بي ..

بسمة:رعد وعد وين اشو مالهم صوت

سلوى: رعد لزم البايسكل. وعد كاعد بالمرجوحة
طلعت اشوفهم لكيتهم بالحديقة يلعبون تخصرت واني اباوع الرعد الي عاندني

: اني شنو كلت رعد

:حبيبتي بسمة بس شوية واعوفه حبابه

كسر خاطري واني اشوف شلون طاير بالباسيكل .. حقه اذا هم من كلشي محرومين .. تركته يلعب وكلت اذا صار شي بالباسيكل اني اخسر فلوسة .. انطيتهم عصائر وكيك يأكلون وكعدت اني هم اكل وياهم.. اول مرة هيج يلعبون بدون ما احد يسممهم بكلمة .. أكثر وكتي حابستهم بالغرفة ..
قبل ما يصير العصر .. رجعنه للبيت صايرين ونيدا اني وسلوى من تعب ..وهم من العب ..
بس وصلنه شمرو نفسهم ونامو .. وقبل لا امدد وارتاح صاحتني جبرية

... لاحول الله ما نخلص اليوم
طلعت الها طافرة روحي وهي كاعدة مرتاحة وتحجي برود : شسويتي

؛ نضفت البيت كله

: اسبحي وبدلي اخذج للصالون

: شصخم بالصالون

: شتخصمين صخمي وجهج وولي صوج عمج الي يريد يرفع رأسج كدام رجلج وخسر كوم فلوس ايجار .. انتي مو وجه نعمة

: رحم الله والديج اني مو وجه نعمه تعبانه اريد ارتاح

: اني ما امشي بكيفك ؟ سبحي وتعالي نروح حفي وجهج وصبغي شعرج .. ومن ترجعين حفي جسمج هذه رجليج جنه رجلين زلمة .. تلعب روحه منج الرجال

رحت للغرفة الدنيا طالعه من عيني. وروحي زهكانة جريت ملابس ورحت سبحت .. شلون ما كان وطلعت ..
وهي كاعدة منتضرتني ..
طلعنه اني وياها للصالون .. كان قريب من يمنه.. تركت نفسي بلا عناد مو هامني شي .. كعدت المرة تحفلي وجهي .. وكل شوي وانكطع الخيط

.. وكالت ياااا رجلج يحبج .. ما تكول هي خيطها بايد واني وجهي صاير غابة من الشعر.. شورابي اثخن من شوارب عدنان..

رغم اول مرة احف بس ولا حسيت بوجع.. يمكن من كدما تعبانه كلشي بية تخدر
كملت وكعدت تفرك بوجهي بمقشرات وخبطت خبطه وخلتها على وجهي مثل القناع
وجهي صااار ناعم كلش ..
نوب كعدت تصبغ بشعري .. وسوتلي خصل
وتحجي ويه جبرية

: ام مهدي عروستنه ضايجة اشو جنها ما راضيى

: ههههه لا خيه شنو قابل نغصبها بس تعب وتحضيرات العرس .. وتعبت كلش ..

: طلعت جنها كمر من حفت .. وجها طلع يلك ..

بقت تدك سوالف ويه جبرية واني باقية على الصامت ..
لحد ما كملت وتحاسبت وياها جبرية ورجعنه للبيت ..وهي طول الطريق توصي بية .. وتعلمني بسوالف مدري شنو ما شنو واني حتى بالي مو وياها ..
رجعنة للبيت كلش مغرب صايرة ومأذن المغرب ومخلص .. ما ردت أتواجه ويه احد ولا اسمع حجي من أحد .. رحت غسلت وتوضيت .. دخلت للغرفة خواني يباوعون على التلفزيون.. وسلوى كاعدة مكمله صلاة وتسبح .. وكفت اني هم اتوجهة وكفت اصلي ..
كملت صلاة المغرب .. وتذكرت عدنان مرة سألتة

انت شلون تصلي المغرب والعشاء سوة وهو المؤذن بعدة ما مآذن للعشاء .. بوكتها توقعت هل شي حرام ..
بس من شرحلي .. أن هم على نهج الامام سيدنا علي ..
وكعد يفهمني ويشرحلي بكل حب .. خلاني اقتنعت وحبيت هل شي .. وفهمني أن احنه لازم نحترم المقابل ونحترم عاداتة مثل ما احنه نريد الي يحترم عاداتنا ..

حجت سلوى: طالعة حلوة كلش

: أقبح مرة اشوف نفسي بيها وكارها شكلي لدرجة بالمراية ما اريد اباوع ..

سكتت وهي تباوع الي .. أحسها متغيرة .. أحسها صايرة تحس بيه أكثر وتفهمني أكثر .. أحسها جاي تحاول تساعدني وتشيل وياي بالي تكدر عليه .. وهل شي مفرحني.. ومريح كلبي ..

لليلتها نمت كلش من وكت .. وماردت افكر بشي ولا اسمع شي .. لأن من كد تفكيري احس راسي راح يطك ..

فتحت عيوني الصبح .. وثكل الدنيا كله أحسه على كلبي .. اخر يوم الي واني ملك نفسي ... اخر يوم الي واني بين اخواني .. يعني صدك هاي هي ؟ راح اصير ملك واحد شايب .. ندفن حلمي وندفن حبي .. وكلشي بيه مات
مطلوب مني اتجرد من احساسي .. حتى اكدر اتقبل هل كائن المقرف ..

بلشت يومي مجبورة اساير وضعي واقبل بكلشي يكولو الي .. مثل لعبه تتحكم بيه جبرية.. روحي تعالي حضري ملابس .. دخلي سبحي .. هاج شيري .. هاج رتبي ..

مثل الطبخه الي يعتنون بيها .. حتى تطلع كدام الي يأكلها بأطيب طعم .. هيج حسيت روحي
يردوني باحسن شكل كدامه .. حتى يستلذ وهو يفترسني حتى يكون راضي عنهم ..

الضهر .. واكفه بالمطبخ جرتني جبرية ..

: عووفي كلشي يله وتعالي جهزي روحج ..

: رحت لغرفتها .. وكعدت على الجرباية .. اجت منى جايبه مكياجها وكاوية الشعر .. غمضت عيوني واستسلمت ساكتة .. وهي تمكيج بيه ...
وماعرف شنو تحط وشنو تخربط .. لحد ما كملت ..
وكفت اباوع تارسه وجهي مكياج.. صح مكياج مرتب بس روحي لعبت من روحي .. وكفت اخفف بي

منى: هاااي ليش صار ساعه ارتب بيج ليش تمسحين

: ثخين كلش ..

هزت أيدها ما عاجبها وسكتت.. طلعت لغرفتنه .. أبدل لبست نفنوف عادي.. بيجي وشعري عفته مثل ما سوته منى بس سرحته .. وبقيت كاعدة .. افرك بأدية ..
سلوى يمي كاعدة تباوعلي بعيون مغوركة ماتريد تبجي
رعد وعد ثنيهم كاعدين كبالي .. اول مره يشوفوني هيج مبدلة ومخلية مكياج ..

رعد: بسمة هذه رجلج اكرها .. بس يجي افلش سيارته بالطابوك ..

: ههههه لا حبيبي عيب ..

: ما احبه شايب .. وانتي هم ما تحبي ..

: ميخالف رعد .. اني شنو حجيت وياكم البارحة.. اذا تحبوني اصبرو شوي بس شوي.. وهو بس يروح .. اني اجي اخذكم يمي وتلعبون بالمرجوحة والبايسكل .. بس لخاطري حبايب ماريد تسوون وكاحة وتشلعون كلب سلوى واني يومية اجيكم

وعد: بسمة راح تجي المدرسة منو يقرينة

: وعد .. انتو صرتو كبار.. اكتبو انتو واني من اجي ادرسكم هم .. وسلوى موجودة ومحمد هم سألو وهو يساعدكم ..

: يعني ما تنامين يمنا بعد ..

: لا يروحي اجي انام يمكم واخذكم تنامون يمي هم ..

رعد: زين العروسة مو تلبس بدلة وسيارات وعرس.. انتي ليش ما لابسه بدلة وماعدنه عرس ..

حرت شنو ارد عليه اي جواب على سؤاله ماعندي..
وشنو الي راح اكوله الهم اكبر من فهمهم ..
شنو اشرح الهم ؟ اكول الهم بدال البدلة لبست وجعي وصرخات كلبي .. هي بدال الهلاهل ..

التمو داير مدايري كأنهم يودعوني.. وكل ضنهم أن اني بعد راح اتركهم تماماً.. لميتهم بين ادية .. مستحيل اتخيل حياتي بدونهم لحضة وحدة .. لو الدنيا كلها رادت تبعدني عنكم مراح ابتعد ..
مر أكثر من نصف ساعة .. واجاني نداء الموت ..

من دخلت جبرية وهي تكلي .. يله بسملة كووومي رجلج بررررة اجة ياخذج ..

25..

............

صوتي مكبوت،
لكن الدمعَ صرخ،
صار دماً،
وصار جداراً لا يخترقه الرجاء.

هوى ظلي خلفه،
خطاهُ نكأتني قبل أن تغادر،
ومضى...
ولم يرَ كيف كنتُ أُذبحُ من ظهري،
وأنّي أحتضرُ واقفة.

لكنّي،
بكلِّ ما في الهزيمةِ من كبرياء،
سأرفعُ رأسي،
أفُكُّ عصبةَ الدم،
وأرى...
من جديد..

من سمعت صوت جبرية وهي تصيح عليّ، حسّيت كل شي بداخلي تجمّد. چنت لأمة اخواني بحضني ، وسلوى تبچي بصمت حتى ما تكسرني أكثر. رفعت راسي ببطء، عيوني تدور على الوجوه، كلهم يباوعولي كأنهم يودعوني للمرة الأخيرة..

فزت سلوى بسرعة وما تحملت تكتم بجيها اكثر .. لزمتني من ايدي وهي تهز برأسها: لا بسمة لاترحين

ابتسمت الها احاول اريحها
: سلوى شنو چنه نسولف حبيبتي .. انتي مو زغيرة .. اريدج تصيرين قوية لخاطر اخوانج واني نطيتج وعد كل يوم وكل ساعة راح تلكيني يمج ..

سكتت وبقت تباوع على باب الغرفة ..

گمت من مكاني ، بس رجلي ما بيها حيل. ماكو زفة، لا دگ طبول، لا فرح، و لا حتى ظل ضحكة. كلشي صار بالسر، كأنهم يسلّموني للموت بسكوت... وبس دمعاتي وقهري وحقدي مرافقني .. حلفت وأخذت يمين على نفسي ..
ادفعهم ثمن كل الي صار بينه .. بس اطلع من هذا السجن

مشيت بخطوات مترددة طلعت من الغرفة للاستقبال ، اخواني يمشون وراي .. ورعد ووعد كل واحد بيهم لازمني من ايد ..

كاعد بكل قوة وصلابة.. وكاشخ بقاط نيلي وقميص سمائي فاتح .. ورباط مخطط متناسق ويه قاطة .. وصابغ شعرة وشورابة .. ومحاول يغطي صلعته مثل ذيج المرة

صادق: تعااي بسمة كعدي يم زوجج ..

الجو كان مليان بالضحكات المزيفة .. والمجاملات التافهة.. تقدمت وكعدت بصفة وخليت بيني وبينه مسافة
لكن ابد ما خليت عيني بعينه ..






ولا واحد منهم كاله حجاية التنكال.. ديربالك عليها .. نهائيا.. كل كلامهم .. بسملة خلي الحجي بعيونج .. اسمعي كلامة .. لاتعاندينة .. والخ .. من هذه التوصيات
وهو يضحك ضحكة مستفزة ويرد عليهم

: لا حبابه هي مبينه .. ويباوعلي

الكعدة طولت يمكن ربع ساعة أكثر شي ..

: يله احنه بعد نترخص .. وجه كلامه الي .. بله بسبوسه نروح ..

من كالي بسبوسه لعبت روحي من اسمي عود يدلعني ..
تركته وكمت طلعت من الاستقبال.. حضنت اخواني ثنيهم .. وسط توصياتي .. و وعودي الهم ان ابد ما راح اتركهم وراح كل يوم اجيهم ..

احتضنت سلوى بقوة : سلوى حبيبتي لاتنسين شنو وصيتج ..

هزت راسها ودموعها تنزل

: سلوى فدوة مسحي عيونج لا تشعلين كلبي أكثر ما هو مشلوع اريدج قوية فدوة ..

مسحت دموعها مجبورة .. وقبل ما اطلع تقرب جبرية تسلم عليه وتباوسني ..

: شايفة كل الخير .. داري الحجي ..

ضحكت منى بخبث : ايي اليوم الحجي صابغ ومكلف.. لا تفشلينه بسبوسه رفعي راسنة عود

حجتها وغمزتلي ..
تجاهلت كل كلامها وسكتت .. وطلع الحجي من الاستقبال وصاحوني حتى اروح وياه ..
وطلعت… بلا زفة… بلا فرح… بلا كلب .. كلشي بيه مهدوم .. طلعت تاركه روحي وراي..
واخواني بقو يبجون وراي .. جبرت نفسي اطلع وما ارجع عليهم وخلي سلوى تسكتهم ..

من صعدت بالسيارة، صدري اختنك أكثر ما اني مخنوكة
حسيت خلص كلش صار صدك وهاي اني رايحة ويه هل شايب .. يعني فعلاً.. اني شبابي راح يندفن بحضن هل عجوز .. راح اصير لعبه بيده يرجع شبابه بيها ؟

صرت ابتلع غصتي وحده وره الثانية
فزيت من صفنتي وكزبر كل جسمي من لزم ايدي فجاء
مجرد حسيت بملمس ايدة.. كشت روحي وبسرعه سحبت ايدي منه .. وباوعت اله بنضرة اشمئزاز ..

وهو رجع ضحك ضحكة غبية : هههههههههه شبيج يمعودة تره كلها لزمت ايد .. لعد فد شوي شراح تسوين

درت وجهي للجامة احس بقرف مو طبيعي ..

صح هو وجها مو قبيح .. شخصيته مرتبه.. نضيف وكاشخ
بس اني الوضع كله ملعب نفسي .. الطريقة الي انطوني بيها ملعبه نفسي.. فرق العمر الي بيني وبينه .. ملعبة نفسي .كل هذا اسباب كافية حتى تخليني تلعب نفسي وانقرف منه .. مجرد اغمض عيوني واتخيل اني بين أديه فورا احاول اطرد هل تخيل من بالي لأن ما اتحملة ...






الطريق للبيت تمنيته يطول أكثر وأكثر .. بس للاسف بدقيقة يمكن صرنه يم باب البيت .. هو نزل قبلي وفتح باب السيارة الخلفي. .. وسحب جنطة ملابسي .. وجطنه ثانيه يمكن ملابسة .. وعلاكة سودة جبيرة ..

بقيت متبسمرة بمكاني .. ما اريد انزل ولا ادخل البيت وهو وياي .. وكف يم باب البيت يريد يفتحه وانتبه الي بعدني كاعدة بالسيارة ..

: ما تنزلين شنو كاعدة تأخذين خيرة
سحبت نفس .. خايفة متوترة مقهورة ... فتحت الباب ونزلت ..
وكف هو يفتح بالباب .. وسحب جنطنته وعلاكته ودخل ..واني سحبت جنطتي ودخلت ..

...............

سلوى: شكد ما حاولت اكون قوية ومتماسكة كدام بسملة لكن من طلعت ماكدرت اقاوم أكثر.. ركضت للغرفة
كعدت وخليت راسي بين رجلية .. وبجيت بكل قوتي .. مثل الطفلة الي تبجي وتريد.امها ..

الغرفة كانت هادئة وكلشي بيها موحش، هل الهدوء نفسه كان يعصر الروح. .

ماكو غيري أنا، والحيطان اللي سمعت بجاي حسيت نفسي لاول مره اني وحدي بهالدنيا، مثل يتيم بين ناس ما تعرف الرحمة ... وفعلا اني يتيمة بين ناس ما تعرف الرحمة .. لكن بوجود بسملة .. كلشي جان يهون

بسملة مو بس أختي، كانت أمي من صغري... من فتحت عيوني، وهي الحضن اللي ألتم بيه، والإيد اللي تمسح دموعي، والصوت اللي يطمّنّي. هي اللي قامت بدور الأم ما خلّتني أحتاج شي،
كانت تصحى أول وحده وتنام آخر وحده، تغسل، تطبخ، تدرس ، وتتحمل كلشي... حتى لو تعبانة ما تبين، تضحك وتضحك بوجهنا حتى لا نحس بشي. شلون تتحمل كل هالهم، وأنا اللي لو أحمل ربع همها، إنكسر

اليوم راحت، وگلبها مجبور مكسور .. وبقينه أنا وخواني الزغار، وحدنا ببيت مليان وجوه تخوف، ناس ما تعرف رحمة، عمام يطمعون بكلشي حتى دمنا، وزوجاتهم اللي لسانهم سيف وعيونهم سم.
أنا أخاف، مو علَيّه بس، أخاف عالزغار... شلون أحميهم؟ شلون أوكف بوجه ناس ما تخاف الله؟ لو صرنا يتامى من قبل، هسه صرنا وحيدين، بلا ظهر، بلا سند، بلا بسملة.

كل زاوية بالبيت تصيح "بسملة"... بس هي ماكو. راحت ويه رجل ما يرحم، وغصبوها مثل النعجة يسوقوها للذبح... وأنا هنانة، أحاول أتشبث بروحي، حتى لا أنكسر، بس أحس روحي متفلشة، ومحد يلمّها... وخايفة حيل خايفة .. اوووف شكد جانت لعد مصدر امان النة ..

واني كاعدة بمكاني .. صرت احس بألم بسيط بكلبي .. كمت اسحب نفس وازفرة .. بس من اسحب النفس احس مثل عضلة بكلبي متشنجة وتاذيني حيل ..
بقيت اتنفس لحد ما شوي شوي هدء الألم .. وتنفست بشكل طبيعي ..






ندك باب الغرفة وانفتح قليل .. وبين منه محمد ..
مسحت دموعي بسرعة .. وهو كال

: عادي ادخل ؟

كتله واني احاول اخفي عيوني منه
: ايي تفضل ..

من دخل هو الباب نسد وراه .. رجع بسرعه للباب وفتحه على حيلة.. وتقرب يمي كعد بعد مسافة متر تقريبا ..
بقى صافن بية دقائق واني عيني تجري دموع وامسحهم وخشمي صار احمر ..

: احمحم .. حجة واحسه متردد ..

:سلوى ما اريد تتوقعين انتي بقيتي وحدج لو تحسين هيج .. اعرف هسه انتي خايفة لأن بسملة كانت شايلة عنج هواي امور .. بس شوفي .. اني موجود وابد ما اريدج تحسين أنتي وحدج هنا .. من بسملة ما مجودة اني بمكانها .. اي شي تحتاجي ..اي احد ياذيج تعالي كوليلي

حجيت بقهر : بسملة محد يسد مكانها محمد .. لاصغرن بيك بس محد يكدر يقدملنه الي بسملة تقدمة .. رغم كل الي يسوو عمامي ونسوانهم .. بس بوجود بسمة عمرنه ما حسينه بفراغ حتى من جنت اخاف من شي هي الكاها فوراً تجي وتطمني .. بسملة جانت ملابسي ما تخليني اغسلهن تخاف عليه اتعب .. بس هسه مجرد طلعت .. فقدت الامان وصرت اخاف واحس روحي وحدي ..

محمد.اني اعترف .. اني خوافه وما أكدر أواجهه لو أرادد .. رعد وكح حيل وكل شوي عمتي تركض وراه تريد تضربه بسملة هي الي جانت تحمي .. اني .. اني كل ذني ماكدر اسويهن .. اتمنى اكدر اكون مثلها بس اني هاي شخصيتي هاي اني جبانه شنووو اسوووي ..

حجيت هيج وخليت راسي بين اديه ابجي بقوة حيل كارها ضعفي ..

تقرب مني شوي وحجي
: سلوى انتي مو ضعيفة منو الي كالج هل كلام .. بالعكس انتي حبابه وهادئة ومؤدبة .. الفرق بينج وبين بسملة .. هي لأن ربت من طفولتها تعلمت تحمل المسؤولية هل شي خلاها عصبية وتواجه .. بس انتي المدلله مالتها .. لهل سبب انتي هيج هادئة بس انتي مو جبانه بالعكس .. تتذكرين ذاك اليوم شلون من شفتي بسملة جاي تنضرب .. شمرتي نفسج فوكاها وصرختي بوجه ابوي بدون خوف .. برايج الي تسوي هيج هاي جبانة ؟ انتي معتمدة على بسملة وبس.. لكن هسه اني متاكد راح تبين سلوى القوية .. السباعية الي تشيل مسؤولية اخوانها بوقت الي بسمله ما موجودة..

باوعت لمحمد، وكل كلمة ينطقها كانت تنزل على كلبي مثل البلسم، حسيت اول مره أحد يشوف بداخلي قوة اني نفسي ناسية وجودها.

سلوى بصوت خافت:
:محمد… شكراً لأنك تصدگ بيا، لأنك شفت بي شي أني ما شايفته… ما أدري شلون، بس كلامك ديحسسني ، كأنه شي انفتح بكلبي






ابتسم محمد بهدوء، وقرب منها أكثر، يحاول يطمنها بنظرة عيونه قبل كلماته.

محمد:

: أني ما دا أجاملك، أني دا أحچي الصدگ… أنتي تستاهلين أحد يوكف يمچ، مو لأنج محتاجة، بس لأنج تستحقين...

رفعت راسي اباوع بعيونه وهو يحچي، كل كلمة طالعه منّه چنت أحسها تدخل جوّه روحي، تحرك شي بكلبي ما أعرفه

:مسحي دموعج سلوتي ... كالها وهو يباوعلي ويبتسم كأن الدنيا كلها متوقفة بين عيونه وعيوني.
ما حسّيت بنفسي إلا وإيدي تمسح دموعي، حسيت اكو مصدر امان ثاني غير بسملة ..

كلش غريب هالإحساس... چنت أحس كلبي يدگ بسرعة، ... من شي حلو، دافي
. نظراته، صوته، حچيه، كلشي بيه يخليني أريد أظل يمّه أكثر. چنت أريد أگله ..لا تروح ... ظل إحچي بس سكت، واكتفيت بابتسامة صغيرة كأنها انولدت من كلبي وبينت على وجهي.
محمد مو بس گال إني قوية… خلاني أصدك واحس بهل شي

سكتنه شوي، بس السكوت بينه ما چان ثكيل، بالعكس، چان بيه راحة… ودفء. محمد كسر الصمت وهو بعده يباوعلي:

محمد:
:تتعجبين إذا گتلج أحسچ صايرة غير؟ حتى صوتچ، نفسچ… بيه شي متغير...

ضحكت بخجل، ونزلت عيني للأرض:
:يمكن لأن أول مرة أحد يحاچيني بهالطريقة…

ابتسم محمد، وقرب شوي، صوته صار أهدأ:
: بوجود بسلمة .. ما جنت اشوفج محتاجتني .. بس هسه اني موجود..وبسملة هم موجودة.. كلنه موجودين يمج .. ماريدج تبجين لو تخافين من شي بعد ..

رفعت عيوني عليه، كلبي صار يدگ أسرع… چنت حايرة شجاوبه، شلون أحچي وهو يخليني أضيع بين كل كلمة

:تعرف محمد؟ كلشي صارلي، من مات أبوي، وامي تمرضت وتركتنه .. بسملة صارت تشيل الحمل ، چنت أحس روحي زايدة .. وحمل زيادة ..

محمد، وهو يمد إيده بحذر، يحاول يلمس طرف إيدي
: سلوى، أني أريد أكون يمچ، مو بس اليوم… بكل الأيام الجاية... كل عمري !

تجمدت للحظة، بس ما سحبت إيدي… حسّيت حرارة لمسته تدخل من أطرافي وتوصل للكلب. يمكن هذا هو؟ هذا اللي يسموه حب؟ أو بداية حب؟ ما أدري… بس أدري إنّي ما أريد اللحظة تخلص. ..

دخلو اخواني للغرفة وهم الحزن واضح على ملامحهم ..
انطيتهم فلوس حتى يشترون واحاول انسيهم شوية
طلع محمد وراح .. واني كعدت بالي كله يم بسملة .. وبنفس الوقت احساس حلوو احس بي ..
لحد الليل .. واني كل ما اتواجه ويه محمد.. كلبي يضل يدك سريع واخجل حيل احاول ابعد نضري عنه ..






حاولت اسوي كل الي جانت تسوي بسملة.. حضر الهم عشى وعشيتهم .. وكعدو يباوعون على التلفزيون
واني بقيت وباهم بس بلا خلك ..

حجى رعد من مكانه: اليوووم من رحت اشتريت .. شفت عدنان يم ابو المحل يشتري جكاير ..

باوعت عليه اتسائل : ايي شحاجاك ؟

رعد: كالي شلونكم ... وكالي اني اداوم بغداد ومرات من يخلص واجبه يجي يبات هنا ابيتهم .. وكال شلونكم ..
كتله بسملة تزوجت وراحت مساع ويه رجلها ..

: شنو كال من كتله هيج

: ما كال بقى ساكت .. واشترالنه اني و وعد وطلع من المحل

سكتت مقهورة اكيد هسه ورث من القهر وهو الي من طفولته ويه بسملة ويحبها .. مو سهله عليه حبيبته تتزوج
الله يعلم شنو حاله هسه .. وشنو حال بسملة !

...........

بسملة...

:نوورتي البيت يا احلى البنات ..

اول ما دخلنه حجاها .. وفجاء اجه بلا مقدمات مثل الملكوف يريد يجرني
سحبت نفسي وبعدتها عنه ..

: هاااي شبيك انطيني مجال

حجى بطريقة استفزازية وهو يجرني من ايدي .. ما اكدررر اصبرررر تعااالي ولج

نكتت ايدي منه: دوووخر شنو هاي انطيني نفس ..

رد وهو طابك حواجبة: انطيج نفسسس لشنو .. هاي شبيج تتهربين ؟

: اتهرب ؟ تره اني لا اعرفك ولا تعرفني وهسه بلا مقدمات جاي تريد تجرني .. شنو هاي ..

رجع ضحك عود مقدر وضعي
: ههههه اي اي هم حقج اني مستعجل.. يله براحتج .. بس لا تسويها طويله .. تره اني صبري قليل وبسرعه امل ..

درت وجهي منه ورحت للغرفة دخلت وسحبت جنطتي وراي .. كعدت على الجرباية .. خليت راسي بين أديه ..
كلبي معصور عصر .. وافكر بطريقة تخلصني من هل كائن الي بره.. نضراته أقذر نضرات اشوفها بحياتي
وين اروح .. وين اختفي ..

رفعت راسي للسماء وكلت : يااارب يااارب يااارب ..
بالي ضل يم اخواني.. وقلقه عليهم ... وبالي ويه عدنان
وماعرف اذا درة هسه بزواجي لو لا ..
.. وجهه، صوته، ضحكته، غيابه...موقفه وياي اخر مره .. كله يمر كدامي، مثل فلم ينعاد بلا توقف. شلون لو عرف؟ شيسوي؟
ينكسر؟ يلومني؟ يساعدني؟






كعدت، مسحت وجهي بكفي، سحبت نفس عميق...
..ما راح أظل بهل ذل، لازم ألكه حل... لازم!
شلون بهذا الي كاعد بره .. شسوي وشنو اتصرف وياه
بسبب الخوف والقهر والتوتر الي صابني .. حسيت بمغص قوووي .. وبطني حيل اذتني ..

عصرت بطني بأيدي متوجعة .. حيل منها كأنما امعائي جاي تنعصر .. وكفت بصعوبه وفتحت الجنطه طلعت منها دادشة بيت .. وحرصت تكون ردن طويل وعريضة.. ومسحت كل مكياجي من وجهي..

وطلعت .. لكيته كاعد بالصالة .. نازع السترة والرباط وفاتح قميصه .. اول ما طلعت هو التفت علي .. بس خابت آماله من شاف لبسي وحجى مزعوج

: هااااي شنو الي لابسته

رديت بعدم مبالاة: شنوو ؟ لابسه ثوب

: اكو عروسه تلبس بيوم عرسها هيج ثوب جنة ثوب امي

تكتفت وكتله: عجبني كلش حلو

: بس اني ما عجبني .. وطول ما اني موجود ماريد تلبسين هيج كدامي

رديت باستفزاز : شتريد البس لعد

: اريد كله كصير وضيك وصلوخ .. وبعدين اني مو كتلج احب الاشياء الي تبرك وتلمع .. روحي لبسي شي بي لمع

رغم ضوجتي بس من ذكرت المع تذكرت عدنان .. رديت عليه: ما اشتريت شي بي لمع ...اكررره الماااع

: بس اني احبه ..

: واني اكرها

حجى وهو يكوم يتقدم بتجاهلي
: هاااا ...انتي واضح راح تتعبيني وياج .. ومبين عليج عنودية.. سمعي .. هاي الدراما ماراح تفيدج .. ماشي يحلوى واليوم لو تلبسين كونيه اول وتالي راح تنزعينها .. تعااااي

جرني من ايدي محاول يدخلني للغرفة .. عتيت ايدي منه بخوف .. ورجع المغص عليه .. صحت بوجع واني الزم بطني :اخخخخ بطنيي

ترك ايدي من شافني متوجعه وسأل : شبيج ؟ شبيها بطنج ؟

بلا ما ارد علي.. ركضت للحمام ..
بقى بمكانه واكف وصاح
:اهوووو مبين لليلة مراح تخلص على خيررر...

من طلعت لكيته ماكو مادري وين طالع .. ركضت للغرفة.. ومددت على الجرباية ولفيت نفسي مثل الجنين ..
احس حتى صخنت .. بلكي اليوم اصير ونيدة كلش واخلص منه ..
مر تقريبا ساعة .. وصار مغرب كلش ... هو فتح الباب الغرفة علية .. غمضت عيوني اتصنع النوووم
دخل الغرفه وكف يمي .. وحجى ..






: كوووومي سويلنه لكمة .. رحت جبت مسواك وجبت دجاجه مشويه ..

فتحت عيوني بتعب .. وكعدت حتى اكوم من الجرباية سألني: شنوو شبيج ..

: بطني توجعني حيل

: بس لا ذيج السالفة

اني فورا صفنت .. ابد ما كان على بالي هذا العذر .. لأن هو مجرد مغص بسبب التوتر .. يعني مو الشهرية .. بس من حجاها هو خطرت أبالي وكتله
: اي هي

صاح بيه لدرجه فززني : شنوووو لعدد ما حجيتي نأجل شنوو على حضي المصخم

: اني شدراني قابل بيدي

حجى بملل: وشوووكت تخلص

: عشر ايام

: شنو عشر ايام وين اكو وحده تضل عليها عشر ايام انتي جاي تجذذبين ..

رديت علي واني ميته بدمي بس انجبرت انطي هيج عذر : لا ما اجذب

: سمعي ولج الج اربع ايام وراهن .. ما تلومين اله نفسج
مو ورطني بيج وتالي كلشي ما احصل .. اروح ادوس بمصارين صالح واطلع فلوسي من خشمه ... قحط نسووان
كووومي سويلنه زقوووم ..

كمت مرتاحه .. أن اليوم راح أخلص وما يجيني ..
رحت للمطبخ .. لكيت العلاليلك تارسه المطبخ متسوك من كلشي .. بديت اصفي بالمسواك ..

فتحت الثلاجة لكيت بيها علاكه سودة .. جريتها اشوف الي بداخلها.. وانصدمت من شفتها شرب بيها .. وكرزات
لعبت نفسي وشمرتها من ايدي رجعتها لمكانها
كرهته أكثر ما اني كارهته .. خليت اله العشى بصينيه ورحت خليته كدامه واجيت ارجع للغرفة صاح وراي ..
تعاااالي تعشي ..

حجيت من مكاني : ما اريد
: تعاالي تعشي

: كتلك ما اريددد

: واني كلت تعالي تعشي وما راح اعيد مرة ثالثة .. تره وصلت وياح حدها وساكتلج ..

رحت كعدت كباله بلا نفس .. صرت انكش .. لعبانه نفسي وكارها وجوده وكارها كلشي بهل بيت .. وكملها الشرب الي شفته .. الصلاة فاتتني .. وبقيت احوس اريد اصلي.. بس خاف يشوفني هذا وهسه يكلي جذابه ماعندج عذر ..

اكلت لكمتين بوسط سكوت .. ومخليه راسي بنص الصينيه ما اطيق ارفع راسي. اشوف وجها ..

خواني ؟ هسه تعشوو ؟ سلوى صبت الهم عشى ؟
هسه شجاي يسوون ؟

: شبيج ما تاكلين






رفعت راسي على صوته وحجيت : بالي يم اخواني اول مره بحياتي هيج ابتعد عنهم

:وانتي وين عايفتهم بالشارع.. هم بيت اهلهم

: ايي اليدري يدري ..

تركته وكمت دورت بالمواعين لكيت قوري .. وكفت اخدر جاي .. رجعت الصينيه لكيته مكمل اكل وكايم يغسل .. شلت الصينيه وكمت أعزل بيها ..

اجه من المغسلة دخل للمطبخ وكف وراي قرريب كلش ولزك روحه بيه .. غمضت عيوني وجمدت جسمي .. روحي لعبانه من قربه.. ولا طايقة ريحته .. ابتعدت عنه بحجه أرتب المواعين ..

: من تكملين رتبيلنه كعدة عود

درت عليه : كعدة شنو الي ارتبها ؟

: هاي العلاكه السودة رتبي الكرزات بماعون وكصصي ليمون ورتبي ميز .. وتعالي اكعدي يمي

حجيت بعصبيه : اسمع .. اني أسنانه استنكف من هاي الشغلات حرام .. وعمري وحياتي ما شفت احد يشرب كدامي

: ايبااااااه حرام .. على أساس عمامج شرفاء لو صالح شريف روما وهو نص دينة من وره الكح**

: اني مالي شغل بيهم عليه بنفسي ومستحيل ايدي تلمس هل قذاره ومستحيل اشارك بهل إثم واحضرلك كعدة وهل سوالف .. شنو شايفني

فجاء اجاني ولزمني من شعري

: اكلجج تره احترمج هووواي وكلت مستحيه كلت اول ليله الها كلتي عليه الصخام وخربتي الليله كلها وسكتت بس لا تجين تصيرلي علوية براسي .. اني هيج رجااال صاحب مزاج و ونسه يعجبج يعجبج ما يعجبج ركعي راسج بأكبر حايط .. اني اخذتج بفلوووسي تونسيني وتمعتيني وتسوووين كل الي اريدة منج ..

نكتت ايدي منه بعصبيه
: تخسه انت والي فكر يبيعني الك .. اني الشي الوحيد الي خلاني اقبل بهل صخام هذا .. هو خوفي على اختي .. لا عبالك ملكتني.. وتمشيني على مزاجك .. اني اساسا روحي لعبانه منك نوب تشرب هذا السم .. لعبت روحي منك بالزايد .. عووووزي ولله احضرلك ميز لهل منكرر.. جان استحيت على نفسك اول يوم الي وجاي تطلب مني هيج طلب ..

فتح عيونه على حيلهن وهوو يسمعني .. صار يتلفت يدور على شي يضرب بي .. ركضت منه اشرد بس ما لحكت لزمني من ايدي ولواها ..

: تعاااالي اشوووفج شلون تلعب روحج مني .. الا صدك العب روحج اليوم .. واخليك تسوين اشياء تكرهج بروحك قبل ما تكرهج بيه .. لج اني نسوووان يجي جوة رجلي انتي الزعطوط جاية تنترين بوووجهي ..






صرت اتلاوه وياه : دوووخر منيييي كدرتك على بنيه ..
روح انت اشرب وحضر ميز لنفسك اني ما احضر شي ..

: تعاااالي اعلمج تعااالي .. صار يسكل بيه من ايدي ومشدد أيده على معصمي واني لازمه أيده بايدي الثانيه واحاول افتحها بس ماكدرت ابد .. وبقى يجر بيه ..
شمرني على قنفة الصاله.. اجيت بنفس اللحظة اكوم بس هو اسرع مني ورجعني وشمر نفسه فووكاي ..
وصار يحاول يبوس بوجهي .. واني ارفس جواه وابعد بوجهي منه .... احس بقرف ما ينوصف اتجاها .. وصلت لمرحله حسيت راح اتقيئ ..

: وخرررر مني وخرررر لزكة .. دوووخر ..

صطرني براجدي فر وجهي فررر وهو يكلي
: منوووو هذا اللزكة منوووو...اليوم اشعل صفحة صالح الورطني بيج ..
الا تلبين رغبتي وما اتركج لحد ما اخذج .. حتى لو عندج عذررر ..

شك ثوبي من صدري .. واني اقاوم بي
ظل فوكي، يتمادى، وأنا جسمي يتلوى تحت ثكله... حسّيت نفسي مو إلي، كلشي بدا يضيع ... أفلت نفسي منه وهو يرجع يسحبني اله .. جان قوي .. واقوى مما توقعت ..

بجيت وصرخت: كااااافي وخرررر الله عليك وخرررر

شال رأسه فحطان وتعب من مقاومتي ...

انتي شكد عرررمة ولج .. بس عرامتج ما تمشي وياي ...
لو اني لو انت اليوم ..

استغليت تعبه .. وصار يتنفس بصعوبه .. وصدرة يصعد وينزل بقوى..
ودفعته عني .. ندفع بسرعة وطاح على القنفه كوة يسحب النفس.. ركضت للغرفة .. ودخلت قفلتها بس ما جان بيها مفتاح .. بس نطبكت ..

كعدت ارجف واتنفس بقوى ... احس هلكت ونهد حيلي كدا ما صيحت ودفعت بي ..
بس الغريب بعد هو مالحكني .. وصار هدوء برة ..
بقيت اذني على الباب ... بس لا مات ؟..

كبل صرت اتخيل يموت واني اطيح بيها وانسجن ..
مر وقت ما يقارب ربع ساعة .. وصار طكطكة بالمطبخ ..
ورة شوي صوت موبايلة دك .. جاوب وطلع يحجي برة

ساعه و وأكثر واني كاعدة ضهري للباب .. وعيوني ما نشفت ..وكلبي ما بطل يدك سريع .. وخايفه يدخل بأي لحظة .. بس ما دخل والبيت هدوء .. تأملت يكون نايم
كمت فتحت الباب ومديت راسي الصالة فارغة ..

طلعت امشي على أطراف أصابعي .. باوعت الاستقبال هم فارغة ...
وين راح هذا ؟ ...
طلعت من باب المطبخ وباوعت بالحديقة .. حاط .. شربه وكرزات بالحديقة بالكاع .. وكاعد .. ومبين علي مفول
وصار فوك الساعه يشرب ..

كشيت وجهي من منضرة.. ورجعت دخلت بسرعة .. ودخلت للمطبخ.. حسيت بجوع قوي عصر بطني رغم ما اشتهي بس جعت حيل.. واستنكفت امد ايدي على الدجاجه الي ماكل منها .. خليت خيارة بوسط صمونه ورشيت عليها ملح وكعدت اكل بيها بدون نفس .. بس لازم ابقى بحيلي .. اول ليله وهيج بدت معارك بالايام الي جاية شلون .. بسرعه اكلت لفتي .. واستغليت مدام طافي مايدري بروحه.. وكفت اتوضى واروح اصلي ..
توضيت بسرعه .. وركضت للغرفة .. وبلشت اصلي.. صليت المغرب والعشاء سوة.. لأن فاتني ..
صليت ركض ركض خفت يدخل ويشوفني .. ونوب يلزك الي ..






جريت جنطة ملابسي فتحتها .. ومن بين الغراض جريت جيزدان زغير خليت بي فلوس .. وبي ورقة العمارة ..
كعدت اضرب صفنات وافكر .. لازم اتحرك واسوي شي .. لازم .. منين ابدي .. وشنو أول خطوة اخطيها..

من بين صفناتي.. نفتح الباب بقوى .. ودخل يمشي بخطوات ثكيلة .. طافي مايدري بروحه ويشوف الواحد اربعه..

فورا دفعت الورقة جوة المخدة.. وهو شمر نفسه فوك الفراش بكل ثكلة ..
وكفت فوراً.. اترك المكان واطلع .. بس لزمني من ايدي وجرني.. طحت فوك صدرة وهو يضحك .. ريحته قويه وتلعب النفس ..لزم شعري وصار يهمس..

: هاي شنو محاسن.. صايرة زغيرة وحلوة ..

كشيت وجهي من رحيته.. وصلت مرحلة الغثيان ومعدتي كلبت..
نوب يمطك بحلكه ويطلع صووت مقرف ..
دفعته حيل وكمت من مكاني .. وهو بلا مقدمات غفة وصار يشخر..

طلعت بالصالة بجيت لحد ما خويت .. وتعبت و نفسيتي تعبت.. عزت عليه نفسي وحيل شفقت عليها ..
تمنيت اشرد لمكان مابي اي بشر غير خواني وعدنان..

هواي احتاجيته واحتاجيت اسمع منه شي يبرد كلبي ..
نسيت روحي متزوجة .. لأن هذه مستحيل يعتبر زواج ..

باوعت موبايلة باقي على القنفه سحبته .. وكمت من مكاني طلعت للحديقة ..

احتاجيت .. اسمع صوته وهو يسولف احس بكلماته يمسح على كلبي ..
ردت يساعدني .. يوجهني.. يكولي شنو اسوي وشلون اتصرف..
بلا تفكير ولا تردد .. تركت كلشي وراي .. ونسيت وعدي لنفسي ونسيت الوضع وبكلشي ما فكرت وكتبت رقمة
.. اكيد راح يتفاجئ .. من يسمع صوتي .. اكيد راح الكه عدنان الي مابيوم احتاجيته وتركني ..

رن الجهاز .. وكأنما مخلي اصبعه على زر الجواب..
بسرعه فتح خط .. اجاني صوت ... خشن وحيل تعبان

:الوو

عيوني جرت دموع وطلع صوت نشغه
م

ن نص كلبي
: عدنان ..

سكت ثواني يستوعب الصوت الي سمعة .. وحجة

:بسملة ..

:اي اي اني بسملة ... هذا رقم ... سكتت مغمضة عيوني بس هو سبقني وكال

:رقم زوجج .. تره محفوظ عندي

بلعت ريكي بقهر وكتله: هل بشر مستحيل بيوم يصير زوجي ..

صاح بيه حيل بقهر ونار تطلع من حروفه.
:بس صااار .. وهسه انتي ابيته واكيد قبلها جنتي بين اديه .. ماصار الي مجال اباركلج .. بس هسه اكلج بحكم العشرة والجورة .. الف مبروك وشايفة كل الخير ..

هزت راسي نافيه كلامة :لا لا عدنان ياخير هذا .. تره..

سكتت فشلانه شنو اكله ..
:لاتحاجيني بهل اسلوب وكأنما اني الي صار براضاتي ..

: انتي السبب بكل الي صار .. ضعفج وجبنج هو الي وصلج للي انتي بي .. صاح بعصبيه .. الفففف مره كتلج ذووول عمامج عااارات وحتى لو طلعتي بيوم حتى ماراح يكلفون نفسهم ويدوروج .. الف مره كتلج بسمه تعاااالي .. تعااالي واضمج برووحي وقفلها عليج .. كتلج فوراً نروح نعقد محمكه وشيخ حتى لا بيوم احد يكدر ينك بيج .. گتلج هل عقدد بااااطل .. وكلشي صار هسه بينج وبينه حرررام لأن عقد بااطل ..
كتلج بسمه .. روحي معلكه بيج لاتكسريني .. كتلج من تضعفين أخذي قوتج مني .. من تتعبين أخذي من حيلي .. كتلج اني اصيرلج السند والضهر وكلشي تردي ..

شسووويتي ؟ ... هااااااااا جااااوبي شنو سويتي .. رحتي وافقتيهم بلي يردون وباعوج برخصصص .. وانتي مثل النعجه يسوقون بيج مثل ما يردون .... انتيي وحده غبيه .. الي يلكاله سند ينسند عليه ويتركه ويختار الذل هذا غبي .. ونتيجة غبائج هذه كدامج رجال بكد جدج .. اخذج بمكان دين عمج .. عمج صادق الكو*** ما انطه بنته ..؟ .. اكيد لا .. من اجيت اخطبج .. عمج صااادق توقع جاي على منى فوراً كال كبع واخذذذها وين نلكه احسن منك .. بس من عرف جاي عليج .. كال لا. مخطوبة .. تدرين ليش .. لأن يردولج الذل وانتي راضية بهذا الذل.. بالعافية عليج ..

طول كلامه واني صرت ما اشوف بعيوني غركن ..
كملت كلامي واني ضايجة من روحي بسبب نبرته ولومة وهو يعرف كلش زين الوضع الي تزوجت بي .. ويعرف مدى خوفي على خواني .. بس ؟ بس معقول كلام عدنان هو الصح .. واني الغلط .. حاولت اتماسك وأبين اله ما مهتمه

: اني ... اني بس اتصلت ردت مساعدتك بشي ..

كلمته أحسها ضربتني على راسي من كال ابرود عكس روحه المحتركه والي طلعها بالجكاير كل هاي الايام وكلامه هسه .. وبعد عصبيته كلها رجع حجى برود

:كولي خوية بشنو اكدر.اساعدج .. لأن لازم اروح وانتي هم لازم تروحين .. مايصير بهيج لليله وتاركة زوجج وحده..

غضيت شفتي حيل واني امنع صوت البجي يوصله ..

: مشكور .. ما اريد شي ..

سديت الخط .. وكعت بمگان انهاريت .. من أدركت أن فعلاً هاي هي كلشي انتهى واني وعدنان .. صرنه مستحيلين.. حلفت من هل لحظة .. اذبح بسمله الي تخاف وتحسب حساب ..
وحلفت بروح ابوي ومرض امي وكسرت كلبي .. من هذه اللحظة بس اعتمد على نفسي .. مستحيل بعد استسلم لو ارضى بشي يحكمونه عليه ..
ومن باجر .. من باجر أول خطوة ...

يتبع

26

تُحدِّقُ...
وكأنّ الحزنَ يسكنُها،
صوتُ الليلِ في جفنَيها،
ووجعُ العمرِ في نظرةٍ
تمضي ولا تُفصحُ عن مأساها...

كأنّها قالتْ،
ولم تنطقْ،
كأنّ الوقتَ خائفٌ من صوتها
أو ربما،
صوتُها مبحوحٌ من كثرِ البُكا.

في معطفٍ صامت،
تخفي الشتاءَ عن كتفيها،
لكنّ الريحَ تعرفُ
أنّها
امرأةٌ من نارِ فقدٍ وارتجاف.

------------------------------

صبرت روحي الموجوعة ومسحت دموعي بإيدي المرتجفة. الوجع ما راح يكتلني. بالعكس، لازم يقويني
واخذت نفس عميق. صوت أنفاسي يغلب الصمت،

لازم اكوم من بين الركام، عيوني ما تباوع ورا، تباوع كدام ... شنو يعني .. اني خسرت ابوي خسرت امي.. يعني عدنان شكد ما جان غالي .. مو اغلى من امي وأبوي
حتى لو حبه عايش بروحي .. اغلق على هذا الحب واخلي لنفسي وبس ..
وهو ما الومه ابد ولا ازعل منه .. هو حاول وياي لآخر لحظة ومافلت ايدة مني لحد ما اني فلتتها ..

طلعت رقم عمي صالح .. ودكيت عليه .. دك أكثر من دكة يله فتح خط

: هلاا بالعريس

غمضت عيوني من حجايته الحقيرة فرحان بالعريس ولاكانما هل عريس ماخذ بنت اخو ..

: عمو اني بسملة
من سمع صوتي حجة برود :ها بسملة شرايدة

: اريد سلوى اطمئن عليهم
: وشبيها سلوى صلخاناها ذبحناها ذيج هي كاعدة بغرفتكم

: اي اريدها اطمئن عليها .. وكملت كلامي بخبث .. الحجي شافني بقلق .. كال اتصلي بيهم

: اوكفي ..

انتضرت شوي وهو يصيح سلوى سلوووى .. واخر شي .. كال عمران ودي التليفون الهم وخل تكمل وترجعة بسرعة ..
بقيت على الخط لحد ما اجاني صوت سلوى ملهوفه

: بسمة .. حبيبتي شلونج .. شخبارج شتاقيتلج

ضحكت على سرعتها ولهفتها : على كيفج يمعود ماصار كم ساعه من تركتج






: ولله هاي الساعه جنها سنه مرت .. الغرفه وحشه وكلشي وحشه بدونج

: اخوانج شلونهم .. عشيتيهم ؟ خوما أحد حاجاكم

: لا لا محد محاجينه .. وعشيتهم .. والعصر انطيتهم فلوس راحو اشترو

: اي عفيه سلوى حبيبتي عينج عليهم واني باجر من الصبح اجيكم ..

:بسمة .. رعد شايف عدنان بالمحل .. وكايله بسمة تزوجت

سكتت بلا ما ارد على كلامها وغيرت الموضوع
: سلوى انتي وين ومنو يمج ..

: محد يمي عمران انطاني الجهاز وراح بس كال بسرعة فضيها

: سمعيني زين وفتحي اذانج للي راح اكولة
الجنطه الرصاصي الي بالكنتور .. بالرف الفوك .. اريدج .. تطلعينها من الكنتور وتخليها بمكان أمان .. تدرين وين اريدج تخليها جوة الكنتور دخليها من الفتحه الي صايرة بالكنتور صفح .. وخاااف أحد يجي ويدورهن .. تكوليله بسملة أخذتهن وياها .. اني باجر من غبشة يمكم ..
فهميتني سلوى ؟

: اي اي فهمت وراح اسوي مثل ما تكولين ..

: هسه بس تسدين الخط ترحين تضميها ..

: ماشي ..

: يله هسه اروح اني وانتي سدي الباب مال غرفه .. وانتبهي للجهاز قبل لا ترجعينه خاف بي تسجيل لو شي

: تمام ..

: يله حبيبي تصبحين على خير ..

سديته ومنها ودخلت للبيت مسحت كل المكالمات ورجعت الجهاز لمكانه ..
مددت على القنفه خليت التكيه جوة راسي .. وكعدت افكر اول شي شنو اسوي ؟ ومنين ابدي..
غفيت واني احلم باجر احسن من اليوم ..
فتحت عيوني الدنيا صبح بس كلش من وكت ..
اول ما كعدت نفتح باب الحمام وطلع منه .. سمير
بملابسه الداخليه.. وجسمه مكرمش وكله شعر .. درت وجهي بسرعه .. حجى هو

: كعدت العرووس .. كومي سويلي ريوك اريد اطلع..
قبل لا اتريك.بيج .. شكلج وانتي نايمة وثوبج مرفوع .. يوكع اكبر راس ..

بسرعه عدلت ثوبي ولميته من صدري .. وركضت من مكاني .. غسلت وجهي من السنك .. وركض خليت القوي وطلعت بيض طكيت اله وحطيتهن بصينه على ميز المطبخ .. وهو طلع لابس نفس ملابسه مال البارحه ..
وكعد يتريك ..






: ما تتريكين ؟

: ما أشتهي اريد.اتريك ويه خواني

: وشكو رايحة من الصبح انتي عروس مفروض ما تطلعين

: اعتقد اني من البدايه كتلك اخواني مستحيل أتركهم ولازم كل يوم اروح الهم لو هم يجون يمي .. وانت كلت احسن ما تضلين وحدج .. كلت لو لا ؟..

: خوش خوش بكيفج .. بس لا تنسين كتلج بيوم الي اني موجود ماريد بشر غيرج بالبيت ..

: الله كريم .. بس هسه اريد اروح الهم وارجع

: اذا تردين خل يجون هنا .. اني راح اروح.. لأن كايل
للحجية بايت بغير محافظة شغل .. وبكل الاحوال اني ما مستفيد منج شي .. فد تلث ايام اربعه واجي..وقتها هم كولي عذر حتى اشعل صفحة صالح ..

: أشعلها مثل ما تريد ..

:بله هذا حال عريس .. كاعدة كبالي الوجه مكلوب.. وبثوب مال بيت وشاردة .. كون هسه كاعدة تسويلي لفات وتوكليني ..

: اقووو اسويلك لفات روح للحجية تسويلك لفات

: وشنو الحجية ما تسويلي .. تره مدللتني دلال .. بس كبرت.. وفقدت إمكانياتها القديمة.. واني روحي خضرة أفقد على الزغار ..

دكيت اديه على الميز طافرة روحي .. وكمت من مكاني احاول التهي بالمطبخ على مايطلع .. وهو هم بس كمل اكل .. وكف يتمضمض على السنك.. وكف يمي جر ثوبي يسمح بحلكة ..

: ايييي وخرررر شبيك قحط مناشف تمسح بثوبي ..

:يعجبني .. يله رايح اني ..
طلع فلوس من محفضته وتركهن على الميز .. وطلع

اول ما سمعته حرك سيارته ركض لميت المواعين وطفرت بدلت ولميت شعري .. وطلعت من البيت طايرة.. احس كلبي ملهوف .. دخلت لبيتنه اول ما وصلت الهول دخلت بدون سلام .. كأعدين يتريكون بالهول ..

فاطمة : بسم الله شنو متحلمة بينه

: اي من كدا ما احبج .. ماكدرت على فراكج اجيت اشوفج ..

صادق :شكو من صباحية الله

: شكو عمو أجيت لإخواني..

فاطمة : وشبيهم خوانج ذولاك بعدهم نايمين بعد شكو عايفه رجلج من الصبح ولافية علينه .. والحجي شلون عافج تطلعين من الصبح






: الحجي هوو خولني وكالي روحي وتعالي مثل ما تحبين والي يندك بيج احط رجلي بي

صادق: انعل ابوج لابو الحجي.. ادبسز بيمن يحط رجله

: اني شعليه ذاك الحجي وروح عاتبه ..

تركتهم متجاهله كلامهم وركضت لغرفتنه .. اول ما فتحت الباب خواني نايمين بعدهم .. ورعد وعد كل عادة كل واحد بصفحه تاركين فراشهم ونايمن بعيد ..

دخلت اتسحب.. وصرف فوكاهم ابوس بيهم ..
اريد يكعدون .. فوراً وعد فتح عيونه وشافني عاطط وهو يحضني

: بسمممة اجييييتي ..

: هههه اي حبيبي جيتت

فزو الباقين ملهوفين .. يحضنون بيه ما مصدكين عبالهم صدك راح اتركهم..
بقيت بالربع ساعه وياهم .. ورحت سويت ريوك وكعدنه نتريك سوة
وجبرية وفاطمه يلوبن .. تجاهلت الكل وما اهتميت ..

: سويتي الي طلبته منج ..

: ايي مثل ما طلبتي ضميتهم بالمكان الي كلتي عليه ..

دنكت وطلعت الجنطه من جوة الكنتور .. فتحته اشوف الي بيها ...وبعد ما اطمنت كلشي بمكانه .. سديتها

:اني هسه ضروري اروح اجيكم الضهر لو العصر وابات يمكم ..

تركتها وطلعت اخذت الجنطه وياي .. رجعت لبيت .. طلعت من الجنطه فلوس .. المبلغ الي جابه الي عدنان ما صرفت منه إلا القليل .. سحبت فلوس ..وسحبت الاوراق الي احتاجها .. بدلت ملابس طلعه .. وقفلت البيت وطلعت .. بادية باول خطوة .. ويمكن الحسنه الوحيدة بهل زواج هو اكدر اطلع براحتي ..

أجرت تكسي مو نفرات .. وطلبت منه يوصلني للمحكمة..
مشيت واني الصدك ماعرف شنو الاجراءات .. بس أبالي كلام أميمة .. وحاولت امشي عليه ..

دخلت أتلفت .. هوسه وناس رايحه جاية.. وماعرف شنو اسوي بقيت امشي فتت من غرفة .. وكاعدين بيها تلث موظفين.. دكيت الباب ودخلت ..

: السلام عليكم ..
: وعليكم السلام
حجيت من مكاني: بلا زحمه بس محتاجة مساعدة استفسار قانوني

: رد عليه رجال يطلع بالاربعين .. تفضلي بشنو نكدر نساعدج






دخلت كعدت على الكرسي الي كدام مكتبه .. وصرت اشرحلة كل الموضوع..

: يعني سابقاً مسوية وكاله المحامية ؟

: ايي بس هي تعرضت للتهديد وسافرت

:معناها اول شي لازم تلغين الوكالة.. عد كاتب الي العدل نفسه الي سويتو الوكاله يمه .. وما تحتاجين وجود المحامية لو أذنها .. المهم يكون عندج نسخه من الوكالة ومستمسكاتج وياج

: اي موجودات ..

:وبعد ما تلغين الوكاله رسمياً.. تراجعين دائرة التسجيل العقاري .. وجود السند الي يثبت العمارة باسم والدج مدام عندج هذا دليل كافي .. بس ضروري تراجعين الدائرة حتى تتأكدين أن ماكو تلاعب لو تزوير بالعقار ...
وراها .. ترفعين دعوة عن طريق محامي
دعوة استرداد ملكية .. ضد عمج إخلاء العمارة وتسليمها الج كونج وريثة شرعية لابوج ومسؤؤله عن اخوانج
وتعويض السنوات الفاتت الي عمج كان مستفيد بيهم من الايجار وحارمكم منه .. هذه القضيه وحدها بس تخلي يزوع كل فلس اكله من العمارة . خلال السنوات الي راحت ..
وبعد ما تصير العمارة الكم .. تكدرين ترفعين دعوة ثانيه وتطالبين بقسام شرعي .. وحصر الأرث وفرز حصص

بقيت استسفر أكثر عن هواي امور .. وهو يجاوبني .. تشكرت منه وطلعت من المحكمة..
اخذت تكسي بوجهي لكاتب العدل ... اول مره بعمري ادخل دائرة ومحكمة.. اني وحدي وبعمر زغير .. ما انكر جنت خايفة نوعاً ما بس الضيم خلاني ادك هاي الدروب بقوة .. بس الي أبالي اكبر من خوفي ..
دخلت الدائرة .. ومشيت لنفس المكان الي رحنه اله اني واميمة.. ورحت للموضف المسؤؤل..

كان يمشي بعض المعاملات .. كعدت انتضر دوري .. تقريبا نص ساعة .. وكالي تفضلي ؟

: اريد.الغي وكاله سويتها قبل سنه تقريبا او عشر اشهر هيج شي هنا بنفس المكان

: وكاله شنو ..

: وكاله لمحامية .. حتى تمشيلي بإجراءات استرداد عقار

: تمام .. بس احتاج جنسيتج .. ونسخه من الوكالة ..

طلعت اله الجنسيه ونخسة الوكاله قراها وقرة التاريخ والاسماء ..
وبلش يكتبلي بورقة .. ومن كمل طلب مني ابصم عليها .. وادخل على كاتب العدل اقدملة ورقة إلغاء التوكيل يوقع عليها ..






اخذتها منه وهو .. دخلني لكاتب العدل بعد انتضرت هم تقريبا ساعة .. دخلت و وقع على إلغاء الوكاله .. وبهل الحال .. كملت أول خطوة .. ودفعت الرسوم
وطلعت من الدائرة .. الوقت صاير ضهر .. كلش تقريبا 12 ونص او اكثر ..

وصلت للبيت ميته من العطش والجوع .. بسرعه اكلت وبدلت ورحت لأخواني .. بس قررت خطواتي هذه ما اخلي اي بشر يعرفها .. ولا حتى اختي ..
هل بيت هذا صار مو امان النه.. اكيد عمامي بس يعرفون راح يأذوهم وما اعرف شنو ممكن يبدر منهم تصرف ..

سلوى : وين صافنه ..
انتبهت من صفنتي عليها تكعد بصفي

:هي حياتي كلها صفنات شنو الجديد يعني ..

: البارحه هذا هم ضوجج أو اذاج

رجعت راسي للحايط
: هو اكو شي يجي من طرف عمامج مابي أذية ؟ اكيد.اذاني وضربني هم ..

: كسر بايده أن شاء الله هل شايب ليش ضربج..

: لأن ما حضرتله كعدة مال شرب .. طلع واحد سكير ومن يسكر ما يدري بنفسه البارحه يكلي محاسن صايرة حلوة وزغيرة .. يمكن يتراوله مرته زغرت ..

: ايعععع .. الله يعينج ولله .. الله ياخذ عمره ويخلصج منه ..

:الله ياخذ عمر عمامج السكط الي ذبوني اله ..

: بسمه الصبح وين رحتي ؟

: ما رحت لمكان .. رحت لبيتي ضميت الاوراق والجناسي خاف ياخذوهن ذوله ..

: اي ...

:سلوى ؟

: ها

: اني اريد اخذكم منا .. هذا البيت بعد مو أمان الكم

طبكت حواجبها وبلعت ريكها متوترة
: ليش مو هاي احنه كاعدين شنو المو امان

: أنتي مو كلتي اي شي تريدينه اوافقج علي لأن اعرف لمصلحتنه .. واني اكلج لمصحتكم هذا البيت بعد مو أمان الكم ..

: بس بس وين نروح

: حاليا ما ادري ..

: زين وانتي ..

: اني وياكم قابل أتركم مثلاً






: وزوجج

: هذاااا مو زوجي موووصخامي .. وماعندة اي ورقه تثبت هو زوجي يركع رأسه بأكبر حايط ..

: يعني شنو ناوية تسوين

: شكد تسألين سلوى

: تررره من حقي اعرف وين تردين تاخذينه ..امشي وياج على عماي تره اني مو طفله وتسحولين بيه تردين
اني جبيرة ومن حقي اعرف كلشي ..

: من حقج صح .. بس اني نفسي بعدني ما اعرف شي

:بس بسمة .. تره هنا محمد ما راح يخلي بشر ياذيني وهو وعدني بهذا الشي ..

درت كعدتي عليها وصار وجهي بوجها وباوعت الها بشك
: سلوووى من الاخير .. عندج شي ويه محمد ..

ارتبكت وهي ترد
: لا يمعودة قابل شعندي وياه .. بس هو دوم يدافع النه ومايسمح لبشر يأذينه ابد

:بلا زحمه ممكن تجاوبيني .. من عمج دخل سحلج حتى يعقدلج .. محمد شنو سوة .. تره لو صالح جارج ومزوجج محمد مايكدر يسوي شي .. من سحلوني اني وخلوني أعقد على هذا الشايب .. محمد شنو سوة .. كاعد على الدرج يباوع .. اني ما انكر محمد خوش ولد وفقير .. بس محمد ماراح يكدر يحميج لو يحمينه .. اني اني وحدي الي اريد مصلحتج ومصلحة خوانج .. واذا عندج مشاعر اتجاه محمد .. انصحج حاولي تنسيها .. لأن هذا الشي مستحيل بيوم اوافق عليه .. محمد ابن صادق وفاطمة وكرري هذا الكلام على طول ابالج ..

: بسملة .. تكدرين تنسين عدنان ؟ .. لو تشيلين حبه من كلبج ؟ ... ايي ما انكر اني حبيته ... ومو من حقج تصيرين انانيه .. وتحكمين عليه انساه .. مهما كان يبقى ابن عمي .. احسن من الغريب ..

: هااا .. هيج الكلام صار

: اي هيج لأن اني ما مسوية غلط .. وانتي تعرفين محمد غير عنهم كلهم .. مو بيدي حبيته ..

: شنو افهم من كلامج ؟

: افهمي مثل ما تردين بسملة ... مو بس انتي عندج كلب وتحبين .. محمد حبني رغم مرضي وعلتي واكيد هو يعرف حتى لو بيوم تزوجنه راح يتعب وياي .. بس حبني
بوقت الي اني هنا محبوسه بهذا البيت .. الشارع ما شايفته شلونه .. حبني رغم الفرق بينه .. هو دارس واصل واني ثالث ابتدائي ومبطله جان يكدر يحب وحده من بنات الكليه الي وياه .. حلوات كشاخات .. يعرفن يسولفن .. وصحتهم زينه .. وعدهم شهادة .. بس هو حبني اني وختارني اني .. واني هم حبيته






: سلوى سلوى حبيبتي اني مو انانيه .. اني اخاف عليج .. سلوى اني ما اريد اجرحج بالكلام بس لازم اكولة .. انتي كلبج تعبان .. وأقل اذية لو صدمه ماراح تتحملين .. مراح تتحملين زواج وأطفال وبيت ومسؤولية.. ماراح تتحملين فاطمة الي حتى لو وافقت تتزوجين محمد راح تشوفج نجوم الضهر .. ماراح تتحملين ولادة وسهر وتعب وجهد
اني كل هذه الأمور مخليتهن كدام عيني من قبل ما يصيرن .. اني اخاف عليج أكثر من روحي افهمي هذا الشي اخاف عليج تنصدمين .. ولج انتي مجاي تشوفين بعينج شنو سوو وجاي يسوون بينه .. مجاي تشوفين حقارتهم ونذالتهم ويانه..

بجت ودنكت راسها مقهورة : بس اني احبه

اخذتها بحضني : انتي حبيتي بهذا السرعة مجرد ما سمعتي منه كلمه حلوة لو وكف وياج شويه .. الحب الي يجي بسرعه ينسي بسرعة .. حبيتي لأن محتاجة حب واحتواء .. . سلوى سمعي مني ولله هذا الشي مو لمصلحتج .. خلي ايدج بأيدي وصدكيني اذا صدك هذا الشي بي خير الج .. اني اول وحده افرح بي ..
اني افكر شلون اطلع من هذا البيت وانتي تردين تجلبين بي من عقلج ؟ نسيتي موت ابوج .. نسيتي شسووو بي
نسيتي شسووو بأمي.. كل ذني نسيتهن ..

: بس هو ماله ذنب بكلشي صار

: اعرف ماله ذنب بس كل الي صار بسبب أهله .. والي سوو هيج بأمج .. مستعدين يسوون أكثر بينه ..

سكتت هي واني ..قررت اطلب من محمد يبتعد عنها وما يعلقها بي أكثر .. بس صار شي .. عمري ما توقعته يصير
طلعت من الغرفة .. رعد وعد يلعبون دعبل باب الغرفه ويحفرون نكره للعبه ..

:رعد يعني هاي الاماكن كلها .. الا هنا تحفرون هسه الي يطلع يعثر بيها .. طمها يله ..

رعد: ولله يس نكمل ارجع التراب

: انت ليشش ما تسمع الكلام بس فهمني ليش هيج وكح كتلك رجع التراب لا واحد يعثر بيها بسرررعه يله ..

: فدوة فدوة بس شويه

:وخر وخر من كدامي يله ..

دنكت ارجع عليها التراب ..ورعد حافرها ومسويها نكرة جبيرة .. جذب انتباهي .. قطعة قماش بيضة ومثل المكتوب عليها أو مشخبط عليها .. وطالعه من الحفرة .
أزمتها حتى أجرها وارجع التراب
حفرت بايدي أكثر من جهة الوصلة بينت أكثر .. وبين علاكة وياها زاد فضولي حيل وبقيت اوخر التراب منها .. واضح شي قديم لدرجه التراب صاير فوكها كلش قوي مثل الصب من ينشف على شي ..






الوصله شلون البايدة من جريتها نشكت .. بس فضولي وعنادي خلاني أحفر اكثر واوخر التراب لحد ما بينت كدامي علاكة والوصله جانت طالعه من العلاكة ..

صارت العلاكة كدام.عيني كلها .. شلتها من مكانها وماعرف شنو بداخلها بس حسيت كلبي نخمش .. وكشت روحي .. شلت العلاكه بسرعه ورجعت التراب ركض ركض ودست علي برجليه .. ودخلت للغرفة .. اريد اشوف شنو ..

ماجنت اعرف ان هذا الشي هو سبب دمار امي جهلت محتواها وفتحتها بايدي .. وبين منها الوصله البيضة من طلعته .. تقربت سلوى يمي أكثر ..

سلوى: شنو هذا

: ماعرف هاي لكيته مدفنه اباب غرفتنه بس مبينه قديمة

الوصله البيضه جانت ...اتك نسائي .. من فتحتها
وكع منها .. صورة مال جنسيه زغيرة لمره .. مكان عيونها مزرف .. ومكتوب علي جنون والصورة بيها مادة شلون الدهن الي باقي بس لثكتة ..
بس نصدمت وفتحت عيوني على وسعهم
: هذا صورة امي

مديت ايدي بصعوبه شلت الاتك وصدمتي زادت واني أقره المكتوب .. رموز وآشياء ما مفهومة ... مكتوبه بالددم
الاتك جان بي اماكن .. شلون اليابسه أو مكركفة ملزكة ..
بس مو دم يعني شي وصخ مخلي هيج مكركف ومكانه يابس .. ومكتوب بالدم .. سمية بت نجية ..
جنون .. مرض .. جنون .. مرض فقد ذاكرة ..
ينحط بحلك ميت ..

شمرته من ايدي بسرعه واني احس كل خلية بيه صارت تنتفض مو بس ترعش .. وصلت لمرحله احس ادية ماتن

سلوى اجت لزمتني وحالها مو اقل من حالي ..

: هذا هذا بسمة هذا شنووو ...هذا سحر؟

لساني نشل مجاي اكدر ارد عليها لأن حتى لساني صار يرجف ..
راسي أحسه.. راح ينفجررر ...
اكيدددد اكيددد. وحده من ذني السافلات هي الي مسويته .. اكيد هنه سبب. جنون امي.. اكيد هن السبب بكلشي .. بس وين اروح ...وين انطي وجهي والمن اشكي

وكفت على حيلي صرت افتر بالغرفة اروح وارجع بيها مثل المخبله .. واباوع على سلوى الوجه صاار كركم اصفر ..

:ياااااربي شنووو .. المن اروح..
حتى ما اندل بشر يفهم بهاي الاشياء ..
صرت افرك براااسي حيل اريد احاول افكررر بشي .. مجااي اكدر ..






سلوى تقربت عليهن ركضت عليها بسرعه

: لااا لاتلمسين شي ابددد ابددد.. ديرررري التلفزيون على القرااان بسرعه

بسرعه شلت الاشياء هاي ورجعتهن للعلاكة.. بس حرت وين اضمهن .. مستحيل اخليهن بالغرفة مستحيل ..

كمت فورا ... كوووومو وياي بسرعه كووومو..

سلوى: ووين بسمة

: كومي نروح لبيتي .. بسرعه .. رعددد وعددد

اجوني من بره يركضون
: بسرعه خلي نروح لبيتي يله ..

ماكالو شي صرت اتصرف بسرعة بسرعة بلا ما افهم شي
احس دخلت بحاله مثل فرط الحركة .. مجاي اكدر اثبت بمكان .. خليت العلاكه بعلاكة ثانية .. وقفلت باب الغرفه وأجينه نطلع .. لاكتني جبرية .. باوعت الها بحقد تارس روحي ترس منهم ..

جبرية :وين ماخذتهم

: وانتي شعليج .. خواني واني حره بيهم

: عساكم ترحون لنار جهنم... شعلي بيكم

:نار جهنم خليتها الج ولأمثالج .. امشو

اخذتهم وطلعت وصلت لباب الحوش وتذكرت شي ..

: انتضروني هنا دقائق ...

رجعت للبيت .. وركضت صعدت فوك .. اعرف بمحمد موجود.. دخل للبيت وصعد فوك ..
دكيت باب الغرفة .. شوي وطلع لي

: بسمة ؟.. محتاجة شي

حجيت بهمس.. محمد اخيتك محتاجتك بشي كلش ضروري الله عليك .. اني راح اروح لبيتي اخذت خواني وياي .. اريدك شوي وتلحكنه ضروري محمد ..

: قلقتيني شصاااير

: تعااال وتعرف الصاير

:ماشي ماشي روحي واني شوي والحكج

نزلت بسرعه وطلعنه من البيت ... رحت للبيت امشي ركض ركض ونسيت سلوى الي فحطت وتعبت وصارت تمشي على كيف .. انتبهت الها .. وكفت جريت نفس ..

: استغفرالله.. اني صرت الكف لكف من كد التوتر والقهر الي ملخ كلبي .. من الي شفته ..






رجعت لسلوى الي ضلت وراي تمشي بتعب ..
ولزمتها من أيدها.. وصرت امشي وياها على كيف
وعقلي احس صارت بي ه‍وسه وكأنما مية شخص يحجون سوى براسي..
شلون كلبهم يطاوعهم يسوّون هيچ ؟ يمه، ليش؟ شسويتي إلهم؟ ليش حرموچ منّا، وحرّمونا من حضنج
، حسّيت الدنيا كلها نزلت على صدري…

صرت أكرههم أكثر من قبل، ومو بس أكرههم، أريدهم يحسون بربع الألم اللي ضكتيه صرت احس روحي .. صارت سودة مثل ليلچ اللي ما شاف نهار من يوم راح عقلج

وصلنه للبيت فتحت القفل ودخلنه .. كرهت ذاك البيت كره العمى .. أزيد وازيد .. وكعدت انتضر محمد على نار ..
بينما سلوى حتى بقهرها تختلف عني .. حتى بعز عصبيتها هادئة وتحجي بهدوء .. وساعات هواي هدوئها حتى يستفزني ..

كعدت على ميز المطبخ والعلاكه كدامي .. واني مرجعه ضهري على الكرسي مكتفيه اديه وادك برجلي بتوتر .. وصافنه بيها ..

ربع ساعه وندك الباب طفرت من مكاني بلمح البصر ورحت فتحته .. دخل محمد مهلوف ويتسأئل بعيونه قبل لسانه

: بسملة خوفتيني شنو الي صاير هيج مخليج ..

دخلت للمطبخ دخل وراي .. واني بسرعه جريت العلاكه وطشرت محتواها على الميز عقد جبينه باستغراب وتساءل..

: هاي شنو ؟

: محمد لكيت هذه مدفونه كدام باب غرفته .. ومحتواها عمل هو الي تسبب بمرض امي .. هااااك شوف واضح وضوح الشمس هل شي كلش قديم وصار سنوات ..

استغرب حيل ومد.ايده وبطرف أصابعه لزم الاشياء وصار يتفحصها .. ونصدم مثلي من قرة المكتوب

: اعوذ بالله من الشيطان الرجيم.. أعوذ بالله من الشيطان الرجيم.. شنو هاي معقوللل ..

كعدت على الكرسي حيلي مهدود
: محمد امي ما عندي أحد اطلب مساعدته غيرك .. اعرفك صايم مصلي وتخاف الله .. كل الي اريدة منك توديني لأحد يعرف يفتح الأعمال وهاي السوالف .. لازم لازم اخلص امي من هل عمل النكس الي حرمنه منها طول هل سنوات وخلاها حتى ما تعرفنه..

: منو تتوقعين هيج يسوي ..

باوعت عليه بنضرة عرف مقصدها .. منو غيرهن يعني ..






: شوفي اني ولله الباطل اكول اله باطل حتى لو جانت امي .. بس الاكثر خالة جبرية هي مسويته .. لأن عمي صالح تزوج امج .. واني واعي وأتذكر شلون جان هاويها ..

هزت راسي وخليته بين أدية .. محمد تعرفلك.احد

: ولله ما اعرف اني .. بس صديقي وياي بالكلية ابو سيد ممكن يكدر يساعدني اذا تريد اتصل بي وأسألة

:لعددد شنو منتضر اتصل بي فدوة ..

طلع جهازة واتصل بصديقة .. بس صديقه كالة ابوي صح سيد بس ما يعرف بهاي الأمور.. بس دلاه على رجال ثاني مو سيد هو .. بس يعرف يفك الاعمال ..

:كوووم نروح هسه

: بسمه بس راح تصير مغرب هسه ..

: ولله يخليك محمد كوم ولله ما اتحمل لباجر ..

: واخوانج يضلون وحدهم هنا شلون ..

: شعليهم ما تكلي .. يسدون الباب ويكعدون وسلوى وياهم محمد فدوة اروحلك كوم ..

: بسمله سمعي مني .. اني راح اخذهن واروح وحدي .. وأخذ صديقي وياي .. انتي ضلي روحتج ما روح تغير شي

: كلبي مثل النار ولله

: كتلج روحتج ماراح تسوي شي .. شبيج .. اني ولله راح اخذهن واروح هسه .. وارجع انطيج كل الاخبار اول بأول..

هزيت راسي موافقة .. وهو الولد اخذ العلاكة وطلع يمر على صديقة ويرحون لهذا الشيخ ..
بقيت بمكاني افور روحي مثعولة .. وكل لحظة صارت ترجع براسي .. مثل الفديو الي ينعاد

امي جانت كلشي مابيها .. احن أم .. نضيفة وشايلتنه بنص عيونها .. جانت تضغط على نفسها وتبلع وجعها حتى ما تبين آلنه .. اتحملت عمي صالح واعتداءاته المتكرره. بس حتى ما تنحرم منه .. بين يوم وليله امي صارت تهج بالشوارع وفقدت عقلها .. وصارت حتى ما تعرفنة ..

منضرها وهي بالمستشفى.. شلون تعبانه وصعفانه وشعرها مزين .. شعر امي الجان اسود وسرح كله حالقينه وصاير ولادي ....

بقينه بالبيت واخواني كعدو وسلوى سوت عشى الهم واني افتر بالحديقة.. مثل الي عدها ولادة وما تكدر تستقر بمكان ..






سلوى: برأيج محمد راح يكدر يسوي شي ..
حجت سلوى وهي تتقدم يمي تكعد ..

: مادري سلوى كلشي ما ادري دماغي ما جاي يشتغل تفكيري نشل. كل الي أبالي هي امي ..

: كل يوم جاي أنصدم واتعجب على الحقارة الي شايلها هل بشر ..

: من شنو تنصدمين سلوى .. اني اصلا صرت ما أنصدم ولا استغرب .. الي صار بامي شغل نسوان مو شغل زلم .. جبرية خافت صالح بيوم يحب امي كالت خل اطيرها هن استاذات بهذا الشغل

: ولله كل يوم جاي اخاف منهم أكثر

:حتى تلوميني من اكلج لا تفكرين بمحمد .. هاي ام محمد وهاي خالته .. وشوفت عينج الي صار بامي .. لاتستبعدين يسوون بيج نفس الشي .. حتى تسمعين كلمتي مرة ثانية وتعرفين مو كلشي يريدة الكلب نركض وراه ..

بقينه بمكانه ساعات .. والقلق تارس كلوبنه .. لاعندي موبايل واتصل بمحمد ولا محمد الرجع وبرد كلبي ..

لحد ما صارت بالتسعه بالليل .. يله دخل محمد .. كمت من مكاني بهلفة تلكيتة .. هاا محمد شصاااار

سحب كرسي من الطاولة مال مطبخ وكعد ..
: مثل ما توقعنه.. عمل .. وعمل مو حي الله. لا شغل على الثكيل كلش .. وحتى فتحته مو سهلة يرادلة تعب وشغل كوم وساعات..

: لاحول ولا قوة الا بالله العلي العظيم.. زين هسه شنو

: الرجال اول ما فتح العلاكة.. فوراً لعبت نفسه وبقى يقرة المعوذات ...ويقرة ايات .. وذذب عليهن ماي مقري عليه ماعرف شنو .. وكال اتركو اشتغل عليه .. لأن نوع لازمله وقت وساعة معينه يله ينفتح بيها .. ويأخذ وقت كلش طويل .. بس يكول ابطال هذا السحر الي بالعلاكة وحده مو كافي .. لازم نجيبلة عمتي سمية بنفسها..

: وشلوون نجيب امي قابل بهذا السهولة ..

:ولله ما ادري بسمة الي كاله الرجال حجيته الج بالحرف وهو الرجال حتى فلوس ما يقبل يأخذ ينذر شغله لوجه الله ..

يحجي وسلوى واكفه تحضر عشى اله رغم هو ما طلب بس ماي ..

:يله اني اترخص

سلوى: لا اووكف سويتلك عشى

باوع عليها وتحسه ابتسامه من عيونه تطلع مو من حكله
باوعت عليه متوترة تعرف بيه ما قابله على تصرفها لأن ما تسمع الكلام ..

:ليش تعبتي نفسج اني بالبيت اتعشى

بسلمة: لاحمودي اتعشى هنا.. بعد سلوى حضرته
حجيتها واني اباوع عليها .. كعد الولد يتعشى وما اكل غير القليل .. وكام

: تعبناج سلوى رحم الله والديج

بسملة: الف عافية .. ماكو تعب .. اني وسلوى اعتبرنه مثل منى قابل غربه ..

ويه ما راد يطلع تذكرت شي ..

محمد ؟ اريدك منك شي ولو طلباتي كثرت

: كولي شنو

: هم تعرف عنوان عمتي سناء

رد مستغرب: عمتي سناء ..ههه شذكرج بيها

: هي الوحيد الي اذكر تحب ابوي وتحن علينه .. الصراحه اريد اتواصل وياها

: اعتقد رقمها عند ابوي .. وعنوانها اندله من توفه زوجها رحنه اني وأبوي وعمي للفاتحة.. ورحنه لبيتها حتى نعزيها
بس هي رفضت تطلع تسلم علينه .. وكالت الدرب الي جابهم يرجعهم اني ماعندي غير اخ واحد وندفن جوة التراب من يومها بعد محد وصل ..

: اريد عنوانها فدوة ..

: هي بيتها بالكرادة .. ب....... واذا تردين ترحين اني اوصلج الها

:تمام .. بس مو هسه ...

نمت باليلتها واشكال الكوابيس مرت على عيني وحتى نومتي قلقلة بالعشر مرات فزيت ..
بذيج الليله رغم بس اني واخواني بالبيت .. بس ما حسينه باي خوف .. اكيد اي مكان أئمن من ذات البيت ..

المقيدني شي واحد .. هذول اذا مشيت باي إجراء وصلهم خبر .. اكيد ماراح يسكتون .. اريدلي مكان يكون امان .. حتى اكدر. اتحرك ... لازم لازم ابتعد منا قبل ما يوصلهم اي تبيلغ ..

كعدت الصبح .. وناوية اكمل الي بديته .. بدلت
وقبل ما اطلع وصيت سلوى ..ترجع تقفل الباب وراي
وطلعت من البيت .. من رأس الشارع اخذت تكسي
وطلبت منه يوصلني لدائرة التسجيل العقاري....



يتبع

27

----------------------

عينٌ واحدة،
لكنها تسكن الليل كلَّه،
ترقبُ الشروخَ على جدرانِ الروح،
وترسمُ بالصمتِ نشيدَ الناجين.

كم من نداءٍ دفنتهُ؟
كم من وجهٍ مرَّ فيها ثم تلاشى؟
هي لا تبكي...
لكن الحريق في حدقتها يروي ألف وجعٍ بلا دمعة.

في جفنها المقطوع،
حنينٌ قديم،
وغضبٌ محبوس،
وانتظارٌ لا يريد أن يموت.

--------------

طلعت من البيت .. من رأس الشارع اخذت تكسي
وطلبت منه يوصلني لدائرة التسجيل العقاري....

قويت كلبي .. ورحت افتر بالدوائر وحدي ..واني كلي يادوب راح ادخل ال19 سنة .. بس الموضوع طلع مو بهاي السهولة .. مهما كنت وكحة لكن وكاحتي بداخل البيت .. بس الدنيا خارج البيت تختلف يراد الها شخص جبير وكون يعرف يتعامل وية الناس برة ..

الشخص الي ما متعود يمشي بمعاملات ودوائر فعلا يضيع ويصير دربة مايندلة .. وهذا بالظبط الي صار وياي ..
وكف بيه السايق يم الدائرة .. انطيته كروتة ونزلت ..
دخلت امشي بخطوات متوترة .. الجنطة بأيدي .. خايفة على الأوراق الي بيها ..

أتلفت على الناس الرايحة والراجعة وكلشي ما اندل ..
صابتني رجفة .. وحلكي أحسه نشف .. وكفت بنص الدائرة افكر منين ابدي .. أولا لازم أسأل...
وبعد ما سألت.. موضف .. كال لازم تروحين لقسم الطابو
رحت متوجها لقسم الطابو مثل ما دلاني الموضف ..
لكيت هم هواي ناس وسرة ولازم انتضر..

كعدت منتضرة دوري .. جنت اتوقع الموضوع سهل وبسرعه راح يكولولي كلشي تم .. خلال فترة انتظاري واني اتخيل..
راح أحاجي موضف الطابو .. وبمجرد ما اشوفه حجة العمارة .. فوراً راح اكدر اسيطر عليها وتصير الي ولاخواني .. بس نسيت احنه بالعراق واذا ما روحي تطلع مراح احصل على شيء .. وصل دوري بعد انتضار طويل ..
وكمت حتى اقابل موضف الطابو ..

السلام عليكم ؟

رد عليه رجال جبير تارس لابس نضارات وكاعد وره المكتب ومبين مستعجل يريد يكمل مني حتى يشوف غيري






وعليكم السلام .. تفضلي بشنو اخدمج ..

كعدت اشرحله الاسطوانه نفسها .. ابوي متوفي وامي مريضة عقلياً .. و أخواني قاصرين واني الكبيرة .. وإلى آخره ..

:اشوف سند العمارة

: اي ..
بسرعه طلعته السند .. وقدمته اله .. رجع طلب جنسيتي .. هم انطيتها اله
وبكلبي اكول .. اي أخيراً.. بس ما طلع أخيراً.. طلع اولاً .. ورها لازم افر السبع فرات ..

نزع نضارته ومسحها ورجع لبسها وطبك ورقة السند ورجعها الي هي والجنسية .وكال ..

الحجة تثبت أن العمارة باسم والدج .. بس حتى تكدرين تكونين الوصيه عن العمارة وتكون تحت تصرفج لازم اولاً تجيبين شهادة وفاة ولدج ..
تقرير طبي من المستشفى أن ولدتج مريضاً عقلياً ...
بطاقة السكن .. اذا ما توفرت جنسيه الاب المتوفي
قرار وصاية .. لانج عمرج ما مقبط ال19 يعني كنتي قاصر .. واخوانج قصّر لازم قرار رسمي من المحكمة يثبت انج المسؤؤله و الوصية عنهم .. وقرار لإسترجاع حقكم
هويتج هوية اخوانج وبطاقة السكن .. واذا متوفرة وثيقه تثبت أن عمج مستولي عليها .. اذا ما توفرت مو مشكلة وجود شاهد أو شاهدين كافي ..

كل هذني الي طلبتهم منج يتخلن بملف .. وترجعين الي ..
ولاتنسين بما أن ولدج متوفي .. عمامج يعتبرون ورثة بالعمارة لأن هذه ورث من اخوهم ..

يحجي. اني فاتحه حلكي كل معنوياتي نهبطت ..
اني شلون راح اكدر امشي بكل هذه الأمور .. ومنين الي فلوس حتى اكدر اتحرك .. صفنت صفنه ابو صابر من حيرتي .. ورجع نبهني صوته وهو يكول ..

بس تكدرين تقدمين طلب رسمي لإيقاف اي تصرف بالعمارة .. مثلا بيع او اي تصرف بيها ..
وبجميع الأحوال البيع يحتاج إلى طابو .. ومدام الطابو موجود عندج ماراح يكدر يتصرف بيها اذا مو بوكالة منج ..

:زين بلا زحمة كل هذه الأوراق الي ردتها مني .. شكد تاخذ وقت حتى اكدر اوفرها.. لازم شهادة الوفاة .. وما موجود عندي واكيد عمي ماراح يقبل ينطيها الي ..

: هنا عندج حلين .. يا اما تحاولين تأخذيها من عمج .. أو لازم تسخرجين نسخه منها .. من المكان الي صدرت منه شهادة الوفاء .. المحافظة.. القضاء .. وهذا هم عن طريق المحكمه.. وهم لازم تتوفر جنسيتج وجنسيه اخوانج وبطاقة السكن وايضا اذا ما توفرت .. جنسيه الاب المتوفي تكفي..






: زين بعد ما كل هذه المعاملات تكمل .. راح اكدر استرجع العمارة..

: بنتي الطابو .. مجرد نسجل الملكية حسب الحجة الرسمية أما قرار .. ونكدر نوقف اي تصرف بيها من قبل عمج .. لكن الاسترجاع هذا لازم يتم بقرار المحكمة..

بهت وجهي.. ونهبطت .. تشكرت منه وكمت ..
امشي بدون حتى ما اباوع للطريق .. شكد يرادلي وقت حتى اكدر امشي بكل هذه الإجراءات.. شلون اجيب شهادة وفاة ابوي وجنسيته اذا هن كلهن موجودات عد عمي .. طلعت من الدائرة الحيرة ماكلتني اكل ..

ماكدامي غير بس تلث ايام .. ويرجع هذا العله عليه .. من كل عقلي عبالي خلال اسبوع راح اكدر ارجع حقنه ..
هواي امور أبالي اريد امشي بيها .. بس الضاهر ماكو شي راح يجي بسهولة .. يرادلي وقت ويرادلي فلوس .. واني ماعندي غير كم فلس من الي جابهم الي عدنان ..

يمكن لو سامعة كلام عدنان وقابله نتزوج جان كل هذه الأمور سهلت .. على الأقل هو رجال ويندل ويعرف ويكدر يمشي ويساعدني بهواي امور .. بس هسه اني شنو اسوي ..

اجيت اعبر الشارع واني صافنه ..
رفعت راسي للسماء وكلت بتعب : يااااارب فدوة ساعدني وسهل اموري يا اللهي .. يارب كل ما جاي امشي بطريق جاي يصعب طريقي حيل ..

بثولي وغبائي رافعة راسي واني بنص الشارع .. ماحسيت غير صوت هورن قوووي ...ونضربت ونشمرت وطحت بالكاع .. صرخت من ايدي الي طحت عليها ..

: اخخخخخ .. صرخت والدنيا افترت بيه حيل دخت ..

نزل السياق من السيارة وركض الي
: اسم الله اسم الله.. بويه صدددك جذب واكفه بنص الشارع .. ما تشوفين السيارة طايرة

بثواني الناس التمت داير ما دايري... اني متت من وجع ايدي ومن الفشلة واني ممطولة بنص الشارع ..

والرجال يطمن عليه .. بيج شي بنيتي تاذيتي

: ايدي ايدي يمكن نكسرررت ورجلي نلوت .. حجيتها واني ابجي والوج من المي ..

: كووومي وياي اخذج للمستشفى..

: ماريد اريد ارجع لبيتنه ...

: لا لا بس خل يشوفون ايدج يمعودة لا صدك مكسورة كومي ومناك خابري اهلج وشنو تردون اني سداد






باوعت اله رجال جبير وحتى سيارته تعبانه ومبين على باب الله .. اضطريت اكوم وياه لأن فعلاً ايدي احس صارت تضرب بكلبي من الألم
صعدت بالسيارة واني ابجي وروحي رايحة .. وداسلها .. وكف يم اقرب مستشفى .. ساعدني انزل .. دخلنه للطوارئ..وبعد الأشعة طلعت ايدي مكسورة ولازم تجبيس

.. يارب شلون بيه هسه يضلون بقلق .. لا عندي تليفون. اخابرهم ولا اعرف رقم أحد بيهم ..

بلشو يصبون بيها .. لو اني صرت اعيط بلا وعي روحي راحت واني وحدي التفت دائري مدايري الرجال الضاهر ذبني بالمستشفى وطفر .. خايف على روحه ...
نوب الدنيا افترت بيه واني كلشي ماشاربه ولا ماكلة .. وسكري صعد .. وحرت بروحي

دخل عليه ممرض يلف ايدي بعد ما جبسوها .. وانطاني مسكن

:خوية الرجال الي وياي وينه

: اعتقد راح لأن بعد ما بين .. هو الي كاسرج ؟

: اي دعمني .. بس اكيد ما قاصد هم خطيه على باب الله مبري الذمة..

: وشلون هسه تبقين وحدج لو ترحين وحدج وانتي كلش تعبانه وعندج رض برجلج .. زين اتصلي بأحد من أهلج يجي ياخذج تره صعبه طلعتج وحدج انتي تعبانة

: ماعندي تليفون

طلع تليفونه وقدمه الي .. هذا خويه جهاز اذا تعرفين رقم أحد اتصلي بي ..

باوعت للجهاز .. هو اني ماعرف اي رقم غير رقم عدنان .. وكرامتي بعد ما سمعني اخر كلام مستحيل يخليني اتصل بي وأساساً هو منو يكول ابغداد .. واجبه يمكن خلص ورجع للبصرة ..

حاول اوكف على حيلي. اطلع .. بس حيل جنت تعبانه
كعدت بمكاني مقهورة مهضومة متوجعة .. بهذا عمري واني وحدي ومحد الي .. وحتى الوكت مو زين
راح المممرض ورجع يفتر عليه ..

: خويه شلون تبقين هيج .. كتلج اتصلي بأحد من اهلج .. كوليلي الصدك انتي شاردة من اهلج لو شنو بالضبط ؟

: نطيني الجهاز راح اخابر ..

قدم الجهاز الي .. والضاهر مكتوب عليه افتر افتر وارجع على عدنان ... ضغطت رقمة واني حتى كارها روحي .. وخايفه يفشلني .. بس على الاقل ينطيني رقم محمد .. بلكي موجود عندة ..
دك الجهاز دكة طويلة وقبل ما ينسد جاوب ..






: الوو

بلعت ريكي فشلانة .. وكلبي دك بسرعه مجرد سمعت صوته .. الووو منووو

: اني عدنان .. عدنان انت وين

: جاي الم بملابسي باجر الفجر رايح للبصرة .. ليش وبعدين هذا رقمن

بجيت حيل بالتليفون.. وصوت البجي خلاه يفز ويكلي بلهفه عكس نبرته الباردة : بسمة شصااااير

:عدنان اني بالمستشفى وحدي .. وماعندي رقم أحد اخابرة ولا اكدر.اروح وحدي لان مكسورة وضعي تعبان

: ياااا مستشفى شنوو. صاير جايج جايج

نطيت الجهاز للممرض حاجاه وانطاه اسم للمستشفى
بقيت بمكاني دمعتي على خدي .. وحيل مهضومة . لأن ماردت اتواصل وياه بعد لو شما يصير .. بس الضاهر القدر مصر يخلي بطريقي ومصر يجمعني بي ويخليني افتر وارجع عليه ..

اباوع على حالي .. بله هذا حال بنيه عدها أهل وعمام.. واني هنا وحدي محد بحالي .. وعدنان الغريب بس هو يركضلي .. بعد ما اخذت المسكن عيني غفت
وفزيت على صوت عدنان يمي .. الخوف تارس صوته

: بسمله بسمتي شكسرج