باوعت عليه ورديت ما مستوعبة كلامه
شرار: لو متفقه ويا ماجان شردت منه.
ونطيهت الكم انا عادي ما خايفه على نفسي طبني طوب خلي شيصير بيه خلي يصير

بس انا اگلكم نرجس مالها علاقه... البنيه چانت وياي شلون اعوفها بوسط الشارع
خاف ما ياخذني ياخذ بتكم وبذيچ الساعة الله اعلم شراح يسوي هوَ وابو بيها

هاشم:هتف وراي بهدوء
ام ستار اخذي البنات خلي يرتاحان
وانتم كل واحد يروح البيته البنات ورجعن سالمات بعد هاي هيَّ خلصت السالفة

حليمه: هيچ يشيخ تصدگ بيها..؟
شمدريك ما راحت نهبت ورطت بتك ورجعها الكم

باوعت عليها رافعه حواجبي ونازله دمعي مو على مودي لا على العقل الخايس العدها... عضيت شفتي وهمست بصوت مسموع تارسته الغصه

شرار: لا تاخذين بختي ترا يتيمه
وطعنچ بشرفي گدام امة محمد.. راح يجي يوم وتطلع بيچ... خافي ربچ لا مرة ولا مرتين تطعنين بشرفي

هاشم: كافي

حليمه: اوكف شيخ، بله تعالي مچذبين احنا شو اصلچ كله نكس... وكلهم گواويد شمدرينا ما أنتِ داخله الهذا البيت تنهبينه وتهدمينه علينا وتشردين
وهاي اولها كسرتي بت الشيخ والباقي على ياهيَّ بله

باوعت على ضرار منتچي على باب المضيف ساكت
وبس يباوع، بلعت ريگ بصعوبه ورديت موجها كلامي العمي هاشم

شرار: عمي انا ما يهمني ان صدگتو بيه لولا
انا گلت هذا الحچي لان صدگ صار وهاي بتك وگدامك... انا عندي رجال يريد يخليني على ذمته ومصدگ بيه هاي هيَّ ما يهمني الف واحد بس الي يهمني هسه نرجس ان تصدگون هيَّ مشت وياي من خوفها عليَّ وبس

هاشم: انا كلت كافي، سمعت الحچي...ماريد حچي زايد بعد... وأنتِ حليمه انا حذرت گلت حرف ماريد اسمع ولا واحد يطلع كلمة من هذا المضيف
بعد تحچين هيچ أنتِ ياهــــــــيَّ..؟
گولـــــــي منوووو أنتِ.؟ أنتِ الشيخة هنا وتحكمين وطعنين بكيفچ... احچي مو احچي وياچ

حليمه: ما مچذبه هيَّ نسبها كله نكس

هاشم:استغفرالله ربي...اسماعيل اخذ مرتك وطلع منا اذا ظلت گدامي راح اتصرف تصرف عمركم تتنمون عليه

باوعت حليمه على اسماعيل واسماعيل گال
اسماعيل:- تطرنه شيخ.!!

هاشم: الما يحترم مضيفي وكلامي يترخص
ويله ام ستار اخذي البنيات وديهن للغرف خلي يرتاحان والكل يرجع يشوف شغله... خلصت السالفة على خير ومحد بيهن متأذيات

مشت حليمة واسماعيل وراها وهيَّ گالت
حليمه: خوش بساعة... بكلمة صدگتها

رفع ثنين ادي ماسح وجها بنفاذ صبر راد عليها
هاشم: أنتِ لو تفكرين مثل البشر چان عرفتي
كلامها صدگ... بس ما تفكرين بعقلچ
وانا ماريد اتعب نفسي وياچ...الضغط صاعد من ورا كلامكم السممني

گال هيچ واشر مرى ثانية الخالة ام ستار
اجت يمنه وكامت نرجس من حضن الحجية
ومشت ويا امها وانا وراهن مشينى والكل كام يطلع شوي شوي باوعت على باب المضيف ماكو ضرار معقولة هيچ سكت بدون ما يسوي شي

طلعو كلهم واحنا آخر شي وورانا اطياف هيَّ وعمو هاشم گايده الحجية...طلعنا وصرنا على صفحة ومشى گدامنا عمو هاشم هوَ والحجية واحنا ورا مشت گدامي نرجس وخالة ام ستار
حاضنتها الصدرها وتحچي وياها بصوت خافت

سعاد: سودة بوجهه العدو "مسحت على وجها"

وكملت طريقهن، ظليت واكفه بمكاني اباوع عليهم
كل واحد راح البيته يتوزع، اباوع الهم ونزلت دموعي مبلله خدي...احساس الغربة الحسيتها بهل لحظة دمرني دمار

عضيت شفتي بقوة كاتمه شهگتي
رفعت ايدي مسحت دموعي وخشمي، بالعه ريگ وشفتي ترجف، سحبت نفس اهدء نفسي
ومشيت خطوة ويا ما مشيت نعتيت من ايدي بقوة

رفعت نظري مباوعه على ايدي وعلى ضرار الازم عضدي بقوة ويمشي على بيه ورا المضيف
گلبي ظل يرعد، راح يذبحني بدون
ما احد يعرف اي راح يذبحني
طاحت دموعي بخوف اي خفت اموت ماريد اموت
خفت من الموت ماري اموت
شهگت وهمست وانا الزم ايده وحچي بشهگه

شرار: ضرار وعلي هوَ اجه علينا وانا من خوفي ركضت، ضرارر فدوة اسمعني لا تسوي بيه شي فدوة

يمشي ولا مهتم الي وانا امشي وتعثر
ورجلي طاحت منها الحذاء ونترست طين لان الارضيه مبلله... شكلي چني مجدية

ظليت افلت بيده وهوَ راصها قوي ولا چن افلت بيها
وانبح صوت وانا احچي
سكتت بعد ما حچيت شي تعبت وانا الغي وهوَ ساكت
هاي هيَّ خلي شيسوي يسوي يكتلني ميخالف فدوة للشعب بقت عليَّ كلها ماتت

طلع بيه على البستان ومشى بعيد شوي عن المضيف
وكف وشمرني گدامه... انحنيت بس ما طحت بالارض
عدلت نفسي مباوعه عليه اتقرب عليَّ واكف گدامي وهاف بحديه مكتومه

ضرار: گليــــلي شسوي بيچ احچـي شيوي.؟

شرار: هزيت راسي وهتفت بنحيب
صدگني شردت منه...وعلي ما مسويه شي غلط
والحسين ضرار والحسين خفت على روحي وعلى نرجس... اذا صار بيها شي انا شسوي اذا خطفها شلون اجي وكلكم

ضرار: وهاي الناس ويــن هــا... هاي خلق الله الگدامچ التروج ويـــــــن راحت..؟ ما حتميتي بيهم مبيـــن ما تجي امـــــــي... لو الغباء العنــــدچ مليووون
لچ ويـــــــــن اكـــو اثــول منچ.
أنــــتِ ثوووله... ما صرختي ما عيطتـي ولميتي
امة محمد كلها...گليلي راح يخلونا ياخذچن.؟

شرار: افهمني لو ظاله راح يسوي الي مااا سوووى
من قبل... افهم انا مو ثوله، وما عرف ناسي
انا... انا... انا مو... موو ثوله وماعرف
ابن فيصل انا... انا عرف شنو الي يدور براسه
بذااات جـــــــوادد... انا... انا لو ظاله وما شاردة جان اخذني وما تشوف ظلي لا انا ولا بت عمك

احچي ومفرفحه وهوَ متخصر ولازم روح لا يتهور ويسوي شي وبس كملت عاط بجهرتي
ضرار: شيســــوي مثـــلاً... گليليييي شيســوي
گليلي هيَّ هيته لو مو هيته... لو هوَ بس أنتِ بشارع وياخذچن... بس هوَ أنتِ متعوده على هاي سوالف وتذبين الصوچ بخوفچ

اسمع بكلامه وداخلي يغلي.. وتحملت كل الي حچا الى آخر كلمة خلتني اثور عليه.. بس كمل هجمت عليه رافعه ايدي ضاربته بصدرة وهوَ اندفع اليورة وانا اتقدم وضرب بي وعيط بكل حركه تعبت وانا ابرر
تعبت وانا اتصنع القوة

شرار: متعــــوده هاااا متعوده مو.؟
اي صحيح انا متعوده من حضن الحضـــــــن مو.؟ هيچ قصــــدك هااااا.؟ مو هيچ تقصد..
اذا انا هيچ المن خليتني على ذمتـــــــك اذا انا مووو شريفة

سكات ما يحچي..وانا وما اشوف منه شي بس ضوء عاسك عليَّ... سكتت وگاعده بالارض ماده رجلي على طولها وحچي بعياط وحركه وضرب بالارض وباوع على السماء

شرار: يــــــــابه تعاااال اخذني يمـــــــك يابه
يابه رادوه ياخذون شرفي وحميت نفسييي
بس يبابه هسه طعنووو بشرفييييي ياابه
تعال اخذنيي ماريدد اعيش

اعيط من كل گلبي احس اوتاري تكطعت
كملت آخر كلمة وحسيت عليه سحبني وهوَ مگنبص على رجله دفعته وعطت بحركه ودموعي ختلطت ويا مخاط خشمي

شرار: وخرررر مني انا مو شريفة انا متعوده على هاي سوالف وخررررر مني وخررر

"كملت كلامي وانا اشهك وحچي بتعب"
شرار: لك لو ماخذني چان اخذ شرفي چان حطمني
چان اخذ الي يريده من سنيـــــــن
لك لو ظاله دقيقة وحدة چان اخذ اعزززز ما املك

هسه عرفت ليش ما ظليت بمكاني.
تعرف ليش شردت وتهجولت انا ونرجس
انا.. انا لووو ظاله چان انا وياها يروح اعز ما نملك
گلييي منو راح يصدگ احنااا بريئات.؟
اذا هوَ هسه طلعوني انا وحدة ناقصة وكـ*ـبه وبلا شرففف واولهم أنتَ

حچيت آخر كلمة وجرني عليه وهوَ گاعد على الارص
بس سوى هيچ عطت بشهگه وحسرة

شرار: يتيمممه انا... اي يتيمه والله ينتقم منـ...

سد حلكي وهوَ يحط ايده على حلكي داحس راسي بصدرة وانا احچي بصوت ما مفهوم منا ما حسيت جسمي كام يرجف بيده وشي كام ينزل من خشمي ثواني وما حسيت بنفسي بعد.

يتبع...

20..

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

.
.
.

فتحت عيوني مباوعه على اسكف بصفنه
رفعت ايدي مسحت عيوني بعدها وخرتها صافحه راسي مباوعه على نرجس نايمه بصفي وجها عليَّ صفنت بوجها متذكرى كلشي
غمضت عيوني ماخذت نفس طويل

ويا ما غمضت طاحت تسرسحت دمعه نازله
من خدي طايحه على المخده
هذا الما عنده اهل يظل مذلول طول عمره
سحبت نفس بشهگه دايره جسمي منطيه وجهي للحايط

دحست روحي دحس اريد اشرد من العالم كله اتمنى انام وماگعد بعد، ماريد اگعد الصبح وباوع بوجهم وشوف نظرات الاتهام بعيونهم
اريد اختفي بلمح البصر لو الگاع تنشك وتبلعني وينمحي اثري

رفعت ايدي عصرت بين عيوني...احسها تنبض
أصلاً جسمي وراسي وعيوني كلشي بيه يوجعني
كأني طايحه من عماره وجسمي كله متفلش
ما ظال بي شي صاحي

ظليت احچي ويا روحي منا ما رجعت
غفيت ما حاسه على روحي
ما گعدت الى على صوت طكطه بالغرفة
رفعت ايدي سحبت البطانية وغطيت راسي ماريد اشوف احد... شوي وحسيت احد يرفع البطانية عني
غمضت عيوني قوي وهيَّ هتفت

-شراره

سكتت ما بدر مني أي حركه:- لا تغلسين ردي عليَّ

بلعت ريگ فاتحه عيوني مباوعه على الحايط صافنه مالي نفس احچي، تعبانه كلش البارحة العياط العيطته والحچي الحچيته تعبني

-شرار گومي جدتي تريدچ ماتريد تاكل الى أنتِ موجوده

شرار: مالي نفس نرجس گليلها نايمه

نرجس: انچبي وگومي لا تزعلين.
گومي الفات مات احنا والد اليوم.. البارحة الصار مشى وراح وله ويا لولو

درت بس وجهي مباوعه عليها وهمست بصوت خافت
شرار: ونظرات الاتهام... لو كلام السمعته والنظرات القرف الي شفتها شلون اگدر انساها.؟
نرجس أنتِ الي يحچي وياچ يهدون عليه الف واحد بس انا من يطعنون بشرفي وبسمعتي منو يهد عليهم
اذا الي اسمه رجلي طعن بشرفي شبقه على غيره.!

نرجس:شسوالچ ضرار وهيچ حالتچ البارحة.؟

عقچت وجهي مستغربة شصار
شرار: ليش شبيه.!

نرجس: امس من طلعنا من المضيف كل واحد راح البيته... وأنتِ اختفيتي دورت امي عليچ ومشت الدانه گالت ماكو واجت الابوي گال تلكوها يم ضرار وصح ورا شوي انشوف ضرار شايلچ وأنتِ لا حس ولا نفس وخشمچ يجري دم امي تخبلت هيَّ وخالة دانه آخر شي طلع صاعد الضغط مالچ...وشگد ردنا نعرف شصار وماحچه الاخ، تاري لاعب بيچ لعب

باوعت عليها ودرت وجهي عنها هامسه بغصه
شرار: نرجس ضلتي هنا راح تموتني
انا لا من طينتكم ولا من مقامكم.. وراح اتعب فوك ما انا تعبانه اذا عيش بوسطكم

نرجس: شبيچ عيني مقامنا شني..؟
شني احنا منو ولد امام لو ولد نبي ومو من مقامنا شريره لا تحچين هل حچي گدام ربيعتنا خوش
حچيتي گدامي ادري بنفسي انا شنو
بس مال تحچين گدام امة محمد الي برا
لا والله انا الطمچ على حلكچ
انا صح ماعرف شگالچ ضرار بس من اخذچ وحچه وياچ بس أنتِ ويا معناه مايريد يخلي امة محمد تعرف يريد يفتهم منچ أنتِ

تحچي وعيني تتنقل بالفراغ وبس كملت كمت من مكاني گاعده على مقعدي ورديت عليها
شرار: شيفتهم نرجس گليلي شيفتهم هوَ غير طعن بشرفي شيفتهم... اذا هاي يريد يفتهم هيچ چا لو يريد يعيط ويضرب شلون.؟

نرجس: انا وياچ وعلي... وحقچ الشرف غالي
بس صدگيني البارحة من جابچ لا حس ولا نفس متخبل مايعرف شيسوي شايلچ على گلبه ويركض بيچ للغرفة

شرار: يقتل القتيل ويمشي بجنازته

نرجس: هسه عوفي خلي يولي.. هسه عليچ بروحچ گومي أكليلچ لكمة... شوفي وجهچ اصفر
والفات مات لا تخلين حليمه وكويثر يتشمتن بيچ

باوعت عليها ودرت وجهي مباوعه للشباك مفتوح ويدخل منه نسمة هوى باردة وياها خيوط الشمس متسلسله بالغرفة وهتفت بهدوء والي بالي يفتر وريده بكل وسيله يتحقق

شرار: انا اريد احچي ويا الشيخ

نرجس: شتسوين.؟

-اريد ينهي كلشي ماريد ابقى هنا بعد

گلت آخر كلمة وما احس بس راشدي ترس وجهي
رفعت ايدي لازمه خدي مباوعه عليها مدهوشه

شرار: ليش ضربتيني.!

نرجس: حتى توعين على زمانچ يا ثوله تردين ترجعين للضيم ها.؟
گليلي تردين ترجعين السليمه والفيصل
خاف هل مرة انطوچ الضرار هل مرة اذا ترجعين يلعبون بيچ لعب ويذبوچ ذبة الچلب
لهيچ استچني وأكلي نعوله...لا تحركين گلبي وتفحطيني وانا ريگي يابس

مسحت خدي ما مقتنعه بكلامها، هوَ صح اذا رجعت راح اعيش اتعس من قبل وذا اظل هنا
راح أكل تبن يوميه
ومادري راسي راح ينفجر
تعبت وعلي تعبت، احس نفسي طوبه بنص ملعب انذب منا وروح منا

نرجس: گومي شرار ونعلي الشيطان لا تفكرين تحچين ويا ابوي بهيچ موضوع خوش
لان محد راح يخسر غيرچ... وعلي كلها راح تعيش مرتاحه بس أنتِ تظلين ملطشه البيت عمچ

باوعتلها وعضيت باطن شفتي مغمضه
ماخذه نفس طويل، زفرته وفتحت عيوني مباوع الها كامت ومدت ايدها اليه باوعت على ايدها وعليها
رفعت ايدي وگومتني

نرجس: وكفي لا طلعين خلي اشيل الفراش ونطاع سويه

هزيت راسي بخوش،وهيَّ كملت تسفيط ومشت گدامي وهيَّ تعدل بشالها
اخذ شال محطوط على الميز لبسته وهيَّ طلعت قبلي وطلعت وراها... باوعت على الصالة ملتمين كل البنات طفوف واطياف وخالة ام ستار يتريگن
مثل كل مرة يم الحجية...صبحت عليهن وردن الصباح عادي مثل كل يوم وجوهم طبيعية
وهذا الشي طمني، بلعت ريگ مباوعه على الحجية

الحجية: شون صرتي حبوبه

ابتسمت بوجها راده عليها بهدوء
شرار: لا الحمدلله

الحجية: شو بله طويفه تدني خلي تگعد البت تاكل

شرار: بس اغسل واجي.

هزت راسها ساكته، مشيت غسلت ونرجس گعدت يمهن غسلت وكملت ورجعت للصالة
ادنت طفوف وگعدت بينها وبين الحجية وخالة ام ستار گبالي... ظلينا نتريگ وانا اظل بالكمة سنه
مالي نفس أكل
أكلت شوي والحجية گالت موجها كلامها الخالة سعاد

الحجية: جبتن الملابس من شيماء.؟

سعاد: جبناهن اول البارحة وسفطتهن نرجس

هزت راسها بدون ما تعلق... كملنا ريوگ وكل وحدة استلمت الها شغله... انا ماخلني اكوم لان ست نرجس جابت جدر شيرة وحصرتني بالغرفة وبدت تنظف بجسمي وانا ساكته ما بدر مني أي حركه أو ألم
هاي انا الي گلت بس يحطن الشيرة على جسمي اگلب الامه من الصريخ

بس يمكن متت من احساسياً... استاذ ضرار خلاني اتخبل وفقد الاحساس... كملت كل جسمي ودخلت اسبح، كملت وطلعت للغرفة مشطت شعري وباوع عليه بالمرايه حتى ما تهنيت بي...شدعي عليك جواد بهذلت حالي من الله يبهذل حالك بحق الحسين

مر اليوم طبيعي محد شفته لا خالة دانه ولا ضرار
وهل شي ريحني ماريد اشوف لا ضرار ولا خالة دانه
من اشوفها احس بحساس مكروه

لليل ورا العشى كلهم التمو بالصالة يم الحجية
ولد عمو هاشم ونسوانهم وعمي هاشم
وعمران ومرته وابنه علي وبته الصغيرة
ماگدرت اطلع استحيت منهم
ظليت گاعده بالمطبخ منا ما صاح عليَّ عمو هاشم
فرحت من صاح عليَّ يعني ما زعلان مني
عدلت شالي زين ودخلت مباوعه على عمو هاشم اشرلي اجي اگعد يمّه... مشيت گعدت يمّه
وظلو يسولفون وشوي وگال عمو هاشم وهوَ ياشر النرجس

-نرجس جيبي موبايلي

علي: عمي الكارتات وزعتهن على الناس انعرفهم بس بقى كم واحد من العشيرة خابرهم أنتَ... انا ماعندي رقم واحد منهم

هاشم: هوَ جاي اخابر بالوادم من البارحة للسه

كمل كلامه وجابت نرجس الموبايل وهوَ ظل يدك على الناس ويعزم... ظلينا گاعدين نسولف منا ما ترخص عمران وعائلته رايحين البيتهم

وعمو هاشم كمل المخابرات وهم مشى ينطرح وانا ونرجس عزلنا البيت واطياف اخذت ابنها هيَّ ورجلها ومشو... وطفوف عزلت المطبخ وانا ونرجس كمنا نكنس بالهول... منا ما كملنا ورحنا للغرفة ننطرح

ما بقى بس باجر آخر يوم اليه هنا
بعد باجر راح اعيش انا ويا بسكف واحد
شگد تغير تفكيري من حچن البنات وياي حتى اكسبه وخلي يحبني، بس هسه لا اريده يحبني ولا انا اريد احبه... اريد اعيش بعيد عنه وهوَ بعيد عني
بس ماعرف راح هذا كلامي يبقى على حطته لو يتغير كلشي

اخذت نفس رافعه ايدي مغطيه راسي نايمه بعد صراع بين عقلي وعقلي شايفين هيچ عقلي يعارك نفسه على قراراته... تنهّدت ونمت غصبن عليَّ

ثاني يوم بدا التجهيز والتنضيف وانا بس اباوع لان عروس وكذا ما يصير الزم شي فدوة احلى فقرة اباوع عليهن فئة تجلف بالبيت، وفئة تجلف روحها هاي التحف وهاي التكوي بدشاديش رجالتها
لان مثل ما عرفت كلهم راح يلبسون دشاديش ويا العريس

گاعده على الدرج وباوع على طفوف واطياف يرحن هيچ ويجن هيچ، ونرجس وخالة سعاد يسون
بالغدى لان الولد على جيه
رفعت ايدي تچيت العكس على فخذي
وكف ايدي تچيت عليه حنچي وتذكر ذيچ الايام من ضرار ظل يرتب بالغرفة...والغرفة القديمة انطاها الواحد يشتغل بالمعمل حالتهم تعبانه ونطاها اله خطيه

وبدا من ذاك اليوم يصبغ بالغرفة بعدها جاب الغرفة الكويتيه وما شفتها لان ما رحت البيت خالة دانه لان الحجية ما تقبل... دگول ادخلي ثاني مرة وأنتِ عروس لا دخلين هيچ

وكلامها ما بي ربط بس انا انچبيت وسكتت لان المن ماشيى شعندي رايحه
والملابس نرجس وخالة دانه رتبن الغراض والملابس
قبل لا اروح اميش شعري سفططنهن باليل

سحبت نفس موخرة ايدي من سمعت صوت الولد بالمطبخ... عدلت شالي وكمت مباوعه عليهم
ثلاثتهم بالمطبخ وعمي هاشم گاعد يم الحجية الي گاعده بالمطبخ

مشيت يمهم سلمت عليهم وتقربت يم نرجس اخذت منها الصلاحيه مال البن وظليت اخوط بيها وباوع عليهم... يحچون على التحضير والطباخ

الحجية: جبتو المواد يولا.؟

هاشم: ضرار من يجي من المحل يجيب المواد
من ابو فاضل... والمخضر العصر يجيبهن غسان حتى لا يخرب شي

باوعت على نرجس غسلت ايدها من البن وراحت الابوها گعدت گدامه ونزعت الجواريب وهوَ رفع ايدع طبطب على راسها مقرب راسه بايسها براسها

ابتسمت على منظرهم احب حنان عمو هاشم على نرجس حيل يحبها هوَ والولد يحبونها ويحترمون كلامها... وهيَّ طبعها جتماعية وفرفوشه
وتدخل للگلب غصب
انا اول ما اجيت بدون تردد دخلت گلبي وامنت بيها وما اثق بحد غيرها

بعدت نظري عنهم اكمل خلط بالبن وتخايل شيصير
لو ابوي عايش چان انا مثل نرجس
ولا واصله الهل مرحلة من ورا فيصل
چان انا هسه لازمة كتابي واقرأ دروسي وفكر شلبس وشاكل

تنهّدت موخره المضرب اليدويّ حاطته على العلاگه مال الطرشي وشلت الصلاحيه ومشيت احطها بالثلاجة... فتحت الباب وحطيتها ومشيت گعدت يم الحجية

اذن وكل واحد كام صله وانا ساعدتهم بالتحضير بين ما يكملون الصلاة...انطتني السفرة خالة سعاد اخذتها ومشيت فرشتها... كملت وطلعت الحجية تكود بيها نرجس جايبتها، گعدتها بمكانها الي تگعد بي يوميه

وانا خليت ورجعت انقل بالاكل
كملنا انقل وكلهم اجو گعدو ياكلون ويضحكون ويشاقون... وانا ابتسم وياهم وعمو هاشم يحچي وياي ويداهرني وانا مجاهده ويا وحچي وهمه فاطسين ضحك

ابتسمت ودعيت بيني وبين نفسي
ادعيت من كل گلبي الله يهنيهم ويخلي عمو هاشم خيمة عليهم... لان عمو هاشم مو مثل اي أب الهم ولا عم مثل أي عم... انسان ملاك على هيئة بشر

كملنا غدى والبنات كامن هنه غسلن المواعين ونرجس وخالة ظلو گاعدين وانا كمت احضر الهم الچاي
خدر وصبيت على عددهم كلهم
شربو الجاي وكملو وكل واحد راح يرتاح الى شويه
وانا ونرجس مشينى للغرفة والحجية نامت بمكانها
ما بيها حيل كل شوي كايمه

دخلنا انا وياها ظلينا نسولف ونتواعد على صالون
منا ما مر الوقت وگعدو الكل وبدت الهوسه تجي
طلعنا من الغرفة بالهول يم الحجية وعمي هاشم مشيت گعدت يميهم ونرجس باوعت على امها

نرجس: يمه خابرتي مروة تجيب الديجي من بيت خالها

رتشفت شوي من الچاي ونزلته
سعاد: راحت البت البيت جدها من الصبح وگالت اجيبه العصر

هاشم: مو واحد عد غسان ليش تودون على الوادم

طفوف: السماعة مالتا خربت

هاشم: گايلين من زمان وجايبين

سعاد: ما صار شي هوَ كله ساعة زمان ويرجع

سكت ما راد عليها.. شرب من الاستكان ظال ساكت
باوعت على نرجس مشت وهيَّ تحچي بترحيب وتباوع على باب المطبخ، درت وجهي مباوعه

نرجس: يا هلا يا هلا بت عمي شيالت همي
عاشت ايدچ يوم عرسچ وذب فلك والعباس

دخلت مروة بت عمو ياسين بنيه خلوقه وفقيرة وابد ما سمعت الها حس هاي صارلي شهرين يمهم ما شفتها بس مرة وحدة وهاي ثاني مرة

تقربت نرجس منها اخذت الديجي چبير وبي جروخ
وتسحل بي صعدنا البايات ودخلن علينا
كمت سلمت عليها ومشت سلمت على الحجية وعمي هاشم

مروة: يله انا ارجع... امي وحدة عود باليل اجيكم

نرجس: اي تعالي نسوي ركصونيه الشرار

اطياف: ركصونيه شني.؟

نرجس: نركص والركصه صغيرة يعني مو چبيرة

هزت راسها مروة بخوش وترخصت وطلعت
مر الوقت بين العشى... وعمو هاشم والولد سمعتهم طلعو يساعدون ضرار جابو ثنين عجوله لان ناسهم هواي وهوَ شيخ عشيرة وكل العشيرة تجي فـ ما يكفي ومثل ما عرفت العشى على عمو هاشم لهيچ جايب هلگد

من جابو العجوله وراها بشوي ستار جاب الجدورة
وصاح غسان وضرار وباقي ولد عم ضرار يغسلون بالجدوره والمواعين،واحنا نسمع صوتهم لان واكفين بالمطبخ... كملنا المواعين وطفوف واطياف طلعن هن وخالة سعاد

انا غسلت ايدي زين من التايت ومشيت صحت النرجس الي گاعد تسوي بالديجي بغرفة جدتي
مديت راسي مباوعه عليها مدنكه مدري شتسوي بالديجي ومندمجه

شرار: نرجس

-ها

ردت عليَّ بدون ما ترفع راسها
شرار: تعالي طلعين بالساحة الولد جاي يغسلون بالجدورة ويتشاقون نوكف يمهم بين ما يجن البنات

نرجس: روحي وانا هسه اجي بس اسوي الديجي

شرار: ليش ما تشعلي بالمضيف أكبر من هاي الغرفة

عافت الواير وگالت وهيَّ طفي الدكمة
نرجس: اي فاتتني

كملت كلامها وهيَّ طلع اليده مالته وجرته
انا طلعت گدامها وهيَّ وراي تسحل بي
طلعنا من المطبخ مباوعه خالة سعاد ماشيى يمهم لازمة الهم الصوندة وهم يفركون بس بالسفنجه
واطياف وطفوف گاعدات على البايات
مشينى للمضيف لان نفس العلوه مال البيت

مشيت وانا مغلسه على نظرات ذاك الواحد لكفني من رفع راسه وهوَ ينزل آخر جدر من السيارة الحمل
مشيت ورا نرجس
فتحت الها باب المضيف ودخلت
شغلت الضويه كلهن وهيَّ مشت بوسط المضيف يم الدكم شكلت السماعه وشتغلت النعمه مالتها مدري شتدگول وصار صوتها عالي باوعت عليها وگلت

شرار: بيش راح تشغلين اغاني.؟

نرجس: بموبايل اطياف بي نت

هزيت راسي بها وطلعت وانا طلعت وراها وكفت باب المضيف اباوع عليهم يغسلون ويداهرون
باوعت على عدنان لازم ماعون ما مغسول ويدك عليه وگال موجهه كلامه الخالة والبنات وبالتحديد انا يباوعلي ويضحك

عدنان: وانا الحبيت ضقوقي (ضروري)
الكل: على طباعة
عدنان: وانا الحبيت ضقوقي
الكل: على طباعة

عدنان: ويطوني اهلي لو أسوي طقكاعه (طركاعه)
الكل: وانا الحبيت ضريره على طباعة
عدنان: وانا الحبيت ضقوقي

كالها ودك على الماعون والبنات يصفكن ويا
كمل كلام وهوَ يدك على الماعون

عدنان: كل شق (شر) مابينه احنا قامش ابيض

سعاد: كلوووووووش

عدنان: حشف گلبي صارله سنين كلوووووووش

غسان: گبر يلغم خزيتنا

عدنان: كلووووووووووش، بعد لو كافي

باوعت على ضرار اخذ الصونده من خالة سعاد ورش الجدورة وهتف

ضرار: استچن لا تلكف

باوع عليه صفح ودار وجها على البنات
عدنان: يله خويه اقيد (اريد) هلهوله تطقش (تطرش) اذان عقيسنا (عريسنا) بعد اخيچن

-كلووووووش

اطياف: ويهل القوط ذبو القوط ضرار لبس قاطة

عدنان: لا تچذبين اطيافو هوَ قاح (راح) يلبس دشداشة منين اجها القاط

اطياف: اي شبيك هيَّ غير كوله

عدنان: لا اوكف حممممم وين ام العريس

-ها يمه

درت وجهي صوب الصوت طلعت خالة دانه جايه بتجاهنها وهوَ هوس وظل يصفك بالماعون والماعون انخسف بيده

عدنان: وسو دقب (درب) الام الولد خلي تلعب جوله
اي عمتييي اقيد تهزين، هز جتف هيچ هز هززز

كمل كلمته وضرار رش عليه مي وهوَ كمز راجع ليورة
باوع عليه وگال

عدنان: اماني عود اهوسلك وزامطلك عقيس وخبصه

ضحك ضرار ساكته...وخرت عيني منهم مباوعه من سمعت صوت نرجس باوعت عليها هوست وهيَّ لازمة الموبايل

نرجس: وحنا خوات العريس ليوم نلعب جوله
وخونه خوش خو يستاهل العوسه كلوووووش
مبارك عرسك يبن الكردية مبارك عرسك

ضحكت مباوعه خالة دانه وكملت
نرجس: اجت عدل وعلي

ضحكنا وخوتها يشتغلون ويضحكون.. اجت تمشي بتجاهي وتهوس وتحچي

نرجس: وشرورة بس گولي بلي
بيچ خير ودللي
وشرورة بس گولي بلي بيچ خير ودللي

ضحكت رافعه ايدي مكمه فمي
اجت دخلت المضيف واجت طفوف واطياف لازمة امير وتهوس وتصفك
انا وباوعت على خالة سعاد عافتهم ودخلت هيَّ وخالة دانا، وخرت نظري عنهم مباوعه على الولد ودرت وجهي داخله ويا البنات

مشيت وكفت يم نرجس تگلب بالتليفون شوي وشغلت ساجدة عبيد اعرفها چانت نورس تشغلها وتركص...علت الصوت ومشت سدت الباب ونزعت الشال وشدته** ومشت وهيَّ تهز ويا الغنية

نرجس: وخالة ويا خالة شلون بيه وما دريتي
وما الومچ يا خالة وشما حچيتي

تمشي وتركص وتحچي ويا الغنية، ومناك گابلتها طفوف وتهز هيَّ وياها ويركصن ويحچن ويا الغنية
شوي ونفتح الباب باوعت دخلت خالة دانه والحجية
الحجية باوعت على نرجس فاتحه عيونها

البت داست الدكمة وما حست بعد
وطفوف تهز على كيف وتباوع على الحجية
ضحكت واجت خالة دانه والحجية گعدن يمي
وانا اطك بصبع واحد وحرك نفسي يمين شمال

ظلت تركص شوي نوب حلت شعرها ودك تفر بشعرها وهيَّ صلوات شعرها مو ذاك الطول بس ضخين
رفعت راسها وشافت الحجية وضحكت وحچت بصوت عالي بس سمعنا

نرجس: وشلون ردح العمارة هيچ وهيچ

تهز ولا فحطت شوي والتمن البنات على صوت الديجي اجت اول وحدة مروة اجت وحدها امها ما اجت ظلت بالبيت
وراها اجت ام البنات طفوف واطياف وكامت بتول گابلت نرجس ودك ركص وبتول مصيبة انكس من نرجس

ظلن يركصن بالدقايق ونفتح الباب ودخلن بنات ثنين اول مرة اشوفهن وراهن حليمه وكوثر
وكوثر تباوع بطرف عينها على الموجودين
ونرجس من شافتهن وكفت عن الركص ومشت الديجي غيرت الغنية وطلعت وحدة ثانية النفس المطربة

علت الديجي والحجية عاطت بيها وهيَّ ضحكت بوجها واجت جرتني من معصم ايدي وكومتني
نزعت الشال مني بلمح البصر لان لافته شلون ما چان
باوعت عليها بخزرة وهيَّ ولا هتمت وخرت القراصه من شعري ونفتح شعري ناعم بس بي كسرة من الضفيرة

سحبتني وكفتني بالنص والبنات داير مدايرنه ويركص تقربت مني شارورتني باذني
نرجس: لعبي لعب يلغمه وخلي الحية تموت غيض

گالت هيچ وخرت مني مبتسمه بوجهي
باوعت عليها ودرت نظري على كوثر واكفه على صفحة هيَّ وامها ويباوعن عليَّ بنظرات متروسه كرهه وحقد..گبر شمسويه الچن ناهبتچن كاتله ابوچن

گلبت عيني منهن بغرور وتقدمت گدام نرجس
وخذت نفس مبتسمه بهدوء... اله خليهن يفتحن حلوكهن... وانا استحيت ما كمت وشاركت خاف عبالهن خفيفه خلي وحدة منهن دكومني وولعها
واجت نرجس من كيفها خلي يشوفن ركص شلونه

تقربت للامام شوس وهزيت جتفي بخفه من ساجدة عادت كلامها:- شگل لامي من روح نكسرت الشيشه

رفعت ايدي ادك على راسي وحچي ويا الغنية
-ولادك روحي بحديد واطلع الدم

ابتسمت بهدوء مباوعه على نرجس وبديت اهز جتف مثل الركاصات من گالت:- بلمنه طك بالمكم يهل العمارا

تقربت نرجس مني وانا هم تقربت وظلن وحدة والثانية تهز جتف

نرجس: وهذا لعبناااا لاا دگووول استهتاررر
وبلمنه طك بالمكم يهل العمارا

ظلت تهز خفيفي ويا الحن وانا بس اهز
ووكفت عن الركص وعافتني بالوسط اهز وحدي وهيَّ مشت للديجي

والبنات يركصن گدامي وكل وحدة ماخذتلها وحدة وتركص وياها اطياف وطفوف وحدة مكابلة الثانية ويركص... باوعت على مروة مگنبصه گدام جدتي وتهز جتف والحجية تصفك وتضحك وياها

الك هنا فراحان ويركص ويضحك من كل گلبه
الضحك وياهم من كل گلبي، وخفت من ضحكتي وفرحي بس افرح اعرف راح يصير شي

عدلت شعري ونرجس...طفت الغنية دكلب بالموبايل
اطياف: ليش طفيتيها

نرجس: البسن شالاتچن خلي يدخلون الولد نشغل هاي الغنية وهوسن الضرار

گالت هيچ وانا رأساً مشيت اخذت القراصه لفيت شعري والبست الحجاب والبنات كذلك
نرجس لفت شعرها وحطت الشال على راسها ومشت فتحت الباب ومدت بس راسها وصاحت

-يابه شبابنه سحلو العريس وتعالو هنا

گالت هيچ وفتحت الباب شوي ونشوف غسان وعلي شايلين ضرار على كتافهم والولد البقية يمشون ورهم
دخلو ونرجس مشت الديجي شغلت مال حسام الرسام

-نسمع احلى هلهولة، للغالي الحلو طوله

ويا ما گال هيچ طببو ضرار والبنات كلهن هلهلن
-كلوووووووش

-الف مبروك كولوله، الف مبروك يالغالي

نزلو وهوَ يضحك، يا الله منو هذا
اليضحك يا صلاة محمد
دفعو الولد وهمه يهوسون ويحچون ويا الغنية
ووكفو بالنص ويهوسون داير مدايره

-عمي ياللي ليدك محناية،چبيرة فرحتك هايه
هيل وطش بالولاية، هيبة ووجهك يلالي
ألف مبروك يا الغالي

الكل: كلوووووووش

-العبلك جوله وما اخسر، الى ارقصلك، رقص يعور

الكل: العبلك جوله وما اخسر

-رقص عمارة، ارقصلك حالف

الكل: كلوووووش

-ارقصلك حالف ياللي گاعد بالكوشة منور

الكل: كلوووووووش

اصفك وضحك وياهم شلون يحچي كلمة حسام ويردون بالكملة الثانية بصوت عالي ويصفكون
الغنية طويلة وسدتها نرجس من اشر الها غسان

غسان: وخونه خوش اخو يستاهل الهوس

گال هيچ وكلها هوست نسوان وزلم
والحجية كومتها خالة دانه وظلت تهوس وياهم بالشيله مالتها وانا ظليت گاعدع ماشوف من شي بس اجسامهم

صفنت عليهم صلوات على محمد
واحد يحب الثاني وگلب على گلب
وهذا الشي شگد احبه لان ما شفت هذا الطبع بيت فيصل هناك كلهم واحد يكرهه الثاني وما يتمنون الخير الغيرهم

فزيت من صفنتي من انجريت من ايدي
باوعت عليها نرجس ابتسمت دومها تكطع صفناتي
ما تخليني اصفن... ابتسمت اباوع عليهم من رجع گال علي وهوَ يوكف بالنص وضرار مقابيله

علي:ليله حنت اخونه نلعب لعب خلونه نلعب لعب خلونه

ضحكت لا ارادياً جابها عدل مدري هيَّ صح اكو هيچ كوله

علي: وكلها تزوجت بس احنا ظلينا وين ام البنين نسوان تنطينه

الحجية: بس احچي ويمك تلكاهن بس احچي

گالت هيچ شلون الكوله وعدنان صار گدامي باوع عليَّ وگال

عدنان: وجبنالك صخله اسقح (اسرح) بيها بس كون اداقيها (اداريها) ههههههههه

رفعت ايدي مكممه فمي ضحكت بصوت عالي
ولكل ضحك خرب يومه، نرجس مباوعه عليَّ ورفعت حواجبها وگالت

نرجس: اوكفو تعلمت كوله من عمت امي اسمعوني

غسان: اطربينه

نرجس: يوم الدكن طبوله... اي يوم الدكن طبوله
على عناد الشماته ناس فرحان كلوووووووش

ابتسمت عاضه شفتي تبسمر كوه
ضرار: يله كافي هواي هوستو باجر وراكم هم طول النهار

غسان:لا الله عليك خلي اگول هاي وكل واحد يولي البيته

باوعله ضرار وعلي اشرله يحچي
غسان:احجي الكوله وانتم گولو يابويه خوش
هزو روسهم ساكتين

غسان:عريسنه خطبوله مرة
-يابويه

غسان:جابوله مرته مكبعه
-يابويه

غسان:عدها كصايب حلوات
-يابويه

غسان:تراب وگمل متروسات
-يابويه

غسان:جابتله من عنده طفل
-يابويه

غسان:طلع على امة مخبل
-يابويه

غسان:وللگاع شعرر شعر
شكو شكو عدنا عرس الما يصلي ؏ النبي بعينه فكس

رفع ايده ستار وغمه بكصته وگال وهوَ يمشي طالع
ستار: ثول ؏ هل كوله ثول

ضحكت أكثر اليوم شگد فرحت بي احس خدودي ماگدر احركهن من الضحك
كل واحد صبح على الثاني وبدو يطلعون
وانا بساع طلعت ماريد اتواجد ويا لان بقى هوَ والحجية وخالة دانه ونرجس

عفتهم ومشيت للغرفة، نزلت فراشي
فرشته ونمت، اليوم آخر يوم انام على هذا الفراش راح اشتاقله احبه هذا الفراش احس بي دفو عجيب
ظليت اتكلب شوي ونمت نعسانه تعبت من الصبح گاعده الهسه رغم ما شتغلت هواي بس تعبت

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

مديت ايدي اخذت البهارات الحاطتهن بالماعون ودرتهن على الدجاج الي بالجدر وحمست باقي المكونات وقبقت الجدر رافعه نظري مباوعه على خالة عيدة وهيَّ تغسل طلعت من الترك متقربه منها اباوع عليها وهيَّ تغسل بالتمن
حكيت رگبتي وهمست بصوت مسموع

-يمه

-ها عزيزتي

گالت هيچ وهيَّ تلتفت عليَّ باوعتلي ورجعت دارت وجها تغسل بالتمن... مشيت وكفت يم الكاونتر حتى تسمع كلامي:- شسمه هاي البارحة صار وياي شي اول مرة يصير بيه

عيدة :اي

قربة: ماعرف شنو بالضبط بس انا فزيت من نومي مدري بيش الساعة فزيت على شي
نايم على صدري بس ماگدر اتحرك ولا اگدر اصرخ وحتى شوف ماگدر اشوف
ظلمة الغرفة هندس واريد اصرخ وحچي ماگدر
شلون المشلوله وهم اسمع كلام يم اذني وحس شخص يمي بس ماگدر اتحرك لو احرك طرف واحد من جسمي

عيدة:هذا جاثوم يمه

عگدت حاجبي راده عليها ما مفتهمه اول مرة اسمع بهيچ اسم:- جاثوم شني.؟

عيدة: الجاثوم هذا يجي للأنسان
اكو يگولون شلل نومي أو جن... بس اهلنا يگولون جن ينام على صدر الانسان، ومايگدر يحرك طرف منه

-يعني شني انا متلبسني جني

عيدة: هههههه لا يمه يا جني هذا شبيچ
جاي اگلچ الدكاترة دگول هيچ لان عمچ هم چان تحچي هل حالة ومن سأل گالو شلل نومي وعادي دقايق وترجع طبيعي... بس هاي كلام اهلنا مال جني لان چانو مايعرفون شي يگولون جن ومن هل حچي

قربة: چا والحچي الي سمعته شني الجني تعبان

عيدة: حچيش.؟

گالت هيچ وهيَّ تسد البوري شايله المعجانه الي بيها التمن وحطتها على الكاونتر الواكفه عليه

قربة: يمه بهاي إذني سمعت يگول مصيبة مگدر احچيها روحي تمرمرت بيها، ههه تاري الجن يسمع باسم الكربلائي وانا مادري

صفنت بوجهي ما مفتهمه، رجعت كررت كلامي بجد
قربة: يمه صدگيني جاي احچي صدگ.
سمعت بهاي إذني هذا الحچي وانا واعية وحس بكلشي حتى صوت الماطور مال الثلاجة اسمعه بس گتلچ ماگدر احرك طرف واحد بجسمي

عيدة: من سمعتي هيچ شصار.؟

-ما اتذكر شصار

دارت وجها عني فاتحه باب الكاونتر مطلعه جدر وقبق وحطت التمن فوك الجدر وردت عليَّ وهيَّ تمشي للترك:- اذا هيچ هاي هلوسه لا تفكرين

سكتت ما رديت عليها، اتنهّدت ومشيت وراها اشوف الجدر المركه وهيَّ تسوي بالتمن
گلبت بالمركه بعد الها شوي وتستوي...طلعت من الترك عايفتها وحدة...خلي اروح اصلي مادام اذن ومن اكمل عود اجي احضر باقي الغراض

ويا ما طلعت من الترك دخل مطلب، شعجب اليوم جاي من وقت مو من عوايده يجي بوقت الغدى
ابتسمت بوجها وگلت وانا افتح الشال من راسي والبسه عدل:- الله يساعدك

مطلب: ويساعد حيلچ، امي وين.؟

ردت ارد عليه وخالة ردت عليه من وراي
درت وجهي مباوعه عليها طلعت من الترك واكفه بالباب مال الترك

-الله يساعدك يمه

مطلب: هلا بيچ، يمه الجمعة حضرو روحكم

-ها وخيراً راح تاخذنه الكربلاء

مطلب: لا اخذكم العرس ضرار يوم الجمعة

بوزت شفتها راده عليه
عيدة: وانا كيفت گلت الله هدا وراح ياخذنا

مطلب: خليها تعدي فترة ونمشي كلنا انا والولد وعالتهم... كل واحد بسيارته

هزت راسها ساكته، وهوَ رجع هتف وهوَ يدخل جوه
مطلب: يمه كلكم معزومين مو دگولون ما گلت
وهم وياچ گولي الهاجر تكويلي القاط

-ان شاءلله

رجعت هيَّ للترك وانا مشيت توضيت وصعدت اصلي
بعده عمو صاحب ماجاي وهاجر بعدها الهسه ما جايه
دخلت للغرفة باوعت ذو الفقار نايم
چنه وحده نفسه اربع وعشرين ساعة مجطول

وخرت نظري عنه ماريد اباوع عليه وتذكر امس
بس اتذكر يحترك دمي وراسي يوجعني
مشيت طلعت المحرم والمصلاية صليت وقريت سورة ياسين الام البنين عليها السلام
وكمت نزعت المحرم ورجعتهن المكانهن ونزلت احضر بالغدى

مراً هاي اليومين عادية ڪ باقي الايام
حضرت نفسي للعرس بعد ما خالة حچت ويا ذو الفقار
لان انازما گتله اريد اروح خليني شوي شايله خشمي عليه

حضرت ملابس والي هنا تنورة وقميص بيجي وياهن شال اسود بلون النتورة وياها حفايه سوده تطلع بالبس حلوة ونازكه... ورتبت وجهي خليت خالة تحفلي شواربي وحواجبي وجهي ما بي شهر هواي لان مو مشعره

وهاجر شگد خالة لحت عليها ما قبلت تجي گالت ابقى يم ذو الفقار لان محد راح يبقى
بالبيت عمو راح يمشي ويانا

مرات احس هاجر نسخه مستنسخه من ذو الفقار
عجيب بكلشي تشبها حتى كلامها نفسه تحچي كلمة وحدة وتسكت ومنعزله اربع وعشرين ساعة وملتهيه بدراستها ابد ما تجي تکعد يمي لو يم خالة وذا اجت اتعجب وظل بس احچي وياها وسولف حتى لا اطلع گدامها الچنه الشريره

فزيت من صفنتي على كلامها وهيَّ تندغ بكتفي
-يله يمه انزلي

باوعت عليها ورجعت اباوع على المكان
صف السيارة مطلب ورا السيارت هواي باوعت المكان متروس زرع ويخبل... مديت ايدي فتحت الباب ونزلت وكفت بصف عمو صاحب
حولت نظري مباوعه على السيارت شگد صلوات على محمد... بعدت نظري من اجت خالة وكفت يمي ومطلب گال وهوَ يمشي بصف عمو صاحب

مطلب: تعالو امشو من بين السيارت منا ناس

مشينى ورا وانا اباوع على السماء مغيمة بس
الغيوم بيض مو مال مطر
مشينى من بين السيارت بعد ماگدر اشوف
الخضار الي مقابيل البيوت

ظلينا نمشي مسافة حوالي بالخمس دقايق يله وكفنه يم باب ابو طلاقتين چبيرة
درت وجهي مباوعه وراي مسفطه كراسي من الباب الواكفين عليه الحد وين رجعت نظري على مطلب من هتف

مطلب: يله فوتو

گال هيچ ودك موبايله طلعه ورد واحنا
مشينى اسمعه يگول

-اي وصلنا
-اي فوت من هذا السايد ويصير بوجهك النزله

ما سمعت شگال لان دخلنا من هذا الباب
اول ما دخلت وباوعت على البيت صلوات على محمد
عين حاره باردة، بيت يخبل والحديقة شنو تخبل وچبيرة جنها الي بالمسلسلات

مشيت بصف خالة وباوع على المكان
بي حوالي بالربع بيبان، ماعرف شنو موضوعهن بس كل باب بُعد عن الثاني مسافه نص الحديقة
نمشي وعيني على الجهال تروج بالحديقة رغم شگد جهال بس ضايعين بالحديقة شگد ما واسعه

تقربنا يم البيت الي مقابيل الممشى النمشي
من تقربنا طلعت مرّة من الباب المقابيلنه
هيچ شوي اكبر من امي من شافتها خالة عيدة هلهلت

عيدة: كلوووشش

تقربت المرة وخالة صعدت البايات الي تصعد المكان الطلعت منه المرّة، تسالمن وخالة تبارك الها والمرّة ترحب وتهلي..وخرت خالة منها ودار وجها عليَّ

عيدة: چنتي مرت ذو الفقار

باوعت عليه المرّة وانا تقربت منها باوستها
وهم أكلتني أكل بالسلام
وخرت منها واشرت النا ندخل ويا ما اشرت النا صار صوت ورانا مال نسوان
درت وجهي انا وخالة مباوعه... فتحت عيوني ضاحكه بصدمة وخرت نظري مباوعه على خالة عيدة

قربة: خالة تدرين بامي راح تجي.؟

هزت راسها بأي، ضحكت بخفه ونزلت البايات رايحه الهن انا والمرّة الي سلمت علينا
تقربت من غيم وامي...وامي هلهلت والمرّة سلمت عليها وانا تقربت من غيم باوستها وحچيت

قربة: لا يا حقير ليش چذبتي عليَّ وگلتي ابوي ما قبل

غيم: مفاجأة

ضحكت مباوعه على خالة عيدة من گالت وهيَّ تاشر على امي وعليَّ

عيدة: ام عليا تصير ام قربة

-اهلاً وسهلا هلا وميت وهلا، اتفضلو اتفضلو

فاطمة: زاد فضلچ حبيبه

مشينى والمرّة گدامنا وخالة وامي يمشن سويه وانا وغيم وراهن وحدة تمشي بصف الثانية
غيم لزمت ذراعي وگالت وهيَّ تباوع على البيت

غيم: صلوات على محمد موش بيت يسطر سطر
بس الله يساعد نسوانهم شيغسل الساحة الهم

قربة: هسه تفكرين بالغسل أنتِ

غيم: اي والله شوفيها شطولها چنها قطاعنه

قربة: عوفينه من الغسل شلون من گتلچ تعالو وياي ما قبلتو

غيم: ترا احنا انعزمنا قبل لا تخابرين
العريس عازم عليا ماعرف هوَ صديقة.؟

قربة: خاف من نخطفت واحد عرف الثاني

غيم: اي يمكن هيچ... المهم عازم عليا وهمه موصينه خاف يعرف واحد عدنا سيارة كوستر النسوان وعليا گال سيارتي موجوده واجبنه

هزيت راسي بها ساكته من وصلنا
دخلت امي وخالة واحنا وراهن باوعنا هذا مطبخ وچبير بي جوكه نسوان

دخلنا وبدا المباوس احس خدي انشلع وشفتي تبنجت
كملنا منهن ودخلتنا جوه باوعنا للصالة بطول وعرض وبيها اربع غرف ثني بالواجهيه وحدة من هاي الجها والثاني من هاي الجها

مشينى سلمنا على الحجية الگاعده على الكرسي
فدوة شگد حلوة بيضه شحم والدك البوجها منطيها جمال يخبل...سلمنا عليها وگعدنا
عرفنه هاي الحجية جدت العريس والمرّة الي دخلتنا تصير مرت الشيخ، وام العريس بالصالون ويا العروس

وخرت عيني من باب الصالة الي يطل على باب المطبخ مباوعه على غيم، مقربة راسها يمي وتحچي بهمس

غيم:اريد اشوف العروس نفس جمال العريس لو غبره

-وأنتِ وين شايفة العريس

غيم: شبيچ نفسه الي اخذ النيشان وهم بالزفه مالتچ عرفته من صاح عليه مطلب ضرار عرفت هذا العريس حلو قربة صحيح اجلح بس حلو وطويل وجسمه مرتب بالدشداشة اهم شي ما عنده كرش

قربة: قابل جاي تاخذي أنتِ

غيم: ميخالف احس رجال هيبة من ما عنده كرش

قربة: ابوچ ماعنده كرش يعني ابوچ هيبة

كشت وجها وهتفت
غيم: ابوي هوَ يبقى ابوي ويحبني وكلشي اريده يجيبه بس احچي الحق قابل اچذب ما بي شوفه مدري شلون قبلت بي امي

ضحكت بدون صوت ما راده عليها
شوي ورجع هتفت وهيَّ تباوع على الغرف

غيم: اگلچ شو ولا وحدة شابه

قربة: خاف يمكيجن لو شي

رادت ترد وطلعن ثنين بنات من الغرفة وثنين بنات كاعدات بالگاع يمكيجن، صارت وحدة من يمهن گدامي رأساً سدت الباب بوجهي صفنت على الباب
ثول هاي شبيها چنها صخلة محمره اوع ثول

غيم: اوع گبر

قربة: گومي هذن البنات اجن يسلمن لا يسمعن

كمت وكامت وراي سلمن على امي وخالة نوب عليَّ وعلى غيم، والحجية گالت وهنه وحدة توكف بصف الخ

الحجية: هذن نسوان والد شيخ هاشم

رحبت بيهن خالة وظلن يردن على كلام خالة وگعدت امي وخالة وحدة منهن گالت موجهه الكلام اليه والغيم

طفوف: تعالن ويانا بالغرفة ليش گاعدات هنا

الحجية: گومن يمه البيت بيتچن

باوعت على خالة هزت راسها بأي كمت واشرت الغيم دكوم وياي، هنا مشن للغرفة الي طلعن منها
اوع راح اشوف هاي الصخلة
استغفرالله ربي ولا حبيتها مدري رغم هيَّ بس سدت الباب بوجهي بس ما حبيتها مو بيدي

دخلت ويانا الي كالت تعالن والثانية اخذت الطفل الي بيدها ومشت للمطبخ، ما لابسه شي بس مكيجه ومبدلة للطفل... بس شگد حلوة طالعه
والثانية نفس الشي بس مكيجه

دخلنا وسلمنا والموجودات مو هواي حوالي بالربع بنات ثلاثة مبينات أكبر مني
بس هاي الي سدت الباب بوجهي تجي بطولي بس اسمن من يمي چنها طليه

من سلمنا كامن الثلث بنات وهاي الصخلة ظلت گاعده تمكيج... گبر حتى ما عدها حترام
غلست عنها والبنيه الاسمها طفوف گالت

طفوف: مرت صديق ضرار واختها

-اهلاً وسهلاً عزيزتي

ابتسمت بوجهن ومشيت گعدت بالارض گدامهن
وطفوف مشت فتحت باب الكنتور طلعت دشداشة نيليه وياها غترة وطلعت من الغرفة
وخرت نظري من سدت الباب وباوعت على البنات الي سلمن علينا شلون يمكيجن وصافنه عليهن هسه انا المن كمت شو لا اعرفن ولا يعرفني ملتهيه اصفن
فزيت من صفنتي مباوعه على البنيه سالتني وهيَّ تحط ظلال العيونها

-شسمچ عزيزتي

-قربة

-اول مرة اسمع هيچ اسمه شنو معناه.؟

قربة: معناه ماعرفه... بس امي سمتني هل اسم لان بالحلم الامام العباس(؏) انطاها قربة وجابتني بنفس اليوم تحلمت بي فـ سمتني هيچ

ابتسمت بوجهي راده على كلامي وباقي البنات يمكيجن وعينهن عليَّ

-اي مو اگول اسم اول مرة اسمع بي

اكتفيت بالبتسامة ما راده عليها، ظليت هيچ ثواني نوب رجعت سألت هاي الصخله وهيَّ تحط حمره لون احمر

-أنتِ يا مرحلة.؟

رفعت تك حاجب راده عليها بهدوء
قربة: خلصت سادس وهاي السنه كلية

-اها

قربة: وجعا... گلتها بگلبي، اوع شمالچ تعوجين بحلكچ
باوعت البنيه الي سألتني اول مرة... گالت وهيَّ تباوع على الصخلة

-كوثر كافي تملطخين جهرتچ

نزلت الحمرة وردت عليها
كوثر: مالچ علاقة

خزرتها البنيه وسرعان ما ابتسمت خطية تفشلت
ثول ولا عدها سلوب چنها صخلة ماكله رمان
درت وجهي مباوعه على غيم كاشه خشمها وتباوع عليها ثواني ورفعت عينها وگالت للبنيه الحچت وياي

غيم: انتن خوات.؟

-اي احنا ثلاثة اخوات هاي زينب أكبر مني وانا بنين وكوثر الگعده، وهاي مروة بت عمي عمران

باوعت على مروة زاويه روحه بعيد عنهن وتمكيج بهدوء ومكياجها مرتب ونازك، ابتسمت بوجها وهيَّ كذلك مبينه حبابه
رغم حتى الي اسمها بنين وزينب سلوبهن حلو الى الي اسمها كوثر مبينه وكحه...هيَّ اختها ما حترمتها گدامنا

ظليت ساكته وعدل بحجابي وعيني على الباب وين راحت هاي البنيه نريد نطلع
ختنگت احس نفسي علاگه زايده بينهن
باوعت على بنين وزينب كملن رغم ما حاطات هواي مكياج بس كحله وحمرة سحرية وظلال وطلعن
مرتبات... الى كوثر چنها مهرج عبالها حلوة من تجيب وتحط والى الي اسمها مروة حطتت بس ظلال وكحلة وتحديد وردي فاتح
شوي ولمت غراضها مروة بالجنطة وگالت

مروة: اترخص بنات انا امشي ابدل

كامت وانا كمت واشرت الغيم

-انا هم خلي اشوف امي

ابتسمت البنيه كاتمه بتسامتها مشت ومشيت انا وغيم وراها...والي اسمها كوثر تباوع ورانا بطرف عينها گبر اي والله ولا رتاحيت الها يالكعبة

فتحت الباب البنيه وطلعت واحنا وراها ويا ما طلعنا اجت طفوف تمشي متجها الغرفتها باوعت عليها ودرت وجهي على امي وخالة عيدة يباوعن علينا، حچت طفوف موجها كلامها للحجية

طفوف: جدتي ابوي الشيخ وين.؟

الحجية: غير برا يم الوادم

طفوف: عمتي دانه هسه خابرت ضرار دگول كملنا هم يله يجون ساعة بالربعة، بينما ياخذون صور وبينما نوصل للبيت مأذن

الحجية: گولي الامچ تخابره

هزت راسها ومشت والي اسمها مروة رجعت فتحت الباب وسمعها دگول الهن بدلن راح يمشون للزفة
مشيت انا يم امي وخالة گعدت يمهن، والبنات الموجودات ظلن يروجن يمشن هيچ ويرحن هيچ

عدلت شالي وباوعت على امي گالت موجهه كلامها للحجية الي حاطه عبايتها وشحاطتها گدامها
المساع من اجينه ما يمها شي يمكن هسه جابن غراض من گالت الزفه راح يمشون

فاطمة: اگلچ حجية هيَّ البت غريبة.؟

الحجية: اي من نعرفها

فاطمة: يعني ابنكم حابها لو هيچ

الحجية: لا هذي ولا هذي، البت سالفتها سالف يا يمه

فاطمة: خير ان شاءلله

عدلت نفسها الحجية وانا وخالة وغيم ركزنه بكلامه
مدري ليش صابني الفضول اعرف شبيها

الحجية:ابنه دعم البت وكسرها تكسر
وعمها أعوذه من عم،خله وگال البت صارت عايبة يا الي ياخذها بعد ومن هل حچي
هيچي يريد بكل صورة يذب البت براس ضرير
وتدرن واليدي هاشم ما راضي على ضرير ولي سوها بالبت

عيدة: ليش تأذت لو خسرت شي من جسمها

الحجية: لا يمه لا...كسر ابيدها ورجلها وقبل جم يوم فتحت الصب مالها

فاطمة: بس ليش گاعده يمكم ليش مو يم اهلها.؟

الحجية: يمه البت يتيمه الام والاب
امها ذابتها وهيَّ لحمه حمرة وابوها ميت وهيَّ بطن امها وعمها مربيه بس موش عم نكس

عيدة: ليش شبي

الحجية: جا يمه هوَ ما نطاها النا السواد عيونه انطاها على مهرها چيف الشيخ خله مهرها چثير
ومن دره ما ياخذ فلس واحد گلب علينا وماينطي البت ويريد يشتكي ويدخل ضرير السجن
وهاشم سأل البت تجين ويانا يو نطلكگ من ابنه هيَّ اختارت ضرير، عمت عيني عليها لاعب بحالها لعب

عيدة: انا سمعت من وليدي صويحبه داعم الى بت بس ما عبالي تزوجها عبالي من بنياتكم ماخذ

الحجية: بعد يايمه صارت من نصيبة
وهيَّ شون بت چنها غزالة تخبل بس سمارها يسودن
وطولها وعيونها الكحيلة بس المدهرب مالنه جامد چنه ثلج

عيدة: يحبها.. يجي يوم ويحبها

الحجية: من حلكچ الباب السماء، مسجينه ما مرتاحه سود عليَّ ، احبنه چيف على گلبي قوية ما تهاب

عيدة: يايمه كل وحدة هيچ هاي مار الف مصيبة ومصيبة وخلتها بهل حالة

رادت ترد عليها وسمعت صوت رياجيل ونسوان صارت.. باوعت على مدخل الصالة دخلن نسوان كبار بالعمر بگد الحجية والباقي شابات وسطتت عمر

هلهلن هرجن الجو بالهلال
طلعت المّرة الي تلكتنه بالباب وتهلي وترحب بيهن وهنه يهوسن ويهلهلن واحنا صافنات عليهن مانعرف بيهن ولا وحدة...توقفن عن الهلاهل والتدبچ وبدا المسالم والتبوس

سلمن وكملن واحنا كمنه من الحجية گكعدن يمها النسوان الكبار عرفت وحدة منهن اختها لان تشبها كلش والثنين الباقيات احمواتها يعني اخوات رجلها
والنسوان الباقيات وحدة خالت المعرس
وبناته اتوقع والباقي لا جناين وبنات هذن العجايز الكابر

صلوات هواي ما ينعدن، وحدة بت بت ابن خيط بدلة العريس...والبيت انترس ترس ماكو محطت رجل
وكل شوي داخلة مرّة تهلهل وياها جوكه شابات
صلوات شگد عدهم بنات شابات

باوعت على الساعة راح تصير بالخمسة وهمه ما طالعين من البيت چا شوگت نروح نجيبها وشوگت نرجع..التمن النسوان كلهن وطفوف واطياف
وباقي البنات السلمت عليهن طلعن من الغرف وقفلن البيبان واجن گعدن يمنه
گالت ام ستار مثل ما سمعت المرّة صاحتها بهل اسمه گالت الطفوف تروح البيت العريس لان الشباب وعمهم الشيخ هناك يم المعرس يجهزون بي

ام ستار: طفوفه روحي گولي العمچ كملنا ما عدنا شي شوگت تطلع الزفه

هزت راسها بخوش وطلعت من الصالة
الحجية: أنتِ تمشين يمه.؟

ام ستار: لا راح ابقى انا وزهور محد راح يظل كلها تمشي علقد خاف يجن الجوارين لو اهل جناين يا الي يتلكاهن انا ابقى وزهور وياي

الحجية: ومن الولد يا الي يبقى

ام ستار: ياسين واسماعيل والد اسماعيل

هزت راسها ساكته ورجعت دارت وجها تحچي ويا اختها واباقي النسوان كل وحدة لازمة الها جوكه ويتبسبسن ويضحكن

مشيت من يم امي الي واكفه يم باب مال غرفة طفوف اخذت غيم ومشيت گعدت يم اطياف وابنها يم الدرج هيَّ فوك وانا گعدت اول باية
ابتسمت بوجها وگعدت، وهيَّ گالت

اطياف: عذريني حبيبيه ما گعدت يمچن

قربة: عمري قابل احنا غربة

اطياف: لا والله البيت بيتچن النه العتبة والكم الدار

غيم: فدوة الهل حلك عود ذيچ الحمرة

اطياف: هههه ياهيَّ بس لا كويثر

غيم: عليچ العباس يا الي مسمينها كوثر
مو كرهتني باسم كوثر وانا احبه

اطياف: ليش شبيها سوتلچ شي.؟

باوعت عليها خزرتها تسكت وهيَّ كتهن كلهم وتحچي بصوت شوي مسموع لان واكفات مرّة وثنين بنات يم الدرج عينهن علينا

غيم: يا اختي شايفة روحه مدري عليمن لا عينها زرکه ولا شعرها اصفر، تباوع على العالم بطرف عينها الي يگول شافت كخه گدامها، اوعع الله يساعدچن عليها

كتمت ضحكتها رافعه ايديها هامسه وهيَّ تتقرب علينا

اطياف: الوراج امها عيوني

كشت وجها مباوعه على المرّة وگالت بشقى وتبسمر
غيم: أنتِ امها يا فدوة ولا تشبهچ شوف الجمال والكشخه... شمالها بتچ ما طالعة عليچ لا جمال ولا كشخه

ابتسمت وردت
حليمه: جمال عيونچ حبيبتي، بس شبيها وياچ گولي وانا العب جوله بيها

رفعت تك حاجب راده عليها وهيَّ تحچي وتحرك بيدها تشرح الموقف

غيم: بربچ خالة گاعدين وساكتين ولا يمها ولا بكرباه
شو انفتح باب الغرفة وباوعي علينا وسدي الباب بوجهنا... بله انا واختي ميخالف بس امي الچبيرة ينسد الباب بوجها ليش.!!
گليلي ترضيها انا اسد الباب بوجهچ حشاج طبعاً

حليمه: يا خاف ملابسه ملابس العرس وفاضحات وستحت منچن

غيم: شتستحي خالة هيَّ غير لابسه دشداشة خضرة جنها ابو حنتوش

اطياف: ههههههههه خرب يومچ

عضيت شفتي السفلية مباوعه على المرّة ماتعرف شتحچي والنسوان الي يمها ضحكن وحدة منهن غيرت الموضوع وحچت سالفة حتى تلهي المرّة
رجعت عيني منهن مباوعه على غيم
كزيت على سنوني وهمست وانا امد ايدي اكرصها من فخذها

-انچبي ولا تلغين بعد

غيم: اشتعل جعفر بنار ونفط

گالت هيچ وهيَّ تفرك مكان الكرصه
اطياف: وعلي حبيتچن دمچن محبوم وأنتِ نسخه مصغرة من شرار ونرجس

غيم: العفو حبيبتي انا الله ما خالق اربعين شبيه اليه
لا انا الاربعين كلهم هه هه هه هه هه هه

اطياف: لا ثقتچ احتاجها يم اخوي علي ضروري كلش

غيم: خوش انطيني رقمچ وخابرچ ونطيچ محاضرة طول وعرض اخليچ تمشين وتضركين ثقة

قربة: غيمم الفاضچ

غيم:غلست عني مغيرة كلام
- حبيبتي ام منو.؟

اطياف: ام امير

غيم: ام امير الوردة. انا طبعي اتشاقى لا تزعلين من كلامي بداعت ام الاخضر

اطياف: لا لا راح ازعل هنا حلفتيني بام الاخضر

غيم: ها احول على غير وحدة گولي وانا احلفچ

ضحكت وصاحت على ابنها الصعد فوك
اطياف: انزل امير راح نروح وتظل وحدك

گالت هيچ وجانه صوت طفوف وهيَّ
تدخل من المطبخ

طفوف: يابه حضرو رواحكه السيارات اجت

گالت هيچ وكامت اطياف
اطياف: تعالن نصعد سوى انا وياچن ومروة وطفوف

كملت وگلت انا وهيَّ لبست عبايتها
قربة: خلي نصعد بسيارة اخوي

اطياف: لا خيه غير بالكوستر

قربة: هو اخوي سيارته نفرات من ضمن الزفه

هزت راسها ومشينى باوعت على غيم وگلت
قربة: غيم روحي صيحي الامي والخالة عيدة خلي نصعد كلنا ويا عليا

غيم: مو تعوفني بربچن

هزيت راسي بخوش ومشت صاحت الامي وانا ظليت واكفه باب المطبخ متانيه اطياف تصيح الاختها والمروة... والنسوانه تطلع اتريد تحصل مكان بس لا ننشتل وما نحصل مكان

شوي وطلعت امي وخالة عيدة وراها غيم والبنات
طلعنا كلنا برا البيت لان السيارت مال الزفه برا
طلعت باوعت على السيارات ادور سيارة اخوي جاي ادور ولمحت مطلب اشرتله يجي
شافني واجه ويا الولد الي شفته ويا عبدالله
يا سبحان الله شگد اشوفه ولا اعرف اسمه

وخرت عيني منه ما احب اباوع عليه
وكف گدامي مطلب وامي والبنات وراي سلم وهوَ منزل عينه على البنات وخالة گالت

عيدة: سيارة عليا خلينه احنا نصعد بيها

مطلب: تعالن وراي

مشى ومشى ورا المكروهه طلعنا كلنا وطفوف تحچي ويا اطياف

طفوف: اگلچ احنا ما حچينا الرجولتنا

اطياف: هسه من نشوفهم نكلهم

مشينى واصلين الآخر سيارة السيارت كلهن بيهن نسوان وجهال، السيارات الصغار هواي
والكوسترات حوالي بالثلاثة وصلنا يم السيارة مال عليا وما بيها بس اربع نسوان ورا
صعدت انا وغيم وحد بصف الثانية وطفوف واطياف مقابيلنا وامي وخالة عيدة ورانا شوي واجن نسوان بقيه انترست السيارة

شوي وشوف من جامه السايق اجه عليها لابس دشداشة حليبيه وغتره سوده لافها لفة عمانيه طالع يخبل فديته فدييي...

فتحت الجامة ومن وصل يم الجامة مديت بس راسي وگلت:- فديت الحليبي انا

رأساً دار وجها مباوعلي وضحك رفع ايده ضرب خدي بخفه وگال

عليا: هلا بصفيرة شلونچ يابه

-هلا ببوي وعزوتي هلا تاج راسي

غيم: تريد منك شي

درت وجهي مباوعه عليها وگلت وانظار البنات علينا
قربة: مو انا الهندية... انچبي اذا ما اتغزل بخوي وتاج راسي بمنو اتغزل

غيم: ذو الفقار المكرود وين واله

باوعت عليها صفح ورجعت نظري عليه
عليا:طببي راسچ يبا

گال هيچ ومشيى صاعد ويا ما صعد انفتح باب الصدر وصعد المكروهه شغل السيارة عليا ويا ما مرت سيارة العريس من يمنه وگالت غيم وهيَّ تباوع على سيارة العريس

غيم:عيني ورمش عيني شغلنه ساجدة خلي نهز

باوعلها بالمراية خازرها... هيَّ كشت وجها مباوعه على صديق مطلب... سكتت هيَّ وخالة عيدة گالت

عيدة:وليدي شغل مواليد احسن من الغاني

غيم: بربچ خالة تحچين صدگ مواليد نشغل شعدنا طهور... غير عرس وخبصه... شو بله شغل ساجدة عبيد خلي نفرح ونصفك شني يومه عرس

باوعت على طفوف واطياف گاعدات مقابيلي ويضحكن تقربت منهن وهمست

قربة:صدگ لو گال ابو المثل عريس واحد والف مجنون

غيم: عليا تشغل شبيك

گالت هيچ وشتغلت غنية ابو البيرة الساجدة عبيد
باوعت للصدر المكروهه لازم تليفونه ورابط التلفون بالسيارة هيَّ شتغلت وغيم طكي اصبع ويا ما طكت اصبع اجتها لطمه من ورا من امي، اي بعد ايدي اختي ستهترت دارت وجها على امي وهمست

غيم: لا تقتلي الفرحه يا امهاااا

خزرتها ساكته وهيَّ تهز على الخفيف بجتفها وتصفك
وتحچي ويا الغنية والبنات ماگدرن لا يحچن ولا يصفكن مبينات خجلن من عليا والمكروهه

باوعت على الزفة صارت شطولها والهورنات والصوت الاغاني من السيارت تارس الشاعر
باوعت على السياير الاصغار ومن ضمنهن سيارة مطلب طالع عبدالله من الورا گاعد على الجامة ويهز چتف ويركص وعمو صاحب گاعد بالصدر ويضحك ويصفك

فدوة شگد طالع حلو شني اليوم كلهم حلوين طالعين مدري انا عيوني مدري شبيها
ظلينا نمشي بربع ساعة وطول الطريق دك هورنات وركص...هرجو الشارع هرج منا ما وصلنا للصالون
صفو السيارت بس محد نزل من النسوان غير الحجية واخواتها وحمواتها والرجال لابس عباية وعگال باوعت عليه وگلت

-هذا ابو العريس.؟

طفوف:لا هذا عم العريس عمي ابو رجلي

هزيت راسي بها، ووخرت عيني مباوعه على عليا نزل هوَ والمكروهه ومشى يم عبدالله ومطلب وعمو صاحب ظلو واكفين يحچون وشوي وجو وكفو يمهم جوكه شباب

اطياف:شوفي هذا ابو الدشداشة الجوزية هذا رجلي ستار والي لابس نيليه هذا غسان حماي ورجل طفوف اختي... والي يمهم اخوي علي ابو الدشداشة الكريمة والي وياهم الولد الابس دشداشة تركوازيه هذا عدنان اخو كويثر

غيم: بس لا مسموم مثل اخته

اطياف: هههههه لا لا يختلف عن اهله من السماء للگاع
فد حباب وگلبه طيب وحنين وكل هذا السانه فالت وكشكولي

غيم: اهم شي كشكولي جوي وجوائي

اطياف: يا اذا بعد شوي دخل جوه اخليچ توكفين على صفحة وانا احچي ويا وسمعي كلامه

غيم: ليش شبي

طفوف: تسمعين حچيه وأنتِ تعرفين

هزت راسها ساكته رجعت باوعت من الجامة
طلعت بنيه شابه طويله ومكيجه مكياج هادئة وحلو بنفس الوقت وياها الحجية والحجيات الباقيات اجه يمها الي اسمه عدنان لزم الحجية وغسان لزم الحجية الثانية ودوهن للسيارة

دار وجها عليها الي اسمه عدنان ومدري شحچه وياها واشر على عليا وعليا اجه مشى گدامها وهيَّ ورا
تمشي ومدنكه راسها، اجه فتح الباب مال السيارة وباوعت علينا وحچت وهيَّ تدخل

-وين اگعد

قربة: غيم ادني خلي تگعد بنصنه

دنت غيم وهيَّ اجت گعدت يمنه وطفوف گالت
طفوف: ها كملو تصوير

-وخري عني لا احركچ

اطياف: خير

قربت راسها من البنات بس سمعت كلامها

-والچن هذا الصاك منو.؟

رفعت ايدها طفوف غمت كصتها مباوعه
عليَّ ورجعت نظرها عليها

طفوف: گبر لفچ عبالي مدري شصار جوه

-احچن منو هذا، صاحب ضرار لو الولد

غيم: هذا اخوي

باوعت على غيم وهمست بصوت ناصي

-بربچ هذا اخوچ چنه أوريو

قربة: تتغزلين تعيبين

-لا جديات هوَ حلو چنه العافية بس طالع أوريو محشه بحليب

غيم: لا تعيبين على اخوي العزيز ترا تصير مو زينه

-يا الي معيب انا اگول چنه العافية غير باوعت عليه نساني حليب امي

طفوف: نرجس انچبي منا امة عيب استچني

دارت وجها على امي ابتسمت بوجها وگالت وهيَّ تباوع على خالة عيدة وامي وهنه مالتهيات يسولفن مو يمنه رجعت نظرها عليَّ وعلى غيم وگالت

نرجس: انتن خوات، وبنات منو.؟

اطياف: اي خوات وقربة زوجت اخو صديق ضرار والوراها ام رجلها وامها وخوها الي دگولين عليه أوريو هذا صويحب الولد بالجديد مبين

نرجس: أنتِ بس لا الي نخطفتي مو.؟

هزيت راسي بأي
نرجس:الحمدلله على السلامة حبيبتي والله من گال ضرار گلت خطيه بس نسيت اسأله بعد

-حبيبتي شكراً

نرجس: شلون هسه انا اريد اخوچن تقبلن اصير چنتكم لولا اذا تقبلن من هسه گولن

ضحكت وغيم گالت
غيم: اذا مسودنه باجر نجيب اخوي ونخطبچ

نرجس: لا عيني اتقشمر على گولت جدتي
اريد اگعد يم هلي ماريد تتزوج مو طفوفو

ابتسمت هازه راسها، ضحكت على سوالفها
مبينه فرفوشة والسانها حلوة مثلها
صفنت عليها ورفعت نظري على عليا واكف يم مطلب
شيصير لو صدگ نزوجه صار شايب الي بعمره عدنا ثنين وثلاثة، ان شاءلله على يوم احچي ويا امي بهل موضوع

فزيت من صفنتي من انفتح باب الصالون وطلع منها الشيخ ورا المعرس ولازم ايد العروس وراها مرّة شايله البدلة

طفوف: ليش ما ظليتي ويا عمه دانه.؟

نرجس: هيَّ گالت روحي صعدي ودي جدتي لان اخذت صورة وعيونها وجعتها من البلوجكتر

باوعت على العروس فتحو باب السيارة وصعدوها والمعرس وياها تذكرت يوم عرسي ماعرف هل بنيه مثلي لو تختلف عني... اخذت نفس زافرته

صعد الشيخ بالصدر والمرّة مدري وين صعدت
تحركت السيارة وكل واحد صعد بسيارته وتحركو ماشين واجه عليا وياه المكروهه
صعدو وشغلها ومشى ورا الزفه...ياوعت على الجو ظلم لان أذن وهمه بالتصوير
طلعتهم غلط اتخرو يله طلعت الزفه
كون من الاربعة طالعين لان الجو تغير وكام يأذن من وقت

باوعت على نرجس همست بصوت خافت تحچي وياي طفوف بس اخوي مدري شلون سمع وباوع من المراية ورأساً وخر عينه

نرجس:خلي يشغل غنية صفكه صدگ چذب ولا يگول عرس

عيدة:دنيا مغرب يمه

نرجس: اذن وراح البيته خالة

گالت هيچ وشتغلت صفكه مال محمد الحلفي
مال لا تخليني وحيد
مديت راسي مباوعه على غيم وغيم انا باوعتلي وضحكنا بنفس الوقت وهمست غيم

غيم: هاچ طلبتي صفكه الاخ انطاچ احلى قصيدة يحبها الاحلى رادود

باوعت على عليا وگالت بصوت خافت
نرجس: يبوو خرب أنه وانا اگول يشبهمن

غيم: يشبه محمد الحلفي مو.؟

نرجس: اي والكعبة بس اخوچن بي روح محمد الحلفي مفچچ

غيم: اخونا أوريو محشة ماكو بجماله

نرجس: ها راح تلزمنها عليَّ

قربة: كون اگله الى يشك زيجه ويصيح يبوووو

نرجس: لا عليچن العباس لا تگولن فشلة والكعبة

ضحكنه كلنا بصوت ناصي،ضحكت مباوعه على عليا عين علينا وعين على الطريق
رفعت تك حاجب وبتسمت بوجها هوَ ابتسمت وعيونه صارن يخبلن مدري من يضحك يختفن عيونه

وخرت عيني منه مباوعه على السيارت الزفه الولد طالعين من السيارة ويركصون
ظلو طول الطريق يركصون ويصفكون
درت وجهي مباوعه على نرجس

نرجس: لو صاعده ويا كويثر الحية ولا صاعده هنا
لا ركصه لا هلهوله، تهلهلن حبيبات

-كلووش

رفعت نفسها مباوعه ورا مدري يا الهلهلت على كيف باوعت عليها وگالت

-هاي ياهيَّ، يااا هاي صفيةةة والچ خالت العريس وما تهلهلينيين وتركصين مع الاسف الى اگول الدانه عليچ

صفية:لعد راوينه هلهولتچ

اشرت على الصدر معنى ماگدر، غيم شاتفتها هيچ سوت رأساً رفعت ايدها وطكتها هلوله

غيم: كلووووووش
-اسمررر ويخبل وكل القوط اتلوك عليه كلوووووووش

نرجس: بعد اخيتچ يله صفية هلهوله كولي كوله

صفية: والله لعوف المؤمنه وبعرسك اصير مسودنه

گعدت بمكانها وردت عليها
نرجس: لا هواي هواي صرتي مسودنه

ضحكت والمرّة ساكته
شوي ودخلنا للمنطقه مالتهم، وصلنا
صف السيارة ورا الكوستر ونزلنا كلنا وحدة ورا الثانية
باوعنا من بعيد الناس الگاعده بالكراسي هواي

باوعنا من بعيد سيارة الزفه دخلوها جوه
وصلنا ودخلنا جوكه باوعنا للسيارة نزل منها السايق ستار رجل اطياف، والعروس كايدينا ام ستار والمرّة الطلعت وياها من الصالون
والنسوان وراها طش جكليت والعريس يمشي بصفها
باوعت عليهم وتقربت من يم امي

قربة: يمه شو ما ذبحو دجاجة يم رجلها

فاطمة: غير بيت رجلها هاي بيت عمها من يزفونها يذبحون دجاجة

هزيت راسي بها دخلنا وراهم ونسوان تهوس وتصفك
مشيت انا وغيم صعدنا على الدرج وباوعنا عليها مگعدينا من الصفحة الي يم غرفة طفوف وحاطين كرسيين كرسي گاعد عليه العريس وهيَّ بصفه
وخرت منها البركع وحدة من النسوان ما شفت شكلها
لكن المرّة عدلت بدلتها وكملت وخرت منها

باوعت عليها مكياجها وتسريحتها والبدلة كلش نازكات وحلوات وهيَّ معانيها حلوة رغم مكياج وهاي معانيه حلوة... حطت القران الصغير بحضنها وعدلت البدلة من صدرها... حولت نظري مباوعه على العريس منزل راسه ويمسح بكصته... درت وجهي منهم من غيم هتفت

غيم: الولد اتبهذلت احواله

قربة: شلون يعني.؟

غيم: جمالها والمكشوف سطرنه سطر ههه

ستوعبت كلامها وخزرتها وهيَّ ضحكت وغلست عليَّ وهلهلت وگالت

غيم: كلووووووش... خدود روبه يا كفاه وين دورها ولكاهاااا... اي والله وين لكاها كلووووووش

باوعت على نرجس وكفت بالنص نازعه شالها وظاله بالفستان وشال ظلت تهوس بي وتكول وتهوس وهيَّ ومرّة الي طلعت ويا العروس

نرجس: ضرار رايد راته وعايف بنات ولايته
كلووووووش

اطياف: اجه العريس والكذله تهفيله مدري شگالچ و#نتِ غمزتيله، احچي شريره شغمزتي

ضحكت البنيع ونزلت راسها وهوَ باوع الها ورجع نظرة للارض... وغيم هوست

غيم: اريد اركص ركص كسر الكاشيه
انا اخت البنيه موش اخت الولد كلووووووش

الحجية:كافي بسكم استچنو، خلي يصبون عشى للوادم

نرجس: هاي آخر وحيدة وعلي
عيـــــن الحارة الحمزة يطفيها، اي والله فديتهم طالعين يخبلون اخاف عليهم ينحسدون صلو على نبي

ردو الصلاة واجت عيني على كوثر وامها كشن وجهن ما عاجبهن، عجيب نفس الخشه يا سبحان الله

گالت هيچ نرجس والعريس كام وطلع وهنه يحچن ويا بصوت ناصي وهوَ يضحك
طلع وكل وحدة گعدت وفتحو الغرفة من الغرف وگعدن بيهن النسوان الكبار وانا وغيم نزلنا يم امي وخالة عيدة ظلينا گاعدين شوي يم امي وباوعت على نرجس گعدت يم العروس وحچت ام كوثر

حليمه: ها نجيرس تردين رجل

رفعت حواجبها نرجس وردت عليها وهيَّ تعدل فستاهنا وتحط رجل على رجل

نرجس: اي وشبيها هذا نص الدين وانا من اريد رجل اكمل ديني صح شومة لو مو صح

ردت عليها الحجية هازة راسها
شومة: حتى لو غلط يصير صح الخاطر عيونچ

نرجس: فيدتچ فدي ست الشيخات

باوعت عليها مبتسمه اجت عينها عليَّ وضحكت ورفعت حواجبي الها وگلت:- انا اجيب الها أوريو محشة بحليب اصلي شدگولين

نرجس: موافقه وداعت شرار

باوعت على العروس تباوع علينا، كمت وغيم كامت وراي باوعت عليها وهيَّ همست

غيم: لا تحچين ماريد شي يفوتني

هزيت راسي ضاحكه ومشيت وكفت يمهن
نرجس اشرت عليَّ وگالت وهيَّ تباوع عليها

نرجس: شريره هاي البنيه الي نخطفت مرت اخو صديق ضرار

فتحت عيونها واشرت بالماسكه عليَّ
شرار: أنتِ

تقربت منها بوستها مباركه الها وگعدت يمها

شرار: شگد تمنيت اشوفچ

قربة: وهاي انا گدامچ

شرار: والله من سمعت شگد ظليت افكر بيچ گلت الله يساعدها

تنهّدت ورديت عليها
قربة: شنسوي مرت على خير

شرار: الحمدلله ذكرى ما تنعاد ان شاءلله

اكتفيت بالبتسامة ما راده عليها وغيم هتفت موجهه كلامها النرجس: شو گومي رجلي طاحت لا ما انطيچ أوريو محشة

نرجس: انچبي

غيم: چا فلا اخذچ الاخوي

نرجس: لا عليچ الله

شرار: وجعه من الله

قربة: لا التمت الشله التعبانه

غيم: واخيراً صار عندي رباعي احسن منچ ماريدچ قربة روحي الذو الفقارچ

قربة: هو رابعكم

نرجس: ليش شبي

غيم: والكعبة ما بي شي بس هيَّ بيها طفكه

شرار: شلون انا اريد اعرف

قربة: سالفة طويله والله

نرجس: تعالي على يوم النا وباتي بربچ

قربة: يا الي يقبل

نرجس: تعالي بالسبعة مو نسوي تعالي الصبح ولي البيتچ باليل

قربة: ان شاءلله اگول الخالة

نرجس: انا احچي ويا امي تحچي وياها من هسه

هزيت راسي بخوش
غيم: اخذي رقم امي وخلي نحچي وياچن

شرار: ما عندي موبايل

غيم: خلي ضراراچ يجيب لا ادچنا

نرجس: اي والله حتى انا اريد احچي ويا ابوي يجيب الي موبايل، انا ناسيى مو على بالي

غيم: اي اخذي رقم قربة من هسه
انطيهم رقمچ قربة

قربة: بيش انطيهن

نرجس: راح اجيب تلفون امي واجي

كامت وغيم گعدت بمكانها
شوي ورجعت رديت عليها رقمي وخزنته عدها
ظلينا نسولف سوالف عادية منا ام نرجس صاحت عليها تفرش السفرة كامت هيَّ ومروة والبنات فرشن السفرة بكل مكان وظلو ينقلون بالكل

ظلينا گاعدين يم العروس ونرجس جابت مواعين وحطت يمنه ومشت شوي ورجعت جايبة ماعون ويا خواشيك وگعدت يمنه أكلت لكمة وباوعت على شرار وگالت وهيَّ ترفع حواجبها

نرجس: شلون #كل

شرار: چؤ لا تغورين هسه ماشتهي العسل مو نوب تمن

ضحكت وظلينا ناكل وتسولف النا على النسوان الموجدة... من كلامها ويانا الي يگول تعرفنا من زمان
وكلامها وشقاهى ويا غيم، ثنينهن نفس السوادين

ظلينا ناكل وكملنا وظلينا گاعدين المن بالتمن الطايح
شلت المواعين مالتي ومالت غيم ونرجس
كامت ويانه حطيت المواعين بالمطبخ
باوعت بالمطبخ گاعدات ام ستار وطفوف واطياف توكل ببنها

ام ستار: أكلتن يمه

قربة: الحمدلله خالة

مشيت غسلت وكملت ويا ما درت وجهي امي طلعت من الصالة حاطه الموبايل على اذنها وعقاجه وجها
تقربت منها انا وغيم وهزيت راسي وگلبي نخمط

قربة: شكو يمه.؟

فاطمة: جاين خيه جاين

قربة: احچي يمه شكو.؟

سدت الخط وام ستار والبنات يتسألن
ردت عليَّ بقهر

فاطمة: وردة...

يتبع...

21

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

.
.
.

نگت ايدي من التمن داير بجسمي گاعد عدل وماد رجلي على طول... ومباوعه عليهم وطكيتها تريوعه
رأساً باوعلي غسان بالع الكمة، بلعها وهتف وهوَ كاش خشمة

غسان: ماكل مطي مدگلي شو احنا ذبحنه عجل شمالك تريع

باوعت عليه صفح متريع مرة ثانية بصوت عالي كملت راده عليه برود واشرله بصبعي يأكل:-أچل ابني أچل

غسان: شبع وكام يزاكط... لو ما شفت الذبيحه بعيني چان گلت ابوي ذبح مطاية للوادم

اباوعله ولعب بصابع ايدي المتروسه دهن من التمن كمل كلامه ورفعت نظري مباوعه على ستار واشرت على غسان وهتفت

-شبي أخيك شو كام عليَّ شني مانين عليَّ بعزيمتكم شني

يسمع كلامي وهوَ مدنك راسه ومد ايده اخذ موزه كشرها وقدمها اليه الخذتها وهوَ اردف

ستار: كام يمضرت عوفه يسربت وحدة وهاك أكل بعد روحي أكل شكم مطيلب عدنا

رفعت تك ايدي حاطها على صدري بدون ما المس الدشداشة ودنكت راسي ورديت عليه بمتنان

مطلب: بعد طوايفي احسن من البالي

غسان: ها ها

مطلب: يا الي يمك بويه

باوعلي صفح وظل يأكل،كملت الموزه وحطيت الكشر مالها بالماعون، ورفعت راسي مباوع على فياض گاعد ويأكل بدون صوت وعبدالله يأكل ويا وعينه عليه
تقربت منه فياض وهمست وانا اقرب راسي يم وجها

مطلب: ها عضيد

برفع نظرة مباوعلي ورد بهدوء
فياض:ها.؟

مطلب: شبيك وجهك چنه نعال دايسته تريله

باوعلي صفح غلس على كلامي،ضربته على زنده اريد اعرف ليش دلغم فجأة:- احچي شبيك امك بيها شي لو ابوك.؟

فياض: لا بس مدري شبيه ختنگت وگلبي يوجعني

مطلب: مو گتلك من ذاك اليوم روح شوف شبيك

مارد عليَّ ماخذ نفس زافره وهوَ يگلب بالتمن بالعظمة مال الحم.. باوعت على ايده بصفنه هاي الايام ماله حس مدري سكت وما كام يفكر بيها لان لازمه عده وحرام عليه يفكربيها... تنهّدت موخر عيني منه مباوع على غسان

مطلب: يول اريد اغسل سويلي درب

هزت راسه بأي وكام وكمت ويا وعفت عبدالله وفياض گاعدين مشيت ورا غسان وسمعت خطوات وراي باوعت وراي فياض ماشي وراي

مشينى يم المغسلة الي يم البيت غسلت انا اول شي كملت وفياض غسل ومدلي غسان خاولي نشفت وجهي وايدي وحچيت ويا غسان

-شوگت تزفونه.؟

غسان: خلي تكمل الوادم أكل

شمرت الخاولي الفياض الساكت وما رديت عليه
ردت امشي وسمعت صوت وراي يصيح بسمي التفتت شفت قربة وياها غيم وامها باوعت عليهن وجوهن مخطوفة اتقربت مني وهتفت بستعجال

قربة: مطلب بعد اختك صيح عليا بساع

تقربت منهن ورديت: شكو.؟

ردت عليَّ امها وهيَّ تعدل بعباتها
فاطمة: ماكو شي يمه سلامتك

هزيت راسي ودرت وجهي مباوعه على عبدالله وصحت عليه وهوَ باوعلي بس باوعلي هتفت بصوت عالي حتى يسمع

مطلب: صيح عليا كلهم الاهل يردوك

هز راسه وكام لبس حذائة وطلع ظل شوي يله دخل ورا عليا هن اول ما شافنه مشن على سريع مشيت وراهن شكلهن مو مال كلشي ماكو
اجه وراي فياض وكف بكم خطوة بعيد علينا
وانا وكفت وراهم واسمع امة تحچيله

فاطمة: مادري البت طايحه من العصر وما حاچيه وهسه متخربطه كلش ومدخلينا عمليات

باوعت على قربة دارت وجها عليَّ وگالت
قربة: مطلب فدوة اگول العمو قربة راح تروح ويا اهلها

مطلب: شكو شصاير احچي.؟

قربة: صديقتي بالمستشفى حالتها خطرة

باوعت عليها ودرت وجهي على فياض
ما احچي شلون صارت تعابير وجها
بلع ريگه مباوعلي ومباوع عليها وبعد نظرها عنها هزيت راسي وهتف موجهه كلامي العليا

مطلب: عليا اخذ امي وبيوي وانا اوصل قربة وامك

فاطمة: لا اخذها المن جايه وياي

قربة: يمه

فاطمة: وغمه المن ماشيى استچني

قربة: عليا مثل ما گال مطلب اخذ خالة عيدة وامي وغيم.. المن بايته امي وياها انا ابقى ويا مريم
وبس تطلع من العمليات اخلي مطلب يجيبني

عليا: ورجلچ

-عمو صاحب يگله ما يگول شي

باوعت على امي خزرتني غلست عن خزرتاها وحچيت بستعجال:- يله مطلب بساع

قربة: هز راسه ومشى گدامي وانا ورا درت وجهي مباوعه على امي وغيم وامي تعضلي بشفايفها
درت وجهي عنها، ادري ذو الفقار ما يگول شي
رجعت نظري ماشيى ورا مطلب
طلعنا من البيت ماشين من بين السيارت لان الهسه العالم بعدهي تروج...وصلنا للسيارة مالته ردت اصعد بالصدر واجاني صوت من وراي باوعت على مصدر الصوت

-اگعدي ورا

عگدت حاجبي مباوعه على مطلب هزيت راسي باستفهام وهتفت:- شعدنه جاي ويانا.؟

مطلب: ارجع فياض

درت وجهي عليه فاتحه عيوني هذا نفسه فياض..!!
بلعت ريگ معدله تعابير وجهي...ههه والله صدفه ما توقعت واحد بالمية فياض نفسه الي شفته
ويا عبدالله بللت شفتي مباوعه على مطلب من هتف

مطلب: راح نظل واكفين.؟

سكتت ما حاچيه شي موكت عرك
عفت يدة الباب وفتحت باب الورا وصعدت
وهوَ اجه فتح الباب وصعد هوَ ومطلب سوى
شغل السيارة مطلب ومشى على السريع طالع من المنطقه مالتهم

مطلب: بيا مستشفى.؟

قربة: الـ****

هز راسه ساكت شوي وهتف
مطلب: مشبيها عسى ماشر.؟

قربة: ماعرف دگول اخذوها من يمنا وما گالو شبيها

مطلب: هيَّ مريضه من قبل لو خاف مصران اعور

قربة: لا حامل

گلت هيچ وباوعت على المراية مال الكرسي الي گدامي الگاعد عليه فياض
باوعتله فاتح عيونه ثواني ودار وجها مباوع على مطلب بنظرات ماعرف اشرحها
درت نظري المطلب مباوعتله ولا دار وجها اله ولا بدر منه أي حركه

تعمدت احچي هيچ وادعي الله الطفل ما بي شي حتى يكطع الظنه لان مبين من صدمته ما يعرف هيَّ حامل بعدت نظري مباوعه على الطريق وعلى المحلات رفعت ايدي حطيت عكس ايدي على فخذي وكف ايدي رفعته اكرط بظافيري

احمد الله وشكره من عرفته فياض نفسه
وانا چنت اخطط بس تخلص العدخ احچي وياها عليه
حتى تقبل بي، بس الله يحبها ويحبني من كشفته بهل ساعة چان هم تبهذلت ودمرت من وراي
وخرت اظافري من حلكي مباوعه عليه من هتف بصوت غريب وكوه يطلع

-من شووگت حاامل..؟

مطلب: سؤالك غبي يعني من منين تحبل غير من رجلها

فياض: گلت من شوگت.؟

قربة: هتفت بصوت هادئة لكن متروس تحذير
من زمان، ورجاءً ابتعد عنها الف متر خوش
ومطلب هاي گدامك انا سكتت وما حچيت العرفة الخاطرك.. بس من توصل يم شي يخصني لا هنا الموضوع يختلف

كملت كلامي وهوَ هتف موجهه كلامه المطلب ما راد عليَّ:- شسويت انا.!! احچي مسوي شي.؟

مطلب: فياض مو قت هل حچي اسكت

فياض: لا اريد اعرف انا شمسوي
شو حبيتها منا راحت من ايدي منا شمسوي الها
مأذيها لو انا الي خليت اخوها ياخذها ويزوجها غصب

رأساً هتفت موجهه كلامي المطلب وحچي ويا بهدوء وصوت ناصي ماريد يعلى صوتي گدامه وهوَ رجال غريب عليَّ

قربة: مطلب انا ما اقصد من هذا الجانب
أنتَ وضح اله على شنو احچي وعلى ايش اقصد

هتفت بهل شكل لان ماريد احچي ويا وأكبر راسه وانا ما اطيقه... وذا احچي ويا راح اكب بوجها مادري
ما اتحمله رغم هوَ ما حچه وياي ولا سوى اليه شي بس الشفته والشكيت بي خلاني ما اشوفه بعيني
نوب اخلي صديقتي تتورط ويا لا والف لا من سابع المستحيلات، خاف يغر وردة بحبه الها انا موجوده ومنع كلشي يصير

فياض: على شنو تقصد بعد.؟

فر السيارة داخل الشارع الثاني راد عليه
مطلب: راجع سجلك وبذات ويا مرت اخي وأنتَ تعرف

سكت ثواني ما حاچي حرف
باوعت عليه بطرف عيني من المراية لان ينشاف
اگدر اشوفه ضوء السيارة مشغله مطلب
باوعتله صافن شلون الواحد على گولت مطلب راجع سجلك

لحظات لا أكثر وهمس بخفوت وبنبرة صوت اول مرة اسمع رجال يحچي بهل كسره شلون واحد فاقد امة لو شي عزيز على گلبه

فياض:وداعت عيون امي انا مو مثل ما ماخذه فكرة عليَّ

سكتت ما راد عليه باوعت على الطريق وهز برجلي
بعدها حولت نظري مباوعه على مطلب بطرف عيني من هتف

مطلب: خويه انا سبق وگتلچ لا عبدالله ولا فياض
بنفس ما ماخذه فكرة عنهم... مو گتلچ همه ما عدهم شي لولا.؟

هزيت راسي ساكته ورجع هتف وهوَ يباوع الفياض ويرجع نظرة للطريق:- فياض صديقي من المتوسطه اعرف عنه كلشي وهوَ يعرف عني كلشي اعرف اهله وناسه وعرف اخلاقه.
لو هوَ نفس ما تگولين شلون امشي وياه.؟
الى بحاله وحدة الى انا مثله وجاي اسلك نفس الدرب
لكن أنتِ شوفت عينچ شفتي عليَّ شي يثير الشك
لو شي يدل انا اشتغل شغل غير قانوني..؟

قربة:بللت شفتي ورديت عليه بحيرة "والي شفته ها.؟ والخوف الي شفته بعيون الولد الي وياه.!!
هذا شنو معناه مطلب..؟
انا حچيت الذو الفقار گتله طبني طوب اذا صار بيه شي بس اهلي خط احمر..
وبالذات وردة، وردة عمرها ما شافت الراحه وانتم شهدتو على مصيبتها نوب اخليها تدخل مصيبة ثانية
متوازيه خو ما متوازيه.

لهيچ اتمنى منك مطلب تحسبها مثل اختك وتقنع صديقك يبتعد عنها يحبها على عيني وراسي
ما صارت من نصيبك الله يرزقك بغير بنيه احسن منها واحلى منها بس لا يورطها

مطلب: هاي هيَّ وعد رجال اذا تقرب منها
انا اول الواكفين بوجها وهاي گدامه مو ورا ويسمع شحچي ويدري بيه من احچي مارجع بكلامي

سكتت ما حچيت وفياض ساكت ما حچه شي بس صوت انفاسه مسموعه...ماريد اذيها من ورا حب
واصلاً.. شحب منها وشاف منها حتى يحبها هل حب
انا اعرف كلش زين هذا عجاب مو حب وبس يتزوج راح ينسى وردة وابو وردة

ظلينا طول الطريق ساكتين بس صوت انفاسنا مسموعه منا ما وصلنا للمستشفى
صف السيارة ونزلنا دخلو همه گدامي هوَ وياع
وكفو يم الاستعلامات ودار وجها عليَّ مطلب وهتف

مطلب: شسمها الكامل

قربة: وردة احـ..

قطع كلامي صوت خطوات وراي درت وجهي مباوعه
بتجاه الصوت شفتها مريم ولو ما تنشاف من البوشي بس عرفتها..رأساً مشيت الها
وكفت گدامها مباوعه عليها وعلى حال

كمت من يم رجلها وگعدت يم راسها ومريم اجت باستها من راسها متحمده الها بسلامة
وخرت مريم وانا بستها من جبينها وهتفت بهدوء

قربة: وردة أنتِ قوية ومؤمنة راح تعارضين ودگولين ليش الله اخذه مني، لا اكيد أنتِ ما تعترضين على حكم ربچ... تعرفين اخذه منچ لان اكو اراده بيها
يمكن يريد ينطيچ احسن من هل طفل، لان لو باقي عندچ يمكن يطلع متشوه لو مريض

ظلت ساكته ودموعها تصب،رفعت ايدي مسحت دموعها وهتفت اسكتها:- لچ ليش تغلطين عليَّ

باوعت عليَّ وكملت
قربة:اي اگلچ وردة حبيبتي تسمعيني دگليلي انچبي

وردة:شوگت هاي.؟

مسحت دموعها وحچي وياها
قربة:من طلعوچ من العمليه وأنتِ تصيحين وتحچين
حرامات ما صورتچ ونشرچ على الفيس تصيرين مضحكه هههههه

ابتسمت بخفوت عاقجه وجها
قربة:تتألمين.؟

وردة:اي شويه

قربة: وجهت كلامي المريم
الدكتورة ما سجلت علاجات.؟

مريم: اي انطيت الراجيته العمي وهوَ راح يجيب من نطلع

قربة:شوگت طلعون

مريم:عمي گال يس يخف البنچ عنها نگدر نطلعها

ظلينا نحچي وياها منا گدرت تستعاد وعيها بالكامل
طلعت مريم صاحت العمو واجه وگال

احمد: حمه قربة ما يقبل گال انا اوصلكم

مريم: وين تكفي السيارة.؟

احمد: الولد الي ويا گال اركب تكسي ومشي الاهلي

باوعت على مريم مباوعتلي ونظراتها تشرح شنو الدار براسها، وخرت عيني منها مباوعه على وردة
ساعدتها تكوم وهيَّ ساكته ولا حچت حرف رغم نحچي وياها وهيَّ ملتزمه السكوت
عدلت حجابها زين ومريم لبستها الجبه مالتها هيَّ باوعت على مريم وگالت بخفوت

وردة: النقاب وينا.؟

قربة: شلچ بالنقاب

وردة: العده شلون

مريم: وين اجيبه غير سريع طلعنا بيچ

عفتهن يحچن ومشيت اريد اطلع وردة گالت

وردة: وين

-هسه اجي

عفتهم وطلعت، الباب مفتوح طلعت وكفت بالباب مباوعه على الممر ماكو مطلب بس فياض وگاعد على الكراسي ومدك
رأساً رفع راسه من حس على خطواتي... باوعلي ونزل نظرة وانا هتفت بصوت خافت

قربة: وين مطلب.؟

فياض: راح هسه يجي

باوعت على الممر بحيرة.. درت وجهي اريد ادخل وهوَ هتف

فياض: خويه احچي محتاجين شي.؟

بللت شفتي وهتفت بهدوء خلي احچي بحترام
گاعد يحچي وياي بحترام

قربة: من يجي مطلب كله نطيني الشطفه مالتك يردوها

فياض: شتسون بيها

قربة: وشكو تسأل.

فياض: سألتچ بحترام ردي عليَّ بحترام

گلبت عيوني ورديت عليه: اريدها نقاب الها

بلع ريگه رافع ايده نزع الشطفه ومدها اليه
فياض: اخذيها

باوعت الايده ومديت ايدي مجبورة اخذها منه مو السواد عيونه لا الخاطر المكروده الجوه
اخذتها ودخلت وهوَ يباوع بنظرات مال واحد بريئة بس انا لو اموت فلا تتغير نظرتي عليه
وكفت يمها ومديت الشطفه باوعت على الشطفه

وردة: مالمن هاي.؟

قربة: البسيها موقت ماكو منين اجيب

حطتها على راسها كلها وهيَّ الشطفه كلها سوده ومزغرفه بلون جوزي حلوة وريحته طيبة للمانه
كومتها وانا مطلعه بس عيونها ومن نطلع من الغرفة انزلها كلها على وجها

نزلناه من السديه ومشيتها وهيَّ حافية سوده عليَّ والارضية باردة خليت ونزعت حذائي
باوعت عليَّ وگالت بخوفت

وردة: شتسوين

قربت الحذاء يم رجلها: البسي بساع

وردة: وتظلين حافية

قربة: هسه غير تلبس لا اهفها بعجل
يله البسي لا تشلعين گلبي

لبست الحذاء ما يشلع الكلب لان حفاية بس دخل رجلها.. لبستها وكمت لزمتها من ايد ومريم من ايد وعمو احمد گدامنا يمشي طلع قبلنا وانا نزلت الشطفه على وجها وطلعنا باوعت على الممر محد بي
مشينى طلعنا ماشين للاستعلامات باوعت مطلب واكف يم ابو الاستعلامات ويشرب جاي ويحچي ويا الولد الموجود

رفع راسه لمحنه رأساً تصافح ويا الولد واجه علينا
مشى ويا عمو احمد بنفس المستوى وحنا وراهم
يعني فياض راح
طلعنا من المستشفى وانا امشي على اطراف اصابعي
وميته بدمي ما لابسه جواريب ومنا صح لابسه تنورة طويله بس چعب رجلي يبين من امشي

بالف يا علي وصلنا للسيارة فتح الباب عمو احمد وساعدنا نصعدها، هوَ صعد بالصدر وانا صعدت بالنص ومريم بصفي...حرك السيارة مطلب متجه البيت وردة بنص الطريق وگال

مطلب: خلي اخذكم البيتنا ترتاحن منا الباجر

احمد: مشكور بويه جزاك الله خير
كافي تعبتك ويانا. والله ومستحي منك ومن البت

قربة: صدگ چذب عمو... چا بعد عليمن تنسمى اهل
والله امي رادت تجي هيَّ وعليا وانا ما خليتها گلت الها ارجعي، مدگلي شلون نعوفكم بهيچ موقف صعب

مطلب: يابه على گولت مرت اخوي احنا اهل
وبأي لحظة تضيك بيك الدنيا رقم قربة يمك بس دك عليها وكلنا گدام بابك احنا ولدك والله

احمد: الله يخليك ويحفظك وليدي
تخجلوني بكرمكم والله حتى ماعرف شحچي

مطلب: لا تحچي شي انا وربعي كلنا ولدك

احمد: اليه الشرف والله

ظلو يحچون وانا حاطه وردة على كتفي ومسح على راسها.. وهمست قريب منها

قربة: ورود انا ارجع اليوم وباجر اجي انا وخالة وامي