گلت هيچ وطلعت من الغرفة اخذت شالي وصعدت
نص الدرج وحسيت عليها وراي
باوعت عليها ورجعت نظري مكمله فوك
فتحت الباب وطلعت مباوعه على السطح عبارة عن فراغ كلشي ما بي هوَ من زمان فارغ ما بي غراض هواي نوب هسه تعزل

تقربت من الستارة أكثر مباوعه على الشارع والساحة مالتنا، مبين كلشي ومنها الساحة مال بيت يعقوب ويا ما باوعت على بيتهم لمحت بنيه شابه تجي بگد رقية مرت سائب باوعت عليها وهتفت

قربة: منو هاي غيم.؟

اجت يمي مباوعه على البنيه الي تكنس بالساحة وردت على كلامي

غيم: هاي مرت شهاب

قربة: هيَّ هاي مرت شهاب

غيم: اي ليش ما شايفتها

قربة: لا

هزت راسها بها ساكته، باوعت على البنيه وخرت عيني من بيتهم مشيت متجهه الباب البيتونه

قربة: يله ننزل

نزلت وهيَّ وراي سدت الباب
مر الوقت بالتعزيل وسوالف منا ما اجه ابوي وعليا وكلعاده ياساده لا سلام اسلم ولا اباوع عليه
ورا ما اجه ابوي اجه عليا
وسلمت عليه وهم جاب العشى ويا لان ماكو طباخ نطبخ عليه تعشينى يله صلينا لان يبرد وين نحمي

أكلنا وكملنا وكل واحد راح يصلي
انا وغيم بالصالة نصلي وامي بالغرفة مالتها هيَّ وابوي وعليا بغرفته.. ستوني كملت صلا العشى وغيم گاعده تسبح كملت قبلي.. سلمت وخذت السبحه جاي اسبح وطكتني ريحه غريبه

باوعت على البيت كاشه وجهي، رجعت نظري الغيم هيَّ كذلك باوعت عليَّ هم عاقجه وجها رأساً گلت

قربة: تشتمين الريحه لو بس انا

غيم: اي ريحه شعواط

فتحت عيوني ذابه السبحه وكمت مفزوعه اباوع بتفحص للبيت وعطت

قربة: يمااا عليااا تعالو هاي ريحه حرك

گلت هيچ وطلعت من المطبخ ويا ما طلعت من المطبخ صارت دخان قوية بوجهي...

يتبع..

28




-فـي الـنـهـايـة كُـلـنـا سـنـكـون ذكـرى 🖤🌸

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

.
.
.

گلت هيچ وطلعت من المطبخ ويا ما طلعت من المطبخ صارت دخان قوية بوجهي.رفعت ايدي احمي عيوني راجعه ليورة ويا ما رجعت صارو وراي كلهم وهم يصيحون شكو وشكو
وخرت ايدي من عيوني عايطه بخوف كل ظني البيت گاعد يحترك وراح نحترك ومحد يطلعنا

قربة: يمه البيت گاعد يحترم راح نموت
يبوووو يا عليييي

عليا: وخرو منا خلي افوت اشوف شكو

لزمته من متنه وعط مانعته يطلع
قربة: لا تطلع لا تطلع

عليا: وخري خلي اشوف شني المحترك وخري

قربة: شلون اعوفك تروح تريد تموووت گلـ..

قطع كلامي صوتها اليلهث وراي درنا وجهونا عليها تركض ورافعه المحرم لازمته بسنونها وتحچي بصوت عالي

غيم: الدخان من بيت... بيت زهرة جاي النار بيت زهرة جاي يحترك مو بيتنا

اطمأنيت وخفت مباوعه عليهم.. عليا وبوي اول ما سمعو هيچ طلعو من المطبخ الي نترس دخان. بينما طلعو غيم كملت كلامها

غيم: تعالو من فوك نشوف

گالت هيچ وركضت انا وامي وراها نركض
صعدنا فوك اول ما طلعنا من البيتونه شفنه الدخان تلهب بالهوى.. مشينى مكملين للستارة باوعنا على الحديقة مالتهم عبارة عن دخان يلهب حتى نار ما تنشاف

بين هاي الدخان صوت زهرة مسموع والولد كذلك
ميزت صوت يعقوب عن باقي ناس يصيح بعالي صوته

يعقوب: يمممماااا وخري من النفط وخرييي

ما نشوف ولا نعرف شلون هبت النار بيتهم.
كل الي نشوفه دخان يلهب من الحديقة وعام على كلشي مانگدر نشوف بس نسمع والصياح والصياح واضح مال يعقوب

غيم: منين اجت النار مساع مرام تنظف بالحديقة

فاطمة: انزلن ابساع الوادم منا لا تشوفچن

گالت هيچ وهيَّ تدفع بيه وبغيم.
الشارع انترس ناس وبيبان البيوت المقابيلنا كلها مفتحه والنسوان الكبار واكفه ولابسه عبيها ومنهم ينقلون ماي بسطوله ومنهم جارين الصوندات يرشون على البيت

تنهّدت حامدة الله ستر علينا النار مو بيتنا
من شفت الدخان هفت بوجهي راحت روحي كل ظني البيت حترك وراح نموت

اتحمدت الله الف مرة، وهم نقهرت عليهم وضعهم وصراخم قهرني مهما كان شنو طينتهم بس يبقى الحرك مو شي هين. الله يستر عليهم ويطلعهم سالمين

نزلت وراهن وانا اذني كلها يم صواتهم العاليه
وأكثر شي يعقوب صوته انبح من الصياح على امة واخته يمكن جوه محبوسات وهل يصيح
وخاف يحتركن
امي وغيم گدامي ينزلن وامي ماخذه وضع الصامت وغيم تلغي فوك راسها

غيم: اخاف اگول حل والله يعيبني

قربة: حرام تشمتين غيم حتى لو همه ناس مو اوادم بس حرام اتشمت بالناس... لا تشمتين لا بالسانچ ولا بداخلچ خافي الله يكتبها علينا

فاطمة: انزلن وكافي وأنتِ غيم سدي الموضوع بيا حال تشمتين الوادم بين الحياة والموت.. ادعي الله يطلعهم سالمين

سكتنا ثنينه ما حچينا بعد، نزلنا وامي طلعت بالساحة رغم عبارة عن دخان... رأساً طلعت وراها واكفه باب المطبخ، الدخان خف مو مثل مساع والحايط مالنا متروس ماي

ظلينا واكفين نسمع صواتهم وكلامهم والعالم تحچي وياهم، وعرفت طفوها ومحد متأذي منهم.
شوي ودخلو ابوي وعليا
اول ما دخلو امي کالت موجها كلامها العليا

فاطمة: ها كون احد تأذّى.؟

مشى راد عليها وهوَ يوكف يم ابوي الي مگنبص كدام بوري الماي الأساسي منتظره يخلص حتى يغسل ايده الكلها صخام

عليا: لا محد بس واجهيه البيت كلها حتركت

فاطمة: هيَّ شلون صارت الحرك

كام ابوي وعليا رد عليها وهوَ يگنبص يغسل
عليا: الگاع كلها بانزين، متبدي البطل حاطينه على صفحة ويعقوب من داخل مورث جكارة وشامر الگطف مالتها على مكان الكاز وبساع مشتعله نار وزين الله يحبهم ما لايحتهم النار ورايحين بيها

فاطمة: هيچ ما مسيطرين على الانار

عليا: غير عمتي الفهيمه ذابه نفط على الحايط البينه وبينهم دگول يطلع منها دود وصراصر عود حتى يموت وخوش النار كبت بالبيت.
والله ينطي الناس تلاحكت بالماي لو منتظرين الإطفاء چان حتركو وراحو

فاطمة: الحمدلله بالكزيز ولا بالعزيز.. الله يحبهم وستر عليهم

يحچون بينما انا عيني على الحايط البينه وبينهم
ورجعت نظري على عليا گال وهوَ يکوم
أما ابوي رجع طلع يباوع من الباب

عليا: يله يمه اتعاونن خلي ننقل الغراض البيت وبقو نص باجر ناخذهن

فاطمه: يا الي يعاونك هناك.؟

عليا: اخابر مطلب يجيب عبدالله ونتعاون

هزت راسها بخوش ودخلنا.. نزعت الجادر وعلكته على الباب وظليت انقل وياهم اخذ بس الكبار الي هن الكراتين والفررفوري الي بالكرتون لان سيارته مو حمل من هذن الفورتات لذلك خاف ما تكفي

اخذ بس قسم وبقى قسم باجر ياخذه بالسيارة الحمل وهوَ ياخذنه بسيارته مثل ما گال.. كملنا النقل وراح
واحنا كل واحد گعدت بمكان ابوي راح انام بالغرفة امي فرشتله، واحنا گعدنا بالصالة منتظرين وردة ونسولف بواضيع عادية، منا ما غيم كامت من حضن امي وگالت

غيم: قربة صدگ تذكرت

قربة: شتذكرتي.؟

غيم: مصرفچ وحتياجاتچ منين ناخذين شو ما تقبلين تاخذين من امي الفلوس الي يوديها عليا الچ

باوعتلها وعلى امي الي ماده رجليها بالطول وغيم چانت نايمه عليها وانا مبطوحه على ظهري ودايره بس راسي اباوع الهن

قربة:عمو صاحب كل اسبوع ينطيني
وخالة قبل لا تنضرب من تروح للسوگ تجيب اليه غراض أو حلويات ومطلب خطيه كل ما يجي من المحل يجيب ثلث علاليگ اليه والهاجر واله هوَ وامة وابوه... وذا جايب ملابس جدد لازم يجيب اليه والهاجر، الحمدلله ما محتاجه شي حتى اخذ منكم همه ما مقصرين وياي

غيم:كل ماريد اسألچ انسى..اگول نسيبنا لا شغل ولا عمل منين تصرف تسوي

قربة:عادي النيشان بعده نصه ما مستعمله منه شي

كملت كلامي وباوعت الامي من گالت وهيَّ صافنه عليَّ وتحرك بؤبؤ عينها على وجهي

فاطمة:بعدچ ما تردينا.؟

ابتسمت لا ارادياً ساكته دايره عيني على غير جانب أما هيَّ رجعت گالت من شافتني ما رديت

فاطمة: مو احچي وياچ

قربة: لا

فاطمة: لا شني.؟

قربة: تنهّدت مبتسمه راده وانا اباوع على الحلقة البيدي أمنت الحب يجي بعد الزواج.
وزواجي من ذو الفقار صح انجبرت عليه ورفضته
وما طايقته چنت لكن هسه تغير كلشي.
ذو الفقار صح انسان مريض بس ماعرف من شنو يعاني لكن هدوئة... حنانه... شخصيته الباردة
او الا أوباليه العنده، لكن جذبني اله أكثر
ومو لان هل مواصفات بي
بس هوَ گدر يجذبني اله وشلون ماعرف

فاطمة: وجعل بينكم مودة ورحمة.. ربچ يرزق الحب ومودة باول ليلة من زواجكم

گالت آخر كلمة مباوعه على غيم تباوع عليها
سكتت امي ما كملت مبين حچي بحلكها، رأساً هتفت

قربة: كملي يمه

فاطمة: منا اختچ مايصير

غيم: يمه احچي ترا الثالث شرحولنا اعضاء الانسان من عينه للي بالچ، كلشي نعرف لا عبالچ
لهيچ احچي خلي نتعلم من محاصراتچ العريقه

قربة: رمقتها بنظرة خلتها تنخرس وانا حچيت اريد اعرف شتريد تحچي:- احچي يمه اريد اعرف

تنهّدت هاتفه بهدوء
فاطمة: اهلنا قبل يگولون المرّة اذا رجلها تقرب منها بيوم الدخلة الله يزرع الرحمة والمودة بقلوبهم
وثنينهم يحبون بعض

قربة: وذا ما متقرب منها.؟

غيم: يـــــــــاااا بس لا الهسه والچ.!!!!

فاطمة: وعلا التعلچ زمالة

غيم: اخخ يماااا رگبتي

فاطمة: وغمه التغمچ شلچ بهاي السوالف

گالت هيچ غيم وامي ركعتها على رگبتها وظلت يتحاچن، وانا صفنت على كلامها صح ليش الهسه ما رادني ههه ههه، هوَ اول شي خلي يحبچ يله يتقربلچ لا... لا قربان...لا مو شرط الرجال اذا راد حقه ما يهمه يحبچ أو يكرهچ... بس معقولة.؟
معقولة يطلع لا راغبني ذاتياً ولا نفسياً.
بللت شفتي بالعه ريگي راده بهدوء وكلامي ما حاسه عليه أو ليش هيچ حچيت ويا امي

قربة: معقولة يمه ما راغبني.؟

فاطمة: لا يمه الولد مريض وشمدريچ بوضعه وشگاعد يحس لا تحكمين عليه وأنتِ ماتعرفين شنو الي بداخلة اصبري، الصبر مفتاح الفرج.
يمكن هوَ ما مستعد يتقرب منچ خاف خايف من شي.

التزمت الصمت محتارة معقولة ما يرغبني أو صح هوَ مريض ومايگدر يحچي الي بداخلة
يله انتظرة شعندي غير الانتظار.
بين كلامي وصفنتي گالت غيم مغيره الموضوع

غيم:اگلچ مبينه وردة ما تجي الساعة بالعشرة

قربة:اخذي تلفوني ودكي عليها

كامت اخذت الجنطة من بين الهوسه وطلعت الموبايل
ويا ما طلعت الموبايل باوعت عليه وگالت

غيم:اگلچ هاي عمتچ داكه عليچ

قربة:بله دكي على وردة شوفيها نوب نطيني الموبايل

هزت راسها وگالت الرمز شگد رديت الها الرمز وظلت تبحوش شوي بينما انا ركزت على كلام امي

فاطمة:بعدچ تسنحين وجسمچ خامل.؟

قربة:هاي الايام لا شويه اشوه

فاطمة:الحمدلله والشكر، بس اكو اية قصيرة اقريها دوم

قربة:شنو هيَّ.؟

فاطمة:بسم الله، قُل اللهم مٰلك المُلك تؤني المُلك من تشاءُ وتنزع المُلك ممن تشاءُ وتعز من تشاءُ وتذل من تشاءُ بيدك الخير انك على كل شيء قدير.
فوائدها هواي لان ربچ مالك كُل شيء
ومن تتوكلين اله ودگولين هذا الدعاء الله يسهل طريقچ ويدبرلچ كل الخير

هسه دگولين يمه انا تزوجت من واحد مو صاحي ولا مثل باقي الزلم.. يا امي، ما تعرفين الله يمكن انطاچ هل شي حتى يحميچ من الشي الي تردي.
ربچ يدير حياتچ بطريق عدل ما بي عوجاج
بس احنا مانعرف باجر شيصير بينا
أو بعد ساعة شيصير بينا

ونگول ليش رب العالمين ما رزقني بهل شي
ورزقني بغير شي
يا امي احنا مانعرف علم الغيب مايعرفه الى ربچ هوَ عالم الغيب، لذلك يا نور عيوني وكلي امرچ الربچ
أن چان خير أو شر، وهوَ خير المدبرين

غيم: هتفت بعدما كملت آخر كلمة امي
وردة دگول ماگدر اجي ابوي فلاونزه باجر اجي قبل لا تشيلون

اجت گعدت يم امي وهزيت راسي بخوش وخذت منها التلفون وباوعت الامي معنى كملي

فاطمة: هاي الاية من تصفنين على اول حروفها تشوفين بيها الملك القدوس الي مالك سموات السبع ومدبر سبع طبقات السماء مايگدر يدبر امرچ أو امري لا يمه حشى من سوء الظن بي.
اتوكلي دوم اله دوم استعيني بي دوم گولي ربي أنتَ وكيلي في ديني ودنياي

غيم: يمه احبچ من تنطين محاضرات.. احسچ ملاك وگاعد بينا

ضحكت منزله راسها راده عليها
فاطمه: يا يمه انا احچي الي اقرأ وحچي مرات الي مفروض ينحچي وينفتح موضوع بي.
مثل هسه هل انا گدامكم، صارلي عمر ويا ابوكم
بيوم گلت ربي المن زوجتنيا.؟
لو اگول انا حظي اغبر وتزوجت واحد مثل شاكر.
لا يا يمه كلنا عدنا حظ ماكو وحدة أو واحد بهل دنيا ماعنده حظ، ربچ عادل وما يقصر بحق واحد

بس احنا البشر نريد كلشي نفس فلان وعلان ودائماً نقارن نفسنا ويا هذاك وذاك.
هذا ليش حظة احسن من حظي، وهذا ليش الله انطاه وما انطاني... انا مو اصلي وصوم، وهذا لا يصلي ولا يصوم... يا يمه ربچ يراويهم زينة الدنيا وينعمهم بمالها وحلالها

قربة: مثل جعفر وربعه

فاطمة: هههههه يا طلابة جعفر

غيم: اي وعلي مثل جعفر.. عايش براحه ونعيم وهوَ لا دين ولا اخلاق بس صيت وشخصيته بين العالم

فاطمة: الله يهديهم يمه الله يهديهم

ظلينا نحچي منا ما قطع كلامنا صوت الموبايل
رفعته مباوعه على المتصل خالة عيدة نسيت ادك عليها وهم شعجب؟ اعده الهل ساعة راح تصير بالـ12
رديت عليها وانا اكوم منهن وهنا عينهن عليَّ

قربة: هلو يمه شلونچ

-هذا انا

صفنت ثواني دايره وجهي مباوعه على امي وغيم يباوعن عليَّ.. عفتهن ومشيت للغرفة مالتنا راده عليه بخفوت

قربة: ذو الفقار.. بيك شي.؟

ذو الفقار: لا

قربة: چا شعجب داك عليَّ.!

سكت ما راد عليَّ.. ثول فشلتي شبيچ.. تمحمت اريد اكسر السكوت

قربة:شسمه ذو الفقار.. تجي باجر ويا مطلب للبيت تبات ويانا وهم تغير جو شويه

ذو الفقار: ماگدر

قربة: ليش.؟ تعال حتى لو من الظهر لليل وروح خاف ما متعود تنام بغير غرفتك... ها ذو الفقار لا تظل ساكت

-لا

قربة: لا شني يعني ما تجي

-اي

قربة: على راحتك.. انا بس اكمل التعزيل وياهم ارجع"كملت كلامي بهدوء اعرف ما راح يرد عليَّ"يله تصبح على خير

گلتها وسديت الخط. سحبت نفس طويل مباوعه على الرقم، الحمدلله على كل حال الحمدلله
مسحت وجهي بتنهّيده وطلعت يمهن محد منهن سألن وهل شي ريحني.

ظليت وياهن شوي نسولف وامي كامت تنام وانا وغيم فرشنا وظلينا انباوع بالتليفون بينما يجي عليا شوي واجه كبل راح نام وحنا هم نمنا

گعدنا الصبح بس تريكنا عليا خابر الولد جاب السيارة واجه ظلينا نتقل بالغراض. عبيناهن كلهن بالسيارة الحمل لان مو هواي البارحة عليا نصهن نقلهن

كملنا النقل وگعدنا شوي نرتاح ونسولف على ايام قبل
شلون امي اجت بهذا البيت وحيدة محد وياها
وهسه راح تطلع منا وهيَّ عدها اولاد يسدون وحشتها بيتها الجديد

متوزعين كلنا بالساحة ونباوع على البيت
ابوي گاعد على الدچه مال الاستقبال وعليا بصفي وامي وغيم يمي من الجهه الثانية
نسولف على البيت وندك الباب كام عليا وغيم گالت

غيم:هاي وردة

فتح الباب على حيله ودخلت مريم وراها وردة.كمنه وهنه اجن سلمن علينا وجوهن يتلاطمن
مريم شبكت امي وظلت تبچي ووردة باوعتلي ودموعها طاحن

جريتها عليَّ حاضنتها وهيَّ نفتح الها بوري ظلت تبچي وتشهك.. وخرتها مني وهتفت بينما امي تهدئة بمريم

قربة: المن هل بچي وين رايحين هوَ كله ربع ساعة وتوصلون النا

وردة: محد النا هنا غيركم

ماعرف شرد عليها بس دموعي تصب.. من الصغر الحد هسه احنا مثل الاهل مو بس صديقات ابوها علاقته ويا ابوي زينه ومريم اتحب امي كلش.
ابد ما حسبتها بس صديقتي هيَّ اختي وصديقتي

شاكر: يله نتوكل هم يله نوصل

باوعت على ابوي نوب على وردة ومريم زادن بالبچي
بينما انا ادموعي وشهكه بلعومي وعدل بشالي وصايتي وامي دخلت اخذت عبايتها من الباب وسدته قافلته بالسركي مالته

طلعو ابوي وعليا گدامنا واحنا مشينى وراهم وردة ومريم ويانا.. طلعنا من البيت نازلين على الرصيف باوعت على البيوت منها الزلم الكبار الي يعرفون ابوي طالعين من شافونها اجو على ابوي بينما عليا اخذ المفتاح من امي وقفل البيبان

مشت امي سلمت على صاحباتها ودك مناحه وياهن
بينما اباوع عليها رجعت نظري من حسيت على باب بيت عمه زهرة ينفتح.. باوعت بهدوء نظرات خالية من أي مشاعر أو تعابير

بينما هوَ وكف باب الشارع يباوع علينا كلنا
نص ثانية طول يباوع بنظراته على اهلي ورجع نظرة يدور بين الموجودين.. ولمحني واكفه بصف غيم وردة

اباوعله تحرك فجأة صاعده تفاحة ادم تعلن بالع ريگه
نظراته نفسها ما متغير منها شي نفس المعه ونفس الهفه، نفسه يعقوب الحبيته بمراهقتي.
لكن نظراتي مو نفسها الچنت انظرله بيها.
اتغير كلشي ويا الايام... تغيرت قربة
تغيرت نظراتها... تغير تفكيرها...تغيرت دگات كلبها ولهفتها من تشوفك

وخرت عيني منه مباوعه على امي اجت من بيت ام حمودي، وهيَّ تمسح بدموعها بينما اباوع عليها عليا خله ومشى باوعت ورا راح البيت عمه زهرة

وكف گدام يعقوب مد ايده البيها مفتاح ونطاها اليعقوب، يعقوب باوع على ايده واخذ المفتاح بتردد..ماعرف شگال عليا ومده ايده تصافح ويا وسلم عليه.. وخر منه واجه علينا ويعقوب ورا يمشي

غلست على وجوده ونظراته الاكلتني
وحطيت انظاري ويا وردة الي دارت بوجها
بينما هوَ مشى سلم على ابوي الي اجه من الجوارين ويا كم واحد

اسمعه يسلم على ابوي...وابوي يوصي ينطي المفتاح الجعفر وهوَ يرد عليه بإن شاءلله وتأمر.. طول السلام ثواني لا أكثر وعليا گال

عليا: يله ركبو خلي نتوكل

باوعت عليه ورجعت نظري الوردة
ابتسمت بوجها وهيَّ صبتها دمعه..حضنتها وگلت مهدئتها

قربة:هسه تكافي بچي ما تكيفين نرتاح من هل بيت

وردة:والله اتمنى الكم كل الخير بس شلون راح اتحمل فراككم

قربة:هوَ منو شو انا متزوجه واجي الاهلي مرة بالشهر
وغيم وامي موجودات شوگت ماتردين تعالي الهم ومري البيت عيالي

غيم:اي والله تعالي شوگت ماتردين عوفي مريمه وحدها وتعالي

مريم:هوَ هذا حظ مريمه

غيم:يخبل وعلي وين لاكيه هيچ حظ وعندچ وحدة مثل وردة

عليا:يله كافي خلي نتوكل

سلمت آخر سلام وصعدنا بالسيارة وابوي هوَ الي يسوق سيارة الحمل..سلمت امي على مريم وردة وصعدت بالصدر وحنا ورا

باوعت عليهن وكفن يم الباب ودموعهن يصبن
عيوني تصب مو لان راح افارك هذا البيت بس راح اشتاق الها ما راح اگدر اجي وامر الها على راحتي ولا هي تگدر تجيني بسهوله
اتمنى القدر ما يبعدني عنها ولا هيَّ تبتعد عني

لوحت الهن مع سلامة وعليا حرك السيارة بعدما تحركت سيارة الحمل الي يسوق بيها ابوي
بينما تحرك عليا اجت عيني على يعقوب يباوع على سيارة البيها انا بنظرات تشرح هواي امور

الحب... الفراق... الاشتياق... الخذلان... هواي شغلات بعيونه تحچي... بس للاسف گلبي ما تحرك ولا ثانية من شفته، والي يحب يتعب وينقهر على محبوبه بس انا الحب الي حبيته اليعقوب كله وهم.. كله مجرد اعجاب وتعلق لا أكثر

لو چنت احبه من صدگ چان ما حبيت ذو الفقار
بس حبي اليعقوب مو حب أنما اعجاب وتعلق لا أكثر
بس هوَ.؟ من الممكن صدگ يحبني أو صح هوَ يحبني لان نظراته نفسها ما تغيرت

تنهّدت مرجع نظري الجامة..ادعي الله يرزقه بت الحلال الي تحبه من صدگ وتعوضه..لان هوَ انسان طيب الگلب بس عيبه اهله وطبعه الي يمشي ورا كلام امة

زفرت انفاسي مباوعه على الجوارين وتذكر كل ذكرى بهاي المنطقه.. حلوة ومره مرت وياي هنا
لكن بطفولتي كلشي حلو وذكرى ما تنسي لكن السنين الاخيرة، الفقر والذل والتعب والحرمان والمذله من اهل ابوي، خلتنا نكرهه هل بيت والعائلة الي ننتمي الها.. ومن ظمنها زواجي طبعاً

ظلينا كلنا ملتزمين السكوت.. محد منا حچه حرف
منا ما وصلنا المنطقة مال عيالي.. البيت مالتنا ابد ما شايفته ولا واصله الى.. عبرنه من الفرع مال عيالي على الفرع الگدامهم

دخلنا الفرع باوع على الفرع مرتب ونظيف وبنيان كله من هذا الحديث.. بينما انا اباوع على البيوت وكف عليا گدام بيت بُعد عن الفرع بخمس بيوت تقريباً.. باوعت على البيت واشرت گايله

قربة: هذا البيت.؟

غيم: اي

باوعتله بيت بنيان حديث بس مو جديد نفس البيوت البقية والحلو بي.. بي شجرة جهنميه لون وردي مطيه الباب رونق يخبل.. وخرت عيني من الباب مباوعه على باب السيارة فتحته غيم ونزلت

كمت ونزلت وراها.. سديت الباب ومشيت ورا امي وغيم، بينما احنا نريد نعبر الرصيف نزل ابوي من السيارة الحمل الي گدام سيارة عليا.. ويا ما نزل عليا هم نزل من السيارة مالته قافلها

مشينى وكفنا گدام الباب واجه ابوي طلع المفتاح من جيب البنطرون ماله وفتحه.. دخل هوَ وامي ورا وانا وغيم دخلنا سوى،
الباب نفس باب بيت عيالي بس هذا اقصر بشوي
يعني اذا عليا أو مطلب لو ذو الفقار اجو يگدرون يباوعن على البيت من الباب

باوعت على البيت صاير هوسه الغراض كلها محطوطه بالساحه.. والساحه شوي چبيرة بس مو مثل ساحتنا بذاك بيتنه.

درت وجهي مباوعه على الزويه اكو مساحه كد متر أو أكثر بيها شجرة الجهنميه وكو شجرة صغيرة يمكن ياس.. اي ياس لان الورق ماله معروف
يله بمحرم اخذ منهم الصينيّة مال خالة عيدة.
ثول شوف وين طفرت

رجعت نظري متفحصه البيت. بينما امي وغيم نزعن العبي مالتهن وبدن يسون وانا اصفن على البيت
البيت الواجهيه مالته بس طابق واحد أما الأماميّة اكو باب صغير هذا مبين صحيات

وبصف الصحيات الي على اليسار استقبال.. كملت نظري وانا امشي ودخل للبيت.. ابصف الاستقبال باب وبين الاستقبال والباب الثاني مساحه صغيرة بعد عن الباب دخلت للباب الثاني مطبخ شلون مطبخنا بذاك البيت يعني مدخل البيت من المطبخ

والمطبخ لا بئس بي چبير زين.. وهم صاير هوسه
الغراض والكراتين فوكه فوكه بس الكاونتر معلك هوَ والسنك والسنك مو نفس مالتنا القديم باين مشترين واحد جديد، كملت طريقي طالعه من المطبخ داخله على صالة

الصاله بيها غرفتين واكو بابين بعد واحد يم الدرج وباين هذا حمام والثاني لزك على جهه الاستقبال
فتحته وطلع باب الاستقبال. يعني الاستقبال بي بابين خارجي وداخلي

البيت نظيف ومرتم رغم الغراض بي ومطشرات بس مرتم كملت طريقي الواحد من الغرف فتحت الباب ودخلت
باوعت بيها اخشاب غرفة امي يعني هاي غرفتهم
عفتها مفتوح الباب ورحت الثانية هم بيها الكنتور والجرباية ام النفر مال عليا

عفت الباب مفتوح ودرت وجهي راجعه الهن
ويا ما جاي اطلع من الصالة دخلت غيم باوعت عليها وهيَّ گالت

غيم: تعالي انا وياج ننقل غراض عليا الغرفته

هزيت راسي بخوش
وظلينا ننقل بالغراض مال عليا كملنا لان مو هواي
ورجعنا ننقل بالنضده مالت امي وهم كملنا
وامي خطيه تصفط بالغراض المطبخ
كملنا النقل وبقى بس التصفيط وخلينا الباجر لان نهلكنا هلاك

ظلينا على هل حال اسبوع نظف ونعزل ونرجع ليورة
وخالة عيدة وهاجر ابد ما عوفونا هيَّ ومطلب وعمو صاحب، بس ذو الفقار ابد ما شفته ومن اسأل خالة دگول ماله خلك يجي

بالي ظل ويا ردت بس اكمل ونرتب البيت باسرع وقت حتى اروح اشوف شبي وليش ما اجه ويا عمو وخالة ومطلب على العشى.
معقولة صاير شي وياه بس ما يحچون.
بس حتى لو صاير شي خالة راح تجي يومية النا وهوَ بي شي، بس هوَ هذا طبعه ما يحب يطلع من البيت

فزيت من صفنتي على صوتها قريب على اذني
درت وجهي مباوعه عليها تچت نفسها على السنك الواكفه يمّه انا وغسل بالستكاين الچاي حتى اشكرها وتوديها الاستقبال لان عدنا شرار وعمتها ومرت عم رجلها

غيم: وين صافنه قربانو.. يله صبي الچاي فار

هزيت راسي بخوش وسديت البوري وخذتهن حطيتهن بصينيّة، صبيت الچاي.
شلت الصينيّة ونطيتها الها وانا شلت الصينيّة الثانية مال الكعك ابو الچاي جابه عليا ويا
طلعنا سويه دخلت هيَّ قبلي وانا وراها. باوعت النا عمت شرار وگالت

دانه: المن يمه هستونا شربنا وتحتمنا وجينه

فاطمة: شحاطين خيه هوَ جاي وكعكات

دانه: ميخالف المن

وزعت عليهن كلهن ونطيت الصينيّة الغيم توديهن للمطبخ... اخذتهن وطلعت وانا گعدت يم شرار
باوعت الها بابتسامة گايله بصوت مسموع وعلى اثرها امي سمعت كلامي

قربة: الحبالة لايكه الچ

فاطمة: بيها والد

باوعت الها شرار باستغراب وهامسه بصوت بس انا اسمعه

شرار: امچ سونار وانا ماعرف

ضحكت بينما مرت عم زوجها گالت وعمتها تباوع على شرار وعين على امي

سعاد: من حلكچ الباب السماء

فاطمة: والله بيها وليد.. امي الله يرحمها من حبلت بعليا، شافتني سمنت وحلويت على حبالتي گالت بيچ وليد، لان ام الولد تحلى وتسمن عليه.. أما ام البنيه يصير خشمها چبير

قربة: ههههه الله والاحد حتى بهاي البنيه مضلومه

سعاد: اول مرة اسمع شو عمتي شومة تعرف كلشي بهاي سوالف ما گالت هيچ

فاطمة: خيه هاي من زمان نسوان قبل ماكو سونارات ولا شي مدري على فطرتهن يگولن هيچ

دانه: الله اعلم ما في الرحوم

ردت عليها امي وانا التفت الشرار مباوعه عليها
قربة: شلونچ.؟

ابتسمت منزله راسها ماده ايدها تمسح على داير مداير الستكان

شرار: زينه

قربة: رجلچ زين وياچ لو بعده على حطته

رفعت راسها مباوعتلي بنظرات غريبة صفنت بوجهي راده بصوت خافت متروس غصه

شرار: زاد ما نقص

قربة: شبي.؟ انا هاي الفترة ما احچي وياچ ملتهي شوفت عينچ لا اگدر الزم التلفون ولا احچي ويا احد وغيم خطية صادف دوامها ويا شيله وبيدها تدرس وبيد تساعد

شرار: معذوره خيه ادري بيچ.. وعلى ضرار سولفت الچ هوَ شلون وضعه وتصرفاته وياي

قربة: اي

شرار: هسه صار بالناقص.. ما يدخل للبيت ولا يوصل بيتنا.. يگول ماريد اشوف وجها بس اشوفها اختنگ وانا يا قربة من اسمع هل شكل اموت الف موته
بس گول خلي يولي شلي دخل
عليَّ بروحي وبطفلي خلي هوَ يطب ما يطب طبه طوب بس تحز بخاطري

باوعلها بؤبؤ عينها يتحرك يعلن على الدموع الترست عينها، بس ما تريد تنزلهن.. بللت شفتي بقهر سألتها

قربة: شبي شجا هوَ ما چان هيچ
من سولفتي اليه، صح سلوبه بارد بس
ما چان يحچي هيچ

شرار: ماعرف قربة ماعرف شنو الغيرة فجأة
تغير بين ضرار قبل وضرار هسه.
صدگيني حتى صلاته الي چان ما يفوت فرض هسه حتى ما يصلي وانا وخالة متخبلات وخالة تمشي وتقرأ قرءان بالبيت وهوَ يخلي ويطلع يروح يم بيت ابوي هاشم لو يطلع من البيت بكبره

صفنت على كل كلمة گالتها وطخت براسي.. ترددت اگلها بس شجعت نفسي: خاف مسحور لو بي جني

شرار: ههههههه. چؤ ضحكتيني

قربة: وعلي شمدريچ أنتِ
اخذو السيد الشي خلي يشوف شبي ترا مو صاحي

شرار: ماعرف قربة ماعرف وضعه ونفوره مني
غريب وملفت للنتظر... بس منو يگول سحر
انا صح اعرف شويه عن اعراض السحر لان
چان ابن جيرانه اشوفه من السطح يعيط وقت الاذان وستغفرالله اذا يكفر وبس يشكي ويتقيأ
وهسه ضرار تقريباً نفس حالتا.. شلون احچي أو شمدريني هوَ صدگ مسحور.؟

قربة: احچي ويا عمتچ وشوفي.
لا تظلين ساكته الى متى تظلين على هل حال.!
أنتِ مو الوحدچ حتى تصبرين أنتَ بطنچ طفل
بعد يوم يومين تجيبينه الهل دنيا تگدرين تربي الوحدچ طبعاً لا وذا دگولين لا اگدر
چذب ما تگدرين، وخص اذا ابو نافرچ شلون تگدرين تتحملين تربينه وحدچ

شرار: شبيدي قربة انا مو من اجو تقدمو اليه حالي حال البنات ودكو بابي وافقت وگدر ازعل وروح الامي والابوي.. شو هل شوفت عينچ انفرضت عليه فرض وهم شلون اگدر ارجع الفيصل هوَ انا چنت وحدي وشفت جهنم بعيني مو نوب طفل بطني

قربة: منو گال ارجعي الخريان.
اگلچ احچي ويا عمتچ أو عمچ الشيخ وخلي يشوف صرفه لو اگلچ سولفي كل السوالف الي تصير ويا الشيخ، اكيد ما مسولفين اله على وضع ابنهم.؟

شرار: اي محد حاچي بالموضوع

قربة: شمتانين خيه مدگليلي، احچي ويا عمچ الشيخ أو احچي ويا عمتچ وهيَّ تفهم شيخكم.
هلبت تشوفون حل صخام ويا رجلچ هذا

هزيت راسي بئس على وضعها
ولا وحدة بينه مرتاحه ولا وحدة عايشه حياتها مستقرّة. كلنا على هل ضيم والقهر.
تنهّدت گايله مرة ثانية

قربة: وهسه أنتِ بيا شهر.؟

شرار: قبل يومين دخلت بشهر الثاني

قربة: ها اها الاشهر جاي تمر بساع بساع.. شمتانيه تجيبين يله

شرار: تصدگين رغم القهر الشوفه والي اسمعه
بس متحمله الخاطر هل طفل الي بطني لان ماريد يمر نفس ما انا مريت بي.
ماريد يتبهذل من ورا الآباء.. لان ما تصافو بزواجهم

صفنت على كلامها حقها دگول هيچ.
محد حاس بالي عاشته غيرها.. هيَّ عاشت عمرها يتيمه الام والاب.. ما تريد تكرر الزمن ويا الي بطنها ادعي الله يكشف همها ويفرج حياتها بحق كفيل اليتام هيَّ يتيمه ومحد يغيرك يابو الايتام علي تكفلها

ظلينا نسولف بغير مواضيع منا ما اجاهن ابن ام ستار وكامن وترخص هواي لحينه عليهن يبقاً بس ما قبلن
سلمن علينا وطلعن

رجعت داخله للمطبخ وامي مشت الاستقبال
اخذت القوري من الكاونتر حطيته على الطباخ اريد اشرب شوي راسي ظل يوجعني وهم ادفي بلاعيمي

دخلت امي شايله الستكاين خلتهن على السنك بينما انا طفيت الطباخ وصبيت چاي ودخلت جوه خلي امي تغسل المواعين مالي خلك جسمي باد من التعب اسبوع كامل دك شغل

اخذت الكوب ومشيت الغرفة عليا..فتحت الباب ودخلت غيم مطشره كتبها ومبطوحه تقرا
اول ما دخلت باوعتلي ورجعت نظرها على الكتب
بينما انا مشيت فتحت الخانه طلعت تلفوني من الجنطة ومشيت طلعت من الغرفة عايفتها وحدها تقرا

مشيت كبل للاستقبال صايره مقري من شلنا الحد هسه مبطوحات انا وغيم بيها لان بس غرفتين ماكو غرف بعد لان الي چانو گاعدين هنا بس ثلث بنات والاب والام والبنات بغرفة والاب والام بغرفة لذلك مسوين بس طابق واحد

صح البيت نظيف وچبير بس ذاك بيتنا اكبر
ومن سألت امي گالت نفس الشي بس هذا مكبر الاستقبال والغرف.. لان صدگ الغرف اكبر بهواي من غرفنا هذنيچ، بس شنو الفايده من نجي خطار وين انام.. روح انام بالاستقبال لو بالصالة

بينما احچي ويا روحي فتحت الباب الاستقبال ودخلت سديته ومشيت بالزويه شغلت الهيتر وگعدت حطيت الكوب بالارض وطلعت رقم خالة اريد ادك عليها وهيَّ دكت.. ابتسمت گايله بضحكه

قربة: هههه وعلي داخلة على رقمج اريد ادك عليچ

ما اجاني أي صوت، ستغربت همست بعدوء
قربة: الو خالة تسمعيني"گلت هيچ وصارت حركه خفيفية وجاني صوت خالة"

عيدة: الو ها يمه قربانه شلونچ

قربة: الحمدلله بخير أنتِ شلونچ البقية شلونهم

عيدة: الحمدلله على الله.. أنتِ شلونچ امچ اخوتچ
ان شاءلله بخير

قربة: الحمدلله بخير.. احمم يمه ذو الفقار نايم.؟

عيدة: ها..؟ اي اي هسه اودي التلفون

سكت منتظرتها تودي شوي وسمعت وشوشه وجاني صوته الهادئ.. بللت شفتي وبطني خبطت احس نفسي مراهقه وجاي تحچي ويا حبيبها.
بطني وگلبي يگول خباطه مال عماله ظلن يخبطن من سمعن صوته

ذو الفقار: ها

ردت اگله وعلا بس گلبي ما نطاني صح بطني خبطت بس عقلي يگلي گليله وعلا بس الساني ستر عليَّ وهتفت بهدوء عكس الموجه الضحك الي بداخلي

قربة: شلونك نظيفي... ليش ساكت.!
ما تحچي نظيفي ادري بيك هسه مبتسم وتباوع بالفراغ

ذو الفقار: شلون عرفتي

قربة: حفظتك مثل اسمي

ذو الفقار: حفظتي حركاتي ما...

قربة: ما شنو.؟

-هيچ ماكو شي.. احمم شوگت تجين

قربة: تريد اجي

-اي

ابتسمت: تمام بعد شوي ورا العشى اخلي عليا يجيبني

-خوش.. يله مع السلامه

-باي

نزلت التلفون من اذني حاطته گدام وجهي مباوعه على الرقم ساحبه نفس طويل
وخرت عيني من التلفون ماده ايدي للكوب اخذه ورتشفت منه شوي وبالايد الثانية دخلت على اليوتيوب ظليت اباوع فيديو ورا فيديو منا ما سمعت الاذان يأذن

يوو هاي صارلي شگد.. باوعت على الشحن راح يطفه
طفيت الهيتر وخذت الكوب وطلعت من الاستقبال ويا ما طلعت دخل عليا ورا ابوي سلمت على عليا وما سلمت على ابوي.. لا هوَ باوعلي ولا سلم ولا انا هم

ماريد احچي ويا خليني بعيده عنه مثل ما راد انا اجي الهنا على مود امي واختي وعليا وبس وهوَ مالي دخل بي

عليا باوعلي واشر براسه تعالي. مشيت اله وكفت بسده وهوَ مد ايده لفها على متني ومشى بيها بينما مشى حسيت على شفته تطبع على راسي ابتسمت بفرح، احلى شي بحياتي الله رازقني باخ حنين عليَّ وام ماكو منها واخت على گلبي وطيبة الگلب الحمدلله والشكر دائماً

دخلنا للمطبخ وامي تتوضى على السنك
سلم عليا وهي كملت وضوى وردت عليَّ عافني ونزع جواريبه والقمصلة مالته ومشى الغرفة
حطيت الكوب على السنك وديت التلفون على الشحن

قربة: شسوي للعشى وأنتِ روحي صلي

فاطمة: مكمله ماعندي شي بس احمي الأكل

- تمام انا اروح اسبح حتى اصلي

فاطمة: تاني خلي يخلص الاذان

-خوش

عافتني ومشت وانا مشيت وراها متجهه الغرفة عليا
دكيت الباب سمح الي ادخل دخلت مباوعه الهم غيم بعدها على حطتها وكتبها مطشره ومندمجه وعليا واكف يم الكنتور يطلع ملابس

قربة: جاي تسبح.؟

-اي

هزيت راسي بها.. مشيت فتحت الكنتور طلعت الجنطة مالتي هيَّ والصغيرة. وسديت الباب
طلعت منها ملابس وخليتهن على الجرباية وعفت الجنطة على حطتها وطلعت لميت الغراض ملاتي ورجعت الغرفة ويا ما جاي ادخل طلع عليا باوع الايدي ورفع نظرة الوجهي عاكد وجها راد يحچي وهتفت

قربة: راح امشي بعد شوي ذو الفقار خابر عليَّ

عليا: شلون تعودت على حسچ

قربة: هاي انا بعد عليكم دربونه شوگت ماريد اجي لو أنتَ شوگت ما تريد تعال

عليا: مو مثل ما أنتِ ويانا

-اعوفهم وجي اگعد يمكم ههههه

ضحك هاز راسه رافع ايده كراص خشمي ومشى
ابتسمت ودخلت اكمل تسفيط. عزلتهن كلهن وحطيت الجنطة على صفحة وشلت الملابس واجت عيني على غيم تباوع عليَّ

غيم: شني راح ترحين.؟

-اي

-ظلي بعد حبابه

-ذو الفقار خابر عليَّ.. لو بيدي چان بقيت بعد ويا امي

-شعجب ابو الذوق خابر

-مو هوَ خالة نوب گتلها وين ذو الفقار وحچيت ويا گال تعالي

-يا الله هاي اول خطوة من النسيب

ضحكت وهيَّ ضحكت عفتها ومشيت طالعه
گاعده بالهول منتظره عليا
گعدت على الدرج ويا ما گعدت طلعت امي من الغرفة باوعت عليَّ و

فاطمة: بعدچ

-عليا بالحمام

هزت راسها بها ومشت للمطبخ.. ظليت منتظرته شوي وطلع طبيت ورا سبحت سبحه الحيض ونشفت شعري زين وتوضيت وطلعت اصلي كملت صلاوات اليوم كلها صليتها قضاء.
لان لازم ينقضن ما دام غتسلت ونضفت
فـ طولت يله كملت صلاة... بس كملت مشطت شعري بغرفة عليا وطلعت انا وغيم يم امي انساعدها

كملنا عشى وگعدنا بالصالة ناكل ونحچي بمواضيع عادية اگلت الفة الصغيرة البيدي مباوعه على ابوي وعلى عليا من گال بهدوء ومستغربة هدوء مو من عوايده هادئة طول هاي الفتره وخص بسالفة الفلوس

شاكر: السيارة بيعها

فاطمة: ليش يبيعها مو زادن فلوس من الگاع اشتري المحل بيها مال الزلمة وخلي السيارة جوها تفيده

شاكر: والصرمايه وزواجه منين مو تردين تزوجي

فاطمه: ترا الصرمايه مو عشرة وعشرين.. وعلى زواجه احنا بعدنا ما ماشين العالم

عليا: الزواج عوفو الاشعار آخر

فاطمه: ازوجك يمه ولا دگول ماكو زواج
والمحل يصير خوش
شاكر تسمعني خلي الخير يزور بيتنا بس فكر بينه وأنتَ تعيش بخير

شاكر: چا اصرف الفلوس كلها

فاطمة: يا فلوس يمعود هوَ أنتَ شصرفت من الگاع غير بس على البيت وأنتَ شراح تنطي للمحل غير كم مليون، وذا على الزواج خلي كل مصاريف الزواج من السيارة الي يبيعها وهم حتى لو باعها شراح يطلعن غير كم مليون حتى ما يكفن نيشان والهوسه مال العرس

ظل ساكت ما رد عليها رجعت گالت والكل ملتزم السكوت

فاطمة: احچي شاكر لا تظل ساكت الولد الى متى يظل بلايه زواج وهوَ راح يطخ الثلاثين

شاكر: منو گال اهل البت يقبلون وهيَّ بت شيوخ

فاطمة: ما يقبلون نشوف غيرها شني نسوان نقرضت.. المهم فلوس العرس والمهر موجوده

ظل ساكت ما راد عليها. اباوع على عليا ابد ما حچه
سوده عليَّ لو عنده وظيفه يحتاز ويطلب
تنهّدت مباوعه على امي من گالت مرة ثانية

فاطمة: احچي شاكر

شاكر: خوش كافي لا تلحين

ضحكت بخفه امي مباوعه على عليا الي مدنك راسه ابتسمت بفرح واخيراً بيتنا راح تزوره الفرحه

غيم: شوگت ترحين الهم.؟

فاطمة: الجمعة بين ما اكمل كلشي وحچي
ويا ام ذو الفقار وامها الحجيه واخذهن ونروح

قربة: اروح وياچ يمه

-ان شاءلله

غيم: وانا هم احنا اخوات العريس وكذا

فاطمه: عراضه خو ما عراضه

غيم: شني امشي والله

ضحكت بهدوء مباوعه على عليا ودنسته بكتفه لان گاعده يمه.. باوعلي بطرف عينه وغمزت اله هامسه قريب منه

قربة: راح ياخذ الدك گلبك الها

عليا: منين الچ هذا الحچي

قربة: هيَّ عليَّ ابو حسون هيَّ غير دشت راسك على گولت الحجية

ضحك ساكت.. ظلينا ناكل بريحيه لان فرحنا على هل خبر، انفتحت النا شهيه ناكل.. كملنا وكمت ساعدت امي ومشيت حضرت نفسي.. كملت وشلت الجنط وطلعت من الغرفة، باوعت امي گاعده يم ابوي وعليا يمها ويباوعون على التلفزيون.. باوعتلي امي ونزلت الستكان مالتها

فاطمة: ها راح ترحين

-هم يله امشي.. يله عليا نمشي

هز راسه باي منزل الستكان دافعه يم امي كام هوَ وامي وشلت الجنط ومشيت طالعه من الصالة وكفت يم الثلاجه جريت الموبايل حطيته بالجنطة وباوعت على غيم واكفه بالمطبخ

اجت اخذت مني الجنطة شالتها وطلعت گدامي هيَّ وعليا وانا وامي وراهم.. وصلنا يم باب الشارع اخذ عليا الجنطة من غيم وطلع واكف بالباب.. سلمت على امي وعلى غيم وطلعت

مشينى سوى... وصلنا يم البيت مالت عيالي
وكفت يم الباب وگلت وانا اخذ الجنطة من ايده

قربة: لا تضوج من كلام ابوي.. تعرف بي هوَ يموت على الفلس

عليا: ادري بي جديدة عليَّ.. بس ان شاءلله بس يتحقق الي بالي يتغير كلشي

قربة: المحل مو.؟

عليا: اي.. اذا صار راح يتغير كلشي اگدر اسيطر على وضعي وضع اهلي

قربة: ان شاءلله كلشي يتسهل الله وياك ومدبر الك احسن الامور

عليا: ونعم بالله.. يله طبي جوه وسلميلي على الولد

هزيت راسي بخوش وسلمت وراح وانا دكيت الباب شويه وجاني صوت عمو، فتح الباب ودخلت سلمت وكملت طريقي داخلة جوه
دخلت مباوعه على المطبخ هاجر تغسل المواعين اتقربت منها سلمت عليها ودخلت جوه للصالة
سلمت على الكل ودور عليه ماكو يعني فوك

ظليت گاعده يمهم شويه نسولف وكمت اخذت الجنط وصعدت.. فتحت الباب ودخلت مباوعه على داخل الغرفة محد بيها.. حطيت الجنطة الصفيرة على الكومدي والثانية بالارض

نزعت الشال الملابس ودرت وجهي على باب من انفتح ودخل ينشف بوجها منزل راسه وينشف
باوعت عليه بنظرات متروسه شوق ولهفه. بللت شفتي نزله عيوني من وخر الخاولي من وجها واجت عينه عليَّ

رجعت رفعت نظري مباوعه، ابتسمت بوجها ومشيت واكفه گدامه، بلعت ريگي هامسه بصوت شبه المسموع بينما هوَ يباوع على تفاصيلي وعيونه حمر

قربة: شلونك نظيفي

بلع ريگ محرك بؤبؤ عينه على تفاصيل وجهي، رد عليَّ بعد صفنه دامت ثواني

-زين

-شبي صوتك.؟

-شبي!!

-مادري شو شولن واحد يمتمت لو تعبان

-اي تعباان شوي.. ممكن اروح انام

صفنت عليه رافعه حواجبي مستغربة وضعه شبي هذا.؟ عافني بدون ما ارد عليه ذب الخاولي على الميز ومشى وخر البطانية وانطرح
اخذت الخوالي شريته على الباب وسديت الباب وباوعت عليه.. وضعه وصوته قلقني

وخرت عيني منه ماده ايدي للجنطة الصفيرة طلعت الموبايل باوعت على الساعة بهدعش.. طفيته ومشيت حطيته على الشحن على الي يم راسي ورجعت طفيت الضوء ومشيت الجرباية.. وخرت البطانية ونمت يمّه باوعت عليه وهمست بهدوء

-ذو الفقار شبيك يوجعك شي.؟
احچي ذو الفقار لا تسكت حتى اگوم اجيب شي تشربه

-ما بيه شي

-صوتك شبي... گلي منشول لو بلاعيمك تأذيك

-لا

-چا.؟

-جسمي يوجعني وبس.. اريد انام لا تحچين ممكن

سكتت ما حچيت حرف.. ظليت اباوع على ظهرة ثواني ودرت جسمي على الصفحة الثاني
خلي انام وشبع نوم اطلع فرق التعب التعبته هناك ظليت اسولف ويا روحي منا ما غفت عيني

بين النايمو والگاعده حسيت على شي يلتف على خصري رأساً فزيت مخروعه
باوعت على بطني هاي ايد... دخيلچ يمه الزهراء گلبي ظل يدك ماگدر ادور راسي اشوف
كوه درت وجهي مباوعه ذو الفقار راسه قريب عليَّ وايده ملتفه على بطني

گلبي الى شوي چان وكف من الخوف ما متعوده يحضني حتى لو انا نايمه چان حسيت
مثل هسه بس هاي اول مرة يسوي هيچ
بين كلامي ويا نفسي حسيت على صوته يتغلغل مسامع اذني بلعت ريگي داير وجهي مباوعتله
عيونه صارت بعيني اگدر اشوف عيونه من ضوء الجاي من الشباك

ذو الفقار: قربان اريدچ... بس وكفيني لا تخليني وكفيني... عارضي... ابچي... امنعيني.

رجفت اطرافي هامسه بخوف وگلبي يرعد
قربة:شـ شتريد.؟ أو شنو هوَ لا اخليك. ومنعك.

رد عليَّ وهوَ يوخر ايده عن بطني لازم تك وجهي دايرني گدامه بينما انا عيني تتحول على ايده وعلى عيونه وشفافه

ذو الفقار: لا تخليني قربة، لا تخليني اتقرب
صحيني... لا تخليني اغلط

بلعت ريگي وصلت الفكرة الي يريد يسويها
بس ماگدرت امنعه ونفذ كلامه.
احس نفسي مبنجه بين ادي.. ماگدر اتحرك لو ارفع ايدي ومنعه مثل ما گال.
كل الي گدرت اسوي اصفن بوجها وسلم نفسي قناعتي

أنما هوَ رص على خدي وهمس بصوت غريب
بينما يحچي وانا اباوع بعيونه
اركز بكل كلمة يكولها وحفظها بعقلي وبگلبي كلمة كلمة وحركه حركه ونظرة نظرة

ذو الفقار: لا تخليني قربان بعديني عنچ

ظليت ساكته اباوع بعيونه.. هوَ شاف هدوء وسكوتي
علامه رضا.. رأساً همست كلمات استغربت منه
ليش خايف، ليش يحچي وياي بهل طريقة.؟

ذو الفقار: لا تتندمين قربان ماريدچ تتندمين بيوم...

يتبع...

29

سنجدُ مانريدُ يومًا ما..
وسنفرحُ لحدوثِ أشياءٍ تمنيناها طويلا،إنَّ الله لايخذلُ من آمنَ به وأحسنَ الظنَّ برحمته. ✨

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

.
.
.

اخذت نفس عميق تارسه صدري هوى بارد
يطفي النار البصدري.. بس چنها ما تطفه هل
نار ما دام اكو حيايه بحياتي

فتحت عيوني متنهّده مباوعه على اغصان الشجر التلعب بيهن الهوى.. ياخذهن منا ويجيبهن منا چنهن حالي، ادولاب يوديني هيچ وهيچ
وانا ما بيدي حيله ولا جاره اعين روحي بيها

نقلت نظري بالارجاء من شجرة الشجرة ومن غصن الغصن ومن وردة الوردة الي مبلله بقطرات الندى وباوع وانا اهز بنفسي بالمرجوحه

هذا الكمت اگدر اسوي مو شرار القديمة التاخذ حقها من اكبر واحد هسه حالي بس دموع ونحب مثل البومه.. لا والله البومه ارحم مني ما تبچي مثل بواچيي

اخذني البنات البيت الشيخ وبدت الاسأله من الكل بس ماگدرت ارد بحرف واحد.. البنات خلن واخذني الغرفة الحجية، فرشتلي نرجس ونمت على الفراش وهتفت بصوت كوة يطلع

شرار: عوفني وحدي حبابات

نرجس: بس خلي انشوف إذنچ

شرار: عوفنها تولي اريد انام ماريد أي شي

نرجس: طفوف روحي جيبي كطن وماي دافي خلي انظفه الها وعود تنام على راحتها

ما رديت عليها غمضت عيوني.. حسيت عليها تجي تگعد يم راسي بدون ما تحچي حرف.
أما انا ما فتحت عيني ولا حتى دمعه نزلت
احس نفسي تبنجت مدري عيوني خلصت دموع
ظليت هيچ بالدقايق وحسيت على فتحت الباب وكلام نرجس ويا طفوف

نرجس: ابوي وين.؟

طفوف: بالبستان ويا شسمه والولد گاعد يحچون وياه

نرجس: ها خوش.. طفوفه بلا امراً عليچ سوي شوربه عدس خلي انشربها

ما سمعت منها شي بس صوت الباب أما انا اريد احچي وگول ماريد بس الساني تبنج وكلام الداير مدايري بي صدى.. عصرت اصبع ايدي بصبعي البهام بخفه مركزة على كلامها..

نرجس: اصفحي على جانبچ اليسر خلي انظف إذنچ

فتحت عيوني مباوعه على السكف بعدها محوله نظري الها نظرت الها بصفنه بدون ما احرك طرف واحد من جسمي، هيَّ كذلك باوعت على وجهي وطفرت دمعه من عينها
بلعت ريگي بمراره گايله بصوت متروس غصه وألم

شرار: ضربنــي بلا سبب.. طردني من بيته بلا سبب
شسويتله..؟ ووصل الهل كرهه والعمه الي بعيونه
بله ذكريني اذا انا مسويه شي غلط.؟
ومادري بنفسي، اي انا دائما اسولفلچ كلشي بله گليلي مسويه شي اله ووصل الهل كرهه

نرجس: لا

شرار: چا ليش هيچ يسوي.؟ صح انا انفرضت عليه بس مو بيدي يا نرجس... انا هم نجبرت على هل زواج حالي حالى

كملت آخر كلمة نازله دمعه ورا دمعه بينما هيَّ هتفت وهيَّ تلزم ايدي مسحت على ظهر كفي بهدوء وظلت تحچي وانا ساعة بالي وياها وساعة اصفن على كلمة الي تحچيها

نرجس: مو بوعيه صدگيني... ضرار مو هيچ أنتِ ما شفتي اول ما اجيتي.. صح رفضچ بس ما تعامل بهل سلوب وياچ، احچي شرار لا تصفنين

شرار: وشنو فرقه عن قبل نفس الخرا ونفس البول

نرجس: انچبي والله مو بوعيه.. ما تشوفي وقت المغرب يتخبل وبس يريد يتعارك

شرار: اسالچ سؤال

-شنو هوَ.؟

شرار: هم يكفر

-منو.؟

شرار: ضرار

گلت هيچ مباوعه الها فاتحه عيونها هاه راسها بالنفي
نرجس: لا ابد ولا مرة بس ليش.؟

وخرت عيني عنها راده بخفوت
-هاي ثاني مرة يكفر

-عليچ الله.؟

-والله

طكتها صفنه ثواني ورفعت نظرها عليَّ گايله
نرجس: شرار احنا هنا ابد. ما عنده سالفة الكفران صح الولد يتشاقون ويفشرون بس ابد من وعيت الدنيا الحد هسه ما سمعت ولا راح اسمع واحد منهم يكفر ولد عمي واخوتي اعرفهم كلش زين تربو على ايد ابوي وهاي سوالف ما عدهم ابد

سكتت ما رادة عليها.. أنما رجعت گالت بتبرير
نرجس: شرار ضرار مو بوعيه.. راح اگلچ شي ولو امي وخالة دانه گالن لا تحچين منا ما نتأكد يله بس اليوم على هل حالة الصارت اريد اوضحلچ أنُ ضرار مو بوعيه ولا يدري بالي گاعد يحچي والي يسوي

-شبي بي ابو الجنيب

-لا تستهزأين شرار ترا جاي احچي وياچ بجديه
ضرار مو بوعيه

-اي شبي.؟

نرجس: مسحور

صفنت على السكف ثواني ما راده أنما هيَّ شافت سكوتي وكملت كلامها

نرجس: والله العظيم لا تصفنين هوَ مو من عوايده يترك الصلاة ولا يكفر ولا يمد ايده على احد
مو نوب هسه يكفر وتارك الصلاة ويضرب بيچ عود هذا الي لعب لعب بحليمه من حچت عليچ

شرار: منو الساحرته.؟

صفنت بوجهي بتردد ما حاچيه حرف ابتسمت بخفوت عكس النار البداخلي: حليمه وبتها هنه السبب

نرجس: لا تاخذين ذنبهن

-ما راح اگول هنه بس الايام هواي وراح تشوفون بعينكم بس وحق الكفل زينب.. لا لا ما احچي خليني هيچ احسن بعدين تعرفون من تطلع الحقيقة

نرجس: خوش وانا اكيف.. وهسه نامي على جانبچ الايمن خلي امسح الدم الي يابس

سويت نفس ما گالت بدون ما احچي حرف.. ظلت تنظف بي وماحس بس من وصلت مكان الجرح شاغت روحي، الوجع يدك بگلبي
كملت بالشفاعات وكامت مدري شسوت ورجعت گعدت.. مدري شحطت على إذني وانا مالتزمه السكوت.. منا ما كملت وگالت

نرجس: يله كومي صلي وفوضي امرچ الربچ حتى بس تكملين تاكلين شوي

شرار: اريد اصلي بس ماگدر اكوم

-اجيب ماي تتوضين هنا

-لا بس تعالي ساعديني اروح الحمام اتوضى

اجت گومتني وعدلت شالي.. طلعنا من الغرفة صارو بوجهي، الكل كاعدين عمو هاشم والولد ومن ضمنهم عدنان باوعلي عاكد حاجبه

عدنان: هاي شببها.؟

هاشم: اسكت

عدنان: عليك الله شكو.؟

غسان: شويه اكشن وحركات نينجا ومن هل سوالف

عدنان: ويا منو.!

نرجس: شگد تسال گلنالك ماكو شي

هاشم: نرجس

عدنان: شبيچ هيو انا شگلت

ستار: غلس عدنان كلشي ماكو بس شرار طاحت مريضه واجت هنا يم نرجس وجدتي

گال هيچ ستار وعدنان دار وجها عليَّ
عدنان: حمدالله على سلامه شقاق

ابتسمت بخفوت راده بصوت كوه ينسمع
بينما الكل يباوعن عليه بنظرة شفقه.. شگد كرهت روحي، شگد تمنيت الموت ياخذني ويريحني

شرار: شكراً

مشيت خطوة ونرجس وياي دخلنا للحمام الي بصف غرفة طفوف بس على الاخير من يم باب الدخول من المطبخ، دخلت ونرجس ظلت واكفه بالباب..

ردت اشوف وجهي بالمراية بس ماكو بالحمام
تنهّدت، فتحت البوري توضيت وكملت وطلعت وانا روحي رايحه الضرب ما اجه على رجلي بس على متوني بس احس كل جسمي متكسر ومضروب

طلعت مباوعه على نرجس مطيتني ظهرها من فتحت الباب رأساً دارت وجها عليه باوعتلي ومدت ايدها
لزمت ايدها ورجعنا للغرفة.. جابتلي ملابس منها ومحرم وتربه وطلعت..

بدلت وكملت وبديت اصلي.. بنص الصلاة وانا ما بطلت دموع يصبن عشرة عشرة.. كملت فرض المغرب كوه ويا ما كملت رفعت ايدي وتوجهت بالدعاء ودعيت من كل گلبي يربد گلبي وياخذ حقي من كل واحد اذاني وضلمني

ما دعيت الله يشافي لان گلبي ملجوم منه اعرف بي هوَ مو بوعيه وصح عرفت متأخرّة بس عقلي ما سمحلي ادعيله، خلي بهل حالة شسويله
بس منتظرة الله شوگت يرجعه العقله الى اخلي يتندم على كل حرف حچا وعلى كل ضربه ضربني بيها
اذا ما اخلي بحسرتي وبحسرة الطفل ما اطلع بت حسين

ظليت على هل حال خمس ايام ما اطلع باب الغرفة
الأكل يجيبو للفرفة، وأكل منه بس اشبع الي بطني وبس وخالة دانه تجي تگعد يمي تحچي وياي وتسولف وابد ما تجيب طاري ضرار وهل شي يريحني ماريد اسمع اسمه گدامي اريد ارتاح من شي اسمه ضرار

صدقت عايفه القرءان على صفحة رافعه راسي مباوعه على الباب دخلت نرجس تهف باوعت عليها هتفت بحماس

نرجس: عندي خبر حلو

ابتسمت بوجها اجاملها الى انا مالي خلك الكلشي
شرار: شنو هوَ.؟

نرجس: قربة واهلها اجونه وهذول بالصالة ما تسمعين الصوت

صفنت عليها ما حاسه على أي صوت بالي چان ويا القرءان ما مركزه باي شي.. بللت شفتي مبتسمه بهدوء

شرار: هيَّ ويامن جايه

نرجس: هيَّ وامها وعمتها ومرّة چبيرة ماعرفها

شرار: ليش صاير شي عدكم وجايات.؟

-لا شعدنا مثلاً.. تدرين انا هم ستغربت اول شي بعدين نسيت وكيفت على جيت قربة

شرار: هم سألن عليه.؟

-لا بعدهن هستوهن گعدن سلمت عليهن ودخلت عليچ
تعالي نطلع نگعد يمهن

مسحت وجهي مالي خلك اطلع يمهن وانا وجهي يلطم چني سعلوى.. تنهّدت وكمت ظليت بالمحرم هيچ اطلع الهن احسن
باوعت على روحي بالمراية وانا على وكفتي
اذا سالوني شبي خدچ ازرگ اگول طحت من الجرباية اي هذا احسن شي ماريد احد يعرف حتى قربة
شي مو هين اسولف الها رجلي كتلني.. احس بالهضيمه اذا احچي

-وين صفنتي يله نطلع

باوعت عليها من طكت اصبعها گدام وجهي
ما رديت، مشت گدامي
فتحت الباب وطلعنا وحدة ورا ثانية هيَّ گدامي وانا وراها

وخرت من گدامي وباوعت عليهن گاعدات
كلهن ويا ما طلعنا اجت طفوف واطياف من المطبخ
كامت عمت قربة وامها وهيَّ
مشيت سلمت عليهن وحدة وحدة وگعدت يم قربة ونرجس يمي صارت گعدتنا منها على الدرج
ظهري صار بين الحايط والدرج ونرجس بتحديد گعدت على اول باية الدرج.

بينما گعدنا طفوف وطياف وزعن الضيافه واجن گعدن يمنه، ظلن انسوان الكبار يسولفن وقربة تباوع على نرجس بنظرات غريبة... ظليت عين على نرجس وعلى قربة.. شكو نرجس بيها شي ليش هيچ تباوعلها رأساً همست قريب منها گايله باستغراب

شرار: قربة شبيچ ليش هيچ تباوعين.؟

باوعتلي مبتسمه بمكر
قربة: هسه تعرفين

شرار: شعرف ليش هوَ شكو شصاير.!!

قربة: لا كلشي ماكو لا تخافين

-وراچ موضوع بهاي نظراتچ وذا ما تحچين نتزاعل

قربة: هسه تسمعين وتشوفين

سكتت ما لاحه عليها فتحنا غير موضوع عادي منا ما سكتنا من تحمحمت الحجية الوياهم گايله كلام خلاني اباوع ما بين نرجس وقربة ونرجس الي فتحت عيونها شاحبه على امها الي اشرت الها تكوم

الحجية: الله بالخير

الكل: بالخير والعافية

الحجية: اليوم جاينكم بشغيله ان شاءلله ما تردونه

شومة: احچي خيه اذا ما تصير الشغيله انخليها تصير

الحجية: ونعم من اصلچ ام هاشم.
يا ام هاشم احنا اليوم جاين نطلب ايد المحروسه بتكم لوليدنا عليا... وان شاءلله نسمع منكم بس كلمة الموفقة... واحنا ما نحچي بزينات وليدنا خاف عبن نحمد بي انتم اسألو عنه بالمنطقة مالتهم القديمة

باوعت على نرجس بعد. ما خالة اشرت الها تكوم كبل كامت زركت للمطبخ.. بينما كامت نرجس جدتي ردت عليها وخالة ام ستار التزمت السكوت

شومة: النا الشرف اناسبكم... بس مثل ماتعرفن نستشير ابوها واخوتها ووليدات عمومها خاف واحد منهم بيهم هاويها

الحجية: اي خيه على راحتكم.. احنا ننتظر منكم الجواب وان شاءلله ما تردون الى كلمة الموافقة

شومة: ان شاءلله خيه ان شاءلله

الحجية: يله يمه خابري مطيلب هم يله نوصل قبل المغرب

عيدة: ان شاءلله

طلعت الموبايل من الجنطة ودكت مدري على منو سدته منه وگالت
عيدة: هذا بعده واكف بالباب

الحجية: چا خلي نتوكل.. وان شاءلله نرجع الهذا البيت بمشيى الزلم فرحانين

شومة: ان شاءلله

گالت المرّة هيچ وكامن.. كمت وياهن مصدومة
منو هذا عليا صح سامعه باسمه وعرف هوَ اخو قربة بس ما شايفته.
سلمن وطلعن وراهن خالة ام ستار والبنات وانا بقيت بمكاني ماگدرت امشي وياهن سلمت وظليت گاعده يم الحجية، باوعت على الحجية ماخذتلها صفنه على اطراف البساط عدلت ردان المحرم گايله بهدوء

شرار: شدگولين ابوي الشيخ يقبل.؟

شومة: حتى لو يقبل الموافقة ترجع النجيرس، هذي حياتها هيَّ وابوها يسأل على الولد واهلها وشغله والباقي على البت تقبل ترفض الها راجع

هزيت راسي ساكته.. كمت منها مترخصه اكمل قراءة القرآن.. عفتها ورحت للغرفة بينما التفت مباوعه على باب المطبخ بعدهن واكفات باب الشارع يحچن
درت وجهي وكملت طريقي الغرفة

دخلت وظليت اقرأ سورة يوسف على توصيات خالة دانه استمر عليها طول احبالتي على الجمال ونور للطفل وخص هاي الفترة.. لان الطفل جاي يكبر شوي شوي بطني، واول مرة اسمع هيچ هيَّ واية النور الي خلتني يومية احفظها بعدها اقراها الصبح على گلاص ماي وشربه وهاي الفترة الموجودة هنا ما سويتها انسى

ولو تدري تلعب بيه فلك.. حيل ملتزمه بهاي الاشياء
ومن اسألها دگول هذا قرءان كله خير وبركه الچ وللطفل، وانا اسوي نفس ما دگول لان اشياء بسيطه مو قوية وتعب اسويهن بدقايق.
وهاي بعد عناء گدرت احفظ اية النور
لان قراءتي مو قوية حتى الفض كلام الله

بس بعد ما هيَّ استمرت وياي وهم اطلع باليوتيوب فيديو الشخص يقرأ السورة الي اريدها.. منا ماعرفت شلون اردد الكلام وياي وحفظت الكلام الصحيح.. منا ما ظليت اقرأ بدون ما اشغل الفيديو

سحبت نفس طويل ساده القرءان ومصدقه بنفس الوقت رفعت نظري للباب مباوعه عليها من دخلت نظرت التعابير وجها اشوف الخجل... فرح... تعاسه

لكن وجها يشبه ابو صابر.. منطينه أكل فاخر
ابتسمت بهدوء گايله وانا اباوع على حركاتها
اجت گعدت گدامي مباشرتاً رافعه ايدها حاطتها على خدها بدون ما تحچي شي

شرار: شبيچ عروستنا

رفعت نظرها من جوه حواجبها مباوعتلي بنظرات استنكاريه، ثواني ظلت على هل حال وگالت كلمة بعدها الكلمة الثانية بضحكه وهيَّ على وضعها ايدها حاطتها على خدها وتضحك وتحچي بضحك

نرجس: عروس.؟ ياااخ انا عروس هههههه

شرار: خيرچ تخبلتي

وخرت ايدها من خدها معدله نفسها وگالت بجديه عكس تفاهتها قبل لحظة... أما انا اباوع عليها ومبتسمه بهدوء على كلامها

نرجس: لا.. لا شرار جديات ماعرف شحچي. انطيني ردة فعل اسويها من يجي يحچي وياي ابوي
شو احس نفسي ماعرف اريد اضحك

شرار: هههههههه "مسحت وجهي وانا اضحك ورديت بضحكه" بربچ تحچين صدگ.؟

نرجس: اي والعباس اريد اضحك وخاف ابوي يگلي شي وانا اطكها ضحكه واتفشل منه.
هسه انا امي باوعت بوجهي اريد اضحك بس لزمت ضحكتي كوه خاف عبالها مكيفه لو عندي شي ويا الولد

شرار: اي ومنو يگول ماعندچ شي ويا الولد.؟

حركت حواجبي بمكر اريد احچيها بينما هيَّ هتفت هيچ شهكت ضاربه صدرها

نرجس: غدييي وعلي ماعندي شي ولا اعرفه بس شفته مرة وحدة وما شفته بعد

شرار: اها يعني هسه يطلع هوَ الحابچ

نرجس: حب هههههه يحبني منين ولچ هوَ شفته بعرسكم، من صعدت بسيارته ويا طفوف وطياف وتعرفت على قربة عرفت هذا اخوها.
والله ماعندي شي ويا

شرار: اي أنتِ شمدريچ جاي اگلچ يمكن هوَ الي يحبچ وحاجه امة واخته واجو يخطبونچ
وعلى طاري الي يخطبونچ شنو ردچ موافقه يو لا على گولت جدتي شومة

نرجس: شوافق هوَ انا شعرف عنه حتى اگول ماوفقة يولا

شرار: هم صدگ بس من ابوچ بعد شوي يسألچ شتردين

نرجس: ماعرف

شرار: گليله ماعرف عن الولد شي.. انتم اسألو وشوفو

نرجس: هيچ برأيچ.؟

-الرأي رأيچ مو انا الراح اتزوج.
أنتِ اگعدي وفكري زين... يمكن الولد خوش ولد ومُدب ومحترم ليش حرامات تفوتين هيچ رجال
وذا تردين اتصل بقربة وسألها عنه شلونه وشلون اسلوبه وياهن. يعني تعامله عصبي لو ما يحترم

نرجس: اكيد اخته وتحمد بي قابل دگول هيچ وهيچ

-هوَ صح بس سلوبه شلونه يعني يصلي مُتدين أو شنو شغله، لو اگلچ، لا همه الولد غير راح يسالون عليه ونعرف شنو شغله

سكت رافعه ايدها تكرط بصبعها وصافنه.. صفنت عليها وهمست بدون وعي

شرار: راح تعوفيني

-ها.؟

-راح تعوفيني هنا نجيرس ويا كويثر وحليمه الحيه

نرجس: شفتي سيارة الزفه بالباب وراح اودع.. شبيچ خيه هوَ انا شعرف حتى اقبل

ضحكت بهدوء: الولد گلتي شايفته حلو لا يعني اجكم نفس جواد لو حلو على اخوتچ

-يشبه محمد الحلفي نسخه منه بس هذا وجها دائري وماعنده كصه وها اتذكر خشمه مو طويل مثل محمد الحلفي لا خشمه عادي حلو

- الله بس لا هذا الرادود

-اي

-هلو هلو بعد شتردين اجاچ واحد يشبه محمد الحلفي

-قابل متزوجه محمد الحلفي نفسه هوَ يشبها بس

-بعد ما اسميچ نرجس اسميچ حلفيه

باوعتلي صفح ما راده، ضحكت وكمت اصلي عدلت نفسي على المصلاية گايله

-گومي صلي ولا تصفنين

كامت بدون ما تحچي شي وطلعت.. بينما انا كملت صلاة وطلعت يمهم.. وكفت وياهم بالمطبخ اساعد وحديث الساحة اهل قربة.
مشيت اخذت من خالة الخفاقه مال البن اخفق بي وهي مشت تقلب بالتمن وگالت طفوف راده على خالة يمكن قبل لا ادخل خالة گايله شي

طفوف: أنتِ ما اجيتي ويانا بالزفه غير احنا صعدنا بالسيارة مالته الولد مُدب وعينه ولا شالها.. وحتى غسان وستار يعرفو لان من نزل ضرار يصور بالستوديو وكف يمهم ويحچي ومندمج وياهم

سعاد: شريد انا اهم شي ولد خلوق ومحترم

اطياف: ياهوَ الي يحچي العمي

سعاد: امي شومة گالت انا اتحچه وياه ويا الولد احسن هيَّ تحجي انا استحي افتح هيچ موضوع ويا الشيخ

وكفت عن الخفق دايره وجهي مباوعه عليهن خالة صح ولا حچت حرف من اهل قربة اجو بس جدتي هيَّ الحچت والناقشت.
بينما اباوع عليهن مالتهيات بالشغل اطياف تسفط بالخبز باين ستوها جايه من التنور وطفوف تثرم زلاطه

ردت احچي وسمعت صوت سيارة.. باوعت من الشباك المطبخ باب الشارع مفتوح وسيارة عمي عمران دخل البيت نزل منها عمي هاشم من الصدر ويا عمي عمران ويا ما نزل عمي عمران طلعو من الورا غسان وستار باين ظالين گاعدين ورا

بينما اباوع عليهم خالة طلعت وكفت بالباب المطبخ
أنما انا شلت سراحيه البن حطيتها بالثلاجة تبرد بين ما نصب العشى

دخلو الولد سلمنا عليهم وكل واحد راح يبدل ويصلي
بينما هم يصلون احنا عزلنا المطبخ وانا وياهن وساعد بالخفيف ما يقبلون اشتغل خاف يصير بيه شي

كملنا تحضير والولد كملو صلاة ونقلنا الأكل وگعدنا كلنا على السفرة ناكل ونسمع حچي الولد على شغلهم اليوم، ونعلق على بعض المواضيع منا ما كملنا وكمنا ننقل بالأكل وگالت الحجية موجها كلامها النرجس الي طول الأكل تاكل بشرود

شومة: نجيرس گومي هدريلي طشيت وماي اغتسل

ما ردت عليها صافنه على السفرة.. رجعت گالت والكل انتبه على كلام الجدتي وباوع على نرجس الي وجها انصبغ احمر، عضيت شفتي كاتمة ضحكتي

شومة: نجيرس گومي بعد وقت تصفنين مو هساع

كامت ركض بدون ما ترد بينما گالت هيچ وباوعت وراها ورجعت نظرها عليَّ وگالت بتصخير

شومة: وأنتِ الثانية گومي جيبي چايات

هزيت راسي رافعه ثنين اديه العيونه راده بهدوء
شرار: من عيوني ثواني والچاي يمكم

ابتسمت بوجهي ومشيت اخذت القوري وحطيته على النار.. بينما خليته البنات وحدة تعزل بالمواعين وحدة تغسل.. وخالة رجعت گعدت يمهم.
حضرت الصينيّة والستكاين وخذتهن للصالة
حطيتهن يم خالة سعاد ورجعت للقوري

وكفت يم الطباخ بينما يخدر.. ظليت اسولف ويا البنات منا ما كمل اخذته هوَ وعلبه الشكر وطلعت والبنات وراي دخلت للصالة مباوعه عليهم كلهم متجمعين واموري يفتر عليهم من حضن الحضن. حطيت الجاي يم خالة سعاد وهيَّ بدت تصب وياخذون وينطون

گعدت يم اطياف وطفوف ونرجس ماكو باين حبست روحه، اخذت الستاكن من طفوف حطيته گدامي وخطه مباوعه على عمي هاشم يخوط بستكانه وگاعد يم جدتي.. وجدتي تشرب بستكانها بهدوء
شربت كمع منزله الستكان تحمحمت والكل باوع عليها وبدت تحچي بهدوء ومتروس وقار وشموخ

شومة: الله بالخير وليداتي

-بالخير والعافية

شومة:الله يعافيكم..عندي كم كلمة احچيهن الابو ستار

هاشم: خير ان شاءلله

شومة: كل الخير يمه كل الخير.. السالفة يا بعد امك
اليوم اجتي وادم خطابه البنيتك نرجس

عم السكوت الثواني، باوعت على عمي هاشم معبره انظاري للولد يباوعن على جدتي وعلى ابوهم.
بينما عيني على الولد رجعت نظري العمي هاشم بعدما فر سبحته على ايده راد بهدوء

هاشم: بيها الخير.. بس ياهمه.؟

شومة: رفيج ضرير مرته اخوها.. اظنن الولد يعرفونه

باوع عمو على الولد والولد عگدو حواجبهم مستغربين رأساً گلت قبل لا الولد يحچون

شرار: مطلب صديق ضرار مرت اخو اخوها

ستار: بس لا الولد ابو الكيه

طفوف: اي هوَ الي اخذنه بالزفه بالعرس

هز راسه عمي بها وجدتي گالت وهيَّ تنزل ستكان الچاي شاربه آخر ما تبقى

شومة: اسأل على الولد واهلها وشني يشتغل وسأل بنيتك لعلها قسمه زينه

غسان: انا الولد شفته بالعرس محترم وخلوق الى درجة، بس ما نقيسه من ساعة عاشرنا. خلي باجر ستار يسأل عليهم، بس صدگ هم وين گاعدين

سعاد: بالـ**** قريب للسوگ والمدرسة الاعدادية دگول امة بس سألو بيت ابو عليا كلها دليكم

هاشم: ان شاءلله خير باجر عكبه يمشي غسان وعدنان يسألون

ستار: يابه عفتها كلها تودي هذول

غسان: ها شبينه مو كد المقام لو ما نعجب ستاذ ستار

ستار: لا والله مو ما تعجب بس عبنكم هتليه وتخزونه بين الوادم

غسان: تسمع يبوي انا فلا اعتب باب البيت ولا اليه غرض

هاشم: احترموني بسكوتكم.. وأنتَ چبيري تروح أنتَ وعلي تسالون من يا عمام وشني الولد ما شني

ستار: ان شاءلله

تغير الحوار على مواضيع ثانية منا ما كل واحد ترخّص الغرفته وانا اخذت جدتي ومشينى للغرفة فتحت الباب ودخلنا باوعنا على زويه مبتسمه لافه نفسها لف بالبطانية حتى راسها مغطيته

مشيت جدتي الفراشها ورجعت سديت الباب وطفيت الضوء ورحت الفراشي اخذت تلفوني من الشباك ونمت يم نرجس ظليت اباوع شوي ونمت

مرت يومين على جيه اهل قربة على نرجس
والولد راحو سألو اليوم الصبح والحد هسه مانعرف منهم شي لان مثل ما گالت خالة رايحين كبل للمعمل وعمي الشيخ عنده گعده ما يجي منا للمغرب

ومر اليوم منا لليل اجو كلهم وگعدنا بالصالة وياهم علي ابن عمران، باوعنا على ستار گعد عدل مباوع على ابو الي يفر بالسبحه ويباوع على ستار منتظره يحچي،بده ستار يحچي واحنا بس نسمع محد منه علق ولا حچه حرف غير جدتي وعمي الشيخ

ستار: الولد كلها تحمد بخلاقه.. وسمعتهم مثل الورد ومن عشيرة * بس شسمه هاي

هاشم: بس شنو.؟

ستار: الولد يشتغل بالكيه وابو چايچي يشتغل بالسوگ

شومة: اي وشكو بيها

ستار: شلون جدة اختنا بت شيخ وبت خير ودلال تاخذ واحد ابو كيه وابوه يشتغل چايچي بالسوگ

هاشم: الشغل مو عيب

ستار: يعني مقتنع بشغل الولد.؟

هاشم: الراي راي اختكم انا ما احكم على مصيرها
عندي عرفت الولد شني ما شني هاي هيَّ عندي
الباقي عند اختك قبلت بي خير على خير ما قبلت هاي حياتها.. وهم تعال مادام شغلته بالحلال هذا اهم شي

علي: اعتذر عن التدخل بس ستار خويه انا من وجهه نظري، كلام عمي صح الاهم شغله محترم ولولد شوفت عينك يا الي ندك بابه يحمد بي وباهله.
وين تلكه هيچ رجال وأنتَ شوفت عينك أنتَ وغسان شفتو بالعرس ماكو بثگله وأدبه

ستار: علي خويه انا ماعندي اشكال ويا الولد أصلاً من عرفت هوَ كيفت اختي تاخذ هيچ واحد ذهب بس شغلته يا خويه مو قوية شلون يعيش اختي الي عمرها كضته دلال وكلشي التريده لبيك

سعاد: هيَّ امة ما جابو طاري الشغل ولا شني يدرس
نسالهم نشوف شني شغله

ستار: يمه مو نگلچ يشتغل بالكيه

هاشم:انا گلتت الراي يبقى الختك تقبل يجي الولد يشوفها وتشوفه.. وعود بذيچ الساعة تقبل بي وبوضعه هاي هيَّ ما تقبل الله ويا

شومة: صيح عليها اسمعو منها

باوعت الهم وطفوف گالت بهدوء وهيَّ تباوع على اخوها والولد

طفوف: خلي شرار تكوم تسالها خاف تنحرج گدامنا تگول اي

نظرولي كلهم وانا رأساً كمت.
دخلت وسديت الباب ورفعت نظري باوعت عليها واكفه يم الحايط مال الباب
باوعتلها بمكر بينما هيَّ رأساً عدلت نفسها وغضت البصر عني، ضحكت بخفه

شرار: اعرفچ سمعتي الحچي كله لهيچ يختي تقبلين تشوفين الولد ويشوفچ لو نرجع الهم الرفض ولو أنتِ شايفته عليمن بعد تشوفي

نرجس: انچبي

شرار: أكلي تبن وحچي منتظرين الجواب من سندرلا

نرجس: شجاوب.؟

-عليچ العباس جاي تستلوتين لو أنتِ نثولتي

-شبيچ شرار.. والله يعني شجاوب شعرف انا شو كل ما تجي قسمه ارفض بس اسمع بس هسه ماعرف شرد

-ردي بأي أو لا.. تقبلين الولد يجي يشوفچ وتشوفي لو ترفضين القسمه

-ها

-وعلا فضيها

دنكت راسها بخجل لاعبه بصابع ايدها
ابتسمت على شكلها مبينه هاويه وناويه.
جليت حنجرتي گايله بهدوء مو مال شقى لو ستهزاء

شرار: تردين اصيح خالة سعاد تحچين وياها وتستشارينها.؟

هزت راسها باي رافعه نظرها الي ابتسمت بوجها ودرت وجهي فتحت الباب وطلعت بس راسي
باوعت على خالة سعاد وهتفت بينما البنات والحجيه باوعن عليَّ منتظرين احچي

شرار: خالة ممكن تجين شويه اريدچ بشغله

هزت راسها باي.. وخرت عنها الستكاين وكامت جايه فتحت الباب وخرت منه صرت ورا.
دخلت وسديت الباب.. سديته وعيني على نرجس وخالة، نرجس واكفه يم الميز مال المراية ومنزله راسها أما خالة تجت نفسها على الحايط الي بصف الباب مباوعه على نرجس وانا رأساً هتفت لان مبين ما راح تحچي شي نرجس من خجلها

شرار: تريد تنصحيها قبل لا ترد الموافقة بشوفت الولد العمي الشيخ

باوعتلي ودارت نظرها عليها.. سحبت نفس وبدت تحچي بهدوء وحنان.. بينما انا تچيت نفسي ورا الباب اركز بكلامها وبينما هيَّ تحچي عيني على نرجس وعين عليها

سعاد: شوفي يمه راح احچي كم كلمة وأنتِ ام الشأن والارأي.. لان أنتِ تعرفين بيه انا لا من ذني النسوان الي يتحكمن بولادهن ولا انا الكلمتي فارضتها على اهل بيتي... تدرين بيه الي يريد رأي انطي بكل ادب وهدوء اخذ بكلامي ونصيحتي عاش مرتاح ومستقر بحياته

كملت كلامها ماخذه نفس رافعه ايدها مأشره على البرا، وعيني على شفتها الي تحرك وعلى حركات ايدها التشرح بيها

سعاد: وأنتِ شفتي اخوتچ اخذو بكلام ابوچ وكلامي ومشو على طريق الصح شلون استقرو وعاشو ويا نسوانهم باستمرار.. لهيچ يايمه انا راح انصحچ وانتِ چبيرة وتعرفين مصلحتچ.
تاخذين بكلامي خيراً على خير ما تاخذين بكلامي هاي حياتچ ووراچ عمر طويل شوگت ما تقتنعين بالقسمه التعجبچ احنا وياچ

رفعت راسها نرجس مباوعه على امها ورفعت كتافها وهتفت بحيرة من امرها عيونه تشرح الحيرة والتردد البيها، بينما خالة مركزه بكلامها وحيرتها

نرجس: ماعرف يمه انا ماعرف اريدچ أنتِ تنصحيني
أنتِ چبيرة وتعرفين كلشي.

سعاد:تردين نصيحتي

-اي

سعاد: شوفي الولد ويشوفچ وأنتِ بعد بذيچ الساعة ارفضي أو تقبلين أنتِ حره

-بس يمه وكلام ستار

سعاد: ماعرف يمه اذا اگلچ وشبي الشغل مو عيب دگولين امي تريد تخلص مني وذا اگلچ عوفي الولد شغله وحالتهم مو قوية دگولين امي كششتني.
لهيچ أنتِ شوفي الولد ويشوفچ واحنا نسال اهلها يمكن عنده غير شغله والعالم ماتعرف

-هيچ رأيچ.؟

شرار: كلام خالة منطقيّ خلي يشوفچ وتشوفي وحنا نحچي ويا اهلها ونستفسر عن الولد أكثر.
لو اگلچ اخابر قربة ونسالها عنه أكثر شنو يشتغل شگد عمره

سعاد: اي هم خوش

باوعت النا ساحبه نفس بعدها نزلت راسها
نرجس: چا گولو لابوي بس نتشاوف وبعدها افكر اوافق لولا

سعاد: بيها الخير ان شاءلله

گالت هيچ وفتحت الباب وطلعت
باوعت على نرجس وخرت من الحايط مقربه وجهي يم الباب اسمع شراح تحچي.

سعاد: ابو ستار دگول رد عليهم الموافقة بس نتشاوف وبعدها تفكر توافق لولا

هاشم:هاي هيَّ ردي الخبر الهم أنتِ وخلي شوف يا يوم يجون ونطونا خبر

وخرت آذني من الباب معدله نفسي..مباوعه على نرجس وهتفت وانا امشي انزل فراش من النضده
-نامي ولا تفكرين سلمي امرچ لله وهوَ يسهل الامر

-ونعم بالله

گالت هيچ واجت اخذت فراشها وفرشته يمي
وكل وحدة دارت وجها على صفحة
ما حچيت بعد خليها هيَّ تفكر على راحتها ما نريد نضغط عليها بالكلام

ثاني يوم، يوم عادي ملتمين بالمطبخ والبنات گدامي
يسولفن منا ما گالت اطياف بستفسار

اطيافةشوگت تخابرين عليهم.؟

حولت نظري الخالة حطت الغراض الي بيدها على الكاونتر راده وهيَّ نقل مواعين المسحتهن مال الكاونتر

سعاد: ذكرتيني گلت اخابر بس اكمل الغدى.
شو بعد امج جيبي جهازي خلي احجي وياهم زحمة الهسه ما منطيهم خبر

هزت راسها باي وخرت من حضنها امير ونطته ماعون الثريد بيده وظل ياكل
مشت طالعه من المطبخ رجعت نظري للباب مال المطبخ.. بالتحديد مستقرّه عيوني على باب الشارع

طول هاي الايام الگاعده بيت عمي هاشم.
ضرار ما وصل الهنا ابد أو انا ما شفته طول هاي الايام بعد مادري من انا نايمه ويجي يشوف جدتي
بس اذا يجي چان گالت نرجس

تنهّدت موخره نظري من دخلت اطياف انطت الموبايل الخالة.. بينما خالة مسحت ايدها بالدشداشة وخذته منها وهيَّ اجت گعدت يمي گدام ابنها

ركزنا ويا خالة وعلى حركاتها.. رفعت الموبايل الإذنها يدل دكت على رقم ام قربة نفس ماعرفت انطت رقمها المرّة من وكفن بالباب.

سعاد: هلا خيه.. صباح الخير
-الحمدلله على على الله.. انتم شلونكم شخباركم
-دومكم خيه.. اگلچ ام عليا حچينا ويا الشيخ وگال خلي يجون يتشافون وبعدها الموافقة تبقى عد البت
-اهلا بيكم هلا بكل وقت.. مع السلامه الله وياچ

اطياف: ها..؟

سعاد: دگول راح ارد الخبر الابو بيتهم ونجي

هزت راسها بها ساكته.. كملنا شغل العلينا واجه وقت الغدى واجو الولد وعمي الشيخ وگعدنا كلنا وخالة انطته علم بس كملنا غدى وكلنا التمينه يم جدتي نشرب چاي، جابت الچاي اطياف وزعته على الكل بينما جاي نشرب دك تلفون خالة

انطته الها اطياف وظلت تحچي عرفتهم اهل قربة كملت المكالمة وگالت

-باجر بليل يجون

باوعت على نرجس الي گاعده على الدرج ولا فتحت حلكها من اجو عليها الحد هسه.. وين نرجس ام السان التلغي اربع وعشرين ساعة

ظلو يحچن وعمو گال الستار ينطي خبر العمامة باجر يجون ورا العشى يلتمون گدام العالم لان انطاهم خبر من يوم الاجو وحاجاهم خاف واحد من الولد رايدها بس كلها گالو خلي تتوكل

مر اليوم عادي بين الشغل والتفكير الباجر
وخالة دانه تجي كل شوي تشوفني وتطمأن عليَّ وتروح، عيونها تريدني يمها بس انا ما ادخل الذاك البيت منا ما يشوفون صرفه الضرار

ثاني يوم ظلينا نحضر ونظف ونظفنا الديوان
وخطية البنات ما قبلن خاف يصير بيه شي على باول اشهر هنه نظفن ثلاثتهن.

كملنا كلشي والعشى سوينا على سريع بس كملنا تنعزيل وغسل اجو عمام ضرار كلهم تجمهرو يم جدتي ودعيت الله حليمه ما تجي لان بس تجي راح تذب سم يله تولي البيتها، والسعد حظ نرجس ما جايه مو هنا اختها مدري شبيها ورايحه الها هيَّ وكوثر

فزيت من صفنتي من دك تلفون عمي الشيخ
باوعت عليه لان انا گاعده على درج وصاير گدام وجهي، رد على الموبايل عاكد حاجبه

هاشم: اهلاً وسهلا منو.؟
-يا هلا اي عرفتك
-هلا بيكم.. هسه الولد طالعين
-خوش ثي ملاه

گالها وكام مأشر للولد الموجودين
هاشم: الولدم بالباب ستار روح افتح الباب الهم

كام ستار وطلع ورا عمي الشيخ وعمام ضرار
كمت مباوعه وراهم شكلهم گدام اهل العريس كلها هيبة، حسيت بالفخر ومشاعر غريبة شتاحتني مو غيرة لا ابد والله، بس تخايلت نفسي انا بدال نرجس شلون راح احس بالفخر عندي اب وخوان وعمام يسدون عين الشمس

عدلت شالي زافره انفاسي طالعه ورا خالة واطياف ونرجس يم طفوف ترتب بوجها… دخلت وياهن اساعدهن بالضّيافة، بينما خالة سعاد وخالة دانه طلعن بعدما الزلم دخلو للمضيف، وكفن باب المطبخ يسلمن وانا واكفه يم الثلاجة اباوع الهن

عرفت بس ام قربة وغيم والي وياها مرّة اول مرة اشوفها بس تنطي روعه الام قربة يمكن اختها أو شي لان تنطيها شبه بس ام قربة شوي كصيرة وهاي تارسه وطويله

دخلن وسلمنا عليهن وحدة ورا الثانية.. دخلتهن خالة للصالة وانا واطياف بدينا نرتب بالستكاين الزلم
طفينا الچاي، واطياف بدت اتصب وانا رتبت بالگلاصات الماي بالصينيّة ترستها للعين خاف ما يكفي

حطيت آخر واحد ودرت وجهي داك گلبي بهمجيه
بللت شفتي مباوعه عليه بس اجت عيني بعينه وخرت نظري منه ماريد يظن انا متلهفه الشوفته ولا اريد يشوف نظرات الاشتياق بعيونه اله

-الچاي والماي بساع

بلعت ريگي دايره ظهري عليه بينما هوَ گال هيچ بصوت يخرخش باين عليه المرض مدري شبي فلاونزه مدري شني، شتت تفكيري عنه رافعه الصينيّة مطيتها الاطياف بدون ما احچي.
اخذتها مني ونطتها اله ويا ما اخذها اجه غسان
اخذ الصينيّة الچاي وطلعو سويه

ويا ما طلعو انا اخذت القوري الثاني صبيت على العدد واطياف اخذت الصينيّة الثانية البيها ماي ومشت للصالة كملت البيدي وطلعت وراها.. وصلت الهن انطيت جدتي ودايره عليهن كلهن

كملت وگعدت بصف جدتي، ظلن يسولفن شوي ويحچن بمواضيع عادية منا ما جدتي گالت ماشرتلي

شومة: گومي صيحي نرجس خلي تجي

هزيت راسي باي وكمت الغرفة طفوف دكيت الباب ودخلت، باوعت عليهن وسديت الباب وعلى وجهي الابتسامة، هزيت راسي بعجاب هاتفه بخفوت

شرار: شنو هذا الجمال يابه

نرجس: حلوة.؟ شو احس روحي چني سعلوى

طفوف: شبيچ چنچ سعلوى حلوة تخبلين حمرة خفيفه كحله ومسكارة طلعتي تخبلين بعد شكو

نرجس: هيچ دگولن.؟

شرار: تخبلين والله چنچ كمر.. وهسه تعالي جدتي گالت خل تطلع تسلم على النسوان

گلت هيچ وهيَّ رفعت ايدها الگلبها گايله
نرجس: والچن گلبي.. ماگدر اطلع

طفوف: شو دنچبي وطلعي رجاءً

لزمتها من ايدها ودفعتها عليَّ.. بينما سوت هيچ طفوف رأساً فتحت الباب وطلعت ودرت وجهي عليها تمشي على بيض مكسر.. كامن هنا ومشت متقربه منهن سلمت على ام قربة والمرّة الي وياها تصلي على محمد

سلمت منهن وجت گعدت بيني وبين اطياف
ظلن يحچن شوي وندك باب المطبخ درت وجهي مباوعه على الباب بس ماگدر اشوف شي بس الحايط مال المطبخ كامت طفوف الي گعدت لزك باطياف شوي ورجعت باوعت علينا وگالت

طفوف: الولد راح يجي.. وبوي الشيخ يگل گعدوهم بمكان وحدهم يحچون على راحتهم

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

اخذت نفس بعمق مغمضه عيوني رافعه ايدي ثنينهن حاطتهن بوسط حضني وعصر بيهن بتوتر.
خوف... توتر... خجل... ارتباك... كلهن انجمعن بهل لحظة هاي انا نرجس ام السان والساني شطوله
هسه انبلع، والمشكله خايفه اظل اجفص گدام الولد

وهنا اتمنى الگاع تشكني وتبلعني
فتحت عيوني مباوعه على اتجاه الباب فازه من كلامي وتخايل الموقف الفشله الي صارت براسي بلعت ريگي منزله راسي
دخل ودخلت ورا امة وغيم وياهم امي.
عصرت ايدي أكثر بينما منزله راسي ولا رفعته بعد

فاطمة: اخذو راحتكم يمه

هتفت بستهزاء
غيم: ها يمه المن فاتحه الباب.؟

فاطمة: ما يصير يمه

غيم:يمه لا تخليني احچي حاچيه حساسه
لهيچ سدي الباب وخليهم يحچون على راحتهم ويشوفها زين وهيَّ تشوفه

بدي الزم غيم املخها تملخ والچ هوَ انا زين وراح ارفع عيوني وباوعله وكله كم كلمة نوب الباب ينسد يمه گلبي

عليا: عوفن الباب

سمعت صوته لو بطني خبطت ماعرف خجل توتر ماعرف، كل الي اگدر اگول بطني وگلبي ظلن يخبطن چنهن خباطه، بينما افرك بيدي هنه خلن وطلعن عايفات الباب مفتوح

رمشت كذا مرة رافعه نظري مباوعه من جوه حواجبي
اريد اشوف شيسوي.. ويا ما رفعت نظري مباوعه شفته يتقدم يگعد گدامي انا گاعده بالارض ومتچيه ظهري على تاج الجرباية.المسافه البيني وبينه متر تقريباً أو أكثر

تحمحم وهتف بهدوء وصوت حلو
عليا:احم سلام عليكم

بللت شفتي راده بصوت خافت كوه ينسمع زين منه وسمع الرد:- وعليكم السلام

گلت هيچ ورفعت عيني خطف مباوعه عليه.
گاعد متربع وحاط ايد على افخاذه ويفرك بصابعه باصبعه الابهام ويحچي بهدوء ومنزل عيونه على الارض بينما يحچي وانا اعصر بايدي ومركزه بكلامه وساعة اصفن على الكلمة الي يگولها

عليا: ماعرف شنو الحچي الي اگدر احچي هسه لو شنو الموضوع الي افتحه حتى تعرفين الي تردي
لكن شنو الي يدور براسچ وتردين تعرفينا أو تأمرين بالشي التردي انا اگلچ تم بالكدر عليه

سحبت نفس رافعه نظري باوعت عليه وعينه اجت بعيني رأساً غضيت البصري عنه وحچيت كم كلمة
لان اذا احط عيني بعينه كل الحچي الي اريد احچي يتبخر من حلكي.
بلعت ريگي للمرة المليون
همست بصوت ناصي بالكاد ينسمع

نرجس: ماريد منك كم شغله

عليا: بس عليّ صوتچ

نرجس: احم شسمه ماريد منك أي شي بس كم شغله

گلت آخر كلمة مباوعه عليه ابتسم منزل نظرة
للارض راد عليَّ، بينما انا افرك بيدي ورتب الكلام بداخلي حتى احچي بدون تعتعت

عليا: گولي بويه اسمعنچ

نرجس: اخذت زفير شهيق وكلت كلمة بدون وعي
أو توتري خلاني هيچ احچي:- شوف خويه خلـ..

ابتسم مقاطعني وكوه كاتم الضحكه
عليا: اخوچ.؟

نرجس: ها.. اي شسمه أنتَ حاليا مثل اخوي.. انا بعدني مو مرتك

عليا: ان شاءلله تصيرين ان شاءلله

لصمت ماگدرت احچي بعد توترت يبووو..هوَ رجع گال ماشرلي اكمل

عليا: احچي لا تخجلين، احچي اسمعنچ

نرجس: انا ماعندي متطلّبات. الحمدلله ابوي تارس عيني ما محتاجه لا فلوس ولا شي حتى اطلب شي منك يكسر ظهرك، بس هنه كم شغله اريد اشوفك زوج الصالح الي اگدر اعيش ويا حياتي

سكتت بينما هوَ يباوعلي بنظرات ماعرف شلون افسرها بس حلوة.. ابن الوادم ما خلاني اعرف شكمل سكوتي استمر ثواني وگلت ناهيه الموضوع.. اخجل احچي أو كلام طار من راسي

نرجس: هاي هيَّ

عليا: شنو هاي هيَّ.؟

-ماعندي شي احچي هاي هيَّ

گال وهوَ يمسح كصته بالكلننس
بينما انا اسمع كلامه وگلبي يخفك بخجل وطمئنان

عليا: عرفت شنو الي يدور براسچ ماله داعي تخجلين مني ومن متطلّباتچ... تردين شخص صالح يعيشچ حياة سعيدة وهادئة.. هذا شي من حقچ.
وانا احچي الزين بيه والمو زين
وأنتِ يبقى القرار الچ توافقين انا فزت اخذ انسانه مثلچ وذا رفضتي الله يعوض

باوعت عليه ونزلت عيوني بسع
أما هوَ رافع ايده يمسح بكصته للمرة الثانية أو الثالثه أو رابعه.. بينما انا اباوعله هوَ كمل كلامه بعدما سكت ثانية وكمل

عليا: الي گدامچ انسان من طبقة بين الوسطى والفقيرة بس الحمدلله عايشين وناكل احسن أكل ونلبس احسن لبس وشغلنا بالحلال.
المهم انا خريج سادس اعدادي، تركت على مود ابوي محد ويا وشغل الگاع مايگدر عليها وحدة
استلمته انا بداله وهوَ بالمحل ماله بالسوگ يبيع چاي

مرت السنين وگدرت المن وأشتري سيارة وشتغل بيها وسد كم حاجه عن البيت.
والحمدلله كدرنا انعيش حياة هادئة وماكو شي ناقص وحاليا الله رزقنا وبعنا الگاع الاهل ابوي وشترينا بيت وشترينا محل بصف محل ابوي وراح اطبكهن سويه وفتح محل مال ملابس اطفال
وان شاءلله اذا صارت القسمه ما راح اخليچ تحتازين بيوم أو تحسين بالنقص

بلعت ريگ رافعه نظري اله مباوعه عليه كمل كلامه وهوَ يكوم يوكف... عدل قميصه مباوع على باب الغرفة

عليا:وبعد بقى القرار قرارچ، بالرفض أو القبول

سكتت ما راده، حسيت عليه يمشي وهوَ يگول بضحكه هادئة:- في رعاية الله اُختا

فزيت من صفنتي على كرصاتها بيدي.. رفعت ايدي افرك مكان زندي عاقجه وجهي.. عطت بوجها بألم

نرجس: ثول شبيچ تكرصين

شرار: ومرض صارلي ساعة احچي وياچ اگلچ خالة دگول خلي تجي تغسل البسط ويا البنات
مو شلتي ايدچ الخطبه خطبتچ والمفروض أنتِ دکومين تنظفين البيت كله من فوك الي جوه

نرجس: باوعتلها صفح ورجعت نظري على المراية مديت ايدي اخذت المشط.
رديت عليها وانا امشط بشعري: انچبي ماريد اتعب ايدي وراي خطوبه اريد ايدي ناعمه ومو مشككه من الغسل

شرار: روحي گولي الامچ هل شكل حتى تهفچ بنعالها الخضر

نرجس: شبيچ روحي گوليلها خطيه وراها خطوبه ويدها تخرب خطيه.. يله شبيچ شرارو

باوعتلي وهزت راسها طالعه
باوعت وراها مرجعه نظري للمراية صافنه على نفسي
الايام مرت مثل رمشه عين

موافقتي رجعتها ورا جيتهم بثلث ايام
انا قتنعت أو أصلاً مقتنعه بس متخوفه
بس من شفت كلامه وياي تغير الخوف بداله الاطمئنان واراحه لان اول ما شفته صح
نعجبت بشكله.. بس من گعد گدامي وحچه وياي وعيونه ما حطها بعيني الى القليل، گلبي ظل يدك اله

الكل مقتنع بي ومحد معارض
وابوي حيل حبيت كلامه بخصوص عليا.
هم راجع سأل ورا علي وستار ورجع مطمئان ومرتاح من أجوبه العالم بخصوصه، وهل شي حيل ريحني
ما دام ابوي مقتنع بي ومرتاحله ما اهتم الشي بعد وانا وكلت امري لله وهوَ خير مُدبرين

مرت يومين واجه يوم الخميس.. وهل هاي انا مقابيل
المراية الي بغرفة طفوف، بدلتي الورديه وتسريحتي ومكياجي الزادني جمال.
ابتسمت بعجاب رافعه ايدي متلمسه كذلتي حاچيه بصوت مسموع

نرجس: اوووه وين اكو بجمالي چني اوربيه

شرار: چنچ زربه

التفت عليها
نرجس: ما غيرچ الزربه

شرار: عود عروس وهالله هالله

طفوف: عروس من سوگ الجمعة

نرجس: طفوففف لا تصفين أنتِ وياها

طفوف: شرار باعتچ عود هاي بعدها ما تسجلت بسم خطيبها سر بيتها

شرار: وسفه يا خيه وسفه باعتني وهيَّ بعدهي ما صايره بسمه

طفوف: وسفه الايام الكضيناه وسفه

نرجس: أكلن تبن ولن، امي جاي تصيح عليچن
وأنتِ مو حامل واخ وما اخ

شرار: حامل بحلكي لو بطني ههههه.
تعالي طفوف تعالي، عوفيها وحدها منا ما يجون النسوان لو اگلچ من ما يجي ابو حسين

شرار: گلت هيچ وغمزت الطفوف وهيَّ ضحكت واجت يمي لزمت ايدي ومشينى بينما هيَّ وجها احمر تريد تعيط بينا، خطيه اعرف بيها متوتره بس تسوي هيچ حتى تبين طبيعية

طلعنا منها ورحنا نساعد بخالة ام ستار وخالة دانه وباقي نسوان عم ضرار كلهن يم جدتي بغرفتها ونرجس گاعده بغرفة طفوف

طلعنا منها وصارت بوجهنا اطياف ومروة دخلن يمها وحنا رحنا نساعد بخالة خطيه نخبصن..لان البيت نکلب كلاب بالجهال ونسوان الكبار كرايب خالة سعاد وهم نسوان هواي ماعرفهن منو

ظلينا هيچ نحضر ونعزل وخالة دانه كل شوي وگعدتني لا تتحركين بطنچ
وهاي كله تحچي بالخنسه والله ياخالة هوَ يا الي ما عرف كلها تعرف بقت على هذول الوادم خلي تعرف شراح يصير

مر الوقت وكلها اجت قريب وبعيد نص ترسو الصالة ونص بغرفة جدتي واكو يجن ويانه بالمطبخ
وطفوف راحت طلعت نرجس تگعد بالصالة الناس كلها اجت وانا بقيت اساعد بالكدر عليه

شوي ودخل عمي هاشم حچه ويا خالة سعاد.
باوع عليه يحچي وصافنه على هيبته وكشخته يخبل مرتب ونظافه تعط من يمّه ولا يگول رجال شكبره ومشيب وعنده احفاد

هوَ صح جماله مو خارق للطبيعة بس معانيه حلوة والشيب والسمار مالته منطيته جمال ومنا هوَ طويل وجسمه وسط لا سمين ولا ضعيف.. جسمه مرتب وهوَ لبسه كله دشداشات وعگال يطلع يخبل

واليوم طالع كلش حلو وهيبة
بينما صافنه على كلامه اجه ورا ستار وغسان وكفو بصفه بينما كملت خالة كلامها گال غسان

هاشم: الوادم قربت تجي حضرو مايكم

سعاد: كلشي حاضر ما عدنا شي

غسان: يابه ضرار يگول المشيى وصلت براس الديره

هاشم: لم عمامك

گال هيچ وطلعو وانا رأساً باوعت على خالة دانه وگلت بهدوء

شرار: لبسي مستور.؟

دانه: يخبل ومرتب

-يعني ما بي شي ابدله بغير شي.؟

دانه: مادري أنتِ مو عندچ فستان نيلي الي شتريتي بالنيشان ما لابسته هذا اريح ونسبلچ

-يعني البسه.. بس انا ماريد ادخل للبيت خاف ضرار هناك

دانه: مو هنا بالمضيف يم عمامه.. روحي بدلي على السريع وتعالي.. وها المفتاح البيت تلكي جوه دواسه مال المطبخ

هزيت راسي بتردد ومشيت.. البسه لابستها اشتريتها اول امس من رحت ويا نرجس نحجز بدله وصالون
هوَ حلو ومرتب بس ضاكه على صدري وحسه خانگني وانا روحي صايره بخشمي نوب اتحمل شي ضيك

عفتهن وطلعت من بين الجوكه الجهال الترست البيت
ماعرفهم وجوهم غريبه عليَّ
بس جهال بنات اسماعيل همه وجهال ولدهم معروفين لان دائماً يروجون بحديقة عمي هاشم

بينما اباوع عليهم يركضون منا ومنا
ومنا عمام ضرار قسم واكفين برا وقسم گاعدين بالمضيف مريت منهم وسلمت عليهم.
واكف عمران وعلي ابنه. وياسين وعمو هاشم وستار ردو السلام وعفتهم ومشيت للبيت
ويا ما مشيت عمو هاشم صاح وراي.
وكفت ولتفتت مباوعتله وعمام ضرار ولد عمه نظرولي ونزلو عيونهم

هاشم: وين بويه.؟

شرار: راح ابدل ملابسي ورجع

راد يحچي وسمعنى صوت هورنات عافني وما رد
انا عفته ومشيت على سريع ابدل ورجع قبل لا العالم تلتم، دفعت باب البيت ودخلت.. مباوعه على ارجاء المكان متحسره. ما گاعده بيتي ومرتاحه من ورا ضقاق افندي

اتنّدت بقهر وكملت طريقي مباوعه على باب المطبخ مفتوح چا خالة مو گالت المفتاح جوه الدواسه
لو انا سمعت غلط لو هيَّ عايفته مفتوح وناسيه.
يله اسده وياي من اكمل

نزعت حذائي ودخلت امشي مترهيه وعلى كيفي
اريد العالم تدخل للمضيف يله اطلع ماگدر اذا بعدهم بالحديقة، بينما انا احچي ويا روحي دخلت للصالة وعيني اجت على مكان الضربني بي ضرار

انعاد عليه الموقف والي يگول هسه گاعد يضرب بيه وانا اصرخ وتوسل احد يساعدني.. غمضت عيوني قوي طارده ذكرى الأليمه عن بالي
فتحت عيوني مكمله طريقي للغرفة
مباوعه على الغرفة مردوده رد ما مطبوك الباب

دفعته ودخلت مباوعه على ارجاء الغرفة وجفلت بمكاني بالعه ريگي بخوف.
رمشت كذا مرة وگلبي يدك بكل قوته
ماريد اكون ويا بنفس الوقت وحدنا خاف منه خاف يعيد نفس ذاك اليوم... وخوف مو على نفسي لا ابد خوفي على الي بطني خاف يسوي شي وهوَ مايدري بروحه أو حتى لو يدري بروحه

سحبت نفس معدله نفسي ابين انا طبيعية.
بينما هوَ التفت اول ما دخلت مباوع على الباب شافني وعگد حاجبه، ونظراته وتعابير وجها تحچي أنتِ شسوين هنا.. بس قبل لا يتحرك أو يحچي حرف رأساً مشيت فتحت باب كنتوري طلعت الفستان وشال نفس الون وسديت الباب ومشيت طالعه.. جاي اطلع من الغرفة وصاح وراي بعنتكه

ضرار: وين موليه.؟

درت وجهي مباوعه عليه بطرف عيني وما رديت
عفته ومشيت متجها للحمام ابدل بي وطلع رأساً
بس الضاهر هوَ عباله طلعت رأساً طلع وراي معيط بصوت عالي

ضرار: مو احچي وياچ وين موليه

فتحت باب الحمام واشرت على الحمام مباوعه عليه وبدون ما احچي حرف.. درت وجهي ودخلت للحمام بدلت وكملت وطلعت.. مباوعه گدام گاعد على الدرج
باوعتله خطف لابس قميص ابيض وبنطرون كابوي اسود وشعرة مشطه بهمال ونازل على عيونه

من سمع الباب نفتح رأساً رفع راسه مباوع بتجاهي
اجت عينه بعيوني ثواني لا أكثر مباوعه بعيونه شفت بيهن التعب ولألم.. وجها الشاحب وعيونه التراسها سواد داير مدايرها
بلعت ريگي بخوف على وضعه. شاصير بي باقي بس القلايچه، وجها الي چان متفح وخدوده المتفحه هسه بس العظمات والخشم باقي.
فطر گلبي وعلي بس ما بينت ابد اله رأساً وخرت عيني منه ومشيت طالعه من الصالة الخارج البيت

ويا ما طلعت هوَ كام واجه وراي يحچي ويمشي
بينما انا ولا رديت ولا درت وجهي وهوَ بده يعصب وصوته بده يعله

ضرار: اوكفي... هييي مو احچي وياچ اوكفي وين طالعه بهذا لبسچ ومنا الوادم… حيواننننه ليش تغلسين مو احچي وياچ وين طالعه بهذا لبســـــــــچ

وكفت باب المطبخ ولتفتت عليه راده بحدة وغيض
شرار: شكووو گلي شكو..؟
وذا طلعت هيچ أنتَ منوو، مو ما يهمك وجوديي مو ما تريدنيي بعد شكوو.؟

ضرار: مكرنننن انا ها مكرن اخليچ طلعين بهذا لبسچ

شرار: يا عيني جاي اگلك أنتَ شكو..؟
مالك علاقه بيه خوش... اطلع هيچ ما اطلع انا حره مالك علاقه بيه.. أنتَ انسانه ماتريدها بعد شكو تحاسب اطلع هيچ

ضرار: وچ مكــــــــــرن اخليچ طلعين بهذا لبس گدام خلق الله... گليلي شفتي عندي كرون واخليچ طلعين هيچ

شرار: ههههههههه عليش تصيح.. مو انا الي نجبرت عليها مو انــــــــا الي تكرهه تشوف وجهااا
مووو انا الي تريد طلكهــــــــا، بعد شكو تحاسب اطلع هيچ لو ما اطلع.. مالك علاقه بيه.. عليك بروحك

گلت هيچ ورفع ايده رأساً غمضت عيوني رافعه ايدي حاميه وجهي وايد حاميه بطني بيها.
بينما سويت هيچ ما سمعت صوت ولا حسيت على ضربه معقولة كمت ما احس بالضرب.
وخرت ايدي عن وجهي فاتحه عيوني على كيف
باوعتله يباوعلي ورافع تك ايد مكورها بالهوى
باوعت بعيونه وگلت

شرار: اي ما تضرب شمتاني اضرب.
تعودت على ضرب جديدة عليَّ
فيصل يضرب أنتَ تضرب عادي... عادي
تتقبل شرار تنضرب تنهـــــــان تتعير عادي كلش عادي

كملت وضرب ايده بالحايط الاستقبال عايط ما راد على كلامي.

ضرار: گتلچ ما طلعين هيچ

باوعت عليه ساحبه نفس بتعب وقهر بلعت ريگي وهتفت بتعب وكلام كوه يطلع من حنجرتي

شرار: ليوين توصل... ليا حد توصل... شتريد مني.؟
لا أنتَ الي معيشني بسدك... ولا أنتَ الي معتكفني تعبت ارحم بيه، ارحمو من في الارض يرحمكم من في السماء.. ارحمني الله يرحمك

كملت آخر كلمة وطاحت دمعه شارده من عيني نازله الارض بدون ما تلامس خدي.. بينما هوَ ساكت ملتزم الصمت، شافني كملت ودموعي نزلت
مباوع على عيوني وگال بخفوت وكوه گدرت اسمع كلامه

ضرار: تعبان راسي ومعدتي... راسي يوجعني ومعدتي تحرك بيه... واحد يحچي براسي... ماعرف شنو هوَ ماعرف

حچه والغصه تارسه بلعومه... ما تحملت كلامه
نزلت دموعي أكثر ويا كل كلمة يگولها
صح السوى بيه مو قليل بس انا اعرف مو بوعيه بس انا ارفض اتقبل هوَ مو بوعيه
كلامه وضربه الي يكسر گلبي.. حتى لو رجع نفس قبل
يظل گلبي يوجعني منه

زفرت نفس بقوة ماسحه دموعي
رافعه نظري اله.. بللت شفتي عاضتها بنفس الوقت
باوعت بعيونه ثواني وگلت بينما هوَ يفرك بمكان معدته

شرار: وهسه شتريد مني.؟

ضرار: ظلي هنا لا طلعين بهذا لبسچ

شرار: اريد اطلع ختنگت النفس كمت كوه اجره

ضرار: اي اطلعي انا هم ماريدچ بس لا طلعين بهذا لبسچ

ابتسمت باستهزاء هازة راسي بقهر وألم.
اخ يا وجع گلبي اخ.. رديت عليه بتنهّيده اريد اخلص منه لان بس اظل يمّه راح طيح ما اتحمل بعد

شرار: خوش روح جيب عباية خالة ولبسها وطلع

ضرار: چذابه تردين طلعين

شرار: ضرار تعبانه مالي خلك احچي روح جيبها ونطلع سوى خوش

ضرار: تعالي وياي

باوعت عليه بصبر مشيت گدامه وهوَ وراي
دخلت رحت اخذت عباية من خانه خالة ولبستها وطلعت وهوَ بعده واكف باب الهول
سديت الباب الغرفة وطلعت عبرت من يمّه وهوَ وراي طلعت من المطبخ وهوَ سد الباب ورجع المفتاح جوه الدواسه

وانا مشيت گدامه وهوَ وراي.. طلعنا من البيت
باوعت على الحديقة اشخاص واكفين غريبين ماعرفهم وجهال تروج.. مشى گدامي ضرار وانا ورا
سلم على كم واحد وترخص منهم مكملين طريقنا

وصلني يم المطبخ مال بيت عمي هاشم وظل واكف
صعدت ويا ما صعدت صاح وراي بصوت أو بهمس

ضرار: صدگ حامل.؟

التفتت مباوعتله بصفنه بلعت ريگي خاف اگله اي ويگلي ذبي، أو اخاف اگله لا ويعيط بوجهي
بللت شفتي بعد صفنه طالت دقيقه أو أكثر.

شرار: اي

صفن بوجهي چنه ابو صابر.. صعدت تفاحة ادم يعلن ان بالعه ريگه.. ما رد عليَّ ولا گال شي عافني ودار وجها ماشي بتجاه المضيف
متت قهر وردت ابچي لو ما سمعت صوت خالة دانه وراي تصيح بسمي.. التفت عليها مباوعه عليها واكفه باب المطبخ وتباوعلي بقهر.. باين سمعت كلامنا

بلعت ريگي وكملت طريقي داخله للمطبخ
تعديت منها بدون ما ارد على كلامها مباوعه على الموجودين بالمطبخ البنات الشابات ينقلن بكاسات الماي ويرجعن.. وجهت كلامي الخالة زكيه

شرار: عقدو.؟

زكيه: هسه اجه غسان گال المعرس راح يجي هوَ والسيد يعقدون.. وحنا ودينا نرجس بغرفة ابوچ هاشم يعقدون

هزيت راسي بها وابتسمت بوجها وكملت طريقي داخله الصالة باوع للنسوان فوكه فوكه.. رأساً عبرت من بين النسوان وصعدت على الدرج
گعدت على الباية الاخيره واباوع على النسوان يركصن وامة وخواته وياهن بنات يركصن بالنص ويهوسن... أما نرجس ماكو نفس ما گالت عمه طببنها البنات على هاي الصفنه وسمعت صوت خالة دانه تصيح

دانه: احتشمن بناتنا السيد والمعرس راح يدخلون.

كمت من مكاني بينما البنات الشابات تسترن.. وانا مديت راسي مباوعه من الدرج.. دخل عمي هاشم ويا عمو عمران والعريس والسيد وياهم رجال اول مرة اشوفه.. اتوقع يعود الهل العريس

مشو دخلو الغرفة عمي هاشم. والنسوان انخمدن محد طلعت صوت حتى السيد يعقد الهم.
رجعت المكاني گاعده ولمحتني قربة واجت عليَّ هيَّ وغيم... كمت الهن سلمت عليهن وباركت الهن وگعدن يمي گالت قربة وهيَّ تباوع العيوني

قربة: شبيچ باچيه.؟

مسحت دموعي على كيف لا تسيل الكحله راده بينما غيم تباوع عليَّ وعلى اختها

شرار: بعدين احچيلچ، هسه التهي بالخطوبه

قربة: احچي شبيچ.؟

شرار: شي مو قوي والله وانا احچيلچ

هزت راسها ساكته.. ظلت تحچي وياي وتسولف هيَّ وغيم منا ما ضحكني.. مر الوقت ونفتح الباب وطلع الرجال الاول مرة اشوفه ورا السيد وابوي الشيخ وعمو عمران هلهلت خالت البنات وغيم وياها
نكلب البيت بالهلهل

طلعو الزلم وطلعو نرجس هيَّ والولد مگعدينهم على الكراسي نزلن البنات يمهم وانا ظليت بمكاني مالي خلك انزل وشاركهم.
روحي صارت بخشمي، بينما نزلن البنات طلعت خالة من غرفة طفوف بيدها علبتين
فتحت العلبة حمرة ونطتها الولد ولبسها الحلقة وهيَّ ترجف هاي نجيرس النجره ام السان صايره زوربه وبس تتارجف

صفنت عليهم طالعين يخبلون.. واحد لايك الثاني
ونوب هوَ انكس من نرجس وجها يكت عرك كوه لبسها الحلقة أما هيَّ انكس منه يگول منتوله.
اذا ما الزمها عليها اكوم وگعد اصيح عليها ام نتله

تمت الخطوبة على خير وكصصو الكيك وشربها وخواته بوسها ولا تخاف من امها.. خطيه خالة سعاد تباوع ودموعها بعينها.. هوَ باسها من كصتها وطلع يم الزلم

بس طلع البنات راحن جابن الكيك والعصير يوزعن
وانا اخذت ماعوني وقوطيتي ورجعت الدرج.
اما البنات انخبصن خبص خطيه.. وزعن وكملن وناسهم مو هواي بس اكلو الكيك والعصير واجوهم گالو يله نمشي

طلعو وبقو بس ناسنا.. نزلت بيدي الماعون والعصير
والكيكى أكلتها طكتني الجوعه وكلتها كلها.
مشيت متجهه الاطياف اخذت ماعون من ايدها لان بيدها ثنين اخذته ونطيتها الماعون الفارغ

-ابني يريد ماعون ثاني.. مو انا

اطياف: اجيبلچ بعد

-بعلي تسوين فضل

-هسه اجيب

مشت ورحت يم نرجس گومت بتول اخت اطياف وطفوف، گعدت يمها مباوعه عليَّ وگالت

نرجس: وينچ ادور عليچ ماكو.. ليش ما اجيتي يمي

أكلت قطعة كيكة وهتفت بهدوء وعيني على الماعون
ماريد اباوع بعيونها، بس اباوع ابچي
عندي رغبه مال بچيه وصرخه تهز البيت هز

شرار: ختنگت من النسوان ظليت گاعده على الدرج

نرجس: ليش شبيچ.؟

-لا ما بيه شي.. اي عوفچ مني شلونه شعورج
لو شصار من عقتو

نرجس: التوتر أكلني أكل كوة رديت الموافقة

-يو نسيت اگلچ الف مبروك.. الف مبروك حبيبتي سبع سعادات ان شاءلله

نرجس:شكراً حبيبتي

ظليت يمها شوي وخلصت الماعون.. انفجعت على الأكل، ويا ما كملته اجت اطياف بيدها ماعون وبي قطعتين، ابتسمت بوجها وخذت منها الماعون وشكرتها ومشت صاحت امها عليها

أكلت لكمه وخذت بالشوكه شوي وقربتها يم حلكها مأشره بعيوني تاكل.. رفعت ايدها غطت فمها وأكلت الكيكة

شرار: اجيبلچ ماعون.؟

نرجس: لا اريد الحصه الجبيرة.. وعلي اذا أكلتو من الكيكة الچبيرة اموتكم

شرار: ذكرتيني تخلي اكوم أكل منها ابني من شافها اشتهاه، وانا گتله هاي الكيكة مال خالتك ما يصير گالي لو هاي الكيكة لو ماريد.
يعني تقبلين ابني يظل بحسره الكيكة

نرجس: خرا عليچ وعلى ابنچ.. عوفي الكيكة وعلي اموتچ وچ روحي صارت بيها لو ما فشله من خطيبي ولنسوان چان اخذت الشوكه وطك اطيرها نصها