يفرك بمكان گلبه ويحچي كوه هنا انا كمت ارجف اريد اسيطر على نفسي ماگدر جدي راح يصير بي شي دخيلك ربي كلشي ولا تفجعني.
عمي طارق والد عمه تخبلو ماعرفو شيسونو
بعدهم يحچون وياه هوَ غمض عيونه قوي خاره روحه طايح بالارض

اتخبلنا العالم التمت على صواتنا
ظليت ارجف ماعرف شسوي. اريد امشي وياهم وهمه ما لحكو يحطو بالسيارة مال جوارينا ومشو بي
ظليت واكف بالشارع ابچي والعالم تباوعلي
محد بقى وياي كلها مشت ويا جدي.
رجعت البيت اهلي ويا ما رجعت لكيت امي واكفه بالباب اول ما شافتني سألتني رأساً ويا ما هتفت عگدت حواجبها بخوف

هدية: شكو..؟ هاي شبيك يمه

نزلت دموعي ذاب نفسي بحضنها.
ظليت احچيلها وشهك وكوه يطلع صوتي.
على صوتي وصوت امي طلعت طيبة وراها مطلب البعده على صخونته من ذاك اليوم الهل يوم

ذو الفقار: يمه يمه ما ماتو ابو ابو فوزي وفوزي

شهكت موخره ايدها من ظهري داكه على وجها
هدية: صخام صخمك والطمك طالب.. صخام صخمك الله ينتقم منك

ذو الفقار: يمه... يمه... جدي... جدي اتخربط مادري شبي... شبي لزم گلبه وكوه يحچي... بس لا لا يصير شي بي

وخرتني منها حانيه نفسها ولو تقريباً شوي وصل الها
هزت راسه بخوف گايله

هدية: شبي ماعرفت شبي.!؟

ذو الفقار: ماخلوني اروح وياهم.. يمه جدي گلبه ظل يوجعه وتخرط وطاح.

باوعت عليَّ وجرتني الحضنها تمسح على راسي
بدون ما تحچي... ظلو يتسألون طيبة ومطلب وامي ترد عليهم بكلمة كلمتين... دخلنا جوه ظلينا گاعدي بالهول اقرب شي على باب الشارع

گاعدين نترقب الاخبار بدون ما نحط لكمة بحلكنا
امي كامت تريد تسوي النا ريوك بس محد راد خلت ورجعت گعدت يمنه لامتنه الحضنها تريد تحمينه من شي ماعرف شنو هوَ.

ظلينا على هل حالة بالساعة وندك بابنا بصورة همجيه
باوعت النا امي واحنا كذلك.. نظراتها متروسه خوف علينا مو على نفسها.. يا تُرى امي تفكر بطالب يسوي النا شي.؟ لو صاير وياها شي وما حاچيه
بلعت ريگ وكمت من يمهم هي رأساً باوعتلي وهتفت بخوف ممزوج بامر

هدية: وين اگعد لا تتحرك من مكانك

ذو الفقار: يمه خلي اشوف ياهوَ، خاف واحد من اهلنا يطمنه على جدي

هدية: اگعد انا اكوم ظل يم اخوتك

-يمه.!

هدية: اگعد يم اخوتك بعد امك اشوفن ورجع

ظليت ساكت وهيَّ كامت اخذت الحجاب وطلعت
مشيت وهمه ثنينهم كامو واجو وراي.
وكفنا باب الهول ونباوع على امي.. فتحت الباب وصارت ورا مدري شحچت واجه صوته البأكي

- عمه عمي صاحب يگول جيبي ملابس السود وتعالو البيت جدي

رجف گلبي مباوع على امي، وامي باوعت النا وفتحت الباب على نص وظهرلي عباس ابن عمي طالب دموعه تجري وحاله حال... رأساً امي ردت عليه وانا طفرت يمهم اباوعله مترقب كلام الراح يحچي

هدية: شصاير عمه ليش تبچي.؟

عباس: جدي جــدي مات

وكفت الدنيا بيه لحظات.. ما مستوعب السمعته
جدي انا مات.؟ البارحة انا گاعد بسده ويناقش ابوي وخوته على طلابه... چذب... چذب ما ميت
رمشت كذا مرة مباوع على امي الرفعت ايدها تكمم فمهم، بينما انا فاقد ماگدر احچي بس اسمع صوت مطلب وطيبة يبچون
هزيت راسي بعدم استيعاب گايل وانا اعبر من بينه طالع الشارع

ذو الفقار: لا... لا جدي ما... مايموت اي ما... مايموت

حچيت هيچ وانا امشي ثواني وبدل المشي ركضت البيت جدي... اريد اشوف بعيني ما جاي استوعب ماكو جدي بعد.. قريب وصلت للبيت وشوف العالم كلها ملتمه على البيت مال جدي

صوت البچي...الصراخ...وعياط عماتي التارس السلف
هنا وكفت متصنم...ماعرف حتى شنو احچي
ماكو كلام الي يوصف جدي..جدي مو مثل الجداد..هذا ابوي مو جدي ولا ابوي الثاني
هذا الرباني والتعب عليَّ، هذا السماء العاليه هذا المهيوب بكلامه وطوله.. شحچي بحق ويكفي عنه.

احچي بداخلي وانا اتقرب من بيت جدي
تخطيت العالم الي ملتمه... وعبرت منهم صارت سيارة حاطين فوكها تابوت.. انا شفت التابوت واجت صورته گدام عيني، هذا ياخذك مني..؟ هذا الخشب ياخذ خير الزلم... مو أي زلمه أنتَ وعلي مو أي زلمه

خطيت خطوات بطئ للامام.. وكفت گدام السيارة وعمامي يفتحون بالحبال العلى التابوت يردون ينزلو
اباوع الهم ودموعي بدت تنزل وحدة ورا وحدة.

نلزو بالارض وعمامي ولد عموم ابوي التمو على التابوت، تقربت منهم داحس روحي بين ابوي وابوي من شافني وهوَ يرفع راسه سوالي مجال وصرت گدام التابوت حطيت راسي على التابوت وحچيت وياه ودموعي تنزل عشرة عشرة

ذو الفقار: اتذكر مرة گتلي الرجال ما ينزل ادموعه الى يفقد غالييّه... هاك شوفني، شوف دموعي الي دگلي غاليات عليك شوف تارسات وجهي..كوم بويه كوم أنتَ ابوي والله ابوي

رفعت راسي مباوع على ابوي وحچي مفرفح اريد اتنفس ماگدر الغصة ترست بلعومي:- بويه حاچي گله يكوم... شو ما يسمعني، شني زعلان عليَّ!!؟
لو انا مسوي شي ومادري
فدوة بويه حاچي ما اتحمل والله ماتحمل فراكه بوووويه

صرخت بآخر كلمة داك على التابوت وكملت عياطي بينما اعيط ابوي يلزم بيه يريد يحضني:- هااا بويه عبيـــــد يهون عليك اعيط وما تسمعني، شني زعلان مني.؟گلي شمسوي گلي مسوي شي غلط وانا مادري كوم گلي انا زعلان منك... وانا شتامر اسوي
بس كوم لا تعوفني بويه.. ماتحمل فراكك وداعتك ما اتحمل

ذو الفقار: بوووويه حاچي... حاچي گله يكوم
گله ذو الفقار شبلك يگلك كوم... بويه شني زعلان مني وما يحاچيني ليش يابه انا شسويت
حاچي يله حاچي گله يكوم احچي ويا شبلك

نزلت ادموعي ويا ما باوعت على ابوي وانا ادك على التابوت..رجعت هتفت واهز راسي وباوع على التابوت

ذو الفقار: اسف يابه اسف عيطت اسف اعذرني انا عطت سموحه بويه...مو قصدي اعيط بس أنتَ ماترد عليَّ، ليش ها ليش... انا مو ابنك وشبلك.
مو دگلي أنتَ ابني الرابع هسه شني الختلف يابه

احچي وتوسل وماكو فأده.. بينما احچي ودك على التابوت، البقية يبچون زغير وچبير يبچي عليه
هذا حنين السلف.. هذا ابو الوجهه الحنين ابو كلمة الطيبة، بلعت ريگ بصعوبه من گال عمي طارق وهوَ يباوع على ابوي

طارق: شيلو دخلو للنسوان يودعنا

كلهم كامو وانا كمت وياهم امشي وراهم وحچي بداخلي.. امده الموت الياخذك، امده الموت الياخذ مثلك... امدااااه الياخذك يابه، احچي وعيط وبس شفافي تتحرك.. دخلو للاستقبال حطو بالنص وعماتي وباقي الكرايب كلهن نامن على التابوت ويتصارخن

طلعو عمامي وانا ظليت واكف باب الاستقبال والنسوان طب جوه.. اباوع الهم وبچي على بواچي عماتي ماعرف منهن يا التعيط وياهيَّ التعاتب.
ماگدرت اميز راسي اتبنج، كل الي يفتر بي راح جدي مني ماعندي جد بعد اتباهه بي

ظلو مخلي بربع ساعة.. وصاحو يله انا سمعت هيچ لو تخبلت، اباوع على التابوت وعلى عمامي الواكفين باب الساحه بچيت اي بچيت مثل الطفل الخذو منه شي عزيز على گلبه، انا الموت اخذ مني حبيبي وابوي

دخلو شالو التابوت وبده الصارخ يعله وخرت من باب الاستقبال ماشي طالع من البيت البستان الي ملتمه العالم بي وكفت بالباب متانيهم يطلعون اروح وياهم

بس خابت امالي من ما خلو ولا واحد منهم غير عمامي ابوي وعمي طارق ولد عم ابوي
صعدو التابوت على السيارة شدو وركبو وحركو السيارة وانا ظليت امشي وراهم اريد اصعد وياهم روحي تريد تمشي وياهم

ظلينا نمشي ورا ونصيح الشهاده ورا منا ما طلعو الشارع العام.. الكل رجع للبيت نسوان وزلم
مارجعت وياهم بوجهي رحت الشط.. الچان جدي الي يگعد بسده من يتعب ويحس بالهم وضيم الدنيا التمت عليه

رايحله انا بس ماهوَ گاعد هناك.
وصلت الجرف الشط مباوع على النخله المكطوعه الي يگعد عليها.. بس هاي المتانيتني ماهوَ عزيز عيني اخذا الموت عني

مشيت گعدت على الجذع رافع ايدي متلمس المكان الي يگعد عليه.. تلمسه ونزلت دموعي شاهك بدون صوت بينما احرك اصابع ايدي على الجذع وعاتب بي لعلى يسمع عتابي

ذو الفقار: مچانك خالي عزيزي
اجيتك هل مسيه ماهوَ هنا يابه.. الك گلب تعوف شبلك وحيد، بعد بمنو احتمي بظله.
ياهوَ الاجي وشكي همومي اله، رحت عني
ما شبعت منك وداعتك بگلبي ما شبعت منك

ظليت على هل حال بالربع ساعة احچي وعاتب بي بس ماكو فايده لا حس ولا نفس.. غمضت عيوني بعدما كامت تبزني النخله بقوة.
ظليت مغمض ثواني وفتحتها بعدما سمعت صوت وراي.. درت وجهي مباوع على تجاه الصوت رافع ايدي ماسح عيوني ومبعد نظري عنه.. اجه وهوَ يحچي متقري عليَّ

مطلب: ذو الفقار هاي أنتَ هنا وانا ما خليت مكان ما ادور عليك بي

غمضت عيوني ماراد عليه مالي طاقه احچي حرف
احس النفس كوه على نفسي اجره مو نوب احچي
فتحت عيوني من حسيت عليه يگعد بصفي مو بمكان جدي لا بصفي.. باوعت عليه عيونه مورمه والدموع يابسه على خدوده.

اخذ نفس زافره من فمه وعيونه تلالي الدموع بيها
اتقرب حط راسه على كتفي حاچي بخنگه بينما انا استمع الكلامه وحابس دموعي كوه بينما كمل كلامه حچيت بخوف وستفسار

مطلب: امي منهاره أصلاً عمه اقبال ظلت تشوخر وتخربطت

ذو الفقار: وين هسه وشلونها

-ما بيها شي هبط ضغطها

سحبت نفس هامس بصعوبه.. بينما هوَ وخر راسه عن كتفي حاچي وهوَ يباوع على تجاه البيت

ذو الفقار: نصبو چادر..؟

مطلب: اي جدي ابو سالم توكل بهل شغله وهسه العالم ترست الچادر ترس

عضيت باطن شفتي حاچي
ذو الفقار: بعد اخوك روح جيب دشداشه مابيه حيل امشي البيتنا

هز راسه كايم مني.. مشى وانا ظليت گاعد مكاني
اتذكر سوالفة وياي.. وكل ما اتذكر كلمة منه تنزل دمعه حاره تجوي خدودي

ظليت هيچ بالدقايق وسمعت صوت مطلب يصيح عليَّ كمت باوعت عليه واكف على التل وبيده ملابس
سحبت نفس طويل كايم من الجذع.. مشيت الى امشي بطئ وكفت گدامه اخذتهن منه ومشيت وهوَ بصفي

دخلت الصحيات البرا بدلت وغسلت وجهي
كملت ولفيت الشطفه على وجهي.. رغم عمري الصغير بس بنيتي ضغمه على عمي طارق.. وطويل رغم كل عمري 12سنه.. بس الي يشوفني بالـ15

كملت وطلعت باوعت على مطلب منتظرني بالباب باوعلي بترقب بينما هوَ يباوعلي درت وجهي عنه ماشي خطواتي الچادر

ظليت طول الفاتحه روحي كوه شايلها
ماگدر اتحرك لو احچي، بس اوكف من لا چاره بالچادر ويا ابوي وعمي طارق.. والي خلاني افكر طول ايام الفاتحه أو مو بس انا لا كل السلف وابوي وعمام ابوي على اختفاء طالب

ابوه الميت وما يحظر فاتحته ثلث ايام.؟
الي خلاني انا وامي وعمتي اقبال نفكر ونخاف اي نخاف على اهلنا من هذا الشيطان
الحرم عائلتين من اعز ناسها.اهل فوزي خسرو ابوهم وخوهم من ورا طالب ومانعرف ليش سوى هيچ.
شنو العداوة الي بينه وبينهم
ولو همه ناس دره مالت الله مالهم حس بالسلف

من اصفن شلون بفعل واحد راحو ثلاثه من واحد عديم الضمير... اناني... طماع... خبيث.
اي هوَ هل شكل قبل لا اعرف بي هوَ ويا النظام

من يوم يومة خبيث وطماع وابو وجهين
چنت انا الوحيد من يحچي ويسولف اعرفه چذاب وحچيه كله تسفيط... بس ماحچي يبقى عمي وچبير عيب مني اتعارك وياه، بس هسه ورا هاي فعلته بان وجهه عمي الحقيقي

سحبت نفس طويل مباوع على ابوي يحچي ويا عمي طارق على مود باجر... نتسوك أكل السبعه
كمل كلامه ابوي وگال ماشر عليَّ وعينه على عمي

صاحب: اخذ وياك ذو الفقار

هز راسه عمي ساكت مشى وانا مشيت ورا
رحنا السوك تسوكنا كلشي واجرنا سيارة ورجعنا للبيت مر اليوم واجه ثاني يوم #كثر يوم مشئوم بحياتي اتمنيت ولو مرة منيتي تتحقق اول ما اتمناها. لكن ما راح يجي هذا اليوم

ظليت اساعد الطباخين بالمواد والثرم الخضروات ظلينا نفتر طول اليوم بدون وكفه العالم هواي تجي وجبه وتروح وجبه تجي.. منا ما اجه وقت العشى وصبينه الأكل وكملنا وابوي صاح عليَّ
انطيت آخر صينيّة المطلب يوديها النسوان وانا رحت لابوي..وكفت گدامه معدل الجفيه على راسي

-ها يابه

صاحب:اخذ صينيّة أكل الامك واختك للبيت

-ليش هن وين غير بيت جدي.؟

صاحب:لا امك توها راحت هيَّ وختك لان تخرطت ومنا صوت نسوان ونعي.

هزيت راسي بخوش وعفته.
اخذت صينيّة فارغة عبيت الهن تمن وحطيت بصفه خبز ومرك ولحم..كملته من كلشي وشلته
ومشيت البيتنا امشي وعيني على السماء مغوربة وخيوط الشمس باقي اطرافها بالسماء

سحبت نفس بساع بساع مر الوقت وصار الى سبوع مفارك داره..اسبوع عيني ما شافت عيونه ولا إذني سمعت كلماته، تنهّدت بخنگه مركز بطريقي لا اعثر بطابوكه وتتبده النعمه قربت على شارعنا وشوف دخان تارس السماء

وصوت اصراخ.. گلبي نخمش ورجلي صارت خيوط
اسرعت بركضاتي اريد اشوف هاي الدخان منين لانها قوية مو مال نار عادية.. وصلت قريب البيتنا وكفت عن المشي طايحه الصينيّة من ايدي متبديه النعمه بالارض

رجف جسمي بصورة سريعة طالع صوت من داخلي لا هوَ شهكات لا انين... اريد تعيني رجلي اروح اركض ماگدر دقايق انا على وكفتي وسمع اصراخن رج طبلة إذني

بس فوك صدمتي هاي اشوف آخر انسان يطلع من باب بيتنا وهوَ يعدل الشطفه على وجها.. منو.؟
هه هه طالب أي طالب هه هه عيني ما تصدگ الشوفه هه منو هذا.؟ طالب عمي ماغيره... لا لا عيني تچذب

بين عدم استيعابي عيني تتحرك ويا شلون يعدل بالثام على وجها وسيارة گدامه رأساً صعد بيها وشخطت السيارة ماگدرت اتحرك الى من تحركت السيارة

ركضت اتعثر بركضي... اريد تعيني رجلي وركض
اريد اوصل الهن... صراخن ترس إذني.
بالف ياعلي وصلت للبيت. دخلت دافع الباب بقوة
دخلت وصار بوجهي منظر عمري ما انساه.
امي مثل الطير المذبوح يتاركضن هيَّ واختي بنص البيت والنار مشتعله بيهن وبأركان البيت.

انفاسي انكطعت، دكات گلبي اختفت
كل ظني هاي هيَّ روحي فاركت جسمي
لكن للاسف روحي صلفة واكفه مچتفه اريد اخطي خطوة اطفي نار الي تاكلهن ماگدر منا ما شفت طيبة تركض الداخل البيت وامي تهومش بيدها تريد طفي روحها

شفتها اريد اروح الها وامي من حلات روحا تركض هيچ وهيچ... الله يحبها وامي شار بطانية على الحايط جريتها وركضت عليها اريد الزمها ماگدر مفرفحه لا اگدر احچي حرف حتى تثبت الساني انعگد

بصعوبه يله گدرت اشمر عليها البطانية ويا ما شمرت عليها البطانية طاحت على وجها ركضت عليها ناسي صراخ طيبة التارس البيت.. گعدت على رگبي لاف البطانية عليها وطفي بيها بصعوبه يله گدرت اطفيها

ويا ما طفيتها درت وجهي على الدخان التراس الاستقبال والحديقه المشتعل الارضية من يم الاستقبال رأساً كمت دخلت للبيت اريد الحك اختي قبل لا اخسرها.. ويا ما دخلت بين المطبخ والغرف مالتنا اشوفها طايحه بالحماك الي بصف غرفة ابوي

ركضت عليها صايرة عباره عن شي بفرگع ومنفوخ
وكله ماي.. وطايحه لا حس ولا خبر بارضية الحمام
دخلت للحمام ماعرف منين الزمها من ايدها اذا الزمها تجي بيدي لو من راسها الي ما باقي شي بي لا شعر لا ماعني منين الزمها اختي... اختي متشوها ومرمه

كوه گدرت امد ايدي اشيلها.. شلتها بثنين اديه على
گلبي طلعت من الصالة وصارت بوجهي نار داخله الصالة باوعت وراي راح توصل المطبخ وطك الدبه

ركضت على السريع ويا ما ركضت طالع من باب احس شي طاح على ظهري.. ما هتميت ما عاونت اطلع بيها
ويا ما طلعت صارو اهلي كلهم بوجهي

انا شفت ابوي شايل امي وملفلفها بالبطانية ويركض بيها، ركضت ورا اريد ياخذهن لا يصير بيهن شي
قبل لا اطلع انشمر شي عليَّ وعلى طيبة هيزار
ظل يسوحل گدامي ما مهتم الى.

طلعت من البيت ورا ابوي ويا ما انا اركض احس على احد يركض وراي مدري ياهوَ من وكفت يم السيارة الدخل ابوي امي بيها حسيت على شخص يضرب بظهري بقوة بس ما هتميت

رأساً وخرت منه مصعد طيبة بالسيارة الثانية
دخلت حاطها بحضني عايف الباب مفتوح.. لحظات وتحركت السيارة
ويا ما تحركت حچيت وانا الفلف الهيزار بيها وباوع الوجها المورم وضايع معاني وجها

ذو الفقار: امشي امشي بساع امي اختي امي

احچي ورجف وانا اباوع عليها.. ما بلساني غير امشي بساع راح تموت.. اختي لا حس ولا نفس ما شوفها تتنفس، لا ربي فدوة روحلك كلشي ولا امي واختي فدوة اروحلك كلشي ولا امي واختي... ما.. ما تحمل وعزتك ما اتحمل

احچي ورجف اريد اسيطر على نفسي ماگدر
حتى ياهوَ الموجود بسيارة ماعرف وياهوَ الي يحچي وياي ماعرف.. صرت مسودن ماسمع ولا اشوف غير النار التاكلهن.. من عسى أكلتني قبلچن

مسافه مو طويله وصلنا بس عني انا دهر يله وصلنا
بس وصلنا فتح الباب واحد من ولد عم ابوي اخذها مني وركض بيها وانا ركضت ورا داخل وراهم
احچي ورجف وتوسل بالدكاترة

ذو الفقار: اختي وامي فدوة لا تخلوهن يموتن فدوة اروحلكم

احچي واشر عليها من حطوها بالسديه
اخذوها يركضون بيها انا امش وراهم.. امشي وصار ابوي گدامي هوَ وعمي طارق... باوعت عليه وهتفت واباوع على باب الغرفة

ذو الفقار: امي يابه امي وينها.؟
ما بيه شي مو.!؟ گول ما بيها شي.

ظل ساكت رافع ايدي مغطي وجها.. بينما احچي اجه عمي طارق حضني ويحچي يهدئ بيه بس انا شيهدئ مني امي تفتر گدامي والنار ماكلتها أكل هيَّ واختي

طارق: كافي عمي هسه يطلعون ويخبرونه كافي بعد عمك

ذو الفقار: امي نار تاكل بيها هيَّ واختي.. تركض وتصرخ متالمه.. گدام عيني تحترك عمي گدام عيني

ظليت على هل حال بالساعة انا مثل المخبل افتر بدون ما ةگعد وردد نار تاكل بيهن
ومحد وصلي بعدما عطت بيهم بدون وعي.
ساعة ضبط وطلعو الدكتور ركضت عليه اتوسل بي يحچي. سحب نفس راد باسف

-البقية بحياتكم البنيه توفت والمرّة گاعد ينضفون بيها وبقت عد الله ادعوله

توقفت الدنيا عن الحركه... لحظات... ساعات أو سنين
وكفت الدنيا بعيني اريد احچي وعيط اگول اختي ماتموت الصبح توصيني احط الها كشمش ويا التمن الصبح اگلها تمرين...لو انا المساع احچي وياها
شلون تموت وتعوفني... لا چذب يﺟذبون عليَّ
اختي ماتموت... لا... لا ماتموت

مثل المسودن اتخبلت اريد ادخل الها ما خلاني عمي دفعته عني داخل الغرفة مثل المخبل.. دخلت وكفت بمكاني مباوع عليها مغطين وجها
رحت عليها موخره عنها لا تختنك ثولان همه.
وخرته عنها مباوع عليها نايمه بس مو طيبتي ام وجهه الحلو.. هاي مو اختي بقايه اختي

مشيت اخطي خطوة ورجعت خطوة.. وكفت گدام السديه متقرب منها لازم ايدها المنفوخه بس لزمته طك جلدها بيدي نازل الماي.. رأساً عايفها مباوع على وجها حاچي بخوف

ذوالفقار:اذيتچ اسف... اسف والله مادري اسف خويه عذريني اذيتج... اسف... هسه اصيح الدكتور
ولو هوَ اثول يگول اختك مات.. ههههه شني أنتِ تعوفين اخوچ... لا... لا مو طيبة هاي

احچي خويه... ررردي عليَّ طيبة
ليش ساكته ها، انت اعرف بيچ ما تحچين هواي بس انا اذيتچ هاي شوفي ايدچ طك الجرح وأنتِ
ما صرختي بوجهي، گومي بعد اخوچ عيطي بوجهي يله أنتِ اختي الچبيرة وما ازعل اذا صرختي بوجهي

طارق: بويه ذو الفقار حرام تسوي هيچ

درت وجهي مباوع عليه ورجعت نظري عليها راد
ذو الفقار: شمسوي عمي شمسوي انا جاي احچي وياها بس ما ترد عليَّ، ليش ما ترد ها.!؟
حاچيها أنتَ هلبت تستحي منك وترد... اي... اي هيَّ تستحي منك وراح تحاچيني

طارق: لا حوله ولا قوة الا بالله إنا لله وإنا إليه راجعون

باوعت عليه راد بعتب
ذو الفقار: ليش تحچي هيچ عمي ليش تفاول
گول الله يكومها بسلامه

تقرب مني مبعدني عنها وتقرب رافع الهيزار مغطي وجها تخبلت وخرته عنها موخر الهيزار عنها: تريدددد تخنكهاااا وخر عنها وخر

طارق: بويه گول يالله حرام تسوي هيچ

ذو الفقار: ليش حــــــــرام هاي اختي شلون تتنفس اذا تغطي وجها، گلي مو خطيه تكطع النفس عليها

ظل يبچي وكتافه تهتز..
ذو الفقار:ليش تبچي عمي لا تبچي اطلع برا عوف طيبة خطيه خاف جاي تتوجع وما تريد تحچي تستحي من يمنه

دار وجها مباوع على الباب واكف ابوي مغطي عيونه وبس كاتفه تهتز.. ويحچي ويا وحچيت ويا عمي بنفس الوقت

طارق: سوي شي

ذو الفقار: يابه حتى أنتَ، ليش تبچي اسكتو رحمه والديكم

كملت كلامي واجه عليَّ اخذني الحضنه وظل يبچي ويشهك صفنت ووجهي بصدرة.. ماريد استوعب ماريد اصدگ هاي هيَّ طيبة راحت.
هتفت بهدوء غريب استغربت من روحي

ذو الفقار: يابه طيبة نايمه لو ماتت.؟

كملت كلامي وبچه وخرت عنه مباوع على طيبة
تقربت منها لازم ايدها المنفوخه وصايره حمرة بين السواد هزيت راسي ودموع مچلبه بهدابي

ذو الفقار: هاي هيَّ خلصت ايامچ.؟
هاي هيَّ ماكو حسچ بدارنا... لا... لا ينطيچ گلبچ تعوفين اخوتچ..؟ مو أنتِ تگولين انا اظل طول عمري وياكم ما اعوفكم... شصار هسه... شو چنچ مستعجله على موت.

اعرف بيج تسمعيني.. حلوة بعينچ هذا حالي.
حلوة خويه حلــــــــوة... حـــلوة تشوفيني اصرخ عليچ وما دگولين ها... ولـــــــك بـــــــويه عبيدد
تعال شوف شبلك شحالةةةة
گلييي ملك الموت حالف ياخذ عزاززز
گلبييي ربيييي واحد ورا ثاني جاي تاخذهم مني.
ليش ربي ليشششش ذولي عزاززز روحي

فاضل: استغفربك وخر عن البت حرام خلي ياخذونها

ذو الفقار: شياخذون ما شبعـــــــت منها
ما شميت عطرهااا... شياخذون عمـــــــي هاي الوحيدة عدييي تروح هيچ من ايدي... بأي ذنب تروح من ايدي گلـ..

قطع صراخي صوت الممرضه باوعنه عليها گايله بستعجال

الممرضه: منو ذو الفقار المريضة تريده على السريع

باوعت على ابوي وعمي ومشيت على السريع طالعين من الغرفة.. اسرعت بمشي وهيَّ كذلك.. دخلنا للغرفة البصف غرفة طيبة.. دخلت وعساني لا شفت
امي حبيبتي ما مبين منها شي ملفلفه تلفلف من الجدم الراس، تقربت عليها..انينها تارس الغرفة

وكفت گدام السديه وهيَّ من حست عليَّ گالت بصوت كوه يطلع من حنجرتها وتأتأت تأتأ
بينما عيني على شفتها وعيونها الي شفتها ماكو بس شي مفتوح

هدية: ذو ذو الفــقار

ذو الفقار: ها يمه ها يبعد حيلي لا تحچين لا تعبين نفسچ

هدية: ذو الفقار انــا انــــــا مما ما محركت روحي انا ما حركت روحي.. هذا هذا طا طـالب.
هوَ هوَ حركنا هوَ يمه صدگني
گلي الــي يننــــدك بببــ بطالب يااا ياخذ نصيبه
انا مـ ما ما حركت روحي..هوَ حركني گول الابـوك انا انا بريئة ما حركت روحي

حجت آخر كلمة بشهكه.. بينما هيَّ تحچي وانا اتذكر شلون طلع من البيت ملثم ردت احچي وصار صوت بالغرفة باوعت على الممرضه وهيَّ اجت باوعت على الجهاز ودارت وجها طالعه تركض برا
گلبي ظل يخفك عين على الباب الي دخل منه ابوي ويا ما دخل دخلو ورا الدكاترة اجو ركض على امي

بعدوني عنها ومدري شيسون.. ماگدر اشوف شيسون
لا اگدر احچي بس اباوع مصدوم من السمعته
نسيت طالب وطلعه من بيتنه.. يعني حرك امي واختي هوَ،عيني ما تچذب الشافته..؟
بين صفنتي فزيت مباوع على الدكتور من گال هيچ وباوعت على امي مغطايه وجها.

الدكتور: البقية بحياتكم

ضربتين على الراس توجع.. وضربتي مو مثل كل ضربه ضربه...

-ذو الفقار ذوووو الفقار كوم شبيك.!

فتحت عيوني مباوع عليه وعلى الغرفة بنظرات تتفحص المكان:- وينها.؟

-ياهيَّ.؟

ذو الفقار: امي وينها

صفن عليَّ ثواني بالع ريگه هامس بهدوء
مطلب: كوم ذو الفقار كوم اصحه چنك متحلم

باوعت عليه متذكر انا شچنت احلم.. نفس الحلم من ذاك اليوم الحد الان.. رفعت نفسي گاعد على مقعدي فارك وجهي بقوة بينما گعدت هوَ گال.
وخرت ايدي مباوع عليه ياخذ خاولي من الزاويه

مطلب: اليوم هنا شعجب مو يم مرتك.

باوعت عليه رافع ايدي حاك مؤخره راسي بينما هتفت هيچ هوَ دار وجهي مباوعلي مصدوم

ذو الفقار: عرفت انا صاحي

مطلب: چذاب

ذو الفقار: ليش اچذب البارحة من رجعنا انا وياك امي عيدة مو شوفت عينك ظلت تحچي وياي
وهي سامعه كلامنه انا وياها.. وهيَّ تخبلت صح ما عاطت ولا شي بس تريد تطلك.
وانا خايف منها تحچي ويوصل الحچي الطالب وتعال يخرب الاول وتالي

مطلب: ما حچيت وياها..؟

ذو الفقار: ما تنطي مجال طلكني ما طلكني
ردت افهمها كلشي بس ما انطتني مجال گلت خليها تهدئة وحچي وياها.. وراح تعذرني

مطلب: ما دكوم تحچي وياها قبل لا تگعد وتروح تحچي الابوي وتروح بيها

هزيت راسي بخوش.. وخرت الهيزار عني كايم مطكطك عظامي وانا امشي طالع.
طلع وراي مطلب هوَ راح الحمام وانا للغرفة.
سحبت نفس ومديت ايدي فاتح الباب
دخلت مباوع على ارجاء الغرفة باستغراب وين راحت بس لا نزلت

رأساً باوعت على مطلب الي ظال واكف باب الحمام هز راسه بها.. رأساً هتفت وانا امشي بخطوات سريعة الدرج

-ماكو

مطلب: ولا تگعد زيتونه

ما رديت عليه رأساً نزلت على السريع
توقفت باية الدرج الاخيرة مباوع عليهم.
گاعد ابوي وامي وحدهم باوعت على اركان البيت مرجع نظري على امي اباوع عليها بترقب
نزلت بهدوء بينما همه ولا واحد رفع راسه وباوعلي وهل شي طماني يعني ماعرف ابوي

بلعت ريك طالع مباوعه على المطبخ فارغ.. عگدت حاجبي طالع برا وبالتحديد الصحيات دكيت الباب ماكو.. وين راحت من الصبح

مسحت وجهي بتك ايد راجع ادراجي
دخلت للبيت ردت اصعد فوك اجاني صوته.
درت وجهي مباوع عليه وعلى امي بالع ريگ مستغرب كلامه

صاحب: لا دور

ظليت اباوع عليه بدون ما احچي بينما باوعلي وهوَ يرتشف من الستكان.. شرب منه ونزله گايل برود فضيع

صاحب: اخذ راحتك ابني حبيبي لا تتقيد

هزيت راسي بدون ما احچي أما هوَ ضحك بستهزاء راد عليَّ وهوَ يباوع على امي ويرجع النظر اليه

صاحب: عرفنا ماكو داعي تمثل وتعب نفسك ابني الغالي

بلعت ريگ مباوع على الفوك
ذو الفقار: منو گلك قربة.؟

كملت كلامي وانا اصعد بايتين بسرعة وهوَ هتف موقفني صاحب: اي صدگ على طاري قربة بح راحت

باوعت عليه عاگد حواجبي باستغراب شني بح
هزيت راسي راد بعدك فهم: شني بح.!؟

عيدة: راحت

ذو الفقار: اي خليها ترتاح شكم يوم وانا اروح اجيبها

صاحب: اي عود روح جيبيها

ذو الفقار: شني يعني مافهمت ليش تحچي هيچ يابه.؟

صاحب: يا ابني، بس تكمل خطتك العظيمة يا ابني العظيم تروح المحكمه تحظر جلسه الطلاكم.

يتبع.

37

غلطان اليحب عالشكل ميدوم كلشي بمظهرة، عطر البخور البلعراس نفس العطر بالمكبرة

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

.
.
.
.

غيــــم: عليا شوكت تاخذني

عليا: باجر بس اخلص العندي

غيم: يومية باجر، صارلي اسبوع اگلك اخذني الها
شو ماكو نتصل عليها ماكو مختفيه

عاف المشط البيده راد بنزعاج
عليا: غيم ليش تلحين بابا، گتلچ باحر اخذچ
وانا امس حچيت ويا مطلب وگال تلفونها عطلان بعد شكو

غيم: اي ميخالف اخذني هسه وياك ومن ترجع من المحل تعال مرلي

خزرني بنفاذ صبر بينما خزرني شمر المشط على المخسله راد موخر مني:- باجر گتلچ وسدي الموضوع

ما رديت عليه ظليت ابحلق بوجها
داور وجها ماشي يريد يطلع.
صارلي اسبوع الح عليه اخذني من السبعة مال عمي كريم الحد هسه، وهوَ ماكو يومية باجر
وامي ما حچايه الها خاف تقلق عليها وهيَّ هم تسأل شو ماكو

درت وجهي داخله جوه لازم امشي اشوفها ما معقولة تلفونها عطلان حتى لو عطلان ما تخابر علينا من عمتها لو من مطلب

باوعت على امي وحچي ويا روحي
ابوعلها دخلت للمطبخ بيدها صينيّة مال مخضر
شافتني واكفه باب المطبخ گالت وهيَّ تحط الصينيّة على السنك

فاطمة: بدال صفنتچ تعالي عاونيني على الفطور

باوعت على صينيّة راده عليها وانا ارفع نظري مباوعه على باب الصالة

غيم: اريد اروح القربة

فاطمة: بعدين... نروح انا وياچ، للسوگ نشتري مسواك رمضان ونمر على وردة اخذ الدشداشات الخيطتهن الچن ونمر على قربة نشوفها ونطيها الدشداشة

غيم: يمه بعد وين الرمضان.. انا انتظر هاي الايام وماروح الها

فاطمة: چا مو تحچين وياها شني يومية رايحتلها اگعدي وسكتي گتلچ نمشي انا وياچ

غيم: رديت بهدوء ماريد اقلقها.
بينما انا الوج خاف ما تقبل:- تلفونها عطلان
وانا مشتاقى الها، صارلي اسبوعين ما شايفتها خليني اروح ربع ساعة ورجع. وهم اگول لابوي هوَ ياخذني ما امشي وحدي... حبابه يمه بس ربع ساعة ورجع

ردت باستغراب، بينما انا كوه لزكته.. ولو انا ليش خايفه يعني مثلاً شكو حتى ماريدها تقلق خلي تعرف وتجي وياي

غيم: مادري عليا يگول سال مطلب وگايل موبايلها عطلان، وانا بالي يمها اريد اروح اشوفها
أنتِ شوفت عينچ شلون من اجتنا تشكي من خمول جسمها..خاف رايحه لدكتورة ولا سامح الله بيها شي وما تحچي النا

فاطمة: خليها بليل انروح انا وياچ انسير عليهم هسه ماگدر امشي مو تشوفين جاي اسوي فطور وهم مالي حيل صايمة وريچي يابس.
وشو وياچ اخذي موبايلي وخابري على ام ذو الفقار بله احچي وياها

غيم: هسه تخلي احچي ويا ابوي هلبت ياخذني وعود أنتِ وعليا امشو بليل

فاطمة: بعد عنتكتي الى تولين

غيم: حبابه يوم والله بسع ارجع ما اتاخر

كوه قنعتها يله قبلت نوب وراي ابوي هسه مدري يقبل لا، عفتها ومشيت للصالة باوعت عليه گاعد يباوع على بالتلفون ويمّه ستكان چاي.وكفت يم الباب حاچيه بهدوء

غيم: يابه "دار وجها عليها هاز راسه معنى ها وكملت كلامي" ما تمشي وياي البيت عيال قربة.
اريد اشوفها صارلها سبوعين ماكو
ويگول حماها تلفونها عطلان وهيَّ من اجتنا شفتها أنتَ شلون مريضة. وخاف بيها شي وما تريد نعرف بس اخذني ربع ساعة ونرجع

-يله بسع قبل لا تغورب الدنيا

هزيت راسي ومشيت للغرفة على السريع
لبس صايتي ولفيت شالي وطلعت واحچي
ويا ما احچي امشي متقربه الوسط الصالة

غيم: يله يابه كملت

كام طلع گدامي وانا ورا باوع على امي وگال وهوَ يكمل طريقة:- رايحين شوي ونجي

طلعت البس حفايتي لبستها وباوعت على روحي بمراية الشباك... توب اخبل
حتى بشواربي الخضر فديتني وعلي
بيه جمال يخبل، ورجوله رجال ما شايلها

قطع كلامي ابوي وهوَ يطلع مشى گدامي
فتح الباب وظل واكف طلعت انا وهوَ وراي طلع وسد الباب ظلينا نمشي ونحچي بأشياء عادية منا ما وصلنا الفرع مالهم باوع على فرعهم وبتحديد بابهم.
گدامه سيارة مطلب

شفتها ونرسمت على شفتي ابتسامة متذكرى الهدية الگال عليها.. فدوة اهلي ما جابولي وهوَ ذكرني.
بس وينها شو الهسه ما وداها النا چنه غلس مدري غلس لان غالي ونوب مُديله هسه يكصبون بي مصب

احچي ويا روحي وتقربنا من بيتهم..
وكفنا گدام الباب دكه ابوي شوي وجانه صوت مدري ياهوَ مطلب مدري عمو شو صوتهم صاير يتشابه.
رد عليهم ابوي ويا ما رد فتحو وصار بوجهنا عمو صاحب

ابتسم بوجهنا وهلا ومرحب.. فتح الباب على نص مأشر النا ندخل.. دخلنا بينما احنا ندخل ابوي يسلم عليه بس بالكلام لان الصبح واحد يم الثاني
أنما انا سلمت عليه من بعيد.. بعدها اشر النا ندخل انا رأساً هتفت

غيم: عمو صيح النا قربة بس انشوفها

صاحب: ادخلي يابه جوه تشوفوها وانتم واكفين ادخلو انظيفكم اول

باوعت على ابوي اشر اليه امشي.. مشينا سويه همه دخلو للاستقبال وانا دكيت باب المطبخ وباوعت على المطبخ فارغ، محد بي رجعت دكيته مرة ثانية من دكيته يله سمعت صوت خطوات وكلام خالة عيدة

عيدة: ياهوَ.؟

گالت هيچ وشافتني.. باوعتلي بنظرات غريبة سرعان ما تبدلت نظراتها وابتسمت بوجهي گايله بترحيب

عيدة: يا هلا ومرحبا منو اليوم منور دارنا.

دخلت متقربه منه وهيَّ كذلك.. باوستها وخرت منها مباوعه على باب الصالة مرجعه نظرب الها بينما انا اباوع وهيَّ تحچي وتشرلي ادخل

عيدة: ادخلي يمه المن واكفه ادخلي

دخلت ومشيت گعدت وهيَّ مشت واكفه يم الدرج صايحه:- هاجررر تعالي يمه

بينما انا اباوع عليها ودور بعيوني على اختي
گالت هيچ واجت يمي گعدت گدامي وهتفت بهدوء وعينها على الدرج وعين عليه

عيدة: شلونچ يمه اهلچ شلونهم ابوچ امچ اخوچ

غيم: كلهم زينين.. وهاي اجيت انا وابوي نشوف قربة بالنا يمها صارلها ايام نخابر عليها ماكو.. وعليا سأل مطلب گايل اله عطلان جهازها

مطلب: هاي يا الذكر اسمي

باوعت على تجاه الدرج نزل مطلب عرفته من خشمة
ابتسمت بهدوء ونزلت نظري مباوعه بالفراغ

غيم: سلام عليكم شلونك اخويه ان شاءلله بخير

كملت آخر كلمة ورفعت نظري اله ابتسم بوجهي راد عليَّ وهوَ ينتﺟي على المحجر ويباوع على امة وعليَّ

مطلب: وعليكم.. الحمدلله بخير أنتِ شلونچ الاهل شلونهم... شعجب اليوم يمنه

غيم:اجيت اشوف قربة.. اندك عليها ماكو وعليا سألك گايله موبايلها عطلان

باوعلي وباوع على امة... أما انا احچي وعيني عليهم
ماعرف شلون افسر وضعهم.
ردت احچي مرة ثانية ونزلت هاجر كمت الها وهيَّ اجت سلمت عليَّ رجعت نظري على مطلب بعدها مباوعه على الدرج معقولة ما سمعت صوتي وما نزلت معقوله بيها شي.؟

بلعت ريگي مرجعه نظري الخالة عيدة وهتفت بهدوء والقلق تارس روحي:- صيحولي قربة اريد اشوفها ورجع امي عفتها وحدة وهيَّ صايمة

كملت كلامي ودرت وجهي مباوعه على مطلب يحچي وهوَ يگعد على الدرج، باوعت عليه مركزة بكلامه
شجاي يحچي

مطلب: شوفي اخت مرت اخي.. هيَّ سالفة انعرفت وبعد مالها الزوم تنظم لـ..

قطعت كلامه وگلبي يدك سريع شصاير ليش هيچ يحچي شصاير بيها.. بلعت ريگ بصعوبة حاچيه باستغراب ممزوج بخوف

غيم: شبيها قربة شــشصاير وياها..؟

رفع ايده حك فوك لحيته مباوع على امة نوب اليه حاچي بهدوء بينما يحچي ويطمني بنبرة صوته

مطلب: ما بيها شي زيتونه الحمدلله.. بس هيَّ مو هنا راحت

صفنت عليه ما مفتهمه شيحچي
جاي يشاقى وياي لو شبي، هزيت راسي بعدم فهم طول ما احچي وياه انا واكفه من كمت سلمت على هاجر ما گعدت بعد

غيم: العفو مافهمت شي.؟ شني يعني مو هنا وين راحت.

مطلب: السالفة طويله بس راح اختصرلچ
أو ادخلچ بالمفيد، اختچ عرفت بخوي مو مريض خلت وراحت مدري وين وهسه اخوي الغالي يدور عليها ماكو

-هههههه شجاي تحچي..؟

عيدة: احچي عدل مطلب فهم البت عدل

مطلب: يا اخت مرت اخي، اختچ هجت من هل بيت لان عرفت اخوي صاحي مو مريض وهاي المده كلها يچذب عليها. ومن عرفت ثاني يوم گعد الصبح ما لكاها، ونسأل ابوي يابه وين البت
يگول بخير، لان يا اخت مرت اخي هوَ الي ماخذها مدري وين وين موديها، خوش
وهسه ماريد منچ غير شي واحد..ماريد تحچين شي لاهلچ غير هيَّ زينه والحمدلله
وصبري النا منا للجمعة،وبعدها بكيفچ ترحين تنطين الاخبار للشرقية هم ميخالف بس صبري النا منا للجمعة

مصدومة ماعرف شحچي طكيتها صفنه معدلة
شني صاحي؟ شني هاي المده كلها يچذب؟
شگاعد يصير اختي وين!؟.
بعد صفنه دامت دقايق وهتفت كره وباوع من واحد الواحد بعدني بصدمتي

غيم: ما جاي استوعب شني الي حچيته
شني صاحي شني هجت، اختي وين وشبيها

كام وهتف
مطلب: غيم ركزي وياي خوش.
ذو الفقار ما بي شي لا بي حالة نفسيه ولا شي نفس ماعرفتو خوش، اخوي ادعى هوَ مريض نفسي بي توحد لو نگول بعقله خلل

بس كلشي چذب بچذب، ليش وشلون بعدين تعرفين لان كلشي ما ينظم.. واختچ من عرفت ما افتهمت من ذو الفقار شني السالفة خلت وهجت وين وبيا گاع
مانعرف والي يعرف بس ابوي

وابوي ما يقبل يحچي هيَّ وين.
لذلك بس المهله تخلص ذو الفقار راح يرجعها وعد الحر دين.. وأنتِ بعد اخيـ...
شسمه ما اوصيچ لا تحچين الاحد انتظري مني خبر لو عليمن هيَّ راح تطش السالفة بساع بس لا تحچين شي

غيم: وذا اختي ما رجعت..؟ احنا شنسوي

مطلب: ترجع وين تروح قابل

ردت احچي وسمعت صوت ابوي.
باوعت على مطلب وخالة عيدة من باوعت عليها كامت واكفه تباوعلي بترقب بينما مطلب سمع صوت ابوي رجع هتف

مطلب: ما اوصيچ لا تحچين اخت مرت اخي

هزيت راسي بدون وعي، مصدومة ما جاي يدخل عقلي منا اختي ومنا الانسان الي ظنينا مريض عقليا طلع صاحي بلعت ريگي وخطيت خطواتي طالعه وهمه يمشون وراي بدون ما يحچون حرف.

باوعت على ابوي مباوعلي وباوع وراي يدور بوجوهم
غيم: بابا تسلم عليك قربة دگول اعذرني ماگدر اطلع تعبانه

باوعلي وابتسم بخفوت مادري شك أو عبالة ماتريد تشوفه، سلمنه عليهم وطلعنا بس شني انا راسي يطك خماس بسداس، مصدومة شلون عنده عقل وقدرة ظال طول عمره متنكر بقناع المرض.

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

ذو الفقــار: حبيبي ابو علي تعال وياي محتاجك

مطلب: شسوي جاي، ترا ابوي كوه لازم روحه بعلي

ذو الفقار: مطلب تعال وياي ماگدر اسوي الشغله وحدي

مطلب: خابر فياض خلي يجي لو يوديلك عبدالله

فركت وجهي مباوعله بنفاذ صبر
هتفت بهدوء مصبر نفسي ماريد اعيط.
حچيت ويا كلمة وقربت نفسي منه رافع ايدي ثنينهن لازم وجها ومقرب راسه الوجهي

ذو الفقار: مطلب بس هل مرة اريدك أنتَ وياي ماحتاج ولا واحد منكم.. بس تروح الطالب تنطي الاوراق الي رادهن منك بخصوص القضيه.
وشتسوي هنا تفتح مايك بجاهزك، وبس من يكمل تخلي وترجع وبعد هاي هيَّ شيل ايدك من كلشي

مطلب: وابوي.؟

ذو الفقار: انا احچي وياه مالك علاقة.
وهم هوَ شمدري شو راح تطلع بالعشرة اذا حچه انا افهمنه

مطلب: ذو الفقار ترا امي عيدة ما گالت اله اخوك هيچ سوا باختي ولا گالت اله يشتغل بهل شغل.
شلون من اطلع ما راح يشك

ذو الفقار ابتسمت بهدوء مطبطب بايد وحدة على خده رديت عليه بعدما طبطبت على خده وخرت ايدي ثنينهن:- ابوك مو غشيم حتى ما شاك
هو اكو أنه ورا سالفة... لان مامعقولة
ما يفكر ليش ابنه يسوي هيچ بدون سبب
طبعاً اكو سبب.. بس ماحچت النا امي شگالت اله. المهم هسه اتوكل وانا اصفي الامور وراك

بلع ريگ راد عليَّ وهوَ يباوع على الباب مرجع نظرة اليه بينما احنا واكفين مقابيل الباب مال غرفتي

مطلب: اخابر عبدالله يجي وياي خاف يصير شي لو يشك بيه.

ذو الفقار: لا عوف عبدالله والبقية كلهم طلعتهم من قاموس الشغله بعد.. وأنتَ يجيك الدور بس هل يومين وهل ليلة، انظرني منا للجمعة وينتهي كلشي بس ادعي الله تمر هل الايام بدون عرقله

هز راسه ساكت بينما انا اباوع بعيونه ادري بي ما خايف بس خايف على ابوي وعليَّ.
بس بعد وصلت الحافه الهاوية نوب اتراجع
ابتسمت بوجها رافع ايدي مطبطب على زنده بخفه

ذو الفقار: لو ما مجبور فلا اخليك تمد ايدك بهل شغل بس مجبور وداعتك عندي

مطلب: ما تنجب بعد عيوني ورموشي

ضحكت وهوَ يباوع مبتسم على ضحكتي
مطلب: تدري مرتين شفتك تضحك مرة سمعت صوت ضحكك وانا جاي من الكهوة وهسه.والضحكه انا وياك نفس الشي بس انا خشمي چنه بطيخه مفروش وأنتَ مسحوب

رفعت ايدي لزمت خشمة جاره ضاحك راد بضحكه
ذو الفقار: اتعود منا وغاد ضحكي يرجع نفس قبل
وعلى الخشم أنتَ خشمك مملوح هههههه

مطلب: يرادله بهارات شويه ويصير توب ههههههه

ذو الفقار: هههه ديله كافي وروح ولي هم يله توصل

مطلب: خوش بس وينهن الوراق.؟

رديت عليه متجه للكنتور: ثواني
فتحت الكنتور واخذتهن من فوك الصندوگ الاحديد القديم، اخذتهن ومديت ايدي الباب ردت اسده وجاني صوته باوعت عليه اجه يمي.. مباوعه على الصندوگ

مطلب: تگدر تفتحه اشوف الي بداخله.

رديت بهدوء وشتاحتني الذكريات
ذو الفقار: خليها مو هسه من ينوخذ ثارها نگعد احنا الاثنين انشوف كلشي

مطلب: خلي نروح هناك يمها نفتحه.. هيچ يعني من ناخذ حقها ن؟ عد يمهن ونسولف الهن شلون ما سكتنه عن حقهن ها شدگول.؟

ذو الفقار: ان شاءلله.. اخذ حقها وروح اشوفها

سحبت نفس ويا آخر كلمة مباوعله مكمل كلامي بتنهّيده:-يله اخذهن وروح وانا نازل وراك

اخذهن مني ودار وجها.. سديت الباب الكنتور أما هوَ طلع وطلعت ورا... نزلنا وباوعت على الموجدين گاعده امي عيدة وابوي وهاجر وياهم

ابتسمت بوجهم واكف ورا مطلب.. باوع النا ابوي وهز راسه موجهه كلامه المطلب بينما بس كمل كلمته انا سبقت مطلب گايل

صاحب: وين مولي.؟

ذو الفقار: امانه... يودي امانه ويرجع

صاحب: امانتيش بهل ليل.؟

مطلب: يابه امانه اوديها الفياض ورجع وهم محتاج كم شغله من برا اجيب وياي.. گلولي انتم محتاحين شي أنتِ هاجر اجيبلچ وياي حبشكلات.

ردت عليه امي وهاجر بنفس الوقت بينما ابوي يباوعلي ويباعله بنظرات مال واحد يگول كاشفكم بعدت نظري عنه مباوع على هاجر وامي

عيدة: سلامتك حبيبي
هاجر: جيبلي وياك نستله نبر وان وعصير رانيا

اشرلها على عيونه وخله ونزل.. بينما انا اترخص منهم صاعد لا يحچي شي حضرت الولد وتعال شلون تفلت من يمّه رجعت الغرفتي.. دخلت وسديت الباب طفيت الضوء ومشيت متجهه الجرباية.
انطرحت على ظهري مباوع على السكف والتفكير بده ينهش راسي

طول الاسبوعين الفاتن انا راسي شابش بين المصيبة قربان وبين خريان طالب.. ماگدر حتى افكر بيها وشلون راح اخلي ابوي يدليني هيَّ وينها
وهم شلون اقنعها تشيل فكره الطلاك من راسها سحبت نفس داير وجهي مباوع على مكانها.
ثلث اسابيع مفتقد وجودها بحياتي.

رجعت راسي اللامام، ظليت التفكير ياخذني ويجيبني منا ما مر الوقت مدري شگ
رفعت نظري باوع على ساعة، ساعة بـ12 الى ربع
شصار عليه صارله بالساعتين وينه
بينما جاي افكر بي سمعت صوت باب الحوش ينسد
رأساً كمت..طلعت مباوع على الدرج ويا ما باوعت ظهر گدامي، باوعت على وجها بترقب هاز راسي معنى ها.. ابتسم بوجهي وهتف وهوَ يمد ايده الجيب البنطرون رافع موبايله يلوح بي بالهوى

مطلب: تصعب على ابو علي لا بعلي

ضحكت رايح يمه رديت عليه وانا اهز راسي بستفسار
ذو الفقار: لا وداعتك ما تصعب.. اي گلي حچه شي.؟

ابتسم بوجهي راد عليه وهو يمشي بتجاه غرفتي
مشيت ويا دخلنا وهو كمل كلامه وانه سديت الباب

مطلب: تعال نحچي بغرفتك.. تدري ذو الفقار اكو شي مستغرب منه

رديت عليه وانا اگعد بالكاع يم الكنتور.هوَ اجه يمي گعد متربع بصفي:- شنو هوَ.؟

مطلب: طالب معقولة ثاق بيه.!؟
شمدريك ما هوَ جاي يخطط يطيحنا بالفخ مو احنا.

ابتسمت بوجها
ذو الفقار: لا ما يخطط... أنتَ ويا من الزغر.
لو بالجديد، لي راح يلعب لعبته ويطيحك أنتَ
وهم لو انا مثلك صاحي وريد اجي اكون وياه راح يطيحني انا،ليش.؟ چيف يعرف بيه من الزغر تربايت ابوه وما امشي بشور الغمان.. لو امشي ويا الباطل

مطلب: ماعرف أو مانعرف شني الي يدور براس طويلب، هذا شيطان يا خويه.
وانا من دخلت ويا وداعتك لا خوفئًا على نفسي ولا شي الموت واحد. وشلون اموت بيها الله وياي
بس كل خوفي خاف يلعب على امي وهاجر
ولو هوَ راد يتخلص منها بس ربك ستر

ذو الفقار: لا تذكرني ترا انا كوه مصبر نفسي ما
اروح اتهور وحركه حرك

مطلب: على طاري الحرك نسيت اگلك غير عباس راجع من تركيا

-شوگت؟

مطلب: اليوم الصبح.. هسه گلي طالب ولو تشوف طالب ميت فرح برجعته

ابتسمت بستهزاء
ذو الفقار: ما راح يظل ياخذله يوم يومين ويرجع منين ما اجه، عباس وعرفه مو مثل ابوه يكرهه ابوه

مطلب: بس طالب يموت عليه

ذو الفقار: طبعاً يموت عليه اذا بس هوَ عنده وعلى اربع بنات والبنات كلهن متزوجات وما باقيه الى ولا وحدة

مطلب: امي دگول يا الي تزوج ما ترجع الاهلها بس سكنه ما تحچي خاف يتشمتون بيها.
بس عمتي اقبال تسولف الامي وامي گالتها مرة گدامي

ذو الفقار: نار التاكلهم كلهم وتبرد گلبي.
وهسه عوفكم منهم، طاريهم يسويلي جالي
راويني التسجيل بله

هز راسه فاتح الرمز.. ظل يبحوش شويه وداس على فيديو نصاه شوي ورفعه المستوى إذنه مخلي بيني وبينه... ورا شوي اجه صوت مطلب يهلي ويمرحم ومطلب هتف بقرف

مطلب: ايع وعلي من احچي هيچ اريد اتقيأ بس شسوي

-اسكت خلي اسمع

سكت وبديت اركز بالحوار البينهم
مطلب: هاي الاوراق مثل ما ردتهن اخذتهن من يمّه بدون ماحد يحس

طالب: بعد عمك نجر والله اعرفك راح تسويها بس افكر واگول مطلب هوَ اليحلها اليه

مطلب: يم عيناك عمي الغالي.. بس ما گلت شراح تسوي وياه... هسه اكيد من يعرف الاوراق الصكوك عندك راح يتخبل

طالب: توصل هديته قبل لا يعرف

مطلب: شلون مافهمت.؟

طالب: ههههه شبيك ابني ما تعرف سوالفنا
اوديله عزرائيل يقبض روحه ونقرا عليه الفاتحه

مطلب: ياهوَ قصدك قاهر.!؟

طالب: اي... ينطي نيشان بالكصه والله وياه
واحنا الما ينطينا الشغله بالسياسة نعرف نتصرف وياه

مطلب: ههههه والله ولا تخيلتك هيچ

طالب: شلون يعني ولك

مطلب: يعني ما تهاب احد تجيبها اله نيشان ترس بالجبهه

طالب: هههههههه عود هاي أنتَ صارلك سنين وياي
وماتعرف عمك مسطرهم تسطر

ذو الفقار: حمه.. ما ذبيت عليه ماي شوي

مطلب: لك كوه مصبر نفسي احچي وياه
بالف يا علي سحبت روحي منه

سد الفيديو راد عليه
ذو الفقار: وهاي قبط السجل.

مطلب: شلون راح تشتكي عليه.
يعني خاف تشتكي عليه وقاهر يطفر

ذو الفقار: لا قبلها ادزك تتاكد طالب بيا مكان وانا وياك
وأنتَ تخبر على قاهر نسرسحه
وانا استلم طالب عندي كم كلمة وياه بعدها انطي الشرطة تشوف احسابهم

مطلب: اها خوش... انا عبالي أنتَ الي تكتل طالب

ذو الفقار: لا شسالفة. انا صح دخلت روحي بقاع نكس بس ما الطخ ايدي بالدم نوب يا دم.
دم انكس خلق الله، وهسه اريدك ترسلي الفيديو للحاسبه وبعدها احذفه منك ماريد اي شي بجهازك اريدك تطلع منها مثل الشعره من العجين

هز راسه بخوش.. اخذت منه الفيديو
وحذفت العنده.. كملت كلشي وكام ماشي يريد يطلع قبل لا يطلع وكف بالباب باوعلي وهتف

مطلب: اليوم اجو نسابتك.. واختها رادت تشوف مرتك سولفت الها المختصر... وأنتَ لا تظل ساكت احچي ويا ابوي خلي البت ترجع الاهلها لا يصير بيها شي ونبتلي

ذو الفقار: ليش ترجع الاهلها...انا مرتي وريدها وبس تخلص السالفة هاي اصفي حياتي

مطلب: ماظن ابوي ناوي على خير چنه باله غير حچي وسوالف

ذو الفقار: مثل شني.؟

بوز شفته رافع كتافه
مطلب: أنتَ سمعت باذنك گلك بس تكمل خطتك العظيمة تروح للمحكمه تحظر جلسه الطلاكك

رديت عليه وانا اكوم ماشي الجرباية
ذو الفقار: سابع المستحيلات اطلك... هوَ انا توسلت بامي توسل تحط الفكره براس ابوي حتى اتزوجها نوب اطلكها عشم بليس بالجنة.

مطلب: يعني أنتَ الي محا٠ي امي مو ابوي الخاطب من كيفه.؟

ذو الفقار: اي انا

مطلب: ومنين تعرفها... حتى محاچي امي

ابتسمت متذكر رديت عليه وفركت شعر لحيتي
ذو الفقار: شفتها هيَّ وابوها واختها ونظربت بيها وعرفتها هيَّ بت شاكر علوان

مطلب: هاي شوگت.!؟ شو ماعرف انا.

ذو الفقار: بيوم الي چنت يم اهل الولد الي طالب مشتري منهم المحل رحت الهم طلع بيتهم بنفس المنطقة الي بيها اهل قربة، ومن رجعت اركض خاف ما الحك ارجع للبيت ويشوفني ابوي
من ركضت انضربت بيها

ضحك غامز
مطلب: حب من اول ضربه هههههه

ذو الفقار: ههه لا مو شرط حب بس رغبتها وبس

مطلب: اي اي مصدگ

ذو الفقار: لا تصدگ...ويله ودع طفي الضوء وسد الباب وروح انطمر مو وراك شغل

ضحك مطفي الضوء وراح.. انطرحت نايم على بطني.. بصعوبة يله كدرت انام

مرت اليومين بهدوء الاوضاع تحت السيطرة
مطلب عنده تواصل وياه بس بالحهاز
حتى يعرف آخر الاخبار...واجه يوم الجمعة وانا منتظرو هل يوم حر من جمر، احسر ثانية ثانية الهذا اليوم

طول اليوم انا گاعد على اعصابي اريد يچي اليل بلمح البصر... والكل لاحظ توتري وقلقي لكن محد حچه منهم ما عده ابوي يكوم ويگعد يبسمر لو يباوع على الساعة وياي ويحچيله كلمة كلمتين

محتار بامره معقولة قربة گالت اله عنده شي ويا طالب لان مال امي دگول ما حاچيه حرف اله غير انُ عليَّ صاحي، اتجاهلت نظراته وكلامه وكمت عنهم عايف امي هيَّ وهاجر ويا يحچون

صعدت فوك متوجهه الغرفتي منتظر مطلب يرجع من المحل، وهم منتظره وخايف عليه
خاف هذا الحيوان صح شاك بينه ويسوي شي المطلب

فتحت الباب ودخلت رحت متوجه الكنتور فتحته وطلعت الجهاز مالتي.. طلعت رقمه دكيت عليه بالرنه الاولى رد عليه اطمئنيت، اول ما سمعت صوت هتفت بخوف ولقلق تارس وجهي

ذو الفقار: وينك.؟

مطلب:غير بالمحل وين يعني

-تعال.. عزل المحل وتعال

مطلب: يا شعزل هسه يله بالاربعه بعد وقت

-مطلب بس اليوم عزل المحل.. لا هذا يسوي شي الك خلي استر عليك بس اليوم

-خوش جاي

سديت الخط مرجع التلفون الكنتور
ظليت على هل حال منا الورا الأذان انا مثل الي تطلك الوج روح هيچ وهيچ... منا ما گعدو يتعشون وانا منتظرهم يخلصون وكل واحد يطش المكانه حتى اگدر اطلع ويطلع وراي مطلب

للعشره حضرت نفسي..لابس بنطرون اسود وقميص اسود وخذت الجفيه حاطها على راسي بس اطلع منا الفها شلون ماكان على وجهي

كملت كلشي وديت مطلب يحچي ويا امي دخل ابوي للغرفة حتى اطلع ويطلع وراي مطلب.
ظليت منتظره على اول باية الدرج مال النزول
شوي وهمس بسمي بصوت خافت..باوعت عليه وهوَ اشرلي انزل

رفعت ايدي سويت الجفيه معدلها على راسي
اخذت الطرف ذبيته على فمي وخشمي ونزلت على اطراف اصابعي.. باوعت على الصالة فارغه محد موجود وكفت گدام مطلب وهمست بصوت خافت وعيني على باب غرفة امي وابوي

ذو الفقار: ما اوصيك بس ادك عليك أنتَ خبر المركز وروح

هز راسه راد بغير كلام
مطلب: السلاح شلون راح تطلع بي.؟

ذو الفقار: ما مبين لابس قميص

-انتبه لا تمر من سيطره ويلزموك

هزيت راسي بخوش وعفته وطلعت معدل بالجفيه فتحت باب شارع وطلعت سديته وباوعت على الشارع ونزلت ماشي على الرصيف.

-سهل ياربي مو الخاطري الخاطر العالم المظلومه
كون وياي ياربي... مرهة وحدة اخلي انتصر على الشر اتوجه الك بحق حبيبك محمد.
وعد عليَّ الآخر نفس بجسمي يومية اصلي صلاة الشكر اذا كلشي صار على ماريد، لا تخيب املي ورجائي بكَ يا الله

احچي وتوسل بالخالق... وانا امشي طالع الشارع العام
اجرت تكسي ونطيته العنوان والولد يباوعلي ويباوع الابسي، حرك السيارة مشى مسافه وگال.. ورديت عليه بدون ما اباوعله

-ميتلك واحد..اقصد عندك فاتحه.؟

ذو الفقار: اي

-البقاء لله الله يصبركم.. منو ميتلك.؟

-عمي

رديت عليه وانه اباوع على الطريق.
شگد يسأل انا عقلي وين وهذا وين... ظل يتسأل طول الطريق وانا ارد عليه كوه وهوَ ولا حس ظل يتسأل من يا عمام وبيتكم هناك، وانا ورد عليه باي أو لا، منا بالف يا علي وصلت المنطقة البيها طالب.

انطيته الكروه وطفرت منه
وكفت بالشارع بعد عن بيته بخمس بيوت تقريباً
سحبت نفس طويل رافع ايدي ضاب الجفيه على وجهي مطلع بس عيوني.

عدلتها وخطيت خطواتي بطئ.. امشي وكلام امي يرن باذني، صوتها الهسه صداء باذني
وجعها... اهاتها... لو سُمعتها... هواي
منو طيبة الما تبلغ من عمرها غير 13 سنه
الي حركها بلا ذنب.. منو بيهن الها ذنب حتى يموتن بابشع طريقه.. أي ذنب يخلي الانسان ينكتل بهل جرم هذا.؟

بلعت ريگي بغصة... وكفت عن المشي بعد عن بيتهم بيت واحد.. باوعت على جماليه البيت وهيبته تجلب النظر بس العايشين بي مو مثله.

وخرت عيني عن البيت مباوع على ارجاء المنطقة
ادور على شخص.. منا ما طاحت عيني على طفل صحت عليه وهوَ رفع راسه مباوعلي واكف
ومشيت متقرب منه گايل بهدوء وانا اشر على باب بيته بينما احچي هوَ يباوع على البيت وعليَّ بخوف

ذو الفقار: عمو حبيبي روح دك باب ذاك البيت وگول الهم وين طالب اكو رجال منتظره بذيچ السيارة ويريده ضروري خوش عمو حبيبي

هز راسه بخوش ومشى وانا مشيت المكان السيارة الاشرت اله عليها.. تبعد عن بيته بيت واحد
اتقربت للبيت الي مقابيل السيارة.. وكفت جوه الشجرة مال نبگ مدري شني لان ما اميزها الدنيا ظلمة وماكو ضوء بهذا البيت

وكفت جوه الشجرة وعيني على الطفل يدك بالباب وعينه عليَّ... ظل يدك شويه يله فتحو الباب اله مدري شحچه ومد راسه طالب.
الله جابك وعلي، اباوع عليه يباوع على السيارة عاگد حواجبه.. رجع نظره للولد وطبطب على كتفه معنى امشي. اتحرك الطفل ماشي من بيته

بينما هوَ طلع من البيت ساد الباب واجه بتجاه السيارة الي گدامي... مديت ايدي الخصري طلعت السلاح وطرافه بعدها بخصري.. بس اتقرب على السيارة واكف يباوع عليها
وتقربت منه بطئ رافع السلاح ضاربه بمؤخره راسه

بس ضربته رفع ايده لازم راسه. لزمه ودار جسمه عليَّ
بعده ما ملتفت يشوفني خر وطاح بالارض
رجعت السلاح الخصري ومديت ايدي لازمه من ايده جاره جوه الشجرة حطيته على الجذع
وطلعت موبايلي دكيت على مطلب بسع رد عليه حچيت وياه وعين على طالب وعين على الشارع خاف احد يجي

ذو الفقار: مطلب وينه فياض.؟

مطلب: جايك هسه خابرته گال دخلت المنطقة

ردت ارد عليه ولمحت سيارته دخلت الفرع مالتهم
رأساً هتفت وانا اسد الخط

ذو الفقار: هذا اجه

ضميت الجهاز وخرت من الشجرة عيني على الشارع وعين على طالب خاف يگعد.. عبرت من السيارة وكفت بعيد عن السيارة اريد يلمحني.
بس لمحني لمض بالايت رأساً رجعت الطالب.
باوعت عليه بعده مطمور
وكفت فوك راسه منتظر فياض يصف السيارة وينزل

لحظات صف السيارة يم السيارة الي گدامي ونزل
اجه وهتفت بخفوت مدلي عليَّ
بس سمع صوتي اجه بتجاه الشجرة.. وكف گدامي وهتفت بسرعة خاف احد يطلع ويشوف

شيله من رجله وانا من ايده وانا امشي گدامك وأنتَ انطي ظهرك للبيوت خاف اكو كامرات ويشوفون وجهك

هز راسه بخوش.. لزمه من اديه وانا من رجله
مشينى بي السيارة.. عفته وظل بس فياض لازمه
مشيت فتحت الصندوگ ورجعت الفياض لزمته من رجلي ومشينى حطينا بالصندوگ. وهتفت ماشر الفياض

ذو الفقار: روح اصعد لا احد يشوفك

مشى واخذت الشناطات الموجودات.
شنتطت ايده ورجله وخذت الوصلة مال السيارة مبينه لان وصخه كلها تراب، شديت بيها راسه وخرت وسديت الباب ودرت وجهي مباوع على الشارع خاف احد طلع

بس لو واحد يموت محد يعرف سنطه والمكان الواكف ماكو بي اضويه وظلمة الي يموت بي محد يعرف
بينما اباوع على الشارع ماشي صاعد.
اول ما صعدت وسديت الباب گلت وهوَ حرك السيارة بسرعة

ذو الفقار: سريع ابني سريع

طلعنا من المنطقة ودرت وجهي مباوع على الصندوگ خاف يگعد هذا صل ما يحس
رجعت نظري للامام گايل مباوع على الطريق ونزلت الچفيه عن وجهي

ذو الفقار: لا تطلع على الشارع خاف نفوت من سيطرة.. ادخل من الدرابين

فياض: وين ناخذه.؟

ذو الفقار: ماكدر اخذه البيت خمسه وخمسين هناك عالم تحس

فياض: ناخذه المجمع الهيكل الي قريب على البيت خمسه وخمسين.. وهم بي طوابق هواي محد يسمع خاف تنطي حبشكلات

ذو الفقار: كلشي وداعتك حبشكلات مقبلات وجبه رئيسيه

فياض: ههههه جريم أنتَ

ضحكت بتنهّيده مباوع على الطريق مرجع ظهري على الكشن.. سحبت نفس ماد ايدي مطلع الجهاز
دخلت على سجل الارقام..دكيت على مطلب شوي ورد وهوَ يلوج

مطلب: ها ضلع بشر

ذو الفقار: طاح بالمصياده.. وهسه اتوكل المركز اخذ الشرطة ومشي قبل لا يوصل الخبر اله ويفلت

مطلب: هوَ انا واكف گدام بيته.. شدگول اخابر عليهم لو اروح الهم

ذو الفقار: لا ظل انتَ گدام بيته وخابر عبدالله هوَ يروح حتى اذا عرف وراد يشرد أنتَ موجود

مطلب: هاي هيَّ يله توكل خليني اتزغنب

ذو الفقار: اتزغنب ضلعي هني ومري

ضحك وسد الخط رجعت الجهاز البنطرون

فياض: ها

-يگول واكف گدام باب قاهر وراد يروح يخبر المركز گتله خلي عبدالله

هز راسه بها ساكت.. ظلينا ندخل من دربونه ونطلع من دربونه منا ما وصلنا المنطقة مالتنا اكو مجمع هيكل مبني بس هيكل
صف السيارة وباوعنا على الشارع يروج بي عالم
وخرت عيني من الشارع مباوعله

ذو الفقار: شلون انزله والعالم منا.؟

فياض: انروح الغير مكان

-تعرف مكان غير هذا.!؟

فياض: البيتي اخذك

-وهلك هناك شلون

فياض: لا بيتي بس هيكل ما گتلك اشتريت بيت بس هيكل وريد اكمل بنائه حتى اعرس بي

-بالعافية بيت العامر.. چا اخذنا بس كون ماكو سيطرة

-لا ماكو سيطرة هوَ قريب منا هيچ ربع ساعوة

هزيت راسي بخوش وهتف قبل لا يحرك السيارة
ذو الفقار: قبل لا تحرك انزل جيب النا صندوگ ماي

-شتسوي بي.؟

-شنسوي بي غير اصحي هذا القذر

-اكو هناك ماي عوفها حرامات تصرف فلس عليه
ضحكت وخرت نظري عنه مباوع على الشارع
حرك السيارة ماشي.. صدگ ما طولنا وصلنا للبيت مالته والشارع ما بي عالم بس الاسواق وبعيدة بالركن لان هوَ بيته باول الركن والاسواق بنهايه الفرع

طفه السيارة ونزلنا سويه. باوعت على المنطقة ظلمة
شسالفتهم ويا الاضويه ماكو كلوبات.
باوعت على فياض وهتفت

ذو الفقار: روح افتح بابك وتعال

-يا باب تعال يمعود هو وينه الباب بس هيكل
اجه بتجاهي مكمل كلامه.. فتحت الصندوك مباوعه عليه بعده على نومته شعجب هل درجة ما يحس وخرت عيني منه واشرت الفياض يلزمه من رجله وانا من ايده

مشينى البيته وعيني على الشارع وعين على الطريق
دخلنا البيت ساحة لا بأس بيها متوسطة وما ركزت شكو لان ظلمة وما اشوف شي

ذو الفقار: هسه شلون اشوف وين انحطه

فياض: اوكف هنا خلي اشغل فلاش الجهاز

گال هيچ وهوَ يعوف رجله.. طلع جهازه وشغل فلاش
ذو الفقار: ضويلي وانا اسحله من ايده

-مو اكو شبينتو بالارضيه خاف يتشخط

-عساه خلي حتى يگعد

-هههههه

ضحك وانا سحل بي وباوع وراي دخلنا مثل صالة بينما اسحل بي اريد اعوفه هوَ گال

-كمل انودي للغرفة هنا خاف ينسمع صوته ويصير صدء

سحلت بي بدون ما ارد، بينما اسحل بي سمعت صوت أنينه.. غلست عليه وكملت سحل للغرفة
بس دخلنا صحه على روحه يحچي كوه عفت ايده ذابه بالارض راد على كلامه وانا اباوع على فياض

طالب: ياهوَ هذا، منو أنتَ.؟

-ملك الموت انا

طالب: منو أنتَ... لو بيك خير وزلمة چان واجهتني وجه الوجه

-منو الزلمة أنتَ.!؟ شني هم حاسب نفسك على الزلم وسفة بعلي اذا محسوب على الزلم..

طالب: افتح عيوني لــــــــك*

وخرت عيني منه مباوع فياض متجاهل الغلط الي يغلطه ابتسمت بمكر وهتفت بهدوء

-ابو الشباب عندك نفط

طالب: نفطيــــــــش هاي شجاي تســــوي.
احچي وياك نفطيــــــــش.؟

- احركنك

سكت ثواني بعدها هتف
طالب: ياهوَ أنتَ.؟ افتح عيوني.. يا الي موديك عليَّ يا جبان... لو بي خير چان واجهتني وجه الوجه مو يودي خياساته

-انا مو أنتَ وربعك ادز مخانيث.انا اجي برجلي اسوي الاريده، ويله ابو الشباب روح دبر لنا نفط

فياض: عندي بانزين

-اي هذا بساع يشتعل ما يتعبني

طالب: لـــــــك افتــــــــح عيونيييي

-لا تصيح ترا كل ما تصيح يزيد شي اسكت احسلك خليك محترم حتى احترمك

هتفت هيچ وباوعت على فياض.. اشرت اله يمشي
مشى وانا طلعت موبايلي شغلت فلاش وباوعت على الغرفة، اشوف شي اشغل بي نار حتى يضوي المكان
بينما اباوع بالغرفة.. هوَ خنس ولا حرف حچه شوي وهتف... باوعت عليه ومشيت واكف باب الغرفة

طالب: بس گلي أنتَ ياهوَ اعرفنك انا..؟

-هسه أنتَ ليش مستعجل.. هسه تشوف بعينك انا ياهوَ

كملت آخر كلمة ودخل فياض بيده دبه مال بانزين
باوعت على ايده:-اريد خشب

-منين اجيب خشب بس اكو كراتين يم الاسواق اجيبهن

-هذن بساع يحتركن.. شوف شجره شي وخذ منها

هز راسه بخوش مادلي الدبه.. اخذتها منه وطلع
عفتها يم الباب ومشيت گعدت على الدرج بصف الغرفة مدري شني.. فتحت الجهاز ودخلت على سجل الارقام دكيت على مطلب وعيني على الغرفة..شوي ورد

مطلب: ها ضلعي

-بشر.؟

مطلب: هاي انا واكف گدام بابهم والشرطة دخلت عليه وأنتَ بعد لا دك عليَّ، عود انا ادك عليك لان يردوني انا وعبدالله ننطي افادتتنا يله نطلع.
عود بس نطلع انا اجيك

-خوش عو خابرني انطيك العنوان المكان الاحنا بي

-خوش يله مع السلامه هذوله طلعو.

سد الخط... سحبت نفس زافره بتنهّيده
باوعت على مدخل الصالة.. دخل فياض بيده خشب وكراتين. كمت ومشينى انا وياه للغرفة بينما نمشي هوَ يحچي

فياض: اگلك اخذت خشب من واحد يشوي سمچ هسه حرام عليَّ

ذو الفقار: حاله طارئة مو حرام

فياض: هاي وين لاكيها

-هسه تدخل عود أنتَ تراهم ويا ابو الشوي

دخلنا للغرفة وعيني على طالب يدور وجها هيچ وهيچ رفعت الفلاش عليه، تقربت منه موخر الوصله عنه، اول ما رفعت الفلاش عليه غمض عيونه من الضوء بينما رفعت الفلاش هتفت

ذو الفقار: شني مستعجل تشوف كتالك

فتح عيونه مزغرهن:-ياهو أنتَ لك.؟

ذو الفقار: لكلاكه تنام بضلوعك حيـ...
لا... لا انا مو كواد مثلك اغلط على الاكبر مني

كملت كلامي وفياض شغل النار رافع راسه مباوعلي كاتم ضحكته ونظراته دگول لك هوَ أنتَ خليت حترام رجعت هتفت مطفي الفلاش

ذو الفقار: ابو الشباب ولو تعبتك عندگ كرسي شي خلي ندلل ظيفنه قبل لا يخطف روحه ملك الموت

فياض: منين اجيبلك كرسي بس اكو بلوك اجيبها لك

-اي جيبها حتى اركع راسه بيها

ضحك بدون صوت كايم درت وجهي منه بينما هوَ ظل يحچي وانا متجاهله ماريد اتعب حلكي اريد اتعبه بعد شوي، ظليت منتظر فياض ثواني ودخل بيده بلوكه

مشى حطها بصفه باوعت عليه وعلى طالب
الي فاتح عيونهگكايل... بينما كمل كلامه رديت عليه بغمزه وعلى ثغري بتسامة

طالب: مطلب.؟

ذو الفقار: خلاسك انا

صفن ما رامش..ضحكت حاچي وانا متقرب منه
ذو الفقار: ها نصدمت ابو شعرور

طالب: عرفتك والله عرفتك

ما رديت عليه لزمت ايده من الشناطات وباوعت على فياض گايل

ذو الفقار: ارفعه بعد اخوك ولو كسرت ظهرك انه

فياض: انطيك عيوني ابو سيف الغالي

ابتسمت بوجها راد عليه بمتنان.. شلنا حاطينا على البلوكه وخرت عنه

ذو الفقار: فياض ظل يمّه هسه جاي

هز راسه وطلعت.. فتحت الفلاش دورت على شي اگعد عليه.. اخذت بلوكه وكفت بنص الصالة بحوشت بجهازي وكملت داخل للغرفة حطيت البلوكه گدام النار الي مقابيل طالب وطفيت الفلاش وباوعت على فياض گايل وانا ارجع نظري الطالب الي صافن عليَّ

ذو الفقار: روح جيب شي اگعد عليه

فياض: لا راح اروح اگعد بالسيارة اخذ راحتك ضلع

هزيت راسي بدون ماحچي، اريد اخذ راحتي اريد اطلع الحچي الي بگلبي الصارله 19 سنه بگلبي اريد اطلعه بهل يوم.. طلع فياض وهتفت بهدوء بينما داخلي بركان

ذو الفقار: هواي حچي بگلبي اريد احچي
بس منين ابدي بي.!؟ من يا أجرام... من فوزي وابوه لو من ابوي عبيد.؟ لو من امي واختي.... لو من العالم الابرياء... گلي من يا حچي ابدي بي.؟
گلي أنتَ من يا حچي ابدي. لا تظل ساكت احچي
من يا جرم ابدي؟

سكت ثواني مباوع بوجها القذر الي يباوع عليَّ بكل عين صلفه... رفعت ايدي جريت اخشمي ماسحه بكف ايدي وهتفت كلمة وسكتت خانگتني العبرة، بعدها كملت

ذو الفقار: ليش حركتهن.؟
ليش حركتهن شني السونا الك
احچي لا تسكــت احچي شنو الذنب الي تحركهن الحد الموتت..لــــــــك لو مجرمات ما يسون بيهن هيچ گليي ليـــــــش.؟

رفعت ايدي عصرت فمي وفچي بكف ايدي خانك عبرتي بلعت ريگي والغصة ترست حنجرتي.
هزيت راسي رافع كتافي وهتفت واشرح بيدي

ذو الفقار: جاوب ليش حركتهن.؟

طالب: حذرتها لا توصل صوبي وهيَّ لعبت بذيلها وراحت گالت لابوي انا اشتغل بالحزب ومن وراها طردني وعاقبني،

ذو الفقار: وتحركهـــــــا... گلـــــي تحركهن هههه ليش عذرك اقبح من فعلــــــــك

طالب: بكل بساطة اكرهه ماطيقها

صفنت عليه ثواني اريد احچي حرف ماگدر الساني نعكد، مدري الغصة والذكرى مال الحادثه خلت الساني ينعكد، كوه هتفت كلامي بخنگه

ذوالفقار: تكرهه گلت.!؟ تكرهه وهيچ سويت بيها.؟
چــــــــا لو مسويلتك شـــــي چان شسويت بيهاا

طالب:ما اسويلها شي بس، احرك گلبها بيكم
لان انتم نقطة ضعفها، بس ما سوت شي قوي حتى اذيكم وانتم ولد ما اذيكم

رديت عليه ارفع ايدي امسح كصتي منزلها على لحيتي وعلى رگبتي مباوع على السكف

ذو الفقار: شحچـــــي يربي شحچي
ربي تشوف بعينك تشوف شيحچي، گلي شسوي اله ويبرد گلبي اموته ياربي اموتــــــــه.
وعزتك وجلاتلك لو اموته ما يربد فادي

طالب:هههه اكرهه الامك اكرهه من يوم دخلت بيتنا كرهتها، ماطيقها خبيثه حيه.
أنتَ ماتعرف امك انا اعرفها حقيرة خربتني انا وبوي خلته يكرهني. خلته ما يشوفني بعيونه، هيَّ حيه ام راسين

باوعت عليه وراسي بعده مرفوع السكف امنع دموعي طيح اريد ابچي وضحك بنفس الوقت
اي امتلك رغبه ابچي وضحك بنفس الوقت
ثواني ورديت عليه، اريد اجمع الكلام بفمي. اخذت نفس ونظراتي تتوزع عليه وعلى انار

ذو الفقار: شايف هاي النار..؟ اي شايفها شلون اكلتهن أكل.. منو الي شغلها عليهن، أنتَ وكتفيت بهذا.؟
لا خليت رحت أنتَ ومرتك اتهمتوها منتحره وعدها شي وبتها كشفتها وموتتها وياها عود خاف تجي تحچي لبوها... لك أنتَ ومرتك طعنتو بشرفها فوك
ما اجيت وحركتها مو أي حرك هذا، تارس البيت وتارسها نفط.

بس گلي شلون انطاك گلبك تذب عليهن ما اتوسلن بيك.؟ ما گلتلك طيبة عمو انا اخاف من النار.؟
اي هيَّ روحها عزيزه تخاف من كلشي

رد بجمود وعيونه حاطها بعيني بكل صلافه
طالب: توسلت وبچت بس شفت بوجها امك وانا وكرهه على كرهي الامك، شايف حتى أنتَ وخوك اكرهكم على كرهي الها، هيچ ما اطيقكم من اشوف اخوك اريد أكله بس گلت خلي اخلص شغلي ويا وبعدها اطيحا بمكيده اتودي السابع ارض.

ذو الفقار: هه گلت اتوسلت بيك.؟
هههه من شنو مخلوق أنتَ... أنتَ شيطان مو انسان حرام اشبهك بحيوان ما مسحوب لا على الانس. ولا الحيوانات... حرام اشبهك بهذن الجنسين

"كملت كلامي متحمحم" اعرفك كلش زين.
بس احنا مو غشيمين كلشي سواى الك مطلب انا اعرفه بي، وكلشي تنطي المطلب يتسجل بصوتك مستحيل اخلي يدخل اخوي وياك
اذا ما مخطط الكلشي وحاسب الف حساب.
وتعرف المخانيث الدزيتهم يكتلون امي، اعرف هوَ أنتَ بس الحظ ما حالفني الزم واحد من المخانيث الدازهم.. الى لا والكفل زينب ارجعهم الك مزرفين تزرف

طالب: هسه شتريد.؟

ذو الفقار: احركك

طالب: هههههه ماتگدر

كمل كلامه وكمت تقربت منه وكفت گدامه.
رفع راسه مباوعلي برود بس نظراته بان عليها الخوف

طالب: ماتگدر تسويها

ذو الفقار: كمل آخر كلمة وگنبصت گدامه باوعت بوجها القذر وهتفت بهدوء فصيع:- اي صحيح ماگدر انا كلني ذو الفقار المخبل مو صحيح.؟
كلني ذو الفقار المخبل العقلة طكه ونص.
وأنتَ تدري بيه مخبل وعقلي نص عقل مو كامل يعني شنو اسوي معذور مو عمي ابو شعرور

طول ما احچي هيچ وهوَ يبلع بريگه ويباوع عليَّ وعلى الباب ابتسمت بوجها وبصورة سريعة مديت ايدي لزمت ايده وجريته على نار حاط ايده بنص النار هوَ بس لاحته النار عاط عيطه هزت اراكان البيت هز وريحه الشعواط مال الشعر طكت خشمي

ذو الفقار: ها يوجع... شو خلي ادخلها بعد

طالب: اخ.. ايـــــــــدي وخرررررها وخرهاااا

ذو الفقار: ها يوجع مو.. تذكر هسه شلون صرخن وتوسلن بيك... اي هسه جرب الشعور شوف شلون يأذي عود هاي بس ايدك، چا لو كلك تحترك شتسوي

احچي وهوَ يعيط مفرفح ويملص بروحه مني يريد يطلع ايده من النار... كملت كلامي وخرت ايده من النار بينما وخرت ايده هوَ طاح بالارض يتلوع وينوح من الألم

ذو الفقار: ما يبرد گلبي لا والله. السويته بيه مو شويه
اخذت ابوي عبيد، نوم امي واختي نوب خطفت مرتي وبعدها امي عيدة... گلي شسوي بيك.
محتار شسوي بيك... انا محتار شسوي احركك وباوع عليك شلون تحترك لو شسوي.؟ أنتَ انطيني حل

رد بصوت كوه يطلع بينما ضحكت بهستريه ما واعي على نفسي

طالب: ارحمني راح اموت.. اخ بويه اخ

ذو الفقار: هههههههههه ارحمــــــــك ههههههههههه ارحــــــــم منو..؟ ارحمك أنتَ... ليش هنه من توسلن بيك ليش ما رحمتهن.؟

-ذو الفقار

درت وجهي مباوع على الباب واكف مطلب.. باوعت عليه وگلبي بي صرخه تهز الكون هز.. اجه بتجاهي
وكف بصفي مباوع على طالب وحاچي بهدوء

مطلب: كافي عوفه انا انطيت خبر للشرطة وكلت الهم بس نلكاه اسلمه الكم.. انطي للشرطة ونطي السجل وخلي الدولة تشتغل عليه

ذو الفقار: اريد شي يفوخ گلبي

مطلب: خلي نمشي الامي منتظرتنا بالبيت.. وهذا ربطه زين، وصعدو فوك بالبيتونه وربطو حلكه العوج وعود باجر انسلمه الشرطة.. وهسه انتَ روح اصعد بالسيارة وانا اتكفل الشغله

باوعت عليه وعلى طالب الي يتلوه تلوي بالارض ورافع ايده الصدرة.. سحبت نفس وتقربت منه گنبصت گدامه وهتفت

ذو الفقار: أنتَ نار شعلت بوسط روحي
ردت اطفيها وزادت طين بله.. بس هسه اگدر انام مرتاح اخذت حق امي واختي وامي عيدة ومرتي بعدما افكر بشي اسمه طالب

گلت هل كم كلمة وكمت منه بينما هوَ يتلوع مايگدر يحچي حرف.. باوعت على مطلب وهتف وهزيت راسي اله بخوش وطلعت

مطلب: انتظروني لا تروحن

طلعت من البيت بروح مسلوبه بس مرتاح من عذاب الضمير، هسه اگدر امشيلها وانا رافع راسي.
اخذت حقكن منه، سحبت نفس طالع من البيت طلعت من باب البيت مباوع على فياض گاعد بالسيارة ورافع الموبايل الإذنه

ما رحت صعدت مشيت گعدت على الرصيف اريد اتنفس وطلع خنگه النامت بصدري.
رفعت ايدي ثنينهن متچي عكوس ايدي على رگبي وكفوف ايدي غطيت وجهي بيهن. سامح الدموعي تجري

اريد ابچي اطلع دموعي النامن بهدابي السنين كلها
ماگدرت انسى منظرهن وهنه يهوجن والنار ياكل بيهن، ماگدر انسى شلون طيبة تفتر بروحها العزيزة لو امي الي اطفي بروحها بدون فايده

لو انسى وجهه طيبة الي ما مبين منه
شانسى منهن..؟ صوت امي لو صوت طيبة
شو ثنينهن عزيزات گلبي... اخ اخ يا طالب شسويلك گلي شسوي ويبرد فادي، رفعت راسي موخر ايدي من عيوني مباوع على السماء وحچي بخنگه

-ربي ادري بروحي مو صالح وانا خجلانك ربي
ماعرف شلون الي عين اطلب منك الصبر وتبرد گلبي
ادري اصليلك وعبدك بس بدون روح.
اي ربي بدون روح ادي واجبي بس انا روحي راحت ويا امي واختي

وانا اليوم جايك بوجهه مسود اريدك تاخذني بين ايدك، ماعندي غيرك ربي ماعندي غيرك اتوسلك وترجاك، اريدك تلهمني الصبر... اي ربي الصبر على فاجعتي.. فاجعتي مو مثل كل فاجعه.

ربي ربي ربي ليس لي سواك.
ارجوك ودعوك متوسلاً
اذا الم تكن معي فمن يكن معي
كن معي لا عليَّ يارب.

ظليت على هل حال بالعشر دقايق أو أكثر وحسيت على حركه وراي.. رفعت ايدي مسحت وجهي بالچفيه مباوع وراي. طلع مطلب مباوعلي بينما شفته كمت رأساً بعدت نظري عنه ماشي منه وهوَ هتف قبل لا اوصل السيارة

مطلب:شسمه احسن شي ناخذه ويانا
لان هنا اذا ظل مانعرف يمكن احد يسمعه ويطلعه خلي ناخذه للبيت الخمسه وخمسين وانا اظل يمّه منا للصبح

-سوي الي تريده

مطلب: گول الفياض خلي يجي وياي يعيني

فتحت باب السيارة وصعدت
ذو الفقار: روح عاون مطلب صعدو الخسيس

فياض: راح ناخذه.؟

ذو الفقار: كلشي يصير اذا يظل هنا

هز راسه مايد كلامي خله ونزل وانا طلعت المسدس من خاصرتي حاطه بحضني.. رجعت نفسي على الشكن رافع راسي مغمض عيوني
ظليت على هل حال بالدقايق وحسيت عليهم يفتحون باب الصندوگ

ما فتحت عيوني ظليت مغمض.. ثواني وجو فتحو البيبان صاعدين.. اول ما صعد فياض فتحت عيوني ماد ايدي لازم المسدس
رفعته ماده اله وهتفت بهدوء بيمنا هوَ اخذه مني ورجعت راسي على الكشن مغمض عيوني

ذو الفقار: هاي الامانه مشكور خويه.. وكفتكم وياي ما انساها طول عمري

فياض: انچب بعد روحي

-هوَ انا نچبيت مالي طاقه احچي شي بعد

عم السكوت بس صوت أنين طالب شوي وهتفت
ذو الفقار: نزلوني انا اول وبعدها اخذ مطلب البيت الخمسه وخمسين

-خوش

وصلنا لمنطقة مالتنا عدلت الچفيه على وجهي وسلمت عليهم ونزلت وهمه راحو
مشيت البيت بخطوات بطيء، ما واعي على داير مدايري.. وصلت للبيت وانا ماعرف بيش الساعة

دكيت الباب شوي وجاني صوتها. رديت عليها وفتحت الباب.. باوعت بوجها بنظرات متروسه تعب
بينما باوعت الها دخلت نازع الچفيه عن وجهي
سدت الباب وگالت

عيدة: ها شصار.؟

درت وجهي مباوع عليها ورجعت نظري ماشي لي جوه ذو الفقار: خلص هاي هيَّ

عيدة: شسويت، كون سوالك شي.؟

-بعدين اسولفلچ تعبان مالي خلك احچي حرف

عيدة: انام يمك يمه.

كملت آخر كلمة وهيَّ توكف يمي باوعت بوجها وهزيت راسي باي.. محتاجها هاي امي الثانية
بينما هزيت راسي باي لزمت ايدي ومشتني
وكفنا گدام باب المطبخ نزعت حذائي ودخلنا مشينى الصالة وكفت بالصالة وهمست بصوت خافت

عيدة: ابقى هنا هسه اجي

ظليت واكف مغمض عيوني بالثواني وفتحتها من حسيت عليها تسد الباب.. باوعلها بيدها فراشات
حطتهن بالارض وظلت تفرش وانا اباوع عليها بدون ما احرك طرف واحد من جسمي كملت الفرش وباوعتلي

عيدة: روح غسل وجهك وتعال

رحت بدون ما احچي شي نزعت الجفيه حاطها على رگبتي، غسلت وجهي ونشفت ورجعت للصالة
رحت بوجهي نمت على الفراش الي مخليته اليه
وهيَّ اجت گعدت على مقعدها على الفراش الي بصفي وماده رجليها، اشرت على فخذها.
رأساً رفعت راسي وحطيته على فخذها
وبدت تمسح على راسي وتقرا ايات قرانية منا ما غلبني النوم ما حاس على نفسي

گعدت من النوم على صوت ضحك ونغي
ركزت بالمكان گاعد بغرفة وبيها باب مفتوح وطالع منه ضوء.. قلصت عيوني اريد اشوف شنو هذا الصوت ثواني وفتحت عيوني مركز بالمكان وضحت الصورة

الباب الي يطلع منه ضوء دخلت منه مرّة وياها بنية شابه، والمرّة شايله بيدها طفل والبنيه الي وياها هم شايله طفل.. باوعت زين اريد اركز بوجهن
گدرت اشوفهن رأساً كمت من المكان الانا بي حاچي بفرح

-يمه طيبة هاي انتن

ابتسمت بوجهي وهتفت وهيَّ تتقرب مني وكفت كدامي ومدتلي الطفل الي بيدها

هدية: هاك هاي طيبة

باوعت على الطفلة الي انطتنياها ماگدر اشوف منها شي رفعت وجهي مباوع عليها وعلى طيبة گايل وانا اشر على الطفل الي بيد طيبة

-وهذا الطفل انطينيا

هدية: لا انا هذا اريده اخذ هاي أنتَ

گالت هيچ ودارت وجها هيَّ وطيبة ومشت بتجاه الباب مشيت وراها اصيح بسمها بس ما ترد

-يمه اوكفي يمه يمــــــــه

-اسم الله الرحمن

باوعت بوجها بالع ريگ وشفتي يابسه.. بينما هيَّ تمسح وجهي وتسمي بسم الله

-شبيك ذو الفقار

بلعت ريگ للمرة الثانية هامس
ذو الفقار: امي تحلمت بيها

-شتحلمت.؟

انطتني طفله وبيد طيبة طفل گتلها انطينيا ما قبلت گالت اخذ هاي أنتَ

صفنت بوجهي وهتف بهدوء وهيَّ تشح نظرها عني
عيدة: ان شاءلله خير ان شاءلله

يتبع..

#بارت_38_.....#القسم١


{ وَلَقَدۡ نَعۡلَمُ أَنَّكَ يَضِيقُ صَدۡرُكَ بِمَا يَقُولُونَ
فَسَبِّحۡ بِحَمۡدِ رَبِّكَ وَكُن مِّنَ ٱلسَّٰجِدِينَ }

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

.
.
.
.

-اگلچ ما راح تخابرين عمچ.؟

حكيت راسي رافعه نظري الها بينما هي واكفه باب الغرفة وتباوعلي وبطنها مدعبله كدامها

-لا

-ليش.. گولي اله خاف كلشي يصير، وهوَ مايعرف

-هيچ دگولين.؟

-اي خابري ونطي علم، هسه انا ما اطلع منا اذا ما اخابر ابوي هاشم. وذا ما اخابره ام سندس تخابره بدون ماعرف

هزيت راسي بخوش بدون ما ارد
اخذت التلفون وطلعت السجل ما بي بس رقم شرار وام سندس، لان وراها بيوم عمو صاحب اجاني انطاني مصرف وشترالي شريحه بعدما وصيته

ما خليت ولا رقم اي واحد من اهلي
اريد ارتاح ماريد افكر بأي واحد منهم.. ولو ما همه
انا ما واصله الهاي الحاله.. كله من ورا ابوي
هوَ السبب الوحيد، لو ما هوَ انا هسه جاي ادرس وكل همي دراستي وتخصصي
بينما احچي هيچ دكيت طول شويه يله رد

صاحب: هلا بويه

-شلونك عمو

صاحب: صرنا عمو وين راحت البويه

رديت عليه بوتر وفشله
قربة: نسيت والله

صاحب: گولي بويه محتاجه شي.
مصرفچ خلص... انا بعد شوي امر عليچ انطيچ

قربة:لا ما محتاجه هنا فلوس مال الاسبوعين الراحن ما صارفه منهن ربع بس شسمه...

صاحب: احچي بنتي صاير شي.؟

-لا ماكو شي بس اريد اروح لدكتورة باجر

-عسى ما شر شيوجعچ

-شسمى بطني ذبحتني وكوه مصبره روحي

-خوش انا راح اعزل المحل وجايچ انا وعمتچ

-ها

-شني الها

-خوش بس يابه فدوة مو يحس عليكم

-لا تخافين

سلمت عليه وسديت الخط مباوعه على شرار
اتباوعلي بصفنه.. طفيت الجهاز:- الصفمنه مو الچ الابو قاط

عدلت نفسها راده وهيَّ توخر من الباب طالعه برا
كمت من الجرباية ماشيى وراها وحچي وياها

شرار: صافنه على وجهچ صار اصفر عود هاي صارلچ ايام تنزفين وجهچ انمص مص.

قربة: هاي الشهريه صارلها هواي ما جايتني ومتخربطه عليَّ، لهيچ طولت عليه

ردت وهيَّ تباوعلي وتكمل طريقها ماشيى المطبخ الي بصف الصالة:- ماظن هاي شهريه حتى لو تخربط عليچ بس مو يا اليوم صارلچ ثلث ايام تنزفين
نوب تريد تظل گاعده ما تولي الدكتورة

ما رديت عليها صحيح ويا اليوم راح يقبطلي عشر ايام انا انزف سبع ايام شهري ومن شطفت الحد هسه انا انزف ونزف، بس مو قوي حتى ايام الدوره ما يطيح عليَّ دم هواي وخفت أكثر من الألم بدت تبدي عندي.

كملت طريقي ورا شرار داخله للمطبخ
البيت مو چبير كلش بس فضفاض... من ندخل للبيت ساحة صغيرة وصحيات واستقبال، وكو ممر ادخلين عليه بي باب الصالة وبصفها حمام ودرج وبصف الحمام غرفتين وبصف الغرفة المطبخ.. المطبخ صاير بالاخير

وحدة من الغرفة تنام بيها ام سندس والثانية انا وشرار، وام سندس هيَّ گاعده ويا ابنها الچبير بس من طلعت شرار من بيت عيالها عمها هاشم اجر بيت بهاي المنطقة الي بيها ابن ام سندس

ومثل ماعرفت هيَّ كرايبه مو غريبه
ومخلي ومحاچي ابنها تجي تگعد ويا شرار وهم شيخ هاشم يتراود عليهن هوَ وابن ام سندس
وهاي انا صارلي اسبوعين ضبط يجي شيخ هاشم
كل احد وخميس، يتسوك انواع وينطي مصرف الام سندس ويروح

وخطيه من درا بعمو صاحب ينطي مصرف ويجيب مسواك ظل يحچي عليَّ منا بعد ما كام عمو صاحب يجيب مسواك.. ظل ينطيني مصرف ويطمئن عليَّ ويروح

فزيت من صفنتي عليهن من هتفت ام سندس وهيَّ تصب الحليب بالگلاصت والها چاي.
ما تقبل تخلينا نشرب چاي وخص شرار لان حامل هوَ مو أنهُ موزين بس يسحب كل الحديد الي بجسمها
فـ ما تقبل تشرب وانا على واهس شرار اشرب حليب
اتقربت منها اخذت الصينيّة وهيَّ شالت سله الكعك بينما انا تقربت منها هيَّ تحچي وانا ارد

ام سندس:تعالن أكلن لكمة.. وأنتِ يمه قربة اشربي حليبه شوي زين الچ وجهچ صار اصفر

قربة: هوَ شو انا جعت وعود ستوني أكلت

ام سندس: عافيه يمه عافيه.. اي خابرتي عمچ انطيتي علم

قربة: اي وگال راح اجيب عمتچ وناخذچ

ام سندس: اها خوش چا انا المن رايحه وياچ
انا اظل يم شرار ما بيها حيل حامل خطيه

شرار: لا بيه حيل اريد اطلع اشتم هوى

ام سندس: تحبين الفرفره والچ.
اگعدي وسكتي حرام طلعين بدون علم رجلچ الملائكه تلعن بيچ

شرار: چا اگول الابوي هاشم

ام سندس: چا هاشم رجلچ

شرار: شدخلني بي انا خلعته لا اريده ولا اوصله واطلع وامشي براحتي هوَ خلي يحير بالحيه مالته

قربة: الحيه مالته طلكها وراچ باسبوع

شرار: شمدريچ ابو رب التزوجها بالسر ما يرجع الها بالسر

نحچي وحنا ندخل للصالة گعدت شرار يم ام سندس وانا وزعت الهن گلاصاتهن وگعدت راده على كلامها

قربة: الولد چان مسحور وهسه طاب وجاي يتوسل بعمچ هاشم وعمچ ما يقبل

ام سندس: مو هاشم يايمه، عمي مكرود هاشم
بس هاي ما تقبل شكم مرة بمرة گعد وياها گدامي وحچه وياها وهيَّ معانده ما تقبل

اخذت كعكه وهتفت واكرط منها شوي وخوط بالحليب:-يعني شني ظلتچ هنا..؟

شرار: وانتي شني ظلتچ

قربة: منو گلچ راح اظل يمچ، بس ارتاح فترة ارجع الاهلي وتخلص السالفة

شرار: لا تفهمين قصدي غلط اقصد هم، أنتِ حالچ حالي رافضه ترجعين الرجلچ وانا هم ماريد ارجع اله

قربة: اعرف قصدچ بس أنتِ عندچ طفل أما انا فارغه ما اهتم.. بس أنتِ منو الي يعاونچ على ابنچ
لا تزعلين بس خالة ام سندس چندوب تظل مشتوله وياچ بعيده عن ابنها واهلها

شرار: باوعت عليَّ وعلى ام سندس الي تغمس بالكعكه وما تحچي شي: صدگ خالة.؟

ردت عليها وهيَّ تباوع عليها وعليَّ
ام سندس: ثنينچن غلطانات گعدتچن هنا غلط
وانا من حچيت ويا شيخ هاشم گال اريدها منا ما تجيب واحچي بهذا الموضوع
وأنتِ قربة هم حچيت ويا شيخ هاشم وشيخ حاچي ويا عمچ گال اريدها تظل هنا مثل ما تريد لينما تخلص السالفة العنده

فـ يا يمه گعدتچن هنا غلط، أنتِ شرار مرّة حامل
ولا عندچ اخ اب لو عم لة خال بيهم خير تروحين يمهم.. أنتِ مجبوره ترجعين الرجلچ الخاطر الي بطنچ لي يا يمه هم يعيش يتيم طول عمره مثلچ.

شرار: بس..

ام سندس: خلني احچي وانتن بكيفچن بعد
انا ما متعاجزه ولا متضايقه من گعدتي هنا لا بالعكس مرتاحه وياچن وانتن بنيات درر مالت الله
بس الى متى تظلن مبتعدات عن اهلچن
وأنتِ قربة يمه لا تظوجين مني،بس زعلتچ ما بيها معنى يعني الي منچ تفرح رجلها ما بي شي
مو والله تزعلين منه

بلعت ريگ راده
قربة: انا ما زعلانه منه لان ضم عليها هيچ شي
لا انا، گتله من زمان اذا طلعت ما بيك شي ما اظل وياك، وهم فوك كل هذا يشربني مدري شني
وذيچ الايام تعبت ردت اموت وهوَ طلع يشربني مدري شني.. بعد شلون اظل وياه

ام سندس: خوش بس افتهمتي منه ليش هيچ يسوي.؟

سكتت ما راده، ماعندي كلام مفيد احچي
بينما شافتني ساكته هتفت

ام سندس: اها هاي شوفي أنتِ ما مفتهمه منه
وهاي ساعة عصبيه، خليتي ولميتي چويلاتچ وگلتي ما اظل وياه.. بس والله زين من عمچ وكف وياچ وسمع كلمتچ وجابچ. هاي عبن عزيزه عليه

باوعت عليها ونزلت نظري العب بظافيري
قربة: ماگدر اتقبل خالة اظل گاعده يمّه وهوَ چان مستغل ضعفي

كملت آخر كلمة رافعه نظري الها.. بينما باوعت الها وكملت كلامي وهتفت وهيَّ تباوعلي وتباوع على شرار

ام سندس: من الاخير ثنينچن بطرانات

قربة: خالةةة

شرار: ااااا

ام سندس: اي والله هاي سوالفﺟن مال جهال
مو كل وحدة منچن چنها بغل.
أنتِ حامل وأنتِ الثانية شكبرچ شيسمون هاي السوالف ارجعن لرجولتچن وستچنن

شرار: خالة ليش احسچ ضجتي من يمنا وما تردين انظل هنا

ضربت فخذها راده
ام سندس: شوف الوعد.. يمه انا احچي كردي
اگلچن هيچ دگللي هيچ... يا بعد گلبي أنتِ شراره ماعندچ غير رجلچ وبيتچ، لا تصيرين غبيه وتحققين حچي النسوان حتى طلعين من البيت وترجعين منين ما اجيتي، لهيچ ارجعي وكسري عيونهن
اتزعلين منه ازعلي بس المهم أنتِ گاعده بيتچ وكاسره عيونهم

وأنتِ الثانية زعلتچ مابيها معنى بعلي
هسه لو اسولف الفرخ اگله هيچ وهيچ يضحك عليچ
ارجعي اله يمه وخلي يفهمچ ليش سوى هيچ.
يا يمه كلشي الى سبب وشوفي السبب الي خلا هيچ يسوي

اسمع الحچيها وما احچي حرف وشرار كذلك
اعرف زعلتي ما بيها معنى.. بس رافضه ارجع اله
وذا اروح لاهلي راح ابوي يجبرني ارجع اله لان قبل مخبل وجبرني عليه نوب هسه صاحي هه يرجعني اله سحول من عطوبي

تنهّدت راده على كلامها بهدوء وتفهم
قربة: خالة انا وياچ... بس رافضه اتقبل السوا بيه
وذا اروح لاهلي ابوي راح يجبرني ارجع اله

هزت راسها ماخذه كعكه وهتفت موجها كلامها النا انا وشرار، وشرار الي طكتها صفنه وبيدها گوب حليب

ام سندس: شريد منچن انا يمه... عسى ما تظلن هنا طول عمرچن، انا شعندي اكيف والله وين اكو مثلچن بس اريد مصلحتچن وانتن بنات شابات بعدچن بريعان عمرچن ليش تبهذلن رواحچن بسوالف العناد وهسه على العموم بسنا حچي، وگومي حضري روحچ خاف يجيچ عمچ ياخذچ

هزيت راسي مباوعه على الساعة بالثلاثه
كمت شايله بيدي الگوب حطيته بالصينيّة وباوعت على شرار باوعتلي وباوعت على ام سندس

عفتهن ومشيت.. كلام خالة ام سندس وشوش عقلي
ماعرف صرت بنارين كلامها الصحيح وكرامتي
هوَ استغلني وستغل حبي اله.. اي استغل حبي اله
وانا الغبيه چنت اخاف عليه وما اهتم المشاعري
من امده الگلب النايم بصدري

تنهّدت محضره نفسي كملت ورجعت گعدت يمهن
ما طولت بگعدتي وندك الباب كامت خالة وانا وراها
صاحت منو واجه صوت عمو صاحب
راحت فتحت الباب وظليت واكفه بمكاني اباوع عليها تحچي وياه وشوي ودارت وجها عليه وهتفت

ام سندس: منتظريچ بالسيارة ما يقبلون يدخلون يگولون هم يله ناخذ موعد