بغداد1989/ ديسمبر
ولدت في لليلة باردة ممطرة يملؤها صوت الرعد
منتصف الليل وقت السحر . هدوء الغرفة المعزولة عن باقي البيت واثاثها الي اقل من البسيط والتعبان ..
وضوء الالة الخافت الموضوعة أعلى الرف .. ماينسمع بيها غير بس صوت الشخير الي يصدر من صابر نتيجة تعبة وكدة طول اليوم ..
وبجانبه سمية الي تتكلب بسبب الألم الي تشعر بي تعض طرف البطانية وتغمض عيونها بألم صامت من غير صوت ..
.. بنهاية شهرها وعلى ما يبدو عدها ولادة وهل ألم ملازمها طول اليوم خفيف لكن نص الليل زاد .. كعدت على حيلها بعد ما كانت نايمة على ضهرها .. وكل ما جالة الوجع يزيد وصلت مرحلة لا تحتمل .. اجت تكعد صابر لكن فجاء اختفى الألم .. اخذت شهيق وزفير عدة مرات ورجعت مددت أقل الدقايق ورجع الألم بقوة يضربها

فزت بسرعة وصارت تكعد صابر بايدها وهيَّ تأن ..
لكن صابر بسبب تعبة مثل الداخل بغيبوبة ونومتة ثكيلة بشكل
تريد تحاچي وتكلة اكعد الحگلي.. لكن سمية لسانها ما يعينها تنطق لأن خرسة فاقدة النطق والسمع .. وكل الي تكدر علي تون وتندها بأيدها ..
الألم يروح ثواني ويرجع بقوة ومن ألمها ضربت صابر حيل على أيدة خلتة يفز بسرعة ..

كعد على حيلة مشلوش ويفرك بعيونة ويباوع الها ..
و يحاچيها رغم يعرف هيه ماراح تسمعة ... ها ها ها سمية سمية شبيج شيوجعج
.. تأن وتأشرلة على بطنها .. وحچت وياه بلغة إشارة هو يفهما ..
نهض من فراشة بسرعة ومن قلقة وتوترة وخوفة
فتح باب الغرفة بملابسة الخفيفة متناسي صليل برد الليل
وطلع سريع متوجه يروح يدك باب غرفة اخو الجبير حتى يكعد زوجتة اخو تشوف سمية ..

صار يدك على الباب بعشوائية وبقوة .. لحد ما فتح الباب اخو بعصبية ولكاه كدامة صاح بي .. وهو يأشر بأيدة
خير خير خير ياستار شيلتنة شمالك انت؟ خبل وعرفناك ماتگول بشر نايمين اكو مطي يدك الباب هيج؟ ..
حجى بخوف من اخو وبتوتر وهو ياخذ ايد اخو يلزمها .. سمية سمية جاي تجيب بس خل مرتك تروح الها .
طبك حواجبة وسحب أيدة بانزعاج .. شنو جاي تجيب شمالك انت ؟ جاي تطلك قصدك؟ ..
اي اي تطلك تطلك وتبجي من بطنها فدوة حباب خل مرتك تجي تشوفها
اشرلة يروح ..روح امشي هسه اخليها تجي تشوفها
تركة ورجع للغرفة لكة سمية سادة رجليها حيل وتبجي .. كابلها وصارت دموعة تجري وياها ويسمح بدموعها ويبوس جبينها ..
.. هسه هسه راح تجي جبرية تشوفج صحتها وهيَّ تعرف تجّيب نسوان هسه تجيبج وتصيرين زينة
..سحبت نفسها و نهضت بوجعها كوة فتحت الكنتور الي من بابين طلعت ملابس الها وملابس للطفل محضرتهم قبل وقت وخلتهم قريب من فراشها وكعدت تنتضر جبرية تجيها .. مر وقت بالربع ساعة يله دخلت جبرية تفرك بعيونها بنعاس .. وتحاجيها
.. ها محصورة كلش لو تشلين حالي يله تجيبين ؟
تباوع سمية الها بعيون متروسة دموع وتهز برأسها
دخلت وهيَّ تگلها مددي خل اشوفج .. و وجهت كلامها لصابر .. اطلع وسد الباب
نهض صابر يريد يطلع بس كلبة ما انطاه ضل واكف يم الباب ويباوع وهو طابك حواجبة وعيونة تجري دموع مقهور على زوجتة ..
فحصتها جبرية وحجت وهي تضرب ايد على ايد .. ياااه ولج الجاهل كلش حتى شعره مبين واجه بيدي شلون ما جبتي لهسه كلش واصلة انتي
ادري هسه شلون اجيبج غير تحضرين ماي شي ..
جاوب صابر من مكانه . اني اني راح احط ماي احمي واجيبة
ركض اخذ جدرية ترسها وخلاها على الطباخ يشتغل وادي ترجف وباكيت الشخاط طاح من أيده نزل أخذه وشعل الطباخ ..
انتضر الماي يحمة شالة وركض بي للغرفة ودخل لكة جبرية تطلع بالطفل صاحت بي ..
ولكككك شتسوي هنا اطلع بره ... وانتي دفعي يله هل طلع عاونيني
تقرب بأيدة الجدر .. ماي هذا ماي دافي ..
جاوبتة وهي ملتهية..خلي واطلع بساااع
خلا على الأرض وحجة .. فدوة جبرية على كيفج وياها لاتوجعيها
.. هزت راسها وتجاهلت كلامه ماخذتة على كد عقلة .. وهو بقى مصصم ماطلع من الغرفة بالعكس اجى كعد يم رأسها ولزم أيدها ..
كل هذا الوقت والصياح ولاواحد من اخوانة لو نسوانهم طلعو من غرفهم .. كلمن بغرفتة وساد بابة ونايمين مثل ضمائرهم .. فقط جبرية لان هي قابلة وتولد النسوان .. وهاي شغلتها

مر وقت قليل ولدت سمية .. وصدع صوت ألطفلة بالغرفة باقوى صوت .صوت صراخ يملأ أرجاء الغرفة و كأنها تحتج وترفض القدوم إلى هذه الدنيا ..

حجت وهي شايلة الطفلة من رجليها وتضرب على ضهرها جبرية ... صلاة على محمد وال محمد .. جتك بنية يصابر .. بالعافية
..يضحك ويباوع عليها وتقدم من كل عقلة يريد يشيلها
صاحت بي ..ولك وين تشيلها بدمها خل أغسل الها خل أنظف مرتك
لفتها ورجعت تكمل شغلها .. لحد ما نظفت سمية وسبحت الطفلة من الدم .. كل هذا وسميه تأن وتعض بالجرجف من الألم .. وصابر متمسك بأيدها ودموعة تجري ويه دموعها

كملت جبرية ونهظت ..
يله تتربى بعزكم بالعافية .. حجت وهي تمد أيدها لصابر بمعنى حساب الولادة
صفن بيها صابر .. تردين فلوس ؟
جبرية.. لعد شنو عيوني بلوشي هذا رزقي وماكو بلاش يله عيني حرك جيبك اريد ارجع انام ..
صابر.. شكد تردين
جبرية.. كلشي الجان قابل اخذ منكم مثل ما اخذ من الغريب وانت هم مهتلف وماعدك اليطلع من ايدك ميخالف..
راح صابر طلع الها فلوس من جيب صروالة وحطهن بأيدها
..صابر.. بس ذني عندي
هزت أيدها ما عاجبها الفلوس قليلة وطلعت .. ما قبلت لأن انطاها أكثر الفلوس الي عنده وخلة شي كلش قليل يادوب يجين ريوك .. وهن الفلوس الي حصلهن من يوميته بدفع العربانة ..
صابر مو فقير .. صابر ماكلين حقه اخوانة ومستولين على كل شيء ..
ابو صابر تارك.الهم محلات بالشورجة و بيتين والبيت الي كاعدين بي .. بس اخوانه ثنين كل واحد منهم لازم محل وكاعد بي والبيوت مأجريهم وكل واحد ياخذ ايجار بيت وكلهن بجيوبهم
وصابر مشغلي تحت اديهم بالعربانة يودي حمل ويجب حمل ويسخرون بي روح وتعال وبنهاية اليوم ينطو تفاليس يومية .. وحجتهم انو صابر خبل وبنص عقل ومايعرف يتصرف وخاف يتقشمر وينضحك علي ويطشر فلوسنا .. ومخلين هل حجى في سبيل يصيرون هم الكل بالكل بالفعل هم الكل بالكل بالمحلات وهو الفقير .. الي حتى اثاث غرفتة تعبان ..
ويوم الي رادو يتزوج ما قبلو يزجوه وحده معدلة و وكحة خاف بيوم توكفلهم وتطالبهم بحق زوجها لو اولادها بالمستقبل
اختاروا بنية خرسه فقيرة يتيمة وعايشة ويه ابوها وزوجتة وبعد وفاة ابوها بقت جوة رحمة مرت الاب .. وزوجها لصابر .. ونسوانهم مسويات سمية خدامة يكربن عليها ..
صابر وسمية جدرية ولكت غطاها ثنيهم نفس الذبة ناس فقرة وقانعين وساكتين بكلشي ..
صابر.. كابل سمية والطفلة وكعد يبوس بخدود الطفلة وسمية حتى ما تعرف شلون ترضعها .. بعدم خبرة خلت البنيه بحضنها وطلعت صدرها وخلته بحلك الطفلة لكن الطفلة رفضت ترضع من صدر امها .. ضلو حايرين بيها شلون يرضعوها ما يعرفون ثنينهم عديمين خبرة .. والطفلة تبجي ورافضة تستقبل صدر امها ..
بقو حايرين بيها وشلون يتصرفون وياها ماعرفو
رجع صابر توجه لغرفة اخو ودك الباب ..
اجاه صوت من داخل الغرفة اخو يصيح .. شلوووون اليوم ما ننطمر من ورة صابر ومرتة راح اطلع ادوس ببطونكم

بطل دك وتراجع خطوات للخلف بعد ما سمع صوت اخو وبقى متردد وحاير. لايكدر يرجع يدك ولا يكدر يبقى ساكت خايف على الطفلة .. دقيقة ونفتح الباب وطلعت جبرية زهكانة .. شكوو بعد مو جيبتها شتريد

.. بس بس الطفلة ماجاي تاخذ صدر امها ما تقبل وتبجي يمكن جوعانة
جرت نفس وزفرتة .. ولك ما صار شوي ومن صارت أنطوها فكة
حجى بخوف على طفلتة .. مو خطية
.. عود اذا بجت وما قبلت ترضع خلي شوي ماي دافي وفوكة ذرات شكر وشربها بخاشوكة جاي
هز رأسه بدون كلام وراح توجه للمطبخ يسوي الي كالت علي .. خلة شوي ماي وشكر قليل ورجع للغرفة
وصار ينقط قطره قطرة بحلك الطفلة
وسمية مخليتها على صدرها حاضنتها .. شافتها نامت
راح صابر جاب بطانية سفطها وسواها فراش للبنيه تنام بي وسمية خلتها بالفراش ورجع جاب غطوة ثخينة هم طبكها اربع طبكات وغطى بيها الطفله من البرد ..
جاب صوبته علاء الدين وطلعها برة الغرفة يشعل بيها لحد ما استقر نارها وبطلت تدخن دخلها للغرفة وخلالها بعيد عن سمية والطفلة .. لحد ما طلع وجه الصبح هو ما نام ولا غفت عينة صلة الصبح وكعد يدعي ويحاجي رب العالمين بكل عفوية .. شكرا يا رب شكرا لأن رزقتني بجاهل أني احبك احفضلي سمية وبنتي يااارب
كمل صلاة وبقى مكابل مرته وبنته ويفكر شنو يسمي الأبنية ..
شاف سميه غاطة بنوم استغل نومتها فرصه حتى يطلع يجب الها ريوك .. طلع فلوس ضلن عنده ما انطاهن لجبرية اخذهن وطلع راح لفرن الصمون اخذ صمون وأخذ كيمر من المعيدية الكاعدة يم الفرن وطاير فرح ويريد بس يرجع السمية خاف تكعد وما تلكاه
بطريق الرجعه شاف سيد حسين طالع من الجامع توجها اله سريع ويحجي بسرعة
سيد سيد صباح الخير
رد علي السيد وهو يلبس حذائة .. يا هلا بصابر هلا وليدي صباح العافية
حجى بفرحة غامرة روحه ووجها .. سيد اني صار عندي بنية
.. بنية حلوة كلش وزغيرة هلكدوتها ..
يالله يالله عالخير والبركة يارب يجعلها من اولاد السلامة وتتربة بعزكم .. وشنو سميتوها بسلامة ؟
رد بحيرة .. سيد بعدني ما اعرف اسميها شنو
.. لا ليش لهسه مامسميها الطفل كون اول ما ينولد يتسمى
سميها وليدي واذن بأذنها بصوت ناصي بس هيَّ تسمعة
.. صفن صابر حاير شنو يسميها .. سيد سميها انت كلي شنو اسميها اريد اسم حلو الها
ابتسم السيد لصابر وصفن شوي .. ورد علي .. شنو رأيك بأسم بسملة

رد بإعجاب من غرابة الاسم.. الله حلو أول مرة اسمعة ..
.. إسم بسملة إسم مميز .. وماكو أجمل من كلمة بسم الله الرحمن الرحيم..الي هيَّ البسملة ..
.. يعني بسلمة إسم من القرآن
.. أنت مو تقرة قرآن .. تعرف ؟
.. أي أقرة مرات بس مو هواي لأن اني من زمااااان بطلت من المدرسة
أبتسم اله ورد .. من تقرا القرآن أول ما تبدي شنو تكول ؟

.. أكول بسم الله الرحمن الرحيم
.. هيَّ هاي البسملة .. بسم الله الرحمن الرحيم
.. الله شكد حلوة أي أي راح أسميها بسملة
.. الله يحفظها الكم يارب ومثل ما وصيتك إذن بأذنها وكلها سميتج بسملة ..
تقرب صابر وباس راس سيد حسين .. رحم الله والديك سيد اني اروح الله وياك
.. هههه الله وياك ابني
رجع للبيت وهو طول الطريق يمشي ويبشر بالعالم والجيران صارت عندي بنيه وسميتها بسملة ..رجع بسرعة يريد يوصل السمية خاف تكعد وما تلكاه من وصل للبيت فتح الباب على بهدوء ويلتفت خاف تشوفه جبرية مشتري گيمر وصمون وهو گاللها ماعندي فلوس ودخل يتسحب
بس الحظ ما حالفة وطلعت جبرية من الطبخ شافته ..
واجته بسرعة
.اوكف اوكف هاي شنو محمل ؟ .. حجت وهي تعاين للعلاكة.. هلا هلا البارحة مو تكلي ذني الفلوس آخر شئ عندي وهسه محمل الكيمر والصمون .. تجذب علية ولك
خلة العلاكة ورة ضهرة .. جبرية شبيج انتي شبيج سمية نفسة وتريد أكل خطية وبعدين اني مو حماج شلون تأخذين مني فلوس أني مو مثل اخوج
.. عشتو حماي وذا حماي شنو يعني هذا شغلي وأنه حرت بمرتك ونضفتها وسبحت الجاهلة وكمطتها .. وتالي تنطيني تفاليس .. بس هينه أني أعرف شلون اطلع فلوسي من عيونكم بس خل تكوم مرتك وبسيطة
تركها واجه يروح للغرفة طلع اخو الجبير من غرفتة وحاچاه
... اشو اشوفك اليوم ما طالع بالعربانة شكو
.. خوية سمية جايبة واليوم ماكدر اعوفها خطية
.. وذا جايبة انت شتسويها تكمط الجاهل لو ترضعه هاي نسوان يمها موجودات انت شنو كعدتك ؟ .. الك بس اليوم وباجر من الصبح اشوفك مزروع يمي بالمحل عدنه غراض يرادلهن حمل ..
.. أن شاء الله ميخالف
تركهم ودخل لغرفته لكة سمية گاعدة ومخلية الطفلة بحضنها وتحاول ترضع بيها والطفلة بعدها رافضة ..
اشر لها بالعلاكة ويحجي وهو يأشر..
.. سمسمية جبتلج ريوك أكلي حتى تصيرين زينة ويصير عندج حليب ..
باوعت اله بعيون تعبانة حيل وما عدها رد غير ابتسامتها حجى بحزن وهو كاعد على ركبة كدام سميه وأيده على رأس الطفلة .. بعدها ما ترضع

رجع يكمل كلامة بإشارة ويحاول يلفظ اسم الطفلة ويخليها تفهم من حركة شفته ..
.. سيد حسين يكول سمي بنتك بسملة .. معاناه بسم الله الرحمن الرحيم كلش حلو راح اسميها بسملة .. بسسسسسملللة ..
ردت علي بابتسامة تعبانه وبعد ما تعبت من المحاولة بارضاع الطفلة رجعتها لمكانها أشرت لصابر انو تريد تغسل وتبدل لأن ابد محد دخلت عليها من نسوان حموينها ولا وحده كالت الها شنو محتاجة .. طلع صابر ملابس نظيفة الها ولزم أيدها حتى يساعدها تكوم .. كامت وتمشي بصعوبة وكادها لحد الحمام
اجاهم صوت مرت اخو
فاطمة... ياااااا هسه وكت سبحكم اريد أسبح اني عود
ما وصيج سميه خلصي الماي الحار وطلعي ..

تجاهل كلامها وساعد سمية تغسل وتبدل ملابسها ورجع سندها لحد الغرفة ورجع للحمام بدون استنكاف غسل ملابسها الوصخة وطلع نشرهن .. وراح للمطبخ صب حليب ورجع للغرفة ريك سمية .. وهو يسولف وياها رغم يعرف ما تسمعة وما ياخذ منها غير الرد بالاشارة لو الابتسامة ..
سووه مثل ما وصاه السيد إذن باذن الطفلة وسماها بسملة
خلص اليوم كله وصابر ما طالع من الغرفة على كد الحاجة
سمية لا ام ولا اب يتيمة ومحد الها غير صابر زوجة ابوها ما صدكت تزوجها وتخلص من حملها وانطتها لاول شخص دك بابها الي هو صابر .. لأن خرسة محد كان يتقدم لخطبتها .. ونسوان اخوان صابر لا محنة ولا عطف عدهم يعني بنفس البيت ما وحدة وصلت الها وكالت الها شنو محتاجة .. حتى وقت الغدى صابر هو طلع للمطبخ صب صينية وجابها يتغدون بالغرفة .. كعد كبال الصينية بحزن ومهضوم .. وهو يسولف ويعرف ما تسمعة لكن ما اله غيرها يشكيلة ..
حجة وهو يجر نفس بحزن .. ليش هيج محد يجي ويكول شنو محتاجين مو يدرن بيج جايبة ومحتاجة أحد يداريج ؟
وحتى اخواني ولا احد كالي بالعافية .. ليش ما يحبوني اني ولله احبهم كلش.. وحتى من يحشموني اركض الهم .. ومن يصيحون علية ما ارد عليهم اكول اخواني .. ابوي من مات ولله كاللهم ديرو بالكم على صابر وحنو عليه وامي قبل لاتموت تكلي دوم اني خايفة عليك اذا تغمض عيني ذول ياكلولك لحم ويذبوك عضم همه ما سوو بوصية ابوي بس يصيحون عليه كدام العالم بالسوك ويغلطون عليه وياخذون الفلوس كلها الهم .. عود ليش هيج اني مو اخوهم ..

يحجي واختنك بعبرته .. وسمية رغم ما تسمعة لكن تفهمة من أشارتة وتحس بحزنة.. لزمت أيده بحنان واخذتها تبوسها وتبتسم اله محاولة انو بهذه الابتسامة تصبرة وتطبطب علي ..
لملم حزنة واتجاهل العبره الي ملت صدرة وغير الكلام بسرعة وهو يكولها .. يله اريدج تأكلين زين اريدج ترضعين بتي شبعيها .. وكعد يسوي لفات الها وينطيها .. وهو يحجي وياها ... باجر اروح للشغل تدرين شجيبلج .. وصار يعدد على أصابعة .. اجيبلج تفاح و تمر وواجيبلج تكة تكة بيها كرفس زين للدم واجيبلج شربت مال برتقال
نام بيومها وهو فرحان اول ليلة ينام بيها وهو أب وبنته منورة غرفتة .. وهو يفكر باجر يشتغل هواي حتى يطلع فلوس تكفي يجيب لسمية التفاح والتمر والتكة والشربت
طلع ضوء الصبح يعلن يوم جديد.. راح صابر توضى وكعد يصلي .. كعدت سمية على صوتة ساعدها قبل ما يطلع حتى تبدل ملابسها وصلها للحمام غسلت وبدلت وغسل الملابس الي نزعتهن وشرهن رجع الها وصلها للغرفة وركض للمطبخ سوالها حليب وصب اله جاي واخذ جبن ورجع يتريك هو وياها ..
اجاه صوت اخو من الخارج يصيح عليه

صالح :- صابر ولك صابر اطلع صار الظهر واحنا هنا فضهاا
ترك من أيده باستعجال وكام يلبس قمصلتة ورجع لبس جواريبة وهو يحاجي سمية .. ديربالج على روحج وعلى بسمة اني اني بلكي اكدر ارجع من وكت .. دنك بأس الأبنية .. وطلع لإخو لكاه كاعد بالسيارة ومنتضرة اول ما صعد صاح بي
صالح : لو مكمل نومتك فد نوب شنو انت واني متانيك صار ساعة دعيدها مرة الثانية وشوف اذا ما تركتك وخليتك تروح مشي مغسول الحظ
صابر: سمية خطية ساعدتها وخليتها تتريك
صالح: واحنة بعد ماعدنة شغل وعمل بس سمية ضل مكابلها وكاعد هسه لو تسولف مثل الاوادم جان شسويت شو مخلصتها بس تهز برأسها وتاشر بايديها لافهم ولاعلم لا وانت طاير الي يشوفك يكول جايبتلك ولي العهد هي بنية والله يعلم اذا ما طلعت خرسة مثل امها ..
نقهر صابر من كلام اخو لكن شنو يسوي لشخصيتة وطبعه الفقير حاول يقوي نفسه ويرد .. خوية ليش هيج تحجي على مرتي وبتي سمية حبابة وخوش مرة ولله
صالح: شلون راح يخليني انزلة واخلي يلحكني ركض لا تترادد وياي من احجي ..
دار صالح وجها ليكدام مركز بالسياقة وهو يحجي بصوت خافت : حقك فاك حلكك عليها وين تصحلك هيج الله مأخذ لسانها ومنطيها خلقة مثل العندي جنها حولي وتجوعر فوك راسي ..
وصلو للشورچة وازدحام يوم جمعة يجون اهل المحلات من المحافظات ياخذون بضاعة مثل هيج يوم هو يوم السعد للكسبه عكس باقي الناس الي تاخذ من يوم الجمعه يوم راحه الها،،،،، الناس جاي تفتح وكلمن يكعد اباب رزقة
واخوان صابر ثنين صالح وصادق كل واحد عند محل كاعد بي من ايام ابوهم محلات أقمشة وهنه بالأساس ترجع ملكيتهم للأب وصابر اله حق بيهن حاله حالهم
بس مخلي يشتغل وياهم بعربانة يوصل بضاعة
سحب عربانتة من مكانها حتى يبدي يلگط رزقة اخوانة مخلي يشتغل بس جوة اديهم لكن بعد ما صارت اله طفلة فكر انو لازم يزيد شغل حتى يكدر يوفر احتياجاتهم رغم التعب بهذا الجو و البرد
كعد على العربانة كبال محلات اخوانة ومر الوقت وناس رايحة جاية تشتري .. اجا صوت صادق الأخ الوسطاني
_ صابر تعالى وصل الحجي لراس السوك و لا تأخذ منه كروه انطانيها ..

تلاشت ابتسامة صابر لان دائما يگولولة هذا الكلام بعدين ما ينطي غير يوميتة و باقي الكراوي الي يطلع بيهن يخلوهن بالجيب وهو يستحي يطالب بحقه،،، ساعد الرجال الجبير يحط علاليلك القماش مالته و طلع يدفع بالعربانة أثناء طريقة بالرجعة وكفته مرة محملة هواي علاليك فرح و وكف يمها بسرعة حمل اغراضها وهي هم كعدت بالعربانة وية الأغراض وقرر انو بعد يأخذ كرواي بدون ما يكول لاخوانة .. وصلها وأخذ كروتة فرحان ورجع للمحل.. صاحة صالح
صالح : تأخرت وين جنت ؟
ارتبك لأن روحة النقية ماتعرف الكذب .. جنت غير جنت اوصل الرجال
صالح: صار لك ساعة من وصلت الرجال وين وليت ورها
صابر: مارحت .. رحت شربت جاي
صالح: خوش دروح جيب ثنين جايات بساع يلة
ترك صابر العربانة وهو فرحان لأن اخو ما كشفة وراح بسرعة لأ أبو الچاي الي بالسوك جاب جايات لأخوه والرجال الكاعد يمة شربوا جايهم وهم يسولفون كام الرجال وهو يحاجي صالح ويطلع الكروة من المحفظة
..يالة ابو مهدي اني رايح اعتمد عليك اريد القماش يوصل وراي لأن عندي نقص وناس طالبتة مني
صالح: عيوني الك حجي وراك فوراً راح اوديلك الأقمشة بيد صابر
راح الرجل بسيارتة وكام صابر حمل الأقمشة للرجال للمحل مالتة الي هو مسافة بعيدة ووصل للمحل ودخل
: حجي وصل القماش
كام الرجال وهو يحشم الصانع ينزل القماش من العربانة وطلع فلوس

: هاك وليدي كروتك
: حجي بس انت انطيت الكروة لابو مهدي
ابتسم الرجال وهو يخلي الفلوس بيد صابر : مالك علاقة بذيج الكروة هاي كروتك انت
صابر: لا حجي خاف ما يقبلون
خلة الفلوس بايدة وسدها.. اشش مالك علاقة ذني سمعت اجتك بنيه هذه نقود الها
ضحك صابر بفرحة مجرد ما انذكر طاريها .. اي اي بنية حلوة كلش اسمها بسملة واني اكلها بسمة ..
جاوبة الحجي : ربي يحفظها الك .. جر نفس وكمل كلامة .. صابر لازم تأمن مستقبلها إذا الله رزقك بعد اطفال إلى متى يبقون صالح وصادق همَّ ماخذين كلشي وانت مشغليك جوة اديهم .. اني ما اريد اتدخل انتو تبقون عائلة بيت بس اني احبك انت رجال فقير وماتحب المشاكل بس ياصابر الوكت هذا الي مثلك ساكتين ما يسلكون بي اني اعرف انت هاي ذبتك العتب على اخوانك الي بعد ما مات ابوك جارو والطمع عماهم ..
صابر :خواني .. خواني أنه احبهم بس هم يصيحون علية وينطوني فلوس شوية بس ميخالف أنه ماريد اتعارك وياهم
هز رأسه الحجي بابتسامة لصابر يعرف هاي طينته والحجي ما يفيد : الله ينطيك على كد نيتك الصافية
راح جر طول قماش وكص منه وخلاه بعلاكة وانطاه لصابر : هاك صابر هاي هدية للمرة وديها كوللها منك مو مني فرحها بيها ..
صابر: مشكور مشكور حجي
اخذهن وطلع من المحل فرحان بالفلوس الي حصلهن وبقطعة القماش ومنتضر شوكت يرجع للبيت ويفرح سمية بيها .. بطريق الرجعه هم حصل كروة وجمعهن
مر اليوم على هل حال يروح ويرجع بهل عربانه لحد ما صار وقت التعزيل .. ركض جاب تفاح وتكة وشربت لسمية
ورجع ..
صالح : شنو هاي شجايب
صابر: ها لسمية تفاح
رجعو للبيت رجع فرحان ومتلهف يدخل الغرفة .. بس دخل لكة سمية تتلوع من الوجع وملابسها غركانة دم ...
**

2



تقدم الها بهلفه وخوف وهو يتلمس اديها وعيونه تفتر على جسمها يشوف شبيها ومن شنو جاي تتألم همس بصوت يرجف من خوفة عليها يسألها

_ سميه شبيج شنو يوجعج ليش هيج جاي تتوجعين ..

ردت عليه بعيون ماليها الدموع وتأشرله أن يساعدها تگوم من الگاع .. تمسك بأيدها يساعدها تنهض حاوطها بيديه ساندها تمشي بعدها بأول خطوة رجعت كعدت بوجع ماكدرت تتحرك والنزيف ماخذها ..

بقى محتار شنو يسوي وشلون يتصرف طلع متوجهة بقلق للباب و رجع الها يحجي وياها

_ لا تخافين سميه هسه اصيح الجبرية تشوفج هسه

طلع بسرعه متوجهة لجبرية لكاها بالمطبخ تسوي عشاء تقدم الها حاجاها بقلق مالي صوتة

_ جبرية لحكي السمية فدوة

جاوبته بكل برود تكلب بجدر التمن ..

_شنو شبيها ؟

_ مادري دخلت لكيتها تبجي ودم هواي هيج تارس ملابسها والفراش وما تكدر تتحرك فدوة حباية تعالي شوفي ها

فرت الجفجير ما مهتمه و كالت ابرود أعصاب

_ اي تلكاها ما مبدلة من الصبح. وهي نفسه اكيد ينزل دم منها هواي خليها تبدل شسويلها يعني قابل اجي ابدل الها زعطوطه هي

صابر: بس مبين بيها شي ولله حيل متاذية انتي مو شغلج تجيبين نسوان وتعرفين دتعالي شوفيها شبيج

نفخت بضيقة وقلة صبر : صابر ليش ما تولي مني وخل اكمل عشاي اطمئن ما بيها شي شمسوين قابل شادين حمل على ضهرها شو كاعدة بغرفتها تلكاها ما مبدلة وهيج ملابسها ندمرن

عبست ملامحه بيأس بعد ما جان متأمل منها المساعدة تركها ورجع للغرفة شاف سميه على وضعها وماتكدر تتحرك من الوجع ..

راح دخل الحمام ترس جدر الحمام ماي
و شاله أخذه دخلة للغرفة ..

صابر: سمية خل اساعدج تبدلين يلة






طلع الها ملابس نظيفة
و ساعدها تغسل وتغير ملابسها . بدل حتى فراشها جان متدمر ورجعها لفراشها راح ذب الماي بالحمام وغسل ملابسها الوصخة ورجع الها

كعد كدامها ويسأل بيها ليش هيج صار .. صارت تأشرلة وتفهمة ..انو كانت جوعانة ومحد اجة وجاب الها شي تاكلة طالعة من الغرفة حتى تاكل وفاطمة جابرتها تغسل المواعين وترتب المطبخ وهي نفسه وكوة تتحرك نص من كلامها يفهما من الإشارة ونص ما يفهمه ..

نقهر حيل من الي يسوون بيهم هو وزوجتة وعلى تصرفات زوجات اخوانه الي ما عذرن ولاقدرن سميه نفسه والها يومين جايبة ويردنها تشتغل بالبيت وطول اليوم ما وحدة منهم دخلت عليها وشافتها شنو محتاجة
نقهر من قساوة كلوبهم عليه وعلى زوجتى

سحب نفس بقهر و حاول يقوي نفسة وياخذ موقف ..

تركها وطلع يحاجي اخوانة يمشي بخطوات مترددة وخايف من ردة فعلهم رغم يعرف اخوانه ما ينطون بنسوانهم بالعكس كلشي يسون هم واگفين وياهن بس مايگدر يسكت على الاذية أكثر جابو عمرهم يأذو و وصلت الاذية لزوجتة وبالمستقبل لاطفال ..

لكاهم كاعدين يتعشون ولاهمهم يتمنى يتعصب ويصيح ويطلع حقة من عيونهم لكن ضعفة مسيطر علي ويخاف منهم .. بلع ريك وحاول يحجي بثبات ..

_ خوية صالح اريد احاجيكم انت وصادق

رفع راسه صالح باوع اله وهو ياكل و رد علي صادق وهو يأكل ..

_خير شرايد

جر نفس وكال : اني اريد اعزل بيت وحدي ماريد اضل هنا بعد

اشرلة صالح على الباب بكل برود وبدون حتى ما يباوع اله

_هذا الباب كدامك يفوت جمل الله وياك منو لازمك ولي وين ما تريد خفةً و راحة

فرك اديه وحده بالثانية بحيره شلون يبدي كلامه جر نفس قوي و حجى بخوف وتردد

_اريد اريد فلوس اريد حقي من بيت ابوي واني اتنازل الكم ونطوني حصتي فلوس اريد أشيل

باوعو صالح وصادق واحد بوجه الثاني وصارو يضحكون بأستهزاء حجى صالح

_ ليش تخليني اكوم اغط راسك بطاسة المرك .. منين نجيب لك فلوس حصتك ووين نروح احنة تالي وكت بيت ابونا ينباع على مود حضرتك تريد تعزل.. تريد تشيل گلعه روح وين ما تريد محد مجلب بيك
وفلوس وحصص ماكو مو جاي تدور ورث براسنة بيت ابونا وكلنة كاعدين بي نچب واكعد حالك حالنة ..






رفع صوته عليهم بقهر وهو يقبض ادي ويدك رجله بالكاع

_ما انجب ما انجب لا تغلط عليّ اني مو زغيررر واريدددد حقي انتو ماخذين كلشي الكم وبس تصرفون وتشترون واني باقي كاتلني الضيم اريددد حالي حالكم ماكلين حقي ..

بعده يحجي وكام صالح الة تولا راجديات و كفخ

_ ولك مخبل طالع صوتك من شوكت هيج توكف بوجهنة مو اكسرك تكسر ولله اسحك راسك برجلي

كردة فعل ودفاع عن نفسة دفع صالح حيل خلا تراجع للخلف و وكع بالكاع وصاح بقهر و عجز

_ انتم لا ترحمون ولا تخلون رحمة الله تنزل عليَّ اذا اضل هنا نسوانكم مالها غرض بسميه ولا يشغلنها لو تنطوني حصتي اطلع ..

گام صالح عيونه براسه لان دفعه تگابل عليه هو و صادق ثنينهم نكلبو وحوش عليه مو اخوان ذياب وينهشون بلحمة لزمو جرمو بي

_ ولك مخبلللل بنص عقل تريددد ننطيك فلوس الي ابوي جاب عمره تعبان بيهم حتى تضيعهن حتى ينضحك عليك وتضيع تعبنا هو انت شنو ونخلي بيدك فلوووس كلك خلك مخبل وحق الخلقك نذبك بالشماعية بنص المخابيل ونخلص منك .. اذا وكفت بوجهنا بعد ..

غطى وجه بيديه كل الي كدر يسوي يحاول يحمي نفسه بيديه ويشاكف من الضرب لحد ما جبرية وفاطمة جرنهم بعد ماكانن يتفرجن وياكلن

جبرية : يبوووو دكافي خل يولي انتو تأخذون بكلامة هو شيفتهم هذا ..

ووجهت كلامها لصابر الي كاعد ولام نفسه وادي على رأسه ...

_وانت ولك صابر ما تستحي موعيب هيج تحاجي اخوتك.الكبار كوم منا سممت لكمتنه عساكم بالسم كون انت وذيج الحية

ردت فاطمه عاوجه حلگها و تحجي بكره

_ هاي الخرسه هم طلع بيها بلى علمتك و دزتك مو لان انت ما يطلع الك حس ماكو غيرها تنحش بيك ع خوانك

جرنهم من فوكاه وراح يركض دخل بالغرفة يبجي مثل الطفل .. شافتة سمية وكامت اله تخفف عنه بصمتها ودموعها بدون صوت
تمسح بدموعة

صابر: اخوواني حقراء يكرهوووني اني ما اريد أبقى وياهم بعد كمت اكرهم اني

ضل صالح واگف متخوصر يباوع ع غرفة صابر التفتت ع صادق و گال






صالح :- هذا اشو صاير يوكف ويطالب بحق وفلوس اول تالي جان صوته ما ينسمع

صادق: خل يولي اذا اخذ حصته يكوم يطشر بدون فهم ولا علم ينضحك عليه بكلمتين والمحلات اشو احنة الي واكفين بيهن ومشغليهن قابل هذا المسودن عربانة هواي عليه

ردت جبرية : لا تلوموا مو صوجه صوج هاي الخرسه باقي فاك حلكه عليها لا تشوفوها هل ما تحجي بيها كل البلاء ترى خوفكم منها خوش ولله تعبكم يروح نصه لذول

صالح: انطي وجع فوك وجع ينجب ويگعد ويسكت

فاطمة: لا تنطو مجال ادگروا دگر حتى لا يوكف وكفتة وكفته مرة ثانية
اليوم حجى وارد حق باجر حتى شكوى يشتكي عليكم خوفكم منه ومن هاي الخرسة العندة ..

باوع صالح ع صادق ثنينهم نفس التفكير و يضمرون نية السوء لاخوهم

مرت الايام والأشهر والوضع مثل ما هو ما تغير بي شي سمية خدامة الهن يكربن عليها وصابر يشتغل جوه اديهم واذا اعترض لو حجى ينضرب ويصيحولة مخبل

وكانوا يتعمدون يصيحون آله مخبل حتى صدك يخبلوا
والطامة انو وره ولادة بسملة باربع اشهر رجعت سمية حبلت وجابت سلوى وزاد الحمل عليها وعلى صابر
ورادت تشيل ولو شوي من حمله ..

وصته جاب الها مكينه وهي تعرف تخيط متعلمه من مرت ابوها قبل الزواج وبدت شوي شوي تخيط ونسوان الجيران الي عدها قطعه تجيبها الها ومن وحده لوحده بدت تصير عليها رجل

تخلص شغل البيت وتكعد تخيط .. وجبرية وفاطمة من شافن عليها رجل اشتغلن خباثة بس يحسن بيها كعدت تخيط يصيحن عليها على شغلة ..

جبرية:سسسمممية ولج سمممية كومي هلسي هاي الدجاجة سمممية

فاطمة: هو انتي تصحين عليمن هي وين تسمعج

: ولله خوش انوب من نريد شي منها نتعنالها لغرفتها

راحت الها جبرية وهي مدنكة على المكينة
رفعت راسها من شافت جبرية دخلت
وصارت تاشرلها :كووومي هلسي الدجاجة وكطعيها يلة

: ردت عليها بإشارة انو بس تكمل الي بأيدها

جبرية:ءءءء أبا أبا أبا ءءء هي شنووو شفتهم منج اني كووومي هلسي الدجاجة كبالي يله

تركت الي بايدها وكامت تحمي ماي وكعدت تهلس بالدجاجة كملت تنضيف وكطعتها وخلتها بصينيه واجت تغسل حتى ترجع تخيط






رجعت الها فاطمة : طبخيييها طبخيييها يله سويها حمرررة وسوي تمن

رجعت للمطبخ ووكفت تطبخ الغدة

وعلى هذا الحال بقن وياها

بهذه الفترة صابر صارت بي مثل الحالة النفسية ..
يحجي ويه روحه ويضرب وياذي اي واحد يصيحلة مخبل لأن حتى ولد اخوانة تعلمو من اهلهم يكولة مخبل .. وبالسوك وين الي مسوي روحة عود لوتي ونجر يكعدون يصنفون علي ويضحكون مستغلين
طبعة الفقير وعقله الي على گده وإخوانه بس اسم بالجنسية حتى من يشوفون أحد ناصب علي ما تهزهم الخوه و الغيرة عليه ولا يهتمون لحد ما صدك تازمت حالتة وصارت تصرفاتة وطريقة كلامة مثل المخبل ومن يسمع احد يكلة مخبل يضل يصيح ..

_ اني مو مخبل اني كلشي مابيّ مابيّ اني عاقل ولله عاقل

صابر كان احن أب وزوج بالدنيا روحه ببناته وزوجته . كان يحس بالأمان فقط بغرفتة وسط بناتة صار العالم خارج الغرفة بالنسبة اله مثل غابة وحوش هذا يغلط علي وهذا يصنف وهذا الي يكلة خبل وذاك اليشمر عليه حجار حاربوا محاربة .

وذاك من ذاك الطيب الي ما يقبل على تصرفات البعض
كان فرحان بهذا اليوم لأن اول يوم البسملة بالمدرسه طاير بيها وهو يشوفها بالملابس المدرسة وتلمع من النظافة شالها وطلع بيها من البيت ..

حجت بسملة وهي محاوطه رگبة ابوها بأديها

بسملة : بابا نزلني امشي وحدي اريد

هز راسه بـ لا

صابر : لا بسومه لا اذا نزلتي حذائج تتدمر تراب وخاف تطيحين وملابسج تتوسخ

حجت بملل : ما اوگع ما اوگع اني جبيرة اعرف امشي بابا اووف نزلني حباب

باقي متمسلك بيها ولاف ادي عليها شايلها يرفض يخليها تمشي و تخرب نظافتها و كشختها

_راح نوصل اريدج من تدخلين المدرسة نظيييفه وحذائج حلو ونضيف واريدج احلى من البنات واريدج تصيرين اشطر منهن كلهن هيج كله عشرة من عشرة

بسملة: اي بابا ميخالف بس نزلني اوووف اريد امشي

صابر: راح نوصل بابا حبيبتي بسومة انتِ شبيج تضوجين مني ؟ شبيج شنو ريحتي مو طيبة

عگدت جبينها من كلامه و نبرة صوتة الحزينة باستة من خده و شددت اديها تحضنه أكثر






بسلمة: لا بابا احبك ولله وريحتك طيبة

: لعد ليش ما تردين اشيلج غير احبج اني واشيلج

: يلة ميخالف شيلني اني احبك

فاتوا من ولد كاعدين براس الشارع عبروهم ماحس غير طابوكة نضربت بضهرة دار عليهم وحجى :

_ انتو شبيكم مخابيل ليش تضربون وتخبثون على الناس

صارو يضحكون علي ويهزون بأيديهم بسملة بحرگة طفولة تفلت عليهم وهيه بحضن ابوها بس التفلة اخذت مسارها الغلط وطاحت بوجه صابر نشغت وخلت أيدها على حلكها

_العفو بابا عليهم مو عليك .. صارت تحجي وهي تمسح بوجه ابوها بردن قميصها تعصب صابر ..

_ لاتمسحين بقمصيج توصخ توصخ ..

باسها بخدها وكمل طريقة وصلها للمدرسة بقى وياها لحد ما كعدها بالرحلة وطلع كعدلها بالباب مال مدرسة وكل ما تصير فرصة يدخل عليها للمدرسة لحد ما خلص الدوام اخذها ورجعو فرحان بيهم فرحة الدنيا

ولأن هو يعرف يقرا ويكتب على كدة يبقى ورا رجعتة من شغلة يدرس بيها ويكتبها ويحفضها املاء ..

يرجع من الشغل كل يوم جايب لبناته شغلة من المحل واكيد ماينسى سمية ..

الي يشوفة ويشوف حركاتة ياخذة على كد عقلة .. لكن صابر كان عقلة اكبر من كل واحد ينتقص منه ملتزم بصلاتة وصومة ويكول لاطفالة هذا صح وهذا عيب وهذا حرام هذا حلال ما يكره ولا يحقد روحة نقيه وطاهرة

وگلبه صافي ونظيف لكن كل مؤمن مبتلى وصابر بلائه اخوانه وكع بيد اخوانة الي استغلو طبعه وضعفه واكلوا حقة وما ينطوا غير يومية شغلة وكأنما مسوين فضل عليه ..

بذاك اليوم دخل صابر من الشغل يعرج ورجلة ملفوفة وصالح وراه يحجي عليه

صالح :ما تكلي شمالك انت فشتلني كدام العالم تبجي جنك زعطوط شوكت يصير برأسك عقل

تنهد صابر ضايج من كلام اخوه الي يستهزء بألمه

_ رجلي ولله وجعتني كلش حيل

صالح: كلش حيل حتى سوالف مثل الاوادم ما تعرف تسولف باقي حلكك يلزك بس تعرف توكف تصيج اريد فلوس. اريد اعزل

طلعت جبرية من غرفتها وشافت صابر كاعد بالهول ورجلة ملفوفة حجت وية صالح






_ها شكو شبي هذا شمالها رجله

حجى وهو يفر ايدة بسخرية

_ شبي اثول ثور الله بأرض الله لافهم ولا معرفه يمشي جنه هبش ما يباوع لدربه اهم شي يلم فلوس ويحط بجيبة

رفع صابر رأسه وجاوبه معترض

_ خوية اني عندي بنات و مرأه شلون اعيشهم اذا ما اشتغل

صالح : ولك...

نطقها بغيض يريد يهد علي وكض روحة

_ ولك انت ما يغزر بعينك الي يسمعك يكول مشغليك ابلاش مو جاي انطيك يوميه ما كفتك طلعت تاخذ حمل من وراي

دنك صابر لازم رجلة : قليلة ما تكفي واني اريد.بناتي ادللهن

جبرية : هسه فهموني شمالها رجلة هل مصخم وين دايس شواكع عليه

صالح : يحمل حديد ووحده من الحدايد ثكيلة طايحة على رجله ورمت وصارت رزكة ونوب كاعد بنص الشارع يبجي منها ..

رجع وجه كلامة لصابر

_ما استحيت على روحك زلمه شكبرك وأنه عبالي تصوبت برجلك طلع بس طايحة فوكها حديدة ..

يستمع الهم ولكلامهم وساكت وحاير برجلة الي متورمه واضفر رجلة الجبير مشلوع .

دخلت سمية للهول وشافت صابر كاعد ومتوجع .. اجت كعدت يمة بلهفة وخوف وتسألة بنضراتها وتأشرله .. فهمها ورد عليها يحجي ويأشر ..

_ سمسمه لاتخافين اني زين بس رجلي وكعت عليها حديدة ..

بقت تلزم برجلة وهو لازم أيدها يطمنها انو مابي شي رغم وجعه والضربة كانت كلش قوية ..

صالح يباوع عليهم ورجع باوعت لزوجتة وفر ايدة باستهزاء ..

_ شلون ثنين جدرية ولكت غطاها .

. رغم شكد يستهزء بصابر وسمية بس عيونة ونضراته على سمية ابد ما كانت نضيفة ..

دخل صادق معصب والشرار يطفر من عيونة جاي وراهم وستوة وصل دخل حامي ومتحلف مجرد شاف صابر كاعد تقدم اله بشر وكفخة على راسة حيل ولزمة من ياخة قميصة يعت بي ويكلة

_ انت رايددد تفشلنه كدام الناس وبس ولك مو مشغليك ويانة ومحترمينك بس انت مو مال احترام هيه كوه






جر صابر روحة من ايد اخوه يعدل ياخته و يحجي

صابر : خوية أنه شنو سويت ما تكلي شسويت شسويت بكت نهبت اشتغلت بالحلال عيب حرام

صادق : عينك تضيك ورايح تحمل بعربانتك من ورانا اثول مطي ولله اكطع رزقك واخليك بعازت الدينار جاي تشتغل وننطيك يومية شغلك تاكلها وتنچب رايح تشتغل وتحمل من ورانة وتلغف بجيبك وشوف ثولك رجلك رادت تروح طبك الف مرض لو مكسورة جان ارتاح گلبي بيك ولك اني يجيني حجي رؤؤف يعاتب بية من وراك ويكلي ليش هيج كاعدين بمحلات وتاركين اخوكم حمال عود مسوي روحك فقير كدام الناس واحنه المو زينين ..

حاول صابر يبرر الهم و يفهمهم ان نيته بس يحصل فلوس زيادة حتى يكفي بناته مو يطلعهم مو زينين كدام الناس

صابر: اني ما اطلعكم مو زينين اني اليومية ما تكفيني وبركبتي عائلة لاحجيت ولا كلت زودوني جاي اطلع من يجي حمل احمله بالعربانة ما مديت ايدي بجيوبكم ولا اخذت حقي الي انتوا ماكلينه شتردون مني بعد ..

همه سمعو كال حقي ماكلينه لو نهدوا عليه مثل العدوان كل واحد يضرب بصفحة سمية لاصوت عدها يساعد تصيح بيهم ولا تكدر على ثنين زلم تتدافع وياهم كل الي كدرت علي تذب روحها فوكه وتحامي اله وبناتة يباوعن اله ويبجن تقدمت بسمله بطفولة تجر عمها من قميصة دار عليها ودفعها وكعها بالكاع وختمها صالح من لزم صابر من من هدومة وحجة بحقد ..

_ اااااني كم مرة كايل هل كلام ما تعيدة حق وحق يا حق هذا ولك فلس احمر ما الك هذا كله ملكنه فضل من يمنه ومشغليك ادوسك برجلي ولله ادوسك برجلي يا صابر احذركك ..

كمل كلامه ودفعة .. جرته سمية وهو يبجي بقهر وبضعف لغرفتهم حطت بناتها وسدت باب الغرفة وكعدت تفهمه انو خل نطلع من هذا البيت ونتركهم لكن صابر ركب رأسه :

هذا بيت ابوي مو بيتهم وما اتحرك منا ما اطلع الا اشتكي عليهم ..

تقدمت بسملة وكعدت بحضن ابوها وتحاجي

_ بابا عمو صالح وعمو صادق ليش يكرهوك وعمه جبرية وعمه فاطمه ليش يكرهن امي ويخلوها بس تشتغل و يضربني واني وسلوى

صار يمسح بدموعه بدون ما يرد عليها حتى هو يريد جواب يطفي ناره شنو سواه حتى اخوته يكرهوا هيج مو الخوان سند ليش اخوته هيج بس يردون يكسروا






نام بقهرتة بدون حتى ما يتعشى ولا يخلي لكمه بحلگة وما يعرف شنو ينحاك من وراه .. ثاني يوم صبح رجلة مورمة بالزايد ولاكدر يتحرك لو يدوس عليها وبقى نايم على غير عادتة كعدو على صوت الباب يندك وصوت صالح

: هوووي صابر شني نبقى منتضرين حضرتك ماتكوم نريد نولي ..

يسمع صوت اخو لكن مارد عليه ولا تحرك من فراشه كامت بسلمة استوها كاعدة من النوم تريد تفتح الباب انتبهت الها سمية تريد تفتح الباب وكفتها وكامت حتى تطلع وياها فتحت الباب صار بوجها صالح

_ صفن بيها شوية وهو يحسد اخو على هيج مرأه اشر الها على صابر

_ مايكعد نريد نروح

صابر يسمع صوته ويعرف سمية ماترد عليه رد عليه من مكانه

_ما اطلع رجلي توجعني مورمة

دخل صالح الغرفه وتعمد يطخ بسمية

_شنو وهاي الناس التجي تاخذ بضاعة منو ينكل الها

صابر : ماواكفة علية خوية اني ماكدر اتحرك

رد صالح عين على سمية وعين وعلى صابر

_خوش ضل اليوم ارتاح .. وعود لاتشيل بكلبك على الصار البارحة احنه اخوان وعيب تكول ماكلين حقي ..

هز رأسه صابر و اندار انطاه ضهره استغل الوضع واجة يريد يطلع لكن سمية فزت من حركته وهو يمد ايده على جسمها من ورا فزت من مكانها وفتحت عيونها وبقت ترجف صابر حس بيها وفوراً دار وجه عليها وصالح طلع من الغرفة ..

صابر: سمية شبيج

بقت ترجف وصارت تهز برأسها وطلعت من الغرفه دخلت للحمام تغسل بوجه بسملة واديها ترجف من الصار..

طلع صالح يروح لشغل هو و صادق الي يمشي و يحجي بحقد

صادق : أكلك هذا صار فترة حقي وحقي شجاه

صالح: دخل يولي هو انت تاخذ بحجي هل خبل ياحق

صادق : لا صالح لا،، خوفك من هذا الي تكول علي خبل باجر يوكفنه على تك رجل ويطالب بحقه مو بعيدة حتى شكوى يشتكي ويطالب بحقة واكيد الشرع والقانون وياه
لأن مستندات البيت والمحلات كلها بإسم ابوي لا تنسى يعني اذا سواها واشتكى صدك اكيد راح يطلبون طابوا البيت والمحلات وساعتها حقه صدك من عيونة يطلعه ولا تنسى الناس الجيران وربعنة بالشورجة كلها شهود وكلها تعرف هاي المحلات أساسها لأبونا وأكيد صابر اله حق بكل فلس ساعتها شراح يطلع النه احنه






صالح: هسه انت شفته اشتكى هو شيعرف هذا تره صابر عقلة طكة ونص ونكدر نكون احنه مسؤولين من يمة واكيد اذا المحكمة شافوا هيج عقلة راح يعرفون هو مو كد مسؤولية ومايعرف يتصرف واحنه اخوانه مسؤولين عنه وعن عائلته .

صادق: يا طكة ونص شبيك انت ما تشوفه شلون يحجي تره هو يخبل بروحه وشوفة عينك ساعة الي يصير بيها حق وفلوس شلون يحجي ويريد يطلع حقه ..

صالح: هاي سهلة .. نخبلة أزيد من هذا خباله

صادق : لا لا هذا مو حل لازم اكو غير حل ..

صالح : وشنو الحل يل فهيم

صادق : صالح شوي افتح عقلك وياي سناء زوجناها وكلنالها مالج شي عدنة وفلوس ابونه ما تروح للغريب وسدينة حلكها بكم فلس بس صابر مراح نكدر ننكر حقه اذا المستندات نعرضت كدام قاضي لو محامي يعني الورث
يتقسم على تلاثة ولازم ننطي حقه من البيتين ومن المحلين وكل واحد ياخذ مثل الثاني بالضبط يعني هذا المخبل يصير حالة حالنة صاحب ملك بس لو يتقسم على ثنين هنا راح يجي بالعدل محل الك ومحل الي بيت الك وبيت الي .. وماكو ثالث

صالح: وشلون نرهمها هاي

صادق: لو بس الله ياخذ عمره جان رهمت احسن ما ضال مفشلنة كدام العالم بخبالة وحركاتة المزعطا تضحك علي ولله اتفشل كدام الناس. اكول اخوي اغط بهدومي باقي مبهذل مخربط ولازك بهذا كبوسة المزرف

صالح: شني السالفة نخنكة ونموتة قابل

صفن عليه صادق وافكار اشكال اتدور براسة بس حتى الورث يتقسم على ثنين

صادق: شلون بله تكدر تخلي كدام الناس والقاضي مخبل وفاقد الأهلية

صالح: بكم فلس كلشي يصير

صادق: ولله هذا اخوك طالع لسانه وصاير يوكف ويطالب وخايف بيوم ما نحس نفسنه غير واكفين كدام قاضي من وراه

صالح : هسه عود خل يجي ذاك الوكت ونشوف شلون نتصرف وندبرها

صادق: لازم .. لازم نفكر بي هذاك اليوم قبل لا يجي ما انتضر يجي ياله عود افكر شلون اتصرف

سكتوا دقايق كل واحد بيهم يفكر شلون يكدر يحافظ على حصته ويحصل زايد فواكها ورجع صالح حجى بتسائل

_زين انت تكول اذا الله ياخذ عمره نرتاح نسيت عنده مرة وبنات وهم الهن حق ..






صادق : ياكلن تبن احسن سميه تولي لأهلها وبناتها يبقن عدنه يكبرن نزوجهن لولدنة بلاش وهاي هيه ..

دار صالح وجه يباوع للطريق ساكت وصلوا الشورجه وكل واحد بيهم راح لمحله كعد بي مر وقت اجه حجي واحد من الزبائن وصاحب محل يتعامل وياهم باستمرار
وبعد السلام واختار أصناف الأقمشة الي يريدها كعد ويه صالح يشربون جاي حجى بعد ما اخذ رشفة من استكان الجاي ..

_ لعد صابر وين خل يوصلي الاقشمة للمحل

صالح : لا حجي صابر اليوم ما جاي مريض

الحجي : لالا سلامتة ما يشوف شر شخيرة

صالح: ماكو بس رجله مضروبة ومتأذي منها كتله ابقى ارتاح اليوم لا تطلع للشغل

الحجي: اي ولله يا بوية هذا أخيكم من أهل الله ابوك الله يرحمة جانت كلها عنده بكوم وصابر بكوم وحد يعرفة فقير وهسه انتو بمكان المرحوم ديربالكم على أخيكم بوية ترا الاخ ما يتعوض

طبك حاجبه صالح باستغراب من الكلام رغم كلام الرجال صح و يوصي ع اخوه بس صالح لان نيته سوء يعامله بسوء اخذ الكلام ع نفسه ووجاوبه

_شنو حجي سامع شي اشوفك توصيني باخويه ترى اخوي هذا اكيد اديربالي عليه ما يحتاج احد يوصيني بيه

رد الحجي عليه

_لا ابني قابل شنو اسمع بس اشوف صابر بهل عربانة باقي يحمل لهذا وذاك وهو ابن حجي مرهون من التجار الكبار ما راهمة وتريد الصدك الناس تحجي اذا ما تحجي كدامكم تحجي وراكم

صالح : شحاجين الناس

الحجي : الكل يكول تاركين اخوهم يشتغل بعربانة مثل الخادم وهمه لازمين محلات

تعصب صابر من هذا الكلام :

_اول شي هاي امور عائلية بيناتنا وثاني شي صابر هو الرايد هل شغله شكد حاجيناه وگلناله تعال اكعد حالك حالنة تريد افتلحك محل واكعد بي بس هو مجلب بهل عربانة

يگول ماعرف للشغل و الحساب وانت تشوفه بعينك شلون مو صاحي وعلى كد عقله عاد كلنه بدال ما نعوفه يشتغل عند أحد نشغلة ونخلي كدام عيونه والي اسمعه يحجي ويجيب طارينه ادوس على راسه ...

الحجي : براحتك بوية على رأيك انتوا عايلة بيت اني بس كتلك الي ينكال الله شاهد عزاز عليَّ وما يهون عليا اسمع طاريكم بالشين .. يله اودعناكم ..

كعد صالح فاير من الي سمعه وراح سوالف لصادق الكلام الي ينكال بالتفصيل

صادق : مو كتلك هذا اذا ما الله ياخذ عمره ما نرتاح

صالح : زين أكلك ليش ما نفتحلة محل بسيط ونخلي يكعد بي ونفتك

صادق : هاي شبيك صالح صدك تحجي تفتح محل المن لصابر ولك هذا بصخلة ما اسرحة مو افتحلة محل وانذب علي كوم فلوس وتالي ينضحك عليه ويتقشمر ..

صالح : وشلون نبقى هيج ينجاب طارينة من وراه صابر

هز رأسه صادق بتوعد : اني اشوف لها حل لازم لازم تنحل ....

حجى هل كلام وهو يفكر بشي اذا ضبط وياه راح يخلص ترك صالح وطلع من المحل

صالح : وين رايح وتارك المحل

صادق : العامل موجود عندي شغله ضرورية اخلصها وارجع

تركه وراح ..

صابر كان طول اليوم بس نايم لحد الضحى على غير عادته .. يتضاهر بالنوم وكل ما سميه تحاول تكعده يسوي نفسه نايم .. تقدمت يمه بسمله كعدت يم راسه

_بابا ليش نايم هلكد اكعد يمنه

شال رأسه وحجة بتعب: بابا اني مالي خلك

باوعت اله بحزن على ابوها الي روحها من الدنيا

_انت مريض ؟

صابر: اي مريض اني واصبعي بي اواه وجع

بسملة : ابوسه ويطيب اكعد يمنه حباب

كعدت من نومتة لخاطرها

_ لا بسمه لا تبوسين رجلي اني راح اكعد يله ..

كامت من الكاع وكعدت بحضنة وباستة بخدة

_ بابا اني اكره عمو يضربك بس اكبر الا اموتهم بس يضربوك ما اخليهم اضربهم هيج حيل..

احتضنها حيل بين ادي وكأنه يريد يحصل الامان الي فقدة من اقرب ناسة

صابر حيل كاره ضعفة وكاره طبعه الي خلى الناس تستغلة
مر الوقت وهو ما طلع من الغرفه ابد وسمية وبناته كاعدين يمه .. ندك باب الغرفة طلعت بسملة فتحتة لكت صالح واكف وعينه صارت على صابر .. حجى وهو يخلي أيده على الباب

_. ها شلون صارت رجلك

رد علي صابر بدون ما يباوع اله .. على الله

مد.ايده بجيبه وطلع شريط حب ودخل الغرفه شمره بحضن صابر

_هذا مسكن راح يسكن الوجع اشرب منه يوميه لحد ما رجلك تصير زينة .. صار يحجي ويأشر لسميه على الحب

_ انطي يوميه حبايه يشربها جبتها اله من الصيدليه كال زينة ..

تركهم وطلع وبس طلع صابر بسبب وجع رجلة شال الشريط وأخذ حبايه من الشريط وبلعها حتى بدون ماي...

**

3










اخذ من الشريط حباية وبتلعها بدون ماي حتى تسكن ألمه ويرتاح ..
رجّع خلى رأسه على المخده بحزن يأن من الوجع ينتظر بصبر معدوم حالة يتغير بيوم او اخوانة يحنون عليه .. كأن يريد يهرب من شي بالنوم يهرب من الم روحه من الحزن والقهر الي نهش قلبه من حقد اخوانه الي ما اله اي مبرر غير الطمع ،،
من ضعفه وطبعه الفقير من خوفه منهم كل ذني اسباب يريد يهرب منهم ..
البنات يلعبن يمه وسمية توصي بيهم بالاشارة لاتاذون ابوكم لايعلى صوتكم .. تركتهم وطلعت راحت للمطبخ حتى تصب عشاء الهم وتجيبة للغرفة تعدت الي كاعدين يتعشون .. صاحت عليها جبرية
_على الحاضر نطبخ وتجي تصب وتدخل بهل غرفة سم كون ..
عبرتها سميو من غير رد لأن أساساً ما سمعتها
ما ارتاح كلب جبرية بهذا السكوت تركت العشاء وراحت للمطبخ لحكت سمية لكتها مخلية مواعين بالصينية لازمة الچفچير تريد تفتح غطى الجدر ..
تقدمت عليها جبرية وهي صاكة على أسنانها الشر تارس وجها لزمت أيدها نكتتها و وكعت منها الچفچير وصارت تحجي وتأشر حتى سمية تفهم عليها
: اليوم متحججة بصابر مريض وباقية بغرفتج ما طلعتي وسكتت منج وكلت خليها لأن صالح وصاني بس مال احنه نطبخ وتجين انتي تصبين على الحاضر حتى تتزقنبين لا عيني موخدم عند الخلفوج احنه افتهمتي انتي سوي اكل واكلو جدري ما توصلين يمه وتغرفين ..
سمية صافنة بيها وافتهمت من طريقة كلامها ومن اخذت منها الجفچير انو هي ما تريدها تصب من الاكل،،
كل الي سوته تركت الجدر وراحت طلعت بتيتة كصصتها حتى تستوي بساع وخلتها بماي تسلكها انتضرت تستوي كشرتها وخلتها بصينية كصصت وياها طماطه وخبز وأخذت الصينيه تعشي بناتها وصابر ..
حجى صالح ويه جبرية يلومها على تصرفها : شجاج جان خليتها تصب عشاء هسه على التمنات وكفتي عليها الاكل شو ظال

ذبت الخاشوكة من أيدها وردت بنتر : أكلك اليوم ما شالت كشايه من الگاع واحنه طبخنة وتجي تصب ما تگوم تطبخ الها ولبناتها ولله أطلعه سم وزهر عليهم .
ادخل صادق بالكلام بأيد كلام اخوه
صادق : بس انطي صبر على روحج شوية و سايسوهم مو كله مشاكل
ردت عليه زوجتة فاطمة حقدها من نفس جبرية : خير شنو اليوم المحنة صاعدة شفتنة مكصصين لحمها شمسويلها احنه هاي هل سوت عشى وراح يتعشون
ضحك صادق بسخرية يعرف بمكرهن وسوالفهن و يعرف بعمايلهن الي يسونها
صادق: لا ابد بس النهار كله گاعدات وذابات شغل البيت كله برأسها عبالج ما نعرف سوالفجن
تخصرت فاطمة وهي كاعدة ما عاجبها زوجها يدافع عن سمية
_ اجت شكتلك ؟ وشغل البيت يوگع ايد رجل شعدنة احنه هي هل كنسة والمسحة وبعدين اشوفك اليوم انت واخوك صايرين محامين دفاع الهم خيرررررر ؟
مد صادق راسه فوك الصينيه يتقرب عليهن يحجي بهمس
صادق : عقولجن بكد فصمة التمر وما تفتهمن شيء
الي أبالي سوالف اكبر من فهمج وفهمها مو اروح افكر بسالفة تنضيف وطبخ انطن مجال شوي و أتركن المشاكل هسه
صارن وحده تباوع للثانية بتسائل ردت جبرية
_ وشنو الي ابالكم شـ تردون تسوون احجوا خل نفهم خو ما نمشى وياكم ع عمى عيونا
صادق شال سراحية الماي شرب رجعها للصينية رد عليها وهو يكوم من الاكل
_يجيكم الصافي بعدين بس سدن حلوكجن شويه هالايام ..
سكتت بدون ما ترد عليه باوعت لابنها كاعد يخبط تمن على المرك وفوكهن روبة صاحت بي كاشه وجها
_ مهدي كاااافي خبط لعبت رواحنة شهل خبيط هذا
رد وهو ياكل باستمتاع
_يوم ولله طيب اني احبه هيج .. شال خاشوكة متروسة وقربها من وجه أمه .. هاج ضوكي شوفي شلون طيب
دفعت الخاشوكة بعصبيه خلت الاكل البيها يتطشر على ابنها

_دووولي مني عوزي معدتي تخبط من هذا الخبط مالتك كافي گوم صارلك ساعتين تعلف ما شبعت صاير شسمنك جنك عمك صابر

حجى بدون ما يدير الها بال يكمل اكله
_عمي صابر مو سمين ضعيف .. كمل كلامه بدون ربط..... بسملة حلوه يمة بس تكبر اتزوجها
لزمته من اذانه ولوتها حيل خلته يعقج ملامحه بوجع
و نترت بي
_سوك زايد لا تسوك وكمل زقوم وگوم يله
صاح صالح بيها بزعانة روحه
_اوووو شلون هسة تخلصوها صياح كافي عاد ثولتوني ولد النعل وانتي شبيج مرعوصة تنكتين بروحج نكت الصمي عاد خل نرتاح بكعدتنا
جبرية : ما تشوف ابنك ساعة يخبط بالاكل ساعة يخبط بالحجي ابو حلك يتزوج بسملة عوزي احفادي يطلعون لو خرسان لو مخابيل ..
تركهم وگام بصجر .. عمي هنيالك يصابر على مرتك مرتاح من لغوة النسوان ماتشوفين حتى من غرفته ما يطلع عبن مرتاح مثلي اجي اكابلج انتي وابنج تجوعرين
صاحت وراه: ايي لازم ما نعجبك تكعد يمنا هسه صرت اجوعر وخلقتي ما تعجبك بس تالي الليل اصير عزيزة

وحلوة
تركها بدون رد
كامت هي هم شالت الصينيه بعصبية ودخلت المطبخ وخلتها على السنك بدون ما تعزلها ووكفت تسوي جاي طلعت سمية هم بيدها الصينية مال عشاهم حاجتها جبرية وهي تهز بجتفها وتاشرلها
_ غسلي الاماعين اذا رجعت ولكيتهن اطشرهن فوك راسج تفهميني لو لا
صارت سمية تنضف بيهن وتغسلهن وكنست المطبخ وعزلتة وراحت للغرفة طلعت ثوب وراحت للحمام تغسل وتبدل الحمام صاير بصف التواليت اجت تدخل الحمام صار بوجها صالح طالع من التواليت ضل صافن بيها وعلى
بطنها الي استوها بدت تبين بحملها الثالث وملامح وجها الهادئة وهي صايرة بيها هبطة من اخر مره تحرش بيها صفنت بوجه بخوف وبسرعة تداركت الموقف وبدل ما تشرد وترجع للغرفة دخلت الحمام وتركته
باوع يمنه ويسرى شاف محد اكو لزمها من معصم ايدها قبل لاتسد الباب يباوع الها بنضرات قذره وحجى بسرعة

_ شبيج تخافين مني قابل راح اكلج
بحركه سريعة منها فلتت أيدها منه و خلت ايدها بصدرة و دفعته وطبكت باب الحمام بوجها وكعدت ترجف
غسّل صالح اديه ورجع گعد بالهول وصاح ابنه يجي يدوس على رجلية و باله وتفكيرة كله بسمية
ويحسد اخو عليها ..
باليوم الثاني صابر داس على المه وگام من فراشه حتى يطلع للشغل وطبك حبايتين من المسكن الي جابه اله صالح وشربهم حتى يسكن ويكدر يشتغل يمشي على رجله بصعوبة ويعرج منها ..
صعد ويه اخو بالسياره وتوكل على رزقه .. مر وقت ما يقارب ساعتين يشتغل بالعربانة يروح ويرجع بيها وكل شوي يگعد بيها يمدد من رجله شويه يرتاح و يرجع الشغله
يمشي يدفع بعربانتة شايل مسواگ ما حس اله انضرب بضهره بحجارة وگف ودار وجها لگه واحد ثاني هم صاحب عربانة بعده مراهق يضحك عليه ترك عربانتة وراح عليه يحجي وياه
: ليش تضرب يمك اني يمك انت شبيك ليش تاذون الناس التمشي مخبل انت
رد علي يضحك : هههههه اي اني صابر المخبل .. صدك عود انت ليش تدفع عربانة واخوانك زناكيل ليش ما يخلوك تشتغل بالمحل لو لأن مخبل
تعصب صابر منا ألم رجله ومنا الم روحه من يسموا المخبل لزمه من قميصه وصار يغلط عليه
_ اكل خ** مطي * جلب اني مو مخبل اني اعقل منك ومن الخلفوك اني ما اذي بشر بس انت تاذي الناس انت مخبل مو اني
الولد تجاوز أكثر رفع ايده ضرب صابر على وجه خلاه يترجع خطوات ليورا لان الضربه اجت فجأه ما جان متوقع ولج أصغر منه يمد يده عليه، استغل الولد صابر انشده ابتعد عنه وگام يصيح بصوت عالي خله العالم تنتبه
_صابر المخبل هو هو مخبل هو هو مخبل ويصوفر
نار صارت بين ضلوع صابر من الناس گامت تباوع اله من حرگة گلبه شال صابر طابوگة من الگاع ونومها براس الولد وصار يصيح وهو يضرب بي
_مو مخبل مو مخبل اني مابيّ شي اني اعقل منك مو خبل اني
خله الولد نايم بالگاع دمه بطوله وصارت الناس تلوم بصابر لأن فتح راس الولد لزمو كم واحد وجرو وهمَّ يحجون عليهِ والي يگول عقله طگه ونص والي يگول هو عقله مو تمام ليش يتحرشون بي وهو يحاول يفتح ادي منهم ويوخر وصلوه لمحل صالح وحجوله الي صار حچه واحد منهم ذب الوم كله ع صابر

: ابو مهدي خوية الزمو اخوكم شنو فشخ الولد خله دمه يجري شجاه

گام صالح گدام الناس ما سئل عن باقي القصة ولا گال ليش ضرب اكيد اكو سبب رأساً تولاه كفخات يدمغ بيه و يصيح كأنه صابر هو الطرف الغلطان بس بالموضوع
: ولك مووووتتتني فشلتني گدام الناس فشلتني وين اوديك احطك بالشماعية واخلص منك ووووين
حاول صابر يحجي يبرر نفسه يبرر تصرفة
_ هو صاحلي مخبل حجيت وياه مد ايده ضربني و ضحك الناس عليَّ صالح
ضربه صالح ع راسي بكل قوه ينتر بي و يزيد ضربه أكثر
_ و تگوم تخلي دمه بطوله انت بهاي سوايتك من صدك خبل وكل عقل ماعندك
كل الي سواه تقوقع على نفسه وصار يحمي نفسه من ضربات صالح لحد ما حس نفسه دخل بحاله أشبه بالصرع .. جسمه كله تيبس وصار ينتفض حيل
تركه صالح بدون ما يرف كلبه وراح يشوف الولد الي نفشخ وينه وقبل ما يروح صاح لصادق حجاله على صابر وشنو مسوي .. دخل صادق المحل وشاف صابر واگع بين الوعي و الفقدان
تقدم اله بحقد ولا كأن هذا اخو ابن أمه وأبو لزمه من كتف ملابسه وگومة يعت بي بلا رحمة
صادق : امشششي گدامي گوم يله اني أعلمك اليوم ولك تريد تبلينه توگعنه بمصيبه فاتح راس الولد ولك اذا مات شنگول ونحجي نوصل للبيت لو ما نوصل بسيطة
نهى كلامه بتوعد كأن السواه صالح ما كفى ولازم ياخذ هو حصه هم من ضرب اخوه و اهانته و صابر يمشي وراه بلا صوت بس يتوجع من جسمة ورجلة صعدوا بالسيارة وحركها راجع للبيت
بلع صابر ريگه بوجع يحجي لاخوه الصار يبرر اله تصرفه عسى ولعل يصدك بي و ينصفه عكس ما سوه صالح
صابر : هو هو ولله خبث عليَّ وضربني اني ما ماحجي هو ضربني ويصيحلي هو هو مخبل مو اني
ضحك صادق ولا كأنه الگاعد يمه اخوه بدل ما يوكف الناس عد حدها صار وياهم عليه يأيد كلامهم

صادق : هوووو انت صدك مخبل صاحي قابل جذب هو انت مخبل ابتلينه بيك بلوه الله ياخذك ويريحنة ما اعرف شنو فايدتك من خلفك ابوي
صار يبجي كل قوة ويحجي بحركات عشوائية
_ ولله مو مخبل اني مو مخبل اني كلشي مابيه ليش تكولولي مخبل ليششش انتو مو اخواني اني عاقل
صاح بي صادق
صادق : كااااافي ولك صوتك ما اسمعه بسيطة بسيطة خل نوصل واعلمك اذا ما طلعت هذا الجن النايم برأسك بسيطة
بقى يبجي مثل الطفل ويمسح بدموعة بطريقة تكسر الگلب
صادق: كااااافي ولك كافي نغيط صطرتني صم حلكك عاد لا اكسر اسنونك بحلگك
صابر: اني ولله عاقل ولله
لم صادق اصابعه بقبضه يدك بيها ع راس صابر و هو يحجي يشدد ع كلامه بتهديد
_اذا باقية براسك ذرة عقل اليوم الا اطيرها منك على سويايتك هاي
وصلو للبيت نزل بعصبية وركع الباب ونزل صابر بشكل سريع يحاول يفلت من اخو ويدخل للبيت قبله حتى يختل بالغرفة بس صادق لحك بي ولزمه بسرعة ..
_تعاااال ولك تعاال وين شارد وين تروح اليوم تطيرررر تصعد ل.. (كفر) هم الحكك وانزلك
سحله مثل ما يسحل الخروف للذبح كأن صادق كان منتضر زلة عليه حتى يعبر عن حقده وغضبة
طلعن فاطمة وجبرية على صوتهم ..
فاطمة : ياااا شكو شصاير
بقى يجر بي بدون ما يرد عليهن وصابر يذب نفسه بالكاع حتى ما يتحرك وصادق لازمه من عكس أيده ويجر بي
:كوووووم ولك لا تخليني اسحلك بالكاع ولله
اجت سمية وشافته هيج يجر بي ركضت اله ملهوفة تحاول تفتحة من ايد اخوه تنخى صابر بيها يريد واحد بس يصدگه و يكول انت عاقل
صابر: سمية سمية اني مو مخبل ولله صادق حباب عوفني اني اخوك ليش هيج تسوي عووووفني عوفني ولله بعد ما أسويها
صادق دفع سمية بقوه وگعها بالكاع لزمت بطنها بوجع ورجعت كامت ورجعت عليه وهم دفعها

صادق : وخررري لا أحبسج وياه ولله وخرررررري
تقربت فاطمة : اييي غير نفتهم شصاااير شبيك صادق شجاك يمعوددد
تركهن وراح يجر بصابر فتح باب المخزن الي جوه الدرج غرفة فارغة مخليها مثل المخزن بي فراش الشتاء والحصة التموينية دفعة ودخل
_ادخل كدامي حجاها،،، وهو يتلفت داير مدايرة شاف واير ملفوف جره وطبكه
صار صابر يرجع ليورة بخوف
_ لا صادق لاتضربني رجلي توجعني ولله اخوك الزغير اني صادق لاتضربني اني بعد ما أسويها ولله فدوة حباب ابوسك خليني فدوه ماعيدها بعد ..
صار يتقدم عليه والواير ملفوف على أيدى
_انت عاقل لو مخبل ؟
رد صابر عليه بدون ما يفهم نيتة اخوه شنو
صابر: عاقل اني عاقل ولله
ضربة كل قوتة خلى روحه تفرفح وكرر السؤال
_انت عاااااقل لو مخبل
تردد صابر بالجواب مايعرف يا جواب راح يخلصه من الضربه الثانية .. وقبل لا يرد اجته الضربة الثانية وياها السؤال
_ انتتتتت مخبل لو عاااااقل
رد وشفته ترجف بخوف بس گلبه ما ينطي ينطق كلمة مخبل ع نفسه گضه عمره يحاول يثبت هو صاحي و عاقل و اخوه هسه يريده ينطقها بلسانه ان هو فاقد عقله
_عاقل اني عاقل
رجع ضربة حيل
_والعاقل يضرب بالناس شفتلك عاقل يمشي و يضرب بالعالم اكو عاقل يفشخ واحد هيج فشخه بله مااات شنجحي وشنكول
حجى وهو شايل ادي يحمي نفسه من ضربات صادق الحاقده ضربات بيهن سم سنين و كره دفين
_هو هو ولله هو ضربني اني جنت ادفع بالعربانة وهو ضربني بحجارة بضهري ويصيح هو هو مخبل عليَّ رحت احجي وياه بس هو ضربني
صادق : اي لأن انت مخبل قابل جذب شكلك شكل وأحد عاقل انت مقتنع بنفسك عاقل لا تعرف تمشي عدل لا تعرف تحجي مثل البشر
ورجع ضربة وتقرب عليه وكمل كلام ..
_ گول اني مخبل

صابر بعناد : بس اني مو مخبل اني عاقل
صك صادق على أسنانه وحار شنو يسوي حتى ياذي لزم إصبعه المضروب كل قوته وعصرها شاغت روح صابر
صابر: اخخخ اخخخ صادق خويه رجلي اخخخ خوية حباب وخر
ضب عليها ورد
_ كووووووول انت عاقل لو مخبل
صابر :مخبل اني مخبل
حجاها بقهر و بعجز وبجى نزلت دموعة ع روحة من قلة حيلته
صادق: انت شنووو؟
رد وهو ينشغ بقهر
صابر: مخبل
تركه بألمة وهضيمته وقبل ما يطلع صاح فاطمة
_ تعاي طلعي الحصه منا هذا الباب ما يريدة ينفتح بعد وجيبيلي قفل
فاطمة : اي شصاير غير نفهم
: ولج فاشخلة ولد فاتح رأسه فتح وصالح ضل يمه مدري عاش مدري مات كسر وجهنا فشلنه گدام الناس بس اني اعمله اذا ما اخلي يخيس هنا وضوه الشمس يصير حسره عليه بسيطة
فاطمة: يا دهر صابك يصابر هي هاي سواية تسويها
راحت جابت قفل سد الباب صادق وقفله وخله المفتاح بجيبة وحذر فاطمة
_هذا الباب محد يفتحه غيري ممنوع
وبقى صابر لام رجلي لصدره ويبجي بقهر والم
وسميه بقت كاعدة يم باب المخزن تبجي و بناتها يمها ..
بسملة : بابا بابا اني وماما وسلوى نبجي عليك اطلع فدوة
كام من مكانه ويمشي بصعوبة تقرب من الباب ورد عليها

_بسومة الباب مقفول اني ما اكدر اطلع بسومة ديربالج على امج خطيه لاتخليها تبجي وانتِ لا تبجين اني اطلع ما ابقى هنا
بسلمة: بابا انت ليش هنا ليش عمو ضربك وضمك هنا ليش
رد صابر يحجي ويا بنته كأنها بنت چبيرة يشكي الها همه و حزنه يسألها بيأس
صابر: اني ما ادري يگلولي انت مخبل .. بسومتي صدك اني مخبل ؟ مو احبكم انتِ وسلوى وامج اشتريلكم والعبكم ها اني هم اضربكم هم أصيح عليكم ؟ اني مو مخبل..

بسملة: لا بابا همه مخابيل انت مو مخبل انت تحبنه ومددللنة
ابتسم صابر رغم وجع روحه ابتسم وهو يسمع كلام بنته وهي مصدگه كلامه و تأيد ان هو عاقل ارتجي ع باب و سألها
صابر: لعد ليش الناس كلها تكلي مخبل حتى اخواني وحتى يضربوني
_ ما يخافون الله يذبهم بالنار،، بابا لا تبجي اني و سلوى و ماما نحبك بابا انت حباب لا تضوج
همهم الها كلامها كأنه بلسم ع جروحة راحت بسملة شايلة القراءه تريد احد يقريها ماكو راحت للمخزن تقربت يم الباب و كالت

بسملة : بابا منو يقريني دروسي ويخليني اكتب حباب لا تضل هنا اطلع قريني
صابر: اي اطلع واقريج
:شوكت تطلع بعد شكد
رجع راسة على الباب بحزن : مادري بسومتي مادري بلكت من يجي صالح يطلعني
بقن كاعدات هي و امها و اختها يم الباب ويسولفن وياه على أمل يرجعون ويطلعوا مر وقت مو قليل سمية أشرت البسملة تسأل ابوها جوعان ..
بسلمة : بابا امي تكول جوعان
صابر: ما اريد اني بس رجلي توجعني هواي خل تجيبلي حب يوخر الوجع
ركضت بسملة للمطبخ تريد تصب اكل بس ما تلوح الجدور الي على الطباخ جرت كرسي صعدت فوكه وطلعت ماعون فافون وصبت بي تمن وخلت فوكة مرك وخبزة شالت الماعون ونزلت قبل ما تطلع لزمتها جبرية
_ تعاي ولج هاي المن
بسلمة: عمه الي جوعانة اني
جبرية: الج لو لابوج
: لا عمه الي
: اذا تطلعين تودي لابوج بس يجي عمج اكله اخلي يملص اذانج
تركتها وطلعت وراحت كعدت يم الباب مال مخزن وبقت تتلفت وحجت بصوت ناصي : بابا اكل حباب ماما تكول خلي ياكل دفعتله الماعون من جوه الباب وراحت كعدت بالغرفة حتى ما يشوفها كاعدة بالباب وما تاكل
تتصرف بذكاء رغم عمرها الزغير 8 سنوات
وأخذت الحب الي ابوها يشرب منه وانطته اله من جوه الباب ورجعت اخذت الماعون ورجعته للمطبخ بدون محد يشوفها

صابر: بسومتي اني عطشان كولي لامج اني عطشان اريد ماي
بسملة : بابا شلون اكدر ادخل الك الماي ما يدخل من جوة الباب
صابر: عطشان اني كلش
راحت جابت دولكة ماي وبقت صافنه شلون تدخلها ماتعرف. باوعت لامها تسألها بعيونها : شلون ماما بابا عطشان سمية مثلها حايرة شتسوي
صفنت بسملة بتفكير وفزت: اجتني فكرة
ركضت للمطبخ جابت ماعون صارت تدير ماي بالماعون وتدخله من جوه الباب وأبوها يشرب ويرجع الها الماعون وترجع تترسه لحد ما ارتوى
بقو هذا حالهم لحد الليل ويا ما صالح وصادق دخلوا
ركضت سمية على صالح تتوسلة بعيونها وتاشرله على الباب وتطلب منه يطلع صابر من المخزن
صار يأشر يحاول يفهمها ويحجي بصوت عالي
صالح: رجلج ماكو هذا رجلج مخبل مخبلللل ما برأسه عقل ضرب ولد وخله دمه يجري ويستاهل يتأدب خل يتأدب ويعقل ونطلعة
بسملة: عمووو انتوا حقيرين تضربون بابا وتحبسوا ليششش
تقدمت عليها جبرية وضربتها حيل على ضهرها ولزمتها من كصيبتها :
_هاي عليمن ولج تغلطين هاااا على عمامج الا اخليهم يحبسوج ويه ابوج
بسلمة: اي عمه حبابة خل يدخلوني يم بابا خطية مريض من رجلة
صالح : ولج انتِ عليمن طالعه هيج عرمة من صغرج شو امج ما تحل رجل الدجاجة وابوج نص عقل انتِ عليمن هيج عرمة هاي اختج اشو صوتها ما ينسمع احمي السجينه واخليها على حلكج واخليج قبل ما تحجين تخافين
فاطمة: فهموني هسه شصار وشسويتو ويه الولد
حجى صالح : وره ما رحت للولد لكيتة صاحي بس سبحان بدمة والناس تولتني ليش ما تكضون اخوكم اذا عقله مو تمام خلوني غطيت بهدومي من الفشلة تالي اخذت الولد خيطو رأسه خياطين وضمدته ووصلته لأهله
وهم اسلتموني بالحجي واني من وره هذا المطي باقي أتوسل حتى اسكتهم. المهم شرحت وضع صابر وفهمتهم انو ابنهم هو الي بده وخليت بيد الابو كم فلس من شافهن سكت .. الحمدلله عدت على خير

رد وهو يأشر على المخزن

_وهذااااا خلي يخيس بالمخزن احسن اله هو الضاهر مال حبس وربط نربطة ونرتاح من همه وفشلتنه كدام الناس بسببه
صار الليل وبسملة لازمة قرائتها وحايرة شلون تقراء رجعت راحت لابوها وحاجته من وره الباب
_بابا عندي قراءة ماعرف أقره وحدي
سمع صوتها كام من مكانة وكعد يم الباب
_ شنو درسكم
گالت اله الدرس انطته القراءة من جوه الباب قرأ الدرس الها وحفظه هم رجع الها القراءة و كامت هي تقرأ و وين توكف يساعدها لحد ما حفظت

مرن تلث ايام وصابر محبوس محد يفتح اله الباب غير صادق يدخل ينطي اكل ويودي للتواليت ويشربة علاج ومهدئات تستخدم للي عدهم امراض عقليه وإذا يرفض يجبره يشرب وهل علاج صادق دفع مبلغ لواحد يدبرهن اله لان مو كل شخص يكدر يدبرة بس بحيلته وفلوسة حصل واحد ما يخاف الله دبرهن اله
يكمل من صابر ويطلع ويرجع يقفل الباب وسمية وبناتها ساكنات باب الغرفة و دمعتها ما نشفت باقية لاحولة ولا قوة
صابر اول ايام جان يرد عليهن من وره الباب يسولف وياهن بس بسبب العلاج الي صار يشربه صار أغلبه وقته نايم لو خدران لو يهلوس وحده ومايرد على أحد من يحاجي
صار وقت دخول صادق عليه اجة يفتح الباب وجايب وياه ماعون بي تمن وفوكة مرك لكه سمية وبناتها كالعادة كاعدات يم الباب صرخ بيهم
_ تضللللن هنا يعني شلووون ما تولن منا شنو كعدتجن عبالجن راح تخليني أطلعه كوووووووومن
تقدمت بسملة بطفولة
_عمو فدوه خلي يطلع بابا
دفعها منها وتقرب جر سمية وخرها من الباب وفتحه حتى يدخل بحركه سريعه دفعن الباب ودخلن بس تعجبن صابر مربوط كاعد لام رجلي لصدره ومخلي رأسه بين رجلي ومابدر منه اي ردة فعل من شافهن ولا اتحرك من مكانه
بأيام قليلة نفسيته تعبت والعلاج الي يشربه تعبه وخلا خدران
شمرن نفسهم يمه كعدن : بابا بابا اكعد ليش هيج .. عمو بابا شبي
صادق : مابي شي كووومي منا
سمية صارت تحاول تفتح بالحبل
ترك صادق الماعون من أيده الگاع و جر سميه طلعها شمرها و رجع ع سلوى هم شمرها برا بقت بسملة حاضنو ابوها حيل
_ بابا اني بسلمه بابا شبيك ليش ما ترد
بقى صابر ع حاله كانه بحالة اللاوعي جرها صادق من أيدها حيل و شمرها برا و دفع الماعون ع صابر يأمره
_ ياله اكل حتى تاخذ علاجك بساع
بقى صابر صافن عليه بعيون ذبلانه تحجي قصة ألمه جسمه خدران مرتخي و صادق يصيح عليه حتى ياكل بعد ما عجز منه ياكل طلع شريط الحب و تقرب عليه طلع وحده دفعها بحلگه و شربه مي خلى يغص بيه
ويكح من الماي
تأكد منه بلعها طلع و قفل الباب ضلت سمية گاعده ورا الباب هي و بناتها وگلبها يم صابر ليش ما يرد ع بسملة من تحاجي القلق نهش گلبها بعد ما شافت حالة
لليل اجه صالح بيده ماعون العشاء من شافهن كاعدات بعدهن حجى بملل
_ اهوو انتن ما تملن ترى ما مسويلة شي كعدته هنا احسن اله و النا
تحضرت بسمله حتى تدفعه من يفتح الباب مثل ما سوت ويه صادق بقن گاعدات حتى يأمن ويه ما فتح الباب گامت سميه دفعته حتى تدخل و بسملة دخلت بسرعة
من يمه تدخل لابوها صالح يحاول يدفع سمية وما يخليها تدخل لكن التفت بسرعة على صرخة بسملة
_ بااااابااااا شبيك بابا ..
يتبع

#البارت_الرابع


هل مره صالح هو الي اجة بدل صادق حتى ينطي عشى لصابر ترك الماعون على صفحة وكف يفتح بالقفل فتحة ودار يشيل الماعون سبقتة سمية وبسملة يدخلن للغرفة
لكن دخلتهن على صابر على مره ماكانت مثل كل مرة
سمية نشغت كل حيلها ورجعت ليورة مخلية اديها على حلكها من هول الصدمة صرخات مكتومة بداخلة تتمنى عدها صوت يساعدها حتى تطلق سراحهن وتصرخ
وهذا اصعب احساس ممكن يمر بي الإنسان من يكون بوقت يتمنى يصرخ بي لكن مايكدر ..
صالح الماعون وكع من أيده وتطشر وهو يصيح صااابر
بسملة صرخت بصوت طفلة شايلة هم أكبر منها وهي تشوف ابوها معلك كدامها وفاقد الحياة .. صابر كان شانق نفسة منت*حر
وهذا الي وصلة كلة بسببهم .
3
همَّ ما قتلو بشكل مباشر حتى لا ينگال عنهم قتلو اخوهم .. همَّ قتلو على دفعات
قتلو من ظلمو وعيشو غريب بوسط بيتا وبنص اخوانة
قتلو من أهانو كدام الناس وسمحو للناس تهينة بحضورهم وهمَّ حتى ما يدافعون عنه ويرحمون ضعفة
قتلو من جبرو يعترف بالسانه انو هو مخبل وسوو بي حالة نفسيه
وكمولها علي حتى يقتلو القتل الاخير من صارو ينطو علاج ما ينطي غير للي عدهم امراض عقلية ومهدئات
ووصل لمرحلة الانتحار .. مات صابر وترك الهم حقة وورثة
كل هذا الي سوو هو حتى الورث يتقسم بس على ثنين ترك وراه اثنين بنات وزوجة لاحوله ولا قوة وحامل اختار ينتقل بجوار ربه الي هو ارحم علي من اقرب ناسة ..
صرخت بسملة ... بابااااااا ركضت وصارت تلزم برجلي تحضن وتبوس بيهم وتحجي وياه بدموع غركت وجها .. بابا فدوة حبيبي شبيك بابا ليش معلك هيج
سلوى تقربت وياها تبجي بدون صريخ ولازمات رجلين ابوهم
صالح صار يصيح وهو يصعد على البرميل الي صاعد علي صابر ودافعه .. صاددددددق الحكككك ولكككك الحك صاددددق صااابر ماااات
سمية من هول المنضر صارت بيها حالة مثل الي نشمرت وجسمها كله تيبس مثل نوبه صرع دخلت بيها ..
الكل اجه يركض على صوت الصياح وتجمعو بالغرفة
صادق من شاف صابر تجمد بمكانه وفاطمة وجبرية صارن يصرخن بنص البيت وسمية الواكعة حتى محد وصل يمها وشاف شبيها الوحيدة سلوى تركت ابوها كعدت يم رأس أمها تبجي وما تعرف شنو تسوي وشلون تتصرف
صاحت عليهن .. عمة جبرية عمة ماما
ردت عليها وهي تصرخ وتبجي : شرايدة انتي شبيها امج بيا حال احنه
سلوى: ماما فدوة طاحت .. ورجعت تحجي ويه امها .. ماما ماما أنتي هم متي ويه بابا ماما كعدي شبيج
تقربت يمها جبرية تشوفها وصارت تدك على خدها جابت ماي رشكتة بوجها وصارت تفتح بايديها الي تيبسن ونقبضن بقوة
لحد ما نشغت وفتحت عيونها ثواني استوعبت وأخذت نفس قوي وصارت تبجي حيل كامت بصعوبة من مكانها وراحت شمرت نفسها على صابر الي نزلو من الحبل ومددو بالكاع و كعدو يبجون علي .. مدري صدك مدري تمثيل مدري ضميرهم أنبهم على الي سوو بأخوهم ورب العالمين وحدى يعلم بلي بالكلب
صار صالح يباوع على صادق وهو عيونة مطعونه دم : هذااا الي ردته صادق ارتاحيييتتت هسه ماي بارد نزل على كلبك
رد علي بعصبية : واني شدراني راح هيج يسوووي اني ماردت اموتة
صالح: ما موته بس وصلته مرحلة خليته هو موت روحة
كعدو يبجون فوكة والنسوان تصرخ والجيران التمت وكلها الجيران بجت على صابر لأن طول عمرة رجال فقير ومن أهل الله وعمرة ما اذى بشر و الكل يحبة
وبين البجي والصريخ لفو صابر ابطانية وشالو للمستشفى
سمية بعد ما صحت ماخلت لاشعر ما كطعتة ولا ثوب ماشكة روحها فرفحت هي وبناتها وراه وتريد تطلع تروح وياهم دفعها صادق دخلها جوة
دررروحي ناقصينج احنه.. فاااااطمة جبرية دخلنها بساع جوة ماريد اشوف مرة كداااامي
خلو صابر بالسيارة وراحو بي للمستشفى دخلو للطوارى اصلاً ميت والناس الي جاية وياهم تسأل وتستفسر شنو الي صار وشنو خله صابر ينت*حر ويسألون على أدق التفاصيل وكعدو يردون عليهم ..
صادق : صابر اخر فترة صار مؤذي حيل ويضرب حتى بناته صار يأذيهن حيل ويخوف واحنه هم عدنه جهال بالبيت اني علمود مصلحتهن خليت وحبستة بالغرفة
علمود ما يأذيهم
صار يحجي بدموع كاذبة ويدك بأيدة على صدرة يمثل التأثر والحزن .. انييي ادري هيج يسوي بروحه واحبسه اخخخ يا خوية كسرت ضهري عمت عيني كون قبل لا اخليك وحدك بالغرفة
رد على صادق واحد من جيرانهم الي اجة وياهم للمستشفى حجى باستغراب من كلام
صادق
: صادق هو صابر قابل ماعنده عقل تره رجال خوش زلمة وفقير والكل يحبه وبعمرة ما اذى بشر لابكلمة ولا بتصرف وبناته اشو روحه بيهم اشوفه ياخذهم للمدرسة مخليهن على كلبة
ويسولف ويتصرف طبيعي وكلشي مابي بعد من شوكت صار بعقلة وياذي بيكم ..

باوع علي صادق وماعندة رد رجع عود يبجي ومتاثر
رد صالح على الولد
صالح: خوية هذا شي احنه ما نحجي بي كدام الناس حتى لا يكولون ينطون باخوهم وحتى لحد يخاف منه. بس صابر لو ما العلاج ما يتصرف طبيعي وتشوف كلشي مابي
بس يخلص علاجة يصير يضرب وياذي
بس احنه ما جنى نحجي هل كلام كدام أحد وهاي شوفت عيونهم شسوى بروحه
مر الوقت بالمستشفى بين الفحص والتشريح وبين التحقيق والسؤال شنو الصار وليش لحد ال2 الفجر يله سلموهم الجثة أخذوها ورجعو بيها للبيت حتى يشيعو
سمية فاقدة لفلفنها النسوان بدشداشة سودة وربطة وعباية وكعدت بنص بناتها الي ينشاغن ويبجي
والمصيبة بسملة تصيح كدام النسوان

: عمووو صادق حبسه بالغرفة وصار يضرب بي يومية يومية ويكتلة صار هووواي حابسة من وره عمووو بابا مات وعمووو من نكله نريد بابا يضرب بينه يكوم
النسوان يسمعن بيها ويتبسبسن بينهم اجتها فاطمة جرتها للغرفة ولزمت الشحاطة:
بسسسمة اذا جبتي طاري عمج كدام النسوان اذبحج ولله اذبحج عرررمة ابوج مخبل وموت روحه عمج شعلييي
رد عليها : من وراكم بابا مات من وره عمو حبسه ومات اكررررهكم اني
1
تقدمت عليها فاطمة ولزمتها بالشحاطة يبستها وخلت جلدها احمر وبسملة وياها لسان بالسان. بعد ما تركتها فاطمة كعدت بالغرفة تبجي على ابوها وتناشغ
لحد ما عيونها ورمن وغفت وهي كاعدة ومرتكية على الحايط. فزت على صوت عالي وعياط
نفزعت من مكانها طلعت تركض من الغرفة حتى تشوف هل منظر كدامها . ابوها بتابوت متمدد بنص الهول
وامها فوك التابوت تبجي وتحتضنة فاقدة وصالح وصادق كدام الناس مدنكين على التابوت ركضت لابوها لكن هذه المرة اكيد ما راح يكدر يتلكاها بحضنة مثل العادة ولايلمها بين أيدي ولا يكول الها بسمتي لاتركضين حيل لاتوكعين
شمرت نفسها ويه امها على التابوت وهي تحاجي ابوها بطفولة وبرائة وتعاتبة ليش تركها
بجو ولطمو وناحو واجة الوقت حتى يشيلو
شالو من الكاع سمية وبناتها طلعن يركضن وراه والنسوان يلزمن بيها ويرجعنها يشيعو صابر بالمنطقة وكل الناس طالعه من بيوتها وتمشي بالتشيع ويترحمون لهذا الانسان الطيب .. الي نطوت صفحة حياتة وصار مرحوم بسبب طمع وجشع اقرب الناس دمة ولحمة اخوانة
صابر كان ضحية الطمع والنفس الجشعة وكل أمنيتة كانت انو يعيش هو وزوجتة واطفالة بكرامة وبدون أذية البشر
انذل وهو عايش أبيت ابو الي يمتلك بي حصه مثله مثلهم مات وكان يتمنى يشوف محنة منهم راح صابر تارك وراه زوجة وأطفال مصيرهم بيد ناس الطمع عامي عيونهم ..
شدو على السيارة وانطلقوا بي للمقبرة مو للنجف ..
وجه الصبح سمية انتهت وباد حيلها وبس تون ولامة بناتها بحضنها وكاعدة ..
سوولة فاتحة جبيرة ينحجي بيها والكل يكول لو ذول الإخوان لو لا شوفو الفاتحة الي سواها لاخوهم بالعافية عليه لحد السبعة و الناس ما كفت رايحة راجعة عليهم
سمية لفت بناتها وكعدت بغرفتها عايشة الحزن والقهر وحدها محد يشاركها بي غير ثنين بنات اطفال نكسرو مثل كسرة امهم ..

فجاء ندفع باب البيت و صدع صوت الصرخة بنص البيت بدخلو اختهم. الي من سنين مقاطعتهم بسبب طمعهم
وما عرفت بوفاة صابر غير سابع يوم من وفاتة لأن كل تواصل بينهم ماكو

ياخووووووية يا أبن امي ولك صااااابر يل حنين يبو كلب النضيف يااااخوية عممممت عيني عليك
كعدت بنص البيت ملخت نفسها وطلعن الها جبرية وفاطمة تلكنها
جبرية : يبووووووو رااااح صابر سناااء راح اخيج ولجججج تصخمنه يا خية
طلعو الها صالح وصادق كابلوها وحضنوها يبجووون وياها
صالح: وييننننج خوية راح صابر ذاك الفقير الطيب راح ولج كتل روحة
كعدت تدك وتلطم لحد ما باد حيلها وكومنها من مكانها
سناء: ولكمممم شلون أمس يله دريت شلوووون ولكم انتو ما تخافون الله وتكولون اخيتنه ننطيها خبررر
لو ما رجلي شايف القطعة بالسوك لاجان دريت ولا علمت
هيج شمرتوني وسويتوني غريبه عنكم من انعل ابو الفلوس الي تخرب الإخوان ليش ولكم ما تكولون هاي اختنه الوحيدة
صالح: سناء انتي الي كاطعتينه وكلتي ماعندي اخوان بعد لو نسيتي
سناء: من عمايلكم وطمعكم اكلتو علي حقي عينك عينك وحتى هل فقير الراح هم اكلتو حقه وهل راح ببطونكم
حوبتي وحوبته ما تتعداكم
انتفظ من مكانه
صادق: ولججج صار سنين ما شايفين خلقتج ليش تخليني هسه اسحلج وطلعج كل هل سنين ما كصرت لسانج وبعده طويل جايه عينك عينك تدعين علينه شكد وكحة عين
سناء : ما جاية عليكم ولا ميته على شوفتتكم انتو باطلين اني جاية أبيت ابوي وجاية لعزة اخوي ذاك الفقير الراح وانتو تكفخون على راسة جاية اشوف بنات. اخوي الحنين الضلن من ريحتة وراجعة لبيتي ما باقية عدكم
جبرية : يااااا شجاج جاية هادة علينه هسه احنه بيا حال ما تشوفين عدنه مصاب ومكسورين