:عمه اثرملج زلاطة ويه الكباب

هي من شافتني غيرت الموضوع ما لحت
:اي اثرمي بس لا تخلين الها ملح هسه

وكفت اثرم وبالي كله يم كلامها..
تغدينه وكملنة .. كعدنه بالغرفة .. فرح وسمر يطلعن بصداريهن وقمصانهن مال مدرسة..

فرح: همزين صدريتي مالت العام على كدي ما اشتري صدرية ما اريد اثكل على امي .. وجنطتي هم بعدها جديدة ..

بسملة:فرح انتي بيا صف

: اني رابع علمي .. وسمر بالخامس ابتدائي ..
اني كلش شاطرة كل سنه اطلع إعفاء امنيتي اروح كلية صيدلة ..

:شكد حلو .. أن شاء الله تصيرين مثل ما تردين

:بس حرامات انتي وسلوى بطلتن الدراسة كلش حلوة

:نجبرنه نترك فرح قابل بكيفنه .. بس رعد و وعد مستحيل اخليهم يبطلون ..

:اي ... شوفي اني من مات بابا حتى تمرضت كلش لأن جان حيل مدللنه ويحبنه أكثر حتى من الولد .. وردت أبطل .. بس ماما ما قبلت وبقت تقنع بيه .. بعدين تندمت لأن فكرت ابطل وتذكرت اني وعدت بابا اكمل كلية .. لخاطرة ذبيت كل حيلي على الدراسة ..

وصلني صوت رساله بجهازي على الشباك مخليته .. جريتة وفتحت الرساله .. وكوة لزمت ضحكتي .. عدنان مشغلي الرومانسيه وموديلي شعر واضح وضوح الشمس جاي يحشش عليه .. كاتبلي






:من كد ما بجيت بيوم فركاك .. هلي بالبيت يفترون ببلامة ..

ضحكت وغلست مارديت عليه لأن رصيدي قليل واخاف احتاجة بشي ..
شوي واجاني صوت دكت باب قوية .. بالبداية ما اهتيمنه كلت يمكن احد يريد شي .. بس صار صوت يعلى وكأنما أحد يريد يدخل .. صفنت اتاكد من الصوت الي جاي اسمعه
نشغت وخليت ايدي على حلكي .. وسلوى فتحت عيونها مفزوعه

سلوى:عمي صااادق بسمله

رغم الرجفه الي سرت بكل جسمي بس حاولت كد ما بية ابقى متماسكة كدامها.. وكدام وعد ..
رعد وووين رعد.. باقي بررة

سناء : أكلك ما تاااخذهم غير على جثتي ولله ما يطلعون مناااا خلفه صابر صاررو بركبتي تفتهم لو لا

: سنااااااااء اتجفي شررري احسلج وخلي يجوووون اكلج لاتخليني أمد.ايدي عليج وانتي بهل عمر

: خاااايب زلمة انت حاسب روحك وتمد. ايدك دجرب تأخذهم وشوف اذا ماخليت الشرطه تسحلك سحل ولله
وكلهم كبار يوكفون كدام الشرطه ويشكون ضيمكم.. ولكمم الله. اكبر جهاااال يتامة يتامة يا ضلام جايرين عليهم .. من لعنة الله عليكم كووون

:منووو الي جاير عليهم اشو عايشين يأكلون ويشربون منو محاجيهم

:هي بس هاي العايزة بس من الاكل ما حرمتوهم .. عايشين بنص الضيم الربع حسره عليهم .. البس حسرة عليهم بت مريضه للطبيب محد يأخذها ويفكر بحالها وباقية هل مسكينه اختهم شايله الضيم وحدها .. ما سكتو وعفتوها مدارية اخوتها رحتو شمرتوها لشايب .. من كون الله لاينطيكم ولكم باقين تلعبون بفلوسهم لعب وهم يتحسررون

: سنااااء اخر مره اكلج واحاجيج باحترام خلي يجون لاتجبريني اسوي شي ما يعجبج ..

صاح ماجد ابن عما الجبير واضح ستوه دخل .. شتسووووي بله شوووفنه مراجلك ..

سناء: ماااجد لاتدخل

: مااااتشوفي صوته واصل لرأس الشارع وشنو يريد

:ميخالف يما هم ناس بلا اخلاق ولا ضمير شنو نصير مثلهم تريد .. يبقى بالاسم خالك ولازم تحترمة






صادق: بسمممملة وينجحجح لج ولله اذبحج على طلعتج بس اصبريلي .. ولله اندمج ولج احنه تردين تخلين راسج براسنه .. اذا ما بجيتج دم وفطرت كلبج اتذكري كلامي حسبالج سناء تحميج بسسسيطه ..

دخل رعد الغرفه يرجف واني وسلوى ووعد وره الباب كلنه خايفين .. وهو مستمر يتصايح ويه عمه

:اتذككككري كلامي اذا ما بجيتج دممم اذا ما صرت كابوووس اخنكج حتى بنومج ... على هاي طلعتج اصطبرلي

ماجد: أكلك انت جااااي تتهدد وتهيط صار ساعه ومحترميك شوووو دررروح

دفعه ماجد يطلع وهو تخبل شلون يدفعه وصار مضارب هو وماجد وعمه تعيط خايفه على ابنها ..

:لككك كلب تمد.ايدك عليه .. هي هاااي تربيتج الززفرة ..
بسيطه بطن عيني .. اعلمكم اني
سمعييييني ولج العرمه .. اذا مكيفه بعمتج تحميج .. خليج خليج مكيفه بيها ... وراح تشووووفين ..

صار صوته يبتعد وهو يصيح لحد ما اختفى صوته .. كعدت بالكاع رجلي ماتن .. وسلوى عيونها تجري دموع وتجرررف

سلوى:بسمله نبقى بهذا الخوووف شلووون بينه شوكت نرتاح ياااربي شوووووكت

قبل ما ارد عليها دخلت عمتي فحطانه وسمعت كلامها ..
صاحت بيها
: عليييمن تتراجفين شعراية من يمكم مايمس وهو هل انكلع لأن يعرف حق المعرفه مايكدر ياخذكم منا بس يتعدى علينه اشتكي عليه ولله لاتخافون عمه ..

بسملة:عما خاف يضل يهد عليج كل شويه اني ما اريد اشلع كلبج واسويلج مشاكل

:كتلج لا تخافين كلشي مايكدر يسوي ..

بقيت كاعدة اكل باضافري .. محتارة .. مستحيل يسكت صادق .. مستحيل يخلينه نطلع من جوة رحمتهم .. كل همهم هو فلوسنه وحصتنه والا لو ماعدهم مصلحه حتى ما يدورنه ولا يهتم وين نروح. وين نجي ..

طلعت لعمتي كاعدة بالاستقبال.. تسولف ويه ابنها ماجد .. بخصوص الي صار .. بس قبل ما ادخل وصلني صوت ابنها وهو يكلها

:يما فدوة اروحلج تره ما النه خلك مشاكل .. هذا راح يضل جاي يتهدد يريد ولد اخو ..






: وشنو هم مو ولد اخوي لو غربه شبيك ماجد

:يبقون محسوبين على عمامهم ونبقى احنه غربه وهن بنات شابات يصير ما يصير تطيح بروسنه ويتركب الحق علينه ..

: ماجد عيب هل كلام يما ولد اخوي تنخو بيه شنو تريد اتركهم واكلهم مالي علاقه بيكم ..

: يما رحمة لروح ابوج ولد اخوج هاي السنوات كلها وين جانو .. مايوم شفت احد دك بابج .. لوبس من تضيك الدنيا بيهم اتذكروج ..

:شايف اذا هل سمعت هذا الكلام منك بعد ولله فلا احاجيك .. تره الابنيه عزيزة نفس ..وهي من لسانها كالت عمه اني بس أرتب وضعي اروح .. وكالت ما اريد اسببلج مشاكل .. بس اني ما قبلت على كلامها .. لاتزعلني منك .. واني اصلا افكر اخطبها الك ...

:شنووو... تخطبيها الي شنو يوم .. هو اني معيش روحي حتى اعيشلي مرة ..

:العيشه تدبر وسهله مثل ماهسه هم ويانه عايشين بس الفرق تصير مرتك عالاقل هي واختها مايتقيدن وانتو هم ما تتقيدون .. بنيه بت حلال ومؤدبة وحلوة شتريد بعد ..

من راد يطلع من الأستقبال اني ركضت للمطبخ وهو طلع وراح لغرفتهم دخل..
احس اختنكت روحي طلعت ... من كلامهم .. حقهم هم يخافون من المشاكل ... واكيد اذا زادت المشاكل راح يملون... ناس كاعدين ومستقرين واني بين يوم وليله طلعت الهم .. وبركبتي تلاثه غيري .. زدت الحمل فوك حملهم ..
حاول اتناسى قهرتي .. ورحت لعمتي تباوع على التلفزيون .. دخلت يمها وكعدت

:عمة ؟

انتبهت الي : ها حبيبتي

:باجر .. باجر اريد.اروح للمحكمة اسوي اعتراض على الوصاية مال عمي اريد انقل وصاية اخواني الي

:ايي .. اني اروح وياج ما اخليج وحدج

:ياريت يكون افضل .. بس المشكلة صالح اكيد ماراح يتنازل بسهولة.. عمي صالح يريد ياكل كلشي اله وعلى مود الفلوس مستعد حتى يموتنه..

:اكيد ماراح يتنازل .. ينراد الج محامي.. يمشيلج بكل هاي الإجراءات..

:ولله كل ملكيتي مليون ونص واخاف المحامي يطلب هواي

:منيلج مليون ونص .. منين جبتيهن






توترت ماعرفت شلون ارد عليها .. واضطريت اكول الها

: بعت ذهب امي .. وأخذت الباقي من كنتور عمي صالح ..

: هزت راسها ساكته بس حسيت بيها مثل الي ما مقتنعه .. وكالت .. اذا على المحامي لاتشيلين هم .. ابن حماي محامي وخوش ولد ما ياخذ هواي اني اكلفه ..
هسه اتصل بيه ...وباجر نشوفه ..

:ماشي لعد باجر من الصبح نروح ..

خليتها طلعت رقم ابن حماها ودكت عليه واني طلعت .. رجعت للغرفه.. شربتلي حبايه مسكن لان ايدي صارت توجعني.. احس محنطه منتضرة شوكت افتحها واخلص
باوعت علاج سلوى باقي حباية وحدة .. ولازم باجر اجيب الها علاج ..

ثاني يوم كعدت من الصبح لدرجه الضوى ستوة طالع .. لكيت عمتي بعدها نايمة .. بس لان طول الليل اني كل شوي افز منتضرة الصبح يطلع
رحت خليت القوري على الطباخ .. و وكفت باب المطبخ اسحب نفس من ريحة الصبح ... مغمضة عيوني ..

أباوع للسماء، چنها لونها رمادي ممزوج بزُراگ خفيف، لا هو صبح كامل، ولا ليل باقي...
فترة ضايعة، مثلي...

صوت العصافير يتعاركن على شجر النبكة الجبيرة.. الجو صاير بارد حيل وقت الصبح .. احتضنت نفسي .. ورجيت راس على جرجوبه الباب غمضت عيوني .. ومثل الغفيت واني واكفه ..
فزيت على ريحة الجاي طلعت .. رحت طفيته .. وبقيت افتر بالحوش .. الضوة نزل وبعدهم نايمين .. ما اتحملت رحت كعدت عمتي من نومها ..

:عمه عمه كعدي ..

اشو المرة فزت حيل رغم اني كعدتها بهدوء فزت وهي تكول
:ها يما اسم الله شصاير شكو

:على كيفج عمه ما صاير شي .. بس اكعدي خل نتريك ونروح

فركت عينها وباوعت الساعه : ولج استوها بالسبعه ونص بعد وكت

: عمه اني الليل كله منتضرة يصير الصبح بين ما نتريك ونحضر نفسه يله كومي ..

هزت راسها وكامت غسلت .. واني سويت بيض ورحت بدلت بسرعة .. كعدنه نتريك .. وراحت هي لبست جواريبها وربطه .. ولبست عباية .. اتصلت على ابن حماها بيتهم قريب على بيتها .. كال الها راح أمر عليكم بالسيارة بس اتريك ..

كعدت منتضرة على نار نص ساعة و وصل .. طلعنه اني وعمتي وركبنه وياه .. صارت عمتي تسولف اله كل شي .. وكل التفاصيل .. باوع عليه بالمرايه وسألني






:يعني برأيج عمج ماراح يتنازل عن الوصايه بسهولة

:اييي لأن هو اهم شي عنده أن فلوسنه تكون تحت تصرفه طبعا فلوسنه ماشايفين منها شي غير مصرف كلش قليل والا اني اطلب بالساني وبالذلة ..

:هاي التفاصيل كل مهمه بس لازم تتأكد منها ..

:شلون تتأكد يعني

:احتمال القاضي يطلب باحث اجتماعي يطلع ويستكشف كلشي

:بس الباحث الاجتماعي شنو راح يشوف .. احنه جنه عايشين وياهم بالبيت بغرفة أهلي وحالياً عايشين يم عمتي

:زين اكو شهود عندج يثبتون هذا الكلام .. اذا اكو شهود هل شي كلش راح يساعدج

:اخواني موجودين .. وابن عمي .. بس مامتاكدة اذا راح يقبل يشهد لو لا ..

هز رأسه وكمل الطريق ورجع يسولف ويه عمتي لحد ما وصلنا المحكمه فتحت الجنطه اتاكد من كل الاوراق ..
كعدنه بغرفة مكتب .. وهو راح شوي ورجع وياه شخص ثاني .. طلب مني احجيله كلشي .. ورجعت كررت عليه نفس الديباجه وهو يكتب .. الملاحظات.
حجيت اله كلشي .. معاملة عمي السيئة النه
استغلاله لحقنه بلا ما ينفق علينه
مرضنه اني واختي وعدم رعايته
حتى موضوع زواجي الغصب ذكرته
عن كلشي سألني ...

. وأخذ مني الاوراق .. جنسيتي وجنسيتة اخواني وأبوي وامي .. وشهادة وفاة ابوي وتقرير الطبي لأمي.. بس شي واحد جان رايح من بالي وهو نبهني عليه من سأل..

:كتلي والدج توفى منتحر ..

:ابتعلت غصتي وقهري ورديت .. اي

اكيد اكو تقرير طبي .. من الطب العدلي .. اعتقد هذا الشي هم راح يخدمج ..

:بس اني منين اجيب التقرير الطبي ..

:هو مو كلش ضروري بس ابسط ورقة ممكن تخدمج .. اذا تكدرين تدبرين هل ورقة يكون افضل ..

حجه وياه المحامي .. استاذ اريدك ا ترتبلي هذا الاستمارة والطلب .. وياريت لو تكدر تخلي الطلب يدخل للقاضي خلال يوم او يومين

:احاول .. وبعد ترجع حسب الزخم وعدد القضايا الي تدخل للقاضي ..

كمل الطلب .. وخله بي مستمكات.. وراح رجع وره ربع ساعة تقريبا نطاني المستمسكات الاصليه وأخذ نسخه عنها وانطاني نسخه عن الطلب .. ورقم دعوة






هذا الإجراءىات طولت تقريبا أكثر من ساعتين يله خلصت
وراح كاتب الضبط الي كتبلي الطلب وياه المحامي .. كعدنه ننتضر بره .. فترة اني وعمتي .. مر تقريبا أقل الساعة ورجع المحامي ..

: الطلب تسلم للسكرتاريه.. وخلال يومين او ثلاثه يدخل للقاضي أن شاء الله..

حجيت من مكاني
:زين ليش ما يدخل اليوم يعني مراح نقابل القاضي اليوم

ابتسم ورد عليه
:انتي كلش مستعجلة.. عبالج بهل سهولة اكيد لا .. اكو هواي ملفات قضاية تدخل للقاضي بالسرة واكو قضايا قبلج .. ماكو شي يكمل بنفس اليوم .. طلبج ندرج ضمن الملفات الي راح تدخل للقاضي .. وبس يتطلع عليه يحدد موعد الجلسه الاولى ..

:هي اكثر من جلسه

:احتمال .اكثر من جلسه بالذات اذا عمج يعاند ما يقبل يتنازل .. هو لو شخص مسالم ويتنازل بلا مشاكل هل شي راح يسهل ويعجل ألنه .. بس اذا صار شي ممكن يخدمنة لاوهنا تنخصم من اول جلسه يصدر القرار بنفس اليوم

:ما راح يتنازل بسهوله اعرف

:زين شنو رايح تنطيني رقمة واني احاول اتفاهم وياه احاول اوصل وياه لحل ممكن من يسمع مني يتنازل .. لأن بجميع الاحول هو راح يوصله تبيلغ

: اني ما اعرف رقمة ... بس ممكن ادبرة

حجت عمتي :اني اودي الك بالليل

:ماشي انتضرج تودي وخلي اسمع منه وأشوف

سألته: وبالنسبه للتكاليف ؟

: ماراح نختلف أن شاء الله

ردت عمتي : لاتفكرين بيهم اني تفاهمت وياه

: انتو تكدرون تروحون بعد واني أبلغكم بأي جديد

طلعنه من المحكمة .. تعبانه ودايخه .. كلشي شلعان كلب .. شنو يضملني ما هم يجي عمي ويسويله مشكلة جديدة.. الضاهر داخله وياهم على حرب ما اعرف راح اربح بيها لو اخسر

مرينه بطريقنه على الصيدلية اخذت علاج لسلوى ..
ورجعنه للبيت .. ومليون سالفة براسي
الناس بلشت تداوم نصها وماعرف شراح اسوي ويه اخواني
عمي راح يتفاهم ويه المحامي لو هم يعاند

لليل خابرت محمد .. اخذت منه رقم عمي صالح وسديته بسرعه منة .وماطلبت منه يجي يشهد لان لو يريد جان هو من ذاته كال ..
عمتي ودت الرقم للمحامي كال الها هسه راح اتصل بي ..






كعدت كلبي يدك حيل واكل باضافري متوترة .. واترقب شراح يصير ..
مر تقريبا ساعة كاملة يله دك جهاز عمتي .. ركضت عليه وشلته جبته الها ومن كد ما متوتره فتحت خط وسبيكر وخليته على اذنها ..

: ها عما بشر شصار

:عمي شنو هذا من بشر
لا يتفاهم ولا يحجي انسان سوقي بلا اخلاق
احجي وياه بهدوء .. يابشر غير بشر يتفاهم وياك
وهو يصيح اصلخ واذبح واسوي واعمل واكسرها .. وكسرت وجهي كدام صديقي وطلعت هي واخوانها من البيت بلا ما احد يدري بيها
ولوتموت ما أتنازل والا ارجعها واذلها أكثر من مذلتها مال قبل ..
عاد اني سحبت لسانه وكتله.. هي مقدمة شكوة هيج وهيج مسوي وياهم.. اول مره نكر
كال جذب عايشه معززة مكرمة .. بس بسبب عصبيته صار يجفص واعترف على روحه

ضل يصيح .. كول الها الا ارجعها واذلها مثل مذلة قبل وأكثر الا اهينها .. الا اكسر رأسها الي تحطة براسي وتريد تصير صاحبة أموال... الا اسودنها وواكعدها يم امها ..
وكال كول الها لاتفرح عبالها خلصت من الحجي بس خل الزمها .. الا ارجعها عليه واكسر خشمها..
طبعا هذا الكلام كله اني سجلته .. جنت محسب حساب كلشي .. وفاتح تسجيل وكلامه هذا كله تسجل .. ودليل كلش قوي ضدة يثبت كلامها كله .. حيل راح يساعدنه كدام القاضي ..
خلي تطمن .. واريد منكم .. اذا صار واتصل بيكم .. سجلو مكالمتة اي شي ممكن يخدمنة

جريت نفس براحه احس باب جديد انفتح الي ..
وعمتي بقت تتشكر منه ..

:بس نصيحه خلي هل ايام لاتطلع من البيت لاهي ولا اخوانها .. لأن مانعرف شنو ممكن يسوون ..

:تمام .. ماراح تعتب الباب .. مشكور ..

سدت الخط وكالت الي .. صالح خرط الاول والتالي بلا مايدري بنفسه أن شاء الله وصاية اخوانج تصير بايدج
لاتشيلين هم ..

شي بي برد وارتاح .. من صار عدنه دليل يساعدني
ولو ما استحي من عمتي جان طلبت شهادة عدنان يشهد كدام القاضي شكد جانو يأذونه .. بس استحيت احجي لو اكول الها ..

مرت ثلاث ايام واني منتضرة كل يوم عسى ولعل يتصل المحامي ويكول الطلب دخل للقاضي وحددو جلسه ..
بس ماكو ... عمي صادق تفاجئت بي سكت بعد وما رجع تعارك حتى يأخذونه .. شكد ما ارتاحيت بس خفت من سكوته..
طار كلبي من سمعت جهاز عمتي دك وهي جاوبت المحامي ابن حماها .. حجت وياه وكملت سدت الخط واجت تبشرني ..
الطلب داخل القاضي وتطلع عليه و وصل تبليغ لعمي .. مو عد اول جلسه بعد اسبوع ....






ولحسن الحظ هل مره .. بعد اسبوع والا هيج قضايا بسبب زخم القضياء ممكن يكون اسبوعين وتلاثه واربعة لكن الحمدلله هل مره الحظ كان وياي ...

بعد ما وصل التبليغ لعمي .. كوم الدنيا وما كعدها..
ثاني يوم تفلش الباب علينه .. ركضت سمر فتحته .. ودخل عمي صالح وياه جبرية ومهدي .. يمشي بصعوبه على عكازات .. اباوع عليه من شباك المطبخ .. ودك كلبي بقوة بس لازم ابقى متماسكة وما اخاف منه ..

طلعت عمتي .. ورغم كارهتهم بس هم بعد دخلو ولازم تواجهم

: هلاااا .. تفضلو

صاح عمي وهو واكف بالطارمه
: ماجاي حتى اتفضل ولا اشوف خلقتج .. طلعي بت اخوج السا*طة الي تفتر بالمحاكم وتوديلي تبيلغ

: حجيكك وياي صاااالح ومالك شغل بيها .. شررايد

: مالي حجي وياج سناء الي مثلج من زمان تبرينه منها .. مو انتي الكاطعتي اخوتج وبعد ما عرفتينه .. مو انتي الي كلتي اخوتي ماتو.. شكو بعد مجلبه بخلفه صااابر ..

: اييي كلت .. كلت اخوتي ماتو .. وما ضل الي غير واحد وبسلامتكم مات .. صابر مات بس طيبته وحنيته عايشه.. بس انتو تشمون الهوى ومتو بعيني .. وخلفة صابر بامانتي وما يطلعون من باب البيت تفتهم لولا ؟

جبرية: اكلج سنيوة مالج شغل انتي اطلعي منها جاين ناخذهم ونروح ما نريد نسوي مشاكل وياج

: ولجج انتي تخلين قندرة بحلكج ولا تحجين .. الضيم الي جرة عليهم كله من ايدج ضيعتي امهم من اديهم بسحورتج وهسه جايه تلعلعين وين وجهج

صالح: وينججج بسيمة طلعي .. ولج اني توديلي تبليغ
ويطلبوني بالمحكمة من وراج ما تلطعين ضامة راسج

خليت وفتحت باب المطبخ وطلعت ما خايفه منه ..
ركض عليه مهدي وصار يريد يجرني من ايدي شاغت روحي من الوجع

: امممشي ادب سززز تبلغين على ابوي ولج

:عووووفني سااافل ... حجيت هيج وضربته كله برأسه .. خليته مايندل طريقة ..

صالح: ولجج فضحتينا بسملة امشي ويانه ... واني مستعد اسامحج سحبي التبليغ






: التبيلغ ما اسحبه ومستحيل اخليك بعد وصي علينه وتاكل بحقنه أني الوصيه على اخواني .. جبت سنين وانت وصي علينه .. عيشتنه بذل واذيه وضلم وقهر .. بس لا عبالك الدنيا تبقى الك طول العمر يجي يوم وكلشي يتغير .. مستحيل ابقى ساكتتلكم بعد وحقي من عيوووونكم أطلعه وما خايفه منك ...

سناء : اممممشي دخلي جوة امممشي اكلج

صار تدفع بيه تريد تدخلني.. بس بحركه سريعه صالح تقدم ورفع عكازته وضربني بيها .. صارت الضربه على كصتي احس عيني طفت من الضربة وبسرعه نزل الدم على وجهي..

ركضت دخلت جوة .. وعمتي بره تتصايح وياهم
وهو يبدع بالحجي ومرته صافة وياه يلعلعون وعمتي مو اقل منهم .. وبقت تطرد بيهم .. لحد ما ركبو السيارة وطلعو ..
واني داخله جريت وصله من الطباخ خليتها على كصتي ..
وسلوى ترجف يمي خايفه عليه

: كسررر بايدة أن شاء الله هل حقيرررر
ولج خاف تريد خياط هاي جرح جبير

صافنه بمكاني والدنيا مفتره بيه ..دخلت عمتي تطمن بيه وتغلط عليهم ..

: شووو اشوف الجرح ..

وخرت الوصله من كصتي وشهكت
: يماااا الجرح كلش غميج يرادله خياط هذا كووومي كووومي

:عمه دايخة ما اكدر ..

:ميخالف حبيبتي كووومي وياي خل اخذج للمضمد
كمت وياها بصعوبه .. جابت فرح الي كوم كلنس خليته على كصتي وطلعت ويه عمتي للمضمد شاف الجرح .. كال غميج بس ما يتخيط .. ضمدة الي ولفه زين ورجعت للبيت .. خليت راسي على المخده مسطور سطر ..
التليفون يهتز على الشباب.. مديت أيده جريته عدنان مرمش ومودي رساله .. يسأل وينج .. رمشت عليه .. ماطول دقيقه واتصل بيه ..

حجيت ومبين على صوتي التعب : الو

: وينج بسمله صار كم يوم لاحس ولانفس وانتي كلتي لاتتصل عيب من عمتي شجاج

:ما اكدر لأن بالغرفه بنات عمتي ينامن واستحي ادك عليك

:شبي صوتج تعبان كلش ..

:استوني.اجيت من المضمد .. صالح شك راسي






:شنووووو صالح صالح وين لكاج وليش يضربج يرررريد اكسر أيده مثل رجله يله يبطل منج مو وحق العباس هل مره الصب ما يكفي ولله اخلي ادي ورجلي ابلاتين يحطولهن..

: يمعود.. اني اصلا جنت متوقعه راح يندلوني اول مرة صادق اجة وعمتي وكفت بوجها
واليوم صالح هو وابنه ومرته وهذا مهدي الجلب يجر بيه من ايدي المكسوره .. شاغت روحي بس ضربته كله على رأسه وصالح ضربني بالعكازة وشك كصتي خلاها تصب دم .. لأن وصله تبيلغ من المحكه مال طلب وصاية

:شنو شنو وحده وحده اشو انتي صايرة كلشي ما تسولفيلي .. تبليغ شنو وشوكت

: رحت اني وعمتي وكلفت محامي يصير ابن حماها .. وقدمت اعتراض على وصية عمي وطلب وصايه الي .. والحمدلله كل الاوراق الي احتاجها اخذتهن من أوراق صالح قبل ما اروح .. وكل وكل الأدلة وياي وضد صالح وصله تبيلغ بالمحكمه والجلسه بعد اسبوع .. وهو اجه هنا يغلي
وصار الي صار

:اجي اشهد اني واكول للقاضي على معاملتهم الج

:فكرت بيها بس استحي من عمتي

:اهووووو شلون سالفه هاي

:دسكت هي غير تريد.تخطبني لابنها ماجد ..

حجيت هيج لو هو انرعص .. بالبدايه سكت مثل الي يريد يركز بكلامي
:عيدي شنو كلتي ..

:اءءءءءء لا هيج هي تحجي تشاقه

:لا لا ما تتشاقة ولو ماصدك انتي ما حجيتي كدامي
ولجج بسسسملة .. هممم تردين ترررحين من ايدي .. ولج مو اجي ولله اجرج من نصهم وما اهتم لأكبر راس

: بسس على كيفك اهداء هسه شفتني وافقت هي بس حجاية

:هسه هسه تحجيلي كلشي بالتفصيل

: ولله مجرد حجاية .. حجتها كالت اريد اخطبج لماجد.. وسمعتها تحجي ويه ابنها بنفس الموضوع ..

:وانتي شنو كلتي الها شنو كان ردج

:سكتت ماعرفت شنو ارد

: ياااحبيبتي جاي تفكرين.. اني اكلج واافقي وافقي خوش ولد وابن عمتج روووحي كولي الها موافقة عمه

حجيتها ورد اشوف شنو يكول
: هااا هيج رايك يعني اوافق

:اي اي وافقي خوش قسمة .. بس كولي الي الجفن الي تريدي يلفوج بيا شنو نوع القماش تردينه






:ياااااا عدنان شبيك اسم الله عليه

:ومررررض بكلب جبرية وسمم وقزرقط بكلب صالح وطحيل بكلب صادق لاتفورين دمي .. ولكم نوب تحجيها بكل سهوله ..

: عدنان لاتكبر الموضوع اي شي ما راح يصير واكيد راح ارفض ..

:لا ولله وافقي .. اني شنو اني نعال قديم صرت .. ولج انتي لو صدك تحبيني ما تضلين ايام ويام ما معبرتني ..واني كلبي يفور مثل البركان عليج ..

:فدوة لكلبك حبيبي

حجيتها وهو فورا خرط وبرد
: ها شنو كلتي

: احم كلت اريد اروح انام راسي يوجعني

:عيدي شنو كلتي ولج

:كلت فدوة لكلبك

:وبعد

:حبيبي

: اخخخخ .. احتركت صفحه صالح
بسسس لاعبالج نسيت سالفه الخطبه

:عدنان انسى ولا تفكر بالموضوع ولله .. ما راح يصير شي .. مستحيل اوافق باي بشر غيرك لو شما يصير .. مستحيل بشر يكون زوجي غيرك .. عدنان اني فتحت عيوني عليك وعلى حبك .. بكل مرحله بعمري احبك
بطفولتي وبمراهقتي وبشبابي.. وبعجزي
حتى لو صار عمري مية سنه مراح انسى شكد حبيتك واني بعمر ال8سنوات .. ارتاح وابد لاتفكر .. وذا شفت عمتي تفكر بالموضوع صدك .. اني راح اوكف واحجيلها الحقيقة ..

:كون كبالي وهيج تحجين بيج بخت بعيدة

:يله يله دوس بريك .. خل اروح ماكدر ابقى أكثر ..

:ديربالج على نفسج ..

فصلت الخط .. وبقيت بمكاني اغفي من الوجع والتعب ..
لحد ما نمت ..
ساعات افكر اكول لعمتي الحقيقة .. واحجيلها كلشي عن عدنان .. واطلب منه يجي يشهد وياي .. بس ماعرف استحي افتح وياها الموضوع .. بس شهادتة راح تفيدني كلش .. بقيت محتارة .. لحد ما أخيراً اخذت قراري ورحت احاجيها ..

جانت كاعدة بالاستقبال.. مطلعه محاظرة لشيخ رجال جبير ..
كعدت يمها .. بقيت اسمع بكلامه .. احس كلماته تاخذ العقل .. وتبجبر الشخص يستمع اله

.. هل تتصور خالق العدل وهو الله عز وجل

اذا مرت به دمعة يتيم منكسر ذهب أبوه هدرا
او دمعة أرملة ضحت برجل بيتها
او دمعة مغصوب اخُذ حقه
تتصور الله عز وجل يعرض عن هؤلاء وهو رب الرحمة
حاشا لله حاشا لله
هو اله العدل .. والعدل لاينشد الا عنده
انك لاتجد العدل الا عند العدل
لأن الظلم أمراً عظيم
الله عز وجل يضع الظالمين في نهايات مفجعة
يحط له نهاية بالدنيا ويحط له نهاية بالآخرة ..






صفنت بكلامة وكأنه جاي يوصف عمامي بكلامة ..
صوته نبرة كلامة أسرت كلبي ولاارديا بقيت صافنة بيه
لحد ما خلصت محاضرتة ..

:عمة ؟ هذا الشيخ شنو اسمه

:هذا الشيخ الدكتور احمد الوائلي..

:كلامة يجننن يجننن

:اوووف انتي شسامعة من كلامة يغير ياخذج لغير عالم

:اول مرة اسمعة واحس رحت بغير عالم .. عمه بعد كل ما تطلع محاظرة اله صيحني ..

:المرحوم جان يموت على محاضراته واكعد وياه اسمع .. وهسه اني صرت مدمنه على محاضراتة حجيه يرد الروح ..

:بيت عمي ولامره شفت هيج امور .. تدرين .. اتذكر مرة من المرات بيت ابو خالد جانو مشغلين سيدي .. بمحرم ومعلين صوته .. جانت طالعه قصيدة كلماتها تجنن
لقارء اسمه باسم الكربلائي.. من كد ما حبيتها رحت سألت جبرية كلت الها عمه ليش مانشغل مثل بيت ابو خالد هيج ..وكون تشوفين بيومها شسوت وشلعبت بيه
وماكافاها من اجه عمي صالح سولف اله وتكلة عدنان جاي يلعب برأسها ويخليها تفكر بسوالف مو من ثوبنه
وحصلت كتله من كتله .. ومنعوني ما اوصل الهم .. بس اني بالبسكوت اصعد بالسطح ..

:هذول مرضة مو صاحين .. بس منو عدنان

الحمدلله لكيت زوية ادخل منها بالموضوع

:عمه هذا ابن جيرانه بيت ابو خالد اني وياه اصدقاء من الطفوله كلش ولحد هسه بعدنه اصدقاء ..

باوعت الي ما مقتنعه ..
: اصدقاء شنو ؟ وين اكو اصدقاء عدنه وين كاعدين بأمريكا

:لا عمه عدنان يختلف هو من جنه اطفال صديقي ويساعدني بكلشي .. انتي ما تعرفين بيت ابو خالد

:اعرفهم شلون ما اعرفهم غير جيرانه بس ناسيه عدنان ماتذكر عدهم ولد اسمه عدنان

:اي هو ابنهم .. يعني يعني .. الصدك.اني ماعندي حتى صديقات بس هو صديقي .. عمه أريده يجي يشهد بالمحكمة لصالحنه شنو تكولين ..

:يجي يشهددد ؟ وانتي وين تلكينه حتى تكولين اله يجي يشهد

:عندي رقمة .. مخلي عندي من زمان كايلي اذا تحتاجين شي تواصلي وياي لأن يعرف اني هناك جنت محد الي






:بسملة انتي جبيرة وهو اكيد جبير مو زغار مثل قبل وأصدقاء وهل سوالف هاي هل شي ما يمشي عدنه مفهوووم وممنوع تتواصلين وياه تره ولله ازعل عليج كلش

هزيت راسي متفشلة منها وسكتت .. بس رجعت حجت .. اذا شهادته راح تخدمج هل مرة وبس .. اخر مره تحاجي مفهوم ..

:اي اي ميخالف...

:دكي علي كدامي خل اشوف وفتحي السماعة

:بلعت ريكي ادعي ما يذب حجايه وتسمعة .. ودكيت عليه
بس فتح خط وقبل ما احجي عمتي جرت التليفون من ايدي .. وكالت اله
:الووو ..

هو سكت شوي يريد.يتاكد من الصوت .. ورد
:الوو منوو وياي

:اني ام ماجد عمة بسملة ..

:اءءء اهلا خاله كولي أمر خدمة

:بسملة حجتلي عنك كالت شهادتة ممكن تفيدنة لأن هي عدها قضيه مال وصاية عمها .. اذا تكدر تفيدنه اكون شاكرة الك .. واذا تكول لا ماكدر .. بعد براحتك يما

:لا لا خاله صدك جذب ابطن عيني .. نطيني اليوم واني بخدمتكم

انطته اليوم والعنوان .. وتشكرت منه وسدت الخط .. وخلت ومسحت رقمه من لجهاز ..

اجة يوم الجلسة .. وكعدت بيومها متلهفة خاييفه كلش وبطني مخبوطة خبط من الارتباك .. ماخليت ايه قرآنية حافضتها ماقريتها .. الف دعاء دعيت .. بيومها اخذت اخواني وياي .. رغم المحامي حاول يطمنه بس مو بيدي الخوف مسيطر عليه

كعدنه ننتضر موعد الجلسه دك جهازي كان عدنان .. وهم عمتي جرت الجهاز من ايدي حاجته ودلته مكانه .. ومسحت رقمة ورجعت الي الجهاز

شوي وبين عدنان .. ويحاول عود يبين كدام عمتي جدي
ويسلم برسمية
احس كلبي طارر بشوفته وطبول صارت تدك بكلبي

:رحم الله والديك وليدي لأن أجيت وكلفت نفسك

:لاحجيه غير تددلون صدك جذب واحد مايصدك يسوي فعل خير .. غير تشلعون عيوني

يحجيها ويباع عليه بنظرات مكر واني كوة لازمة ضحكتي .. نوب من يشوف عمتي تدير وجها .. يحجي وياي بلا صوت ويحرك بشفايفه ... ويكلي مشتاقلج
خفت عمتي تلكفني .. درت وجهي وبعد ابد ما باوعت اله
.. لحد ما صار موعد جلستنه ودخولنه على القاضي .. توكلت على الله ودخلت وياي المحامي طلبوني اولا بس اني وحدي كوني اني الي مقدمة الطلب
دخلت... حسّيت رجلي ترجف، بس مشيت بثبات. وسحبت نفس وزفرته ..






وكفت كدام القاضي .. جان مدنك عينه بأوراق كدامة ..
رفع رأسه يباوعلي..

القاضي: إنتِ بسملة صابر مرهون ؟

نعم .. اني

سأل المحامي والوياي : الطرف الآخر وين ..

جاوبة بثبات سيدي القاضي المحترم،
الطرف الآخر تم تبليغه أصولياً حسب القانون، وغيابه بدون عذر مشروع يدل على امتناعه المتعمد عن المثول أمام عدالتكم.
نلتمس من عدالتكم المضي في نظر الدعوى غيابيًا، ، واعتماد الأدلة المقدمة من جانب موكلتي، وإصدار القرار المناسب حفاظاً على مصلحة القُصَّر ..

هز رأسه ساكت ..ورجعت باوعلي وبلش يسالني سويت مثل ما وصاني المحامي بالضبط

بهدوء وثقة.
بدون مبالغة أو اتهام مباشر إلا إذا عندچ دليل
حاولي تكون إجاباتچ واقعية وعاطفية بنفس الوقت تبينين حبچ وحرصچ عليهم ..

والحمدلله من نبهني المحامي .. وعلمي لأن جنت على أساس محضرة جواب واريد اكول للقاضي لكيت سحر الباب غرفتنه مدفون وطلع مسوينة لأمي .. بس المحامي كال القاضي ماياخذ بهذا الكلام ..

بسملة صابر مرهون .. قدمتلي طلب .. بالاعتراض على وصايه عمج وطلبتي انتقال الوصايه الج ..
ليش قدّمتِ طلب نقل الوصاية؟.

بسمة: سيدي اعتراضي على وصاية عمي.. اولا الوصايه علينه ماكنه نعرف بيها لا اني واخواني اني تفاجئت بورقة قرار وصاية علينه موجودة عندة ما اذكر أحد سألنه أو طلبنه اني لو اخواني ... ثانيا اني بلغت السن القانوني
وهم برعايتي من وفاة ولدي وراها تمرضت امي ...طول هذه السنوات اني المعينه الهم .. اخواني الازغر مني اختي مريضة بالقلب وكلش تعبانه .. صحتها مهمله من قبل الوصي ومصاريف علاجها يذلني يله ينطي .. واخواني الاطفال اني هم الي ارعيهم وامشي بأي إجراء يخصهم مدرسه طبيب ..

:وين ساكنين الأطفال؟ ويا منو

: اني واخواني ساكنين بيت جدي الي هو بيت ورثة وعايشين وياهم..

منو اللي يعتني بيهم حالياً
:اني ..

:تصرفات عمج الي هو الوصي عليكم شلونها ..

أشرت على كصتي وكتله .. هذا وحده من تصرفاته
سيدي راح احجي الي بكلبي واريدك تباوعلي بعين الاب.. ولدي كان شخص فقير لدرجة يصيحون اله مخبل
عمامي الاثنين استولوا على حقه بالورث وشغلو بعربانه دفع .. كانو يعاملونه اسؤء معاملة ضرب واهانه وذله هم وزواجاتهم .. واخر شي حبسو بمخزن لحد ما بيوم لكيناه منتحر .. بعدها عمي الي هو الوصي الحالي كال لامي لو تتزوجيني لو اذبج على اهلج وأخذ اطفالج. . وهي لخاطرنه وافقت في سبيل ما يحرموها من يمنه .. وقتها كانت حامل بأخواني التؤام بس ولدت تزوجها بعدها بفتره فجاء امي فقدت عقلها .. وشمروها بمستشفى الشماعية.. ومن وقتها واني تركت دراستي حتى اعتني بأخواني.. واختي الي ازغر مني مريضة بالقلب كانت تطيح وتكطع النفس وتصير زركة .. بدل ما يأخذها لطبيب هم تركت المدرسه .. وبقينه هذا وضعنه طول هذا السنوات ضرب وظلم ..

حجيت الي بكلبي والقاضي صفن يسمعني لحد ما سكتت

:يوفر الكم مصرف دراسه رعاية

:لا ابد

عدچ دليل إنه مقصّر أو مؤذي ..
جاوب المحامي بدل عندي .. سيدي عندي تسجيل مكالمه بصوته .. يعترف على نفسه وعلى معاملته الهم .. وعلى إجبار موكلتي على الزواج من رجل مسن

هز رأسه ورجع يكمل

إنتِ شنو وضعچ؟ تشتغلين؟ مستقرة؟

: سيدي، صحيح حالياً أسكن ويا عمتي، لأن ما عدنا مكان مستقل، بس هذا وضع مؤقت. إحنا عدنا عمارة باسم أبويه، والعم مستولي عليها، وعدنا قضية مفتوحة وننتظر الحكم، وإن شاء الله نسترجع حقنا.
أخواني محتاجين حنان وأمان، وأنا رغم وضعي البسيط، ما تاركتهم لحظة.. أراعيهم من توفى أبويه، وأمي حالياً بمستشفى الأمراض النفسية.
طلبي للوصاية مو طمع، بس حتى أكدر أراجع معاملاتهم وأحميهم قانونياً، وأوكف بوجه الظلم اللي واكع علينا.

:وجوابي هذا كان اجابه على كل باقي الاسالة والمحامي ابتسم الي ابتسامة رضا

خلص من يمي وطلب مني اطلع طلعنه اني والمحامي وهو يثني على جوابي ..
وبلش يطلب اخواني واحد وره الثاني يدخلون ويطلعون .. ورجع طلب الشهود عمتي وبعدين عدنان
واني كاعدة توتر ماينوصف بكلبي ..

دخل المحامي للقاضي قدملة الاوراق الاصليه الي عندي كل المستمسكات.. وسمعه التسجيل الصوتي ..

وبقيت على نارر ادعي كون القرار يطلع بنفس اليوم ..
انتضرت وانتضرت والمحامي بعده جوة ..
عيني بعين عدنان ...الي حاس بقلقي وهو يحاول يطمني بنضراته ..

لحد ما طلع المحامي من القاضي اني دمي نااشف ..
فور كمزت كدام المحااامي وركضت عليه صرت بصفه من كد حماسي .. اجاني صوت عدنان قريب يكلي

:طفري بحضنه بعد .. شوي خليلج بلوكات

درت وجهي باوعت عليه ورجعت ابتعدت من المحامي .. وهو يكول

:الفف مبررروك قرار الوصايه صاار بصالحج ...

يتبع .

31
---------------
لستُ أطلب سوى حقي، ولا أسعى لغير الإنصاف.
ظُلمتُ كثيرًا، وصبرتُ أكثر، لكن للصبر حدٌّ إذا جار الزمان.
أقاتل لا ببطشٍ ولا بظلم، بل بعزمٍ يسكن قلبي،
فما ضاع حقٌ وراءه قلبٌ يؤمن بالعدل ولا يلين.
-----------------------
:الفف مبررروك قرار الوصايه صاار بصالحج ...
والله ما أعرف شگد ظلّيت واكفة، أحاول أستوعب. حسّيت روحي أطير، مو فرحانة وبس... چنت مرعوبة، تعب سنين ومهانة ومذلّة، كلها چانت معلّكة على هاللحظة. گلت بنفسي: بسملة، ربحتي... ربحتي! مو على عمّي، ولا على المحكمة، ربحتي على كل لحظة سكتّوا بيها صوتج، وكل مرّة جبرتج الدنيا تنزلين راسج.

تمنيت اشوف الهزيمة بعيونهم، بس. الفرحة ألجبيرة چانت من عيون إخواني، من الأمل اللي رجع بيهم، من ضحكة نرسمت على وجوهم
خليت ايدي على وجهي .. ما اريد ابجي ما أريد ابجي .. اريد افرح وبس ..
الف الحمد لله يارب الف الحمدالله.. من فرحتي ناسيه نفسي وناسيه حتى اني واكفه بصف المحامي لزك واستمع لكلامة ..
ماحسيت غير نجريت من شعري على كيف ورجعت ليورة .. التفتت عدنان واكف وراي وهو الي جرني ..

انتبهت اني فعلا لازكة بالولد المحامي ابتعدت عنه .. ورحت احضن بأخواني وأبوس بيهم
سلوى:الحمدلله بسمة .. همزين كدرتي تاخذين الوصاية جنت خايفه صالح يسوي مشكلة ..

:لاتفكرين بشي حبيبتي اهم شي خلصت من هل خطوة وخليت رجلي على اول الطريق ..
جريت رعد و وعد صرت احضن بيهم .. فرحتي ما انطيها لبشر ..
كمت منهم رجعت اتشكر من المحامي ..
:كلش اشكرك استاذ هواي سهلت عليه امور ..
:هذا واجبي اختي .. والتوفيق من رب العالمين.. ما تتخيلين تسجيل الصوت وغياب عمج شكد فادنة وسهل علينه القضيىة
:الف شكر ..
رفعت راسي العدنان واكف مسافه عنه ويباوع .. عمتي دايرة ضهرها تسولف ويه المحامي .. رحت وكفت كدام عدنان .. مبتسمة وعيوني مدمعة
:عدنان ...
:روحه وضوة عيونه

:الله يخليك الي ولايحرمني منك ... بس هذا الي اكوله لأن كل الكلام يمك يتعب وحروف اللغة العربية كلها توكف عاجزة على وصفك .. ووصف مكانك بكلبي .. وبحياتي
:الروح شكد عزيزة .. بس من اكلج مستعد افديج بروحي فعلاً اعنيها .. ولله مو كلمة التنكال بس افديج بروحي وماتغلى على ضحكة فرح تنرسم على وجهج
ماكدرت اتماسك أكثر وختلطت ضحكتي ويه دموعي ..
:عمتج منين طلعت لي صفح نايمة على خوانيكي من البارحه لليوم .. عمي خل نرجع على ايام عمامج احسن

:هههههههههه شبيك تخاف عليه ولله للمحل ماتخليني اطلع
:ولله فرحان كلش الج .. وفرحان بهذا حرصها عليج
:اي ولله هاي الايام القليلة الي عشتها وياها .. شبعتني بيها حنان ..
:واني مقصر بالحنان ؟ انتي بس كولي تم ونزوج اطلع الحنان من خشمج .. اكرهج بالحنان ...

:اني ما مرتاحه لقصدك بس راح اغلس
:وداعة جبرية عزيزة كلبي .. نيتي صافية بس عقلج وسخ

:مدام حلفت بجبرية معناها صادق ..
:لا عمي اني جذاب بس لاتجيبين اسم عمج المسموم كدامي
تعال صدك .. ماحاجيت لهلك حتى ترجعون لبيتكم
: حاجيتهم .. بس ماكلت الهم صالح الي مسويها.. اولا ماعندي دليل وثانيا صالح اني اريد اعمله على عملته هذه .. بس امي ما تقبل ترجع وأبوي يكول خل تستقر الأوضاع أكثر يله نرجع ..
هزيت راسي ساكته عدهم حق يخافون وفعلاً ماكو دليل يثبت صالح هو الي مسويها غير كلامي وبس ..
:اجت عمتي وكفت يمنا وحجت
: عدنان وليدي رحم الله والديك على وكفتك هذه ..
:صدك جذب خاله من عيوني
:مشكور يمة .. باوعت الي بعدني واكفه يمهم ..
:يله يما نروح بعد..
:ايي ماشي ..
:عدنان وليدي تعال تغدى يمنى
:مشكورة خالة .. بس لازم ارجع لدوامي .. واجبي مابقى شي ويبدي ..
طلعنه من المحكمة سوة وكلنه فرحانين .. عدنان سلم وراح .. واحنه اجرنه تكسي ورجعنه للبيت ..
باوعت للطريق الجهال بادية تداوم... واخواني اكلو راسي على مود الدوام .. وقررت باجر لازم اروح لمدرستهم اقدم اللهم على نقل .. خطيه ماريد اضيع سنه عليهم ..
طول اليوم كنه مرتاحين .. ورعد ينفخ بروحه

:اني ماخفت من القاضي .. من سألني جاوبته
كتله عمو يضرب بسمة وزوجها لرجال شايب .. وكتله يكتلونه من نكعد نباوع على التلفزيون واختي جابت النه جديد. ... وكتله عمو صادق .. يكلي الا ابطلك انت واخوك من المدرسه واشغلكم بعربانه مثل ابوكم الخبل..
1
نشغت عمتي ودكت على صدرها
: يا من كون مرض خبيث يلفهم يرحون فدوة لنعال صابر ..
2
اني اول مره اسمع هذا الكلام من رعد ...
:رعد صادق شوكت كالك هذا الكلام وليش ما حجيتلي

:قبل من زمان كالي .. بس نسيت اكلج
:محد يكدر يبطلكم ابد من المدرسة حبايب ..
خل يولي ...
:اني كتله .. كتله اختي بسمة ماراح تخلينه نبطل.. فاطمة تكلي انعل أبوكم لابو اختكم العرمة
باوعت لعمتي مقهورة وهي بادلتني النضرات نفسها ..
باليل قررت اكعد باجر من الصبح واروح للمدرسة وبطريقي أمر اشتري الهم ملابس واخليهم يداومون
سلوى :بسمة
التفت عليها من كعدت يمي
:ها حبيبتي كولي
:اكلج يعني راح نبقى هنا دوم
:بعد مادري لحد الان ما مبين .. من ناحيه عمتي ما تقبل .. وهم اذا طلعنه وين نروح .. ومن ناحية أحسها صعبه نبقى هنا دوم حمل عليها مايصير ..
:اني هم هيج اكول .. والصدك كلش استحي من ولدها اليوم صار موقف كلش خجلني
:شنو صار
:الضهر دخلت سبحت .. ومن كملت وطلعت صار كرار بوجهي كلش يريد يدخل يسبح .. حسيته بقى صافن بيه وشوي ودخل هو الولد انحرج واني كلش استحيت من الموقف .. والصدك احس نفسي كلش متقيدة
:اني همين مثلج ولله .. بس بالوقت الحالي ماعدنه حل غير نتحمل .. جاي تشوفين وجود عمتي شكد مساعدنه ومريحنه وهي فرحانه بينه .. سلوى اني صح حصلت على وصايه .. بس بعد وراي هواي امور اريد.اكملها .. وينراد أحد يكون بضهرنه .. وعمتي حالياً هي الي بضهرنه وجاي تشوفين محد بيهم كدر يتقرب وياخذنه منها لان جاي توكف بوجهم ...اريدج بس هل فتره تتحملين لحد مانرتب امورنه ..
:ومحمد
:شبي محمد ؟
بقت ثواني ساكته .. شبي محمد سلوى ؟
:احس بسبب العداوة الي بينّه وبين عمامي .. مستحيل اني ومحمد ننجمع بيوم ..

التفتت وصرت كبالها لزمت اديها
:اني ساكته تعرفين ليش .. لأن انتي فورا تكولين هاي انانيه .. بس اذا ترجعين للصدك.. اني ضد اي شي يصير بينكم .. سلوى لو شما صار وحتى لو تزوجج... وطلعتو بيت وحدكم .. تبقى فاطمة أمه وصادق ابو وجبرية خالته ومنى أخته .. انتي تعرفين حق المعرفه شنو ذول ..
تكليلي يتبره من أهله على مودج اكلج من سابع المستحيلات...أهله ذول يحبو ومددلينه ويباوعون لحكله وماشاف منهم غير الحب والحنان فمستحيل يتخلى عنهم لخاطرج .. محمد كل أمله تتصلح العلاقه بينه وبينهم ويتزوجج ويكعدج يم أهله ويتقبلوج .. هذا الي يريده محمد وانتي واني نعرف هل شي مستحيل يصير ..
اني هذا رأيي
:هو كلامج صح وعندج حق بي .. بس
:بس شنو سلوى
بلعت ريكها ماتعرف شنو ترد حايرة ...واني سكتت منها خلي الايام هي الي تثبت الها صحة كلامي ..
انتبهت الها تتنفس بصعوبة اليوم.. حاجيتها بخوووف
:سلوى شبيج ليش هيج تتنفسين كلبج يوجعج
:لا ماكو وجع قوي هيج خفيف كلش .. بس شوي تنفسي صعب .. واحس رجلي يوجعني ..
كعدت يم رجليها .. لزمتهن افرك بيهم واعصر باقدامها حسيت رجليها مثل المتورمات سلوى رجليها كلش ناعمات وبيض.. حسيت بيهم منفوخات ومثل الزراك خفيف صاير باضافرها ..
القلق ملخ كلبي ... وبقيت ادلك الها ..
سلوى كلش نهملت.. وضروري اخذها لطبيب ..
بالليل قبل ما انام سحبت جنطتي طلعت منها الفلوس ..
لازم احسب حساب المحامي ..
وبنفس الوقت لازم اخذ سلوى لطبيب
ولازم احسب حساب معاملات استنساخات كراوي
مستحيل اخلي تدفع شي هي ضروفها على كدها وفوك ما كاعدين ناكل ونشرب انوب أزيد عليها ..
سلوى إذا اخذها لطبيب .. هم فحوصات وعلاج الله يعلم شكد يكلف .. وبالمستشفى مو كل الفحوصات موجودة
بقيت حاطة ايدي على خدي وحايرة بزماني ..
حتى ماعندي شي يسوى وابيعة ..
ثاني يوم كمت من الصبح .. لبست وتريكت .. واجيت كلت لعمتي ..
:عمه اريد اروح لمدرسة اخواني اسويلهم نقل
:لعد انتي مبدله ومكملة يله جاية تكولين .. شنو تريد ترحين وحدج
:لا هو اني اجيت اكلج ترحين وياي
:اي لعد اخليج ترحين وحدج .. وبله ذول عرضولج وسوو بيج شي .. اوكفي البس جواريبي وعباتي ..
كامت لبست جواريبها وعباتها .. وقبل ما نطلع وصت فرح على البيت وكالت الها اذا يندك الباب ممنوع تفتحي احجي من وره الباب ..
رحنه نتمشى للمدرسه الي يم بيت عمتي الي راح انقلهم الها .. حتى نشوف المدرسه يقبلون لو مايكدرون
الحمدلله كدرنه ناخذ الموافقه من المدير ...

طلعنه اخذنه تكسي من رأس الشارع ورحنه للمدرسة القديمة .. كان بداية دوام .. عمتي هي حجت ويه المدير وكالت اله نريد نقل .. كال لازم نسلم الهم الكتب .. قبل النقل ..
كملنه الإجراءات ورجعنه ...
بالطريق سألت عمتي
:عمة المحامي شكد يأخذ
:موكتلج لاتفكرين اني تفاهمت وياه
:يعني شلون تفاهمتي وياه .. اذا ناويه انتي تدفعين اله مستحيل اقبل... و اذا ناوي يسويها لله هم ما اقبل أحد يتصدق علينه.. فدوة كولي الي شكد يأخذ مبين خوش محامي حتى اخلي يساعدني ارجع العمارة واطلع حقنه من ورث ابوي ..
:براحتج ييما .. هسه بالوقت الحالي انطي 500 ومن يمكمل كلشي والعمارة وحقكم يرجع انطي 500ثانية ..

وهو يمشي بكل المعاملات والمراجعات يعني انتي لاترحين ولاترجعين .. بس سويله وكاله خاصه
حتى يمشي بالاجراءات
:تمام هذا هو .. لأن الي يبقن عندي اريد اخذ سلوى للطبيب يمكن اليوم العصر .. عمه سلوى تعبانه وامس شفت رجليها مورمات واضافرها زرك .. اعرف بيها تتاذه بس ماتشكي لأن مقدرة وضعي بس ماكدر ابقى ساكته أكثر ..
: اي لا تخليها لازم تشوفين الها طبيب زين ..
:بس غير كون اندلي طبيب زين مو شلون ماجان
:اني اسألج .. بت حماي اخت هذا المحامي صلاوات هم كلهم واصلين .. أخته تشتغل بالمستشفى معاونة طبيب .. اسالها على دكتور قلبيه زين .. ونحجز حتى لو باجر
:ماشي ...طلبت من عمتي نمر بالسوك واريد اشتري ملابس الهم .. هي ما كالت باطل نزلنه بالسوك
بس لان بالي يمهم ما افتريت هواي من محلين اشتريت الهم قمصان وبناطيل .. وعمتي اخذت الهم جنط كالت هديه مني
وكفنه بطريقه يم البقال .. عمتي تسوكت مخضر وفواكه
ورجعنا للبيت صايرة الدنيا ضهر ..
اول ما دخلنه ركضت فرح مفزوعه وعيونه تصب دموع ..
صحت اني بخوف :
:فررح شصاااير
احس روحي فرفحت من كالت
: خالو صادق ومهدي اجو اخذو سلوى ..
احس فقدت القدرة على الثبات العلاليك وكعن من ايدي ورجليه ما تعيني بعد حتى اوكف.. فقدت توازني ورجعت ليوره ضهري نضرب بالكاونتر ..
:سلوى سلوى هم اخذو سلوى بالذات .. لأن يعرفون كلش زين هي نقطة ضعفي اختاروا سلوى لأن يعرفوها مريضة ويعرفوني اسوي كلشي لخاطرها ..
عمتي تحاجي بفرح
: شووكت اجو وشوكت أخذوها ولج وليش تفتحين الباب الهم ليششش

: وره ما طلعتن تقريبا بساعه...
يما رعد هو فتحه مو اني ولله ماحسيت غير دخل علينه خالو صادق وياه مهدي .. دخلو وصارو يجرون بسلوى وهي واكفه بالمطبخ .. دخلو متقصدين سلوى ..ورعد و وعد كدامهم جانو ما اخذوهم ..
عفتهم يحجون .. وركضت اني اطلع لحكتني عمتي تركض وراي .. وجريت تليفوتي اتصلت بمحمد .. اول ما فتح صرخت بي واني واكفه بنص الشارع نسيت العالم وما مهتمه لأي بشر
:ابوووك الناقص وابن عمك العارررر. اخذو اختيييي اخذووو سلوى من البيت ....ولك سلووووى تعبباانه
اذا صاااااار باختي شي احرككم ولله احركك البيت فوووووك رووووسكم تسسسسمعني لو لا
:بسسمه ششصاااااير فهمني شووووكت اخذوه‍ا
:ماااخذيها صار فوك التلث ساعات لو اربعه
محمد سلوووووى سلوووى اذا صار بيها شي وقسم بالله احرككم واحد واحد
: انييي رااايح رايح للبيت هسه اطمني ولله محد يمسسسها بكد الشعرة
سديته منه افووور نار بنص روحي مشتعله عمتي يمي تغلط وتسب وتريد تبردني واني افووور افوررر
اكيد هسه تخربطت اكيد خاااايفه ...
عيوني صرت ما اشوف بيهم وحضي المصخم طير التكسيات... امشي على السريع وعمتي وراي ما تلحك بيه وتلفت على الشارع اريد بس تكسي توووكف ..
............
سلوى...
يجرون بيه مثل طلي ويسحلونه .. بلا مقدمات دخل صادق وياه مهدي .. واني واكفه بالمطبخ ..
تقدم عليه صادق
:تعاااالي لج ... اممممشي كدامي
متت من الخوف :عموووو عوفني الله يخليك ما اروح عووفني فدوة
اجه رعد و وعد .. يضربون بيهم .. بس اطفال وناعمين وذول واحدهم جنها فيل .. ولله عرفت سكوتهم هذا وراه شي عرفت ماراح يعدونها على خير ...
جروني بثوب البيت ذبيت روحي بالكاع واني احاول افتح ايدي من ايد صادق
:عووووفني الله يخليك عووووووفني مااا اريد اروح عووووفني عموووو
صادق: هاااا اختج الكح**** الا اسحك رأسها واكسر خشمها هذا الرافعته
من كد ما صرخت وبجيت النفس صرت ما اكدر اجره
بحيث فاتحه حلكي واشاكف بالهوى .. فرح وسمر من الخوف بقن يباوعن ويرجفن ...ولد.عمتي بالشغل
بس احنا بالبيت..
صرت حتى عياط ما اكدر اعيط ولااكدر.اقاوم كلشي بيه تجمد وكل الي اريدة اسحب النفس ...
جروني وخلوني بالسيارة .. وطلعو وبيه واني احس نفسي اصارع الموت... من الألم الي صار بصدري ..
املي الوحيد جان هو محمد وبسملة...اكيد راح تجي وماتخليني عدهم ..

يحجون وياي بصياح بس حرف من الي حجو ما فهمت ولا ركزت بشي ... كل همي اسحب النفس ...
المسافه بين بيت جدي وبيت عمتي مو قليلة
لحد ما وصلو كدام البيت ...وفتح عمي صادق باب السيارة وجرني ..تبسمرت بمكاني وجسمي كله صار مثل الخشبه ..
صادق:امشي ولج نززلي مو سويتي روحج مواتة
اريد ارد عليه لساني نشل .. وجسمي تصلب ..وجع بصدري موات .. وصادق عباله جاي أمثل ..
مهدي:عمي شوف حلكها صار ابيض ... خاف هاي تخربطت

جرني صادق وشالني بيدة من شافني ما تحركت ...
دخل بيه للبيت ..

فاطمة: المن رجعتها مو ولن وخلصنا المن رايح جايبها
صالح : احبسها هل جلبه احبسسسها خل تموت موتت الجلب اذا ما اجت ذيج الساق**طة .. ونذلت كدامي فلا ارحمها ولله

جبرية: يمعووودين هاي لاتموت ونبتلي ما تشوفها مريضه نوب يحسبوها علينه آدمية
صادق شايلني وصل بيه للغرفة وهو يصيح
:مهدددي افتح الباب
منتيها بين ادي .. دخلني لغرفتنة.. ونزلني بالكاع .. واني لا اكدر اقاوم ولا اكدر اتنفس ولا اكدر احجي لو أصيح .. احس صرت مثل الي مشلول شلل كامل وبس عيونه يتحركون هيج صرت اني .. لدرجة حتى لو احد ضربني مراح اكدر ادافع عن نفسي ..
شمرني بالغرفة وطلع وسد الباب ..
بقيت بس اباوع بعيوني ... دمعتي نزلت وايدي ما تعيني امسحها ... عمامي مشكلتهم مو وياي.. لأن يعرفون حق المعرفه اني ماكدر اسوي شي .. هم مخليني اداه يحاربون بسملة بيها ..

حسيت خلص هذه اخر دقائق حياتي .. والموت جاي .. نايمة ومستسلمة للموت يجي يأخذ روحي ...
مر وقت ربع ساعة تقريبا .. كوة كدرت ارفع أيدي اخليها فوك صدري ... واني اعقج وجهي من الألم ...
وعيني على الباب متأملة تدخل بسملة وتاخذني ..
بره صوت كلامهم عالي وكل واحد بيهم ينطي رأيه ..
صالح:هسه ... هسه تجي .. تدخل هنا مثل الجلبه تبوس بالنعولة على مود اختها ..
يابويه ولكم نااار بكلبي منها .. اذا ماذليتها اذا ماطيحت حضها مايبرد كلبي اذا ماندمتها .. وعلمتها شلون تسحب الوصايه وتوديلي تبيلغ .. بعيني بس خل تجي

صادق: اطلعهن من عينها وحده بس بس خل تلفي .. ولكم صار ايام كاعد من المحل من وراها ادور وراها هل ادب سز .. ماتنكظ صااارت شكد شكددد حذرت منها شكددد ومحد صدكني
صالح: الا ارجعها هنا خدددامة جوة رجلينه واخليها تتحسر ... تحجي بالورث والحق هل دايحة ..
ولله لوما تكسرت وكعدت هاي كعدتي .. جان هسه ذابحها وغاسل عارها

كاعدين بره واصوتهم عالية ويتعازمون على مذلة بسمة .. لعد شكد حاسبيلها حساب وشكد موجعة كلوبهم وهيج حاقدين عليها ...
شوي وصار صوت محمد بره عالي ويصيح.. والضااهر استوى دخل .. ويريد يجي على الغرفه ولزموو
محمد: يااااابه عووووفني اوديها لأختها شترردون منها بنيه مريضه مرررريضه بالقلب لاتموووت
:ومووت الجلاب السود طبها الف مرض فوك مرضها .. عالاقل اشوف اختها شلون مكسوره ...
:لاتددددعي عليها لاتددددعي سلوووى اذا صار بيها شي بعد وجهي ما تشووووفه ولله اطلع من هذا البيت وجهي ماتشوفه ... اتتتتتركني اروح اطلعها

:مااا تطلعها محمد ...لاتجبرني اكسرك تكسر ولله ولك كلببب تطلع عن شوري وصاف وياهن .. عبالك نسيت سالفتك من شردتهم وتشوفنه نفووور وندور وانت ساكت
ساااافل ..
:انيييي سافل انيييي؟ السافل هو الي يضلم اخو وجهاله الأيتام ويريد يستولي على حقهم.. صار الي يحجي الحق سااافل
:لككك محمد تتجاوز عليه ...
: انتتت باااطل باااطل واخوك باطل ونسونكم وخلفتكم مثلكم ... شرايدين منهم .. اذا خليتو الله بين عيونكم وراعيتوم شنو تخسرون شنووو .. وخررررر من طريقي
محد يوكف بوووجهي بعد..
بقى صوت الصياح بره مستمر ومحمد يحاول يجي للغرفة وهم يمنعو لحد ما اختفى صوته ومثل الي بعدو صادق ومهدي

بصعوبه كدرت اكعد من نومتي احتضنت نفسي ارجف رعب مو طبيعي ..صووت تكسير بعيد وكانما أحد جاي يكسر ويهبد.على الباب ..
دقائق وانتفح الباب .. ودخل منه مهدي ..
رجعت ليورة ارجف ... ومهدي دخل وسد الباب نضراته قذرة ...تقرب مني خله وجها بوجهي وصدمني بكلامه ..

: محمد يحبج مووو مستقتل عليج ملخ نفسه نريد نكضة ماينكض فلش عرفة اهلة على مودج .. شنو منطيتة وهيج مغزر بيه ماتنطيني ..

ابلع ريكي بصعوبه واحس عظام صدري جاي تتكسر من الألم .. وهو كمل كلامه
:بس ابوي كالي احرمه من يمها وأخذها انت .. شنوو رايج اني اخذج...

حجاها ومد أيده على شعري ..
وبصعوبه كلت
:وخررر مني الله يخليك وخررر مهدي اني بت عمك
: ادري بت عمي .. واني اولى بيج من محمد النثيه شوفي جبان مايكدر يدافعلج .. بس جره ابو ودخله بالغرفه تركج .. بقى بس يكسر ويصيح عود يسوي سوك لروحة كدامج

: هسه تجي بسمله هسه تجي وتاخذني مناااا
:بين ماتجي تعاي نتونس شويه
بمجرد ما اجه يتقرب مني ندفر الباب حيل ودخل محمد قميصه مشكوك ومفتوح من صدرة .. وجها احمررر مطعون
لزم مهدي من ضهره وجره من تشيرته كومة بالكاع .. ونام فوكاه .. وصار يضرب بي بوكسات ويصيح

:حقيررر تريد.تنكسسسها يانكس انت وابوك نكسسين نكسسين...
بحركه سريعه مهدي دفع ومحد وهو صار فوكاه وبقو يتمالخون بطريقة تخوووف .. كعدت بزوية الغرفه ارعش وحاضنه نفسي .. دخلو الكل الغرفه جبريه تفك ابنها وتغلط على محمد ... وفاطمة وصادق يفكون ابنهم ويصيحون على مهدي ..
لحد ما وصلت لاخر ذرة مقاومة بيه ...بعدها فقدت الوعي ومادريت شنو صااار ..

...........
بسملة... وكفت الي تكسي وماصدكت بسرعه الريح فتحت بابها وصعدت وعمتي صعدت وياي ..

طول الطريق كل شوي اكول للسايق يسرع ..
روحي فايرة .. عليها وما اعرف شنو ممكن يكونون سوووبيها
صفنت دقايق .. وتأكدت هم سوو هيج حتى ارجع الهم مذوله ... وهيهات اريح كلبهم واسوي الي يردونة
مستحيل ...
ما صدكت دخلنه منطقتهم... واريد اطيررر طيران واوصل الها .. بس السيارة مالتنه فاتت من دورية شرطة..
صحت بالسايق .. اوكف اوكف ثواني
وكف واني بسرعه نزلت للدورية .. وحجيت بسرعه ويا الشرطي
:خويه الله يخليك اريد اقدم بلاغ خاطفين اختي .. عمامي خطوفها
الشرطي:عمامج خاطفيها شلون
:مثل ما أكلك ولله عمامي ناس ضلام مايخافون الله واختي مريضه وضعها كلش حرج .. وهم استغلوا وجودها وحدها بالبيت رجعت مالكيتها اترجاك تعالو وياي اررريد.اختي لايسوون بيها شي
:وليش حتى يخطفوها عمامج
:يريدون ينتقمون مني بيها .. لأن سحبت الوصايه من عمي وصرت اني الوصيه عليهم وهذه عمتي تشهد بكلامي خويه الموضوع كلش طويل بس الله يخليك تعالو وياي فدوة اروحلكم ساعدوني
حجت عمتي وياه : اي ولله خاله حجيها صحيح وهاي احنه اجينه من الكرادة لهنا كلوبنه رايحه ..
:خيتي انتي جاي تكولين عمامي يعني منو يكول خاطفيها خطف يمكن رايحه برضاتها

اني منا كلبي يفور وهذا يحجي وياي هيج عطت بيك
:انتوووو شنو شغلكم هناااا غير شغلكم الي يقدم بلاغ ترحون اله .. اني جايه اطلب حمايتكم .. ورايدة بس اطلع اختي من يمهم وبسس
صاح واحد ضابط من ضمن الواكفين ..
:عباس اخذ سيارة وثنين عناصر وروح وياها

رجعت للتكسي وهم ركبو بسيارتهم ومشو وره التكسي ..
بس وصلنه للبيت. نزلت بسرعه .. وهم واكفين بره ..
يم الباب نزلو وياي ..
فلشت الباب تفلش اني وعمتي .. لحد ما طلعت فاطمه فتحته .. راد تحجي وتشمت بس مجرد شافت سيارة الشرطه وياي بلعت حجايتها وسكت ..
دفعتها ودخلت اركض اني وعمتي ...
: سلوووووى... ووووين سلووووى
تلكاني صالح .. هااا رجعتي ... وعدتج اذلج وارجعج تبوسين بالنعل ..
:لا انت ولا الأكبر منك يذلني بعد..
ركضت من مكاني لغرفتنه .. دفعت الباب .. واني اشوف مهدي ومحمد متمالخين .. وسلوى طايحة وفاقدة الوعي
ركضت عليها .. الدنيا طفرت من عيني
سناء:يااااجلاب يا حقراااء ولكم شني تاليها وياكم شنووو
الشرطه على صوت الصياح دخلو للحوش
وفاطمه دخلت تركض وهي تصيح .. الشرررطه هل
ادب سز جايبه وياها الشرطه وجااااية ..
صالح تخبل من سمع جايبه وياي الشرطه بس ما اتدخلو أول مره ضن منهم انو خلاف عائلي ..
اني اخذت سلوى بين أدية والمصيبه مجاي اكدر اشيلها ..
صرت اابجي واصرخ
ساااعدددوني الله يخليكم ..
محمد اجاني يريد يساعدني وعمتي باقيه تتلاطش هي وصالح ..
صالح شافني اريد اشيلها وأخذها وهو اجة .. صار يضرب بيه على ضهري بعكازته .. والصياح بالبيت نكلب ..
وجبريه صافه وياه وتدفع بعمتي تريد تطلعها
وغلطه من هذا وفشار من ذاك ومسبه من هذا وهذا يدفع والثاني يجر واني كل الي رايدته بس اطلع اختي وأخذها
الشرطه بعد ما كانو بالحوش شافو الصياح زاد ماحسيت غير دخلووو للبيت .. وصالح ملخ روحه من شافهم
:ولججح تدخلين شرررطه لبيتي ...ولج سااافلة الشرطه توورج على نسوانه
صادق: امووووتج اليوم الحككج بابوج ولله
على التهديد تدخلو الشرطة وحتى يخوفوهم سبحو سلاحهم عليهم .. واني وعمتي ومحمد تقرب يريد يشيل سلوى الي منتهيا وفاقدة ..
صادق بحركه غدر منه ماجان محسب الها اي حساب وبلا تفكير .. مانعرف شلون بثواني سحب المسدس من ايد الشرطي .. كان ولد ضعيف وناعم عكس صادق الضخم ..
باغت الشرطي وجر المدسدس من ايدة .. وجها عليه وهو يكول
:لوووو اعرف انعدددم اليوم موتح على أيدي انتي لعنه لازم نرتاح منها ..
اني ما جنت منتبها اله .. انتبهت على كلامه .. ويه ما قرر يضرب واني ومحمد شايلين سلوى
عمتي صرخت كل ضنها تدفعني.. وماحسبت حساب صادق جان ناوي صدك يكتلني .. وسواها وضرب طلقه استقرت بطن عمتي سناء ..
يتبع ...

32

-------------------------

في زحام العالم، كانت تخاف من كل شيء… من الأصوات العالية، من الوحدة، من نظرات الناس، من الغد.
لكن حين تجلس قربه، حبيبها وصديق طفولتها، تنسى كل ذلك.
صوته يطمئن قلبها، وضحكته تُعيد ترتيب فوضى روحها.
هو الوحيد الذي تعرف ملامحه منذ كانت تركض خلف الطائرات الورقية، واليوم تركض إليه كلما ضاقت بها الحياة.
معه فقط، تشعر أن العالم لا يمكن أن يؤذيها…
وكأن قلبه بيت، لا تدخله العواصف.
-----------------------

عمتي كل ضنها صادق مراح يسويها ويريد بس يخوفني حتى اترك سلوى.. ما حسبت حساب راح يسويها صدك ويريد.يقتلني .. دفعتني من كدامة من صدري وصارت كدامي.. بس صادق الحقد عمة بصيرته وخلاه ما يشوف كدامة غير عدو لازم يتخلص منه..

كلشي صار بأقل من دقيقه وحدة بين سحب صادق للسلاح ودفع عمتي الي واطلاق الرصاصه
وكعت عمتي وسط ذهول الجميع .. حتى صادق رجف والسلاح طاح من أيده ...
الشرطه فوراً جتفو صادق والشرطي سحب اللاسلكي يحجي بيه صار
... صرخت منهارة مرعوبه

:عممممة عمممة... الله لا يوفقك ليشششش هيج ليشششش عمممممه...

صرخ وهو مدنك جوة سلاح الشرطي :كله من وراجج ضعت بسببج يا سافله يا حقيررررره

:حقددك هو الي ضيعك مووو اني انت ضعيت نفسسسك بسبب سمك الي ترسك ترس وراح يقتلك ..

تركت سلوى وحضنت عمتي اصرخ يمها ...
محمد سلوى نزلها من أيده بسرعة.. الدنيا نكلبت صياح وعياط فاطمة وجبرية..

فاطمة :ارتااااحيتي من ضيعتي عمامج يااا ادب سززز الله لا يوفقج يماااا ضاع رجليييي راح من ادددديه لحكووووولي ياناااااس هاي الساق*ة دمرررررتنه دماااار

:حقددددهم هو الي ضيعهم مووو اني كل الي اريدة منكم تتركوني بحالي اعيش اني واخواني مرتاحين انتو الي الحقد والطمع هو الي ضيعهم مووو اني .. هااااي حوبتنه وبعد أزيد وازيد

كعد محمد بالكاع مصدوم ما مستوعب الي صار وأيديه على رأسه وخواته يعيطن مرعوبات
والشرطة دخلو وصارو يجرون بيهم بصالح وصادق ياخذوهم

صالح:اني ما عليه ما ضررربتها موو اني ولله اني شعليه

طلعن وراهم نسوانهم وبناتهم والعالم بره الجيران كلها ملتمه تتفرج
صعدوهم بالسيارة واخذوهم وصادق يحاول يتمنع مايصعد .. رجعت جبرية وهي تكلي

: الله لا ينطيج بابسيمة كله من وووراج الصاااار
ولج ماجذب من كاااال انتي لعنه لعنه ..






كلشي صار بسرعة بسرعة واني اركض بين عمتي وبين سلوى ثنيهم طايحات... بقى شرطي واحد خابر على الإسعاف
البيت كب بالصياح والخوف ...
رجعت فاطمة من بره صارت تصيح على محمد

:ولك بعددك كاعد مكاابل هذني الي ضيعن ابوووك مااا تكوم وراه تروووح مو ابنه الجبيرررر اننتت لو العشك خلاك طللللي ...

رفع رأسه عيونه مطعونه حمررر ..
اضطر محمد يطلع وره ابو وراح هو ومهدي..
مر وقت كلبي ناااار ملخت روحي فوك عمتي...
لحد ما وصلت الإسعاف... دخلو بسرعة شالو عمتي
وما انتبهو لسلوى ... اني ركضت وراهم كتلهم عليها رجعو شالوها...
ركضت وراهم وصعدت بالسيارة .. واني اشرح وضع سلوى ..
كاعدة بنصهن عاجزة وبس دمعتي بعيني والخوف ماكل كلبي اكل
ابوس بايد سلوى ... اتحملي فدوة اتحملي ..
وارجع على عمتي ... عمه فدوة اتحملي الله يخليج .. ولله اذا متي مستحيل اسامح نفسي مستحيل ..
اني السبب بلي صارلج اني السبب اني اجيت وجبتلج المصايب وياي ..
جنتي مرتاحه وكاعده ابيتج.. اجيتج ومن وقتها ما ارتاحيتي ... ماردتي تخليني وحدي اجيهم وبالاخير انتي وكعتي بيها بسببي ..
السيارة طايرة بينة .. وثنيهن منتيهات كدامي .. لحد ما وصلنا للمستشفى اني قطرة دم ما بقت بيه ..

نزلوهم وركضو بعمتي وسلوى للطوارئ
ودخلو عمتي بغرفة ... وماعرف شنو جاي يسوون الها

وكل وحده بيهم بصفحه واحير ويه منو اروح ومنو اترك ..
اضطريت اركض وره عمتي ..
الي صارو يفحصون وماعرف شنو يسووون .. طلع طبيب فوراً وكال لازم تنقل لغرفة العمليات لأن الرصاصه داخله بمكان عميق. لأن انطلقت عن قرب كلش

خلو عمتي على نقالة بعد ما كملوو الإجراءات وسملوني غراضها .. ودخلوها للعمليات ..
نوب سلوى تركتها .. بس اول ما دخلنه للطوارئ شرحت وضعها للمرض ومن شنو تعاني .. وركضت وره عمتي ..

كعدت منهارة بمكاني، الدنيا ظلت تدور بيه…
الناس تروح وتجي، أصوات تحجي، ممرضين يركضون،
بس أني؟
كلشي بيه احس ثكل تنفسي جسمي عيوني كلشي صار ثكيل …
عيني على باب غرفة العمليات وكلشي بيه انهار دفعة وحدة…
نزلت دموعي بلا صوت، حطّيت راسي رجعت راسي للحايط، وحسّيت ،كلشي ضاق…
الهوى، المكان، حتى جسمي ما عاد يتحملني.ورجلي احركهن بتعب شايلين كل ثكل الايام

هسه إذا ولدها عرفوا بالي صار شنو راح يسوون .. حسيت نفسي اني السبب بكل الي صار... فشلانه كلش منهم وكان الي صار من ايدي أو راضيه بي او متعمدته ..

صحت بصوت مبحوح تعبان
:عمه! عمه لا تروحين… سلوى فدوة لا تتركيني
ولا وحده منهم سمعتني…
بس چنت أريد أصرخ، چنت أريد أحد يسمع هذا العجز اللي بيه… أني السبب…
كلشي صار بسبب حضوري، بسبب وجودي،
گلت خلي أجي أطالب بحق،
وچنت ناسية إن الدنيا ما تنصف أحد مثلي…






معقول اني الغلط وهم الصح؟ معقول الباطل صار هو الصح ... يعني جان لازم ابقى ساكتة على الذل .. والفكر والتعب .. جان لازم اسكت على حقنه وهم يضعيونه

إيدي على خدي، وجسمي يرجف…
كأني طفلة، تايهة، مو لاكية حضن، ولا حتى كلمة تطمنها
ما گدرت أوكف على حيلي كلشي بيه هبط…
روحي، عزيمتي، حتى أملي.

وبهاللحظة، عرفت معنى العجز...
مو إنك ما تگدر،
العجز الحقيقي، إنك تشوف الناس اللي تحبهم يضيعون كدام عينك، وإنت ما بيدك غير البچي...

وكفت بصعوبه اريد اروح لسلوى... رحت يمها لكيتها بعدها ما صحت والممرضه مخليه الها جهاز تخطيط القلب

حجيت بحيل مهدود. :اختي شبيها ؟

:هسه راح اودي التخطيط للطبيب ويشوفه ويشرحلج وضعها ..

كعدت كبالها لزمت أيدها.. وبجيت بقوة والم يعتصر روحي ... تعبت اني ولله تعبت منين اتلكاها
وفوكاها ايدي مقيدتني حيل .. قررت افتحها واخلص
كمت من سلوى .. طلعت سألت بنية

:بلا زحمه بس اريد اعرف وين اروح افتح ايدي من الجبس

:كامت الي بعد ما خلت اخر لكمة بحلكها نكتت أيدها واجت وياي .. وصلتني لممرض .. كتله اريد افتح الجبس

:شكد صارلها مجبسه

:تقريبا أكثر من عشر ايام حتى محاسبه ولله

كعدني كدامه على كرسي وصار يفتح بيها .. من وخر الجبس ارتاحيت.. بس وجعتني شوي لفها الي باندج..

وكفت بالمرر سحبت جيزدان عمتي مخليته بجيب ثوبها.. طلعت رقم ماجد.. اتصلت بي واني ميته بدمي وماعرف شنو راح اكوله.. بس لازم يعرفون

اتصلت بي دك أكثر من مره يله فتح خط
:الو ها يوم
بلعت ريكي وكوة نطقت : ماجد اني بسملة

رد عليه ومبين من صوته مستغرب.: ها بسملة صاير شي امي وينها لعد

:ماجد .. احنه.. احنه بالمستشفى

فز يكلي :شصااااير امي بيها شي

:عمتي تصاوبت بسببي ودخلوها للعمليات..

نفزع من سمع كلامي
:شنووووو أمي شبيهااا وين انتو بيا مستشفى..

كتله اسم المستشفى بدون ما يرد سدة بوجهي..
رجعت يم سلوى لكيتها كاعدة استوها منتبها ... رحت يمها بلهفه وفرحه بوسط حزني وقهري ..

:سلوووى حبيبتي شنو تحسين كلبج بعده يوجعج اصيحلج الطبيب..

:اني زينه اطمني بس شوي تعبانه..






:ارتاحي حبيبتي ارتاحي

باوعتلي بعيونه المتعوبه وابتسمت
:جنت متأكدة راح تجين تاخذيني.. كلش خفت بسمة كلش مهدي راد يعتدي عليه لو ما محمد لحكني..

: مستحيل اسمح لبشر منهم يمس شعره منج .. وكعو بشر أعمالهم.. هل حقراء ..

:لعد عمتي وين شعجب مو وياج

ترددت احجيلها الي صار وهي تعبانة هيج

:عمتي بقت بالبيت يم اخواني ماخليتها تجي

:وين جنتي انتي فتحت عيوني ما لكيتج

:جنت افتح ايدي من الجبس.. مللني

تقربت يمها سحبت رأسها وحضنتها ... كلبي مثل النار عليها
تركتها شوي وطلعت اريد.اشوف الطبيب شنو يكول على حالتها ... لاكتني الممرضة

:عيوني الله يخليج كلتي راح اودي التخطيط للطبيب وبعد ما رجعتي ..

:اي هسه راح يجي الطبيب ويفحصها ويكلج نتيجة التخطيط ..

رجعت كعدت انتضر الطبيب ... تقريبا ربع ساعه واجه
صار يفحص بيها ويشوف النبض والتنفس وسألني

:هذه اول مره تطيح لو سابقاً هم طايحة

:لا هي بين فترة وفترة هيج يصير وياها .. بس عالاغلب من تكون مجهدة.. خير دكتور طمني ؟

صار يشرحلي حالتها الصحية

: التخيط بين اكو احتماليه وجود ثقب قلبي عدها
هنا شوفي... هذا الخط يبين عندنا تضخم بالأذين الأيمن. وهذي الموجات، خاصة موجة P، شكلها مو طبيعي... معناها القلب دا يتحمل أكثر من طاقته ..

:يعني شنو

يعني أكو احتمال يكون عندها ثقب بين الأذينين – يسموه ASD. مو أكيد مية بالمية، بس التخطيط دا ينطيني إنذار...
للاسف مموجوده أجهزة كامله بالمستشفى ضروري تنعرض على طبيب مختص.. حتى نتأكد احنه هنا اكو نقص بالاجهزه والا كان بنفسي سويت الها كل لفحوصات ..
الافضل تنعرض على طبيب..
لأن كل ماتكبر راح الكلب يكون مجهد وتعبان أكثر

:يعني الي أفهمه أن كلبها كلش تعبان..

:مو تعبان بمعنى ميشتغل، بس إذا فعلاً أكو ثقب، فالقلب دا يشتغل دبل... وهذا ممكن يسبب لها ضيق نفس، خفقان، وتعب مستمر.. واكيد اذا نهمل راح يتفاقم اكثر ..

:وشنو لازم نسوي؟

:نسوي إيكو – تصوير بالسونار للقلب. هو الي راح يثبت إذا أكو ثقب، وشكد حجمه، وإذا يحتاج قسطرة أو جراحة. بس المهم، عرفنا إنو أكو مشكلة ونكدر نلحك عليها."

:زين شوكت نكدر.نطلع

:الافضل تبات هنا اليوم نراقب وضعها وباجر وتكدرون تطلعون

تشكرت منه وراح بقيت كاعدة يمها فتره من الوقت
رجعت تغفي لحد ما نامت..

كمت من يمها رحت لعمتي ... وصلت للصاله لحد الآن بعدها ما طالعه..
كعدت على الكرسي الي بالمرر ايدي على خدي وصافنه بالكاع
.. دك جهاز عمتي بيدي.. ماجد يتصل .. فتحت خط فوراً حجه بسرعة : وين انتي بالضبط..

:اني بالمرر مال العمليات

رجع سدة بوجهي.. مر تقريبا ربع ساعة واجه ماجد وكرار وياهم تلث زلم ثنين كبار واحد ولد شاب..
من شافني ماجد اجاني يركض ركض مو مشي وعيونه بكصته تنكط شرار عليه..

وبسرعه صاح بوجهي
:شصاااار وامي شلون تصاوبت ؟

دنكت راسي وحجيت بقهر
: عمي صادق جاي ماخذ سلوى من البيت واني رحت ارجعها بس عمتي ماقبلت اروح وحدي وأصرت تجي وياي بس صادق راد يضربني طلقة وطاحت بيها

صرخ بيه بعصبيه.
: ارتااااحيتي من ضيعتي عمتج
شنوووو حصلنه منج غير المشاااكل منين طلعتي النه انتي من يوم ما طلعتي انتي واخوتج واحنه المشاكل ترف فوك روسنه... وهاي امي هسه رادت تموت بسببج

كرار : ماااجد شبيك يمعووود مو هيج قابل الابنيه شنو ذنبها هم خوالك عارات وطماعين من يوم يومهم

:شلووون شنو ذنبها.. من يوم ما طلعت واحنه يوميه صياح ابيتنه والناس بره تسمع صوته يوميه خوالك هادين علينه نطلع للشغل وكلوبنه نار وامك مجلبه بيها... ولله شنو من ريحة المرحوم اخوي.. لو ميته امي ربحي بمنووو بهاااااي لو بريحة المرحوووم الي ما يوم شفناه دك بابنه..
ااسمعي خويه من الاخير بلا مستحه ولا خجل....
احنه ناس ماشين بسد الحايط ومالنه خلك مشاكل .. تكوم اختج بالسلامه تأخذين اخوانج وتتوكلين
مثل ما جنتي ناسيه عمتج رجعي انسيها هسه .. احنه ما مسؤولين عنكم ... لو الا واحد بينه ينكتل يله ترتاحين ؟..

كرار : ماااجد كافي عاد مو وكت هل كلام شجاك ماتكلي .. وين غيرتك وانت تطرد بنيه دكت بابنه لو امي تسمع هذا كلامك ماراح تقبل الك عيب عليك ..

تجاهل ماجد كلام كرار وراح وكف قريب من غرفة العمليات ورجع كرار يحاجيني..
:بسملة خويه الله عليج لاتاخذين بكلام ماجد ولله كلبه ماكو اطيب منه بس هو هسه بحاله عصبيه هل كام هيج يحجي بس يبرد يتندم على كل شئ كالة..

حسيت ااتمنى الكاع تطمني من كد القهرة والفشلة ..
الغصه وكفت بنص بلعومي لا اكدر اطلعها ولا اكدر ابلعها






:لا كرار ماجد حقه بكل كلامه فعلاً اني من يوم ما طلعت واني جايبتلكم المشاكل وياي وفعلاً انتو ما مسؤولين عني .. هو حقه واني ما زعلانه..

رجع ماجد وكف قريب مني وكال
: اي ولله بلا زعل ناس احنه بعيدين عن المشاكل و سوالف الورث .. حتى امي تركت حقها وسكتت.. ومن ضهرتي بحياتنه احنه ما مرتاحين.. ياريت ترحين لاختج ابقي يمها وتركي عمتج بحالها وكلش كافي الي صار...

هزيت راسي متفشلة وميته قهر .. نطيت غراض عمتي لكرار ومشيت بعدني اول خطواتي وطلع الدكتور من الغرفه.. موبيدي رجعت عليه وكلهم اتلكوه بلهفه يسألونه على وضع عمتي ..

: الحمدلله كدرنه نسيطر على الوضع والنزيف لأن الرصاصه داخله بمكان عميق وضاربه القالون بس الحمدلله ما واصله الشريان الرئيسي..

ماجد: يعني بعدها بمرحله الخطر..

:اكيد بعدها ..راح تنقل للعنايه كم ساعه لحد ما نطمن على وضعها وراها ننقلها لغرفه خاصه الحمدلله على سلامتها

صرت ابجي بفرحة مرتاحة .. بس فجاء ماجد اجاني لزمني من قصص وروايات عراقية كرار صلاح زندي وعصره وهو يكلي..

:اني شنو حجيت كتلج روحي منا وممنوع تووصلين بعد افتهمتي امممشي

حجاها يدفعني على كيف تراجعت شوي ليورة ارجف
درت وجهي وطلعت من المرر عيوني تصب وامسح بيهم
ورجعت يم سلوى .. تعبانه حيل وماتكدر تحجي بس فاتحه عيونها ..
مر ما اعرف شكم ساعة حسيت صارت دنيا مغرب .. سحبت جهازي اشوف الساعة.. لكيتها بالسته ونص .. والجهاز محترك بالاتصالات عدنان متصل اكثر من ثلاثين مرة والجهاز صامت وناسيته .. دكيت عليه من اول مره فتح خط

وصوته ملهوف وخايف : وينججج لخاطر الله ماتكليلي وين جنتي شكد دكيت عليج

رديت ببرود :ها عدنان

:بسمله شصاير يمعودة وينج انتي هسه

بجيت وجاوبته
:اني بالمستشفى وحدي.. محد الي عدنان

:ولج كلبي راح من الخوف عليج اجيت لبيتنه والجيران كلها تسولف بالي صار ... سمعي كوليلي بيا مستشفى انتي وهسه راح اجي ..

كتله اسم المستشفى وسديته رجعت كعدت دايخة واحس سكري.ماعرف هبط ماعرف ارتفع .. بس طز بروحي حتى ماقستة ..
بقيت كاعده اسولف ويه سلوى بلي صار وهي تشكيلي
وبالي باقي يم اخواني ...
وافكر بعمامي اكول هسه شصار وياهم ...
وافكر بعمتي بوضعها
وافكر بماجد وكلامه
وافكر باجر من نطلع وين نروح واحنه ما عدنه مكان ... وبعد كلام ماجد مستحيل ابقى عدهم... واخواني مثل ما اني طلعتهم ملزمة اوفر الهم مكان .. وعيشه ..

دك عليه عدنان .. كال طلعي الي اني واكف بباب الطوارئ
كمت طلعت اله لكيته منتضرني والقلق تارس عيونه

:بسملة شصاير يمعودة فهميني شكد دكيت عليج وانتي متردين خليتيني اتخبل

:جهازي صامت ناسيته واصلا ما شايفته
انت منين عرفت بلي صار ؟

:رجعت لبيته لأن مفروض اليوم نزولي بس ما كدرت اروح ولله حسيت راح يصير شي ... كلت صالح وصادق ماراح يعدوها على خير مستحيل ...عالاقل اذا احتاجيتيني اني قريب يمج... خابرت ابوي كتله عدنه إنذار بسبب الأوضاع الأمنية وما أكدر انزل هل اسبوع.. لكيت الجيران كلها تسولف ..

:عدنان ... اني فعلاً وحدي مالي احد ولله حيل تعبت ولله لوما خواني جان دعيت على نفسي بالموت ..

:اشش اسم الله عليج يكلبي لتحجين هذا الكلام مره ثانيه ..

واكفه يمه وهو يحجي بس فجاء صارت صوته ما واضح مثل صوت الوشه بأذني وفقدت توازني بس هو بسرعة انتبه الي ولزمني من ايدي دخلني جوة كعدني على كرسي وصاح ممرضة تجي تقيسلي ضغطي وسكري

:اكيد كلشي ما مخليه بحلكج وباقية تركضين وهل طحتي صدك جذب يعني ما تفكرين عندج سكر ولازم تأخذين علاج..

:بربك اني بحال اكل..

دقايق واجه ممرض يقيس الي الضغط وكف كدامي ..

عدنان:لعد اني مو صحت الابنيه ليش ما اجت

الممرض:وشنو فرق عيني اني لو هي ثنينه نسوي نفس الشي ..
حجاها ولزم ايدي رفع رداني ويخلي جهاز الضغط عليها..
كب عدنان على الولد

:ها ها ها خويه سلامات كشفتها وطلعت أيدها شكو

:اخي شبيك غير اقيس ضغطها

:اخي تكدر تقيس ضغطها من وره الردن تره مو الا ترفعه

سكت الولد وقاس ضغطي وسكري هم.. طلع عندي هبوط بالسكر والضغط..
الولد كال لازم تاكل شي مالح... وشي بي حلاه شويه ..
حتى يتوازن الضغط والسكر
من كد ما تعبانه ودايخة حتى ما انتبهت للعلاكة الي جانت بأيد عدنان .. سندني وصلت القاطع الي بي سلوى نايمة

عدنان: طبعا حسبت حسابي جبت لفات ولبن عرفت بيج ناسيه نفسج وما ماكلة شي ..

ابتسمت اله واحس براحة من هو اجة .. اخذت من أيده العلاكة واني عاجزة عن شكره

:اني ما أشتهي العسل ولله بس راح أوكل سلوى

:بسمة لاتعاندين جبري نفسج جبر واكلي ... يله بسمتي لخاطري اكلي لازم تبقين واكفه على حيلج إذا وكعتي اخوانج تاكلهم الجلاب تره.. لخاطرهم ..
دخلي تعشي وعشي اختج واني راح انتضرج بره بالحديقة كملي وتعالي نسولف ..






هزيت راسي موافقة.. ودخلت لكيت سلوى كاعدة

:عدنان جاب عشى النه .. يله عيني كعدي خل نتعشى

:ما أشتهي ابد رغم احس جوعانه

:اني مثلج ولله ما أشتهي بس لازم ناكل علمود العلاج .. وعلمود نبقى أقوياء .. ورانه معارك طاحنة..

:ليش اني يايوم دخلت وياج بمعركة.. جبت عمري باقيه أتفرج عليج وانتي تحاربين وحدج بهل دنيا كل نفع مابيه ..

:سلوى لاتحجين هيج... انتو قوتي انتو ضهري .. مستعدة احارب موبس عمامي مستعدة احارب الدنيا كلها لخاطركم .. ما سألتي نفسج ليش عمامي كل مايردوني أضعف وانذل يتركوني ويرجعون عليكم.. لأن يعرفون حق المعرفه اني اخذ قوتي منكم يعرفون انتو نقطة ضعفي ومستعدة اسوي كلشي لخاطركم .. انتو نقطة قوتي وضعفي وسلاحي الي احارب بيه الزمن ..

لزمت ايدي وبحركه سريعة ما متوقعتها سحبت ايدي وباستها..

:هل ايد الي تحمينه الله لا يحرمنا منها ..

جريت ايدي منها وكعدت يمها على السديه حضنت رأسها لصدري .. :حبيبتي انتي اهم شي بالدنيا اشوفج بخير

جريت العلاكه وكعدت يمها على السدية كبالها
طلعت الها لفه وبطل لبن
واني هم طلعت لفتي واكلتها حسيت اني شكد جنت جوعانه من شفت نفسي كملتها كلها وحتى كعم الصمونة أكلته وشربت كل اللبن الي بالبطل ..
من كملنه ساعدتها تكوم للصحيات رحنه اني وياها
ورجعتها نامت غطيتها ..

:اأني شوي وارجع ما أتأخر ارتاحي أنتي .. هذا جهازي راح اتركه يمج بس اطلع أحاجي عدنان بره وارجع

تركتها تغفي وطلعت للحديقة بقيت أتلفت ادور على عدنان شفته كاعد على مقعد بالحديقة وبيده جكارة..
تقربت يمه من شافني شمر الجكارة جوة رجله طفاها ورجع شالها وراح شمرها بسله الزبل ورجع كعد مسافه بسيطه عني بنفس المقد..

:تعشيتي

:اي الحمدلله.... شكراً

:على شنو

:على كل شيء تسوي الي.. شكراً لانك صديقي.. شكراً لانك حبيبي.. شكراً لانك موجود بحياتي... شكراً لأن كل ما أحتاجك الكاك موجود ..

:بسمتي احجيلي شنو صار بالتفصيل..

سحبت نفس بارد دخل لصدري وبلشت احجيله :طلعت الصبح حتى اسوي نقل للمدرسه مال اخواني لأن خطيه اكلو كلبي على الدوام وكلها بدت تداوم .. رحت اسوي نقل .. وبطريقي مريت اشتريت ملابس الهم للمدرسه... كملت الضهر ورجعت للبيت .. لكيت بت عمتي تبجي ومرعوبه .. كالت صادق ومهدي اجو اخذو سلوى
وانت تعرفهم زين كل مايردوني أضعف يعرفون سلوى هي ايدي الي توجعني ..






: سفله مو بيدهم

:المهم اني صرت ما اشوف كدامي طلعت من البيت واني اركض عمتي لحكتني ماقبلت اروح وحدي .... وأصرت تجي وياي.. وصلت هناك بس حسبت حساب غدرهم لهذا بس وصلت المنطقه وكفت اخذت دروية شرطه وياي ورحت .. دخلت لكيتها فاقدة الوعي.. شلناها اني ومحمد وطلعنه
بس الي صار .. صادق النذل بسرعه سحب السلاح من الشرطي ورمة بي جان ناوي يقتلني

:شنوووو ؟ يقتلج ؟ .. ولج لو جايس شعره منج طلقة واحدة اطشر رأسه بيها ولله

:عمتي عرضتلي ما توقعت يسويها ويريد يقتلني
بس سواها ورمة .. وطاحت بيها عمتي المكرودة ..

:لاحول ولاقوة الا بالله العلي العظيم... شوفي حقدهم وين وصلهم .. صادق دمر نفسه بنفسه تدرين .. وكع نفسه بمطب مستحيل يكدر يطلع منه بعد .. تدرين صادق أقل شي مؤبد ينحكم ... محاولة قتل كدام عيون الشرطه.. وتجاوز على سلاح الدولة وخطف وانتي احسبي
عساه بابو زايد ويخيس بالسجن ..

: بعدين اتصلت بماجد ابن عمتي وكتله بلي صار ومن اجه ذب كل الحق عليه وصار يصيح بوجهي ويكلي كل مشاكلنا بسببج ..

:وانتي شيسوي رقم ماجد عندج

باوعت عليه صفح : اني بيا حال وانت وين تفكر

:اي تره بالي وياج بس غير اعرف شيسوي رقم ماجد عندج

:موووعندي ... خابرته من جهاز عمتي

:تمام تمام

:عدنان اني حايرة حايرة وين انطي وجهي .. ماجد ابن عمتي طردني وكال أخذي اخوانج وتوكلي يعني طردة من بيتهم بصريح العبارة .. وهو الولد الصراحة هم حقة ما الومة.. حايرة وين أولي .. شي واحد اعرفه مستحيل ارجع لبيتهم بعد الي سمعته منه لو اعرف انام جوة الجسر لأن محد يريدني

:وليش تنامين جوة الجسر اني وين وليت تره بعدني ما متت اني اريدج انتي واخوانج ومشاكلج وحزنج وقهرج وكفشتج وكلشي بيج اريدج ..

:وانت شنو قابل مبتلي بينا لخاطر الله مو كافي حتى ايام اجازتك وراحتك ما نزلت وباقي هنا في سبيل ما تتركني ..

:اي مبتلي ... مبتلي بيج... بسمة عوفي عنادج .. انتي تحتاجين سند يكون وياج خطوة بخطوة خليج وياي ومراح تندمين .. بطلي عناد لخاطر الله وتقبلي نتزوج ..
لاعبالج اني اريد اتزوجج علمود نفسي لو افكر بغريزتي... خاف عبالج هيج افكر انتي غلطانه.. ما انكر ولا اجذب عليج واكلج ما أتمنى هل شي .. بالنهايه انتي حبيبتي واريدج قريبه يمي.. بس اني كل همي اكون وياج بلا ما تحتاجين أحد ويذلج .. بسمله تره محد يتحمل أحد وهذا ابن عمتج تلكي من البدايه ضايج من كعدتج عدهم وهل لكاها حجى حتى يكلج الله وياج ..






كام من مكانه وكعد كدامي بالكاع واني على المصطبه كدامه .. وحجه بحب ..

:بسمتي ... كولي اي .. وعمرج ما راح تندمين ...

:عدنان .. شنو تكول لاهلك لكرايبك .. اني شنو موقفي كدامهم ... وانت ساحبني اني و تلث نفرات وياي ومدخلني عليهم .. منظري سمعتي ...احس راح أفقد احترامي كدام الكل .. الناس الها الضاهر عدنان وماراح يكولون وحيدة.. راح يكولولن شمرت أهلها وره ضهرها وتزوجت بلا علمهم ..

صفن بعيوني ومد أيده..
اذا تثقين بيه مدي ايدج وخليها بأيدي... واذا تكولين لا ولله ما اثق بيك .. لاتمديها..

بين التردد والقبول .. شريط حياتي مر على السريع بعيني وفتشت بكل سنين عمري ومالكيت سند من بعد رب العالمين.. غير عدنان .. عمري ما وثقت بي وخذلني
عدنان الي مجرد احتاجه الكاه كدامي وراكضلي قبل الكل .. صديقي وحبيبي ورفيق عمري ودربي .. هو الي شاركني كل ايامي الصعبه ..

رفعت ايدي خليتها بأيده ضغط عليها حيل وهو يبتسم ويكول ..
: هذه الثقه اني كدها ... ومايبعدني عنج غير الموت... لحظة وحده ما اريد تفكرين ممكن اسوي شي يضر بسمعتج .. لو يشوه منضرج كدام بشر..
اني وياج نمشي الطريق سوة شكد ما كان هذا الطريق صعب راح قصص وروايات عراقية كرار صلاح نمشي سوة استندي عليه واستند.عليج ..
وثقي عمامج ماراح يربحون ولاراح يعدي الي سوو وياكم على خير ..

:عدنان الناس تباوع كوم اكعد عدل يمعود

كعد بصفي عدل .. وصار يباوع بوجهي والإبتسامة شاكة وجها..اول مره هيج احس بخجل من نضراته..

:كااافي شبيك هيج تباوعلي تره خجلتني ولله ..

خله أيده على ضهر المقعد وقبض كفه وارتجه عليه وصافن عليه .. احس عركت من الخجل من نضراته بقيت احاول اشتت بنضري عنه...

بسمتي، ليش ساكتة؟ بشنو تفكرين؟

:شنو تريد أحچي؟شكول

: گولي كلشي، أني أسمعج حتى وانتِ ساكتة.. حتى من تحجين بكلبج

:عدنان، تعرف شنو أحس من تكون يمي ؟

:اعرف كلشي ، بس احب أسمع منج

:أحس الدنيا كلها تهدى، صخب الدنيا يسكت، وضجّة الخوف اللي بكلبي تسكت.
من تكون موجود، أني ما أخاف، ما أرتبك، أحس ظهري مستند على حايط قوي ، وگدامي طريق مفتوح، حتى لو الدنيا كلها ضدي، وجودك يخليني أحس آني بخير.
عدنان،انت مو بس تحبني، أنت تطمنّي،
ما اعرف شلون أوصف، بس وجودك يخليني أحس اني مو وحيدة بهالدنيا.. وان كلشي تمام ..

بطرف إصبعه وخر كذلتي من عيني وابتسم
: اني يمچ و وياج ... كل خطوة تخطيها وكل نفس تتنفسي .. أني يمچ ما دام أنفاسي تطلع وتدخل بريتي..
ما أريدچ بس تحبيني وتوافقين نتزوج ، أريدچ توكفين على حيلج ، وترتاحين، وتحسين كلشي تمام وكلشي بخير ..

: أني أحبك لأنك مو بس حبيبي..
أنت بيتي، وطمأنينتي، وامان كلبي وراحتة ..

بوسط الحب والرومانسيه طفرت من مكاني
:عزززززة

هو فز بعد ماكان دايخ : شكووو شصار نكرصي

:يمعود نسيت اختي جوة مارحتلها

:صدك جذب دمرتي ام اللحظة ولاتبطلين هل طبع لازم بنص اللحظة الحلوة تجفصين

:يمعود اني مال رومانسيه خل ادخل لأختي..

:هم صدك وجهج مو مال رومانسيه جنج كراط حجار

:هاااي بعده ما تزوجنه صرت تصنف من نتزوج شلون

:من نتزوج اخلي خدودج تطك وتربرب

:هذا المتوفر عاجبج لو ما عاجبك

درت وجهي منه كفخني خفيف على راسي :عاجبني بس صمي حلكج لاتنهدين عليه ..

: لا ولله خاف ماعاجبك وجهي لأن ضعيف عود وتريد وحده سمينه تره انت ساحل روحك سحل عليه ما موديه عليك اني ..

دمشي لج. عود كامت تضبط عليه .. زين مني وراح انفكج ...

:اذكرك لو ميحتاج قبل خمس دقائق كاعد على ركبك كدامي وتعرض عليه الزواج .. وبعدني أصلاً ما وافقت ..

رجعت صفنت بي ثواني ..
:انوب يجنن صاير وجع .. احلى مني

سكت من كتله هيج وضحك واني ضحكت وياه ..ومشينه دخلنه للطوارئ.. تلكاني كرار
بقى يباوع الي ولعدنان

:وين جنتي جاي ادور عليج

:صار شي .. اني جنت بالحديقة

: امي صحت والشرطة دخلو ياخذون افادتها وطالبيج حتى يسمعون افادتج ..

:تمام هسه اجي ..

راح كرار واني التفتت على عدنان
: انت روح اذا تريد بعد لأن احنه نبات هنا اليوم

:وشنو اخليج وحدج تباتين هنا بين الممرضين والدكاترة وهاي الناس الرايحه وراجعه.. اني ابات هنا اليوم

:اني علمودك خاف تتعب

:تعبج راحة كلبي وسعادتة حبيبة عمري انتي






ماكدرت أضم ضحكتي : استغفرالله.. تره كلش مو وكتك

: الخجل كلش ما لايك عليج ... مدري اني ما متعود اشوفج خجلانه متعود عليج لو تلطمين ولو لسانج رشاش
المهم اني راح اكعد على هاي الكراسي .. وبس اشوف سدية فارغه اسوي روحي متخربط و امدد اخذلي غفه عليها..

ابتسمت وتركته رحت لعمتي .. مشيت بالمرارات شفت شرطي واكف باب الغرفه عرفتها غرفة عمتي مخليها بغرفة خاصه بس هي بيها .. دكيت الباب ودخلت
لكيت الشرطي يسأل بعمتي وهي تعبانه لدرجة تحجي بصعوبه كلش وصوتها كوة ينسمع ... ماكدرت امنع دموعي
تقربت يمها سحبت أيدها بستها

:عمه الحمدلله على سلامتج حبيبتي ... اني اسفه كلشي صار بسببي وياج ...

ابتسمت الي وغمضت عيونها وسدتهم ... ماجد حجة بصوت ناصي بس وصلني

: همزين تعرفين كل الي صار بسببج

تجاهلت كلامه ومارديت عليه .. بعدين الشرطي رجع يسالني عن كل الي صار .. واني اجاوبه حجيتله كلشي بالتفصيل ماضميت اي شي ..

دخل الدكتور لكاها هوسه

: المريضه كلش تعبانه ياريت ما تجهدوها أكثر وشخص واحد يبقى مرافق يمها يكفي...

الشرطي كمل ألافادة وطلع .. واني بقيت شوي يم عمتي ابوس بكصتها .. أودعها لاخر مره .. ودعت هذه الانسانه الحنونة الي بأيام قليلة عوضتني عن كل الحنان المفتقدة بحياتي ...

ماجد:كرار انت روح للبيت واني ابقى يم امي باجر جيب الها ملابس ..

حاجيت كرار قبل ما اطلع : كرار بلا أمر عليك .. كول لاخواني باجر اجيهم .. بس الليله تحملوهم وباجر اجي اخذهم ..

:خويه صدك جذب شنو هل كلام هذا .. كتلج لا تأخذين كلام ماجد ولله العضيم كلبه ابيض ..

:ماصار شي عيوني .. ميخالف..

تركتهم ونزلت .. لكيت السدية الي يم سلوى فارغه مددت عليها .. بقيت طول الليل كل شوي افز ولا نمت براحه ..
وخلص الليل وطلع النهار ...ولازم اليوم اشوف لي مكان
كعدت سلوى ساعدتها وطلعنه للصحيات وغسلنه ورجعت لمكانها ...

دك عليه عدنان... طلعت اله لكيته واكفلي بالمرر وبيده ماعون سفري جبير وبي لفات كيمر وكوبين جاي ..
اخذتهم منه ..ورجعت تركينه ... وبعد ما الدكتور فحص سلوى اخر مره .. صار وقت نطلع ..

عدنان وياي خطوة بخطوة.. أجر النه تكسي وركبنه... بالطريق شرحت لسلوى كلشي صار .. وهي من كد ما تعبانه مالها خلك ترادد لو تحجي بس طلبت تنزل وياي تسلم على فرح...

:عدنان بس اجيب ملابسنه

:منتضرج على راحتج ..

دخلنا للبيت .. تلكوني اخواني يركضون جلبو بركبتي..

رعد:بسمه حبيبتي وين جنتي ليش ما اجيتي

:حبيبي سلوى جانت مريضه ونمنه بالمستشفى

وعد شاورني : باليل بقيت ابجي عليج بالفراش
حضنته وبسته براسه
تركت سلوى تحجي ويه فرح واني لميت ملابسنه وغراضنه شلتهن وطلعت .. ورتبت ملابس اخواني الي لابسيها تراكات نضيفه ومرتبه بس رتبت شعرهم.. وسلوى لبست نفنوف نضيف على السريع

فرح:بسمه ولله تعودت عليكم ليش ترحون

:ميخالف يعمري لازم نروح بعد ..