حضنتها وحضنت سمر وطلعنه من البيت
تلكاني عدنان اخذ مني الجنط وخلاهن بجنطة السيارة
حجيت وياه قبل ما اصعد ..

:عدنان ؟ وين راح نروح

:وياي

:وياك وين

:للبصرة .. نتزوج ..

:هزيت راسي موافقته بكلشي يريدة بعد لان فعلا مابقالي غيره اعتمد عليه ..

يتبع ....

33

------------------------

كأن الحزن علّم قلبها أن لا يطمئن…
طالت الأيام وهي تسير بثقل الألم، حتى ظنت أن الفرح أسطورة لا تُطال.
و

حين جاءها حبيبها بخاتمٍ ووعد، ارتجف قلبها فرحًا… ثم ارتجف خوفًا.
هل يُعقل أن تُزهر الحياة فجأة؟
تبتسم… لكن في عينيها سؤال:
"هل هذه السعادة حقيقية، أم أن القدر يجهّز لي صفعةً جديدة؟"

-----------------------

بسلمة : خايفة ..

:من شنو بسمتي ؟

:من ردة فعل اهلك .. واني ادخل عليهم بلا مقدمات ..

:ومنو كالج بلا مقدمات

:شنو يعني

:يعني اريدج تروحين وياي وخلي كلشي عليه

:عدنان اني لو وحدي بيها باب وجواب بس اني وياي تلث نفرات.. وتعرف كلش زين اني وياهم لو نبقى سوة لو نمشي سوة .. واذا اهلك تضايقو اني ماراح اكدر الومهم ابد... وبعدين تتوقع تكلهم اريد اتزوجها هيج بكل بساطة راح يتقبلون الموضوع ..

:احنه شنو اتفقنه بسمه مو اتفقنه نمشي الطريق سوة حتى لو كان صعب ...

:اي صح .. واني بعدني على اتفاقنه بس ...

:بلا بس واريد منج تسمعين كلامي .. وشنو احجي كدامهم انتي تسانديني تمام ؟

:تمام

:شوفي من البدايه خل اكلج .. هناك شوي الوضع مختلف عن بغداد ... هناك مجتمع عشائري أكثر .. لاتنسين ابوي أصله بصراوي وأهله وعمامة كلها هناك .. فالي اريدة منج اذا سمعتي كلمه لو نضرة غثتج تجاهلي وحاولي قدر المستطاع لاتحتكين بأحد غير أهلي .. خاف وحده تجي من كرايبنه منا لو منا ..

:جاي تخوفني

:من شنو تخافين تره اني وياج .. وصدكيني هذا الي اكوله الج مجرد احتمالات .. يعني اكلج اذا اذا صار هيج شي ..

:اوك

ركبت اني واخواني بالسيارة .. السايق انشتل بس عدنان متفق وياه مسبقاً وينطي كروة الي يريدها ..
طلع بينه للكراج .. وحتى ملابس عدنان جنطته مارجعت الها تاركها بالدوام ..






اخذ النه سيارة خصوصي من الكراج تذبنه بباب بيتهم .. والمسكين بس بالكرواي تزين رأسه ..
چنت اشوف التشتت پعيون اخواني .. حسيتهم ما حاسين بالاستقرار... واني كل شوي ماخذتهم بصفحه
كل شوي بمكان..
معقول كلام سلوى الي كالته قبل .. صحيح ؟
هي هذا الي جانت تحجي عنه ..
وكالت العالم بره مو ارحم من عمامي .. كالت على الأقل اكو سكف فوك روسنه ولكمة نأكلها ... كالت خايفه نفقد احساسنه بالاستقرار

واني بوقتها ما رضيت على كلامها ... بس هسه !
هسه جاي احس كل كلامها مخاوفها حقيقة
فعلاً للحظة حسيت اني شتتهم وبهذلتهم وياي
وراح يخسرون سنه دراسية بسببي ...
حسيت بالندم.. حسيت اني أنانية فعلاً...
حيل نقهرت وحيل ضجت من نفسي ...

وعد خله رأسه على كتفي وسألني وطريقة سؤاله حيل لجمة كلبي : وين راح نروح هل مرة

باوعت عليه ولميته بحضني ... بلا ما ارد عليه لأن نفسي ما اعرف هل مره هم نكعد كم يوم ونروح .. لو شنو بالضبط..

جاوبة رعد : شبيك رايحين ويه عدنان يمكن ياخذنه لبيتهم

سلوى كاعدة يم الجامة من الجهه الثانية .. تباوع عليه .. مديت ايدي وهي بادلتني ومدت أيدها الي .. شدتت قبضه ايدي على أيدها ... ابتسمت لي بتعب .. ورجعت راسها على الكشن ...
عدنان كاعد يم السايق .. يسولفون بأمور عشوائية ..

عيني عليه اباوع وصافنه بكل تفاصيله كلامه صوته الخشن شخصيته الحلوة ... ذاك الولد الزغير الي كان اربع وعشرين ساعه رافع بجامته ويركض بالشارع .. ومحد خلصان من كتله ..
والمراهق الي لازم السطح يطير طيور وكل مايشوفني بالسطح يبقى يصوفر ويذب حجي عليه ..
هسه صار زلمة .. وسند الي بالوقت الي اني عندي عمام ولد عمام وخال ولد خال وعمة ولد عمة ... عندي عشيرة وأهل .. بس محد وكف الي وسندني غيرة ... رغم تهورة ساعات ... بس يبقى هو الامان والوحيد ... رايحة وياه
واني كلي ثقة بيه .. بس ماعندي ثقه بالوكت ولا بالظروف ...

الطريق كان طويل لدرجة ماتنوصف واني واخواني ابد ما طالعين هيج طريق طويل ... كلش تعبنه..
وكفت السيارة بينه يم مكان استراحة ..
نزل عدنان.. طلب من يمنه ننزل نروح الحمامات ونغسل وناكل شي ونكمل الطريق...
نزلنه ودخلنه جوة والسايق هم نزل ..
جان وقت ضهر وغدة ... رحنه الحمامات و غلسنه من طلعنه .. صاح عدنان جان كاعد على طاولة ..
صاح ... رعددد وعد تعااالو
التفتت على صوته ...ورحنه يما






:اكعدو طلبت غدة نتغدى ونكمل الطريق

حجيت وياه بهمس
:عدنان كافي تكلف روحك تره فلست من ورانه بس كروة السيارة كافي .. جان اخذنه شي سريع من المحل افضل

:شنو السالفة بسمتي .. لاتهتمين

:لا عدنان اهتم لازم اهتم .. مايصير هيج فدوة

:,فدوة الج انتي اسكتي ...وبعدين تعرفيني ما استحي منج ولو مفلس جان كتلج بس لاتهمين مستلم الراتب

: وخلصتة علينه

:فدوة الج ماي عيني مو بس الراتب .. لتخافين عليه تره الكدامج احسب حساب الالف يله اصرفة ..

نزل الاكل .. طالب النه برياني بي دجاج وزلاطة وسوب دجاج .. ولبن .. تغدينه وكملنه ..
كال اصعدو كدامي واني جاي وراكم بس اشرب جكارة .. رحنه صعدنه وهو دقائق واجه بيده علاگه مد أيده من الجامة خله العلاكه بحضني .. ووهم بيها كيك وعصاير وجبس..
وكملنه الطريق ...دخلنه البصرة الوقت العصر كان لأن هم سيطرات على الطريق ووكفنه أكثر من مرة ..

مجرد دخلنه احس الخوف والتوتر عندي تضاعف .. ودكات كلبي زادت ... احس حتى شي صار ينبض ببلعومي ...
احاول استعد لمواجهة أهله ... وخليت كل الاحتمالات كدام عيني .. وبالذات الاحتمالات الاسؤء حتى ما ابني آمال و انصدم .. شي واحد متأكدة منه
هو حتى إذا أهله ما تقبلو وجودي عدنان ما راح يتركني ...

عدنان حس بخوفي وتوتري .. كان طول الوقت يحاول يطمني بنظراته .. مثل كل مرة يغمض عيونه ويفتحها بأبتسامة خفيفة .... حركتة المعتادة ألي يسويها بمعنى اني يمج موجود لاتخافين ... يوصلي رساله أن كلشي راح يكون تمام ... وفعلاً احس هذا الحركه تشيل جزء من همي وتحسسني بالاطمئنان..

دخلنه منطقة هي مو ريف .. بس يعني تشبه الريف تقريباً .. وبيها بيوت هواي .. وعدنان يوصف للسايق الطريق.. لحد ما وكف يم باب لونها جوزي ..وبيت من بره شكله مرتب .. طابقين .. نزل فتح الباب النه ...

:يله يأبه انزلو ..
تركنه ننزل وهو راح فتح الجنطة طلع جنطنه وسدها ورجع وكف كدامي ..

:عدنان ...
قبل ما اكمل كلامي هو سبقني وكال
:اني وياج اطمني كتلج ..






حجاها وراح سحب سيم طالع من الباب وفتحه ..
فتح الباب النه ..
:يله عيوني .. دخلو

بقينه اني واخواني واحد يباوع بوجه الثاني .. واني خطيت اول خطوة ودخلت من الباب ..
للطارمة الحوش كان جبير وبي حديقه جبيرة.. يمكن بس الحوش وحده تقريبا أكثر من 100متر ..

مشى سريع كدامنه يصيح ... يماااا ... ام خالد وينج

بقينه بره واكفين كلش مستحين ندخل... بس تفاجئت طلع ابو خالد من الاستقبال ...
واتلكاني بطريقة ابد ما توقعتها ...
ابتسامة واسعة على وجها وتقدم باتجاهنا يرحب

: ياهلاااااا بجيران العمر هلا بالغوالي ولد الغالي ... الحمدلله على السلامة بويه ..

اني نصدمت بترحيبه وكأنما يعرف بينه راح نجي لأن ابد ما تفاجئ .. بالعكس اني وسلوى باسنه من راسنه وباس وباس خواني من خدودهم ..

رديت مستغربه
:الله يسلمك عمو ..

:توقعت توصلون قبل كل هل وكت شو تاخرتو ..

طلع عدنان من باب المطبخ وجاوبه : اي ولله يابه طريق طويل وهم وكفنه أكثر من مره .. وسيطرات ..

:الحمدلله على السلامة يا سبع ... يله اتفضلو تفضلو ليش واكفين ..

اني وسلوى نباوع لبعض مستغربين.. وشلت ذنب ام خالد توقعت ما تريد تطلع تسلم علينه .. بس تلكتنه هاجر اخت عدنان الزغيرة ..

:بسملة شلووونج حبيبتي شخبارج شلونج سلوى

:الحمدلله زينين انتي شلونج خاله ام خالد شلونها

:امي جاي تسبح ... هسه راح تطلع وسلمي عليها بنفسج

كعدنه بالاستقبال كلش مستحين .. وساكتين وهاجر راحت جابت ماي وقدمت النه .. دقايق واجت ام خالد
دخلت علينه .. بس حسيت ملكاها ثكيل عكس الباقين

:السلام عليكم

كمت اني بلهفه حيل مشتاقة الها : وعليكم السلام .. شلونج خاله

تقدمت باوستنه واحد واحد وراحت كعدت يم زوجها
: شلونكم يما شخباركم

رديت اني بحرج ومدنكة راسي :ماشية وياها وياها

: الحمدلله كلنه وياها وياها .. هاي هي






ابو خالد: بسملة بويه ما اريدج تستحين احنه أهل وجيران وهذا بيتج واني أبوج وهذا امج وهذه اخيتج

كمل بضحك ... بس عدنان مو اخوج اذا اكول هيج هسه يمرغل روحه بالتراب ...

ضحكت ودنكت راسي بخجل: طبعاً عمو اني الصراحة كلش محرجة منك .. وداثكل عليكم حيل .. ووو

ما خلاني اكمل... بنتي بلا هل كلام .. انتي راح تصيرين وحده منه وبينه .. خله أيده على رجل عدنان

:عدنان حاجيلي كلشي ... وكتله هلا بيها هي واخوانها ..

حجت ام عدنان بس حسيت كلامها ثكيل ..
: بس يما انتي شلون تطلعين من بيتكم .. الدنيا تخوف وما تتأمن وانتن بنيات شابات وحلوات وياجن ثنين جهال .. مفروض تحسبين حساب قبل طلعتج ... تدرين بعمامج شرانين .. اذا درو بيج عدنه ماراح يكولون ناهبها عدنان ؟ ويسووها عشائر ويانة؟ .. ذيج المره احنه لا نعرف بطلعتج ولا النه علم .. وعمج خابر ويتهدد ...

تبلعمت واحس للمرة الألف الغصه وكفت ابلعومي ..
بس جاوبتها فوراً ..
:حقج خاله .. الله يشهد اني عمري ما ردت اجيب المشاكل لأحد بس هي المشاكل تركض وراي ... اني من طلعت من بيت عمي ما طلعت وبقيت افتر بالشوارع .. اني فوراً رحت لعمتي وبقيت يمها مستقرة .. الشهادة لله عمتي ما قصرت ويانة .. بس

كمل عدنان عندي : يوووم اني شرحت كلشي لابوي بعد شنو هل كلام ..

:حبيبي اني بسملة من يوم يومها اعتبرها مثل بنتي الله يشهد واعرف كلشي واعرف عماها شنو طينهم .. بس بنفس الوقت اني من حقي اخاف عليك .. وهي تعرف لازم جيتها للبصرة احتمال تبسبب الها مشاكل ويه أهلها

حجه ابو خالد : كل مشاكل ماكو والموضوع اتركوا يمي ...

حجاها بنوع من الحدة ... بس اني هنا لو يوذروني قطرة دم ما بقت بيه حسيت بالرخص والذل للمره الما اعرف شكد ...

ابو خالد : هسه نخليهم يرتاحون من الطريق الطويل.. وباجر نسولف لحد ما نشبع اليوم اكيد تعبانين ...
ام خالد يله بويه اخذيهم للغرفه يرتاحون ..

هزت راسها وابتسمت الي بس حسيت ابتسامة مجاملة
كمنه وياها ... وصعدت للدرج وهي تكول
:غرفة خالد ومرته .. راح تصير الكم .. ارتاحو بيها






ساعدت سلوى من أيدها لزمتها.. وصعدنه
من وصلنة الغرفه .. كانت بيها بس كنتور وفراش ..
وبنكة ...
: هذه الغرفه جانت غرفة خالد عمت عيني قبل ما يهاجر
اكعدو بيها رتبو اغراضكم ..

من اجت تطلع كالت : بسمة يما بس تعالي احاجيج شوي
طلعت وراها وكفت مسافة عن باب الغرفة

:هذه الكدامكم غرفة عدنان ... بسملة ... يما طول ما انتي هنا وعدنان مو حلالج لاتحتكين بيه .. حتى إذا هو حاجاج

هزيت راسي بحرج منها: أن شاء الله..

سحبت نفس وحجت : الله يرحم ابوج .. لاتزعلين من كلامي ... بس اني ام ومن حقي اخاف على ابني ..
وعمامج ناس مايخافون الله .. انتو دمهم ولحمهم ما رحموكم ..

:حقج خاله ولله ما زعلانه ... صدكيني لو ما إصرار عدنان اني جان دبرت نفسي ... بس
كملت بهضم ... بس فعلاً ما الي مكان اروح اله ..

مسحت أيدها على كتفي وابتسمت هل مره ابتسامة حنونه وسحبتني لحضنها...
:احنه اهلج حبيبتي لاتشيلين هم ما يظل حمل مطروح ..
دخلي ارتاحي.. من تعب الطريق.. وهذا اكو صحيات فوك بالسطح هم اذا تردون تستخدموهن ..

تشكرت منها نزلت واني رجعت دخلت يم اخواني.. تفاجئت بيهم نايمين شبسرعه نامو ؟ ..

بدلت دشداشة بيت و مددت يمهم تكلبت لحد ما مليت ردت اكدر انام ما كدرت وهم استحي انزل لو افتر بالبيت .. بقيت بمكاني
لحد ما دك جهازي .. باوعت عدنان يتصل
فتحت خط وجاوبته ..

:الو

:ها بسمتي .. نايمة وكعدتج ؟

:لا .. ماكدرت انام بس اتكلب ..

:بسملة مو تزعلين من امي أمانة

:لا لا ابد ما زعلت ولله وهي من صعدنه اصلا طيبت خاطري..

:امي كلبها طيب تعرفيها أنني شكد تحبكم بس هي تخاف

: ما الومها ..... صدك أكلك ؟ تفاجئت اهلك عدهم علم بجيتنه .. شوكت كلت الهم ؟

: بسملة .. تتوقعين مثلاً اني اجيبج كل هذا الطريق .. واني عندي شك واحد بالمية ممكن أهلي ما يستقبلوج واخليج بموقف يقهرج ؟ مستحيل ... اني لو ما متاكد واعرف أهلي .. ما جان جبتج هنا جان بقيتج ابغداد
بس اني البارحه اتصلت بابوي ...وشرحت له كلشي بالتفصيل ... وكتله هيج وهيج ... هو اول مره طبعاً مثل امي كال مشاكل وكذا ... بس شافني قافل ... بعدين كال هلا بيها واي شي يصير نتصرف






:شلون يعني يتصرف ؟

:شوفي من جبتج اني وأبوي فكرنه بكلشي ... مثلا يصير ما يصير شنو أكلك شردت أو عدنان نهبها .. وهذا الاحتمال كلش وراد ..
هنا ابوي يكّعد اكبر راس بعشيرتكم ... ويطلع خياس عمامج كله كدامهم .. ويحجي كل الي صار بيكم من وراهم ...ويكلو الهم بحكم الجورة الي بيناتنه الابنيه دخلت عندي هي واخوانها....

: برأيك يصير يعني تنحل هيج

: تنحل طبعا لاتشيلين هم ... بسمه كلشي يصير انتي بس ريحي بالج .. وكوني على ثقه مستحيل اسوي اي شي يقلل من قيمتج لو ينزل راسج ...

:انت وين هسه

: يمعودة امي وأبوي حكمو عليه انام بالاستقبال بعد طول ما انتي مو حلالي ... ما اوصل غرفتي ... شفتي شكد مضطهد

:ههههه يعرفون بيك ما تكعد راحة ..

:بسمله ؟. حجاها بجدية مال واحد يوصي على شي مهم

:نعم

:بسملة ما اوصيج على طيوري ... من التحق طيوري امانتج تره من اروح للدوام وارجع الكاهن بالظيم ..

:ههههههه خرب بليسك ولله عبالي توصيني على امك ابوك اختك

:ابوي امي حايرة بي وامي ابوي حاير بيها واختي ثنيهم حايرين بيها .. بس ذني روح مساكين اذا بقن بلا ماي يموتن اذا بقن بلا اكل يموتن محد الهم خلافي ... بسملة اني أريد اسلمج الراية من بعدي ومن التحق انتي تدرايهن

:يا ستار تسلميني الراية .. شنو وين رايح هن طيور

: يوميه تذبين الهن حنطة .. وتخلين الهن ماي .. واذا مايهن وصخ تغيرينه ... وقفلي القفص زين عدنا هنا بزازين تكولين جلاب مو بزازين

:صااار تريد اطيرهن هم وأوكف اصوفر الهن

:لا هذه المهمه ما تعرفيلها خليج بس بالاكل والماي

:صاااااار ... بس الله عليك خلي هاجر تصعد تكول انزلي لأن روحي طكت من الكعدة وحدي واخواني نايمين واستحي انزل من وحدي

:من عيوني هسه اوديها .. هي رادت تصيحج بس امي كالت الها خاف نايمين وتعبانين من الطريق .. هسه اوديلها جاي تحضر العشة بالمطبخ ..

:سديت الخط وتقريبا عشر دقايق صعدت هاجر .. كالت تعالي نزلي يمنه اني وامي اذا كاعدة ..

حسيت سجين وطلقو سراحة .. كمت غسلت من الحمام الفوك ... ومشطت ضفرت شعري ونزلت ..
لكيت ام عدنان تثرم زلاطة .. باوعت الساعة المطبخ ب8 ونص باليل .. واضح يتعشون على كيفهم مو من وقت
بقيت يمهم نسولف بعدة أمور ... وجبناها على عمتي وإصابتها .. لحد ما جهزو العشة .. كالت صيحي اخوانج
صعدت هم لكيتهم كاعدين كلهم غسلو وبدلو .. ونزلنه سوة .. مستحين كلش وخاتلين بسدي وكوة يأكلون ..
كملنه العشة






نطيت سلوى علاجها .. وراحت كعدت يم هاجر بغرفتها ... واخواني عدنان أخذهم وياه للمحل ماعرف وين ..
وبقينه اني وابو خالد وام خالد كاعدين بالاستقبال..
وهم نسولف بعدة أمور ... يسألون واني اجاوب
بس بالي .. باقي يم عمتي ... وافكر بمحمد وشصار ويه صادق ؟ وأبو خالد سألني بنفس الي افكر بي

: هسه صادق الله يعلم شكد راح ينحكم على عمتله هذه
ولكم شجاها هاي الناس ... الفلوس عمتهم كلش .. هسه هم شنو عايزين ؟ اشو ابوهم ترك خير من الله ومحلات يعني دنت نفسهم على حق اخوهم واختهم ..

:الطمع عمو ... الطمع عماهم وخلاهم ما يعرفون
طريقهم وين يردون كلشي الهم...
صادق حقده ضيعه ودمر نفسه ...وصالح يجي اله يوم ..

:لاحول ولا قوة الا بالله العلي العظيم... ذول جيران العمر مع الاسف هيج الفلوس غيرت نفوسهم

:احم ... عمو .. اكو شي لازم تعرفة

:شنو هو

:التهديد الي بسببه شلتو وتهجرتو من بيتكم
هذا مو من مليشيات سنيه لو شيعية ولا من ارهاب
هذا التهديد صالح هو ذبه الكم .. أو الأصح موكل شخص عن طريقه يذبه الكم

صرخت ام خالد .. يما صخاااام

ابو خالد نصدم من كلامي :شنووو هل حجي شجاي تكولين ... وبعدين. صالح ليش هيج يسوي ... من تهجرنه هو واكف يودع بينه دمعته بعينه

:تمثيل ... كله تمثيل ... صالح بنفسه حجاها .. بيوم اجيتو تخطبوني ...

:وليش هيج سوى

:لأن بعد مالكيت سند عمارة بأسم ابوي مستولي عليها صالح وفلوسها كلها بجيبه ... وكلت اميمه حتى تساعدني ارجعها... وما اعرف شلون داري .قصص وروايات عراقية كرار صلاح.. فقرر يخليكم تشيلون وبالذات التهديد نذب بشكل خاص لخالد ومرته ..

بقى ابو خالد صافن ومصدوم بلي سمعة ما مصدك جار عمرة هيج يسوي وياه ... وام خالد كعدت تدك على رجلها

:الله لا يوفقهم بجاه الزهرة ام الحسين ... ولكم اللكمه جنه نتقاسمها سوة ... شلون هيج يسون بينه شلووون

:كتلج ياعمة .. كلنه نخدعنه بالبجي والدموع
عليكم من شلتو ..والله يعلم بشنو مخدوعين بعد ..

بقى ابو خالد يفر بسبحته بطريقة عصبية ...
اني شوي وكمت يم هاجر وسلوى ... تفاجئت هاجر مخطوبة لابن ابن عم ابوها . وعرسها ما بقالة شي وكاعدة تشوف سلوى بنيشانها وتجهيزاتها ..
ومطشرة كل غراضها ...






:عدنان كل ما يستلم راتت ينطيني مصرف وأبوي هم كل ما يستلم التقاعد ينطيني واني اجمع اجمع واروح اشتري شي ..

:وشكد بعد العرس

:على راس السنه .. ما بقى شي يعني

:الله يوفقج ويسعدج

:بس حايرة من اهلي يرجعون لبغداد شلون بيه يصيرون بعدين عني لأن صار فتره يحوسون على الرجعة

:بعد سنه الحياة هذه .. لازم تصبرين

:يوم الكم انتي وعدنان.. و اشوفكم عرسان

دك تليفوني ... لكيت محمد هو الي يخابر ... بسرعة جاوبتة

:ها محمد .. شلونك

:تعبان بسمله كلش .. اركض منا ومنا

: أيي صدك .. كولي شنو صار

:عمي صالح طلع ... بس ابوي ...ابوي سالفة كلش ثكيلة وحاليا جاي يتحقق وياه .. وحتى المحامي الي خليناه يكول شغلته صعبه ينحكم ينحكم بجميع الأحوال

:لاتزعل مني بس هو الي وكع نفسه بهذه المصيبه ... يعني شنو اذيتنة عليهم احنه .. راح اخذ سلوى وخوفها وهو يعرف بيها مريضة .. ورحت حتى اخذها تالي يريد يقتلني ليش شنو الي سويته اني حتى هيج حاقد عليه

:للاسف اعرف .. هي هاي الحقيقه ابوي هو الي ورط نفسه
انتي شنو اخبارج عمتي شلون صارت

:زينه طلعت سلامات بسس

:بس شنو

: ماجد طردني محمد ... وكالي خلصينه من مشاكلج وطردني ...

:هاي شنوو صدك تحجين ...

:اي ولله

:وين انتي هسه

: أكلك وين بس لاتزعل مني لأن مابقه الي غير حل

:شصاير احجي

:اني اجيت للبصرة لبيت ابو خالد

: وعددددنان هو الي اخذج موووو

: اي هو ... وقبل لاتعصب وتاخذك الغيرة ... كولي شنو جان ممكن اسوي واني ما الي مأوى.. وين اروح بأخواني وابن عمتك طردني من بيته

:جاااان خابرتيني واني ادبرلج مكان بسمة مو ترحين ويه عدنان

:اخااابرك ليش انت بيا حال ... اني كل الي فكرت بي اخواني وين نروح وين انطي وجهي بيهم...وانت تعرف حق المعرفه عدنان وياي خطوة بخطوة ... أجيت وياه لان فعلا محدد الي غيرة

: وشنوو ناوية تبقين يمهم

:حاليا اني يمهم ... وبعد نشوف الله كريم ...

:ماعرف شنو اكلج ولله ماعرف احجي عليج وأصيح .. هم بيا وجه ما الي عين ولله ..

هاي هي ...اريدك سالم ... بس اني مسؤؤله عن نفسي وعن اخواني .. وعمامي لو واحد منهم بي غيرة على علينه ما جان هذا حالي ... مع السلامة ..

ثاني يوم ... صالح رايح لعمتي للمستشفى.. يشوفها بس صايرة عركه بينه وبين ولدها... من خلال المشادة بالكلام ماجد كايل لصالح .. بتكم وطردناها وما النه شغل بيكم لمو لحمكم وجفونه شركم ...

صالح من سامع اني مو يمهم ... متخبل وباقي يريد يعرف وين اني واخواني ... كرار كايله اني شفت وياها ولد بالمستشفى وموصفله مواصفات عدنان
صالح عرف هذا عدنان ..
ومحمد متعارك ويه صالح ... وكايله انتو السبب بكل الي صار لا تجون هسه تلومونها لأن راحت ويه عدنان...

خله صالح ... فكر أن يستغل هذا الموقف لصالحه وتكون طريقة يخلص بيها مني ...
اول شي مسوي مخابر ولد عمامه .. ومخابر شيخ العشيرة الي صرت ودرت واني بعمري ما شفت واحد منهم ...

كايل الهم بنات صابر شردن والبت الجبيرة رايحه ويه صاحبها بلا علمنه وهي متزوجه وبذمة رجال... ولازم نغسل عارنه ... ومطلعني كدامهم ...زايعتني الكاع
على اساس يومية لاكين عندي موبايل
وعلى أساس اني اتختل ويه عدنان
وعلى أساس اطلع. اطب بكيفي وما انرد.من احد
ومخلي ومنطي رقم ابو خالد للشيخ ...
والشيخ اتصل بابو خالد ... بلا سلام
كايله.. ابنكم ناهب الابنيه وابنكم وبناتنه دمهم مهدور

ابو خالد كايله : هلا بيكم واني جنت منتضر هل مكالمه... البنات واخوتهم عندي بالحفظ والصون وأمانه بركبتي والي وصلك هل كلام هذا وصلك ربع الحقيقه ... وصلك الشي الي يفيدة ويصب بمصلحته ...وصلك البنات نهبن حتى تكتلوهن ويحصل الي يريدة بس كوله يخسى يلزم شعراية من روسهم ....

الشيخ كايلة شنو تقصد بربع الحقيقة ... وشنو عمهم يتبلى عليهن وينزل رأسه بيده ..

: اي مو بس ينزل رأسه .. مستعد على الفلوس يغط رأسه بالطين... والكلام الي وصلك من صالح كله جذب وذرة من الصدك مابي .. وهيج حجي مايفيد بالتليفون لزوم مكابل يصير وشوكت ما تردون نحول عدكم... ومثل ما كتلك الابنيات جعلتهن بناتي وطرف من ثوبهن محد جايس وأشرف من الشرف نفسه والي يكولك غير هل كلام .. كله انت ما تخاف ربك ..

الشيخ كايلة بفلان يوم تحولون عندي ونحجي ونشوف وين الصدك و وين الجذب ..






اسمع بالحجي وارجف توتر .. ما انكر خايفة .. بس الي بردني .. من ابو خالد سولفلي الي صار بالمكاملة.. برد كلبي من كال

:كل هذا أني حاسب حسابه .. وعمج فضح نفسه بنفسه بلا مايدري .. لاتخافين ولاتشيلين هم ابد ..

احس ارتاحيت نوعا ما.. اتفقوا على يوم معين تصير بي الكعده ... طول هذه الأيام صالح ما طلع صوته ولا اتصل بأبو خالد ابد ماعرف شعجب ... وشنو غايته ؟

وعدنان ابد ما احتك بي مرات شوي بالتليفون نحجي واسدة... امه مانعته يوصل الطابق الثاني مدام اني بي وينام بالاستقبال باقي ... وفتره إجازته قليل يتواجد بالبيت يعني شبه مطرود .. وباقي يدك ويلطم ..

بس من اني جوة يصعد للطيور مخلي كم طير يتسلى بيهن ما جايب هواي يكول اعرف ما مستقرين هنا أو تالي نرجع لبغداد ... من يجيهم أحد من عمامهم لو نسوان عمامهم يسيرون عليهم ام خالد تكلي ابقو فوك .. افضل النسوان هنا حشريات ويدخلن نفسهن بكلشي .. وهم يكلك منو هاي وشعدها هنا الافضل لا تحتكين بيهم ...

بيوم الكعدة ... ابو خالد كال لازم ترحون ويانه لبغداد ..
وهم طلعنه من الفجر كلش .. وهو اخذ ولد عمه وياه وابن عمه شيخ ... واني واخواني وام خالد راحت ويانه... الصدك اني استغربت روحتها بس سكتت.. صرنه تلث سيارات .. سياره اني واخواني وام خالد وعدنان
وسياره بيها زلم ...وسيارة ابو خالد و ولد عمه اربعه ..
ونفس تعب الطريق وهلاكة .. لحد ما وصلنا لبغداد الدنيا ضهر ...

جنت رايحه على عماي وما اعرف كلشي ..
وكفت السيارة يم بيت ... اول مره اشوفة ... بيت جبير وكلش حلو وحديث ...
بس من نزلنه وشفنه الزلم الهواي عرفت هذا بيت الشيخ مالنه هو الشيخ من عمام ابوي بس عمري ما شفته بس من عمي تكسر وصل وهم ما شفته كعد بالاستقبال ..

دخلت واني ارجف وحاضنة اخواني واتلفت بعيوني وام خالد تطمن بيه ...

زين هي كعدت زلم ... اني واخواني ليش جايبني وياهم لبيت الشيخ .. هذا السؤال جان ياكل براسي اكل ...

رحبن بينه النسوان ودخلنه كعدنه بالصالة...
ترحيبهن جان حلو ... ومن حسن الحظ كعدتي صارت يم باب الاستقبال الداخليه... وصوتهم يوصلني ...
اول صوت وصلني هو صوت صالح ... من شاف ولد عمه اتسبع وصار يصير على ابو خالد وعدنان...

:لك بكل عين صلفه جاااااي بعد ما نهبت الابنيه وضحكت على عقلهاا

جاوبة ابو خالد :ابووو مهدي لا يطك الك عرك خل نحجي وإذا ابنه منه العيب والعار هسه احط طلقة برأسه واكتله وانتو اخذو بتكم غسلو عاركم






:بتتتتنه من يوم يومها عاااااار بس اني اكول يتيمه مسكورة بس ابنك هو الي بقى يحشي برأسها لحد ما خلااها تكسر وجوهنه ...

صارت حجايه من هذا وحجايه من ذاك ... صارت هوسه الاستقبال والكلام ما واضح ... لحد ماسكتهم الشيخ ...
وطلب الصلاة على محمد واله
كلها صلت على محمد واله
وطلب اول مره يسمع من صالح ...

كعد صالح مزقني تمزق اني وسلوى بس اكثر شي عليه
وكال هي عدها علاقه بيه من جانو جيرانه ...
وكال اخر فتره بقت تهدد كل ما نحاجيها ... وكال هي على ذمة رجال وشردت ...

من سكت صالح ... طلب يسمع من ابو خالد ..

حجه ابو خالد ...كل الي صار ..

: كاله الابنيه قبل فتره مشينه عليها ورفضونه ... وشايفة الضيم منهم بعد وفاة ابوها هي الي شالت اخوانها
طلعتها وطبتها الي يحجي عليها صالح ... هي تركض على خوانها تدبر أمورهم لأن محد بحالهم

والتليفون الي عدها ... جنتي هي خلته عدها من شلنه كالت الها يمتى ما تحتاجيني خابريني
والزواج الي يحجي عليه ابو مهدي ... جان زواج بالغصب .. غصبها وزوجها لواحد شايب حتى يسدد دينه انطاها بمكان الدين حتى لا يدفع فلوس .. والرجال طلكها وره اقل الاسبوع ...
الابنيه هجت عد عمتها ... استقرت بس ما تركوها بحالها لحكوها لهناك وأخذو اختها المريضه... ولأن راحت ترجع اختها كوم يصادق وطكها طلقة يريد يكتلها والطلقه طاحت بعمتها ... وابن عمتها من حركة كلبه طردها ...

زين انتو حاجوني اريد واحد بيكم يجاوبني ويحجي حجاية حق ...الابنيه وين تروح وهي بركبتها تلث نفرات
ابني من جنه جيرانهم ومن جانو جهال زغار هم سوة يلعبون .. من شايفها محد الها وضاله هي واختها بالمستشفى وحايرة وين تروح .. خله وجابها يمنا .. والله يشهد ومحمد وكتبه ورسله .. من يوم ما عتبت باب بيتي الابنيه كاعده بغرفتهم هي واخوتها وابني حتى للبيت ما يلفي ... كولوالي اذا غلطانين وياكم بشي ..

صاح صالح : جذب هل حجي ابنك مصاحبها ... ويركض وراها وهي ما مطلكه ورجلها من شردت يله طلكها شتردون الزلمه يشد كرون ويخليها على ذمته
عايشه عدنه معززة مكرمة .. مدلله هي واخوانها بين يوم وليله ما لكيناها ..

بقت الزلم تجر وتعر بالحجي وهوسه.. والنسولن الي يمي يسألن صدك شاردة يمه لو شنو السالفة.. وام خالد تجاوبهن بدل عني .. سلوى إذا الحايط حجه هي حجت واخواني كذالك ..
لحد ما قطع صوت الهوسه .. صوت مو غريب عليه ...
ماجد ؟ اي ولله هذا ماجد ؟ شجابه هنا ؟
وكف بنص الديوان وهو يحلف ويقسم بكلام الله ..






:الابنيه طلعت من بيت عمها شايفه الضيم دكت بابنه .. تكسي مأجرته من باب بيتهم ذبهم بباب بيتنه .. أكثر من عشر ايام هي يمنا وأمانتنه هي وإخوانه... خطوة ما تخطي الباب اذا مو امي وياها ... دخلت عدنه طالبه الحماية من ذول .. خووووالي ... خوالي الي علمود. الفلوس باعو لحمهم ... ونكرو حق امي ونكرو حق اخوهم بالورث وبهذلو خلفته .. وفعلاً اني من امي تصوبت من صادق اني قهري على امي عماني وبالحظة عصبيه طردتها كلت الها أخذي اخوانج وروحي ماريد اشوفج عدنه بعد... وامي من يوم ما عرفت ما تحجي وياي ..

صارت عيوني تجري وامسح بيهم .. احس هل كلام راح ينصفني ... بس كرم رب العالمين كلش جبير كلش

اخر شخص توقعت يشهد ضد أهله ... محمد
محمد وكف وصار يحجي كلشي ...طلع خياس صادق وصالح وأمه وخالته وما خله على حالهم حال ...
وحتى تصرفاتهم ويه ابوي قبل وفاته حجاها وقسم على القرآن بكل حرف حجاه ...

خله صادق تخبل بنص الديوان بعد ما الكل نكلب ضدة وصار يلوم بي ...وبعد ما كان الغلط عليّ صار الغلط كله عليه ...
محمد كان يحجي وصوته مخنوك .. تحس القهر كله متجمع بصوته ..
بهذا موقفه ثبت .. ماكو كلمة تعلى فوك كلمة الحق
ثبت أن كلمة الحق تنطق حتى لو كان الباطل امي وأبوي دمي ولحمي ..

كان من أصعب المواقف الي يتخلى بيها محمد...
بعد ما صالح هجم عليه كدام الكل وصار يغلط ويسب
وصلت بي تفل عليه ..

هواي حجي وهوسه وكلام متداخل... تركت كلشي ومن فرحتي .. واني بمكاني سجدت على الكاع ... اشكر ربي الف مره .. على الحق الي ضهر ... اكتافي تهتز من شدة البجي ... دموعي تنزل بغزارة...

عمامي صارو يدمرون نفسهم بأديهم ... وهذا صالح كان رايد قتلي رايد يطلعني غلط وعار .. بس محد طلع غلط وعار غيره ... وبوجود الكل .. فقد احترامة بين الجميع لدرجة الشيخ حتى ما حسب حساب لعمرة ورزلة ...

كمت حضنت اخواني وسلوى بفرح غامر كلبي ...
والنسوان الي يمي يكولن

الحمدلله من ضهر حقج عيوني ...
ومن بعد ما فضت الكعدة بالتفاهم ... ابو خالد وكف وحجه بصوت عالي

:واني كدام الكل ... ومن هذا المكان وكدام هاي الوجوه الطيبة... اطلب ايد الابنيه لابني عدنان .. والتريده حاضرين بي

الشيخ : ابشر بالخير و البت بتكم أن شاء الله

:وهذا الشيخ الي يعقد الهم حاضر.. نقرة الفاتحة ونعقد الهم بخير..






كعدو يتفقون على حاضر و غايب.. وقرو الفاتحه..
شكد ما اكول كلشي صار سريع وسهل ما اكدر اوصف ذاك الشعور... بوقت قصير الموقف نكلب كله لصالحي... وضهر صالح على حقيقته..
وطلع من الكعدة فشلان مذلول ..

حجت الحجيه ويه جناينها:
كومن ولجن جيبن الها قرأن وكرسي وبركع ابيض بساع..

راحت بنيه شوي ورجعت بايدها كرسي وكعدت

... خلت قران بايدي كالت افتحي ...

سويت مثل ما طلبت فتحته لا على التعيين.. طلعت كدامي سورة النور ...
رغم هي كالت طلعي سورة الفتح ... بس اني ماعرف ليش سورة النور من طلعت كدامي حيل تفائلت بيها
وكلت الها

: هو القرآن كله خير وبركه .. راح اخلي على سورة النور

:براحتج حبيبه ..

راحت شوي ورجعت بايدها بيدها قماش ابيض ..
كالت المره الجبيرة الكاعدة

: هذا البركع كل بناتي وجنايني من يعقدن البسه الهن كلش اتبارك بيه ..

خلته على راسي .. دقايق وكالو راح نعقد ...
اسمع صوتهم جوة الشيخ يعقد لعدنان وصوت محمد موجود هم ..
شوي وارتفع صوت المباركه بالاستقبال ...

عيوني اريدهم بس يوكفن من الدموع مجاي اكدر اسيطر عليهن ..
سلوى واكفه يمي حاصره جفي بايدها من كدا ما ارجف عيونها مدمعة من الفرح .. رعد ووعد واكفي كدامي .. وام خالد وكفت على راسي مخليه أيدها ...

الشيخ گال:من وره الباب .. جاهزين بوية
حجت ام خالد ... جاهزين شيخنه

بسم الله نبدأ... بلش يقره صيغة العقد ... لحد ما كال اذا قبلتي فقولي نعم وانت وكيلي

حسّيت الدنيا صار لونها وردي بثواني...
گلبي يدك مثل طبل ...
وإيدي ترجف، والقرآن بإيدي ،

هزّيت راسي بصمت من الفرحة حتى صوتي ما جاي يطلع ...
الشيخ ما سمعني وكرر العقد

حجت ام خالد: صوتج يمّه، نريد نسمعج..

رفعت راسي بشويّة جُرأة ممزوجة بخجل:
:إي... أقبل .. نعم وانت وكيلي

بثواني، صارت دمعتي أسرع من كلمتي...
والكعدة صاحت بـالرفاه والبنين ومبارك،
، والنسوان هلهلن ، والحجية الكبيرة حطّت إيدها على كتفي، وكالت:
هنيالج يمّه، الله يسعدج، ويبعد عنج أولاد الحرام..

ام خالد وكفتني واخذتني بحضنها : بالعافيه يما الف مبروك ... ولله سواها عدنان ...

:ابتسمت بخجل منها ... درت على سلوى لميتها بحضني

:يعمري يعمري الف مبروووك ولج مجاي اصدك ... سواها ابو الطيور

رعد : يعني صرتي مرت عدنان بسمة

سلوى: اي ولك تزوجو

وعد:الله همزززين تزوجتي عدنان احبه احسن من ذاك الشايب اكرها

سلوى تداركت الموقف وسدت حلكة ..

بس أني برغم الفرررح ... بعدني حايرة،
هاي اللحظة حلم؟ لو صدگ صارت؟
صوت الشيخ، الفاتحة، الدعاء، الدموع...
كلشي كان مثل حلم حلوو صحاني من كابوس طويل....

يتبع ...

34...

-------------------------

حمدت ربي وشكرته .. سهل الي كل هذه الأمور ...
وبعد المباركه والكعدة اترخصو حتى نطلع ..

حجه ماجد : من رخصتكم ..اخذهم ويانه للبيت الله شاهد امي بوجهي ما تباوع .. واني اعترف بلحظة عصبيه وخوف على امي بدر مني تصرف طايش لكن يشهد الله هم بحسبه اخواني والحجي الي حجيته ندمان عليه ...
اني أريدكم ترخصوني .. يجون وياي معززين مكرمين والابنيه تطلع عروس من بيتنه ...

رد ابو خالد : بس يا عمي .. اني الابنيه اخاف عليها أحد يتعرض الها لو يصير شي وهسه هي بأمانتي وصارت مرت ابني ...

:أمانا الله ورسوله محد يوصل ولا أحد يتعرض الهم واذا صار شي اني كدامك ..

عدنان : ماشي .. بس اني بأيدي اوصلهم ... وكل يوم راح اطئمن عليهم .. وهم خلال هذه الكم يوم مدام اني ببغداد نعقد محكمة فد نوب ..

ابو خالد:هاي هي بويه معناها هم صارو بمسؤوليتك وأي شي يصير عليهم .. انت الي تصير كدامي ..

الصراحه اصتصعبت رجعتي لبيت عمتي بعد طردة ماجد .. بس الولد اعترف بغلطة واني هم كلبي نار على عمتي ... واستحيت أعارض مدام هم اتفقوا .. سكتت وجاريتهم ...
سلمنا وطلعنه ... صار بوجهي محمد وماجد وعدنان واكفين على صفحه يسولفون ...
عدنان من شافني طلعت اجه تقرب يمي مبتسم والفرحة طاغية على ملامحمة ... وكف قريب مني وهمس ..

:مبروووك مريتي

دنكت راسي بخجل وجاوبته:الله يبارك بيك

: راح اوصلكم لبيت عمتج .. ماجد طاح بركبة ابوي واعتذر عن كلامه يكول امي تريدها .. شنو رأيج اذا ما تردين ترحين لا تضغطين على نفسج

:لا لا ميخالف ماكو مشكلة .. اني الصراحة اريد اشوف عمتي ... وهم سلوى تره تعبت من الطريق روحة جية

:ماشي حبيبتي ...

صارت عيني على محمد يخطف نضرات من سلوى وهي كذالك ... بس حسيت هموم الدنيا كلها ملتمة بكلبه ومبينه على ملامحمة مقهور حيل .. وهل شي مبين كلش عليه ..






بعد ما طلعنه من البيت ابو خالد وام خالد سلمو عليه .. بعد ما باروكلي ... و صعدو بالسيارة ..
وعدنان بقى لأن عنده دوام و ماتسوى بعد يروح ويرجع ..
محمد جان جاي بسيارة عمي صادق ...
وكف يم السيارة حاجيتة ..

شلونك محمد ..

رد بتعب واضح بصوته و بوجهة :الحمدلله عايشين ..
مبروك الله يتمملج بخير

:شكرا حمودي يوم الالك ..

هز رأسه بلا حتى ابتسامة وصعد .. ماجد صعد بصفه ورعد كعد بصف ماجد ..
وليورة حصرنه نفسنه اني وسلوى ورعد وعدنان
ورحنه لبيت عمتي ... مطلعيها من المستشفى صار يومين .. من وصلنه لهناك .. ماجد أصر على محمد وعدنان يدخلون ...
دخلنه للبيت .. الولد دخلو للاستقبال .. واحنه دخلنه من باب المطبخ .. تلكتنه فرح فرحانه بجيتنه
سلمت عليها .. ودخلت عمتي مخلين سريرها بالصاله
ركضت عليها بلهفه و خوف ..

:عمممه ... حبيبتي الحمدلله على سلامتج ..

جانت زعلانه مني بس ردت عليه السلام وباستني
:هيج بسمة تخليني بالمستشفى... وترحين ليش يمة ...

:عمه .. اني اسفه ولله بس انتي ما تعرفين الي صارلي.. اني ما طلعت بمزاجي عمه ..

:اعرف كلشي كرار حجالي ...ولله من يومها ما اخلي لساني على لسان ماجد.. شكد اعتذر وكال من خوفي عليج هيج حجيت ... بس ابد حلفت اذا ما يرجعج ما اباوع بوجها... ولله ماجد كلبه نضيف بس من يتعصب يضل يخيط ويخربط بالحجي ...

:ما زعلانه منه ولله اعرف حقه صدك اني اجيت والمشاكل اجت وراي مسربه ... وهاي اخر شي لو ماستر الله جان رحتي بيها

:لا ولله مو بسببج... الصار كله لأن اخوتي جلاب يرحون فدوة للجلاب

:هاي هي عمة الحمدلله على كل حال ...

دخلو اخواني وراي سلمو على عمتي وباسوها ..

:مبروك يما على العقد ماجد خابرني قبل ما تجون وحجالي .. تستاهلين زلمة مثل عدنان ...بس هذا الي صدك يحافظ عليج

:الله يبارك بيج عمتي ... الحمدلله رب العالمين نصفني.. صالح جانت نيته يطلعني وصمة عار كدام الناس بس حاشا ربي يظلم عبدة كلشي صار بصالحي وهو طلع فشلان






:عساه بابو زايد ويضل دومة فشلان أن شاء الله..
باوعي انتي بعد تضلين عندي مفهوم لحد عرسج ..

:براحتج عمه مثل ما تحبين ...ولو ملابسنه وغراضنه ضلت هناك ماجبت غير كم قطعه حسبت حساب نبات

:اذا على الملابس سهله عود رجلج من ينزل من دوامة ويتلحق يجيبهن الج بطريقة ...انتي هنا ضلي اجهزج بيدي ..

:ماشي ...

شوي وطلع ماجد كال لعمتي محمد وعدنان يردون يسلمون عليج ... كمت اني عدلتهه ورتبت حجابها وغطيتها ... ودخلو للصاله يسلمون على عمتي ..
بس ما قهرني صدك غير محمد .. من سلم على عمتي حضنها وصار يبجي بحضنها وهي تبجي وياه .. غصب عني دموعي نزلت عليه ..

محمد: عذريني عمه عيني مكسوره منج ولله

:عمت عين ابوك كون الخلاك بهل موقف ... لا حبيبي لاتعتذر انت شنو ذنبك .. شيل راسك حبيبي .. انت زلمة معدل... وما منك كل صوج

:عمه ابوووي دمرني فشلني .. حتى ما بقالنه أحد يريدنه بسببه ... شسوي عمه كوليلي .. يبقى ابوي ومجبور اوكف وياه ...

:ميخالف امي ... لا تتخلى عنه ... انت زلمته هسه .. وعسى هل صار يخلي يصحى على زمانه وينظف كلبه من هل حقد الي ضيعة ...

:وكفت بنص الديوان تمنيت الكاع تنشك وتبلعني من الفشلة ... جبروني اشهد ضدهم بسبب سوالفهم المايرضى بيها رب العالمين...

:ماسويت الا الصح ... ابد لا تضوج انت سويت الي يريح ضميرك ويرضي ربك ...

كام من حضنها وهو يمسح بعيونه ... دك ماجد على ضهرة كاله
:محمد انت الي سويته هو الصح يكفي انت تنام وضميرك مرتاح وتوكف كدام ربك وانت ما ظالم...وذا على ابوك ...هو بايده ودة نفسه للسجن.. وذا على صالح لاراح يموت ولا راح يفلس .. هو الي كان رايدة منك .. توكف وياه بالغلط والباطل...صالح جان رايد يهدر دم انسانه بريئة شردت من ظلمة ..

هز رأسه محمد :الحمدلله الي خله ضميري صاحي وما أشبههم ..

انتبهت عمتي لعدنان ... بالخير وليدي بالعافيه عليك بسمه حطها بعيونك امانه

:توصيني على بسمه... بسمه هي عيوني شلون اخليها بعيوني ...

:والنعم منك ...اول ما شفتك عرفتك زلمة ينشد الضهر بي






عدنان: طبعا اني من عقدت هناك عليها ... ماردت ألبسها الحلقة .. بس مادام جينه هنا .. ترخصوني ألبسها حلقتها
بحضوركم ...

فتحت عيوني مفاجئه ... شوكت أشتره الحلقة ... واصلا شنو عرّفة. كلشي راح يتم وننخطب .. معقول مخطط لكشي سابقاً واني ما ادري .. بقيت صافنه وبس مبتسمه ..
تقدم يمي ... وهو يطلع من جيبه علبه.. فتحها بيها حلقتين ...
باوعت للعلبه ورجعت رفعت راسي اباوعله احس كلبي طاير فرح وما مصدكة الي جاي يصير ...

حجت عمتي : يله بسمه مدي ايدج ولبسي حلقتج

ضحكت وخليت ايدي على حلكي ...ورجعت مديت ايدي كدامه.. وهو لازم حلقتي بأيدة ولبسها بأصبعي ...
غمضت عيوني أستشعر السعادة الي جاي تتسلل لكلبي وهو يخلي الحلقة بأصبعي ... واحس كلبي مسوي احتفال بصدري.. رفع ايدي وباسها ... كهرباء وسرت بكل جسمي ورجفت رجفة قوية ... متت بدمي من عمتي ومحمد وماجد وهو بلا مستحى بأس ايدي .. ورجع باس كصتي

عدنان: الف مبروك بسمة عمري

من كد التوتر والخجل حتى ما رديت عليه

اباوع له الضحكه ما اختفت من وجها... ولا من وجهي .. بعدين طلعت الحلقة اني وهو مد أيده لبسته حلقته ... وبسرعه نزلت ايدي .. والكل تبارك النه مرة ثانية

عمتي : الله يسعدكم ويتمم الكم بالسعادة والخير ويرزقكم الذرية الصالحة كولو آمين

الكل كال آمين ..

بعدين اترخص عدنان وكال لازم يروح ..
طلعت وياه للباب أوصله وكفنه شوي بالطارمة ..
وهو يوصي بيه

: اريد منج ديربالج على نفسج.. وخلي جهازج قريب منج حتى اتصل عليج ...

:تمام أن شاء الله

لزم ايدي الي بيها حلقة يباوع عليها مبتسم ويرجع يباوع بعيوني ... ويسحب نفس قوي

:ولج فرحتي مجاي اكدر اوصفها ... عود صدك صرتي مرتي ؟

:ههههه لا حبيبي صدّك .. انت زلمة من ضهر زلمة ... وسويتها صدك ...

:من فدوة رحت لهذه الضحكة ..

:تعال صدك ... اشو ابوك محضر الشيخ .. وانت محضر الحلقة .. يعني كأنما محضرين كلشي وجايين من البصره مخصوص حتى تخطبون .. يعني جان ممكن ما تنحل المشكله واطلع اني بالوجه الاسود .. شلون هيج محضر كلشي .. تره دخت ...

ابتسم ومسح على ذقنه الي ستوه بادي يضهر بي الشعر بعد الحلاقة .. باوع على باب المطبخ .. ورجع جاوبني






:شنو كتلج سابقاً...

:شنو ؟

:اني مو كتلج خليج وراي .. وثقي بيه .. كتلج مستحيل اخليج تنزلين راسج كدام بشر .. ؟

: ايي ؟

:اني من إخذتج وياي للبصرة جنت حاسب حساب كل الي صار .. وكل خطوة نخطيها اني رتبتها زين قبل ما امشي بيها .. مستحيل اسوي شي يعرضج للخطر ...
باليلة الي بتنه بالمستشفى ... رحت لعمتج ... ولكيت ماجد طلبت منه نحجي على انفراد ..
المهم .. كعدنه حجيته وكلت اله كلشي .. هو أول مره جان قافل بسبب عصبيته على أمة .. لكن اني كتله .. الابنيه صارت دخيله عندي .. واذا صار عليها شي لو طلعت حجايه ... انت اول واحد اطلبك للشهادة .. حتى تبرئهه

:اي ؟

اخذت رقمة وتركته ... وقبلها اني اتصلت بأبوي وهم فهمته كل الوضع ..
وبعد ما عمج سوه الشي الي جنت متوقعة ... اتصلت بمحمد ... واتصلت بماجد ...
كلت لماجد اي شي يصير على الابنيه انت المسؤول لأن الابنيه امانة عدكم وانت طردتها ... هو رد كال امي هم كرار حجالها كلشي و ماتحجي وياي و لاتباوع بوجهي ..

و اجينه للبغداد ... وسمعتي وشفتي الي صار .. صالح طلعت خيسته وكلها عرفته شنو هو ...
الصدك اني ما بالع ضلتج هنا .. بس مجبورين هل فتره نتحمل .. هم حتى نعقد محكمة .. وهم نشوف المحامي الي يمشي بموضوع العمارة...

:اي ولله اني المشاكل حتى نستني موضوع العمارة ..

:حقج وحق اخوانج ديربالج تغفلين عنه ... وخل اكلج شي ... ابوي بعد ما عرف صالح هو ذاب التهديد وهو من يومها ... قرر نرجع لبيتنه هذه الفتره ..

:صدددك راح ترجعون ؟

:اي ولله احتمال أقل الشهر نرجع ... البيت موجود وحتى اثاثه موجود.. والصدك ابد ما كدرنه نتأقلم هناك نهائيا حيل تعبنه نريد نرجع لبيتنه ونرتاح

:اي ولله ياريت ...

: وهسه قبل ما اروح انطيني بوسه

:عااااا ولي لا على حلكك اهفك

فتح عيونه عليه وهو يكلي هذا عليمن ولج اني أولي وتهفيني على حلكي..

أدركت حجم جفصتي. تذكرت هو صار خطيبي وزوجي مو ذاك صديقي الي ارزله شوكت ما عجبني ..
:لا باوع باوع خل احاجيك .. مو شنو اني بعدني ما متعودة عليك زوجي .. انطيني فرصه اتعود حتى اتعلم احترمك ..

:تتعملين تحترميني ؟

لزمني من آذاني ... كووولي اسفه يا زوجي ياحبيبي بعد ما أعيدها ..






:وخرررر ما اكول ...

هو يزيد بلويه آذاني ... كووولي اسفه ولج

:وعلي ما اكول

ضحكت واتفاجئ:: وعلي ؟

:يمعود تعلمتها منك ..

: وعلي التحلفين بي صايرة اذا ما كلتي اسفه هسه اسوي الأكبر من البوسه ..

:دووخر شنو هو الأكبر من البوسه تعرس عليه هنا بالطرمة

:عادي اذا تردين ماكو مشكلة

: أكلك جفيني شرك واكفين بنص الطارمة وانت تدور بوس هسه يطلع أحد وننفضح .. لاتصير مسربت

:نووب مسربت امنعج من وحده تجفصين بالاكبر منها

حاولت اتمسكن كدامه بس حتى يسكت
: يا حبيبي انت مو كتلك اني متعودة عليك صديقي واجفص براحتي بعدني ما متعودة عليك زوجي وبعدين اني بسمتك اهون عليك تلوي اذني.. واحنه اليوم مخطوبين .. بطلت ماريد خل نرجع اصدقاء احسن على الاقل جنت ما اتقيد ...

بسرعة صارت نضرات الندم بعيونة : اسف بسمتي .. اذيتج يعني

:لا ما اذيتني .. فدوة الك .. اني هم غلطانه وفعلاً المفروض افرق وانتبه لكلامي وياك .. صاار تؤبرني تشكل أسي ..

:ديله عيني أم عصام خل اروح .. نكلبنه باب الحارة ...
باجر حضري نفسج الصبح .. نروح نسوي تحاليل بلكي نلحك على المحكمة نعقد

:مستعجل كلش

:اي حبيبتي اريد نعقد محكمة افضل على شنو التأخير وبعدين اني مدام واجبي يبدي باليل..

:تمام لعد الصبح موعدنه

:يله يأبه .. ديربالج على نفسج...
وصل للباب طلع بره وقبل ما يروح كال
: شو عيدي مال أسي..

حجيت واني اضحك :تشكل أسي ابن عمي

ضحك ولزم خشمي بأصابعه وعصرة وجر اصابعة ..
وهو يكلي : سدي الباب لايفوت واحد يصجمج ..

:الله وياك .. راح هو وسديت الباب وراه اضحك .. بس احس بقيت بس جسم واكف اخذ كلبي وروحي وعقلي كله وياه ... اجيت ادخل واني طائرة .. لاكاني محمد هم يريد يروح و وياه ماجد.. طلع كدامه وهو وكف وياي

:ها حمودي راح تروح

:ايي رايح .. بس .. اح حم






يريد يحجي شي بس متردد : كول محمد رايد شي ؟

:بس ردت احجي ويه سلوى قبل ما اروح.. ردتها ضروري

من كال ضروري لعب كلبي بس اول مره يطلب مني هيج طلب ماكدرت اكله لا ..

:تمام ثواني اصيحها ..

دخلت صحتها هي اجتني
:سلوى محمد بره يريد يحجي وياج يكول شي ضروري

بسرعه توترت وارتبكت.. رغم حبها اله بس كلش تستحي لأن ما يصير بينهم كلام غير النضرات

:شنو يريد

:ماعرف ولله كال بس اريد احاجيها .. ومبين عليه كلش مقهور خطية..

:ابقي يمي مو ترحين

:وياج ما اروح تعالي ..

اخذتها وطلعنه بره هو واكف ... من طلعنه تقرب مسافه عنها صار كدامها .. يريد يحجي بس الكلام واكف ببلعومة وغاص بيه ... ويسحب كل نفس أحسه يحرك صدرة حرك
بس القهر صدك من حجه ويه سلوى وكال

:سلوى .. شوفي .. الله يشهد اني شكد حبيتج .. وشكد تمنيتج ... بس ... بس ساعات ننجبر نتخلى عن الاشياء شكد ما جانت عزيزة علينه ... اني قبل جنت اكول اي شي مو مهم المهم تكونين الي ... بس ...

سكت ونزلت دمعة من عينه مسحها ودار وجها انطه ضهره لسلوى الي صافنه بي ... سحب نفس قوي ومسح وجها ورجع دار وجها عليها وكمل كلامة...

:بعد كل الي صار ... ابوي اول وتالي ينحكم ... وامي واخواني مستحيل اكدر ابتعد عنهم ... وبنفس الوقت حتى لو وكفت بوجه الكل وأخذتج اعرف امي شنو .. اعرفها تأذيج وتستغل اي فرصه حتى تقهرج ...
وانتي ... انتي مثل الورده.. ما تحملين أذية ولا ضغط .. اني منا اكلج .. الله يسعدج ... وما أريد تربطين حياتج بيه .. طريقته مو واحد ... الله يوفقج ...

كمل كلامه بسرعة وبنفس الثانيه دار وجها وطلع ...تارك وراه سلوى الي حرف ما نطقت وبس صافنه بي ... حتى دموع منها ما نزلت ...
تقدمت يمها حضنتها لصدري ... وهي بنفس جمودها لا حجت ولا بجت ولا بدر منها رد فعل .. غير تركتني ودخلت جوة .. دخلت وراها ميته قهر على محمد وعليها... هي دخلت للغرفة .. تركتها براحتها .. وكعدت يم عمتي .. نسولف باكثر من موضوع... وسمر مطشرة جنطتها وكاعدة تكتب بالواجب .. واخواني يحوسون ...
سولفت الها كل موضوع محمد وسلوى .. وشكد مقهوره عليهم

:ما تعرفين امي ... يمكن بالمستقبل ربج كاتب الهم نصيب سوة الله يعلم ... ومحمد زين سوة حتى لو يتأذون هسه .. كل جرح اول وتالي يبرة ... سلوى وفاطمة مستحيل يصيرن سوة .. وهسه هو المسؤؤل عن أهله ..
انتي لاتتركينها وحدها هذه كلبها تعبان وخاف تتخربط ..






صدك من كلام عمتي خفت عليها لا تتخربط خليت ورحت دخلت يمها بالغرفه .. لكيتها مخليه راسها على مخده وغامتة روحها بالبطانيه وجها للحايط .. كعدت يم راسها .. شلت الغطه منها ... وبس صوت نشغتها وصلني ..
لزمتها من كتفها درتها عليه ...

صوت بجيها عله وصار قوي شالت رأسها من المخدة وخلته بحضني.. تركتها بجت لحد ما فرغت كل دموعها ..
حجت ...

: محمد لو صدك يحبني جان تحدى الكل علمودي .. بس هو بأول موقف باعني .. اعرف لأن مريضة محد يتحملني .. جنت اعرف هذا اليوم راح يجي .. شفتي ؟ شفتي بسمه شلون بسرعة تخلى عني ..

مسحت على شعرها بأيدي
: سلوتي ... حبيبتي ... إني جنت اعرف هل شي راح يصير اليوم لو باجر... أكثر من مره كتلج لاتتعلقين سلوى .. تره انتي وياه طريقكم مو واحد كتلج أمه فاطمة وأبو صادق وعندج الحساب ...
من شفتج ما اقتنعني بكلامي تركتج للايام هي الي تثبتلج صحة كلامي ...
ومحمد هم الموقف الي بيه هو مو سهل .. هو باقي بين نارين .. مفروض انتي تعرفين كل هذه الكلام شنو الجديد يعني ..

:اي اي حقج ولله كلامج كله صدك واني رحت زايد بمشاعري...

: انتي بنيه ... مجرد شفتي أحد اهتم بيج فوراً تعلقتي بيه .. التعلق هذا بسرعه يروح .. هسه كلها فتره بسيطه وتنسين ... ونرجع حقتنه وترحين لاحسن الأطباء وتتعالجين وساعتها ... الف من يتمناج ..

:هههه الف ؟
بسملة مسحت دمعة نزلت على خدها، وابتسمت بألم:

تره ربج ما ياخذ شي إلا يعوض علينه بأحسن منه، يمكن مو هسه، بس يوم من الأيام راح نعرف ليش صار الي صار... يمكن لأن رب العالمين كاتبلج نصيب أحسن.... راح يرزقج براحة ما شفتيها من سنين.... يمكن مو بحضن محمد ... بس بحضن أمنه ... بحضن ناس تحبج حب حقيقي... مو مجاملة ولا شفقة... وراح يجي يوم تضحكين على كل لحظة بجيتي بيها، وتكولين: الحمد لله ربنا ما نسانا

باوعت الي بعيون مدمعة

:تحجين وكأن كلبج مو مكسور... كأن عمرج ما مر عليج وجع وهم .. وانتي أكثر انسانه تحملت وجع و كسرة كلب

:أنا مؤمنة إنو كل دمعة نزلت من عيني.... الله شايفها... وكل وجع كتمته بصدري هو سامعه... و دامه هو السميع العليم أكيد ما راح يتركنه . دعائي، دموعي، صبري، هاي ما تروح هدر... لأن رب العالمين وعدنا: إن مع العسر يسرا، ووعده حق ... ودامي أتنفس، راح أظل أؤمن بالعوض ...
سلوى... احنا نظن نحب، ونظن نختار، بس رب العالمين أرحم بينا من نفسنا... يمكن نحزن لأن فقدنا شي حبيناه، بس لو نعرف شگد الله يبعد عنّا الشر حتى لو إحنا نتمناه، چان سجدنا شكر بدل الدموع ...






تقربت مني وهي تحتضني..

:ياريت اكون قوية مثلج .. بس اخاف ما اتحمل ..

: تحملين... لأن الله ما ينطي الابتلاء إلا على كد نيتچ... وراح تشوفين، يوم العوض يجي وتكولين: يا ربي شگد كنت أجهل حكمتك..

مسحت عيونها موافقة على كلامي مبتسمة .. وسكتت ..
بقينه اني وياها نسولف ماتركتها خفت صدك تتخربط من كلبها... المغرب كلش إذن كمنه صلينه و وكفنه اني وفرح نحضر العشى.. سلوى بقت بالغرفه اخر مره شفتها واكفه تصلي .. بس اشو تأخرت ..
رحت اشوفها ... دخلت لكيتها لابسه جادر الصلاة..و واكفه كدام المراية صافنه بنفسها ومبتسمة ...

تقربت منها ابتسمت لابتسامتها.. حبيت امازحها
:شنو معجبه بروحج .. وتضحكين لنفسج

:اكلج ؟ هذه المراية تطلعني حلوة ؟ لو اني اليوم معجبه بروحي ..

:حقج تنعجبين بيها ... غير تخبلين اني ولو ولد ومو اختج الا ما املخ روحي عليج

:بسملة ؟
:ها

:لايكلي الحجاب ؟

:انتي كلشي يلوك الج

:كلش احب شكلي من البس الجادر واصلي... احس روحي اقرب لربي و انظف .. تدرين كل ما اصلي... و البس الجادر ومن اكمل انزعه واطلع .. اسأل نفسي ليش نلبس الجادر بس من نصلي؟
يعني، هو ربّ العالمين يشوفنا بس بهالركعات؟ هو شايفنا بكل لحظة…
ليش بس من نوكف نصلي نستحي من نفسنا ونغطي كلشي؟

سكتت، حسّيت كلامها مثل طعنة ناعمة... ما توجع.. بس توخر الستارة عن شي داخلي ما چنت اشوفه. ..
سؤال ابد ما كان الي عنه أجابه بس حاولت ارد عليها بالي اعرفه ...

: يعنني.. اكيد لأن بالصلاة نقابل رب العالمين ونتواصل وياه... وعيب وغلط أن نلتقي بربنه واحنه ما ساترين أنفسنه ..

:يعني رب العالمين الي خلقنه وانطانه كلشي من النعم .. وخلق تفاصيل جسمنه .. نستحي نوكف كدامه واحنه ما مستورين .. بس عادي نطلع كدام.الناس الغريبه.. مكشفين وشعرنه وركبتنه طالعه ويباوعون علينه ..
شنو مثلا رب العالمين يشوفنه بس من نصلي .. لا هو يشوفنه بكل وقت وبكل لحظة .. اللقاء الحقيقي هو بكل لحظة نعيشها؟
هو يشوفنا وإحنا نضحك، نغلط، نطيح، ونكوم…
ليش نخلي الحشمة بس بهاي اللحظات القليلة

ما عرفت شنو اجاوبها .. وكلامها عكد لساني ..

: كل مرّة ألبس الجادر أحسني حقيقية… أحس الله يحبني أكثر…ولما أشيله، أحسني ناقصة






:بس سلوى… إنتي مو ناقصة حتى لو كنتي ما محجبة ..
إنتي تنحبين على نيتچ وكلبج. ورب العالمين يباوع لكلبج

كامت تعدل الجادر على وجها ..

:بس آني أحب نفسي بهالشكل… أحسني محترمة ..وقوية..
مو لأن الناس تشوفني هيچ… لأن أني أشوف نفسي هيچ

سكتت، ما عرفت شگول…
بس حسّيت إن سلوى ما چانت تحچي عن جادر،
هي چانت تحچي عن هوية.. عن كرامة .. عن قرار .. عن حبها لنفسها بهيچ شكل..

بقت سلوى تباوع لروحها بالمراية، تبتسم، وچفوفها تمسح الجادر قصص وروايات عراقية كرار صلاح بهدوء،
كأنها تحضن الطمأنينة.. مو بس قطعة قماش.
أنا طلعت من الغرفة، وكل خطوة أحس بيها أفكاري تنكلب...
سلوى چانت تحچي عن الجادر، بس بالحقيقة چانت تحچي عن شيء أعمق...
چانت تذكّرني إن الحياء مو بس فستان، الحياء سلوك... إحساس... حضور دايم لله بداخلنه...

بقيت اشتغل ويه فرح بالعشى بس بالي ويه كلام سلوى ..
مر تقريبا عشر دقائق .. وطلعت سلوى من الغرفة .. تفاجئت بيها لافه شال على رأسها ... بس شكد ما اوصف شكلها حلو طالع قليل ...

حجت وهي فرحانه تبشر عمتي ... عمه اني قررت اتحجب ..
عمتي طارت فرح بقرارها ..

:فدوة رحت لهل وجه هذا الي مثل الكمر .. حبيبتي الله يكملج بعقلج ...

اجت وكفت كدامي... شنو رأيج ..

مسحت بايدي على خدها فرحانه الها : يخبل عليج .. يعمري .. وهديتج مني درزن شالات

كعدنه نتعشى كلنه سوى واني عيني ما طاحت منها ..
وحتى الولد باركولها بالحجاب .. بس لاحظت شي .. أن عيون ماجد اكلتها اكل ونظرات اول مره اشوفهن بعيونه ... وهي ابد ما منتبها...

باليل فرح خنتكتي خنك الاتحف شورابي وتشقر وجهي .. شلون باجر ترحين تعقدين وانت شورابج داجة ..
استسلمت الها بعد ما اخذت نضرة بالمراية واكتشف صدك شورابي سود ..

:فرح شقريهن تشقير عود بالعرس احف

:ولج ششقر ...بربج شعر وجهج اسود وشورابج صفر صدك تحجين غير تصيرين ميز نصبه

حجت سلوى
:وتطيحين بالسان ابو الطيور وبعد عندج الحساب ..

:خاف يوجعن ؟

:اي يوجعن اجذب عليج اكلج ما يوجعن صدك يوجعن بس اتحملي بسرعة اخذهن الج يله حبابه طلعي حلوة كدام الرجال .. شوفي ماريد تغارين من كلامي ... بس ولله عدنان حلو كلش ومرتب وشخصية.. رتبي نفسج لا ينشفط منج ..






بس سمعت ينشفط مني كعدت مثل الحبابه واتحملت وجع الشوراب .. وبقيت ساعه انفخ شورابي من فوك ساعه اخلي لساني بلثتي ساعه أعصر وجهي ...روحي طلعت لحد ما كملت ... وصدك فرق صار بوجهي ...
رجعت سوتلي خبطة تشقير .. وخلته على وجهي لو احس اشتعل نااار... وكعدت اهفي على وجهي ... شوي وركضت غسلته ...طلع وجهي ابيض كلش ..
نوب راحت ورجعت بيدها صحن جاي بداخله خبطه ..

:نوب هذا شنو فرح لاتضلين تلعبين بخلقتي ..

:مقشر هذا شبيج ..

مديت اصبعي وشلت بي وضكته : يا مقشر هذا تمن

: اي هذا طحين تمن اخلي فوكه عصر برتقال لو شوي حليب .. واخبطه واخلي على وجهج من بنشف فركي وجهج بيه يصيررر ناااعم مثل وجه الطفل ..

:عزة بعينج تذبين مصايب بيج البله كله ..

:ولله كلشي ما اعرف بنات عمي هن يعلمني ...

كعدت تتمعمر بوجهي ... والصدك احس وجهي ارتاح وصار حلو وناعم ... قبل ما انام اتصل عدنان حجينه شويه وسديته ..
ثاني يوم من الصبح .. كعدت حضرت نفسي ..
وتريكنه اني وعمتي سوة

:ولله يما لو اكدر اكوم جان رحت وياج

:حبيبتي عمه ادري بيج متقصرين فدوة لكلبج ..

نطيتها علاجها ورحت بدلت لبست من فرح بنطرون ومانتو شوي فوك من الركبه .. وشعري لميته ذيل حصان ... وقررت اخلي شي لوجهي.. اخذت من جرار فرح قلم كحله ومسكاره .. خطيت عيني .. وخليت شوي حمره سحريه بس لون خفيف .. وتعطرت ... اتصل عدنان كال وصلت الباب طلعي ..
بسرعه سلمت على عمتي وطلعت.. لكيت عدنان واكف ومترجي على السيارة .. يمكن هي نفسها سيارة صديقة ..

:صباح الخير

رد علي بحب: صباح الحب .. شنو هاي شطالعة اليوم

استعرضت نفسي كدامه بغرور: شلوووني املخ مووو؟

:ناقصج شي واحد

:شنو ؟

:ناقصج بس جنحان وتصيرين فراشة..

: مممم خاف اطير منك بعد وين تلزمني

:اصير زبمور واطير وراج

ضحكت حيل على حجايته.. وصعدت بالسيارة بالصدر وهو صعد .. وشغل السيارة

:هذا هم سيارة صديقك

:اي هو كال اخذها عليمن مأجر تكسي






:يله أن شاء الله مستقبلا تشتري سيارة

:قريبا ناوي اشتري بقوة الله

مشينه متوجهين للمستشفى... من وصلنه نزلمه وهو شابك ايدي بين اديه... وكأنما يكول للناس اني صرت اله ..
دخلنه وبلشنه .بسحب الدم والتحاليل .. وكعدنه ننتضر النتيجة لحد 11 الضهر يله طلعت ..
كال مدام بعد وكت خل نروح للمحكمه احسن
وصدك توجهنا للمحكمة... وهم انتظار وإجراءات وهوسه المحكمة شبه فرغت من الناس يله وصلنه السرة ... ودخلنه عقدنة ...

طلعنه من المحكمة لازمين عقد زواجنة وأيدي بأيدة وكأنما طايرين ما نمشي على الكاع .. وأصر الا يدخلني مطعم يغديني ... طبعا المطعم جان شبه فارغ .. وهل شي ريحني أكثر ... طلبنه غدة وكعدنه نتغدى ونسولف ونضحك ... و نخطط للجاي من مستقبلنه ...
وبعد ما كملنه رجعني للبيت ... طول الطريق مشغل سيدي بالسيارة مخلي اغنيه ...ماجد المهندس..

بين ادية. واحس انك بعيد ..
ويردد بصوته ويه الاغنيه بصوت عالي
علم العشاااك كيف الحب يكون ... بلا حواجز احلى طعم الحب اكيد ...

يااابوية شوكت تدخلين لقفصي ..

:ههه ادخل لقفصك شنو اني طير من طيورك ..

:انتي احلى طير واجمل طير واعز طير على كلبي ...

:بس كون ما تنكلب عتوي عليه

حجيتها بقصد بس كون ما تتغير بعدين .. بس هو الضاهر مخة طفر لبعيد ... وطك من الضحك ... ويكلي

:اكيد انكلب عتوي ... انفش ريشاتج ريشة ريشة

:تررره انت كلش صاير مسربت تدري لو لا

:مسررربت نووووب ؟ شحجينه البارحة

:لا يعني اقصد صاير مستهتر

:انوووووب

:اهووووو كافي كافي اسكت احسن الي ... لأن بعدني مجاي اتعود انت زوجي ... بس اتعود اكوم احترمك وعد

:لا فدوة احترميني حبابه احترميني الله يخليج ...
انتي الضاهر الا اخليج بقفصي يله تتعودين اني زوجج ..
حتى كل ما تنسين اني زوجج اذكرج ..

درت وجهي منه بخجل ومبتسمة وهمست : حباية كون

سمعني ثأري : ب ط ...

فتحت عيوني على وسعهم على حجايته مصدومة
ومن صدمتي بقيت الطريق كله ساكته وهو يندن .. لحد ما وصلنا .. ونزلت واني بعدني فشلانه من حجايتة
وهو سلم وراح ...

مرن يومين الوضع طبيعي وماشي عدل .. خليت عمتي تخابر ابن حماها المحامي حتى يشوف موضوع العمارة ويمشي بي ... وطبعا ما تفوتني عيون ماجد الي صارت ما تنزل من سلوى كل ما يشوفها...

بلش المحامي يمشي بموضوع العمارة .. وورث ابوي ..
ورث عمتي هم ...
وشلت اله 500 من الفلوس وانطيتة مقدمة ...
خلال هذه الأيام .. طلبت من عدنان ياخذنه اني وسلوى نشوف امي ... وهو ابد ما قصر ..
اخذنه الها ... سلوى لطريق كله ترجف .. وعيونها مدمعة ما مصدكة راح نشوف امي .. رغم نعرف هي ما راح تعرفنه...
دخلنة ومثل المره السابقة.. عدنان كال راح انتضر بره ..

كنت أمشي بالممر الطويل، جدرانه بيض وباردة، مثل كلوب الناس اللي مرو من هنا ونسوا أهلهم. إيدي لازمة بإيد سلوى، حسّيت بيها ترتجف، ما أعرف من البرد لو من الخوف،
صوت خطانا كان يرن بالمكان، والممر ما يخلص، كأنه يريد يجرّب صبرنا. المستشفى هدوء .. بس بيه أنين خفيف، مثل نحيب مكتوم، يطل من كل غرفة نعديها.

سلوى جانت تباوع بكل زاويةزتسالني

:هنا امي كاعدة .. المكان بارد حيل

مشينه سوى ويانه مره ممرضة .. دخلتنه للغرفة ...
اني وسلوى وحده لزمت بالثانيه كلوبنه تدك سرريع حيل ..
مشينه داخل الغرفه عيونه تدور عليها ...

شفتها ... شفتها كاعدة نفس كعدتها .. بس هل مره شعرها طولان .. ومخليه شال عليه ..
اني و اختي وحده باوعت بوجه الثانيه ... دموعنه تنزل ...وركضنه بلهفه شمرنه نفسنه بحضنها ...
حسيت بيها ... ولله حسيت بيها رفعت أيدها وبادلتنه الحضن ...
وخرت من حضنها حتى اخلي عيوني بعيونها وأشوف عيونها شنو تكول...

بس هي رفعت كف أيدها وخلته على خدي ... عررررفتني والله عرفتني... ..

#الجزء_الاول_من_البارت_الاخيرررررر


-----------------

عررررفتني ...ولله أحسها عرفتني ...
ذيج جيتي ما بدر اي رد فعل منها نهائيا... بس هل مره بادلتنه الحظن .. خلت عينها بعيونه اني وسلوى ... رفعت كف ايديها الضعيف وباقي بس عظام ... خلته على خدي ..

يمكن شبهت عليه وجاي تحاول تسترجع ذاكرتها ... ما اعرف شنو بالضبط...

باوعت لسلوى الي عيونها صارن جبود حمرر من البجي .. واني مو اقل من حالها ... باوعنه لبعض مبتسمين ... وكلت لسلوى ...

:سلوووى امي يمكن عرفتنه ...

هزت راسها فرحانه توافقني الرأي ... اي ولله اني هم هيج حسيت ...
تربعت على السرير كدام امي وصرت احجي واشرلها ..

:ماما .. اني وسلوى بناتج ... ماما تعررفينه ...
حجيتها وخليت راسي على صدرها ... بس هل مره بقت منزله أيدها ..
رفعت راسي اباوع بعيونها .. كانت عيونها تحمل وجع سنين وتعب ما ينوصف ... عيونها تروح بيني وبين اختي ..
بس فجاء صفنت ... وبدر منها رد فعل غير متوقع .. كامت من السرير بسرعة وراحت كعدت على السرير البعيد .. ولمت نفسها .. خلت راسها بين رجليها وصارت تهز بنفسها ...

باوعت لسلوى ... وسألتني ..
:ليش هيج سوت ...

رديت بحيرة:ماعرف .. بس الي اعرفه هي شبهت علينه أو شبه عرفتنه وهذه بداية زينة ..
بعدها حاولنه نتقرب منها بس هي بسرعة خافت ولمت رجليها وحضنت نفسها .. مثل شخص يريد يضربو وخايف.. ما سمحت ألنه نتقرب..

رجعت المررضة .. من دخلت شافتها .. ركضت عليها ..
تصيح عليها وكانما تحجي وية شخص يسمعها ..
وتحاول تفك اديها من نفسها

:شبيييجج شبيج ... باوعت علينه وحجت : شبيها .. شنو سويتو لها

بسملة: ماسوينه شي ولله بس هي احس عرفتنه احنه بناتها وركضت كعدت هذه كعدتها

:لعد شنو هي ما جانت تعرفكم قبل ؟

:هي من تمرضت مثل الي فقدت الذاكرة وصارت ما تعرفنه بس هسه مثل الي عرفتنه ..






:احتمال دخلت بنوبنه هيجان أو عصبيه .. الافضل تطلعون واصلا وقت الزيارة خلص ..

:زين بس سؤال .. الدكتور الي يشرف على حالتها وينه

ردت عليه وهي تحاول تكوم امي وترجعها لسريرها
:دكتورة ايناس .. هي الي تشرف عليهم. ... موجودة بمكتبها اسألي بره يدلوج عليها ...

باوعنه عليها نضرة أخيرة.. وطلعنه .. بس طلعت منها واني كلي امل .. يمكن من فتحنه العمل بدت ترجع لوعيها .. ماعرف ..
بقيت أسأل على مكتب الدكتورة إيناس دلوني بي ..
ورحنه الها ... جان باب مكتبها مفتوح وهي كاعدة تحجي بالموبايل .. دكيت الباب بدون لا ادخل ..انتبهت النه ونهت المكالمة ..

:تفضلو ..؟

دخلت للمكتب اني وسلوى .. وبعد السلام كعدت وسألتها ..
:دكتورة اني ردت اسال عن وضع المريضة .. سمية

دكت بالقلم على المكتب :هااااا ... وشنو تقربولها انتو

:احنه بناتها

:زين ولله من اجة شخص يسأل عنها .. صار فتره كلش طويلة محد جاي وسائل عنها .. عموماً..
سمية بآخر فتره وضعها تحسن عن قبل .. بس صارت عدها حالة ... تلف جرجف وتخلي بحضنها وتدك عليها .. لوتطلع صدرها وتسوي مثل الي مخليه رضيع بحضنها تريد ترضعه.. وقتها عرفت انها ممكن تكون فاقدة طفل أو هيج شي .. صح لو لا؟

:دكتورة امي من تمرضت كان عندي ثنين اخوان تؤام بعدهم يرضعون كلش زغار .. بس عمامي جابوها هنا ومن وقتها هي ما شايفتهم ...

هزت راسها بتفهم ..: هسه عرفت سبب تصرفها .. من الواضح .. تذكرت أن عدها اطفال رضّع ..
اخر فتره صار تحسن ملحوظ بحالتها.. هي عرفتكم ؟

اي ... أول مرة من دخلنه عليها، واحتضناها ...أحس عرفتنه.
بس آني ما أعرف... هي عرفتنه فعلاً أو لا

:والدتچ حالتها معقدة... هي مصنفة ضمن الحالات الفصامية وتحديدًا عندها نوبات تفكك بالواقع.
يعني أوقات تتذكّر، وأوقات تنفصل كلياً عن الواقع والناس، حتى أقرب الناس إلها.

:يعني اليوم كانت تذكرنا، وباجر تنسانا؟

:ممكن... بس هذا مو شي سلبي تماما لأن ظهور أي تفاعل، حتى لو بسيط، هو دليل إن الدماغ ديحاول يرجع يتواصل.
لكن إحنا نحتاج وقت، وجلسات علاج نفسية منتظمة...
والأهم، وجودكم وياها، حتى لو هي ما وعت بشكل كافي، بس وجودكم يخلي عدها أمان.






:إحنا ما تركناها دكتورة... بس الدنيا والأهل والظروف كلها كانت ضدنا وبالذات احنه اطفال وما نمتلك قرار ولا شي وآني، والله، كلشي و لا أشوف أمي بهالحال.

:، والدتچ مريضة نفسياً، مو مجنونة... وهاي فرق كبير.
وأنتِ، من خلال دعمچ إلها، ده تسوين أكبر علاج ممكن تقدميه..

:أن شاء الله بعد ما اتركها ابد ... وراح اجيها باستمرار وبس أرتب وضعي ممكن اطلعها منا ..

شكرتها وطلعنه .. عدنان بره ومنتضرنه ..

: تأخرتو ؟

سولفتله كل الي صار واحنه نمشي واحنة نطلع خارج المستشفى...
رجعنه للبيت .. بشرت عمتي بالي صار وان امي شبه تعرفت علينه ..
ثاني يوم .. المحامي ابن حما عمتي اجة لبيت عمتي .. كعدت حجيت وياه .. بخصوص موضوع العمارة .. كال

: بس سويلي وكال واني امشيلج بالقضية ..كلها بس اذا رادوج بالمحكمة تعالي ..

ارتاحيت من هوسه المعاملات والروحة والرجعة .. وفعلاً ثاني يوم .. عدنان بسبب دوامة ما كدر يجي .. وكوة قبل ماجد هو يروح ويانه..
رحنه لكاتب العدل سويت وكالة للمحامي ... وسلمته كل الاوراق .. حتى يبلش يمشي باول خطوة ..

وهي خطوة رفع قضية استرداد عقار وتعويض عن الإيرادات السابقة طول فترة استيلاء عمي على العمارة واستفادته منها ...

وهذا كان أول ضربه لصالح .... رفع المحامي القضية ..
وبلش بكل الإجراءات...
وبعد رفع القضية بأسبوع وصل تبليغ لصالح ...

ما انكر بيومها جنت كلش متوترة ... ومرتبكه وخفت يسوي مشكلة مثل موضوع الوصية ... وكالعادة من اكون متوترة.. وخايفه من شي اتصل بعدنان ..
دكيت عليه دك ورفضة ورجع اتصل هو ..

:ها بسمتي..

:اووف متوترة احس معدتي مخبوطة خبط

:منين خايفة .. مايكدر يسوي شي

:لا عدنان صالح مايعديها ..

: اذا سوة اي تصرف راح يعم على روحه مو عليج ..
متشوق اشوف وجها هسه شلون شايط ..

: ماعرف ولله .. لله يعيدها على خير ..
شجاي تسوي

: يمعودة مخبوص خبص ابوي ... مدري شجاه يريد خلال هل ايام يرجع






:صدددك تحجي ..

:اي ولله .. يكول البيت موجود واثاثه موجودة.. وهاي اني مخبوص باقي اغسل بالبيت حتى ما اروح للبيت ..
يجيبون بس ملابسهم و اغراضهم المهمه ..

:الف الحمدلله أخيراً..

:يله حبيبتي اني مضطر اروح هسه .. اي جديد بلغيني بي

:الله وياك ..

انتضرت كلت بأي دقيقه صالح يدفر الباب ويدخل يرعد .. بس خلص اليوم وكلشي ما صار ..
المحامي يكول حددوا موعد الجلسه بعد عشر ايام ..
والتبليغ وصل لصالح ...

وبيوم كاعدين بالبيت عصرية .. نسولف وناكل كليجة وچاي .. ندك.الباب .. طلعت سمر فتحته ..
تفاجئنه من دخلت سمر كالت لعمتي .. خالو صالح بالباب ..
بسرعه معدتي خبطت من التوتر .. سيطرت على نفسي .. شلنه الصينيه بسرعه للمطبخ وهو دخل للصالة .. سلم بهدوء ...
ردت عمتي بثكل كلش عليه

:خيرر صالح شرايد ... هم جايبلك طلابه جديدة لو تهيمة جديد لذول اليتامة .. لو خاف اخوك ما خلص عليه انت جاي تخلص..

رد بكل هدوء : لا ...اني ما جاي اتعارك جاي اتفاهم ويه بت اخوج واروح ..

:شرايد منها عوف الابنيه بحالها وكافي

:خلي هي أول مره تعوفنه بحالنه ... وتحط حد لتصرفاتها

:وهي شمممسويه شموووسية

:تفتر بالمحاكم وتوكل محامي وتودي تبيلغ ... وكلشي ما مسوية .. بت بكد النعال تريد تصير مسؤولة على عمارة شكدها وشكبرها وتتعامل ويه تجااار نلبسسسس كرون ونكعد ... بسممملة وينج طلعي احاجيج

قويت نفسي وطلعت اله ... تكتفت وكفت كدامه .. فوراً حجه ..

: انتي شنوو تردين بالضبط فهميني ..

حچيت بثقة :اريد حقنه .. حق ابوي وحقي اني واخواني ..

:اي حق هذا الي تحجين عنه ...ولج انتي شفهمج بسوالف الفلوس والعقارات .. شنوو تردين ترحين كل رأس شهر تفترين على المؤجرين تلمين ايجارات .. عبالج هيج السالفة سهلة تلعبين بكيفك انتي ..

كملت بثقه: زوجي موجود وهو يسوي كل ذني

عفط حيل باستهزاء: زوجج ... هذا المطيرجي الي ضحك على عقلج كال هاي وراها جم فلس خلي انام برأسها ...






: ينام براسي يصرف فلوسي .. هاي تبقى بيني وبينه ..

نطت عيونه بشرار وكام حجه بوجهي
: واذا كتلج الف دينار مال الج يمي ؟

:المحكمه موجودة وهي تعرف شلون تطلع حقنه ..

:ولجج لا انتي ولا الاكبر منج يكدر يأخذ مني شي غصب فهمتي لوووو لا ...

:لااااااا ما فهمت وحقنه يرجع النه براضتك لو بعدمها ... الدنيا ما تايها تره ... واني وياك وجاي أكلك حقنه رااااح يرجع ...

حاول يهدء نفسه فرك وجها
: لحد هاي اللحظة جاي اكول جاهل وساكتلج واحاول اتفاهم وياج ... من الاخير ..
شكد تردين وتسحبين القضية وتصمين حلكج وتسكتين ...

خليت عيني بعينه ورديت: شكد اريد؟ شكد اريد ؟ يعني تدفعه..

:خلصصيني شكد تردين

:اريد العمارة ...واريد ايجارتها من وقت ما تسجلت بإسم ابوي لحد اخر شهر .. واريد ورث ابوي وحصته بالمحلات والبيوت ... شكد يطلعن بعد ما اعرف المحكمه هي الي تقررر..

: انتي من كللللل عقلج اخلي بيدج كل هاي الفلوس باحلامج ولج لووو تموتين

رديت ببرود : عمو اني جاي أكلك ما اريدك تخلي بيدي كل هذا الفلوس .. المحكمه هي الي راح تخليهن .. بيدي

درت وجهي اريد اروح بسرعه لزمني من شعري صرخت بي
: لااا تنسى اكو قضية ضدك... واذا نمست شعره مني لو.من اي احد مساندني هذا راح يصير ضدك وتعم على نفسك .. لو حجارة تضربني انت المسؤول كدام المحكمه ... ترووووح تونس اخوك ...

حجيتها بلا اي خوف وهو فعلاً من كلامي خرط ..

: اسمعي ... تطلكين من ذاك المطيرجي السا*ط ... وترجعين انتي واخوانج لبيت جدكم تكعدون معززين مكرمين ... وكل شهر اخصصلج راتب مبلغ محترم يكفيكم ويزيد .. شرايدة بعد ؟ ...

ضحكت من كل كلبي ولله هل بشر عجيب فعلاً القوى هي الي تخلي يمشي عدل ...

: ولله فات وكت هذا الكلام .. يا عمي العزيز.. لو من الاول مسوي هيج ويانه ومحتوينه ومخلين الله بين عيونكم .. جان كل هذا ما صار .. بس ساعات البشر بيدة يودي نفسه للتهلكه... كل هذا تمردي وصلافتي وياكم .. هاي صنع اديكم .. الوجع والعوز والقهر والحرمان ربوني .. شنو تريد.اكون بالاخير... اكيد راح اكون مثل هسه .. واكفه بوجهك طفله شافتكم شلون تضربون ابوها وتسحلونه وتهينونه بس لان فقير ومن أهل الله .. شفت ابوي شانق نفسه كدام عيني .. شفتكم شلون حابسبنه ورابطي .. شفتك شلووون تعتدي على امي وهي نايمه بنصنه .. وشلون تذلها بينه ...
كملت كلامي بغصة .. حتى بعد ما تمرضت ونحبست بالمخزن .. جنت اشوفك وانت تدخل تسوي بيها الي تسوي وهي لاحول ولا قوة .. كل هذاااا بعييييني شفته ...
.. واحب أكلك عرضك مرفوض ...
وخلي أكلك شي اخير ... اذا فكرت مجرد تفكير تاذيني لو تسوي شي يضرني... فأنت راح تضر نفسك اولا .. وصدك .. تره انت تكدر توكل محامي .. من حقك ..






تركته ودخلت الغرفه .. واسمعه بره يتحاجه ويه عمتي وهي تردة
: كله من ايدكم ... شعبالكم تستغلون صابر وسميه الفقرة ومحد يطلع وراهم ... هاك شوف بعينك ربك جابها مخصوص حتى تطلع حق أهلها ... نصيحه خويه ... كافي طمع.. هل طمع هذا راح ينهينك ولله ...

تركها وطلع ركع باب الحوش وطلع شايط ...
بقيت بمكاني ... كاعدة ما طلعت ... جاي يضحك عليه بكم فلس حسباله مثل قبل اسكت واتقشمر بتفاليس ..

مرت الايام... وصار موعد اول جلسه .... اني ما رحت ولا وصلت المحامي هو الي حضر.. وصلي كلشي اول بأول ..
صالح اضطر يحضر الجلسه ..
قصص وروايات عراقية كرار صلاح وجايب وياه محامي ...
ومحاول قدر المستطاع يبين أن هو ما كان مستولي على العمارة ...وكان وصي علينه .. بس المحامي مالتي جان كلش شاطر ... منين ما صالح يطلع صفح المحامي يثبت العكس ويطلعله بزاغور جديد ..

انتهت الجلسه الاولى بلا حكم .. بس كلشي بيها جان ضد صالح ...
المحامي مالتي بعد ما اخذ عنوان العمارة ... رايح ومتفاهم ويه بعض المؤجرين ... ومتأكد منهم أن كل شهر الإيجارات جاي تتحول بحساب صالح .. وهو الي مأجر الهم .. ومفهمهم أن العمارة هي ملكة .. وقبل أيام جاي يطلب منهم يخلون العمارة لأن يريد يرممها ...

بوقتها اني استغربت ليش صالح طالب من المؤجرين إخلاء العمارة .. وشنو يريد يرممها وهو يعرف عليه قضيه ..

عدنان: مو بعيدة يريد يفرغها من المؤجرين حتى يسوي بيها شي ..

:يسوي شي شنو يسوي مثلا يفلشها

:لا مستحيل ما يكدر ... بس مو بعيدة يودي جماعه يحركوها .. يسوي بيها حريق .. وشكلك تماس كهربائي

:معقووول تحجي صدك

:الي مثل صالح كلشي توقعي منه ... صارله سنين مستفاد منها .. ومن شاف الجلسه كلشي ضدة عرف راح يفلس منها ...اكيد ما راح يسملها الج ويفرح كلبج بيها ... والا شنو تفسرين.. طلبه من المؤجرين إخلاء العمارة بعد أول جلسة ..

:اي ولله كلامك صحيح ... زين شلون خاف يسويها صدك ...

:قبل ما يتعشى بيج تغدي بي ... وخلي المحامي يستغل هل فرصه لصالحة.. ويكول اي ضرر يوكع على العمارة خلال هل فتره صالح هو المسؤول عنه ..

:ولله تفيد تصير محامي.. مثل الطماطه بكلشي ترهم ..

:بالخدمة بسمة عمري ... كم بسمة عندي اني ..






:وانتو شنو يمتى تجون بسلامة لملمتو اغراضكم

:عكب باجر .. لمينه كلشي.. بس الاثاث ما نجيبه.. بس الخفايف .. والبيت اني غسلته ورتبت كلشي ..

:الله يسهل حبيبي ..

:حتى بعد نلتفت لنفسنه .. نشتري غرفه ونجهز ..

:عدنان اني اتفقت وياك ... اكمل من هل قضية وندل طريقي ساعتها نتزوج ..

:اي يا عيوني قابل تجهيزات تخلص بين يوم وليله هم تاخذلها وقت طويل .. غرفتنة اوصي نجار يشتغلها.. قابل اجيبلج غرفه سوكيه شلون ماكان وبالذات الجربايه اريدها تكما وتتحمل ..

:ههههههههه هو انت هذا كل همك ... شكد فاسد

:متفسد.على غريبه .. مرتي واتفسد يمها .. وبعدين انتي شبيج فوراً هيج تفكرين .. يمكن عاجبني اكمز عليها .. وما اريدها تنكسر..

:صدك عمي عرض عليه خوش عرض يمكن راح اقبل بي

:شنوو

:كالي اطلكي من المطيرجي واسويلج راتب شهري.. هههههههههههه

: اكلج لسانج محتاجته بشي

:لا ليش ..
: حتى اكصه واخلص ... تكلي لا الثوله

:اخخخ ولك كنوز الدنيا كلها .. ما ابدلك بيها ...
الكون بجهه وانت واخواني بجهه

:ممممم زين اني لو اخوانج

:اخواني طبعاً

:صدك تحجين

:اي طبعا ... وانت مفروض اصلا ما تسال هيج سؤال .. انت سؤالك مثل الي يخيرونه ياعين من عيونك اعز من الثانيه .. وثنين عيوني ماكدر افارك وحده بيهم .. بس اذا اضطر الأمر ننجبر نتخلى عن وحده بيهم حتى نحافظ على الثانية ...

مر كم يوم .. وبيت ابو خالد رجعو لبيتهم بخير وسلامة ... وهل خبر صدك طيرني من الفرح ... المحامي بلغته بكلام عدنان كالي أساساً اني جنت محسب حساب لهذا الموضوع .. عمتي الحمدلله رجعت شوي بحيلها .. وقوتها .. صح مرات يصير عدها الم .. بس احسن بهواي ..
واجه موعد الجلسة الثانية .. الي راح يقررون بيها ...
جنت بيومها كاعدة على نار ...
معقول الجلسه تنتهي لصالحه .. معقول ما احصل شي ..
والف فكرة وفكرة اجت براسي ... بيومها تمنيت اروح وأشوف وجه صالح .. وهو مهزوم واتشمت بيه
بس عمتي وعدنان رفضو اروح وكالو اتجفي الشرر وكعدي ..
من كد توتري حتى ماكدرت اكعد بس افتر ..
ومنتضرة الجهاز يدك ... صارت صلاة الضهر ..
كعدت صليت ... ودعيت من ربي ما يفشلني وينصرني ..






ب12وربع دك موبايل عمتي ... جانت مشغولة جاوبت اني بمكانها.. بلهفه

:الوووو بشر استاذ شصااااير

:مبررروك العمارة ...وصارت الج ... وانتهت القضيه لصالحنه

من فرحتي عطتتت كل قوتي اجت عمتي وسلوى وفرح يركضن خايفات بس من شافني فرحانه ..

:عمممممة عمة العمارة رجعتتتت النه

:بالخير الفففف مبروك

اجاني صوت المحامي يكمل كلامة ... دسمعني يمعودة حتى تكمل الفرحة ..
خليته بفر بأذانه الله وكليج وبعده ما لحك يصحى من الصدمة الأولى جبته بالثانية ... دعوى رد المبالغ المستوفاة بدون وجه حق ... شكو فلس اخذة من العمارة من يوم ما تسجلت باسم ابوج لحد اليوم .. كل هذا الفلوس راح ترجع الكم ... والقاضي وكل خبير مالي يحسب الإيرادات خلال هذه السنوات كلها ...
عمج هنا نصرع وصار يشيل روحه ويدكها بالكاع ضربتين على الرأس توجع ...

وان شاء الله باجر .. أتوجه لدائرة التنفيذ .. حساب عمج ينحجز وما يكدر يتصرف بأي فلس من فلوسه قبل ما يرجع المبلغ .. واذا رفض حتى سجن ينسجن
الحمدلله حاليا أصدرو القرار ..
عمج مايكدر بعد يتصرف بكد الشعر بأي شي يخص العمارة واني بنفسي اروح وأبلغ كل المؤجرين بهذا القرار ..

:الف الحمدلله يارب الف الحمدلله

حضنت سلوى واخواني بفرحه عاااارمة أن حقنه رجع
وركضت اتصلت بعدنان ابشرة... وفرحته ما جانت أقل من فرحتي ... بيومها عمتي سوت عشى لوجه الله وعزمت ابن حماها هو الولد المحامي ...

:استاذ ما اعرف شلون اشكرك ...

:هذا واجبي اختي ...

:زين بعد هذا القرار خاف صالح يتعرضلي لو يسويلي شي

:مايكدر .. عليه دعوة واي تصرف منه يعتبر جريمة ..
القرار صدر واي تحكم بالعمارة مايكدر يتحكم ...وحتى فلوسه الي بحسابه مايكدر يتصرف بيهن ..
بس اني انصحج أن تسوين حساب باسمج .. تتحول بي الفلوس .. وإيجارات كل شهر .. اسهل بدل الفرة على المؤجرين...

:اي تمام بس شلون اسوي

:يكون حساب تجاري ... حتى المؤجرين فوراً يحولون الايجار لحسابج .. لكن .. لاتنسين هذه الفلوس مو فلوسج وبس هذا فلوس اخوانج هم وانتي وصية عليهم ..






:اي اكيد طبعاً

نمت ليلتها فرحتي ما تنوصف .. اني جنت كلشي ما افهم بسوالف الحسابات والصرف وهذه الأمور كلها .. بس الولد الله يحفظة ما قصر .. بقى وياي خطوة بخطوة..
وراح ويانه اني وعمتي .. علمود نسوي حساب
يكولي سوي هيج وسوي هيج .. وابصمي ووقعي وأملي هذه الاستمارة .. وهذا رقم الحساب .. لحد ما كملت الحساب .. وخليت بي بالبدايه مبلغ 50الف

وصالح بعد استسلم للأمر الواقع وماكدر يسوي اي شي لان المحامي حاصرة من كل الجهات ...
وراح المحامي.. وكمل اجرائات استرداد المبالغ .. ونحجز حساب صالح وكل فلوسه.. وغصبا ما علي استسلم ..

المحاسب الي وكتله المحكمة حتى يحسب الإيرادات خلال هذه الفترة كلها ... حسب عدد المكاتب المؤجرة بالعمارة وشكد ايجار كل مكتب وكل مخزن .. وحسب من سنه 88 خلال هذه السنوات كلها
طلع المبلغ الكلي كحد أدنى .. 410 مليون ... بس صالح ماكان بحسابه كل هذا المبلغ فحولو كل الي بحسابه لحسابي ومابقى بحسابه ربع دينار..

تمنيت امنيه حياتي بس اشوف وجه صالح وجبرية .. بس عمتي .. مجلبه بيه ما تخليني ..
بس ما فاتتني الفرحه ابد... من اتصل بيه عدنان وبشرني
صالح مجلوط وناقلي للمستشفى...

: هههه حقه ينجلط .. اني اذا يضيعلي الف دينار انقهر عليه مو 410 مليون وعمارة هي وايجاراتها ...