: سمعنه هوسه ابيتهم.. طلعت بالشارع .. طلعو صالح كوة يمشي وساندي مهدي وجبريه .. وأخذو بالسيارة ...
للعصر شفت عمران بالباب سألته .. كالو عمو صالح يكولون صايره بيه جلطه .. ومنومي بالمستشفى..

:عساهم بابو زايد أن شاء الله... ابوي انتحر بسببهم كل الي يصير بيهم من اديهم... شعبالهم تدوم الهم لا ولله ابد

:وهسه بعد شنو ناوية تسوين

:ناوية بس تعبر فتره بسيطة هم أطالب بورث ابوي وحصته ..

:خوش بنيه تعلمتي طريق المحاكم بعد

:عدنان هذا حق أهلي.. خل أكلك شي ولله لا تتوقع الموضوع موضوع فلوس وبس .. اذا على الورث يرجع .. بس الدم شنو يرجعة .. ابوي الي خسرته بسبب طمعم شنو يرجعه امي الي نجنت بسببهم شنو يرجع عقلها ..
اني الي اريدة بس اشوفهم مقهورين ومذلولين ..
واني جاي تشوف لا اروح ولا اوصل المحكمه المحامي هو يمشي بكلشي ..






:شكد اخذ المحامي بعد هذا الفرة كلها

:انطيته مليونين .. والصدك يستاهل اكثر

:خوش محامي الله يحفظه

:اريدك تجي وياي باجر اخذ سلوى .. للطبيب

:تمام .. من عيوني ..

:تسلم عيونك ..

بت حمى عمتي اخت المحامي معاونه طبيب ونصحتني بطيب قلبيه كلش زين بالحارثية .. حجزنه يما لسلوى ..
لأن تركتها بما فيه الكفاية ولازم التفت لحالها بعد ...
ثاني اجاني عدنان اخذنه سلوى ورحنه ...

:أخاف .. يطلع بيه مرض قوي بكلبي

:حبيبتي انتي مؤمنه ... خلي ايمانج قوي بربج وادعي يطلع شي مو كلش صعب .. كل الموضوع انتي حالتج مهموله بسبب وضعنه بس هسه الحمدلله تغير الوضع .. واني بعد مستحيل اتركج .. حتى لو احتاج الموضوع سفر ولله العضيم اسفرج وتتعالجين .. خليج قوية ..

اباوع الها وجها اصفر مرتبكة .. واني مو اقل منها بس احاول اقويها .. وصلنه الحارثية .. كانت هي اشهر المناطق الطبيبه ببغداد .. وتوجنها لعيادة الدكتور الي حاجزين يما .. كنه حاجزين قبل يوم .. وحصلنه رقم 3 ..
بس طلع الشخص الي كان يم الدكتور .. السكرتير كال دخلو ..

دخلنه بس اني وسلوى .. وبقى يسأل بسلوى عن شنو تحس وشنو الأعراض ... واني هم جاوبته على كم سؤال .. كتب النه فحوصات ايكو .. واشعة صدر..
وتخطيط.. وتحاليل دم شاملة ..
اخذت منه اوراق الفحص وطلعنه ... بقينه نفتر نكمل الفحوصات وكل فحص ننتضر فتره يله يطلع ... لحد ما صارت الدنيا مغرب يله كملنه .. ورجعت للدكتور ..
وشاف الفحوصات .. وشخص حالتها ..

: تعاني من ثقب قلبي متوسط الحجم .. فتحة بالجدار الفاصل بين الأذين الأيمن والأيسر..
طبعا هذا نوع من أنواع الثقب هو بسيط .. لكن مهمل ..
وعلاجة أيضا بسيط نكدر نعالجة بالقسطرة بلا تدخل جراحي ..

حجيت بفرحة:دكتور يعني وضعها مو صعب كلش

:لا لا ان شاء الله موصعب .. بس اي مرض شكد ماكان بسيط اذا ينهمل يصعب .. بس حالت سلوى .. مو صعبه أن شاء الله بالقسطرة نغلق الثقب .. وتكدر خلال يومين تطلع من المستشفى وترتاح وتمارس حياتها بشكل طبيعي ..

لزمت ايد سلوى الي من الفرحه صارت تبجي ..
:الف الحمدلله ياربي ... زين دكتور شوكت تكدر تسوي الها عملية القسطرة ..






:الفحوصات الي كدامي تشير أن ماكو مشكله تمنع العملية .. اكدر احدد موعد الكم بعد تلث ايام الى اسبوع ..
وبيوم العملية قبل القسطره نعيد التحاليل .. واذا كلشي تمام نبلش فوراً..

:بعد تلث ايام ماكو اي مشكلة..

اتفقنه على موعد العملية بعد تلث ايام .. وطلعنه .. سلوى وجها صار اصفر من سمعت عملية وقصرة ..

عدنان: ها بشرو

:بعد تلث ايام راح يسوي قسطرة الحمدلله وضعها مو كلش صعب ..

:اي الحمدلله... سلاوي ... صيري سباعيه شبيج مصوفرة

:خايفه اموووت

بسملة:شبيج سلوى .. لاتخافين عمري .. ما سمعتي شنو كال الدكتور كال وضعج مو صعب .. والقسطرة مو عمليه جراحيه ولا فتح قلب .. مجرد عمليه صغرى وبسرعة تخلص ..

: مادري يمعودة.. خايفة

:يله عاد كااافي جبن. وخوف صيري سباعية لا اطيح حضج ..

عدنان: اكلج بدل ما تهديها ترزليها شبيج وياها

:متشوفها شلون خوافه ..

:اي حقها تخاف ... بطلي ترعدين .. تعالي سلوى امشي بصفي ماعليج بهاي الخبله ..

: لاتكول على اختي خبله بسملة وردة

:ولله اني هم صوجي ادافعلج

بسملة: شوف شلون بثواني باعتك ..

هز ايدى يضحك .. وكفلنه سيارة .. صعدنه بيها ورجعنه للبيت بالطريق خليت عدنان وكف .. نزلت وياه اشتريت لفات هبمركر للبيت كله .. وحلويات لاخواني .. ورجعنه

:خلال هل فتره محمد مرة وحده تواصلت وياه .. سولفلي على صالح .. وضعه الصحي شوي تعبان .. وصادق نحكم 15سنه ومحمد اضطر يلزم المحل بدال ابو ...

بقينه نحضر .. لعملية سلوى .. رغم هي قسطرة بسيطة .. بس كلش جنت خايفة عليها ...
اريدها تطيب وتمارس حياتها بشكل طبيعي ...
بعد تلث ايام .. لمينه اغراضها لأن تبقى يومين لو تلاثة نايمة بالمستشفى.. ومن الصبح توكلنه للمستشفى.. عمتي وماجد.. جان ويانه وعدنان بسبب دوامة ماكدر ..
الخوف على اختي جان تارس كلبي ترس .. بس احاول اطمنها .. وابرد عليها ... المستشفى جان حكومي بس حجزنه الها بالخاص وغرفة خاصة .. والعملية هم على حسابنه ... ومن بعد ما جيكو وضعها وسولها تحاليل وفحوصات... صارت جاهزة سلوى حتى تدخل ...

حجيت واني ابوس بكصتها
: راح ابقى واكفه انتضرج هنا .. اريدج تصيرين قوية حبيبتي ... وعديني ما تخافين

لزمت ايدي حيل وباستها
: راح اطلع واني كلشي مابيه .. حتى احضر عرسج ..

:يروووحي انتي ...

بقيت ابوس بكصتها ... وابجي حجت عمتي
:كولن ياالله.. وين مودينها كلها ساعة وتطلع بخير وسلامة لاتكلبنها مسلسل حزين .. يله حبايب .. كافي بجي
وانتي سلوى .. شدي حيلج ... تره اكو وحيد منتضرج على نار بس عود يكابر

حجتها وباوعت لماجد الي توتر وبقى يحك بكصتة ..
اخذو سلوى .. ودخلوها للعمليات تاركتني وراها كلبي يريد يطفر من مكانه ويدخل وياها ..

-----------------

يتبع ..

﷽ ♡.

#ميراث_الدم
#البارت_الأخيررررر
بقلمي#يمامة ..

متابعة ممتعه للجميع تفاعلكم للبارت تصويت وتعليق بين الفقرات متابعة الحساب فضلا

--------------------

دخلت سلوى للعمليات .. تاركتني وراها ... أعصر بادية بتوتر وقلق .. شكد ما طمنه الدكتور .. أن العملية سهله مو جراحية ولا فتح صدر .. مجرد قسطرة لإغلاق الثقب .. بس خايفه لأن اعرف سلوى هسه شكد خايفة... سلوى ضعيفة وتخاف بسرعة .. واعرفها هسه قلقة أكثر مني ...

كعدت على كرسي ومن توتري اهز برجلي بشكل سريع ..
وعمتي كاعدة كدامي وماجد بصفها .. اباوعله نفس حركتي يهز برجلة.. وكل شوي وكال

:شو تأخروا مو كالو بس قسطرة

:ولك يمة هاي عملية قلب قلب .. قابل جرح ويخيطو.. غير لازم شغل دقيق.. شبيكم انت وهاي ولله وترتوني ..

باوعت الها وحجيت
: عمة شلون ما نتوتر .. اخاف على اختي
شكد عندي عشرة هي بس هل وحدة ..

:ميخالف امي دعولها .. هسه شوي وتطلع بسلامة ..

اتصل عدنان بيه .. طلعت موبايلي.. الجديد الي اشتراه الي هدية .. كان موديله .. دبدوب ومخلي بيه مداليه حروف اسامينه .. رحت مسافه عن عمتي
وجاوبته ..

:ها عدنان

:ها بسمتي طلعت سلوى

:لا بعدها ..وكلش قلقة

:ماكو شي أن شاء الله.. اطمئني كلبي

:أن شاء الله ماكو شي ..
احجي وياه وشفت الدكتور طلع حجيت بسرعه
:عدنان طلع الدكتور خل اروح باي ..

سديته وركضت للدكتور وكفت يما يحجي ويجاوب عمتي
:الحمدلله كملنه القسطره.. وضعها حاليا مستقر.. شوي وتطلع ترتاح ..

:الف الحمدلله والشكر يا اللهي ..

ارتاحيت بعد خروج الدكتور شوي وطلعوها .. للغرفه مالتها ..
جان بيها ديلاب .. وسرير وقنفه
مخليه اغراضها بالديلاب وهي خلوها على السرير ..
تقربت يمها .. ابوس بجبيتها مرتاحه ...
رفعت أيدها وصرت ابوس بيها ..

:حبيبتي .. سلوتي يروحي .. الف الحمدلله على سلامتج

اجت عمتي يمي خلت أيدها على ضهري وحجت بحنان
: ربي يكومها بالسلامة .. هانت وكلشي خلص..

هزيت راسي مبتسمة ومدمعة وعيني عليها نايمة .. رغم هي ما كانت مبنجة .. البنج كان موضعي






تقريبا كل ساعة تمر يجي الدكتور يتابع حالتها يقيس ضغط الدم .. وقيس الحرارة .. والأكسجين .. كال لازم ترتاح لمدة 6 ساعات ..
وحاولو تنتبهون عليها .. لاتحرك رجلها ابدا.. لأن القسطرة من الفخذ .. مر الوقت وسلوى فتحت عيونها .. عيون ماجد تباوع الها بلهفه .. وخوف ..

سلوى:بسمة ...
ركضت الها بلهفه : ها حبيبتي يوجعج شي .. شنو تحسين

:خلصت يعني .. هاي هي ..

:اي يروحي خلصتي.. وان شاء الله فتره كلش بسيطة وتكدرين تمارسين حياتج .. حالج حالنه ..

:الحمدلله والشكر لله... كلش خفت بسمة

:يولي الخوف بعد... لتخافين من شي حبيبتي ..
ارتاحي يعمري لا تحجين هواي .. ارتاحي ..

مر اليوم كله .. والطبيب ما تركها نهائيا .. وعمتي ما قبلت تروح للبيت ولا توصل .. باتت ويانه بس ماجد راح ..
وثاني يوم رجع .. وعايف شغله وعملة وكاعد ..
مر يومين بالمستشفى.. عدنان باليوم يتصل فوك الخمس مرات ... ماتركني ابد .. واني مدارية سلوى ..
والدكتور متابع حالتها ... لحد ما سمح النه بالخروج ..
بس طلب لازم تنام .. وترتاح أكثر وقت ممكن .. تبتعد عن الماي الحار كلش .. وكل أسبوعين مراجعة لمدة ست اشهر ..
طلعنة من المستفى واختي تمشي وياي على طولها ..
والدنيا ما واسعتني من السعادة ..

وهم لكينه فرح محظرة فراش لسلوى .. ترتاح بيه ..
دخلناها للغرفة على فراشها.. وضعها كلش مستقر بس مجرد تعب من القسطرة وتحتاج راحة ..

اسبوع مر واني تاركة كلشي وبس مكابلتها وكاعدة ..
لحد ما اتصل عدنان كال فد شوي العصر نجيكم اني وامي تريد تتحمد لسلوى بالسلامة .. العصر اجت ..
تاكبلن هي وعمتي صارن حبايب ويثردن سوالف ..

ام خالد: بسمة .. حبيبتي مو طولت سالفتكم انتي وعدنان شوكت ناوين بسلامة حقج ورجع وسلوى سوت العملية نريد نفرح بيكم عاد ...

حجت عمتي : ولله ودي اليوم قبل باجر نفرح بيهم .. وبعد ماعدها كل عذر يمنع ..

حمحمت وحجيت: صح خاله اني هسه ماعندي شي يمنع الزواج بسسس
سحبت نفس وكملت:اخواني

ام خالد:شبيهم اخوانج

: خاله يعني اني من اتزوج اخواني وياي يبقون ؟ لأن اني مستحيل اكدر ابتعد عنهم .. وبنفس الوقت اني هم ماريد اثقل عليكم .. محتارة..

:شوفي امي .. من يومنه نعرف اخوانج شنو بالسنبه الج .. ونعرف ماتكدرين بعيد عنهم وهم نفس الشي ... وبيتنه واسع وفوك غرفتين وحده راح تصير الج والثانيه لاخوانج .. وهاجر كلها ايام وتتزوج ..






:زين واذا خالد رجع .. شلون

:وقتها يحلها حلال يا كلبي ..

:يعني ما اعرف شلون أشكرج .. احد غيركم مستحيل يتقبل يجيب چنه وياها تلث نفرات

حجت عمتي :نفرين مو تلاثة

فهمت قصدها .. صار فتره تلمح على سلوى ..
بعد مااكدر اعترض لو تأجيل لأن صار هواي أجل الزواج .. وعدنان شكد ما هو متفهم وضعي.. بس هم اكل كلبي ..

وراها بأسبوع اخذنة سلوى للدكتور يجيك وضعها والف الحمدلله وضعها كلش زين ...
وبلشت مرحلتي بتجهيزات العرس .. رحنه اول شي اشترينه الذهب .. وحاولت كد ما اكدر ما اخذ ثكيل .. لأن ما اريد اثكل على عدنان .. واعرف وراه مصاريف زواج هواي ..
وحتى ملابس اشتريت نصهن من فلوسي والفلوس الي انطاهن الي ضميت قسم منهم .. وكلت احتاجة بغير شي .. جنت كاعدة اشوف شنو احتاج بعد وشنو ناقصني .. تذكرت علاج سلوى بالمطبخ ولازم تاخذة..
كمت اجيبه الها .. لكيت ماجد واكف على الطباخ منتضر القوي يحمة .. مديت ايدي فوك الثلاجة اسحب علاكة العلاج ..

ماجد:بسملة ؟

:ها

:الدكتور .. طمنكم على وضع سلوى بعد ؟

:اي الحمدلله القسطرة ناجحة وضعها زين .. بس لمدة ست اشهر لازم كل اسبوعين يجيك وضعها .. وبعدها تخلص

:يعني ... هي بعد تكدر تتزوج وتخلف ما عليها خطر ؟

:اي هي تكدر .. بس الدكتور كال اذا صار والمستقبل مثلا تزوجت .. وحبت تخلف لازم تحت إشراف طبي تبقى طول الفتره .. وبجميع الأحوال هذا الموضوع بالوقت الحالي مو مناسب ابد..

هز رأسه ساكت .. تركته ورجعت الغرفه.. اعرف بماجد من يوم ما سلوى تحجبت هو بدأ ينجذب الها ... ومحاجي عمتي عليها ..
مرت الايام طبيعية .. بين تجهيزاتي للزواج وبين تجهيزات عدنان وبين اهتمامي بأخواني .. شكد عمتي توسلت في سبيل من اتزوج اترك اخواني يمها بس رفضت لأن مستحيل اكدر اعيش بعيدة عنهم ولاهم يكدرون ..
سلوى رجعت تتحرك طبيعي وحتى أحسها منشنشه وراجع الدم بوجها ...
صار موعد زواج هاجر .. نهاية شهر 11 يوم 28 .. عزمتنه أم خالد على حنتها ..
عجبني هل مره اكشخ على اخر حبايه واكشخ خواني وياي ... اريد يبين علينه احنه ولد خير .. مو مثل قبل عايشين بنص خيرنه.. بس بسبب الظلم والعوز ما مبين علينه ابد ...
اخذت عمتي وفرح ورحت للسوك ..
دخلت لمحل راقي مال ملابس .. وبعد البحث بالملابس.. لكيت فستان .. متت عليه .. جان سادة مابي هوسه ولا شغل هواي بس احمر .. وقماشته شوي ثخينة ..
اشتريته الي .. واشتريت لسلوى رادت نفنوف محجباب وكالت على ذوقج أخذته الها لون تركوازي فاتح بي تشجيرة كلش ناعمة .. وياه شال سادة يناسبه .. اخذت لاخواني ملابس مرتبه .. واشتريت لسمر وفرح وياي رغم رفض عمتي .. وكالت لا تصيرين تبذرين.. بس اني كل الي اريدة هو اعوض اخواني واعوض نفسي عن الحرمان الي عشناه ..
اخذت احذيه .. النه وعمتي هم اشترت كم شغلة ورجعنه .. ثاني يوم جهزنه نفسنه ... خليت فرح كوت الي شعري بالأوتي .. وبعدين مشطته بمشط حراري .. صار حرير من النعومة وصار اطول من قبل .. خليت مكياج خفيف بس طوخت الكحل و حمرة حمرة ..
وورحنه لبيت ابو خالد ...






اول ما دخلت لشارعنه نبض كلبي من شفت باب بيتنه.. رغم كل الوجع الي عشتة بهذا البيت .. بس ما اعرف ليش حنيت اله .. الشي الوحيد الي احبه بهذا البيت هو احس بي ريحة ابوي ...

دخلنه للبيت .. واتلكنه ام خالد تهلي وترحب بينه .. كان الدنيا ضهر والعروسه بعدها ما راجعه من الصالون ..
لا ارديا بقيت أتلفت عيوني تدورة وحتى بالي مو وية سوالفهم ... تقريبا نص ساعة واتصل بيه عدنان ..
لكيتها حجه حتى اكوم منهن .. ابتعدت وجاوبته

:هلو حبيبي

:هلا بسمتي وصلتي لو بعدج

:وصلنه صار أكثر من نص ساعة .. واني باقيه عيوني تدورك عبالي اشوفك بس انت الضاهر طالع ..

:اريد منج شغلة

:شنو

:اريدج تصعدين لغرفتنه .. تشوفيها .. وتشوفين شنو ناقصها يالون بردة يناسبها وكولي الي ..

:لا گلبي زحمة استحي ...

:منين تستحين .. هو الدرج مو كدام العين .. اصعدي شوفيها وارجعي بسرعة ..

:ماشي راح اصعد

:يله اني باقي وياج على على الخط

كنت كلش متشوقة اشوف الغرفة .. واتوقته طالع .. ما اعرف بي ناصبلي كمين .. وصلت فوك سألته منو من الغرف .. كال الي على ايدج اليمنا ..
فتحت الباب ودخلت للغرفه اباوع الها نجارتها تخبل كلش حلوة وفخمة وبقيت اباوع والجهاز على اذني ..
ما انتبهت اله صاير وره الباب .. وكمزت حيل .. ويه ما حسيت ايدين تنلف على خصري ويحضني من وره

: عجبتج

:يماااا ... جيتها فازة وبسرعه درت وجهي عليه
ضربته على صدرة : عدنان وكفت كلبي .. هاي انت هنا

:لا مو هنا

:لعد وينك

:اني بكلبج بسمتي ..
انتهبت لقربنه مايفصل بينه غير الملابس .. دكات كلبي صارت ترعد أحسها .. حاولت ابتعد عنه بس هو لاف اديه عليه ....

:بس وخر شوي ..

:واذا ما وخرت

:عدنان فدوة .. وخر عيب خل انزل لو ادري بيك هنا ما اصعد ..

ابتسم وبعدني عنه شوي بس باقي لازم ايدي .. وعيونه فصلتني تفصال .. رفع أيده وصار يفرني .. وهو يباوع على طولي ... ورجع سحبني اله خله ايد وره ضهري وايد لازم بيها خصلة من شعري ..
وعيونه تشرح حبه .. أما اني .. احساسي وقتها يمكن اجمل احساس أعيشه بكل حياتي .. واني مخليه عيوني بعيونه .. كلبي يدك بقوة رهيبه.. رجفه سرت بكل أطرافي.. وإحساس ما اريد هذه اللحظة تخلص .. مخليه اديه على صدرة .. واشم ريحة عطر خفيف باقية بملابسه ..
قويت نفسي وحاولت اتماسك ..






:كملت تمعن ؟

هز رأسه بنفسي :لا .. ماكملت ..

يربي احس متت من الحر الحراره صارت تطلع من آذاني .. من الخجل بلعوني نشف .. ردت بس اتدارك الموقف .. كوة ابتعدت عنه وكفت كدام المراية اكله

:شلون طاالعة

اجت كعد على حافه الميز المراية كدامي وبس صافن بيه
: شبيك بس ساكت

:جاي ادور على كلمة مناسبه توصفج مجاي الكه ..
ولج بسمتي .. عود صدك صرتي مرتي وكلها ايام وحضني يصير فراشج ...
حمحمت بخجل .. واجيت اطلع
سحبني من ايدي وهو كاعد قربني منه صارت وكفتي بين رجليه .. بلا مقدمات سحبني لحضنه.. وبلا أي مقاومة لكيت نفسي الف ادي على ركبته ابادلة الحظن ...

:عدنان ..

:بسمة عمرة

:احبك .. اموووت عليك .. اعشقك.. روحي بيك .. كلبي يحبك هووواي كلش هواي

:اشتعلت صفحه جبرية ... ولجج شنو اكلج .. شنوو مخبل بيج .. هم قليلة .. وين انطي وجهي من حبج هذا الي يمشي بدمي ..

وخرت من حضنه باوعت بوجها :انطي وجهك الي ..
حبيبي ..
صفن بيه بنضرات غريبه .. دقائق مرت وهو صافن بيه .. اخر شي كام من مكانه كح وفرك شعره .. وكال
:يله حبيتي نزلي جوة .. واني هم راح ابدل واطلع قبل ما تصير هوسه نسوان ..

:اي اي .. طلعت بسرعه من الغرفه .. لزمت كلبي اجر نفس قوي .. والضحكه شاكة وجهي .. باوعت من محجر الدرج .. همزين ما لكيت أحد نزلت بسرعه .. ورحت كعدت بسد سلوى ... وعمتي فصلتني بعيونها تفصل ...
غلست عليها .. جابو العروس من الصالون .. جانت طالعة تجنن كلش حلوة وهي أساسا حلوة وناعمة وبدلتها ماروني .. وام خالد تمشي وتعرف النسوان بيه .. هاي خطيبه عدنان .. جنت احس بفخر وفرح مو طبيعي ..
من كلمة خطيبه عدنان .. ما مصدكة هيج السنوات مرت بينه وكبرنة وباقي ايام ونتزوج ...

هواي محطات مرت بحياتي وبكل محطه كان عدنان وياي ...
بكل معاناتي هو شاركني .. وساعدني .. ونصحني ..
رغم بعض.نصائحة كانت كارثية .. بس على الاقل جانت تبرد كلبي ... وحدة من هذه النصائح من خلاني احرك غرفة جبيرية واخليها تصرخ .. وهو شهد وياي اني جنت يمهم العب وما الي علاقة الصار ..

الحنه صارت بوسط أجواء كلش حلوة .. وثاني يوم يأخذونها البصره الزفه تطلع من بيت عمها .. لأن مسافه طويلة كلش بين بغداد والبصرة ..

رجعنه من الحنه وبس نسولف ونكص بفلانه وعلانه...
مرت الايام ودخلنه شهر ال12 وقررنه اني وعدنان الزواج يكون بيوم 20 / 12 .. رتبت كل اموري على هذا الأساس .. وما باقي لزواجي غير 12 يوم ..






بيوم 15/12 ... اتصلت بعدنان حتى اتفق وياه على صالون وهاي الأمور .. بس يطلع جهازة مغلق .. أكثر من مره كررت الاتصال يطلع مغلق .. كلت هسه بالواجب واكيد خلص شحن .. وره ساعتين كررت الاتصال وهم مغلق .. اختنكت كلش طلعت بالطارمة افتر .. والجهاز بأيدي ... دخل كرار من بره شافني واضح عليه التوتر ..

:بسملة صاير شي

:لا .. بس من الضهر اتصل بعدنان وجهازة مغلق بقيت بقلق ..

:تلكين جهازة طافي شحن

:اي توقعت .. بس صار هواي اتصل ومغلق ماعرف السبب

هز رأسه ودخل واني على فد فرة سلوى عمتي حاولوا يطمنوني بس ماكو احس نار شبت بكلبي ..
قررت اتصل بأمة.. وأشوف
طلعت رقمها اتصلت بيها ... دك هووواي كلش وهي ما ترد .. وهل شي خلاني صدك فرفحت روحي .. لاعندي رقم ابو واتصل بيه .. ولا اكدر اخابر هاجر واقلقلها ويطلع ماكو شي ... كعدت على بلوكه بالحديقة وما بطلت اتصل... عدنان مغلق وأمه ما ترد ... ما لكيت كدمي غير محمد ..
بسرعه اتصلت بي ثواني وجاوبني خايف وملهوف

:بسمله انتي زينه .. لاتخافين أن شاء الله ماكو شي ..

اريد.اوكف على رجليه بعد ماكدرت طحت من طولي واني اسأله..

:محمد .. محمد شصااااير

مثل الي ادرك شي :ها .. انتي وين هسه

:اني بالبيت ... محمد كوووولي شصااااير عدنان اتصل بي مغلق أمه ما تجاوب بس ردت منك تدير عليهم تشوف صاير شي ...

بسرعه حجه وهو متوتر :بسما شوفي ماكو شي أن شاء الله.. بس .. احم .. سيارة مفخخه مقتحمة النقطه الي بيها عدنان.. وكل الي بيها بين قتيل وجريح ..

صفنت ثواني اريد استوعب .. لااااا لااااااا عدنان .. عددددنان ما يتترررركني ما يترككككني لا ..

على صوت عياطي طلعو الكل من البيت وجت عمتي تركضي عليه : يمااا ستار الله ششصاااااير بسمه

:لااااا ولله ما يتركني عمااااا عدنان ما يموت ما يتتتركني ما يتركنييي عمااااا ولله ما يتركني مستحيل يتبعد عني ...

ماجد : ولجج فهمينيه شصااااير .. جر الجهاز من ايدي بعده الخط مفتوووح .. وصار يحجي ويه محمد .. وخله أيده على رأسه وصار لا اله الا الله...

سد.الجهاز وتقدم عليه. اني راسي بحضن عمتي ...
:ما يتركني ولله ما يتركني ما يموت عدنان ..

تقدم ماجد يحاجيني
: بسمله اطمني ولله العضيم ما ميت بس مصوب ..

:موووو.. شفتو شفتوو كلت عدنان ما يتركني ... كوووم كووووم اخذني اله اخذني اله كووووم
كمت كدامه وبملابس البيت ونعالي .. طلعت للباب .. وماجد يرجع بيه ...






:بسمله ترحين هيج يمعودة بس لبسي شي فوك ثوبج ..

ركضت عليه فرح لبتسني صايه منها وعمتي طلعت تركض لابسه عبايتها ولازمه جواريبها بايدها ...
طلعنه من البيت نركض ركض ... وقتها ما اعرف شنو هذه القوة الي اجتني .. وبقيت ثابته .. بس كان عندي ثقه برب العاملين .. واعرف ما راح يكسرني بعدنان..

بسرعه ماجد وكف تكسي وصعدنه رحنه للمستشفى.. طول الطريق عيني على الشارع ودمعة ما نزلت مني ... بس روحي جانت تحترك من الداخل ..
وصلنه المستشفى ودخلنه نركض وماجد يتصل بمحمد يكله وينكم ومحمد يدلي بي .. لحد ما وصلنه.. لكينه ام خالد كاعدة بالكاع وحتى خدودها مخرطه ... تقدمت الها وهي بسرعه حضنتي وصارت تصررررخ

:ولجج عدنان بحلك المووووت ... عزيز كلبج بخطرررر بسمه... وليددددي لو يطلع لو ما يطلع ...

رديت عليها بكل ثقه .. وثبات .. خالة.. عدنان راح يعيش .. راح يطلع ولله راح يطلع .. اني متأكدة

المستشفى مخبوص خبص وأهله والكل بقلق .. واني كاعده صافنه بالفراغ ... ولساني يهلج بالدعاء ... وبس صافنة الكل استغرب وضعي وسكوتي .. وعمتي تكول الهم مصدومة ...
تجاهلت الكل وبقيت على كعدتي .. لحد ما طلع الدكتور كلنه ركضنه كدامة .. والكل يسأل بيه .. وهو يجاوبهم

:الحمدلله كدرنه نطلع الشضاية من جسمه .. وإصاباته مو حيل قوية بس قوة الانفجار والشمرة الي انشمرها سوت بجمسه رضوض قوية ... ودخلت بجسمه شضايا ..
بس يرتاح وتكدرون تشوفونة ...

مجرد اطمنت من كلام الدكتور .. وكأنما وصلت لمرحله الانهيار ... بسرعه الدنيا افترت بيه وطحت بعد ما دريت بشي ...
فتحت عيوني راسي ثكيل وحلكي ناشف وكانولا بيدي ولكيت نفسي بالطوارئ وعمتي يمي ..
بسرعه تقدمت يمي من شافتني كعدت

:عدناننن عماااا عدنان وينه .. شلونه

:زين ولله زين وروج ابوج ... بس مجرد تعبان ورضوض بجسمه ...

:اريدة ... أريده عمه اريد اشوفة

:درتاحي يا امي سكرج صاعد حيل

:لا لا اريد اشوفه فدوة

ايست مني ساعدتني حتى اكوم ... لزمت ايدي واخذتني لغرفته الي هو بيها ...
اول ما فتحت الباب .. صار كدامي .. بس فاتح عيونه نايم ملفلف وصدره ملفوف ..
بسرعه شهكت بدموعي .. واني اباوعلة ... تجاهلت الكل وركضت اله .. ابتعدت عن جسمه ولزمت وجها بثنين أدية وصرت ابوس بوجها بخوووف ودموعي تجري عليه ..
خليت جبيني على جبينه .. ودموعي تطيح على وجها

:حبيبي عمري ... جنت كلي ثقه بربي وبيك واعرفك ما راح تتركني ... حبيبي انت من عمري على عمرك يروحي






حجه بتعب كلش وصوته كوة يطلع :بسمتي .. اهدي ياروحي هاي اني كدامج بسبع ارواح.. كلشي مابيه .. كلها ايام اكوم على حيلي واعرس عليج

ضحكت من بين دموعي :بس كوملي على طولك واني الي اعرس عليك ميخالف

ضحك موجوع ويحجي بهدوء : تره مجرد رضوض بعدني ما عطلان .. وتعرسين عليه

ضحكت حيل وهو ضحك بتعب .. وأجاني صوت أم خالد
شجاي تتبسبون ما تسمعونه ..
رفعت راسي فشلانه لأن صدك من شفته نسيت روحي ونسيت الكل ...

مر تقريبا ساعة وعمتي ترخصت ... ولله ما كان هاين عليه اتركه .. بس عمتي رفضت ابقى وهو نفس الشي ما قبل .. ابو وأمه بقو يما .. واني وعمتي وماجد ومحمد رجعنه
طول الليل بقيت اصلي واشكر رب العالمين الي ما حرمني منه .. وثاني يوم سويت غدة لوجه الله عن سلامتة
. بس خطيه وياه عناصر مستشهدين
جان كلش مقهور عليهم ...
بقيت اربع ايام اروح وارجع عليه .. لحد ما طلعو للبيت واتأجل العرس .. لحد ما يكوم بالسلامة ..

طول هذه الفتره اني ايدي على كلبي لا يصير شي..
لحد ما بيوم اتصل بيه يكلي ..
صار رمي قوي على بيت صالح .. جماعه رامين البيت وطالعين كبل .. فضولي ما خلاني اتحمل .. شلت الجهاز وخابرت محمد أسألة شنو صاير ..

: شكلج بسمله صالح بهذلنه الله لا يوفقة كون .. ولج مطلوب بكد شعره رأسه والديانة صارت تطلع النه من جوة الكاع ..

: عزززة وديانا مال شنو

:تجار يأخذ منهم بضاعه وياكل فلوسها .. وما يسددهم .. وكل تاجر يطلبه أقل واحد يطلبه10ملايين ..

:وليش ما يسددهم شنو عايز هو مثلا

:كل الي جوة ايدة ما يطلعن 30مليون وهو مطلوب فوك ال100مليون

:وشراح تسوون

:ولله أن شاء الله نارهم تاكل حطبهم اني مليت وهذا ابنه باقي مسربت وبس كبسله وبنات .. وكل مسؤوليه ماعندة .. اني أساسا اتمنى البيت ينباع اخذ امي واخواني ونشوف بيت على كد فلوسنه وابتعد عن صالح ومشاكلة

:لاحول ولاقوة الا بالله..

سديت الجهاز منه وسولفت لعمتي .. أحسها مثل الي نقهرت ... بس ولدها يكولون الها عساه بزايد أن شاء الله وهي ما تقبل يدعون عليه ..

بعد مكالمتي .. ويه محمد بيومين ... صدمني عدنان من كال مهدي مخطوف .. والخاطفي هم نفسهم الي يطلبون صالح وما يقبل يسددهم .. ومهددي أقل حركه منه للشرطة طلقة براسه ويودو اله بكونيه ... وجبريه صايرة مسودنه على ابنها تملخ بروحها وتذب وكل شوي تهج بالشارع تريد تدوره .. وعارضين البيت للبيع ..






رغم كرهي الهم بس كلبي انعصر كلش .. قتل انسان مو سهل ابد مهما كان هل انسان ضالم وحقير ...

هنا خطر على بالي شي ومن سألت عمتي وعدنان ايدوني... بدلت وأخذت عمتي وياي ورحنه.. وكفت التكسي كدام بابهم ... سحبت نفس وقويت نفسي ودكيت الباب .. دقايق وفتحت الباب الي انتضار بت صادق
اتفاجئت من شافتنه بس ما حجت كالت تفضلو ..
دخلت امشي بثبات .. بس دخلت صارت فاطمه كدامي .. متغيرة ومكسورة .. ما حجت شي بس كالت

:شجابكم شنو متيهين الطريق

ردت عمتي عليها :ما جاين عليج .. صالح وين ..

:ذاك كاعد بغرفته وبس ينوح على ابنه

حجيت بقوى واني ادخل لاستقبال:صيحي اريدة ..

رحت كعدت بالاستقبال اني وعمتي .. وهو شوي ودخل.. الشعر واكف .. ومبهذل ومبين عليه الكسره على مهدي .. ومن كد ما تعبان كعد بلا حجي ولا صياح بس تفاجئ بجيتنه .. وعمتي الفطيرة ما تحملت من شافت منضرة كامت حضنته وصارو يبجون ثنينهم ..

ما انكر الموقف اثر بيه .. وعيوني غوركت بس سيطرت على نفسي ما يستاهل أتأثر بيه .. راح كعد وعمتي كعدت بصفه وهو يشكيلها كسرته على ابنه ..

:شلووونك عمووو

باوع عليه وعيونه ما عرفت أفسر نضرتها وحجه بتعب : شلوووني ابني وحيدي مخطوف شلون لوني .. جايه تتشفين مووو

:لا غلطان اني جاي اساعدك ترجع ابنك

بسرعه فز وحجه بأمل: يااااريت ... شلون تنطيني المبلغ انطي الهم وارجع مهدي .. شما كان هذا ابن عمج واخيج..

ابتسمت مستهزاء وكملت:وليش اني انطي.المبلغ ابني لو ابنك هو .. المهم .. انت عارض البيت للبيع ..

:ايي بس يجيب سعر ابيعه بسرعه

:شكد رايدين بي

:شنو تردين تشترينه ..

:انت تعرف أوضاع بغداد .. وتعرف العقارات شلون هابطه بسبب الاوضاع الامنيه .. والبيت قديم ..
شكد رايد بي ..

:اجاني شراي انطاني بيه 90 وراح ابيعة لأن محد اجاني بهيج سعر ..

: ب100 أخذه ..

فوراً فز مثل الغركان جلب بكشاية : موووافق

:تمام .. بس قبل لا تستلم ربع تتنازل عن حصتك بيه ..
اتفقت ويه صالح .. وبقى محمد .. الي من عرف اقتراحي فرح وكال زين تسوين ..
وهم عن طريق المحامي .. بلشنه بالاجراءات بسرعه لان مستعجل ويريد ابنه ..
طلع قسام شرعي .. شاف البيت وقيم الحصص.. وقمسها على تلاث اولاد وبنت .. طلع حصه كل ولد
28 مليون و500 و71 الف دينار
وحصه عمتي 14مليون و500و71 الف ..
وبعد ما أتنازل عن حصته بوجود المحامي وقع تنازل .. وصادق هم وقع تنازل بعد ما سمع بكل الي صار ..
وعمتي وقعت تنازل ... وصار وقت توزيع الحصص هم عن طريق المحامي لأن اني ما افهم بكل هاي الأمور ..






وبعدين طلعت سوالف صفح ماي وكهرباء ورصيف وهاي الأمور هم طار مليونين من الفلوس ..
كعدنه كلنه التمينه بالبيت حتى كلمن يأخذ حقة ..
طلعت حصة صالح .. خليتها كدامه .. وحصه محمد خليتها كدامه .. وحصه عمتي كدامها .. وحصة ابوي بقت عندي
هنا صالح نصدم جان متوقع ال100كلها راح تصير اله .. كام منتفظ

: شنوو انتو تضحكون عليه .. مو منطيني بس 28 ووووين اوديهن ..

: عمو كلمن يأخذ حصته حسب الشرع وانت حصتك من البيت 28 .. تريد.ال100كلها الك وين اكو هيج هيج

:لجج شنو انتي تضحكين عليه ..

:بشنو ضاحكه .. هذا حق

محمد:عمو انت جوة ايدك 30 وهاي 28 ومن حصتنه هم نعطيك 8 هاي صارن 66

صرخ : ولكككم مياااا مطلوب مياااا

حجت عمتي : خويه حصتي ما اريدها اني هاي اخذها
حجت هيج عيون ولدها نطت بس بقو ساكتين ..
وهو كعد أيده على رأسه .. مستسلم ..
للحظة فكرت أسويها لله مو للبشر .. لو ابوي عايش جان سوة نفس الشي .. جليت صوتي وكلت ..

:الثمانيه الفوك من حصتنه .. هم خذها .. وهاي لرب العالمين أسويها ..

صاح بيه:وانتي ما كفاج الي اخذتي .. شتسوين بعد بحصتج .. ولج ابني بحلك المووووت

: عمو هذا مو حصتي هذا حصة اخواني .. قبل من جنت جوة رحمتكم اختي هم جانت بحلك الموت .. تتذكرون شلون انت لو مرتك تذلوني حتى تنطوني فلوس اجيب الها علاج ..

:انتي مو راح تتزوجين وتكعدين أبيت رجلج .. شكو بعد

:عمو الي عندي كلته حصتة اخواني أمانة وما اتصرف بيها ..

بسرعة جبرية ما حسيت غير ركضت كدامي ولزمت ايدي تبوس بيها مثل المخبله: ابوووس ايدج ابو نعالج ... ولجججج ابني ماعندي غيرررره ...

تركتها تبوس بايدي .. وحجيت بفخر : تره امي هم ماعدنه غيرها .. اممممي الي خبليتها تتذكرين لو لا..

:فدوة اروح لنعالج .. بس خل يكمل المية ويرجع مهدي ابوس نعالج فدوة ..

عمتي جرتها مني وهي تكلها: على كيفج جبريه كاااافي شجاج تخبلتي

حجت وهي تملخ بروحها: اييييي تخبلت ولكممممم تخبلتتتت اريددد ابني اريدددد وليدي

:لعددد كوووولي وين مسويه عمل لامي .. ووووين موديته ... اذا انفتح العمل من امي ...مستعدة انطيج ال28كلها ..






: مااااذكر ولله ماذكررررر لو اذكر ولله جان كتلج

:لا تتذكرين كلش زين ... تتذكرين من وليتي للنجف ...وانتي طاري أهل البيت من ينجاب كدامج تنرعصين شموديج للنجف رحتي حتى تخبلييين امي وترجعين ... موووو. صح جنت جاهل بس كل سوالفج اتذكرررهن ..

: بشنو تريدين احلفلج ما اندل وين الكبور كثرت وحتى لو رحت ما راح اندل وينه ..

الكل صار يباوع عليها بقرف وهي تعترف على نفسها ..
روحي شاطت تركت الكل وطلعت من البيت .. لحكتني عمتي ولدها .. ورجعنه للبيت .. جان عندي امل اكدر اساعد امي .. بس وين وجبريه تكول ما ادري وينه ..
وصدك من ذاك الوقت لهذا الوقت كلش كثرت المقابر

البيت بقى بأسم جدي.. ما حولته باسمي وابخس حق اخواني .. بس الكل وقع تنازل والتنازل تصدق .. والمحامي طمني لو بعد مية سنه محد يكدر ينكر التنازل..
لأن كلشي صار رسمي ..

بعدها بيومين سمعت من محمد .. صالح دافع الفلوس ومرجع مهدي .. بس يكول شعراية منه محد جايس رجع يمشي على طوله وكلشي مابي .. بس ماخذي حتى يضغطون على صالح ويسدد فلوسهم لأن ملو من يما وهو ما يسدد العالم ...
سويت بأصلي وما خليتهم يطلعون من البيت .. لأن وين يروحون ..

بس شي واحد صار .. الطابق الثاني اخذته لاخواني .. كانت بي غرفه بيها كاعد محمد ومهدي .. خليتهم يفرغوها .. ويفرغون المخزن ... وعدنان ما قصر طلع عمال سوو صحيات ... واسسو ماي للمطبخ وللصحيات ..
وطلع درج من السطح للحديقة .. وعزل الطابق الثاني كله عن الجوى .. وسوة فتحه بالحايط بين سطح بيتهم وسطح بيتنه .. لأن اني هم غرفتي فوك واصير قريبه منهم واروح الهم بأي وقت .. براحتي

برغم شكد عيالي لحو عليه وطلبو مني اجيبهم وياي يعيشون عدهم بس استصعبت الموضوع وما ردت يكونون حمل على أحد.. ردت يبقون بيتهم معززين مكرمين وبنفس الوقت كدام عيني ..
وبنفس الوقت الطابق الثاني نعزل عن الجوى حتى لا تلتقي سلوى بمحمد لو احد يغثهم ..
وجهزت الطابق الثاني كله الهم جبت الهم اثاث غرفه تلث اسره وبالصاله الي كدام الغرفه تقريبا تطلع اربع أمتار .. خليت بيها الهم تلفزيون وقنفه ورتبتها .. والمخزن صار مطبخ هم جهزته من كلشي الهم..

وخليت كلشي بمكانه الصح ... وكل هاي الفتره امي ابد ما تركتها .. اخذ اخواني ونروح الها ... وبلشت شبه توعه وتنبه النه .. ساعات تبادلنه الحضن وتعرفنه ... وساعات تنفر وماتقبل احد يتقرب منها ... وكل ما اروح اخذ الها ملابس وغراض واوصي بالمررضات عليها ..

وهاي اني اليوم زفتي ... صارت 2009 شهر الثالث ,, هواي اجلنه بسبب كل الي صار .. بس عدنان كال هاي هي حدي بعد .. لأن قبل العرس هلكته هلاك بمشاكلي وترتيب الطابق الثاني
البارحه سويت حنه .. جانت كلش حلوة وبسيطه ومابيها هواي ناس .. بس عمتي عزمت كم جارة من جيرانها وعزمت حمواتها وبناتهم وبنات حماها ..
واليوم .. طلعت عروس من بيت عمتي ... بوسط البجي ودموع الفرح ... سلمتني بيد عدنان .. وكالت اله .. ما يحتاج بعد اوصيلك عليها ..






كاعدة على الجربايه ... ارجف وافرك بأدية .. والخوف بس هو مسيطر عليه .. ولا كأنما هذا عدنان حبيبي الي متعودة عليه بكل خطوة بحياتي ... كأنما شخص غريب راح يدخل .. وعمتي كاعدة يمي وتوصي بيه وتعلم بيه ..
لحد ما صارت هوسه زفو العريس .. وكفت عمتي تريد تطلع بسرعه جلبت بايدها

:وووين رايحه عمه ..

:يا يا شوف شنو ابقى يمكم كاعدة .. لتخافين حبيبتي راح ابات ليوم يم اخوانج بغرفتهم .. وباجر من الصبح يمج
صيري سباعية بنيتي وتذكري ... هذا عدنااان مو حي الله ..

نزلت البركع على وجهي وباستني وطلعت... ودخل عدنان
اني شفته كدامي لو اريد بس زوية اختل بيها .. اريد اختفي .. اريد اشرد .. مادري شنو اريد بالضبط...
قصص وروايات عراقية كرار صلاح اريد ذرة بيه ما ترجف ماكو ...
سد الباب وطك القفل واني عاصره ادية افرك بيهم ..
رفعت راسي ببطء اباوع اله .. واكف بعده يم الباب ..
وتقدم وهو يفرك ايد بايد بحماس..

وكعد بصفي ... احس فكي.الاسفل يطك بفكي الاعلى .. وكوة اتنفس .. من حس عليه هيج ..

:اهدئي اهدئي أخذي شهيق زفير شهيق زفيرررر

سويت مثل ما طلب .. وصرت اتنفس

:شبيج كلبج راح يوكف .. لتخافين حبيبتي ولا تفكرين باي شي فكري بس .. اني وياج نجمعنه بخير

هزيت راسي براحه .. وهو رفع البركع من وجهي.. بأس كصتي ورجع باس ايدي..

:نورتي بيتج وغرفتج .. وقبلها نوتري حياتي كلها .. اهلا وسهلا بيج شريكة حياتي وحبيبه عمري ورفيقة دربي وبسمة عمري .. نورررتي كلبي الي صارله عمر ينتضر هل لحظة ..

:باوعت بعيونه وابتسمت مرتاحه من كلماته الحلوة
وكمل كلامه

بسمتي هاي الليلة مو بس عرس... هاي بداية عمر، بدايتنه إحنا، أني وانتي
أهلاً بيچ... مو بس ببيتي، أهلاً بيچ بروحي، بضلوعي بنبضي.

لزمني من ايدي كومني .. صرت كدام المراية يباوع عليه
ويحجي :عيوني تشوفج ملاك .. بهذه البدلة ..
مثل طير زاجل ..

:هههه حتى بغزلك طيوررر

:حبيبة عمري انتي اجمل طيررر اليوم نحط بقفصي

مد.ايده يوخر البركع من شعري ..
تركني براحتي .. أبدل .. وكان يتصرف بشكل طبيعي خلاني كلش أطمن...
لدرجه ماعرف شوكت وشلون صرت بالجربايه وهو مدد واني راسي على صدره وهو بس يسولف وياي خلاني نسيت وانطلقت بالسوالف بكل اريحية ...

:شوووفي اريد سبع ولد .. والجبير اسمي غازي

رفعت راسي معارضه: ايععع شنو غازي من كل عقلك اسمي ابني غازي لا مو حلو






:ليش هو عدنان يسمو ابو غازلي

: لا يمعود مو حلو اريد اسم حلو

:مثل شنو .. مثل مثل مثل ... يعني مثلا نسمي مهند

:كا تلات نفسجن على مهند لو تطيكين كدامي ما اسمي مهند

:لعد شنو نسمي

بسرعه كلبني وصار هو فوك وجهي .. شنو رأيج هسه نخلفه وبعدين نتفق على اسمه ..

باوعت بعيونه ساكته وابلع ...

لم تكن ليلة زفاف…
بل كانت اكتمالَ شوقٍ نضج بين نظرات الطفولة، وهمسات الخجل، وانتظارات العمر.
، شعرت أن العالم كله أصبح خلفنا…
وبقينا نحن فقط، كما نحن منذ البدء:
حبيبان عرفا بعضهما قبل أن يفهما معنى الحب،
وتعلّما معًا كيف يخفق القلب حين يشتاق.
اقترب ببطء، وكأنّه لا يريد أن يُفزع قلبي،
لكنني كنتُ مشتعلةً كنجمة على وشك الانفجار…
لم يلمسني أولاً، بل نظر إليّ... نظرة رجل يرى أنثاه لأول مرة،
ويريد أن يحفظ تفاصيلها بين جفونه، لا بين يديه فقط.
كان الهواء يضيق من حولي،
وصوته الهامس باسمي يبدّد خوفي،
ثم… تلامست أناملنا، وارتعشت كل ذاكرتي،
كل ضحكاتنا الصغيرة، رسائلنا، سرقات العيون… عادت في لحظة واحدة.
تقدّم نحوي كمن يسير إلى مصيره،
وفتحت له صدري كما تُفتح أبواب الوطن للعائد من الغربة.
لم تكن لمسته فجة ولا مترددة،
بل كانت دعاءً… واحتواءً…
كانت جسده يقول لي: "اشتقتكِ أكثر مما تحتمل الكلمات."
ذابت بيننا الحدود…
لم أعد أعرف من أين يبدأ هو وأين أنتهي أنا.
كنا روحين تعانقتا حتى سالت الرغبة بصمت،
وبقي يهمس في أذني: "أنتِ لي… كلّك لي."
لم يكن الأمر جسدًا يبحث عن جسد،
بل روحٌ وجدت أخيرًا مأواها،
وصمتٌ امتلأ بأجمل موسيقى:
أنفاسي، ونبضه، وتنهيدتنا الأولى بعد الاتحاد....

لامني بين اديه ويمسح على شعري واني ابجي
:هسه ليش هل دموع حبيبتي

:ابجي على نفسي .. جبت عمري كله محافظة عليها وهسه بساعه وحدة .. انت على الحاضر انتهكت حيائي

احس من هزة صدرة هو يضحك بس ما يطلع صوت ضحكته .. ومثل الماخذني على كد عقلي
:يله حبيبتي اسف بعد ما أعيدها

:بعددديش ...
حجيتها بعصبيه وهو ما تحمل طك من الضحك كمت منه وكفشتي من سبري التسريحه صايرة شكبرها اباوعله بحقد .. لفيت الديباج عليه وكمت نسحل الغطة كله وياي وهو ضل مكشف
:اشتعلتت روح جبريه كشفتيني

:صاااير خير هسه ويدور ستر دروح ..
كمت منه البس بثوبي وهو بمكانه ولا جنه وحاصر ضحكته ..

مرت ايام زواجنه أني وياه احلى من العسل .. احس شكد جنت احبه ومتعلقه بي .. تعلقت بي قاطات .. روحي صارت بيه .. ومن يلتحق انصب مناحه وراه ..
بس همزين دوامة قريب مرات من يخلص واجبه يسحب نفسه كم ساعة يجي .. ويرجع ..
ومن يبات بالدوام ساعات اروح ابات يم اخواني بغرفتهم ..






مرت الايام طبيعيه وحلوة وعايشه بين عيالي وبين خواني مرتاحه .. وامي باستمرار وياها ..
سنه مرت على زواجنة .. وبهذه السنه ماجد تقدم لسلوى وهي رفضت .. تكول بعدني ما مستعدة لهذه الخطوة .. وهو باقي على أملها منتضر .. ومحمد ابتعد تماما عنها ..

من بعد السنه .. واني ما صار عندي حمل .. وهنا بلشت رحلة معانااة جديدة وية الناس وكلامهم
ما صار عدكم شي
صار شكد متزوجين
ما راجعتو .. الصوج منج لو منه
اعرف شلون دكتورة ... خاف شغلتج يم سيد خاف مجبوسة .. وعلى هذه الرنه .. لدرجه حتى صرت ما احب اطلع لأحد بسبب هذا الكلام ...

اني نفسي جنت احس بفراغ وانقهر .. ومرتين رحت للدكتوره وكالت كل سبب ما بيج يمنع الحمل ..
لحد ما عدنان كال اني راح اروح ... وراح عدنان يفحص
مرت ساعات ورجع .. بس رجع عيونه حمر ... مهموم وبسرعه صعد الغرفه ... تركت الي بيدي وصعدت وراه .. لكيته على الجربايه مخلي رأسه بين اديه ..

كعدت كدامه بالكاع .. رفعت رأسه بأيدي .. لكيت عيونه حمر مطعونة ..

:عدنان .. شبيك حبيبي ليش هيج حالك

سحب نفس زرف صدرة قوي :بسملة ..

:عيونها .. شبيك كولي

:السبب مني .. اني ما اخلف

رغم صدمتي وقهري بس ما بينت كدامه : شلون يعني شنو كالك الطبيب

:كالي بسبب الشضايا الي ضربت جسمي بالانفجار وحده منهم صايرة بمنطقه قريبه من الحوض .. وكال هل شضيه اذا ما تأثر على قدرتك .. راح تأثر على الإنجاب

:اي بس اكيد اكو علاج عمري ..

:بس صعب كلش .. يعني احتمال تنتضرين سنوات طويله

: ولا يهمك منو كلك اني ميته على الطفل .. اني ردتك انت وما أريد شي بعد .. انت عندي تسوى الدنيا
ماريدك تنقهر ولا تشيل بكلبك ابد فدوة الك كلشي مدام انت طلعت سالم .. خل يولون الاطفال .. ما ريد
يروحي انت ..

كومني من مكاني كعدت على رجله وحضني وبچة
وبرغم قهر كلبي بس ابد ما بينت كدامه مهتمه..
وهيج مرت ايامي .. وسنين عمري
شكد ما اني وياه متفاهمين ونحب بعض .. بس فجوة جبيره ونقص نحس بيه ثينه ..

وبالذات بعد ما سلوى الله هداها وافقت على ماجد .. وتم زواجهم .. وبعد الزواج بفتره قصيرة الله رزقهم ببنيه

خلتها بحضني .. وكل الي موجودين اشوف بعيونهم الشفقة ويكولون يوم الكم .. ويترس حضنج ..
چانت السنين تمشي وأنا أعدّها مثل الجروح.. كل سنة تمرّ، أگول يمكن هاي السنة يفرح حضني، يمكن الله ينطيني طفل يونس وحدتي، بس لا .. مرّ العمر وضلّ الحضن خاوي، والبيت ساكت، حتى الحيطان ملت من سكوتي.
كل شهر .. تأخير اسبوع يزرع بيه امل .. وراها بيوم يومين يتحطم هل الامل بداخلي ..

كل سؤال يجرحني .. 'بعدچ ما حملتي؟ صارلكم هواي شنو بيچ؟ حتى لو ما گالوه بلسانهم، عيونهم تسأل، ونظراتهم تفتّش بطني قبل وجهي.بكل جمعه وبكل مناسبه وبكل واجب ..
حتى اللي الله ما رازقهم، يصيرون فجأة حكام على رحمي.
أحچي ويا ربي كل ليلة، أشتكي له من الوجع مو وجع بطن، وجع نظرات، وغمزات، وهمسات. أريد طفل، بس مو حتى أسكتهم، أريده حتى يحس بحناني المدفون، ويشعرني إني مو ناقصة ..

عدنان كنت أحسه مثل الي يحمل نفسه مسؤؤلية ألمي وقهري .. وكد ما يطلع بأيده يحاول يعوضني ...
وبكل مره اكول كلمتي الي مالي غيرها ... الحمدلله على كل حال .. ساعات رب العاملين يأخذ شي وينطي شي ..

مشت السنين بيه .. برمشة عين .. بحلوها ومرها مشت.. وبخوفها ورعب كلبي على عدنان بالاحداث الي مرت على العراق لحد ما رجع العراق وكف على حيلة ..

عدنان كمل دراسته .. وشد نجوم وصار ضابط ..
ورعد وعد .. الي ربيتهم بين ادية صارو زلم ومن امشي بصفهم اطول مني .. وتخرجو من الكليه وكل واحد بيهم اعتمد على نفسه ...

صادق طلع من السجن بس ما طلع مثل ما دخل.. طلع الدنيا كاسرته ومهدود ..

محمد تزوج بت خاله بنيه حبابه وأخلاقها حلوة
ومهدي مرتين تزوج وطلك وصار محد يقبل ينطي مرة ..

فاطمه وجبرية .. يمكن رب العالمين أجل عقابهم بالدنيا وخله عقابهم بالاخره لأن عقاب الآخرة أشد وأقسى ..

وسلوتي صار ام لتلث اطفال .. وكالو بعد هاي هي كافي
ماجد كلش يخاف عليها لأن ولادتها كلها عمليه وتحت إشراف طبيب قلبيه ...

وه‍اي اني وهاي قصتي .. بحلوها ومرها ويمكن المر جان أكثر .. بس رب العاملين حاشا يقبل بالظلم .. لكن يريد العبد يسعى حتى يرجع حقه مو يستسلم للضلم وينتضر الفرج بلا سعي ...

------------------------

النهاية

قصه جديده

أزهـــــــــــار ـ كاعده أدقق المعاملات المدير طلبهن لابسه مناظري وكل تركيزي بالمعامله وما حسيت غير انشمرت معامله بقوه على المكتب مالتي رفعت عيني رجال طويل وسيم وشكله ما يبشر بالخير قبل لا احجي حجه بعصبيه

ـ مشيلنا هالمعامله ترى طلعتوا ارواحنا أجدي منكم جداوه ما صارت هاي حلولو خبزتكم عــاد

ـ عفواً

ـ لا عفواً ولا سهلاً الكدامج مو يشتغل عدگم يوميه روح وتعال مشيها وخل انكلع عـــلىٰ شغلي

ـ خليها واحنه نشوفها ونمشيها إلك وتكدر تتفضل برا

ـ لا والله تطردديني حضرتج شنو الدائره مسجله بإسم إبوج وماادري انعل ابوج لابو اللي سواكم موظفين بهل الدوائر خشموكم متر وتشتغلون عـــلىٰ مزاجكم

ـ كام يصيح ويغلط والموظفين كلهم ضلوا صافنين عليه ما انطه مجال خبص الدائره بصوته العالي شبيك انت تصيح شكووو هو، شو هسه اجييت وكبل كمت تصيح اخذتنا حاصل فاصل انطييي مجال

ـ يا هسسسه ترى صار شهر جد جدي انصمط يوميه عايف شغلي ورايح جاي وحضرتج شمدريج منو يطب ومن يطلع ملتهيه ولا تدرين

ـ كافي تجاوزت حدودك وياي احترم نفسك تقرب باوع بنص عيني بكل جراءه نظراته مليانه شر

ـ خليت الاحترام الج بس سهــــــله يصير خيــــــــر !

ـ جر معامله من كدامي بعصبيه الا وكع الاقلام والمعاملات البقيه وطلع عصبي مسحت وجهي باوعت عـــلىٰ رشا صديقتي ومحمد هذا شبي مخبل قسم بالله

رشا ـ لا ولج خطيه صار كم مره يجي معاملته بيها اشكال وندزه ؏ غير دائره ويرجعونه علينا اعذري المشكله هو ما يتفاهم

محمد ـ حتى لو شطالع بيدنا عباله معاملته تمشي بالصياح واحد مريض وخبل

أزهـــــــــــار ـ ما جاوبتهم بس دمي أحترك واني أتذكر نظراته والشر يتطاير من عيونه السود مو عيون بلوه !

" ومر وقت وهو ما بين بعد وخلص الدوام وطلعت من الدائره وبطلعتي جان موجود ومخلي بيده بجيوبه عاگد الحواجب ويباوعلي بنص عين من فوك ليجوه نظراته مال واحد حاقد شسويله قابل بكيفي يريد معاملته تمشي من دون الكل وبسرعه عبالك اشتغل عنده

" تجاهلته ومشيت شغلت سيارتي ورن تلفوني عمي فاضل جاوبته واني مبتسمه هلاو عمو شلونك

فاضل ـ هلا بزهرتنا شوكت تجين العائله كلها منتظره حضرة جنابج تشرفين ؏ الغده

ـ جايه عمو مسافة الطريق ، قطعت الأتصال وقبل لا اشغل السياره عبر من يمي وكال بعصبيه

ـ طبعاً اذا تصعدين سياره أخر موديل شمدريج بالفقير شياكل ششيرب حقج عمي من ترفعين خشمج علينا وما تمشين المعامله حكومه هي گوه

ـ لا اله الا الله زفرت نفس بغضب شلون ويه هذا اليوم الاكشر راح اقدم استقالتي من وراه جايني اول مره وتعالي اليوم تمشيين المعامله لا فوك القهر ما انطاني مجال أشوفه شيريد شهل الورطه هاي ناقصه عطلات

" مشيت بسيارتي وهو واكف ؏ الرصيف والشمس قويه كلش شغلت التبريد وصارت عيني بنص عيونه مليانات تعب مسح كصته عبرته وضليت مدققه نظري عليه بالجام شخص عادي وأنفعالي تجاهلته وكملت سياقتي .

" تأففت احس روحي مخنوكه ما اعرف الجو حار لو هذا اللي ازعجني بصياحه وشال الدائره بهوسته وكلامه مثل السم محد يقدر تعب الموظف وجهوده

" وصلت بيت جدو دكيت هورن وانفتح الباب اخوي الصغير مجد هااا حبيبي شلونك

مجد ـ هي مال شلونك فوتي يمعوده الجو حار مو مال سلام

ـ اي والله تصمط، طبكت السياره بالكراج بصف سيارات اخواني عصام ومروان وعمو فاضل توجهت للبيت دخلت كلهم مجموعين هلاو شلونكم كلهم رحبوا بيه تقدمت بوست جديتي شلونج جده

ـ زينه بشوفتج اكعدي ارتاحي بنيتي مبين عليج تعبانه ودمج حار

ـ اي والله عطشانه اكوم أشرب ماي بارد متت حر كلبي ماع الله وكيلكم شنو هالحر الشمس اليوم نازله

عصام ـ وأنتِ شلج بالشغل تخرجتي واكعدي بالبيت وسكتي كافي عليج هوسه الدوائر

أزهــــار ـ عاد بهوسة الدوائر صدكت بس شنسوي نتحمل شلونك عمو

فاضل ـ بخير بخير دام انتوا مجموعين اني بالف خير

عصام ـ والله عمي تكمل بوجودك طال عمرك

أزهــــار ـ بعد روحي عمو كايمه اشوف وصال خانم وعمتي زينب شمسويات عـــلىٰ الغده لن كاتلني الجوع

فاضل ـ روحي وكوليلهن خل يستعجلن لن أبوج ما يجي عنده شغل

أزهــار ـ تمام عمو عفتهم وكمت للمطبخ شلونكم عمه زينب شلونج

زينب ـ زمان هالگمر ما بان زينه الحمدلله بالجذب سألي ذكري عمتج لو هالوظيفه أخذتج من عدنا

وصال ـ اي والله اخذتها ملتهيه وكلشي ما شايفين منها وهي مو بحاجة الشغل ما اعرف ابوها منين طلعها النا وظفها بواسطه رغم أخوانها ما موافقين بس ابوها بعد

أزهـــــــــــار ـ عوفونه من الشغل شطابخات اليوم فتحت الجدوره الله دولمه اوفيش وفاصولياء وتمن وحشوه شعريه شنو هالدلال عمي يوميه انجمعوا بيت جدو واطبخوا هل الاكلات الطيبه

زينب ـ تعالي كُل يوم وتدللي عليه أسويلج اطيب الأكلات كم زهره عدنا هي هالوحده

أزهـــــــــــار ـ يا بعد گلبي عمتي ، فتحت الثلاجه وجريت بطل ماي وشربت وبردت گلبي وتذكرته واگف ؏ الرصيف الجو حار غمضت عيوني أحاول أتلاشى صورته

جريت الكرسي وكعدت وامي تصب الغده وعمه زينب تساعدها جريت تفاحه وأكل بيها صدك زوجة عمي فاضل وين والبنات ما يجون

زينب ـ رباب البارحه عمليتها جابت وراحت يمها ما يكدرن يجن مجموعات يم أختهن

وصال ـ جان جابتها اهنا أداريها خطيه وين تكدر لوحدها وابنها بعده صغير

زينب ـ والله ما ادري سألت فاضل كال بكيفهن

وصال ـ خل تفض سالفه أسيا وعصام ونروح الها نبارك الها

أزهار ـ صدك ماما أسيا مو عـــلىٰ أساس اليوم ترجع للبيت جرت نفس وهي تهز برأسها بقهر

وصال ـ إذا إخوج عصام شالع گلبها منين ترجع ما يبطل سوالفه مستصغر الكل بعينه ما اعرف شلون ربيته أني

زينب ـ والله أسيا فقيره وحبابه بس عصام ما ينجرع هسه شعليك بإهلها ؏ كل سالفه تعلق صرت أب وتتنظر طفل بالطريق

وصال ـ أولادي كلهم طالعيين عـــلىٰ أبوهم المستويات فوك گلشي خشمهم فوك السما هما أذا خوالهم ما يرحون عليهم لا بالعيد ولا بالمناسبات شتترجين منهم

إزهار ـ تحجي ومقهوره رايحه أغسل رحت غسلت وعصام يحجي عـــلىٰ بعصبيه وعمو فاضل يگوله

فاضل ـ هدي هدي أستهدي بالرحمٰن عـــلىٰ كيفك أبني

عصام ـ والله هذا العندي عاجبها ترجع أهلاً وسهلاً ما عاجبها طبها الف مرض وجهال باجر اجي اخذ أبني عندي وبنتكم عدكم ديله عــــاد

أزهـــــــــــار ـ كعدت بصف جديتي وأخوي مروان ساكت شبي شصارله

مروان ـ أخو أسيا خابره تعرفين سوالف عصام وأسسيا بسلامتها روحي خليهن بحلگ أخوانج وتعالي اللي يفضها

مجد ـ هسه يجي بابا ويخربها وتعرفون شيحجي

الجده نعيمه ـ هو شكووو يحجي عـــلىٰ العالم مو عيب تنگال هالحجايه ناس عـــلىٰ كدهم ما ضاريين احد شگوو ناسبتهم ما دزوا عليك خط مصخم أنت رحت دگيت بابهم وقدروك وانطوك مره هالحجي شله داعي

أزهـــــــــــار ـ ليش شنو حاجي

الحجيه نعيمه ـ گايلها بنت الفگر .

أزهـــــــــــار ـ لا أله الا الله بله هاي حجايه تنگال، سكتوا وهو يشيل روحه ويركعها بالكاع والتلفون ما يطفه لزم أخوانها اكس مربع ويغلط وفشار يفشل لسانه متبري منه

عصام ـ أهلها كواويد أني كواد رحت دگيت بابهم منو يناسبهم هما فگرهم كاتلهم صايرلي شريف ويداعي بگرامة أخته اجفص عليك أنتَ وأختك وأنعل شكو واحد يطلع وراكم مشكله بيني وبين زوجتي اخوانها شگو بنص

الجده نعيمه ـ كــــافي أستجلبت لسانك توجه عليهم جان أستحيت عـــلىٰ شواربك زارعهن بوجهك عيب هاي مرتك وام جهالك لو وصال وكمال انطوك خبز ما انطوك تربيه

عصام ـ جده خليني بقهرري يرحم جدي النايم بترابه .

أزهــــار ـ سگتنا ومحد تغدا ضلينا ننتظر بابا يرجع من الدوام وهم علمود سالفه أخوي عصام وزوجته أسيا

أحنه عائلتنا تتكون من أب عسكري اسمه كمال وأم ربة بيت أسمها وصال وبنت وحيدة أهلها اللي هي أني أسمي أزهـــــــــــار وعندي أربع أخوان عصام ومروان ضباط وعمر ومجد بعدهم يدرسون عمار يدرس بالخارج ومجد بعد بالاعداديه .

" وبيت جدي جديتي نعيمه وعمي فاضل متزوج عنده بس بنات ثلاث بنات كلهن متزوجات، وعمتي زينب ما متزوجه وجديتي بعد ما توفى جدي ضل هذا البيت الجبير عايشين بي عمو فاضل وزوجته وعمتي زينب وجديتي واحنه بيتنا لوحدنا بغير منطقه بس مرات ننجمع بيت جدي اهل أبويه .

" اندك الباب كام مجد يفتحه ومروان أبرد من الثلج متجاهل الوضع وعينه بتلفونه شوي ودخل بابا عصبي ويصيــح عـــلىٰ عصام وطلعت ماما والعمه زينب من المطبخ

كمال ـ ما نخلص من مشاكلك أنتَ ومرتك وأهلها يوميه هي ، دامك هيج شكوو عاندتني ورحنه خطبناها الك

عصام ـ يابه

كمال ـ وجعة ابوي شوف ولك سالفة مرتك تنحل من جذرها ما اريد صوتننا يطلع ادعوا ربكم عدكم ولد
جان طلكتها وخلصت منها ومن اهلها ومشاكلكم

وصال ـ أهلها شعليهم الناس هو عصام يعثر بالكاع ويرجع عليهم

كمال ـ أنتِ أنجبي محد طالب رأيج وأنت سمعتني شنو حجيت لليل سالفتك تنحل وأبنك كرم يرجع البيت

أزهـــــــــــار ـ ماما نزلت رأسها مقهوره ومشت للمطبخ اجه كعد بصفي هدي بابا والله موزين عليك ما تستوجت هو ومرته يحلون مشاكلهم

كمال ـ شلع كلبي من يوم تزوج صوجج يمه طاوعتيني كتلج خل اخذله وحده من أصدقائي ناس معروفين محترمين والهم اسمهم لا الا تلبين رغبة عصام أفندي أستلمي كل واحد عقله شكل البيت راح انترس جهال وهما ما متراهميين

الجده نعيمه ـ والله يا أبني دلالك هو خرب وولدك وتربيتهم إحنه مو هيج ولا تربينا هيج

أزهـــــــــــار ـ جديتي كامت مقهوره وكمت لحكتها لاتزعلين تصير بأغلب العوائل

الجده نعيمه ـ لا يا جده ما تصير أبوج وأخوانج شايفيين نفسهم هواي ويتعالون عـــلىٰ الاوادم وأسيا اذا برأسها عقل ما ترد لأخوج .

أزهار ـ حالة عصام وعقليته ميأوس منها ، رحت المطبخ وساعدتهم بنقل الأكل عـــلىٰ الميز واجوا كلهم الا بابا ضل كاعد وعمي فاضل يطبطب عـــلىٰ اكتاف عصام يحاول يهدي الوضع

" تغدينه ومروان أول الناس شغل سيارته وطلع البيت

مجد ـ يلة كومي نروح البيت بسيارتج لن مستحيل اروح ويه بابا

أزهـــار ـ يلة كوم ودعتهم وبابا عـــلىٰ كعدته تقربت بسته من رأسه وأبتسملي رايحه لبيت قبلهم وأنت وماما تعالوا وطيب خاطرها اعرف بيك تسرعت بالكلام

كمال ـ ماشي بابا ديري بالج على نفسچ أنتبهي بسواقتج

أزهــار ـ إبتسمت ان شاءالله ومشينا اني ومجد ورانا عصام هم طلع وتوجهنا للبيت عصام طلع وراي بس وصل قبلي لن سياقته سريعه

مجد ـ عـــلىٰ هاي سياقتج شوكت نوصل للبيت

أزهار ـ نوصل نوصل ، باب البيت مفتوح طبكت سيارتي بصف سياراتهم مجد نزل وطفر لغرفته واني اخذت بطل ماي من الثلاجه توجهت لغرفتي سبحت وتمددت عـــلىٰ السرير غمضت عيوني بتعب وتذكرت أسيا شراح يصير بيج اذا رجعتي شورطج وياه خبل لا يروح ولا يجي بس هم حقها عصام يجفص بالبطن بسوالفه ادون سبب يعيب ويستنقص منها رغم عاش علاقة حب وياها بس ما اعرف ليش هيج أطباعه صعبه .

" نمت للعصر يله كعدت عـــلىٰ صوت عصام مزعوج نزلت لكيته كاعد ويأكل بروحه هو ما مزعوج لن أهلها خابروا مزعوج لن أسسيا خلتهن كدامهم مثل شاف روحه أستصغر بعيون أهل مرته دام هيج شكوو تحجي عامي شامي ضبط لسانك عن البشريه ، شفت الجو مكهرب

عصام ـ سويلي جاي ما شاء الله البيت مههجوم ماكو مره تكعد تخلي القوري عـــلىٰ النار

أزهار ـ متسوي أنت شيرادله ما حسيت غير طفر ولزم ظفيرتي عصاااام والله ما قصدي

ـ هذا لسانج اذا ما تضبينه وتحجين مثل الاوادم اجفص عليه فاهمه

ـ اي أي بس عوفنيي دفعني وانضربت بالكاونتر درينه ضابط وحلو اطلع عضلاتك على اختك المسكينه اوفاا عليك يا اخويه يا سندي يا حزام ضهري

ـ فضينا وبلا لواگه هالسم هم ما اريده

ـ شال سترته وتلفونه وطلع صحت وراه وين

ـ وأنتِ شگو مرتي وتحاسبيني !

ـ عزا العزاك عـــلىٰ للسان راح وانركض باب الصاله كل قوته بس سمعت صوت بابا عاط من غرفته

كمال ـ عصام من غضب عـــلىٰ يومك ادري مخلف ثور

أزهار ـ ضحكت والله حشا الثور منه بري من افعال عصام المسكين شجابه عليه .
" فتحت الخانه طلعت كهوه سويتلي واجه مروان صب فنجان اكول عـــلىٰ سوالف عصام وأسيا ما نفرح بيك

مروان ـ مخابيل أثنينهم نفس الشيء هيج زواج الافضل من أولا أنفصال احسن اله وإلها.

أزهار ـ لا يمعود، طيب أنتَ لو ردت تزوجت تمشي عـــلىٰ رغبه أهلك لو عـــلىٰ رغبتك

ـ طبعاً عـــلىٰ رغبتي ومن نفس مستواي علمود تتطابق أفكارنا وما نواجه مشاكل بالمستقبل ويوكعون بيها الأطفال .

ـ أهاا تمام

ـ التجربه خير برهان

ـ مشه وبيده فنجان الكهوه أعرف شُــــــنو يقصد علمود سالفة شاهين أبن خالي يريدني بس أهلي ما وافقوا ولا أني وافقت ما كلت لا أي ولا لا لن اعرف بـ ماما تزعل وتنقهر والولد من شافنه ساكتين ما ردينا الجواب هو هم سگت وفعلاً كلام مروان صحيح !

" الثاني يوم لبست كملت وشلت جنطتي ونزلت لكيت ماما كاعده تتريك لوحدها صباح الخير كاعدين من وكت

وصال ـ طلعوا كلهم

أزهار ـ هاا تمام الله وياهم تردين مني شيء

ـ لا سلامتج

أزهار ـ الله يسلمج طلعت والكراج فارغ ثلاثتهم طالعين الله يحفظكم، بس ماما ومجد ضلوا واحنه نتوجه لدوامنه .

" نهاية الأسبوع وصلت الدائره صباح الخير

رشا ـ صباح النور استلمي الشغل كومه اليوم

أزهار ـ عادي متعوديـن ، كعدت أشتــــغل لما خلص الدوام وطبعاً أخذت أستراحه، طلعنه للبيت ورشا گالت

رشا ـ ما بين بعد

أزهار ـ مــنو ؟

ـ هذا اللي خبص الدائره بصياحه ما بين بعد الظاهر أنكظت شغلته

ـ الله يسهل اله أحتمال شغلته مو بدائرتنا عـــلىٰ شُــــــنو الصياح ماله داعي ، يله حبيبي اني أتوكل للبيت عندي كومة شغل

ـ شغليش شعندج

ـ أريد اروح الصالون وصديقتي عيد ميلادها بعد كم يوم تريد هديه تعرفين بعد هوسة العيد ميلاد

ـ لا والله ما اعرف ما حاضره عيد ميلاد الاعياد الميلاد الكم ولحلالكم

ـ شُــــــنو هاي جديده

ـ شبيــج أتشاقه يمعوده .

أزهار ـ يله باي شغلت سيارتي وهي ظلت تباوعلي ومبتسمه وتوجهت للبيت البيت هدوء وماما ما طابخه اخذتلي تفاحه وصعدت غرفتي سبحت ونمت .

" بعدها كعدت لكيت ماما بالمطبخ تجهز الغده حضنتها وهي تشتغل بعدج زعلانه من بابا

وصال ـ هو هذا أبوج من يومه يستنقص مني ومن الكل عبالك الدنيا بس اله هو ولده وصايره ولا أكدرلهم عمار ركب رأسه والف سيف يدرس بالخارج ليش شبيها الدراسه بالعراق مو احسن جامعات بيها شو خلك الله كلها جاي تدرس وتأخذ أحسن الشهادات لو هذا هم حظي

ـ شتسويلهم هما تربوا بوسط هالشيء عـــلىٰ الحاضر وأمرك وتدلل ولبيــك ما تكدرين تسيطرين عليهم وهما كبار.

ـ لا والله الصوج لإبوج كله يضرب من رأسه ورأئي ولا اله أهميه ولا كأنما اني الحملت وتعبت وربيت عصام ومروان دخلهم كليه العسكريه وخلوا كلبي بيدي نوم ما نايمه مثل الامهات الف فكره وحسبه تجيني.

ـ غير يريدهم يصيرون مثله والهم اسمهم ومركزهم وبعدين شحلاتهن ضباط وعسكرين ورجال دوله جمال وقيافه أدعيلهم الله يحرسهم ويرزقني واحد مثلهم ضربتني عـــلىٰ رأسي وعصبت ليش يا ماما

ـ شتسوين بالعسكـري ينشلع گلبج وياه والله تموتين ناقصة عمر عـــلىٰ خوف وقلق يا راح يا اجه
ابوج وعصام شُــــــنو نسيتي سوالفهم المكسره وخياناتهم المتخلص الله يساعد گلبي وگلب اسيا والله يعيين التاخذ مروان

ـ شو هيچ ماما گلبتي عليهم فرد گلبه خوما كلهم سويه مو شرط

ـ شمدريج أنتِ

ـ أدري وأخواني يشبهون بابا هواي بكل صفاته طبعاً يطلعون مثله ف لاتخليهم مثال مو كل اصابعج سويه ان شاء الله اخذلي عسكري بس اني بحياته ! أحلى امنيه والله
ضربتني وطفرت بعيد عنها وشايله الجفجير وتحجي وتأشر

ـ من أنعل ابوج لابو أهلج قليلة تربيه اللي أستحوا ماتوا عمت عينج عـــلىٰ هيج أمنيه عليمن تطلعين الخلف عـــلىٰ الخلفوه نفس طينة ابوج واخوانج غاسله ايدي منكم .

ـ خلص سگتنا بس لاتزعلين

ـ أني اريدلج الستر ورجال يحبج ويخاف عليج لو هم تمررميين مثلي ويه ابوج اخ لو ابوج وأخوانج يوافقون واسوي اللي بالي

ـ هاا أمي رجعنا

ـ أي رجعنا ليش شبي مو ابن خالج ورجال شاغول هذا الباب ما يفوته رجال بي حظ اخته تعشگه شبي حظي متردينه

ـ ڪُــل عقلج ماما حبيبتي، بعدين أنتِ مو شايفه عيشتهم وبيتهم طين وشغل وزراعه وفلاحه وأخواته سته وياه وما عنده شغله ثابته يعني عاجبج تنطين بنتج دارسه ومتعلمه ومتعينه وتعبانه عـــلىٰ روحي لفلاح شگلتي لنفسج .

ـ شاف الذهب وگال مزنجر ليش شبي الفلاح ما عاجبج بنت أبوج شيطلع منج خشمج متر، والله مو صوجج صوج أبن اخوي رايدج ويهواج خو أنتِ الخسرانه كلتلج اني رجال بي حظ يحبج ومشتريج شتسوين بالبيت والشغل والجاه اذا ماكو راحه

ـ تفكيرج سطحي ماما

ـ لا والله تفكيري عميق أنتِ تفكيرج السطحي، لو بس تشيلين المثاليات والتباهي من رأسج جان عرفتي امج تريدلج السعاده بس شسوي محد يأخذ بكلامي

ـ ماما أني مو رفضته عيباً بإبن اخوج شاهين يخبل الف وحده تتمناه بس مقصد كلامي عقولنه مختلفه البيئه تختلف يعني راح يعاني من هالسالفه غير مثل أسيا وعصام بس يعيب عليها وعـــلىٰ أهلها وما يگولها غير بنت الفگر ومن هالحجي اليغث

ـ واخوج الزمال وأبن خالج واحد

ـ لا طبعاً أخوي فدوه لعينه الضابط عصام عـــلىٰ سن ورمج هيبه وشخصيه واله مكانته وشخصيته

ـ بالعكس ماما بالعكس روحي شوفي مجد كاعد اريد أدزه لـ الاسواق

ـ خوما زعلتي

ـ عـــلىٰ شُــــــنو أزعل الما يسمع گلمتي هو الخسران خليكم ورا ابوكم والجاه مالته والخشمه عالي هي تكعدلكم حظ اني بنت الفلاح منو يأخذ بحجايتي روحي امي روحي .

أزهار ـ حسيتها زعلت طلعت عفتها ورحت دكيت الباب يله مجد أكعد الدنيا عصر كوم كافي نوم

مجد ـ أجييت بس اسبح

أزهار ـ ديله والغده جاهز وأمي تريد أدزك لـ الأسواق ما رد عليه طلعت كعدت بالحديقه وأندك بابنه بس لا خالي اجه لن خوالي بس من يطلع بابا يجون طلعت امي على صوت الجرس صيحي مجد يفتح أني رايحه لغرفتي

وصال ـ وين موليه فتحي أنتِ مجد نايم عرب متكعده هذا خالج اجه سوده عليه ركضي موكفته يم باب

أزهار ـ هم اكو احد وياه

وصال ـ ما ادري دتروحي فتحي لما اطفي الجدر

أزهار ـ وجدرج متطفينه الا هسه ماشي رايحه امري لله رحت فتحت الباب خالي سلمان هلاو خالوا بوسته وراه شاهين يباوعلي بنطرات غريبه وركز عـــلىٰ دشداشتي جانت جوه الركبه بشوي ودلعه وفاتحه شعري واصل لخصري اتفضلوا اتفضلوا ماما هذا خالو سلمان

سلمان ـ ماكو أستر من هالكلابيه يبعد خالج والستر حلو
وأنتِ جنج جماره والعين عليج تجيبين التايه الله وكيلج

أزهار ـ مشوا وشاهين عافنه وراح عـــلىٰ سيارته نزل صناديق الفواكهه والخضره واني لازمه الباب انتطره يدخلهم باوعلي وتركيزه بنص عيوني

شاهين ـ وين أخليهم

ـ خليهم اهنا مجد عود يدخلهم اتفضل أنتَ

ـ هاي كل واحد يدك الباب أنتِ تفتحينه وبهذا لبسج

ـ لا طبعاً

ـ لا واضح

ـ وأنتَ شگو

ـ شُــــــنو اني شگو أنتِ بنت عمتي عرضي أمشي تستري بويا الله يستر عليج امشي أنكلعي من وجهي

ـ باوعتله ما راضيه ومشيت كدامه وهو ضل يتأفف بإنزعاج دخلت الصاله وخالي نزل رأسه واجتي امشي تحجي عليه اي شگوو شبيج

وصال ـ روحي لبسي شيء مستور فضحتيني كدام خوالج شيكولن عليه ما مستره بنتها

ـ عـــلىٰ كيفج هذا اللبس لابسته بالبيت ماكو احد وبعدين أنتِ طلبتي افتح الباب الهم لاتجيين عليج بكلامج اوه عوفيني عفتها وصاحت وراي

ـ هذا دلال ابوج طلع عينج روحي لبسي شيء مستور وغطي شعرج سودتني ابن اخوي راح تجيبلي الجلطه صعدي وتعالي قدمي الضيافه تحركيي عـاد

ـ كل سالفه ذبيتها ورا ابوي خلاص رايحه ، صعدت لبست بجامه عريضه وفانيلا وذبيت شال عـــلىٰ شعري ونزلت حضرت الضيافه واخذتها الهم قدمتلهم وصلت لعنده عيونه أكلتني لما عيب جان كلبت الصينيه عليه شدعوه شيل عيونك

" مشيت وإمي تغمز وتهمس زفرت نفس بقلة صبر ابتسمت وكعدت بصفها وبحضني الصينيه

وصال ـ اي يا أخوي شلونكم سناء والبنات شلونهن ابويه وإمي والباقين كل منكم

سلمان ـ الحمدلله كلهم بخير يسلمون عليج وعـــلىٰ خلفتج والطريق ما تبعده سياره لو غاسله ايدج منهم كلهم

ـ نزلت رأسها بخيبة وجاوبته

ـ عدهم دوامات والتزامات وخفارات احنه ما جاي نشوفهم

سلمان ـ لا تبررين خيتي لاتبررين وتغطين عـــلىٰ زلمتج ولدج نعرف گلشي ونطلبج جيه تجيننا وتجييبن وياج أزهار وأمي وأبوي اكدوا عليه أبلغج دام ولدج ما منهم فايده عـــلىٰ اقل زهوره خوالها يحبونها ويسألون عليها شتكولين بعد خالج

أزهار ـ الله كريم خالوا يتعاتبون بينهم واجه مجد سلم من بعيد وامي تأشر برأسها تقدم وباوسهم واني كذلك مجد تحرك وجع مجد

مجد ـ شلونك خالوا شاهيين شلونك

سلمان ـ الحمدلله

رياض ـ زين

ازهار ـ مشه وطلع لبرا وأمي انقهرت وخالي شوي وكام

سلمان ـ لاتقهرين بروحج ابوهم منو يله خيتي نسلم عليج أزهار عود تعالي ويه امج خالاتج وجديتي وجدج يردون شوفتج

أزهار ـ ان شاء الله خالو بوسها ومشه وتقدم شاهين باسها من رأسها ومن بين عيونها

شاهين ـ ولا يهمج عميمه فدوه إلج

وصال ـ فدوه لطولك الله يرضي عليك

أزهار ـ عبر من يمي هي نظره هي أبتسامه ومشوا امي وصلتهم الباب واني رجعت لملمت الضيافه بالمطبخ واجت عصبيه

وصال ـ تردون تموتوني أنتِ وأخوانج حضرتج ما تحترمين لبسج مو قانوني والثاني يسلم من بعيد ويطلع بس مكتوب عليه شلعان الگلب من كبل لاتصيرون ابوج ما احترمهم ولا قدرهم عـــلىٰ كد السلام ويمشي لا رجال ريح كلبي ولا خلفتي والله لن مو من مقامهم حضرة جنابه قسمة الگشره وساعة السوده الصارت .

" راحت لغرفتها عصبيه واجه مجد باوع الصناديق

مجد ـ منو عاتب عليهم وكايلهم جوعانين شنسوي بي

أزهار ـ شعليك أنتَ فوك ما جابيين وأنت الما راضي
ليش هيج تصرفت مو خطيه امي يضلون خوالنا ويحبونا ما شايفيين منهم الا كل الخير

ـ شمسوي شحاجي شكايل اني يمعوده هو سلام الا مباوس واني توني كاعد من النوم روحي بخشمي وهما الا هسه يله يجون

ـ شو ماتعرف تحجي اسكت اسكت لاتسمعك امي ، صب من الجدر وكعد يأكل باوع ؏ الصندوق وكال

ـ غسلي النا من هالخضره شكلها يشهي

ـ ما عرفناك

ـ ترى توني كاعد من النوم فضيناا أزهـــــــــــار

ـ لاتعيط عابت هالشكل، غسلتها وخليتها كدامه وكعدت انظفها واعزلها خليتها بالثلاجه والبصل بالسله برا كملت ورحت عليها يمه كومي تغدي

ـ ما اريد اتغدي أنتِ عزلتي الصوغه

ـ اي كملتها ورتبتها بالثلاجه رحت حضنتها خلاص باجر نروح اني وياج نبات ونرجع شتكولين

ـ شكول كوون ابوج يوافق تروحين وياي

ـ يوافق ما عليج منه اني احجي وياه اساساً اني ضايجه وماله من نفس الروتين بيت ودوام اريد اروح واشوف جديتي وجدو وخالاتي ابتسمت وارتضت

ـ لعد قنعي خل مجد يروح ويانا

ـ واذا مجد ما يروح

ـ لا يروح بس يشوف اجواء القريه يتونس وخل مروان يووصلنه هذا شوي زين

ـ تدللين يله كومي كامت وصبيت الغده وكعدنا ناكل والدنيا غوربت واحنه هسه نتغده كلهم دوامات.

" كاعدين نباوع عـــلىٰ التلفزيون ومجد طلع لبرا وإمي عينها عـــلىٰ تخاف يتأخر ويجي بابا يضل يحجي ويخبصنا واندك الباب ركضت فتحت باب الهم ابوي وراها سياره عصام مروان ما اجه شعجب إحتمال عنده خفاره دخلوا وامي استقبلته نزع البسطال والسلاح كلهن واجه عصام وجه زين خفت عصبيته

عصام ـ اكو أكل

وصال ـ اي امي طابخين تحب اسويلك مقليلات او اشويلك

عصام ـ لا تعبين نفسج صبيلي من الموجود فايت أسبح

أزهار ـ بقيت وحدي بالصاله واجه ابوي سابح اخذ الريمونت مني كام يگلب ؏ الاخبار وحته وهو يباوع التلفزيون متعصب الله يساعد ماما عليك

كمال ـ شلونج بالدوام بابا

أزهار ـ زين يعني

ـ ليش خوما يضايقج كوليلي بابا انعل والديه

ـ لا بابا شسالفه ماكو شي اقصد تعب وهوسه دوام بعد

ـ اي بابا ادي وظيفتج احسن ما يكون لاتخلين قصور خليج ذيبه مثل ابوج واخوانج بس اخ لو مجد يطاوعني ويخلص وادخله كلية عسكريه مثل أخوانه

وصال ـ لا يا رجال عوف الولد عـــلىٰ راحته هذا مستقبله لاتربطه بالعسكريه انتوا ما قصرين ما شاءلله صرنا عائله عسكريه الاب ولده

ـ ليش مضايقينج بشيء

ـ لا يبوه شگلت اني بس اقصد كافي كلهم عسكريه اني هم أم واخاف عليهم هذول ولدي

ـ وأني اب محد يعرف مصلحتهم بگدي هذا خدمة شرف خدمة وطن لاتصيرين حجره عثره بطريقهم

ـ سگتت عمي أنتَ اعرف بمستقبلهم

ـ اي سكتي محد طالب رإيج

ـ بالگوه لزمت اعصابها عليه هو جان يحجي وعيونه تباوع الاخبار أول باول خلت الصينيه كدامه واجه عصام تكابلوا هو وياه وابوي باوع يميين يسار عرفت يدور عـــلىٰ مجد

كمال ـ مجد ويـــــن

ازهار ـ أني وامي وحده تباوع الثانيه بقينا ساكتيين وعصام عاط بينا

عصام ـ مو يحجي وياجن مجددد وين

وصال ـ طلع ويه جماعته هسه يرد

كمال ـ أني مو مانع محد يطلع من تغيب الشمس والا بعلمي شو كلمتي صايره ما الها اهميه وصااااال

وصال ـ لا عيني انت لا هسه يجي ما تلكاه الا فاتح الباب

عصام ـ كايم اشوفه وأنتِ يمه لاتنطي عين الولد مراهق ويستجلب علينا يضل دايح بالشوارع خل يخلص اذا ما كظبته التدريب

ازهار ـ عصام طلع وأمي كعدت مقابل بابا وكاعدين ننتظرهم مر وقت ودخل عصام لازمه من اذنه

وصال ـ لا على بختك يمه رجال عوفه ابني

مجد ـ مو بالله يمه رجال شوفي أبنج يسحل بيه

كمال ـ اي ابني رجال ميخالف أخوك ويخاف عليك

عصام ـ رجال تسمع كلمة الأكبر منك مو صايع بالشارع ويه ربعك الهتليه يله اطلب السموحه من الوالد

مجد ـ اسف بابا

كمال ـ ما اريد هذا الشي ينعاد اللي أكوله هو اليمشي كلام زايد ناقص ما اريد كلمه فوك كلمتي بهل البيت متصير فاهميين

أزهــــار ـ الكل سگت كمت يله تصبحون عـــلىٰ خير رحت بوسته عافيات باباتي

كمال ـ ؏ كلبج حبيبة ابوها ابقي جايب خوش حلويات

ازهار ـ لا بابا تعبانه واليوم نهاية الأسبوع ارتاح انام من وكت وتذكرت خوالي نسيت اكوله صدك بابا اريد احجي وياك ماما باوعتلي بقلق

كمال ـ گولي بابا

ـ ماما تريد تروح لخوالي

ـ خل تروح منو مانعها عصام عود ودي أمك لخوالك

ـ بابا وأني هم اريد اروح وياها عصام ذب خبزه وخزرني وجاوب قبل بابا

عصام ـ وأنتِ شگو موليه بنيه شگدج شكبرج كعدي بالبيت كافي عليج وظيفتج انوب تروحين خوالي ولدهم كلهم هناك

أزهار ـ أي بابا عفيه گوله هما خوالي خوما غربه وهم اطلع شوي تتغير نفسيتي والله مشتاقه لجدو وجديتي وخالاتي من زمان ما رايحيين وخالوا سلمان وشاهين جانوا يمنا العصر وأگدوا علينا

كمال ـ شو ما عندي خبر وصال أهلج جايين

وصال ـ اي مروا ساعة زمان وراحوا

كمال ـ هما هذول أهلج عـــلىٰ السريع جياتهم

ـ عدهم شغل مو كيفهم يله عـــلىٰ الجايات

عصام ـ سألوا عـــلىٰ ولدج

وصال ـ انتوا ما تسألون عـــلىٰ خوالكم عبالك غربه راحت بنفسي تروحلهم

ـ يمه فدواتج منو عنده مجال يحك رأسه يله باجر نروح ونسلم عليهم ونتغده هم بس لاتزعلين

أزهار ـ هاا بابا اروح

كمال ـ أي بابا روحي

عصام ـ خو أنتِ محد يرفضلج طلب الأميره ديانا

أزهار ـ شکو مزعوج

ـ انزعج منج ششايفه نفسج أنتِ

ـ شايفه نفسي بيك اخوي الضابط عصام بابا وماما ضحكوا وهو اختنك باللكمه

عصام ـ ينعل بليسج

كمال ـ شوف عرفت شلون تسگتك ولك هاي شمعة البيت من كثر اخواتك، لعد مجد هم اخذوا وياكم لاتعوفونه بالبيت لوحده

مجد ـ وأني اخر الناس بالجذب أخذوا رأيي الك الله يا اخر العنكود

عصام ـ محد طالب رأيك كافي تسمع الكلام وتنفذه

كمال ـ گافي متلاغين بينكم عصام أبني باجر اخذهم لخوالك وارجع ووصال لاتطولين يومين ورجعي

وصال ـ ان شاء الله

ازهار ـ يله اني اروح اجهز جنطتي عفتهم وصعدت غرفتي تمددت بفراشي ولكيت رشا متصله ما جاوبتها تسأل رحتي الصالون لو لا ما الي خلگها .

" كمت جهزت طلعت جنطتي ملابسي مال بيت ماكو ثوب طويل هاي شلون سالفه نزلت ماما عادي اخذ تراكسود وياي

عصام ـ علمود اشنقنج بي

كمال ـ عصااااام، عادي بابا بس اخذي مستور ردان كامله

عصام ـ بابا صدك تحجي ترى تنجلب علينا بعدين

كمال ـ لا تتدخل شنو تستجلب تعلم الأحترام ولك هاي أختك شوف عصام اذا تضل ورا اختك متلوم الا نفسك

أزهار ـ فدوه لعمرك حبيبي عصام وجه صار دم وماما تعض بشفايفها دخلت طلعت تراكات والغسول مالتي والمرطبات والعطر وجنطه مكياجاتي كملت كلشي وتمددت ومر وقت واندك الباب منو

عصام ـ اني وجع شو فتحي

ازهار ـ خير شتريد فتحت الباب نعـــــم جان بيده جيس شمره بوجهي شوي خلي عندك ذوق شُــــــنو هذا

عصام ـ ملابس لبسيهن هناك تستري بويا عينج طالعه بدلال ابوي ويا ويلج ما تسمعين كلمتي

ـ بابا عايش واسمعه كلمته هو يقرر انت حكمك عـــلىٰ مرتك مو عليه

ـ