ـ يمممممه رجاءً لا تتدخلين

أسيا ـ دخلت الغرفه بجيت من كل گلبي أختنكت حيل وصار عندي وجع بطني تغطيت ولفيت رأسسي ونمت وأني أشهك ما اعرف شكثر مر وقت وانرفع الغطا من رأسي صفن بوجهي كبل اخذني بحضنه وبجيت ليش هيج سويت بيه

ـ خلص گلبي موزين عليج شُـــــنوْ نسيتي نفسج حامل

ـ خايف عـــلىٰ البطني

ـ والله خايف عليج و؏ البطنج هو نازل من ظهري وأنتِ بگلبي

ـ مسح دموعي وباس عيوني وعصر وجهه بأيده الأثنين ولطخ كصته بگصتي

ـ ما اريد أخسرج ثمني هالكلمه بعقلج وخليلها وزن وأعرفي معنى كل حجايه احجيها الج

ـ أن شــــــاءالله

ـ زعلج ودموعج عـــلىٰ خشمي حقج عليه بنت الاوادم

ـ ابوس خشمك حضنته وابوس بكتفه بحنيه وشوك قربني اله وايديه تغلغلت بشعري و؏ خده أبتسامه حب ورضا رفع خصله من شعري وشمها حيل وأيدي تتلمس صدره فتحت السحاب مال التراكسود بوسته بعمق وشغف ورفعت أيدي لوجه واصابعي تملل بشورابه رفعت نفسي لمستواه وبست شورابه وحقك عليه وهاي بوسه من هالشوراب زلمتي الاحبه أعتذر منك ما جاوبني بس صافن عـــلىٰ حركاتي

ـ أسيــــــــا

ـ عيونها

ـ لأ من اسامحج تتمادين أكثر يرحم أبوج بكبره أعرفي وحفظي أطباعي كتلج ما رايد خسراتج

ـ تأمر كلتها ونزلت رأسي لن فعلاً حسيت نفسي غلطانه بحقه رفع حنجي وباسني من خشمي حبيت هالمره اني ابادر تقربت لوجه وبسته من شفايفه بجراءه وتفاعلت وياه وهو أجن من حركتي لمني بحضني ويحير شلون يفرض رجولته من بين انفعالنا وشوکنا وحُبنا حجيت بصوت ذايب عصام أعشق رجولتك

عصام ـ وأعشقج

ـ أعشقني تمرد عـــلىٰ عشقك

ـ شسوي بيج من تولدين يا تمرد ولج يا تمرد شعلتي أهل أهلي وكاظ روحي عنج وما شايف شغلي عدل لن حامل

ـ ضحكت وهو محترك بناره اخذني بحضنه وهو خايف عليه من روحه لمني بحضنه حبيبي بعدك زعلان مني

ـ نهيت الموضوع وبعد ما ينفتح كلشي بوگته

ـ حضنته وقررت اتفهم واتفاهم اطباعه اللي صعب عليه حفظهن كل ما اكول خلص أسيــــــــا تقبلي كلشي هو عصبي وانفعالي وما يحب الغلط مشكلتي بينا تشابه اثنينا نار .
__

أزهار

ـ لاحظت صاير شي بين عصام وأسيا وخفت أني السبب لان سمعت أطراف حديثهم المشكله هي من دخلت بيتنا أني لوحدي بين أخواني وهي حبابه وتصادقنا وهي تحجيلي كلشي واخويه من نوع حريص اعرف تفكيره عميق وين يبحر

" نزلت والبيت هدوء لكيت بس عصام وأسيا بالمطبخ صباح الخير

أسيا ـ صباح الخيرات تتريكين أصبلج چاي

أزهار ـ أي والله بلا زحمه عليج كعدت ماما وبابا ما كاعدين

عصام ـ ليش ابوج لافي على البيت نايم بيت جدي

أزهار ـ وأمي احد شافها

ـ عوفوها يله اني رايح اشغل السياره شربي جايج وتعالي اوصلج الدوام واليوم أصلح سيارتج ونفتك من هالسالفه

ـ شال السويج وطلع شربت جاي وشلت جنطتي يله أسيا رايحه عيونج على أمي واذا صار شي بلغيني حبابه

ـ ماشي عيني أطمئني هي خطيه رادت تروح لاهلها شو عصام خابره وگاله تريد تروح لخوالي وما وافق گاله متروح ما اعرف بعد شصار ورا هالاتصال

ـ ماشي فهمت طلعت لكيت عصام يحجي بالتلفون وشغل وطلعنا وجان مزعوج

عصام ـ ما يصير هيج عايفها كل وقتك لاهي عنها وفواكاها متقبل تروح لخوالي ماشي ماشي راضيها مو تعوفها على زعلها هذا هو يابه في أمان الله .

أزهار ـ وصلنا ونزلت مشكور تعبتك وياي

عصام ـ شمسوي قابل هسه سيد الوالد اذا ما تصلحت يغيرلج سيارتج وتشيلين خشمج علينا

أزهار ـ شعندي غيركم فدوه اروحلكم أبتسم وراح الله وياه دخلت وسلمت وبلش الدوام واجت رشا هلاو

رشا ـ هلاوات عبالي أجيج فد يوم لن أنتِ بالجذب متعزميني على كهوه أستكان جاي ميبستها فدمره

أزهار ـ تعالي هلأ بيج والا اكولج الجمعه عازمه صديقاتي كلهن وتعالي ننجمع جمعه حلوه وهم نتونس شتكولين

ـ اي والله ياريت احب هيج أجواء خلاص الجمعه أجيكم

ـ هلا بيج راحت فرحانه ابتسمت ورجعت أكمل شغلي لما خلص الدوام طلعت وجنت متوقعه عصام يجي يأخذني بس گال يأخذ السياره يصلحها بقيت صافنه وراح عليه الوكت حتّى رشا راحت للبيت .

تمشيت ووكفت انتظر سياره وطبكت تكسي باوعت هو نفس الشخص أي هو
وهالمره الزم لساني وما احجي وياه وأخلي بابا وأخواني كدامي وبعدين هو ماكو شغل الا هنا قحط اماكن احجي بداخلي وهو احسه يباوعلي باوعتله وابتسم تلقائياً ابتسمت كبر شبيه أستخفيت تراجعت وعگدت حواجبي

هشام ـ يلة صعدي مو أجداد اجدادنا أنصمطو عوفي الكبرياء عـــلىٰ صفحه مو وكته بهل الحر صعدي اوصلج بكروتج مو خيرات

أزهـــــــــــار ـ ما تحركت من مكاني توكل

ـ صعدي وبلا عناد ما تلكين سياره وبيها تبريد كسري غرورج

ـ باوعت الشارع يصفر هسه لو لازمه خط ويه رشا مو اشرفلي من هالزقنبوت اللي جاي اشوفه ما كلت باطل فتحت الباب وصعدت وجه التبريد ناحيتي

ـ اخاف تموعين

ـ يباوع بالجامه ويحاجيني نزلت رأسي وانطيته الكروه ما عندي خرده

ـ اني عندي

ـ اخذها ورجعلي الباقي تندل البيت

ـ لا شمدريني ابن عمج خالج

ـ انطيته العنوان وصلنا البيت يم الباب من نزلت مدلي ايده بيها كارت مال رقم

ـ خاف تحتاجين خط اني اشتغل خط موظفين وطلاب جامعات

ـ اخذته منه ما اعرف ليش اخذته مشيت وكالي

ـ حتى كلمة شكراً متنكال شدعوه عليچ

ـ ما التفت ولا جاوبته فتحت الباب ودخلت وبيدي الكارت رقمه ضميته بالجنطه بالجيب خاف يوكع ويشوفونه اخواني شيخلصني منهم بعدين اني هم ثوله شكوو اخذته منه وشسوي بالخط اصلح سيارتي واخلص من هالسالفه شبيه اني

دخلت البيت لكيت عصام يفتر وشكله متعصب وامي باوعتلي تكرظ بروحها شكوو سلام شلونكم

عصام ـ شلووووونه يعني منوووو هذا الوصلج للبيت

ازهار ـ منو قابل سايق تكسي

عصام ـ سايق تكسي كلتيلي مو؟

أزهار ـ ما احس الا هجم عليه يضرب بكل قوته عبالك مجرم عنده ايده وما مدت وامي واسيا يفازعن ويتصارخن وهو انكلب ابو الهول

ـ سايق تكسي مووووو والله من انعل اهل اهلج عـــلىٰ هالتربيه السكط عبالج ما شفته شنو نطاج رقمج بنت السطعش گلب وأنتِ حضرتج متونسه ما كلتي باطل

ـ عوفنيييي تنكسررر ايدك والله والله الا اكول لبابا عليك يا حقير اني كلت هيج وضربني كف وجر جنطتي كلبها كلها وتطشرت اشيائي وفتح الجيب الصغير وطلع الرقم وشككه بوجهي وعاط

ـ هذااااااااا شُــــــنو تكدرين تنكرررررررين يا أدبسززز

ـ رقم شنو قابل سايق تكسي وانطاني رقمه اخاف احتاج خط هو هذاااااا شغله عـــلىٰ باب الله الا تخلون بيها صخام وحبجيات شسوي لعقولكم الوصخه مشكلتكم مو مشكلتي راد يضربني صرت ورا امي وهو يهد ويرعد واسيا صارت بصدره وتفازع بي خطيه عجنها عجن كل شوي محصله كفخه لا بيها لا عليها راح يولدها قبل اوانها

عصام ـ بكل وقاحه تجاوووبين والله انعل سلفه سلفاج واني كواد اذا خليتج اداومين والا ازوجج واكسر ركبتج واشوفج شلون تراددين بوجهي ولسانج بطول بسطالي اصبريلي يا أزهـــــــــــار والله لا اشمرج بحلك جلب

وصال ـ کااااااافي عاد تخبلت توليتها الصلي هاي اختك وحيدتكم همزين ما عدكم عشرة اخوات بس اني اعلمك الا اخليهن بيد ابوك وهو يتصرف

ـ خليهن ليش لا بس لاتنسين اذا اشوفه اللي شفته بالكاميرات شيعمل وشيقررر يمكن اني ارحم منه عليها اقري عـــلىٰ روحج السلام ابو التكسي يرقمج وحضرتج بكل عين كويه تراددين بوجهي اصبريلي أزهـــــــــــار

وصال ـ أمشيييي ولي لغرفتج امشييييي الله ياخذج

أزهـــــــــــار ـ رايحه بس والله يجي بابا واكوله والله ما يصيرلك خير اني كلت هيج ما احس الا هجم عليه لا امي ولا اسيا كدرن اله يجر من شعري ويضربني راجديات واني اعيط بعلوا صوتيييي يممممممممه راح يموتنييييي باباااااااا الحكلييييييي

عصام ـ هااااااي تربيه الـ باباااا انعلج وانعل ابوج وياج حيوووووانه تردين تصخميييين وجهيييي شلوووون تاخذين الرقم منه شلوووون اني كواد كاعد بهل البيت كواد شاد كرون ستيييييييل واخليج سري مري لا والله اذا ما سودت حياتج يا ازهار اني نغل وما نازل من ظهر ابوي

أزهار ـ سحبتني أمي ورا ظهرها وضربتني راجدي بكل قوتها واني مو حاسه بشيء مثل الفاقده وعقلي تحت تنويم بس احس بطعم دم بحلكي وعصام أيده تنزف واسيا تشد بيها بالشاش إشسويت اني

وصال ـ إشسويتي ما تعرفين أشسويتي حقج من عرامج وصلافتج يا أدبسززز تردين تموتين إخوج تردين تذبحينه لهنا وصلت بيج المواصيل اخوج دمه حار وغيرته ما تسملحه اخته تترقم تكومين تواجهينه وتضربينه بايده من جعل أيدج الكسر والشل يا ازهار شسوي بيج لو موتته شسوي بيج غير الحكج بي والله ادفنج تف ؏ شكلج الزفر

أزهار ـ ما جاوبتها بس ساكنه وصدأ صوتها عبئ المكان وعصام ساكت وهادئ أشسويتله شلون أذيت اخوي شلون اذي روحي لا مستحيل اكيد هذا حلم كاعده على بايه مالت الدرج وصافنه عليهم وعيوني الرؤيا مو واضحه وامي واكفه يمه وتحجي وياه وعصبيه

وصال ـ امشي روح المستشفى يخيطونها الك

عصام ـ ما يحتاج بسيطه يله أسيــــــــا فضينا عـــاد
يمه كولي لبنتج لاتشوفني خلقتها لا ومحمد اقضي عليها

وصال ـ أمشي ولي بغرفتج وحسابج كبر حجمه خل يجي أبوج وهو يعرف شغله وهالوظيفه بالحلم بعد متشوفينها هذا الدلال هذا تاليته عرامه وقلة تربيه ادبسزز حركتينا الله يحركج امشييييي أنكبري بغرفتج

أزهار ـ مشيت تعبانه وأمشي وأعثر بالگوه صعدت فتحت غرفتي وتمددت بفراشي وأحاول اذكر أشسويت عصام ليش أذيته عصرت مخي مو ذاكره شيء بس جسمي يرجف ودگات گلبي صارت بطيئه ؏ خوف على صدمه كبيره من اخوي ظن بيه السوء وخسرته وخسرت ثقته والاكبر من هاي صدمتي بروحي شلون اذيته هذا روحي أخواني روحي من الدنيا واحدهم قطعه من گلبي .

" أسمع أصوات وهوسه وركض وبابا يصيح عليهم وسمعت صوت عصام اي هذا عصام

عصام ـ كب ماي على وجهه يمعود

كمال ـ والله أكلب البيت ؏ روسكم كلكم ما تكوفوني لا انتوا ولا امكم اذا ازهار صارلها شيء أزهار بابا ازهااااااار عزيرة كلب ابوج فتحي عيونج بابا ولك مروووووان وجع شغل السياره عصام اذا لحكتنا ورب العزه انخلك نخل أنت وأمك العوجه

أزهار ـ أنرفعت ومشيه مو متوازنه عبالك وكعت من تل عالي وريحة بابا بخشمي اي هذا عطره اني بحضنه وهذه سترته فتحت عيوني وشفته يبجي ويمسح على وجهي ومروان نازل شوكت نزل منو دز عليه شجاي يصير امي وين اريد احجي بس لساني مربط احس بروحي مبنجه

" نرفعت كلني ريحة العطر تغييرت هذا عطر مروان اي مروان يمشي سريع وبابا صوته اختفى خلاني على السديه وخبص المستشفى عليهم

ـ على كيفك خويه امشي اطلع برا خل نشوف شغلنا

مروان ـ وين طلعونييييي ما متحرك خطوه وحده فاهمه شوفي شغلج لا اكلب المستشفى على روسكم يلااااااااااا

أزهار ـ هوسه وصوت اجهزه وصوت مروان راح طلعوا برا سوده بوجهي خايف عليه كل هذا كلبي يم عصام شلون اذيته تنكسر ايدي

" صحيت وصوت اجهزه مزعج تمللت وبابا يم رأسي بابا شصار

كمال ـ الف الحمدلله من فتحتي عيونج الحلوه ماصار شي باباتي ولا يهمج تصيرين زينه وكل اللي وصلوج لهل الحاله احاسبهم واحد واحد هسه المهم عندي صحتج

أزهار ـ ليش شبيه

مروان ـ هبوط حاد بالسكر ربج ستر ما دخلتي غيبوبه وفقدتي الذاكره جان منين النا أزهار بعد، يله الحمدلله عدت سلامات تنذكر ما تنعاد والف الحمدلله على سلامتج لو تدرين أشسويتي بينا

أزهار ـ أسفه ما قصدي أصلاً ما اتذكر الا القليل بس عصام اي عصام وينه وامي

مروان ـ بعدين هسه أرتاحي ما عليج منهم ارتاحي خيتي

أزهار ـ بابا كعد تعبان وجهه أصفر وصافن عليه ومروان يفتر ويباوع على الملف مالتي ويرسل تقارير باوعلي وأبتسم رديت الابتسامه واجت الممرضه ما فهمت شنو يحجي وياها واجو مجموعه دكتادره ضلوا يحجون بس أنكليزي مروان يعرف ودارس مجموعه لغات ف جان يفهم عليهم ويترجم لبابا ولدكتور الوياه ومروان يرجع يجاوبهم بلغتهم خلصوا وطلعوا اللي عرفته بابا داز على مجموعه أطباء يشرفون على حالتي ومدخلني مستشفى خاص وهو جان تعبان سوده بوجهي مروان هو تكفل بكلشي .

" مر يومين وبابا وياي ما عافني ولا لحظه هو يوكلني ومروان وياه وعرفت مانع اي احد يوصل المستشفى بالاخص أمي وعصام ردت احجي بس مروان منعني

" انفتح الباب ودخلوا عمي فاضل وعمتي فريال وعمتي زينب سلموا وعمو مقهور ويبوس بيه

فاضل ـ سلامات عمو سلامات

زينب ـ ليش هيج وكعتي گلوبنا شجاج يا ماما امي رادت تجي بس تعبانه ضلت يم أمج لن تعبانه ضغطها صاعد ما جاي ينزل

فريال ـ بسم الله عليج ماكو شي لاتخافين ماماتي

أزهار ـ عمه امي خل تجي اشوفها قنعي بابا فدوه اروحلج

زينب ـ ليش أقنعه يا عيني أمج لن تعبانه ما يخلونها تجي هسه عوفيني من إمج شصارلج ليش وكعتي شصارلكم سألت ابوج ميحجي ومروان ما تطلع منا الحجايه هو بإيام الخير أخرس الحايط يرد وهو ما يرد عاد هسه

فريال ـ عوفيها زينب خل ترتاح هسه وكته وعيال بيت بيناتهم ماكو الا الخير أن شــــــاء الله يلا ماما حبيبتي ارتاحي ما بيج غير العافيه

أزهار ـ الله يعافيج عمه، وانفتح الباب ودخل مروان غمزلي وسوالي حركه معناها لاتحجين شي هزيت رأسي وعمه زينب ضلت يمي وأمي وعصام ما شفتهم ولا وصلو

" وكتبوا اليه خروج من المستشفى صحتي تحسنت وتأكدوا من سلامتي .
" عمتي لبستني وطلعنا للبيت مروان يسوق وبابا ويه عمي فاضل بسيارته بالطريق واتصل واسمعه يحجي

مروان ـ بالطريق جايين اي اضبط نفسك أمي شلون صارت خوالي شجابهم هسه يله بالطريق راح نوصل

أزهار ـ سكتت وباوعت على مروان بالمرايا دار وجهه عني معقوله هو هم شك بيه مثل عصام ما فكروا يسمعوني وبعدين يحكمون عليه شافه الرقم وهيج لعد لو علاقه شيصير .

" وصلنا وشفت سيارة خوالي موجوده طبكت سيارة مروان ورانا سيارة عمو فاضل نزلت ومروان بيده جيس الادويه مالتي مشه كدامنه وطلع عصام واكف يم الباب وايده ملفوفه بشاش عبرت من يمه صفن بوجهي وغير نظرته عـــلىٰ عمتي وسلم عليها دخلت ولكيت جديتي نعيمه وأمي شافتني اجتني ركض تبوس بيه وتبجي

وصال ـ يمه بنيتي جان راحت من بين إيديه شحجي شگول سوده بوجهي تعالي امي امشي اخذج لغرفتج ترتاحين

الجده نعيمه ـ لا خل تجي اريد احجي وياها وأفهم منها شصاير بهل البيت تعالي ازهار

وصال ـ أبوج وصه محد يحجي لاتحجين

ازهار ـ هزيت رأسي وكعدت يمها تسألني وأهز برأسي ما اذكر شيء وكعت فجأه وهاي هيه

الجده نعيمه ـ شلون هيج وكعتي لازم صار شي متنعقل

مروان ـ جده من التعب والارهاق وهي أخر فتره هلكت نفسها بالدوام عادي تصير

جده النعيمه ـ ما جاي اصدكم جذابين بالأخص أنت اكبر جذاب وعصام شبيها ايده هم تعب وأرهاق اعرف مصيري اعرف الضامينه هسه خل أزهار تصير زينه عود الله كريم

وصال ـ أزهار كومي ارتاحي بغرفتي

أزهار ـ رحت لغرفة أمي تمددت وهي اجت وكامت تبجي حضنتني وتبجي وتبوس بيه وبأيده خلص ماما لاتخافين ما بيه شي

وصال ـ شلون ما بيج شيء جان رحتي من بين ايدينا ساعه اخوانج يكعدون بيج ما تكعدين

ـ يمه احجيلي شصار ما جاي أذكر

ـ سوده بوجهي يمه من بعد ما صعدتي غرفتج وعصام خابر عـــلىٰ مروان وعاف دوامه واجه تعاركوا هما وابوج والسالفه انلاصت بس ابوج واثق منج ومن تربيته احسن مني ابوج ما تجازينه بس اني اخ اني تنكسر ايدي يمه بنيتي يمه رويحتي

أزهار ـ بقيت بحضنها لليل بيتنا فرغ عرفت خوالي رايحين وبيت عمي فاضل هم طلعت لكيتهم مجموعين عصام شافني وكام وبابا عاط بي

كمال ـ وين مولي

عصام ـ عندي شغل

كمال ـ عوف شغلك هسه وأكعد بمكانك عندي حجي هواي اريد احاجيكم بي

أزهار ـ رجع بس على أعصابه كعد بس ما يباوع لاي احد متوتر من الكعده اجت امي جايبتلي العشه وبس تبجي باستني من كصتي وكعدت قريبه مني وبابا كام يحجي

كمال ـ شعندج مكابلتها وتنوحين لو فعلاً أنتِ ام جان منعتي هالثور أبنج عنها شلون تخلينه يضربها وأني ما موجود هاي اني عايش وهي تسرحون وتمرحون بكيفكم لو اموت شتسوووون هاااا شو سكتوا مستقوين عـــلىٰ أخيتكم وحيدكم ولكم حاجونيييي

عصام ـ حجيت مره ما احجي مره ثانيه

كمال ـ عصام حاجيني عدل لا اكوم انزعلك الحزام .

عصام ـ هذا العندي وضربتها لن عيني ما تحملت اللي شفته عرضي مو رخيص علمود اعبر الموضوع عادي واذا عاجبك هالتصرفات اني طالع من البيت

كمال ـ وين تطلع اكعد وخل نحجي مثل الاوادام وارجع احجيلي السالفه كلها وأول شيء أسمع من ازهار احجيلي بابا

أزهار ـ رفعت رأسي وعصام صدت وجهه منزعج حجيت كلشي وختمت كلامي وهذا الولد ما اعرفه مجرد وصلني وهاي هيه والرقم انطه لن كال خاف تحتاجين خط اني اشتغل خط موظفين وطلاب جامعات بس عصام الله يسلم عمره ما انطاني مجال احجيله

كمال ـ هاا عصام

عصام ـ هاا

كمال ـ سمعت أختك شگالت

ـ أي سمعت قابل اطرش

ـ هاي اخر مره تتصرف وتضرب من رأسك واللي يحاسب ويمد ايده عـــلىٰ اخته ما يلوم الا نفسه تردون تفرضون حكمم افرضوا بس مو عـــلىٰ بنتي افرضوا عـــلىٰ نسوانكم

عصام ـ هاي هي خراعين خضره ما شاءلله

كمال ـ أحجي عدل يله تسامحو ا وما اريد زعل بين الاخوان يله باباتي أزهار عصام ابني هاي اختك وحيدتكم باجر اموت منو يفتح عليكم الباب غيرها

عصام ـ الك طولت العمر والسموحه منك

أزهار ـ كمت وصلت العنده بسته من رأسه اسفه والله أنتَ ظلمتني بجيت وحضنته وتراضينا ورجعت كعدت يم بابا

كمال ـ باجر أجيبلج شلون سيارة

عصام ـ بعد لا سياره ولا وظيفه وكافي دلال .

يتبع
__

الحلقه السابعه
__

أزهار ـ كمل كلامه وباوعلي ورجع گال

عصام ـ أكو زواج وستر وغيرهن ممنو؏

ـ باوعت عـــلىٰ بابا بدون ما احجي هز رأسه وجاوبه

كمال ـ من أموت عود قرر عني وأفرض حكمك عليها دام اني عايش محد يتأخذ اي قرار يخصها واذا اجتها قسمه اخذ رأيكم اي بس مال أمشي عـــلىٰ رأيكم وحكمكم لا ما صارت وأزهار ترجع الها سسيارتها وظيفتها وكلام ثاني ما أريد خلص الموضوع ينسد نهائي مثلما انفتح بخبال تصرفت بقله فهم وطيش وحكمت عليها بدون ما تسمعها وجان سويتلنا سالفه الها أول ما ألها تالي .

عصام ـ يعني كلامي ما أله أي أهميه ماششي !!

"بس أنتَ بهاي قرارتك تكون أنطيتها الحريه أكثر من اللازم وكلشي مباح ألها وكلنا نعرف كثرة الدلال يخرب والخراب اذا لكه أساس ينخر بس ميخالف ضلوا هيج ضلوا .

أزهار ـ كام ومشه لغرفته وأسيا لحكته ومروان ساكت باوعلي بنظرات صعبه أفسرها

كمال ـ كومي أرتاحي بنيتي وما عليج من أخوج كلها يومين ثلاث ويفش ويرجع الوضع طبيعي واذا ما عاجبه الباب يوسع جمل أني ما جايز منج وصال اخذيها لغرفتها

وصال ـ يله ماما كومي أخذج لغرفتج ترتاحين يله حبيبتي

أزهار ـ كمت وعيون مروان عليه عبرته وصعدت فوك دخلت غرفتي وأمي نومتني بحضنها تمسكت بيها بقوه ونمت تعبانه وهالتعب احسه متراكم عليه من سنين .

" مر أسبـــو؏ ولازم أباشر بدوامي كعدت من وكت صليت وشلت السجاده ورن التلفون عـــلىٰ الميز جريته مروان جاوبته هلأ مروان

مروان ـ تروحين الدوام اليوم مو .

أزهار ـ أي أن شــــــاء الله ليش؟

ـ هيج اسأل لن شفت سيارة جديده طابگه بالكراج أكيد سيارتج !!

ـ ما أعرف والله هسه أشوفها

ـ تمام أنتبهي على نفسج لاتثبتين شك عصام عليج لن عصام من يخلي شيء برأسه يصير

ـ وأنتَ

ـ شبيه

ـ هم تشك بيه

ـ لااا لن ما شفت شيء موزين منج عـــلىٰ كلن الايام كفيله بالنسيان كدامج طريق طويل يله نزلي لاتتاخرين ؏ دوامج

ـ ماشي أنتهى الاتصال لبست ورتبت روحي ونزلت لكيتهم كلهم مجموعين عصام باوعلي من نظرات تتفحص لبسي من رجلي لرأسي يباوع بنظرات شك ويأكل بهدوء مميت كعدت بصف مجد وأسيا قدمتلي كوب جاي اشرب ومتوتره من وجوده كمل وكام وصفن بوجهي وهو يشرب اخر ما تبقى من أستكان الجاي جان لابس ملابس عسكريه يلتحق مشه ولحكته اسيا بالجنطه مالته كملت يله اني اروح باوعلي بابا وابتسم

كمال ـ الله وياج باباتي أنتبهي ؏ نفسج وهذا السويج سيارتج واذا حسيتي روحج تعبي كبل خابريني أجيج متفقين

أزهار ـ متفقين بابا مع السلامه طلعت من يمهم عصام بالسياره ومشغلها وأسيا واكفه ويحجون عبرتهم وتوجهت لسيارتي صعدت والباب جان مفتوح طلعت قبله وهو مباشرة طلع وراي اني سياقتي بطيئه بحكم بنت وهو سريع عبرني نزل الجام ومنحني رأسه يباوعلي ثولني وخرب كل يومي ما أعرف وين يريد يوصل خلاص دخلت رأسه ما يشليني بعد لو يجي الحمزه نكز شيطانه عليه .

" وصلت دخلت وسلمت عليهم ويتحمدن اليه عـــلىٰ السلامه كعدت ما متوازنه دزيت عـــلىٰ كهوه وكعدت اشتغل واجت رشا

رشا ـ أعذريني ردت اجيج البيت بس أستحيت لن وحدي
وان شاءلله تنذكر ما تنعاد سمعت سكرج نازل ومتخربطه شكد أنقهرت منين اجاج

ـ منين سمعتي

ـ ابوج اخذلج اجازه مرضيه وعرفنه عـــلىٰ هالاساس

ـ اي صحيح الحمدلله عدت سلامات اي شلونج أخبارج

ـ زينه بس أكو شيء اريد اكوله الج بس بعدين

ـ لا كولي هسه شنو هالشي المهم

ـ هيج أكو واحد اجه لدائره بس شافج ما موجوده وطلع

ـ منو هذا

ـ هذا ابو المعامله كل مره أذكرج بي وتنسينه شبيج داگج الثول

ـ أهاا اي تذكرته شبي وليش اجه

ـ ما أعرف سألي روحج اكو شي بينكم

ـ لاااا

ـ هاا مو أكول لن من تمرضتي مرتين اجه ما لكاج وراح هو ما سأل احد بس حسيته خايف عليج ما أعرف هالشاب معجب بيج لو أني متوهمه اكو شي بينكم لن من يوم الشفناه بي هو ما شال رجله من الدائره وخاصه بعد ما تمرضتي .

ـ گتلج ماكو شي لاتضلين تلحين بعدين اعرفه يعرفني عاد أنتِ من تلزگين بسالفه

ـ شگو بيها اذا أكو والولد حلو ومبين أبن اوادم

ـ رشا سدي حلكج

ـ علينا ولج

ـ لا اله الا الله روحي اريد أكمل شغلي

ـ ماشي رايحه ونحجي بعدين

ـ ماشي راحت وتذكرته هذا شيريد جاي لدائره فوك ما سببلي مشكله شگدها شگبرها وخسرت ثقة اخواني وصلت الموت عـــلىٰ أساس ناقصه وتكملها عليه .

" خلص الدوام وطلعت وشفته واكف يم دائرتنا أستغربت وجوده جان واكف يم سيارته مشيت عـــلىٰ السريع كلتله ليش ما رايح

هشام ـ وين اروح

أزهار ـ شعندك اهنا

ـ شعندي يعني شغل

ـ ما جاوبته فتحت سيارتي وقبل لا اصعدها هو ابتسم واجو موظفين اثنين صعدوا بسيارته هذا شوكت ضبطهم تجاهلته وشغلت سيارتي وهو شغلها وفرها قبلي ويه طلعتي جان دعمته بس تلاحكت روحي وطلعنا سوه هذا مو صاحي .

" وصلت البيت تعبانه لكيت ماما مجهزه الغده شافتني وأبتسمت حضنتها وبادلتني بحنيه جوعانه الغده جاهز

وصال ـ اي جاهز غيري ملابسج ونزلي بين ما أسيا تطلع من الحمام دخلت تسبح كرم

أزهار ـ ماشي صعدت اخذت دوش وطلعت رتبت نفسي لكيت رشا تتصل هاي شتريد جاوبتها هلا رشا

رشا ـ هلا ولج طلعتي بدون متكولين شدعوه عليج

أزهار ـ تعبانه وطلعت أول وحده واريد ارتاح

ـ صدك عرفتي الولد الي يسأل عنج طلع أسمه هشام ولازم خط موظفين أستاذ احمد ورقيه زوجه أستاذ محمود هذا شبسرعه ضبط اموره واخذهم لخط مالته

ـ شمدريني سايق تكسي وهذا شغله اكيد جان محتاج الشغل شعلينا بالعالم رشا أسألتج صايره ما اعرف شلونها

ـ والله اسألتي كلشي ما بيها ورايدتلج الخير بس أنتِ داگج الثول ماما الرجال معجب بيج

ـ وينعجب كيفه بس اني ما يعجبني

ـ وليش ما يعجبج شو يخبل حبيت شخصيته ومبين عليه شاغول يكفي عصبيته تنكع بالگلب والله ولد عين الله عليه رجال معدل

ـ خل ينكع بگلبج هيج مخليه كل بالج وتركيزج عليه ما تضبطينه شگو لازكته بيه

ـ لن حسيته معجب بيج

ـ مو من مستواي ولا اعجابي واخر همي أرتاحيتي هسه

ـ هاا هيج الحجي

ـ أي رشا أطمئني وأذا عاجبج أخذي الچ .

ـ تمام لعد راح احول الخط مالتي يمه

ـ شدعوه هيج ساحله روحج عليه ترى الثگل حلو للبنت وقحط زلم

ـ أنتِ هيج تكولين لن اخر همج ولو ردتي تزوجين يجيج أحسن واحد واحسن مكان نعرف ابوج وأهلج شكثر مدللينج أما اني يحظي البيت مليان جنانين وأول ما اجه الدائره قبل لا تجين شفته خوش زلمه والدنيا متعبته أمر مني وبهل الوكت صعب تلكين زلمه يخاف عليه ويشتغل بذمه وضمير ويركض وره عيشته .

ـ كيفج لعد الله يسهل الج

ـ أدعيلي يولي

ـ أن شــــــاء الله يله باي نهيت الأتصال والله خبله عندج وظيفتج شلج بالزواج من هسه لاحكه على المسؤوليات

" خليت تلفوني عـــلىٰ الشحن ونزلت لكيت ماما مجهزه الغده كعدنا نتغدا واجه مجد ضايج شبيك الوجه معبس

مجد ـ ما ضلي واهس بالدراسه

وصال ـ ليش يا أمي من هسه يخرب واهسك بعدك وين والسادس يرادله تعب

مجد ـ من ورا بابا وعصام راكضين وراه علمود العسكريه وأخرر همي اني عندي طموحي غير بس المن تحجين ليش احد مهتم لرأيي

أزهار ـ يريدون مصلحتك امشي وراهم وما تخسر وشبيها العسكريه تصير مثلهم ونصير دوله وعلم .

مجد ـ بطرانه يمعوده، زين الله خلقج بنت والكل مدللينج مو مثل حظي عـــلىٰ دراستي لاحكني ويتحكمون بمستقبلتي

وصال ـ هسه اطلع من السادس والله كريم ما عليك منهم وأنتي أزهار فگي عن اخوج شويه ما اريد يخرب واهسه

أزهار ـ ماشي سگتنا بالتوفيق حبيبي مجد رجعت كملت أكلي وغسلت وصعدت وتلكتني أسيا صايرين ما نشوفج

أسيا ـ موجوده والله تعبانه هالايام تعرفين دخلت بالسابع وحملي ثگل وهذا كرم متعبني

ـ ربي يكومج بالسلامه

ـ الله يسلمج

ـ راحت وحسسيتها متغيره عن قبل او يمكن عصام مانعها تختلط وياي ما اعرف اني افسسر على كيفي يله وشنو يعني توكف حياتي على عصام وأفكاره .

" للعصر صديقاتي أيات وأستبرق اجو يتحمدن اليه عـــلىٰ السلامه ودزيت عـــلىٰ ضيافه مجد راح يجيبها وكعدنا نسولف ونضحك ونسيت اللي صار بجمعتنا وبصفي صديقتي إستبرق كالت

أستبرق ـ ماكو منا منا نفرح بيج يا عروسه

أزهار ـ لا والله أبداً الفرح الج حبيبتي شوكت تتزوجون

ـ شهرين انوب ان شاء الله لما يضبط أموره تعرفين الزواج جان أختياري ف لازم اصبر بين ما يكمل التجهيزات العرس

ـ أنتِ مدلله والله مفضل عليكم شجاج ارتبطتي بواحد حالته عـــلىٰ كده واقعج وحياتج كلها تتغير

ـ هذا الدلال تحجين عنه ما مرتاحه بي الله وكيلج عبالك منفوسين بيت اهلي ما بي راحه وأني حبيته وحبيت كلشي يخصه عسى ما يسكني يخيمه يكفيني أكون مرتاحه

ـ والله أنتِ أدرى بروحج ومصلحتج بعد وربي يوفقج ان شاء الله

ـ ويوفقج حبيبتي

أيات ـ هسه عوفونا من سالفة الزواج ولو المفروض أزعل عليكم ما حضرتوا عيد ميلادي واني رتبت وتعبت عليه وتالي ما تجون

أزهار ـ حقج علينا ان شاءلله اجيج فد يوم بس والله العظيم ملتهيه دوام وارجع تعبانه حته تواصل ويه أستبرق ووياج قليل ما اعرف الوقت شلون يخلص بلمح البصر

أيات ـ اي والله تصدكون الوقت صاير يخوف عكس قبل

أستبرق ـ وكتنا اختلف أنما الوقت نفسه وكلمن ملتهي بدنياه يله منا وهيج نضبط امورنا وكل فتره نتلقي فد مكان او ننجمع يم وحده

أزهار ـ ان شاءلله اتفقنا ومر الوقت ودعتهن واجه سايق أستبرق أخذهن وراحن الله وياهن رجعت لميت الهوسه ولكيت ماما بالمطبخ مشيت وكالت

وصال ـ تعالي اغسليهن ماما

أزهار ـ والله تعبانه

ـ ما يصير تضلين هيج ادري اذا تزوجتي يضل يباوع على طولج ما تغسلين ملابسه تسويله لكمه أكل

ـ والمطاعم شُنو شغلها وشجاب سالفه الزواج عـــلىٰ بالج ليكون

ـ مو أبالج لتخافين الله يوفقه ويلكه بنت الحلال التسعده والمطاعم شغلها لناس تطلع تتونس وتأكل مو لامهات البيوت ما يطبخن بس يوصن منها ما يصير يا امي اخاف تجيج قسمه وأنتي كلشي ما تعرفين يومين ويرجعج عليه

ـ الله كريم منا لوكتها عفتها وصعدت غرفتي جريت الايفون وكعدت أتصفح وشفت عصام نشط الأن أرتعبت والله من هذاك اليوم واني صارت بيه خوفه منه الله يرجع الامور مثلما كانت وترجع عصام الاحبه وأمن منه
__'__

أسيل

ـ كاعده وأدرس بيهم وهما ثولان لايرحون ولا يجون شلعوا گلبي وركبوا گلب جديد أخر شيء نفذت طاقتي وعطت بيهم گاااافي امشي ولو على أمكم ادرسكم ما جاي تحفظون مو وضعيه هاي ريم كامت تغلط عليه وتفلت بوجهي والله من انعل أبوج لابو الرباج بنت الگلب كمت صفكتها راجدي وبردت گلبي وطلعت تصرخ وتشگي

ريم ـ باباااااا مامااااا أسيل الوسخه ضربتني وتگول انعل ابوج بنت الگلب تغلط عليكم وكتلتني

أسيل ـ أكلتيها يا أسيل راح تجيج بارده مبرده جنت مندكه واشرح رامي موضوع الرياضيات ودخل حارث عيونه بكصته بدون ما يسألني ضربني وجرني من شعري عوفنيييي بنتك هي ما مربايه وتغلط عليه

حارث ـ وتخلين عقلج وياها وتغلطين عـــلىٰ أخوج كدامها هاي التربيه الربيانها الج والله أنعل اليوم الصرتي بي يا حيوانه وهذا كبرج بهل الغرفه وغصباً عليج أدرسينهم

أسيل ـ دفعني وخلص كلامه وطلع باوعتله بحقد وبگلبي نار منه بس الصوج مو منه الصوج من أهلي صارلي أسبوع محد سأل عني المن عايشه اني عـــلىٰ شنو مبقيني للخدامه وتربيه جهالهم وشابعيني تكفخ وفشار حتى أحترام محد يحترمني لو فصليه هم مو هيج.

" اكلت نعل مكطعه ورجعت ادرسها وأني ساكته بس بداخلي عبره مهتضمه حيل شوي وكفت يم الباب باوعتلها بحقد

أسماء ـ يله تكبرين وتنسين هاي ولا شي من اللي تكتلين بيها جهالي عبالج ما ادري شابعتهم كتل وغلط

أسيل ـ ما جاوبتها لن العتب مو عليه العتب عـــلىٰ أخوي لو محترم أخته ومقدرها هي ما تكدر تفتح حلكها وياي بس شتشوف كدامها .

أسماء ـ يله كملوا دراسه علمود تنامون من وكت ورامي أدرس الموضوع البعده لن باجر عمتك تروح واني كلش مالي خلكك .

رامي ـ بس عمتي تعبت خطيه

أسماء ـ شبيها تعبانه شو أكل ونوم ودلال وأجازه من المدرسه أرتاحت بيها شتريد بعد يله كملوا دراستكم

أسيل ـ رجعت اشرحله الماده وهو صافن بوجهي أنتبه عـــلىٰ الشرح عوفك مني راميييي

رامي ـ عمه لاتزعلين من أبويه لن ضربج

أسيل ـ لا عمه ليش أزعل هذا اخويه ميخالف، كلتها وحيل وأختنكت خلصوا دراستهم وكمت نومتهم وفرشت فراشي ونمت بالكاع.
" والصبح كعدت عـــلىٰ دفرات جفصوني وكالبين الغرفه وناثرين ملابسهم وكتبهم كمت ساعدتهم ومشطت شعر ريم ولبستها جنطتها صحيح وكحيين واغلط عليهم بس احبهم وتعودت عـــلىٰ هالاسطوانه مو جديده عليه من صاروا لدنيا لحد هسه هما كبروا عـــلىٰ أيدي .

" راحوا واسماء دوامها ظهري وحارث ما راح المحكمه ما اعرف ليش تجاهلتهم وكمت لملمت الغرفه ورتبتها وطلعت ملابسهم الوسخه غسلتهن ونشرتهن واجت عليه

أسماء ـ أسيل تحضري تروحين اخوج ينتظرج

أسيل ـ ما جاوبتها رحت لبست صايه دائماً اجي بيها عليهم فوك تراكسودي وذبيت شالي بدون دنوس وطلعت لكيته ينتظري صعدت ليورا وشغلها وتوجه للبيت ما حجينا أبداً وصلنا وامي فتحله الباب عفتهم ودخلت

جنان ـ ما تسلمين وجه النعال

أسيل ـ خلقة الله ، عفتها لكيت ابوي يتريك شگو عليك تاكل وبنتك مسحوله سحلة الجلب خدامه لجنانين أب مزهريه لاتهش ولا تنش وامي سايگه عليك

علوان ـ شبيج بنيتي شو وجهج مصوفر ادري دازينج تقاتلين عافيتج مسلوبه

أسيل ـ ما بيه شي عن أذنك صعدت غرفتي باوعت كتبي عـــلىٰ حطتهن والله أشتاقيت لغرفتي دورت عـــلىٰ تلفوني ولكيته كبل اتصلت عـــلىٰ هديل وجاوبتني هديل

هديل ـ هاا عيني شبيج

أسيل ـ بجيت ودموعي عشره عـــلىٰ عشره كلشي بيه طالعه روحي من الدنيا كلها مخنوكه خنك تعالي امانه مشتاقتلج صحيح من تجين تضلين بس تعيبين وتصيحين فاهيه وما تشتغلين وما تنظفين والبيت خايس وتعاركيني بس ميخالف راضيه أنتِ ولا أسماء الجلبه.

هديل ـ هي أسماء جلبه من يومها وأستجلب بالزايد ومنو جلبها غير حارث وأمي يمشون كدامها وادري مسويتج خدامه الها واتصلت اسأل عليج امي تكولي لا دزيتها ترتاح خطيه تغيير جو يا جو هذا خدامه

ـ هي هاي أمي متتغير من يومها هيج تذكرين من جنتي ما متزوجه اشسوت بيج ومن انفصلتي من عصام يبوه كرعت روسنا

ـ هاي هي الج الله شطالع بيدي عليج وأحاول اجيكم هالأسبوع وأنتي طنشي قابل جديدين عليج

ـ أحبج هواي

ـ يا بعد روحي وأني هم ديري بالج على نفسج ولاتنقهرين

ـ ماشي مع السلامه نهيت الأتصال ولكيت مكالمات من صديقاتي تقى وهاجر ورسائل يسألن عليه ما جاوبتهن
كبل شمرت روحي على جربايتي ونمت بعدني ما غافيه عاطت

جنان ـ ولج أسيل وجع أسيل نزلي غسلي البيت جايف

أسيل ـ انكصف عمرج أسيل هو البيت كظه العمر جايف واسيل تغسله صحت بيها نازله رفعت شعري معقدني هالشعر لما اشوفه حلو الا اكصه واخلص منه

" نزلت لكيت البيت وسخ والدنيا مكلوبه متريكين والمواعين مكدسه والكوابه الجاي يمه صار أسبوع ما منظفات ادري شنو شغلجن أنتِ ونسرين

جنان ـ والله يمه من رحتي ظهري أنكسر وبعد ما ادزج يم بيت حارث

أسيل ـ همزين حسيتي لن كافي عليه الخدامه اهنا

جنان ـ أنجبي خدامتيش هذا بيت أبوج وهذاك بيت أخوج واخذج يمه لن أسماء مشكله ويخاف عليها تعرفين حبالتها زقنبوت واني التهيت بمرتضى ومصطفى نسرين ظهرها بس يوجعها من رجعت من بيت أهلها لحد اليوم ما تجيس شيء يا دوب تطبخ الغده واني ملتهيه بالجهال شالعين كلبي ومحد يكدرلهم بس أنتِ .

أسيل ـ شعدها تحبل دام حبالتها زقنبوت تخلف واسيل تربيلها كافي العدها شالعين گلبي ونسرين شجاها جانت العافيه لو هاي حيل من حيل جناينج ترى اعرف كل سوالفهن بس أنتِ تغطين ساطرتج من سطرهن العباس ابو فاضل ، ضربتني عـــلىٰ ظهري احس كلياتي وكفن بالكوه اخذت نفس يمه دخيلج والله راح تسكطيني حتى خلفه ما تخلين بيه تضربين جموع على ظهري ما جايزه من رويحتي والا راسي سويتي مخي مرگه تبسي .

ـ من الله يكصف عمرج عـــلىٰ هاللسان االشايلته لو بس تضبينه فلا احد يكرب صوبج شوكت تجنين عقل ما اعرف شاده دوبج من دوب نسوان أخوانج من عمه العماج يله امشي شوفي شغلج لما اشوف مرت اخوج

أسيل ـ راحت ورفعت رداني وبلشت اغسل بالمواعين وجلفت المطبخ جلفه مالت اخ لاخوه ورجعت غسلت البيت كله والأستقبال خايس من كطوف الجكاير والهوسه بي للظهر كملت وظهر ما ضل عندي وامي طبخت وطلعت نسرين عـــلىٰ الحاضر تغدت وهمزين غسلت المواعين

نسرين ـ اعذريني يولي ما ساعدتج بس ظهري موتني من الوجع حتى اخذت اجازه

أسيل ـ لا يمعوده متعلمه صعدت غرفتي اخذت تلفوني وتمددت عـــلىٰ جربايتي لكيت هديل فاتحه نت راسلتها ما جاوبت دخلت اتصفح وشفت حارث ناشر صورته دخلت اشوف التعليقات فضول لا اكثر ولا اقل اريد اشوفه هم يخون أسماء هم عنده معجبات بديت اكلب وصار حساب كدامي ولفت أنتباهي الصوره دخلت هذا مروان ابن عمي كمال ضليت أكلب بحسابه ما بي شيء بس صورته أنرسمت بخيالي حليوه مبين عليه هادئ الله يحفظك لشبابك ويحفظك لـ أسيل كلتها وضحكت عـــلىٰ روحي اني شبيه استخفيت كبر ، شمرت التلفون ونمت

" الثاني يوم كعدت من وكت لبست صدريتي ورتبت حجابي وجهي شاحب عبالك جنت بسجن مو بيت اخوي جهاله جعصوني جعص على ساعه يوكفون كلياتي من الدفرات .

" شلت جنطتي ونزلت لكيتهم كاعدين صبيت كوب جاي وسويت لفه جبن كعدت اتريك يمه خابرتي ابو الخط يمرلي

جنان ـ لا والله يمه نسيت عبالي ما تروحين

أسيل ـ صدك تحجين يمه وليش ما اروح خوما اعوف دراستي هسه شلون اخابره يضل بس ينتر من صباحيات عاد اني لساني شلونه .

نسرين ـ روحي ويانا نوصلج بطريقنا

أسيل ـ اي والله كعدوا تريكوا هي وحسن مبين عليها صدك تعبانه كلمنا وطلعنا لمدرسه وصلوني وراحوا دخلت المدرسه شمرت جنطتي شفتهن كاعدات هاا ولجن

تقى ـ عبالنا ميته نتصل ما تردين وابو الخط اهلج مبلغينه ماخذه أجازه أسبوع ادري شعندج وين جنتي

هاجر ـ وين تكون قابل اكيد يم الحيه أسماء مو بالله

أسيل ـ اي وين اكون لعد عوفونا من سالفتها شگو ماكو شخبار المدرسه والمواد ترى كلشي ما شفت من رسائكم

تقى ـ شنسويلج والله فاتتج هواي اخبار مهمه هاجر أنخطب وراح تزوج وتغادر الشله

أسيل ـ جذب كولوا والله منو سعيد الحظ

هاجر ـ أبن عمتي

أسيل ـ شايفه الف خير تستاهلين حبيبتي بس بعد وكت عـــلىٰ الزواج خلصي السادس عـــلىٰ الأقل

تقى ـ شمدريني كاتلها الجوع يكول خطيبها يخليها تكمل دراسه

أسيل ـ يمعوده كلاوات العيد بس تروح يمه ينفش رياشاته عليها وما يخليها تكمل عـــلىٰ أغاررر وما اكدر عـــلىٰ فراگج واريدج يمي

هاجر ـ لا خطيبي يختلف وعدني وعمتي هم تريدني اكمل دراسه

تقى ـ يمعوده شنريد الله يسعدكم

أسيل ـ ضلينا نسولف ورن الجرس واجت مدرسه الرياضيات أول درس ضغط نفسي اويلي يابه ....

" خلص الدوام ورجعت وياهن بالخط وصلني البيتنا دخلت البيت من باب المطبخ الاكل جاهز دولمه اوفيش يابه اخذتلي ماعون وصعدت لغرفتي غيرت ملابسي وكعدت أكل واكلب بالتلفون وهم رحت الحسابه ولكيته مغير صورته بقيت صافنه بيها وبهل اللحظه تقى دزت رساله جاوبتها هلاو

تقى ـ شو ما تحجين مثل قبل صايره تغطين منو مأخذج من عدنا شتسوين

أسيل ـ جهال أخواني منو قابل كاعده ومالي خلك

ـ نعرف جهال أخوانج من زمان عـــلىٰ الخط عفيه ما تملين من هالوضعيه الخايسه أهلج عدهم ومتمكنين ما يخلوهم بحضانه مثل رهف وجهال اخوج حسن اخليهم بحضانه يحظي والكبار خل امهم تتكفل بيهم شبيها مكسوره وكسرت عين جدي .

ـ ألمن تحجين عبالج ما ماله والله طالعه حتى روحي بس شسوي امري لله

ـ تزوجي يحظي وأخلصي كم يوم تضلين تخدمين وتربين خلفتهن وهنا وظائف ولبس وطلعات وطبات وكشخه وصالونات وتجميل وما راحت بس عليج مضيعه عمرج بين الجهال باجر عكبه حتى واهس لجهالج ما يضل بسبتهم يمه الله يساعدج

ـ يا زواج تحجين عنه خل أكمل دراستي عكبها الله كريم وبعدين حتي لو اجتني قسمه امي ما توافق اتزوج

ـ ليش شكو بيها هاي هاجر يتيمه وجديتها ما دايمه الها ابن عمتها خطبها وتكول كلش زين عليها واعدها تكمل دراستها وليش امج شگوو غير ابوج اليوافق شنو رجل كرسي هالاب ترى ربالي عله أبوج

ـ يمعوده سدي سالفة شبيج كالبه الرنه على الزواج

ـ أنقهر عليج والله خاصه من غبتي أسبوع كامل واليوم كمتي كلشي ما عرفتي والواجبات مكدسه عليج وجهج طافي كلت أسيل لو تتزوج اشرفلها من عيشة أهلها

ـ و؏ أساس الزواج حل لمشاكلي ومعاناتي ويه أهلي وجناينهم وجهالهن لا يمعوده هسه يطلع اضرب منهم عـــلىٰ اقل محصله حريتي تلفون وانتن ودراسه ما متقيده عوفينا عوفينا

ـ عـــلىٰ راحتج صدك نهاية الأسبو؏ بابا يسافر بس اني وماما بالبيت تعالن أنتِ وهاجر نتونس ونسولف نخلص من ضغط الدراسه واخلصج من ضغط أهلج عليج اخاف بيوم تشردين من ضيمهم

ـ لا اسم الله، ماشي الله كريم عود نتفق

ـ يله حبيبي باي

ـ الله وياج راحت واني تمددت وصفنت بكلامها نوعاً ما بي وجه نظر ايجابيه يمكن الزواج هو حل مشكله الاعاني منها بس منو سعيد الحظ الامي توافق عليه والله لو يجي الوزير بنفسه امي ترفضه يله عاد اني شبيه حميت انوب وزير والله يالله استقري أسسسيل .
____

أسيا

ـ من يوم الصارت سالفه أخته والتحق لدوام هو ما أعرف شبي حتى اني ما اله خلك يحاجيني أراسله ساعه علما يجاوبني وحجاياته كوه عبالك محملني منيه ولا عبالك زوجته وبالدوام المفروض يشتاق يحن شو هذا لابس الوضعيه ومطنش ماشي يا عصام لا تجاوب اني الك.

" تجاهلته يوم كامل ولا عبالك شاف رسائلي ولا كلف على نفسه يرد عليه عفت التلفون لن احس نار بگلبي مشتعله من يتجاهلني أو يقرأ رسائلي بدون رد عديتها وكلت ميخالف اصبر وأتحمل واعاملك بالمثل شگو عندي شغل عمل.

" التهيت بغرفة كرم غيرت الديكور مالتها وصيت عـــلىٰ سرير جديد وصل ومجد ساعدني بي والعصر رحت السوك كلت اغير جو اخذت عمتي ورحنه حتى ما بلغته ولا انطيته خبر عـــلىٰ اساس هلكد مهتم ملتهي بسالفة أخته شد وياها عـــلىٰ شيء ما صاير جان موتتها من ورا خبالاته

" أشتريت جراجف ودببه ومجموعه العاب ونواقص لغرفته ونواعم لغرفتي كلت اغير بيها ومريت محل ملابس اخذتلي كم قطعه ملابس بيت ونوم ما اخذت هو يحب يجييلي عـــلىٰ ذوقه ومعروف ذوقه .

" رجعت هلكانه عفتهن ولا رتبت وتعبت من الطريق والفره مالت السوك هسه اني ادور شلعان كلب لنفسي شمدريني كلت التهي عنه ولا اضل وراه .

" رحت على التلفون لكيته متصل عفته ورحت سبحت رجعت متصل مرتين واخر شيء كاتب رساله

عصام ـ وين مكبوره اليوم

أسيا ـ شفتها وما جاوبته

ـ شُنو سالفتج اتصل متردين اراسلج ومتجاوبين كامن طناكرج عليه هسه

ـ ما جاوبت بس منتظرته واعرف راح يكوم يغلط ويفشر

ـ هوووش ومرض ما تحجين شبيج بيج توحد

ـ اي والله توحد منك ليش اللي تعاشرك صاحيه

ـ لا طبعاً لازم تكون نص عقل لن سبحان الله العقله كامل يوكعله بوحده نص عقل بس تزومل وتتزعل

ـ منو گال زعلانه تفسسر عـــلىٰ كيفك

ـ جدي طلع من كبره وگالي منو قابل عوفينا هسه
كرم وينه

ـ يم عمتي

ـ وأنتِ وين

ـ بالغرفه

ـ وين بالضبط

ـ عـــلىٰ الجربايه

ـ متمدده لو كاعده

ـ ليش بشنو يهمك

ـ هسه يا يابه اسألج وجاوبي

ـ متمدده وتعبانه

ـ اوففف بمكاني لو بمكانج

ـ مكاني طبعاً جذب مكانه

ـ ادري بيج ما تشتاقين اليه بس اني

ـ بس انت شنو

ـ بس اني جوعان اكوم اسويلي حميسه لحم احسن ما اكابل هالوجه اليلطم خير شر

ـ واني شحجيت تريد حجه وتروح

ـ وين رايح مو جاي احاجيج شتردين اطلعج من التلفون واتعبج فوك تعبج ومن شنو تعبانه شو عصام مو يمج لو كعدتي تنبشين وطلعين شغل من جوه الكاع بابا عوفي الشغل من انعل ...

ـ انعل ليش سكتت لو ما تعرف تسگت الا تغلط وتفشر

ـ لاتشيلين هم نعلتهم بگلبي هسه كوليلي شمسويه وتعبانه منو متعبج حبيبي

ـ والله غيرت ديكور غرفة كرم احسن ما كاعده

ـ ومنو رايد منج تغيير مو حجيت وكلت من تولدين بخير وسلامه اغير الهم هو واخته لو دوده بيج متعرفين تكعدين اسسيا كعدي وستري عليه شهر لخ تروحين عليها وتجين تتبجين الدكتوره تكولي لاتخلين رجلج يتقربلج مخليتني وجه اليتيم

ـ هو هيج أحسسن علمود تعرف قيمه نعمتك

ـ شمسوي لنعمتي شو مداريها احسسن ما يكون وصابر عليها و؏ خبالها شتريد بعد

ـ سلامتك

ـ الله يسلمج حبيبتي أكول اشتاقيت شلابسه

ـ ضحكت وجاوبته ثوب قصير التحبه لونه اسود

ـ اووووف نعلتي أهلي بهل الثوب يرادله تجديد بس انزل اجيبلج غيره ينراد النا سهره معدله تكعد الرأس

ـ سخيف

ـ لا والله ماكو أعقل مني يله حبيبي بعدين احاجيج لازم اروح

ـ عود جاوبني مو تجاهلني

ـ هسه فهمت شبيج اثاري مستخدمه وياي الصمت العقابي مو؟

ـ منو اني لو أنت

ـ عليج الله استخدمي كل يوم وفكيني منج ومن نكدج

ـ خلف الله عليك

ـ احبك يا حبيبي أنت

ـ ضحكت يله دتروح

ـ ارجعلج اتصال واريد تدلليني

ـ تمام راح وصفنت هذا خبل وطباكات فلا صاحي هالرجال .

" صار الليل وكمت لملمت الهوسه وعزلت الأغراض عـــلىٰ صفحه بعدين ارتبهن مالي خلكهن شو صايره بسرعه اتعب شوكت اولد وارتاح منا حمل منا عصام هذا حامل بي بدون كرش حاملته بگلبي بسوالفه وسخافته تذكرته وأشتاقيت خرب بيومه ولا اكدر من دونه يله ننتظره كال ارجعلج أتصال خل اشوف يوفي بوعده .

" طلعت لكيت عمتي موكفه أزهار وتعلم بيها عـــلىٰ الطبخ هاا منال العالم جايه وما عندي علم

أزهار ـ أتقشمري أتقشمري شگوو عليج

أسيا ـ تحمس بالبصل ولعبانه نفسها خرب بيومج عـــلىٰ حركاتج لعد شعبالج هيج الطبخ يرادله نسوان معدله

أزهار ـ اجت وصال رقم ٢ عفيه أسيا ما يصير الطبخ بدون بصل والله اشوفه ماله داعي بس دموع وريحه خايسه تتطبع بأظافري يمه خلصيني عاد ما طلع عشه هذا

وصال ـ وين يصير طبخ بدون بصل شو حمسي وبلا لغوه الله يساعد الياخذج يموت جوع والله بيضه ما تعرفين اطكين متكوليلي شلون تعيشين ويه الرجال وعيال

أزهار ـ ما اتزوج ما أتزوج عوفيني يرحم أهلج

أسيا ـ متلاغيات هي وياها وعمتي نكزت جنيتها الا تعلمها عـــلىٰ الطبخ اضحك عليهن وعمي اجه شايل بيده اكياس خلاهن عـــلىٰ الميز وكال

كمال ـ جهزولنا العشه جبت وياي مشاوي

وصال ـ منو رايد مشاوي مو طبخنا عشه

كمال ـ مجد خابرني وكال جيبلنا عشه وياك ما طابخين

وصال ـ يااا وصارلي ساعه اعلم بنتك علمود تطبخ النا العشه وأهل أهلي أشتعلوا وتالي تجيبلي مشاوي

كمال ـ عوفي وجهزي بين ما اصلي

وصاال ـ اويلي منك مجد الا اكسر رأسك

أزهار ـ يمه خل اروح اسبح فدوه

وصال ـ لا والله فلا تروحين خلصيها طبخ ولي يله حمسي صدر دجاج يله امييي فاهيه يربي يربي

أسيا ـ عوفيها عمه شوي شوي تتعلم خوما من اول مره
ازهار تباوعلي وتضحك كملت وجابتها بعد ما جهزنا العشه بس والله طلعت طيبه

أزهار ـ عاشت ايدي شوف بابا طبخي طيب

كمال ـ والله تعيشين باباتي بس متوصلين طبخ أمج

وصال ـ ما طالعه عليه كرت عيني

كمال ـ تتعلم تتعلم محد اجه من بطن امه متعلم عـــلىٰ كيفج وياها انطيها مجال

أسيا ـ ما جاوبته بس حسيتها ضاجت لن احسن تربيه ومصلحة أزهار من مسؤولية عمي مو مسؤولية أحد لن بنته وحيدته ويحبها ويدللها بنته محد اله كوه عليه بس عمتي هم الها دور خطيه بس بوجود عمتي تسحب نفسها

" كملنا العشه وأزهار غسلت المواعين وأني سويت جاي صبيت الهم وشربوا عمي كاعد هو وعمتي وكرم يكمز عليهم ومجد طلع بالحديقه صديقه أجه عليه

مشيت وصاحت وراي

أزهار ـ أسيا أوكفي اريد احاجيج

أسيا ـ كولي حبيبتي

ـ عصام هم حجه وياج بخصوصي

ـ لا والله أبداً ولا جاب طاريج

ـ شعجب

ـ اي والله حتّى گالي لاتتدخلين ومنعني اتدخل نهائي وحذرني اذا متدخله ما الوم الا نفسسي وفعلاً شيء بينكم وربي يهدي القلوب

ـ ماشي حبيبتي

ـ اذا تحتاجيني تعالي أني بغرفتي

ـ ماشي حبيبي

أسيا ـ أبتسمت ومشيت للغرفه مالتي تمددت باوعت تلفوني ما أتصل گالي أتصل لا واضح خوش تتصل صاير لوتي وتخاتلها عليه عبالك اني غشيمه عنك

" ضليت مراقبه حسابه صار ساعتين نشط الأن وأدز بهل الرسائل توصل بس ما يشوفها .

" وينك حبيبي " الووو " مرت وقت ودزيت تعشيت فاتح نت ميفتح ولا يجاوب والرساله توصله شنو سالفته

" مو كلت أتصل " كرم يريدك " ماكو رد نهائي هو غير لو يشوف الرسائل !
"أخر شيء طكت مرارتي وأتصلت ورفضني ويامن مشغول وما ترد ؏ رسائلي وأتصالتي دزيتها ومر وقت وجاوبني

ـ عندي شغل يمعوده

ـ شغليش هذا

ـ ترى بالدوام ما فاضي لنكدج اخلص واخابرج

ـ

هاا كلتلي شغل وشغلك هذا الأ ؏ التلفون طول الوقت نشط الان !
" انتظرته يرد وصلت بس ما يفتحها نشط الان راح يخبلني هذا شبي شوي و رد

ـ يمعوده تلفوني عايفه وفاتح بيانات طبعاً يطلع الج نشط الان شغلي أعلى من رأسي خفارات وجماعتي يمي تردين كل الوقت اسولف وياج شبيج أنتِ

ـ ما جاوبته بس أنحمست قهرر اعرفه يجذب متأكده جاي يخوني وواثقه من هالشيء أربع وعشرين ساعه فاتح نت عرفته مو خالي رجع جاوبني لن حس بيه

ـ ما تجاوبين شبيج حبيبتي

ـ سلامتك شبيه يعني

ـ مشتاقتلج والله بس قدري ظروفي يا عيني يله أنزل واعوضج عن أنشغالي عنج

ـ ما جاوبته

ـ مو أحاجيج شبيج أنكلبت خلقتج مو صوجج صوجي اني كاعد احاجيج يابه دولي.

ـ شمرت التلفون ولطمت ؏ وجهي الله ياخذني ؏ قسمتي الكشره  ما أعرف شحبيت بي وافقت عليه لا وكتلت نفسي عليه لو عصام لوما اتزوج أستلمي هذا عصااام ربالي عله بوسط گلبي رجال ما ينحزر وصعب الاطباع



" صافنه وأكل بروحي رجعت فتحت التلفون نشط الأن ويامن عصام ويامن راح تموتني قهرر يله تنزل من الدوام وأفتح حسابك بتلفوني ونشوف شمسوي سهله حبيبي !

يتبع
__

#الحلقه_الثامنه
___

أسيا

ـ مرت هالليله عـــلىٰ نار گلبي ميلون فگره تربعت بعقلي ماكو زوجه متغار عـــلىٰ زوجها وتخاف وحده تأخذه منها اني هالشعور عايش وياي قبل لأ أزعل جان عنده معجبات أكثر من شعر من رأسي مرات يجاوب ومرات يتجاهلهن

"المشكله هو من النوع كلمته تمشي عـــلىٰ الكل ميحب احد يفرض عليه ويتحكم بي ما خله عليه لزمه ما شفت منه شيء ملموس ولا علاقه ثابته ما اعرف هو حريص لو لو اني حسساسه أكثر من اللازم لا اكدر اتجاهل الوضع وأرتاح ولا اكدر ابحوش وارتاح بالحالتين الوضع مميت

" مسحت دموعي النازله بسسببه وكمت شفت ابني لكيته نايم بحضن عمي اخذته منه

كمال ـ عـــلىٰ كيفج عمي يمكن مصخن شو رأسه حار أنطي خافض حراره وديري بالج عليج بابا

أسيا ـ أن شــــــاء الله عمي ، اخذته نومته بجربايتنا وانطيته خافض حراره بقيته بحضني والتلفون گبالي سحبته وفتحته ما فاتح نت ونشط من ساعه العافني شعجب نايم من وكت ! يمكن ظلمته ردت أدزله رساله تالي تراجعت طفيت النت ونمت اني وأبني.

" الفجر والوقت متأخركعدت عـــلىٰ التلفون يرن تململت بإزعاج كرم نايم سحبته حبيبي يتصل بقيت صافنه ما اريد اجاوبه بس هو أتصل من الفجر ما كدرت الوضع مو مال تجاهل جاوبته هلأ حبيبي

عصام ـ كليبي فدوه لهل الصوت كعدت صليت وأشتاقيت وأريد أرتوي منج

أسيا ـ تقبل الله حبيبي يعني ما هنت عليك تعوفني زعلانه ومقهوره منك

ـ طبعاً ما تهونيين و؏ شُنو زعلانه حضرتج ليش هو شگو

ـ كيفك

ـ منيح كتير

ـ بعصبيه عصااااام

ـ هاا روح عصام مشتعلين أهل أهله ترى متصل مشتاق مو مال نك ونكد من الفجريات الجو مال حضن بوس للعظم عظامي كلها تصل عليج من اشتعلوا اهلج

ـ أهلي شگو من الفجريات عوف العالم بحالها جر حسره وحجه بصوت ناصي

ـ مشگلتهم غصباً عليهم يتحلموني أني ولساني شعبالهم لعد هذا النسيب يصير حبيب ويريد زبيب ولج مشتااااق أريد أشوفج انوب ظلمه والوضع محاصر نعله عـــلىٰ يومك رياض كافي تجعرررر جنك ثور

ـ ضحكت عليه تستاهل

ـ هو هذا الله كدرچ عليه

ـ أحبك

ـ كوليها بصوت ذايب اريد احس بذوبانج ذوبي اسيا روحي ماعت

ـ والهيبه وين راحت

ـ مشتاقلج وحايرتلي بالهيبه بابا رجلج بهيج وضع محرج عوفي الهيبه عـــلىٰ صفحه كلشي واله شغله اريدج رومانسيه رب الحلو

ـ كلتها بصوت مايع حبيبي

ـ حبيبي جنج دجاجه جاعصتها هَمر

ـ شبيك رومانسيتي مبطنه

ـ لا والله مجفنه كبل لنجف، أعرفج تلكطين العافيه بس تشوفيني من اعصرج بين أيديه روحج اقرأ عليها السلام بس من التحق ادكينها كرامه وعزة نفسس برأسي واني اهل اهلي اشتعلواا

ـ تعال هسه واشوفك الرومانسيه عـــلىٰ اصولها بالواقع احلى تكون حاره ومكسبه

ـ أي اجيج ليش لا علمود بالكطنه

ـ لا اسم الله اتشاقه شبيك دير بالك تجي

ـ لا يابه شسالفه تخبلت ساعة زمان وتخف حرارتي وارجع انام

ـ اي گلبي خليك عاقل

ـ أني أعقل عـــلىٰ اوادام احجي عدل أسيا

ـ فدوه لعقله حبيبي شعجب اليوم كاعد تصلي من الفجر

ـ بلال الحبشي اليوم كعد يأذن

ـ منووو، يحجي واني بالكوه كاتمه الضحكه على سوالفه

ـ أستغفر الله عبرت عـــلىٰ الموته الاولياء والصالحين هذا رياض يصعد ماي كل شوي ويشفط ويرجع يسوي انزال طير ابو النوم من عيني تالي اكوم اكب سطل ماي واخلي يلكط العافيه هووووش ومرض كافي تجعر

رياض ـ شعندك من الفجر تخابر عوف هالمهجوم خلي بنات الناس ينامن لازمهن سره

ـ من لزمك صرع ما تلكه دواك خبل عليه الحرمه خبلها

أسيا ـ هاا لازمهن سره

عصام ـ أي واخذهن عـــلىٰ كد عقلهن وأنتِ كبري عقلج إذا كل وحده تتدخلي خلص وأحجي وياها وادخل بعلاقه اصير واحد يلعب ستين نفس والمن عايف حلالي هذا عقلج كبري يا بنت الاوادم

ـ غير أغار عليك

ـ غاري منو كايلج لاتغارين يله حبيبي لازم اروح هذا كعد وكاعد يحوص ما اكدر اخذي راحتي بالكلام بعد هو احاجيج بالهمس وسمعان شحجي بعد بالاشاره

ـ ماشي گلبي اخذ راحتك

ـ يا بعد راحتي ديري بالج على نفسج ورجعي كملي نومتج

ـ تمام راح ورجعت التلفون وكملت نومتي نوعاً ما ارتاحيت بس گلبي ما يخلى من الشك ينزل بالسلامه وأحاول أفتح حساباته بتلفوني هم اتأكد وهما اريح گلبي
__

أسيل

ـ واجبات بكد شعر رأسي أدرس وما الحك گلشي صار اكثر من طاقتي جنت خلصانه ومسيطره عـــلىٰ دارستي هسه حتّى هي لحكوني بيها وطفوا شغفي وواهسي بيها

" كملت وضلتلي الرياضيات هاي تريد الها گلب ما مدشن
وفزيت عـــلىٰ صوت أمي ودفعت الباب بكل قوتها بقيت منزله رأسي بكتابي لن أعرف طلباتها وشتريد

جنان ـ گومي ساعديني الف الكبه مسوين كميه علمود اجمدها للعشه وبيت أخوج يجون عـــلىٰ العشه مو احاجيج

أسيل ـ ليش ما عدهم بيت يتعشون بي كل يومين جايه وجايبه جهالها وتجي تأكل وتمشي ماعون ما تغسل كله برأسي يمه والله اني هم بشر وأتعب

جنان ـ شمسويه هنا شغلات بيت وبعدين أنتِ بنت هذا البيت هذا بيتج شكوو تعاجزين بنات أخر وكت شو لحكيني واذا نزلت وما اجيتي اجيج بالماسحه اكسرها عـــلىٰ رأسج يله صفطي كتبج بعدين عود درسي ما تطير الدراسه عندج الليل شطوله يله

أسيل ـ راحت وطشرت الكتب امري لله رفعت شعري ونزلت وكعدت الف بيها لما خلصانها مية وخمسين كبايه ركبه ما ضلت عندي وكمت سويت منها للعشه وسويت بيتزا لجهال صينيتن واجو بيت حارث والبيت انكلب هوسه ولعبان نفسس
"مو عن شيء بس اسماء شايله ايدها منهم ولا تنهم جاهل ولو يكسرون أغراض البيت ولا تحجي افه من الفاهيه بس بيتها غرضها عزيز يمنا اغراض مال حرام

صبينا العشه واسماء حاسبه نفسها خطار لازكه بصف حارث نسرين ساعدتني كعدنا نتعشى وحسن باوعلي وگال.

حسن ـ دام مجموعين اكو الموضوع احاجيكم بي

حارث ـ خير أن شــــــاء الله شنو موضوعك

حسن ـ أسيل جماعه تقدموا الها لزواج

حارث ـ وينها وين الزواج خل تتدرس بالأول

علوان ـ بعدها أبني خل تكمل دراستها

جنان ـ ما ازوجها هسه اذا متخلص وتتوظف يله

حارث ـ انهي الموضوع بطريقتك كولولهم صغيره وجاي تدرس ومن هالحجي

أسيل ـ يحجون ولا احد فكر يسألني لما عيب جان كتلهم أني موافقه عـــلىٰ الزواج بس اعرف راح انبصط من حارث والبيت ينگلب عـــلىٰ رأسي ورأس الخلفوني طبعاً ما يوافقون منو يخدمهم منو يحمل جهالهم ما شاء الله هم خدامه وهم مربيه .

" كملت أول وحده وعافن المواعين عليه نسرين غسلت وتحجت بظهرها وظهرها يوجعها من السنك ينترس مواعين وهذيج صبت جاي واخذته الهم باوعت المطبخ مگلوب ويوسخن بدون وجع گلب لا يبوه شگو عليجن

" أستغفرت ربي وسگتت وبديت أغسلهن وكملت تنظيف المطبخ والحوش عفته لما يرحون جهال حارث عفتهم كاعدين وصعدت الغرفتي قفلتها لن الجهال بس يكمزون على رأسي مثل الفيران .

" كعدت ادرس كملت واجباتي كلهن رتبت غرفتي وتمددت لكيت تقى مراسلتني هلا تقاوي شلونج

تقى ـ ليش ما اجيتي أنتظرناج

أسيل ـ ما لحكت والله عود غير مره عـــلىٰ الجايات

ـ عـــلىٰ راحتج حبيبتي

ـ تعذرت منها ونمت للصبح كعدت لبست وشلت جنطتي ونزلت لكيتهم كاعدين يتريگون كعدت أتريك وأمي كالت

جنان ـ أبو حارث اليوم العصر كلت اروح بيت ابو عصام بنتهم دخلت مستشفى وطلعت وما رحنا عيب منهم

علوان ـ شعندج رايحه يا مره خلي رواحتنا لبيت ام فاضل وهاي هي

ـ لا يا رجال ما يصير خوما تكاطعت فدمره وأذا على هذيج السالفه صارلها عمر والفات مات اروح ساعة زمان اعافي الها وأتحمدلهم عـــلىٰ سلامة بنتهم أزهار .

ـ يله ميخالف روحي وتأخذيمن وياج

ـ اخذ جناين نسرين وأسماء

نسرين ـ لا عمه أعذريني اخذي وياج أسماء گافي

جنان ـ ماشي هذا هو لعد ما اخذ الجهال اعوفهم واسيل ديري بالج عليهم مو تكتلين البنات عـــلىٰ ساعه تسكطيهن .

علوان ـ خفي عـــلىٰ البنت يا مره واخذيها وياج عود روحي ويه أمج

أسيل ـ ما حجيت شيء هزيت رأسي وطلعت أنقهرت من امي تريد تعوف الجهال يمي ويرحن همزين أبوي حس وحجه يله زين اجت منهم بدون ما اطلب اروح وياهم

" وصلنا المدرسه وطول الدرس ساكته ورن الجرس والدرس البعده شاغر المدرسه ما جايه واجن هاجر تقى كعدن گبالي حجيت الهن وضحكن

تقى ـ فرصتج ولج واجت عـــلىٰ رجليها

هاجر ـ عيب خوما هي تصارحه وانوب كرايب لا أسيل ديربالج الثكل زينة البنت

أسيل ـ لا شسالفه عزا مو لهل الدرجه هو مجرد اعجاب لا اكثر وتورطت حجيت الكم عاد تأخذونه طابو

تقى ـ لا يمعوده شگو بيها كلنا عـــلىٰ هالطريق بس أقصد مو تصارحينه أنما الفتي أنتباه حسسي بوجودج حسسي عنده بنت عم وحليوه وطيبه ومظلومه وشابعه ضيم وتكفخ من أهلها خرب راح ابجي ونبي لو عندي أخ الا اخذج اله حتى لو متزوج ازوجج اله بس مهم ما اشوفج بهل الضيم العايشته .

أسيل ـ لا يمعوده عادي الحمدلله على كل حال

هاجر ـ اي والله الحمدلله موزين عندج أهل اني ما عندي أهل بس بيبي بس الحمدلله الله عوضني بخطيبي

أسيل ـ الله يسعدج يروحي والله تستاهلين كل خير
ضلينا نسولف وتقى گلبت جنيتها عـــلىٰ مروان گوه تريد تضبطه اليه يمعوده عوفي الرجال بحال سبيله يجوز مرتبط

ـ لا شگله سنگل أني اعرف هالنماذج من شگولهم وأن شاءالله ما يرتبط بس بيج حبيبتي الغالية أخ لو ينطوني أسماء يوم واحد يوم وبصحراء قاحله شسوي بيها افوخ گلبي وخاله جنان اويلي يابه، ولج ومنا هيج لاتسكتين حتى لو يضربونج هو حي عـــلىٰ الصلاة شابعه تكفخ عـــلىٰ أقل بردي گلبج .

ـ أضحك عليها و؏ حرگة گلبها عليه وضلينا نسولف ونضحك كلش أرتاح من اجي المدرسه اتخلص من الضغط وأتونس ويه صديقاتي مو صديقات اخوات بالن يمي وشايلات همي اني أمي ما شايله همي بكثرهن .

" درس ورا درس الى أن خلص الدوام ورجعنا البيوتنا
لكيت أمي تصب الغده واجه حسن ونسرين صعدت غيرت ملابسي وساعدتها وتغدينا وعافن المواعين عليه يمه ما يصير اني هم جنت بالدوام وتعبانه شو هي من الصبح طلعت حالها من حالي لا شغل لا عمل ما يصير على أقل تغسلها ماعون شطلعت هاي

جنان ـ شتغسل مو وراها جهال اثنين ويردون منها شتصير المره وظهرها يوجعها وهنا ماعنين غسليهن ولاتأكلين رأسي

ـ يمه گلبج يوجعج على جنتج ما يوجعج على بنتج

ـ شمسويتلج يا أمي وهذا بيت ابوج والبنت ما تتعاجز من شغل بيت أهلها باجر عكبه تتزوجين بعد ششوف منج تعيريني بغسلة المواعين وناشبه ويه نسوان أخوانجن جفينا شر المشاكل يمه مالي خلكهن .
"يله دتكملي البيدج وصعدي تجهزي لبيت عمج كمال دانروح هم يله النهار كصير بين ما اخابر أسماء شوگت تجي .

ـ سگتت وكملت غسل وهي راحت تخابرها غسلت وصعدت غرفتي طلعت فستان مستور وحلو ومرتب لبست ورتبت شكلي وشلت تلفوني وجنطتي ونزلت لكيت أسماء موجوده تفاجئت الافنديه عبرتها ودخل حارث

حارث ـ وين وين موليه

أسيل ـ اروح ويه امي

حارث ـ وشعندج رايحه يممممممه أسسيل متروح

أسماء ـ صدك تحجين عمه لعد الجهال وين اعوفهم واسيل تروح ويانا شگوو مأخذينها هي بنية بيت حتّى عيب

جنان ـ ليش عيب قابل مأخذتها أدلل بيها ابوك هو گال أخذيها والجهال رهف أخذيها وريم ورامي يبقون بالبيت ووصي نسرين عليهم

حارث ـ كلت متروح يعني متروح

أسيل ـ گول هذا الحجي لابويه هو گالي روحي

حارث ـ أنتِ أسگتي چلبه

أسيل ـ نار شبت بصدري حجيت بصوت ناصي مثل مرتك غير ما حسيت غير ضربني بكل قوته بأيده وضربه عـــلىٰ حلكي وخله دم يتطافر شك شفتي وامي كامت تحجي عليه

جنان ـ ليش ضربتها شسوتلك وابوك كال اخذيها وياج ما تكعد راحه الا تسويلنا سالفه وانتِ متعرفين تسكتين روحي غسلي نولي

أسيل ـ غسلت عـــلىٰ المغسله وخليت كلنكس كوه أنكطع الدم الشك من داخل شفتي خليت مرطب شفه وطلعنا وجان مزعوج ويفتر وأسماء گلبت خلقتها لن شافت امي ما رضت واني مستغربه من امي يمكن مفعول السحر خلص ههه ورجعت امي طبيعيه

" طلعنا لبيت عمي كمال واخذنا تكسي وبالرجعه كالت تخابر حسن يجي ياخذنا وصلنا بيتهم ماكو فرق عن بيت جدهم وعمهم فاضل بس هذا مرتب وأحلى وحسيته أوسع الحوش كبير ومليان سيارات ثلاثه يعني موجود بالبيت لحد علمي أزهار عدها سياره وعصام وعمو كمال وهو ياربي موجود .

" مجد فتح النا الباب ودخل يصييح عليهم وشوي وطلعت عمتي وصال تهلي وترحب بينا

وصال ـ يا هلأ عيوني يا هلأ توه ما نور البيت اتفضلوا اتفضلوا

أسيل ـ باوستنا وصلتني باوستني وصفنت بوجهي وأبتسمت ودخلنا الأستقبال ويا ما عمه وصال فتحت الباب مروان نايم كبل كمز لابس بس داخليات وبأذانه هيتفون جان عـــلىٰ اتصال ويمكن كاميرا لن كبل كلب التلفون وتفاجئ خطيه نزل رأسه ومشه سريع ودخلنا الأستقبال وهو اسمعه يحجي على امه

وصال ـ شمدريني نايم اهنا مو عندك غرفه

مروان ـ هاي سوالفج تحممي كولي بالله عليج هاي سالفه سالفتج خليتني بموقف محرج كله جفت وصال خاتون
لا وانوب مصلخ

ـ اي دتروح بدل وتعال سلم عـــلىٰ مرت عمك عيب

ـ ضل بيها سلام

أسيل ـ كعدنا وأسماء باوعتلي وكالت

أسماء ـ ياا خطيه فشلنا الرجال وأستحى من عدنا وضل يحجي على امه هو فشل لن اسيل موجوده ويانا

جنان ـ ما صار شي حسبة اخوانها

أسيل ـ سگتت واجت ازهار وأسيا زوجه عصام سلمنا عليهم وأسيا جانت كلش حلوه وكاشخه تلمع لمع وتذكرت هديل وأزهار راحت جابت ضيافه قدمت النا وأسماء أستلمتها

أسماء ـ ما تزوجيين نفرح بيج

أزهار ـ بعد وكت

أسماء ـ يا بعد وكت شو دراسه وخلصتي وتوظفتي تزوجي نفرح بيج

أزهار ـ قسمه الله كريم اتفضلي

أسيل ـ وصلت لعندي ضيفتني وسمعنا صوت تحمم غصيت الا شويه دخل وسلم عـــلىٰ أمي اكلها وشربها بالسلام صاحب ملكى الحلو ابن الحلو

مروان ـ يا هلأ بيكم سلمينا عـــلىٰ عمي علوان و؏ الولد

جنان ـ بالمهلي يمه يوصل ان شاءلله الله يسلمك ويعزك

أسيل ـ جان لابس وكاشخ شكله يطلع طلع وأشر لـ أزهار ضحكت ولحكته اني شبيه مراقبه حركاتهم اخذت نفس لن توترت من وجوده يقلق علــــىٰ رغم شكله وطوله وشخصيته تجيب العافيه ..

جنان ـ شلون صارت والله سمعنا انقهرنا خطيه بعدها وينها وين السكر وينزل

وصال ـ الحمدلله عدت عـــلىٰ خير اي والله يخيتي

جنان ـ الله يجفيكم شر الامراض تنذكر ما تنعاد وربي يفرحج بيها صلاوات صايره شحلاتها وأنتِ هم ما طلعينها ضامتها

وصال ـ ههه والله اختي لا ضامتها ولا أبداً هاي بنت ابوها شحدها اللي يحاجيها وبس تخرجت وظفها وعلمها السياقه وحتى صعدها سياره منو بدورنا صعدت سسياره اني لو أنتِ بس لن وحيدتنا وتستاهل الدلال عيني طولها

جنان ـ هاا ما شاء الله الله يحفظها الكم .

أسيل ـ امي باوعتلي وسگتت نزلت رأسي ضامتهن بگلبي
اجت تضحك وكعدت بصف امها وشوي واجه كرم طفر عليها شالته تبوس بي وأسيا كامت شالت الضيافه

" وكمنا وعزمونا عـــلىٰ العشه بس امي ما قبلت وتعذرت منهم عاد كالت

وصال ـ دام ما تضلون عـــلىٰ العشه مروان يوصلكم ما يصير والله أزهار شوفي أخوج كاعد بغرفتنا يله امي

جنان ـ لا يمعوده نأخذ سياره ليش اتعبينه هو نازل تعبان خطيه

وصال ـ لا شصار قابل يله أزهار وين صرتي

أزهار ـ هسه بس يجيب المفاتيح السسياره بغرفته ويجي

أسيل ـ شوي وسمعنا صوته يصيح امه عاد كمنا واسماء مشت أول وحده يربي هالبنيه شكد خفيفه كون يشوفج حارث الا يملص رگبتج لا والله هو شاطر بس عليه الاخت مسيطره .

" طلعنا هو مشه والتفت علينا اجت عيونه بنص عيوني بس بدون أنتباه مجرد نظره عاديه بس يمي مو عاديه احس سحب شريان من نص گلبي وازدادت نبضاته ينبض بقوه لاحظت أيديه بيهن رجفه خفيفه
نمشي واني نظراتي عليه هاي بالبيت وهيج كاشخ لو تطلع شلون تكون الكشخه مشكلتك دخلت راسي وتربعت بگلبي .

" شغل السياره وازهار صاحتله

أزهار ـ سيادتك لاتنسى الوصيتك عليهن

مروان ـ عـــلىٰ هالخشم

أسيل ـ لحالي ابتسمت حبيت عائلتهم وحبهم لبعض شغلها وامي صعدت ليكدام اني صرت ورا امي وأسماء بصفي ودعناهم وطلعنا للبيت ساكت يمكن هو طبيعته هادئ .

وصلنا وأمي تشكرت من عنده واني نزلت مستحيه بس تمنيت الطريق ما يخلص هو شكله حلو يجيب العافيه

جنان ـ مشكور يمه تعبناك ويانا الله يحفظ لشبابك اتفضل فدوه لعينك والولد موجودين

مروان ـ لا عمه صدك جذب احنه اهل من عيوني الاثنين سلمي عـــلىٰ عمي علوان والولد واعذرينا غير مره ان شاءلله يله فيمالاا

جنان ـ في حفظ الرحمٰن يمه درب السلامه وليدي .

أسيل ـ راح الله وياه ليش هم رفع عينه عـــلىٰ وحده بينا هم باو؏ لا والله عفيه شُنو من اخلاق وثكل ورزانه شايل هم حلو وهم شخصيه وهم أخلاقك عاليه اي يا مروان .

جنان ـ الله يحفظه شلون ولد أبداً ما رفع عينه والله ونعم تربيتج يا وصال زلم بيهم حظ الله يحفظهم ويفرحها بيهم .

أسماء ـ أي ما شاءلله مبين خوش زلمه

أسيل ـ عفتهن يحجن وطفرت للغرفه فتحت الباب فتحت الشال ونثرت شعري وتمددت عـــلىٰ الجربايه وغمضت عيوني وهذاك الطول انرسم بخيالي ومخيلتي خليت ايدي عـــلىٰ گلبي وابتسمت رفعت ايدي خصلات شعري واحس ريحة عطره بخشمي خشونة صوته مشيته بطوله الحلو هدوئه وثكله والاهم عيونه كبار واسعات النظر .

" بقيت مبتسمه وفرحانه احس بروحي طايره بدون جناحات بهل السما الحلوه روحي هادئه وساكنه وعايشه شعور الملكات شعور حلو وينعس شعور الحب الحقيقي هو حبك يا مروان وتحول الأعجاب من نظره الى نظرات الى حب وهل الحب شلون راح تكون نهايته . !
_____

أزهار

ـ من بعد ما راحوا رجعت لميت الضيافه وغسلت المواعين واكفه اغسل واجه مروان خله الأغراض الوصيته عليهن مشكور تعبناك

مروان ـ بالعافيه يابه

ـ جر الكرسي وكعد وعينه بالتلفون اكول مروان نفخ الدخان وحجه

ـ گولي

ـ ويامن جنت تحجي بالاستقبال ولكفتك الوالده

ـ تحقيق لو شُنو وبصفتج منو تسألين

ـ أختك منو قابل

ـ لااطيحين ميانه زايده

ـ تمام بس مره گتلي أحجيلج حابه اعرف

ـ من يجي وگتها مو هسه

ـ يعني مرتبط

ـ شعليچ يله اني طالع لاتتنظروني على العشه وأحتمال اتأخر

ـ وين رايح اليوم نزلت بعدنا شفنه منك هسه يجي بابا ويسأل عليك

ـ وين أطير قابل شعندي مكابلجن يله فيمالا.

ـ الله وياك راح ورجعت اكملهن واجت امي

وصال ـ وين راح مروان شعنده طلع

أزهار ـ وين يروح قابل يم جماعته وگال يتأخر

ـ شوكت ازوجه وارتاح عـــلىٰ اقل اضمن وجوده هسه عصام من ساعة تزوج كعد عـــلىٰ عقله

ـ الله كريم

ـ شفتي أسيل شلون بنيه حلوه وتنحب

ـ أي شفتها بس مو ذوق مروان

ـ وليش مو ذوقه شبيها شو عين هالكبر والطول شحلاته شيريد اخوج انجلينا جولي

ـ يشلع گلبها والله اني اعرفه يحب الحلوات فد مره هذن ناعمات وبشرتهن مثل الورق ثلج ثلج عكس عصام ما يهتم لجمال بكثر ما يهتم بالاخلاق

ـ مو معوز اخلاق يعوض

ـ والله ضحكتيني

ـ الله كريم بس احاجي عليها بس خل اشوف أبوج بالاول اني هالبنيه عجبتني حبيتها وبنت عم ابوج

ـ كيفج اللي تشوفينه يله ماما غسلت المواعين شلوني

ـ شلونج يرادلج عمه وحموات يشوفجن نجوم الظهر

ـ ليش ماما بيش طالبتني

ـ هذا مو شغل ماما المفروض منج تعرفيهن بدون ما اعلمج البيت يريد هواي أمور وأم البيت لازم تعرفهن كلهن مو شرط تكون موظفه ما تعرف بالعكس الموظفات قايمات بواجباتهن عـــلىٰ اتم وجه ف مغزل كلامي اتعلمي امي محد يفيدج لا اني ولا غيري احسسن ما تسمعين حجايه تغثج وتضل تأكل بگلبج العمر كله.

ـ الله كريم أتعلم شوي شوي عفتها وصعدت غرفتي وتمددت وكلام امي برأسي يعني شرط الوحده تتعلم اي شرط لعد شلون يله منا وهيج احاول اتعلم الطبخ والحلويات وكلشي يخص المطبخ سهله ان شاءالله

" فتحت تلفوني وراسلت أيات وأستبرق وحجيت الهن ايات ضحكت لن نفسي كلشي متعرف بس أستبرق لا متعلمه عـــلىٰ أبواب زواج راح ادخل العش الزوجيه .

أيات ـ ازهار اني وياج نقدم على تقاعد شنسوي بالزواج وتعالي رجال وعيال وبعدين يجون الاطفال ومسؤوليه يمه شُنو هالحياة الله يساعد أهلنا

أستبرق ـ لعد شعبالجن هاي الحياة

أزهار ـ واني احجي وياهن رشا دزت رسائل دخلت عـــلىٰ رسائلها وكاتبه اتصلي أتصلت عليها وحجت

رشا ـ ازهار أريدج تساعديني

أزهار ـ عيوني الج كولي

ـ هذا هشام رفض يأخذني بالخط ما اعرف ليش وهو عنده مكان فارغ حاولت وياه يكول ما احتاج وبيتج بعيد وبيتي اقرب من ست رقيه

ـ ليش وشمعنى

ـ ما أعرف والله حسيته ما يريدني وأني رايدته وحبيته نوب عليه صوت بالتلفون الا يموت

ـ منين حصلتي رقمه

ـ دبرته وهسه شلون صديقتج وكعت بالعشك حبيته ما جنت اظن بهل السرعه راح أحبه ولج ثكيل وما ينطي مجال وكوه يحجي عباله بهاي التصرفات راح ابتعد ما يدري وكعت عـــلىٰ عمى عيوني

ـ أخاف يدك ثكل برأسج

ـ لا لا مو من هذا النو؏

ـ وشمعرفج بي

ـ مبين الشخص من النظره ينعرف وأني عرفت اطباعه بحكم عصبيته ونظراته اللي سلبت گلبي

ـ تحجي وصوتها مخنوك الاخت عاشگه فعلاً والبنات يدزون رسائل وهي تحجي جاوبتهن لحظه صديقتي بالدوام جاي احجي وياها صاعده أتصال

أيات ـ بس لا تكولين رشا

أزهار ـ اي هي ليش

أيات ـ من خلال كلامج عنها ما ارتاحيت الها ما اعرف ليش هيج گلبي ما حبها ولا حب اسمها

أستبرق ـ ولا اني حبيتها عوفيها ختولي قحط صديقات مو عندج احنه موجودين وعلاقتنا قويه لاتثقين بيها ختولي

رشا ـ ازهار وين رحتي شو سگتي اني اتصلت مو علمود تضلين ساكته حاجيني فدوه رايده مساعده منج

أزهار ـ بشنو اساعدج والله ما أعرف والحب مو غصب ولا اجبار احتمال الرجال متزوج او مرتبط بوحده ثانيه وما جاي ينطي مجال لهل السبب

ـ بس اني حبيته

ـ حبيتي بس لاتسحلين نفسج وراه خليج ثكيله الرجال يكره الخفيفه والتركض وراهم اني حسب اخواني احجيلج بعد كيفج .

ـ ما حبيتي قبل

ـ شنو معنى هالسؤال اظن شيء خاص بيه

ـ مجرد سؤال شبيج

ـ اي حبيت بس ما صارت قسمه انفصلنا من زمان

ـ وتزوج بعدج

ـ ما اعرف الصراحه ولا اريد اعرف

ـ ليش أنفصلتوا

ـ علمود أمه ما رادتني واني كبل نهيت

ـ علاقه قويه لو هيج عابره

ـ اكعد احجيلج شيء صار بالماضي مالي خلك عوفينا من هالموضوع خلينا بموضوعج شراح تسوين

ـ ما أسوي شيء ومثل ما كلتي احتمال يحب ثانيه

ـ مجرد إحتمالات لاتخلين بالج عوفي وثكلي اذا يحبج هو يصارحج هيج افضل

ـ ماشي يله باي

ـ وين تروحين شو گبل باي

ـ أخواني بالبيت ما اكدر أطول عـــلىٰ التلفون تعرفين الاخوان

ـ اي حقج الله وياج راحت وما اعرف حسيتها تجر لساني بالكلام واني الثوله شكو حجيت الها يله قابل قاتله الولد حبني وما صارت قسمه وراح الله يسهله

ايات ـ ولت لو بعدها وينج

أزهار ـ اي راحت

استبرق ـ شتريد

أزهار ـ عدها موضوع وطلبت مساعده ونصحتها

ايات ـ لا تثقين بيها ما مرتاحلتها

استبرق ـ اي ديري بالج منها

أزهار ـ يمعودات شبيكم أنكلبتوا عليها البنيه كلش حبابه وما شفت منها شي مو حلو من يوم توظفت بالدائره هي لطيفه وياي

ايات ـ مهم نصحناج كيفج

أزهار ـ تمام مشكورات عـــلىٰ النصيحه نهينا المراسله ودخلت ابحث عن وصفات صارلي واهس طلعت ونسختهن ونزلت اسوي عشه كملت ورجعت ادور على وصفه ثانيه واشم ريحة شعواط لما انداريت الدخان وين واصل واجت امييي تركض وتصيح عليه طفت الطباخ

وصال ـ لا خوش تعلمتي من اولها حركتي الطبخه وجان حركتينا وياج اذا هالمهجوم التلفون بيدج منين تعلمين من عين جدي عوفي لخاطر الله هالطبخ مااريده منج لاتتعلمين

أزهار ـ ليش تحطمين واهسي شصار اذا احتركت الطبخه عادي مو من اولها تضبط وياي خل اجرب مره مرتين ثلاث لما اتعلم

ـ اي وتحركيلي الجداري والمطبخ كله دهن وسماد ودخان عـــلىٰ هالحجي نحترك لما حضرتج تتعلمين عمي ازوجج كعيدي يمي علمود لا طبخ ولا شي تخلصين

ـ شنو كعيدي

ـ يكعد ويانا

ـ اي هاي العايزه طلعت وضلت تدردم وتحجي حطمت واهسي يبووو شجاني غير انتبه عـــلىٰ الطبخه خل تضبط الاولى عود طبخه الثانيه يجي وكتها ضجت حيل
وحلفت بعد ولا اتعلم شيصير خل يصير وهالزواج هم ما اريده ولا اتزوج قحط .

" الثاني كعدت من وكت ومعصبه مزاجي متعگر لبست رسمي وشلت جنطتي وشلت السويج ونزلت الكل نايمين فتحت الباب طلعت سيارتي من الكراج وتوگلت لدوام .

" وصلت طبكت سيارتي واني نازله عبر من يمي بالسياره موظفين ولاحظت فعلاً اكو مكان فارغ ليش رفض يأخذ رشا وياه مشيت ونزلوا وسلموا عليه اهلاً أستاذ احمد

احمد ـ اي عمي شگو عليج سياره وأحنه ناجر خطوط

رقيه ـ لا استاذ احمد لا انوب اطكها بعين مدلله ابوها بعد ما عليج من كلامه

ـ لا شسالفه اتشاقه والله عليج الف عافيه تستاهلينها

أزهار ـ الله يعافيك تسلملي مشوا واني مشيت لفت أنتباهي بعده واكف ونظراته متوجهه ناحيتي تجاهلته ومشيت وراهم دخلت ودزيت على كهوه كعدت اشربها ودخلت رشا مزعوجه خير شبيج

رشا ـ ضايجه والله ومخنوكه نفس الروتين ماكو شي جديد

أزهار ـ اخاف من ورا هذولاك الناس

رشا ـ قصدج هشام

ـ اي

ـ اي بس شسويله قافل عليه ما يقبل ياخذني بالخط مالته ليش هالعناد ما اعرف

ـ عوفي وشنو يعني لا يقبل ابقي بالخط مالتج

ـ لا ما اعوفه ما حبيته علمود اعوفه والمن اعوفه

ـ شبيج تعصبتي كيفج لاتعوفينه

ـ لاتزعلين امانه حجيت هيج من حرگة دمي

ـ لا عـــلىٰ شنو ازعل

ـ دام هيج اليوم عازمتج على دولمه الا تموت سويتها البارحه باليل نطلع من الدوام وتروحين وياي نتغدأ وبعدين رجعي بيتكم

ـ لا ما اكدر ما طالعه لغير بيت

ـ ليش شگو بيها اني صديقتج مو غريبه

ـ أعذريني ما اكدر والله اذا تحبين اني اعزمج

ـ اي عادي اوافق لن من يومج تعزميني ويصير شيءوتغلسين عليها واني مو مثلج حقنه وأرفض العزيمه وجدر الدولمه أي عـــلىٰ شنو عازمتني

ـ تعالي وتدللي

ـ لعد من يخلص الدوام اروح وياج

ـ اي تعالي هلا بيج يله خل نكمل شغلنا هواي حجينا
رجعت كملت شغلي وهيج لما خلص الدوام ورأسي صد؏ والله اليوم تعبت وعبالي اروح السوك شكلي راح اكنسلها

رشا ـ لا ليش اروح وياج واسويلج واهسس

أزهار ـ أخاف تتأخرين وأخوانج يضلون يحجون

رشا ـ لا يمعوده أكول الهم حفلة عيد ميلاد وصديقتي تاخذني وترجعني ميكولون عادي لن يعرفونج بالبيت من تتصلين ازهار كلهم يصحون ازهار اتصلت

أزهار ـ يا عيني خلص لعد امشي للبيت نتغدأ وبعدين نروح السوك

رشا ـ تمام متفقين

أزهار ـ فرحت هواي وطلعنا سوا وبطلعتنا جان موجود عبرنا من يمه ورشا ما شالت عينها وهي نظراته مو يمها ومن صعدت رشا كالت

رشا ـ شفتي شلون يباوعلنا او بالاخص يباوعلج الج

أزهار ـ خل نمشي هسه

ـ هاي سيارتج شگد حلوه احلى من هذيج بيش اخذتيها

ـ من معرض بابا هو جابها اليه

ـ هاا تستاهلين نيالج عـــلىٰ أبوج

ـ شغلت سيارتي وهو هم ورشا ثولتني بس تحجي وتسأل واني ما اعرف شجاني ارتبكت بالسياقه مو بالعاده هيج يصير وياي

رشا ـ مبين معجب بيج من اسالج تكولين لا ماكو هيج شي باعي نظراته مال واحد عاشك وولهان

أزهار ـ لا اله الا الله جلبتي بيه بعد لزكتي سگتيي عاااد انزعجت منها لازكتلي شيء مو ابالي واني أيدور السياره ضربت سيارته بقوه

رشا ـ عزا العزاچ أشسوووويتييييييي ؟

أزهار ـ إشسوووويت . !

يتبع
_

9





أزهار

ـ طفيت السياره وانخبصت ورشا تحجي وتلطم

رشا ـ عزا العزاج صخام الصخمج ضربتي سيارته خطيه

ـ گااااافي سدي حلكج خل اشوف دربي ، نزلنا ولكيتهم نازلين ومجموعين والسياره مالته مدمره من كدام وسيارتي هم متأذيه باوعلي وهو منزعج

هشام ـ اذا ما تعرفين تسوقين شگوو تركبين سياره ما عندج احد يظبج ويعلمج السياقه شلووون

أزهار ـ أحترم نفسك وأحجي عدل خوش وبعدين أنت ضربت سيارتي مشكلتك مو مشكلتي انت روح أتعلم سياره لا تذب بلاءك عـــلىٰ العالم

ـ عمي أنتِ تردين تبليني دعمتي سيارتي اني رجال اسوق سياره من عمر مو تجيني وحده جاهله تعلمني السياقه

ـ والله هذا العندي أنتَ دعمت سيارتي وأنت تعوضني والا اكولك هالتعويض هم ما اريده خلي صلح بي سيارتك لن خطيه هم تضررت وكان الله يحب المحسنين، حسيته صار واحد ثاني من عصبيته وكام يعيط وأستاذ احمد يهدي بي

ـ شوفي لج ورب الكون اذا ما تحجين اعدل أعلمج الحجي شلون بس أنتِ الظاهر مستجلبه عـــلىٰ الاوادم والله لما حرمه جان عرفت شغلي وياج بس الموكفني حرمه مو رجال واذا عندج زلم خابريهم اتفاهم وياهم ما عندي كلمه وياج جاهله وكل منطق ما عندج .

أستاذ ـ هدي اعصابك كول يالله يمعودين تنحل بالتفاهم

هشام ـ ليش تعرف التفاهم أستغفر الله العظيم واتوب اليه .

أزهار ـ مسح كصته بتعب جريت تلفوني أتصلت عـــلىٰ بابا خل هو يتفاهم وياه الظاهر واحد لسانه متبري منه وكعت بسالفه وياه بعد شيخلصني من بابا واخواني

" وكفوا على صفحه وأني أتصلت ورن جاوبني بابا وين أنت

كمال ـ بالبيت ليش بابا

أزهار ـ بابا تعال لدائره صارتلي مشكله

ـ مشكلتيش خيرررر شصااااير ازهار باباااا

ـ بابا لاتخاف بس شسمه اندعمت وهذا ما يتفاهم يكولي أنتِ دعمتيني تعال احجي وياه

ـ جاي بابا جاي

ـ أنتهى الاتصال ورجعت باوعتله كلب عيونه وصد وجهه عني ويستغفر عبالك شايفني مصلخه هذا شبي

رشا ـ ترى أنتِ دعمتي ليش ما تتنازلين وتدفعين التكلفه يصلح بيهن سيارته خطيه هو صحيح سيارتج هم متأذيه بس ميخالف أنتِ عندج خير زايد ومعرض هسه تكدرين تروحين تختارين احسن سياره بس هو المسكين هذا رزقه .

ـ أنتِ أكرمينا بسكوتج لخاطر الله ما ناقصتج فگي عني
عفتها وكفت قريبه منهم وأستاذ احمد يهدي بي وهو ساكت باوعلي وگال

ـ اذا محد يجي اريد اولي اوصلهم وراي أهل ينتظروني مو اضل انتظر

ـ بابا بالطريق جاي ما جاوبني ومر وقت وطبكت سيارة بابا ونزل تسلاموا هو وياه وأستاذ احمد وكفوا يحجون اله واني ساكته واجه بابا القى نظره وباوعلي

كمال ـ فوك سوايتج تتهمين الرجال داعمج ليش بابا

أزهار ـ بابا هو أكلني حاصل فاصل ما انطاني مجال وما اتحملت حجيت هيج خلصني من هالسالفه فدوه

كمال ـ امشششي صعدي هسه اجي

أزهار ـ لا ابقى وياك هز رأسه ومشينا وهشام ما يباو؏ بوجهي عبالك كاتله اهله مو داعمه سسيارته وبابا تعذر منه

كمال ـ حقك علينا أبني ونعتذر منك واحنه الغلطانين وتكاليف تصليح السياره عليه وشتريد اني حاضر وأعذرها بنت وتسوق سياره مو مثلنا احنه الزلم

هشام ـ لا عمي شسالفه هذا هو ما صار شيء والتكاليف خليهن ما يحتاج كلامك كافي الله شاهد وبنتك الله يسلمها لو محاجيتني بالطيب جان انحلت بساعتها

ـ لا والله ما امشي منا اذا ما ادفع كل تكاليفها وغير كلام ما ارضى بي وأنت رجال تشتغل عـــلىٰ باب رزقك ما يصير أبني الحق حلو

أزهار ـ اجه بابا فتح السياره وكفت عـــلىٰ صفحه طلع مبلغ عباره عن اوراق مبين مبلغ جبير مشه من يمي وراح خلاهن بيده وهشام يحلف وما ياخذ وصارت لغوه وبابا قفل اخر شي خلاهن بيد أستاذ احمد وسلم عـــلىٰ هشام وتعذر واجه وهزلي رأسه مقهور مني واجت رشا تركض هي وكعبها خبلتني هالبنت

كمال ـ يله صعدي سيارتي وسيارتج بقيها هسه ادز مروان يجي يأخذها جيبي اغراضج وتعالي بسرررررعه.

أزهار ـ تمام مشيت لسيارتي فتحتها اخذت جنطتي واغراضي وقفلتها وهو باوعلي كذلك مقهور ويهز براسه تجاهلت نظراته ومشيت ورشا وراي خبصتني

رشا ـ وهسه شلون

ازهار ـ مو انحلت كدامج بعد شگوو

ـ اي بس اقصد وأني اروح وياج لا ، لن خوما اضل لوحدي بلغت اهلي ترى والخط مالتي راح من زمان

ـ نوصلج بيتكم عود بعدين اعزمج

ـ جان استحيتي

ـ خلاص لاتزعلين يمعوده امشي ويانا وفضينا شيخلصنا من لسانج

ـ هذا ابوج مو

ـ اي بابا لعد منو

ـ ما شاءالله بعده شباب وشخصيه وهيبه الله يحفظه الج

ـ شكراً يله امشي صعدت ليكدام وهي ليورا وبابا باوعلها ورجع باوعلي وصغر عيونه راساً جاوبته بابا هاي رشا صديقتي عازمتها على الغده

كمال ـ اهاا هلا بيج عمو اعذرينا بنيتي

رشا ـ أهلاً بيك لا عادي ولا يهمك