أزهار ـ يحجون وأني اباوعله شلون متعاند هو وأستاذ احمد علمود الفلوس بهل الاثناء وقبل لا بابا يشغل السياره اجه استاذ احمد ونزل بابا راحوا عليه بابا شگله عصب عليه وهو ولا اهتز ورفض رفض قطعي بابا طبطب عـــلىٰ اكتافه وتشكر منه واجه هزلي رأسه صعد وطلعنا وهشام رفع عيونه توجه نظره ناحيتي نزلت رأسي مو عارفه شحجي !

كمال ـ غرقني بالاخلاقة هالولد ما يقتنع ياخذ طفرت روحي وأني اكوله اخذهن ميبس رأسه نفسه عزيره الله يحفظه لشبابه .

أزهار ـ خلاني أحتقر روحي بلحظتها ذبيت الكلام بوجه وكدام أستاذ احمد بدون ما احسب حساب مشاعره قسيت عليه صافنه وفززني صوت بابا

كمال ـ سياره بعد ماكو

أزهار ـ ما حجيت

كمال ـ نوصل البيت ونحجي

أزهار ـ مثل تريد بابا، سكتنا وصلنا البيت والتفت عـــلىٰ رشا رايحه بعالم ثاني صافنه على البيت والحديقه والكراج ضحكت عليه وينج

رشا ـ موجوده سگتي استحي من ابوج

أزهار ـ انهجم بيتج ضحكت وطبك السياره نزلنا وهي مستحيه بابا مشه قبلنا

كمال ـ اتفضلي بابا يا هلا بيج

رشا ـ شكراً

أزهار ـ دخلنا واجت امي على ملامحها قلق وخوف شافت رشا بهتت ملامحها وخافت أبتسمت شبيج ماما

وصال ـ قل اعوذ برب الفلق منو هاي ولج

أزهار ـ شبيج ماما لاتخافين هاي صديقتي رشا نداوم اني وياها نفس الدائرة عزمتها عـــلىٰ الغده اعرفكم على بعض رشا ماما، ماما ورشا يله رشا اتفضلي

رشا ـ هلا خاله شلونج

وصال ـ الحمدلله

ازهار ـ دخلتها الاستقبال وعيون امي ورا رشا عافتنا ولحكت بابا تفهم منه شگو ، اعذرينا صارت بوجهج

رشا ـ لا يمعوده عادي تصير بس أنقهرت على هشام خطيه كسر خاطري وأنتِ بسلامتج ما قصرتي

أزهار ـ لا تذكريني فدوه هو هم ما انطه مجال اكلني بلسانه يله هسه ارتاحي اروح اجيبلج ضيافه بين ما يجهز للغده واشوف ماما

رشا ـ عـــلىٰ راحتكم حبيبتي

أزهار ـ طلعت من يمها وامي هزتلي رأسها تعالي الغرفه

وصال ـ ابوج يريدج شمسويه ولج داعمه سياره الولد صخام نوب عليه أنتِ كافي عليه اخوانج شايله همهم هما وسيارتهم وسرعتهم اجيتني أنتِ

أزهار ـ خل أشوف بابا شيريد وبعدين نحجي بهل الموضو؏ مشيت ونزل مروان هزلي رأسه معناها شصاير

مروان ـ خيررر شگوو وجهج ما يبشر بالخير .

أزهار ـ تعال هسه وبابا يحجيلك دخلنا الغرفه جان كاعد يدخن باوعلي بانزعاج وعصبي

كمال ـ مروان تروح تجيب سيارة اختك وترجعها المعرض

مروان ـ ليش غير اعرف

كمال ـ سوي اللي كتلك عليه ولا تسأل

مروان ـ ماشي وراج مصيبه حسبتج مو خاليه

كمال ـ مروان

مروان ـ رايح

كمال ـ وصال روحي شوفي صديقتها عيب البنت اجت وعفناها وازهار سدي الباب وراج

وصال ـ خل افهم منكم عود لاحكين عليها

كمال ـ وصال گتلج روحي وازهار سدي الباب وراج

أزهار ـ رديت الباب وراها وكفت مقابله أول مره اخاف من لحظه غضبه

كمال ـ هذا دلالي الج تفشليني كدام الاوادم يا بابا لسانج ليش ما تضبينه شنو شايفته واحد من اخوانج وتحاجينه بابا رجال غريب وانتِ محكوگه لو داعمته ومات بساعتها

أزهار ـ لا يابه الله لا يگولها ما اعرف جنت متوتره وما باوعت وراي واني عبالي راح أصلاً شلون دعمت سيارته ما ادري

ـ يله الحمدلله عدت على خير روحي صبي الغده وساعدي أمج

ـ بابا

ـ مو هسه بعدين نحجي

ـ بس

ـ أزهار لاتحلين بابا .

ـ تقربت بسته من رأسه وطلعت لكيت رشا طالعه من الاستقبال تغسل هاا ما انتظرتيني

رشا ـ اي والله تضايقت عاد طلعت أمج دلتني على المغاسل

أزهار ـ هاا ماشي غسلت وراحت الاستقبال توني اريد اصعد اغير ملابسي امي من المطبخ صاحتني ورحتلها هااا ماما

وصال ـ وجعا التوجعج منو هاي الجايبتها وياج

أزهار ـ شبيج ماما مو كتلج صديقتي رشا

ـ وشعدها جايه بهل الظهريه وياج ما عدها أهل أخوان يسألون عليها وأنتِ الثوله شگو تلفين صديقات ولا وجايبتها وياج للبيت ومليان زلم

ـ لاتسوينها سالفه عاد البنيه اجت لن عزمتها عـــلىٰ الغده وصار الحادث وأضطرت تجي ويانا وين اوديها قابل

ـ ما جان بطريقكم توصلينها لبيتها

ـ يمه شبيج ترى عيب هاي صديقتي

ـ عيب هي ما كالت على نفسها عيب من جايه لوحدها لبيت مليان زلم والله عود بيت صديقتها بنات اخر وكت من أمداج أنتِ وهالصديقه وجها وجه وحده مو راحه والحواجب طايره جوه كل حاجب شيطان

ـ لاتزعليني منج عاد

ـ ما ارتاحيت الها ما ادري گلبي لعب منها

ـ بستها من رأسها عديها عـــلىٰ خير ما اريد اتفاشل وياها اكلت رأسي تريد تجي تشوف بيتنا وطالبتني غده شسويلها بعد

ـ أول واخر مره تلفين هيج شگولات ونماذج مو عندج ايات وأستبرق شسوين بالصديقات امشي امشي بدلي وتعالي اخذيلها الغده وخل تولي لبيتها

ـ ماشي تدللي عفتها وصعدت الغرفتي غيرت ملابسي وشوي اندك الباب فتحته رشا.! مو عفتج بالاستقبال شجابج

ـ ولج أختنكت لوحدي جني مزهريه كلت اجي يمج وهم اشوف جمال غرفتج عاد طلعت أمج صعدتني

ـ هاا تمام دخلت الغرفه وضلت تباوعلها وراحت الميز التواليت تكلب بالعطورات والمكياجات تنزلين لو تحبين نتغدا اهنا

ـ لا خل اشوف

ـ عود بعدين تشوفينها يله خل ننزل هسه ماما جهزت الغده هزت راسها ونزلنا وصارت بوجهي امي بيدها صينيه الاكل منوعه من گلشي

وصال ـ وين نزلتن جبت الاكل الجن فوك احسن لن ابوج ومروان يردون يتغدون

رشا ـ عادي نتغدا وياهم

أزهار ـ امي كلبت عينها وعظت شفتها وتستغفر ونظراتها بتوعد اليه اخذت الصينيه منها نروح نتغدا بالاستقبال يله رشا تعالي مشينا وصادفنا مروان صغر عيونه وغمزلي همست بعدين دخلنا وقفلت الباب وكعدنا نتغدا ورحت جبت العصائر وامي تدردم

" رشا تأكل وتباو؏ اكلي الاكل برد

رشا ـ حسيت إمج متضايقه من وجودي

ازهار ـ لا يمعوده صدك جذب هي مزعوجه من سالفتي أنتِ شعليج يلا مدي ايدج لاتخلين بالج، بسم الله

" كملنا وهي انتخمت خرب بيومج كومه أكلنا كومي غسلي واني اودي المواعين والم هالهوسه

رشا ـ لا اساعدج ما يصير

أزهار ـ اجت وياي ساعدتني بالمواعين وجمعنا السفره احنا بالعادة كل اكلنا بالمطبخ مطبخنا جبير وبي ميز طعام غده عشه ريوك عصريه جوعان شبعان بالمطبخ

" كملنا وأمي عيونها علينا اخذت رشا المغاسل غسلت وراحت الاستقبال واجه مروان ضربني عـــلىٰ رأسي

مروان ـ منين ملفيه هالعطلات

أزهار ـ يمعود صديقتي انوب عطلات شبيكم شديتوا وياها

ـ مو الوقت مو مناسب والوجه ما يساعد هسه لو حلوه بيها باب وجواب مو حواجب ساريه سواس من طكن بوكتهن بس اسمع مني يل منجنني

ـ خلقة الله عوف البنت بحالها والله فقيره

ـ خلقه الله بس ملعوب بيها شدعوه هلكثر شامرتهن كوليلها أخويه مروان يكولج ليش عاسله حواجبج

ـ هههه تدلل مشيت وامي هي وبابا كاعدين باوعتلي اكو جاي

وصال ـ اي صبي الج ولصديقتج

كمال ـ لاتقصرون وياها عيب بنيه غريبه واول مره تتدخل بيتنا

وصال ـ ما قصرنا يله اخذيلها الجاي عيب

أزهار ـ صبيت الجاي ولاحظت أسيا ماكو ماما أسيا وين

وصال ـ بعد وكت

ـ صدك وينها لا هي ولا كرم

ـ نايمه ظهرها يوجعها

ـ ليش شبيها

ـ صار عدها وجع واخذناها اني وأبوج ومروان شافتها الدكتوره وفحصتها وكالت تعبانه ولازم ترتاح وتضل نايمه لن اخاف تصير عدها ولاده مبكره .

ـ يا عيني منين اجتها يله رايحه اشوفها واطمئن عليها

ـ عوفيها هسه روحي على صديقتج بعدين رجعي شوفيها ما تطير امشي صديقتج كاعده وحدها يله امييييي .

ـ ماشي ماما أخذت الجاي ومروان صادفتني وگال

ـ صديقتج بالحديقه تتشمسس

ـ كالها بمياعه وضحك ومشه يشرب جاي يمهم الله صبرني ويعدي على هاليوم ؏ خير

" فعلاً رحت الأستقبال وما لكيتها هاي شبيها ما تعرف تكعد فتحت الباب وشفتها تفتر تعالي اشربي الجاي

رشا ـ ضجت لوحدي وأنتِ تأخرتي يم أهلج كلت أطلع شويه بالحديقه .

أزهار ـ وشگو بيها الحديقه هي مسبح والعاب كرم دتعالي شربي جايج ونصعد الغرفتي

رشا ـ اجيت أكولج هذا المسبح هم تسبحون بي لو هيج منظر

ـ اي أخواني يسبحون عادي بس مو دائماً

ـ هاا حلو، صدك ما تروحين السوك

ـ لا وين من بعد الصار مو مال اطلع السوك ومالي خلك الصراحه واهسس ما عندي

ـ أسويلج واهس خل نروح حبابه

ـ غير مره

ـ ماشي بس مو تغلسين

ـ لا وعد شربنا الجاي وطلعنا وبابا صار بطريقنا بيده السويج هاا بابا تطلع ما جاوبني ورشا ضلت صافنه عليه شبيج وين صفنتي

ـ لا هيج بس ابوج ما شاءالله بعده شباب وشخصيه وهيبه باعي المشيه والطول جسمه متناسق حتى كرش ما عنده

ـ اي هو محافظ عـــلىٰ رشاقته وصحته كلش وأكله صحي يله خل نصعد مشينا وامي تغسل المواعين شافتنا وتهز برأسها بقهر صعدنا الغرفه تمددت وهي كعدت تباوع من الجام شوكت تحبين اوصلج لبيتكم اخاف اخوانج يحجون

ـ هاا عادي لا ما يكولون عليج

ـ تمام كعدنا نسولف وامي دزتلي رساله

وصال ـ خل صديقتج تولي لبيتها ما يصير أمي

أزهار ـ ماشي منو موجود يوديها

ـ بس ابوج توه اجه ومروان طلع من زمان خوما تردين ابوج يوصلها لبيتها لا بس هاي العايزه

ـ لعد منو يوصلها لبيتها يا ماما

ـ مشكلتها والله اطلبي الها تكسي وخل تولي ابوج ما ادزه هسه لو دنيا تنكلب وهست احطه بالغرفه واقفل عليه الباب واذا كعدت ولكيتها موجوده ما تلومين الا نفسسج

ـ ماما شبيج من كل عقلج خايفه عـــلىٰ بابا من صديقتي شدعوه هل الكثر .

ـ اي خايفه عـــلىٰ ابوج وأخوانج هم وعصام لو موجود أسيا هم جان دخلت حاله أنذار لن البنت مبينه من شكلها مو راحه واني كلبي لعب ونكز منها ما ادري من الله ما ارتاحيت الها .

ـ ماششي نهيت المراسله وعيون رشا عليه حسيتها بيها حست بالوضع أبتسمت شبيج

ـ لا هيج ما بيه شي بس خل اروح احسن وهم تأخرت

ـ بعد وكت خليج

ـ لا عيب من أهلج

ـ كيفج خل اشوف مروان ونوصلج أني وياه

ـ تمام على راحتج

ـ أتصلت على مروان وجاوب وين أنت سيادتك

ـ طالع ليش

ـ تعال نوصل رشا لبيتهم

ـ ماشي جاي تحضروا لعد

ـ أوك قطع الخط يكول تحضروا اكوم اغير ملابسي فتحت الكنتور طلعت ملابس دخلت الحمام غيرت وهي عفتها كاعده يله جهزتي

ـ ما عندي شي نمشي

ـ اي يله نزلنا وشوي واجه مروان وطلعنا لبيتهم وبالطريق أنطلقت ويه مروان تسولف وهو على اعصابه يجاوبها

رشا ـ شدعوه عليك تحجي من ورا خشمك

مروان ـ ثكيل

رشا ـ ندري ثكيل بس خف شوي

ـ ما احب الخفه

ـ يمعود الواحد لازم يلاطف

ـ وين صاااار بيتكم

ـ وصلنا من هذا الفرع وادخل عليه

ـ خوش

أزهار ـ ما شاركت وياهم وصلنا بيتهم بناء قديم. وضخم من بيوت القديمه حبيته نزلت وسوت حركه باصابعها

رشا ـ باي

أزهار ـ الله وياج مروان هز رأسه ومشينا

مروان ـ وغفت وحمضت عـــلىٰ معده

ـ شبيها يمعود

ـ ما تنبلع بطل سفن وياها صودا وما تنهضم خفيفه هواي اموت من هيج نسوان عقلي يطير منهن .

ـ ما جاوبته ومشينا للبيت نزلني وراح وبدخولي توجهت لغرفة أسيا لكيتها نايمه وكرم نايم بحضنها عيوني غطيتهم وتلفونها يرن مخليته صامت باوعت هذا عصام سحبت التلفون وطلعت بالصاله جاوبته الو عصام

عصام ـ هلأ أسيا وين

أزهار ـ نايمه هي وكرم

ـ شعدهم نايمين لهل الوكت

ـ أسيا شوي تعبانه ونامت ترتاح

ـ ليش شبيهااااا

ـ هاا لا ما بيها شي عرفته ما عنده علم تورطت وجاوبته

ـ أزهار أسياا شبيها من الصبح اتصل محد يجاوب ودزتلي رساله مشغوله وتعزل الغرفه واعرفها متكعد اشتغلت وتعبت مو

ـ ما اعرف والله بس من اجييت ما شفتها سألت ماما كالت ظهرها كام يوجعها

ـ أي اي كملي كملي

ـ شسمه ماما وبابا ومروان مأخذينها المستشفى والدكتوره كايله الهم إحتمال يصير عدها ولاده مبكره لازم تزتاح وتنام علـــىٰ ظهرها

ـ وأني ليش محد كالي كل هذا يصير واني هسه يله ادري

ـ لاتخاف ماكو شي نايمه ومرتاحه إحتمال ما رادت تقلقك وأنت بالدوام كلها ايام وتنزل

ـ ماششي يصير خير خليها نايمه لعد غير وكت احجي وياها

ـ ماشي عيني قطع الاتصال وراح شگله عصب وأنزعج اني شبيه حجيتله خطيه هسه يضل عايش بقلق وهو بالدوام يبوووه عليج ازهار متعرفين تسكتين .

" رجعت التلفون وأسيا كعدت باوعتلي وگالت

أسيا ـ ويامن تحجين شُنو خبله لو أني حلمانه

أزهار ـ لا موو حلمانه ولا خبله جنت احجي ويه عصام والحمدلله عـــلىٰ سلامتج سمعت من ماما اللي صار

ـ جاوبتي عصام خوما حجيتله

ـ اي والله زل لساني ما عرفت اكذب عليه

ـ لا ازهار صدك تحجين

ـ اي والله اسفه مو قصدي والله

ـ هسه يضل يحجي عليه لو يعوف دوامه وينزل ما تعرفين أخوج شگد نكناكي شيخلصني من لسانه.

ـ متخلصين أول تالي يعرف

ـ سوده بوجهج

ـ هي اليوم سوده مصخمه من اولها كعدت وحجيت الها ضربتني عـــلىٰ كتفي وضحكت وغمزتلي خير شبيج

ـ ما سألتي نفسج شنو سر هالنظرات القاتله

ـ لا ولا أريد أسال

ـ ليش عوبه الولد مبين معجب بيج بس أنتِ ميبسه خشمج وياه ازهار عوفي الكبرياء والغرور ويه العالم ترى صفه مكروه مو محبوبه بالمره

ـ شسوي تجي بلحظتها وبعدين تجيني لحظة ادارك وأتندم عـــلىٰ تصرفاتي بس هو هم ما قصر متعجرف ولسانه وكح

ـ بس يمج متعجرف ولسانه متبري منه

ـ شلون يعني

ـ بس يمج هيج يصير ما يتحكم بأعصابه لن معجب بيج وأنتِ ما منطيته وجه روحي سألي وشوفي وراقبي تصرفاته ويه الباقين هسه تكلي أنسان عفوي ومحبوب ودمه يلعب

ـ اهاا طلعتي خبره سگتي وأسترنا علينا لا يجينا أبو الهول ويوكع علينا السكف

ـ هـهـهـــه‍ه لا أخوج ما يشبه احد نادر ومميز وحبيته من ساعه دخل الجامعه يمه فدوه لهذيج الساعه الاجه بيها لجامعتنا وانعجبت بي وكتلت روحي عليه خرب بيومج أزهار اشتاقيتله

ـ اي كعدي سولفيلي قصة حبكم اللطيفه

ـ سالفه طويله أخوج جان خشم مثلج وما ينطي وجه لكل أحد وثكيل بشكل متصوري واني مشيت عـــلىٰ مايه واكتشفت بعدين يحب الثكل والاخلاق اكثر من الجمال
يعني شيء عـــلىٰ شيء وحبينا بعض

ـ حبكم أسرع من البرق

ـ ولج هو ما يحب العلاقات تطول تعرفنا عـــلىٰ بعضنا كم شهࢪ وكال نتزوج وهيج افضل لن بسلامته هو وكح وما يسيطر عـــلىٰ لسانه كل شوي وجافص بالسالفه ومفلشني ويخليني اطب بهدومي من سوالفه الادبسززيه

ـ بعد روحي ربي يحفظكم ويخليكم لبعض

ـ أمين أي هسه شلون

ـ شلون

ـ عصام تعالي خلصيني من لسانه يضل يسأل شلون وشلون

ـ ما فهمت ليش يسأل هو ظهرج يوجعج قابل بيدج

ـ سگتي وخليها ليش اني ما عرفت أكرص روحي واكعد كمت جبت منطفات ونظفت الحمامات وجلف من گل گلبي وكرم كام يبجي وأجيت امشي وطرت وأنطبيت بالكاع و؏ ظهري والله كلت هاي هيه الطفله راحت

ـ يااا صدك تحجين وكت شغل بربج. دكعدي وسگتي

ـ شمدريني شفتهن وسخات وعصام بس يعيب اقل شي يضل نفسه تلعب من وراه كمت نظفت وجلفت الارضيه

ـ أكليها لعد اجتج على المستريح

ـ يله نتحمل

ـ لا ان شاءلله ماكو شي يله حب اني اروح ارتاح شويه من رخصتج وتضل يمج العافيه وتكومين بالسلامه

أسيا ـ اخذي راحتج حبيبي ، الله يسلمج ، راحت وردت الباب وراها ورجعت تمددت وجريت التلفون فتحته هو فاتح نت ردت اراسله هو دز رساله شبسرعه

عصام ـ كعدتي

اسيا ـ اي حبيبي كاعده

ـ حبيبج بس المصايب تجيي تهلهل عليه

ـ الحمدلله

ـ الحمدلله شلونج هسه

ـ زينه

ـ سولفيلي أسيا سولفيلي .

ـ شسولف

ـ أسياا

ـ شبيك حبيبي

ـ أسياا

ـ خلص لاتعصب

ـ راح اوصل وأني اعلمج عـــلىٰ العصبيه

ـ ليش نزلت

ـ لا بعدني انتظرج تولدين وأنزل شعندي نازل عليمن

ـ حبيبي صارت بعد لاتقلق روحك

ـ لا يبوه ليش اقلق روحي مو بنت شارع ملفيج عندي شلون ما ترديني اقلق مية الف فكره تربعت برأسي من وراج جايج جايج واشوف هذا الط** الخفيف يمتى يكعد عـــلىٰ الكاع .

ـ ضحكت على المصطلح السخيف وعفت التلفون ورت اكوم ارتب شكلي وسمعت صوت الباب انفتح وكف يم الباب وگالي

ـ رجعي نامي رجعي وين كامزه

ـ أستقبلك حبيبي

ـ ما يحتاج

ـ تقدم بوس كرم وباوعلي ابتسم بوجهه واني متبوسني؟

ـ أكلج مو بس ابوسج بس الاول لازم نتحاسب ونصفي حسابنا عكبها نشتغل عـــلىٰ البوس

ـ عـــلىٰ شــنو

ـ تستغبين وعليمن

ـ مو شسمه

ـ شسمه

ـ شمدريني صارت بعد

ـ بس كوليلي ليش ما تعرفين تكعدين اكرصي الدوده وهل كم شهر مو تعرفين حبالتج زقنبوت بكرم شلعتي گلبي بهاي عليتني بسوالفج

ـ هو أني ناعمه وما اتحمل

ـ بس تتحمليني

ـ شلون لعد شعندي غيرك

ـ حبيبي والله يله هالمره سماح ومره ثانيه ما يجرالج خير خوش

ـ خوش

ـ شغل بعد ماكو لا بالغرفه ولا خارج الغرفه اني مو متزوج خدامه تخدمين يريد ياكل هو يسوي لروحه وغرفتج وصيت عـــلىٰ وحده ثقه تجي تساعدج وتنظفلج اللي تردينه ام عزير مره جبيره وتخاف الله

ـ هذا هو اللي تريده يجرالك تامر عـــلىٰ شي ثاني

ـ سلامتج أنتِ كومي بالسلامه واشوفج الاوامر شلونها لاتهجيين المواجع خلينا راكدين يمعوده

ـ ضحكت وردت اكوم ورجعني بخفه ودفع كرم

ـ روح رب الحلو شعندك ماخذ مكاني خوش لاكيها

ـ حضني ويبوس ويشم بركبتي خرب لا عطر لا ترتيب

ـ يا عطر غير سابحه بالمعطرات تخاتلينها عليه عليمن ولج سگتي خليني اشوف شغلي ومنين ابدي شأكل مقبلات لو گبل ابلش بالدسم .

ـ بسته من خده وصفنت بوجهه احمم اكول

ـ وجعاا انطقي هالجوهره خيرج

ـ ممنو؏

ـ والله عرفت تبقيني عـــلىٰ النواشف ادري بسوالفج

ـ قابل بيدي ياعيني وبعدين أنتَ ما خايف علينا اني وبنتك خايف ينكطع حقك ضربني عـــلىٰ راسي بخفه ايده

ـ انجبي واحجي عدل لاتجفصين بسوالفج

ـ عليك الله خوما زعلت

ـ ليش ازعل شگو قابل وگفت الحياة كلها شهرين وتولدين
بالسلامه عود النا شوط ثاني نعوض الخسرنه

ـ الك كلشي

ـ الله كريم حبيبي بالتساهيل هاي هيج ملاطفه كلام

ـ ليش نزلت

ـ علمودج والله ضليت ما مرتاح واني منا مشتاقلج واجت بوكتها رغم اجت مو من صالحي بس يله تعوضيني.

ـ تدلل بسته من خده تحرشت بي وهو يضحك

ـ خلينا عقال وستري علينا يا حرمه

ـ عاد بس بوسه

ـ اشبعج بوس بيمن تورطتي

ـ عادي بس لاتعنف ما احبك هيج خليك حنين وياي

ـ مشكل يا حلو

ـ غمزلي وبلحظات جنون أبد؏ برومانسيته المفرطه يبوس بشفايفي ويتلذذ بيهن بكل حب اكتفى بوسه عـــلىٰ كصتي بحنيه رجال لحببيبته نومني عـــلىٰ أيده وهو غفه بسرعه والتعب مأخذ مساحه من ملامح بشرته رفعت نفسي وبسته من خده ردت اجيس النبض واتأكد منه نايم لو كاعد .

" اجاني الشك وسكن عقلي وساعه اكول لا أسيا ابقي مثل ما تعرفي وتعودي عـــلىٰ أطباعه لاتخربين حبج ومكانتج بيدج عوفي مرجعه الج وين يروح قابل هالحضن انخلق اله، اعوفه لن اغلب مشاكلنا تصير من ورا هالسالفه

" وارجع أصفن اكول لا أخاف عنده علاقات موزينه لو سوالف أدبسززيه يحجيهن وياي وعادي يرجع يحجيهن ويه غيري غمضت عيوني ابعد هالوسواس من عقلي وگلبي ونمت .

" كعدنا وقت متأخرين هو كام للحمام رفعت نفسي وشفت تلفونه موجود بعد ما تأكدت منه بلش يسبح لن الدوش مشتغل والصوت وصل لعندي فرصتج أسيا .

" فتحت التلفون الرمز القديم نفسه ما مغيره كبل طفرت عـــلىٰ المحادثات اكيد ما يبقي بس انصدمت مبقي محادثه ويه بنيه دخلت أقرأ

ـ هلاو عمو شلونك

ـ عمى العماج أعرفج تعرفيني سويتني عمج

ـ شگولك يعني كيفك

ـ أهلج وين بابا

ـ الله كولي مره لخ

ـ شگد عمرج

ـ ١٥ سنه

ـ وبيدج تلفون

ـ اي شگو بيها

ـ خير ان شاءلله

ـ أسيا بعد ما مجاوبها ضاله ادز وهو يشوف رسائلها وما مجاوبها صرت نار عود كايلي ما احجي ويه بنات ومسويلي روحه الشريف العفيف يمكن هذه مخليها يبعد الشبهه عنه عود شوفيني ما مجاوبه هنا لاطشات اليه
بهل الاثناء اجه هو للحظه يوكف گلبي هو ماكو شي بس لن فكره اني مراقبته تخوفني من وجوده وهو يكره اضل اراقب وابحوش وراه

عصام ـ شسوين

أسيا ـ شسوي يعني أكلب بتلفونك ضايجه والفيسبوك مالتك حلو كله اخبار وصفحات مو مثلي الفيسبوك مالتي كله كروبات وسوالف نسوان

ـ هاا عيني گلبي بي وأخذي راحتج

ـ اي مأخذه راحتي

ـ عاد هالكروبات مستفاده منهن لو هجمان بيوت ويخربن عقلج بسوالفهن

ـ لا شسالفه عادي سوالف نسوان

ـ مو كلشي يكولونه تجي تطبيقنه بحياتنا الزوجيه اعدمج

ـ عصام اني مو طفله تعلمني لاتخاف اعرف بنفسي شتابع

ـ خوش كومي سويلي لكمة أكل لو ما بيج لا لا خليج خليج اني اروح اصب وأكل أرتاحي گلبي

ـ راح وبقه تلفونه يمي رحت عـــلىٰ الحسابات المقيده ما لكيت شيء كعدت نبشته نبش ماكو اي شيء مملوس والحاجي وياها مبقيها اجه وعيونه عليه وگال

ـ خلصتي حبيبي

ـ ليش محتاجه

ـ اي والله ضوجه اريد أكلب بي

ـ انطيته اله وأخذه وباوعلي

ـ شعندج داخله بالمحادثات رجعنا لشك والنگد

ـ والله اشوف زوجي شيسوي ويه بنات العالم

ـ أسياااا أحجي عدل احسنلج

ـ وكفت وجريت التلفون منه وهو متفاجئ من حركتي ممكن اعرف هاي محادثه شُــنو

ـ ياهي منهن

ـ وتسأل

ـ اي اسأل ليش شگو قابل

ـ مو عـــلىٰ أساس ما تحاجي بنات ومسوي روحك شريف كلتها وجنيت عـــلىٰ عمري كبل سحب التلفون وركعه بالكاع وعاط بيه

ـ من اكولج ما ينطالج عين تنجلبين اني شسوي لعقلج اذا عقل زعطوطه حتّى عقل المراهقه مو مثلج اكو مره تكول لزلمتها هالكلام

ـ من حقي ترى وانت مجاوبهن ومنطيهن مجال يحجن هاي اذا ما طلعت انت داخل خاص الها

ـ اي وخايف منج مثلاً ترى لو اريد اسوي علاقه لو أخونج لا أنتِ ولا الاكبر منج يمنعني فاهمه ف لاتكعدين تلوصين بحجيح وتجنيين عـــلىٰ عمرج بهاي سوالفج الماصخه

ـ والله گول لروحك هالحجي

ـ كاااافي عاااد فضينا من هالطركاعه ما مسوي شي ولا عندي شي اضمه ولا خايف لو رايد جان حذفتها بس بقيتها لن ما حجيت شي وياها حجت حجت ما لكت وجه عندي وانركعت بنعال عـــلىٰ حلكها

ـ من الاساس شگو تجاوب

ـ لا اله الا الله ما تخلين يوم يمر وياج اذا ما طلعينه من خشميي تكرهيني بساعه الجيييت بيها للبيت

ـ اي شگو تجاوب جاوبني عـــلىٰ سؤالي

ـ جاوبت كيفي احد اله عنده كيف عندي تلفوني خصوصياتي محد اله وليه عليه كافي رعونيه هذا كبري كبري رب الحلو حشي عقل وازني كلامج لا اعاملج بالقندره .

ـ شال تلفونه وطلع بعد ما كمل كلامه الاخير وضربني عـــلىٰ رأسي بمرات عده وازني كلامج حشي رأسج عقل
ليش تعيش وياك تجني عقل .

" بقيت بغرفتي ما طلعت وعفته ولا سألت عنه لليل رجع لفه رأسه ونام ولا كأنما الي وجود حاجيته عصام عصامم مو احاجيييك

عصام ـ نامي

أسيا ـ ترى من حقي اعاتبك

ـ عاتبي منو مانعج بس مو بشگوكج الوصخه

ـ أغار عليك

ـ هاي مو غيره

ـ لعد شُنو

ـ هاي دوده

ـ خلف الله عليك

ـ العفو

ً ـ انطيته ظهري ونمت ولا اباله ولا راضاني وعادي عنده الوضع بالكوه غفيت وفزيت عـــلىٰ صوت كرم متنحس كعدت ولكيت عصام كاعد ومرتاج عـــلىٰ ظهر الجربايه ويگلب بالتلفون ويگولي تصرفاتج مراهقه لعد أنت شتكول عـــلىٰ نفسك بهاي تصرفاتك خليتها غصه بگلبي وسگتت ورحت جبت كرم نومته بالنص الاخ عادي ولا ابالي ولا يمه السالفه عاف التلفون ورجع انطانه ظهره وكمل نومته تخبلت خلاني انكز من القهرر

" لازم لازم اكشفه ومتاكده عنده شي والا ليش كاعد يگلب لوحده وأني نايمه مو خالي ومسويلي روحه الشريف العفيف اصبرلي يا عصام اكشفك قابل تكدر تضمهن العمر كله عليه لازم تنكشف وگتها ما يصير خير والله .
_______

أسيل

ـ من اخر شفته بيها وهو ما طالع من دماغي خلاص قفلت عـــلىٰ القضيه لو ربح لو خساره بس الربح سالفتي ضحكت على عقلي وگلبي وكعت وحبيت شخص بعيد على الرغم هو ابن عم ابويه والاقرب بس من بعد سالفة هديل وعصام صعبه اهلي يرجعون يفتحون دفتر شجرة العائله وانضم لعائله عمو كمال .

دخلت الحسابه بعدين تراجعت لا ما اراسله ويعرفني وأخاف يبلغ أخواني لو يراسل هديل واختج واختج واروح بيها جفص بين الرجلين اضل اباوعله واحفظ كل تفصيل بشخصيته اعوف دراستي وأدرسك يا مرواني يا مري وحلاوتي .

" بالفرصه وبيدي لفتي وصافنه وبالي مو يم البشريه وناسيه نفسي بين الطالبات والمدرسات ما اعرف عقلي متشوش يمكن هاي بدايات الحب وما ادراك ما الحب الحقيقي نابع من القلب وناشئ عـــلىٰ الفطره .
"جنت ايامها وبدور خطوبه هديل وعصام معجبه بي أشد الاعجاب كشخصيه وهدوء وثكل هيج حسيته مميز عن باقي اخوانه وبالاخير لكيت نفسي عشقته وأدمنت التفكير بي وبالاخص بعد ما شفته وصوته تغلغل بخلايا دماغي
فزيت عـــلىٰ تقى بصفي ورن الجرس يله خل نكوم

تقى ـ وين صافن الحلو

أسيل ـ هيج امشي راح نتأخر مشينا لدرس جان كيمياء يشرحون واني عقلي شاطح لهناك شبيه كمت ما اوازن نفضت الافكار ورجعت لدرسي .

خلص الدوام وطلعنا اني وصديقتي وهاجر فرحانه تتنظر خطيبها يجي يأخذها وتتباه بي كدام الطالبات ولابسه الحلقه ضحكنا عـــلىٰ شكلها ونتتظر الخط وما اجه خابرنا من الاداره كال سيارتي عاطله والاغلب بلغهن أهلهن هاا شنسوي

تقى ـ بابا مسافر واخوج الحقنه لو اعرف انخطف ما نخابره ونروح وياه امشي ناجر تكسي اني وياج ونروح

أسيل ـ لا ما اكدر اخاف من أهلي واخاف حارث يمنا

تقى ـ لعد شلون امشي نضل على كلامج وخوفج من اخوج كلها راحت ودبرت وضعها واحنه ضلينا هسه لو رايحين ويه هاجر وخطيبها مو احسن بس شمدرينا ابو الخط سيارته تعطل امشي اوكف سياره

أسيل ـ يله ماشي وكفت سياره بس مو تكسي بس سياره لونها ابيض

ً كال اشتغل تكسي عادي صعدوا اوصلكم

ـ جان حلو وتقى قفلت الا تصعد وين مصعدتنا امشي نولي

ـ شگوو يمعوده ترى عـــلىٰ باب رزقه وهواي امثاله قابل بس هو بس لاتردين اوكف شايب يضل يرطن برأسي ويحجيلي تاريخه نوب يروح يدعمنا

ـ احسن من الشاب امشي تقى جرتني وصعدنا وانطته العنوان وبيت تقى قبل بيتي تقى لا تعوفيني

ـ شگوو يأكلح ترا الدنيا ما تكاطعت والولد من ساعه مشينا عينه ما رفعها علينا

ـ ما ادري وكف يم بيت تقى

ـ خيتي وصلنا

ـ اي هذا بس وصل صديقتي لبيتها هي أدليك يله خليج سباعيه والله الدنيا متاكل بشر

أسيل ـ الله ياخذج عـــلىٰ هالسالفه راحت ومشه وفعلاً الولد عاقل وخابر مرته يسألها عـــلىٰ المسواك اطمئنيت ودليته وصلنا بيتنا وشفت سياره حارث يم الباب عزا العزاج أسيل

ـ خيتي بيج شي هذا عنوان بيتكم لو غلطان

ـ اي خويه رحمه الله والديك نزلت وحارث جان واكف وشافني وضل يباو؏ لولد بعدني ما واصله الباب ما احس الا اجه لزمني من ايدي بقوه ويسحل بيه مثل النعجه
ويعيط ويغلط وفشار عمري وحياتي ما سامعه بي

حارث ـ بنت الكواووووويد تجين لوحدج وبسياره بس انتي وياه وبعز النهار وعينك عينك كدام خلك الله ولج ادبسززز هذا الكواد الج والله اليوم اموتج تعاااااالي يمه شوفي الخاتون بنتج شمسسسسويه

اسيل ـ ما احس الراجديات و.الضرب منين يجيني دفعني وكعت عـــلىٰ حافة الدرج بكل قوته ضربة عدو مو اخ وايدي تيبست خلعها من المفصل اتوسل بي وهو قافل ركبه شيطان عليه بس خلينيييي افهمك فاهم الموضوع غلط والله ما عندي شي وياه مجرد سايق تكسيييي وصلني اني وصديقتي وهاي هي حااااارث بس اسمعني امي اجت تفازع وهو قافل فدمره

جنان ـ انطيها مجال تحجي نفهم منها السالفه گبل توليتها الضرب هو هيج

ـ هاي دواها مو بس الضرب لا والله مال موت و؏ الكبور طلع حجي اسماء صُدك عاشگه وتردين رجال علمود تخلصين من الجهال وهوستهم بس عليمن ولج عليمن

جنان ـ خوووش سالفه طلعتوها انت ومرتك اني اعلمها اسماء ما غزر بعينها شايله ومتحمله جهالها انوب تلزك بيها العوجه
ولك جان استحيت شو وخر كسرتها اني اختك اعرفها ما عدها هيج سوالف كتلك وخر جنك ثور راح تموتها ولك حااااارث

حارث ـ شوفي لج دراسه ماكو بعد وحلم اخليج توصلين مدرسه هي القبلج شطلعت عاد انتي وكبرج الغرفه

أسيل ـ جرني من حجابي ويسحل بيه يممممممه لحكيلي راح أمووووت موتنييي قضى عـــلىٰ حياتي وامي خطيه تتوسل بي ويدفع بيها دخلني غرفتي وقفل عليه الباب حارث بس اسمعني والله فاهم الموضوع غلط

حارث ـ شوفي حارث شيسوي بيج والله انعل والديج وتربيج السكط يا ادبسزز.
" سمعي يوم لا اكل ولا شرب حتى لحمام متطلع المفتاح اخذته وياي واللي يفكر يحاول يفتح الباب ما يلوم الا نفسسه

جنان ـ ولك يا ظالم اختك هاي اني اعرفها فقيره بس لسان على جهال ما عدها سوالف موزينه اتعوذ الشيطان وافتح هالمهجوم خل اشوفها مدري كسرت ايدها رجلها

ـ وكسرت عين جدي خل تعفن

ـ ولك وابوك اذا سأل عليها ما يجرالك خير خل نفهم السالفه وعكبها زومل

ـ د خل يعرف بسوالف بنته اذا ما ذبحها تعالي تفلي بوجهي و؏ شاربي اني اعلمج ادبسزز عايقه والله اربيج من جد وجديد حيووووانه .

أسيل ـ نزلوا ويحجون بصوتهم عالي وأني امسح الدم من خشمي وايدي لازمتها ما اكدر احركهه احس مكطوعه بسجين من شده الوجع بجيت بقهررر ودموع تحرك بخدي يممممممه ايدي راح اموووووت من الوجع فتحولي الباب والله اسماء جذابه يمممممممه راح امووووت من وجع ايدي لحكيلييي .

يتبع ... ...

10









أسيل ـ الوجع يدك بگلبي ضليت ادك وأصيح محد يرد عليه ولا فتحولي الباب شنو من أهل انتوا صدكتوا وحكمتوا بدون ما تسمعوني .

" خلص اليوم واني مقفول عليه تضايقت بشكل لايطاق يمه فتحيلي اريد اروح الحمام يممممممه تسمعيني وينج يمممممه فدواتج تعاليلي وينكم
البيت هدوء مليت واحس مثانتي راح تنفجر وادررت عـــلىٰ نفسي من لا جاره شگول عليك حارث غمضت عيوني واحس الدمع مثل الجمر يلجعني بخدي يممممممه تسمعيني ياربي وين رحتي باباااااااا يممممممه وينكم

" مليت وصوتي شبه الاختفى نمت عـــلىٰ الباب على أمل امي تفتحلي للصبح فزيت على صوت المفاتيح تفتح بالباب أبتعدت ودخلت نسرين كبل سدت خشمها دفعتها وطلعت ركض للحمام واسمعها تحجي

نسرين ـ عزااا شُنو هالريحه طاح حظك يا حارث حسسسن حسسسن

حسن ـ شبيج تصيحين شگو فتحي الها الباب ونزلي

نسرين ـ خطيه مسويتها عـــلىٰ نفسها

ـ وجايه تبشريني رايح المستشفى ديري بالج على الجهال

ـ ماشي واذا اجه حارث واخذ المفاتيح مني

ـ لاتنطينه عود خابريني واحد متسر؏ جان سوالنا سالفه وصخم وجوهنا يله رايح اني

ـ الله وياك

أسيل ـ طلعت واخذت ملابسي اريد اسبح واجت نسرين باوعتلي بنظره شفقه وين جنتوا كومه صيحت عليكم

نسرين ـ غير عمتي تخربطت واخذناها المستشفى

أسيل ـ شُنو وهسسه شلونها سوده عليه شصارلها ليش شبيها شكالكم الدكتور

ـ عـــلىٰ كيفج لاتخافين ما بيها شي ضغطها جان مرتفع هسه حسن راح يجيبها هي وعمي يله نازله اشوف الجهال وأنتِ لاتنزلين هسه اخاف حارث يجي ويضل يحجي ابقي بغرفتج

أسيل ـ ما جاوبتها ما اعرف شحجي صارت الجنايين هي تتحكم بيتك وتقرر مصيرك تموت أو تعيش نزلت وغسلت الغرفه وعطرتها وسبحت وتمددت بفراشي راسلت صديقاتي وحجيت الهن كلشي وتقى خابرتني تحجي وتدعي لا تقى لاتدعين يبقى اخويه شسويله عقليته تحكمه

تقى ـ لا والله گولي مرته تحكمه جان أستحى عـــلىٰ شواربه زارعهن بوجهه مستقوي عـــلىٰ أخته لا حول ولا قوه الا بالله

أسيل ـ الحمدلله على كل حال احسن شي

تقى ـ الحمدلله والله اسيل تردين الصدك ومن الأخير

ـ أي

ـ أنتِ تتزوجين احسن الج لن اذا تبقين هيج نسوان اخوانج يطلعنج بفضيحه ولحد الان دارستج ما معلوم مصيرها شُـــــنو

ـ بعد ما ارجع هاي هي شحصلت من أهلي علمود دراستي

ـ لا يل الثوله حرامات هذا مستقبلج وحياتج مرتبطه بهل الدراسه ديري بالج تعوفينها بسبب أهلج منو يفيدج بعدين

ـ ما اريد كلشي لا دراسه ولا أهل هاي هيه بعد اكعد بغرفتي وأسكت

ـ وتبقيين هيج ودراستج وتعبج من سنين كله يروح من ورا أخوج ومرته

ـ شسوي مو بيدي حكم القوي عـــلىٰ الضعيف حارث متجبر وفرض حكمه عـــلىٰ الكل لدرجه امي متخربطه اذا مو ابوي هم

ـ اسيل لاتسستسلمين لواقعج المر دراستج اهم انتظري يهدأ الوضع ورجعي حاجيهم يولي مستقبلنا هذا مو ناوين ندخل نفس الجامعه ونكمل المشوار سوا صحيح اني وحيدة أهلي بس والله حاسبتج اخت واكثر وأعز

ـ يروحي ربي ما يحرمني منج هاي هيه الحمدلله سمعت صوته اجه كبل عفت التلفون وضميته جوه المخده وسويت روحي نايمه بس والله خايفه وگلبي يوجعني

حارث ـ نايمه من نامت عليج طابوكه كبرج بهل الغرفه اذا نزلتي اجنزج وكبرج بوادي السسلام يا أدبسزز .

أسيل ـ ما تحركت من مكاني وسمعت الباب إنقفل رفعت رأسي وصوت حسن وأمي اي هاي امي

جنان ـ تريد تموتني عوف اختك بحالها بس اذا شايف واحد بغرفتها يله تسوي سوايتك

حارث ـ يمه رحمه لاهلج سگتي من ساعه شفتها نازله من سياره الولد شاب وهم مو تكسي عقل ما خلت برأسي بنتج السكط

علوان ـ خلصت حجيك يله امشي ولي لبيتك كافي عاد خبصتنا تحجي وتدعي عـــلىٰ شيء ما صاير .

حارث ـ بس يابه

علوان ـ بعدني عايش وهيج لو اموت شتسون بيها يله انكلع لبيتك وهاي السالفه تنسد من عرجها وأختكم يا ويله اللي يحاجيها وأنتِ صعدي شوفيها وحاجيها.

حارث ـ وسحبي التلفون منها نسيت أخذه

علوان ـ لا اله الا الله صعدي يا مره شوفي البنيه

حارث ـ رايح بس قبل لا اروح اسحب التلفون منها نسرين بلا امر عليج صعدي سحبي تلفونها

علوان ـ صعدي يابه صعدي خنشوفه وين يوصل بسوالفه

جنان ـ جيبي وتلفونها يضل يمي محد ياخذه ولو متأكده منها ما عدها شيء بس اشوفكم وين توصلون بـ بطلكم عليها وعساها بحظكم وبختكم وتطلع ان شاء الله كلمن ذب حجايه ولزكها بثوبها .

حارث ـ يممممممه

جنان ـ لا الك الأمممم خليت بيها يممممه

أسيل ـ متلاغين بينهم وصوت أمي صوت مكسور تعبانه سمعت صوت عـــلىٰ الدرج رجعت كعدت وأجت نسرين باوعتلي خير شتردين أنتِ الثانيه

نسرين ـ يردون التلفون دزوني عليج جيبي احسن ما تصيرلج مشاكل اني اعرف ما عندج شي بس نكسر الشر ونتجفى شر لسان حارث .

أسيل ـ اخذي شعندي بي قابل انطيته الها ونزلت حزت بگلبي امي وابويه اوادم كبار وحارث يتحكم بالكل لو يصير شي عليهم يسوووني وصله ممسحه الهم ولو هما عايشين شمسوين بس يبقون عزوه وأهلي احسن من اخوي مشاي لكلام مرته .

" شوي وصعدتلي أمي صديت وجهي عنها

جنان ـ يله نزلي ما عليج من كلامه يرطن من رأسه يحجي يحجي يسگت شسويله هو من يوم خلفته زمال

أسيل ـ وسمعتوا كلامه وخليتوني يوم كامل بغرفتي تدرين سويتها عـــلىٰ نفسي وصوتي طبك واني ادك بالباب ومحد فتحلي
"وبالاخير سحبتوا التلفوني ادري شفتوا عليه كبل حكمتوا هاي بس لن نزلت من سياره لزمني الضرب وهو ما عنده دليل ضدي ششايف بس لو شايفني بالجرم المشهود يله .
والله انتوا اهل والنعم منكم تربيتكم عظيمه وتخافون الله..

جنان ـ الدنيا ما بيها أمان واخوانج يخافون عليج وأنتِ المفروض منج تتصلين وتبلغينا الخط مالتج عاطل جان واحد من اخوانج اجاج لو اني البس عبايتي واجيج يرادلها فهم يا امي ملاحكتلي تقى هاي لا صداد ولا رداد

ـ اي هذا الله كدرج عليه ترجعين تذبين الصوج ببنت العالم شحجي ليش ضل حجي ينججي اذا حارث افندي متحكم بيج أنتِ وابويه كل دور ما الكم بالعائله كثره بلا خثره تحجين منا وتتراجعين منا صاكرجينج حارث ومرته

ـ أنجبي محد يتحكم بينا اني وابوج بس اخوج وخايف عليج والله تستاهلين من ورا لسانج عم عليج لو ادامي محد يعاملج بالقندره ، يله نزلي عاونيني البيت جايف

ـ هو البيت كظه عمره جايف خير شر جايف

ـ كومي لا اكوم اكسرلج حلكج ادبسزز لسانج شطوله جافت لشتج اي والله شالعه گلبي فوك قهررري .

ـ نزلت تحجي وتدردم عليه نفضت نفسي بقهر ولحكتها ودخلت الاستقبال مخربط طن وسخ بي كطوف جكاير وگشور فواكهه وكرزات كهوه مو مكان خطار وكعده ادري متنظفن بس اسيل كل اعتمادكم عليه طيحتوا حظي

" فتحت الشبابيك وغسلت كل البيت ونظفته وعطرته لما خلصت ظهري انكسر

نسرين ـ اسيل الغساله بيها ملابس الجهال فدوه نشريهن بين ما اكمل الغده

اسيل ـ كملي غده ونشريهن أنتِ شبيج

ـ متشوفين جاي اطبخ عفت دوامي لن اهلج جانوا بالمستشفى

جنان ـ اسيل روحي شريهن على الحبل مو تشوفين مرت اخوج جاي تطبخ يله يمه

اسيل ـ اي يمه ليش لا عفتها ولكيت الغساله مليانه ملابسها هي وحسن وملابس جهالها ما مغسولات ركعت باب الغساله بقهرررر وعاطت امي

جنان ـ كسرتيييي الغساله موو اجييي اكسر راسج جري عدل اسسسسسسيل لاتعليييين گلبيييي

اسيل ـ ليش شمسويه ما حجت رجعت اغسل بملابسهم والافنديه عايفه ملابس النوم استغفرت ربي وكملت غسل كملتهن ورجعت عـــلىٰ المطبخ عبوه ومفجوره لو ما طابخه اشرفلها مكومه مواعين بالسنك الا كايله بسس

" لملمت المطبخ وصبينا الغده وتغدينا يحجون واني ساكته لن بعمري ما حسيت بإنتماء لهل العائله ابويه حنين بس فقير حارث عازل بيت لوحده وهو مسيطر يعني ما خلصانين من طغيانه وتجبره وهسه عرفت هديل ليش بسرعه تزوجت من هالضيم الشافته لو باقيه جان دكوا الها طبل وفضحوها خلصت عمي ما وكعت بس براسي هسه لو يجيني جلب مجلوب اوافق واني ممنونه ولا اضل خدامه لنسواين ومكفخه بيد الرايح والجاي بيت اهلك ماكل طن نعل وشابع ذل .

______

أسيا

ـ الصبح كعدت وهو ما موجود بس ملابسه ؏ الجربايه أكيد طلع شيكعدته بالبيت علمود يأخذ راحته شعنده مكابل أسيا تنگ عـــلىٰ رأسه .

" جاي ارتب بالجرجف اريد انظف الغرفه ودخلت عمتي كامت تحجي عليه لن أشتغل

وصال ـ مو كالتلج الدكتوره أرتاحي يا أمي شعندج كاعده تفترين عوفي الشغل هسه صحتج وطفلتج اهم من كلشي

أسيا ـ كلت انظف الغرفه وسخه والطفله خوما معلكه بخيط الله الحافظ

ـ الله الحافظ ونعم بالله بس هذا علم ماما مو كيفج ولا كيفي تستاهنين بروحج منو يفيدج متكوليلي شو عوفي من ايدج ورجعي تمددي يله

ـ رجعت تمددت بفراشي وهي اخذت من أيدي نظفت الغرفه خطيه وفتحت الشبابيك وغسلت ملابسنا وملابس عصام كلها ونشرتهن وغسلت الحمامات واخر شي شغلت المبخره وتريد تطلع عمه تعبتج وياي

ـ لا بنيتي تعبج راحه شمسويه قابل ما مشتغله وهاي غرفه أبني يله رايحه اجيبلج لكمه تأكلينها وتغذين رويحتج خليج بفراشج مو تلحكيني

ـ ماشي راحت وبقيت بفراشي جريت تلفوني لكيته نشط الان فاتح نت تجاهلته بس هالتجاهل ما اعبره بلاش اخليك تسرح وتمرح ويجي يوم نتواجه لان گلبي حاسني بيك شي وهالأحساس مستحيل يخيب ماشششي عصام

" مر وقت وأجت عمتي بيدها صينيه مليانه مشاوي معلاك وهبر لحم وخبز حار وخضروات شُـــــنو هالزحمه يا عمه والله كلفتي عـــلىٰ نفسج

وصال ـ أكلي وما عليج مني يله مدي ايدج كلهن تخلصيهن هذن رجلج شواهن الج خلصيهن بالعافيه

أسيا ـ ليش عصام اهنا

ـ اي جاي يشوي هو وأخوانه من الصبح كعد راح جاب ذبيحه لسلامتج وأجه ليش ما تدرين

ـ هاا

ـ جنكم متزاعلين

ـ لا عمه ماكو شي

ـ ماشي يله مدي أيدج رايحه اشوفهم هسه يضلون يصيحون وراي الطلي نوزعه يله خلصيهن مو تضلين تنكمشين خلصي ماعونج .

ـ راحت وعفت اللكمه وأختنكت اني شبيه ظلمته من صباحيات الله رايح جايب طلي علمود سلامتي وحاير بيه ويشويلي واني افكر خاينني لو لا ، هو هم ما ادري شلونه ما برر ولا حجه طبعاً أشك وميه فكرة تجي برأسي

" صافنه على الأكل انسدت نفسي ودخل هو بدون ما يباو؏ لي خله تلفونه عـــلىٰ الشحن وفتح الكنتور اخذ ملابسه ودخل يسسبح

" ما طول شوي وطلع من الحمام باوع على الصينيه وگال

عصام ـ ليش ما تأكلين

أسيا ـ أنتظرك

ـ أكلي أنتِ عليج بالف عافيه

ـ ما تاكل وياي

ـ لا رايح اشوف كرم

ـ عصام زعلان مني

ـ لا

ـ لعد ليش متباو؏ بوجهي

ـ خلينا هيج أحسسن

ـ ونضل هيج

ـ اي

ـ ما أكدر عـــلىٰ فراكك خلص انسى وعد بعد ما اشك بيك

ـ ما تكدرين بيج ذاربه وسخه متبدلينها روحج وأمج وأبوج النكد والمشاكل واني مليت من هالشيء ارجع من الدوام ارتاح لو اكظيها تزعل ونكد هنا وحده أثنين .

ـ مشه وصحت وراه عصام

ـ كملي أكلج تعبت بشويهن خلصيهن بالعافيه رايح اشوف كرم ينكز يم عمامه اخاف ينجوي شيخلصنا من لسانه لسان أمه

ـ إبتسمت اله ماشي راح ورجعت كملت الأكل بس گوه مخنوگه خنك شوي ودخلوا گبل للحمام سبحه وطلع خلاه عـــلىٰ الجربايه يغيرله ملابس عطرله ومشطله وبوسه

عصام ـ يله اطفر عـــلىٰ جدو يله وليدي فدوه لطولك

أسيا ـ كرم اجه باسني وراح وهو جمع ملابسهم الوسخه بالسله وين ماخذهن

عصام ـ لأمي تغسلهن.

ـ لا بقيهن أني اغسلهن

ـ لا أنتِ ارتاحي ما الج شغل تأكلين وتنامين وبس منا لما الله يسهل الج

ـ طلع وشوي ورجع اعرف بي ما يكدر عـــلىٰ فراكي يحب يكابر بزعله بس احس بي منتهي وذايب عـــلىٰ الاخير تنام

ـ لا طالع

ـ وين تطلع

ـ يم جماعتي واذا تضوجين شغلي التلفزيون اشغله الج

ـ لاميحتاج ضوجتي متروح بالتلفزيون

ـ يله فيمالاا .

ـ راح وهو زعلان وروحي ذابت وراه اريد اكوم واحضنه وأمنعه يطلع ويضل بحضني بس كابرت وفزيت على صوت الباب انرد راح أسيا لحكي منعي خلي يمج شيسوي بجماعته يريدج الج ضليت بين مشاحنات بين عقلي وگلبي وما سويت شي .

" للظهر هو ما بين وعمتي وصال جابتلي الغده تمن ومركه للحم صفره وخضروات عمه عصام رجع

وصال ـ وين يرجع هو ما طلع

أسيا ـ شلون يعني

ـ ما طلع موجود بالبيت

ـ أهااا عبالي طالع

ـ لا يمه كاعد بالاستقبال يله تغدي اروح اصبلهم الغده هسه ازهار رجعت من دوامها

ـ ماشي ازهار منو وداها لدوام

ـ راحت ويه أبوها وهسه هم إبوها راح يجييبها

ـ ماشي عيني عمه مشكوره

ـ بالعافيه بنيتي .

ـ طلعت وضليت أباو؏ الأكل لما البطني مالي نفس اكلت شوي ودفعت الصينيه اخذت التلفون فاتح نت دزيتله وينك گبل شافها وكتب

ـ موجود

ـ وين

ـ أنتظر الغده يجهز ليش

ـ هيج سألت عبالي طالع

ـ لا ما طلعت

ـ كرم وين

ـ راح عـــلىٰ جده هسه اجوا هو وأزهار

ـ ماشي

ـ تغديتي

ـ أكلت كم لكمه مالي نفس هالكد

ـ بالعافيه

ـ الله يعافيك، أخذ راحتك شافها وما رد عليه بعد
عفت التلفون وشلت الصينيه وطلعت وبطلعتي دخلت أزهار مزعوجه گبل صعدت فوك لغرفتها ما فهمت شبيها اجه هو شافني وأجه ناحيتي وگلبي ينبض بكل سرعته بحضرته سالب روحي من صدري أنوب الزعل مبين عـــلىٰ ملامح وجهه غير طالع يطك بالكا؏ .

ـ وين

ـ أكعد يمكم ضجت

ـ تعالي

ـ اخذ الصينيه من أيدي ومشيت وراه كلهم كاعدين حوالين الميز بالمطبخ وعمتي وصال تصب الغده ومجد يساعدها عصام عاف الصينيه عـــلىٰ السنك وكام يصيح ؏ أزهار

عصام ـ ما تجييييين تساعدين أميييي نمتي فوك

أزهار ـ شعندك تصيييييح نازله

عصام ـ ومحمد اصعدلج اشمرج من فوك مرادد لا تراددين

ـ أهوووووو

ـ وجعااا التوجعج من انعل أهل أهلج وشيب الخلفج لابو وظيفتج يوميه طالعتنا بسالفه جديده ولد مراهق مو مثلج

وصال ـ عصااااام لسانك أبوك بالحمام أذا سمعك تفشر وتسب وتلعن شيسوي بيك هسه شگووو نزلت عـــلىٰ الكل بس تلعن إلزمك لسانك نازل عـــلىٰ الاوادم لعنه وعوف اختك بحالها ما ضاره احد هي وابوها يحلون السالفه شگووو حارك دمك يا أمييي

عصام ـ أي طبعاً أسكت لن هاي البرنسيسه أزهار ما شاء الله عليها لا شغله لا عمله أكل ونوم ودوام .

وصال ـ أبوك طلع من الحمام أسكت وضب لسانك شويه

أسيا ـ سكت بس على أعصابه ونزلت أزهار أبتسمت بوجهه وهو خزرني أني شكوو ، اجه عمي وكعدنا كلنا وبسم الله اني انفتحت شهيتي بديت أكل وهو يجيب ويخلي كدامي أبتسمت اله وخزرني عاد من نخلص من هالزعل والطنكوره ما تفض الله يعيني ويصبرني عليك
_____

أزهار ـ نهاية الأسبو؏ ويكون أكثر الايام متعبه وأريد يخلص الدوام بسرعه وأرتاح بالأخص بعد السالفه الصارت وأخذت حيز من تفكيري ليش ما أدري عـــلىٰ الرغم بابا حل الموضو؏ بطريقته بس الوقت الحجينا بي وطريقه حوارنا والعصبيه التجمعنا متربعه بخلايا دماغي

" بعز صفناتي أبتسمت لا أرادياً نفضت دماغي من الأفكار وكملت لبسي وترتيب حجابي القيت نظره أخيره على وجهي وأصغر تفاصيلي كلشي تمام

" شلت أغراضي وجنطتي ونزلت لكيت الريوك جاهز بابا وماما موجودين ويضحكون مو ؏ العاده بس فرحلتهم صباح العافيه شـــنو هل الصبـــاح الحلو

وصال ـ صباح النور الصبـــاح منور بوجودج أنتِ وأبوج

كمال ـ اليوم أمج كالبه فدمره عـــلىٰ غزل عـــلىٰ كلام حـــلو .

وصال ـ عاد لاتطوخها

كمال ـ لا عمي شگايل يله بابا أزهار خلصي ولحكيني اوصلج وارجع عندي شغل بالمعرض ووصال عود كعدي مروان خل يلحكني للمعرض عدنا شغل .

أزهار ـ ماشي بابا مشه وأمي صافنه وراه شبيــج ماما

وصال ـ هاا لأ هيج ماكو هيج ما أعرف صارلي يومين ما مرتاحه مكوبسه واحلامي مخربطه

ـ أسم الله شبيــج أخاف تثكلين بالعشه

ـ شمأكله يا أمي حالي من حالكم

ـ ماكو شيء تصير عادي صبتلي الجاي وصعدت تكعد مروان وبهل الاثناء أتصلت رشا تجاهلتها شتريد من الصباحيـــات والله بطرانه .

" ضلت تتصل جاوبتها خفت صاير شي الو رشــا .

رشا ـ وينج أتصل ما تجاوبيــن

أزهار ـ موجوده خير صاير شي

ـ لا شيصير يعني حبيت اسأل عليج تجين لدوام لا

ـ اي هسه اجي جاي أتريك

ـ ويامن تجين

ـ ما أعرف بعد

ـ شُنو ما تعرفين ترى ما ضل وكت

ـ يله روحي لعد بعدين نحجي باي كنسلتها هواي صايره تلغي وبس تسأل عبالك أختي مأخذه راحتها لازم أحطلها حد .

" كملت ومشيت ونزل مروان وتوجهت لسياره بابا وصعدت وطلعنا وطول الطريق أتصالات هوسه تلفونات ثلاثه يحير المن يحجي دخت باوعتله بابا الله يساعد ماما عليك شمفتهم من حياتك

كمال ـ أي والله بابا ما مفتهم من حياتي گلشي يرادلي تغيير جو وسفره أبتعد عن هالتعب والهوسه

أزهار ـ أخذ ماما وسافروا فد يوم خطيه

ـ أمج متحب أجواء السفر وبعمرها ما سافرت مو جوها ولا أجواءها الله كريم شوف شلون ترهم يله وصلنا

ـ شكراً بابا توني ردت أنزل بابا طفه السياره

ـ هذا مو هشام مبدل سيارته روحي بابا خل اسلم عليه

ـ نزل وتسلاموا هو وياه عبرتهم ومشيت والتفت يحجون بينهم ضليت واكفه بس بعيده عنهم وهالحديث مبين طول وفزيت عـــلىٰ رشا المزعجه

رشا ـ هااا ازهار اجيتي منو وصلج أبوج الانيق

أزهار ـ شبيـــج تحممي فززتيني

رشا ـ شدعوه عليج صايره ما تتحملين مني اي شي ليكون صرنا ما نعجب مقام حضرتج

ـ جاوبتها بعصبيه اي والله لن صايره هواي تلغين وتحشرين خشمج بأشياء متخصج شعليج منو وصلني وبعدين شويه أستحي تتغزلين بـ بابا وكدامي ترى بمقام والدج عيب عليج هالتصرفات حتّى لو بداعي الشقه مو حلــوه وكلش أتنرفز من هيج وما أحب فـ ياريت تتنبهين لنفسج وتصرفاتج الطفوليه ولاتعبرين حدودج لا بالكلام ولا بغير شيء .

ـ مع الأسف عليج وأني معتبرتج صديقتي المقربه وأمون عليج وبالاخير هذا كلامج اليه بس من يومج خشمج يابس وعندج كبرياء لا صعد لا نزل شتصيرين يعني بس الظاهر اني الفطيره عبالي كلها مثل طيبة گلبي شفتج صديقه وأخت يلا عـــلىٰ العموم ماله داعي الكلام بعد أحسن ما نقهر نفسسنا

ـ مشت وشگلها زعلت يمكن طوختها وياها يله احسسن تجاهلتها ومشيت وبلش الدوام والشغل وجان يوم متعب نهاية أسبو؏ وحل علينا التعب .

" خلص الدوام وطلعوا الموظفين ولاحظت رشا ما موجوده شعجب طالعه أول وحده ليكون هاي زعلت مني لازم أراضيها عيب ما بيها داعي يمكن قسيت عليها خطيه

" أتصلت عـــلىٰ بابا ورفضني طلعت وشفت سيارته بس تفأجات رشا واكفه وياه ويتبادلون الحديث وبابا يضحك!
؏ شنو يضحك ورشا منطلقه وياه عبالك تعرفه من زمان احس نار شبت بداخلي احتركت مشيت سريع هلاو بابا

كمال ـ هلا بابا

رشا ـ خطيه ابوج من زمان ينتظرج يله أني اروح فرصه سعيده أستاذ كمال

كمال ـ وأني الأسعد صعدي نوصلج بطريقنا

رشا ـ لا مشكور متقصر عندي خط وينتظرني غير مره يله أزهار باي

أزهار ـ باي راحت وبابا مبتسم مبين جنتوا تحجون

كمال ـ اي سلمت عليه وتشكرت مني عـــلىٰ غده هذاك اليوم يله اصعدي تأخرنا أمج خبصتنا بالأتصالات .

ـ ماشي صعدت وشغل ولاحظت سيارة هشام ما موجوده ما أعرف أفتقدته مو ؏ العاده مشينا ورجعت تفكيري لرشا وكفتها وضحكتها ويه بابا معقوله تكون خبيثه ووو ...
وأني ما ملاحظه عليها لا شسالفه رشا مو من هالنو؏ فقيره وبنت ناس عـــلىٰ كد حالهم أهلها تعبانيين بتربيتها اني شبيه شطح تفكيري بعيد مجررد سلمت سلام عادي وتشكرت ما بيها شي اي هذا هو .

" بالطريق وأني صافنه بابا اجه اتصال وضل يحجي ويضحك وگال

كمال ـ هذا هو لعد الأسبو؏ الجديد أنت توصلها لدوام

أزهار ـ ما فهمت شيء أنتهى الاتصال وباوعلي

ـ الأحد هشام يوصلج لدوام ، الولد أخلاقه عاليه وعجبني ووياج موظفين بالدوام وسياره بعد ماكو بابا سياقتج مو مضبوطه وهالمره عدت سلامات والولد تنازل اخاف مره ثانيه تسويلنا سالفه.

ـ شو هسه يله تكولي بابا أظن لازم يكون عندي علم

ـ علميش بابا اني اكول كلامي وخلص لاتناقشينييي بعد تروحين وياه وخلص لاتطولينها وهي كصيره خط يوديج ويجيبج حالج من حال الموظفين الوياج شفرقج عنهم

ـ بس

ـ لا بسسس ولا هم يحزنون كافي بابا

ـ ما جاوبته حتى ما أنطاني مجال احجي مخطط ومتفق ومرهم كلشي وأتصالات وكذا وأني أخر من يعلم ويكون عندي خبر هشام يوصلني اروح وأجي وياه يضل بس يتأمر وما يتفاهم أحسسه صعب وكل عقلي أخذ سيارتي عقوبه فتره ويرجعليلها أثاري هاي هي بعد ماكو سياقه بعد قل الدلال يا أزهار .

" وصلنا كلهم مجموعين عـــلىٰ الغده صعدت لغرفتي مزعوجه من تصرف رشا وتصرف بابا اثنينهم ما عجبوني اليوم ، بقيت متممدده وعصام شال البيت بعياطه شگوو لخاطر شبي هذا انكرص صحت بي بعصبيه شكوو تصيح نازله كام يعد ويغلط ويلعن سگتت لن خفت منه وصارت بيه خوفه من أخر مشكله صارتلي وياه .

" نزلت كلهم كاعدين ساعدت ماما وكعدنا وأسيا أبتستملي ورديت الأبتسامه مجامله گلبي مقبط بعدين نحجي هزت رأسها وبلشنا الأكل

كمال ـ أختكم أزهار أجرتلها سياره منا وهيج يجييها خط موظفين وياها بالدائره يرحون ويرجعون وياها وسياره بعد ماكو أنوب تسويلنا سالفه ونبتلي حبيت يكون عدكم علم

عصام ـ لو تشلف الوظيفه بعد أحسن دام السياره طارت وضل ذاكراها عـــلىٰ البال عـــلىٰ البال

كمال ـ عصااااام گاااافي عاد هذا تعبها حالها من حالكم شيل أختك من رأسك خل تشوف دربها لاتضل رأسك من رأسك كبر عقلك

عصام ـ ماااااشششي ومنو هذا الاجرته

كمال ـ هسه الا تعرفه اني اعرفه وأجرته وخلص ينسد الموضو؏، يله كملوا غداكم

أزهار ـ باوعلي ونزلت رأسي بماعوني معقوله اذا شافه يعرفه بس هو جان ما واضح بالكاميرات مجرد مد ايده وانطاني الرقم والتصوير بوكتها مروان حذفه علمود لاتصير مشاكل ولا اعرف ليش حذفه بوكتها يمكن يفكر لبعيد لن عقل مروان ما يشبه عقل عصام وحتى عمار اللي بس بالاسم موجود أنعزالي وعايش حياته بالخارج

" بهل الاثناء ذكرته أتصل عـــلىٰ بابا وعاف الاكل وضل يحجي وياه وأنطاه لامي وكامت تبجي وتسأله شوكت يرجع

كمال ـ عوفي الولد براحته لاتضلين تنكين وتتبجين عـــلىٰ رأسه رايح يدرس قابل رايح يلعب وكت بجي هسه حاجي وأطمئني عليه وهاي هيه .

أزهار ـ حسيتها فشلت حجت كلمتين وانطت التلفون لمروان وكامت تجمع المواعين الفارغه وعصام ضاج وعاف الأكل وابويه عاط

كمال ـ شگووو زعلت أنتَ وأمك شحجيت أني

عصام ـ منو كلك زعلنا تفسسر على كيفك

كمال ـ عصاااام احجي عدل ويه أبوك

وصال ـ يمعودين شصارلكم

كمال ـ من وراج ومن ورا زعلج زعل الافندي عليج وعاف الأكل هاي تربيتج أستلمي عيشه زقنبوت أنعل ابوكم لابو الرباكم كواويد

أزهار ـ بابا حجه وعصب وعاف الأكل ومشه ومروان يحجي على التلفون وقطع الاتصال وباوعلنا وكال

مروان ـ عمار يگول توبه بعد اذا أتصل .

عصام ـ زحمه عليه والله زحمه يعلس نعل مكلف عـــلىٰ نفسه والله متصل حملت وسهرت وربت وتعبت والافندي مستكثر الأتصال وسيد الوالد ما عاجبه والله يالله.

أزهار ـ مشه لغرفته وأمي هزت رأسها لـ أسيا معناها لحكي زلمتج، مروان شال تلفونه وطفر لغرفته هذا عاشك الولهان وقريباً ننصدم بي .

وصال ـ أبوج اليوم شبي متحمل علينا

مجد ـ شبي يعني هذا ابويه

أزهار ـ أخاف ضايج عـــلىٰ عمار لو مشتاقله

وصال ـ ليش منو دزه يدرس بالخارج اني لو ابوي مو هو

مجد ـ يمه لاتزعلين قابل جديد عليج يله اني شبعت

أزهار ـ مجد كام وضلينا بس اني وأمي بقيت ساكته انقهرت عليها وما أعرف شحجي اخفف عنها بابا قسى عليها وحقه عصام يعصب ويزعل عـــلىٰ زعلها، كسرت الصمت البينا وحجت بگلب مكسور

وصال ـ أتمنى ما تأخذين رجال يشبه أبوج يمكن أنتِ تتمنين مثله لن مددللج وما يرفضلج طلب بس الدلال مو كلشي بالحياة أكو أشياء اهم بالحياة يله الحمدلله على كل حال شنسوي كبرنا بعد شيتغير عكب هالعمر هاي هي

أزهار ـ ما حجيت بقيت ساكته انقهرت عليها

وصال ـ أي ما كلتيلي منو هذا الولد أجره الج يوديج ويجيبج گال موظفين وياج

أزهار ـ اللي دعمته بسيارتي

ـ تحجين صدك ماما

ـ أي ماما قابل مجذبه عليج لو الوضع مال اتشاقه

ـ وهذا الولد شبي يحظي وافق يأخذج بالخط مالته وأنتِ داعمته جايز من روحه هذا أبتلى عـــلىٰ عمره الظاهر أبوج لزكج اله مبين هههه

ـ تتقشمرين ماما

ـ اي والله شبيــج لو هو شاخط لو أبوج

ـ الله وكيلج أثنينهم شاخطين هذاك هم مو قصر

ـ يله موزين ما شلف وظيفتج منج

ـ شلف شنو عفيه منين تجيبون هالمصطلحات أنتِ وعصام

ـ شلف يعني راح طار هيج يعني تفسلفين برأسي كل كلمه تعيقلين أنتِ وأبوج عليها

ـ أسفه ماما مو قصدي هيج والله

ـ لا عادي تعودت قابل جديدين عليه يله كومي أرتاحي أكوم أغسل المواعين وراي ملابس مروان تريد كوي وراه ألتحاق شوكت يتزوج وأسلي همه وأرتاح

ـ هو يتزوج لاتستعجلين على مريته اكول صدك شصار على أسيل

ـ حجيت لـ أبوج مبين ما وافق يكول ما يتوالمون هو ووياها وأبنج يحب من طيينته يعني على رغبته مو ابوج ما تزوج عـــلىٰ رغبته ف يخلي أخوانج يتزجون بأرادتهم اني رأيي وكلامي هيج يكولي منين طلعتي بيها هي اختها ما توالمت هي وعصام وطلكها انوب هي شتحجين وياه بعد خليت وسگتت

ـ أي احسسن ماما لادخلين نفسج بمواضيع الزواج والله بعدين توكع برأسج شيخلصج من لسانهم هو حياته وأعرف بأختياره

ـ أني بس أريد ارتاح من ناحيتج

ـ لاتخافين ما عليه شيء

ـ الله كريم

ـ عوفيهن روحي أرتاحي.

ـ خاف تعبانه امي دروحي نامي اني أغسلهن

ـ لا والله عوفيهن اني أغسلهن

ـ ماشي بنيتي

ـ مشت وكمت أجمع المواعين أخذهن للسنك أغسلهن طلع عصام بالصاله وعصبي ويحجي ويه نفسه وراه اسيا

عصام ـ ساعه السوده الـ نزلت بيها للبيت من صركاعه توكع عـــلىٰ رأسي وأخلص منج ومن مشاگلج

أسيا ـ أي طبعاً علمود تخلص مني لا نكد ولا نگ وتأخذ راحتك ويه الكحاب مالتك

عصام ـ والله من انعل أبوج لابو الرباج بنت الگلب

أزهار ـ كمز عليها راد يضربها وأمي وكفت كدامه تمنعه واسيا كامت تخاف وتترجف من الخوف وهو قافل الا يكتلها ويفشرررر ويغلط عليها و؏ ڪُـــل سلالتها

عصام ـ بنت الگلب انييييي تحاجينيييي هيج والله لا أنكعلج البسطال مالتي وين اليوجعج يممممممه رحمه لشكوووو ميت وماله أهل عوفينييييي أششوووف شغلي وياهاااا .

وصال ـ ولك مرتك حامل وحالتها خطره أنوب تصير عدها لاده مبكره تريد تشيل خطيتها وتموت بنتك شو عوف خبالك ؏ صفحه فدوه لهل الوجه الحلو لخاطر طلوكتي بيك مو طلعت من بين عيوني حس بتعبها وعوفها اني احاجيها

ـ انيييي احاجيها الموضوع بيني وبينها كم مره حجيت واكلت خ** وكلت لاحد يتدخل بمشاكلييييي

ـ خلص خلص محد يتدخل يجرالك يمه يجرالك بس أعصابك لا يروح يصيرلك شيء ما جايزه منك يمه فدوه لطولك حيلك يرجف عـــلىٰ شنو متكولي من ورا اسيا خفت وجهه ولج شمسويه متكوليلي مخبلته

أسيا ـ شمسويه والله عمه من ورا

أزهار ـ رادت تحجي وعاط بيها وسگتها

عصام ـ سكتيييييي أكسر حلكج اذا تفتحينه يممممه من بعد أذنج هديني وخليني احل مشاكلي لاتخافين ما أذيها

وصال ـ احلفلي

ـ لا اله الا الله ليش أحلف بطنها روح جايز منها اضربها
وخري عن دربي خليني اشوف شغلي وياهاااا يرادلها صيانه من زمانه من ضابها

ـ بس على كيفك وياها هي هم فطيره وتخربط بسوالفها

ـ ماششششي

أزهار ـ أبتعدت امي من أسيا تقدم جره من ايدها بس اسيا قطعه صفره يذبحها قطره دم ماكو بجسمها من الخوف بس سمعنا الباب أنركع بكل قوته وأنضرب قفل خوما يأذيها

وصال ـ لا بس راح يحاجيها ولو تنضرب اشرفلها لن راح يعاملها بالقندره وكل كلمه يكوللها الها تعادل عشره ضربات وهي زين تدري وتعرف اطباعه بس ما أتوب الله يدري شخابصه بسوالفها جنتي وأعرفها أسيا زماله

أزهار ـ مشت امي حيلها يرجف ولاحظت لا مروان ولا مجد ولا حتّى بابا طلعوا لن مره تعاركوا وطلعوا وعصام طردهم ومن هذيج المره محد يطلع على صوتهم بس اني وأمي بعدني ما ماشيه من غرفتهم سمعت أصواتهم عاليه وأكثر شيء صوت عصام

عصام ـ انوب عليه نسوووان أخوانج داخلتي وياهن عـــلىٰ الخط ومسويتني صباح الخير يا عرب وتعال عصام لاتغلط وصير اداميييي شسويلج متكوليلي شسويلج

ـ أنت خاين

ـ شفتي بعينج اني خاين شفتييييييي

ـ طلكنيييي ما اريدك بعد

ـ أطلكج ليش لا واطلك عشره من امثالج بس مو هسه

أزهار ـ سگتوا وصوتهم مو هلكد ينسمع عفتهم ورحت كملت المواعين ونظفت المطبخ وصعدت غرفتي تمددت بفراشي راسلت البنات ما موجودات وأستغربت رشا ما مراسلتني ولا سألت معقوله أخذت على نفسسها وزعلت

بهل الاثناء أجتني رساله من رقم غريب

ـ السلام عليكم

ـ صفنت بالرقم منوو اخاف رشا غيرت رقمها لا شسالفه خوما تحجي رسمي جان كالتلي رجع دز

ـ الو

ـ أتصل رفضت ورجع أتصل مرتين يله جاوبت اجاني صوت رجال خشن

هشام ـ الو السلام عليكم

أزهار ـ وعليكم السلام نعم

ـ متجاوبين

ـ ما اجاوب ارقام غريبه

ـ بس جاوبتيني

ـ باي

ـ وين رايحه يمعوده اني هششام

ازهار ـ هشام ! .

يتبع ...

11






أزهار ـ ضليت ساكته مصدومه ومتفاجئه يمكن الأثنين راساً جاوبته لحظه كمت تأكدت من الباب ورجعت أخذت نفس وجاوبته تفضل محتاج شي

هشام ـ أنتِ ليش تحاجين العالم بخشم يابس ترى محد يشتغل عندج وهالكبرياء ما لايكلج

ـ وأنتَ شگوو شعليك بيه

ـ حاجيني عدل ما متصل عـــلىٰ خشمج اليابس

ـ لعد شتريد

ـ أبلغج الأحد اجي أخذج تأخير ما اريد وياريت تضبطين الوقت زين ما احب الانتظار

ـ ماشي باي

ـ الله وياج .

أزهار ـ قطع الأتصال وتلقائياً لكيت روحي مبتسمه هذا شبي متحمل عليه وفزيت عـــلىٰ دگة الباب قوي خفت الصراحه عفت التلفون وكمت فتحته ماما

وصال ـ ليش قافله باب غرفتج

ازهار ـ ليش اكو مانع ترى غرفتي خصوصياتي خير وصال خانم بدأت التحقيقات وبعدين شمصعدج طابق الثاني مو مفاصلج توجعج

ـ سدي الباب وتعالي

ـ رديت الباب وراها وكعدت عـــلىٰ جربايتي وبالكوه اخذت نفس طلعت من صدرها تلفون ولاحظت هذا تلفون بابا شيسوي يمج

ـ سگتي ونصي صوتج تعالي شوفيلي هاي منو تتصل على أبوج زهكته يسد خط بوجهه وترجع تتصل ورجعت اتصلت من رقم ثاني انتظرته ينام واجيتج شوفليها منو هاي

ـ تغارين ست الحبايب من معجبات بابا

ـ اي ليش ما اغار شنو ما عندي گلب

ـ بستها من رأسها لا يا روحي أنتِ، حقج والله هسه أشوفه الج طلعت الرقم وبحثت عليه ما بي حسابات متصله عليه ١٠ مكالمات واخر شيء بابا حاظر الرقم ونوب متصله برقم ثاني باوعت لامي ما مسجل بأسم

ـ ليش ما مكتوب اسمها ماكو شيء يطلعها

ـ ماما هم ملاحظه على بابا فد تصرف معين خلال هالفتره

ـ لا ما ملاحظه هو أبوج نفسسه ليش

ـ اخاف متزوج لطمت عـــلىٰ وجهه خلص خلص ماكو هيج شي مجرد احتمالات

ـ يمه اسم الله فال الله ولا فالج خلي رقمها بالسله مالت الزباله وختولي تنكلع من انكلعت روحها منين طلعتلي
وشوفيلي تلفون ابوج نبشي اني اعرف انبش دورت ماكو شي بس اخاف منا منا مدحوسات

ـ ماشي بديت اكلب بكل حساباته ماكو كلشي فارغ كلهم جماعته وناس من المعرض واخواني وعمامي ماكو محادثات بنات نهائي ماما ماكو شي لاتخافين بابا ميسويها

ـ الله يطمن گلبج يا امي وهاي رقمها شلفي بالزباله

ـ حظرتها انتوا سمعتوا صوتها اخاف ولد

ـ اي لعد شلون غير جان نايم واتصلت وجاوب وحجت وضل يغلط عليها وهي لازكه تعرفين ابوج من نايم لاعصام ولا خبره نعل اهل اهلها

ـ عاشت ايده الله ياخذهن كبور لهيج نماذج لاتخافين حبيبتي اباوع وجهه مصفر حضنتها بابا الج وما يصير لغيرج اطمني وروحي نامي يمه رغد

ـ هيج تكولين

ـ اي والله

ـ ماشي امي رايحه وتلفونه خل ارجعه اخاف يحس تعرفينه ما يحب احد يفتش بتلفونه ويرجع يحجي عليه

ـ بستها من راسها وابتسمت وراحت سوده عليه وجهه صاير نوميه من يومها تخاف على بابا تاخذه وحده وحقها منو متخاف عـــلىٰ ابو بيتها والله اني اخاف عـــلىٰ بابا واكلها بسنوني تتقرب عليه الله ياخذهن

" رجعت تمددت وتذكرت المكالمه بيني وبين هشام أبتسمت لن صوته خطر عـــلىٰ بالي صوته رجولي وحلو يجذب السمع نامي ازهار وكافي .
___

أسيا

ـ من بعد الغده لحكته الغرفه لكيته يگلب بالتلفون سريع شافنيي كبل طفاه وتهرب من نظراتي تصرفت طبيعي ورحت نومت كرم بس بالي يمه ما مرتاحتله گلبي يلعب ناصب حفله يريد يطلع من صدري منا شوق ومنا أفكار شيطانيه توسوسلي يخونج اي عـــلىٰ علاقه ويه غيرج
نفضت الافكار السوده من رأسي ورجعت أنوم أبني .

سمعته يحجي أتصال خليت أذني وطلع صاحبه وصار صوت كهكهات ضحكته عاليه والأمور عاديه عنده ولا مهتملي أن زعلت أو رضيت احسس القهر صعد بدماغي

" ميخالف عصام خليك نشوفك وين توصل بهاي تصرفاتك جنت ضايجه ومحتاجه افرغ القهر الكاتمته جبت تلفوني وكمت اكلب اتصلت على امي ما جاوبتني
رجعت راسلت دره وحجيت الها بگلبي برساله عود جاوبيني محتاجتج ضروري بلكي تنصحني شسوي بعمري وبرجلي المراهق

" انتظرتها ترد ما جاوبت راسلت رواء اسألها ؏ دره شلونج رواء كبل ردت جانت فاتحه نت

رواء ـ هلا والله زمان القمر ما بان شدعوه عليج شدعوه هيج عصام ماخذج من الدنيا كلها احنه نسوان اخوانج بالجذب اتصلي سألي علينا و؏ أخوانج

ـ حقج عليه بس أعذزيني هم ملتهيه هي هاي الدنيا مأخذتنا بمشاغلها شلونكم أخباركم

ـ بخير كلنا زينين أنتِ أخبارج رجلج شلونه وياج اموركم

ـ الحمدلله تمام

ـ شو تمام لازم شالع گلبج بعده

ـ شسوي اي والله رواء ما اعرف شاگه بشيء ومتردده أخاف اكون ظالمته ومنا طول الوقت فاتح نت ما اعرف

ـ والله المثل رجلج گلشي توقعي منه والشك ما يجي من عبث اكيد عنده شيء وگلبج لعب منه هذا احساسج الداخلي ينطيج أشاره علمود لاتضلين غافله عن سوالفه

ـ هيج تكولين ما اعرف

ـ اوكفي خل نسوي كروب وندخل رسل ودره ونتفاهم عـــلىٰ سالفتج ونلكيلج حل هذول الزلم يشلعون الگلب بسوالفهم

ـ لا يمعوده يا كروب اني مجرد شگوك لا اكثر ولا اقل عوفي السالفه حبابه ومالي واهسس اكعد اكتب

ـ أنتظري شبيج فوك ما دمي محترك عليج من ورا رجلج ابو النسوان اكيد هسه تلكين ملفيله وحده اثنين بحساباته والواقع الله واعلم الج الله يا اسيا أنتِ فطيره و؏ نياتج وهذا لكاج عـــلىٰ كد ايده بكيفه يلعب ويسرح ويمرح

ـ لا حبابه لاتوكعين گلبي اني بدون شيء عقل ما ضال برأسي من كثر التفكير ما ردت عليه شوي ودخلتني بمجموعه رسل ودره هم موجودات وكعدنا نسولف ونشارك بالكلام بس دره ما شاركت بس تشوف الرسائل طلعت واجتني خاص دزتلي

دره ـ طلعي من المجموعه وعوفي رواء وأختها ما وراهن بس هجمان البيوت.

اسيا ـ جنت محتاجه افضض راسلتج ما جاوبتيني ما اعرف أنهديت بالكلام وكلمه تجر كلمه وحجيت وفرغت كلبي

ـ فرغي گلبج ياعيني بس مو هيج شگو خرطتي الاول والتالي كدامهن يضل زلمتج وابو ابنج انطي مجال تأكدي يحظي شبيج مستعجله عـــلىٰ شنو

ـ نار بگلبي دره محد حاس بيه طول الوقت فاتح نت واراسله ميجاوب ويگولي راح اطلع وبعدين اسمع بي نايم بالاستقبال هاي شنو تفسيرها هو يجيب الشك لنفسه كوه وانوب متجاهل وجودي بالليل اكعد الكاه كاعد وعيونه بالتلفون شيسوي ما اعرف.

ـ ترى رجال لا مثلي ولا مثلج عنده اصدقاء ودوامه يفرض عليه طول الوقت متواجد عـــلىٰ النت مو شرط عنده علاقات وسوالف مو زينه، رجلج رجل عسكري مسؤولين على تواصل وياه شبيج تكبرين المواضيع اكبر من حجمها تشترين المشاكل شرايه يحظي مدللج ومعيشج بعز عيشة ملوك ويحبج عـــلىٰ شنو راكضتلي ورا الهم والقهر وتحمسين بروحج

ـ مو بيدي والله صعبه

ـ حقج أعرف صعبه كلش هم منو ترضى رجلها يحاجي بنات بس شطالع بيدي وبيدج هما كل الزلم هيج يحجون ويملون فتره ويرجعون هذا الطبع بالدم ذاك من ذاك ما عنده وتلكي مرته حاكمته لو هو مال من هالسالفه ف فدواتج عوفي رواء وسوالفها وهالمجموعه طلعي منها ترى تجاوزت عـــلىٰ زلمتج عيب لا انوب الرجال يشوف الغلط نوب نتخزى كدامه رجال غريب وهاي مشاكل خاصه بينكم تنحل وتصافى القلوب ما بيها داعي والله

ـ ماشي وهسه يعني اعوفه ما اراقبه

ـ عوفي والله بس قهررر خلي هيج يحسبلج حساب

ـ ماشي مشكوره وينج من راسلتج ما جاوبتيني

ـ أخوج أبراهيم جان كاعد بصفي ما حبيت احاجيج وهو موجود لن هيج مواضيع خاصه الافضل تضل بيني وبينج ما ندخل الزلم بيها

ـ شكراً دره كلامج ريحيني جاي أكتب وحسيت أحد يمي رفعت رأسي لكيته فوك رأسي بلعت ريك أني شلون تغاضيت عن وجوده بالغرفه وما حسيت بي من اجه الشاشه جانت مفتوحه والمحادثات كباله وعيونه تباوعلي بشك بدون اي كلام سحب التلفون بهدوء ومشه الغرفه

" راح واحس گلبي راح يوكف راح يقرأ المحادثات أني شبيه ما اتوب كمزت رحت عليه عصام جيب التلفون

عصام ـ لحظه لحظه

اسيا ـ عصام جيب التلفون عيب تقرأ المحادثات سوالف نسوان تلاولينا اني وياه بس بهدوء احاول اسحبه لزمني وقيدني وخلاني بصدره والتلفون بيده دخل عـــلىٰ المجموعه وبلش يگلب والكلام مسطر كدامه يقرأ يقرأ اخر شي راح عـــلىٰ محادثه دره قرأ اول سطرين وشمر التلفون وتكسرت الشاشه غمضت عيوني بخوف لزمني من شعري ويحجي بغضب ووعصبيه عارمه

عصام ـ شــــــــــنو هذا القرته عيونييييييي سر غرفتي ليششششششش بالمحادثااااااااات يعني اكعد بالليل ضايج والدنيا طالعه من عينيييييي لن حضرتج لابسه وجهج رقم أربعين واكعد اكلب بتلفونيييييي تجيييين حضرتج تسوينهااااا سالفه من الماكو اكوووو ومسويتنيي كوووواد فد مره سوينيييي ادخل ملاهي ليليه ما هي مرت اخوج كالتها ضلت عليج

اسيا ـ دفعته وجاوبته بعصبيه اي قابل كذب أنتَ طول الوقت فاتح نت ومشغول وتصرفاتك. توحييي عندك شي

ـ تفسسررررين عـــلىٰ كيفج دماغج يوحيلج اني كواد وخاين تصدكين شسويلج يعنيييييي

ـ اي اصدك اصدك اللي جاي اشوفه

ـ شــــــــــنو شفتييييييي احجيييييي شــــــــــنو شفتيييييي شووووو سگتييييتيييييي شــــــــــنو شفتييييييي اسياااااااااا

ـ تحجي ويه بنات

ـ يا بنات وينهن حظ الكوااااااد يا خ**٠

ـ وهذه لكيتك مجاوبها شتسميها

ـ واخذتيها طابوو ركبج الشيطان عـــلىٰ هااااااي موو شفتينييييي ما حاجيييي وياهاا وما منطيها وجه ولابستها بسطالي هالاكلان الخ** شيسمووووا شيسمواااا

ـ كذاب هاي مخليها تبعد الشبهه عنك عندك غيرهااا حبيبه وعشيقه لسوالفك ومكسراتك ومتأكده مبلغها من تجي يمي ما تراسلك لن من تطلع من يمي تفتح نت وطول الوقت نشط الان
اكيد متفقين بينكم تحجون لوحدكم ويمي تصيرلي شريف برأسييييي گبل ضربني كف بكل قوته بحيث وجهي نمل وخدر من قوته

ـ شوفي لج انيييييي شريف وغصباً عـــلىٰ سلالتج كلها ودام عقلج فسرلج الامور هيج ابقييي ما ابرررررلج لو تموتين لن ياما حجيت وأنتِ مثل الحصان واكفتلي عـــلىٰ نغزه مسسسمتني بعيشتي وياج .

ـ مشه وصحت وراه وين راييييييييح ارجع ما كملنا كلامنا وين تتهرب مني ارجع خل نحجي عصااااام طلع بالصاله وكام يحجي وادخلت عمتي وازهار
وهو تعصب فدمره لن اني جفصت وكلتله رايح عـــلىٰ الكحاب مالتك علمود تخلص من النكد والنگ مالت اسياااا

" راد يضربنيييي بس عمتي صارت حاجز وضلت تتوسل بي ومنعته وهو تخبل عقل ما ضل برأسه من ردت احجي السالفه لعمتي لن سألتني أخر شيء سحبني من ايدي ودخلني الغرفه وقفل الباب ويباوعلي يحير شيسوي ابتعدت ليورا خفت يضربني بس صاح بعلواا صوته

ـ يمتي تصيرين ام بيت وتجنين عقل وتبطلين مشاكلج يمتى يمتى ارتاح مثل خلك الله ترى قسم بالله دين ما خليتي برأسي اني هذيج المره والسالفه الصارت بينا وصلتيها لأخوانج لا عبالج غفرتلج لااااا والف لاااااا لحد الان أدك بگلبييييي تأكل وتششرب وياي أخوانج استحي أباوع بوجهم استحييييي اسلم عليهم من ورا منووووو من ورااااااااج أنتِ من ورررااااا سوالفج ما تعرفين تحفظييييين حجايتي ولا تعرفين تحافظيييين عليه بس تردين الزله صخمتي وجهيييي ويه اخوانج سويتني نمله ما اسوه كدامهم سكتتت وبلعتها وعديتهاوكلت ميخالف لحظه عصبيه وانقهرت منك واجتمعهن حبايب بينهن وفرغت گلبها ميخالف عصام تبقى مريتك عزيزه وام الجهال ميخالف مع الوكت تنسيييي

انوب عليه نسوووان أخوانج داخلتي وياهن عـــلىٰ الخط ومسويتني صباح الخير يا عرب وتعال عصام لاتغلط وصير اداميييي منين اصيررررر اداميييي شسويلج متكوليلي شسويلج

ـ أنت خاين

ـ شفتي بعينج اني خاين شفتييييييي

ـ طلكنيييي ما اريدك بعد

ـ أطلكج ليش لا واطلك عشره من امثالج بس مو هسه

أسيا ـ لحظه خفت عليه يوكع من طوله جسمه كله يرجف وعيونه حمر بالكوه مشه للحمام وركع الباب وراه كعدت على حافة الجربايه حيلي يرجف وگلبيييي يدك سريع شويه وطلع ناكع بالماي وجهه وصدره كله ماي وايديه يرجفون اخذ مخدته وغطاه وراح للصاله وتلفونه عافه يمي على الميز ما تقرب عليه.

" نام بالصاله ولزمت بطني توجعني تغاضيت وتمددت بفراشي لو صاير شيء عليه منو يفيدني نمت وهالليله كلمن نام بفراش وأول مره تصير نتباعد عن جربايتنا وكلمن ينام بمكان هيج عصام هيج تاليها تعزل فراشك اشوف وين توصل علاقتنا ليا حد ليا نهايه..
_____

ازهار ـ كعدت الصبح يوم جمعه فتحت عيوني ساعه ١٢ الظهر عزا شكثر نايمه جريت التلفون ولكيت رساله من رقم فركت عيوني منو هذا بعدين تذكرت يبووه نسيت احفظ الرقم هذا هشام فتحتها وكاتب

هشام ـ شيجيب الاحد

أزهار ـ تمددت وضليت صافنه بالرساله اكتب لا من زمان دازها عيب وليش داز هالرساله شيقصد معقوله كلام اسيا صحيح هشام معجب بيه اي معجب لن نظراته ما توحي غير اعجاب تنازلت عن كبريائي وكتبت اله

ليش " استغبيت عليه شوي أنتظرته شوي ورد

هشام ـ أشتاقيت لفد واحد خشمه عالي

أزهار ـ ضحكت واني شگو بالرساله الظاهر غلطان بالعنوان الارسال..

ـ لا ما غلطان العنوان مضبوط

ـ ما جاوبته شوي ودز

ـ اخذي راحتج

ـ تمام شافها وما رد عفت التلفون عـــلىٰ الشاحن وصرت كلني نشاط هيج شعور داخلي مثل الفراشات معقوله حبيته لا شسالفه شبسرعه يمكن مجرد اعجاب بأهتمامه

" فزيت على صوت امي تصيحيني

وصال ـ أزهاااااار كعدي يا امييي ساعه ١٢ توضي وصلي ونزلي ساعديني بالغده

ازهار ـ نازله ماما ، دخلت الحمام سبحت وسرحت شعري ورتبت شكلي وصليت ونزلت لكيت امي غاسله ومنظفه وطابخه دولمه عـــلىٰ الغده بما أنو اليوم جمعه ومجموعين كلنا عـــلىٰ الغده

" عصام كلب الدولمه بالصينيه وعزل بماعون وخلاه عـــلىٰ صفحه دفع الصينيه وكال لامي

عصام ـ يله يمه كلبتها مجد عوف البلاي وكوم صيح ابويه ومروان بالاستقبال كرم يلا باباتي أرفع ردانك

أزهار ـ اسيا ما تجي تتغدا ويانا تقربت امي وحجت بصوت ناصي لن هو جان كاعد ويحجي ويه كرم

وصال ـ لا ما بيها اخذيلها هاج اخوج عزل حصتها مفكر بيها قبلنا اخ منها لوتقدر حب اخوج روحي وديلها غداها
واذا تريد تجي تتغدا كيفها كوليلها امي تكولج خل تعوف الزعل وتأكل بطنها روح

أزهار ـ ماشي شلت الصينيه وعصام باوعلي مشيت لغرفتهم لكيتها تكوي بملابسه وتبجي شافتني مسحت دموعها عيونها دم هذا غداج شبيج اسيا

أسيا ـ ما بيه شي مشكوره

أزهار ـ يمعوده ما كافي مشاكل والله ما تلوك الكم

ـ من اخوج غير كوليله هالحجي شگو بس تجن عليه

ـ الله يهديكم بعدين من تهدأ أعصابج نحجي

ـ اخذي الغده ما اريد ما جوعانه

ـ أمي تكول خل تعوف الزعل وتأكل بطنج روح الاكل شعلي تزعلين عليه راح اعوف الصينيه والحك عـــلىٰ الدولمه گبل لا يصير هجوم كاسح

ـ ازهار

ـ مشيت وصصاحت هاا

ـ عصام موجود على الغده مو

ـ اي موجود اذا تحبين تعالي تغدي ويانا لن كلنا مجموعين كيفج بعد

ـ أخذي الصينيه هسه الحكج

ـ تمام اخذت الصينيه ورجعت وهو باوعلي كانما يگولي ليش رجعتيها عاد امي كالت بعصبيه

ـ ليش ما تتغدا الا اكوم ارزلها

ـ توني ردت احجي هي اجت

أسيا ـ لا اجيت اتغدا وياكم ما احتاج رزاله

وصال ـ اني علمودج يا بنيتي ومنا وضعج مخطر وين صاروا اهلج الدولمه راح تبرد خل يعوفون شغلهم هسه

مجد ـ عدهم شغل عـــلىٰ الحاسبه هسه بس يلم الاوراق يجون اجووو انطيني الخبز ازهار

ازهار ـ هاك انتظر خل يجي بابا الزم نفسك ابو بطن

وصال ـ اسيا ماما اللبن عـــلىٰ الكاونتر صبي ووزعي الكلاصات وعمج وعصام صبيلهم بالكلاصات فافون

ازهار ـ اجو بابا كعد ترأس الميز واني جنت كاعده بصف عصام وكرم بحضنه امي هزتلي راسها وكالت

وصال ـ كومي كعدي بصف مروان اسيا تعالي بصف زلمتج

كمال ـ اي والله عاشت ايدج عـــلىٰ هالدولمه تعيشين عمي معدله يا بسم الله مدوا ايدكم بابا

ازهار ـ كعدنا واسيا صبت اللبن وزعته واجت كعدت بس حسيتها متشنجه بالكوه تاخذ النفس كعدت وبسم الله

" وقت الاكل اتصل تلفون بابا وماما كبل باوعتلي رفع الشاشه وانزعج وكال

كمال ـ هذا الرقم جلب تجلبه ما صايره زهكني والله

عصام ـ جاوبه خاف من المعرض لو جماعتك

مروان ـ جاوبته اني ماكو صوت حظرته ورجع اتصل من رقم ثاني الظاهر رايد ابويه بالخصوص بس سيد الوالد ماله خلك لهيج نماذج يمكن معجبه

كمال ـ عيب بابا شــــــــــنو هالحجي أنوب معجبه

عصام ـ جيبه اني اجاوبه وانعل والديه منو ما يكون

ازهار ـ اخذ تلفون من بابا وفتح خط وسبيكر واجانا صوت بنت تحجي بصوت مايع وناعم ما اعرف شكالت وعصام سد سبيكر وضل يسمعها وهو ساكت وبابا ياكل عادي وعايف الشغله على عصام ومروان ناصب عـــلىٰ بابا ويضحك بسگوت

كمال ـ مروان متجوز مني ادري بيك جلبت عاد

عصام ـ وياج أبنه شوفي لج اذا اخليج برأسي أنتِ وهذا صوتج تموعين بي اوديج ورا الشمس بنت الكواويد ادبسزز شغل وعمل ما عندج تتصلين على هذا وهذاك والله من انعل والديج عـــلىٰ هالتربيه السكط جربي تتصلين عـــلىٰ هذا الرقم انوب اجيبج سحل بالقندره يله ولي وليييي .

ازهار ـ قطع الاتصال وبحوش بالتلفون ما اعرف شسوى رجع التلفون لـ بابا وغمز لامي وأمي أبتسمت عصام محبوب گلب أمي

مروان ـ ليش كطعت خبزتها المسكينه

عصام ـ وأكطع عرج اهلها همين وحده أدبسزز

كمال ـ عوفوها ختولي وكملوا غداكم يله بابا

أزهار ـ رجعنا كملنا الغده او بالاصح محد عاف الغده ليش الدولمه تنشال الايد منها مدوا ايدهم والحلو بالموضوع كله أمي بهيج مواضيع ما تتدخل أبداً ولا تنگ ولا تحاسب بابا ولا تگوله منو هاي ليش هم دخلت نفسها وسألت نهائي عصام شاف شغله وحظر الرقم ويمكن هذا السبب نجاح علاقه بابا وماما عكس أسيا وعصام اللي من تزوجوا لحد الان مشاكل ودائماً في زعل .

" كملنا اني كمت أغسل المواعين ومجد عافوا عليه الجاي ويصب ويتذمر شبيك هو جاي

مجد ـ هي هاي الضلت سويتوني جاجيجي

عصام ـ صب وأنت ساكت كلها بس هالسنه وتوجه لكليه العسكريه

مجد ـ رجعنا لمربع الأول

مروان ـ هو احنه ما طلعنا منه خلص ونكظبك التدريب وتخلف شورنا نشمرك ورا عمار خلي الغربه تفيدك

مجد ـ بابااا

كمال ـ مثل ما كالوا اخوانك بابا العسكريه تريد زلم وحالك من حال اخوانك أنت زلمه الحك ربعك يا ابني

مجد ـ بس بابا طموحي مو عسكريه والله

مروان ـ بله شــــــــــنو طموحك

مجد ـ تدريس

مروان ـ باو؏ هذا والله بطران

عصام ـ جيب الجاي وفضنا خلص دراستك ويصير خير واخلي الطموح بالتدريب يغردلك .

أزهار ـ صب الجاي وقدملهم وكعد بصف بابا وبابا خلاه بحضنه وهو زلمه ونصبوا عليه أخواني سوا مزق وابويه يحجي عليهم ويرزل بيهم ضحكت عليهم كملت ولاحظت أسيا ماكو ماما أسيا وين كلت هيج وعصام راساً دار رأسه بس سمع بإسمها اختل توازنه خرب بيومج أسيا مطيحه حظ اخويه المسكين

وصال ـ گومي شوفيها ما عجبتني خاف عدها وجع سأليها خوما تشگي من شيء علمود ارجعها عـــلىٰ دكتورتها

أزهار ـ كمت ورحت الغرفتها لكيتها نايمه أسيا شبيج شو اختفيتي فجأه ضل بالنا يمج خوما عندج وجع وامي تسأل عليج

أسيا ـ لا ما بيه شي بس ظهري يوجعني وأخوج كاعد والجوو متوتر بينا كلت الأفضل ارجع لغرفتي

ـ أكيد

ـ أي لا يضل بالج وطمني عمتي

ـ ماشي ارتاحي لعد ، أحتمال اروح الصالون اسوي تنظيف بشره وترتيبات تعرفين جمعه ومناك نطلع لسوك تحبين اجيبلج وياي محتاجه شيء

ـ لا گلبي تسلمين عود أخابرج اذا احتاج شي

ـ تمام أخذي راحتج طلعت ودخل عصام شايل كرم دخل غرفة كرم وقفل الباب وراه لا الظاهر زعلهم قوي الله يهديج اسيا وكت زعل والله متسوى الله يصلح حالكم

" رحت على أمي ماما نروح الصالون حبابه

وصال ـ اي نروح اني هم اريد اصبغ شعري من زمان ما صابغته حضري نفسج بين ما اخابرها

كمال ـ مروان عود أمك واختك عليك وصلهن

مروان ـ ماشي صاعد الغرفتي من تخلصن أتصلن عليه

أزهار ـ اوك حبيبي صعد وبابا تمدد عـــلىٰ رجلين ماما وتلعب بشعره وهو غفه بحضنها غمزتلها صاعده اغير ملابسي

وصال ـ روحي ولا تتاخرين

أزهار ـ صعدت غرفتي سحبت تلفوني وباوعت رقمه ماكو شيء منه وصفنت اني شبيه هلكد مهتمه اله يعني أتصال والله تأثرت هالدرجه لا لازم اوازن نفسي مو اليه هاي الحركات عفت التلفون ونفضت الافكار من رأسي وكملت تبديل ملابسي وشلت جنطتي وتلفوني ونزلت لكيت ماما جاهزه وتحجي عـــلىٰ التلفون وبهل الاثناء نزل مروان وعيونه بالتلفون ما حجيتلنا عنها كتلي بعدين وغلست

مروان ـ شحجيلج مثلاً

أزهار ـ مثلاً شــــــــــنو أسمها ومنين

مروان ـ هناس

ـ واوو عالمي هالاسم اكيد جميله مثل أسمها

ـ طبعاً

وصال ـ ولك مروان جنها كرديه لو مسحيه الاسم عبالك الاسم مو عربي

مروان ـ كرديه يله اني كدامجن اشغل السياره

أزهار ـ مشه وامي باوعتلي وگالت

وصال ـ أخوج طايح بالشبكه ما ظنتي يوافق عـــلىٰ أسيل ولو أبوج رفض وأني خيلت عليها

أزهار ـ قسمه ما تدرين شمضموم يله نمششي

وصال ـ يله مجد لاتضل تلعب بلي انتبه عـــلىٰ دراستك

أزهار ـ طلعنا ومروان مشغل السياره واخذنا للصالون وصلنا وأستلمتنا گبل اني قصيت اطراف شعري وصبغته وحفيت وجهي وحواجبي وتنظيف بشره وترتيبات وامي كذلك طلعنا للوز طبعاً كل فتره نجي نسوي تغيرات وأسيا ويانا بس بعد وضعها ميسمح الها ومنا زعلها هي وعصام

وصال ـ شتكولين حلو عليه هاللون

أزهار ـ غير طالعه تخبلين

وصال ـ فدوه لهل الوجه يله ورانا سوك شكد حسابج عيوني

أزهار ـ انطتها الحساب وطلعنا ماما نخابر مروان

وصال ـ لا بس ناخذ تكسي اخوج مروان هسه تخابرينه يضل بس يعيط عليج انوب عليه الصالونات أخوانج واعرفهم كوه عليهم الطلعه عود من نطلع من السوك نخابره يله امشيي

أزهار ـ وكفنا ننتظر تكسي ماكو الشارع فارغ ماما عندي رقم الخط اللي راح ياخذني لدوام هو يشتغل تكسي نخابره يجي يوصلنا لسوك

وصال ـ هاا اي خابري وانطيني اني احاجي احسن عـــلىٰ اقل ابوج يعرفه تعرفينه يضل يدقق عـــلىٰ الروحه والجيه ويحجي عـــلىٰ اخوانج

أزهار ـ اتصلت وانطيته لـلامي فتحت الها سبيكر

هشام ـ الو

وصال ـ الو ابني

هشام ـ هلا خاله

وصال ـ أنت شسمه ولج

أزهار ـ هشام هشام

وصال ـ اي يمه هشام ما تجي توصلنا لسوك بلا زحمه عليك

هشام ـ اي من عيني

وصال ـ سالمه عيونك وليدي تعال النا يم صالون ... وتاخذنا لسوك

هشام ـ هسه خاله دقايق واني يمكم

أزهار ـ قطعت الخط وانطتني التلفون وضلينا ننتظر شوي وطبك يمنا صعدنا وسلمنا السلام عليكم

هشام ـ وعليكم السلام والرحمه

وصال ـ اخاف ازعجناك لو عندك شغل

هشام ـ لا عـــلىٰ بختج خاله صدك جذب كل ازعاج ماكو

وصال ـ رحمه الله والديك وليدي

هشام ـ ووالديج حجيه

أزهار ـ طلعنا بينا لسوك اني بصف ماما لن هي صارت وراه ما اعرف شصارلي متوتره واصابعي زلمتهن الرجفه رفعت رأسي ونظرلي وصارت عيونه بالمرايا عليه يمه گلبي دفر دفره حسيتها فلش القفص الصدري بلعت ريك وامي تگلب بالجنطه ما اعرف شدور شبيج ماما شدورين

وصال ـ ما عندي صرف كلهن اوراق عندج أنتِ

أزهار ـ اوكفي دورت طلعت ٢٥ أنتِ انطي اخذتهن وانطته

هشام ـ خليها خاله علينا

وصال ـ لا والله يمه ما يصير هذا زرقك و؏ باب الله اخذ من ايدي

هشام ـ لا والله ما اخذ خليها علينا رجعيها حجيه

وصال ـ ما أرجع يمه هذا تعبك وهاي بقيتها اهنا

أزهار ـ خرد ورجعلنا الباقي ووصلنا لسوك أمي نزلت قبلي وهو باوعلي وگال

هشام ـ أنتظركم لو اروح

أزهار ـ خل اشوف ماما

هشام ـ لعد خابريني تمام

أزهار ـ تمام

هشام ـ شدعوه هالكد شايله حِسن

وصال ـ يله ازهار نزلي بنجرتي

أزهار ـ اي ماما اجييت جنطتي وكعت ودخت بكلمته وهو أبتسم نزلت وهوسه كومه ناس لن يوم جمعه ومشيت وراها وهو ضل واكف نظراته تتبعنا .

وصال ـ مبين خوش ولد الله يرضى عليه

أزهار ـ اي مشينا ودخلنا المحلات اخذتلي ملابس لدوام وطبعاً لبس مستور وحجابات وشغلات احتاجهن وامي تسوكت واخذت شغلات الها والبيت كذلك كم حاجه واخر شيء اخذت مكياجات وعطورات وكملنا هاا ماما نخابر مروان

وصال ـ اي خابري شوفي وين اذا ما يجي خابري هشام

أزهار ـ ماشي أتصلت عـــلىٰ مروان وجاوب وهوسه يمه وين انت

مروان ـ طالع يم جماعتي وين صرتوا كملتوا بعدكم

ازهار ـ بالسوك نريد نرجع البيت

مروان ـ منو اخذكم السوك

ـ أمي اخذت تكسي تجي هسه

ـ أتأخر عليكم رجعوا بتكسي لعد وهسه يله تحجون عبالي بعدكم بالصالون

ـ ماشي قطع الخط يكول اخذوا تكسي ما يجي يتأخر

ـ خابري هشام

ـ طلعت رقمه واتصلت عليه وجاوب

هشام ـ الو نعم

أزهار ـ خلصنا

هشام ـ ماشي جايكم

أزهار ـ قطع الخط واجه وهالمره صرت وراه مُباشرةً وشغل وتوجهنا البيت يباوعلي بس بتحفظ عيب من ماما اني صرت ماكو أعقل مني فعلاً اني عاقله ووصلنا وخطيه نزل ساعدنا بالاغراض نزلهن ويانا واني فتحت الباب وليش ما عصام يطلع بوجهنا اجاك الموت بلعت ريك وامي انثولت

وصال ـ مشكور يمه رحمه الله والديك يله أزهار امشيي امشيي

أزهار ـ دخلنا وعصام ضل واكف يم باب الحوش ويباوعله وهشام شغل وطلع ورجع باوعلنا

عصام ـ مو مروان وصلكم ليش راجعين بتكسي

وصال ـ طالع كال يتأخر واخذنا تكسي

عصام ـ ماشي أتصلت عليج ام حارث عود اتصلي عليها عازمتج عـــلىٰ ختان ابن حسن

وصال ـ هاا اي ميخالف ليش اتصلت عليك

عصام ـ اي لن متصله عليج ما محصلتج رجعت اتصلت عليه

وصال ـ ماشي يمه هسه اتصل عليها

ـ يمه اني طالع عينج على كرم كعد مصخن وماله خلك عفته يفتر والبيت فارغ محد موجود ومجد وين مولي

ـ ماشي يمه هسه اشوفه وأسيا شلونها

ـ نايمه يله فيمالاا

أزهار ـ مشه وامي صاحت وراه وهو روحه بخشمه ماله واهسس حتّى كوه يحجي

وصال ـ يمه وليدي حبيبي دير بالك على مريتك ميخالف تصير بين كل متزوجين لاتضل زعلان عليها هي وضعها مخطر واني اعرفها فطيره وگلبها طيب ؏ كيفك وياها .

عصام ـ الله كريم

وصال ـ أي يمه فدوه لوجهك

أزهار ـ شغل سيارته وطلع ورديت الباب وراه وأستغربت ما حاسبنا ولا هلهل علينا الحمدلله نفذنا بريشنا وعدت سلامات شلت الاكياس ودخلنا البيت وامي عافت گلشي وراحت لغرفتهم وشوي صاحتني

وصال ـ ولج أزهااااار لحكيلي اسيا مصخنه جمر سوده بوجهي تعالييييي ولج

أزهار ـ رحت عليها ودخلناها الحمام أمي طلعتني سبحتها بماي بارد وكرم انطيته شراب وضليت العب وياه وامي التهت بأسيا وتسويلها كمادات

وصال ـ روحي عزلي الاغراض وصعدي اغراضج ولمي الهوسه ووصيهم عـــلىٰ عشه وياهم خل يجييون ونكعيلي تمن اسوي لمرت اخوج شوربه باقيه يمها لما تصير زينه .

أزهار ـ ماشي سويت مثل ما كالت وصعدت لغرفتي لكيته يتصل رديت الباب وجاوبته نعم

هشام ـ شلونج

أزهار ـ تمام ضل ساكت حسيته مو عارف شيحجي كسرت الصمت وحجيت شكراً تعبناك ويانا

ـ تعبج راحه يابه وامج تبين من أهل الله فقيره وتنحب اهلج كلهم هيج مثلها

ـ اي ماما طيوبه لا أهلي كل واحد شكل مختلف باطباع وتصرفات حسب

ـ وأنتِ

ـ شبيه

ـ مختلفه عنهم لو تشبهيهم

ـ ليش

ـ هيج سألت

ـ وليش تسأل

ـ فضول

ـ فضولك يخصني اليه لو يخص عائلتي فقط

ـ يخصج الج وعائلتج هم

ـ ليش

ـ هواي تصرفين ليش

ـ غير اعرف ليش

ـ مع الوكت تعرفين

ـ طيب وليش متصل

ـ أسمع صوتج

ـ خجلت ما عرفت شجاوبه بقيت ساكته ومتوتره رجع گال

ـ أسمج حــلو ومميز

ـ شـكراً وأسمك هم حلو

ـ بس أسمي حلو

ـ جاوبته بثقه أنت هم حلو

ـ شـكراً

ـ حسيت روحي تماديت بالكلام وخجلت من نفسي مسحت وجهي وارتبكت حجيت شسمه هشام أحمم اني اروح مع السلامه

ـ على راحتج يابه

أزهار ـ قطع الخط وشويه ودز رساله

هشام ـ الخجل العندج حاجه اقدسها

أزهار ـ ابتسمت وبعدين صفنت هذا شبي يبسمر لو شــــــــــنو قصده بعدين صفنت عـــلىٰ نفسي شنو حجيت وياه وكلامنا جان اقل من العادي بس مهما يكون عيب وبعد ما اجاوبه شيكول عليه ما صدكت سمعت صوتي واستخفيت زايد يبوووه عليج ازهار شكد عيب وانوب بابا صار يعرفه وبينهم سلام لا لا كلش عيب اي بعد ما اجاوبه رحت مسحت المحادثه كلها والمكالمات على كدما يوديني لدوام ويرجعني هاي هيه وهيج أحسن
___

أسيل

ـ صعدت الغرفتي لن حارث جان يمنا وغثنيي حيل بكلامه وحلف بعد ماكو دراسه ودام هيج هاي هي بعد ما اروح وخطيتي بركبتكم فتحت الكنتور وطلعت كل كتبي ودفاتري واغراضي جمعتهن بجنطه ورحت السطح نثرتهن واريد احركهن واجتي امي معصبه كفختني على راسي وصرخت بيها ليششششش تضربينيييي شتردين لخاطر الله

جنان ـ لاتصيحيييين بوجهي اني شعليه

ـ شعليج ليش مو هذا التردينه اعوف دراستي وأكعدلج بالبيت اطبخ لج وانظف لج واربيلج احفادج مو هذاااااا جنتي تحلمييييين بي أنتِ مو أم الام تحلم بنتها تتدرس وتتخرج وتتوظف وتتباه بيها بين النسواين أنتِ عكس الامهات راحت حسره بنفسييييي أدافعين اليه وأخر شيء مستقبلي بقيتي ساكته لقرارات حارث وحسسسن حرمتونيييي من ابسط احلامييي

ـ

كله من أيدج من لسانج هذا الطويل ما تحترميييين احد من لكفاتج وخفتج طبعاً يبطلونج وما تضل عدهم ثقه بيج اذا نازلتلي من سياره بيضه والسايق ولد شاب شتردين منهم يتصرفون حقهم ترتبيهم ما تسمح الهم اختهم تنزل من سياره ولوحدها والدنيا ظهررررر شتردين منهم يشدون كرون ستيل طبعاً يقسسسسون عليج.

ـ رجعتي عليه وتذبين الصوج بيه هذا هو كثر الله خيرج مشكوره عـــلىٰ أموممتج تجاه بنتج اول مره اشوف ام ماتريد الخير لبنتها وتوكف ضدها قبل لا اكمل كلامي ضربتني كف ولزمتني من ظفيرتي بقوه وگالت

ـ صيري أدامي لا اكعدلج گلب ما مدشن اسيل لاتصخمين وجهي بهذا صوتج ولسانج اختج انسترت بيت رجلها وما سمعنا الها صوت اذا تبقين هيج أنتِ والقندره واحد لكمتج والسم لمي هوستج وكتبج ونزلي ساعديني نكطع اللحم يله ورانا كومة شغل

ـ دفعتني ومشت وعثرت بالكتب شالتهن وشمرتهن برأسي عبرتي شگت صدري جمعتهن عـــلىٰ السريع وشمرتهن بالبيتونه وقبل لا انزل صفنت عـــليهن تتطشرت احلامج أسيل.
ميخالف سهله يا أهلي الحره التبقى عدكم بعد !!!

يتبع
__