كل بغداد ملكك وانت راعيها
شنو قيمتها اذا مو مرقدك بيها
**
ارض بغداد ملكك وانت سيدها
وكل ارموزهم باالعن نجلدها
الف لعنه عليها وعااليمجدها
بشسع نعلگ الطاهر مانساويها
**
لهسه بقاتلك لا زالو يجملون
ويوميه علينه بسالفه يطلعون
على المنصور لعنات وعلى هارون
واحد واحد اذكرها بأساميها
**
انت تخلدت بس رحمه للأمه
وهم تخلدو بس للعن همه
چا قرص الشمس من يگدر يضمه
ملاين بضريحك هاي تاليها
**
شكثر مدحو بخصمك تعبو ومافاد
اشكثر خلو القاب ورفعو الجلاد
شيحطون اسم وانت اسد بغداد
ضريحك سيدي هوه المحليها
**
الجسر چي شال نعشك سيدي نجله
واذا نوصل اگباله المدمع انهله
ياجسر الرصافه شحالك انگله
عا الگال الجنازه منين اهاليها
**
صدى تسبيحتك يكبر ويه الايام
صوت القيد چن تكبيرت الاحرام
ياباب الحوائج نطلع بكل عام
نمشي اعله الجدم هاالذكره نحيها

#سعد #العبودي

اربع حماميل،،         لجنازته شالوهه
منها الدم يسيل،، فوگ الجسر خلوهه
والاهل ماحضرته،، والله غربه غربته.
**
عمره گضاه،، حسره وي اه
باالسجون المظلمه كل عمره جابه
ونعشه تاليه،، حزنه غاطيه
لااهل حضرتله لا حضرت گرابه
كلها تسأل راحت الجسر المصيبه
تصيح المن هاي الجنازه الغريبه
ميت والقيود.  مافارگت چفوفه
چاوين الحيود. خل تحضر وتشوفه
لو تشاهد حالته،، والله غربه غربته
**
ابن الاطياب،، شنهي الاسباب
ليش يوميه بسجن عاش بمراره
نعشه مطروح،، ينزف اجروح
وليش محد شيعه وشاله اعله داره
هوه كل ميت تجي اهله وتشيعه
هذا يصرخ ذاكه يجري اگباله دمعه
تسأل يمظلوم،، ليمت ترد عليه
معصومه هليوم،، صارت مثل رقيه
موتتها فرگته،، والله غربه غربته
**
ليلة اهموم.   اه يمسوم
اليله كل بغداد لمصابك كأيبه
وسفه مولاي،،  جنازتك هاي
عاالجسر ياسيدي ضلت غريبه
المثلك توصله الايادي للثريه
موش يبقه اعله الجسر نعشك رميه
خلي تبچي بغداد،، حزنك لهسه بينه
كل اهلك ابعاد.      ماهمه باالمدينه
والجسر هل دمعته.  والله غربه غربته
**
قيدك الچان.   صوت الاذان
يرفع كلما تحركها السلاسل
كلشي شافاك.، صلى وياك
حتى حيطان السجن صلت نوافل
السلسله چانت مثل سبحه بيمنك
طهرت گاع السجن سجدت جبينك
طاموت الموت  ماغيرت حياتك
من السجن صوت،، يطلع اثر صلاتك
،، واليسجنك ذلته،، والله غربه غربته
**
مانسيناك،، يبقى ذكراك
عايش ويانه ومقامك مانمله
احنه نهواك،، ونبقه وياك
والحيات بدون حبك والله ذله
نتجه يوميه للرض الكاضميه
نسلم عليك بدمعنه بكل بمسيه
تاخذنه الاشواگ،، لزيارتك نسافر
كل لحضه نشتاگ،، ماتبرد المشاعر
والگلب بيه لهفته،، والله غربه غربته

#سعد العبودي

وين أهله هاالنعش غريب
وين أهله مااجو عجيب
وين أهله تشيعه باالنحيب لايبقه وحيد

وين. ،، أهله يحضرون*خلي يشوفون*مأسات الحال
ليش .،،ماجوه أحباب*شالوه أغراب* وشچم حمال
غريب ويلتفت للأهل ينتظر
وسافه هاالنعش ينترك عاالجسر
باالغربه ،ويلي عاالحنين
باالغربه .عاالجسر حزين
باالغربه. خلص السنين عن أهله بعيد
**
اه. والوحشه تحوم.ونعش المسموم. رايد جناز
راد. يسمع ونات. ويسمع صرخات.واصوات إعزاز
وراهه اجنازته لا عرف لاربع
ولاصرخت ابن عاالنعش تنسمع
لمصابه . يعمن العيون
لمصابه. كل أمر يهون
لمصابه. صاحت السجون.جرحك مايهيد
**
چان. بيته الطامور.گلبه المكسور.ضلم السجان
چان.لقاضي الحاجات .حتى النسمات.ماتوصل چان
ضلام ابكل كتر والظلم مستمر
على افراگ الأهل كل وكت ينكسر
مشتاگه. والنفس مرار
مشتاگه. من الانتظار.
مشتاگه.روحه للديار . يرجع من جديد
**
حيل.والناعي ينوح.صوته المبحوح.يوصل كل دار
صار.جسر الاحزان.اصبح عنوان.للكاظم صار
اذا شفت الجسريادمع يلزم
يقرأن الحزن كل وكت ينختم
يم جسرك.قصه ماتزول
يم جسرك. الحزن يطول
يم جسرك.سيدي نگول.عايش باالوريد
**
هاي .كل الأقطار.جتك زوار. مشايه تسير
ليك.هاي الوفاد.والعنده امراد.ماشوفه يحير
اليجيلك حاجته تنكظي بلا تعب
بحضرتك سيدي ياما شفنه العجب
مگضيه.حاجتك تصيح
مگضيه.وانت باالضريح
مگضيه.ودمعك اليطيح. اطلب وشتريد

سعد العبودي

شدات. شدات..    يمك تگضي شدات
بابك كلها مگضيه.     نسمع بيها يوميه
**
انت باب الحاجه انت.  وماترد كلمن اجاك
گبل لا يحچيها يمك.   سيدي تگله انت هاك
چم مريض الي شفيته.  من اجه ليك ونخاك
كله هاالعالم (وطبه)       يختلف عنهم دواك
دكتور.    دكتور.         مثلك ماكو دكتور
وصفاتك الاهيه.         نسمع بيها يوميه
**
ابوطلبه ملقبينك.     هاالقب لايگ عليك
الابنه اعمى بلا تردد.  سيدي يجيبونه ليك
ترجع عيونه لبصرها.   عليها لو خليت اديك
معروف.  معروف.     تگضي الحاجه معروف
الوادم سولفت هيه.   نسمع بيها يوميه
**
گبتك شمس الله صارت.  هيه تلمع من بعيد
چني اسمعها تنادي.       وينه هارون الرشيد
صار شباچ ومناره.      ذيچه جامعت الحديد
وتسجد ابابه سويه.         الملوك ويه العبيد

چاوين.    چاوين.    ذيچ الدوله چاوين
صارت دوله منسيه.   نسمع بيها يوميه
**
كل سجون الدنيا عجزت.   ماتغير محتواك
بسجدتك ذيچ الطويله.     السجن يسجد وراك
همه طاحت الويتهم         وانت باقي، يرف لواك
الرادو يضيعون ذكرك.       همه راحو وانت ذاك
  كل يوم.      كل يوم.     قصة طاغي كل يوم
يروح ويمشي طاريه.       نسمع بيها يوميه
**
بگبتك ذيچ الشريفه.            مأمنه تنام الطيور
وكل حمامه هناك تسكن.    عايشه بأجمل شعور
نوضع بهاالذكرى احنه ، نعش رمزي اعله الجسور
ودمعته تجري المصابك.   كل موالي وكل غيور

مسموم.     مسموم.     تصرخ كلها مسموم
ونطلق صرخه شيعيه.    نسمع بيها يوميه

سعد العبودي

هذا الغريب المسموم.       خليهم يشوفونه

وين هارون الرشيد وكل زمرته
گبال موسى الكاظم نهارت دولته
الله سبحانه اقتضه وشائت حكمته
بنص گلب بغداد تتشيد حضرته

ذاك السجن.والسجان.     ماگدرو يغيبونه    
**
صوت سلسلته الزمن ضل منه حاير
تحول الأذان يصدح عا المناير
همه راحو والقصور امست مقابر
وحضرت الكاظم صفت تجذب ضماير

من كل حدب من كل صوب.        زواره يتعنونه
**
وين بيبان السجون اسأل عليها
خل تعاين حضرته چم باب بيها
مانسدت لحضه بوجوه التجيها
گلوب وعقول الخلائق تهوه ليها

باب الحوائج معروف.           ماخيب اليدعونه
**
ذاكه نعشه العاالجسر محد يرفعه؟؟
اليوم اصبح مو غريب اختلف وضعه
هسه حتى اطفالنه تبچيله دمعه
نعش رمزي تسوي باالبيت وتشيعه

مو عاالمتن فوگ الروس.  تابوته يخلونه
**
شيعتك منك يغالي وانت منهه
سيدي وتستاهل الونه النونهه
الحايره بشباچك تسولف حزنهه
وليك تتعنه وتجي المسجون ابنهه

وبجاهك الكل مظلوم.        من سجنه ايطلعونه
**
سعد العبودي

هاي الدنيا ماتسوه
نتكبر تخلينه
خطار احنه بيها نعيش
وتضحكنه وتبچينه
ماندري اعله ياساعه
بيها الموت يلفينه
موبس ياخذ الارواح
ياخذ حتى اسامينه
نرد ماچنه مخلوقين
والايام تفنينه
اشگد نعيش فوگ الگاع
حدرها نصير تالينه
واحنه اشما نكون اعزاز
ينشمرن جناسينه
سعد العبودي

ياعلي. ياعلي.    ياعلي.  ياعلي
        
النجف منك اخذ هاي الخصوصيه
ضريحك جنه فوگ الگاع مبنيه
حامي الجار عنك هاي مرويه
شكثر يمك تجي وتندفن يوميه

        ياعلي ياعلي ياعلي  ياعلي
**
چم صافي الصفا راد الدفن قربك
وچم ميثم نصلبو من اجل حبك
وعلي خسران كلمن مامشه بدربك
منزلتك عظيمه وهاي من ربك

ياعلي ياعلي ياعلي ياعلي
***
مگبرة النجف مزدحمه بحبابك
امان الله يحيدر غادي بترابك
العدل والميت يطوفون بعتابك
بيبان الشفاعه نرسمت ابابك

ياعلي ياعلي ياعلي ياعلي
***
علي ذكرك عباده وتشبه القران
علي خصك الباري بسورة الانسان
علي انت الامام التطعم الجوعان
علي اسمك فرض  صار اعله كل السان

ياعلي ياعلي ياعلي ياعلي
**
وحگ هامك علي والطبره والامك
تره ساعة رحيلك ماتت ايتامك
نشالت فرحت المسكين گدامك
عليهم چان دوم مبلل الثامك

ياعلي.  ياعلي.   ياعلي  ياعلي
**
رحيلك زينب هوايه يألمهه
وطار العيد ياكرار يلچمهه
تلزم صورتك عاالباب ترسمهه
وتبچي گبالها وتضل تكلمهه

ياعلي ياعلي ياعلي ياعلي

سعد العبودي

ناديت بصوت.    وتحسر
ابعد ياموت.     عن حيدر
ليش تريد تبچينه.  والدنه ومحتاجينه.
**
بعدنه زغار عاالفرگه.   نريد نعيش بحضانه
مثل الشجره والدنه.     واحنه نحط اعله اغصانه
والله الدنيا ماتسوه.       اذا مو هوه ويانه
علي لو راح عن زينب.     عمرها تخلصه حزنانه
حيدر باالكون   بسمتها
هليله شلون      حالتها
صاحت جرحك ياذينه   والدنه ومحتاجينه
**
امس ياموت اخذت امنه.  وماطاب الجرح بعده
وصبرنه اعله الجرح احنه   وگلنه الوالد اليضمده
وداع الام ولا ننساه.         اوداع الاب بألف شده
ولي ينوله چف الموت.             محد يگدر يرده
شبعتنه فراگ.    دنيتنه
الهم نشتاگ.      خلتنه
نار الفرگه وتچوينه.    والدنه ومحتاجينه
**
زينب تنظر الوالد.    بده ذاك الوجه يذبل
العلايم چن يگللها.   ابوچ بها الشهر يرحل
من ذاك الوكت زينب.  بدت قصتها وي التل
من مقتل علي الكرار.  نفتح لحسينها مقتل
واشگد الام.     مر بيها
راحت لشام.      تاليها
تندب ياهو يحامينه.   والدنه ومحتاجينه

**
بس هليله وي زينب.    ويستر الله من باچر
ليلة واحد وعشرين.        تشبه ليلة العاشر
ابوهه اهنا يودعها.       وغادي اخوانها تسافر
رحلة موت ماتخلص.     بين الطبره والحافر
ليمت ترتاح.     ماتدري
جابتها اجراح.  دم يجري
حسين وصدره مهشمينه.   والدنه ومحتاجينه
**
الابو ماكو اغلا من عنده.   حنين وعازته عازه
بدونه البيت خنگه يصير.   ومثل النسمه نعتازه
وياه كل فرح ينشال.        من تنشال الاجنازه
واصعب لحضه عاالانسان.    لمن يدفن اعزازه
ارحل ياعيد.        عن بابي
عن عيني بعيد.     احبابي
عاالهم ياهو يواسينه.    والدنه ومحتاجينه

سعد العبودي

يابيت الكرم والطيب حاچيني
اواسيك اعله حيدر لو تواسيني
**
يابيت الكرامه راح والدنه
باالدنيا بعد گلي اشبقه عدنه
بحضان الابونگضي العمر ردنه
فراگ الوالد بها اليوم ياذيني
**
يبيت العز بعد خل تبچي حيطانك
صفن يتشابهن أحزاني واحزانك
بعد ياهو اليجي ويچهبها بيبانك
نار اوداع ابو الحسينين تچويني
**
بعد راح الابو والوحشه حاطتني
ليلة واحد وعشرين بچتني
بشهر رمضان ليش الدنيا فجعتني
ويتيمه انه اصبحت من اول اسنيني
**
اعيش بذكرياته التارسه بالي
الابو ماگول غالي اغلى من غالي
يابيت الصميده ابچي على حالي
ويه جسمه الطاهر تمنيت تچفيني
**
اعز إنسان نعشه گبالي هاالشفته
ابو البيت اذا راح شحال عايلته
من يرحل ترى يكسرگلب بنته
اليالي شما تمرني ما تنسيني
**
اجاني العيد وأنه بعيني الف دمعه
ومكان العيد امبارك صرت انعه
بعد ذاك الزمن هيهات شيرجعه
عطشته وذكرياته ماترويني
**
سعد العبودي

الله وياك. يابه الحسن
**
هذا الرحيل اشگد صعب ندري احنه
افراگك يحماي الحمه الجارحنه
محنت غيابك والله اكلف محنه
مثل المطر بويه اعله نعشك طحنه
والدمعات. لجلك جرن
الله وياك ،.يابه الحسن
**
كلمة وداعك گوه من نحچيها
وجنازتك حگنه نچلب بيها
اليله اليتامه اموادعك ياذيها
خلافك بعد ياهو اليمر اعليها
للأيتام. انت الوطن
الله وياك. يابه الحسن
**
وي نعشك انشالت أحلام الفقره
كسرت وداعك والله اكبر كسره
هليله زينب تختنگ باالعبره
اليفگد ابو شنگله حتى نصبره
يضل محتار. بين المحن
الله وياك. يابه الحسن
**
الدنيا وحشه اليله مو بس بيتك
بنعشك اليه وتلتفت حسيتك
لو تندفن وسط الگلب خليتك
ياريتك اترد ياعلي ياريتك
بس شيعود. ذاك الزمن
الله وياك. يابه الحسن
**
انت حبيب اگلوبنه اودنيتنه
والدنيا بيك بها المسه فجعتنه
بفگدك مثل عود الخشب كسرتنه
وياك نگضي العيد ماخلتنه
والأيام. سرعه گضن
الله وياك. يابه الحسن
**
سعد العبودي

ياعلي
بيام الحصار وذيج السنين
وليالي العوز والحاله العشتهه
نزلت السكف وهدوم الاطفال
بس صورت علي مانزلتهه
سعدالعبودي

شدت اضعون الاحبهم عاالرحيل
وأنه اصد اعليهم ودمعي يسيل
**
كلشي ماضل عندي بس ون وبچي
حيل مابيه وعلى الحسره انتچي
من اهد ما مشو بطلت الحچي
الموت بجفاهم احسن شي قليل
**
شي قليل الموت بجفاهم احس
وگمت اتحسر على لمت أمس
الدار وحشه عگب طيبين النفس
كلمة الله اوياكم اتذوب الدليل
**
كلمة الله وياكم اتگصر العمر
وانه طفله اويني اوين الهجر
عصر يعصر روحي لو مر العصر
وملليت الدار من كثر العويل
**
ملليت الدار باالون والنحب
ليش اضل الوحدي شنهو الذنب
صرت اتلگه الهوى كلما يهب
بلكي جايب ريحه من عمي الكفيل
**
بلكي جايب ريحه من ريحة هلي
وبلكت يحنون ويردون الي
اليل يخلص بألف كلمة ياعلي
الذكريات تميل وياي من أميل
**
الذكريات هواي متروس النزل
چني أسمع صوت عبدالله الطفل
من البواچي شلون تردوني امل
الروحي غير الحزن ماضل كل بديل
**
الروحي غير الحزن ماضل شي أبد
وانه هاي الدنيا ماخلتلي أحد
عمتي زينب هسه من بلد البلد
ميسره يفرونها فوگ الهزيل

سعد العبودي

ليمت ترجع. خليني أسمع. منك كلمه
**
ياالمسافر الك رجعه. عليك الزهره فهمني
بعدك يمي بس بعدك. بده من هسه يالمني
اخر مره يابويه. أخذني الصدرك وضمني
ما مهتمه أنه بروحي. بس افراگك يهمني

دون إخواني. تتركني اني. شنهو الحكمه
**
خلي عيونك بعيني وشوف اهمومي وقراهه
المثل حنيتك بهاالكون گلي وين الگاهه
شعجب كل الأهل ترحل. وانه ماامشي وياهه
من هسه رقيه اختي. بده يذبحني فرگاهه

هاي الحرگه. وچف الفرگه. موتي يرسمه
**
عليله تدري وزغيره. واريدن ياالابو امباره
شنهو حال البگدي. اذا بوها ترك داره
شسوي حتى اقنعك. الوب وروحي محتاره
ابو الحنيه اعرفنك. وتشوف اعيوني تجاره

الموت أسهل. هجرك معول. عمري يهدمه
**

التسافر أهله وأحبابه المصايب ماتكف عنه
تموت افراحه والبسمه. ويضل الموته يتمنه
اخر مره أحسنها. الطفل عبدالله اشوفنه
اريد اشبگ على مهده. بعد مااريد اهزنه

عگب اليله. مالوليله. فدوه الاسمه
**
هوادجكم اعاينهن. جنايز شالن احلامي
مشن عني وبعد صعبه. ارد اوگف على اجدامي
الضلام.بأول الخطوه نشر جنحه على ايامي
سلامي الصدرك الدافي. وسلام الگلبك الضامي

مشتاقتلك ،.متلهفتلك. چفي تلزمه
**
أصلي وادعي يحبابي. دعائي الله يحميكم
وألزم سبحتي بأيدي. وافرنها بأساميكم
داري موحشه وضلمه. الچانت زاهيه بيكم
اعله اباب الدار اضل اربي. ولحد الموت اتانيكم

دمعاتي اتكت ماراح اسكت. لمن اعمه

سعد العبودي

كلمات سعد العبودي

كلمات سعد العبودي

أحبك ياعلي حب مااله حدود
الگلب مثل الحمامه بصحنك يدور
انه مشتاگلك بس اكثر اشتاگ
اذا اسمع بواحد رايح يزور
وحيد ودنيتي خلتني محتار
طير بلا جنح عايفته الطيور

سعد العبودي

يعباس. يعباس. يعباس. وداعاً ياالگمر
**
يبو فاضل بدت رحلة سبينه
بچينه والنهر يبچي البچينه
رجعنه بلا شراع ولا سفينه

يبو الخوه العظيمه الما مثلها
زينب رادتك ما ترجعلها
السوالف حلوه عنك مانملها

كسرت الفاگدله غالي مايطيبها الدمع
وانه طبع الماي طبعي ابچي بس ماانسمع
اشما اديرن وجهي كترك گلبي احسن ينشلع

چن اهلال. چن اهلال. چن اهلال..
صبح خويه الضهر
**
بعدنه بعازتك ياعز خواتك
امس عباس ويانه اشحلاتك
حنين وحيل توجع ذكرياتك

وحشه الدنيا بعدك تدري هيه
خذاك الموت مني وانت إليه
مدري منين اجتني الغاضريه

وحشتك محد يسدها انت يانبض الگلب
خويه بس كلمة الوينك خلصت بيها الدرب
مو صعب لو روحي راحت لكن افراگك صعب

اسيرات ،اسيرات،اسيرات،،يودينه القدر
**
حسافه تضل يبو الغيره ورانه
تمنينه يهل شايل لوانه
العزيز يعيش ونموت بمكانه

الك برواحنه حسره شكبرها
رقيه بفرگتك ميته اعتبرها
مثل قطرت مطر نازل عمرها

والله يا عباس بعدك ابد مانهنه ونعن
الما تموتها المصيبه تموت من كثر الحزن
والهزيل علينه تصفن يابو فاضل من نحن

غريبات ،غريبات،غريبات،،تعبنه من السهر
**
اثر من رايتك باقي اعله هامي
كفيلي وهيبتي وبيرغ عمامي
يعباس اسمك محلي الأسامي

فريده خوتك ضلت فريده
يكاتب عاالنهر اجمل قصيده
يكافل شوفتك صارت بعيده

لخوتك تعجز الدنيا ماتعاود مرتين
هاذي النسميها خوه خوتك وي الحسين
الوفه بچفك كتبته وانت ما عندك ادين !!!

يوفاي ،يوفاي،يوفاي،يمن صيتك عبر
**
غرايب عيلتك صارو غرايب
وخواتك گعدوهن باالخرايب
لو عبدالله باقي يصير شايب

على ضيم اليمر بينه جزعنه
الهوى النشتمه صار بلايه معنه
الخرابه بلاسگف بيها نجمعنه

باالاهات ،باالاهات،باالاهات،،گضيناه هاالسفر

سعد العبودي

جعفر الصادق. انه من شيعته
جعفر الصادق .واحچي عن سيرته

نور الله على أرضه أمام اواجب الطاعه
يشبه حيدر بحلمه. واطباع النبي اطباعه
ربان الفقه هوه. ومركب علمه وشراعه
أمامي وبيه اتفاخر. واعيش بذكره كل ساعه
روحي مشتاگه. والله لزيارته
جعفر الصادق. واحچي عن سيرته
**
علوم الدنيا والاكوان. نقطه ابحر وي علمه
نفخر احنه مذهبنه. يتسمى على اسمه
من عنده تعلمنه. العلم والدين والحكمه
ايه من ثغر قرآن. منه تطلع الكلمه
نورالدنيا. بعلمه وبحكمته
جعفر الصادق. واحچي عن سيرته
**
.الامام الفاضل الطاهر،الصادق هاذي القابه
اگباله ينحني التاريخ. وعلى اسمه يسجل إعجابه
الرايد يكتب بحقه. يعجز من الكتابه
هوه الكوكب السادس.واهل الباطل اتهابه
يشبه اجداده. بشكله وبهيبته
جعفر الصادق. واحچي عن سيرته
**
عميان البصائر دوم. تكره طلعت الگمره
اختالو جعفر الصادق. لئن بيه ريحة الزهره
الإمام الكاظم بهليوم. ينوح ومنكسر ضهره
شيع روحه بچفوفه. لمن شيعه الگبره
الوالده ينعه. عاالوجن دمعته
جعفر الصادق. واحچي عن سيرته
**
أمامي ومرجعي هوه. ومصابه بروحي اعيشنه
شيعي وقمت احلامي. الگبره اوصل واشمنه
وسافه وقبره من ابعيد. صرت من بيتي ازورنه
لون اگدر يصح بيدي. البقيع بگلبي انقلنه
والبقيع اصبح. وحشه ياوحشته
جعفر الصادق. واحچي عن سيرته
**
الهدم گبره ابن ذاكه. الگطع باالسم افاده
عبد الله ابن البليهد؟ والمنصور وولاده
سلاله توارثو همه. كره واحقاد عاالساده
الصدر فتوه بهدم قبره. طبق رغبت اسياده
تنگطع باچر. الچف الهدمته
جعفر الصادق.واحچي عن سيرته

سعد العبودي

سادس الأنوار ودع دنيته
والنعش بدموع صارت شيلته

سادس الانوارعن داره ارتحل
الوداع الأصعب اوداع الاهل
بلايه موعد من يجي وكت الأجل
ومايدگ اي باب غفله جيته
**
اليوم دور العلم كلها مكدره
والمدينه لاطمه لطم المره
موحش وحزنان اصبح منبره
كلشي باالدنيا يحن الفرگته
**
جعفر الصادق سليل المعرفه
الرحمه دينه والنبل والعاطفه
تراب گبره بيه دوه وبيه الشفه
وسأل الناس المشتله وزارته
**
تارس الدنيا صفه بكل العلم
والمذاهب كلها تعرف هاالاسم
رحل لكن من رحل بس الجسم
فكره باقي والعده مادثرته
**
الحاير ابمسألته يمه مايحير
وچان عون وسند هوه للفقير
كلشي عنده وسفرته خبزت شعير
مثل سيرت جده حيدر سيرته
**
نعه الناعي وباالحزن طش الخبر
ودعينه الصادق بهذا الشهر
گبره بگلوب اليحبونه نحفر
وباالعيون اليوم صارت دفنته
**
سعد العبودي