بهاء سوادي


صَاغـت،
من حِـزنها الحـار
گُـمّيرة أغـاني ،
مدوّرة بكلّ لـون يوليدي قَـزح ...

ولك ،
من كلّ لـون
جابتلـك قَـزح..

نثّـت ،
اغنيّـه اعلى راس الرمـح،

سِجَـد وردة
ونثّت بكلـشي ضَماد ،
الچِـفَـن ، والتابـوت، وتراب الجَـرح..

أتـرف من الياس، واطعـم
ياسـه لو تدري؟
نِـثيث اُغنـية بَيضه ،
مگمـّرة
بكـل عين،

يوليدي نَجـمتين..
مسنـّنـه،
بلعبة فضيـة
ورگَـص ساجيِـتين
منّ العيـن ،
للعيـن

أطعـم من تـراب ساحگـته الحَبيبه
واطعم من چِفـوف ،
مَلْيانه بـ شَـعَـر ليـل الگِصيية،

أطـعـم من اليـاس ،وأطـعـم ..
ولـك و أگــمَــر من (حَبيبي)،
واگـمـَـر من النـاس ..
واگــمَــر من (حِزنهـا)،

واطـعم،
من الكـاسْ
واطرَى من النـَسيم ..

ياسة يوليدي لَحـن
كلش جنوبي،
وخاتل
بـ كاسيـتْ ،
ستيني،
قَديــم..

‏حسين السلطاني


بما إنك عظيم وتگدر لكل شي
سبحانك بعد ما بي حيل امشي
‏
ما عايش ولا لحظة
منو غيرك يرد الراح
واليخسر منو يعوضه
‏
اجيت استغفرك وأدعيك وأتوضه
واصليلك لحد ماترضى يامولاي
اذا ماترضى .. ما ارضى

نسيتك والتهيت وركزت بالناس
واحد ذبني عالثاني
منو غيرك تلكاني

لوتلتم شياطين الانس والجن
بعد مايهتز ايماني

متندم لان عفتك
هو انه من اذكرك گلبي زين يصير
يعني شلون اذا شفتك

سبحانك يرب سبحان اليوصفك
اعرفك
لو قفلت الدنيا مايفتحها بس چفك

مامرتاح
بس همزين مامرتاح
لو مرتاح ماعرفك

#جرح_سبايكر

عامر عاصي

-عراريس النهر -

يا نهر ذبني عله الجرف ناي
وبهداي جيس الروح بهداي
سولفلي أدري جروحك هواي
ودمهم حرير ويجرح الماي
...........
يا نهر ذبني عله الجرف عين
بعيونهم تقره العناوين
يا نهر حلّفتك بالحسين
من موتهم ، هم استحه الطين ؟
......
توّه الدمع والموت ، توّه
والعاش گوّه ، يموت گوّه
يا نهر شوف آدم شسوه
يمطر جثث بچفوف حوّا
......
يا نهر يا گبر النواميس
ابليس راح وخلف ابليس
والروج ظل يكنس عراريس
ونذور وشموع وفوانيس
......
يا نهر دم ودموع صاير
وچنّك بالولايات حاير
خجلان ؟ شتگل للمناير؟
الشبان بمتونك ضفاير
........
بس يا نهر طينك عماهم
وبرياگهم وذّن ظماهم
أدري النخل يشرب دماهم
وتنوح برحيّة بسماهم
.....
صار النهر حيّه وتمد ناب
تروي الشواطي بدمعة احباب
غِيّاب .. چنهم موش غياب
شو چن أديهم دگّت الباب

نام الولد ، والشوگ ما نام
والريح تعوي ومالها لجام
يا طيف يبن ثمنطعش عام
تبچي الصور وتبلل الجام
......
وينشد فضيض الماي شتشوف؟
ماي وسِعِد وعيون وچفوف
ومچتوف لاذ بإيد مچتوف
والروج مغزل يغزل زلوف
.........
شتشوف من توگف على الشط
وشمس الفجر توهه اتّمَغَط
وتسمع غراب الليل ينغط :
شيلي الضمير البالنهر غَط
.........
شيلي الولد شوفي شحلاته
عطشان والماي بلهاته
والموت شل جرحه بعباته
عريس ...... شيگولن خواته؟
.......
يا نهر روجاتك مخاديد
ناموا عليها الإيد بالإيد
حتى اليريد يصيد ، شيصيد؟
ضحكات وشفاف ومواعيد

سيد حكيم الشبري


الليل من يعزف موسيقی
الشمعة ترگصله ضواها
ترگص الحد ماتموع

اللیل کون اسمه ایتغیر لازم انسمیه
قتال الشموع

او هیه هاي.. ضحکت الفاگد عزیز
اقراها تلگاها دموع

او هیه هاي الریح من ینزع عیونه
یسافر ابلایه اتجاه

والفقیر البطنه مابیهه عطر ضحكة رغیف ...
ایصلي لجل الخبزة
مو لجل اﻹله

الجوع من یمد رگبته بدیره یترسهه کفر
والقصیده الخالیه من الخبزة
مابيها شعر

او مدري لیش الدنیا من تتنسى شاعر
باچر تخلف فقر ..!!

ناظم السماوي

"عشگ أخضر"


أريدك بالحلم خطار مر بيّه عشگ أخضر
وأتيهن نجمة بسنينك أدور طيفك الــما مر

خذانا الواهس من بعيد نزف شموعنا بشوگك
مشينا وأيد تشبج ايد ننــــــاغي الروح بطيوفك
العمر من غير حب شيفيد لمني بعصرة جفوفك

ياريحة مسج يا هيل
عذبني ونيــن الليل

شگلك وانتَ نسمة صيف شگــــــــلك يالذهب شعرك
لاجن مـــــــا تحب يا حيف تصد وتعذب بهـــــجرك
وادلل بالصبر سنتين خلص صبري الحمل صبرك

يكــحلة بجفن كل سمرة
تره الدنيا بطرگ عشرة

أجيتك من بعد غربة أجيت بليلة كمرية
هذاك اني نبع صافي يخايب دغش ما بيّه
أجيتك والعتب بالعين عتب عاشگ بحنية

واكلك هجرك شسوة
لوّن ادري فلا اهوّى

ودعت السماوة بليل وهزني الشوگ بالحسرة ..
أسافر لا صديج وياي ..
بس جدمي النگل صبره

وظليت بطرگ روحي.. واتـﭼّـه على جروحي..
ويا حيف والف يا حيف..
عبنك مو صدك صاحب..

گضت والدنيا مگضية...
هدني .. هدني ولاتعت بيّه

دفنت العشگ بالغربه.. بعد لولايتك مارد
شكبنت العشگ والضيم ..اظن عالضيم متواعد

خسارة التعب ضيعته ..شعر ما ينشره وبعته ..
ويا حيف والف يا حيف... شبگت سنينك المرّت
.. مثل شبگت البردية
..هدني ..
هدني لاتعت بيّه

محمد الدراجي


أجيتلكم ..
ضريح أستاحش أحبابه أجيتلكم
أجيتلكم حزن ممدود بشفافي
و الوذ بكل دفو مضموم  حد آخر جدايلكم
و بچيتلكم  ....... ؟
تراب إيغني بين المآي ويموت بجناسيكم
بچيتلكم نهر ، طاغي اعله جرفينه
و صعد بيد الشمس للغيم
و أيامه عرس ممحي بصرايفكم
و اجيت أشهگ صرايفكم
و اصيح بكل حزن بيه ..
أصيح احااااه .
يا بخت الـ جرح منكم

جنح مستاحش الـ نسمه واريد اغفه أبمنايركم
و امد روحي .. طفل يمكم 
و ارگص فيّ عشب للگاع
و بروحي مسيح .. و غار مصلوب أعله شرفتكم

و أگللّكم يَهل ماشين  هذا آنه
اذبحوني  عذر للـ ليل فدوة الشرف مريمكم
و اتانيكم ..
و اجس بيبان عافيتي ..
و نبض گلبي لوگف چذاب
لا غثكم و لاملّكم
اجس كلشي ..و اطيح أشموع ..
و اتغنه شمع منحور  يم ديرة صوانيكم
وستايركم
لهسه احلامي طيرة خوف مكتوله بستايركم

بتجاعيدي و حزن روحي  اندفن حبكم
و صهل بيه حنين الليل ..
وأمرآية سواديني . تغث روحي ابملامحكم
و أنه اليندل طريق الله بضفايركم
و أغيرلكم ..
و اجيكم منتچي أعله الـ آآخ
و أرد دم ابمناجلكم ...
و ولا ملكم ..

علي الشبّاني
" الحرف ﭼـتّال "

أكتبني ضوة بكل حايط اظلم ..
فيّضني نهر كل روح يغسلها، العطش من يشتهيك ألتم ..
حمامة لكل مدينة ينام بيها الليل غبشة،
ويگعد الناس الصبح ميتين ..
يمتى يگوم بيَّ الطين .. شجرة
ويصعد بروحي الحنين .. گمرة
تفيض بيَّ الروح گمرة ..
وتلعب بروحي الشمس مهرة ..
مهرة وقصيدة،
توگع بروحي ورگ سِدرة وفرات ..
أخضّر وأشتعل وأردود مرّات ..
مرّات الزمن يشتلنّي بيرغ ضيم بالشدّات ..
أفوتن نار بالشدّات ..
أردّن لابس ثياب الرماد ..
أردّن والحزن ليغاد ..
سواجي وناس تعبانة السجج بيها ..
وضمير يجيس ممشى الشمس تالي الليل ..
ويغسّل حزن عمره بسواجيها ..
وتظل تحوم، طيرة ماي ..روحي العطش ماذيها
اموتن غبشة ثوبي تراب ..
عشب روحي صبر عالباب ..
أموتن سكتة گلبي كتاب ..
واليقرا الگلب يعمى،
وأظل بين الگلوب الميتة كلمة خوف ..
روح الشِعر كلمة خوف ..
تاخذني عداوة بكل گلب ممحل،
وأطگ بيد السوالف شوف
وأوگفلك سما وواهس يگلك موت وآني أصهل ..
وأظل گامة بگلب ممحل ..
وأظل گامة بسفرها الگاع تتعب ..
والشمس بيها عمر تتعب ..
يظل فيّها شبر، يحچي الندة ويَّ الرمل والعاگول،
لو يحچي الحزن گلبي!!
كل ما يرتوي الخوف الـ بروحي يطول!
يا هلبت يجي ويكتبني مهر أخضر،
وأفتح بالهوى البيبان عالگمرة، نهر أسمر
يفتح بالمسامات الينابيع البعيدة والقصيدة،
بلبل بروحي يغني الماي ..
والحرية، والگاع الجديدة ..
إكتبني الدهر يمحي الصدگ ويعاند النيات
نبعت بعين شمسك ماي بارد .. يثگل بدمي الفرات
يركض بروحي الفرات الزين دهلة ..
يصعد بروحي الحچي الواگف ضمير ..
وأنتَ ذاك الماي كل دنياك سهلة ..
وآني بيك ينام گلبي ويگعد بحومة عذابه ..
يمتى أشوفك فارس بتالي الدهر يجدح مهابه ..
يمتى أشوفك ﭼـفك يجيب الصبح للبيت ..
وينام الصبح ويَّ الزغار!
يكبر بحلم الزغار ..
دنيا وولايات،
يگعد بدرب المدارس عافية وورد الصبح ..
يمتى أشوفك!،
مهرك يدگ الحوافر عالهوى رايات،
واگلك هاك روحي وروح ..
يا ريتك تخلصني الحزن مثل الخبز .. مثل القميص
الشمس مثل الناس من يثگل حزنها بروحي، وأسكت هَمْ..
يا ريتك تعتني من السما للماي ..
وأنبت طير فوگ الدم ..
تاخذني جنح مضوي، السفر واهس ..
واطير بكل سما .. بكل حايط أظلم،
مكتوب العمر من يشتعل بالناس حيرة ..وهَم،
منارة هناك تلهث للنبوة سيوف
من تلهث منارة هناك، أرد للروح أفيّضها
العطش من يشتهيك ألتم ..
وأظل ألتم ..وأظل ألتم ..
وأرد نقطة بحرف ﭼـتّال ..

عقيل العرد

هنا ضريح
ترابه بي دم حار ..
بي منحر ذبيح

هنا صحن
بي منبر
ولاقطة صوت

الصوت من المفترض كلش صريح

بين راعي الصحن عن صوته مسافة

وبالمسافة البين نحره وصوت صحنه
صوته جان اول جريح

الصوت يرعب
لازم يكسر شبابيج القصور
الصوت يجدح نار
يرهب
يصرخ وما يستريح

الصوت يعصف
يقلع جذور الطغاة
الصوت بالتاريخ ريح

الصوت كون يشرف وجوه المناير
والمنارة بصوتها تعلى وتطيح

وبين هذا المنحر المذبوح صوته من الوريد
وبين ذيج اللاقطة تشويش صار

الصوت صار يفشل وكلش قبيح

الصوت ما يشبه المنحر صار وسفه
وانه اخاف المنحر من عيون ناس اهله يطيح

والله حتى حسين اذا يوكف بصحنه
ينزلونه
ويكطعون البث عليه

و ياخذون اللاقطة من ايده النظيفة
ويذبحونه اردود اذا قرر يصيح

حسين التوبي

مثل الشمع تبدي التضحية من الراس
ومو بس الذهب لمعت أعذار الناس
الصرايف والقصور اتوحّدت يحسين
ولسان اللهب ما خلّة شي ينجاس
وفرغنا الخيم وأبتدت كلها تطيح
بس ما ترضى توگع خيمة العباس
ما ندري اعلى ياهو ادموعنا من اتطيح
الحوافر عالنهر وصدورنا التنداس
شيمسح عارهم دمعة اعلى خد مـﭼـتوف
العز ينصنع والذل عرج دسّاس
الخبز أسهل عذر للـ نوى يريد يخون
المبادئ صعبة هالـ تتخلى عنها الناس
من يرتفع صوت الخرخشة الـ بالجيب
تظل حتى المخالب ناعمة وتنباس
وتظل حتى الفتاوي اتمكيج الخذلان
وكلشي اليسد جوعك مو ذنب ينقاس
من تزهى للوادم مغريات السوگ
الأمان أبعد درب للياخذه الوهواس
ما يتغلف بسد الأخلاق الخوف
لو تحمي النخل لو لا تذم الفاس
خوف الوادم اليحرس قصور ابليس
لذلك ما تلحگ تحلم الحرّاس
بس هو المجد سنّارة التاريخ
ما تصنع الصدفة من المواقف راس

بهاء سوادي

كالولي عليك تمـوت
لو مَـرّه الوَرد ،
ينذبـح بـ أسـم الرِيـح
وكالو سَلسَبيلك ينـزل مگمّر '
اذا فَـيّ الظَلام يطيح ،

گالوا بـ الاغـاني ؟
تعيـش ..
گالوا بـ النَعـاوي ؟
تمـوت ..
وگالـوا "ماخلقت الشَـجر للتابوت"
وگالـوا وَجهـك الفُضّـي،
ابـوسه بـ شفّـة بنيـه
خذت منك طعم للتوت.

گالـوا..! "صِـدگت گلـبي "
عليمن هالذَبـح ؟
والتِيـه ؟
والحـِرمان؟
وارگـاب الزَغـار
تطيـرلَك تَسبـيح؟
گالـولي..! "رِجَـف گلـبي "
صَعـد رُمـح العَتب بـ الريح ،
"صَعـد گلبي رُمـح بـ الريح "
وصحتلك فـوگ كـل محراب،
حرگنا "كلوبنا بـ تيزاب يا الله "
بَعـد شنصـيح؟

موفق محمد


ميّت أنا ..
ميّت أنا ولا خط يجي عن موتك ..
سودة وحشتك يـولدي ..
حرموك من تابوتك ..
مشـﭼـولة (مشكولة) ذمته المرمرك
لا تبري ذمته مروتك ..
ما ناح طير اعلى الشجر ..
إلا اعلى نغمة صوتك ..
حيل أدلهلمت يا نبع گلبي وگمرنا أمدمه ..
بموس الخناجر تاكل بلحمك ..تفطّر النجمة
عميّة وتدور رويحتي ..
بـ يا بير ادوّر يُمه ..؟!
وما اظن بعد تطلع شمس
وتزول هاي الغمة ..
وفرگاك فَت مرارتي ..
وضاگت عليّة الچلمة
لا گبر وأتهدل اله ..
وألهم اترابه واسأله ..
الگلب صاير كربلا ..ولا خط يجي عن موتك ..
يتنفس بشفته الورد والنجم غافي برمشه
هد حيلي موتك يا حلم ..يبس الطير بعشه
أن ﭼـان متت بلا گبر ..!
أنا گبر يتمشى ..
بلچن تفز رويحتك يوم وتطير الوحشة
والگاك أقفلك بالرحم ..
وأنطيهم أذن الطرشة ..
يا حلم ما رد لـهله ..
وصدره رصاص ومنقلة ..
والگلب صاير كربلا ..
ولا خط يجي عن موتك ..
ما تخلص گبور البلد ..
دفان ينخى بدفان ..
ومشلّه شليله الشفل ..
ويطمها عدلة الشبّان ..
يا ريت ما جبتك ..ولا
هلهلت يمه النسوان ..
يصل عظمك بسن الشفل ..
وتاكل بعيني الغربان ..
وأوگع وأتل رويحتي
واتچبح اعلى البيبان
ما رد حلم عايف هله ..
ولا طير يعرف واسأله ..
والگلب صاير كربلا
ولا خط يجي عن موتك

ايما صباح

سهر والشوف شيّع للنجم عمره
حلم والما يجي بگد ليلنا نعبره
الزعل ما يكبر حچاياتنا وما يزغر بنظرة ..
الورد ﭼـي ظال للعشاگ الله يطوّل بعطره
يگايدني لشمعتك ليل .. يالـ من عندي بيّه أدرى ..
ضم عن حايطك عيني ..
الصور بسمار للذكرى ..
أجيس النار بظنوني من أشوفن صورتي تفوتك ..
تصد وأغتاض عالنسمة .. الهوى من أشتاگلك صوتك ..
تبرد حسرتي بشمسين ..من يعيل طاريّك ..
والگى الما انزاح .. انزاح ..
بس يجبل عليّ فيّك ..
وأصيحك غاد من حزنك ..
أنشدك بيك شخباري ..
أبدل الشيب بالمو شيب ..
وأرجع غانمة لداري ..
أشم بعطري قمصانك ..
وألم ﭼـفك من اسواري..
واگول الشبگة دون فراگ مذمومة ..
وأنت شما ترد وتروح حضني يوالمك دومه ..
أعرفك من وره النسيان تذكرني ..
وادريبك تنگط ليل .. كل ما طيف يعصرني ..
لاﭼـن ما تهيد العين لو ما بيدها تحوفك ..
لن الدنيا أنت ودمعي وﭼـفوفك ..
وحلم ينلاح من ينگال ..
أصد لـمراية أحلامي ..
وأشوفك بـ الابعاد اوصال ..
أجيسك وأنتَ مو يمي ..
البعد مو بالدرب بالبال ..

لميعة عباس عمارة


اشتاكلك يانهر يالبردك الجنة
صفصاف شعري هدل
وبمايك اتحنه
لزني عله صدرك هله ..
وسكته
وهله ..وونه
وطول .. مدام الحلم ..ماينشبع منه
................

عمرك ابد يا ابد متباهي بشيله
وعمري شكثر جم شهر ..
جم يوم ..
جم ليلة
موجه عله صدرك نبض نسمة هوه تشيله
بلياك ياضيعتي والعمر ياويله
.................
التغريب كله تعب دير البلم حدار
وخلي الليالي تمر
نكته
وسمر
واشعار
تشرب عيوني كمر بس الخدود تغار
من يسكفون السمج وتلالي بيك النار
.................
خابط وصافي وسخي ومابيك كل عيوب
تتباهى ..
حكه يتباهى الها كثر محبوب
من منبعك للمصب فَيت عليك كلوب
ياما رويت الغزل وياما غسلت ذنوب ..
................

ورديتلك يانهر يالبردك الجنة
صفصاف شعري هدل
وبمايك اتحنه .

حسين التوبي

عصفت والشمع مگبل بوجه الريح
ولهب يغرف عناد النهر والخدّر
خذوا سم للخليفة بدون ما يدرون
وهاي أول حرب ما بيها كر وفر
خبز ما عشت غربة بكل مجان اتمون
بس جانت التوجع غربة المنبر
النصر مو لحظة الكلها متوقعة تفوز
النصر من تطب والكل حاسبك تخسر
تندل وين ينحط منجل الـﭼـوّاي
وگلت غدر الأقلام أشرس من الخنجر
وگلت لون الخصم ما يقبل التلوين
ومثل وضح الشرف هم واضح المنكر
رفضك يكشف أعذار اليدوّر أعذار
المسح ﭼـتف الحكومة بحجة المضطر
گلت " لا " بوكت بس الـ "نعم " تحميك
وأصدگت بوكت بس الـﭼـذب معبر
ميّت والحسين أطول الموجودين
برمح ولا برمح فيّ الثبت يكبر
الموت بخطبتك حريّة للينهان
وتلاشت والزلم ما لحگت تگصر
سكتة وبالقصر يطلع صدى من الريش
وحطب ما ينسمع اله صياح من يسعر
كلت بطش السيوف بسطوة الإيمان
وجابهت الرماد بشفرة الكوثر
وعِلت وصلت علي وسبابة الزهراء
ونهظت بالعقايد همّة المنبر
أول مرة تطّي مكشف ويم ناس
من شلت النصر وأطيته للمنحر

بشير المرشدي

ماكو واحد ينتظرني ..
غير صورة مدثرة برفّي القديم
وورقة متهزل جسمها ..
كاتبتها ﭼـفوف وادم ..جانت لعيني وطن ..
عايش بدنيا غريب ..
لا شوارع تشتهيني ..
ولا گهاوي .. ولا مسناية العليها اجدامي تغفى ..
امشرد بديرة هلي ..
عمري خلصته اباوع
هلبت يمرني نبي ..
هلبت يگاودني بيده ..
وأصعد بليلي گمر
اتغربيت وخلوا بداري نزل
والطلاليگ الگبل تفتحلي ضيها
جتفوها بسنسلة ورزّة وقفل
وبهتت ارسومي صفيت بلايا لون
وكاسريت ايام عمري
ووضاعن بشهگة نفس
وصارت الضحكة حرام
وصارت الدمعة حلال
وانصلبت بنص سكتتي
طير مكسور الجنح ..
لا سما ظلّت تودني ..
ولا غصن أشرلي بيده ..
وأعزف بمتنه لحن ..
عود مگطوع الوتر بـ ﭼـفوف اعمى
امناطر ابنادم فطن ..
يخيط اهموم السنين
ويترس الشارع غنا ..

شاكر الخباز

هلبت بليلة حچيتي لشهريار
حچاية العافت رجلها ..
ﭼـانت بنية ولا كل البنات ..
وحلوة مثلچ شهرزاد ..
چانت وچان الوكت دنّة بحجلها
چانت بكل بيت من كل المحلّة
حچاية النسوان كلها ..
ها حلاها، ها وسع عين العليها
والحلگ، قربان من سوة حلگها
حلگ حمرية شواطي ..
والشعر ظلمة شتا ..
وليل الشتا إعله الگذلة ساطي
والصدر مرمر، ولا قصر الخليفة المنّه حاوي
ولا حوَّة من الشفة حاوي ..
چانن يغارن لوَن سمعن زلمهن
ردّدوا طاري سعاد ..
يا قهر لو وحدة منهن لچحت تحاچي رجلها
چانت أعذب شهرزاد ..
جانت أعذب من ليالي الصيف وأطرة ..
وچانت أترف من حريم الوالي والسلطان وأمره
وچانت و چان الوكت .. دنة بحجلها ..
فاض نبع الشوگ عدها وغرگاها ..
وضلّت تفوج بحلم والمد طواها ..
وشلهت بشاطي أملها بلوح زفة ..
ﭼـان الوليد بكبرها .. شوية أكبر ..
ﭼـان جيران العمر والجورة تكبر ..
وهوَ يكبر وهيَ تكبر
طفّوا بدرب الوكت عشرين شمعة ..
فاض نبع الشوگ عدهم صدفة بالحب ..
وغرگوا بناگوط دمعة ..
دافوا بليل الوصل حفنة سوالف،
باعوا الدنيا وشروها وباعوا وردوا شروا ..
وتمازحوا، وتزاعلوا، وتصالحوا،
وترادفوا مهرة نبي سليمان.
وتعدّوا حچي وشر المضايف
..
..

اوس النواب

يا عصاري اهلي
ودفو الحوش
وسطحنا

اليشبگ خدود الكمر ويبات يمنه

انت وينك ؟
دوريتك

بالشناشيل العتيگه ومالكيتك
تالي منك ايسيت

ورجعت من الحلم
مكسور طيف

جفي كايد محبسك وبلايه شذرة
جي لان انت شذرتي

جنت اظن جتوفك يتجن كُبرتي
جنت اظن تبقالي دوم

تالي رحت بلايه نشده
حتى مالحكت اودعك

حتى ما لحكت اكلك
من تسافر لاتسافر

سافر بروحي قصيدة
وطير بيه
وصْفك جنيحات گلبك

حطحط اعلى جتافي
حنية جهال

آنه لو موجود اموت وماتروح
وكبل ماتندار اصيحن الك تعال

بس مشيت
وانه بالموت انتجيت
بس مشيت

مصطفى الخزاعي

هذاك أنتَ المشى بـ لونه سمار اوداع ..
وهذاك أنت العزيز الماي وجهه الگاع ..
وهذاك أنت عشت نبتة انقرت عاگول
ما ﭼـن منشتل نعناع ..
وكلمن سافر بـ نيته ..
واليعبر شواطي الليل ..ياخذله وجه وي طبگة عيونه يفز اشراع ..
وجه ما غِيرت ارسومه نوايا الگاع ..
وجهك منشتل بيه شتل گمرة ..
لمض عالمنجل الينطر شتا سواليفنا الخضرة ..
يا بيدر ضحك عذري تبده بشفة السمرة
يالحزنك عمر نخلة عراقية عشت فيّ ومتت جمرة ..
يواهس مستحة عيوني شربني النوم
عطش للما حضى بگدره ..
عطش يالمستحة عيونك مري احديثات
قريت الجايب سنيني ..
شما طاريك يذبل ..اشوفه يورّد بعيني ..
وشما تبرد اشفافي اعلى فيّ ضحكة ..
افز واذكر دفو ونيني ..
وأمطرلك بگايا الناس البروحي ..
عسى تجيبك بواﭼـينا ..
وعسى يلالي التعب نجمة بمحاﭼـينا ..
وتگول الناس ماله..
شما عبر گيظه تخضر ساجية بعينه ..
ما يدرون ..
ما يدرون من جان العمر لـچمة توضينا بغناوينا ..
ولا يدرون من جان الزعل نجمة ..
تسامرنا بروازينه ..
جانت تزغر الگمرة بسواجينا ..
وﭼـانت تندهّ الغبشة مساحينا ..
وﭼـان الزعل من يجزي ..
نعرف لذة بواﭼـينا ..
وگلتلي الموت مهرة .. اتفرزن الخيّال لو تاهت نياشينه ..
وگلتلي نعيش والدنيا قصيدة غيم لليغفو الصحو بعينه ..
وگلتلي الما يحب الناس بس الريح
والعاگول ينحر صحرة سنينه ..

عباس الغالبي


حسافة تبيع عمرك سكتة بشموعك ..
يطيح الليل من حيلك
وحسافة تشيل حمل الرازقي ومايه
وتدور گمبرة تشيلك ..
يـ تيهة ديرم بـ حِنّة ..
تخيّر سـچة جروحك ..
حكومات الدمع مو الا تبچيلك
وتخيّل دنيتك نثية وبچت بشليلك ادخيلك ..
وخذت طينك ..
سواتر بللت مايك .. لوَن محرابك السنبل يمل حچایته بدينك ..
وگالتلك .. حوافر خيل المرايا ..
يسبّگ شوفك بكيفه،
بعد يا جفن يحلالك لوَنك طايح بعينك
ولا تندم، الشمس مو ستر للظلمة ..
بس الصبح فيّ بيوت ..
يطيح من العذاب إنسان .. ويسولف فرح للموت..
جا المن تصير إنسان وأنتَ من الزغر للموت ..
ﭼـفك مو الك .. للخصر، للتابوت ..
جدمك مو الك .. للگاع .. لـ اغنية غيابك لوَن سچة تفوت ..
عينك مو الك .. لمراية الغيمة .. سكتة وباوعت للصوت ..
شِفتك مو الك .. للندم، للشباچ، للهفة التعتّك من يصيحك توت ..
كلّك مو الك يا تيهة الديرم ..
وبعدك ما شلت عينك ..
عثر أسمك بجفنك من صحت روحك ..
وگوة من الصدى الما لايحك شلتك ..
عليمن تكتب سنينك ..
العمر ضحكة العمر يتوشّل بوكته ..
وها يمته؟ ..
الحَصد ياخذ مكانه بذلة المنجل ..
چم عثرة الـحچت للگاع عنك ما يمر صندل
چم احبيبة سوّتلك گصيبتها ليالي شموع ..
وأنت اتيّه من تندل ..
چم أغنية گالتلك .. تعال وبيعني ثياب اعلى طاريهم ..
ولا تفرش اصابيعك ..حلال برگبة المغزل ..
يخايب ما تهت تتمرجح بضيّك ..
مالك نيّة تتوضى بخمر غالي ..
صلاتك ما جزت فيّك ..
يخايب ورّد بتعبك ..
ولا سوگ الهِداك التشتري جروحك ..
تشتل "ها" وتخضر "صفنتك" رايجة بروحك ..
تحصد تحط گلبك درب للشوگ مو للشوگ
مامش درب ما مسحوگ ..
وما دام الصدگ مبيوگ ..
تاليته الفرح مبيوگ ..

لو سألك محمد عبد الوهاب ..
كل ده كان ليه؟؟!

شنو راح تجاوبه بـ بيت شعر؟