حامد الشمري


اهجوني واكتبوشماعلي تردون

لتخافون مايهجيكم الساني

خيال وموهبه منطيني رب الكون

حتى اهجي واسب القاصي والداني

انه فلاح اصلي ومفرداتي ابخير

الكطهن لكط من طيب بستاني

الورده السنبله والطير والقداح

ذني من المهد يسرن بشرياني

مامتوازي اجيبن مفردات اتغيض

جبت عمري النوارس تغفه بحضاني

الانانيه بنسب موجوده عندالناس

عندك انته عدهم حتى عندي اني

شسويله اليحب بس روحه هم معذور

ماعنده مجال ايحب شخص ثاني

ترى المبدع الحاقد لو وصل لناس

سمعة گلبه تسعر تاكل اعماله

شكد شاعر يزيد تكول عنه الناس

قسوة گلبه ماخلتني اقراله

هاشم الخزاعي

من كفروا برب الشوگ
لبست عيونك وصليت
ومن هزوا كواريكي
شبگت اول حضن حضنك
وگعدت بفيّك اسنيني

تـجي وي امي طواريك
واسكت من تناغيني

وانه ادريك
اي ادريك وجهك مو صدگ واحچايتك تنعاب

عشت عمري هوه وگضيت عمرك باب.

يبو خلگ الشحيح شما تهل سرداب.
انـه ميت عطش
وادريك صم تراب

امـّنت الفراش الذمة العاگول
من شفت الورد چذاب

وامناغاك ترتيلة بحـلگ سكران لا بيها خشوع ولا عليها اعتاب

لطيف العامري


مدري ليش ..
انتَ انتظارك يختلف !
لا .. مدري ليش ..انت كِلّك تختلف ؟
روحي صبّيرة ويمر طولك ندة
چا شرد أصير ..

شيثمر العاگول من تمطر حرير ؟؟
وآنه بس لـ حزن طيفك ابقى اسير
وانتظارك يجري بيّه وگاعي صبخة..
ما يخضّر بيّه غير الشيب لون اسود حزين

ومدري ليش !
الليله حتى اللون الأبيض ينذكر كلش حزين
مر مثل ليلة رحيلك..هاكثر بيها سواد
چنها شعري .. الطعمه اسود
سنِّيني بلا لون مرّن

وانتظارك طيف .. لو بس طيف تعبر
والله حتى الشوك اسويه ياسمين
والله حتى غيومي هاي العاگر الماترضى تمطر
چنت امطّرها عطر

يالــتعبتني
الگاع من ينشف ثديها تدر ملح
وانت لو نشفت عيونك من دمعها
يخضّر الصبير بشفاف الجرح
وآنه كل عمري جرح نشفت شفافه

الصبخه گاع ..يغني فوگ جروحها الفلاح آآآآه
الليل كل ماتثگل مرورة ظلامه
تذوب بشفاف الصبح
وليلي طال وصلت مرورة ظلامه
المشتهاك العازتك..
مابيه اغني ..

ومدري شلون !؟
امد شوفي على گد الحيل البعيني وماالگاك
وردّن للحلم مجبور
يالضاعن چفوفي من الدوارة عليك
يالمابيك شي الـ بهالناس حتى الگيك ..
يالوحدك بروحي تدور
يبرد نبض روحي وانت بيّ تفور
وما الگاک
ما الگاك
وردّّن للحلم مجبور

عقيل العرد
........

اغتيال وكلشي جاهز
والسما عدها علم

وگف جيش من الجهل
ضد مدينة من العلم

گبل ليلة من الجرح بالكوفة خوف
والشوارع نايمه وشافت حلم

من السما لمسجد الكوفه
يثعول الدخان مرة
ومرة حايط ينثلم

ومر شريط الدنيا بعيون الامام
كام يتمشى الفجر بالذكريات

يبوس ذو الفقار
ويعلگه اعله صبره

ويرجع لبِشت النبي
يحضنه و يشم

مبينه نظرات الوداع بعين حيدر
ويلمح وجوه اليتامى ويبتسم

من زمان الصحرة تستاهل عطشها
ومو مكانك ياعلي تبديت بيها
هاي ناس تقدس الما يفتهم

وقبل اذان الفجر
نعسان الضمير

و توه فز جفن البلابل
من الندى تنَشَف جنحها
و اعله باب الله تطير

الشوارع باقي بيها الليل ما يقبل يروح
والوضع بالكوفة من يومه خطير

عرضة صارت بس علي مواعد يتيم
وزينب مسويه سحور
وحيدر أباله فقير

هنا طلع للمسجد يصلي الامير

تلمع سيوف الخوارج
بس علي بلايه حماية
لا يصلي من ورى الجامة وي ربعه
ومثل هاي الناس ما يقبل يصير

تحت كل سجادة سيف
وسيف الــ يصلون ما يحتاج اجازة
هنا بداية جرح الاسلام الجبير

عبد الوهاب الحمداني

( الليلة گدِر )

ودّيتلچ وي الگمر ديرة هلا

او رفّة خواچي أو مستحه او ريحة نثايا مهلهلة

او ردتچ تجين إبضحكتي أو ما صحلي طارش للنذر

أو ردت أشتري من الله الهوى وأشرب روازين العمر


يمرايتي الليلة گدِر ...

حلّيتلچ ميّة ظفيرة او لا شفت خصلة فجر

أو صلّيتلچ ميّة نهد لمّن غفه إبجفي الخِصر

أو غنيتلچ كلّ القصايد و الرسايل والمواويل أو سوالفنا الشِعر و المو شِعر


يمرايتي الليلة گدِر

او باچر يمر بينه العطش و إنفرفح طويرة عتب ما أظن يكفّينا صبر

و آنه إعله باب حجايتچ بلكت حرف يترس قصايدنا خمر

بلكت تمر نسمة صدگ تفتحلي شباچ الجدايل وأنتظر

يمرايتي الليلة گدِر

و آنه نبي أو متعوووب من ليل الوِتر

صلّيني بأحضان الشَفع خل أنتچي

تدرين المرايات تطفى إبلا وجه يمسح تجاعيد البچي

أو تدرين الولايات تغفه إبلايه شاعر يعلگ شموع الحچي

ناظم السماوي

الجوري الاحمر

لاتركض ..
تره الدنيه مسافتهه..
ابشبختك بالركض ضيكه !!
لاتركض .. كبلك ناس ركضوا..
والبشر الوان ..

راح السيف منه وضيع الدركه
وناس انطه العزيزه ..ونزف حد الموت ..
ومارخص الروح .. لأخر الشهكه
وناس ..نريد .. تقفل ..
باب الله اعليك ..
الهوه لوبيده صدّك ..
عنك ايخنگة
وناس ..اوجزهه .. رخصت ..
بأول ااسوم !!
وناس ..اويه الشرف
لم العُله ترگة

وناس اتخف جدم ..
وي صفكة الماشين ..!!
اعله حس الطبل يركض ..
لو على الصفكه

طبع بالناس .. هاذه يختلف عن ذاك ..
ذاك ارخيص ..
وهذه بالذهب مثله فلا تلكه !!
وأبو ..جف الكريم .. وصخي ..
ايعز الناس ..
مثل النخل ينطي ..!!
وّعبرته اتغركه

وابو .. وجه البخيل ..
الموت ماينطيه ..!!
خاف الجفن يشرد منه ويلحكه
النخل ..!
النخل يفرح إذا عثكه ..
هدل للكاع ..
شله ابطوله النخل ..
لوماهدل عثكه ..!!

الشجر وكت الخريف ..
ايصير عاري الثوب
يبجي ..اعله الربيع ..
ايستره بالوركه
اذن .. عّود ضميرك .. لو ..
ردت ترتاح ..!!
إلأ لك .. ماينوخذ منك ..مهما يطول ..
اليكلك غلط لتصدكه ..!!

الحسين ..
اشلون خله الناس ..
تبجي اعليه ..؟
إلى يوم القيامه .. وساعة الملكه
لأن .. اسمه الحسين
وابن داحي الباب ..
ترك دم الشهاده .. يطالب بحكه !!
خله السيف يبجي ..
اعله النحر لليوم ..!!
وخله .. السمه .ـ سبعه ـ
نزلت اتشبكه !!
وثيقة ..
تضحيات وشرف صبر احسين !!
إقره .. وكلب التاريخ ..!!
فِنك رُبعه لو تلكه ..!!
الوثيقه ..اموقعه .. بأصبع
إله الكون ..
وبّباب الشفاعه اهناك متعلكه
ولاتنهظم ..
لاتنهظم .. لوشفت الاسد جوعان
والواوي .. يطيح .. اللحم ..
من حلكه ..!!
ولاتنهظم .. لوشفت ..
المثقف .. عالرصيف ايبيع ..؟
يبيع آخر كتاب .. ودمعته اتلحكه
لأن ..
طبع المثقف .. دفتر امن اشواك ..!!
موقف ..!!
والغبي مايكدر ايحركه
جان ..!! اعله الورد ..
اجمل فراش ايطير ..!!
وهسه .. اعله الورد ..
تتشايم "البگة "
صدكوني .. الورد .. من عطره موزعلان ..
لان ..
اصل الورد .. يشتم ..
عطر حلكه !!
لان .. طبع الورد .. بخدوده..
رابي الكون ..
ويكره عل اليدوسه ..!!
ابجدمه ويسحگه !
الورد ..
ألوانه ..لون ..
ولون يسحر لون .. !!
بس .. الجوري الاحمر ..
مانمل عشگه

مريم القيسي

صيهودك ذبح شوگي
لاتعطش تعال اشرب بگايه جروف
تعبها الرگد روحي ولابلام بيها يحوف

شيعني الهوه صفصاف
خريفك خرب بوجهي ملامح شوف
(يجلمه اوف)
انه بصدري ملاذ الخوف (يجلمه اوف)

عشت شاعر بلايا جفوف
صغتلك من دمع رمشي ندى طاح اعله شباجي
يفزز كل گلب مشغوف
يبو زلوف العليهن صلت حروفي
نجم غافي ابكايه طيوف
يكون اجدامك تحن اعله ملكانه وبدربنه تروف

شوكح حلمك..! يشتلني بدرب تايه
واجيك بركضه الملهوف
واشوفاً وجهك مشرغد ضحك مرتاح
وانه لابس حزن لوني.

عبد الكريم القصاب

خمر تفاح

يوم الكاك
اديه تفوج الك واصرخ بغير صياح
واعثر بالضوه وتغمض جروحي جفن قداح

يوم الكاك ..
الكه الواهس يصفك بروحي جناح
عله صدرك كلاده تطيح شهكاتي
واكلك هسه كلبي ارتاح

مثل الريح من اتلاكي صدر اشراع
شبكه تطيح فوكه وتخدر وترتاح
ياكاروك وكماطه ترف ملتف علي سباح
هاكد نوم اضوكن بيك
نوم امبيت جفونه بخمر تفاح
جفن مخمور نومك بيه يضيع الطيف
جفن ماينفتح بصياح
نومك مآله مفتاح

ياااا هلكد حلو ياصفنة ضنوني
ياااا هلكد حلو يابوسة عيوني
يابستان وجهك هاكثر فواح
بالغربه الوجوه اشباح
يلفكيت حزني وحزني مايلاح
انه مقفول حزني وصدرك المفتاح

حبيبي ياوطن كلبي
حبيبي توه كلبي ارتاح
بس نته يابعد اهلي
يمته ياوطن ترتاح حته من صدك ارتاح

اعادة نشر

كاظم خبط -ﭼـنت احبها

جنت أحبها ..
وجانت بسحر إبتسامتها يتفطّن كل حنيني
وجانت بـ ليل الرموش تنيّم ايامي وتفرهد كل سنيني
جنت اكَضي بعطش فركَتها نهاري
ومن يجيني الليل حسبة وهم تجيني
يا حلاة عيونها شما يوجعني ..
انا اصيحن حيل يعيوني أوجعيني
ويا ملذ طيوفها يسيرن علي ليلية ويباتن بعيني
جنت احاجي زلوفها بلمسات اديّة
تعاركن على الزلف يسراي ويميني
وجانت بلمسات أديها الدافيات أتجيس صدري
تكَلي كل دكَات كَلبك تشتهيني
جانت تكَلي أخذ كَلبي ينام بحضن كَلبك
وجانت تكَلي بكثر حب العطش للماي أحبك
وأبكَى احبك
حتى لو كل يوم تـﭼـتلني وترد تحييني أحبك
جنت احبها وجانت عيوني على كل الوجوه أتحط رسمها
وأحفر بروحي يــ هلبت بالجرح مكتوب أسمها
وساعه أطير بجنح شوكَي ومايذبني الشوكَـ يمها
آه لوّن نجيّمه هيَّ
جنت أعد كل النجوم وهلبت يصادف نجمها
و آه لو غنّاوة هيَّ
جنت أضل كل عمري أغنيها وأذوبن وي نغمها
و آه لوّن اطويرة هيَّ
جنت أصير الها سما وكَاع وتطير تحط أشمها
صادگت كل العصافير بطرفهم وأعرفني
وگمت لو مريت يتناغن بـ اسمها يسمّعني
وحتى شارعهم
نشدني شوكت جا ترتاح شو كل ساعة تمر مشيك سحلني ..
گتله ياشارع انا المـﭼـتول
مو حگي من أدور اعلى الـﭼـتلني
أمس ودت ليّه اختها
تگول اخيتي الساعة بيش ووين اشوفه
تگول أخيتي وهاي اخر مرة اشوفه
وردت اگلها اعلى السبب
تالي اعرفت
لن السبب ما عندي سيارة وقصر هاي معروفة
أوالمتها ومن شفت دمعة جفنها
ضعت بين تراب دربي وحرت مدري منين أفوت
بلا حجاية ولا سلام
عيوني ذبت روحها وتبجي بسكوت
تگلي موتني اعلى ايدك مرة وحدة
احسن من افراگ بيه كلساع اموت .
تگلي باعوني اعلهى غيرك
جا بعد عمري شريده
تگلي غرگوني بذهبهم وآني اصيحن ما اريده
تگلي حدوا كل خناجرهم عليك
وذكروا أسمك گلت اريده
يا حسافه العِگل طخت وانحنت تحت الدنانير الجديدة
ويا حسافة الشيمة اليحلفون بيها للصدگ كلش بعيدة ..
سموا الما عنده تكرم مال ما عنده شرف
والشرف كل الشرف للعنده سيارة جديدة
ومادروا باليحب شايل روحه وكت الضيج بيده
وحتى لو گدروا يسجنون الجسم هذا بقصرهم ،،
تبگى ذيج رويحتي تعيش بصريفتكم سعيدة ..

ميثاق الهلالي


ذابل وعطرك يهلهل ..
مَطَّر بگلبي الربيع ورَگَّص بروحي النهار

تدري ..
من دون الورد عطرك يسولف؟
يمشي ومحمّل فوانيس ومشاعل
عطرك البارد يطرّ الظلمه نار ..

وتدري ..
كلما مدري شنهي يموت بيَّ
وياخذ اَلواني الخريف
تمر ضحكتك وي عصافير الشلب واگعد خضار

مرّة لمّيتك قصيدة من الجروف
ورهّمتلك ريشة بيضة
وريشة گلبي ونورس من الورقه طار.

ومرّة ضمّيتك حبر وي دم رگبتي

وگتلك شما تگدر اكتب
مرة وجهك
مرة نسمة
وخلصت أوراق الشرايين وعِفتها

محمّلة أطفال وسنابل
والگلب جاهل يدوّر بلكي بأغنيّة ضحكتك
يضحك اسمه...

ولالت بدفتر ضلوعي شويه گمرة
ونامت بصدري فراشة
وغرگت ويَّ انفاسي چلمة

وطلّعتها ومن قريت أوّل حرف من فضّة اسمك
لمعت اعلى شفافي نجمة

تذكر شگتلك گبل ما ننغلب
ويطش خبرنا؟
نلم حچينا ونطفي شبّاچ الوعد

ولو همّ مرّات أحبّك من تگلهم عاشگين
ويضوي چفّك من تسولف
لا تملْ سولف بعد

تدري مرّة انرسم وجهك عالمراية وگابليته
وغيّم براسي وصعد

ومرّه طشّيت الورد فوگ الرسايل والتهيت
الورد مات
وعطرك البارد گعد!

زيد السومري

من يجيك الليل وحدك
حتى جرحك يستغلك
من تگلب بالصور
عينك تفشلك
تبدي تتخيل حبيبك من يذلك

شلون يذلك ؟

تجي گاطعلك مسافة
رايد تودع عزيز
توكع تراب المحطة يغطي شكلك
تمد ايدك عل قطار وهو يمشي
وماكو واحد يلتفتلك
هيچ كسره خاطري يمعود شكلك
شاوروني بروحتك لو لقنوني
مدري شافوا گلبك اسود
عافوا الكعبة على بيتك
چبلوني
وخيطوا حزن الثمانينات ثوب ولبسوني
والعطر يخنكني عكبك
والورد ما كمت اطيقة
تدري ما يعبر الليل بلا جكارة ولا موسيقى
تدري احس الوطن مذبوح عل صدري
تدري حلقات الجنود الماتوا بكل الحروب
كلها احسن بيها مشلوعه من اصبعي
هاي امس بس اني امس ما سولفتلك
اني عگبك باب عاچر بالحرب محد يذكرة

ومشهد غيابك خرابة
وصوتي مبحوح شيصح
الشوارع كلها مسكونة
وصفير وصوت ريح
والهياكل والجماجم ملحمة
والناس ميتة
ووحدي اعثر واطيح

ولو خبر منك يجيني

الناس تعدل من جديد
ضوه يبين من بعيد
مطر ينزل
شمس تضحك
المشانق تنصب مرجوحه
لاطفال الشهيد
الورد يطلع بالجماجم لو تجيني
واقدملك اعتذاري وانكساري وكل حنيني
لو كلت هذا خطية
وياما كتلك من اديه تروح
بس مو من اديه
وياما كلتلك شوفتني جنازه امي
من ثگل وجهك عليه

صاحب الضويري


خليك طيف يرَوح المنزلي
وخليني طير يغرد بمنزلك

طول مسيري و تيهت ساحلي
وهذا انا اجيت مدولب بساحلك

جيت ولكيتك تنتظر جيتي
چنك دريت مدولب وتنتظر

وچني لگيتك مرهم العلتي
وچني لگيت الهل ليالي فجر

جاوبني دمعه تسولف بوحشتي
تدري الدمع مستاحش أمن الزغر

يامن وهب للصابرين الورد
هلبت تصح للماصبر منشده

واحد يبات اعله النده و العرد
او واحد يباهي اغيومها بمورده

او واحد ينعثل وحده بالكعد
چم نوف ضل عايش على الوَحده

تدري السحابه شما تضل تنجلي
وذاك اليخاف امن السحابه هلك

حاسبني يامن كسرت منجلي
ساعه وحصد باگي العمر منجلك

يحبيب انا لو اسولف سنه
ماضن يخلصن و السوالف عمر

خلينه هسه نسولف بحاله انا
وخلينه هلبت نسكر أمن الخمر

عفنه الحزن و اتلتلينه الغنه
وخلينه نشرب بالشفاف الحمر

يحبيب اشرب لو غفه عاذلي
بهيده لما يغفه جفن عاذلك

حته يحله بعيونك تغزلي
ولا تنهظم خاف انا اكلك ولك

خاف النواضر تذبل أمن الشمس
مرخوص اصير الناضرك منضره

اردس على اگليبي يحمله الردس
وخل گذلتك يمدلل منعثره

باجر لون فر الهوى بالعكس
وذيج النواضر باتت مخدره

امودع الله وانا ارد الهلي

وخليك طيف يروح المنزلي
وخليني طير يغرد بمنزلك

وخليك دنيا شما طوه مغزلي
بيها يرد يلتف على مغزلك

عقيل العرد


مشيت بلايه ما نيشن لعيني شراع
انا بنادم بعت مفتاحي بجفوفي
ورجعت اتوسل البيبان تفتح رزة حروفي

وحگ بيبانا الما دگها شوگ ذراع
انه وروحي دمعنا انباع
يا وسفة دمعنا انباع
مهرة انجتل فارسها بظهرها وتيهتها الگاع

عفت روحي وراي تصيح
يا مجتول
لم ارسومك من الريح
يا مجتول
يالمالك ربع وي مستحاك اتطيح

انا وحنية ضلوعي
خصر حنطة للمتانين ؟
ورغيف امي سفر خوة للمتيهين

انا ونكران ذاتي
وضحك عيني ذراع للمغتاض
وعلى المايسوى طاري نصيح ك
انا وروحي مطر نيسان
مطر
بس ما عرفنا بيا مجان نطيح

مساء الخير أصدقائنا ومتابعينا
حتى نقدم لكم أفضل محتوى شعر شعبي بالقناة .. ونتواصل وياكم بسهولة ..

سوينالكم بوت تواصل @sha3eriqbot
من خلاله اللي عنده مشاركة او قصيدة او فكرة لتطوير القناة او إقتراح .. يكتب النا ع معرف البوت .. وان شاء الله نقدم الكم محتوى يليق بيكم .. وبالشعر الشعبي العراقي 🤍

ديوان الشاعر شاكر السماوي بخط يده ..

عباس الغالبي


مايكم بيمن تلهى وصار غيمة
غيمة صار سنين عطشانة بزعلها ..
واحنه ريج طيور مسجونة بحياطين الحكومة
ما مطرتوا حتى لو نص الدرب يم المناير
جان شفناكم مطرتوا
هلبت الربح البعيدة تجيب گطرة حيف منكم ..
هلبت اطويرة غريبة اطيح يمنا امبللة بزفة عطركم
خاف مو غيمة ومشيتوا برأي غيمة
خاف مريتوا بسراديب العفه وطحتوا ونسيتوا
منين تحجون لمشيكم
خاف غيمتكم بـﭼـيكم
خاف ماخليتوا عيد يراهن شموعه بنذركم
خاف لفيتوا القطارات التضل بيها الرسايل
جوه رجلين السكارى بعلك جندي
وخاف انتم هذا الصياح البقى براس القطار
ماعرفناكم عليمن در حزنكم
مره تلبسكم صناديگ الستاير
مره تحجون الهوى بشباج خايف تنكسر جامة ونلمكم
كلها منكم ..!
صرنا نتلفت رحى ونطحن عذركم
رايجة البسمة بشفايف مشتهاكم
واحنه دمعة ليل مشدوهة بنجمكم
ردنا نتسوگ عصارينا ونجيكم
مالكيناكم سكتنا
وبگنا ثوب غروبكم من طيب خاطر
حتى تنشافون عصرية أعلى فيّ
متاني رشة ماي منكم
وردنا نختل جوة هَوية انشالت اتراب بقهركم
ثاري حتى بـ أوفكم ما حَسنا دمكم
ليش بعتونا لمع دنيا لشذركم
ليش سويتونا كسرة عين سنبل
ينتجي بضيمه أعلى سدكم
اه من اعمارنا الما منها ظنّة
وانتم بهلهولة تزهي لايگة لبيبان سنكم
فرّوا بينه هواي فرتنا السنين وعايشين
ما عبرنا الگنطرة وعفناها تستاحش مشينا
راجعين ..
للشعر، للخوف، للشم، راجعين
احنه بوسة توّة صاير
تفتر الدنيا أعلى امه وتوّة صاير.. راجعين
مايمض بينا التعب لـ اخر عشگنا ..
ونضل سولة مستحين
ونضل سولة مستحين

حسين سعد


يا حبيبي الشوگ من يِگبُل يسودن
ومن يفز براسي صوتك
تنخبص روحي ويأذيني رَطِنها
ليش من روحي تِگَصْر اثياب وَصلك
وانت چنت اگدار ظَنها
اشگد طِوَل دربك عليها
وما گلت دربك سحنها
زغرت اطيوفك ابعيني
وكبرت الدمعة ابجفنها
تدري كل غِنّاوة بعدك
يشرب بحيلي لحنها
اشگد حچيت الليلي عنك
وظلت اتلمّض نجومه
هاي عَبراته أظِنها
اشگد شكيتك للرسايل
وسال كل الحبر منها ...
هاي اظن اختنگت وطلگت حزنها ...
يمته نرجع
الدنيا احس تندسني موعد
من ينِثّ اعلي مِزَنها
يمته نرجع
یا چتل روحي وأمِنها
جرني يم سچة عذابك ابقى احبك !!!
تدري( بالثوار) انت
اشگد تضحي وما تمل
وهيه تعرف راح تبقى
مهجوِلة من حب وطنها !!!

ناصر البدري


إذكروك ، ،
وجدح حزني
وشتعل بيدر سنابل حدر صدري

وصرخ بعيوني الضباب
وباب باب تخلخلن بيبان عمري

وكون تدري ، ،
الحچي الماعابر شفافي يگودني لــ حسنك رهينه

وكون تدري ، ،
شوغة متيهين روحي
وانته خصرك چان شطـيـن ومدينه

ومـاهي هينه ، ،
اَي وحگ ثنية گذلتك مـاهي هينه

ليـلك إيچمل الخساره عناد نثيه وخلگي طيف
لا عثرله بجفن يسوه ولا حضه بجرفين عينه

انه حسبالي شكو واحد ترف گلبه فطير
انه وين ادريبك أدور ضحكتك

رافگتني ،، وغربتني
ومثل ضيعة مالت الله ضيعتني

آآآخ يافشلة قسمتي الحالها حال السفن
شحصلت من ماي البحر
طول السفر يابس گلبها

ياوليد الندى بسك
لا تخيط جرحي بحبال الشمس

الضمه تناوش أيامي ومالي بالوادم مطر
كافي انخاك اعله گطره وشامتك فزعة نهر

كافي گلبي يمشي بدروبك ذليل
بارده اثياب اليالي
وچنها حضنك دوم ماضمت دخيل

من يمرني اسمك أضيع بين چويات الشوارع
وشكو ولاية اگبل عليها أبلا هلا تتلگه جدمي

حيدر النعاس


حرز ياصوغة الدرويش
يليلو ازواگ دشداشه

يروف احديثه بالخندوز
يجف بدويه حياشه

أغن يابلبل ام بروم
يلبلابه وتحوم اعليك فراشه

يدعج يانبي الجلباب
كاشان الجمال البيك
شما يعتك
يكوم
ويلصف افراشه

اصعدك والگط المرطوب
أوغيري اتصير طواشه
حن اطوير كلبي وطار
اوعليه زرزر گنيص الشوك
ياواشه

رد انه ال اغازل بيك
الغزل بجفاك يتلاشه

انه حضني كهف مهجور
لمن فارگيته اعليك
وطوط حيل خفاشه

هجرك مثل جتف الماي
وانه احذاه
مگرم حرت بگياشه

مثل جيس التتن هالروح
طاحت بيد حشاشه