منتظر سعد


الصدفه إذا رادت تجيبك
ترس اشليلك محنه
وجيب عمري وياك اذا ناوي تمر
وچيم بطيشي القديم وصبله زيت
خاف نار الشوگ يغلبها البرود
ويهفت ابروحي الجمر
انه اجيت بلهفتي صاعود واعمى
من چهبتك لنك موشل تمر
ويثگل الدين العليك وما تسدد
حتى لو تگدر تسدد
تگدر تسدد عمر ؟
تگدر ترجعلي دمعه
تگدر ترجعلي ليل
تگدر ترجعلي من دربي شبر
چم عطش وديت بظروف الرسايل
هلبت يرد ليه ماي
والگه بسوالف مكاتيبك شمر
جان كل همي ارد اشوفك
هسه همي شلون اعبره الليل وانه بلا خمر
انت مدري بيا فكر سارح خيالك
وانه ليهسه انتظر
انه ليهسه اكفر بكل باچر يجذب عليه وما يجيبك
واكفر بكل المسافات التبعدك عن حبيبك
وتكبر بروحي الشكوك
وخوفي يكبر
خاف كلبي البارد وهل ما حواك؟
خاف گلبي مجمر من الشوگ من جسته چواك ؟
وادري مليوگ العشگ للمثل گلبي
اخ ياگلبي شخداك
واخ ياتعب الجدم والخطوه چذبه
واخ ياتعبك لذيذ شگد احبه
واگصي وياي بغرامك يا لذيذ
المثلي ميهيم بعشگ
لو ما تعذبه
دورت كل الليالي
گاطفت شباچك حجار ودمع
واشتل دروبك تواسيل وتعال
وازرع الخطوات قداح وشمع
من اصدلك من بعيد شگد جميل
ومن اضوگكً حنضل وما تنجرع
واعدتني
وموعدك دخان عابر
بس أصير وداعتك حايط واشبگه
وأنه ذاك محضر اهلي
وبيدي صم الواهليه
متناني ملگه
ويبطي جدمك وانتظر حدما تجيني
وتلگه فاتح للعذر مليون باب
وليش تأخذني اعله ليش
ومدري شمخليني انطرك يا سراب
ردلي صبري الخلص ابابك سؤال
عمي ما اريد الصبر
ردلي جواب

كاظم الرويعي 1971 م


هذا انا .. نهر عطشــان
آيا ذلة النهران .. من تعطش ..
هذا انا ..
بـ اديك ألتم ..
وبـ أديك أنطش ..
ولا گتلك كتلني الگيظ ..

يا فيّ اليسدّي عالوحش ..والگاع
يا ميّ اليروّي الشوگ .. والنعناع
يالجيتك عليّ بارح.
يالجيتك الغيري فيض ..
ولا فزن ارموشي بعتب ..
ولا شالن اشفافي غيظ
وهذا انا ..نهر عطشان ..
ولا گتلك كتلني الگيظ ..

أتمشّي النار بـ اسنيني
ومشيت اوياك ..
اتبوگ الفرح من عيني
واظل اتناك ..
وذبت بهواك ..
ولا گتلك اجروحي اتناشدك
خوفي الزعل يطفيك ..
يا مِشعل يوّج بالروح ..
ودمّي الزيت اليروّيك ..
واخاف العمر يخلّص بيك
ولا شوفك فجر .. ومحمّل ابشارات
ولا شوفك العين الوشّلت عيني ..
ولا شوفك توافيني ..

تدلل على اجروحي
اشما بحيلك حيل
تدلل واعجّن بيك نهار وليل
وخليني بـ اديك التم ..
بـ اديك انطش
بس يفلان ..
بس يفلان ..
إحذر حوبة النهران من تعطش

طارق بريسم


وسولفتلي
البارحه وگتلك قصيدة
وگتلي اشتاگ القميصك
واشتهيي تغني القصايد حتى اغفى

هيه هاي الروح تتعب
لاچن تأمن اذا صوتك جزاني
والجروح اعله الطواري تگوم تشفى

وتغفى بعيونك حمامه
تريد شجره تصوغ فيها لكل امان

وسولفتلك كل شي ما اگدر اگوله وانت صاحي
وهذا كله وردت أگلك
انه والدنيا البروحي لسه عايش وانه
ادور عن مكان

ياحبيبي شما نسافر لازم بتالي العمر نلگه الامان

ناظم السماوي

بـﭼـيتك ..
بـﭼـيتك يا قصيدة ليل..!
يهنياله البـﭼـى بـعينه
يعگدة شوڰ ما تنفل
بـﭼـيتك .. مو بـﭼـي البطران
مثل بـﭼـي الگصب ..لو حن على المنجل
بـﭼـيتك يا شبـﭻ صايود ..
حلو خيطك يفاله وأبد ما تبخل
بـﭼـيتك والدهر طشنه ..
مثل طش الغريب الما بعد يندل
بـﭼـيتك .. والمن نعاتب؟
حلاة العتب لو صار العتب مگبل!
نَعيتك .. نَعي الگوّالات
يا سرگي التفگ .. يا ﭼـيلة ما تنذل
يا دانگ سفينة نوح ..
يا زخة مطر ..
يا ﭼـف بسابع غيم يتمحـﭼـل ..
يگيظ العاشرينه اشتاك
وين اشتاك ..!
خايب سِـﭼّـة ما بلل ..
قحط زخاتك بگلبي ..
ورعيدك ما يفك مصلوب.
قحط حتى على الحالوب أتوسل ..
أفز وتستر بحوبة الباعوني ..
يجرّيد النخل ﭼـم دوب تتهدل..
تهت .. ما تاهت اجدامي ..
ومشيت بـســﭼـة العاگول
جرعت الصبر والحنظل ..
أجيتك تعب ..عشر اسنين
والدنيا على الطيبين
تتعكز ولا تخجل ...
بـﭼـيتك ..
والأسف يتخطى حد الشيب
والضيّع حبيبه .. شلون يتحمل
عذاب المستحة الـ بـالعين ما ينشال
وانه من مستحاي اعيونني تتكحل
تِحز بيَّ الظنون ..
وثوبي الك مرهون ..
وانا ثوبي ستر .. من ثوبك الأول ..

زامل سعيد فتّاح



مسامحين
بس تعالوا نشوفكم
يلي غبتوا
وبس تجينه طيوفكم

ان چان ضنيتوا الهجر منكم عذاب
ومستحين اعذاركم صارت غياب
ما دريتوا ارواحنه اعلى چفوفكم

احنه ياما للحبايب
شكثر وشگد سامحينه
لكن نحبهم بقينه

ان چان شمس الدنيا تزعل عالنهار
ولو فراشات الهوى تعوف الازهار
ان چان هذا يصير احنه نعوفكم

احنه ما مرت علينه
نحاسب الروض اعله ورده
شلون ويه المنّه بينه
ما يظل بالروح ودّه

مسامحين والگلب باقي بوداده
مسامحين ومن هواكم
هاي دنيانه سعاده

ان چان شمس الدنيا تزعل عالنهار
ولو فراشات الهوى تعوف الازهار
ان چان هاي تصير ... احنه نعوفكم

يونس الغزي

وكت ما يندل مـﭼـانه
ودنيا ما تندل حلگها
ﭼـهب مگعاد التركها
ودردمت عالـ ما شبگها
ﭼـنت ادورلهم اعذيبي وما دريت
الوادم اتبوگ الهوى من اليشهگ الها
ولا تدنگ الراس يمهم ..
مهي النخلة التنحني يسهل عثگها
روحي سعفة وحزني صاعود
وكسرها بلاية منجل .. تسمع اصياح بشرگها
بهيدة شمها .. رگبة انفاس انا روحي
وﭼـف المسودن خنگها..
ﭼـنها باون ذهب لاﭼـن
زيبگ سنينك حرگها ..
شامة شگرة اعلى الشفايف
خمشت عيون الـلحگها ..
روحي مدري لـ وين طلعت
تركض اعلى اطراف عشگي
ببابكم مسحت عرگها ..
روحي اخذ من عدها كلشي
ودوم لا تاخذ عشگها ..
جرف صبري شوكت ينشف
روحي ﭼـف مشلول درفعها وغبگها ..
عدها حوبة تحرگ اشباب المضايف
روحي لو شدّت علگها ..
وليّه لا تنگل عشرتك
روحي ما ترضى بفصل جيب الها حگها
داسها برجلين متعودة اعلى صبخة
وغيره بشفافه سحگها ..
دوم منگلها بصدرها تطرد الـﭼـيلة التجيها
وتكسر بخاطر تفگها ..
روحي اخذ من عدها كلشي
ودوم لا تاخذ عشگها
حزني يتشلبها عليها وما تمل منه
ويمل منها ويشگها ..
ﭼـف اخيّط فتگ ناسي
وﭼـف اخيّط بيه فتگها
روحي ما تعصي بيمينك
كون عندك خلگ ويناسب خلگها
هي بس هاي انا عندي
وهاك تگبلها واحگها
موش تتهاون وياها انطيها حگها
روحي اخذ من عدها كلشي
ودوم لا تاخذ عشگها ..

شاكر السماوي

اشموَع اَلغايب

أما آن للنهايات أن تبدأ ؟!

حزنان الجرف، واللوح شال اشموع محتارة
والشط ابسواده اينوح، شايل ضيم خطاره
والنور اعلى چف الماي، شاف اسرار باسراره
انشده رايه
ما يعرف يحل الغاز ، بالشط فلشت ناره
شهگ مايه
اوحچى احچايه
من يگدر يشوف الروح،
فوگ اخيال بمرايه؟
••••••••••••••••
يچل الضيف
يفتر سندباد الطيف
يسأل كل شواطي الليل:
- وين الغاب باسراره !
وينه الگال، وكت الضيم،
يخفگ سيف مختاره ؟
وينه اللي رهن بالبير ثدي امه اوهجر داره ؟
اوشتل گطرة حليب اوگال..
اجي اويه اسهيل تسياره ؟
••••••••••••••••••
اويفتر سندباد الطيف
يطش سنبل على اجروفه
لهلبت لو خطف مهره، اعلى غفله السنبل اتشوفه اوتسولف له..
الصبر نگضان،
اوتگله الساعه ملهوفه
••••••••••••••••••
اويفتر سندباد الطيف
شايل حنة الصبير
يحني الماي وجروفه
يحني اهروش متلوفه
اويحني الطير
اويظل ينطر صهيل الريح...

............................!
مامش،
لا صدىَ اولا طيف
ولا حيف اليرد الحيف
شط اخرس
جرف اخرس
شمع اخرس
اوهالة ليل دواره
- عليمن چاتذب انذور، واسبوعك خمس تيام ؟
نحروا نجمة الأحد، و الجمعة اندفن بالشام
والسنبل تدوسه الگاع، نذر للطين حباته
اويذري الريح بالحنه، اويلم الماي حسباته
•••••••••••••••••••••••
اوينام النور..
تنگض خشبة الخايب
بس ومضه اعلى خد اللوح،
تلهث فوگ جثة شمعة الغايب
تكتب عالجرف والليل:
- ياجرح السفر جل توب من ثارك
- يَلن اللي طفح ثاره، صبح تايب !

زامل سعيد فتاح

عيني مامش فوگها لغيرك مچان
ولا لساني لغير طراوكم طريت

يا فراشه
وروحي ماتنطيني اجيسنها
واخاف تغثك ايدي اشما دنيت

حتى لو وكرت فوگ ارموش عيني
يظل الك مصلوب يبگه اشما بطيت

وخاف يتعب رمش عيني
وخاف دمعي يهل
وتتوهم بچيت

ويا متاع الروح
ما والمني غيرك والك بس اتولميت
بالحنين وبالمحاچي الحلوه
وبطوک الموده اتخرميت
عمري ماضگت الموده

وعشت وي شوچ الشفلّح عوسجيت
وروحي توها أمية الحنيه بيك
عروگها اتطش

وياصريمة ورطّبت چنها ورميت
خاف سوم يزود سومي
وداعتك
مازود ولسومك رضيت

صادق الصافي


مخلبص غزل روحي بمغزله تخلبص
واليغزل ثمل
ومسودن
ويرعص
مدافر للصبح وياه
ولعد شمس العصر
شبگات وإتحرمص

بلچن ينعدل ويطيب
وبلجن بالصدف يچنص

اجاني مكطع الغزلات
والمغزل جديد
وكاسره من النص

جثيرة الفرهدت شبعت
وانا بلگمة حلال وكال بيه يغص

يظل گلبي گلب سمچة
يغريه الطعم ويكظه غفله الشص

جودت التميمي


أشكد صبرنا أعلى الكّناطر ... ؟؟
وأنتَ لا هزك دمعنا .. ولا نفع وياك خاطر

لا خطف وجهك علينه
او لاسماك أعلى العطش والديم ماطر

والله لو أعرف الك موسم حصاد
وما تذر الفشل بعيون اليناطر

جنت أضحي بكل عزيز
وجنت بالغالي وبگاي الروح اخاطر ...

تعبتني
زامطت دكَيت صدرك واعدتني
و خالفت من دون حلي
وبين الحديثات كلهن فشلتني
وتالي لنك ..
بس بالمزامط ودكَ الصدر شاطر
يا حسافة .. يا حسافة أعلى الليالي
العاشرت بيها الكَناطر

أو لا ردت منك أو لا مراية
لا مشط .. لا مكحلة
أو لا ردت صوغة من الولاية

ردت أشوفك ... ردت أكَلك ..
لشوكت عمري يضل واعيوني سبايه .. ؟؟
وردت اكّلك شنهي نيتك .. ؟؟

حرمت أترف اسنيني أيصير تحرمني البكَايه ؟؟

أهواي نشدني الحبايب
يمته فوك الدار تتعلك الرايه .. ؟؟
صدك يمته ؟؟
يمته يا الذبيتي ابكتر الدرب ذبة النوايه
يمته فوك الدار تتعلك الرايه ؟؟
ينشدني .. واضحك

وحتى الضحك مكسور خاطر
يا حسافه .. يا حسافه
أعلى الدموع الفيضت بيها الكّناطر
وهم بعدني .. هم بعدني
أبذاك شوكّي البيك شدني

وللكّناطر
ضوه أطيوفك يا طويل العمر ردني
حكَي .. لا تغتاض مني ..
وانه احس ضحكة الشامت
خنجر أبكّلبي وضهدني ... وأدري بيك

أدري بيك
ما اودك ... تودني

وأنه غاد اعلى الكّناطر
يالمشيت أتجيب لسنين الحزن
جبر الخواطر

أمير ال جدوع


و متانين ..
شتتّنا الصبر عالگاع
تسحگنا الليالي بغيظ
وبدوس الجدم يلتم شتات الطين
ومتانين .
تانينه خلگ فحطان يلهث
وبحِمادة وشوگكم تموز
وطوارشكم ..
سواجي اطيوف مرننا بحضنهن كيظ
رادن من دمعنه احروز
نفحط.. والكوار يزيد نتصبر يلن ندري
الخلگ شيّال نهبت من خلگنا النوگ
ننطركم زرع ريحان، فوگ مروز
يسحگنه اليريد ايحوش ونتاني
زرع مسحوگ ...
هذوله احنه
الرسايل لو ملح تدّي نحطه اشداد
لن اجروحنه اتعزها ..
وواحدنا غشيم اعيون فك عينه
اعلى صفصافه حملها تراب ويهزها
وهذوله احنه ..
تانينه رمد، وديرة كلها اعيون
دوم ابكل جفن مفروك..
شجرة ابطارف الصوبين ورخيصة
سعره الحيل ويداعي اعلى حگها الشوگ
تموت الـ أه
اذا خاوت اشفايف افهى من الطين، ومتانین..
الطير الـ بالسما امجنح اذا يسمع
حجي الزنجار واصل للقفص يزعل
وهذوله انتم ..
سجنتونا حديد بماي ينشال الجريب الشوف والفرهود بالمضموم مايندل
وغشمة احنه ..
علگنا عشگنا اگبال غيمة صيف ..
نيشان الغشيم يعگب مثل الصوت
ونناشد ماعطشتونا؟
وكل عطشان.. يدري البلم من يعطش
يشگ روحه ويدور الموت ..
ومتانين
فيّ عيطة نخل
جم دوب نمتد عالدرب كله
واذا مريتوا لاتجزونا وصيحوا
سعف بينا يسد الشوف جا شِلنا
لجن يومي عكس باقي السعف گذلة
وبالملاگه ننصي الشوف لايتعب
نماشيكم نخل ،
ننزع كربنا ونلبس الدخان
غشمه احنه واخذنا الراي
ﭼـي شفناها ماتنشد
العمية اتحس اجاها الليل
من يبرد حجي الشباﭺ والبيبان
لجن طحنا عرگ حمّال
من ننشف نخلي اثار بالقمصان
لو رديتو تلگونا
حطب مكتول ..
فصله ارماد والفجّار ما مندوم
گام امن الطلابه
ابراحته اوابيض وجه ادخان
شلناکم‌ حرز چذاب والوادم يعيرونه
صبغ ماشي بوجه زنجار
من يوگع یرد لونه ...
يروج شوصلك يم بلم المعيبر
يماتدري يشگ گلبك ابمجدافه
نضحك والجرح يدّي
الگطن ناعم وخشنة اجفوف ندافه
تنيناكم شبيب الفين لكن شيب
لاح اوجوه المرايا ونبت سبعين
ومتانين
من نشتاگ؟
ننفش شكو اخيال بـ طير
هلبت جايس اخيال انتـﭼـى بـ فّيكم
هذوله احنه ، جدم متعوب
تانينه ايعثر بينه درب حيّكم
تعال و صيح ..
نتلگاك هودج ها
يماي اروينه گبل الذبح
ترضه انموت عطشانين ومتانين ..

حسن علي الغالبي



شَرّعتني چفوف غُربة ..
طشّرت زَفّة هَلاهل تمشي بالدَمْ
وباعني اللِيلْ إعله حَسبة خايفين ..
''وانه وجناح القصايد''
مدري وين مسافرين ..
ندوّر الگاع إعله شَهگة
ندوّر الگاع إعله رُفگة ..
نوصل لسابع سِمة مرايات گَمرة
ونندفع من چَف مُطر ..
نطيح غنوة لِيلْ بحلوگ السِكارىٰ
ونِنمحي بصحوة صُبح ..

ضايعين ..
درّة فكّت عينها بشاطي الحِزن ..
باردين ..
مِحبس المَوتىٰ الينزعوه للدفن ..

''وانه وجناح القصايد''
نرسم الفرحة بنعاوي ..
نِظفر الصَفنة قصيدة ..
انّناغي لِعب الهور والبَردي وعَجدنه
لحد ما يذبل حچينه
وننطحن بالرحّة حنطة ..
ماكو سدّة اتحشّم الغافي بگفاها ..
وماكـو طوفـة تعبّر الطايح وراها ..

كِلشي ماكو ..
واحنه هم مرّات ماكو ..
نزغر، شما شِفنه زفّة
نبرد، شما شِفنه ماي ..
نكبر، شما شِفنه عفّة
نعرگ، شما شِفنه راي ..

'وانه وجناح القصايد'
نرسم الدخّان گِذلة ..
نِظفر الساعة مواعد ..
إنتاني رفّة ثوب وشموع وتراچي
لحد ما تغفىٰ الإميالة
وننّثر ع الباب ذاري ..
ماكو نثية تطرز ثياب القَصيدة ..
وماكو منَحر ننصلب شذرة اعله جيده ..

كلشي ماكو ..
واحنه هم مرّات ماكو ..
وخاف يوم احنه انتصادف
هذا دخّان السنين المدري شنهي
احنه ماكو ..!

علي الصفراني


أشمك جاي ..
بس أطلع سراب الگيك
وأردن ردّة المكسور وأگعد وألتهي بطاريك
تعال أرجع وأحنيلك گناطرنا
وألملّك هلا الوادم ..أگللك أمس صرنا
تعال العشگ ما خلاش بحبال الوكت شرنا
اشو شحيت يهوايّة!! ..
الشجر من ينشتل عالگاع موش بكيفه وبرايّه ..
انا اخلافك بشر متعوب ذلّت وجهه المرايّة
حالف لو تمرني بيوم اجديلك ضحك بطران
أدگلك بوب الولاية ..
وألم سنين طيش الفات
وأراوس عمري بحجاية..
يحسرة موكب متانيك
لكن ماكو مشايّة ..
تعال أطغى أشتهيتك خل اضوگ الذل
تدري البير لمته يموت ..لا رد الدلو اموّشل
وتدري الصحرا يمته تعيش اذا شمّت مطر مجبل
وتدري الـ اااخ يمته تموت من تتشابگ وي الخل
شبشرك صوفرت بجفاك
والمنجل وصل للزيج ..
وانا حجايات خرسة وياك ..
تتماطل تظل بالريج ..
مـ انا براسي محطة عليك
تاخذ ناس وتوّدي ..
واطــيح وطيحتي لوحدي
جم اسبوع تانيتك ..
وأردن للسبت وأبدي
طبع رحّة جبتها وياك من كل كتر متبدي
يعندي وكلشي ما عندي
وانا الطاسة .. لجن ما طب گلبها الماي
تشبه طاسة مجدّي
وانا ادموعي اعلى باب الله
مثل معتاز دوم اتدوّر بخدي
حلم خرسة .. دفنت أسرارك بصدري
وعشت وياك بين الـ اااخ والمو ااااخ والمدري
تعال أتدفى بـ أعذارك ..
مو دلّة واعاشر دوم بس نارك
تمنيت بغرفتك روحي يدة باب
يالمالك بعد جيّة ..
تدري الصيف يكشخ بيش؟
من نگعد سوة بـ فيّه ..
وهذا انا جبتها وياك
مُدّة تصبر بمُدّة
صرت ﭼـنّي حبل تابوت
هذا يصيح جِرّه وذاك اليشدّه
يـ كوز اشگد توزع ماي بس بالتالي تتبده ..

هاشم الخزاعي

حتى زواكتك بهتت
والديرم طعم زنجار مات بصبخة اشفافي

راي ايكول بطّل يشتهي ازلوفج
وراي يكول لكَه... واللاكَت اجفوفج

وآني ابين هاي وهاي
اشوفك راي
واشوفك جاي

كالتلي الكصايب ذيج تذكرهن؟
شما اظفر اشوفك جاي
لو مر الهوه بشعري اشوفك جاي

ومن تنكع زلوفي بصيف اهيسك ماي
حته الماش المصفطه اعل لاهيتك
شما اغير مكانه احتار اشوفك جاي

وتعلل بأول لون حطيته على جتافي
وتعلل بآخر آه مرت والكَمر غافي

ايما صباح

يصيحني الليل وتفزني الدار عَبرة
وتركض احلامي شبابيچ بمدينة
وهو ركض الليل فِكرة
وامشي اموت بساع
حتى احيى الصبح گبل الجرايد
وانقري بكل حايط يدلي اليضيعوني عليّه
آنا حرّة

صوتي محبوس بقفص ..
بس روحي برّه
عيني معصوبة بدمع ..
بس شوفي يقرأ
يمته يفتهمون آخرتي لسماي
وباچر إمن الگاع خطواتي اتبرّه

صدگ ما غنيت يم اذن الشمس ..
بس سامعتني
صدگ ما لحت الگمر ..
بس الي اوياه چم هلا وذكرى

آنا حرّة
ودوم اخضّر جسر للشارد لروحه
وين ماشِتلوني حُفرة
وين ما ضمّوني ما يلگاني غيري
وين ما باعوني ما يشريني غيري
وين مادفنوا گذلتي بچف شگار
تطفح احچاياتي سمرة

آنا حرّة
واسود إمن الليل شيبي
لياهو ينطوني ورد ما بوح عطري
آنا مضمومة لحبيبي
كلمن اتحلاني گمرة يموت مغرب
ما يحصل بس مغيبي
ياهو غير الرادني بظرفي رسالة يلوگ لإسمي ؟
يندل بچف من دلال جروحي
ويگلي بهمس عگب الضماد
يمته ما تردين طيبي
ياهو غير الباعته الأيام اليّه بكلشي اعرفه
يصح نصيبي ؟

آنا حرّة
وشوغتي اتعثر الهوى الينباگ مني
وحزني ما يسترني يم طاري الفرح
وإبچاي عيبي
مدري چم عثره اليطيح اوياها ضحكي
ويلحگ اعله الماكو جيبي
مدري يا چف گاد گلبي إمن الضوه لهاي المتاهة
وگال للساعات ماكو ايام ينتظروچ غيبي

وغاب كلشي
وصارت الدنيا سجن
والتهمة ناس
وبيها بس المات يبره
والسعف مد راسه يرجى الريح
والبيبان تشره

غابت طيور وبچه اويه اغناي عشها
والنهر دمعاته فوگ خدود حزن الگاع
تطفح شجرة شجرة
والدروب بعين كل مشتاگ تبچي
بگلب كل عطشان تبچي
تريد من فيض الأيام الرايحات اوشال گطرة

وآنا ماهدّيت حلمي برغم كل هاي العواصف
سألوا اسمي منين هاي ؟
وجاوبتهم ..
من وره النجمات
فوگ امن الخرايب
غاد من دار اهلي ذيچ التيهتني ..
آنا حرّة .

سلام حمزة


وگف عد أول الظلمة
شمس عـ الباب
ودگت ساعة الظلمة وزعل عـ الباب
وصار مرادم الحيطان والتيجان تتلوه
تره المبيوگ موش الباب سرگي الباب ماهوه .

ما يدرون
بالظلمة نشاز الصوت
والسكته گمر محبوس والعِله بلهات الحوت

هذا أخر گمر يا حوت ……. لا تطفي
هذا أخر ضوه من الطين … لا تچوي

وأتكتر وروحه هناك مسبيه على الشباج
وبراسه شذر ملچوم
ومراية حزينه بخوف توميله .

تشوف الباب ، وتعته يشوف الباب
ويشخبط ليله من ليله
ويگللها التعب حيله
ويغطي مرايته بخوفه عن لاينلچم سباح بجروفه .

بكتاره أصابع باب من لونه
تندس والدرب مذبوح والدرويش وحاش إعله رازونه
يصفك والهوه بلا جف .. يزته لأخر عيونه

وتنام الدنيا بعيونه
وبراسه حلم ماجوته مرايه
كتب عـ الباب ، كلبه ، وشمعة
لا مو شمعة عشر شموع وچماغه وشمر ضيه
خاطر ما يموت الباب والبهلول يعرگ لو ذكر فيه .

كلما تضحك الظلمه يشب طاريه
كلما رمح غفلة يطوف
يلتم گلبه فوگ الريح ويچويه

كلما يتعب السنبل يطيح اميّه بذياله
كلما سلهمت كحلة يصوغ النجم گرداله
هذا ( أخر نبي ) والباب غناله ..

علي الشباني


بالليل الأول
جست روحي من المحبه
خفت حد الموت يحبيبه المحبه

جست اصابيعي وخفت
نجمه مشتعله همت

بالحنين أنتَ والليل الصعب سكته
( سكته مكسوره بطعم بوسه جديده )
يا سر النجم مفضوح ، واحزانك جديده

هدم حايط حنيني ، وروحي تاهت بالرياح
صرت اخاف من الطيور اتحرك بدمي الجناح
وإنتِ حركتي الرياح

بالجهات اليّه واندارن بروحي
مري يحبيبه الشته يدك باب روحي

ومالي حيل ويه المطر تگضي السوالف
وإنتِ بأول زخه
نجمه زغيره نزلت بالسوالف
جدحت بروحي ،وهدم حايط حنيني

لن محبتنا سؤال
دخت من لون السهر
تميت بالحيره نهر

والسهر مثل الضوه الـ بالبيت

يالبراري
بالحنين وبالرمال
يرسم الخطوه سؤال

يمته يفتح بالعشب باب الجواب؟
نركض بكل النوايا

ثيابنا تخضّر التراب
نركض بهذا العمر يحليوه ودروب العذاب

تلتف وتاخذنا ونرد
تلتف وتاخذنا ونرد
وآني وإنتِ والعذاب والمحبة
تلتف وتاخذنا ونرد
للبعيد ...تكبر وما يتسع كل الجواب

أمير جدوع
في رثاء الراحل علي مهدي


مابين دجلة البارحة و اليوم
قبل أن يكون موت كان قصيدة

يگود عيني النورس او للماي اتبعه
دجلة باب تصير للمحد يسمعه
هكذا قال الشاعر علي مهدي إلى أحد الأصدقاء



أجيت و أوَلَك دمّك
و شوغة من الدمع تاليك

أجيت بوحشتك فايض
تريد تسابگ الروجة اعلى حد مابيك

مد وجزر وبلامة توهسك روجتك بس جرفك يوازيك
حر وزواگتك دمك اذا چان العمر جازيك

ياراگ اليلم فيضك حلم تجزينه ونتانيك

ويمد النهر وتبوگك الروجه
وبقى من اللون بس حزنه
على چفوف الرمل ماتوسم الحنّة
موش المشتهى الدنيا التعب شاريك للمنّة
يافيض وحزن توّك ومِن ننشف تعاتبنه

الالواح الجديدة تريد ماي اكثر
وتونه احنه دمع صرنا

وچنت مثل المري اترد الضوة بگده
وتوهس جرحك احجاية
وجنت تدري النزف ماردّته امراية

ويصك دمك... وتظل حدره معانيك
يالتضم العتب حدر التواسيل بأغانيك

اوتساير دربك ويگصر تخاف العمر لا يبطي
يالـ اجدامك مشاحيف وخشب بيه روح
ومن تجزي تهم روحك جذر للطين ماتطّي

ورحت كلك وماگصّر اجدامك خوف
من يكسر ابفيك الليل تكسر على الفي اطيوف

وچنت من تخصم عيونك
يتيه صيدتك گلبك هواي يشوف

وجنت تدري الضوه مايلتفت يجزيك
وضعت يالتنفگد بينه
زمخ يم وجهك الفانوس ما وجد ملامح بيك

اشعفت للملگة من مايك
يلو فيّ منك وننخاه من المامش اتلمك عين
يـ انگاط ما ظل ورا سنينك طين

وانت اول اصيارك حب

اجينالك برد من خاطر الظلمة
برد وشلت الشمس مغرب

اخذها بهوسة الصفاف و لا برحي اليفز منك يدليها
وجزه التتخايره بضنها جزت للمگبرة عثوگك
الرمل ماعثرك بيها

ويناغيك الضوة الفوگ الگبر يبچي
وتفز وتگلب عيونك وغاد من الحلم تبعد

تشب ويوهسك اصيارك
تريد بروجتك تجزي العطش وترد

وتثگل ريتك تالي
وتعب لعب الصبا بروحك او فيّ من العمر ما ظل
وترد وتنجفي بحزنك مطر حدره الرمل يثگل

وعتب عالناس تتشضى

وغيضك يكسر الدنيا توچد حزنك بسيفك
او ما ينكسر منها مرايتك فضة
وتموت بكيفك ونرضى ..

عماد المطاريحي


روحي دايّة ..
وشاطي عينك ..
حلم يزرعني اعلى جرفه
وعمري صدفة ..
وانت روحك نافذة ..
تجيب الضوة ..
وضحكتك عصفور حط بحضن شرفة
وماي أصابيعك .. أتمس الماي يغفى ..
أنت بستان المحبة ..
تدري بسيوف العطش تذبح الرغبة ..
تذبح ازهار البنفسج ..
والنوارس ..
والسوالف ...
والبداية ..
تدري من ترويني أكبر!
أزرع طيوفك شمس والديرة عنبر ..
آه .. لا تحرمني نبعك ..
تذبل ورودي وتموت بشوگ دمعك
جرحي يضحك وانتَ تضحك ..
وانا اتبعك ..
من مزامير اليشيعوني ..
احس ريحة شماتة ..
وذاب عمري ..
وظل نداكم ينعى ذاته
ما يفيد اللوم
شاطيكم نبت صوبين حلفة
تعذرت منه البلابل ..
ردت وتندب حلمها بغير زفة ..
ونايكم خضّر حزن وجروحي شفّة
وروحي داية ..

كاظم اسماعيل الكاطع


ولا جنك يكَلبي بكَلبك النار
ولا جنك ثلج من عاشرت نار
خلص عمر المواسم والنياسين
وظل بس
الغنه الصامت ... والاسرار
نام
وصبح الناعور مشلول
لا ... ماي النهر يصعد للشفاف
ولا بيه حيل يكَدر حيل يندار
جان الفرح عدنا طير محبوس
ولكَـــــــه فرصه وتعلكَ بالسما .... وطار
ولا جنك يكَلبي فوك الارماح
معلكَ... خلصت عمرك بالاسفار
ومادامك يكَلبي فوك الارماح
ولا عندك حبيبه
ولا الك دار
شيفيدك لو تجر كل المواويل
شيفيدك لو تردد كل الاشعار
شيفيد ...!!
تمر نهر بولايه مهجوره
شيفيد ... !!
تمر محابس بيد مبتوره
شيفيدك ....؟؟
يا .... يول
يا كافي ... يا كَلبي
تظل مثل الارض يوميه إلك ...دوره
وشمتانيه الروح ...؟
وبعدها متانيه ...؟
واسنين تكَضي من العمر
كل ... ثانيه
واحلام ياخذها الدمع كل مشوار
وبيوت ياخذها المطر كل مشوار
وانت ...؟ !
انت يكَلبي تعيش للحين
ولا جنك ثلج ومعاشر النار
آنا وياك خلينا غريبين
سولتنا الجكاير... والصبر زين
وبليل الشته يصير الحزن ...حار
دافي ياحزن
للفاركَ اثنين
صاحبته وشبابه انكتلوا ازغار
آنا وياك خلينا غريبين
نحلم بالحبيبه ... وعتبة الدار
وإذا شفتك يكَلبي ... بيوم فرحان
هذا اول عتاب
وآخر
إنذار