...عبد الكريم القصاب

............وآمــــتانـــــــــين ............

وآمتانين ،
وآمتانين.
مثل خيط الشمع ، بسكوت محتركَين ،
وآمتانين ،
علينا سنين دارت وآحنا مشتاكَين ،
وآمتانين .
مثل شجره عليها يدور فيْها سنين ،
مشتولين ، وآمتانين .
عاشرنا الندى مفرعين ،
لاكَينا السموم ويبس عود التين ،
غدينا تـراب وآمـتانين .
كل صفنه جسر مكَطوع ،
كل صفنة حلم خطوه بدرب ممنوع ،
كل حسره رمح وضلوعنا بربين ،
وآمتانين .
ها يعزاز كَلبي ، دخــت يمعودين ،
ها يحباب كَلبي ، متـت يمعودين .
أنتم ويــن يمعودين ؟
صرتم وين يمعودين ؟
جنتوا آكَبال عيني وغايبه روحي .
هسه شلون بيه وآنتم ابعيدين ؟
بعدكم مايله الدنيا ،
وآحنا آمن البجي مدنجين .
بجي وخدودنا من طين ،
بجي وماجونا المبشرين .
ظلمه وعثر بيها الشوف ،
صحره وتاه بيها الصوت .
مامش ،
ما بعد للروح رازونــه .........
تشم اطيوب المحبين ،
مامش خيط كَمره يجيب المحبين ،
وآمتانين ،
غدينا تراب وآمتانين ،
الله ايساعدك يا كَلبي يا مسكين ،
مدري آتون على الميتين ،
مدري آتحن على العدلين

الكروب الخاص بالقناة .. 💜

https://www.tg-me.com/sha3ir_100

سعود الخفآجي



يا حبيبي
وياحلم عشرين
وي عشرين احبك

سامرتني
وانت تدري
الدنيا مابيها اعله گدي
بس ضحكتك
عاشرتني
وياضحكتك؟؟
لمت الناس الغريبه
وطشرتني

هاك اخذني؟
شكد كلتها وماخذتني
اشتريني !؟
السوك نازل
ضمني من تحتاج موقف

ماردتني
خل اروح
ويمك يظلن ضحكتي
وذكرياتي
شتنسه منهن
انسه واتذكر بعتني

وادري بيك؟
وچني ما ادري واجيت
ومن ثگل وجهك ؟
عرفت الدنيا خربت
الناس خربت
وبابكم عينه اعله غيري
ونسّيت

وداعة الله
ولايظل بالك عليه
النيه چانت
بس احبك
هالمشيت

ومانسيت
وداعة الگتلك عليهن
وحدة... وحده
ورتلتهن ركعه ركعه
وسجده سجده ؟؟
وصفطتهن يمك وبيهن رضيت

انت يالمدري؟
شسميك من اشوفك
يابعد كلشي اسمه احبك
انت يل بس اعله طولك
فرعتهن من حچيت
اعذرني مدري شچم جرح عنك خذاني .
وهسه اجيت

وهم اگلك
انه عيني اعله الخصر والفوگ منه
ومن وصلت الما اگلك
ششتهيت
كلشي ماسويتلك من الردتهن
والله عوضني بضحكتك والتهيت ؟

وانه ذاك اعله الجرح كلش حنين
هيج الوليله اعله كيفي
شما كبر وي السنين
بعيني يبقة زغير
من يمشي اعله حيله
حتى من اطلع كمت
للسوك نوبات اشتريله ؟

ومن تغيب الشمس
بعيونك
تجي تدور ضوه
وين تلگه
هوه بس انه گمر
وانت اول ليل
يتعافه اعله وجهي
ليش ؟
وانه بحيلي كله من اعتنيك
اشتري شما بالسمه
نجوم او اجيك ؟

ونجمه نجمه
اگبالك احسبهن عليك
هاي نجمه ؟
لخاطر عيونك حبيبي
وهاي نجمه؟
لخاطر شلونك حبيبي
وهاي نجمه
لخاطرجروحك حبيبي
وهاي چم نجمه اعله باجر ؟
خاف اموت

وگتلك من ازعل عليك
يجوز ارضه بضحكة منك
ابوسه منك
بكلشي منك
بس گلتلك
لاتزعلني اعله روحي
وزعلتني
وانه توني مراضي روحي
ويازعل روحي اعله روحي
شگد تنيت ؟
وهاي چم نجمه اعله مودك ؟
طيحتها وما اجيت

ميثآق الهلآلي


ايدك بأيده
وسحگتوا اعله الجروح
احساسكم بارد واحس دمي أشتغل

انت تضحك
وانه اسكت بالدموع
وانت تنثر وانه اجمع بالجمل

جنت ماشايف اهلالك .. من بعيد
شلون بدرك هسه بحضانه اكتمل

ماعليك بحالتي
وحنضل جفاك
رايدك تحجيلي عن شهر العسل

شلون شعلت المشاعر والدَلال
شلون طفيت الشته بنار القبل

مو مهم شلون طفيت الشموع
الشمعه سهله شلون طفيت الخجل

جنت تخجل
من تمر ايدي اعله اديك
هسه هذا شجم كتر بيك استحل ..؟

وجنت تكسر واهسي
وكلبي من اجيك
وجنت ارد بين الرضا وبين الزعل

وتنشل حروفي
وبرد بالدم يطيح
شَكثر امن الدمعه ويلفها الشلل

هم اجي ابالك
مثل نسمه غرام
لو يمر اسمي بثگل وزن الجبل

انه اغطيك بحلم لو مر ضواك
وازرع الشبگه اعله شباجك أمل

وامي تسألني شعجب مامر شتاك
شرد اكلها ليا حضن دافي انتقل

ماحضرت ابفاتحتنه … شعطلاك
ماوصلك خبر ضحكاتي الجلَل

ابابكم ..
حدت مناجلها السنين
وحصدت ايامي ونده ايامك ختل

ابابكم…
فرتني فر الذكريات
لحد ما عود الجسم خيط انفتل

امك تهلهل
وانه بضلوعي نار
اشجم جرح ميت بزفتكم عدل

روحي طلعت
من شفتهم طلعوك
ما سمعت ابابكم زلمه انكتل

جنت شاغل
شهگه احساسي وضواي
بيا وكت وي غيرك احساسي انشغل

كلت مشتول
وي روحي ومايبيع
مثل ما وجها ابذّره عيوني انشتل

عبد الامآم الاسدي


دنيا غروب
ومخاذف يزِت گـلبي على مخاذف

أوّهّمتني
بـَعد شـَبگة ماي بصدور المشاحيف لجرفها
وإلها ملگه ويالتراب

أوّهمتني
عيونك الحلوات تِندل بالضباب
گلبك الجاس الجِنـَط
ما جاس گلـبي؟؟

يمعبودي
معبودك عذابه إيريد
وأنتَ تريد
شبعد وتشيلني من الماي أصابيعك
طيرة ماي مكسورة ولك گلبي
رَگـِص مشحوف من يخذف
ولك گلبي

وغرّبتني
وخوفي أخذني
خوفي خورة ماي تفتر بالنباعي

وغرّبتني
كرُنفُله مسيسه العـَصر
مـَرِز يحديها المـَرِز
مِتدوهنه تغني إبّـِساتين الرفاعي

ولك يا ماي العـِرِس
إغسـِل الشـَبگات إلمتربه عذابك
أركض أتلگاك
وِنزهّر گبـُل مـَمشى العذارى

ولك يا ماي العِرِس يا اووف أوميلي
ارد أفك طلاگتين
مشذّرة بعين الحيارى

وين مِبحر ؟
ليش عفت العطش
يتمايز عيوني ؟؟

اوّاگف أتوسل سواجيّك دَهـَر

وين مِبحِر ؟
دنيا ليل
الدنيا وحشة وما إلك جِـثّـه بمِچاتيل الگـُمر

ليش طشّيت الرماح السود شوباش بقميصي ؟؟
بـَعـَد عطّشني ينفنوف المُطر
بـَعـَد دورة وجه مِنّك
ويلبس إسراديبه گلبي
بـَعـَد دورة وجه
وسِتْ بوسات بيض
وينزع إسراديبه گلبي

ولك يا ساعي البچي
كل ليلة يحديني إعله بابك
وعيني مُهرة دَمع مشدوهه بغربتك
وتنفتح بوابة مثل الله الندامة
ولك باهي النـَدَم هم لـ الله علامة

جيسني
خل أرجع إمن الرمُل لـ أيام النـَبع
يا ضـَريح الماي لـِم طولي دَخيلك
دِرت وجهك وإشتها الصـُبّير طولي
لا أنتَ الجـَزّيتني التيه الشربني
ولا آنه اواكح لون قُمصاني الغُرب

ولك يـَحبـَيّب
أثاري النـَبض بالفُرگه العـَصر هم يلتوي مِثل الدَرُب
كون ناوي تسِد شبابيچك ولك
چا وين أغنّي ؟
وكون ناوي ..
تلِم دربنا منين أفوت ؟
وكون ناوي
تبلِل الگاع بسـَفـَر چا وين أموت ؟

وآثق التميمي

خاف ماتدري ارد اگلك
انته اول واحد الشفتي انحنتله
وگامت دگله العزيز

وچنت اظنك عاشك عيوني لحلاهه ومادريتك ..
سولتك چانت يطك بيهن نزيز

وچنت اظنك
من تمرني بكل تسايرك هذيچ
الجايبك چان العشگ

وانت ثاريك تمرني بلايه واهس من تشوف رويحتك مالك خلگ

من تشوف
الوادم تسرفن خلگهه
وچلمه ماتطلع صدك
من تشوف
گلوبهم ماهي اعله گلبك لو حچيت
من لگيت اجفوفهم مابيهه فزعه اعله الدمع
لمن بچيت ....

وانت حگك عوديتك ...
شما تجيني
تشوفني امك فارشه اگبالك حظنهه

شما تجيني
تشوفني مغطي الثجيلات اعله گلبي
امكشف الضحكه التحبه ...

اشما تجيني ...
تشوفني ابلايه گلب واضحك واغني وتارس الدنيه خلگ كله اعله مودك

شما تجيني ...
تشوف ديرة واهس ومحزن جهبهه ...
ديره حلوه ...
امسوره بوادم حنينه ...
بلابواچي بلا نعاوي ...
ولايه مكتوب بمنارتهه الچبيره
احنه كل واحد چهبنه انحسبه منه ...

احنه كل واحد يمرنه يصير واحد من اهلنه
وماكو چلمه لاهلا اتلوح اعله اذنك
حته جلمه ياهلا اتشح اعله سمعك
عدنه هالچلمه عتيجه وموش مملوحه اصبحت
عدنه الحلوگ التجهبك كله فرحانه وتغني ...
وشتغني ...
اتغني لجلك حاسبينك مثل رمش عيونه ...

طآرق بريسم


بعدني اليضحك ويبچي
اليغني من الوجع والناس وضنونه

اليسولف للسچچ والماي ليليه
وينام وشوگه بعيونه

اليموت ويه الورد لومات
اليخضر گنطره بكل باب
لو مر اعله گلبه انسان
وعيون اليحبونه

اليعيش ويه النده ويه الماي
لو شاف اعله راگ الطيف
سباحة گطن لو هرش زيتونه

بعد بيه جمال الله اليحب الناس
والدنيه

بعدني بكل عطش راوي وافك للغربه جربه وكاس وارويهم

ولا چنه العطش بيه
انه الغنيت بالظلمه
وشفت بس لوني يشبهني

سماري وفترة عيوني وتجاعيدي وحزن گلبي اليسافر للتعب
للأخ ليليه
ضوه البيبان والشرفه خمر روحي

واسافر بيهن واسكر
وافك لليل شباچي وامد چفي لصلاته واستحي من الماي
من يخدر

غفيت ويه المطر عالگاع
واتبديت يم الله حلم وانسان
لونه اسمر

انه الما گايله يأذي
لو ادري الگناطر ما تعبر الناس لاحلام الفخاتي وشوگها
الچذاب
ما دليتهم بيه
افز من الوجع والأخ ليليه

واموت واعدل وارتاح
واشبع شوف
واگول من الغياب يصير
هم بيهم بعد جيه

يريت الناس تفهمني
واگلهم ليش ماعندي وطن مثلي
يحب الناس
واموتن ليش لو عندي
ولو هو العمر يالون خلوني اعله راگ الماي متبدي
واموتن ليش لو عندي

الوطن ما يشبه عيوني ولا ناسي ولا قداح يشبهني
خلوني اعله راگ الماي متبدي

شآكر السمآوي


ِشلِت جرحك
وجيت اعلى السراب اتخُط
صلاة الدم
للشاطي المِن ورى النجمات ينده بيك

يحسين الضمير ايريد قُربانه

اوتعلاّك الضمير اوما تعلّى الدم
اوعفت نيسان و نياسين
اوِجبت دمك يُمُر غيمه ابِهرش عآشر بردها
اوعشعش اجوٓريد بآطيانه
لهلْبت چم غصن ذبلان
يلگىَ بيك نيسانه

ِشلِت جرحك
اوتيمّمت ابضوه الكعبه
وجيت اتِشد جروح اسنين
لا داوت و لا اتداوت
و لا مره لِچمٓها الشامت اوشاغت
و لا رف ابگلبها العار من شافت
دِماها اعلى الصُبٓخ تنباع عريانه
ِشلِت جرحك
ِحديته او نجمة الغُبشه
تلگّيت شچتك صلّت
عليك او حنّت اخيامك
ابدِمه عمّار و الحمزه
و بوذَر التچفّن بالعطش من فيض نهرانه

ِشلِت جرحك
وجيت اعلى السرِج مِبحِر
ِتِشگ روج الرمل ورچابك اعلىَ الريح
گبر ينگل ضوه ِجدميك
وآجدام المِشن وياك دفّانه
مشيت اوخطوة احصانك

ِتِدگ الگاع و تصحّي نعش كل من تچفّن عمره بآيمانه
ِتدگ و الگاع على حس الحوافر تنعى و حصانك

بچى الجامه عليك اوحيرة اعيونه
تِشم دمك علىَ آعنانه

ِشِلت جرحك
وجيت اعلى الظنون اتفوج بظنونك

ِتنخاك السِّما من شاف
طوفان التراب اعلى المناره اتفوج طيگانه

اوِتنخّاك الجرح بگلوب دوهنْها الدرب و الخوف فلّشها
فلّش كل ضمايرها
فلّشها اوعليها
من دماها ايصوغ تيجانه
اوِتنخّاك الضوه بعيون طفّاها العمى
وعيون خيّطها الجفن من شافت الرايات
روجه الكربله تحديك عطشانه

ِشِلت جرحك
اوِتعسكرت أعلى شاطي الموت
تدري الصوت من جرح السمه ينخاك تفدي الصوت
ِتعسكرت اوتجِلْمٓد كل گلب بالناس
مخنوگ ايتنٓفّس چذبة السانه.

ِتعسْكرت
اوتوشّل ع الجرف من ذاك طوفانه
ِنداك
اوگطرة الخوة
اوگطرات النخاوي الأٓمْطٓرت دمها
على جدح السيوف اوصهلة المطعون بعْنانه
اوغبر گلبك على اعيونك
يِجس دم النذوره الشّگ سواجيه
على ماي الفرات اوينِشد اجروفه
عن بحر الجروح ابمسجد الكوفه
اوتوحدت
اوتشيمت
اوتشاهدت ابـ خُذيني
اوعالنده رديت
و بدم الرضيع اودمك اتوضّيت
او على سرجك
ِتچفّنت ابضواك اوعالجرح صلّيت
اوتساميت
اوعلى درب السمه اتخطيت
اوعِفت للماي
شارات او سوالف تنعى بعلوگك
يحسين الچفوف الباعتك بالماي
لهسّه اتبيع كل حسين
واخبرنّك
يبو جروحي زينبك ذيچه
لهسّه اسمع صداها ابريتي ينعىَ
يحسين الدروب اتلمْلِمت يحسين
يحسين الجروح اتصٓهدت يحسين
يحسين الظنون اتسوِدنت يحسين
وآنه اسمعها واذوب ابريتي جرحين
وآنه اسمعها اوتگلّي اجروح هاي الناس
روحْ العِتبته وبحٓضرته احچينه
وآنه اسمعها
اوتضويني المناره ابهالتك و احچي
العطش ذاك العطش محّد
ِشتل ع المـِشرعه اجدامه
الجرح ذاك الجرح  بالهيم
يرشف رجفة اعظامه
الشِّمر ذاك الشمر  لساع
يِحد اسيوفه بالهامه

كآظم الحولآوي


زينب ما ادري الخيمه المهم  .. طلعت
مره يمها الخيام الخايفه انجمعت

وكفت والزلم وكفت ومن بعيد
من تشاهد ادكول الحرب رجعت

حچت .. والما يفرزن دمع من الخوف
ومعناها الزلم من دمعت سمعت

صلت كعده ربك كالها تكعدين
وكفتي للحسين الوكفه الي وكعت

عبايه متربه بس نظفت تاريخ
مره عكب ابو فاضل ريج ما بلعت

افا كالت وانا اخت المنگطع يمناه
بس عيونه عن الخيم ما كطعت

خلص دور السيوف العبي انوب تثور
مو منه المره البحسين ما كبعت

غشمه اتوقعوا بالسوط ينتصرون
واحنه اطفالنه بالذبح ما قنعت

ابسط حرمه عدنه تمر بابنها المات
چا حسبالكم دنكت لو خضعت

ادور عيونها وتاخذ كماطمه حزام
خاف يكول واحد بالولد طمعت

جابوا روس اخوتي وكالوا تشوفين
كتلهم زلم قاتلت وارتفعت

كالوا خيلنه فوك الحسين ادوس
كتلهم بعد هي ادوس لو شبعت

ترى هذا الخيال الطايح عله الكاع
هاي الخيل چه ما تفتهم فزعت

ابو الاكبر ترى اكبر من مدار الكاع
ومجازا للعقول بهل الشكل وقعت

گطعتوا خنصره مو لان محبس بي
فهمكم راد يستوعب وما سيطر

بقت بي من نحر عبدالله خوفة ماي
وخفتوا من يظل خنصره يصير هواي
واحنه الساده واحد من يظل نكثر

اول عركه هاي تحرم الحايوز
اليطب  لو يجي ويانه لو يجمل الشر

وخيمنه كبالكم بس شكل ما تدرون
خيم  جبريل بيها محزم ويفتر

من كد ما ابخرتهن بعطر حسين
من احتركن الدخان شفته اخضر

وطفلنه اسمر طلع من الخيم مو خوف
تاخر بالصلاه وانچوه وصار اسمر

تفطر كلشي بس الترب لا والله
بلال كصصنه ما خلاها تتفطر

ورى خيمنه الحسين مسوي خندق ليش
هم فكرتوا لو حسبالكم مظطر

راد يكلكم لوحده الكدها يثور
لا رايد امداد ولا ابالي انجر

تيقنت النصر من وكع ماي الجود
الخير اليكثر يكولون يطشر

ومو دوم النصر للوصل كبل الناس
بالطف لازم الينتصر يتاخر

اخذتوا كلشي عدنه العدنه اذن بي خير
هاي من الله بس العدنه يتقدر

علواه ننجتف سبحه الزهره انصير
ولو غير مجانه العطر يتحرر

فرق ما بين تفكير النحر والسيف
مثل واحد يشوف والثاني يتصور

انتم رايكم بالماي تنتصرون
واحنه براينه بالعطش نطور
بنظركم من يطول السبي يذل الحسين
بنظرنه النهر كل ما طال نفعه اكثر

كلتوا من نطب للسوك شتبيعون
كلنه الما يبيع اخلاق ما يكبر

كلتوا بالخرابه نبات ماكو اشكال
هو احنه الخراب نريده يتعمر

بصفحتكم اليوكع ع التراب يطيح
بصفحتنه اليطيح يطيح عله المنبر

ننجر بالحبل هو احنه ناس شراع
يكبر صيتنه بالحبل من ننجر

كلتوا جف اخوج انكطع واتعذر
كلت بس ابو فاضل من يحن يكثر

من رد مايكم دين الموقف ماي
ولو ما غرفت ايده الكصص تصحر

خوفا عل النهر ما وكف يمه هواي
اذا هو التراب بصفه يتبخر

اكو هنا بي جرح هذا اسمي بس ما كال
عن لا ينمسح ويصير حجمه اصغر

اجينه شويه مو معناها احنه اگلال
بس هي الاشياء الزينة تكدر

كل هذا الحجي بالطف الشام شلون
مره يمها الافكار انحنت وامتنعت

لهسه وما حدد طولها التاريخ
زينب ما ادري الخيمه المهم طلعت

حسين جبآر


يطخ دمه برسن روحه
ويناحر بالرمل غرگان
هذا إنجيل
فز من مدري ياعيسى
وزرع شجرة
أعله لون إنسان

يعبر تايهات الدم
يجابل تايهات الناس
ويسامر مواعيده العطش
ويگوم گومة يابس بدخان

ويبطّل نزيف الصوت
شيبطّل نزيف السكته فوگ الصوت
والماعنده غربة تلوگ لجروحه
بمنافي يموت

فوگ الجيد خرزه مرصعه بچم عيب
من تطفه غربته يموت
ياهو أويه النحر بين الودج والسيف
حط عينه ويريد يفوت

ياهو بزرگة الدم التصبغه الگاع
فز نيشان
وينوش النزف ياقوت

هذا الظيم
هاي هاي السكته صوت الموت
بس وحشة اليشيل چفوفه من چم غاد
ذبح يموادع البسكوت

صرخة وسكته متلاگين
من شمس الخيم حد يا سبي
وحد يا حبل تگضي
وبعدها مراية التاريخ
تعكس بالظعون أوداع

ليش الـ آه تتربه أعله رمش الليل
وتخضّر على چتاف الحنين
إمتاع

وليش من النعي تخضر الراحة طيور.
وتسافر لتالي الماي
لعيون السمه
تلچم ليالي الگاع

مو كل ضي شهگ للگاع يتهلّه
گماري السبي تحز عفه
وتنيشن طول اليعبرون

ويا آآخ اليظم روحه
بعبي روحه
وجدح حتى التراب عيون

ويا خوف الخذو چفه
وتطوگ رگبته الحيرة
ويسولف خوفه رجف سنون

خذوك لبابهم باچي
وهدولك توّج
مدلل يا نده ومرهون
عليمن توجعه الخطوة
الطريجه عيون
شوف وغازل الرايات

شوف وگلها نحر حسين
يلمع للصدگ دم
من بختهم مات

شوف، العيـن لليهـوه
تشاور جايّآت الريح
وتلوّح البچي أولايات

جرحي الما يعرف يضيع
دومه مسابج الـ وينه
وعلى دروب الثغيب يروح

ينگّط گبل لا حشمه
حسافه تحشّم الدنيا
وتشوف الماي
بجروف الظمه مذبوح

وحسافه الروح من ينگال
ميزان الستر
عريان
وتضل بيها وشّلة روح

وحسافه الما يعرف الـ آه
فك رازونه أوجاعه
وصرخ للشمس هذا آنه
وإحنه العدنا بالطف راي
تتعاگب علينا ايام گوّه نلوح

يمته يمشط الحافر ضمايرنه
يمته تعيشلك سوده ستايرنه
يمته نفارگ النجمات
ونعلّگ
أمانينا بمنايرنه

يمته أتغسّل الغربة خواطرنه
چم باچر نگول نذوب
راح من الصلابه نموت
ومتانين باچرنه

نضل چم دوب
شيطان الهوى الچذاب
عـ المامش يعت بينه
وعلى المامش يناحرنه

يمته عروج الـ أبروده
نگوم أعليها صيحة نار
ونحزها بخناجرنه

وحگ الما عرف يندار
من شبّوا صياح أزغار
زود من الندم بينه
ونشوف الويل
ونعرف الدمع سلطان

ننخه المنذبح بالماي
عطشنا لمعانيك
يجي مسودن
يبوس البوب
من يتواعد العطشان

يسولف للعلگ شوگه
ويزخ الجمر من گلبـه
ويعيش أويه الخيال أمچان

ما ينباگ حزن اليحب رب الطين
ولا ينجاس بالذابل
الـ إيعرف العطش شاطي
ويشوف الينسگي خسران

وگِل للدمه سيفه هنا
أصابيعك سجن مفتوح
نجي ونروح
مشتاگين لگيودك
حلاتك بالصدگ سجان

جمالك يرسم الحِنة
على خدود الرمل مرقد
عشرتي وياك لا موسم
ولا ليله ولا ثوب لضماك أسود
عِشرتي هناك للنجمة التغوش العين
لا وأبعد

تجي أيامك وألاگيها
وتبارحني ويگولون إنگضه أمرادك
ويفوت اليوم
مر باچر ترد أزود
يلموضيّك چم قرآن

أگطعلك جلد ذاتي
وأكسرلك عظم خوفي
وبعد خجلان

دخيلك گودني يحسين

احمد المشرفآوي


الليل چل
وصوت زينب  .. طال نومك يا حسين

ليمته تفتح عيونك
حتى اكولن طر صبح

انت اول ركبه تتعنى السيوف
وانت اول راس يضحك ع الرمح
انت اول طالب
ياخذ اول بقاعة محمد
وجان درسك
ياهو من بعد الله رب
وكلها سكتت
وانت كتله يامحمد
خافن يعبدوني العبدو علي

يا حسين
انت نفسك مو دنيه
التدني نفسه على الشهادة اكبر شجاع
ولذلك صلت عليك السيوف
انت امام الكل
وماكو عليك امام
انت سيد عل السيوف
و انت قائد للسلام
حتى من تحج فرق عن العباد
انت تتوسط وبيت الله اليطوف
ولذلك صلت عليك السيوف
وعزبت حتى بــ علي بيوم الطفوف
ولذلك صلت عليك السيوف
انت ضيجه عليك گاع الله بكبرها
ولهذا بعينك شويه الالالوف
ولذلك صلت عليك السيوف

تلاشى دين الله بعظمته وطاح
وتنخه بوريدك
اطيت ملكك كله لله
والله سلم كلشي بيدك
كلشي بيدك
الموت بيدك
الرحمه بيدك
حتى دم عبدالله بيدك

زنجرت ذيج السيوف العادتك
وزنجرت مولاي ذني الالف واربعمية عام
وانت باشط
هواي الك اسماء ذكرتها القليل
موش بس اسمك حسين
انت بردا وسلاما وسريرا واثير
وانت ذاك
الشرغد ابراهيم باسمك بذيج ناره
ولوله بردك ذاك چا عظمه انفخر
انت جنت الصيحه ذيج
بقوم صالح
البيها صاروا ك حشيما محتضر

منين ما چهبك صلابة
منين ما چهبك تلين
انت مره تصير ثورة
ومره تتحول ونين

يا حسين
شكثر انت وكلش شويه السنين
شحه بالجوع بزمانك
سيدي وظال الشبع
وكت وكتك بيه حتى الما يسولف ينسمع
انت ما خليت كلب ام ينصدع
لچن ما خليت عد زينب دمع

يا حسين
كتاب ربك كبل ما ينزل حفظته
وهو ظل
الله اعلم حفظ منك وله لا
شحفظ منك
وانت تملك كل شيء وماكو شي يسمه مالك
استغفر الله
وانا عبدك ياحسين وما اشك ذره بجلالك
انت ما واحد قراك
انت وحدك تقره انت
انت عرضوك على ادم گام يتهجه بخيالك
انت حومه كربله لا شيئ عدك
وهما عدهم ملحمه
انت كون الله بعضمته
السمه جفيه على راسك
تكدر تشمرهه وتذب السمه

وهذا موش ولام وياك الحجي

انت عرش الله
على جتفك مرتچي
انت دين الله الجبير
الدين شنهي
فضل على الدين انت الك

انت جبدك بيه ابوك وبيه امك
ولذلك هما صابوا چبدتك
الزلم من تبچي تعيرها الرجال
وانت يسمه شجاع اليبچي الك

انت مو ترتاح ترجع للخيام
يا حسين بذيج ساعه التعب مو من شيمتك
انت چف الله على السبعه الشداد
هذا جفك يمنت الله شلون تتعب يمنتك

ما اعرفك ليش ترجع للخيام
چني ادري بغايتك
ترجع تحج 
وترد تعلن جهاد
لان چانت كعبة الله بخيمتك

شلون كعبة
ذيج كعبة
وهاي كعبة
مستحيل
كعبة ما حجاها ابو سفيان قط
جان ممنوع على اي واحد يطوف
حتى ممنوع على جبريل الطواف
اطوفها بس ال هاشم
هاي يا كعبة بحرمها الكمر خادم
هاي زينب
بيت حيدر
بذرة شاتلها محمد
وجان يسكيها الصميده
بماي عينه
من يرد من اليتامه
بماي وجه الكله غيره
الــ لا فتى بالكون غيره
بت علي
وعلي واحد
والله واحد
الله حيا لا يموت
وعلي ليومك گبته جنها العرش

يا حسين
انت بكبر صاية علي
الجانت ايتام الله كلها تلوذ حدر ذيالها
هذا كله وحرب ابوك وحرب جدك
ما تعادل ساعة بالطف
ساعة الطف
موش ساعة
شلون ساعة البيها من ظليت وحدك
لا نصير ولا معين
شلون ساعة البيها حتى الميل خاف
كام يفتر عكس من زينب نخت جفالها
وما كعد جفالها
شلون ساعة
البيها وادعت الحسين
عين تربي على الحسين
وعين تربي عيالها

يا حسين
انت بكبر حسرة رقيه على الطشت
الماتت على شفافك التنزف عطش
موش من طبعك تنام
وسكنة تسهر
وانت رمشك ما رمش
ولو مو هاي القضية
القضية…
شلون شال الطشت راسك
وانت ربك كال
لو انزلنا ابوك على الجبل
طخ وارتعش

علم البراسك
بكد سجدات ابوك
غيره بيك بكد فضل طبرة علي
لــ عمر ابن ود
شلون تسلب خواتك

سجآد شآكر

الليلة ملتم الحزن من غير عرفه
وباهته عيون المدينة

الليلة المتانه على طولة يبات صاحي

الكاع من تندچ نذر يتگاسمه الفلاح وجفوف المساحي

والمتانه يوازي سكنه
وتصبر أتاني الشريعة بلاية جربة
وتفحط متانة وتنام .
وتقرى عل ملگه السلام .

ورقية أتاني أبوها زلوف ما بيها تراچي
والدمع حافر مرز من البواچي


ويابس الدم على اذنها
حنه چن بمتون حضرة

والسنين اطيح من زينب نذر
والهوى چنه مناشق
ضاگ بيها من العصر

تنخى وتسيير نعاوي على الشريعة
وتحجي لزنوده متن .

وتستحي ياذيه حچيها تخنگه جن خنگه عباية

وترجع هلال لخيمها بلاية عيد .
مثل ساعي بلا بريد .
تنهطر والجدم يعثر
تكعد وتلكاه الأكبر
نازف من عروگه جيل

وتثكل الدنيا بمشيها اجدام المتيه وطن.

منين ما يمشي غريب
اليفتح اذراعه على شبگه ويرد خالي يظل صليب .

وهي هاي
الكاع بس للطايح تفرع شبكگ
الشجرة من يبرد غصنها
يصل وجعها من العرگ

والحزن چنه كحل بعيون طفلة

والفرح طلبة همس
نورس على الراگ مذبوح العرس

بعد ياشوباش يرهم ياشمع
وأنتي مامش كل كتر طاح العزيز
وراده ومشدوها حيرة
مدوهنه جن ماي شاطي
وروج عالي يمشي وين يريد عد الله ماي

حيرة المنكوب يمشي بلايه راي

والرمح شد راسة للممشى بنحر
وشفته تناغي الدرب

زيبگ المغرب لچن يثكل على وجوه الغرب

من فزع حيلج عراضة
شفتي جف بلايه خنصر طحتي جن طيحة صريفة
هنانه جدمج ما كدر لفياي يعبر ركضت الدنيا شمس

أخ يل عندج عشيرة وظالة بعازة متن
الكاع من يشح ضواها لتصير للماله سجن


من تخاف أطفال عندج سولفي العباس يمهم
تطفح البسمه أمان
ولمي صبرج حدر روحج عش حمام

هي هاي
منين ما تنهاب كاع ايطيح دم
منين ما تنهاب جربة يطيح شوف
مشية العميان من تمشي السيوف

وليل مد روحه على طولة
والصبح غافي على متون النعش
اطلوگ المعسرات چن ليل اهدعش

كلمات : ايهاب عيال ..
اداء :مسلم الوائلي

يطيح الليل فوگ عيوني و اشكيلك
گـوم امشـينه تـچيلي و اتچيلك
تعبت عليك خل نمشي .. النار أدنت لرمشي
كلشي عيوني يردنه .. بس ما حصلت كلشي

تكابر و التدوسه الناس شيكابر
ندم و الخيل تصفگ حافر بحافر
الم عافيتـي لو لمك .. وجهك ماهو شيرسمك
الحافر واصل لطيفك .. رمشت عينك اتلچمك

أهـز بجـثتـك و انـتَ و لا چنـك
نـص منك جزيته و هذا نص منك
العمر لو مه العشگ فاهي .. واشوف اعمامتك ماهي
ماني مصدگه احچي وياك .. تگلهم هلمره ياهي ؟

اسولف وانتَ ساكت و انا محترگه
صدرك نعمة كون ايبوسه اليسحگه
يگلبي اتوهوس اشمالك .. فال الله و لا فالك
اليموت عليه شو ميت .. التموت عليه كتالك

شكثر ابچي دمع يا ضحكتي و عظمي
مثل الهيـل شو طحـنوك يبن امي !
شبيدي و رايح من ايدي .. دمي نشف بوريدي
يروحي العاشگچ عافچ .. صح حبيتي بس هيدي

بچيت و ضحكو عليه و گلت مو عيب
العاشگ صار عاشگ چي يسولف شيب

حرگو‌ گلبي و اخيامـي .. يغص السوط بيتامي
النفس ما يصعد بصدري .. التل شيصعده يجدامي

عقيل العرد

تأخرت عنك لأن
ردت الوكت يهدا

وشدة انت يا أبا الفضل
والشعر يم حضرتك هم واكع بشدة

ردت الشعر يستقر
واكتبلك شجم شطر
من يلم روحه الفجر
و تفتح الورده

كالولي عنك كمر
كلتلهم لوحده

وكالولي جوده انجفى
كلت النهر عنده

كالولي والعلكمي
كتلهم شحده

كالولي عنك طحت
كلت الضوى تبدى

كالولي راسه انضرب
كتلهم يرد عدل بس زينب تشده

والماي كلش رخص
ياهو اليجي وسده

وعباس عنده نهر
والنهر ما عنده

هد زنده عالمشرعة
بس جوده ما هده

وعباس حاجى الجرف
ومن شافه ما يستحي
حط وادمه بخده
..................

مهند حمود

هكذا الحب اذا جنَ عليك هو رزقٌ ساقهُ الله اليك
من يفارقه الحبيب .. لايفارقه النحيب ..
هو رزق ساقه الله اليك

فقه تذكرة الدخول لـ نينوى
ليل ماصلى ولا ركعة ضوة
والمرض متقمص ادوار الدوة
حتى ذرة الهوا حسرة اعلى الهوا
حاط راسه ابين رجليه اللوا
والدمع والشمع نفس المستوى

(اينعَ الفجر السموم من هنا ..
وبهِ معراجُ اكليل القنا )
من لهُ فيهِ نصيب .. لايفارقه النحيب

اشعر الجو سجن مسجون بسجن
حاله حال الهوا والماي الحزن
حلم بس مازاير گبور الجفن
وغصن ينعى اعتقد ميته ام غصن
گبل دافي وهسه شو حافي الحظن
ومثل لون السما شو لون المتن
(بعثَ النجمُ بريداً للفنَان
جاء فيهِ ان وعد الله حان)
ياترى هل من مجيب ..لايفارقه النحيب

طفل بعده وشيب اكو براسه الگمر
چفن ابيض لابس هلال الشهر
الغيمة (ام) واخو عبدالله المطر
والجفاف هنا تشاهد عالنحرعالنهر
عطش اخرس كطع سالفة النحر
والجفِن خيمة ..او وتد خيمة السهر

(كفهُ اعشوشب فيهِ القنوت
بهِ يحيا من بهِ حباً يموت )
ولهُ لوح الصليب ..لايفارقهُ النحيب

حسين خيمة وكاعدة الخيمة ابخيام
عنده افضل زاد بالدنيا الصيام
الصبح ابيض .. لأن يم گلبه ينام
جرح باني بكل غصن عش للحمام
بي ختام المسك مو مسك الختام
وبعد عينه اقرا السلام اعله السلام

(دحرَ الضوءُ ثعابين الدجى ...
واضمحل كل ديجور سجى)
وغدا من يستغيب .. لايفارقهُ النحيب


طلع وي الناس مشاية التراب
والهوا بالموكب يوزع ثواب
غسل وجها بدمعة عيونه السحاب
ماشرب ماي الدعاء المستجاب
وعزا مسويه ام الكتاب اعله الكتاب
حسين فاتح كل جرح بي لله باب

(يُدفنُ كل امرءٍ تحت التراب
وحسينٌ يدفنُ فوقَ القِباب)
فالشروقُ لايغيب ..لايفارقهُ النحيب

كلمات : مهند حمود
اداء : سيد فاقد الموسوي

@sha3er_100

عقيل العرد


هذا آخر يوم باخلاق العرب

سنبلة
وسبعين حبة من العِناد

سنبلة عطشانة لله
وموسم الكوفة جراد

رادوا يضيعونه ظنهم
نثروا اشلاء الحسين
والحسين اردود زاد

الحسين شكد غريب
نية بيضة وطاحت بديرة سواد

اتلاحك ابنك يا محمد
أمتك أعلنت ضد ابنك جهاد

اتلاحك ابنك (خارجي ) بعين القصور
اتلاحك ابنك
گله بايع
الصرايف راضية بحكم الفساد

اتلاحك ابنك..
گله بايع
هاي اجاويد العرب تعشگ يزيد
امتيازات ..
ورواتب
حكم ري.. وفلوس.. بايع و استفاد

العمر خيطه ايتلولح
من (أنس) لگماط عبد الله الرضيع
كلشي بالطف ما سلم من الحصاد

هي هاي امة محمد ؟
حطبت بيها ام لهب گبل الحسين
وشب لهبها بحيله
بخيام الحسين
واللهب تاليه رماد

هنا خرق واضح لقانون الحرب

هنا الماي انگطع عن شفة رضيع

هنا سهمهم فقط صالح للشرب

يوم  عاشر
چان اخر يوم باخلاق العرب

الشلب ما صحله گطرة من الفرات

وبالفرات گياش ما صح للگصب

هذا اخر يوم باخلاق العرب

ينسلب ثوب اليموت بلا حياء
وينگطع خنصر لجل خاتم صلاه

وراس الحسين اعله رمح الله انصلب

حيدر عبيد



مهموم أجي لحضرتك ..
وأستحي وما أشكي

عار البچي اعله الزلم...
بس أحس راحة شكثر بگبالك من أبچي

وياك أسولف دمع...
وأدريك تقره الدمع مولاي من يحچي

كلما أصد للگبب  ،، 
ما وچد من الدمع
أمسح بچفي الدمع ويرد أنوب ايهمل

أوگف أباب الصحن
واليطب محّني الظهر يطلع وظهره عدل

وأتخيل بكل ظهر
مطبوع چف المسح
بس بيه نقص خنصر

بالضبط بس أربعة
إبهام.. والما تسب.. والوسطى.. والبنصر

مولاي ردت أشتكي
بس أستحيــــــت هواي

يصير أنت كلك عطش وآنه أشتكي أعله الماي

ششكيلك من الوكت
لو بيهـ خير الوكت مولاي چا راحك

ولا طفله تمشي بزجر وأسياط ذباحك

هو المهم منتصر والحاربك منذل
والمو مهم سيدي جيتك وأريد الحل

مولاي ما ظل بعد غيرك يسد عازة
حتى الحسبته ذخر وأنخاه من اتوازة

من عوزي گمت أعتقد كلش بعيد الطف
ظهر اليكسره الحمل بس يم ضريحك خف

نآئل المظفر


المال والبنون
زينة الحياة الدنيا
والباقيات الصالحات
خيرا عند ربك ثوابا وخيرا املا

وانت لله انطيت مالك والبنون
والمشن للشام
هنه الباقيات الصالحات

العلمن بالعفه
كيف يكسر خشوم الزلم
ستر البنات

ياعبايه
الكشفت خوف الرجال
وثبتت من القوة اقوى المستحات

الزلم بيج اقتدوا
ظل من وراج
الزلمه بالديوان يكشخ بالعباة

تحجبت زلم ونسه بمجلس يزيد
عفه زينب
ما تحاجي السافرات

وكفت كل الحناجر علــ النصال
بخطبة نفخت صور باحرف ذاريات

زلمه من ماتوا هلي لحد يصير
الصار شفته بعيني مو عين الرواة

ما قدم فارس عليهم بيده سيف
امده الفرسان لو صاروا رماة

وانه يمكم ما ادنك علــ الحسين
المات خاطر لا نظل مدنكات

اشكي بس لـ الله حالي
وبس لخوي
خويه من حزني الجبال محدبات

اكثر من الموته غطاني التراب
لو عباتي انكثها .. ينطم الفرات

حتى اصبر بلوتي يابلوه اشوف
يامره الفكدت اخو بهاي الصفات

انا اخت اثمنطعش زلمه
وبقيت ..
بلا اخو وتفتر علي خيل السبات

چانوا ارماح التعلكوا علــ الرماح
امتوني .. واملاك الجتاف مأمنات

ما تجرأ يطكني حر النسمه يوم
محوطيني اخواني من ستة جهات

خويه واكثر شي هضمني بكربلاء
وردت اطيح ويالدموع اليابسات

من شفت عباس ينزف عــ التراب
والشمر يضحك علي من يمي فات

الــ الله خالق كونه الهم
ما خذوه …
كله ظل وقابلوا ربهم حفاة

والله لو رافع نبي لــ رابع سماء
حسين عالعجماء يسجد بالصلاة

جبآر الشدود

ربك صوَّر بوجهك علامه
اعله عينك سيف
واعله السيف شامه

انطاك وساترك من شر العيون
الكريم وحاطك بسور السلامه
ودستر وجهك وداره اعله فرجال مثل دورة بدر ليلة تمامه

وخذه الثغرك
إمن إخيوط الشمس خيط
وطرز بين الشفاف ابتسامه

وجمع جيد الغزال وعين شاهين
وحسن طاووس وترِهدِّن حمامه
وظهر سدره وعذوبة ماي شلال وخصر دله وترف ريشة نعامه

وهبوب عذيبي غبشه
ونفحة ورود
ومحنَّة ناگه ومروة نشامه

وحلاوة كيك عيد
او وهج ياقوت
وطراوة مَلمل وهيبة زعامه

هذن كلهن جمعهن ياترف بيك

اموت وقهر كاتلني مرامه
وتعمَد حتى بالدنيه احترگ بيك ويحاسبني گبل يوم القيامه