لحن(صفوف القافله)
بصوت
ملا حسين علاء
كربلاء

((ليش تركض))


أديـنه أمچـتفه ومانگدر انكض
على هونك يحادي ليش تركض
عليمن كاض رايه
هوه أحنه سبايه ... ليش تركض
""""""""""""""""""""""""""""""""""""""""""""""""'''""""

مــن فـجر الله گمنه
وصـــلـــينه بحـــزنه
وعـــالــهزله صـعدنه
وضل يحچي دمعنه

وظل حتى أسمي يبچي من كثر مآ
صاحو ياسبيه
أَرَكـــب هاي تــــوگع هـــــــاي ويلاه
وشلون برقيه
هـــــزلّ وبــــــــلا هـــــوادج آه يا آه
حبل صار بأديه

ســــارو بـيـنـه بـــالويــلات والطگ
صرنه أحنه الخوارج همه أهل حگ
مشينه أبلا درايه
هوه أحـنه سبايه ... ليش تركض
""""""""""""""""""""""""""""""""""""""""""""""""'''""""

العــثره أتــعيــش بيـنه
الــحبــل شــابـگ أدينه
الدمع بالهمسه يحسين
بــس گـــولوا أشجنينه

زاد الـطــگ علــينه والشتـم زاد
وأتغطه بسكوتي
مــو يـمي النشامه وذيچ الاولاد
تمنيت آنه موتي
وكل ساعه يسبني ودمعي ينعاد
ومخلصه سلوتي

أخوتي أمذبحه ونحور حمره
وأنه مسبيه نص الروح جمره
هاي شلونه هايه
هوه أحنه سبايه ... ليش تركض
""""""""""""""""""""""""""""""""""""""""""""""""'''""""

غــربه وليــل هندس
وأنه بدموعي أهمس
بــس يسـمعني جلاد
يضل بطـفالي يرفس

أتــوسد حـبل وأغفه آنه بهداي
وأفز فزتّ حـمامه
خــاف اتروح طـفله أسهر هواي
عيني أعله اليتامه
بعيني أتبع اليحرس رايح وجاي
مــابــيـهـم شهامه

هاي أتصـيح عمه وتدمع العين
ذيچ اتصيح عمه وين الحسين
وراسي انشدهّ رايه
هــوه أحــنه سبايه ... ليش تركض
""""""""""""""""""""""""""""""""""""""""""""""""'''""""

بــعــيد الــشــام عني
دربــــه الــــزاد ونــي
هضيمه السوط وياي
النبي مو جـدي چني

زيـنـب آنــه هـيچ إيـصير چاليش
أنه بـت الـــرساله
سبيه أمشي بحبل وبوليةّ الجيش
الزمن هذا شجاله
الخاطر أسمي هـاي الوادم اتعيش
كدري ايموت حاله

وبــاب الـــقصر تانينه ساعات
واهل الشام كلهم ناس شمات
ألف وسفه النهايه
هوه أحــنه سبايه ... ليش تركض

عبد زينب
محمد الابراهيمي

لحن(ليش تركض)
بصوت
ملا حسين العنزي
ناصريه

((أنا ابنُ))


أنه بيه الصور عاشـت بالعيــــون
أنه السجاد مدري وعايش شلون
اغمض لو على عمتي يضـربـــون
يركضون الهزل بيه يروعـــــــون

اسـد اذني من الصياح
السوط بجسمي يرتاح
اصيحلهم تعالو
كثرو بروحي الجــراح

أاضربوني اعله اديه
وعـــــــوفـوها رقيه
ابـد ما يحمـــل الاه
گلـــــــــب الهاشميه

أنا ابنُ .. انيسات النفــوس
أنا ابنُ .. منارات الشـموس

""""""""""""""""""""""""""""""""""""""""""""""""'''""""

الطفل لو طاح ابوي يغمض العيـن
وتسمع بالضعن بس بويه يحسيـن
وتركضله الچبيره العـمر خمسيـــن
واصيحن عمه زينب لا تطيحيــــن

تگلي بمدمع يســـيل
متـــــن الروح ويميل
يعمه احچیلي بالصار
گلي اشسوت الخــيـل

صدر حسين ينداس
نايم ليـــــــش عباس
و نتباوع على الروس
دنگ مستحـي الراس

انا ابنُ .. طويلات القنوت
انا ابنُ .. ربيبات البيـــوت

""""""""""""""""""""""""""""""""""""""""""""""""'''""""

زينب تصفن و معناها الاشواگ
ياويلي وتفــــز من كثر الافراگ
والمشتاگ عـــــمره يصير خناگ
گلبها هـــــواي للعـــباس مشتاگ

يا هذا الحبل شــوگ
يويلي چفها مشبوگ
من تصيح يــحسـين
تسمع وَنَــــت الـنوگ

الهزل تبچي علـــــيها
چي مشدوده اديـــها
زينـــب لا تونيــــــــن
الحجر يبچي السبيها

انا ابن .. خشيعات الركــوع
انا ابن .. كسيــرات الضلوع


""""""""""""""""""""""""""""""""""""""""""""""""'''""""

اسولف و السياط وياي تحچي
انامن عله النــاگه وگلبي يبچي
كتلو كل اخوتي وبعد شحـچي
ياهو يلزمه كون الحـمل يرچي

اسمــــــــع زيـــنب تگول
الاخو مكتول مكتــــــول
الصخر يبچي على الحال
اسير و جســـــمي معلول

مريض و علتي احبال
و هلي ضــــلو بالرمال
دمهم بلل الگــــــــــاع
وآنه مدوهن الحــــال

انا ابن .. امــيرات السماء
انا ابن .. عفيفــات الحياء

""""""""""""""""""""""""""""""""""""""""""""""""'''""""

طبينه و ابد ما عدنــــه كل مخــرج
بنص السـوگ و الشمات تتفــــــــرج
يطگونه بحجر و بحرگتي اتوهــــج
و اَسَكن الروح كلمةّ ما تظل تفـــرج

خوارج صاحت الشام
واحنه اسلامنه اسلام
ما فارگنه جــــــــبريل
محمد صان الاحـــكام

الشام شبيك مـــرتاب
ابونه داحــــــي الباب
الخوارج سكنو قصور
حسين وســادته تراب

انا ابن .. نقيات الجناب
انا ابن .. ربيبات الكتاب

عبد زينب
محمد الإبراهيمي

لحن(انا ابن)
بصوت
ملا صادق هاشم
ملا علي مهند

((يگايدني))


مــــا أستــــاهل بدربك مشـــــايه يگايدني
اجيتك والصدگ حبك وآنه ادريك متهدني
أنذب كون عن دربك حنــين ولا فله تذبني

رحمتك تحبس عيوبي .. يمحبوبي
يماسح بيــــدك ذنوبي .. يمحبوبي

اجيـــــــك أمعصب بدمعه
أعله صيوان العشگ شمعه
لــــــــو مـــــا أنته بالـــدنيا
العشگ مــــــا نفتهم شرعه

يامولاي يا اباعبدالله ...
""""""""""""""""""""""""""""""""""""""""""""""""'''""""

مَشــــــيّ والدمعه ليليه تنزل خاطر ضعونك
على عيوني اللطم نيه اللطم كله الدفو عيونك
الحــــــب لازم دفع ديه وحُبك ديته جنونك

عفت الناس وضعوني .. بجنوني
هَلـــــي والدنيا ملوني .. بجنوني

أجيت بخطوه خجلانه
حبيبي يـــــابس لسانه
وعّيـــــــاله على الهزله
مــــــن الهزله تعــــبانه

يامولاي يا اباعبدالله ...
""""""""""""""""""""""""""""""""""""""""""""""""'''""""

خيالي اليحّدي وأتعثر وأگـــولن هيه مو هيه
هاي أم عون وأتصور أعله هزله شلون علويه
حبـــــل ياناس يامنضر تَعب ومّتون محنيه

الحبل ومضيگ أشباگه .. ومشتاگه
صعبه وتـــركض الناگه .. ومشتاگه

تظل عالناگه محـتامه
للعبـــــــاس وأيـــــامه
وللخيمه وســـــوالفها
وخدرها وذاك هندامه

يامولاي يا اباعبدالله ...
""""""""""""""""""""""""""""""""""""""""""""""""'''""""

خرابه ومدمع العيله وياصفنه التحــيرهم
جرح مُرضع تلوليله الحزن صاير يصبرهم
ياهو اليسوه تشكيله لا حامي الذي يمرهم

الحچي ميفيد تصويره .. ياحيره
أميره صارت إيســـيره .. ياحيره

اسيره ام الخدر هايه
لا محمــــــل ولا رايه
ولا خوان يحـــدوها
لذلك نمشي مــشايه

يامولاي يا اباعبدالله ...

عبد زينب
محمد الابراهيمي

لحن(يگايدني)
بصوت
ملا حسن الزينبي
ناصريه

((خطوةّ المشايه))


مو حجه وحده تنكتب
سبعين حجه تنحـسب .. خطوةّ المشايه

""""""""""""""""""""""""""""""""""""""""

متفيد الاصـــابع لو حسبنه
محتاره يهـــل الوادم كتبنه
شفيد القلــم واليدري ربنه
يعني شگد ابو اليمه يحبنه

الصادق كلمته حلــوه
حجه وعمره بالخطوه
حــد ما وصل سبعين

گلوله شنو شصاير
هاي هواي للــزاير
حــد ما وصل سبعين

يازاير افهم مـن تحب
سبعين حجه تنحسب .. خطوةّ المشايه

"""""""""""""""""""""""""""""""""""''''''''''

الصــــادق كلمته معلومه بيها
مـــــــن اوجوهنه يسلم عليها
من تنزف سمار ابچي السبيها
شما نمشي فـــلا نشبه مشيها

كون بجرحك اوصافك
وخـــــل الرايه بچتافك
أحنه زلم الحسين

قَدس هاي خطواتك
وكون الخير چلماتك
احنه زلم الحسين

يل مايك بحبك عذب
سبعين حجه تنحـسب .. خطوةّ المشايه

"""""""""""""""""""""""""""""""""""''''''''''

اسمع مني هاي وانــته ساير
كون تزور وانته بحــبه حاير
وكون دموعك تصير المناير
حتى الزهره تشهد ليك زاير

هذا شعنده ينفعلك
انته الزهره تشفعلك
وتنضر ام البنين

ام عباس مشـــايه
هيه وياك تچـــايه
وتنضر ام البنين

للكلمه حَسب من تذب
سبعين حجـه تنحـسب .. خطوةّ المشايه

"""""""""""""""""""""""""""""""""""''''''''''

لو ما حسين چاهسه انته وينك
چا حــــتى الدمع مـــازار عينك
حب حسين دين وصــــار دينك
وصار الشمعه المّضوي سنيـنك

زور ودمعتك خدمه
حب حسيـن للزلمه
احنه زلم الحسين

هاي الخدمه تشريعي
رافع إيدي أنــه شيعي
احنه زلم الحسين

والخدمه ماي وتنشرب
سبعين حجه تنحـسب .. خطوةّ المشايه

عبد زينب
محمد الابراهيمي

لحن(خطوة المشايه)
بصوت
ملا حسين العائشي
بصره

((ياحبيب عيوني))

شـمااضيع بدربي اني
ودربك وشوگه لگاني
شكد نسيته ومانساني .. ياحسين

مانســاني وزال همي
بـي أبي هـــــوه وامي
شمااضيع حسين يمي .. ياحسين

شما تجر بيه الــدواهي ومن اضيع بروحي
الگــه دمعه بطرف عيني وياحسين بنوحي
الذكرى والموقف يلمني لوصحت مذبوحي
هوه بس هوه الاعيــشه هوه باقي جروحـي

من يحس دمعي تجــاره
يـــــجيبني يمـــه زيـــاره
وروحي ترجع من اشوفه
بّـــــگبته وذيــــچ المناره

ياحسين ياحبيب عيوني ..

"""""""""""""""""""""""""""""""""""''''''''''

خادم وأمشي أعله رايه
وعبد للـــــراحن سبايه
وبخـــدمته وبيدي رايه .. ياحسين

وداعةّ السبل چـــفوفه
لو ذبح هـــــم مااعوفه
وأبقه مشتاگ الطفوفه .. ياحسين

مايجف شوگي ودمعتي ورسم عاش بعيني
واليصــيح بأسمه اگـــــله هذا بس حسيني
هـــــذا شايــل روحي بيده هذا كل سنيني
هـــــذا احــبه وحيل احبه هذا كل تكويني

هذا معشوگي وحبيبي
هذا بالــــــدنيا نصيبي
مـــايرجعني مـن ازوره
هذا ابو الأكـبر طبـيبي

ياحسين ياحبيب عيوني ...

"""""""""""""""""""""""""""""""""""''''''''''

أگطع بحبه الصحــاري
وامشي مشايه بنهـــاري
ومجلس الدمعه خياري .. ياحسين

انزف الواني اعله موده
يل وجودي من وجوده
ويا خلودي من خـلوده .. ياحسين

اسمــــي مقرون بحروفه واسمي صار الهايم
واسمي ضيعته بخدمته واسمي هسه الخادم
شماخدمته مّقصر آنــــــه وحيل اضلن نــادم
كون اطش روحي بثوابه خلها تحجي الوادم

لو اطش روحي وضميري
المهم بالخــــدمه مصيري
هوه ديني وهـــــوه امامي
ولو طحــــت هوه مجيري

ياحسين ياحبيب عيوني ...

"""""""""""""""""""""""""""""""""""''''''''''

ياعشگ صاعد هـــــيامي
ياسلام الله اعـــله امـامي
ومن ذنوبي اهوه المحامي .. ياحسين

انته حارس حتى گلبي
انته حب وفوگ حــبي
بيك اشكره هواي ربـي .. ياحسين

احمد الله آنه واشـكره من صرت محبوبي
دروبي عايفها بغـرامك وانته صرت دروبي
شگد حنين وماعفتني وتستحي من ذنوبي
وخدمتك ثوبي الاحـــــبه وماامل من ثوبي

خدمةّ الزاير مــــصابي
قطعه اعلكها عله بابي
المهم اسمي بســـجلك
وردت حبك مــو ثوابي

ياحسين ياحبيب عيوني ...

"""""""""""""""""""""""""""""""""""''''''''''

شما احبك جـرحي يكبر
ودمعي يامــــــولاي يكثر
كمت اشوفن كلشي منبر .. ياحسين

الخدمه للعاشگ هويه
الغربه عن دربك منيه
انته اكبـــــر من هديه .. ياحسين

ياهـــــــــديتنه الـــــعزيزه الماتـفارگ بالي
انـته كل حــــــرف الاگوله انته كل اقوالي
انتـــــــه عـالي بس احسن بالعشگ تـدنالي
وخدمتك صارت قريني بصفي مثل خيالي

خدمتك هيه نجـــاتي
هيه صارت كل حياتي
وبالگبر هم خدمه گالو
راح اخدمنه بممـــــاتي

ياحسين ياحبيب عيوني ...

عبد زينب
محمد الابراهيمي

لحن(ياحبيب عيوني)
بصوت
علي احمد العبودي
ناصريه

((ويهزني حبك))


يبردني الذنب ويهــــــــزني حــبك
اريد أتعنه مشــــــــاي أعــله دربك
مشلـــول ويتاني الخطــوه بالروح
يمشدود أعله روحي وجازي قربك

شحــــلاةّ الرايه بيدي
المشي يحسين عيدي
الحب هـــــوه بوريدي .. ياحسينا

جمر بالشوگ صاير
وأسمي يصــير زاير
اجي بجــــناح طاير .. ياحسينا

اتراب الدرب .. هوه الدوه
ونور العشـگ .. في نينوى

ياحسينا ...
""""""""""""""""""""""""""""""""""""""""""""""""'''""""

أهاجـرلك عشگ يمشيب العين
يعالي الروج اجيتك والبلم طين
اشـــوف البلم خَلص وآنه محتار
غرگان وأمـدلك الأيدي يحسين

مدّ إيدك علــيه
يتدري النـار بيه
وأنه عبد السبيه .. ياحسينا

يتدري مالي غيرك
لاتحــــرمني خيرك
أنه بكلشي أســيرك .. ياحسينا

ماعندي خل .. ولا سند
بس انته ألي .. ماكو بعد

ياحسينا ...
""""""""""""""""""""""""""""""""""""""""""""""""'''""""

على متون اليحب اجمل علامه
رتبه ومــــن ذهب هيه الخدامه
ذره ومــــــن ضمه مولاي ياريت
ويريت الروح جمره ومن خيامه

شكثر عندي اماني
جمـــر ريته چواني
حتى بهاي أعـــاني .. ياحسينا

حبــــــــــل ريته بديه
اعله هزله وسوط بيه
بيه ومــــــــو رقـــــيه .. ياحسينا

ياريــت أنه .. بـــــيه الألم
وبعيني أنه .. ذاك السهم

ياحسينا ...
""""""""""""""""""""""""""""""""""""""""""""""""'''""""

نسيت جروحي وجروحك تهمني
المخيم بالجمر صــــــاير يضمني
خيال البيه يسرح فـــوگ الارماح
نحرك يابس وكلــــــش هضمني

لگيتك تتلو قــــــرآن
وتشم دخان عطشان
وتسمع بچي رضـعان .. ياحسينا

خبر تتناقله الريــح
صوت يصيح لطيح
أضنها زينب تصـيح .. ياحسينا

ليش الهزل .. يتـــــراكضن
سر الـعرش .. طاحن گضن

ياحسينا ...

عبد زينب
محمد الابراهيمي

لحن(ويهزني حبك)
بصوت
ملا بشير شوگي
بصره _مّدينه