((تحچي وياي))


هنيال گلبي وتحچي وياي
يالمشـــترك بدموع عيناي
يفياي عمري الماله شــراي
يالمشتريني وجــاي مـشاي

شفت الحب ألـم
يعني الحب سهم
وجمرات الخـــيم .. تحچي

الحب البي جرح
يعــــــني وتنذبح
وبراس الـــــرمح .. تبچي

يبـو الكلشي
العمر يمشي
الجرح صابغ
وجه رمــشي

حسينآ .. حسينآ

"""""""""""""""""""""""""""""""""""''''''''''

والعام شفتك من مضه العام
گتلك غريبه وگتــــلي يا شام
گتلك حنين وگـــتلي محـتام
گتلك الحافر گتـــــلي الايتام

گتلي من الهزل
طايح چم طـفل
ومضبوب الحبل .. ويلي

ابلا خيمه گلت
ضلــت يا اخت
وياسوط اليفت .. حيلي

السمع ينصم
متــــــن ورم
خـــدر زينب
وسف ينطـم

حسينآ .. حسينآ

"""""""""""""""""""""""""""""""""""''''''''''

مشاي بس جروحي طيبات
يمته ألچم من المســــافات
ياشام كافي وكافــي شمات
ميته العقيله وارحم المـات

ماتت مـــن زمن
من چبد الحسن
ومن راح الضعن .. ماتت

من ركضّ الفله
مــــــاتت كربله
هيه وعـــــــايله .. راحت

ألف عثـــــره
وچوي جمره
وركض هيمه
برمح نحـــره

حسينآ .. حسينآ

"""""""""""""""""""""""""""""""""""''''''''''

شيصـــير بيها وبعد شيصير
والشام لا مـــــــايرحم إيسير
الروس الغوالب صارت أدير
والحسره بيها هــواي تفسير

خدر الطالبي
ياوسفه بسبي
ويابيت النبي .. يهلي

بحبل أمــيسره
وأحنه المغفره
يحسين اشجره .. گلي

انشدهّ بالي
بقصـر تالي
متت خـويه
ومشه حالي

حسينآ .. حسينآ

عبد زينب
محمد الابراهيمي

لحن(تحچي وياي)
بصوت
سيد حيدر الموسوي
بصره

((وبرها))

شــــوچ الگاع مايــرحم .. وبرها
وحــزني البحــــر ميلمه .. وبرها
الناگه من الضرب طايح .. وبرها
واحسها اتصيح بثواب الزجيه


عبد زينب
محمد الابراهيمي

((وين أبويه))


وين أبويه .. المايجيبه الليل ميجيبه النهار
وين أبويه .. الخــرابه أبلا سگف وبلا ستار
دليني وأمشيله
ياعمه وأشكيله .. وين أبويه

""""""""""""""""""""""""""""""""""""""""""""""""'''""""

كل ماغفت عين الدمع
تفز بيه الجروح
يمرني حلم وآنه بحزن
وأحزاني أتنوح
يـــــاعمتي يـــــاسلوتي
چايمته ونروح
اسمع حچي من دمعتي
وتگلي مذبـوح

خل يرجع ألي وأنسه الحبل وأنسه السبيه
عيني تشاهده وأنسه العــــــده والغاضريه
التراچي فدوته كــــون اسمعه ينادي رقيه

خطــاري ويجيني
أفرش حتى عيني

عمه زينب .. عمه جيبي فراش هلبت لن ابوي
عمه زينب .. من يجي ياعمه كون إيجيب أخوي
عبـدالله ألوليله
ياعمه واشكيله .. وين أبويه

""""""""""""""""""""""""""""""""""""""""""""""""'''""""

أتلوه أنه گلبي انصـــدع
ودلالي وشــراد
اركض جرح لو استــــمع
عطر الابو عـــاد
خلگ الگلب صد بالمحــن
بالباب جـــــــلاد
ارد امشي بس ماصح ألي
وشام الجرح هاد

چم سوط وألم بجرح المتن هاي الحقيقه
ماتت قصتي مات الورد وكـــــل الحديقه
ايامي انتهت يــــــــاوالدي خلصت دقيقه

اسئل ياهي آني
بخرابه يا زماني

هذا حالي .. زغيره وانشد ما أمل من السؤال
هذا حالي .. الاميره شلون تغفى بالحبال
دهري شسويله
ياعمه وأشكيله .. وين أبويه

""""""""""""""""""""""""""""""""""""""""""""""""'''""""

جرحي انفتح راح الصبر
ويا محنتي اتزود
دمعي نزل فـــوگ الحبل
وصيحاتي أشهود
عمه صحت لَمـــن شفت
عيون الجرح سود
ردت الابو يــــــرجع ألي
ردت الابو يعود

تراتيل الجرح اصرخ دمع وآنـــــه بخرابا
كتبت اعله الزمن آنه الجرح فـوگ الترابا
ويـــــاكلمةّ ألـــم من صيحت وينك يبابا

وينك بويه وينك
وينك يــا حنينك

بيه سمعو .. والقصر يذبح دمعتي من العيون
بيه سمعو .. وبالطــبق جابو وطن كله شجون
شفته بدمع سيله
يـــــاعمه اشكيله .. وين أبويه

""""""""""""""""""""""""""""""""""""""""""""""""'''""""

وتفاجئت شفــــت النحر
ومغمضه العــــــين
مابي حضن ويـــن الدفو
يابويه چــــــا وين
من العطش يــابس جرح
صحت آنه يحسين
گــــــتله (أبا) بس ابتسم
حتى انسه السـنين

مافز من صحت وتـلوعت شو ماحضني
أظل أبيا غـرب بويه الولي ياهو اليلمني
ضربوني بچعب رمح وأنه دهري شمرني

مشموره بدمــعتي
وتچويني حسرتي

چلمه گالت .. ومانزل منها النفس ضاع الونين
چلمه گالت .. هلا بعطرك يابعد روحي الحسين
وبالسكته تحچيله
ياعـــــــمه اشكيله .. وين أبويه
""""""""""""""""""""""""""""""""""""""""""""""""'''""""

صــوت اختفى من طفلته
وعمتها حيره
تفل الحبل مـــــاتت عشگ
هاي الاسيره
هوه الحب ألم موت وسهر
وقصه چبيره
وبدمع العشگ غسلو جسد
طفله وأميره

شهيده وبالعشگ نغمةّ حزن كل الليالي
دفنوها بلطم دمـــــع الأسى منها يلالي
رقيه اتحملت كل السبي وضاع الدلالي

ولاگتها المنيه
ماتت يا رقيه

ياشهيده .. خذت وياها السبي وحتى التراب
ياشهيده .. خذت وياها الهزل بويه ومصاب
السجاد هد حيله
ياعـــمه اشكـيله .. وين أبويه

عبد زينب
محمد الابراهيمي

لحن(وين أبويه)
بصوت
ملا مرتضى الشمري
حله

((آنه الحسن))


زينب يخيـتي يــاضوه العين
راح أحچي خويه يالتسمعين
درب الـــركض خليــني أدليچ
مـــن المخــيم حـــد الحـسين

بعد عيني باچـــر نعــــشي لسهامي يوديني
بعد عيني گبـــــل لا موت يازينب اسمعيني
بعد عيني أنه يبست ورگتي وخلصت سنيني

كلمتي بهـيامي
وياجرح كلامي
عيله لامحــامي .. زينب

والـــوطن تهدم
مايظـــل مخيم
والضعــــن تيتم .. زينب

يازينب آنه الحسن ...

"""""""""""""""""""""""""""""""""""'''''''''''

هذا الطشت بي چبدي مسموم
مـــــاينفــع أتضـــمدينه ملچوم
هَيّن يزينب بــــــاچـــــر الخــيل
باچــــر الخــيل أتســلب الهـدوم

چبيره أنتي يزينب خويه اسمعي هاي سالفتي
چبيره أنتي وتّصيحين راحــــت ويلي قافلتي
چبيره انتي وسنينـــچ چبيره من الركض متي

ماتظل حميه
اسمچ السبيه
هايه غاضريه .. زينب

خـويه لاكفاله
حالتچ يــحاله
وگلبچ وسؤاله .. زينب

يازينب آنه الحسن ...

"""""""""""""""""""""""""""""""""""'''''''''''

باچر يچلچل لـــيل الجروح
وليل أهدعش يازينب بنوح
مابين سوط وبين جمـــرات
مابين خيمه وبيــن مــذبوح

على الشمعه وي رمله يــــزينب گعدي من تنعه
على الشمعه حتى الخيمه صارت هم تهل دمعه
على الشمعه وأمـــي الطاهره يمچ تجي البضعه

فـــاطمه تجيلچ
وتنحب الونينچ
وتركض وتعينچ .. زينب

اتسكـت اليتامه
تلملــــم العمامه
وتنعه عالنشامه .. زينب

يازينب آنه الحسن ...
""""""""""""""""""""""""""""""""""""""""""""""""'''""""

فجر اهدعش متلوعه العيال
مابين هزله وبين الحبال
المايلزم بكل قوته يطيح
وكل ساعه ضعنچ حاط ياشال

على الكوفه تمر أضعونچ بحيره وألف خوفه
على الكوفه أميــــرتها انتي يازينب المعروفه
على الكوفه هضيمه وبالحبل هسه ومچتوفه

خويه ياحبيبه
صرتي ياغريبه
هايه يا مصيبه .. زينب

خدرچ بعفـافه
لكن وحـسافه
بغربه ياوسافه .. زينب

يازينب آنه الحسن ...
""""""""""""""""""""""""""""""""""""""""""""""""'''""""

درب الشـــماته باچر الشام
ومنچ يزينب تــــوگع ايتام
خوله وصفيه عين الجروح
وماتت رقيه بگلب محــتام

أعله والدها تريده وهيه مذبوحه بعشگ ودها
أعله والدها تـــــــــنادي عمتي زينب دساعدها
أعله والدها تشم راس الأبو وجمره على خدها

ماتت المصابا
زهـرةّ الخـرابا
بحسرةّ اليبابا .. زينب

گلبيـچ بحسرته
وجفنچ بدمعته
وچبدچ وجمرته .. زينب

يازينب آنه الحسن ...

عبد زينب
محمد الابراهيمي

لحن(آنه الحسن)
بصوت
ملا سجاد الزيادي
ناصريه

((حتى احب))


بس نضره منك حتى احب
مو كافي أحبك بـــــالجذب .. مو كافي

تدري بضمـــــيري المـو ألك
وتنـــطيني كلـــما أســــئلك .. مو كافي

أحچي بمضاميــن العشگ
بس آنه مـو يـــــم العشگ
ويدروني بالخدمه احترگ
بس انته تدري مــو صدگ

صـــــوتك فزز أگبور اليحبون
والعــدلين ماچـــنهم يسمعون
لَمن ردت ناصر وگـــفت الگاع
بس گيد العشگ خلاك مرهون

حبيبي ياحسين ...
""""""""""""""""""""""""""""""""""""""""""""""""'''""""

تسجلني أجـي لزيارتك
مشايه وأگصد حضرتك .. مشايه

يمته الجراحك أحتــوي
أمشيلك ومـــا منچــوي .. مشايه

والخـــاطرك ريـــت احتمل
وكون أجرح چفوفي بحبل
لو أعرف الصعـــــدت منــو
چــان أفــتهم ضيــم الهزل

عريــــان وتــوزع بيـدك أثياب
مارديـت واحــــد لازم الــــباب
چا ليش انته بيك معَيد السيف
ومسافر بنحــــرك حتى التراب

حبيبي ياحسين ...
""""""""""""""""""""""""""""""""""""""""""""""""'''""""

خليــني أشـوفن وأستدل
لو عثره حتى أمشي عدل .. لو عثره

حتى اذكر العثـــــرت منو
يمكنها المضـــيعه أخـــــو .. لو عثره

ذيچ المشت صوب النهر
ذيچ الشجن بـــيها وقهر
ياهـــــوّ اليـــــدليــها گمر
مرعوبه مجسومه الضهر

حرامات آنه عايش وأسمع الصار
مامحروگ بيتـــــي وبيـتك بنـــار
بس عدكم وراثــــه النـــار والباب
وحبـــال وسجـــن ومذبحه ازغار

حبيبي ياحسين ...
""""""""""""""""""""""""""""""""""""""""""""""""'''""""

طشرني ورجعلك جرح
وأتعلگ بساگ الـــــرمح .. وتعلگ

الحب قسـمتي بدنيـتي
وللخيمه حاجز دمــعتي .. وتعلگ

ياگلــبي أبچـي الخاطره
وعيــاله شـــافت منحره
صعدن على النوگ بحبل
ومرن على الـــوالي سره

التتعده أعله أبوها وهـــــوه مذبوح
أضنها أتموت سكته وتمشي وتروح
زينب بالـــــــــدرب وتــــودع أطفال
زرعت بالدرب چــم طـــــفله وتنوح

حبيبي ياحسين ...

عبد زينب
محمد الابراهيمي

لحن(حتى احب)
بصوت
ملا حيدر المالكي
ناصريه _ سوق الشيوخ