((وگوه))

وگوه وطاوعني اجــدامي يحسين
عفتك گـــــوه بس عيــوني تندار

وگوه اسحل بروحي الماتت اعليك
يــــالمخلي الدمع من فرگتك حار

اردن للمـــــــدينه شعندي يحسين
ارد اليـــاجـــــرح يـــــابيت يانــــار

ارد اليـــا ضــــلام الـــتارس البيت
ومــــــن دونك الكون يصير محتار

گـــــــــوم وياي ماگلك على الشام
ولا بالسوط اسولف واحچي بحجار

گوم وحتى انسه الهـــــزله يحسين
ومحاسن وجهك انسه الصار ماصار

بــــــس خليني ارد وانتــه ويــــاي
العليله تموت اذا مو انته بــــــــالدار

دباصرني وشگـــلها فدوه يحسين
يبـــــن المــاترك بالمــــوزمه الجار

فدوه الخنصرك طباتي للسوگ
وفدوه الشتماني العــل ضعن مـــار

گوم وردني زينب اسمي مبيوگ
مــــو كـــــافي سبيه واسمي تذكار

مو كافي غريبه وانــــته موجود
غيــــر انته الـــــوطن وشدار مادار

مليت السبي واحبالي والــناس
وصــــارن بالمعاصم مثـــل السوار

مو متعوبه بـــــس تسولف وياي
ارد بيـــــوم ضعني تــــوه من سار

يرد هودج الخوه وخدري مصيون
ومـــــامديوس طرفي بعيد الغبار

هــــــا يحسين شو چنه العمر راح
چـــــا گلبي شيكضه بدونك وفار

راح ارجع بضعني الكـــــله مكتول
مثـــــل ألي يرد ومـــخلص اعذار

شگل لـــ ام البنين الحــافر اخيام
لــــــــو عين الچفني ويمنه ويسار

ودعتك وراح ارجعـــــــلك بموت
ونتـــلاگه مّخيم نـــــــار بالــــــنار


عبد زينب
محمد الابراهيمي

((يبو الزهره))


غمض يبو الزهره بــ ألم
يالتحــرگ بروحك خيَم
غمض عيــــــونك بالقهر
هـــــا يا ضلع بيك انرسم

محمــــد من تون
يشگ ثوبه الحزن
وبروحــــك يــ أن .. محمد

محمـــد يــاضلع
يفك بيك الدمع
وگلبـــك ينسمع .. محمد

ورى عيونك محمد كلشي يبدي
النــــار اتحـــــزمت للباب تعدي
وضلع الطاهـــــره للعصره يروي
ونحر حسين يصرخ ويلي جــدي

غمض يامحمد ...

"""""""""""""""""""""""""""""""""""''''''''''

ماتنطق انته عن هوى
ماتهجر وحچيك دوى
چا مدري بيهم يابغض
غمض يدمعـك نينوى

غمـض بالبله
واصرخ كربله
وتركض عايله .. محمد

نــــار امخيمك
محــــد شيمك
ندري السممك .. محمد

مسموم وشهيد وعيـــــنك تّلوح
آخر كلمه صحت حسين مذبوح
ياشيخ الهـــواشم روحك اتصيح
زينب عالهزيله باچـــــــــر تروح

غمض يامحمد ...

"""""""""""""""""""""""""""""""""""''''''''''

تركو دموعك وَحَـــدك
گومك ترى سلبـو فدك
غمض بدمعات السَـلب
ومسلوب صابر شاهدك

مديـوس الحمه
وطاحت فاطمه
ومحـسن بالدمه .. محمد

وحيدر ينولي
ياحيرةّ عـــلي
وينك يالــولي .. محمد

بحمائل سيفه حيــدر چتفو إيده
ودمعةّ عيـــنه بالحـــسره شهيده
وصيتــــــــــك يـــــامحمد قَيدته
وصارت روحه من عگبك وحيده

غمض يامحمد ...

"""""""""""""""""""""""""""""""""""''''''''''

المو خليـــفه اصـدر أمر
بيت الطهر يصبــح جمر
والماله سجده بمسجدك
يكـــسر ضـــلع ليــلةّ قدر

محمد فاجـــعه
محسن مصرعه
عيلــــه أمروعه .. محمد

يا اشرف نبي
زينب تنـسبي
بعيون اجنبي .. محمد

بده بيها السبــي وهـاي الهزيله
وصعدت بالهضـم اشرف عقيله
بسوگ الشام مفضوحه الهلاهل
طب ضعن الستر لهــــل الرذيله

غمض يامحمد ...

عبد زينب
محمد الابراهيمي

لحن(يبو الزهره)
بصوت
ملا علي المحمداوي
بصره

((آخر الانفاس))


في آخر الانفـــاس
سَيكتبُ القرطاس
قد قالها المزمر
أنَّ الرجل ليهجر ...

"""""""""""""""""""""""""""""""""""''''''''''

على لفراش الهجر وعيونه تندار
جيبــــولي دواةّ ودمـــــعه مـدرار
چــــان الطاغي يسمع والحقد ثار
اليهــجر كـــلمه مــــن الــــنار للنار

رجسٌ من الارجاس
سيكتب القــرطاس
معــناها للمفسر
أنَّ الرجل ليهجر ...

"""""""""""""""""""""""""""""""""""''''''''''

طلعت روحه بس امچــلبه بالباب
بسـمار الجــــرح والفرگه عــطاب
فك عينه ودمعته تصيح ابو اتراب
اتحــــضر ياعلي ومصابك امصاب

قد يحرقون الياس
سيُـكتب القرطاس
مــن بنتيهِ مُبشر
أنَّ الرجل ليهجر ...

"""""""""""""""""""""""""""""""""""''''''''''

على بابك علي تلتلم الاحقاد
هذا البيده مشعل ذاك جلاد
هذا يصيح اكثـر زيدو الاعناد
ذاكه إيچتفك وبحـسره تنقاد

لايعلمــــون الباس
سيُـكتب القرطاس
احقـادهِ تــــــؤثر
أنَّ الرجل ليهجر ...

"""""""""""""""""""""""""""""""""""''''''''''

ومحسن يــــاعلي بالعتبه مطروح
ويا اكبر جـــــــرح وحسين مذبوح
وزينب للســــــــبي عالهزله وتروح
من عندي اقترب خل تطلع الروح

في كفهِ العـــباس
سيُـكتب القرطاس
في حقهِ مسيطر
أنَّ الرجل ليهجر ...

عبد زينب
محمد الابراهيمي

لحن(اخر الانفاس)
بصوت
ملا مصطفى احمد الطيب
حله

((أرد المن))


أرد ألمــــن بعـــد يحسين
لا عنــــــدي أخو ولا عندي تچايه
هلي بدرب الجفه مغربين
هلي ضلينه مــامش بالضعن رايه

ارد اليـــآ گلب مذبوح
بيبان العشــيره أتنوح
وبيوت المدينه جروح .. خويه جروح

أرد اليـــآ عليله شلون
أرد والدنيا كلها عيون
أرد أخـواني مايدرون .. مـــــــايدرون

رديت بدمعتي ...

""""""""""""""""""""""""""""""""""""""""""""""""'''""""

ومعسره الدروب وياي
بكل عثره ودمعتي تشرح مصابي
أردن والنفس مخنوگ
ينكرني أخـــــــــافن من أرد بابي

مـــــــايعرفني خاف الباب
لـــــــو شاف بعباتي اتراب
ولو شاف بدمعتي امصاب .. خويه امصاب

مايدري بگــينه ايتام
ولوني ضــيعآه الشام
ومرت بالضعن ايـــام .. أوف ايـــــــام

رديت بدمعتي ...
""""""""""""""""""""""""""""""""""""""""""""""""'''""""

أرد وحسين موش وياي
ألمـــــــن ردتي وياوحــــشةّ الرده
جرح عالناگه مـن رديت
وياجرح الفراگ بــروحي شيشده

خلــــيت الدوى ياناس
وأجيت ابلا اخو عباس
يهل الغيره ضلي انداس .. ضلي انداس

خليت الهوى ورديت
مخنـــوگه أرد للبيت
اظــل بكربله تمنيت .. أنه تمنيت

رديت بدمعتي ...

""""""""""""""""""""""""""""""""""""""""""""""""'''""""

تعبانه ومشيّ وسياط
واليحدي بضعنه ذابـــــح اخواني
عيوني أتغمض بيا حال
شما أغفى وحبل من إيدي جراني

الحبل مايرحم النايم
متنه أي وحگ جاسم
الطفل وي الهزل هايم .. الطفل هايم

الحبل من إيدي ليديهن
بروحي أسمع بواچـيهن
مدري شلـــــــون تاليهن .. تــــــاليهن

رديت بدمعتي ...

""""""""""""""""""""""""""""""""""""""""""""""""'''""""

عگب ذاك السبي كله
أرد ابيا ملامه وأخوتي صـــرعه
شگلها ام البين شلون
اذا تنشدني وين أخوانچ السنعه

شگلها المـــــادرت بيه
اگلها آنــــــــــه مسبيه
وعفت أخواني مرميه .. ومرميه

عفت أخواني بالهيمه
ويتيمه گايده إيـتيمه
الضعن يايمه ياضيمه .. ياضيمه

رديت بدمعتي ...

عبد زينب
محمد الابراهيمي

لحن قصيدةّ
((أرد ألمن))
بصوت خادم الحسين
ملا بشير شوگي
البصره _ بني منصور

((هيه زينب))


ياهــــــي ذيچه البيـنت
عيوني شو چنها انعمت
هيه زينب مـــوش هيه
ليــــش عالـناگه انحنت

شو رجعتي بربع ضعنج ومتنچ من بعيد مايل
شــــو وحيده وماكو اهلـچ وبدمعتچ يارسايل
تعثر الناگه بصفنتچ وتنچـــفي بروحچ حمايل

وينهــــــم روس المناير
الشيموچ اهــل الضماير
احچيلي مو دلالي حاير
شو غريبه وشنهو صـاير

ويــــن ريحــــانةّ محـمد
المــــاله باب بيوم ينـسد
رحـــتي ماتنعد اضعونچ
شو رجعتي وضعنچ انعد

وين الضعن يابت علي ...

""""""""""""""""""""""""""""""""""""""""

گلبي ليـش امضـيعه
مــن فــدوته الاربعه
وين خيـمتنه يزينب
مصرعي ولا مصرعه

يمه بس گليلي سالم وفدوه لو روحي بألمها
ياضياع الــــروح دونه ويـا سنيني وياحلمها
تطلگ عيـــون الليــــالي وخـلفت بيه سهمها

من تعثرين آنه اعثر
فدوه لتگولين منحر
يازمن شلي بعـذابك
حتى ماخليت معـبر

حيـــــودچ وماهمه يمچ
لا اخـــــوتچ ولـــد عمچ
لا كفيلــچ يمــــــه زينب
وچنه شو متبدل اسمچ

وين الضعن يابت علي ...

""""""""""""""""""""""""""""""""""""""""

صــــاير بطولچ جرح
وناشفه عيون الصبح
يانحر هــــذا السباكم
ويـــــاذبح يمه ورمح

ياصـــــــــدر هـــذا التكسر يمه جاي اسمع حوافر
شو رجعتي أوجهچ اصفر احچيلي يابعد النواضر
چــفوفمن يمـه الگطيعه ويــاعطـش بعيون عاشر

يمه آنه اموصيه جعفر
گتله كون اتصير منحر
لايرد راس اعـله متنك
بخوتك يـــوليدي تكبر

حتى هــــم عبدالله گتله
العيشه عگب حسين ذله
وعون وصـــيته بدمعتي
صيـــر للخـــــــوان شتله

وين الضعن يابت علي ...

""""""""""""""""""""""""""""""""""""""""

وين كفــــال الخــدر
وين ابو خلگ الســتر
چنه مايدري بضعنكم
من مشه فوگ الجـمر

يمه يــ ام عباس طايح وگتله خويه وهوه سكته
بس شگلچ يالحنينه مـــــن الجرح گوه عرفته
والنبـــال امغيره لـــــونه گتله انته الگمر انته

گتله خـويه وهوه يبـچي
وين اروحن گتله احچي
الخيمه عطـــابه عطرها
ونركض وماترضا هچـي

وبالشمس چا وينه فييك
وياحــوافر فــوگ اخييك
يـــــاگمر طــــل بضيائك
ليش خـويه يروح ضييك

وين الضعن يابت علي ...

عبد زينب
محمد الابراهيمي

لحن(هيه زينب)
بصوت
خادم الامام الحسين
ملا محمد رؤوف
بصره_ خور الزبير

((ياسيدي يالعسكري))


زحمه الغيرك امشي وانته عندي
يابـــو المهدي يـــــا احساس ودي
كل عام واضيفك وانته ابو الجود
واجـــيّ لــزيارتك بــــدموع خدي

ها ياعسـكري الروح
الغيرك والله ماروح
بالحب جــاي مولاي
يــــالمسموم مذبوح

الذبح ذمـه
الذبح كلمه .. الذبح بي غربةّ الشام
النزف دمه
بـــي لچمه .. وبـــي صرخات الايتام

ياسيدي .. يالعسكري

"""""""""""""""""""""""""""""""""""''''''''''

فشله وباب غيرك ليــش ادگه
يالصدرك وسيع بشوگي اشبگه
المــازارك يظـــلّ بّحيرةّ الباب
الماشم عتبتك مطلــوب شهگه

سامره تظــل هيل
بيكم مايظـــل ليل
بس دمعتكم دموم
لو مر طاري للخيل

الف كافر
ولا حــافر .. يسحگ صدر الحسين
ألم وافــر
بده يسافر .. ومــــدري يروح لاوين

ياسيدي .. يالعسكري

"""""""""""""""""""""""""""""""""""''''''''''

هوه العاف دربك دربه حـــاير
ينامــــوس المدينه والعشــــاير
يعگـــــال الغوالب والهــــواشم
يسور الشيعه بس عالشيعه داير

حاجب حـافظ العين
حافظ مجلس حسين
لذنه بســـــدك سنيـن
ونّـرد ألوذ بالـــــــدين

يشارينه
يحامينه .. بعباتك ذنبي مستور
يواليــنه
وتدلـينه .. ذاكه تصيـــح عاشور

ياسيدي .. يالعسكري

"""""""""""""""""""""""""""""""""""''''''''''

يادمعي المصــــــابك صرت أصبه
وانته تصيح عــــاشت عمتي غربه
نعشي المهدي شاله فوگ الاجتاف
بــــس زينـــب نعشها بغربه صعبه

نعش العفـه مهجور
مثــل حسين منحور
وهسه الغربه بالشام
ليـــــل ومحــد إيزور

ولا حـاير
ولا زايـــر .. ذاك الباب مقفـول
گلب فاير
دمع غـاير .. وليل الغربه ويطول

ياسيدي .. يالعسكري

عبد زينب
محمد الابراهيمي

لحن(ياسيدي يالعسكري)
بصوت
خادم الامام الحسين
ملا مصطفى علوان
السماوه_ خضر

((أطفي النار))

لمن وصــــل يم بابي
وخله الحطب بعتابي
يــدفع البـــاب بحيله
وآنــــه لذت بحجابي

شبت النــــار بداري
ولاصاحب ولاجاري
محد فـــــزع طفانه
وياشوغةّ البسماري

يشيعه الدار محروگه عليه
أطفي الــنار مجبوره بديه

يافاطمه .. يازهراء

""""""""""""""""""""""""""""""""""""""""""""""""'''""""

شيطفي جمــرةّ نوحي
محسن وگع من روحي
والحسن يلـــــزم بيدي
وهوايه هِـــنه جروحي

هجمو الــــدار علينه
سعفه بهـــوى ضلينه
نرجف عشـــــاير لمه
وطگونه فوگ أيدينه

رمح وسياط طگانه وهضمنه
(وأن) يصيح مـاواحد رحمنه

يافاطمه .. يازهراء

""""""""""""""""""""""""""""""""""""""""""""""""'''""""

يا لوعتي المشيوفه
بينه چبيره الخـوفه
وزينب تنـــادي يمه
خلو حبــل بچفوفه

شفت العده يجرونه
وحيدر تدير عيــونه
وبگلبه گلي شلــونچ
ضلعچ يزهره شلونه

الضلع مكسور فدواتك يوالي
أهمن بيك مـــــــاهمن الحالي

يافاطمه .. يازهراء

""""""""""""""""""""""""""""""""""""""""""""""""'''""""

وگــــــــلاله أرجع ليها
وروحي الضلع سابيها
قنفذ أجــــاني برمحه
روحي بهضم سابـيها

بجعب الرمــــح طگاني
وكل حيله من سطراني
وگمت آنه أصيحن بويه
وفـــــــوگ الترب ذباني

الحسن وياي وآنه اشگف بديه
وعلى التــربان طيحتنه سويه

يافاطمه .. يازهراء

""""""""""""""""""""""""""""""""""""""""""""""""'''""""

بــــالگوه أجر انفـاسي
هـــــذا السده يا ناسي
چم طگه فوگ چفوفي
وطگات حــتى براسـي

بــالگوه اشوفن دربي
طگني وشهگت الربي
لا مـــــــاگلت ياحيدر
وبتعبي زايـــــد تعبي

طحت بالباب وگليبي شيكضه
وصدري انعاب ألحگيني يفضه

يافاطمه .. يازهراء

""""""""""""""""""""""""""""""""""""""""""""""""'''""""

وزينب تنــــاشغ يمي
وتصيح ويلاه أمــــي
وتلزم أديــــــه بچفها
وبعروگي واگف دمي

گلتلها زينب باچر
يايمه يوم العاشر
باچر مناحـر يمچ
يايمه باچر حـافر

بحوافر خيل صدره يطشرونه
ييمه حسين ويلي يفــرهدونه

يافاطمه .. يازهراء

عبد زينب
محمد الابراهيمي

لحن(اطفي النار)
بصوت
خادم الامام الحسين
سيد حيدر الموسوي
بصره

((وفقيني يزهراء))


رزقيني .. يـــزهراء .. رزقيني
وفقيني .. بالدموع .. وفقيني

""""""""""""""""""""""""""""""""""""""""""""""""'''""""

اسود ثوبي لابس
رزقيني المجالس
رزقيني .. وفقيني .. تنزل دمعتي

يالذكــرچ ثوابي
ومصابچ مصابي
حاچيني .. دليني .. تاهت خطوتي

اذا مو دمعتي لمصــابچ انـزف
يعني عن دربكم جدمي يـزلف
ويا ماي الضمير بروحي ويجف

ممنونچ .. يزهـــراء .. ممنونچ
وفقيني .. بالدموع .. ممنونچ
""""""""""""""""""""""""""""""""""""""""""""""""'''""""

اخدم يمه رايد
جايبلچ قصايد
كل مره .. يالزهره .. انتي ام الرزق

يالگلـبچ محنه
وچفوفچ تلمنه
بالعبره .. يالحره .. روحي تنوثق

اوثقي العين يالحبــچ وجودي
يالمحروگ بابچ وأعله مــودي
حتى اشهد وأگول انتم خلودي

مـولاتي .. يـــزهراء .. مولاتي
وفقيني .. بالدموع .. مولاتي

""""""""""""""""""""""""""""""""""""""""""""""""'''""""

مولاتي عطاشه
يــــارقةّ فراشه
بس انتي .. فاطمتي .. تّرويني العشــگ

خلـــــــيني اجالس
بس اهل المجالس
وبالهضمه .. واللطمه .. الجرحچ احترگ

احرگ روحي من فدوه الدمعـتچ
كون بحسره كل عمري الحسرتچ
الارض مــرزوقه مولاتي المحبتچ

ابچیلچ .. یزهـــراء .. ابچیلچ
وفقيني .. بالدموع .. ابچیلچ

""""""""""""""""""""""""""""""""""""""""""""""""'''""""

مدي ايدچ عليه
مـــولاتي الزچيه
بنفاسي .. وبراسي .. زرعيلي الضــــعن

من كوثر دمعـتچ
شمليني برحمتچ
نوماسي .. وكل ناسي .. مولاتي ام حسن

اريد اضعونكم دوم اعــله بالي
وكون السوط ميفارگ خــيالي
وبس حسين غالي وماكو غالي

ماعوفچ .. یزهـــراء .. ماعوفچ
وفقيـني .. بالدموع .. ماعوفچ
""""""""""""""""""""""""""""""""""""""""""""""""'''""""

بكل مجلس عزيه
مــــن نقره الرقيه
آهاتچ .. دمعاتچ .. خيمه اعله الدمع

محتاره الوديعه
وبعيونچ شريعه
همساتچ .. نضراتچ .. كل نضره ضلع

يبعد أضلوع روحي ضلوعچ شلون
انتي ضلوع زينب عـــــدها الّمّتون
وچم طفله وطفل مـارد بالضعون

وبزينب .. يزهـــراء .. وبزينب
وفقيني .. بالدموع .. وبزينب


عبد زينب
محمد الإبراهيمي