((چم طوعه))


مسلم اعليمن تعـــــاتب للسقيفه وصفگو
الناصي ناصي شما تَعَله نازلين من اعتلو
انته رايه اعله المناره وگلي همه شحصلو

طبعك ..
مـــــــا ينحزر ليلك
چم طوعه تدعيلك
وين الصبح .. خنجر ينطرك

دمعك ..
يتجاره بخدودك
ناشف الم جودك
تصلي وتون .. وما طافي جمرك

عشگك اعلا من قصرهم
مــــــاي يمطفي جمـرهم
ياملاذ الحـــــب چفوفك
عمرك اطـول من عمرهم

سيدي يابو حميده ...

"""""""""""""""""""""""""""""""""""""""""

شما اريد اتصورك تتسائل المسئــله
انت بالكوفه نعم بس شفتك بكربله
چـــه ابو فاضل تحبه بنفسك تبادله

بسمك ..
تتبـيض النيه
وتتبده حنيه
شايل وفه .. بجرحك عشگتك

رسمك ..
نص الورد گــاعد
وي ورده متواعد
جرحك وطن .. بروحك دمعتك

ياگلب مـــــولاي حامل
روحك تحب ابو فاضل
من اجــــــولك بالملاگه
تصيــــح عباس وتقاتل

سيدي يابو حميده ...

"""""""""""""""""""""""""""""""""""""""""

والرسايل شگـــــــوگهن صعد دخان الغدر
طاحوا بهويه خفيفه سيف صارت مو عذر
والمناجـــــل حضروهن وانحنوا يم الشمر

واضح ..
مثل الشمس امرك
ابيض وجه ســرك
عندك امر .. تحمل رسايل

سارح ..
كل فكرك ضعونك
تدري ويغــدرونك
اهل الغدر .. چم لوعه شايل

حرگو حروف الرسـايل
وانغلــــب أمر الحمايل
وانته تدريهم يمســـلم
للفلوس الكــوفي مايل

سيدي يابو حميده ...

"""""""""""""""""""""""""""""""""""""""""

الكوفه بير وانته يوسف ونوخذ حته الدلو
ترسم بصفحةّ خيــــالك امنـيه وياك الاخو
حتــــــى نسمات التمرك تلتفت تصـرخ منو

صلفه ..
عين الذي تعوفك
والتنكر جــروفك
انته العَذب .. چفك كريمه

ترفه ..
عين المشت يمك
وتسـولف بأسمك
انت المحب .. والد يتيمه

غربه يامسلم هضـيمه
وبالضعن عايف يتيمه
ياشهيد بحـب حبيبك
ياخضار وكوفه هيمه

سيدي يابو حميده ...

عبد زينب
محمد الابراهيمي

لحن(چم طوعه)
بصوت
ملا حسين الحميداوي
بصره - دير

((ياسيدي آسف))

يالمصدگني خـــــادم وآنه مو هيچ
ودمعـــاتي الجـــذب صارن يغزرن
اشوفن روحي أجذب روحي خَدام
وانتـــه عيونك تشوف ويصـــــدگن

يعني شگد حنين
مـــولاي الحسـين
كهــــف الخائفين .. ثم الحائرين

يعني شگد عطوف
اذا ابــنه الـــرؤوف
بساعات الحتـــوف .. بس حبك يشوف

ماشاف ذنبي وشاف حبي
ويغفرلي اذا تنـزل دمعتي
مو كافي اسف ها يروحي
ياگلبي اخجل من خدمتي

ياسيدي آسف ...
"""""""""""""""""""""""""""""""""""'''''''''''

يالمصــدگني وانته اخيامك بنار
وتصيح اقصدوني وعوفو العيال
آنه شعندي وانـــته بخدك تراب
وبيرغ عسكرك فوگ الــنهر مال

عود ألطم متون
وانته بيا شجـون
وحسرات العيون .. وكسرات الضنون

بّذره ومـــــــــاوفيت
شعندي وبس بچيت
عود أقــــرالي بــيت .. ولخيامك نسيت

بس هوه يدري بگلبي يدري
يدري بدمعتي وآه صــــدري
والليل ويـــــن يــــروح وياي
بدموعي اجره وهــوه يجري

ياسيدي آسف ...
"""""""""""""""""""""""""""""""""""'''''''''''

ليش انته اعله صدرك تمطر الخيل
وكل هذا اعله مودي تسحگ اعليك
ومــــــو وياك أخلص طـــارف الليل
ولا ساعـــــاته كلهـــن ينحــچن بيك

يما تسوه الحـياة
ليش احنه بسباة
مو باچر ممـــات .. كافي السيئات

كافي من القــيود
كافي من الجحود
لحسينك دعــــود .. لاتنسه العهود

هـــــــــذا حسين كافي ولاتلچمه
مـــــــو كافي لهسه يجــــري دمه
ذمه الخدمه عد العدهم احساس
والحــــافظ خـــدمته خوش زلمه

ياسيدي آسف ...
"""""""""""""""""""""""""""""""""""'''''''''''

يـــالمصدگني عاشگ ياعشگ وين
العشگ بس الرقيه وتسكت الناس
مـــــــن صاحـت اريده بابا يحسين
مــــاتت واليحــــب متهمه الانفاس

ماظــــل بيها روح
ماتــــــت بالجروح
هاي اقصى الينوح .. المايگدر يروح

هـــاي ام الوفاء
شمعه الكل ولاء
رفعتــــــها بنداء .. رايةّ كربلاء

رايه بكل مجــالس دمعه هيه
تظل للحب رمز قصه وقضيه
اطلب من دمعها تنطي بالايد
مَشيّ اعليها ابــو فاضل رقيه

ياسيدي آسف ...

عبد زينب
محمد الابراهيمي

لحن(ياسيدي اسف)
بصوت
سيد علي الصافي
بغداد

((بالميدان))

بــــالميدان اتصير الحيره
والحب يتساوه ويه الغيره .. خوش انصار

"""""""""""""""""""""""""""""""""""''''''''''

يقــــــرون بــ آيات الكوثر
أنـــــا اعطيــــناك المنحر
يمخليـــــــــنه بحبك نسهر .. يالمحبوب

يمخلي الحب اجمــل صاير
من حاير ظل يحچي الحاير
مانهـــتم للجيــــش الـــداير .. يالمحبوب

كل الــحيره بيك الماي ممنوع
وأحنه الخاطرك سَبَلنه الدموع
وبضلمةّ عشگنه صرنه الشـموع

يالحبـــــك ضواها الديره
والحب يتساوه ويه الغيره .. خوش انصار

"""""""""""""""""""""""""""""""""""''''''''''

ياعــــالي وبالحب انكابر
گمنه نشوف بحبك باچر
ومتاتين ايصير العـــــاشر .. يالمحبوب

يمته نزف المنحر لجلك
يمته نصير الســاتر لهلك
يالمحبوب بدمعه نسئلك .. يالمحبوب

ويمته من الزنود چفوف ننطيك
ويمته من المناحر يبدي طاريك
كل ســــوالف الحب نلتقي بيك

والحب اصعب من تعبيره
والحب يتساوه ويه الغيره .. خوش انصار

"""""""""""""""""""""""""""""""""""''''''''''

نتسابگ والمنحــر شاهد
ياهـــــوّ اليبرز اول واحد
فرحان البرماحه الصاعد .. يالمحبوب

مو بس عابس شگ هدومه
كامت تصرخ حتى الحـومه
گــــــــوه الفرسان وملزومه .. يالمحبوب

ليش انته غريب وانته ابو الناس
ولو تارس حياتك ملگه عــــباس
هوه الجيش كله وهوه الاحساس

عباس اليصــعب تصويره
والحب يتساوه ويه الغيره .. خوش انصار

"""""""""""""""""""""""""""""""""""''''''''''

ميدان الحب هوه الغايه
وتخفگ بالميـدان الرايه
وبسمك دگيـــناها الثايه .. يالمحبوب

لو ينجاب اسمك بالـطـاري
يبدي المدمع بالحب جـاري
چا ليش اسمك يصبح عاري .. يالمحبوب

حتى الثوب منـك صار مسلوب
بغضاً بالولايه حسين مطــــلوب
من يوم السقيفه اكتاب مكتوب

والــــــدين بدمك تحريره
والحب يتساوه ويه الغيره .. خوش انصار

عبد زينب
محمد الابراهيمي

لحن(بالميدان)
بصوت
ملا محمد الكربلائي
كويت

((شگلها الهزله))


شگلها الهزله واتانيني اودعنك
شگلها وتعـرف اتنزلني اشمنك
ياخوةّ صباي وعشرتي وضيمي
تريد اتگلي چلمه خويه احسنك

يمرني هواك
واتخيلك يمي .. عالهزله يبن امي
وتشوف حالي

گلبـــــي رجاك
هذا الحبل عله .. لــــو تگدر تفله
وينـــــك يغالي

مــا مــــاشيه بدروب وعره
فكيــــت عيني وامي زهره
سهله الحبل والصعبه غربه
والمـات حــدر النـاگه گبره

كل ساعه طفله تصيح اريده
خــــوله ورقيه ويــــا حميده
وبيده بعيده وگـلبي خلصان
تگضيش بيـــده وتبدي بيده

يبن امي وينك ...

"""""""""""""""""""""""""""""""""""''''''''''

شگلها الهزله خاطر تعرف بشوگي
شحچي وياها والدم فارگ عروگي
لـــــــــو بيدي وأموتن يمك حسين
ولا اركــــب نياگ المــــاهن بنوگي

خــــــويه اريد
يمك تخليــني .. وتنضر دمع عيني
وأغفى بثنيتك

دربــــــي بعيد
خويه شيوديني .. بگيد شيمشيني
بگلبي ونخيتك

بساعه ومشت كل العشيره
وام الخـــدر تالي أسيـــــره
ويّ ناس ميعــرفون اسـلام
يضربون يحســــين الاميـره

وحمل المتن خويه شــيذبه
عــــالهـــزله والدنيا متــربه
ماشوف حتى الناگه ياخوي
والحـــادي بضعني يعـــذبه

يبن امي وينك ...

"""""""""""""""""""""""""""""""""""''''''''''

مشيت وأمري بيد الحادي موبيدي
وچان الحادي ابو النوماس تعويدي
علـــــى دروب الأبد ماشايف اجدام
مشاني وبعــــد يحســـــين وشبيدي

الكوفه جروح
ياخويه طبينه .. وشمات تحدينه
الكوفه عذابي

روحــــي تــــروح
ذاك القصر شفته .. ويابيتي عاينته
وشمــــيت بابـــي

وتذكرت بيــتي وصـــبانه
ما لاگت بضعـــني المهانه
والناگه وگفت چنها تدري
وخلتـــني اتـــــذكر حمانه

وتذكــــــــرت حيدر ابونه
وگتله برمح ياراس اخونه
شگ الگبر ياحــيدر وگوم
ماكو شرف ذولي ســـبونه

يبن امي وينك ...

"""""""""""""""""""""""""""""""""""''''''''''

وياشام ودرب بالـــــــگوه ماشيته
وغطـــــاني الدرب بتـراب ذاريته
گبل عباس يمي وخدري مصيون
گبل عباس من غطتــني خاچيته

ويلـــــي يشام
ويهلهل أگبالي .. بالغربه لا والي
وبحـجار يرمي

بگــــلبي سهام
بالسوگ خلونه .. وغربه يشوفونه
يازهره يَــمّـــيّ

هذا العشگ اركـض خذاني
ومن ابصمت عالحب سباني
ودانــــي لقصـــور وشمـــاته
طبيــــت لكـــــن مو مچاني

هذا القصر تضحك شماته
ورمح العشگ واصل لهاته
من جــابو الراس وتراديت
مــــــو وحده لا ماتن بناته

يبن امي وينك ...

عبد زينب
محمد الابراهيمي

لحن(شگلها الهزله)
بصوت
ملا علي الرضا
ناصريه

((اجيتك شاب))

اجيتك شاب بس بذنوبي شايب
حشــــاك اترجع البدموعه تايب
يـــالمعجب السـبعّ من العجايب
خــــــدك ليش مفروش بترايب

ثغــــرك ليش مولاي
يابس وانته ابو الماي
طايح بالشمس ليـش
يــــــالمسمينك فياي

ليش ليش .. أزود بــــالجــــــرح ليش
ليش ليش .. اعوفك وانته نص جيش

بعيده المشــرعه
وحياضك مترعه
ترضــــا ابلا عذر
وصوتــك اسمعه

حبيبي ياحسين ...

"""""""""""""""""""""""""""""""""""''''''''''

اجيت ارتاح مــــن روحي المريره
ولگيتك بس وصل نص الحصيره
هيــــــه الحــيره من تشوف حيره
ونسيت جـروحي الزغيره الچبيره

تنسه بصدرك الصوت
وحلمك يغدي بالموت
شما گلــــــولك تعيش
انته تگـــــــــول تابوت

وين وين .. آنه جروحي چا وين
وين وين .. وهذا امگطع حسين

ماعندي خيم
ولاضايگـ سهم
ماراكب هـزل
وماعـندي ألم

حبيبي ياحسين ...

"""""""""""""""""""""""""""""""""""''''''''''

احبك بــس هضيمه مو مقامي
اشرب ماي يمك وانتـــه ضامي
يمك تستحي حروفي وكــلامي
وأعاتب گلبي وأشواگي وهيامي

أظل عالروح زعلان
هذا حسين عطشان
ضعنه الصار منهوب
وفوگ اخيامه دخان

آه آه .. كون ومن صدگ آه
آه آه .. ويلاه اعــــــله ويلاه

دمعي شما يهل
ميــوصف طفل
من جاله السهم
بالحــب يحتفل

حبيبي ياحسين ...

"""""""""""""""""""""""""""""""""""''''''''''

يحساس الگلب شتريد كافي
مو هذا الضعن ياگلبي حافي
شما تسحگ جـمر لا ماتوافي
ياگلبـــي تظــــل أبعيد غافي

ظل ياغـافي العيـون
ظل ماعندك أمتــون
الضايگ سوط بالروح
بنص دموعه مسجون

طيف طيف .. مر بيه الجرح طيف
طيف طيف .. أذل مديـون للسيف

چا يمته السـره
گلبــي ومنحره
وأذبحلك گلب
يبن الطاهـــره

حبيبي ياحسين ...

عبد زينب
محمد الابراهيمي

لحن(اجيتك شاب)
بصوت
ملا محمد الفاطمي
ناصريه _ فهود

((اكبر اولادي))


هلا يالتشبه الهادي
هلا يا اكــبر اولادي .. علي الاكبر

"""""""""""""""""""""''''''''''

فدوتك يبني هذا الجيش والحــــومه
يبو البسمه اعله وجه الخيمه مرسومه
الماشــايف علي خــل ينضــر علـــومه

راويــــــــهم أحد .. يبني وخيـبرى
وشـــــوفهم علي .. ونوبه حـيدرى
شويه مـــــن بدر .. راويــــهم عسر
شويه من الجمل .. وأذبحهم سرى

يبني وسـيد الوادي
هلا يا اكــبر اولادي .. علي الاكبر

"""""""""""""""""""""''''''''''

ينشمي اهلك يهاشم يابزر هاشم
يالمعتبر الزود القــــائد الحــاكم
اريدن راسه هذا الگال ابن غانم

خلي عــالرمح .. راسه ويعــتلي
يبني وبالعجل .. غــير انته علي
يومك زمجرى .. وانته القسورى
واليمك يجــي .. يعني ويبتــــلي

هلا يمريح أفـادي
هلا يا اكبر اولادي .. علي الاكبر

"""""""""""""""""""""''''''''''

ياطيب المعـــشر ياهوى الملگه
يابستان گلـــــبي ويارطب عثگه
من تذبح الجيش رد عليّ حرگه

سويهــــم قدد .. ساويلي الجثث
واليسئل شكو .. كــــــرار انبعث
رد للمعــــركه .. وصــارت آفكه
اسحگ شاربه .. والســــوه عبث

يروح حسين يالحادي
هلا يا اكـــــبر اولادي .. علي الاكبر

"""""""""""""""""""""''''''''''

يزماط الغوالب والنفـــس انته
يوليدي وچبيري يــــاربه عمته
حتى المهره بالنضرات فاهمته

راويهم رعــــــب .. يبني ومن تطب
علمهــــــم درس .. وشتعني الحرب
الجاي ابلا درس .. لتخـــــلي يحس
اطبـــــر هـــامته .. وخل دمه يصب

يشايل هيبةّ اجدادي
هــلا يا اكــبر اولادي .. علي الاكبر

"""""""""""""""""""""''''''''''

يبعد حسين ابوك الموت ميهمك
يامخــتار عصرك بس طبع عمك
متشـــــــم الورد هوه الورد شمك

عسـكرهم مشه .. ولفـــوها الخيم
مـــــاضلت زلم .. والجـيش انهدم
والجيش اعتذر .. وظم راسه النهر
ياطـــــبع الندى .. يــــاراعي الشيم

عطرك خضر وبادي
هــلا يا اكــبر اولادي .. علي الاكبر

عبد زينب
محمد الابراهيمي

لحن(اكبر اولادي)
بصوت
ملا حسين الشويلي
بغداد

((اليَمته انتضر))


وديلي من حضنك دفو بردانه من يوم الرحت
وديلي مـن ليلك نجم حتى اندل ادروبك تهت
يمعذب أگلوب التودك بالهجر
آنه العليله وشبعد گلي انتضر .. اليمته انتضر
""""""""""""""""""""""""""""""""""""""""""""""""'''""""

كلمــــا تفز نشغةّ جرح أَتصبر برسمك هوى
يامــــن دواي بشوفتك ماينفع بدونك دوى
چـا هسه طيبه وداعتك لو آنه ورقيه سوى
وبخيمتك أگعد أنه وأفرش ضلوعي بنينوى

المغرب أصلي بشوفتك ... يابويه
وبروحي امسح دمعتك ... يابويه

وتلم خواتي بخيمتك وللزهره مجلس ينصب
وكلها تطب برحمتك وعمي ابو فاضل يطب
الشوفه من عينك عمر تسوه العمر
آنــــــــه العليله وشبعد گلي انتضر .. اليمته انتضر
""""""""""""""""""""""""""""""""""""""""""""""""'''""""

يَمّغَرب بضعــــــنك ندى والدنيا عطشان ذبح
چفيتك الخضـــــره زرع كلهم مناجل تنفضح
خليني اسد باب الهجر ونطيني من جرحك جرح
ماتــــــرهم انته الوحَدك يابويه تصعد عالرمح

ياقــــــبلتي وراح الفرض .. يابويه
زينه صرت وأركض ركض .. يابويه

مــــا اركب بهودج أنه لو أمشي ويّ ضعنك مشي
ويّ ضعنك أحسب دمعتي راح المرض مابيه شي
ناحل دليلي ولوضعن روحي يطر
آنــــــه العليله وشبعد گلي انتضر .. اليمته انتضر
""""""""""""""""""""""""""""""""""""""""""""""""'''""""

مالي نصيب برفجتك عوگني يابويه المرض
هوه أليفارگ نضـــرتك من روحه معناها انرفض
ياحــزنك الماله وصف گوه على روحي انفــرض
ياهو اليعوضك ياهوى ماگولن أعله الله العوض

طير أنسلب منه الجنح .. يابويه
وفوگ الجرح ذرو ملح .. يابويه

قسمةّ دمعتي الماتجف مرسومه بلوان الخيم
راح آنه أضل شمعه بشمس هيمه ويرف بيها العلم
حتى الصبر يابو علي مني يفر
آنه العليله وشبــعد گلي انتضر .. اليمته انتضر
""""""""""""""""""""""""""""""""""""""""""""""""'''""""

الخطوه من ضعن العشگـ ضليت أحس اكبر سنه
والموت أجه الروحي ركـض يم عيني يابويه دنه
شيب أعله گـد طولي طلع وتاهت محطات الهنه
يا باب يل ماخـــذ (أبو) چا ماخذت روحي أنه

راح انتضر يل ماترد .. يابويه
مايرجع اليسكن لحد .. يابويه

تودعني وتگلي اجي وآنه ادري راسك عالرمح
عگبك الليل بداخلي مايطلع بروحي الصبح
گمت آنه أدور بالهوى وين الصبر
آنه العليله وشبعد گلي انتضر .. اليمته انتضر
""""""""""""""""""""""""""""""""""""""""""""""""'''""""

راح الضــعن وأحسب ألم مدفونه بحزان الوكت
بنص بيتي بس جرحي مشه أنشد أبابي وتيهت
مــــــن الزمن يا والدي بس گلي شنو الحصلت
راح الضعن مات الضعــــن وأنته متت وآنه متت
چم فاتحه بروحي غفت .. يابويه
بويه العليـــــله وشجنت .. يابويه

ياحصةّ الحافر صرت وأنته چنت بس حصتي
الـــطف شنو وأنشد منو تلگه السؤال بدمعتي
من عگبك وهذا الامر گمت احتضر
آنه العليله وشبعد گلي انتضر .. اليمته انتضر

عبد زينب
محمد الابراهيمي

لحن( اليمته انتضر)
بصوت
ملا حسنين الربيعي
كوت

((خدام الحسين))


شما تتعبنه السـنين
نبقه خدام الحسين
العوز مــــو ذله نگله
عوز دمعك هوه ذله ... ياحسين
""""""""""""""""""""""""""""""""""""""""""""""""'''""""

للضروره احكام
للدمـــوع اخيام .. شدو أحزام .. يالخدام
المابچه بعاشور
بهايه مامــعذور .. صير بخــور .. للمنحور

صحيح العـــــوز يقتــــل بالاماني
ويرد مهزوم جـــــرحي الماچواني
صرت لحسين مثل العنده جنحين
اطيــــــر بخــــــدمته وآنه امكاني

الخدمه مملكتي وسماي
حسين محبوبي وهـواي
دمع عينك لا تمـــله
عوز دمعك هوه ذله .. ياحسين
""""""""""""""""""""""""""""""""""""""""""""""""'''""""

من تّـوزع الماي
انحـــني للجـاي .. الكل وفاي .. للمشــاي
لا تــــدير الروح
من يصير النوح .. للمـــذبوح .. للمجروح

يــــتـــل بايع شبابك للعزيه
يبــــــو آثار خـــــدك للسبيه
دربالك يبعد عيوني والروح
گبل الخدمه كــون النيه نيه

أنّوي للخــــدمه ضلوع
وأكسر بعــــينك دموع
دمعك شمحـلا تهله
عوز دمعك هوه ذله .. ياحسين
""""""""""""""""""""""""""""""""""""""""""""""""'''""""

شاب بس محروگـ
بالعــــــزه مخـنوگـ .. الذاك السوگـ .. واسم النوگـ
تلطـــــــم أبلا راي
من يمر المــــــــاي .. تبچي أهواي .. الهاي وهاي

يعايف لونك ويل لابـس السود
تشيل بروحك وللمجلس اتجود
أديك وصدرك ودمعـاتك شهود
كــــل تفكيرك العــــباس ميعود

مجلسك دولةّ هــــواك
روحك وكل محـــتواك
الخادم بحـــبه تعله
عوز دمعك هوه ذله .. ياحسين
""""""""""""""""""""""""""""""""""""""""""""""""'''""""

سهــرك الويــــاك
والدمع بحمــــاك .. روح انطاك .. وگلك هاك
وخدمتك بالخير
لاتــــــــون للغـير .. لا ميصير .. والله أتحير

الدمع محجوز بس لحسين وآله
عـــــــلى نحره التبده ويّ سؤاله
على مــــــــولاتي زينب والكفاله
وعلى الراحو سبي أهله وعيـاله

عدنه واحد بس ذبـــيح
عدنه بس زينب تطــيح
زينب الصعدت التله
عوز دمعك هوه ذله .. ياحسين
""""""""""""""""""""""""""""""""""""""""""""""""'''""""

للعشگ محراب
للدموع اسباب .. هذا الباب .. حسين مصاب
للرباب نمــــوت
والدمع مبخوت .. من يفوت .. جرح الصوت

چبيره أحزاني والطف ماله تالي
أَخَذ مني بسمتي ودمعـــه حالي
ضيعــــــــني بعشگ حبيت والي
وبس حسين غالي وماكو غــالي

كلشي من عيــــوني طاح
(حسين راح وكلشي راح)
والجرح ميصير أشله
عوز دمعك هــوه ذله .. ياحسين

عبد زينب
محمد الابراهيمي

لحن (خدام الحسين)
بصوت
سيد حسين المشايخي
حله

((ها يحسين))


ها يحسين وين انته
هضيمه العين من تشوف ناس هواي
بس يحسين مو انته
بالمسمع كلام هواي
چا ليش انته شو سكته؟

چاليش انته شو ماهوّ
الغيرك اشتكي الياهوّ

ها يكحيل
اجانه الليل
وبالضلمه الورد ينداس
شنگلها وترد الخيل
شنسوي وغزانه الويل
ياضي عيني يانبراس
يبو حچايات عطر الياس
حلوه سوالفك تنباس

گصر بيه الصبر
والناس
تتشمت مشه العباس
حاچيني ولو نضرات
الشماته منادس اعله الحال
يگلولي المخيم مات
چاوينك يبعد أهلي

چاوينك يبعد آنه
تلفح فرگتك بالروح
حيرانه
وغلات امك
اي يحسين حيرانه
من ركض الضهر والسوط تعبانه
ومو عطشانه بس يحسين ذبلانه
وألك يحسين عطشانه
وينك گوم
ياخويه الهوى من فرگتك ميشوم
وينك گوم
يالباجي بلايه هدوم
ترى سگف العمر مهدوم
ياخويه الشماته تلوم
ياخويه الضوه مسموم
ياخويه الضعن مطشر بلياك
بس جرح العده ملموم
وينك گوم
اجتنه الگوم
خذتنه الگوم
ولتنه الگوم
طفو سلسبيلك نار
يشيوخ العرب يكبار
اجتنه ازغار
وأحنه بخيمه مكشوفين
ماعدناش حفنةْ غار
الحافر مايميز ضلع من ازغار
هذا الصار
والضميته عنك نار
يساجيني تعب طفين
اركض والسياط تلوح
مرعوبه وكلتني النار
اي يحسين
صريم الگاع چنه ارماح
لا مايرحم (السعدان)
اجتنه الگوم
وملتمين يم العيله چم سياف چم ذباح
اجتنه الگوم
يبن المايعرف النوم
يابيرغ سلف فوگ الرمح محكوم
اجيتك بالفراگ الحار
ماعندي كلام ايلوم
سوالف فاضت من الروح
مابيهن عتب يحسين
كل قصدي اكلك وين
گواك الله من الخيل
يالمصفن الدمعه بعين
دورتك شمس بليل
وين الگاك
انشدمن واشوفك وين
دليني
اعله دربك ياعزيزي منين
هيه الطف غدت بس روس
وركضنه وخايفين اندوس
خويه حسين
يبن امي
العمر لاوين
خويه حسين
خويه حسين ...

عبد زينب
محمد الابراهيمي

((راس المخيم))

يرافع رآس المّخَيَم .. يعباس
گلبي بحـبك مّتَيــَم .. يعبـاس
اخوي وما خلف وعــده
الجربه تبوسه من خده
يعباس .. يعباس

""""""""""""""""""""""""""""""""""""""""""""""""'''""""

صعد فوگ المهـر و المهـر گلالــه
اسحگلك مشاة اسحك الخيالـه
وعيونك الجيش نبهـــذل احواله
يريال الحــرب و السيـــف ريالـه

ياهو اليمر من سيفـه .. يعباس
الماي بشورته و كيفه .. يعباس
اليجيلك عقل ما عنــده
الجربه تبوسه من خـده
يعباس .. يعباس

""""""""""""""""""""""""""""""""""""""""""""""""'''""""

النجم شو بالسمه و من بــرز يتدنه
يسولف وي علي طگـ راسه بالجـنه
يبويه الجيــش هــذا تريـــد اوذرنه
بكيفـــك يا علي بــس گول اطمنــه

علي گلاله يوليـــدي .. يعباس
بيد حسين مو بيدي .. يعباس
اعله سيفك كلهه متعوده
الجربه تبوسه من خـــده
يعباس .. يعباس

""""""""""""""""""""""""""""""""""""""""""""""""'''""""

اخوي و ادري بي بالخوه حَقاني
ترسني بخوته و انطيت لخواني
أنه اتلمس بروحي كون حاچاني
يگبعنــي خـــدر عباس غطانــي

خدر من عينه يطلعلي .. يعباس
بخدمتـچ زينب يگلـي .. يعباس
يشيال العلــــم وحـــده
الجربه تبوسه من خده
يعباس .. يعباس

""""""""""""""""""""""""""""""""""""""""""""""""'''""""

(خدر الله) الگمـــر خيمتـــــي مسميها
حتــــى حچايتــــي التطـــلع يغطيهـــا
اباوع مدري شنهــــو الگمـــر جربيهـــا
يجيب الروس زينب يختي اسحگيهـا

روحي عايشه بشمه .. يعباس
اخوي يگـلي يا عمـه .. يعباس
ابچفك جيش و اتبـده
الجربه تبوسه من خده
يعباس .. يعباس

""""""""""""""""""""""""""""""""""""""""""""""""'''""""

يا صدر الخلائــــق يا عمـــد بيتــي
اخــــوي وچافلــــي عباس تربيتــي
يشيلةّ راســـي ها وقماش بوشيتـي
يحيلي و نخوتي وبالگومه عوچيتي

يعگلي بشوفتك طاير .. يعباس
الجيش بطبتك حايــر .. يعباس
يّرخي الجـيش و يشـده
الجــربه تبوسه من خده
يعباس .. يعباس

عبد زينب
محمدالابراهيمي

لحن(راس المخيم)
بصوت
ملا محمد رضا الفاطمي
ناصريه _ قلعة سكر